សង្គម និងសេដ្ឋកិច្ច - La Reine Media

កំពូលអាហារ ជំនួយសម្រាប់ការហាត់ប្រាណ

មនុស្សជាច្រើនតែងតែជួបនឹងបញ្ហា “ហាត់ប្រាណ” មិនទាន់បានប៉ុន្មានផង ក៏ហត់បាត់ទៅហើយ ធ្វើឱ្យអស់អារម្មណ៍លែងចង់ហាត់ប្រាណតទៅទៀតតែម្តង តែថ្ងៃនេះ ឡារ៉ែន សូមណែនាំជូនមិត្តអ្នកអានដែលចូលចិត្តការហាត់ប្រាណនូវកំពូលអាហារ4យ៉ាងដែលនឹងជួយបង្កើនកម្លាំងថាមពលដែលលោកអ្នកបាត់បង់ក្រោយការហាត់ប្រាណ និងជួយឱ្យការធ្វើលំហាត់ប្រាណរបស់លោកអ្នកកាន់តែងាយស្រួលឡើងផង។

1.ទឹកឃ្មុំ

ការសិក្សាស្រាវជ្រាវកាលពីពេលថ្មីៗនេះបានរកឃើញថា អាហារដែលមានចំណែកផ្សំរបស់ហ្វ្រាក់តូស (Fructose) និង គ្លុយខូស (Glucose)នឹងជួយបង្កើនកម្លាំងថាមពលក្នុងការធ្វើកិច្ច-ការផ្សេងៗបានច្រើនជាងអាហារដែលមានតែ គ្លុយខូស ម្យ៉ាង ហើយប្រាកដណាស់ថា ទឹកឃ្មុំ គឺជាអាហារដែលមានទាំង ហ្វ្រាក់តូស និងគ្លុយខូស ហើយទឹកឃ្មុំនៅមានវីតាមីន រួមទាំងសារធាតុប្រឆាំងអនុមូលឥស្សរ:ដែលល្អចំពោះសុខភាពទៀតផង។

2.ផ្លែប៉ោម

ការទទួលទានផ្លែប៉ោមមួយផ្លែមុនធ្វើលំហាត់ប្រាណ នឹងជួយធ្វើឱ្យលោកអ្នកហាត់ប្រាណបានកាន់តែយូរឡើង ព្រោះផ្លែប៉ោមសម្បូរទៅដោយ “ឃ្វើរ៍ស៊ីទីន” (Quercetin) ដែលជាសារធាតុដែលមានឥទ្ធិពលប្រឆាំងអុកស៊ីដេ-ស្សិនខ្ពស់បំផុត។ លទ្ធផលនៃការសិក្សាស្រាវជ្រាវបានរកឃើញថា ឃ្វើរ៍ស៊ីទីន អាចជួយឱ្យកីឡាករប្រណាំងកង់អាចធាក់កង់បានកាន់តែយូរឡើង ព្រោះ ឃ្វើរ៍ស៊ីទីន នឹងទៅជួយផលិតអុកស៊ីហ្ស៊ែននៅក្នុងសួតឱ្យកើនឡើង ធ្វើឱ្យមានអារម្មណ៍អាចអត់ទ្រាំនឹងការហត់នឿយបានកាន់តែខ្លាំងឡើងទៀត។ ក្រៅពីផ្លែប៉ោមហើយនោះសារធាតុ ឃ្វើរ៍ស៊ីទីន នេះ នៅត្រូវបានគេរកឃើញថា មានច្រើននៅក្នុងផ្លែទំពាំងបាយជូរផងដែរ។

3.ទឹកដោះ

មិនចាំបាច់ត្រូវទទួលទានភេសជ្ជៈសារធាតុរ៉ែ ឬភេសជ្ជៈប៉ូវកម្លាំងអ្វី ដើម្បីបង្កើនថាមពលឡើងវិញ បន្ទាប់ពីហាត់ប្រាណរួចនោះទេ តែចូរទទួលទានទឹកដោះគោធម្មតាទូទៅ ឬទឹកដោះសូកូឡា ដែលប្រកបដោយខាបូហាយដ្រេត និងប្រតេអុីនវិញ ព្រោះវានឹងជួយសម្រួលឱ្យរាងកាយរបស់លោកអ្នកមានតុល្យភាពល្អឡើងវិញក្រោយពេលហាត់ប្រាណរួច។

4.យ៉ាអួ

ការស្រាវជ្រាវថ្មីមួយបានរកឃើញថា “ប្រូបៃអូទិក” (Probiotics) ដែលមាននៅក្នុងយ៉ាអួនឹងជួយធ្វើឱ្យលោកអ្នកមានសុខភាពល្អ ក្រៅពីនេះយ៉ាអួនៅមានខាបូហាយដ្រេត និងប្រូតេ-អុីនលាយផ្សំគ្នាក្នុងបរិមាណដ៏សមល្មមទៀតផងដូច្នេះហើយទើបយ៉ាអួក្លាយជាកំពូលអាហារក្នុងការស្តារកម្លាំងថាមពលដល់រាងកាយរបស់លោកអ្នកក្រោយពេលហាត់ប្រាណ៕

