សង្គម និងសេដ្ឋកិច្ច - La Reine Media

ក្រុមហ៊ុនកូរ៉េខាងត្បូងផ្តោតលើការវិនិយោគនៅថៃដោយបារម្ភពីទីផ្សារចិន

ក្រុមហ៊ុនរបស់ប្រទេសកូរ៉េខាងត្បូងមានចំណាប់អារម្មណ៍ខ្លាំងចំពោះការមកវិនិយោគក្នុងប្រទេសថៃ ដែលជាច្រកសេដ្ឋកិច្ចនៅក្នុងតំបន់អាស៊ីខាងកើត និងបានធ្វើឱ្យប្រទេសនេះក្លាយជាតំបន់ផលិតកម្មដ៏សំខាន់សម្រាប់តំបន់អាស៊ាន និងអាស៊ីទាំងមូល។ នេះបើយោងតាមទីភា្នក់ងារលើកកម្ពស់ពាណិជ្ជកម្មកូរ៉េ (Kotra)។

លោក Kim Nam-Wook អគ្គនាយករង Kotra បាននិយាយថា ក្រុមហ៊ុនកូរ៉េខាងត្បូងជាច្រើននឹងចាក់ចេញពីប្រទេសចិនដើម្បីបញ្ជៀសហានិភ័យដែលអាចនឹងកើតឡើងជាមួយប្រទេសកូរ៉េខាងជើង ខណៈដែលប្រទេសថៃបានផ្តល់នូវជម្រើសល្អបំផុតសម្រាប់ការផ្លាស់ប្តូរទីតាំង ដោយសារការលើកទឹកចិត្តចំពោះការវិនិយោគ និងមានការគាំទ្រពេញលេញពីរដ្ឋាភិបាលផងដែរ។

លោក ថ្លែងថា៖“មានវិនិយោគិនកូរ៉េខាងត្បូងជាច្រើនធ្លាប់បានផ្តោតលើប្រទេសចិនដោយសារប្រទេសចិនជាទីផ្សារធំដែលមានប្រជាជនជាង1ប៊ីលាននាក់។ តែទោះបីជាយ៉ាងណាក៏ដោយ នៅពេលនេះអ្វីៗហាក់កំពុងផ្លាស់ប្តូរ។ ភាពតានតឹងកើនឡើងកំពុងធ្វើឱ្យពួកគេគិតអំពីការបញ្ជៀសហានិភ័យ ដោយប្តូរមូលដ្ឋានអាជីវកម្មរបស់ខ្លួន។

លោកបានបន្តថា អ្នកវិនិយោគកូរ៉េ ក៏ដូចជា Kotra កំពុងចាប់អារម្មណ៍ខ្លាំង ដោយប្រទេសថៃអាចក្លាយជាតំបន់ផលិតកម្មថ្មីមួយ ហើយក៏ជាច្រកមួយទៅកាន់តំបន់អាស៊ាន ដែលមានប្រជាជនជាង600លាននាក់ផងដែរ។

Kotra កាលពីពេលថ្មីៗនេះបានរៀបចំសិក្ខាសាលាមួយ ដោយមានក្រុមហ៊ុនចូលរួមប្រហែល100 មកពីកូរ៉េខាងត្បូង ឥណ្ឌា អឺរ៉ុប និងប្រទេសជាសមាជិកអាស៊ានផ្សេងទៀត ដើម្បីស្វែងរកឱកាសបង្កើតជំនួបអាជីវកម្ម និងចុះកិច្ចព្រមព្រៀងដែលនឹងនាំទៅដល់ការវិនិយោគបន្ថែមនៅក្នុងប្រទេសថៃ ពិសេសគឺក្នុងតំបន់ EEC។

The EEC ជាគំនិតផ្តួចផ្តើមថ្មីមួយរបស់រដ្ឋាភិបាលដើម្បីលើកកម្ពស់ការវិនិយោគថ្មីក្នុងឧស្សាហកម្មបច្ចេកវិទ្យាកម្រិតខ្ពស់ ជាមួយការគាំទ្រពេញលេញរបស់រដ្ឋាភិបាល ជាពិសេសការលើកទឹកចិត្តផ្នែកហេដ្ឋារចនាសម្ព័ន្ធ និងការវិនិយោគ។ The EEC មានទំហំផ្ទៃដីជាង 30,000រ៉ៃ (48គីឡូម៉ែត្រការ៉េ) នៅក្នុងខេត្តចំនួន3 គឺខេត្ត Chon Buri, Rayong និង Chachoengsao។

The EEC ត្រូវបានរចនាឡើងដោយផ្តោតលើតំបន់ឧស្សាហកម្មចំនួន10 ដូចជារថយន្តជំនាន់ថ្មី ឧបករណ៍អេឡិចត្រូនិក ទេសចរណ៍សុខភាព និងផាសុកភាព កសិកម្ម និងបច្ចេកវិទ្យាដាំដុះ ម្ហូបអាហារគ្រឿងយន្តសម្រាប់ឧស្សាហកម្ម បណ្តាញឡូជីស្ទិកអាកាសចរណ៍ ឥន្ធនៈអេតាណុល និងគីមីអេតាណុលឌីជីថល និង សេវាកម្មផ្នែកវេជ្ជសាស្ត្រ។

