សង្គម និងសេដ្ឋកិច្ច - La Reine Media

ឳពុកក្មេករបស់បងប្រុសខេមរៈ សិរីមន្តទទួលមរណភាព

បើតាមរយៈFacebook Page របស់កំពូលតារាចម្រៀង ខេមរៈ សិរីមន្តបានឱ្យដឹងថា ឳពុកក្មេករបស់បងប្រុសលោកគឺឯកឧត្តម ចៅ ភារម្យ បានទទួលមរណភាពក្នុងអាយុ 72 ឆ្នាំ កាលពីថ្ងៃទី2 ខែតុលា ឆ្នាំ2017។

ដូចដែលប្រិយមិត្តធ្លាប់បានដឹង បានស្គាល់ហើយ កាលពីពេលកន្លងមក លោកខេមរៈ ភារុណ គឺជាបងប្រុសរបស់កំពូលតារាចម្រៀងខេមរៈ សិរីមន្តដែលធ្លាប់បានបញ្ចេញស្នាដៃនិពន្ធបទចម្រៀងល្បីៗជាច្រើនកន្លងមកឱ្យតារាប្រុសរូបនេះច្រៀង។ ហើយកាលពីរាត្រីម្សិលមិញនេះដែរ តារាចម្រៀងរូបនេះក៏បានចូលរួមរំលែកទុក្ខដ៏ក្រៀមក្រំជាមួយនឹងក្រុមគ្រួសារបងប្រុសរបស់ខ្លួនតាមរយៈFacebook Pageថា «សូមវិញ្ញាណក្ខន្ឌលោកអ៊ុំបានទៅដល់សុខគតិភពកុំបីអាក់ខានឡើយ»៕

October 5, 2017

ល្បីស្អាតៗ តាមពិតកែសម្ផស្សសោះ…បវរកញ្ញា Miss Universe Vietnam

បើតាមសារព័ត៌មាន kenh14 ដែលបានចេញផ្សាយនៅថ្ងៃព្រហស្បតិ៍ ទី5 ខែតុលា ឆ្នាំ2017នេះ បានឱ្យដឹងថា កម្មវិធីប្រកួតបវរកញ្ញាលំដាប់ថ្នាក់ពិភពលោក Miss Universe Vietnam 2017 ទទួលបានការចាប់អារម្មណ៍យ៉ាងខ្លាំងចំពោះសម្រស់បវរកញ្ញាដែលស្អាតដាច់គេតែចំនួនប៉ុន្មាននាក់ប៉ុណ្ណោះ ដូចជា Hoang Thuy, Mau Thuy, Mai Ngo, Huyen Thanh និងជាពិសេសជាងគេនោះគឺ នាង Ly Thien Huong ដែលមានជើងសស្រឡូន ហើយមានកម្ពស់ 174 សង់ទីម៉ែត្រ ព្រមទាំងមានទំហំទាំង3 (ដើមទ្រូង ចង្កេះ និងត្រគៀក) ត្រូវតាមខ្នាតស្ដង់ដារទៀតផង។

តែអ្វីដែលកំពុងធ្វើឱ្យទស្សនិកជនភ្ញាក់ផ្អើលនៅពេលនេះគឺ នាង Thien Huong ត្រូវបានក្រុមអ្នកលេងបណ្ដាញសង្គមយករូបភាពពិតរបស់នាងមកបង្ហោះ ដែលស្ដែងឱ្យឃើញថា ការពិត នេះជាសម្រស់ក្លែងក្លាយទេ ហើយរូបភាពពីពេលមុននេះទើបជារូបសម្រស់ពិតរបស់នាង។ គឺជារូបសម្ផស្សដ៏គួរឱ្យភ័យខ្លាច ខុសគ្នាដាច់នឹងពេលបច្ចុប្បន្ននេះដែលនាងមានសម្រស់ស្អាតដាច់គេ។ យ៉ាងណាមិញ ដើម្បីកុំឱ្យប្រិយមិត្តមានមន្ទិលសង្ស័យយូរនោះ សូមទស្សនារូបភាពខាងក្រោមនេះ៖

October 5, 2017

Sam Smith ថើបសង្សារប្រុសដូចគ្នាកណ្ដាលទីសាធារណៈ

បន្ទាប់ពីបែកធ្លាយរូបភាពប៉ុន្មានសន្លឹករបស់តារាចម្រៀងមនោសញ្ចេតនាលន្លង់លន្លោច Sam Smith បានថើបជញ្ជក់មាត់គ្នាជាមួយសង្សារប្រុសដូចគ្នាដែលជាតួអង្គនៅក្នុងរឿង “13 Reasons Why” លោក Brandon Flynn រួចមក ស្រាប់តែថ្មីៗនេះ តារាចម្រៀងរូបនេះបានអះអាងប្រាប់សារព័ត៌មាន The Star ថា លោកពិតជាមានទំនាក់ទំនងស្នេហាជាមួយគ្នាពិតប្រាកដមែន។

