នៅថ្ងៃទី25 ខែកញ្ញា ឆ្នាំ2017 បើតាមប្រភពពីសារព័ត៌មាន Kenh14 បានឱ្យដឹងថា តារាសម្ដែងស្រី Yoona បានបង្ហាញវត្តមានក្នុងការចូលរួមកម្មវិធីបង្ហាញម៉ូដសម្លៀកបំពាក់ប្រ៊េនដ៍ល្បីម៉ាក Dress Garden នៅក្នុងបរិវេណអគារ Cheong damdong នៃទីក្រុងសេអ៊ូល ។
ក្នុងនាមជាអ្នកតំណាងសម្លៀកបំពាក់ប្រ៊េនដ៍ល្បីមួយនេះ តារាស្រីរូបនេះបានបង្ហាញម៉ូដសក់ខ្លីដ៏ស្រស់ស្អាតឱ្យសាធារណជនបានឃើញ និងបានទទួលការកោតសរសើរមិនដាច់ពីមាត់ពីអ្នកទស្សនាពីសម្រស់ដែលមើលទៅឃើញក្មេងជាងវ័យរបស់នាងទៀតផង។
ដើម្បីឱ្យកាន់តែឃើញច្បាស់ សូមទស្សនារូបភាពទាំងឡាយខាងក្រោម៖
កាលពីថ្ងៃចន្ទ លោក Pep Guardiola បានធ្វើការព្រមានដល់ក្រុមឡើងទម្រង់លេង Manchester City របស់លោកថា ពួកគេមិនត្រូវមើលស្រាលគូប្រកួតឡើយ មិនអ៊ីចឹងទេ អាចប្រឈមមុខនឹងការខកចិត្តម្តងទៀតនៅរដូវកាលនេះ។
Man City កំពុងតែនាំមុខនៅលើកំពូលតារាងនៃក្របខ័ណ្ឌ Premier League ក្រោយពីបានកត់ត្រាជ័យជម្នះ5លើក និងស្មើ1លើក ពីការប្រកួតបើកឆាកទាំង6លើករបស់ពួកគេ ស្របពេលដែលពួកគេក៏ដណ្តើមបានជ័យជម្នះក្នុងលទ្ធផល 4-០ លើក្រុម Feyenoord ក្នុងក្របខ័ណ្ឌ Champions League និងផ្តួលក្រុម West Brom 2-1 ក្នុងការប្រកួតពាន League Cup ផងដែរ។
ប៉ុន្តែ ទោះបីជាយ៉ាងណា លោក Guardiola ដែលក្រុមរបស់លោកនឹងត្រូវធ្វើជាម្ចាស់ផ្ទះទទួលក្រុម Shakhtar Donetsk នាកីឡដ្ឋាន Etihad ក្នុងនាត្រីនេះ ក៏កំពុងតែព្រួយបារម្ភខ្លាំងដែរ ក្រោយពីបានឃើញក្រុម Man City បញ្ចប់ដោយការមិនបានឈ្នះពានអ្វីសោះកាលពីរដូវកាលមុន បើទោះបីដណ្តើមបានជ័យជម្នះ10លើកជាប់ៗគ្នាក្នុងរាល់យុទ្ធនាការទាំងអស់ក៏ដោយ។
Man City បានជួបរដូវកាលដ៏ខកចិត្តមួយដូចគ្នានេះរួចស្រេចហើយក្នុងរដូវកាលមួយមុននេះ ក្រោមការដឹកនាំរបស់លោក Manuel Pellegrini ក្រោយពីពួកគេដណ្តើមបានជ័យជម្នះ5លើកដំបូងនៃក្របខ័ណ្ឌ Premier League ប៉ុន្តែ បានបញ្ចប់យុទ្ធនាការនៅរដូវកាលនោះតាមរយៈការឈរក្នុងចំណាត់ថ្នាក់លេខ4។
Man City កំពុងតែស្ថិតក្នុងទម្រង់លេងយ៉ាងល្អឥតខ្ចោះនាពេលថ្មីៗនេះ តាមរយៈការរកគ្រាប់បាល់បញ្ចូលទីសរុបដល់ទៅ16គ្រាប់ក្នុងការប្រកួតលីក3លើកចុងក្រោយរបស់ពួកគេ ខណៈដែលពួកគេបានយកឈ្នះលើក្រុម Liverpool និង Crystal Palace ក្នុងលទ្ធផល 5-០ ដូចគ្នា បន្ទាប់ពីយកឈ្នះលើក្រុម Watford 6-០រួចមក។ ប៉ុន្តែ លោក Guardiola បានបញ្ជាក់ថា វាឆាប់ពេកហើយក្នុងការជឿជាក់លើភាពខ្លាំងនៃក្រុមរបស់លោកនោះ។
