សង្គម និងសេដ្ឋកិច្ច - La Reine Media

ក្រុមជម្រើសជាតិថៃនាំមុខគេស្ដីពីការវាយលុក ខណៈវៀតណាមខ្លាំងខាងការពារនៅ AFF Cup 2022

ការប្រកួត 2 ជើងនៅថ្ងៃទី 13 មករា និង 16 មករា នៃវគ្គផ្ដាច់ព្រ័ត្ររបស់ AFF Cup 2022 ទំនងជានឹងល្អមើលខ្លាំង នៅពេលក្រុមជម្រើសជាតិថៃពូកែខាងវាយលុក ចំណែកវៀតណាមវិញ ក៏ខ្លាំងខាងការការពារ។

គេអាចប្រដូចក្រុមជម្រើសជាតិថៃទៅនឹងដាវ រីឯវៀតណាមវិញគឺប្រៀបបានទៅនឹងខែលការពារនៅ AFF Cup 2022 ព្រោះថា ថៃកំពុងនាំមុខគេនៅក្នុងស្ថិតិវិជ្ជមាននានាទាក់ទងនឹងការវាយលុក។ ផ្ទុយទៅវិញ វៀតណាមនៅតែរក្សាចំណុចពិសេសក្នុងសម័យគ្រូបង្វឹកជនជាតិកូរ៉េខាងត្បូង Park Hang-seo នោះគឺសមត្ថភាពការពារ និងកាត់បន្ថយបានជាអតិបរមានូវចំនួនគ្រាប់បាល់ចាញ់។

យោងតាមស្ថិតិរបស់ទំព័រ AFF Cup 2022 ក្រុមថៃនាំមុខគេក្នុងបញ្ជីស្ដីពីការស៊ុតបញ្ចូលទី ដោយរកបាន 16 គ្រាប់។ ថៃក៏មានកីឡាករដែលកំពុងនាំមុខគេក្នុងបញ្ជីចំណាត់ថ្នាក់ស្ដេចកម្ទេចសំណាញ់ទី នោះគឺ Teerasil Dangda ដោយរកបាន 6 គ្រាប់ក្នុង 6 ប្រកួត ច្រើនជាង 1 គ្រាប់ធៀបនឹងកីឡាករវៀតណាម Nguyen Tien Linh។

ទន្ទឹមនឹងនេះ ប្រធានក្រុម Theerathon Bunmathan និងកីឡាករ Safawi Rasid របស់ថៃ ក៏នាំមុខគេ (4 លើក) ស្ដីពីការបង្កឱកាសស៊ុតបញ្ចូលទីបានសម្រេច។ កីឡាករ 3 រូបដែលបង្កើតឱកាសស៊ុតបញ្ចូលទីបានជោគជ័យច្រើនជាងគេបំផុតនៅ AFF Cup 2022 គឺបានទៅលើក្រុមថៃ រួមមានកីឡាករ Theerathon, Teerasil និង Ekanit Panya។ កីឡាករ 3 រូបដែលស៊ុតផ្ដាច់បានច្រើនជាងគេបង្អស់គិតត្រឹមវគ្គពាក់កណ្ដាលផ្ដាច់ព្រ័ត្រក៏បានទៅលើក្រុមជម្រើសជាតិថៃ ក្នុងនោះដែរ Teerasil មានរហូតដល់ 21 លើក ច្រើនជាងទ្វេដងធៀបនឹង Bordin Phala និង Peeradol Chamrasamee។

ក្រៅពីនេះ ក្រុមថៃក៏មានការបញ្ជូនបាល់ 3,480 លើក, អត្រានៃការបញ្ចូលបាល់បានល្អ 87%, ស៊ុតផ្ដាច់បាន 128 លើក, ស៊ុតចំគោលដៅ 45 លើក, ទទួលបានបាល់ពិន័យជ្រុង 40 លើក និងបាល់ប៉េណាំទីចំនួន 3 គ្រាប់។ នេះគឺជាសន្ទស្សន៍ល្អបំផុតសម្រាប់ក្រុមបាល់ទាត់ជម្រើសជាតិមួយនៅ AFF Cup 2022។

ចំណែកក្រុមជម្រើសជាតិវៀតណាមវិញ មកដល់បច្ចុប្បន្ន គឺជាក្រុមតែមួយគត់ក្នុងប្រវត្តិសាស្ត្រ AFF Cup ដែលឡើងដល់វគ្គផ្ដាច់ព្រ័ត្រដោយមិនមានក្រុមណាមួយអាចស៊ុតបញ្ចូលទីរបស់ពួកគេបាន។ អ្នកចាំទីរបស់វៀតណាម Dang Van Lam ក៏ជាកីឡាករដែលរក្សាទីបាន «ស្អាត» ជាងគេ ក្នុង 6 ប្រកួត (540 នាទីផ្លូវការ) របស់ពានរង្វាន់នេះ។

ការប្រកួតជើងទីមួយនៃវគ្គផ្ដាច់ព្រ័ត្ររបស់ AFF Cup 2022 រវាងវៀតណាម និងថៃ នៅឯកីឡដ្ឋាន My Dinh ក្នុងរដ្ឋធានីហាណូយ នឹងធ្វើឡើងនៅម៉ោង 19 និង 30 នាទី ថ្ងៃទី 13 មករា 2023៕