លោក Kim បានប្រាប់ទៀតថា អ្នកវិនិយោគកូរ៉េដែលមានបំណងវិនិយោគនៅក្នុងប្រទេសថៃភាគច្រើនផ្តោតលើគ្រឿងបន្លាស់រថយន្ត និងគ្រឿងបង្គុំអគ្គិសនី។ លោកបានបញ្ជាក់ថា៖“យើងចាប់អារម្មណ៍ប្រទេសថៃ ព្រោះវាក្រុងធំរបស់អាស៊ី ដូចនេះវាងាយស្រួលខ្លាំងណាស់ដើម្បីបង្កើតសង្វាក់ផ្គត់ផ្គង់នៅទីនេះ ដើម្បីផលិត និងនាំចេញទៅកាន់ប្រទេសអាស៊ានផ្សេងៗទៀត។

កូរ៉េខាងត្បូងជាប់ចំណាត់ថ្នាក់លេខ8 ជាប្រទេសដែលបានចូលមកវិនិយោគច្រើនជាងគេក្នុងប្រទេសថៃ ដោយមានតម្លៃវិនិយោគរហូតដល់ទៅ8.9ប៊ីលានបាតក្នុងឆ្នាំ2016។ បច្ចុប្បន្ននេះមានក្រុមហ៊ុនកូរ៉េខាងត្បូងប្រមាណ300កំពុងបើកដំណើរការក្នុងប្រទេសថៃ ហើយមានការរំពឹងថា ចំនួនក្រុមហ៊ុននឹងកើនឡើងទ្វេដងនៅប៉ុន្មានឆ្នាំខាងមុខ។

អ្នកវិនិយោគកូរ៉េកំពុងចាប់អារម្មណ៍ខ្លាំងចំពោះឧស្សាហកម្មផ្សេងៗទៀតនៅក្នុងប្រទេសថៃ ដូចជា ទូរស័ព្ទចល័ត គ្រឿងបន្លាស់រថយន្ត កម្មន្តសាល គ្រឿងសម្អាង និងថែសម្ផស្ស។ អ្នកវិនិយោគកូរ៉េក៏ចាប់អារម្មណ៍ទីផ្សារប្រទេសឥណ្ឌាផងដែរដោយសារចំនួនប្រជាជនច្រើន៕

October 7, 2017

ខួបកំណើតកូនស្រី តែ ប៉ែន ចំរុង គ្មានវាសនាបានចូលរួម

នៅរាត្រីថ្ងៃសុក្រទី6 ខែតុលា ឆ្នាំ2017 ជាថ្ងៃខួបកំណើតមួយឆ្នាំរបស់នាងតូច Katerina ដែលជាតំណក់ឈាមដំបូងរវាងតារាស្រី ភិន សុដាលីស និងតារាប្រុស ប៉ែន ចំរុង ដែលជាការរៀបចំឡើងដោយ លោក អ៊ិន សុភិន ក៏ប៉ុន្ដែជាអកុសល ប៉ែន ចំរុង គ្មានវាសនាបានចូលរួមខួបកំណើតកូនស្រីរបស់ខ្លួនឡើយ សូម្បីតែមកទល់ពេលនេះក្ដី ក៏តារាប្រុសរូបនេះ មិនទាន់បានចាប់កាន់ ឬពបីកូនស្រី និងបានជួបមុខដោយផ្ទាល់នៅឡើយ។

យ៉ាងណាមិញ លោក អ៊ិន សុភិន ជាជីតាបង្កើត និងបានបីចាច់ចៅស្រីតាំងពីដើមរហូតមកនោះ លោកបានផ្ដល់កាដូជាសាច់បា្រក់ចំនួន2ម៉ឺនដុល្លារអាមេរិកដល់ចៅស្រី ដើម្បីធ្វើជាមូលនិធិសម្រាប់ជួយដល់កុមារកំព្រាដែលឪពុកម្តាយបោះបង់ចោល។ លោក អ៊ិន សុភិន បានបញ្ជាក់ថា «កាដូសម្រាប់ចៅស្រីគឺទឹកប្រាក់សុទ្ធចំនួន2ម៉ឺនដុល្លារអាមេរិក សម្រាប់ឱ្យចៅស្រីបង្កើតមូលនិធិជួយដល់កុមារកំព្រា ពិសេសកុមារដែលឪពុកម្តាយបោះបង់ចោល»។

ជាចុងក្រោយលោកក៏បានបន្ដថា ចៅស្រីរបស់លោកទោះបីជាឪពុកបោះបង់ចោលចាប់តាំងពីនៅក្នុងផ្ទៃ៤ខែក្តីក៏ពេលនេះនាងទទួលបានភាពកក់ក្តៅ និងការយកចិត្តទុកដាក់ខ្លាំងពីក្រុមគ្រួសារលោក ហើយលោកនឹកដល់កុមារដែលរស់នៅមណ្ឌលកុមារកំព្រាដែលខ្វះភាពកក់ក្តីពីក្រុមគ្រួសារ។ ចំពោះមូលនិធិដែលបង្កើតសម្រាប់ចៅស្រី និងជួយដល់មណ្ឌលកុមារកំព្រាណាដែលខ្វះខាតនេះ លោកក៏នឹងបែងចែកទៅតាមលទ្ធភាពផងដែរ។ លោកថា មូលនិធិនេះនឹងបានរួមចំណែកជួយដល់កិច្ចការងារសង្គម ផងដែរ៕