គ្រូបង្វឹករូបនេះបានប្រាប់អ្នកយកព័ត៌មានក្នុងសន្និសីទសារព័ត៌មាននៅមុនពេលប្រកួតថា៖ «វាជារឿងដ៏ល្អប្រសើរបំផុតក្នុងការស្ថិតក្នុងទីតាំងដែលយើងកំពុងតែស្ថិតនៅនេះ ប៉ុន្តែវាត្រឹមតែខែកញ្ញាប៉ុណ្ណោះ។ នៅសល់ពេលវេលាជាច្រើន និងការប្រកួតជាច្រើនទៀតដែលយើងត្រូវលេង»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕
ប្រភពពី៖ Sport24
រថយន្តប្រភេទ SUV ខ្នាតតូច ម៉ូដែល C-HR របស់ក្រុមហ៊ុន Toyota Motor ដែលល្បីលក់ដាច់បំផុតនៅលើទីផ្សារប្រទេសជប៉ុននោះ ពេលនេះបានមានវត្តមាននៅក្នុងទីផ្សារកម្ពុជាយើងហើយ កាលពីពេលថ្មីៗនេះ។ នេះបើតាមការឱ្យដឹងពីឃ្លាំងលក់រថយន្តមួយក្នុងរាជធានីភ្នំពេញ។
រយៈពេល 4 ខែក្រោយពីចេញលក់រថយន្ត Toyota C-HR រួចមក ស្ថាប័នឧស្សាហកម្មរថយន្តនៃប្រទេសជប៉ុនបានចេញផ្សាយថា រថយន្តនេះត្រូវបានគេបញ្ជាទិញរហូតដល់ទៅ 13,168 គ្រឿង ដោយ C-HR នេះមាន 2ប្រភេទគឺ 2-Wheel Drive ម៉ាស៊ីន Hybrid មានតម្លៃប្រមាណ 2,646,000 យេន (ឬប្រហែល 23,100 ដុល្លារ) និង 4-Wheel Drive ម៉ាស៊ីនធម្មតាតម្លៃ 2,516,400 យេន (ឬប្រហែល 22,000 ដុល្លារ)។
ចំពោះរថយន្តដែលមានលក់នៅក្នុងស្រុកខ្មែរយើងនេះ គឺជាប្រភេទម៉ាស៊ីនសាំងធម្មតា ជាមួយនឹងទំហំស៊ីឡាំង4 ចំណុះ1.2 L អាចរត់បានល្បឿន189 គីឡូម៉ែត្រ/ម៉ោង និងមានសម្ទុះពី0 ទៅ100គីឡូម៉ែត្រ/ម៉ោង ប្រើពេល10,9 វិនាទី និងស៊ីសាំង 5 លីត្រក្នុងចម្ងាយផ្លូវ100 គីឡូម៉ែត្រ។
រថយន្តដ៏ប្រណីតនេះមិនទាន់មានដាក់លក់ទូលំទូលាយលើពិភពលោកនៅឡើយទេ ប៉ុន្តែក្រុមហ៊ុនរថយន្តជប៉ុនមួយនេះគ្រោងនឹងចែកចាយC-HR ទៅកាន់ទីផ្សារ100 ប្រទេសដើម្បីបំពេញតាមតម្រូវការ។
ទើបតែចេញលក់បានប្រមាណជា4ខែមែន ប៉ុន្តែC-HR ជារថយន្តដែលលក់ដាច់បំផុតរបស់ក្រុមហ៊ុន Toyota សម្រាប់ទីផ្សារប្រទេសជប៉ុន ដោយលក់ចេញបានសរុប13,168គ្រឿង៕
ស្ថិតក្នុងនាមជាកីឡាករមានតម្លៃខ្លួនខ្ពស់ជាងគេបំផុតក្នុងប្រវត្តិសាស្ត្រនៃកីឡាបាល់ទាត់ តារាឆ្នើមអន្តរជាតិប្រេស៊ីល Neymar ដេញតាមតែពីក្រោយខ្សែប្រយុទ្ធ Carlos Tevez ក្នុងនាមជាកីឡាកររកបានចំណូលខ្ពស់ជាងគេបំផុតក្នុងពិភពលោក។
ប្រាក់ចំណូលដ៏ច្រើនសន្ធឹកសន្ធាប់របស់ Neymar នៅឯក្លិប Paris Saint-Germain ស្ថិតក្នុងចំណាត់ថ្នាក់ពីក្រោយតែកីឡាករ Tevez ប៉ុណ្ណោះក្នុងនាមជាកីឡាកររកបានចំណូលខ្ពស់ជាងគេបំផុតក្នុងពិភពលោក។ នេះបើយោងទៅតាមការចេញផ្សាយរបស់កាសែត Football Leaks។
