សង្គម និងសេដ្ឋកិច្ច - La Reine Media

AFF Cup 2022 – វៀតណាមបំបែកកំណត់ត្រាជាច្រើន ក្រោយឈ្នះឥណ្ឌូណេស៊ី ក្នុងវគ្គពាក់កណ្ដាលផ្ដាច់ព្រ័ត្រ

កូនសិស្ស និងគ្រូបង្វឹក Park Hang-seo របស់ វៀតណាម ដណ្ដើមបានជ័យជម្នះបន្តបន្ទាប់លើកទី 9 នៅលើទីលានរបស់ខ្លួន ទន្នឹមនឹងការរក្សាទីបានស្អាតរហូតដល់ 6 ប្រកួតនៅ AFF Cup បន្ទាប់ពីបានផ្ដួលឥណ្ឌូណេស៊ី នៅវគ្គពាក់កណ្ដាលផ្ដាច់ព្រ័ត្រកាលពីព្រលប់ថ្ងៃទី 09 មករា 2023 ក្នុងលទ្ធផល 2-0។

នេះគឺជាជ័យជម្នះបន្តបន្ទាប់លើកទី 8 របស់ វៀតណាម នៅលើទីលានរបស់ខ្លួននៅគ្រប់ការប្រកួត រាប់ចាប់ពីក្រោយការប្រកួតចាញ់ Oman 0-1 នៅវគ្គជម្រុះ World Cup 2022 កាលពីថ្ងៃទី 24 មីនា 2022។ ក្នុងជ័យជម្នះខាងលើ វៀតណាម រកបាន 20 គ្រាប់ និងចាញ់ 1 គ្រាប់ពេលប្រកួតជាមួយ Dortmund។

កូនសិស្ស និងគ្រូបង្វឹក Park Hang-seo ក៏បានបំបែកកំណត់ត្រា «ប្រកួតមិនចាញ់» របស់ខ្លួន នៅគ្រប់ការប្រកួត ឡើងដល់ 12 ប្រកួត ក្នុងនោះ វៀតណាម បានឈ្នះ 9 ប្រកួត និងស្មើ 3 ប្រកួត។

(ការប្រកួតរវាង វៀតណាម និង ឥណ្ឌូណេស៊ី នៅជើងទីពីរនៃវគ្គពាក់កណ្ដាលផ្ដាច់ព្រ័ត្ររបស់ AFF Cup 2022 កាលពីព្រលប់ថ្ងៃទី 09 មករា 2023 នៅ ហាណូយ)

ក្រោយការប្រកួតកាលពីព្រលប់ម្សិលមិញ វៀតណាម ក៏បានបំបែកកំណត់ត្រា «26 ឆ្នាំមិនឈ្នះឥណ្ឌូណេស៊ីនៅ AFF Cup រាប់ពីឆ្នាំ 1996» ផងដែរ។ វៀតណាម ក៏បានបំបែកកំណត់ត្រា «រក្សាទីបានស្អាត» របស់ខ្លួន ឡើងដល់ 6 ប្រកួតនៅ AFF Cup 2022 ស្មើនឹងកំណត់ត្រារបស់ ថៃ នៅក្នុងមួយរដូវកាលមុនរបស់ AFF Cup។ ពេលនេះ វៀតណាម នៅមាន 2 ប្រកួតទៀតដើម្បីបំបែកកំណត់ត្រារបស់គូប្រជែង។ គូប្រកួតរបស់ វៀតណាម នៅវគ្គផ្ដាច់ព្រ័ត្រ AFF Cup 2022 គឺ ថៃ ឬ ម៉ាឡេស៊ី៕

January 10, 2023

ភាពយន្តរន្ធត់ «M3GAN» និង «Avatar 2» ជាសញ្ញាវិជ្ជមានសម្រាប់បន្ទប់លក់សំបុត្រ

(សហរដ្ឋអាម៉េរិក)- ភាពយន្តរន្ធត់ «M3GAN» បង្កការចាប់អារម្មណ៍ក្រោយពីរកបានប្រាក់ចំណូល 30.2 លានដុល្លារអាម៉េរិក កាលពីសប្ដាហ៍កន្លង ក្នុងពេលដែលកំពូលខ្សែភាពយន្តរឿង «Avatar 2» បន្តនាំមុខគេនៅបន្ទប់លក់សំបុត្រ។

យោងតាម Variety ភាពយន្តប្រភេទរន្ធត់របស់ Blumbouse រកចំណូលបានច្រើនជាងការរំពឹងទុករបស់ក្រុមអ្នកជំនាញ បន្ទាប់ពីបញ្ចាំងបានជាង 3,500 លើកក្នុងរោងកុននៅអាម៉េរិកខាងជើង។ នៅក្នុងទីផ្សារអន្តរជាតិ M3GAN (ពាក្យកាត់របស់ Model 3 Generative Android) រកចំណូលបន្ថែមបាន 14.8 លានដុល្លារ ជួយឱ្យប្រាក់ចំណូលទូទាំងពិភពលោកឡើងដល់ 45 លានដុល្លារ។

