សង្គម និងសេដ្ឋកិច្ច - La Reine Media

AFF Cup 2022 – លទ្ធផលនៃការប៉ះគ្នា «កាលពីអតីតកាល» ដ៏គួរឱ្យភ្ញាក់ផ្អើលរវាង ថៃ និង ម៉ាឡេស៊ី នៅ Bukit Jalil

ក្រុមជម្រើសជាតិថៃ មិនធ្លាប់បានឈ្នះ ម៉ាឡេស៊ី នៅ Bukit Jalil ហើយក្នុងជ្រុងមួយផ្សេងទៀត សហព័ន្ធបាល់ទាត់ម៉ាឡេស៊ី ឱ្យដឹងថា សំបុត្រចូលទស្សនាការប្រកួតវគ្គពាក់កណ្ដាលផ្ដាច់ព្រ័ត្រនៅ AFF Cup 2022 រវាង ម៉ាឡេស៊ី និង ថៃ ត្រូវបានទិញអស់។

មួយថ្ងៃបន្ទាប់ពីការប្រកួតវគ្គពាក់កណ្ដាលផ្ដាច់ព្រ័ត្ររវាង ឥណ្ឌូណេស៊ី និង វៀតណាម ដែលនឹងធ្វើឡើងនៅក្នុងប្រទេសមានកោះរាប់ម៉ឺន ការប្រកួតពាក់កណ្ដាលផ្ដាច់ព្រ័ត្ររវាង ម៉ាឡេស៊ី និង ថៃ ក៏នឹងធ្វើឡើងនៅ ម៉ាឡេស៊ី។

អ្វីដែលគួរឱ្យភ្ញាក់ផ្អើលនោះគឺថា ក្រុមបាល់ទាត់ជម្រើសជាតិថៃ មិនទាន់ដណ្ដើមបានភាពសប្បាយរីករាយម្ដងណាឡើយនៅលើវាលស្មៅ Bukit Jalil។ ជារួម ថៃ បានចាញ់ 3 ប្រកួត និងស្មើ 2 ប្រកួត នៅក្នុង 5 ប្រកួតដែល ថៃ ធ្វើជាភ្ញៀវនៅកីឡដ្ឋាន Bukit Jalil របស់ ម៉ាឡេស៊ី។

ខាងលើនេះគឺជាស្ថិតិដែលមិនល្អសម្រាប់ ក្រុមជម្រើសជាតិថៃ ហើយវាបង្ហាញថា ម៉ាឡេស៊ី ពិតជាឧបសគ្គធំសម្រាប់អ្នកការពារជើងឯកថៃ។

វីដេអូខាងលើគឺជាការប្រកួតជើងទី 2 នៃវគ្គផ្ដាច់ព្រ័ត្រ AFF Suzuki Cup 2014 ដែល ម៉ាឡេស៊ី ឈ្នះ ថៃ 3-2។

មិនត្រឹមតែមានលទ្ធផលអវិជ្ជមាននៅពេលទាត់នៅ Bukit Jalil នោះទេ ប៉ុន្តែ ថៃ ក៏ត្រូវប្រឈមនឹងសម្ពាធពីទស្សនិកជននៅ ម៉ាឡេស៊ី ផងដែរ នៅពេលធ្វើជាភ្ញៀវនាថ្ងៃទី 07 មករាខាងមុខ។

យោងតាម សហព័ន្ធបាល់ទាត់ម៉ាឡេស៊ី គណៈកម្មការបានដាក់លក់សំបុត្រចំនួន 59,000 សំបុត្រសម្រាប់ការប្រកួតខាងលើ ហើយក្នុងរយៈពេល 2 ថ្ងៃមុនការប្រកួត សំបុត្រទាំងនេះត្រូវបានលក់អស់គ្មានសល់។

កីឡដ្ឋាន Bukit Jalil អាចដាក់មនុស្សបានជាង 87 ពាន់នាក់ ប៉ុន្តែ ម៉ាឡេស៊ី លក់តែ 59,000 សំបុត្រប៉ុណ្ណោះ ព្រោះតែការសង់រោងប្រគំតន្ត្រីមួយនៅក្នុងកីឡដ្ឋាន ប៉ះពាល់ដល់ទស្សនិកជន។

ប្រធានគណៈប្រតិភូបាល់ទាត់ថៃ លោកស្រី Nualphan Lamsam យល់ថា សម្ពាធនៅពេលត្រូវធ្វើជាភ្ញៀវក្នុងកីឡដ្ឋានដែលមានមនុស្សច្រើនគឺពិតជាធំធេង។ «វានឹងជាការប្រកួតដ៏លំបាក» លោកស្រីថ្លែងដូច្នេះ និងបន្ត «ថៃ មិនធ្លាប់បានផ្ដួល ម៉ាឡេស៊ី នៅលើទីលាននេះ។ ដូច្នេះ យើងត្រូវតែត្រៀមឱ្យបានរួចរាល់ទាំងកម្លាំងកាយ ទាំងកម្លាំងស្មារតី»៕