ខ្សែប្រយុទ្ធអន្តរជាតិប្រេស៊ីលរូបនេះ បានបំពេញការផ្ទេររបស់គេទៅកាន់កីឡដ្ឋាន Parc des Princes ពីក្លិប Barcelona កាលពីខែសីហា ឆ្នាំនេះ ដើម្បីក្លាយជាកីឡាករដែលមានតម្លៃខ្លួនខ្ពស់ជាងគេបំផុតក្នុងកីឡាបាល់ទាត់ ក្រោយពីផ្ទេរក្នុងតម្លៃខ្លួន២២២លានអឺរ៉ូ (ស្មើនឹង២៦៤លានដុល្លារអាមេរិក)។ ប៉ុន្តែ បើយោងទៅតាមរបាយការណ៍ដដែលដែលត្រូវបានចេញផ្សាយកាលពីចុងសប្តាហ៍ថ្មីៗនេះ Neymar មិនបានទទួលចំណូលកប់ពពកដូចការរំពឹងទុកនៅឯក្លិប PSG ឡើយ។
គេហទំព័រ Football Leaks បានចេញផ្សាយថា Neymar ទទួលបានចំណូលត្រឹមតែ៣លានអឺរ៉ូ ប៉ុណ្ណោះក្នុងមួយខែ ក្នុងក្របខ័ណ្ឌ Ligue 1 ដែលមានន័យថា រូបគេរកបានចំណូលប្រចាំឆ្នាំចំនួន៣៦,៨លានអឺរ៉ូ។ មានតែខ្សែប្រយុទ្ធ Tevez ប៉ុណ្ណោះដែលបច្ចុប្បន្នកំពុងតែលេងឲ្យក្លិប Shanghai Shenhua របស់ក្របខ័ណ្ឌចិន Super League ជាកីឡាកររកបានចំណូលខ្ពស់ជាងគេ ខណៈដែលបណ្តាញសារព័ត៌មានជាច្រើនអះអាងថា តារាឆ្នើមអន្តរជាតិអាហ្សង់ទីនរូបនេះ រកបានដល់ទៅ៣៨,៤លានអឺរ៉ូ ក្នុងឆ្នាំទី១របស់គេនៅលើទឹកដីអាស៊ី។
ទោះបីជាយ៉ាងណា Neymar នៅតែទទួលចំណូលដ៏ច្រើន ខណៈដែលបើគិតទៅលើប្រាក់ខែរបស់គេ តារាឆ្នើមប្រេស៊ីលរូបនេះរកបាន១០ម៉ឺនអឺរ៉ូក្នុងមួយនថ្ងៃ ៤០០០អឺរ៉ូ ក្នុងមួយម៉ោង ឬ៦៦អឺរ៉ូ ក្នុងរយៈពេលមួយនាទី៕
ប្រភពពី៖ Goal.com
ពេលខ្លះអាការឈឺធ្មេញធ្វើឱ្យយើងខឹងមួម៉ៅ ឬជួនកាលឈឺរហូតដល់ចង់វិលមុខ ឈឺក្បាលគិតអ្វីមិនចេញទៀតផង នៅក្នុងស្ថានការណ៍ដែលយើងមិនអាចទៅពេទ្យធ្មេញបានទាន់ពេលវេលានោះ អាចនឹងត្រូវទ្រាំឈឺមួយរយៈ តែ ឡារ៉ែន មានវិធីបន្ថយអាការឈឺធ្មេញនេះបានដោយវិធី5យ៉ាងដូចខាងក្រោម។
1.កុំទទួលទានអាហារដែលនាំឱ្យឈឺធ្មេញ
កាត់បន្ថយនូវអ្វីដែលមានផលធ្វើឱ្យធ្មេញឈឺកាន់តែខ្លាំងឡើង ដូចជា ទទួលទានរបស់ត្រជាក់ខ្លាំង (ទឹកកក ការ៉េម), របស់ក្តៅខ្លាំង (ទឹកក្តៅ កាហ្វេក្តៅ និងអាហារក្តៅៗជាដើម) និងអាហារដែលមានរសជាតិផ្អែមខ្លាំង ឬជូរខ្លាំង។
2.កុំធ្វើឱ្យប៉ះទង្គិចដល់ធ្មេញដែលកំពុងឈឺ
កាត់បន្ថយការធ្វើឱ្យប៉ះទង្គិចដល់ធ្មេញដែលកំពុងឈឺ ពីព្រោះអាការឈឺធ្មេញនឹងកាន់តែកម្រើកខ្លាំងឡើង បើធ្មេញដែលឈឺនោះត្រូវបានធ្វើឱ្យប៉ះទង្គិចញឹកញាប់ វិធីងាយៗគឺ ទទួលទានអាហារណាដែលមិនចាំបាច់ទំពាខ្លាំងៗ និងវិធីមួយទៀតគឺ ទំពានៅធ្មេញម្ខាងទៀត។
3.យកកម្ទេចអាហារចេញពីធ្មេញ
បើអាការឈឺនោះបណ្តាលមកពីមានកម្ទេចអាហារ វិធីល្អបំផុតគឺប្រញាប់យកកម្ទេចអាហារទាំងនោះចេញឱ្យបានលឿនបំផុត ដោយការប្រើខ្សែសម្អាតធ្មេញ (Dental Floss) កុំប្រើឈើចាក់ធ្មេញ។
4.ប្រើទឹកក្តៅឧណ្ហៗជាជំនួយ