រូបភាពឱបថើបគ្នានេះ ស្ថិតនៅក្នុងទីសាធារណៈមួយនៃទីក្រុងញូវយ៉ក សហរដ្ឋអាមេរិក ដែលបង្ហាញពីការណាត់ជួបគ្នា និងទទួលទានអាហារជាមួយគ្នាផងដែរ។ គួរបញ្ជាក់ផងដែរថា តារាចម្រៀងវ័យ 25 ឆ្នាំ និង តារាសម្ដែងវ័យ 23 ឆ្នាំ ទាំងពីរនាក់នេះ បានបញ្ចាក់ថា ពួកគេកំពុងតែមានទំនាក់ទំនងស្និទ្ធស្នាលនឹងគ្នា ហើយកំពុងតែស្វែងយល់ពីចិត្តគ្នាទៅវិញទៅមក ដូច្នេះហើយទើបអ្នកគាំទ្របានឃើញពួកគេបណ្ដើរគ្នាទៅទទួលទានអាហារ ព្រមទាំងអង្គុយផឹកស្រាយ៉ាងផ្អែមល្ហែមជាមួយគ្នា ពោលគឺ ញ៉ាំបណ្ដើរ ថើបជញ្ជក់មាត់គ្នាបណ្ដើរ។ ផ្អែមល្ហែមដល់កម្រិតនេះឯង ដែលធ្វើឱ្យអ្នកគាំទ្រជាច្រើននឹកស្មានមិនដល់ ដូច្នេះដើម្បីឱ្យកាន់តែច្បាស់បន្ថែមទៀត សូមទស្សនារូបភាពទាំងឡាយខាងក្រោមនេះ៖

October 5, 2017

Kane នឹងធ្វើជាប្រធានក្រុម ពេលអង់គ្លេស ប៉ះ ស្លូវេនី រាត្រីនេះ

Harry Kane នឹងធ្វើជាប្រធានក្រុមបាល់ទាត់ជម្រើសជាតិអង់គ្លេស ក្នុងពេលប្រកួតជាមួយនឹងក្រុមជម្រើសជាតិស្លូវេនី ក្នុងវគ្គជម្រុះសម្រាប់ព្រឹត្តិការណ៍ World Cup ឆ្នាំ2018 នៅរាត្រីនេះ ប៉ុន្តែ លោក Gareth Southgate មិនទាន់បានសម្រេចចិត្តក្នុងការជ្រើសរើសយកប្រធានក្រុមជាអចិន្ត្រៃយ៍នៅឡើយទេ។

លោក Southgate គ្រូបង្វឹករបស់ក្រុមជម្រើសជាតិអង់គ្លេស បានប្រកាសថា Kane នឹងដឹកនាំក្រុមរបស់លោកក្នុងការប្រកួតនៅថ្ងៃព្រហស្បតិ៍នេះ ប៉ុន្តែ លោកមិនបានប្រកាសថា ខ្សែប្រយុទ្ធរបស់ក្លិប Tottenham រូបនេះជាប្រធានក្រុមអចិន្ត្រៃយ៍ឡើយ។ អ្នកចាត់ការទូទៅរូបនេះ បានស្ទាក់ស្ទើរក្នុងការតែងតាំងប្រធានក្រុមជាអចិន្ត្រៃយ៍ ចាប់តាំងពីចូលជំនួសកន្លែងរបស់លោក Sam Allardyce កាលពីឆ្នាំមុន និងបានជ្រើសរើសប្រធានក្រុមរបស់លោកទៅតាមការប្រកួតមួយលើក។

ខ្សែបម្រើ Jordan Henderson របស់ក្លិប Liverpool ធ្លាប់បានធ្វើជាប្រធានក្រុមរបស់អង់គ្លេស ក្នុងពេលក្រុមខ្លួនទទួលជ័យជម្នះលើក្រុមជម្រើសជាតិស្លូវ៉ាគី និងម៉ាល់ត៍ កាលពីដើមឆ្នាំនេះ ស្របពេលដែល Kane ក៏ធ្លាប់បានកាន់តំណែងជាប្រធានក្រុមក្នុងពេលប្រកួតជាមួយនឹងក្រុមជម្រើសជាតិបារាំង និងស្កុតលែនដែរ។ លោក Southgate នឹងត្រូវសម្រេចចិត្តថា តើលោកនឹងត្រូវតែងតាំងប្រធានក្រុមជាអចិន្ត្រៃយ៍ម្នាក់ នៅមុនយុទ្ធនាការ World Cup ក្នុងប្រទេសរុស្ស៊ី នៅរដូវក្តៅក្រោយ ឬយ៉ាងណា ប៉ុន្តែ គ្រូបង្វឹករូបនេះជឿជាក់ថា Kane គឺជាមនុស្សដ៏ស័ក្តិសមក្នុងការដឹកនាំក្រុមអង់គ្លេស ក្នុងពេលប្រកួតជាមួយនឹងក្រុមជម្រើសជាតិស្លូវេនី នៅកីឡដ្ឋាន Wembley។ លោក Southgate បានឲ្យដឹងថា៖ «រូបគេនឹងធ្វើជាប្រធានក្រុមនៅថ្ងៃស្អែកនេះ ជាព័ត៌មានដែលរូបគេបានដឹងរយៈពេលមួយខែមុនទៅហើយ យើងបានធ្វើការពិភាក្សាគ្នារួចជាស្រេច»។