មុននោះ បណ្ដាស្ថាប័នតាមដានការលក់សំបុត្រចូលទស្សនាភាពយន្តបានព្យាករថា M3GAN នឹងរកបានតែពី 17 ទៅ 20 លានដុល្លារប៉ុណ្ណោះនៅ អាម៉េរិកខាងជើង។ ក៏ប៉ុន្តែ ដោយសារមានមតិវិជ្ជមានពីទស្សនិកជន និងពីក្រុមអ្នកវិភាគ M3GAN ក៏ទាក់ទាញអ្នកចូលមើលបានកាន់តែច្រើន។ បញ្ចប់ការលក់សំបុត្រក្នុងសប្ដាហ៍ទីមួយ M3GAN ក៏រកបានប្រាក់ចំណេញទៅហើយ ដោយសារតែការចំណាយលើការផលិតគឺត្រឹមតែប្រហែល 12 លានដុល្លារប៉ុណ្ណោះ។

ខ្សែភាពយន្ត Model 3 Generative Android និយាយអំពីរ៉ូបូត M3GAN ដែលត្រូវបានបង្កើតឡើងដោយវិស្វករ Gemma ដើម្បីជួយមើលថែកូនៗជំនួសអាណាព្យាបាល។ ដើម្បីសាកល្បងបច្ចេកវិទ្យា Gemma ក៏បានឱ្យ M3GAN ធ្វើជាមិត្តជាមួយនឹងក្មួយស្រីអាយុ 8 ឆ្នាំរបស់ខ្លួន។ ក៏ប៉ុន្តែ ការសម្រេចចិត្តនេះបាននាំឱ្យមានបញ្ហាធ្ងន់ធ្ងរកើតឡើង។

ភាពយន្តនេះទទួលបានការសរសើរយ៉ាងច្រើនពីក្រុមអ្នកវិភាគ។ ក៏ប៉ុន្តែ ភាពទាក់ទាញរបស់ M3GAN មិនអស្ចារ្យគ្រប់គ្រាន់ដើម្បីដណ្ដើមបានតំណែងនាំមុខគេនៅបន្ទប់លក់សំបុត្ររបស់ Avatar: The Way of Water ដែលដឹកនាំសម្ដែងដោយ James Cameron នោះទេ។ ដោយរកចំណូលបានជាង 1.7 ពាន់លានដុល្លារ បច្ចុប្បន្នវគ្គពីររបស់ Avatar ឈរលំដាប់ទី 7 ក្នុងចំណោមភាពយន្តដែលមានទស្សនិកជនគាំទ្រច្រើនជាងគេបង្អស់នៅគ្រប់សម័យកាល។

ជោគជ័យរបស់ M3GAN និង Avatar 2 ត្រូវបានវាយតម្លៃថា ជាសញ្ញាវិជ្ជមានសម្រាប់បន្ទប់លក់សំបុត្រនៅអាម៉េរិកខាងជើង នាដើមឆ្នាំនេះ៕

January 9, 2023

AFF Cup 2022 – ឥណ្ឌូណេស៊ីត្រូវការតែលទ្ធផលស្មើ 1-1 ប៉ុណ្ណោះ គឺបានឡើងដល់វគ្គផ្ដាច់ព្រ័ត្រ

ក្រុមបាល់ទាត់ជម្រើសជាតិវៀតណាម ចូលដល់ការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្រជាមួយ ឥណ្ឌូណេស៊ី នៅ AFF Cup 2022 ក្នុងស្ថានភាព «ត្រូវតែឈ្នះ» បើសិនចង់មានមុខនៅវគ្គផ្ដាច់ព្រ័ត្រ។

នៅក្នុងការប្រកួតជើងទីពីរដែលនឹងត្រូវប៉ះជាមួយក្រុមវៀតណាម នៅព្រលប់ថ្ងៃទី 09 មករា 2023 នេះ ឥណ្ឌូណេស៊ី ត្រូវការតែ «លទ្ធផលស្មើដោយមានគ្រាប់បាល់ស៊ុតបញ្ចូលទី» ប៉ុណ្ណោះ គឺនឹងបានឡើងទៅវគ្គផ្ដាច់ព្រ័ត្រ ខណៈដែលវៀតណាម ក៏រំពឹងថា នឹងមានប្រៀបជាង ដោយសារតែបានធ្វើជាម្ចាស់ផ្ទះ។ ដូច្នេះ ការប្រកួតនៅព្រលប់នេះប្រាកដជាគួរឱ្យចាប់អារម្មណ៍។

មុនការប្រកួតនេះមកដល់ មានមតិជាច្រើននិយាយថា វៀតណាម នឹងរកបានមួយគ្រាប់មុនឥណ្ឌូណេស៊ី ព្រោះថាមានតែវិធីវាយលុករកគ្រាប់បាល់បានមុននេះទេ ទើបជួយឱ្យវៀតណាមអាចមានប្រៀបជាងក្នុងការយកឈ្នះលើគូប្រកួត។ នៅពេលត្រូវបាននាំមុខ 0-1 ឥណ្ឌូណេស៊ីប្រាកដជាត្រូវបង្កើនការរុលទៅខាងលើដើម្បីរកគ្រាប់បាល់ស្មើ ធ្វើឱ្យវៀតណាម មានឱកាសវាយបកបន្ថែមទៀត ដែលនេះគឺជាក្បាច់ដែលគេជឿថា នឹងត្រូវបានគ្រូបង្វឹកជនជាតិកូរ៉េខាងត្បូង Park Hang Seo របស់ក្រុមវៀតណាម ប្រើប្រាស់នៅព្រលប់នេះ។