October 7, 2017

ចូលរួមសារទដល់កម្ពុជា ដែលអាមេរិក និងសហភាពអ៊ឺរ៉ុបនៅតែបន្ដបញ្ជាទិញទំនិញ

ខណៈការនាំចេញផលិតផលវាយនភ័ណ្ឌរបស់កម្ពុជានៅក្នុងឆ្នាំនេះមានការធ្លាក់ចុះ ធ្វើឱ្យសេដ្ឋកិច្ចទាំងមូលមានការថមថយមកនៅត្រឹម6.8% ដែលធ្វើឱ្យកម្ពុជាត្រូវប្រឹងប្រែងពង្រឹងលើផលិតឧស្សាហ៍កម្មដទៃសម្រាប់នាំចេញធ្វើយ៉ាងណាជួយទប់ទល់នូវការថមថយកំណើនសេដ្ឋកិច្ច។ ថ្មីៗកម្ពុជាបានទទួលដំណឹងល្អ ដោយសារតែអាមេរិក និងសហភាពអ៊ឺរ៉ុបនៅតែបន្តបើកទីផ្សាររបស់ខ្លួនដល់កម្ពុជា និងបង្កើនការបញ្ជាទិញទំនិញពីកម្ពុជា។

ក្នុងជំនួបរវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយ ឯកឧត្តម William A. Heidt ឯកអគ្គរដ្ឋទូតអាមេរិកប្រចាំកម្ពុជា និងឯកឧត្តម George Edgar ឯកអគ្គរដ្ឋទូតសហភាពអ៊ឺរ៉ុបប្រចាំនៅកម្ពុជា ដើម្បីពិភាក្សាអំពីកិច្ចសហប្រតិបត្តិការលើវិស័យការងារ ឯកឧត្តមទាំងពីរបានបញ្ជាក់ថា សហរដ្ឋអាមេរិក និងសហភាពអ៊ឺរ៉ុប នឹងមិនភ្ជាប់កិច្ចខិតខំប្រឹងប្រែងរបស់កម្ពុជាក្នុងការគោរពលក្ខខណ្ឌការងារ ទៅនឹងភាពតានតឹងផ្នែកផ្សេងទៀតឡើយ។ សហរដ្ឋអាមេរិក និងសហភាពអ៊ឺរ៉ុបនឹងបន្តបើកទីផ្សាររបស់ខ្លួនដល់កម្ពុជា និងបង្កើនការបញ្ជាទិញទំនិញពីកម្ពុជា។

ឯកឧត្ដមទាំងពីរបានសាទរដល់កម្ពុជា ដែលទើបសម្រេចបានប្រាក់ឈ្នួលអប្បបរមាឆ្នាំ2018 ចំនួន 170ដុល្លារ ប្រកបដោយរលូន និងកុងសង់ស៊ីសគ្នាពីគ្រប់ភាគីនាឆ្នាំនេះ។ ជាមួយគ្នានេះ ឯកឧត្តមទាំងពីរក៏បានលើកទឹកចិត្តឱ្យកម្ពុជាបន្តប្រកាន់ភ្ជាប់នូវយន្តការត្រីភាគី ការសន្ទនាសង្គម ការគោរពលក្ខខណ្ឌការងារ ការគោរពសិទ្ធិសេរីភាពអង្គការវិជ្ជាជីវៈ និងការដោះស្រាយបញ្ហាទំនាក់ទំនងវិជ្ជាជីវៈ និងវិវាទការងារឱ្យបានលឿន និងមានតម្លាភាព។

ជាការឆ្លើយតប ឯកឧត្តម អ៊ិត សំហេង ក៏បានថ្លែងអំណរគុណដល់ភាគីទាំងពីរដែលបានរួមចំណែកក្នុងការលើកកម្ពស់លក្ខខណ្ឌការងារនៅកម្ពុជា ព្រមទាំងធានាថា កម្ពុជានឹងបន្តគោលនយោបាយផ្សារភ្ជាប់ពាណិជ្ជកម្មទៅនឹងលក្ខខណ្ឌការងារ ដោយបន្តសហការជាមួយគម្រោងរោងចក្រកាន់តែប្រសើររបស់អង្គការអន្តរជាតិខាងការងារ (ILO-BFC) អង្គការ GIZ និងអង្គការអន្តរជាតិផ្សេងទៀតដែលចុះបញ្ជីត្រឹមត្រូវតាមច្បាប់កម្ពុជា៕

October 7, 2017

អេស្ប៉ាញ កក់កៅអីទៅ World Cup ខណៈស៊ែប៊ី ត្រូវរង់ចាំ

ក្រុមជើងខ្លាំងអេស្ប៉ញ បានឈ្នះកៅអីទៅលេងក្នុងព្រឹត្តិការណ៍ World Cup ឆ្នាំ2018 ក្រោយពីបានទទួលជ័យជម្នះលើទឹកដីរបស់ពួកគេក្នុងលទ្ធផល 3-០ លើក្រុមជម្រើសជាតិអាល់បានី ប៉ុន្តែក្រុមបាល់ទាត់ជម្រើសជាតិស៊ែប៊ី ត្រូវតែរង់ចាំសិនដើម្បីបំពេញការឈ្នះសិទ្ធិរបស់ពួកគេ ក្រោយពីចាញ់ក្រុមជម្រើសជាតិអូទ្រីស 3-2។

កីឡាករ Rodrigo, Isco និង Thiago Alcantara សុទ្ធសឹងបានរកគ្រាប់បាល់បញ្ចូលទីក្នុងរយៈពេល30នាទីដំបូង ក្នុងទីក្រុង Alicante ខណៈដែលក្រុមម្ចាស់ជើងឯកពិភពលោកឆ្នាំ2010មួយនេះ បានបញ្ចប់ដោយឈរលើលេខ1ក្នុងពូល G ក្រោយពីក្រុមឈរលេខ២ អ៊ីតាលី បានបញ្ចប់ក្នុងលទ្ធផលស្មើ 1-1 ពេលជួបក្រុមជម្រើសជាតិម៉ាសេដ្វាន ក្នុងទីក្រុង Turin។