ក្រុមជម្រើសជាតិអង់គ្លេស នឹងឈានទៅកាន់ការប្រកួតនេះ ដោយដឹងថា ការដណ្តើមបានជ័យជម្នះពេលជួបក្រុមស្លូវេនី នឹងគ្រប់គ្រាន់សម្រាប់ពួកគេក្នុងការកក់កៅអីទៅ World Cup នៅរុស្ស៊ី ឆ្នាំ2018 ខណៈដែលពួកគេត្រូវការត្រឹមតែ2ពិន្ទុទៀតប៉ុណ្ណោះពីការប្រកួតជម្រុះ2លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ Sky Sports

October 5, 2017

ក្រៅពីវិស័យកាត់ដេរ កម្ពុជាត្រូវពង្រឹងវិស័យផ្សេងៗទៀត ទើបអាចរក្សាស្ថិរភាពកំណើនសេដ្ឋកិច្ច

ភ្នំពេញ – យោងតាមការព្យាកររបស់ធនាគារពិភពលោកបានបង្ហាញឱ្យឃើញថា កំណើនសេដ្ឋកិច្ចកម្ពុជានឹងមានការធ្លាក់ចុះបន្ដិចនៅត្រឹម 6.8% ក្នុងឆ្នាំនេះ ខណៈការនាំចេញផលិតផលវាយនភណ្ឌទៅកាន់ក្រៅប្រទេសមានការថយចុះ។

បញ្ហាចម្បងមួយដែលគេមើលឃើញថា ជាកត្តារុញច្រានឱ្យសេដ្ឋកិច្ចកម្ពុជាមានការថយចុះបន្ដិចនោះ គឺដោយសារតែប្រាក់ឈ្នួលរបស់កម្មករបានកើនឡើង រីឯតម្លៃផលិតផលវាយនភណ្ឌមានការធ្លាក់ចុះបណ្ដាលឱ្យសកម្មភាពនៃការនាំចេញផលិតផលទាំងនោះមានការថយចុះដែរ។

យោងតាមការលើកឡើងរបស់លោក លី សូដេត សេដ្ឋវិទូជាន់ខ្ពស់នៃធនាគារពិភពលោកបានបញ្ជាក់ថា ដើម្បីរក្សាឱ្យបានកំណើនសេដ្ឋកិច្ច កម្ពុជាត្រូវតែប្រឹងប្រែងពង្រីកសក្ដានុពលនៃការផលិតនូវផលិតថ្មីបន្ថែមទៀតក្រៅពីផលិតផលវាយនភណ្ឌ ធ្វើយ៉ាងណាជំរុញឱ្យមានការនាំចេញកាន់តែផុលផុស។

នៅក្នុងឆ្នាំនេះការនាំចេញលើវិស័យវាយនភណ្ឌមានការធ្លាក់ចុះនៅត្រឹម5.4%គិតត្រឹមឆមាសទីមួយ បើបើធៀបទៅនឹងឆ្នាំ2016 រយៈពេលដូចគ្នាមានការនាំចេញរហូតដល់ 8.4% ។

សេដ្ឋវិទូជាន់ខ្ពស់រូបនេះប្រាប់យ៉ាងដូច្នេះថា៖«ការពិតសេដ្ឋកិច្ចដែលធ្លាក់ចុះពីអត្រា7.0%មកនៅត្រឹម6.8% ដោយសារតែវិស័យកាត់ដេររបស់យើងថយល្បឿនបន្ដិច លើកមុនយើងមានកំណើនដល់8%ឥឡូវយើងមានការធ្លាក់ចុះមកនៅត្រឹម5% ។ តែយ៉ាងណាក៏ដោយ ប្រទេសយើងនៅមានឧស្សាហកម្មថ្មីៗជាច្រើនទៀត ដែលកំពុងរីកលូតលាស់ ដូច្នេះយើងត្រូវតែថែបំប៉នវាឱ្យមានសក្ដានុពលខ្លាំងឡើងជាងហ្នឹងទៀត ដើម្បីជំនួស និងជួយទប់នូវការធ្លាក់ចុះបន្ដិចម្ដងនៃវិស័យកាត់ដេររបស់យើង ព្រោះយើងមិនអាចរារាំងវិស័យកាត់ដេរមិនឱ្យទៅណាបានទេ»។

ជាមួយគ្នានេះដែរ លោក លី សូដេត បន្ថែមថា ប្រសិនបើសេដ្ឋកិច្ចកម្ពុជាឡើងខ្ពស់ តម្លៃពលកម្មឡើងខ្ពស់ ដូច្នេះយើងត្រូវផលិតផលិតផលណាដែលមានតម្លៃជាងផលិតផលវាយនភណ្ឌ (សម្លៀកបំពាក់) នេះ។ ទោះយ៉ាងណា យើងត្រូវទប់ទល់នឹងការថយចុះយ៉ាងគំហុកនៃវិស័យកាត់ដេរដែរ បើមិនដូច្នោះទេ យើងមិនអាចរក្សាស្ថិរភាពនៃកំណើនសេដ្ឋកិច្ចបានទេ៕