លោក Shin Tae-yong (ឆ្វេង) ជាគ្រូបង្វឹកជនជាតិកូរ៉េខាងត្បូងរបស់ក្រុមឥណ្ឌូណេស៊ី និង Park Hang-seo ជាជនជាតិកូរ៉េខាងត្បូង គ្រូបង្វឹករបស់ក្រុមវៀតណាម

ក្នុងរយៈពេល 16 ឆ្នាំមកនេះ ក្រុមជម្រើសជាតិវៀតណាម ពុំធ្លាប់បានយកឈ្នះលើ ឥណ្ឌូណេស៊ី ម្ដងណាឡើយនៅ AFF Cup។ ប៉ុន្តែ បើសិនជាចង់ឡើងទៅវគ្គផ្ដាច់ព្រ័ត្រ វៀតណាម ត្រូវតែយកឈ្នះលើឥណ្ឌូណេស៊ី ជាដាច់ខាត។ នេះក៏ជាឱកាសចុងក្រោយដែលគ្រូបង្វឹក Park Hang Seo ចង់ដណ្ដើមបានជោគជ័យបំផុត ក្រោយពីបានឆ្លងផុតរបត់នានានៅពេលដណ្ដើមបានមេដាយមាសនៅ SEA Games ដោយយកឈ្នះថៃជាលើកដំបូងក្រោយរយៈពេល 10 ឆ្នាំ នៅក្នុងការប្រកួតផ្លូវការមួយ។

នៅវេលាម៉ោង 19 និង 30 នាទីព្រលប់ថ្ងៃទី 09 មករា 2023 នេះ ឥណ្ឌូណេស៊ី នឹងប្រកួតជាមួយវៀតណាម ក្នុងជើងទីពីរនៃវគ្គពាក់កណ្ដាលផ្ដាច់ព្រ័ត្រ ដែលនឹងធ្វើឡើងនៅលើទឹកដីវៀតណាម។ នេះគឺជាការប្រកួតចុងក្រោយរបស់ក្រុមទាំងពីរ ដើម្បីដណ្ដើមសំបុត្រឡើងទៅវគ្គផ្ដាច់ព្រ័ត្រ AFF Cup 2022៕

January 9, 2023

ASKA A5 គឺជា «ឡានហោះកូនកាត់អគ្គិសនី-សាំង» ដំបូងគេបង្អស់លើពិភពលោក

គំរូដើមពេញលេញដំបូងរបស់យានដែលហោះឡើង និងចុះចតដោយត្រង់ (eVTOL) ដំណើរការដោយអគ្គិសនី ASKA A5 ត្រូវបានក្រុមហ៊ុន NFT, Inc. បង្ហាញនៅក្នុងពិព័រណ៍ CES 2023។

ក្រុមហ៊ុន NFT, Inc. បានអភិវឌ្ឍឡានហោះឡើង និងចុះចតដោយត្រង់ (eVTOL) កូនកាត់ (hybrid) អគ្គិសនី ដំណើរការដូចទៅនឹងយន្តហោះ និងរថយន្តមួយគ្រឿង។ ក្រុមហ៊ុនដែលមានទីស្នាក់ការនៅ California សហរដ្ឋអាម៉េរិក បានសម្ពោធសាលតាំងបង្ហាញឡានហោះដំបូងគេលើពិភពលោក នៅ Los Altos កាលពីខែមេសា 2021 និងបានប្រកាសទទួលការបញ្ជាទិញជាមុននូវឡានហោះដែលមានឈ្មោះថា ASKA A5។

ASKA A5 មានទំហំប៉ុនរថយន្ត SUV និងជាយានយន្តអគ្គិសនី 4 កៅអីដំបូងលើពិភពលោកដែលអាចបើកបរលើផ្លូវគោក និងហោះបានចម្ងាយផ្លូវជាង 400 គីឡូម៉ែត្រ បន្ទាប់ពីបញ្ចូលថាមពលអគ្គិសនីមួយពេញ។

ឡានកូនកាត់យន្តហោះអគ្គិសនីនេះដំណើរការដោយថ្មផ្ទុកអគ្គិសនីលីចូម-អ៊ីយ៉ុង (lithium-ion) និងម៉ាស៊ីនសាំង។ ប្រព័ន្ធថាមពលនេះអនុញ្ញាតឱ្យ ASKA A5 ផ្ដល់ទំនុកចិត្តខ្ពស់ដល់អ្នកបើកបរ ទាក់ទងនឹងប្រភពអគ្គិសនី។

ឡានហោះ ASKA A5 អាចហោះឡើង និងចុះចតដោយត្រង់ដែលប្រើប្រាស់ទីលានចង្អៀតក៏បាន និងអាចហោះឡើង និងចុះចតលើផ្លូវរត់ដូចទៅនឹងយន្តហោះធម្មតាក៏បាន៕

January 9, 2023

ប្រទេសចិនផលិតទួរប៊ីនបង្កើតអគ្គិសនីលើសមុទ្រធំជាងគេលើពិភពលោក

ទួរប៊ីនថ្មីមានកម្លាំង 18 MW ដោយស្លាបកង្ហារវិលក្នុងទំហំផ្ទៃក្រឡាឡើងដល់ 53,000 ម៉ែត្រ ស្មើនឹងទីលានបាល់ទាត់ចំនួន 7 ដែលក្រុមហ៊ុនចិនផលិតឡើង គឺជាទួរប៊ីនសមុទ្រធំជាងគេបង្អស់លើពិភពលោក។

