ភ្នំពេញ៖ ប្រមុខដឹកនាំរដ្ឋាភិបាលបង់ក្លាដែសនឹងមកបំពេញទស្សនកិច្ចនៅកម្ពុជា នៅថ្ងៃទី16 ខែតុលា ឆ្នាំ2017ខាងមុខនេះ ដើម្បីជំរុញកិច្ចសហប្រតិបត្តិការជាមួយកម្ពុជា ក្នុងនោះមានការចុះអនុស្សរណៈនៃការយោគយល់គ្នាផ្ដោតលើការជំរុញការអភិវឌ្ឍលើវិស័យទេសចរណ៍នៃប្រទេសទាំងពីរផងដែរ ខណៈដែលប្រទេសនៅក្នុងអាស៊ីមួយនេះមានការចាប់អារម្មណ៍ខ្លាំងលើតំបន់ទេសចរណ៍កម្ពុជា ពិសេស ប្រាសាទអង្គរវត្តតែម្ដង។
លោក ទិត ចន្ថា រដ្ឋលេខាធិការក្រសួងទេសចរណ៍ បានឱ្យដឹងនៅក្រោយបញ្ចប់ជំនួបពិភាក្សាការងាររវាងលោក ថោង ខុន រដ្ឋមន្ត្រីក្រសួងទេសចរណ៍ ជាមួយលោកស្រី សៃដា មូណាតាស្នីម ឯកអគ្គរដ្ឋទូតបង់ក្លាដែសប្រចាំកម្ពុជា ដែលមាននិវេសនដ្ឋាននៅរាជធានីបាងកក ប្រទេសថៃ នាថ្ងៃទី29 ខែកញ្ញាឆ្នាំ207 នៅទីស្ដីការក្រសួងទេសចរណ៍។
លោក ទិត ចន្ថា បានឱ្យដឹងថា ក្នុងជំនួបពិភាក្សានាព្រឹកថ្ងៃសុក្រ ម្សិលមិញនេះ លោកស្រី សៃដា មូណាតាស្នីម បានជម្រាបប្រាប់លោករដ្ឋមន្ត្រី ថោង ខុន ថា នាពេលខាងមុខឆាប់ៗនេះ ប្រមុខដឹកនាំរដ្ឋាភិបាលបង់ក្លាដែសរបស់លោកស្រីនឹងមកបំពេញទស្សនកិច្ចនៅប្រទេសកម្ពុជាដើម្បីជំរុញកិច្ចសហប្រតិបត្តិការលើវិស័យមួយចំនួនជាមួយកម្ពុជា ពិសេសគឺវិស័យទេសចរណ៍។
លោកស្រីឯកអគ្គរដ្ឋទូតបានលើកសរសើរមិនដាច់ពីមាត់ថា ដោយសារប្រទេសកម្ពុជារក្សាបាននូវសុខសន្តិភាព ស្ថិរភាពនយោបាយ និងមានការអភិវឌ្ឍលើគ្រប់វិស័យ ពិសេសគឺវិស័យទេសចរណ៍នេះតែម្ដង ទើបប្រជាជនបង់ក្លាដែស និងភ្ញៀវទេសចរប្រទេសទីបីដែលកំពុងទស្សនានៅបង់ក្លាដែសទាំងនោះចង់មកទស្សនាកម្សាន្តនៅប្រទេសកម្ពុជា ពិសេសប្រជាជនរបស់លោកស្រីបាននិងកំពុងចាប់អារម្មណ៍ខ្លាំងលើប្រាសាទអង្គរវត្ត ខេត្តសៀមរាប ដោយសារអាជ្ញាធរកម្ពុជាមានការគ្រប់គ្រងតំបន់ទេសចរណ៍នៅតំបន់អង្គរបានយ៉ាងល្អប្រសើរ។ ប្រជាជនបង់ក្លាដែសមានចំនួនរហូតដល់ជាង200លាននាក់ឯណោះ ដែលនេះជាសក្ដានុពល វិជ្ជមានមួយសម្រាប់វិស័យទេសចរណ៍របស់កម្ពុជា ហើយលោកស្រីឯកអគ្គរដ្ឋទូតក៏ចង់ឱ្យភ្ញៀវទេសចរកម្ពុជាទៅទស្សនានៅប្រទេសបង់ក្លាដែសផងដែរ។