October 3, 2017

ស្ថាប័នរដ្ឋ និងឯកជនចាប់ផ្តើមមើលឃើញពីគុណសម្បត្តិរបស់គ្រូចូលនិវត្តន៍កាន់តែខ្លាំង

សាលារៀនជាថ្នាលបណ្តុះបណ្តាលធនធានមនុស្ស តែអ្នកដែលកែច្នៃ និងថែទាំមនុស្សពិតប្រាកដនោះគឺគ្រូបង្រៀនដែលកំពុងបម្រើការងារយ៉ាងមមាញឹកនៅក្នុងសាលាឱ្យមានសកម្មភាពរស់រវើក។ គ្រូបង្រៀនជាកម្លាំងចលករយ៉ាងសំខាន់ដែលធ្វើឱ្យសង្គមមួយមានស្ថានភាពស្រស់បំព្រង ពោរពេញទៅដោយការអភិវឌ្ឍលើគ្រប់វិស័យតាមរយៈការបង្កើនចំនួនធនធានមនុស្សទៅតាមជំនាញរៀងៗខ្លួនរបស់យុវជនដែលជាអ្នកបន្តវេនរបស់កម្ពុជា។

ប៉ុន្មានថ្ងៃទៀតនេះ ជាទិវាគ្រូបង្រៀន ដែលគ្រប់សមាសភាពក្នុងសង្គមចាប់ផ្តើមនាំគ្នាលើកឡើងពីបញ្ហាគ្រូបង្រៀន និងក៏ជាពេលដែលសិស្សគ្រប់គ្នារំឭកឡើងវិញនូវគុណបំណាច់របស់លោកគ្រូ-អ្នកគ្រូ សាស្ត្រាចារ្យដែលបានយកចិត្តទុកដាក់ បណ្តុះបណ្តាលសិស្សទាំងឡាយឱ្យក្លាយជាមនុស្សដែលមានសមត្ថភាពខ្ពស់ និងមានភាពថ្កុំថ្កើងនៅពេលបច្ចុប្បន្ននេះ។

ទោះជាយ៉ាងនេះក្តី ជាទូទៅគ្រូដែលជាវិស្វករនៃព្រលឹងរបស់មនុស្សម្នាក់ៗនេះ ត្រូវបានគេយកចិត្តទុកដាក់ដោយពេលម្ដងម្កាលតែប៉ុណ្ណោះកាលពីប៉ុន្មានឆ្នាំមុន។ ជារៀងរាល់ទិវាសំខាន់ៗ សិស្សជាច្រើននាំគ្នារំឭកគុណ និងដឹងគុណគ្រូ តែពេលក្រៅពីនោះមក គ្រូបង្រៀន ជាពិសេសគ្រូចាស់ៗដែលចូលនិវត្តន៍ នៅមិនទាន់ទទួលបានការលើកទឹកចិត្តខ្លាំងៗពីសិស្សនៅឡើយទេ ដូចជាស្ថាប័ននានា ជាពិសេសស្ថាប័នឯកជនតែម្ដង។ តែនាពេលថ្មីៗនេះ សាធារណជនបានចាប់ផ្ដើមមើលឃើញថា ការយកចិត្តទុកដាក់លើគ្រូបង្រៀនហាក់មានលក្ខណៈផុសផុលខ្លះៗហើយតាមរយៈការបង្ហាញជំហរបស់សាលាឯកជនមួយចំនួនក្នុងការជ្រើសរើសគ្រូបង្រៀនចូលនិវត្តន៍ឱ្យមកបង្រៀនក្នុងសាលារបស់ខ្លួន ដើម្បីជាការលើកទឹកចិត្ត និងដើម្បីជាផ្តល់ប្រាក់ចំណូលបន្ថែមដល់គាត់ផងដែរ។

ពាក់ព័ន្ធជាមួយនឹងបញ្ហានេះ លោក ប៉ិច ប៉ូឡែន ស្ថាបនិកសាលាវេស្ទឡាញន៍ ធ្លាប់បានលើកឡើងថា លោកសាស្ត្រាចារ្យ ចូលនិវត្តន៍ជាធនធានមនុស្សដែលមានតម្លៃ និងជាជនដែលមានទេពកោសល្យខ្ពស់ក្នុងការបង្រៀន។ ម្យ៉ាងវិញទៀតយើងសង្កេតឃើញថា គ្រូបង្រៀនចាស់ៗជាមនុស្សដែលពោរពេញទៅដោយទេពកោសល្យខ្ពស់ក្នុងជីវិតបង្រៀន ដែលអាចបណ្តុះបណ្តាលសិស្សជំនាន់ក្រោយឱ្យក្លាយជាធនធានដ៏រឹងមាំសម្រាប់សង្គមបាន។

ស្រដៀងគ្នានេះដែរ អតីតនាយកវិទ្យាល័យទួលទំពូង លោកសាស្ត្រាចារ្យ ស៊ិន ស៊ីថុន និងជាស្ថាបនិកនៃសាលា មហាសាស្ត្រា ក៏បានលើកទឹកចិត្តគ្រូបង្រៀនចូលនិវត្តន៍ដើម្បីមកបង្រៀនក្នុងសាលារបស់លោក ដើម្បីជាការលើកទឹកចិត្តផង និងដើម្បីផ្តល់ឱកាសឱ្យលោកគ្រូ-អ្នកគ្រូចូលនិវត្តន៍បានជួបជុំគ្នា ពិភាក្សាគ្នាផងដើម្បីផ្ទេរចំណេះដឹងដល់ក្មេងជំនាន់ក្រោយ។

ក្រៅពីនេះគេមើលឃើញសាលាឯកជនមួយចំនួនផ្សេងទៀតក៏បានចាប់អារម្មណ៍ និងជ្រើសរើសគ្រូបង្រៀនចូលនិវត្តន៍មកបង្រៀនដែរ ដែលជាការផ្តល់ឱកាសច្រើនសម្រាប់សាស្ត្រាចារ្យចាស់ៗដើម្បីរកប្រាក់ចំណូលបន្ថែម និងដើម្បីជាការយកចិត្តទុកដាក់ចំពោះរូបគាត់ផងដែរ៕