October 5, 2017

អាហ្សង់ទីន អ៊ុយរូហ្គាយ និងប៉ារ៉ាហ្គាយ រួមគ្នាដេញថ្លៃធ្វើជាម្ចាស់ផ្ទះ World Cup ឆ្នាំ2030

ប្រទេសអាហ្សង់ទីន អ៊ុយរូហ្គាយ និងប៉ារ៉ាហ្គាយ នឹងរួមគ្នាបង្កើតការដេញថ្លៃមួយដើម្បីធ្វើជាម្ចាស់ផ្ទះក្នុងព្រឹត្តិការណ៍ World Cup នៅឆ្នាំ2030។ នេះបើយោងតាមការប្រកាសរបស់ប្រធានាធិបតីរបស់ប្រទេសទាំងបីកាលពីថ្ងៃពុធ។

លោក Horacio Cartes ប្រធានាធិបតីរបស់ប្រទេសប៉ារ៉ាហ្គាយ បានបញ្ជាក់កាលពីខែសីហាថា ប្រទេសរបស់លោកនឹងចូលរួមដាក់សំណើដេញថ្លៃដែលត្រូវបានចូលរួមដោយប្រទេសអាហ្សង់ទីន និងអ៊ុយរូហ្គាយ ដែលធ្លាប់បានធ្វើជាម្ចាស់ផ្ទះ និងបានឈ្នះពាន World Cup ដំបូងគេ កាលពីឆ្នាំ1930។ លោក Cartes បានចូលរួមប្រជុំជាមួយនឹងប្រធានាធិបតីរបស់ប្រទេសអាហ្សង់ទីន និងអ៊ុយរូហ្គាយ គឺលោក Mauricio Macri និងលោក Tabare Vazquez ក្នុងទីក្រុង Buenos Aires កាលពីថ្ងៃពុធ ដើម្បីធ្វើការប្រកាសជាផ្លូវការ។ លោក Cartes បានឲ្យដឹងថា៖ «កិច្ចប្រជុំជាលើកទី1សម្រាប់ការរៀបចំការដេញថ្លៃនេះ នឹងត្រូវរៀបចំឡើងនៅសប្តាហ៍ទី1នៃខែវិច្ឆិកា។

ប្រទេសផ្សេងទៀតក៏ចង់ធ្វើជាម្ចាស់ផ្ទះដែរ ប៉ុន្តែ វានឹងមានការប្រជែងដ៏ខ្លាំងមួយពីសំណាក់ប្រទេសអ៊ុយរូហ្គាយ ដែលនឹងធ្វើការអបអរគម្រប់ខួបឆ្នាំទី100របស់គេនៃការធ្វើជាម្ចាស់ផ្ទះ» ចាប់តាំងពីប្រទេសនេះបានរៀបចំព្រឹត្តិការណ៍ World Cup ជាលើកទី1មក។ ប្រទេសម្ចាស់ផ្ទះអ៊ុយរូហ្គាយ បានផ្តួលក្រុមជម្រើសជាតិអាហ្សង់ទីន ក្នុងលទ្ធផល 4-2 ក្នុងការប្រកួតវគ្គផ្តាច់ព្រ័ត្រ កាលពីឆ្នាំ1930 ក្នុងទីក្រុង Montevideo។

សូមបញ្ជាក់ថា ព្រឹត្តិការណ៍ World Cup បន្ទាប់(ឆ្នាំ2018)នឹងត្រូវប្រព្រឹត្តទៅនៅក្នុងប្រទេសរុស្ស៊ី ខណៈដែលកាតា នឹងធ្វើជាម្ចាស់ផ្ទះក្នុងឆ្នាំ2022។ ដោយឡែក ការដាក់សំណើដេញថ្លៃរួមគ្នារវាងប្រទេសសហរដ្ឋអាមេរិក ម៉ិកស៊ិក និងកាណាដា កំពុងតែមានប្រៀបធ្វើជាម្ចាស់ផ្ទះ World Cup ឆ្នាំ2026 ខណៈដែលមានតែប្រទេសម៉ារ៉ុក មួយប៉ុណ្ណោះ ដែលបានចូលខ្លួនក្នុងការដេញថ្លៃ៕

ប្រភពពី៖ Sport24

October 5, 2017

ចាប់ពីឆ្នាំ2018ទៅ កម្មករកាត់ដេរនឹងទទួលបានប្រាក់ខែច្រើនហើយ

ភ្នំពេញ៖ ក្រុមការងារបច្ចេកទេសត្រីភាគី រួមមានភាគីក្រសួងការងារ ភាគីក្រុមសហជីពតំណាងកម្មករ និងភាគីនិយោជក (ថៅកែ) បានជួបប្រជុំគ្នាមួយដើម្បីធ្វើការចរចាគ្នាស្វែងរកដំណោះស្រាយក្នុងការដំឡើងប្រាក់ខែឱ្យកម្មករ-កម្មការិនីកាត់ដេរ និងដេរស្បែកជើងសម្រាប់ឆ្នាំ 2018ខាងមុខ។