CSSC Haizhuang ដែលជាក្រុមហ៊ុនមួយក្នុងចំណោមក្រុមហ៊ុនការពារជាតិលំដាប់កំពូលទាំង 10 របស់ ប្រទេសចិន បានអភិវឌ្ឍក្បាលអ័ក្សរ៉ូទ័រ និងសម្បករបស់ទួរប៊ីន 18 MW នេះ។ គំរូដើមនៃទួរប៊ីនលើសមុទ្រធំជាងគេលើពិភពលោកនេះ ត្រូវបានប្រកាសនៅក្នុងព្រឹត្តិការណ៍មួយនៅតំបន់ឧស្សាហកម្មទីក្រុង Dongying ខេត្ត Shandong នេះបើតាមក្រុមហ៊ុនមេ សាជីវកម្មសាងសង់កប៉ាល់ចិន (CSSC)។

«ទួរប៊ីន H260 18MW នឹងរួមចំណែកលើកកម្ពស់សមត្ថភាព និងប្រសិទ្ធភាពរបស់ទួរប៊ីន ក៏ដូចជាកាត់បន្ថយការចំណាយលើថ្លៃដើមក្នុងការផលិតអគ្គិសនីរបស់ស្ថានីយផលិតអគ្គិសនីដើរដោយកម្លាំងខ្យល់នៅលើសមុទ្រ» CSSC ឱ្យដឹងដូច្នេះ។

ទួរប៊ីន H260 មានស្លាបកង្ហារ SuperBlade+ 128 ម៉ែត្រ និងមានបំពាក់មុខងារបញ្ជាទៅលើទិសទទួលខ្យល់។ កង្ហារទាំងនេះវិលក្នុងទំហំផ្ទៃក្រឡាឡើងដល់ 53,000 ម៉ែត្រ ប្រហាក់ប្រហែលនឹងទីលានបាល់ទាត់ចំនួន 7 បូកចូលគ្នា។

នៅពេលដំណើរការក្នុងកម្លាំងអតិបរមា ទួរប៊ីន H260 18MW អាចផលិតអគ្គិសនីបាន 44.8 kWh ពេលស្លាបរបស់វាវិលបានមួយជុំ។ ទួរប៊ីននេះមួយគ្រឿង អាចផលិតអគ្គិសនីបានគ្រប់គ្រាន់សម្រាប់ការប្រើប្រាស់របស់ប្រជាជនចំនួន 40,000 គ្រួសារ ជារៀងរាល់ឆ្នាំ។ CSSC Haizhuang ឱ្យដឹងថា ទួរប៊ីននីមួយៗអាចផលិតអគ្គិសនីបាន 74,000 MWh/ឆ្នាំ៕

January 9, 2023

ខ្សែប្រយុទ្ធឥណ្ឌូណេស៊ី ចង់ផ្ដួលវៀតណាមនៅព្រលប់នេះ រួចដណ្ដើមជើងឯក AFF Cup

យោងតាម Sulistyawan ក្រុមកីឡាករបាល់ទាត់ជម្រើសជាតិរបស់ ឥណ្ឌូណេស៊ី កំពុងរំភើបចិត្តខ្លាំងនៅមុនការប្រកួតជាមួយក្រុមរបស់ វៀតណាម នៅជើងទីពីរនៃវគ្គពាក់កណ្ដាលផ្ដាច់ព្រ័ត្ររបស់ AFF Cup 2022 ដែលនឹងធ្វើឡើងនៅព្រលប់នេះ។

ឥណ្ឌូណេស៊ី មានប្រៀបជាងដោយសារសម្រាកយកកម្លាំងបានច្រើនជាងមួយថ្ងៃ និងបានលេងនៅលើទីលាន Bung Karno របស់ខ្លួន អមជាមួយនឹងការលើកទឹកចិត្តពីអ្នកគាំទ្រជិត 50,000 នាក់ ប៉ុន្តែ មិនអាចយកឈ្នះលើ វៀតណាម បាន (0-0) នៅក្នុងការប្រកួតជើងទីមួយនៃវគ្គពាក់កណ្ដាលផ្ដាច់ព្រ័ត្រនៅ AFF Cup 2022 កាលពីថ្ងៃទី 06 មករាកន្លងទៅ។ ឥណ្ឌូណេស៊ី និង វៀតណាម នឹងប៉ះគ្នាជាថ្មីនៅព្រលប់ថ្ងៃទី 09 មករានេះ។

«យើងនឹងធ្វើឱ្យបានល្អជាងមុន នៅក្នុងការប្រកួតជើងទីពីរ។ រង់ចាំមើលចុះ។ កីឡាកររបស់យើងកំពុងរំភើបខ្លាំង និងពេញដោយក្ដីសង្ឃឹមនៅមុនការប្រកួតជើងទីពីរ ជាមួយនឹង វៀតណាម» ខ្សែប្រយុទ្ធរបស់ ឥណ្ឌូណេស៊ី Sulistyawan និយាយដូច្នេះ។