October 2, 2017

ទស្សនាឈុតតារាឯកប្រុសក្នុងរឿង “Descendants Of The Sun” របស់ប៉ាគីស្ថាន

មិនមែនធម្មតាទេ តារាប្រុសម្នាក់នេះពិតជាសង្ហារបស់គេមែន!! រឿង “Descendants Of The Sun” ជារឿងភាគរបស់កូរ៉េ ដែលទទួលបានភាពល្បីល្បាញនៅក្នុងបណ្ដាប្រទេសក្នុងតំបន់អាស៊ី និងអឺរ៉ុបផងដែរ ក៏ប៉ុន្ដែបើនៅតាមប្រទេសក្នុងតំបន់អាស៊ានវិញ គឺបានបោះឆ្នោតឱ្យរឿងភាគទូរទស្សន៍មួយនេះ ជាប់លំដាប់ថ្នាក់លេខមួយតែម្ដង។

ដោយសម្លឹងឃើញសាច់រឿងមានភាពទាក់ទាញ និងបង្ហាញពីវិរភាពនៃសេចក្ដីស្នេហាជាតិដ៏អស្ចារ្យនោះ ប្រទេសប៉ាគីស្ថានបានទិញសិទ្ធិរឿងនេះទៅផលិតជាថ្មីជាវើហ្សឹនប៉ាគីស្ថានវិញម្ដង ដោយបានបង្ហាញពីស្ថានភាពជីវិតរបស់ក្រុមទាហាននៃប្រទេសមួយនេះ ហើយកាន់តែពិសេសជាងនេះទៅទៀត គឺមានវត្តមានតារាសម្ដែងឯក និងបង្ហាញម៉ូដប្រុស លោក Imran Abbas វ័យ 34 ឆ្នាំ ដែលមានរូបរាងស្រស់សង្ហា ដែលស្រីៗឃើញហើយទប់អារម្មណ៍មិនលង់ស្នេហ៍មិនបានឡើយ។ ដោយឡែក នៅថ្ងៃនេះលោកអ្នកនឹងបានឃើញឃ្លីបវីដេអូខ្លីមួយ ដែលតារាប្រុសរូបនេះសម្ដែង ហើយដកស្រង់យកមកបង្ហាញជូនទស្សនិកជនអ្នកគាំទ្ររូបលោកនៅលើបណ្ដាញសង្គម អ៊ីនស្ដាក្រាម ផ្ទាល់តែម្ដង ដូច្នេះដើម្បីកុំឱ្យខាតពេលយូរ សូមទស្សនាវីដេអូខាងក្រោមនេះតែម្ដង៖

A post shared by IMRAN ABBAS (@imranabbas.official) on Sep 6, 2017 at 4:26am PDT

October 2, 2017

ទស្សនាសម្រស់ Fan Bing bing ខណៈមិនទាន់កែកុនក្នុងកម្មវិធី Photoshop

នៅថ្ងៃទី2 ខែតុលា ឆ្នាំ2017 នេះ សារព័ត៌មាន kenh14 ដែលបានចេញផ្សាយមុននេះបន្ដិច បានឱ្យដឹងថា បន្ទាប់ពីបានរង់ចាំការចូលរួមកម្មវិធីបង្ហាញម៉ូដ Fashion Week តារាស្រីចិនកំពូលសម្រស់ Fan Bingbing ដែលអ្នកគាំទ្រឱ្យរហស្សនាមថា ជារាជិនីសម្រស់ នោះបានបង្ហាញវត្តមានក្នុងឈុតសម្លៀកបំពាក់ពណ៌ស ហើយមុខមាត់មិនសូវមានការ Make-up ប៉ុន្មានទេ។

រូបថតប៉ុន្មានស្លឹកដែលបានថតដោយ អ្នកជំនាញថតរូបអាជីពដ៏ល្បីល្បាញជនជាតិបរទេសម្នាក់ បានប្រាប់អ្នកសារព័ត៌មានឱ្យដឹងថា រូបថតរបស់តារាស្រីរូបនេះគ្រប់សន្លឹកទាំងអស់ មិនចាំបាច់កែកុននៅក្នុងកម្មវិធី Photoshop ទេ ព្រោះនាងមានសម្រស់ស្រស់ស្អាតបែបធម្មជាតិស្រាប់ទៅហើយ ហើយលោកអ្នកថែមទាំងមិនអាចរកឱ្យឃើញនូវចំណុចដែលថាមិនស្អាត ឬទើសទាស់ចិត្តត្រង់ណាមួយបាននោះឡើយ ព្រោះនាងគឺជា រាជិនីសម្រស់ ពិតៗតែម្ដង៕

October 2, 2017

កម្ពុជាមិនទាន់ប្រមូលពន្ធបានគ្រប់តាមផែនការកំណត់នៅឡើយ

ភ្នំពេញ៖ ត្រឹមរយៈពេល8 ខែដើមឆ្នាំ2017 អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុប្រមូលពន្ធបានប្រមាណជា 5,657 ពាន់លានរៀលស្មើនឹងប្រមាណជា 1,414.43លានដុល្លារសហរដ្ឋអាមេរិក ដែលមិនទាន់គ្រប់តាមផែនការកំណត់នៅឡើយទេ។

ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនាយកដ្ឋានពន្ធដារបានឱ្យដឹងក្នុងពិធីជួបសម្តែងការគួរសមរបស់ប្រតិភូនាវាយុវជនអាស៊ីអាគ្នេយ៍ថា ត្រឹមរយៈពេល8ខែ ដើមឆ្នាំ2017នេះ ការប្រមូលពន្ធទើបតែសម្រេចបានប្រមាណជា 82.43% នៃផែនការកំណត់ដោយច្បាប់ប៉ុណ្ណោះ បានន័យថា មិនទាន់គ្រប់100%នៅឡើយទេ។