January 12, 2023

ក្រសួងសាធារណការ ស្នើឱ្យក្រុមហ៊ុនឯកជនសិក្សាពីលទ្ធភាពស្ថាបនាផ្លូវរថភ្លើងល្បឿនលឿននៅកម្ពុជា

រដ្ឋលេខាធិការប្រចាំការនៃ ក្រសួងសាធារណការ និងដឹកជញ្ជូន បានស្នើឱ្យក្រុមហ៊ុន NIPPON KOEI សិក្សាពីលទ្ធភាពស្ថាបនាផ្លូវរថភ្លើងល្បឿនលឿននៅ ភ្នំពេញ ក្នុងឱកាសអញ្ជើញទទួលជួបពិភាក្សាការងារជាមួយតំណាងក្រុមហ៊ុន NIPPON KOEI កាលពីដើមសប្ដាហ៍នេះ។

ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន កាលពីថ្ងៃទី 09 មករា 2023 បានអញ្ជើញទទួលជួបក្រុមការងាររបស់ក្រុមហ៊ុន NIPPON KOEI ដែលដឹកនាំដោយលោក Hirotoshi SUZIKI ដើម្បីស្វែងយល់អំពីបទបង្ហាញរបស់ក្រុមហ៊ុន NIPPON KOEI ទាក់ទងនឹងគម្រោងកែលម្អប្រពន្ធ័ដឹកជញ្ជូនអ្នកដំណើរតាមរថភ្លើងនៅតាមតំបន់ចំនួនបីនៃផ្លូវដែកភាគខាងជើងរបស់កម្ពុជា ដែលរួមមាន បាត់ដំបង សិរីសោភ័ណ និងប៉ោយប៉ែត។

ក្នុងឱកាសនោះដែរ ឯកឧត្តម តូច ចាន់កុសល បានស្នើឱ្យក្រុមហ៊ុន NIPPON KOEI ពិនិត្យលទ្ធភាពលើការសិក្សាគម្រោងផ្លូវរថភ្លើងក្នុងទីក្រុងភ្នំពេញ។ ផ្លូវរថភ្លើងល្បឿនលឿនក្នុងក្រុង បច្ចុប្បន្នមានការពេញនិយមនៅបរតេស ដោយសារវាមានតម្លៃទាប ងាយស្រួលក្នុងការវិនិយោគ បើធៀបនឹងប្រព័ន្ធប្រតិបត្តិការរថភ្លើងស្វ័យប្រវត្តិ (AGT)។

យោងតាម ក្រសួងសាធារណការ និងដឹកជញ្ជូន ក្រុមហ៊ុន NIPPON KOEI ទទួលបានការគាំទ្រពីសមាគមសហប្រតិបត្តិការដឹកជញ្ជូនជប៉ុន (JTCA – Japan Transport Cooperative Association) ជាអង្គភាពសហប្រតិបត្តិការអន្តរជាតិតែមួយគត់របស់ប្រទេសជប៉ុន ដែលផ្តោតជាសំខាន់លើអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន៕

January 12, 2023

ជិះយានជំនិះប្រភេទថ្មីនេះ អ្នកមិនបាច់ចេញពីកាប៊ីន តាំងពីបរលើដី ហោះលើអាកាស និងជូនដល់ផ្ទះ

(សហរដ្ឋអាម៉េរិក) – ក្រុមហ៊ុន Node Air កំពុងអភិវឌ្ឍមធ្យោបាយដឹកជញ្ជូនមួយដែលរួមផ្សំរវាងផ្លូវគោក និងផ្លូវអាកាស ហើយមានកាប៊ីនសម្រាប់ដឹកភ្ញៀវ អាចដោះចេញបាន។

ក្រុមហ៊ុន Node Air ដែលមានទីស្នាក់ការនៅ Florida សហរដ្ឋអាម៉េរិក កំពុងសហការជាមួយ JetX ដើម្បីអភិវឌ្ឍមធ្យោបាយដឹកជញ្ជូនទម្រង់ module ថ្មី ដែលបំពាក់ប្រព័ន្ធរុញច្រាន vector។

ក្នុងមធ្យោបាយដឹកជញ្ជូននេះ កាប៊ីនរបស់វានឹងធ្វើដំណើរទៅទទួលអតិថិជនដល់ផ្ទះរបស់ពួកគេ។ កាប៊ីននេះស្ថិតនៅលើគ្រោងទម្រដែលដំណើរការដោយថាមពលអគ្គិសនីដែលមានថ្មដោយឡែក និងមានម៉ូទ័រ អង្គញាណ ប្រព័ន្ធកាច់ចង្កូត និងប្រព័ន្ធបញ្ជាសមស្រប។ វានឹងដឹកភ្ញៀវទៅដល់កន្លែងត្រូវហោះឡើង ជាទីដែលមានយន្តហោះដ្រូនគ្មានមនុស្សបើកកំពុងរង់ចាំជាស្រេច។ ប្រព័ន្ធទម្រនឹងខ្ជាក់កាប៊ីននោះចេញ ហើយយន្តហោះដ្រូនដែលនៅពីលើនោះនឹងចាប់យកកាប៊ីនដែលមានភ្ញៀវនៅខាងក្នុងពីអាកាស មុនពេលចេញដំណើរ។