ឥណ្ឌូណេស៊ី ត្រូវបានចាត់ទុកថាជា «ជើងឯកលំដាប់ទីពីរនៅ អាស៊ីអាគ្នេយ៍» ដោយបានឡើងដល់វគ្គផ្ដាច់ព្រ័ត្រ AFF Cup ចំនួន 6 លើក ប៉ុន្តែមិនទាន់បានក្លាយជាជើងឯកម្ដងណាឡើយ។ ដូច្នេះ ឥណ្ឌូណេស៊ី បានវិនិយោគយ៉ាងច្រើនសម្រាប់ពានរង្វាន់លើកនេះ ដោយសង្ឃឹមថា នឹងដណ្ដើមបានពានមាសជាលើកដំបូង។

«គោលដៅរបស់ក្រុមគឺជើងឯក AFF Cup 2022។ ដូច្នេះហើយ យើងត្រូវតែយកឈ្នះលើ វៀតណាម។ យើងបានត្រៀមយ៉ាងម៉ត់ចត់រួចហើយ ដើម្បីលេងក្នុងជើងទីពីរឱ្យបានល្អជាងជើងទីមួយ» Sulistyawan បន្ថែមដូច្នេះ និងបន្តថា «…យើងមកទីនេះដើម្បីជ័យជម្នះ»។

ការប្រកួតជើងទីពីរនៃវគ្គពាក់កណ្ដាលផ្ដាច់រវាង ឥណ្ឌូណេស៊ី និង វៀតណាម នឹងត្រូវធ្វើឡើងក្នុងកីឡដ្ឋាន My Dinh នៅ រដ្ឋធានីហាណូយ ប្រទេសវៀតណាម វេលាម៉ោង 19 និង 30 នាទី ថ្ងៃទី 09 មករា 2023៕

January 9, 2023

ហេតុអ្វីតារាសម្ដែង «Romeo and Juliet» ប្ដឹងទាររាប់រយលានដុល្លារ ព្រោះតែការថតរឿងកាលពីជាង 50 ឆ្នាំមុន?

តារាសម្ដែងពីររូបរបស់រឿង «Romeo and Juliet» បានប្ដឹងទាមទារសំណងជំងឺចិត្តជាង 500 លានដុល្លារអាម៉េរិក ព្រោះតែទិដ្ឋភាព «ក្ដៅសាច់» ក្នុងភាពយន្តដែលពួកគេបានថតកាលពី 55 ឆ្នាំមុន។

នៅអំឡុងពេលថតរឿង Romeo and Juliet របស់អ្នកដឹករឿង Franco Zeffirelli តារាសម្ដែង Olivia Hussey (បច្ចុប្បន្នមានវ័យ 71 ឆ្នាំ) និង Leonard Whiting (72 ឆ្នាំ) មានអាយុទើបតែ 15 និង 16 ឆ្នាំប៉ុណ្ណោះ។ ពេលនេះ ពួកគេបានប្ដឹងក្រុមហ៊ុន Paramount ឡើងតុលាការ Los Angeles ដោយចោទថា បានរំលោភបំពានផ្លូវភេទ បៀតបៀនផ្លូវភេទ និងឆបោក។

ទំព័រ India Express បានបកស្រាយអំពីមូលហេតុដែលនាំឱ្យតារាសម្ដែងទាំងនេះដាក់ពាក្យប្ដឹង ក្រោយការថតភាពយន្ត «Romeo and Juliet» បានកន្លងទៅរាប់សិបឆ្នាំ។

កាលពីឆ្នាំ 2020 រដ្ឋ California បានបន្ថែមពេល 3 ឆ្នាំទៀតដល់ប្រជាជនវ័យលើសពី 40 ឆ្នាំ ដើម្បីអាចដាក់ពាក្យបណ្ដឹងប្រឆាំងនឹងអំពើរំលោភបំពានផ្លូវភេទដែលពួកគេបានរងគ្រោះកាលពីនៅតូច សូម្បីតែហេតុការណ៍ដែលអស់សុពលភាពក្នុងការជំនុំជម្រះ។ ពេលវេលាខាងលើនឹងត្រូវបញ្ចប់នៅថ្ងៃទី 31 ធ្នូ 2022 ហើយពាក្យបណ្ដឹងរបស់ Hussey និង Whiting ត្រូវបានដាក់ឡើងតុលាការមុននោះមួយថ្ងៃ។ បណ្ដឹងនេះស្ថិតក្នុងចំណោមបណ្ដឹងរាប់ពាន់ដែលស្រដៀងករណីរបស់ Hussey និង Whiting។

ភាពយន្តរឿង Romeo and Juliet ទទួលបានជោគជ័យទាំងនៅក្នុងការលក់សំបុត្រ ទាំងបេក្ខភាពពានរង្វាន់ Oscar។ ប៉ុន្តែ ភាពយន្តនេះក៏ធ្វើឱ្យមានភាពចម្រូងចម្រាសផងដែរទាក់ទងនឹងទិដ្ឋភាពលើគ្រែរបស់តួអង្គសំខាន់ ក្នុងនោះមានទាំងទិដ្ឋភាពលេចទាំងគូទរបស់ Whiting និងដើមទ្រូងទាំងមូលរបស់ Hussey។ តារាសម្ដែងទាំងពីរបានឱ្យដឹងថា បានទ្រាំនឹងការឈឺចាប់ផ្លូវចិត្តអស់រយៈពេល 55 ឆ្នាំមកហើយ។ បើទោះជាខ្សែភាពយន្តទទួលបានជោគជ័យ ប៉ុន្តែអាជីពរបស់ Hussey និង Whiting រីកចម្រើនបានតិចតួច។