ឯកឧត្តមមានប្រសាសន៍ថា ការអនុវត្តកំណែទម្រង់នេះ ចៀសមិនផុតពីផលប៉ះពាល់នោះទេ គ្រាន់តែតិច ឬច្រើនប៉ុណ្ណោះ ជាពិសេសការផ្លាស់ប្តូរផ្នត់គំនិត និងវប្បធម៌ការងាររបស់ «មន្ត្រីពន្ធដារជាអ្នកត្រួតត្រាអ្នកជាប់ពន្ធទៅជាអ្នកផ្តល់សេវា និងការប្រឈម ដែលសត្រូវនៃការកែទម្រង់គឺជាអ្នកមិនចង់កែទម្រង់» ក្នុងភាពជាអ្នកដឹកនាំស្ថាប័នដើម្បីឈានទៅទទួលបានជោគជ័យលើការងារ កំណែទម្រង់ត្រូវការឆន្ទៈខ្ពស់ ការតាំងចិត្តពុះពារមិនរាថយ ចំណេះដឹង ភាពជឿជាក់ ការបំពេញការងារប្រកបប្រតិសកម្ម និងផ្នត់គំនិតនៃការផ្តួចផ្តើម។

ឆ្លៀតក្នុងពេលនោះឯកឧត្តមបានផ្ញើសារតាមរយៈក្រុមយុវជនអាស៊ីអាគ្នេយ៍ឱ្យជួយផ្សព្វផ្សាយចែករំលែកបន្តចំណេះដឹង និងបទពិសោធការងារ ពាក់ព័ន្ធនឹងវិស័យពន្ធដារ ក្នុងន័យពង្រឹង និងបញ្ជ្រាបវប្បធម៌ នៃពន្ធដារ និងក្នុងន័យពង្រឹង និងបញ្ជ្រាបវប្បធម៌នៃការបង់ពន្ធនៅកម្ពុជាឱ្យបានកាន់តែជ្រួតជ្រាបដល់មជ្ឈដ្ឋានអ្នកជាប់ពន្ធនានា ក៍ដូចជាមន្ត្រីរាជការស៊ីវិល និងកងកម្លាំងប្រដាប់អាវុធទាំងអស់ដែរ។

គួររំឭកដែរថា ក្នុងរយៈពេល5ឆ្នាំចុងក្រោយនេះ ចាប់តាំងពីឆ្នាំ2012មក គឺតែងតែសម្រេចបានលើសផែនការ ហើយការប្រមូលចំណូលពន្ធបានកើនឡើងជាមធ្យមប្រមាណ 20% ក្នុងមួយឆ្នាំ ដែលជាក់ស្តែងបានកើនឡើងជាមធ្យមប្រមាណពី736លានដុល្លារអាមេរិក ក្នុងឆ្នាំ2012 រហូតទទួលបានប្រមាណជាង 1.4 ពាន់លានដុល្លារអាមេរិកក្នុងឆ្នាំ2016៕

October 2, 2017

នៅកម្ពុជា…បើគ្មានវិធានការទប់ស្កាត់ ឧស្ម័នផ្ទះកញ្ចក់នឹងក្លាយជាបញ្ហាប្រឈមដ៏ធំមួយ

គ្រាដែលបញ្ហាការប្រែប្រួលអាកាសធាតុបាននិងកំពុងក្លាយជាបញ្ហាប្រឈមមួយដ៏ធំនៅក្នុងពិភពលោកជាពិសេសនៅកម្ពុជា។ យោងតាមការសិក្សាមួយបានបញ្ជាក់ថា បរិមាណបញ្ចេញឧស្ម័នផ្ទះកញ្ចក់នៅកម្ពុជានឹងកើនឡើងប្រហែល4ដងនៅឆ្នាំ 2030 និងបន្តកើនឡើងប្រហែល 24ដង នៅឆ្នាំ2050 បើធៀបទៅនឹងឆ្នាំ2010 នេះបើគ្មានវិធានការទប់ស្កាត់។

ឯកឧត្តម ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថាន លើកឡើងថា បច្ចុប្បន្នការប្រែប្រួលអាកាសធាតុ បាននិងកំពុងក្លាយជាបញ្ហាប្រឈមមួយដ៏ធំ នៅក្នុងពិភពលោកដែលទាមទារឱ្យមានការចូលរួមពីគ្រប់ភាគីទាំងអស់ដើម្បីដោះស្រាយជាបន្ទាន់។ ដូច្នេះទើបក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថាន សហការជាមួយវិទ្យាស្ថានយុទ្ធសាស្ត្របរិស្ថានសកលនៃប្រទេសជប៉ុនបានរៀបចំកម្មវិធីសិក្ខាសាលាមួយស្តីពី ការកសាងសមត្ថភាពស្តីពីការអភិវឌ្ឍបញ្ចេញកាបូនតិចសម្រាប់ប្រទេសកម្ពុជា ឡាវ និងមីយ៉ាន់ម៉ា។ កម្មវិធីនេះធ្វើឡើងដើម្បីពិភាក្សាថា តើត្រូវពង្រឹងសហគមន៍ស្រាវជ្រាវដែលគាំទ្រដល់ការធ្វើសេចក្តីសម្រេចចិត្ត និងការអនុវត្តសកម្មភាពនានា ដោយផ្អែកលើវិទ្យាសាស្ត្រនៅប្រទេសកម្ពុជា ឡាវ និងមីយ៉ាន់ម៉ានាពេលអនាគតយ៉ាងដូចម្តេច? ។