ជាលទ្ធផលនៃកិច្ចប្រជុំក្រុមការងារបច្ចេកទេសត្រីភាគីដើម្បីពិភាក្សាពីប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ2018ខាងមុខនេះ ភាគីនីមួយៗនៃក្រុមការងារបច្ចេកទេសត្រីភាគីបានដាក់សំណើចុងក្រោយរបស់ខ្លួន ដោយក្នុងនោះភាគីសហជីពស្នើសុំ 170ដុល្លារ ភាគីនិយោជកស្នើសុំត្រឹម 162ដុល្លារ និងភាគីរាជរដ្ឋាភិបាលសម្របសម្រួលដល់ 165ដុល្លារ។

ប៉ុន្តែយ៉ាងណានោះ ក្រុមការងារបច្ចេកទេសទាំងបីមិនទាន់ឯកភាពគ្នាទាំងស្រុងនៅឡើយទេ ដោយគណៈកម្មការប្រឹក្សាការងារនឹងកោះប្រជុំនៅរសៀលថ្ងៃទី5 ខែតុលា ឆ្នាំ2017នេះ ម្ដងទៀត ដើម្បីប្រជុំពិនិត្យសម្រេចលើសំណើរបស់ភាគីនីមួយៗនេះ។

សូមជម្រាបថា ក្នុងពិធីជួបសំណេះសំណាលជាមួយកម្មករ-កម្មការិនីកាត់ដេរ នៅក្នុងតំបន់សេដ្ឋកិច្ចកាលពីម្សិលមិញនេះ សម្តេចនាយករដ្ឋមន្ត្រី ហ៊ុន សែន បានប្រកាសថា ប្រាក់ខែអប្បបរមារបស់កម្មករកាត់ដេរនៅឆ្នាំ2018នឹងទទួលបានយ៉ាងតិចក្នុងចន្លោះពី160-170 ដុល្លារ ហើយបើបូករួមទាំងប្រាក់អត្ថប្រយោជន៍ផ្សេងៗទៀតផងនោះ កម្មករកាត់ដេរម្នាក់ ៗនឹងទទួលបានប្រាក់ខែលើសពី 200ដុល្លារក្នុងមួយខែ។

ក្នុងគោលនយោបាយលើកកម្ពស់ជីវភាពកម្មករ រដ្ឋាភិបាលបានអនុញ្ញាតឱ្យកម្មករនិយោជិតជាស្ត្រីដែលមានផ្ទៃពោះលើសពី3ខែ បានចេញមុនម៉ោងធ្វើការរបស់ខ្លួនយ៉ាងតិច15នាទី ដើម្បីគាំពារសុខមាលភាពកម្មករនិយោជិតជាស្ត្រីមានផ្ទៃពោះ និងទារកក្នុងផ្ទៃ។

ចំណែកស្ត្រីមានផ្ទៃពោះសម្រាកឆ្លងទន្លេក៏មានប្រាក់ខែ120%រយៈពេល3ខែផងដែរ។ ទោះជាសម្រាលកូនក្នុងប្រព័ន្ធ ឬក្រៅប្រព័ន្ធ និងទោះបីជាកូននោះកើតរស់ ឬស្លាប់ក្ដី ក៏នៅតែទទួលបានប្រាក់ឧបត្ថម្ភគាំពារដែរ។ ក្នុងនោះបើសម្រាលកូនបានមួយនាក់នឹងទទួលបានប្រាក់ឧបត្ថម្ភ 40ម៉ឺនរៀល កូនភ្លោះពីរនាក់ទទួលបាន80ម៉ឺនរៀល និងកូនភ្លោះបីនាក់ទទួលបាន120ម៉ឺនរៀល ដែលប្រាក់ឧបត្ថម្ភនេះនឹងចាប់អនុវត្តពីថ្ងៃទី1 ខែមករា ឆ្នាំ2018ខាងមុខនេះតទៅ៕

October 5, 2017

ស្ថានីយបូមទឹកថ្មីនឹងធ្វើឱ្យភ្នំពេញលែងលិចលង់

ភ្នំពេញ៖ ស្របពេលដែលជំនន់ទឹកភ្លៀងបានកើតឡើងជាបន្តបន្ទាប់នៅរយៈពេលប៉ុន្មានថ្ងៃចុងក្រោយនេះ និងបានបង្កឱ្យមានការលិចផ្លូវ និងផ្ទះសំបែងជាច្រើនកន្លែងនៅក្នុងភូមិសាស្ត្ររាជធានីភ្នំពេញកន្លងមក ដើម្បីទប់ស្កាត់ការលិចលង់នេះ អាជ្ញាធររាជធានីភ្នំពេញបានប្រកាសថានឹងសាងសង់ស្ថានីយបូមទឹកមួយកន្លែងទៀតដែលមានសមត្ថភាពអាចរំដោះទឹកភ្លៀងចេញបានដល់ទៅ 3 ខណ្ឌ។