January 6, 2023

ទំហំពាណិជ្ជកម្មកម្ពុជា-តួកគី 11 ខែ នៃឆ្នាំ 2022 កើន 63.6% ធៀបនឹង 11 ខែក្នុងឆ្នាំ 2021

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានអញ្ជើញដឹកនាំកិច្ចប្រជុំអន្តរក្រសួង ស្ដីពី «ការត្រៀមរៀបចំសម្រាប់ កិច្ចប្រជុំលើកទី 3 របស់ គណៈកម្មការសេដ្ឋកិច្ចចម្រុះកម្ពុជា-តួកគី» ដែលគ្រោងនឹងធ្វើឡើងនាពេលខាងមុខ។

ក្នុងអង្គប្រជុំនេះ ក្រុមមន្ត្រីបានពិភាក្សា និងផ្លាស់ប្តូរយោបល់លើសេចក្តីព្រាងកំណត់ហេតុរួម ដែលគ្របដណ្ដប់លើវិស័យអាទិភាពដែលរួមមាន ៖ ពាណិជ្ជកម្ម វិនិយោគ ធុរកិច្ច ឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ ហាឡាល សហគ្រាសធុនតូចនិងមធ្យម កសិកម្ម ដឹកជញ្ជូន អាកាសចរណ៍ស៊ីវិល សុខាភិបាល អប់រំ ទេសចរណ៍ និងវិស័យពាក់ព័ន្ធដទៃទៀត ក្នុងបំណងជំរុញ និងទាញយកអត្ថប្រយោជន៍ឱ្យបានជាអតិបរមាពីកិច្ចសហប្រតិបត្តិការទ្វេភាគីកម្ពុជា-តួកគី។

«កិច្ចប្រជុំលើកទី 3 របស់ គណៈកម្មការសេដ្ឋកិច្ចចម្រុះកម្ពុជា-តួកគី» គ្រោងនឹងធ្វើឡើងនៅថ្ងៃទី 10-11 ខែមករា ឆ្នាំ 2023 នៅ រាជធានីភ្នំពេញ» នេះបើតាម ក្រសួងពាណិជ្ជកម្មកម្ពុជា។

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម

យោងតាម ក្រសួងពាណិជ្ជកម្ម ទំហំពាណិជ្ជកម្មកម្ពុជា-តួកគី សម្រេចបាន 462.63 លានដុល្លារអាមេរិក ក្នុងរយៈពេល 5 ឆ្នាំ (2017-2021) ខណៈដែល 11 ខែដំបូងនៃឆ្នាំ 2022 សម្រេចបានរហូតដល់ 136.149 លានដុល្លារអាមេរិក ពោលគឺកើន 63.6% ធៀបនឹង 11 ខែក្នុងឆ្នាំ 2021។ មុខទំនិញដែល កម្ពុជា នាំចេញទៅកាន់ តួកគី មានដូចជា ៖ សម្លៀកបំពាក់ វាយនភណ្ឌ ស្បែកជើង សម្ភារៈធ្វើដំណើរ អង្ករ ។ល។ ចំណែកការនាំចូលទំនិញពី តួកគី វិញ មានដូចជា ៖ ម៉ាស៊ីន កប្បាស ផលិតផលឱសថ កញ្ចក់ ដែក ផលិតផលប្លាស្ទិក និងទំនិញដទៃទៀត៕

January 6, 2023

ទិន្នន័យរបស់អ្នកប្រើប្រាស់ 235 លាននាក់នៅ Twitter ត្រូវបានហែកឃើរបញ្ចេញជាសាធារណៈ

ក្រុមហែកឃើរ (Hacker) បានឱ្យដឹងថា លួចបានទិន្នន័យនៃគណនី Twitter ជាង 400 លាន និងបានបង្ហោះលើអ៊ីនធើរណិតអស់ពាក់កណ្ដាល។

យោងតាម Cybernews ទិន្នន័យរបស់អ្នកប្រើប្រាស់ចំនួន 235 លាននាក់នៅលើ Twitter ត្រូវបានបង្ហោះលើវេទិកាមួយដែលជំនាញក្នុងការទិញលក់ទិន្នន័យរបស់ហែកឃើរ។ ទិន្នន័យទាំងអស់នេះមានទំហំ 63 GB ដោយមានផ្ទុកឈ្មោះ អ៊ីមេល ចំនួនអ្នកតាមដាន និងថ្ងៃខែបង្កើតគណនីរបស់អ្នកប្រើប្រាស់។