Solomon Gresen តំណាងរបស់តារាសម្ដែងខាងលើនិយាយថា ការខូចខាតដែល Romeo and Juliet បង្កឡើងទៅលើតារាសម្ដែងនៅតែមិនថយចុះ ពិសេសនៅពេលភាពយន្តត្រូវបានផ្សាយឡើងវិញ។

អ្នកនិពន្ធ Peter Bradshaw របស់ Guardian យល់ថា ពាក្យបណ្ដឹងរបស់ Leonard Whiting និង Olivia Hussey អាចជួយឱ្យចលនា #MeToo លេចឡើងជាថ្មីនៅ Hollywood។ Peter Bradshaw ឱ្យដឹងថា មូលហេតុចម្បងដែលនាំឱ្យកើតមានភាពចម្រូងចម្រាសនេះគឺដោយសារវិធីសាស្ត្រផលិតភាពយន្តកាលពីអតីតកាលអាចត្រូវបានចាត់ទុកថាមិនសមស្របនឹងទិដ្ឋភាពនាបច្ចុប្បន្ន។ Peter Bradshaw លើកអំណះអំណាងថា កេរ្តិ៍ឈ្មោះរបស់ Bernardo Bertolucci បានរងផលអាក្រក់ជារៀងរហូតនៅពេលគាត់សារភាពថា មិនបានប្រាប់អ្នកសម្ដែង Maria Schneider ឱ្យដឹងជាមុនអំពីសកម្មភាពលម្អិតស្ដីពីឈុត «ក្ដៅសាច់» នៅក្នុងការថតភាពយន្តរឿង Last Tango in Paris (1972)។ អ្នកដឹកនាំរឿងជនជាតិអ៊ីតាលី បានសារភាពរឿងនេះបន្ទាប់ពី Schneider បានទទួលមរណភាពកាលពីឆ្នាំ 2011។

ក្រៅពីរឿងរ៉ាវទាំងឡាយខាងលើ ក៏នៅមានហេតុការណ៍ស្រដៀងគ្នានេះជាច្រើនទៀតដែលបានកើតឡើងកាលពីអតីតកាល។ ក៏ប៉ុន្តែ រឿងរ៉ាវខ្លះមិនអាចទម្លាក់កំហុសទាំងស្រុងទៅលើអ្នកដឹកនាំរឿង ឬផលិតករភាពយន្តនោះឡើយ។ ព្រោះថា នៅក្នុងអតីតកាល អ្នកសម្ដែងត្រូវបង្ខំចិត្តថតឈុតស្រើបស្រាលតាំងពីទើបចូលប្រលូកក្នុងវិស័យភាពយន្ត ដើម្បីមានឈ្នាន់សម្រាប់ការអភិវឌ្ឍអាជីពរបស់ពួកគេ។ Kirsten Dunst ធ្លាប់ថើប Brad Pitt នៅពេលថតរឿង Interview With the Vampire កាលពីមានអាយុទើបតែ 11 ឆ្នាំ។ អ្នកស្រីធ្លាប់និយាយថា មិនពេញចិត្តនឹងទិដ្ឋភាពនោះ ប៉ុន្តែមិនបានបញ្ចេញមតិអ្វីបន្ថែមទៀត។

យោងតាម Peter Bradshaw លទ្ធផលនៃការជំនុំជម្រះរឿងក្ដីនៅតុលាការរវាងតារាសម្ដែងរបស់ «Romeo and Juliet» និងក្រុមហ៊ុន Paramount Pictures អាចបង្កើតឱ្យមានរលកនៃការប្ដឹងផ្ដល់ថ្មីនៅ Hollywood ដូចទៅនឹងចលនា #MeToo ដែលបានផ្ទុះឡើងកាលពីប៉ុន្មានឆ្នាំមុន៕

Olivia Hussey (ស្ដាំ) និង Leonard Whiting

Olivia Hussey (ឆ្វេង) និង Leonard Whiting

January 6, 2023

កីឡដ្ឋានបាល់ទាត់ដំបូងគេនៅអាម៉េរិកខាងត្បូង ប្ដូរឈ្មោះទៅជា Pele

កូឡុំប៊ី បានក្លាយជាប្រទេសដំបូងគេនៅអាម៉េរិកខាងត្បូង ដែលបានឆ្លើយតបនឹងការអំពាវនាវរបស់ប្រធាន FIFA លោក Gianni Infantino ស្ដីពីការប្ដូរឈ្មោះកីឡដ្ឋានបាល់ទាត់ដោយដាក់តាមឈ្មោះស្ដេចបាល់ទាត់ Pele។

យោងតាម AFP លោក Juan Guillermo Zuluaga អភិបាលខេត្ត Meta នៅភាគខាងត្បូងប្រទេសកូឡុំប៊ី ប្រកាសនៅលើ Twitter កាលពីថ្ងៃទី 04 មករាថា កីឡដ្ឋាននៅទីក្រុង Villavicencio «នឹងត្រូវបានហៅថា Bello Horizonte Rey Pele»។