បើធ្មេញពុកមានប្រហោង សរសៃប្រសាទធ្មេញហើម និងមានខ្ទុះនៅជើងធ្មេញ ហើយមើលឃើញអាការហើមស្ទុលនៅលើថ្គាមនោះ ការប្រើទឹកក្តៅឧណ្ហៗជួយស្អំពីខាងក្រៅ នឹងជួយជម្រុញឱ្យការហូរខ្ទុះចេញមកខាងក្រៅឆាប់អស់ ជួយឱ្យអាការឈឺធ្មេញឆាប់បាត់កាន់តែលឿនឡើងថែមទៀតផង។
5.ប្រេងធាងម្លូ
ប្រេងធាងម្លូ ជាឱសថដែលជួយកាត់បន្ថយអាការឈឺធ្មេញបាន ដោយយកសំលីជ្រលក់ប្រេងធាងម្លូ ហើយយកញ៉ុកចូលក្នុងប្រហោងធ្មេញដែលឈឺ នោះប្រេងធាងម្លូនឹងបញ្ចេញឫទ្ធិជាថ្នាំបំបាត់ការឈឺចាប់បានភ្លាមតែម្តង។
វិធីការដែលណែនាំខាងលើនេះ ជាវិធីជួយ
ឱ្យអ្នកបាត់ខឹងមួម៉ៅ ដោយសារការឈឺធ្មេញក្នុងករណីដែលមិនអាចទៅជួបជាមួយគ្រូពេទ្យបានតែប៉ុណ្ណោះ មិនមែនជាវិធីព្យាបាលឡើយ ដូច្នេះបើអ្នកមានឱកាសហើយ គួរតែប្រញាប់ទៅជួបនឹងគ្រូពេទ្យ ដើម្បីទទួលយកការព្យាបាលដែលត្រឹមត្រូវទើបជាការប្រសើរ៕
វារីអគ្គិសនីសេសានក្រោមពីរ ស្ថិតនៅក្នុងខេត្ដស្ទឹងត្រែងដែលអភិវឌ្ឍដោយក្រុមហ៊ុនចំនួនបី នឹងត្រូវបិទទ្វាទឹកជាផ្លូវការដើម្បីដាក់ឱ្យដំណើរការតួប៊ីនទី1 នៅថ្ងៃទី25 ខែកញ្ញា ស្អែកនេះ ក្នុងការបង្កើនថាមពលអគ្គសនីបន្ថែមសម្រាប់បង្គ្រប់កង្វះខាតថាមពលអគ្គិសនីទូទាំងប្រទេស។
ឯកឧត្ដម ស៊ុយ សែម រដ្ឋមន្ដ្រីក្រសួងឧស្សាហកម្មរ៉ែ និងថាមពលបញ្ជាក់ថា៖ «វារីអគ្គិសនីសេសានក្រោមពីរ ប្រើទឹក យើងបិទទប់ទឹកឱ្យបង្វិលទៅតួប៊ីនដើម្បីទទួលបានថាមពលអគ្គិសនី ប្រសិនបើយើងមិនបិទទេទឹកវាហូរចោល។ ការបិទទឹកគឺជាកាលបរិច្ឆេទនៃការចាប់ផ្ដើមដំណើរការវារីអគ្គិសនីរបស់យើង ដូច្នេះនៅទន្លេនេះបិទទឹកជាផ្លូវការគឺបិទរហូតហើយ»។
វារីអគ្គិសនីសេសានក្រោមពីរ គម្រោងដ៏ធំជាប្រវត្ដិសាស្ដ្រនៃកម្ពុជានឹងត្រូវបិទទ្វារទឹកជាផ្លូវការនៅថ្ងៃទី 25 ខែកញ្ញា ឆ្នាំ2017។ បន្ទាប់តួប៊ីនទី1ដំណើរការនៅចុងឆ្នាំ នឹងអាចទទួលបានថាមពលអគ្គិសនីកម្លាំង 50MW។ រហូតដល់ឆ្នាំ2018 ដំណើរការតួប៊ីនចំនួនបួនអាចទទួលបានថាមពលអគ្គិសនីកម្លាំងរហូតដល់ 400MW។
លោករដ្ឋមន្ត្រី បានបន្ដថា វារីអគ្គិសនីសេសានក្រោមពីរ នឹងជួយចូលរួមចំណែកដល់វិស័យថាមពលអគ្គីសនីនៅកម្ពុជា និងវិស័យពាក់ព័ន្ធទាំងអស់ដែលប្រើប្រាស់ថាមពលអគ្គិសនី លែងឱ្យមានការខ្វះខាតតទៅទៀតហើយ។
វារីអគ្គិសនីសេសានក្រោមពីរ រួមចំណែកជាមួយប្រភពថាមពលដែលមានវារីអគ្គិសនី6 និងរោងចក្រធ្យូងថ្ម នឹងបំពេញបន្ថែមសេចក្ដីត្រូវការថាមពលសម្រាប់បម្រើដល់សេដ្ឋកិច្ច វិស័យសង្គមកិច្ច រួមនឹងវិស័យផ្សេងៗ ។ ពិសេសវាអាចបង្គ្រប់នូវកង្វះខាតថាមពលអគ្គិសនីនូវទូទាំងប្រទេសកម្ពុជា ខណៈកំណើននៃការប្រើប្រាស់ថាមពលអគ្គិសនីក្នុងប្រទេសកម្ពុជាកើនឡើងរង្វង់ 20% ជារៀងរាល់ឆ្នាំ។ វារីអគ្គិសនីសេសានក្រោមពីរ គឺជាគម្រោងអភិវឌ្ឍរួមគ្នារវាងក្រុមហ៊ុនកម្ពុជា Royal Group សហការជាមួយក្រុមហ៊ុនមកពីប្រទេសចិន និងវៀតណាមក្រោមទុនវិនិយោគជាង 800លានដុល្លារ៕
