សង្គម និងសេដ្ឋកិច្ច - La Reine Media

ធនាគារពិភពលោក (WB) ព្យាករថា សេដ្ឋកិច្ចសកលឆ្នាំ 2023 អាចធ្លាក់ទៅក្នុងវិបត្តិ

ក្នុងការព្យាករស្ដីពីសេដ្ឋកិច្ចថ្មីបំផុតកាលពីថ្ងៃទី 10 មករា 2023 ធនាគារពិភពលោក (World Bank – WB) បានទម្លាក់ការព្យាករកំណើនសេដ្ឋកិច្ចរបស់ប្រទេសជាច្រើនចុះមកត្រឹមឱនភាព ដោយសារតែផលប៉ះពាល់ពីកំណើនការប្រាក់ សង្គ្រាមរុស្ស៊ី-អ៊ុយក្រែន និងសេដ្ឋកិច្ចធ្លាក់ចុះនៅក្នុងបណ្ដាប្រទេសធំៗ។

Reuters ដកស្រង់ព័ត៌មានពីធនាគារពិភពលោក ឱ្យដឹងថា កំណើនផលិតផលក្នុងស្រុកសរុប (GDP) នៅទូទាំងសកលលោកគ្រោងនឹងមានអត្រា 1.7% ក្នុងឆ្នាំ 2023 ដែលនេះគឺជាកំណើនយឺតបំផុតរាប់ចាប់ពីឆ្នាំ 1993 លើកលែងតែឆ្នាំ 2009 និង 2020 ដែលមានវិបត្តិធ្ងន់ធ្ងរ។

តួលេខខាងលើត្រូវបានទម្លាក់ចុះទាបធៀបនឹងនៅក្នុងរបាយការណ៍ទស្សនវិស័យសេដ្ឋកិច្ចសកលកាលពីខែមិថុនា 2022 ដែលពេលនោះ WB បានព្យាករថា កំណើន GDP ទូទាំងពិភពលោកនៅឆ្នាំ 2023 ស្ថិតនៅត្រឹម 3.0%។

ក្រៅពីនេះ ការព្យាករអំពីកំណើនសេដ្ឋកិច្ចសកលថ្មីបំផុតសម្រាប់ 2024 ក៏ត្រូវបានទម្លាក់ពី 2.9% ក្នុងរបាយការណ៍ឆ្នាំ 2022 មកនៅត្រឹម 2.7% ក្នុងរបាយការណ៍ចុងក្រោយនាបច្ចុប្បន្ន។ កំណើនមធ្យមក្នុងដំណាក់កាលពីឆ្នាំ 2020 ដល់ 2024 នឹងស្ថិតក្រោម 2% ជារយៈពេលដែលមានកំណើនយឺតជាងគេបង្អស់រាប់ពីឆ្នាំ 1960។

ក្នុងប្រកាសមួយដែលអមនឹងរបាយការណ៍ព្យាករខាងលើ WB បានសង្កត់ធ្ងន់ថា ដោយមានសេដ្ឋកិច្ចផុយស្រួយដូចបច្ចុប្បន្ន រាល់ការប្រែប្រួលអវិជ្ជមានណាមួយក៏អាចរុញច្រានសេដ្ឋកិច្ចសកលឱ្យធ្លាក់ទៅក្នុងវិបត្តិ។ ការប្រែប្រួលអវិជ្ជមាននេះអាចជាអតិផរណាកើនឡើងខ្ពស់ជាងការរំពឹងទុក ការប្រាក់កើនឡើងភ្លាមៗដើម្បីគ្រប់គ្រងអតិផរណា ការផ្ទុះឡើងជាថ្មីនៃជំងឺរាតត្បាតសកលកូវីដ-19 ឬសេដ្ឋកិច្ចធ្លាក់ចុះនៅក្នុងបណ្ដាប្រទេសធំៗ និងភាពតានតឹងក្នុងភូមិសាស្ត្រនយោបាយមានការកើនឡើងជាដើម៕

January 11, 2023

AFF Cup 2022 – គ្រូបង្វឹក Polking ថា «ថៃរងផលអវិជ្ជមានច្រើន» មុនប៉ះវៀតណាមនៅវគ្គផ្ដាច់ព្រ័ត្រ

(ប្រទេសថៃ)- គ្រូបង្វឹកជនជាតិប្រេស៊ីល របស់ក្រុមជម្រើសជាតិថៃ បានឱ្យដឹងថា ថៃរងផលមិនល្អជាច្រើននៅពេលត្រៀមខ្លួនចូលប្រកួតនៅវគ្គផ្ដាច់ព្រ័ត្រដែលត្រូវប៉ះនឹងវៀតណាម។