Washington Post រកឃើញថា ទិន្នន័យនេះគឺជាផ្នែកមួយក្នុងចំណោម 400 លានគណនីដែល ហែកឃើរបានប្រកាសកាលពីថ្ងៃទី 23 ធ្នូ 2022 នៅលើវេទិកាទិញលក់ ប៉ុន្តែ ពេលនោះមានគណនីតែ 1,000 ប៉ុណ្ណោះដែលត្រូវបានផ្ដល់សិទ្ធិឱ្យចូលកាន់កាប់សាកល្បង។ នៅពេលបង្ហោះ ក្រុមចោរអ៊ីនធើណិតបានព្រមានថា Elon Musk គួរតែទិញទិន្នន័យទាំងនេះទៅវិញ មិនដូច្នេះទេនឹងត្រូវប្រឈមមុខនឹងការពិន័យពីអាជ្ញាធរ។

យោងតាមសាររបស់ហែកឃើរ Twitter អាចនឹងត្រូវបង់ប្រាក់ពិន័យ 276 លានដុល្លារអាម៉េរិក ទៅឱ្យ GDPR (General Data Protection Regulation គឺជាបទប្បញ្ញត្តិនៅក្នុងច្បាប់សហភាពអឺរ៉ុបស្តីពីការការពារទិន្នន័យ និងភាពឯកជននៅក្នុងសហភាពអឺរ៉ុប និងតំបន់សេដ្ឋកិច្ចអឺរ៉ុប) ដូចទៅនឹងករណី Facebook បើមិនទិញទិន្នន័យទាំងនេះ។

ទិន្នន័យដែលត្រូវបានលួចពី Twitter អាចត្រូវបានក្រុមជនខិលខូចយកទៅលក់ ឬប្រើប្រាស់ក្នុងសកម្មភាពទុច្ចរិត ក្នុងនោះ អ្នកនយោបាយ អ្នកមាន និងបុគ្គលល្បីឈ្មោះជាដើម អាចក្លាយជាជនរងគ្រោះ៕

January 6, 2023

Mbappe ចាញ់ Messi ក្នុងការបោះឆ្នោតរើសកីឡាករឆ្នើមជាងគេប្រចាំឆ្នាំរបស់ IFFHS

កីឡាករបារាំង Kylian Mbappe ត្រូវបាន Lionel Messi យកឈ្នះដាច់យ៉ាងឆ្ងាយនៅក្នុងការបោះឆ្នោតជ្រើសរើសប្រចាំឆ្នាំដែលរៀបចំដោយសហព័ន្ធស្ថិតិ និងប្រវត្តិសាស្ត្របាល់ទាត់អន្តរជាតិ (IFFHS)។

លទ្ធផលនៃការបោះឆ្នោតខាងលើដែលត្រូវបានប្រកាសកាលពីថ្ងៃទី 04 មករា 2023 បង្ហាញថា Messi នាំមុខគេក្នុងការបោះឆ្នោតជ្រើសរើសកីឡាករឆ្នើមជាងគេឆ្នាំ 2022 របស់ IFFHS ដោយទទួលបាន 275 ពិន្ទុ។ ឈរលំដាប់ទីពីរគឺ Kylian Mbappe ទទួលបាន 35 ពិន្ទុ។ ចំណែក Karim Benzema ទទួល 30 ទិន្ទុ ត្រូវជាប់លេខ 3 ខណៈ Luka Modric ជាប់លេខ 4 ដោយទទួលបាន 15 ពិន្ទុ និង Erling Haaland ទទួលបាន 5 ពិន្ទុ ត្រូវជាប់លេខ 5។

Ligue 1 គឺជាតំណែងរួមតែមួយគត់របស់ Mbappe ក្នុងឆ្នាំ 2022។ ក្រុមជម្រើសជាតិបារាំង របស់ Mbappe បានឡើងដល់វគ្គផ្ដាច់ព្រ័ត្រ World Cup 2022 ប៉ុន្តែបានចាញ់ អាហ្សង់ទីន 2-4 ក្នុងការប្រកួតទាត់បាល់ប៉េណាំងទី។ អំពីផ្នែកផ្ទាល់ខ្លួន ខ្សែប្រយុទ្ធវ័យ 23 ឆ្នាំរូបនេះ ដណ្ដើមបានស្បែកជើងមាសនៅ World Cup 2022 ដោយរកបាន 8 គ្រាប់ និងដណ្ដើមបានតំណែងស្ដេចកម្ទេចសំណាញ់ទី Ligue 1 ឆ្នាំ 2021-2022។