ខ្សែការពារ Gerard Pique របស់ក្លិប Barcelona ត្រូវបានស្វាគមន៍ដោយការស្រែកចំអកឲ្យ និងការទះដៃអបអរ នៅថ្ងៃនៃការបង្ហាញខ្លួនជាអន្តរជាតិលើកទី92របស់គេ ក្នុងរយៈពេលត្រឹមតែប៉ុន្មានថ្ងៃ ក្រោយពីការបោះឆ្នោតប្រជាមតិដណ្តើមយកឯករាជ្យនៅតំបន់ Catalonia ដែលត្រូវបានចាត់ទុកថា ជាទង្វើខុសច្បាប់ដោយរដ្ឋាភិបាលអេស្ប៉ាញ និងត្រូវបានរារាំងដោយប៉ូលិស។ លោក Julen Lopetegui គ្រូបង្វឹកនៃក្រុមជម្រើសជាតិអេស្ប៉ាញ បានប្រាប់ស្ថានីយទូរទស្សន៍ Teledeporte របស់អេស្ប៉ាញថា៖ «យើងត្រូវតែផ្តោតតែទៅលើកីឡាបាល់ទាត់ប៉ុណ្ណោះ។ វាមានសប្តាហ៍ដ៏លំបាក និងស្មុគស្មាញមួយ ហើយជារឿងល្អដែលយើងអាចដោះស្រាយបានយ៉ាងល្អក្នុងរយៈពេលត្រឹមតែ30នាទីដំបូង»។

ក្រុមម្ចាស់ជើងឯក World Cup 4សម័យកាល អ៊ីតាលី ត្រូវមានជោគវាសនាចូលរួមក្នុងការប្រកួត Playoff នៅខែវិច្ឆិកា ក្រោយពីខ្សែប្រយុទ្ធបម្រុង Aleksandar Trajkovski របស់ម៉ាសេដ្វាន បានរកគ្រាប់បាល់តាមស្មើគ្រាប់បាល់របស់ខ្សែការពារជើងចាស់ Giorgio Chiellini៕

ប្រភពពី៖ sports.yahoo.com

October 7, 2017

វិស័យហិរញ្ញវត្ថុអាចលែងត្រូវការធនធានមនុស្សច្រើននៅប៉ុន្មានឆ្នាំខាងមុខ

អ្នកជំនាញក្នុងវិស័យធនាគារ និងហិរញ្ញវត្ថុនៅកម្ពុជាបានអះអាងថា តម្រូវការធនធានមនុស្សក្នុងវិស័យនេះនៅតែមានច្រើន ខណៈដែលវិស័យនេះនៅតែបន្តទាក់ទាញវិនិយោគិនថ្មីៗឱ្យចូលមកបណ្តាក់ទុនបន្ថែម បើទោះបីជាប្រឈមនឹងការដាក់កំហិតលើអត្រាការប្រាក់ខ្ពស់បំផុតត្រឹម18% ក្នុងឆ្នាំដែលក្រសួងសេដ្ឋកិច្ច និងហិរញ្ញវត្ថុ ព្រមទាំងធនាគារជាតិនៃកម្ពុជាបានដាក់ឱ្យអនុវត្តចាប់តាំងពីខែមេសា កន្លងមកក៏ដោយ។

ក្រោយការដាក់ចេញនូវសេចក្តីសម្រេចថ្មីលើអត្រាការប្រាក់នេះ ប្រតិបត្តិករក្នុងវិស័យនេះបានឱ្យដឹងថា ប្រាក់ចំណេញរបស់ខ្លួននឹងធ្លាក់ចុះ បើទោះបីជាមិនប៉ះពាល់ធ្ងន់ធ្ងរដល់ដំណើរការប្រតិបត្តិរបស់ខ្លួនក៏ដោយ។ ជាមួយការប្រឈមថ្មីៗនៅក្នុងវិស័យធនាគារ និងហិរញ្ញវត្ថុឯកជននេះ អ្នកគ្រប់គ្រងក្នុងវិស័យដែលទទួលបានប្រាក់ចំណេញខ្ពស់ជាងគេមួយនេះបានលើកឡើងថា តម្រូវការធនធានមនុស្សសម្រាប់វិស័យនេះនៅតែត្រូវការច្រើនដដែល ដោយសារវិស័យនេះស្ថិតនៅដំណាក់កាលអភិវឌ្ឍ។

ការអះអាងនេះ អាចជាមធ្យោបាយមួយកាត់បន្ថយនូវមន្ទិលសង្ស័យរបស់និស្សិតចំពោះការសម្រេចចិត្តសិក្សាមុខវិជ្ជាធនាគារ និងហិរញ្ញវត្ថុផងដែរ ស្របពេលដែលសិស្សទើបប្រឡងជាប់សញ្ញាបត្រមធ្យមសិក្សាទុតិយភូមិ កំពុងតែស្វែងយល់ជ្រើសរើសមុខវិជ្ជាដើម្បីបន្តការសិក្សានៅថ្នាក់ឧត្តមសិក្សា។