នៅ AFF Cup 2020 គ្រូបង្វឹក Mano Polking ដឹកនាំក្រុមជម្រើសជាតិថៃ បានយកឈ្នះលើវៀតណាម 2-0 ក្រោយការប្រកួតពីរជើងនៅវគ្គពាក់កណ្ដាលផ្ដាច់ព្រ័ត្រ មុនពេលផ្ដួលឥណ្ឌូណេស៊ី ដើម្បីក្លាយជាជើងឯក។ ក៏ប៉ុន្តែ កាលពីរដូវកាលនោះ ក្រុមទាំងអស់ត្រូវទៅទាត់នៅសិង្ហបុរី។ ចំណែក AFF Cup 2022 ក្រុមទាំងអស់ត្រូវទាត់តាមរូបមន្ត «ធ្វើជាភ្ញៀវ និងម្ចាស់ផ្ទះ»។ ដូច្នេះ គ្រូបង្វឹករបស់ថៃ វាយតម្លៃថា «វៀតណាមមានប្រៀបជាងច្រើនផ្នែក»។

«វៀតណាមបានសម្រាកច្រើនជាងពួកខ្ញុំមួយថ្ងៃ» លោក Polking ថ្លែងដូច្នេះ បន្ទាប់ពីបានផ្ដួលម៉ាឡេស៊ីនៅវគ្គពាក់កណ្ដាលផ្ដាច់ព្រ័ត្រកាលពីថ្ងៃទី 10 មករា និងបន្តថា «…បន្ទាប់មក ពួកគេបានទាត់នៅលើទីលានរបស់ពួកគេនៅជើងទីមួយវគ្គផ្ដាច់ព្រ័ត្រ ដូច្នេះយើងខ្ញុំចាញ់ប្រៀបជាង»។ ក៏ប៉ុន្តែ គ្រូបង្វឹករបស់ថៃអះអាងថា «បើសិនត្រូវជ្រើសរើស ខ្ញុំនៅតែចង់បានស្ថានភាពបច្ចុប្បន្ន»។

គ្រូបង្វឹកជនជាតិប្រេស៊ីល Polking (ឆ្វេង) អបអរជាមួយនឹងប្រធានប្រតិភូក្រុមបាល់ទាត់ជម្រើសជាតិថៃ អ្នកស្រី Nualphan Lamsan បន្ទាប់ពីថៃយកឈ្នះលើម៉ាឡេស៊ី 3-0 នៅជើងទីពីរនៃវគ្គពាក់កណ្ដាលផ្ដាច់ព្រ័ត្រនៅ AFF Cup 2022 កាលពីថ្ងៃទី 10 មករា 2023

ពេលនេះ គោលដៅរបស់ថៃគឺការយកកម្លាំងមកវិញ មុនពេលផ្លាស់ទី និងមានវត្តមាននៅ រដ្ឋធានីហាណូយ នៅព្រលប់ថ្ងៃទី 11 មករា។ ក្រុមនេះនឹងហ្វឹកហាត់សាកល្បងនៅលើទីលាន My Dinh មួយពេលក្នុងថ្ងៃទី 12 មករា មុនពេលចូលប្រកួតជើងទីមួយនៃវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 13 មករា។ 3 ថ្ងៃក្រោយមក ការប្រកួតជើងទីពីរនឹងធ្វើឡើងនៅកីឡដ្ឋាន Thammasat នៅរាជធានីបាងកក។

ថៃ ប្រកួតនឹង វៀតណាម នៅវគ្គពាក់កណ្តាលផ្តាច់ព្រ័ត្រ ជើងទីពីរនៅ AFF Suzuki Cup 2020

ក្នុងការប្រកួត 14 រដូវកាលនៅ AFF Cup ថៃបានឡើងដល់វគ្គផ្ដាច់ព្រ័ត្រចំនួន 10 ដង។ ពួកគេធ្លាប់ដណ្ដើមបានជើងឯក 6 រដូវកាល គឺនៅឆ្នាំ 1996, 2000, 2002, 2014, 2016 និង 2020 ព្រមទាំងដណ្ដើមបានលេខ 2 ចំនួន 3 រដូវកាល គឺនៅឆ្នាំ 2007, 2008 និង 2012។ នេះគឺជាលើកទីពីរហើយដែលថៃត្រូវប្រកួតនឹងវៀតណាមនៅវគ្គផ្ដាច់ព្រ័ត្រ បន្ទាប់ពីលើកដំបូងនៅឆ្នាំ 2008។ កាលណោះ វៀតណាមឈ្នះថៃ 2-1 នៅកីឡដ្ឋាន Rajamangala មុនពេលស្មើ 1-1 នៅកីឡដ្ឋាន My Dinh ដែលជួយឱ្យវៀតណាមបានក្លាយជាជើងឯកលើកដំបូង។ ក្នុង 28 ប្រកួត ថៃនៅតែមានប្រៀបជាងវៀតណាម ក្នុងនោះ ថៃឈ្នះ 16 ប្រកួត, ស្មើ 9 ប្រកួត និងចាញ់ 3 ប្រកួត។