ឯកឧត្តម ឃួង ស្រេង អភិបាលរាជធានីភ្នំពេញ បានថ្លែងក្នុងកិច្ចប្រជុំបន្ទាន់មួយជាមួយមន្ត្រីជំនាញ និងអាជ្ញាធរពាក់ព័ន្ធបានឱ្យដឹងថា ដើម្បីដោះស្រាយបញ្ហាលិចលង់ទីក្រុងដោយសារទឹកភ្លៀង អាជ្ញាធររាជធានីបានសម្រេចជាបន្ទាន់មួយលើគម្រោងសាងសង់ស្ថានីយបូមទឹកមួយកន្លែងទៀតស្ថិតនៅទីតាំងលូប្រាំ ក្នុងសង្កាត់ស្ទឹងមានជ័យ តាមបណ្តោយផ្លូវវេងស្រេង រួមនឹងការស្តារប្រឡាយមេជាច្រើនខ្សែទៀតក្នុងតំបន់នោះ ដូចជាប្រឡាយលូប្រាំ ប្រឡាយបារាំង និងប្រឡាយដើមស្លែង ជាដើម។

លោក ម៉េត មាសភក្តី អ្នកនាំពាក្យសាលារាជធានីភ្នំពេញបានថ្លែងប្រាប់អ្នកសារព័ត៌មាន ក្រោយកិច្ចប្រជុំនោះថា អាជ្ញាធរ និងមន្ត្រីជំនាញក្រោយពីបានចុះសិក្សាធ្វើការត្រួតពិនិត្យពីស្ថានភាពប្រឡាយលូប្រាំ ប្រឡាយបារាំង និងប្រឡាយដើមស្លែងបន្ទាប់ពីលិចលង់ដោយជំនន់ទឹកភ្លៀងរួចមក ឯកឧត្តមអភិបាលរាជធានីភ្នំពេញបានសម្រេចដាក់គ្រឿងចក្រដើម្បីស្តារប្រឡាយមេទាំងនោះ ដើម្បីដោះស្រាយស្ថានការណ៍បន្ទាន់ ហើយត្រៀមសាងសង់ស្ថានីយបូមទឹកថ្មីមួយទៀតក្នុងពេលឆាប់ៗនេះតែម្តង។

ក្នុងកិច្ចប្រជុំនោះដែរ ឯកឧត្ដមអភិបាលរាជធានីភ្នំពេញបានជំរុញឱ្យមន្ទីរសាធារណការ និងដឹកជញ្ជូនរាជធានីភ្នំពេញ សិក្សាជាកញ្ចប់លើការដោះស្រាយបញ្ហាលិចលង់នេះ ដែលរំពឹងថាក្រោយការជីកស្តារប្រឡាយមេទាំង 3ខាងលើ និងក្រោយពីសាងសង់ស្ថានីយបូមទឹកនេះរួច នៅឆ្នាំក្រោយ បើស្ថានភាពភ្លៀងមានដូចឆ្នាំនេះទៀត វានឹងអាចរំដោះជំនន់ទឹកភ្លៀងបានយ៉ាងល្អប្រសើរ និងអាចរំដោះទឹកបានទាន់ពេលវេលាបញ្ចៀសការលិចលង់ដូចបច្ចុប្បន្នបានយ៉ាងទាន់ពេលវេលា។

សូមជម្រាបផងដែរ នេះគឺជាគម្រោងស្តារបើកមុខប្រឡាយដាក់បណ្តាញលូប្រអប់ថ្មីដែលមានទំហំចន្លោះចាប់ពី 2.50ម៉ែត្រ ដល់ 6ម៉ែត្រ៕

October 4, 2017

អប់រំ ជាផ្នែកសំខាន់មួយក្នុងយុទ្ធសាស្ត្ររបស់ធនាគារពិភពលោកដើម្បីជួយកម្ពុជា

ធនាគារពិភពលោក ជាស្ថាប័នសកលមួយដែលបានចូលរួមចំណែកអភិវឌ្ឍសេដ្ឋកិច្ចនៃប្រទេសនានាលើពិភពលោក ដោយក្នុងនោះកម្ពុជាក៏ជាប្រទេសមួយផងដែរដែលទទួលបានផលប្រយោជន៍សំខាន់ៗជាច្រើនពីស្ថាប័ននេះ។

យោងតាមការបង្ហាញរបស់ធនាគារពិភពលោក បានឱ្យដឹងថា កម្ពុជាបានទទួលឥណទានលើកដំបូងរបស់ខ្លួនពីធនាគារពិភពលោកនៅឆ្នាំ1993 ដែលជំនួយសំខាន់នេះត្រូវបានប្រើប្រាស់ក្នុងការស្តារឡើងវិញនូវស្ថាប័នសង្គមកិច្ច សេដ្ឋកិច្ច និងការអភិវឌ្ឍហេដ្ឋារចនាសម្ព័ន្ធជារូបវ័ន្ត។