លោកឧកញ៉ា ហួត អៀងតុង ប្រធានសមាគមមីក្រូហិរញ្ញវត្ថុកម្ពុជា បានប្រាប់ថា បន្ទាប់ពីការដាក់កម្រិតថ្មីរបស់ធនាគារជាតិមកលើការប្រតិបត្តិរបស់វិស័យហិរញ្ញវត្ថុឯកជន គេនៅមិនទាន់ឃើញមានផលប៉ះពាល់អ្វីធំដុំនៅឡើយទេ ក្រៅពីការបាត់បង់ប្រាក់ចំណេញប៉ុណ្ណោះ។ លោកឧកញ៉ា បានបន្ថែមថា ការបាត់បង់ប្រាក់ចំណេញនេះអាចទប់ស្កាត់ផែនការពង្រីកអាជីវកម្មតាមរយៈការពង្រីកសាខាបន្ថែម ហើយតម្រូវការធនធានមនុស្សសម្រាប់ប្រតិបត្តិការក៏នៅតែមានដើម្បីពង្រឹងខ្លួន បើទោះបីជាវិស័យមួយនេះស្ថិតនៅដំណាក់កាលដំបូងនៃកំណែទម្រង់ក៏ដោយ។

លោកឧកញ៉ា ហួត អៀងតុង បានថ្លែងថា៖“ហិរញ្ញវត្ថុជាវិស័យមួយសំខាន់សម្រាប់អភិវឌ្ឍន៍ប្រទេស ដូចនេះតម្រូវការធនធានមនុស្សក៏នៅតែមានអាទិភាពដែរ ហើយខ្ញុំរំពឹងថាតម្រូវការចំនួនមនុស្សបម្រើការងារក្នុងវិស័យនេះអាចថយចុះនៅពេលខាងមុខ តែវិស័យនេះទាំងមូលនឹងនៅតែល្អជាបន្តទៀត។

លោកស្រី សូ ផនណារី អនុប្រធានប្រតិបតិ្តនិងជាប្រធានមន្ត្រីប្រតិបតិ្តការនៅធនាគារអេស៊ីលីដា បានលើកឡើងថា សម្រាប់វិស័យធនាគារនេះទីផ្សារទំនងមិនចង្អៀតពេកនោះទេ ដោយសារមានធនាគារថ្មីៗរបស់បរទេសទើបចូលមក ហើយម្យ៉ាងទៀតវិស័យហិរញ្ញវត្ថុក្នុងស្រុកកកើតច្រើនដែរក្នុងរយៈពេលថ្មីៗនេះដែលបញ្ជាក់ឱ្យឃើញថា ទីផ្សារនៅតែត្រូវការច្រើន។

ទោះជាបែបនេះក្តីលោកស្រីហាក់ទាញចំណាប់អារម្មណ៍របស់អ្នកសិក្សាឱ្យសម្លឹងមើលជំនាញផ្សេងៗជាច្រើនទៀតដែលទីផ្សារត្រូវការដូចគ្នាដោយមិនត្រូវផ្តល់អាទិភាពដល់ការសិក្សាហិរញ្ញវត្ថុខ្ពស់ពេកនោះទេ។ លោកស្រីនិយាយថា៖“ជំនាញអ្វីក៏ដោយឱ្យតែទីផ្សារត្រូវការខ្លាំង ជំនាញនោះនឹងទទួលបានការឱ្យតម្លៃ និងប្រាក់ចំណូលខ្ពស់។

សម្រាប់ធនាគារអេស៊ីលីដា ដែលជាធនាគារពាណិជ្ជធំបំផុត លោកស្រីបានបញ្ជាក់ថា តម្រូវការធនធានមនុស្សថ្មីអាចនឹងនៅទ្រឹងសម្រាប់ឆ្នាំ2019 និងឆ្នាំ2020 ខណៈឆ្នាំ2018 ខាងមុខ តម្រូវការធនធានមនុស្សថ្មីអាចមានត្រឹម1ទៅ2%ប៉ុណ្ណោះនៃចំនួនបុគ្គលិកបច្ចុប្បន្នសរុប12,580នាក់។

លោកស្រីបានបញ្ជាក់ថា៖ “យើងកំពុងបណ្តុះបណ្តាលបុគ្គលិកឱ្យផ្តោតលើ Digital Banking ដូចនេះតម្រូវការធនធានមនុស្សថ្មីសម្រាប់ប៉ុន្មានឆ្នាំខាងមុខគឺមិនទាន់ចាំបាច់នោះទេ។

ឯកឧត្តម វង្សី វិសុទ្ធ រដ្ឋលេខាធិការក្រសួងហិរញ្ញវត្ថុ និងហិរញ្ញវត្ថុ ធ្លាប់បានទទួលស្គាល់ថា វិស័យហិរញ្ញវត្ថុនេះមានភាពកាក់កបខ្លាំងជាវិស័យផ្សេងៗទៀត ដែលមានអត្រាចំណេញប្រចាំឆ្នាំរហូតជាង18%។ ទន្ទឹមគ្នានេះអត្រាការប្រាក់ខ្ពស់សម្រាប់អតិថិជនគឺជាចំណោទមួយដែលទាមទារឱ្យដោះស្រាយនៅពេលខាងមុខ ព្រោះវិស័យនេះក៏ដល់ពេលដែលត្រូវកែទម្រង់ដែរ។

យោងតាមរបាយការណ៍របស់ធនាគារជាតិនៃកម្ពុជា (NBC) បង្ហាញពីការរីកចម្រើនឥតឈប់ឈរក្នុងវិស័យនេះក្នុងរយៈពេលកន្លងមក ដោយប្រាក់បញ្ញើ និងកម្ចីនៅក្នុងវិស័យធនាគារ និងហិរញ្ញវត្ថុនៅកម្ពុជាក្នុងឆ្នាំ2015 បានកើនឡើងក្នុងរង្វង់ពីជាង 18ទៅជិត 30%នៅឆ្នាំ2016។ ប្រាក់បញ្ញើរបស់អតិថិជននៅក្នុងគ្រឹះស្ថានធនាគារ និងហិរញ្ញវត្ថុ នៅក្នុងឆ្នាំ2015 បានកើនឡើង 18.9% ដល់ 12.68ពាន់លានដុល្លារ ខណៈដែលឥណទានបានកើនឡើង 28% ដល់ 15.14ពាន់លានដុល្លារ ធៀបទៅនឹងឆ្នាំ2014។