ថៃ ប្រកួតនឹង វៀតណាម នៅវគ្គផ្តាច់ព្រ័ត្រ ជើងទីពីរនៅ AFF Suzuki Cup 2008

នៅវគ្គពាក់កណ្ដាលផ្ដាច់ព្រ័ត្រ AFF Cup 2022 ថៃបានចាញ់ម៉ាឡេស៊ី 0-1 ក្នុងជើងទីមួយ និងឈ្នះ 3-0 នៅជើងទីពីរ មុនពេលបានឡើងទៅវគ្គផ្ដាច់ព្រ័ត្រដែលនឹងត្រូវប៉ះវៀតណាមនៅជើងទីមួយដែលប្រកួតនៅថ្ងៃទី 13 មករា នៅវៀតណា និងជើងទីពីរនៅថ្ងៃទី 16 មករា នៅប្រទេសថៃ៕

January 11, 2023

AFF Cup 2022 – ខ្សែប្រយុទ្ធលេខមួយរបស់ថៃរងរបួស មុននឹងប៉ះវៀតណាមនៅវគ្គផ្ដាច់ព្រ័ត្រ

ក្រុមជម្រើសជាតិថៃ ទទួលដំណឹងមិនល្អនៅពេល Teerasil Dangda រងរបួសនៅក្នុងការប្រកួតជាមួយម៉ាឡេស៊ីនៅជើងទីពីរនៃវគ្គពាក់កណ្ដាលផ្ដាច់ព្រ័ត្ររបស់ AFF Cup 2022 កាលពីព្រលប់ថ្ងៃទី 10 មករា ដែលថៃបានយកឈ្នះ 3-0។

ខ្សែប្រយុទ្ធលេខមួយរបស់ថៃ Teerasil Dangda រងរបួសក្នុងម៉ោងចន្លោះពីរតង់។ យោងតាមសារព័ត៌មានថៃ Thairath ខ្សែប្រយុទ្ធវ័យ 34 ឆ្នាំនេះ រងរបួសត្រង់កំភួនជើង។ គាត់ត្រូវបាននាំទៅមន្ទីរពេទ្យដើម្បីពិនិត្យលំអិតអំពីស្ថានភាពរបួស។

មុនពេលចាកចេញពីទីលាន Teerasil រួមចំណែកបានមួយគ្រាប់ដំបូងដោយការតែតបញ្ចូលទីនៅនាទីទី 19។ ក្នុងតង់ទីពីរ Bordin Phala និង Adisak Kraisorn រកបានពីរគ្រាប់ទៀតនៅនាទីទី 55 និង 71។ ចប់ការប្រកួត ថៃផ្ដួលម៉ាឡេស៊ី 3-0 ក្នុងជើងទីពីរ និងឈ្នះសរុប 3-1 ហើយក៏បានឡើងទៅវគ្គផ្ដាច់ព្រ័ត្រដែលនឹងត្រូវជួបវៀតណាម។

ដំណឹងស្ដីពីខ្សែប្រយុទ្ធលេខមួយរបស់ថៃ Teerasil Dangda រងរបួស គឺជារឿងមិនល្អសម្រាប់ថៃ នៅក្នុងការត្រៀមខ្លួនដើម្បីទៅប្រកួតជាមួយវៀតណាមនៅថ្ងៃទី 13 និង 16 មករាខាងមុខ៕

January 11, 2023

រថយន្តអគ្គិសនី Tesla ត្រូវបានបញ្ចុះតម្លៃខ្លាំង នាំឱ្យអតិថិជនចិនធ្វើបាតុកម្ម

ម្ចាស់រថយន្តអគ្គិសនី Tesla ប្រហែល 200 នាក់ បានប្រមូលផ្ដុំគ្នានៅទីតាំងប្រគល់ទំនិញរបស់ Tesla នៅ សៀងហៃ ប្រទេសចិន ដើម្បីតវ៉ាប្រឆាំងនឹងការសម្រេចបញ្ចុះតម្លៃលើកទីពីរក្នុងរង្វង់មិនដល់ 3 ខែដែល Tesla ទើបតែបានអនុវត្ត។