ដោយមានបំពាក់បណ្ដុំថ្មផ្ទុកអគ្គិសនីដោយឡែក យានជំនិះនេះនឹងដឹកភ្ញៀវទៅដល់កន្លែងចុះចត រួចទម្លាក់កាប៊ីនដឹកភ្ញៀវទៅលើប្រព័ន្ធទម្រមួយផ្សេងទៀតដើម្បីដឹកភ្ញៀវទៅកាន់គោលដៅ។ នៅក្នុងការធ្វើដំណើរនេះ អតិថិជនមិនចាំបាច់ចេញពីកាប៊ីនឡើយ។

ម៉ូឌុលនានារបស់ប្រព័ន្ធដឹកជញ្ជូននេះក៏អាចដឹកជញ្ជូនដោយមធ្យោបាយស្តង់ដា មានដូចជា រថភ្លើង ឬកប៉ាល់ជាដើម ចំពោះការធ្វើដំណើររយៈចម្ងាយឆ្ងាយ។

ក្រុមហ៊ុន JetX ដែលជាដៃគូសហការរបស់ Node Air កំពុងអភិវឌ្ឍបច្ចេកវិទ្យារុញច្រាន vector ដែលជួយឱ្យយានជំនិះមិនចាំបាច់ផ្អៀងខ្លួនពេលប្ដូរទិសក្នុងពេលហោះហើរ ដោយវានឹងប្រើប្រាស់ប្រព័ន្ធបែងចែកលំហូរខ្យល់ដែលមានស្លាប់ ឬមិនមានស្លាប។

ទោះជាយ៉ាងណាក៏ដោយ ប្រព័ន្ធយានជំនិះប្រភេទម៉ូឌុលនេះ បច្ចុប្បន្នស្ថិតក្នុងដំណាក់កាលរៀបចំរចនារូបរាង ហើយ Node Air ក៏មិនទាន់បង្ហើបឱ្យដឹងអំពីដំណាក់កាលសាកល្បងនៅឡើយ៕

January 12, 2023

AFF ចេញសេចក្ដីព្រមានសំខាន់បំផុតសម្រាប់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ

សហព័ន្ធបាល់ទាត់អាស៊ីអាគ្នេយ៍ (AFF) ចេញសេចក្ដីព្រមានកម្រិតខ្ពស់ ទៅកាន់កីឡាករ និងគ្រូបង្វឹករបស់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ AFF Cup 2022 (AFF Mitsubishi Electric Cup 2022)។

នៅសល់មួយថ្ងៃទៀតប៉ុណ្ណោះ ការប្រកួតវគ្គផ្ដាច់ព្រ័ត្ររវាងក្រុមជម្រើសជាតិថៃ និងវៀតណាម នៅ AFF Cup 2022 នឹងត្រូវបានធ្វើឡើង។ ការប្រកួតជើងទីមួយរវាងក្រុមទាំងពីរនឹងធ្វើឡើងនៅថ្ងៃទី 13 មករា 2023 លើវាលស្មៅរបស់កីឡដ្ឋាន My Dinh នៅវៀតណាម ហើយ 3 ថ្ងៃក្រោយមក គឺនៅថ្ងៃទី 16 មករា ការប្រកួតជើងទីពីរនឹងធ្វើឡើងនៅឯកីឡដ្ឋាន Thammasat របស់ថៃ។

នេះគឺជាលើកដំបូងក្រោយរយៈពេល 14 ឆ្នាំ ដែលអ្នកគាំទ្រនឹងបានទស្សនាការប្រកួតវគ្គផ្ដាច់ព្រ័ត្ររវាងថៃ និងវៀតណាម នៅ AFF Cup។ ឆ្នាំ 2008 ក្រុមជម្រើសជាតិវៀតណាម បានផ្ដួលថៃដោយលទ្ធផល 3-2 ដែលជួយឱ្យវៀតណាមដណ្ដើមបានជើងឯកជាលើកដំបូងនៅ AFF Cup។

មុនថ្ងៃប្រកួតវគ្គផ្ដាច់ព្រ័ត្រ នៅ AFF Cup 2022 ក្រុមវៀតណាម និងថៃ សុទ្ធតែកំពុងរៀបចំយុទ្ធសាស្ត្រយ៉ាងម៉ត់ចត់។ អ្វីដែលគួរឱ្យចាប់អារម្មណ៍ជាងគេគឺថា ក្រុមទាំងពីរនឹងត្រូវប្រកួតយ៉ាងប្រុងប្រយ័ត្ន ក្រោយពីមានការព្រមានថ្មីបំផុតពីសហព័ន្ធបាល់ទាត់អាស៊ីអាគ្នេយ៍ (AFF)។

ថ្មីៗនេះ AFF បានប្រកាសព័ត៌មានស្ដីពីការពិន័យនានាសម្រាប់ក្រុមដែលនឹងចូលប្រកួតវគ្គផ្ដាច់ព្រ័ត្រនៅ AFF Cup 2022។ ជាក់ស្ដែង ក្រុមថៃ និងវៀតណាម កំពុងមានកីឡាករ និងគ្រូបង្វឹកសរុប 10 នាក់ ប្រឈមនឹងហានិភ័យអវត្តមាននៅក្នុងការប្រកួតដណ្ដើមតំណែងជើងឯកនៅថ្ងៃទី 16 មករា។