ចំណែកកីឡាករឆ្នើមជាងគេលើពិភពលោក Lionel Messi វិញ បានបញ្ចប់ឆ្នាំ 2022 ដោយការដណ្ដើមបានតំណែងចំនួន 3 រួមមាន World Cup, Intercontinental Super-cup និង Ligue 1។ នៅ World Cup 2022 ប្រធានក្រុមជម្រើសជាតិអាហ្សង់ទីនរូបនេះ រកបាន 7 គ្រាប់ និងបង្កឱកាសផ្ទាល់ (Key pass) បាន 3 គ្រាប់។ Messi ដណ្ដើមបានតំណែងផ្ទាល់ខ្លួនចំនួន 2 ថែមទៀតគឺ កីឡាករឆ្នើមជាងគេបង្អស់ និងស្បែកជើងប្រាក់។

នៅក្លឹប PSG Messi ក៏មានឥទ្ធិពលខ្លាំង។ ក្នុងចំណោម 51 ប្រកួតដែលលេងឱ្យក្លឹប និងក្រុមជម្រើសជាតិ ឆ្នាំ 2022 កីឡាករវ័យ 35 ឆ្នាំរូបនេះ រួមចំណែកបាន 35 គ្រាប់ និងបង្កឱកាសផ្ទាល់បាន 30 គ្រាប់។ គិតជាមធ្យម ក្នុងរយៈពេល 69 នាទី Messi រួមចំណែករកបាន 1 គ្រាប់។

នេះគឺជាលើកទី 6 ហើយ ដែល IFFHS ប្រគល់ពានរង្វាន់កីឡាករឆ្នើមបំផុតប្រចាំឆ្នាំ។ ក្នុង 2 លើកដំបូងនៅឆ្នាំ 1988 និង 1989 Marco Van Basten សុទ្ធតែជាប់ចំណាត់ថ្នាក់លេខ 1។ ចំណែកឆ្នាំ 1996 ពានរង្វាន់នេះបានទៅលើ Lothar Matthaus។ ដោយសារសំណើពី FIFA ពានរង្វាន់នេះមិនត្រូវបានប្រគល់រហូតដល់ឆ្នាំ 2020 តែត្រូវទុកតួនាទីនេះឱ្យពានរង្វាន់កីឡាករឆ្នើមបំផុតប្រចាំឆ្នាំរបស់ FIFA។ កីឡាករដែលដណ្ដើមបានពានរង្វាន់នេះក្នុង 2 ឆ្នាំកន្លងទៅ គឺ Robert Lewandowski៕

January 6, 2023

កំពូលតារាបាល់ទាត់ច្រើនរូប ដែលនឹងអាច «ក្លាយជាកីឡាករសេរី» នៅរដូវក្ដៅឆ្នាំ 2023

Lionel Messi, Karim Benzema, Toni Kroos, Luka Modric និង N’Golo Kante ជាដើម គឺជាកីឡាករដែលអាចចរចា និងចុះកិច្ចសន្យាជាមួយក្លឹបផ្សេងពីថ្ងៃទី 01 មករា 2023 មុនពេលអាចក្លាយជាកីឡាករសេរីនៅរដូវក្ដៅឆ្នាំ 2023 នេះ។

Lionel Messi លេងឱ្យក្លឹប PSG តាំងពីរដូវក្ដៅ 2021 ហើយកិច្ចសន្យានៅសល់តែកន្លះឆ្នាំទៀតប៉ុណ្ណោះ។ យោងតាមអ្នកជំនាញផ្នែកទិញដូរកីឡាករ Fabrizio Romano តារាបាល់ទាត់អាហ្សង់ទីន បានយល់ព្រមពន្យារសុពលភាពនៃកិច្ចព្រមព្រៀងជាមួយ PSG ហើយការចុះហត្ថលេខានឹងត្រូវបានសម្រេចបន្ទាប់ពីកិច្ចប្រជុំជាមួយប្រធាន Al Khelaifi និងទីប្រឹក្សា Luis Campos។ Romano បន្ថែមថា ក្លឹប Inter Miami និង Barca ក៏ធ្លាប់ទាក់ទងមកកាន់ Messi ប៉ុន្តែ ត្រូវបាន Messi បដិសេធការចរចា។

Karim Benzema ស្ថិតក្នុងក្រុមកីឡាករដែលបញ្ចប់កិច្ចសន្យាជាមួយ Real Madrid នៅរដូវក្ដៅ 2023។ ប៉ុន្តែ ខ្សែប្រយុទ្ធជនជាតិបារាំងនេះ នៅតែមានតួនាទីសំខាន់នៅទីលាន Bernabeu និងត្រូវបានគេជឿថា នឹងពន្យារកិច្ចសន្យាជាមួយ Los Blancos ថែមមួយរដូវកាលទៀត។