ឯកឧត្តមបានបន្តថា ប្រទេសនៅតំបន់អាស៊ីអាគ្នេយ៍រួមទាំងកម្ពុជាផង បាននិងកំពុងប្រឈមនឹងផលប៉ះពាល់ពីការប្រែប្រួលអាកាសធាតុដែលបណ្តាលឱ្យបាត់បង់ជិវិតមនុស្ស សត្វ ហេដ្ឋារចនាសម្ព័ន្ធរូបវន្តធនធានធម្មជាតិ និងប៉ះពាល់ដល់ការអភិវឌ្ឍសេដ្ឋកិច្ចជាតិ និងសង្គមយ៉ាងធ្ងន់ធ្ងរ។ ជាក្ដីរំពឹងតាមរយៈការសិក្សាមួយនេះពិតជាបានឆ្លើយតបទៅតាមតម្រូវការចាំបាច់ជាក់ស្តែង និងការចែករំលែកនូវចំណេះដឹង បទពិសោធពីគោលនយោបាយ និងផែនការអភិវឌ្ឍន៍បញ្ចេញកាបូនតិច និងវិធានការដោះស្រាយការប្រែប្រួលអាកាសធាតុនៅបណ្តាប្រទេសមួយចំនួននៅតំបន់អាស៊ី និងផ្តល់ឱកាសឱ្យអ្នកចូលរួមស្វែងយល់កាន់តែច្បាស់ អំពីសារៈសំខាន់នៃការរៀបចំផែនការអភិវឌ្ឍបញ្ចេញកាបូនិក នៅតាមបណ្តាទីក្រុងនៅតំបន់អាស៊ី ជាពិសេសប្រទេសកម្ពុជា ឡាវ និងមីយ៉ាន់ម៉ា ។

គួរបញ្ជាក់ថា ដោយសារតែបម្រែបម្រួលអាកាសធាតុទឹកជំនន់ឆ្នាំ2013 បានធ្វើឱ្យកម្ពុជាបាត់បង់ថវិកាប្រមាណ 360លានដុល្លារ ស្មើនឹង10% នៃថវិកាជាតិ និងនៅឆ្នាំ2050 ការបាត់បង់សេដ្ឋកិច្ចជាតិដោយសារការប្រែប្រួលអាកាសធាតុអាចកើនដល់ប្រមាណ 3,5% នៃ GDP ប្រសិនបើពុំមានចាត់វិធានការណាមួយ ។យោងតាមរបាយការណ៍របស់អន្តរដ្ឋាភិបាលស្តីពីការប្រែប្រួលអាកាសធាតុលើកទី5 បានបង្ហាញថា ផែនដីកំពុងបន្តឡើងកម្តៅ ផលប៉ះពាល់ពីការប្រែប្រួលអាកាសធាតុទៅលើការអភិវឌ្ឍសេដ្ឋកិច្ច-សង្គម និងបរិស្ថានពិភពលោកកាន់តែធ្ងន់ធ្ងរឡើងៗ ។ ឧស្ម័នផ្ទះកញ្ចក់នៅលើពិភពលោកបានកើនឡើងជិត2ដងក្នុងរយៈពេល2ទសវត្សរ៍ចុងក្រោយនេះ ពីឆ្នាំ1990ដល់ឆ្នាំ 2010 បរិមាណនេះនឹងបន្តកើនឡើងកាន់តែខ្ពស់ប្រសិនបើគ្មានវិធានការកាត់បន្ថយសមស្របនោះទេ ។

ពាក់ព័ន្ធការប្រែប្រួលអាកាសធាតុ ស្ថាប័នរូបីយវត្ថុអន្តរជាតិ(IMF) ធ្លាប់បានប្រាប់ទៅកាន់ប្រទេសអ្នកមានឱ្យទៅជួយប្រទេសអ្នកក្រីក្រដើម្បីដោះស្រាយផលប៉ះពាល់ដោយការប្រែប្រួលអាកាសធាតុ ឬជាប្រទេសមានការរីកចម្រើនយឺតយ៉ាវ ឬក៏ប្រទេសដែលមានលំហូរជនភៀសខ្លួនច្រើន។

ស្ថាប័នអន្តរជាតិមួយនេះ បានលើកឡើងថា ប្រទេសក្រីក្រដែលមានចំណូលតិចតួច គឺបានបញ្ចេញឧស្ម័នផ្ទះកញ្ចក់តិចតួចតែប៉ុណ្ណោះ ដូច្នេះប្រទេសធំៗត្រូវតែចូលរួមផ្តល់ជំនួយក្នុងនាមជាប្រទេសដែលបានបញ្ចេញឧស្ម័នផ្ទះកញ្ចក់ច្រើន។ IMF លើកឡើងថា ការកើនឡើងនូវកម្ដៅរបស់ផែនដីបានជះឥទ្ធិពលមិនស្មើគ្នាឡើយ ហើយប្រទេសក្រីក្រនឹងលំបាកក្នុងការដោះស្រាយចំពោះផលប៉ះពាល់ដោយសារការប្រែប្រួលអាកាសធាតុនេះ។

ពាក្យ «ឧស្ម័នផ្ទះកញ្ចក់» Greenhouse gas (GHG) ជាឧស្ម័នដែលមាននៅក្នុងបរិយាកាស ដែលកើតឡើងដោយធម្មជាតិឬដោយសកម្មភាពមនុស្ស ហើយដែលស្រូបយក និងបញ្ចេញរស្មីតាមជំហានរលកជាក់លាក់ក្នុងជំហានរលកនៃរំភាយរស្មីកម្តៅក្រហមអាំងហ្វ្រាដែលភាយចេញពីផ្ទៃផែនដីបរិយាកាស និងពពក។ បាតុភូតទាំងនេះបង្កឱ្យមានផលផ្ទះកញ្ចក់។