កីឡដ្ឋានបាល់ទាត់ខាងលើនេះត្រូវបានសម្ពោធដាក់ឱ្យប្រើប្រាស់កាលពីឆ្នាំ 1958 និងអាចដាក់មនុស្សបាន 15,000 នាក់។ មុននោះ កីឡដ្ឋាននេះមានឈ្មោះថា Bello Horizonte ដែលមានន័យថា «ជើងមេឃស្រស់ស្អាត» នៅក្នុងភាសាអេស្ប៉ាញ។ នេះគឺជាទីលានម្ចាស់ផ្ទះរបស់ក្លឹបបាល់ទាត់ Llaneros នៃពានរង្វាន់លេខពីររបស់ កូឡុំប៊ី។

លោក Pele បានទទួលមរណភាពកាលពីថ្ងៃទី 29 ធ្នូ 2022 ក្នុងវ័យ 82 ឆ្នាំ ដោយសារជំងឺមហារីកពោះវៀន។ សពរបស់ស្ដេចបាល់ទាត់នេះត្រូវបានបញ្ចុះកាលពីថ្ងៃទី 03 មករា 2023 នៅទីក្រុង Santos ប្រទេសប្រេស៊ីល។

ប្រធានសហព័ន្ធបាល់ទាត់ពិភពលោក (FIFA) លោក Gianni Infantino កាលពីថ្ងៃទី 02 មករា បានឱ្យដឹងថា នឹងស្នើឱ្យប្រទេសទាំងអស់ក្នុងពិភពលោក យកឈ្មោះ Pele ដាក់ឱ្យកីឡដ្ឋានបាល់ទាត់របស់ពួកគេ។

កាលពីថ្ងៃទី 04 មករា នាយករដ្ឋមន្ត្រី Jose Ulisses Correia e Silva របស់ កាប់វែរ (Cabo Verde) បានឱ្យដឹងថា ប្រទេសកោះនៅអាហ្វ្រិកខាងលិចនេះនឹងប្ដូរឈ្មោះកីឡដ្ឋានជាតិនៅ Praia ទៅជា កីឡដ្ឋាន Pele។ កីឡដ្ឋាននេះអាចដាក់មនុស្សបាន 15,000 នាក់។

កន្លងមក ទីក្រុង Maceio ភាគឦសានប្រទេសប្រេស៊ីល ក៏មានកីឡដ្ឋានមួយដែលមានឈ្មោះថា Rei Pele ដែលដាក់ឈ្មោះនេះតាំងពីឆ្នាំ 1979 ប៉ុន្តែ ត្រូវបានគេស្គាល់ច្រើនតាមរយៈឈ្មោះ Trapichao។ ពាក្យថា Rei ឬ Rey មានន័យថា ស្ដេច៕

January 6, 2023

និន្នាការទេសចរណ៍ថ្មីដែលនឹង «ផ្ទុះការពេញនិយមបំផុត» នៅឆ្នាំ 2023

ដើរទេសចរណ៍ដើម្បីស្វែងរកភាពស្ងប់ស្ងាត់ក្នុងចិត្ត ចាកផុតពីតំបន់សុវត្ថិភាពរបស់ខ្លួន ឬទេសចរណ៍បណ្ដើរធ្វើការបណ្ដើរ គឺជានិន្នាការទេសចរណ៍ថ្មីដែលមនុស្សជាច្រើនកំពុងជ្រើសរើស។

ខាងក្រោមនេះគឺជានិន្នាការទេសចរណ៍ថ្មីក្នុងឆ្នាំ 2023 ដែលទើបត្រូវបាន Travel + Leisure ប្រកាសកាលពីថ្ងៃទី 04 មករា 2023។ លទ្ធផលនេះគឺបានមកពីការស្ទង់មតិពីទេសចរ អ្នកជំនាញក្នុងវិស័យទេសចរណ៍ និង blogger ផ្នែកទេសចរណ៍ជាង 24,000 នាក់ មកពី 32 ប្រទេសនៅជុំវិញពិភពលោក។

លទ្ធផលនៃការស្ទង់មតិខាងលើបង្ហាញថា មនុស្ស 73% មានអារម្មណ៍ថាជឿជាក់ជាងមុននៅក្នុងការដើរទេសចរណ៍ បើធៀបនឹងឆ្នាំកន្លង។ 88% ចង់ទៅទេសចរណ៍ដើម្បីរម្លឹកអនុស្សាវរីយ៍ចាស់ៗ ខណៈ 61% ចង់ទៅកម្សាន្តនៅឯឧទ្យានបែបប្រពៃណីបុរាណ និង 54% ចង់រៀបគម្រោងលំហែកាយជាមួយគ្រួសារ ឬទៅសួរសុខទុក្ខញាតិមិត្តជិតស្និទ្ធនៅទីឆ្ងាយ។

ឆ្នាំ 2023 មានមនុស្ស 47% ចង់ទៅទេសចរណ៍នៅតំបន់ដែលមានមុខម្ហូបអាហារពិសេស និងចម្លែក។ 44% ក្នុងចំណោមមនុស្សដែលត្រូវបានសួរ ឆ្លើយថា ការទទួលបទពិសោធន៍ផ្នែកសុខភាពផ្លូវចិត្ត ហាត់សមាធិជាដើមនៅពេលទៅលំហែកាយ គឺជារឿងដែលពួកគេចង់បាន។