Luka Modric និង Toni Kroos គឺជាកីឡាករផ្សេងទៀតរបស់ Real ដែលនៅសល់កិច្ចសន្យាកន្លះឆ្នាំទៀត។ Modric ទំនងជានឹងទទួលបានការពន្យារកិច្ចសន្យាពី Real ខណៈ Kroos ប្រហែលជាអាចចូលនិវត្តន៍ក្នុងរដូវក្ដៅឆ្នាំនេះ។

N’Golo Kante លែងមានតួនាទីសំខាន់នៅ Chelsea ក្នុងរដូវកាល 2022-2023 ព្រោះតែបានរងរបួសធ្ងន់ ព្រមទាំងមិនបានចូលរួមប្រកួតនៅ World Cup 2022 ទៀតផង។ យោងតាម Foot Mercato ក្លឹបថ្មី Al Nassr ដែលទើបតែបានទិញ Ronaldo កំពុងរៀបការចំចរចាទិញ Kante តាមបែបកីឡាករសេរីនៅរដូវក្ដៅ 2023។

ក្រៅពីកីឡាករមួយចំនួនខាងលើ មានកីឡាករជាច្រើនរូបផ្សេងទៀតក៏នៅសល់កិច្ចសន្យា 6 ខែ រួមមានជាអាទិ៍ កីឡាករ Eric Maxim Choupo-Moting, Ilkay Gundogan (ក្លឹប Man City), Thiago Silva (ក្លឹប Chelsea), Milan Skriniar (ក្លឹប PSG), David de Gea (ក្លឹប Man Utd), Youri Tielemans (ក្លឹប Leicester), Jorginho (Chelsea), Wilfried Zaha (Crystal Palace), Roberto Firmino (Liverpool), Hector Bellerin, Memphis Depay, Sergi Roberto (ក្លឹប Barca) ជាដើម។ល។

January 5, 2023

គម្រោងបង្កើតរោងចក្រកាត់ដេរ និងផលិតកាបូបចំនួន 3 ទៀត ទទួលបានការយល់ព្រមពី ក្រុមប្រឹក្សាអភិវឌ្ឍន៍កម្ពុជា

រោងចក្រផលិតកាបូប សម្លៀកបំពាក់ កម្រាលគ្រែ របស់ក្រុមហ៊ុន WINDARA INTERNATIONAL, YUE WING CHEONG MANUFACTORY និង XIN SHUN JIE (CAMBODIA) LEATHER ត្រូវបាន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា សម្រេចចេញវិញ្ញាបនបត្រចុះបញ្ជីគម្រោងវិនិយោគ។

រោងចក្រទាំងនេះមានដូចខាងក្រោម ៖

ក្រុមហ៊ុន WINDARA INTERNATIONAL CO., LTD ៖ គម្រោងបង្កើតរោងចក្រផលិតកាបូបស្ពាយពីក្រោយ កាបូបដំណេក តង់ កាត់ដេរសម្លៀកបំពាក់ និងកម្រាលក្រាលដេក ដែលមានទីតាំងវិនិយោគស្ថិតនៅអគារ C ភូមិល្វា ឃុំអង្គពពេល ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.4 លានដុល្លារអាម៉េរិក និងអាចបង្កើតការងារបានចំនួន 2,714 កន្លែង។

ក្រុមហ៊ុន YUE WING CHEONG MANUFACTORY CO., LTD ៖ គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិម្កាក់ ឃុំស្នំក្រពើ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.4 លានដុល្លារអាម៉េរិក និងអាចបង្កើតការងារបានចំនួន 738 កន្លែង។

ក្រុមហ៊ុន XIN SHUN JIE (CAMBODIA) LEATHER CO., LTD ៖ គម្រោងបង្កើតរោងចក្រផលិតកាបូបគ្រប់ប្រភេទ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.2 លានដុល្លារអាម៉េរិក និងអាចបង្កើតការងារបានចំនួន 1,133 កន្លែង។

រោងចក្រទាំង 3 ដែលមានទីតាំងនៅ ខេត្តកំពង់ស្ពឺ ខាងលើនេះ គ្រោងនឹងបណ្ដាក់ទុនវិនិយោគសរុប 16 លានដុល្លារអាម៉េរិក និងអាចបង្កើតការងារបានជិត 4,600 កន្លែង៕