នៅក្នុងការផ្តល់ជំនួយទាំងអស់នោះធនាគារពិភពលោកបានរៀបចំយុទ្ធសាស្ត្រទំនាក់ទំនងប្រចាំប្រទេសរបស់ធនាគារពិភពលោក ដែលជាយុទ្ធសាស្ត្រមួយមានរយៈពេលពីរឆ្នាំដើម្បីគាំទ្រដល់កម្ពុជាក្នុងការទ្រទ្រង់កំណើនលើគ្រប់វិស័យ និងរឹងមាំសំដៅកាត់បន្ថយភាពក្រីក្រ និងលើកកម្ពស់វិបុលភាពរួម។

យុទ្ធសាស្ត្រដែលបានចែងក្នុងឯកសារយុទ្ធសាស្ត្រទំនាក់ទំនងនេះ គាំទ្រដល់ផែនការយុទ្ធសាស្ត្រអភិវឌ្ឍន៍ជាតិឆ្នាំ2014 – 2018 របស់កម្ពុជា និងមានគោលបំណងជួយកម្ពុជាកែលម្អបន្ថែមទៀតនូវបរិយាកាសធុរកិច្ចរបស់ខ្លួន ផ្គត់ផ្គង់ នូវសេវាសង្គមកិច្ចនិងហេដ្ឋរចនាសម្ព័ន្ធឱ្យបានល្អប្រសើរជាងមុន និងបង្កើតឱកាសសម្រាប់ប្រជាពលរដ្ឋទីទ័លក្រតាមរយៈការវិនិយោគលើអ្វីដែលអាចជំរុញការផលិត។

ជាផ្នែកមួយនៃការអនុវត្តយុទ្ធសាស្ត្រនេះ ក្រុមធនាគារពិភពលោកបានរៀបចំការវិនិច្ឆ័យស្ថានភាពប្រទេសដែលមានលក្ខណៈជាប្រព័ន្ធ(SCD) ដើម្បីជួយកំណត់រកឱ្យឃើញនូវឱកាស និងបញ្ហាប្រឈមនានា ព្រមទាំងផ្នែកអភិវឌ្ឍន៍ដែលជាអាទិភាពសម្រាប់ធានាឱ្យបាននូវកំណើនសេដ្ឋកិច្ចដែលរឹងមាំ។ យោងតាមការវិភាគនេះបានរកឃើញនូវយុទ្ធសាស្ត្រសំខាន់មួយចំនួន ដែលក្នុងនោះ ការកសាងធនធានមនុស្សត្រូវបានគេមើលឃើញថា ជាយុទ្ធសាស្ត្រសំខាន់មួយដែលត្រូវបានរៀបចំឡើងដើម្បីសម្រួលដល់ចល័តភាពសេដ្ឋកិច្ច និងវិបុលភាពរួមនៅក្នុងប្រទេស។

ការអភិវឌ្ឍធនធានមនុស្សនេះ ត្រូវបានគេមើលឃើញថា ជាផ្នែកយ៉ាងសំខាន់ដែលគាំទ្រដល់សកម្មភាពរបស់គ្រប់វិស័យនៅក្នុងសង្គម ទាំងវិស័យសាធារណៈ និងវិស័យឯកជន ព្រោះថាគ្រប់ស្ថាប័នទាំងអស់សុទ្ធតែត្រូវការមូលធនមនុស្សប្រកបដោយភាពច្នៃប្រឌិត និងសមត្ថភាពខ្ពស់ដើម្បីចូលរួមជំរុញឱ្យមានភាពរីកចម្រើន៕

October 4, 2017

យុវជនកំពុងប្រឈមនឹងបញ្ហាខ្វះឯកសារស្រាវជ្រាវ

ការសិក្សាស្រាវជ្រាវជាផ្នែកដ៏សំខាន់មួយសម្រាប់ការអភិវឌ្ឍសមត្ថភាព និងពង្រឹងនូវគុណភាពនៃការអប់រំរបស់យុវជន ជាពិសេសនិស្សិតដែលកំពុងសម្រួចសមត្ថភាពដើម្បីត្រៀមបម្រើការងារ ឬបង្កើតអាជីវកម្មថ្មីៗនៅក្នុងសង្គម។ ចរន្តនៃការសិក្សាស្រាវជ្រាវនេះត្រូវបានគេសង្កេតឃើញថា ចាប់ផ្តើមមានការផុសផុលឡើងហើយក្នុងរយៈពេលប៉ុន្មានឆ្នាំចុងក្រោយនេះ តែអ្នកស្រាវជ្រាវមួយចំនួននិយាយថា នៅមានឧបសគ្គច្រើននៅឡើយលើកត្តាឯកសារ។