ក្រោយរដូវកាលបញ្ចុះតម្លៃថ្មីបំផុតដែលត្រូវបាន Tesla អនុវត្តសម្រាប់ទីផ្សារចិន បណ្ដាម៉ូដែលរថយន្តអគ្គិសនីរបស់ក្រុមហ៊ុននេះកំពុងតែត្រូវបានលក់ក្នុងតម្លៃទាបជាងពី 13% ទៅ 24% ធៀបនឹងតម្លៃក្នុងខែកញ្ញា 2022។

ក្រុមអតិថិជនរបស់ Tesla នៅក្នុងទីក្រុងផ្សេងៗមួយចំនួនទៀតរបស់ប្រទេសចិន ក៏មានការតវ៉ាស្រដៀងនៅសៀងហៃ។ ក្នុងនោះ នៅតំបន់ខ្លះក៏មានការបញ្ជូនក្រុមប៉ូលិសទៅរំសាយក្រុមអ្នកតវ៉ានៅខាងក្រៅហាង Tesla ផងដែរ។

អ្នកនាំពាក្យរបស់ Tesla នៅប្រទេសចិន បានប្រាប់ Reuters ថា ក្រុមហ៊ុននេះមិនមានគម្រោងផ្ដល់សំណងចំពោះអតិថិជនដែលបានទទួលរថយន្តមុនពេលការបញ្ចុះតម្លៃត្រូវបានប្រកាសនាពេលថ្មីៗនេះឡើយ សម្រាប់ Model 3 និង Model Y។

សកម្មភាពរបស់ Tesla ត្រូវបានគេមើលឃើញថា គឺដើម្បីជំរុញកំណើននៃការលក់រថយន្តអគ្គិសនីរបស់ក្រុមហ៊ុននេះនៅទីផ្សារចិន។ ប៉ុន្តែ ឥរិយាបថនេះក៏នឹងអាចធ្វើឱ្យក្រុមហ៊ុនផលិតរថយន្តអគ្គិសនីដទៃធ្វើត្រាប់តាមផងដែរ៕

January 10, 2023

AFF Cup 2022 – ថៃប៉ះនឹងម៉ាឡេស៊ីនៅព្រលប់នេះ តើក្រុមណាអាចឡើងទៅជួបវៀតណាម?

ចាញ់ 0-1 នៅលើវាលស្មៅរបស់គូប្រកួត ម្ចាស់ជើងឯកថៃ ត្រូវការកំពូលថ្វីជើងបញ្ចេញកំពូលសមត្ថភាពនៅក្នុងការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្រនៅ AFF Cup 2022 ដែលនឹងប៉ះជាមួយ ម៉ាឡេស៊ី នៅព្រលប់នេះ។

ម៉ាឡេស៊ី បានបង្ហាញថា ខ្លួនគឺជាជើងខ្លាំងនៅពេលបានក្លាយជាក្រុមដំបូងគេដែលបានផ្ដួលថៃនៅ AFF Cup 2022។ គ្រាប់បាល់ឈ្នះតែមួយគ្រាប់គត់របស់ Faisal Halim ជាខ្សែប្រយុទ្ធដែលរកបាន 4 គ្រាប់នៅក្នុងរដូវកាលនេះ បានជួយឱ្យ «ខ្លាមាស» ម៉ាឡេស៊ី មានប្រៀបនៅក្នុងការប្រកួតជើងទីពីរ។ បើសិនជាក្រុមអាជ្ញាកណ្ដាលទទួលស្គាល់គ្រាប់បាល់របស់ Quentin Cheng ទៀតនោះ ម៉ាឡេស៊ី នឹងប្រកួតជាមួយថៃ ដោយមាន 2 គ្រាប់ធ្វើជាដើមទុនបន្ថែម។

មុនពេលចូលប្រកួតនៅ AFF Cup 2022 ម៉ាឡេស៊ី មិនទទួលបានការវាយតម្លៃខ្ពស់ ដោយសារពួកគេទើបតែបានតែងតាំងគ្រូបង្វឹក Kim Pan-gon កាលពីខែមករា។ លោក Pan-gon មិនមានកីឡាករឆ្នើមៗក្នុងដៃនោះទេ។

ក៏ប៉ុន្តែ ពេលនេះ ម៉ាឡេស៊ី មានឱកាសផ្ដួលម្ចាស់ជើងឯកដើម្បីឡើងទៅកាន់វគ្គផ្ដាច់ព្រ័ត្រ។ ការប្រកួតជាមួយថៃ នៅកីឡដ្ឋាន Thammasat នឹងជាឱកាសល្អសម្រាប់ ម៉ាឡេស៊ី ក្នុងការ «បិទមាត់» អ្នកគាំទ្ររបស់ថៃម្ដងទៀត បើសិនពួកគេលេងបានល្អដូចការប្រកួតជើងទីមួយ។