ចំហាយទឹក (H2O)ឧស្ម័នកាបូនិក(CO2) ឌីអាសូតម៉ូណូអុកស៊ីត (N2O)មេតាន(CH4)និងអូសូន (O3) ជាឧស្ម័នផ្ទះកញ្ចក់ចម្បងៗនៅក្នុងបរិយាកាស របស់ផែនដី។ ក្រៅពីនេះ មានឧស្ម័នផ្ទះកញ្ចក់មួយចំនួននៅក្នុងបរិយាកាស ដែលបង្កើតឡើងដោយមនុស្សទាំងស្រុង ដូចជាហាឡូកាបួ និងសារធាតុដទៃទៀតដែលផ្ទុកក្លរនិងប្រូម គឺស្ថិតក្រោមការគ្រប់គ្រងនៃពិធីសារម៉ុងរ៉េអាល់។ ក្រៅពី CO2 N2O និង CH4ពិធីសារក្យូតូ គ្រប់គ្រងឧស្ម័នផ្ទះកញ្ចក់ដទៃទៀត ដូចជា ស៊ុលភួអ៊ិចសាភ្លុយអរីត (SF6) អ៊ីដ្រូភ្លុយអរ៉ូកាបួ (HFCs) និងពែរភ្លុយអរ៉ូកាបួ (PFCs)៕

October 2, 2017

មនុស្សជាច្រើនសុទ្ធតែចង់មានទម្លាប់អាន តែមិនដឹងចាប់ផ្តើមដោយវិធីណា

ការអានសៀវភៅ ឬអានអ្វីមួយ គឺជារឿងមួយដែលមនុស្សស្ទើរគ្រប់គ្នាទទួលស្គាល់ថាសំខាន់ ប៉ុន្តែពួកគេតែងមានឧបសគ្គមួយដែលមិនអាចធ្វើឱ្យពួកគេក្លាយជាអ្នកអានដ៏ល្អបាន នោះគឺ ការគ្មានទម្លាប់អាន ហើយតែងងងុយគេងរៀងរាល់ពេលដែលពួកគេកាន់សៀវភៅអាន។

ដើម្បីដោះស្រាយបញ្ហាទាំងអស់នេះ ឡារ៉ែន សូមជូននូវដំណោះស្រាយមួយចំនួនដើម្បីជាវិធីសាស្ត្រសម្រាប់អនុវត្តចំពោះអ្នកដែលចង់បង្កើតទម្លាប់នៃការអាន។

ឯកសារសម្រាប់អាន

មនុស្សម្នាក់ៗ ពេលធ្វើអ្វីមួយ តែងតែចង់ចាប់ផ្តើមភ្លាមៗ និងទទួលបានជោគជ័យភ្លាមៗតែម្ដង។ ដូចជាអ្នកហាត់ប្រាណថ្ងៃទី1 ហើយចង់បានសាច់ដុំពោះ 6កង់តែម្តងជាដើម។ វាមិនអាចទៅរួចទេ ហេតុនេះការអានក៏ដូចគ្នាដែរ គ្មានមនុស្សណាម្នាក់មិនចង់អានឯកសារសំខាន់ៗដើម្បីជាប្រយោជន៍ភ្លាមៗនោះទេ តែនៅពេលដែលពួកគាត់ខ្វះទម្លាប់នៃការអាន គាត់អាចនឹងធុញ ហើយបោះបង់ការអានចោលវិញយ៉ាងងាយ។

ជាវិធីសាស្ត្រល្អមួយសម្រាប់អ្នកអាន គឺត្រូវស្វែងរកឱ្យឃើញនូវឯកសារដែលខ្លួនចូលចិត្តអាន ចាប់ពីសៀវភៅដែលមានរូបច្រើនអក្សរតិច រហូតដល់សៀវភៅ ឫឯកសារដែលមានសុទ្ធតែអក្សរទាំងអស់។ ក្រៅពីនេះ ការអានទស្សនាវដ្តីកម្សាន្ត ការអានរឿងប្រលោមលោក រឿងកំប្លែងសប្បាយៗក៏អាចជាចំណុចមួយដែលធ្វើឱ្យអ្នកចូលចិត្តអានសៀវភៅបានដែរ ហេតុនេះសូមអានអ្វីក៏ដោយឱ្យអ្នកតែពេញចិត្ត រហូតដល់មានទម្លាប់អានដោយរីករាយហើយ សឹមប្តូរគោលដៅទៅអានសៀវភៅឯកសារដែលមានប្រយោជន៍ នោះយើងនឹងអាចក្លាយជាអ្នកអានម្នាក់ដែលខុសប្លែកពីពេលមុនមិនខាន។

នៅឱ្យឆ្ងាយពីរបស់ដែលអ្នកធ្លាប់ញៀន បើសិនចង់អានសៀវភៅបានយូរ

ពាក្យថា ញៀន គឺមានច្រើន អ្នកខ្លះញៀនស្រា ញៀនល្បែង ញៀនថ្នាំញៀន ដែលសុទ្ធតែជាបញ្ហាធ្ងន់ធ្ងរ ព្រោះជាទូទៅមនុស្សដែលញៀនរបស់ទាំងអស់នេះប្រហែលជាមិនសូវចង់អានសៀវភៅប៉ុន្មានទេ តែញៀនដែលយើងចង់និយាយនៅទីនេះគឺញៀនរបស់កំប៉ិកកំប៉ុក ដូចជាញៀន Facebook ញៀនហ្គេមទូរស័ព្ទដៃ ញៀនជជែកលេងតាមទូរស័ព្ទ ឬញៀនការនិយាយដើមគេជាដើម។