January 5, 2023

កូនស្រីរបស់ស្ថាបនិក Huawei ថតភាពយន្តជាមួយនឹងកំពូលតារាសម្ដែង Liu Yifei

ស្រីស្អាត Annabel Yao ដែលជាកូនស្រីរបស់ស្ថាបនិកនៃក្រុមហ៊ុនចិន Huawei លោក Ren Zhengfei សម្ដែងជាតួអង្គរងក្នុងខ្សែភាពយន្តរឿង Windy Place ដែលមានកំពូលតារាសម្ដែង Liu Yifei (Crystal Liu) សម្ដែងជាតួឯក។

នាង Annabel Yao វ័យ 25 ឆ្នាំ សម្ដែងជាតួអង្គម្ចាស់ហាងចាបហួយនៅក្នុងខ្សែភាពយន្តរឿង Windy Place (Meet Yourself) ដែលចាប់បញ្ចាំងតាំងពីថ្ងៃទី 03 មករា 2023។

នៅលើវេទិកាអនឡាញនានា អ្នកគាំទ្រជាច្រើនបានឱ្យដឹងថា ពួកគេភ្ញាក់ផ្អើលនៅពេលកូនស្រីរបស់ស្ថាបនិកនៃក្រុមហ៊ុនខ្នាតយក្ស Huawei សម្ដែងជាតួរង ព្រោះថា កន្លងមកនាងត្រូវបានគេឡង់សេខ្លាំងរាប់ចាប់តាំងពីពេលឈានជើងចូលក្នុងវិស័យកន្សាន្ត។ មុនពេលសម្ដែងក្នុងរឿងខាងលើ Annabel Yao បានសម្ដែងជាតួអង្គឯកក្នុងភាពយន្តខ្នាតខ្លី រឿង The Water Murmurs, 2022។

ខុសពីបណ្ដាគម្រោងថតភាពយន្តមុនៗ លើកនេះ Annabel Yao ទទួលបានការកោតសរសើរច្រើន ដោយសារតែនាងអាចបង្ហាញលក្ខណៈបែបធម្មជាតិ ស្លូតត្រង់ និងបែបអ្នកជនបទពិតៗ។ ក៏ប៉ុន្តែ នៅមានមតិរិះគន់ជាច្រើនផងដែរ ក្នុងនោះមានអ្នកខ្លះថា សម្រស់របស់នាងធម្មតាៗ បើសិនមិនមានខ្នងបង្អែកនៅពីក្រោយទេ នាងពិបាកនឹងបានសម្ដែងជាតួអង្គលេចធ្លោ។

នាង Annabel Yao គឺជាកូនស្រីពៅរបស់លោក Ren Zhengfei ស្ថាបនិករបស់ក្រុមហ៊ុនបច្ចេកវិទ្យាចិន ដូច្នេះ នាងក៏តែងត្រូវបានអ្នកយកព័ត៌មានចិនហៅថា «ព្រះនាងរបស់ Huawei» (Huawei ត្រូវបាន សហរដ្ឋអាម៉េរិក ដាក់ទណ្ឌកម្ម ដោយចោទថា ជាអ្នកបង្កការគំរាមកំហែងដល់សន្តិសុខជាតិប្រទេសនេះ)។ នាងបានចូលប្រលូកក្នុងវិស័យកម្សាន្តតាំងពីដើមឆ្នាំ 2021 ក្រោយពីបានរៀនចប់មហាវិទ្យាល័យវិទ្យាសាស្ត្រកុំព្យូទ័រនៅ Harvard។ Annabel Yao ធ្លាប់បញ្ចេញ MV ចំនួន 2 ប៉ុន្តែ សុទ្ធតែត្រូវបានសហគមន៍អ្នកជំនាញ និងទស្សនិកជនវាយតម្លៃទាប៕

January 5, 2023

ទួរប៊ីនផលិតអគ្គិសនីដោយកម្លាំងខ្យល់ខ្លាំងជាងគេលើពិភពលោក ចាប់ផ្ដើមដំណើរការ

ទួរប៊ីនខ្យល់ V236 កម្លាំង 15 MW របស់ក្រុមហ៊ុន Vestas បានចាប់ផ្ដើមដំណើរការសាកល្បងនៅលើលំហសមុទ្ររបស់ ប្រទេសដាណឺម៉ាក។