ចំណែកភាគីខាងថៃវិញ ក៏មិនមានកីឡាករល្អបំផុតនៅ AFF Cup 2022 ដោយសារកត្តាជាច្រើន បណ្ដាលឱ្យគោលដៅការពារតំណែងជើងឯក ប្រែជាលំបាកជាងមុនសម្រាប់កូនសិស្ស និងគ្រូបង្វឹក Mano Polking។ ដើម្បីដោះស្រាយបញ្ហានេះ គ្រូបង្វឹកជនជាតិប្រេស៊ីល នឹងប្រើប្រាស់កីឡាករឆ្នើម Theerathon Bunmathan និង Teerasil Dangda របស់ខ្លួនឱ្យអស់ពីលទ្ធភាព។

ក្រុមជម្រើសជាតិថៃ ក៏មានប្រៀបលើ ម៉ាឡេស៊ី ខ្លះដែរ ដោយសារធ្វើជាម្ចាស់ផ្ទះនៅព្រលប់នេះ។ «យើងក៏នឹងមិនការពារ ឬផ្លាស់ប្ដូរយុទ្ធសាស្ត្រ ប៉ុន្តែ ទាត់ដោយម្ចាស់ការជានិច្ច» គ្រូបង្វឹករបស់ថៃ និយាយដូច្នេះ និងបន្ថែមថា ថៃត្រូវតែរក្សាទីឱ្យបានស្អាត ហើយការគ្រប់គ្រងអារម្មណ៍របស់ទស្សនិកជនក៏ជាកត្តាសំខាន់សម្រាប់កីឡាករថៃ។

ដោយឡែក គ្រូបង្វឹកជនជាតិកូរ៉េខាងត្បូង របស់ ក្រុមម៉ាឡេស៊ី លោក Kim Pan-gon ក៏បានកំណត់គោលដៅយកឈ្នះលើថៃឱ្យបាន ដោយមិនគិតដល់លទ្ធផលស្មើគ្នា។ បើសិន ម៉ាឡេស៊ី ធ្វើបានដូច្នេះ នោះនៅក្នុងវគ្គផ្ដាច់ព្រ័ត្រ លោក Kim Pan-gon នឹងត្រូវប៉ះជាមួយគ្រូបង្វឹករបស់ វៀតណាម Park Hang-seo ដែលមកពី កូរ៉េខាងត្បូង ដូចគ្នា៕

January 10, 2023

សម្រាប់សម្ដែងតួអង្គ Wolverine របស់ Deadpool 3 កំពូលតារា Hugh Jackman នឹងហាត់យកសាច់ដុំ 6 ខែ

កំពូលតារាសម្ដែង Hugh Jackman បានឱ្យដឹងថា នឹងចំណាយពេល 6 ខែក្នុងការហាត់លើកដុំដែក ដើម្បីឱ្យមានរូបរាងដូចបំណងសម្រាប់សម្ដែងជាតួអង្គ Wolverine ក្នុងរឿង «Deadpool 3»។

កាលពីថ្ងៃទី 09 មករា Jackman បានឱ្យដឹងនៅលើ Insider ថា «ក្រោយពីសម្ដែងល្ខោនរឿង The Music Man នៅ Broadway ខ្ញុំនឹងនៅតែផ្ទះ និងយកចិត្តទុកដាក់ជាអតិបរមាក្នុងការហាត់ប្រាណ 6 ខែខាងមុខ»។

កំពូលតារាសម្ដែងជនជាតិអូស្ត្រាលី បច្ចុប្បន្នបានបញ្ចប់ដំណើរសម្ដែងនៅមហោស្រព Broadway ដែលគ្រោងនឹងបញ្ចប់ជាស្ថាពរនៅថ្ងៃទី 15 មករា។ ល្ខោនរឿង The Music Man របស់ Hugh Jackman ទទួលបានការគាំទ្រច្រើន។

Hugh Jackman កើតឆ្នាំ 1968 នៅ អូស្ត្រាលី និងមានឈ្មោះល្បីខ្លាំងបន្ទាប់ពីបានសម្ដែងជាតួអង្គមនុស្សចចកក្នុងខ្សែភាពយន្ត X-Men រួមនឹងរឿង The Prestige, The Fountain និង Les Miserables។ គាត់ក៏ទទួលបានជោគជ័យនៅលើឆាកសម្ដែង Broadway និងអាជីពច្រៀងរាំរបស់គាត់។