ក្នុងចំណោម 10 នាក់ខាងលើ ក្រុមថៃ មានកីឡាករ 5 នាក់ និងគ្រូបង្វឹក Mano Polking ផងដែរ ដែលបានទទួលកាត់លឿងនៅវគ្គពាក់កណ្ដាលផ្ដាច់ព្រ័ត្រ ខណៈដែលវៀតណាម មានកីឡាករ 4 នាក់បានទទួលកាត់លឿង។

ដោយសារតែ AFF Cup 2022 បន្តអនុវត្តលក្ខន្តិកៈ «បូកសរុបកាតពិន័យចាប់ពីវគ្គពាក់កណ្ដាលផ្ដាច់ព្រ័ត្រ» កីឡាករ និងគ្រូបង្វឹកទាំង 10 រូបខាងលើ នឹងត្រូវបានបញ្ឈរជើង ឬហាមដឹកនាំក្រុមនៅវគ្គផ្ដាច់ព្រ័ត្រជើងទីពីរដែលនឹងប្រកួតនៅថ្ងៃទី 16 មករាខាងមុខ បើសិនទទួលបានកាតលឿង 1 ទៀតក្នុងការប្រកួតជើងទីមួយនៅកីឡដ្ឋាន My Dinh របស់វៀតណាម នៅថ្ងៃទី 13 មករា។

នេះគឺជាប្រការសំខាន់បំផុតរបស់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ។ អវត្តមានកីឡាករ ឬគ្រូបង្វឹកណាម្នាក់ ក៏នឹងប៉ះពាល់យ៉ាងធ្ងន់ធ្ងរដល់ក្រុមរបស់ពួកគេ ដូច្នេះ កីឡាកររបស់ក្រុមទាំងពីរ និងគ្រូបង្វឹក Polking សុទ្ធតែត្រូវប្រុងប្រយ័ត្នជាទីបំផុត។

ជើងទីមួយនៃវគ្គផ្ដាច់ព្រ័ត្ររបស់ AFF Cup 2022 នឹងត្រូវប្រកួតនៅវេលាម៉ោង 19 និង 30 នាទី ថ្ងៃទី 13 មករា 2023៕

January 12, 2023

វគ្គផ្ដាច់ព្រ័ត្រ AFF Cup 2022 – ទិដ្ឋភាពក្រុមជម្រើសជាតិថៃ នៅអាកាសយានដ្ឋានវៀតណាម

(ហាណូយ)- កីឡាករលេខមួយ Teerasil Dangda ដែលបានរងរបួសកាលពីប៉ុន្មានថ្ងៃមុន ពេលនេះរួមដំណើរជាមួយក្រុមជម្រើសជាតិថៃ បានទៅដល់ហាណូយ ប្រទេសវៀតណាម ដើម្បីទាត់វគ្គផ្ដាច់ព្រ័ត្រជើងទីមួយរបស់ AFF Cup 2022 ដែលត្រូវប៉ះនឹងក្រុមជម្រើសជាតិវៀតណាម។

Teerasil Dangda ដើរធម្មតានៅពេលរួមដំណើរជាមួយក្រុមជម្រើសជាតិថៃ ចុះចតនៅអាកាសយានដ្ឋាន Noi Bai កាលពីល្ងាចថ្ងៃទី 11 មករា។ កីឡាករលេខមួយរបស់ថៃរូបនេះ បានរងរបួសក្នុងការប្រកួតឈ្នះម៉ាឡេស៊ី 3-0 កាលពីព្រលប់ថ្ងៃទី 10 មករា។ Teerasil Dangda ត្រូវបាននាំទៅមន្ទីរពេទ្យ ប៉ុន្តែភាគីថៃមិនបានបង្ហើបឱ្យដឹងអំពីព័ត៌មានលម្អិតស្ដីពីរបួសនោះទេ។

Teerasil Dangda កើតឆ្នាំ 1988 កំពុងនាំមុខគេក្នុងបញ្ជីចំណាក់ថ្នាក់ស្ដេចកម្ទេចសំណាញ់នៅ AFF Cup 2022 ដោយរកបាន 6 គ្រាប់ ច្រើនជាង 1 គ្រាប់ ធៀបនឹង Nguyen Tien Linh របស់វៀតណាម។ Teerasil Dangda គឺជាកីឡាករតែម្នាក់គត់នៅក្នុងការប្រកួតវគ្គផ្ដាច់ព្រ័ត្រ AFF Cup 2008 រវាងថៃ និងវៀតណាម ដែលនៅមានវត្តមានក្នុងវគ្គផ្ដាច់ព្រ័ត្រលើកនេះ។ កាលណោះ Teerasil Dangda រកបាន 1 គ្រាប់ ប៉ុន្តែ ថៃបានចាញ់ 2-3 ក្រោយការប្រកួតពីរជើង។

ក្រុមជម្រើសជាតិថៃ ជិះយន្តហោះពីរគ្រឿងទៅកាន់ហាណូយ ដោយសារមិនមានកៅអីគ្រប់គ្រាន់។ ប៉ុន្តែ ព្រោះតែយន្តហោះមួយគ្រឿងត្រូវចេញដំណើរយឺត ដូច្នេះពួកគេហាក់មានវត្តមានស្របគ្នានៅអាកាសយានដ្ឋាន Noi Bai នៅវេលាម៉ោងប្រហែលពី 18 និង 25 នាទី ទៅ 18 និង 30 នាទី។