រហូតមកដល់ពេលនេះចំនួនធនាគារពាណិជ្ជ ធនាគារឯកទេស និងគ្រឹះស្ថានមីក្រូហិរញ្ញវត្ថុ ដែលកំពុងប្រតិបត្តិនៅកម្ពុជា មានចំនួនជិត80ស្ថាប័ន៕

October 7, 2017

ចំណុចសំខាន់ៗរបស់បុគ្គលិក ដែលគួរធ្វើឱ្យក្រុមហ៊ុនមួយទទួលបានជោគជ័យ

ការអភិវឌ្ឍក្រុមហ៊ុន មិនខុសពីការអភិវឌ្ឍប្រទេសប៉ុន្មាននោះទេ វាទាមទារឱ្យមានសមាជិកប្រកបដោយគុណភាព និងមានការគិតដើម្បីចូលរួមគ្រប់សកម្មភាពឆ្ពោះទៅរកគោលដៅរួម។

អគ្គនាយិកា នៃក្រុមហ៊ុនឌីហ្វើនីឈ័រ លោកជំទាវ តាំង ហ្គិចលៀង បានលើកឡើងថា មិនថាការធ្វើការនៅទីណា ឬឱ្យក្រុមហ៊ុនណានោះទេ បុគ្គលិកគួរចាត់ទុកថា ទីនេះជាផ្ទះរបស់ខ្លួន ព្រោះនៅពេលដែលក្រុមហ៊ុនមានការរីកចម្រើន យើងទាំងអស់គ្នាក៏មានការរីកចម្រើនទៅតាមនោះដែរ។ ម្យ៉ាងវិញទៀត បុគ្គលិកក៏គួរតែគិតថា ស្ថាប័នដែលខ្លួនកំពុងធ្វើការជាសាលារៀនដែលអាចជួយឱ្យអ្នកទាំងអស់គ្នារៀនពីមនុស្សនៅជុំវិញខ្លួន និងជាពិសេសគឺបានរៀនពីបទពិសោធក្នុងការធ្វើការងាររបស់អ្នកគ្រប់គ្រងស្ថាប័ននោះ។ ទន្ទឹមនឹងនេះ ការធ្វើការងារនៅក្នុងក្រុមហ៊ុន ក៏ជាឱកាសមួយដែលអាចធ្វើឱ្យបុគ្គលិកម្នាក់បានបញ្ចេញសមត្ថភាព ដើម្បីហ្វឹកហាត់សម្រេចកិច្ចការងារឱ្យបានល្អពីមួយថ្ងៃទៅមួយថ្ងៃ ព្រោះក្រោយពេលដែលបុគ្គលិកម្នាក់ៗគិតបែបនេះ គេនឹងទទួលបានផលប្រយោជន៍ជាច្រើនពីការងារ ហើយតែងតែអាចអភិវឌ្ឍខ្លួនឯងបានល្អបំផុតទៀតផង។

លោកជំទាវក៏បានលើកឡើងផងដែរថា បុគ្គលិកម្នាក់ៗគួរមានភាពម្ចាស់ការលើខ្លួនឯងក្នុងការធ្វើការងារ ព្រោះក្រុមហ៊ុននីមួយៗត្រូវការបុគ្គលិកដែលមានគំនិតបង្កើតថ្មី និងមានការទទួលខុសត្រូវខ្ពស់។ ភាពម្ចាស់ការលើខ្លួនឯងនេះ អាចធ្វើឱ្យបុគ្គលិកខ្លួនឯងក្លាយជាបុគ្គលដែលបង្កើតសមិទ្ធផលបានយ៉ាងច្រើនដោយគ្មានការបញ្ជា ហើយសមិទ្ធផលទាំងអស់នេះក៏អាចរុញច្រានឱ្យគាត់ក្លាយជាអ្នកដឹកនាំគេទៀតផង។

ជាធម្មតា មនុស្សណាម្នាក់ក៏មានគុណសម្បត្តិ និងគុណវិបត្តិដែរ ហេតុនេះភាពម្ចាស់ការត្រូវតែច្បាស់ថា ប្រកបដោយការទទួលខុសត្រូវដែលមានហេតុផលច្បាស់លាស់ ដើម្បីធានាថា សកម្មភាពដែលស្តែងចេញមកគឺជួយជំរុញដល់ការអភិវឌ្ឍក្រុមហ៊ុន តែមិនមែននាំបញ្ហាដល់ក្រុមហ៊ុននោះទេ។ នៅពេលដែលបុគ្គលិកមានភាពម្ចាស់ការ និងទទួលខុសត្រូវខ្ពស់ហើយ គាត់ប្រាកដជាមានគំនិតមួយដែលចេះទើស ចេះវិភាគ និងចេះជួយបញ្ចេញយោបល់ប្រកបដោយភាពវិជ្ជមានដើម្បីធ្វើយ៉ាងណាឱ្យបុគ្គលគ្រប់គ្នានៅក្នុងក្រុមហ៊ុន ជាពិសេសអ្នកដែលធ្វើការងារនៅក្នុងក្រុមជាមួយគ្នាទទួលបានជោគជ័យក្នុងការងារដើម្បីឆ្ពោះទៅរកភាពរីកចម្រើននៅក្នុងក្រុមហ៊ុន។