តួអង្គ Logan/Wolverine បានជួយឱ្យ Hugh Jackman ល្បីឈ្មោះនៅ Hollywood។ ឆ្នាំ 2020 Deadpool និងបណ្ដាតួអង្គ X-Men បានចូលរួមជាផ្លូវការក្នុងពិភពភាពយន្ត Marvel (MCU) បន្ទាប់ពី Disney បានទិញ 20th Century Fox។

Shawn Levy ជាអ្នកដឹកនាំសម្ដែងរឿង Deadpool 3 ចំណែក Rhett Reese និង Paul Wernick ដែលជាអ្នកនិពន្ធរបស់វគ្គដំបូងៗរបស់ Deadpool ក៏នៅតែបន្តសរសេរវគ្គ 3។ Reese ធ្លាប់បានប្រកាសថា Deadpool 3 នឹងត្រូវបានចាត់ក្នុងចំណាត់ក្នុងប្រភេទ R (មិនសម្រាប់ទស្សនិកជនវ័យក្រោម 17 ឆ្នាំ បើសិនមិនមានអាណាព្យាបាល ឬមនុស្សធំអមដំណើរ)៕

January 10, 2023

មូលហេតុដែលឥណ្ឌូណេស៊ីចាញ់វៀតណាម 2-0 នៅ AFF Cup 2022 កាលពីម្សិលមិញ

យោងតាម CNN Indonesia ក្រុមបាល់ទាត់ជម្រើសជាតិរបស់គ្រូបង្វឹក Shin Tae-yong បានជួបប្រទះបញ្ហាធំៗចំនួន 3 ដែលនាំឱ្យពួកគេត្រូវចាញ់ 0-2 ក្នុងការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្ររបស់ AFF Cup 2022។

«ដំបូង ក្រុមត្រូវគេនាំមុខឆាប់ពេក (នៅនាទីទី 3) បណ្ដាលឱ្យផែនការដំបូងនានារបស់គ្រូបង្វឹក Shin ត្រូវដួលរលំ» សារព័ត៌មានឥណ្ឌូណេស៊ី បកស្រាយដូច្នេះ ទាក់ទិននឹងការបរាជ័យរបស់ក្រុមជម្រើសជាតិឥណ្ឌូណេស៊ី កាលពីព្រលប់ថ្ងៃទី 09 មករា។

ក្រោយត្រូវគេនាំមុខនោះ CNN Indonesia បន្ថែមថា ឥណ្ឌូណេស៊ី ក៏មានបញ្ហាប្រកែកគ្នាជាច្រើនលើកជាមួយនឹងក្រុមវៀតណាម។ ភាពច្របូកច្របល់ចាប់ផ្ដើមកើតឡើងពីករណីប៉ះទង្គិចគ្នារវាងខ្សែប្រយុទ្ធ Dendy Sulistyawan ជាមួយនឹងខ្សែបម្រើ Que Ngoc Hai នៅនាទីទី 22 ដោយកីឡាករឥណ្ឌូណេស៊ី ជឿថា ខាងវៀតណាមលេងខូច។ ក្រោយនាទីខាងលើ ភាគីទាំងពីរទទួលបានកាតលឿងជាបន្តបន្ទាប់ ដោយសារការប៉ះទង្គិចគ្នា។

ចូលដល់តង់ទីពីរ បញ្ហានៅតង់ដំបូងក៏កើតឡើងជាថ្មីនៅពេលសំណាញ់ទីរបស់ ឥណ្ឌូណេស៊ី ត្រូវប៉ើងម្ដងទៀតនៅនាទីទី 47។ CNN Indonesia អះអាងថា «ពួកគេពិតជាត្រូវអូសទាញទៅក្នុងការឈ្លោះប្រកែកគ្នាជាមួយវៀតណាម»។

យោងតាមសារព័ត៌មានឥណ្ឌូណេស៊ី បញ្ហាចុងក្រោយដែលនាំឱ្យក្រុមឥណ្ឌូណេស៊ី ចាញ់វៀតណាម នោះគឺភាពខ្សោយនៅខ្សែប្រយុទ្ធ ព្រោះថា កូនសិស្សរបស់លោក Shin មិនអាចបង្កការគំរាមកំហែងណាមួយដល់ទីរបស់ក្រុមម្ចាស់ផ្ទះ។