គំរូរបស់ទួរប៊ីនផលិតអគ្គិសនីដើរដោយកម្លាំងខ្យល់ Vestas V236 ខាងលើត្រូវបានដំឡើងកាលពីពេលថ្មីៗនេះនៅក្នុងមជ្ឈមណ្ឌលពិសោធន៍ជាតិ Osterild នៅ Jutland ខាងលិច នៃប្រទេសដាណឺម៉ាក និងបានចាប់ផ្ដើមផលិតអគ្គិសនី kWh ដំបូង នេះបើតាម Interesting Engineering ចុះផ្សាយកាលពីម្សិលមិញ។ បច្ចុប្បន្ន នេះគឺជាទួរប៊ីនផលិតអគ្គិសនីដោយកម្លាំងខ្យល់ ខ្លាំងបំផុតលើពិភពលោក។

Vesta V236 មានកម្លាំង 15 MW និងទំហំផ្ទៃក្រឡាដែលកង្ហាររបស់វាវិលគឺជាង 43,740 ម៉ែត្រ។ Vesta V236 ដែលត្រូវបានបង្ហាញកាលពីខែកុម្ភៈ 2021 មាន rotor ដែលមានមុខកាត់ 236 ម៉ែត្រ និងកម្ពស់ 280 ម៉ែត្រ ខណៈដែលស្លាបកង្ហារនីមួយៗមានប្រវែងជាង 115 ម៉ែត្រ។

Vesta V236 មួយគ្រឿងអាចផលិតអគ្គិសនីបាន 80 GWh ជារៀងរាល់ឆ្នាំ គ្រប់គ្រាន់សម្រាប់ការប្រើប្រាស់របស់គ្រួសារ 20,000 គ្រួនៅ អឺរ៉ុប និងអាចកាត់បន្ថយឧស្ម័នកាបូនឌីអុកស៊ីតបាន 38,000 តោន/ឆ្នាំ។

ទួរប៊ីនផលិតអគ្គិសនីដើរដោយកម្លាំងខ្យល់របស់ Vestas នេះ កំពុងស្ថិតក្នុងដំណាក់កាលដំណើរការសាកល្បងបន្ថែម ក្នុងបំណងបញ្ជាក់ទៅលើបច្ចេកវិទ្យាដែលបំពាក់លើវា មុននឹងដាក់ពាក្យស្នើសុំអាជ្ញាបណ្ណដើម្បីផលិតទ្រង់ទ្រាយធំ៕

January 5, 2023

ឡើងតុលាការព្រោះតែលែងត្រីជាង 12 តោនដើម្បីរំដោះគ្រោះ

(ប្រទេសចិន)- ស្ត្រីម្នាក់ត្រូវឡើងតុលាការបន្ទាប់ពីបានលែងត្រីអណ្ដែងជាង 12 តោន ទៅក្នុងទឹកបឹង ទៅតាមជំនឿព្រះពុទ្ធសាសនា ដើម្បីជាការរំដោះគ្រោះ និងបួងសួងសុំសេចក្ដីសុខ។

SCMP កាលពីថ្ងៃទី 04 មករា បានចុះផ្សាយថា រដ្ឋអាជ្ញានៅខេត្ត Jiangsu ប្រទេសចិន អនុវត្តច្បាប់ចំពោះស្ត្រីម្នាក់ដែលមានត្រកូល Xu ព្រោះតែសកម្មភាពលែងត្រីអណ្ដែង 12.5 តោន ចូលក្នុងបឹង ធ្វើឱ្យកម្មករផ្នែកអនាម័យនៅមូលដ្ឋានចំណាយពេលរហូតដល់ 10 ថ្ងៃ នៅក្នុងការស្រង់ ប្រមូលត្រីពីបឹងវិញ។ រឿងក្ដីនេះកំពុងត្រូវបានបើកសវនាការនៅតុលាការក្រុង Changzhou។

រឿងហេតុដែលបានឡើងដល់តុលាការនេះគឺកើតឡើងបន្ទាប់ពី ស្ត្រីម្នាក់ត្រកូល Xu បានចំណាយប្រាក់ប្រហែល 13,000 ដុល្លារអាម៉េរិក ទិញត្រីអណ្ដែង 12.5 តោនពីអ្នកលក់ម្នាក់ដែលមានត្រកូល Liu ហើយយកទៅលែងដោយស្ងាត់ៗនៅក្នុងបឹងមួយក្នុងទីក្រុងកាលពីខែធ្នូ 2021។

ត្រីជាច្រើនដែលត្រូវបានលែងក្នុងបឹងនោះក៏បានងាប់ជាបន្តបន្ទាប់ ធ្វើឱ្យមានការភ្ញាក់ផ្អើល និងការចាប់អារម្មណ៍ពីបុគ្គលិក អាជ្ញាធរក្នុងតំបន់ និងធ្វើឱ្យពួកគេត្រូវចំណាយពេល 10 ថ្ងៃក្នុងការប្រមូលត្រីងាប់ពីក្នុងបឹង។