គ្រូបង្វឹកជនជាតិប្រេស៊ីល Mano Polking របស់ក្រុមជម្រើសជាតិថៃ ក៏បង្កការចាប់អារម្មណ៍ពេលទៅដល់ Noi Bai។ គ្រូបង្វឹករូបនេះធ្លាប់ធ្វើការនៅវៀតណាម ដោយបានដឹកនាំក្លឹបទីក្រុង HCM ពីឆ្នាំ 2020 ដល់ 2021។

ម៉ោងប្រហែល 20 ក្រុមកីឡាករថៃ បានចេញពីតំបន់ទទួលអីវ៉ាន់ ទៅកាន់រថយន្ត។ គ្រូបង្វឹក Mano Polking គឺជាអ្នកដែលបានចាកចេញពីអាកាសយានដ្ឋានក្រោយគេ។

ក្រុមថៃ ចំណាយពេល 40 នាទីក្នុងការធ្វើដំណើរទៅកាន់សណ្ឋាគារ Hyatt ដែលមានចម្ងាយពីកីឡដ្ឋាន My Dinh ប្រហែល 5 នាទី បើជិតរថយន្តក្រុង។ ទីនេះក៏ជាកន្លែងស្នាក់នៅរបស់ក្រុមឥណ្ឌូណេស៊ី ពេលធ្វើជាភ្ញៀវនៅវៀតណាម៕

January 12, 2023

អ្នកគាំទ្រក្រុមជម្រើសជាតិម៉ាឡេស៊ី ជូនពរថៃ ឱ្យឈ្នះវៀតណាម ក្នុងវគ្គផ្ដាច់ព្រ័ត្រនៅ AFF Cup 2022!

(ម៉ាឡេស៊ី) – ក្រោយការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្រដែលបានចាញ់ថៃកាលពីព្រលប់ថ្ងៃទី 10 មករា ក្រុមអ្នកគាំទ្ររបស់ម៉ាឡេស៊ី នាំគ្នាច្រៀង និងជូនពរដល់ក្រុមរបស់ថៃ ឱ្យដណ្ដើមបានពានរង្វាន់ជើងឯក AFF Cup នៅឆ្នាំនេះ។

ទស្សនិកជនប្រហែល 300 នាក់ បានទៅកាន់កីឡដ្ឋាន Thammasat នៅបាងកក ដើម្បីលើកទឹកចិត្តដល់ក្រុមជម្រើសជាតិម៉ាឡេស៊ី។ ក្នុងការប្រកួតនេះ ក្រុមដែលពួកគេគាំទ្រនឹងបានឡើងទៅវគ្គផ្ដាច់ព្រ័ត្រ ឱ្យតែមិនចាញ់ ដោយសារតែបានឈ្នះ 1-0 នៅជើងទីមួយដែលបានទាត់លើទីលាន Bukit Jalil របស់ ម៉ាឡេស៊ី។

ក៏ប៉ុន្តែ ថ្វីជើងរបស់កីឡាករ Teerasil Dangda, Bordin Phala និង Adisak Kraisorn បានជួយឱ្យក្រុមរបស់ថៃ ឈ្នះម៉ាឡេស៊ី 3-0 ហើយក៏បានឡើងទៅប៉ះវៀតណាមនៅវគ្គផ្ដាច់ព្រ័ត្រ។

បន្ទាប់ពីការប្រកួតរវាងថៃ និងម៉ាឡេស៊ីបានបញ្ចប់ ក្រុមកីឡាករថៃក៏ដើរខាងមុខតាមបណ្ដោយកន្លែងទស្សនិកជនដើម្បីអរគុណដល់អ្នកគាំទ្រ។ ពេលពួកគេឈប់ត្រង់ខាងមុខកន្លែងទស្សនិករបស់ក្រុមភ្ញៀវ ក្រុមអ្នកគាំទ្រម៉ាឡេស៊ីក៏នាំគ្នាច្រៀង «សួស្ដីក្រុមថៃ»។

បន្ទាប់មក មនុស្សមួយចំនួនក៏បានស្រែកឡើង៖ «យកឈ្នះលើវៀតណាមឱ្យបានណា៎» និង «ជូនពរសំណាងល្អនៅវគ្គផ្ដាច់ព្រ័ត្រ»។ ភ្លាមនោះ ក្រុមកីឡាករថៃក៏បានទះដៃឆ្លើយតបការជូនពរពីអ្នកគាំទ្ររបស់ម៉ាឡេស៊ី។

ថ្វីជើងរបស់កីឡាករ Teerasil Dangda, Bordin Phala និង Adisak Kraisorn បានជួយឱ្យក្រុមរបស់ថៃ ឈ្នះម៉ាឡេស៊ី 3-0 ហើយក៏បានឡើងទៅប៉ះវៀតណាមនៅវគ្គផ្ដាច់ព្រ័ត្រ