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងថា កម្ពុជាជាប្រទេសតូចមួយក៏ពិតមែន ប៉ុន្តែកម្ពុជា ជាប្រទេសដែលមានការអភិវឌ្ឍយ៉ាងឆាប់រហ័ស គួរឱ្យកត់សម្គាល់មួយ នៅក្នុងតំបន់អាស៊ីអាគ្នេយ៍ ដោយសារវិស័យពាណិជ្ជកម្មកម្ពុជា បានរួមចំណែកយ៉ាងសំខាន់ក្នុងការអភិវឌ្ឍ និងជំរុញកំណើនសេដ្ឋកិច្ច។
ឯកឧត្តមបានថ្លែងក្នុងសន្និសីទព័ត៌មាន ដែលរៀបចំឡើង នៅក្នុងពិធីតាំងពិព័រណ៍សម្លៀកបំពាក់ “APPAREL SOURCING PARIS 2017” នៅក្រុងប៉ារីស ប្រទេសបារាំងថា ការនាំចេញរបស់កម្ពុជា មានការកើនឡើងជាលំដាប់ ជាពិសេសការនាំចេញក្រោមប្រព័ន្ធអនុគ្រោះ “Everything But Arms (EBA)” ដែលប្រព័ន្ធនេះបានអនុញ្ញាតឱ្យកម្ពុជា អាចនាំចេញទំនិញគ្រប់ប្រភេទ (លើកលែងតែអាវុធ) ទៅកាន់សហគមន៍អឺរ៉ុប ដោយគ្មានបង់ពន្ធនិងជាប់កាតព្វកិច្ចផ្សេងៗនោះទេ ។
ក្រោមប្រព័ន្ធអនុគ្រោះ GSP/MFN ផងដែរ ប្រទេសកម្ពុជាបាននាំចេញទៅទីផ្សារសហគមន៍អឺរ៉ុបធំជាងគេ បន្ទាប់មកគឺសហរដ្ឋអាមេរិក និងកាណាដា ហើយទំនិញដែលនាំចេញច្រើនជាងគេ គឺសម្លៀកបំពាក់ និងវាយនភ័ណ្ឌតែម្តង។ ក្រៅពីនោះ មានស្បែកជើង អង្ករ ស្ករត្នោត ម្រេច និងផលិតផលផ្សេងៗទៀត។
ឯកឧត្តមរដ្ឋមន្ត្រីបានបន្ថែមទៀតថា ពិព័រណ៍សម្លៀកបំពាក់ “APPAREL SOURCING PARIS 2017” នេះជាព្រឹត្តិការណ៍អន្តរជាតិដ៏ល្បីល្បាញ និងធំជាងគេបង្អស់នៅក្នុងតំបន់អឺរ៉ុប ដូច្នោះហើយការចូលរួមរបស់កម្ពុជាក្នុងពេលនេះ ពិតជាមានសារៈសំខាន់ខ្លាំងណាស់។
គណៈប្រតិភូពាណិជ្ជកម្មកម្ពុជា និងសមាគមរោងចក្រកាត់ដេរនៅកម្ពុជា (GMAC) បានដឹកនាំពាណិជ្ជករកម្ពុជាចំនួន09 ក្រុមហ៊ុនមកចូលរួមព្រឹត្តិការណ៍នេះ ដើម្បីបង្កើនទំនាក់ទំនងពាណិជ្ជកម្មរវាងកម្ពុជា-បារាំង ក៏ដូចជាដើម្បីស្វែងរកទីផ្សារអឺរ៉ុប និងជំរុញឱ្យមានការកើនឡើងបន្ថែមទៀតនូវការវិនិយោគនៅកម្ពុជា លើវិស័យកាត់ដេរសម្លៀកបំពាក់ និងវាយនភ័ណ្ឌ។
ជាមួយគ្នានេះ ឯកឧត្តមបានជំរុញឱ្យភ្ញៀវទាំងអស់ដែលមានវត្តមាននៅទីនោះ យកឱកាសដ៏សំខាន់នេះ ធ្វើការជជែកពិភាក្សាគ្នាជាមួយកម្ពុជា ដើម្បីបង្កើតទំនាក់ទំនងធ្វើពាណិជ្ជកម្មជាមួយគ្នា ព្រោះកម្ពុជាមានកម្លាំងការងារគ្រប់គ្រាន់ ហើយតម្លៃឈ្នួលពលកម្មក៏ទាបផងដែរ ហើយការដឹកជញ្ជូនក៏បានតែមានភាពប្រសើរឡើងដែរ ដោយសារកម្ពុជា កំពុងមានផ្លូវគមនាគមន៍ជាច្រើននឹងតភ្ជាប់ផ្លូវរថភ្លើងទៅកាន់ប្រទេសក្នុងតំបន់ទៀតផង៕