ការដកខ្លួនចេញពីរបស់ដែលអ្នកធ្លាប់ជក់ចិត្តដែលមិនមែនជាការអាននេះមួយរយៈ អាចធ្វើឱ្យអារម្មណ៍របស់អ្នកស្ងប់ស្ងាត់ ហើយមានចន្លោះល្អមួយសម្រាប់ការអភិវឌ្ឍខ្លួនតាមរយៈការអាន។ ហេតុនេះប្រសិនបើចង់មានទម្លាប់អានសៀវភៅ សូមនៅឱ្យឆ្ងាយពីរឿងទាំងឡាយណាដែលធ្វើឱ្យយើងគិតថា រំខាន ឬជាគ្រឿងអូសទាញឱ្យអ្នកបោះសៀវភៅចោល។

កុំបង្ខំអាន និងកុំអានទាំងបង្ខំ

អ្នកដែលចង់បង្កើតទម្លាប់អានដំបូងៗ គេមិនអានទាំងបង្ខំភ្លាមៗ ឬនៅកន្លែងណាក៏អានបានដែរនោះទេ តែគេអាចចាប់ផ្តើមពីការសម្រួលអារម្មណ៍ឱ្យបានល្អជាមុនសិន។ ដើម្បីឱ្យងាយស្រួលអាន អ្នកអាចស្វែងរកពេលសម្រាកដ៏សមរម្យណាមួយជាប្រចាំ បើទោះបីជាពេលនោះខ្លីក៏ដោយ តែឱ្យតែស្ថិតក្នុងបរិយាកាសមិនមានឮសំឡេងរំខានខ្លាំង មិនហប់ ឬមិនមានការធុញថប់អារម្មណ៍ជាដើម។

សូមចាប់ផ្តើមអានសៀវភៅក្នុងបរិយាកាសស្ងប់ស្ងាត់ និងរីករាយ មុនពេលឈានដល់ការក្លាយជាអ្នកអានម្នាក់ដែលអាចអានបានគ្រប់ពេលវេលា និងគ្រប់ទីកន្លែង៕

October 2, 2017

បើមិនប្រយ័ត្ន និស្សិតអាចជ្រើសយកជំនាញតាមក្តីសុបិនក្លែងក្លាយ

ជារៀងរាល់ឆ្នាំ និស្សិតដែលបានបញ្ចប់ការសិក្សានៅមហាវិទ្យាល័យមួយចំនួនតែងតែត្អូញត្អែរចំពោះការដែលខ្លួនបានសិក្សាចំជំនាញដែលធ្លាប់នឹកស្រមៃតាំងពីតូច ឬបានធ្វើការងារដែលធ្លាប់បានស្រមៃទុកហើយ តែបែរជាមិនសប្បាយចិត្តសោះ ហើយទីបំផុតក៏ងាកទៅរកជំនាញមួយផ្សេង ខុសពីមុខជំនាញដែលរៀននៅមហាវិទ្យាល័យ។

ពាក់ព័ន្ធនឹងបញ្ហានេះ កញ្ញា អៀង លីនដា គ្រូបង្វឹកកម្មវិធី Life Coach បានលើកឡើងថា ការដែលយុវជនមិនទាន់រកឃើញសក្តានុពលរបស់ខ្លួនឯង ឬសិក្សាលើជំនាញមួយដែលធ្លាប់គិតថា ចង់រៀន តែបែរជាមិនសូវពូកែ ហើយបោះបង់ចោលវិញនោះ អាចមកពីពួកគេរកមិនទាន់ឃើញក្តីសុបិនពិតប្រាកដ។ មនុស្សជាច្រើនបានសម្លឹងមើលតែលើរូបភាពខាងក្រៅនៃអាជីពមួយ ដូចជាមើលឃើញពីការប្រែប្រួលនៃជីវភាព ឬមើលឃើញតែពីសម្ភាររបស់មនុស្សណាម្នាក់ក្រោយពេលដែលមានជំនាញមួយ ហើយគិតថា ប្រសិនបើខ្លួនបានធ្វើដូចមនុស្សម្នាក់នោះប្រហែលជាអាចមានរបស់ទាំងអស់នោះដូចគ្នា ដោយមិនបានគិតពីចំណង់ចំណូលចិត្តពិតប្រាកដរបស់ខ្លួន ដែលធ្វើឱ្យពួកគេមិនអាចសម្រេចក្តីសុបិនពិតប្រាកដបាន។

កញ្ញា អៀង លីនដា បាននិយាយថា៖ «ពេលខ្លះនិស្សិតចូលចិត្តចំណាយពេលច្រើនដើម្បីស្តាប់គំនិតពីមនុស្សជុំវិញខ្លួន ឬមើលមនុស្សជុំវិញខ្លួនច្រើនពេក ហើយភ្លេចគិតពីខ្លួនឯង»។

អ្នកបណ្តុះបណ្តាលខាងលើបានលើកឡើងផងដែរថា សំឡេងខាងក្រៅថ្វីត្បិតតែល្អសម្រាប់យុវវ័យម្នាក់ៗក្នុងការកំណត់ទិសដៅអនាគតមែន តែសូមកុំធ្វើតាមទាំងស្រុងហើយភ្លេចគិតពីខ្លួនឯង។ ជាធម្មតា អ្នកខាងក្រៅអាចមើលយើងឃើញតែមួយជ្រុងប៉ុណ្ណោះ តែស្ថានភាពពិត គឺមានតែខ្លួនយើងទេដែលជាអ្នកស្គាល់ខ្លួនឯងច្បាស់។