អ្នកស្រី Xu និងអ្នកលក់ត្រីត្រកូល Liu ត្រូវបានគេប្ដឹងកាលពីខែកញ្ញា 2022 និងត្រូវស្នើឱ្យសងការខាតបង់ជាង 90,000 យុន រួមនឹងប្រាក់ពិន័យមួយចំនួនទៀត។

ការលែងសត្វរំដោះគ្រោះគឺជាទំនៀមទម្លាប់ដែលមានតាំងពីយូរមកហើយ ប៉ុន្តែ បច្ចុប្បន្ន សត្វដែលត្រូវគេយកមកលែង មួយភាគធំគឺជាសត្វដែលត្រូវគេចាប់ពីធម្មជាតិ និងលក់ទៅឱ្យអ្នកមានតម្រូវការលែងក្នុងពិធីរំដោះគ្រោះ ក្នុងនោះក៏មានសត្វដែលអាចបង្កការគំរាមកំហែងដល់បរិស្ថាន និងជីវិតមនុស្ស មានជាអាទិ៍ សត្វក្រពើ ឬពស់វែកជាដើម៕

January 5, 2023

ឥណ្ឌូណេស៊ី មិនធ្លាប់បានចាញ់ក្រោមថ្វីជើងរបស់ វៀតណាម នៅ AFF Cup ចាប់តាំងពីក្រោយឆ្នាំ 1996

លើកចុងក្រោយបង្អស់ដែល ឥណ្ឌូណេស៊ី ត្រូវចាញ់វៀតណាម នៅ AFF Cup គឺនៅឆ្នាំ 1996 ដោយវៀតណាម បានឈ្នះ 3-2 ក្នុងការប្រកួតដណ្ដើមពានរង្វាន់លេខ 3។

នៅក្នុងការប្រកួតចាញ់ វៀតណាម 2-3 នៅ AFF Cup 1996 ដែលកាលណោះនៅប្រើឈ្មោះ Tiger Cup ក្រុមរបស់ ឥណ្ឌូណេស៊ី រកបាន 2 គ្រាប់ ខណៈ វៀតណាម ស៊ុតបញ្ចូលទីរបស់គូប្រកួតបាន 2 គ្រាប់ ចំណែកគ្រាប់ទី 3 ដែល វៀតណាម រកបាន គឺដោយសារកីឡាករឥណ្ឌូណេស៊ី ទាត់ចូលទីខ្លួនឯង។

ក្នុងរយៈពេល 26 ឆ្នាំក្រោយការប្រកួតខាងលើ ឥណ្ឌូណេស៊ី មិនធ្លាប់បានចាញ់វៀតណាមម្ដងណាទៀតឡើយនៅក្នុងការប្រកួតដណ្ដើមពានរង្វាន់ជើងឯកនៃបណ្ដាប្រទេសអាស៊ីអាគ្នេយ៍។ ក្នុងអំឡុងពេលនោះ ឥណ្ឌូណេស៊ី ធ្លាប់បានឈ្នះលើ វៀតណាម 3-2 ក្នុងឆ្នាំ 2000, ស្មើ 2-2 ក្នុងឆ្នាំ 2002, ឈ្នះ 3-0 នៅឆ្នាំ 2004, ស្មើ 1-1 នៅឆ្នាំ 2007, ស្មើ 2-2 នៅឆ្នាំ 2014, ឈ្នះ 2-1 និងស្មើ 2-2 នៅឆ្នាំ 2016 ហើយស្មើ 0-0 ក្នុងឆ្នាំ 2020។

លទ្ធផលខាងលើនេះកំពុងតែជួយឱ្យ ក្រុមជម្រើសជាតិឥណ្ឌូណេស៊ី មានទឹកចិត្តក្នុងការប្រឈមមុខនឹង វៀតណាម នៅជុំដំបូងដែលនឹងធ្វើឡើងនៅល្ងាចថ្ងៃទី 06 មករា 2023។ ជាសរុប ក្នុងប្រវត្តិសាស្ត្រ ឥណ្ឌូណេស៊ី និងវៀតណាម បានប៉ះគ្នាចំនួន 25 ប្រកួត ក្នុងនោះ ឥណ្ឌូណេស៊ី បានឈ្នះ 8 ប្រកួត, ស្មើ 10 ប្រកួត និងចាញ់ 7 ប្រកួត។

យោងតាម Bola ក្រុមបាល់ទាត់ជម្រើសជាតិឥណ្ឌូណេស៊ី មានគូប្រកួតធំចំនួន 3 គឺ ថៃ វៀតណាម និង ម៉ាឡេស៊ី៕

January 5, 2023

Category: សង្គម និងសេដ្ឋកិច្ច