លោក Antonio Conte អ្នកចាត់ការទូទៅរបស់ក្រុម Chelsea បានថ្លែងអំណរគុណដល់ Diego Costa កាលពីថ្ងៃសុក្រ សម្រាប់ការលះបង់របស់គេនៅឯកីឡដ្ឋាន Stamford Bridge ក្រោយពីក្លិបតោខៀវ បានយល់ព្រមលក់ខ្សែប្រយុទ្ធរូបនេះទៅឲ្យក្លិប Atletico Madrid។
Costa បានរកគ្រាប់បាល់បញ្ចូលទីចំនួន 52គ្រាប់ក្នុងការប្រកួតក្របខ័ណ្ឌ Premier League ដើម្បីជួយឲ្យក្រុម Chelsea ឈ្នះពានកំពូលរបស់អង់គ្លេសចំនួន2លើក ក្នុងរយៈពេល 3ឆ្នាំ នៅមុនពេលលោក Conte បានប្រាប់ខ្សែប្រយុទ្ធវ័យ 28ឆ្នាំតាមរយៈការផ្ញើសារកាលពីដើមឆ្នាំនេះថា រូបគេមិនស្ថិតក្នុងគម្រោងរបស់ក្លិបនេះទៀតឡើយ។
Chelsea បានបញ្ជាក់ក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ពួកគេបានយល់ព្រមទៅលើលក្ខខណ្ឌផ្សេងៗជាមួយនឹងក្លិប Atletico របស់ក្របខ័ណ្ឌ La Liga ដើម្បីផ្ទេរ Costa ស្របពេលដែលកាសែតអេស្ប៉ាញ El Mundo បានបញ្ជាក់ថា តម្លៃខ្លួននៃការផ្ទេរនេះ មានចំនួន 55លានអឺរ៉ូ (ស្មើនឹង 65,7លានដុល្លារអាមេរិក)។
នៅពេលដែលត្រូវបានចោទសួរពីទំនាក់ទំនងដែលត្រូវបានប្រេះស្រាំជាមួយនឹងខ្សែប្រយុទ្ធអន្តរជាតិអេស្ប៉ាញរូបនេះ ក្នុងរយៈពេលប៉ុន្មានខែចុងក្រោយនេះ លោក Conte បានជ្រើសរើសយកធ្វើការផ្តោតអារម្មណ៍ទៅលើអនាគតរបស់ក្លិបរបស់លោកវិញ ដោយចាប់ផ្តើមពីការធ្វើដំណើរទៅប្រកួតនៅលើទឹកដីក្រុម Stoke City នៅពីថ្ងៃសៅរ៍នេះ។
គ្រូបង្វឹកសញ្ជាតិអ៊ីតាលីរូបនេះបានឲ្យដឹងថា៖ «យើងចង់ថ្លែងអំណរគុណដល់ Costa សម្រាប់អ្វីដែលរូបគេបានធ្វើជាមួយនឹងក្លិបនេះ។ យើងសូមជូនពរឲ្យរូបគេជួបតែសំណាងល្អនៅថ្ងៃអនាគត»។ លោក Conte បានបន្ថែមទៀតថា៖ «រឿងអតីតកាលមិនសំខាន់ឡើយ។ ប្រសិនបើអ្នកធ្វើបានល្អកាលពីអតីត វាមិនអីទេ ប៉ុន្តែ យើងត្រូវតែធ្វើការសម្រាប់បច្ចុប្បន្នភាព និងអនាគត»។
លោក Conte ជឿជាក់ថា ក្រុម Chelsea នឹងត្រូវជួបការប្រកួតដ៏ស្វិតស្វាញមួយនៅកីឡដ្ឋាន bet365 ក្រោយពីក្រុម Stoke របស់លោក Mark Hughes រកបានដល់ទៅ 4ពិន្ទុពីការប្រកួត២លើកជាមួយនឹងក្រុម Arsenal និង Manchester United។ ការប្រកួតនេះនឹងចាប់ផ្តើមនៅម៉ោង9យប់៕
ប្រភពពី៖ Reuters
ក្នុងការធ្វើដំណើរផ្លូវឆ្ងាយៗតើលោកអ្នកត្រៀមខ្លួនហើយឬនៅសម្រាប់ដំណើរកម្សាន្ត ដើម្បីបញ្ជៀសរាល់បញ្ហាទាំងឡាយដែលអាចនឹងកើតឡើងក្នុងពេលធ្វើដំណើរ? ជាការពិតអ្នកគួរតែនាំយករថយន្តរបស់អ្នកទៅធ្វើការត្រួតពិនិត្យជាមុនសិនមុននឹងចេញដំណើរកម្សាន្តផ្លូវឆ្ងាយ។ តើមានចំណុចអ្វីខ្លះដែលអ្នកគួរត្រួតពិនិត្យមុនពេលដំណើរ?