ឥរិយាបថរបស់អ្នកគាំទ្រម៉ាឡេស៊ី គឺជារឿងកម្រកើតមាននៅក្នុងតំបន់អាស៊ីអាគ្នេយ៍ ដែលមានទម្លាប់ប្រឈមមុខដាក់គ្នារវាងក្រុមបាល់ទាត់នានា។ សារព័ត៌មានថៃបានលើកសរសើរចំពោះក្រុមអ្នកគាំទ្ររបស់ម៉ាឡេស៊ី ដែលបានបង្ហាញនូវស្មារតីកីឡាដ៏ថ្លៃថ្នូរ។

ម៉ាឡេស៊ី ធ្លាប់ប៉ះវៀតណាម នៅវគ្គសន្សំពិន្ទុរបស់ AFF Cup 2022 ឆ្នាំនេះ ដែលពេលនោះម៉ាឡេស៊ីបានចាញ់ 0-3 នៅលើកីឡដ្ឋាន My Dinh ក្នុងការប្រកួតដែលមានការប្រកែកគ្នាច្រើន។

ក្រុមជម្រើសជាតិថៃ នឹងត្រូវប្រកួតជាមួយក្រុមរបស់វៀតណាមនៅវគ្គផ្ដាច់ព្រ័ត្រដែលក្នុងនោះ ការប្រកួតជើងទីមួយនឹងធ្វើឡើងក្នុងថ្ងៃទី 13 មករាលើវាលស្មៅ My Dinh របស់ រដ្ឋធានីហាណូយ ហើយ 3 ថ្ងៃក្រោយមក នឹងត្រូវប៉ះគ្នាម្ដងទៀត និងជាលើកចុងក្រោយនៅ AFF Cup 2022 លើទីលានបាល់ទាត់ Thammasat ក្នុងរាជធានីបាងកក៕

January 11, 2023

ក្រុមហ៊ុនអាម៉េរិក ប្រកាសលក់យន្តហោះអគ្គិសនីផ្ទាល់ខ្លួន ល្បឿន 101 គីឡូម៉ែត្រ/ម៉ោង

យន្តហោះហោះឡើង និងចុះចតដោយត្រង់ Recon មានតម្លៃ 150,000 ដុល្លារអាម៉េរិក អាចហោះហើរបាន 20 នាទីក្នុងកម្ពស់ 122 ម៉ែត្រ។

ក្រុមហ៊ុនអាម៉េរិក Ryse Aero Technologies ចាប់ផ្ដើមទទួលការបញ្ជាទិញជាមុនសម្រាប់ Recon ដែលជាយន្តហោះអគ្គិសនី ហោះឡើង និងចុះចតដោយត្រង់ (eVTOL) ប្រភេទស្រាល នេះបើតាម Interesting Engineering ចុះផ្សាយកាលបីថ្ងៃទី 10 មករា 2023។

តាមគម្រោង យន្តហោះនេះនឹងត្រូវបានប្រគល់ជូនអតិថិជននៅត្រីមាសទីបួន ឆ្នាំ 2023 ក្នុងតម្លៃ 150,000 ដុល្លារ/គ្រឿង។

Recon ត្រូវបានរចនាឡើងដើម្បីហោះហើរនៅតំបន់ជនបទ និងបម្រើដល់វិស័យកសិកម្ម។ យន្តហោះនេះជួយឱ្យការផ្លាស់ទីនៅតំបន់វាលធំដែលមិនមានផ្លូវកៅស៊ូ និងមានតិចតួច មានភាពងាយស្រួល។

Recon មានកៅអីតែមួយ អាចហោះបានកម្ពស់ 122 ម៉ែត្រ និងល្បឿន 101 គីឡូម៉ែត្រ/ម៉ោង។ ដោយបំពាក់ថ្មផ្ទុកអគ្គិសនីចំនួន 6 គ្រាប់ យន្តហោះនេះអាចហោះបានប្រហែល 20 នាទី បន្ទាប់ពីបញ្ចូលថាមពលមួយពេញ។

យោងតាមក្រុមហ៊ុន Ryse Aero Technologies អ្នកបើកបរយន្តហោះ Recon មិនចាំបាច់មានប័ណ្ណបើកបរយន្តហោះឡើយ៕

January 11, 2023

តម្លៃប្រេងសាំងនៅកម្ពុជា អនុវត្តចាប់ពីថ្ងៃទី 11 ដល់ 20 មករា 2023

ក្រសួងពាណិជ្ជកម្មបានប្រកាសពី តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី 11 ដល់ 20 មករា 2023 ក្នុងនោះ សាំងធម្មតាមានតម្លៃដដែលគឺ 4,200 រៀល/លីត្រ និងប្រេងម៉ាស៊ូត ចុះ ១៥០ រៀល ដោយត្រូវលក់ 4,400 រៀល/លីត្រ។

January 11, 2023

ភាពយន្តរបស់ Steven Spielberg ផ្ដួល «Avatar 2» និងទទួលបានពានផែនដីមាស

(សហរដ្ឋអាម៉េរិក)- «The Fabelmans» របស់ Steven Spielberg ឈ្នះ «Avatar 2» ដោយដណ្ដើមបានពានរង្វាន់ «ភាពយន្តមនោសញ្ចេតនាល្អបំផុតប្រចាំឆ្នាំ» 2023 នៅក្នុងព្រឹត្តិការណ៍ប្រគល់ពានរង្វាន់ Golden Globes លើកទី 80។