កញ្ញាលីនដា បានផ្តល់ដំណោះស្រាយថា ដើម្បីដោះស្រាយបញ្ហាជ្រើសរើសជំនាញខុសនេះ យុវជនគួរតែស្រង់យកមតិពីអ្នកជុំវិញខ្លួនសម្រាប់ជាមតិដើម្បីពិចារណា ហើយធ្វើការសម្រេចដោយខ្លួនឯងផ្ទាល់ទើបជាការប្រសើរបំផុត។ ចំណុចសំខាន់ដែលត្រូវធ្វើ គឺចំណាយពេលវេលាមួយចំនួនដើម្បីស្តាប់បេះដូងខ្លួនឯង ហើយពិចារណាឱ្យបានដិតដល់ថា តើយើងស្រឡាញ់អ្វីឱ្យពិតប្រាកដ មុននឹងជ្រើសរើសជំនាញសិក្សានៅមហាវិទ្យាល័យ៕

October 2, 2017

សង្ស័យ Song Hye Kyo កំពុងតាំងគភ៌មុនរៀបការ

នៅថ្ងៃទី2 ខែតុលា ឆ្នាំ2017នេះ សារព័ត៌មាន Teenee បានចេញផ្សាយឱ្យដឹងថា នៅលើបណ្ដាញទំនាក់ទំនងសង្គម អ៊ីនស្ដាក្រាមដែលមានឈ្មោះថា dots_kdrama បានបង្ហោះរូបភាពរបស់គូស្នេហ៍ Song Hye Kyo និងមិត្តប្រុសនាងគឺ លោក Song Joong Ki ដែលបានធ្វើដំណើរវិលត្រឡប់មកពីទីក្រុងប៉ារីស ប្រទេសបារាំងវិញ។

ដោយឡែកមានរូបថត2សន្លឹកដែលបង្ហាញពីគូស្នេហ៍មួយគូនេះកំពុងដើរចេញពីព្រលានយន្ដហោះ ហើយជួបរាក់ទាក់ជាមួយអ្នកគាំទ្រ តែអ្វីដែលគួរឱ្យកត់សម្គាល់ខ្លាំងបំផុតនោះគឺ ពោះរបស់តារាស្រី Song Hye Kyo មានសភាពហាក់ដូចជាស្ត្រីដែលកំពុងតាំងគភ៌ ក៏ប៉ុន្តែយ៉ាងណាមិញ បើតាមសារព័ត៌មានរបស់កូរ៉េ តារាស្រីរូបនេះនៅមិនទាន់មានការបកស្រាយណាមួយឱ្យច្បាស់ការដល់អ្នកគាំទ្រឡើយ។ ដើម្បីស្រាយចម្ងល់ខាងលើនេះ សូមទស្សនារូបភាពទាំងអស់ខាងក្រោមនេះ ៖

October 2, 2017

ពិតជាអស្ចារ្យមែន!! ឈុតប្រចាំជាតិឡាវ សម្រាប់កាប្រកួត Miss Grand International

ជិតដល់ថ្ងៃប្រកួតហើយសម្រាប់វេទិកា Miss Grand International 2017 ដែលរៀបចំឡើងដោយប្រទេសវៀតណាម នៅថ្ងទី25 ខែតុលា ឆ្នាំ2017 បវរកញ្ញាតំណាងប្រទេសឡាវគឺ កញ្ញា ជីនណាលី ណៈរៈស៊ីង ឬឈ្មោះហៅក្រៅថា ហ្វាសៃ ក៏ជាបេក្ខនារីបវរកញ្ញាម្នាក់ដែរដែលនឹងត្រូវដើរបង្ហាញម៉ូដឈុតប្រចាំជាតិចូលរួមក្នុងការប្រកួតនៅក្នុងឆ្នាំនេះ ។ នេះបើតាមសារព័ត៌មាន Teenee នៅថ្ងៃទី2 ខែតុលា ឆ្នាំ2017។

ដោយឡែកឈុតនេះទៀតសោត បានក្លាយជាកម្លាំងជំរុញចិត្តដល់ប្រជាជនឡាវគ្រប់រូប ព្រោះខាងអ្នកឧបត្ថម្ភបវរកញ្ញាឡាវបាននាំយកឈុតនេះមកពីវត្តព្រះធាតុហ្លួងវៀងច័ន្ទជាវត្តប្រាសាទដ៏ចំណាស់មួយ និងជាឈុតបុរាណដែលបង្ហាញពីភាពស្រស់ស្អាតពិបាកនឹងបរិយាយប្រចាំវប្បធម៌ជាតិនៃប្រទេសឡាវ និងកាន់តែធ្វើឱ្យប្រជាជនឡាវមានមោទនភាពខ្លាំងបំផុតទៀតផង។ គួរបញ្ជាក់ដែរថា ឈុតដែលប្រកបដោយគ្រឿងអលង្ការភ្លឺចិញ្ចាច មានរស្មីពណ៌មាស មានរចនាក្បាច់ផ្កាភ្ញី និងសត្វនាគមួយឈុតដ៏ប្រណីត ថែមទាំងមានលក្ខណៈឯកពិសេសដោយឡែក ដែលរចនាម៉ូដដោយ អ្នកនាង កែវ ស៊ីដួង ជាជនជាតិឡាវ ដែលជាអ្នកជំនាញផ្នែកសិល្បៈបុរាណ វប្បធម៌ ទំនៀមទម្លាប់ និងយល់ដឹងពីប្រពៃណីរបស់ស៊ុនសាតឡាវ(ជនជាតិឡាវ) យ៉ាងច្បាស់លាស់។

ដើម្បីឱ្យកាន់តែជាក់ច្បាស់ សូមទស្សនារូបភាពទាំងអស់ខាងក្រោមនេះ៖

October 2, 2017

Category: សង្គម និងសេដ្ឋកិច្ច