ចំពោះរឿងនេះ អ្នកជំនាញផ្នែកជួសជុលរថយន្តនៃក្រុមហ៊ុន Ford បានឱ្យដឹងថា មុននឹងធ្វើដំណើរចេញខេត្តឆ្ងាយៗ អ្នកប្រើប្រាស់ថយន្តគួរតែត្រួតពិនិត្យលក្ខណៈបច្ចេកទេសរថយន្តឱ្យបានយ៉ាងតិច 3 ចំណុចជាមុនសិន ដើម្បីចៀសវាកើតមានបញ្ហាផ្សេងៗពេលបើកបរ។
ត្រួតពិនិត្យភ្លើងរថយន្ត
អ្វីដែលងាយស្រួលបំផុតនិងចាំបាច់បំផុតដែលអ្នកគួរពិនិត្យលើរថយន្តរបស់អ្នកគឺប្រព័ន្ធភ្លើងបំភ្លឺរបស់រថយន្ត។ អ្នកត្រូវតែប្រាកដថាប្រព័ន្ធភ្លើងបំភ្លឺរបស់រថយន្តទាំងខាងមុខ និងខាងក្រោយដំណើរការធម្មតាពេលដែលអ្នកបើកបរ ពីព្រោះវាមានសារៈសំខាន់ណាស់ជាពិសេសនៅពេលអ្នកធ្វើដំណើរកម្សាន្តផ្លូវឆ្ងាយទៅខេត្តនានាជាដើម។
ត្រួតពិនិត្យសភាពរបស់កង់រថយន្ត
តើអ្នកបានត្រួតពិនិត្យសំបកកង់រថយន្តរបស់អ្នកហើយរឺនៅ? ទាំងនេះជាចំណុចដែលអ្នកគួរតែត្រួតពិនិត្យនៅលើកង់រថយន្តមុនពេលចេញដំណើរ៖ សម្ពាធខ្យល់កង់ សំនឹកកង់ អាយុកាលនៃកង់រថយន្ត និងសភាពរបស់កង់សាគួរផងដែរ។ អ្នកគួរពិនិត្យសម្ពាធខ្យល់កង់រថយន្តជាប្រចាំរួមជាមួយនឹងស្ថានភាពរបស់កង់ផងដែរ។តើកង់សាគួររបស់អ្នកអាចប្រើប្រាស់បានដែររឺទេ? តើនៅលើសំបកកង់រថយន្តអ្នកមានស្នាម ឬរងការខូចខាតដែររឺទេ? តើក្រឡានៅលើសំបកកង់របស់អ្នកមានសភាពសឹក ឬចាស់ដែររឺទេ? បើដូច្នេះ តើអ្នកគួរតែប្ដូរសំបកកង់ថ្មីរឺយ៉ាងណា។ ហេតុនេះហើយ អ្នកគួរតែយករថយ្តទៅយានដ្ឋានត្រួតពិនិត្យសំបកង់មុនពេលធ្វើដំណើរកម្សាន្ត។
ត្រួតពិនិត្យកម្រិតប្រេងម៉ាស៊ីនផ្សេងៗ
កម្រិតទឹកនិងប្រេងម៉ាស៊ីនផ្សេងៗនៅក្នុងរថយន្តគួរតែត្រួតពិនិត្យឲ្យបានត្រឹមត្រូវដើម្បីជៀសវាងបញ្ហាផ្សេងៗដែលអាចកើតមាននៅពេលកំពុងបើកបរ ដូចជា កម្រិតប្រេងម៉ាស៊ីន ប្រេងចង្កូត ប្រេងប្រអប់លេខ ប្រេងហ្វ្រាំង ធុងទឹក ទឹកលាងកញ្ចក់ខាងមុខ បូករួមទាំងខ្សែរពាននិងទុយោរផងដែរ។ អ្នកគួរតែយករថយន្តទៅយានដ្ឋានដើម្បីត្រួតពិនិត្យទៅលើចំណុចទាំងនេះឱ្យបានត្រឹមត្រូវដើម្បីជៀសវាងហានិភ័យផ្សេងៗ។
ត្រួតពិនិត្យអាគុយ
ប្រសិនបើអាគុយរថយន្តរបស់អ្នកប្រើប្រាស់រយៈពេលយូរមកហើយ អ្នកគួរត្រួតពិនិត្យឡើងវិញជាមុនសិនមុននឹងចេញដំណើរ។ អ្នកអាចពិនិត្យមើលស្នាមប្រេះខូចខាត ឬការហៀរទឹកចេញពីអាគុយ ប្រសិនបើប្រទះឃើញកត្តាទាំងនេះអ្នកគួរតែយករថយន្តទៅយានដ្ឋានដើម្បីប្ដូរអាគុយថ្មីជាបន្ទាន់។
ចំពោះការត្រួតពិនិត្យលក្ខណៈខាងលើ ម្ចាស់យានយន្ដគួរតែស្វែងរកយានដា្ធនជួសជុលរថយន្តដែលមានជំនាញច្បាស់លាស់ និងមានឧបករណ៍ទំនើបៗក្នុងការជួសជុល ហើយអ្នកប្រិយមិត្តទាំងអស់ក៏អាចទៅទទួលសេវាកម្មពីយានដា្ធនជួសជុលរថយន្ត Ford ផ្ទាល់ទាំង 3 ទីតាំង – ទីតាំងទី 1 តាមបណ្ដោយផ្លូវមហាវិថីព្រះមុនីរង្ស ក្បែរស្ថានទូតវៀតណាម, ទីតាំងទី 2 តាមបណ្ដោយផ្លូវទៅអាកាសយានដ្ឋានភ្នំពេញជិតស្ថានីយ៍ប្រេងតូតាល់ និងទីតាំងទី 3 ខេត្តសៀមរាប ផ្លូវជាតិលេខ 6 ៕