ពិធីប្រគល់រង្វាន់ត្រូវបានធ្វើឡើងនៅព្រឹកថ្ងៃទី 11 មករា 2023 (ម៉ោងនៅកម្ពុជា) នៅ Los Angeles និងត្រូវបានផ្សាយផ្ទាល់បន្ទាប់ពីអវត្តមានមួយឆ្នាំដោយសារបញ្ហាអាស្រូវមួយចំនួន។

អ្នកដឹកនាំសម្ដែង Quentin Tarantino ប្រកាសឈ្មោះនៃស្នាដៃដែលបានឈ្នះពានរង្វាន់ភាពយន្តមនោសញ្ចេតនាល្អបំផុតឆ្នាំនេះទៅឱ្យភាពយន្តរបស់ Steven Spielberg គឺ The Fabelmans។ The Fabelmans បានយកជ័យជម្នះលើកំពូលខ្សែភាពយន្តជាច្រើនក្នុងឆ្នាំ មានជាអាទិ៍ រឿង «Avatar: The Way of Water, Top Gun: Maverick» ជាដើម ហើយក្លាយជាម្ចាស់ពានរង្វាន់ខាងលើ។

ខ្លឹមសាររបស់ The Fabelmans ត្រូវបានបំផុសគំនិតដោយសារអតីតកាលរបស់ Spielberg អ្នកដែលធំឡើងនៅ Arizona ក្នុងសម័យក្រោយសង្គ្រាមលោកលើកទីពីរ។ ខ្សែភាពយន្តនេះមានការចូលរួមសម្ដែងដោយតារាល្បីៗមួយចំនួន មានដូចជា Michelle Williams, Paul Dano, Seth Rogen និង Gabriel LaBelle ជាដើម។

ផលិតករភាពយន្តដែលជាម្ចាស់កម្មសិទ្ធិលើ The Fabelmans ថែមទាំងបានឈ្នះពានរង្វាន់អ្នកដឹកនាំរឿងឆ្នើមជាងគេទៀតផង។ នេះគឺជាពានរង្វាន់ផែនដីមាស (Golden Globes) ទីបីក្នុងអាជីពរបស់ Steven Spielberg។ អ្នកដឹកនាំរឿងរូបនេះក៏ធ្លាប់ទទួលបានពានរង្វាន់កិត្តិយស Cecil B. DeMille ឆ្នាំ 2008 ផងដែរ។

ពានរង្វាន់ផែនដីមាន ជាពានរង្វាន់ដែលផ្ដោតលើការកំសាន្ត មិនដូចទៅនឹង Oscar។ ដូច្នេះ លទ្ធផលនៃការជ្រើសរើសបេក្ខភាពក៏មិនបង្កភាពចម្រូងចម្រាសប៉ុន្មាននៅក្នុងចំណោមទស្សនិកជន។ The Fabelmans និង The Banshees of Inisherin បានឈ្នះពានរង្វាន់ភាពយន្តពីរដែលសំខាន់បំផុតរបស់ Golden Globes។ នេះក៏ជាពន្លកកំពូលៗសម្រាប់ការចូលរួមដណ្ដើមពានរង្វាន់ «ភាពយន្តល្អបំផុត» នៅ Oscar នាពេលខាងមុខ។

ចំណែកផ្នែកសម្ដែងវិញ គណៈកម្មការមេប្រយោគបានប្រគល់ពានជាច្រើនទៅឱ្យអ្នកសម្ដែងពហុជាតិសាសន៍ ក្នុងនោះភាគច្រើនគឺជាសិល្បករ សិល្បការិនីមានដើមកំណើតអាហ្វ្រិក និងអាស៊ី។

ខ្លឹមសាររបស់ The Fabelmans ត្រូវបានបំផុសគំនិតដោយសារអតីតកាលរបស់ Spielberg អ្នកដែលធំឡើងនៅ Arizona ក្នុងសម័យក្រោយសង្គ្រាមលោកលើកទីពីរ

ពានរង្វាន់ផែនដីមាស (Golden Globes) ដែលត្រូវបានបង្កើតឡើងដោយ HFPA កាលពីឆ្នាំ 1944 គឺជាពាន់រង្វាន់ដែលទាក់ទាញទស្សនិកជនបានច្រើនជាងគេលំដាប់ទីបីនៅ សហរដ្ឋអាម៉េរិក បន្ទាប់ពី Oscar និង Grammy។ គណៈកម្មការមេប្រយោគគឺជាសមាជិករបស់ HFPA មកពីបណ្ដាទីភ្នាក់ងារសារព័ត៌មានរបស់ប្រទេសជាង 50 លើពិភពលោក។ ប៉ុន្មានឆ្នាំកន្លងមកនេះ Golden Globes ត្រូវបានគេធ្វើពហិការមិនចូលរួម ដោយសារតែក្នុងជួរគណៈកម្មការមេប្រយោគពុំមានសមាជិកជាជនជាតិស្បែកខ្មៅ និងការមន្ទិលទាក់ទងនឹងអំពើពុករលួយ ទិញពាន។