លោកជំទាវ តាំង ហ្គិចលៀង បានលើកឡើងបន្ថែមទៀតថា បុគ្គលិកដែលអាចជួយអភិវឌ្ឍក្រុមហ៊ុនបានភាគច្រើនជាមនុស្សដែលមិនចេះអាងគេ ហើយមានទំនុកចិត្តលើខ្លួនឯងនៅក្នុងការអនុវត្តការងារ ស្របពេលដែលខិតខំព្យាយាមស្វែងយល់បន្ថែមពីអ្នកនៅជុំវិញខ្លួន។ ជារួមគឺបុគ្គលិកពូកែ ភាគច្រើនគិតថា ខ្លួនឯងជាចំណែកមួយរបស់ក្រុមហ៊ុន ហើយជាផ្នែកមួយក្នុងការជួយអភិវឌ្ឍដល់ក្រុមហ៊ុន មិនរង់ចាំឱ្យក្រុមហ៊ុនមកអភិវឌ្ឍពួកគាត់ឡើយ។ លើសពីនេះទៅទៀត ដើម្បីដាក់ចិត្តខិតខំប្រឹងប្រែងឱ្យបានខ្លាំងបុគ្គលិកម្នាក់ៗគួរយកចិត្តរបស់អ្នកបណ្តាក់ទុនមកគិត។ បុគ្គលិកគ្រប់គ្នាអាចគិតថា ប្រសិនបើអ្នកជាអ្នកដែលបោះទុនរាប់ម៉ឺន រាប់លានដើម្បីរកស៊ីវិញ តើអ្នកនឹងមានអារម្មណ៍ព្រួយបារម្ភប៉ុនណាចំពោះអនាគតនៃក្រុមហ៊ុននោះ ហើយអ្នកត្រូវពង្រឹង និងពង្រីកវាដោយវិធីណាខ្លះ?។

ស្រដៀងគ្នានេះដែរ លោក ឆាក់ សុជាតិ ម្ចាស់ក្រុមហ៊ុនសេដ្ឋីនី បានលើកឡើងថា បុគ្គលិកក្រុមហ៊ុននីមួយៗគួរតែយកកន្លែងធ្វើការជាយានជំនិះដើម្បីសម្រេចគោលដៅ។ មុននឹងធ្វើការ គួរតែសួរខ្លួនឯងថា តើធ្វើការងារដើម្បីអ្វី? ហើយអ្វីជាចំណែកនៃការសម្រេចក្តីសុបិនដែលយើងត្រូវទទួលបានពីការងារទាំងនោះ?។ បើគ្មានចម្លើយទេនោះ មានន័យថា អ្នកកំពុងតែបំផ្លាញពេលវេលានៃដំណើរជីវិតរបស់ខ្លួនឯងនៅកន្លែងធ្វើការហើយ។ ការដែលយើងយកកន្លែងធ្វើការជាយានជំនិះដើម្បីសម្រេចគោលដៅ មិនមែនមានន័យថា យើងធ្វើជាបុគ្គលិកកិបកេង ឬលួចបន្លំលុយកាក់ និងពេលវេលារបស់ក្រុមហ៊ុននោះទេ គឺយើងយកពេលវេលាដែលកំពុងធ្វើការទាំងនោះ ដើម្បីរៀនសូត្រពីរបៀបនៃការធ្វើការ របៀបធ្វើការដឹកនាំ របៀបធ្វើជាម្ចាស់ និងរបៀបផ្សេងៗទៀត ដែលវាជាចំណែកនៃក្តីសុបិនរបស់យើង ដោយមិនចំណាយប្រាក់។

លោក ឆាក់ សុជាតិ បាននិយាយថា៖ «បើអ្នកស្រឡាញ់ការងារ ក៏ដូចជាស្រឡាញ់ជីវិតខ្លួនឯងដែរ នោះមានន័យថា ដំណើរជីវិតនៃការបំពេញការងាររបស់អ្នក គឺមានន័យគ្រប់គ្រាន់ហើយសម្រាប់ជីវិត»។

លោកបានបន្ថែមទៀតថា ធ្វើការឱ្យគេ ឬបង្កើតការងារឱ្យគេធ្វើ គឺគ្មានលក្ខណសម្បត្តិខុសគ្នាប៉ុន្មានទេ ព្រោះមានតួនាទីជាអ្វីក៏ដោយ ក៏យើងនៅតែធ្វើការបានដូចគ្នា។ គ្រាន់តែបែបបទនៃការបំពេញកិច្ចការវាមានភារកិច្ច និងតួនាទីផ្សេងគ្នាតែប៉ុណ្នោះ។ ប៉ុន្តែនៅតែមានឈ្មោះថា ធ្វើការដូចគ្នា។ ម្ល៉ោះហើយ ដើម្បីឱ្យការបំពេញកិច្ចការងាររបស់យើងម្នាក់ៗមានលទ្ធផលល្អ និងជាទីគាប់ចិត្តរបស់អ្នកដឹកនាំ គឺយើងត្រូវតែបំពេញកិច្ចការទាំងនោះឱ្យដូចជាការដែលយើងកំពុងបំពេញក្តីសុបិននៅក្នុងជីវិតរបស់យើងដូច្នោះដែរ។ ព្រោះបើយើងស្រឡាញ់ និងយកចិត្តទុកដាក់វាស្មើជីវិត នោះយើងនឹងខិតខំសម្រេចវាឱ្យបានល្អបំផុត ដូចការដែលយើងខំដកដង្ហើមដើម្បីរស់រាល់ថ្ងៃនេះអ៊ីចឹងដែរ។