លោករដ្ឋលេខាធិការបានបន្តថា ភាគីទាំងពីរបានពិភាក្សា គ្នាលើកិច្ចសហប្រតិបត្តិការក្នុងការបញ្ជូនភ្ញៀវទេសចរប្រទេសទាំងពីរ និងភ្ញៀវទេសចរប្រទេសទីបី ឱ្យទៅមកទស្សនាគ្នាទៅវិញទៅមក ធ្វើយ៉ាងណាជំរុញការងារទំនាក់ទំនងនេះឱ្យកាន់ល្អប្រសើរ និងជិតស្និទ្ធថែមទៀត ពីព្រោះកម្ពុជា-បង់ក្លាដែសធ្លាប់មានទំនាក់ទំនងជាមួយគ្នាជាយូរមកហើយ ហើយក៏មានស្ថានភាពសង្គម ទំនាក់ទំនងសាសនា វប្បធម៌ និងអរិយធម៌ ប្រហាក់ប្រហែលគ្នាផងដែរ។
លោក ចន្ថា បានបន្ថែមទៀតថា ក្នុងឱកាសដំណើរទស្សនកិច្ចរបស់ប្រមុខដឹកនាំបង់ក្លាដែស នាពេលខាងមុខ លោកស្រី សៃដា ចង់ឱ្យមានការចុះអនុស្សរណៈនៃការយោគយល់គ្នាមួយ (MoU) រវាងក្រសួងទេសចរណ៍កម្ពុជា និងក្រសួងទេសចរណ៍បង់ក្លាដែស។ ចំណែកលោករដ្ឋមន្ត្រី ថោង ខុន ក៏បានជម្រាបពីការចាប់អារម្មណ៍ និងឆ្លើយតបនូវការស្វាគមន៍ចំពោះកិច្ចសហប្រតិបត្តិការនេះយ៉ាងពេញចិត្ត។
លោក ថោង ខុន បានជម្រាបទៅលោកស្រី សៃដា ថា កម្ពុជាពិតជាចង់ពង្រីកកិច្ចសហប្រតិបត្តិការលើវិស័យទេសចរណ៍ជាមួយបង់ក្លាដែស ដូចទៅនឹងបំណងប្រាថ្នារបស់ប្រទេសបង់ក្លាដែសផងដែរ ពីព្រោះផលប្រយោជន៍ដែលបានពីវិស័យទេសចរណ៍នេះនឹងចូលរួមជំរុញកំណើនសេដ្ឋកិច្ចនៃប្រទេសទាំងពីរឱ្យកាន់តែរីកចម្រើនមួយកម្រិតទៀត។ លោករដ្ឋមន្ត្រីក៏បានស្នើទៅលោកស្រី សៃដា មូណាតាស្នីម នូវគោលបំណងពិសេសមួយទាក់ទងនឹងការតភ្ជាប់ជើងហោះហើរត្រង់ កម្ពុជា-បង់ក្លាដែស-កម្ពុជា ពីព្រោះការតភ្ជាប់ជើងហោះហើរត្រង់នេះហើយ គឺជាកត្តាចម្បងដ៏សំខាន់បំផុតសម្រាប់ជំរុញចលនាទេសចរណ៍ពីគ្នាទៅវិញទៅមក។
ទោះយ៉ាងណា ភាគីបង់ក្លាដែសមិនទាន់អាចបញ្ជាក់ពីកាលបរិច្ឆេទច្បាស់លាស់ នៃដំណើរទស្សនកិច្ចរបស់ប្រមុខដឹកនាំរបស់ខ្លួននៅឡើយទេ ប៉ុន្តែបើតាមលោកស្រីឯកអគ្គរដ្ឋទូតគឺ ខណៈនេះបង់ក្លាដែសកំពុងរៀបចំកម្មវិធីនៃដំណើរទស្សនកិច្ចនេះជាបណ្ដើរៗហើយ៕