ខាងក្រោមគឺជាបញ្ជីឈ្មោះភាពយន្ត អ្នកដឹកនាំរឿង និងតួសម្ដែងដែលបានឈ្នះពាននៅ Golden Globes ឆ្នាំនេះ ៖

January 11, 2023

ទិញ iPhone 14 Pro Max ពីផ្សារអនឡាញ Shopee អតិថិជនទទួលបានដុំឈើ

(សិង្ហបុរី) – បុរសម្នាក់ចូលទៅកាន់ផ្សារអនឡាញ Shopee ទិញទូរស័ព្ទ iPhone 14 Pro Max តម្លៃ 1,961 ដុល្លារសិង្ហបុរី ប៉ុន្តែទំនិញដែលគាត់ទទួលបានគឺឈើមួយដុំ។

សារព័ត៌មាន Shin Min Daily News ដកស្រង់សម្ដីរបស់បុគ្គលិកសុខាភិបាលម្នាក់ឈ្មោះ Yu អាយុ 37 ឆ្នាំ ឱ្យដឹងអំពីបទពិសោធន៍អាក្រក់នៅពេលទិញទំនិញលើ Shopee។ លោក Yu និយាយថា គាត់តែងតែទិញទូរស័ព្ទពីហាងចែកចាយផ្លូវការរបស់ Apple។ ប៉ុន្តែលើកនេះ គាត់ទិញ iPhone ពីផ្សារអនឡាញ ដោយសារតែគេនឹងទទួលបានប័ណ្ណបញ្ចុះតម្លៃ 8 ដុល្លារសិង្ហបុរី និងសន្យាថាសងប្រាក់វិញនៅលើ Shopee បើមានបញ្ហា។

«ខ្ញុំបានពិនិត្យមើលមតិស្ដីពីហាងអនឡាញនេះ។ កំណែដែលខ្ញុំចង់ទិញក៏ជិតអស់ពីឃ្លាំងនៅកន្លែងជាច្រើន ទើបខ្ញុំសម្រេចចិត្តបញ្ជាទិញ iPhone 14 Pro Max កំណែ 256 GB នៅលើ Shopee» លោក Yu ឱ្យដឹងដូច្នេះ។

បើទិញនៅ Apple Store ទូរស័ព្ទខាងលើនេះមានតម្លៃ 1,987 ដុល្លារសិង្ហបុរី ប៉ុន្តែបើទិញអនឡាញ អាចចំណេញបាន 26 ដុល្លារសិង្ហបុរី។ លោក Yu ក៏ជឿជាក់លើ Shopee ដូច្នេះ គាត់ក៏សម្រេចចិត្តទិញ។

មកដល់ថ្ងៃទី 31 ធ្នូ 2022 ទំនិញត្រូវបានដឹកមកប្រគល់ដល់អាសយដ្ឋានរបស់លោក Yu។ អ្នកប្រគល់ទំនិញបានដាក់កញ្ចប់ទំនិញមួយនៅខាងក្រៅទ្វារ ថតរូបមួយសន្លឹក រួចក៏ប្រញាប់ចាកចេញ។ នៅពេលបើកប្រអប់ទំនិញ លោក Yu ឃើញថា ខាងក្នុងមានតែឈើមួយដុំនៅកណ្ដាលថង់ប្លាស្ទិកដែលមានខ្យល់ពេញ។ ពុំមានទូរស័ព្ទ iPhone ណាមួយត្រូវបានប្រគល់ឱ្យអតិថិជនម្នាក់នេះឡើយ។

លោក Yu បានទាក់ទងទៅកាន់អ្នកលក់ ស្នើឱ្យសងប្រាក់មកវិញ ប៉ុន្តែត្រូវបានបដិសេធ។ បន្ទាប់មក លោក Yu ក៏បានទាក់ទងទៅកាន់ផ្នែកបម្រើអតិថិជនរបស់ Shopee ប៉ុន្តែ ក៏មិនត្រូវបានជួយដោះស្រាយ ព្រោះគេថា ទំនិញត្រូវបានផ្ញើទៅកាន់អាសយដ្ឋានទៅតាមសំណើរួចហើយ។

លោក Yu ក៏បន្តប្ដឹងទៅកាន់សមត្ថកិច្ច។ ក្រោយពីពិនិត្យឡើងវិញ គាត់រកឃើញថា នៅបាតប្រអប់មានស្នាមស្កុត។ គាត់សង្ស័យថា ទំនិញត្រូវបានប្ដូរនៅពេលដឹកជញ្ជូន។

អតិថិជនវ័យ 35 រូបនេះយល់ថា អ្នកទិញមិនគួរត្រូវរងការខាតបង់ដូច្នេះសោះ។ គាត់ក៏ស្បថថា នឹងមិនទិញទំនិញនៅលើផ្សារអនឡាញទៀតឡើយ។

នេះមិនមែនជាលើកដំបូងទេ ដែលអ្នកទិញ iPhone តាមអនឡាញ បែរជាទទួលបានរបស់ចម្លែក គ្មានតម្លៃ។ យោងតាម មុននោះ អតិថិជនម្នាក់នៅ អង់គ្លេស បានទិញ iPhone 13 Pro Max តម្លៃ 1,500 ផោន ប៉ុន្តែទទួលបានទឹកលាងដៃពីរដប៕

January 11, 2023

Category: សង្គម និងសេដ្ឋកិច្ច