កញ្ញា ឆែ សុសម្ផស្ស ប្រធានក្រុមជំហានយុវជនកម្ពុជាដែលជាក្រុមស្រាវជ្រាវពីទិន្នន័យលើវិស័យនានាក្នុងសង្គម បានលើកឡើងថា ការសរសេរ ឬការជជែកពិភាក្សាតស៊ូមតិ ចាំបាច់បំផុតត្រូវតែមានអំណះអំណាង ឬទិន្នន័យពីប្រភពច្បាស់លាស់ និងទទួលយកបាន ដើម្បីឱ្យនិយមន័យ ឬការលើកឡើងនូវបញ្ហាទាំងអស់នោះមានទម្ងន់ និងប្រកបដោយភាពប្រាកដនិយម តែជាទូទៅអ្នកស្រាវជ្រាវ ក៏ដូចជាអ្នកតស៊ូមតិដែរ តែងមានបញ្ហាប្រឈមធំមួយគឺ ខ្វះទិន្នន័យ។

កញ្ញា ឆែ សុសម្ផស្ស បាននិយាយថា៖ «ជាទូទៅយើងឃើញថា និស្សិតត្រូវការស្រាវជ្រាវដើម្បីធ្វើការងារសាលា ហើយអ្នកតស៊ូមតិក៏ត្រូវការស្រាវជ្រាវដើម្បីធ្វើជាអំណះអំណាងគាំទ្រទឡ្ហីករណ៍របស់ខ្លួន តែពួកគេមានបញ្ហាមួយគឺ កង្វះខាតវិធីសាស្ត្រស្រាវជ្រាវ និងខ្វះខាតប្រភពឯកសារសម្រាប់ស្រាវជ្រាវ ដែលធ្វើឱ្យពួកគេមិនអាចបង្កើតស្នាដៃដែលច្បាស់លាស់បានដោយងាយនោះឡើយ»។

បង្ហាញពីចំណុចនេះដែរលោក ហម សុខនី ប្រធានក្រុមអ្នកអាន និងជាអ្នកស្រាវជ្រាវមួយរូប បានលើកឡើងថា ជាបញ្ហាសម្រាប់អ្នកស្រាវជ្រាវគឺ ទិន្នន័យសំខាន់ៗពាក់ព័ន្ធនឹងបញ្ហាសំខាន់នានាក្នុងសង្គម គឺនៅរាយប៉ាយគ្រប់ទីកន្លែងដែលធ្វើឱ្យពួកគេចំណាយពេលច្រើនក្នុងការស្វែងរកឯកសារមុនពេលចងក្រងជាសំណុំឯកសារឡើង។

អ្នកស្រាវជ្រាវខាងលើបានបន្ថែមទៀតថា ប្រសិនបើប្រភពឯកសារត្រូវបានគេចងក្រងទុកឱ្យមានរបៀបរៀបរយ និស្សិតនឹងមិនពិបាកស្រាវជ្រាវនោះទេ ហើយការទាញយកអំណះអំណាងក្នុងការនិយាយរបស់ពួកគេក៏នឹងមានភាពរលូនផងដែរ។ នៅពេលនោះការគិតរបស់យុវជនកម្ពុជានឹងកាន់តែមានលក្ខណៈស៊ីជម្រៅដែលអាចធ្វើឱ្យពួកគេអាចទាញយកប្រយោជន៍បានយ៉ាងច្រើនពីការសិក្សាស្រាវជ្រាវនានា។

និស្សិតដែលកំពុងសិក្សាផ្នែកស្ថាបត្យកម្ម និងជាអ្នកតស៊ូមតិម្នាក់ដែរ លោក ឆែម សុភី បានលើកឡើងថា ទន្ទឹមនឹងបញ្ហាឯកសារនៅរាយប៉ាយ កង្វះការធ្វើបច្ចុប្បន្នភាព (Update) ទិន្នន័យក៏ជាបញ្ហាមួយដែលធ្វើឱ្យនិស្សិត និងអ្នកតស៊ូមតិពិបាកខ្លាំងណាស់ដែរ។ ជាទូទៅ គេសង្កេតឃើញថា អ្នកតស៊ូមតិមួយចំនួនមានការពិបាកខ្លាំងក្នុងការលើកយកអំណះអំណាងឱ្យបានគ្រប់ជ្រុងជ្រោយឱ្យស្របតាមស្ថានភាពជាក់ស្តែង និងស្របតាមព្រឹត្តិការណ៍ថ្មីៗដែលកើតមាននៅក្នុងសង្គម។

អ្នកតស៊ូមតិរូបនេះចង់ឃើញស្ថាប័ននានាបង្ហាញពីប្រភពឯកសារឱ្យបានលឿន រួមទាំងគ្រឹះស្ថានអប់រំនានាចូលរួមចងក្រងជាប្រភពទិន្នន័យឱ្យបានរៀបរយ និងគ្រប់ជ្រុងជ្រោយដើម្បីជំនួយដល់សិស្ស និស្សិតដែលត្រូវការស្រាវជ្រាវលើបញ្ហានានាដែលវាអាចជាទុននៃគំនិតសម្រាប់បង្កើតស្នាដៃថ្មីៗប្រកបដោយភាពច្នៃប្រឌិត៕

October 4, 2017

Category: សង្គម និងសេដ្ឋកិច្ច