ដោយសារតែបញ្ហាទាំងនេះ ឥណ្ឌូណេស៊ី បានបរាជ័យនៅលើទីលាន My Dinh របស់ វៀតណាម ព្រោះពួកគេមិនអាចលេងបានល្អដូចការប្រកួតជើងទីមួយកាលពី 3 ថ្ងៃមុននៅកីឡដ្ឋាន Gelora Bung Karno។ ដូច្នេះ ជាថ្មីម្ដងទៀត ឥណ្ឌូណេស៊ី បានបាត់បង់ឱកាសចាប់យកតំណែងជើងឯក AFF Cup៕

January 10, 2023

ក្រសួងសាធារណការ នឹងបើកព្រឹត្តិការណ៍ «TSI OPEN DAY» សម្រាប់សាធារណជននៅសប្ដាហ៍នេះ

នៅព្រឹកថ្ងៃទី 10 មករានេះ ក្រសួងសាធារណការ និងដឹកជញ្ជូន បានឱ្យដឹងថា «TSI OPEN DAY» ដែលជាព្រឹត្តិការណ៍បញ្ជ្រាបព័ត៌មានជាច្រើន ទាក់ទងនឹងអាហារូបករណ៍សម្រាប់និស្សិតជាដើម នឹងត្រូវបើកទទួលសាធារណជននៅថ្ងៃចុងសប្ដាហ៍នេះ។

យោងតាម ក្រសួងសាធារណការ និងដឹកជញ្ជូន សាធារណជន មាតាបិតា អាណាព្យាបាល សិស្ស-និស្សិត ដែលមានបំណងស្វែងរកគ្រឹះស្ថានឧត្តមសិក្សាសម្រាប់បន្តការសិក្សា អាចអញ្ជើញចូលរួមដោយសេរីក្នុងព្រឹត្តិការណ៍ «TSI OPEN DAY» របស់ វិទ្យាស្ថានតេជោសែន សាធារណការ និងដឹកជញ្ជូន។

សាធារណជនដែលបានចូលរួមព្រឹត្តិការណ៍នេះ នឹងទទួលបាននូវការតម្រង់ទិសជំនាញ ការចែករំលែកបទពិសោធន៍ពីនិស្សិត ទស្សនកិច្ចអគារសិក្សា បរិក្ខាបច្ចេកទេស ព័ត៌មានអាហារូបករណ៍ ការដាក់ពាក្យប្រឡងជ្រើសរើសនិស្សិតជំនាន់ទី 3 និងការសិក្សាស្វែងយល់ពីឱកាសការងារទៅតាមជំនាញនីមួយៗ នៃវិស័យសាធារណការ និងដឹកជញ្ជូន។

ព្រឹត្តិការណ៍ «TSI OPEN DAY» នឹងប្រព្រឹត្តទៅនៅថ្ងៃទី 14 ខែមករា ឆ្នាំ 2023 នៅវិទ្យាស្ថានតេជោសែន សាធារណការ និងដឹកជញ្ជូន។

January 10, 2023

មេធាវីរ៉ូបូតដំបូងគេលើពិភពលោក ជិតបានឡើងការពារក្ដីឱ្យមនុស្សនៅតុលាការ

(សហរដ្ឋអាម៉េរិក)- រ៉ូបូតបំបាក់បច្ចេកវិទ្យាបញ្ញាសប្បនិម្មិត (AI) ដែលអភិវឌ្ឍដោយក្រុមហ៊ុន DoNotPay នឹងជួយការពារកូនក្ដីរបស់ខ្លួន ប្រឆាំងនឹងការផាកពិន័យចរាចរណ៍នៅតុលាការក្នុងខែកុម្ភៈ 2023។

មេធាវីរ៉ូបូត AI មួយ ជិតបង្កើតបានប្រវត្តិសាស្ត្រនៅពេលក្លាយជារ៉ូបូតដំបូងគេដែលការពារកូនក្ដីជាមនុស្សនៅក្នុងសវនាការ នេះបើតាម IFL Science ចុះផ្សាយកាលពីថ្ងៃទី 09 មករា។ មេធាវីរ៉ូបូតនេះនឹងជួយរម្លឹកជនជាប់ចោទ លើកឡើងនូវអំណះអំណាងល្អបំផុត ដើម្បីប្រឆាំងនឹងការផាកពិន័យលើករណីបើកបររថយន្តហួសល្បឿនកំណត់ នៅក្នុងសវនាការមួយដែលនឹងត្រូវបានធ្វើឡើងនៅខែខាងមុខ។