ទោះបីជាកម្ពុជា ចាប់ផ្ដើមមានក្រុមហ៊ុននាំចូល និងចែកចាយផលិតផល Apple ធានាជាផ្លូវការពីរោងចក្រហើយក្ដី ប៉ុន្ដែអ្នកប្រើប្រាស់ភាគច្រើន ហាក់នៅមិនទាន់យល់ច្បាស់ពីអត្ថប្រយោជន៍ និងគាំទ្រផលិតផលទាំងនោះច្រើនប៉ុន្មានទេ។ ដោយអ្នកប្រើខ្លះ នៅតែនិយមគាំទ្រផលិតតាមហាងដែលនាំចូលដោយឈ្មួញដែលមានតម្លៃមិនប្រាកដប្រជា មិនមានប្រភពច្បាស់លាស់ គ្មានការធានាជាលក្ខណៈស្តង់ដាពី Apple ដែលនាំឱ្យខាត់ប្រយោជន៍ និងផ្ដល់គុណវិបត្តិមួយចំនួន។
ការទិញផលិតផលទាំងនោះ អាចប៉ះចំផលិតផលដែលត្រូវបានគេវេចខ្ចប់សាថ្មី ឬត្រូវទិញចំផលិតដែលត្រូវបានគេផ្លាស់ប្ដូរ កាស ឆ្នាំងសាកថ្ម (Original Accessories) ដាក់របស់ចម្លងពីចិនជាដើម។ តាមការឱ្យពីម្ចាស់ហាង លក់ទូរស័ព្ទមួយនៅរាជាធានីភ្នំពេញ សូមមិនបញ្ចេញឈ្មោះបានឱ្យដឹងថា កន្លងមកហាង លោកធ្លាប់ទទួលលក់ទូរស័ព្ទ iPhone, iPad, iPod និងផលិតផលជាច្រើនទៀតគ្មានការធានា ដោយនាំចូលដោយឈ្មួញនាំចូលក្រៅផ្លូវការ។ ប៉ុន្តែលោកមិនដឹងថា ផលិតទាំងនោះមានការបង់ពន្ធគយត្រឹមត្រូវ ឬយ៉ាងណាទេ។ លោកបន្ដថា ការលក់ផលិតគ្មានការធានាកន្លងមក ហាងលោកជួបបញ្ហាញច្រើនគួរសម ខណៈអតិថិជនទិញប្រើមិនទាន់បានប៉ុន្មានផង ស្រាប់តែជួបបញ្ហាដែលនាំឱ្យ មានការអន់ចិត្តពីភ្ញៀវ ថាហាងលោកលក់ផលិតផលមិនល្អ ហើយត្រូវដូរថ្មីជូនករណីទើបទិញថ្មីៗ ជាដើម។
ទីផ្សារទូរស័ព្ទកម្ពុជាកំពុងច្របូកច្របល់គ្នាចំពោះការលក់ផលិតផលផ្លូវការ និងមិនផ្លូវការ។ ចំពោះការលក់ផលិតផលមិនផ្លូវការ បានធ្វើឱ្យបាត់បង់ចំណូលជាតិ និងធ្វើឱ្យអ្នកវិនិយោគស្របច្បាប់អស់ជំនឿ និងខាតបង់ប្រាក់កាក់។ ការចរាចរណ៍ផលិតផលមិនផ្លូវការកាន់តែច្រើន វាបានបង្កការលំបាក និងគ្រោះថ្នាក់ដល់អិថិជនដែលជាអ្នកប្រើប្រាស់ផ្ទាល់។ ដោយសារតែចង់បានចំណេញច្រើនពីការលក់ផលិតផលមិនផ្លូវការ និងគេចពន្ធនោះ អ្នកលក់មួយចំនួនធំបានព្យាយាមប្រើនូវវិធីសាស្រ្ត និងការក្លែងបន្លំមួយចំនួនចំពោះអតិថិជនរបស់ខ្លួន។ ជាឧទាហរណ៍ការទិញផលិតផលរបស់ Apple ដែលគ្មានការធានាពីរោងចក្រ និងក្រុមហ៊ុននាំចូលស្រប់ច្បាប់ ប្រើប្រាស់អាចនឹងទទួលបាននូវបញ្ហាមួយចំនួនដូចជា៖
ដើម្បីចៀសវាងបញ្ហាទាំងនេះ ប្រិយមិត្តត្រូវស្វែងយល់ឱ្យច្បាស់មុនសម្រេចចិត្តទិញផលិតផល iPhone, iPad ឬ ផលិតផលApple និមួយៗ ព្រោះវាអាចជា ការចំណាយដោយឥតប្រយោជន៍ និងសូមសួររកការធានាដែលត្រឹមត្រូវរយៈពេលមួយឆ្នាំពី Apple និងមានបិទសញ្ញា ឬ Seal ពីរោងចក្រ ឬដៃគូអាជីវកម្មរបស់ Apple (i.e. Falcon Tech) ជាដើម។
ចំពោះការប្រើប្រាស់ផលិតផលដែលមិនស្របច្បាប់ ឬគេចពន្ធប្រៀបដូចជាយើងកំពុងលើកទឹកចិត្ត និងជំរុញឱ្យមានការលក់ និងចរាចរណ៍ផលិតផលខុសច្បាប់ដែលជាចំណែកធំធ្វើឱ្យខាតបង់ចំណូលជាតិ ហើយក៏កំពុងយកជីវិតខ្លួនឯងផ្ទាល់ទៅប្រថុយនឹងផលិតផលដែលគ្មានការធានាគុណភាពត្រឹមត្រូវដូច្នោះដែរ៕