ពិសេសជាងគឺថា ឆ្នាំនេះទេសចរ 73% មាននិន្នាការចង់ចាកចេញផុតពីតំបន់សុវត្ថិភាពរបស់ខ្លួន។ 38% ចង់ទៅកាន់ទីឋានពិសេស ជាកន្លែងដែលគួរឱ្យចង់រស់នៅ។

មនុស្ស 66% ចង់មានដំណើរទេសចរណ៍បែបលំហែកាយ 100% មិនត្រូវរំខានដោយកិច្ចការនៅក្រុមហ៊ុន។ ចំណែក 59% និយាយថា ការទៅកំសាន្តនៅតំបន់ ទីតាំងទេសចរណ៍ ទីតាំងកំសាន្តថ្មីនឹងជួយឱ្យពួកគេធ្វើការបានល្អជាងមុន ពេលត្រលប់មកវិញ។

ទន្ទឹមនឹងនេះ មាន 55% និយាយថា ចង់ទៅទេសចរណ៍បែបធម្មជាតិ ដោយមិនប្រើអ៊ីនធើណិត ឬទូរស័ព្ទឆ្លាតវៃ។ ចំណែកមនុស្ស 68% ក្នុងចំណោមអ្នកដែលត្រូវបានសួរ និយាយថា ពួកគេត្រៀមខ្លួននឹងកាត់បន្ថយការចំណាយទៅលើការស្នាក់នៅ ដោយគិតតែការទទួលបទពិសោធន៍បែបធូរថ្លៃ ហើយអ្នកខ្លះក៏ថា ចូលចិត្តធ្វើការបណ្ដើរ ដើរទេសចរណ៍បណ្ដើរ៕

January 6, 2023

ចិនចំណាយតិចជាងអឺរ៉ុប 10,000 អឺរ៉ូ ក្នុងការផលិតរថយន្តអគ្គិសនីមួយគ្រឿង

បណ្ដាក្រុមហ៊ុនចិន អាចត្រូវការប្រាក់តិចជាងបណ្ដាក្រុមហ៊ុនអឺរ៉ុប ប្រហែល 10,000 អឺរ៉ូ (10,618 ដុល្លារអាម៉េរិក) ដើម្បីផលិតបានរថយន្តអគ្គិសនីមួយគ្រឿង នេះបើតាម Forvia។

ខាងលើគឺជាការអះអាងរបស់លោក Patrick Koller នាយកប្រតិបត្តិរបស់ Forvia ដែលបាននិយាយកាលពីថ្ងៃទី 04 មករា 2023 នៅឯព្រឹត្តិការណ៍ពិព័រណ៍ CES នៅ Las Vegas (សហរដ្ឋអាម៉េរិក)។ Forvia គឺជាអ្នកផ្គត់ផ្គង់គ្រឿងបន្លាស់ធំជាងគេលំដាប់ទី 7 លើពិភពលោកនៅក្នុងវិស័យផលិតរថយន្ត និងមានដៃគូសហការចំនួន 80 នៅទូទាំងសកលលោក។

លោក Patrick Koller យល់ថា ថ្លៃផលិតរថយន្តអគ្គិសនីរបស់ ប្រទេសចិន គឺជាចំណុចមានប្រៀបដ៏លេចធ្លោ ធៀបនឹងក្រុមហ៊ុននៅ អឺរ៉ុប។ លោកនិយាយថា ប្រទេសចិនកំពុងផលិតរថយន្តល្អៗ ហើយ អឺរ៉ុប នឹងមិនអាចបញ្ឈប់ការនាំចូល។

ឥទ្ធិពលនៃការប្រកួតប្រជែងក្នុងការចំណាយលើការផលិតរបស់ ប្រទេសចិន គំរាមកំហែង អឺរ៉ុប ច្រើនជាង សហរដ្ឋអាម៉េរិក ដោយសារថា ពន្ធមានកម្រិតខ្ពស់បានរឹតបន្តឹងលើចំណែកទីផ្សាររថយន្តរបស់ប្រទេសចិន នៅ សហរដ្ឋអាម៉េរិក នេះបើតាមលោក Patrick។

យោងតាមការស្រាវជ្រាវរបស់ JATO Dynamics តម្លៃជាមធ្យមរបស់រថយន្តអគ្គិសនីមួយគ្រឿងនៅ អឺរ៉ុប បានកើនពី 48,942 អឺរ៉ុប នៅឆ្នាំ 2015 ឡើងដល់ 55,821 អឺរ៉ូ នាបច្ចុប្បន្ន។ និន្ននាការនេះក៏កើតមាននៅទីផ្សារអាម៉េរិក ដោយមានការប្រែប្រួលតម្លៃពី 53,038 ដល់ 63,864 អឺរ៉ូ ក្នុងអំឡុងពេលដូច្នេះ។ ក៏ប៉ុន្តែ តម្លៃរថយន្តអគ្គិសនីនៅ ប្រទេសចិន វិញ គឺផ្ទុយពី អឺរ៉ុប និង សហរដ្ឋអាម៉េរិក ដោយនៅទីផ្សារចិន តម្លៃរថយន្តអគ្គិសនីមួយគ្រឿងត្រូវថយចុះពី 66,819 អឺរ៉ូ មកនៅត្រឹម 31,829 អឺរ៉ូ៕

January 6, 2023

Category: សង្គម និងសេដ្ឋកិច្ច