មេធាវីរ៉ូបូតបំពាក់បញ្ញាសិប្បនិម្មិតរបស់ក្រុមហ៊ុន DoNotPay នេះ ត្រូវបានអភិវឌ្ឍក្នុងទម្រង់ Chatbot ជាកម្មវិធីកុំព្យូទ័រដែលអាចជជែកតទល់នឹងគ្នាបាន។ វាត្រូវបានដំឡើងនៅលើទូរស័ព្ទដៃ ហើយលើកឡើងនូវការក្រើនរម្លឹកល្អៗសម្រាប់ជនជាប់ចោទ តាមរយៈកាស។ កូនក្ដី (ជនជាប់ចោទ) បានយល់ព្រមនិយាយតែអ្វីដែល AI បានស្នើ។

ករណីការពារក្ដីខាងលើនេះដើរតួនាទីដូចទៅនឹងការពិសោធមួយសម្រាប់សេវាកម្មរបស់ DoNotPay ហើយក្រុមហ៊ុននេះនឹងចេញថ្លៃពិន័យទាំងអស់ បើសិនមេធាវី AI របស់ពួកគេនេះ មិនអាចជួយឱ្យជនជាប់ចោទឈ្នះក្ដី។

សូមបញ្ជាក់ថា ដើមឡើយ DoNotPay ដែលត្រូវបានបង្កើតឡើងកាលពីឆ្នាំ 2015 គឺជាក្រុមហ៊ុនដែលផ្ដោតលើបច្ចេកវិទ្យា Chatbot ជួយឱ្យអតិថិជនរួចផុតពីបញ្ហាត្រូវបង់ប្រាក់ពិន័យ និងការចំណាយលើការទូទាត់យឺតពេលជាដើម។ល។ ប៉ុន្តែក្រុមហ៊ុននេះបានចាប់ផ្ដើមផ្ដោតលើ AI ជាងមុន ចាប់ពីឆ្នាំ 2020៕

January 10, 2023

ទីក្រុងរបស់ប្រទេសជប៉ុន គ្រោងផលិតអគ្គិសនីពីព្រឹលដែលសល់

នៅឯទីក្រុង Aomori នៅភាគឦសានប្រទេសជប៉ុន អាជ្ញាធរកំពុងរៀបផែនការផលិតអគ្គិសនីពីព្រឹលដែលសល់ ដើម្បីធានាលើប្រភពផ្គត់ផ្គង់ថាមពលកកើតឡើងវិញ និងជួយកាត់បន្ថយបញ្ហាដាច់ភ្លើង។

គម្រោងដែលជាកិច្ចសហការរវាងក្រុមហ៊ុនបច្ចេកវិទ្យា Forte Co និងសាកលវិទ្យាល័យទូរគមនាគមន៍តូក្យូត (UEC) រួមមាន ការប្រើប្រាស់ភាពខុសគ្នានៃសីតុណ្ហភាពរវាងព្រឹលដែលគេរក្សាទុក និងបរិយាកាសជុំវិញ ដើម្បីផ្ដល់ថាមពលឱ្យទួរប៊ីន។ ថាមពលនេះត្រូវបានបង្កើតឡើងនៅពេលសីតុណ្ហភាពក្នុងបរិយាកាសធ្វើឱ្យហួតធាតុរាវដែលត្រជាក់ដោយសារព្រឹល។

ការផលិតអគ្គិសនីពីព្រឹលដែលគេរក្សាទុកនឹងផ្គត់ផ្គង់ប្រភពថាមពលដែលមានប្រយោជន៍ផ្នែកបរិស្ថាន សុវត្ថិភាព ហើយការចំណាយក៏ទាប នេះបើតាម Tech Times ចុះផ្សាយកាលពីថ្ងៃទី 08 មករា 2023។

ទីក្រុង Aomori របស់ ជប៉ុន មានព្រឹលធ្លាក់ច្រើនជារៀងរាល់ឆ្នាំ។ ការចំណាយលើការសម្អាតព្រឹលក្នុងឆ្នាំ 2021 បានឡើងដល់ 55 លានដុល្លារអាម៉េរិក។ ជំនួសឱ្យការយកព្រឹលដែលសល់នេះទៅចាក់ចោល អាជ្ញាធរក្រុង និងដៃគូសហការ បានសម្រេចចិត្តរៀបចំគម្រោងផលិតអគ្គិសនីខាងលើ។

បើសិនជាទទួលបានជោគជ័យ ប្រភពថាមពលកកើតឡើងវិញដ៏ពិសេសនេះ មិនត្រឹមតែផ្គត់ផ្គង់ប្រភេទអគ្គិសនីថ្មីសម្រាប់ទីក្រុង Aomori នោះទេ ប៉ុន្តែក៏អាចបង្កើតបានឧស្សាហកម្មថ្មីសន្លាងនៅក្នុងតំបន់ទៀតផង៕

January 10, 2023

Category: សង្គម និងសេដ្ឋកិច្ច