ម្ចាស់អាជីវកម្មរូបនេះបានថ្លែងផងដែរថា បុគ្គលិកខ្លះចង់បានលទ្ធផលច្រើន តែចូលចិត្តធ្វើសកម្មភាពតិច ពោល គឺមានន័យថា ចង់បាន តែមិនចង់ធ្វើ។ ពួកគេខ្លះទាមទារ ឱ្យមានការផ្តល់ឱ្យសិន ទើបពួកគេខិតខំតាមក្រោយ នេះជាមូលហេតុដែលធ្វើឱ្យបុគ្គលិកភាគច្រើន ពិបាករីកចម្រើន និងមិនអាចឡើងតំណែងបាន។ ព្រោះពួកគេមានការគិតមួយផ្ទុយពីអ្នកដឹកនាំ ដែលម្ចាស់អាជីវកម្មភាគច្រើនតែងគិតថា ចាំពួកគាត់ខំធ្វើកិច្ចការបានល្អសិន ទើបដំឡើងប្រាក់ខែ ឬតំណែងឱ្យ។ ការគិតផ្ទុយគ្នានេះ ធ្វើឱ្យបុគ្គលិកនៅតែមិនអាចទៅមុខបាន រីឯក្រុមហ៊ុនក៏គ្មានភាពរីកចម្រើន ដែលសកម្មភាពដដែលជាដដែលនេះចាប់ផ្តើមក្លាយទៅជាជំងឺមហារីក ពិបាកព្យាបាល ព្រោះទាំងអ្នកដឹកនាំ ទាំងបុគ្គលិក គឺនៅតែបន្តរស់នៅក្នុងបរិបទដដែលៗ និងចាប់ផ្តើមអស់សង្ឃឹម ឬបាត់បង់ជំនឿពីមួយថ្ងៃៗ អាចរហូតដល់ថ្ងៃបិទទ្វារអាជីវកម្មទៅវិញក៏អាចថាបានដែរ ព្រោះតែពួកគេ គ្មានលទ្ធផលថ្មីដែលជាការលើកទឹកចិត្តក្នុងការបន្តដំណើរទៅមុខទៀត។

លោកបានបន្ថែមទៀតថា បុគ្គលិកគួរធ្វើជាផ្នែកមួយនៃដំណោះស្រាយសម្រាប់ក្រុមហ៊ុន ព្រោះក្រុមហ៊ុនណាក៏ដូចជាក្រុមណាដែរ គឺមិនអាចចៀសផុតពីបញ្ហាឡើយ។ គ្រាន់តែបញ្ហានោះធំ ឬតូច គឺទៅតាមសមត្ថភាពនៃការដឹកនាំឡើងមកតែប៉ុណ្ណោះ។ បើអ្នកជាចំណែកមួយនៃដំណោះស្រាយ នោះក្រុមហ៊ុននឹងកាន់តែរីកចម្រើន ប៉ុន្តែបើអ្នកជាចំណែកនៃបញ្ហា នោះក្រុមហ៊ុននឹងកាន់តែមានបញ្ហា។ បញ្ហាធំ ឬតូចនោះមិនទាន់ហៅថា ជាបញ្ហានៅឡើយទេ ប៉ុន្តែសមត្ថភាពនៃការដោះស្រាយរបស់ក្រុមការងារធំ ឬតូចនោះ ទើបជាបញ្ហាយ៉ាងពិតប្រាកដ។ ពោលគឺមានន័យថា បើទោះជាក្រុមហ៊ុនជួបបញ្ហាយ៉ាងណាក្តី បើក្រុមការងាររបស់អ្នកមានសមត្ថភាពគ្រប់គ្រាន់ក្នុងការរួមចំណែកដោះស្រាយ នោះបញ្ហាវាលែងទៅជាបញ្ហាទៀតហើយ គឺវាគ្រាន់តែជាឱកាសដែលអាចឱ្យក្រុមហ៊ុនរបស់អ្នកបានរៀនសូត្រនូវអ្វីដែលថ្មីក្នុងការបោះជំហានទៅរកភាពជោគជ័យតែប៉ុណ្ណោះ៕

October 6, 2017

សត្វស្វាក្តាមជាង4ម៉ឺនក្បាលត្រូវបាននាំចេញទៅលក់នៅក្រៅប្រទេស

ភ្នំពេញ៖ បច្ចុប្បន្នចំនួនសត្វស្វាក្តាមក្នុងកសិដ្ឋាននៅកម្ពុជាមានការកើនឡើងគួរឱ្យកត់សម្គាល់ ប៉ុន្តែការនាំចេញទៅក្រៅប្រទេសមានការធ្លាក់ចុះព្រោះតម្រូវការទីផ្សារមានតិចតួច។ គិតត្រឹមខែកញ្ញា ឆ្នាំ2017 សត្វស្វាក្តាមនៅតាមបណ្តាកសិដ្ឋានទាំងអស់មានចំនួនសរុប54,500ក្បាល ក្នុងនោះកូនកើតក្នុងរយៈពេល9ខែ ឆ្នាំ2017នេះ មានចំនួន 8,154ក្បាល។

គិតពីឆ្នាំ2010 ដល់ 2017 ក្រុមហ៊ុនបាននាំចេញសត្វស្វាក្តាមទៅក្រៅប្រទេសដូចជា ជប៉ុន ចិន សហរដ្ឋអាមេរិក សាធារណរដ្ឋកូរ៉េ និងសិង្ហបុរីចំនួន 40,420ក្បាល។ ការនាំចេញសត្វស្វាក្តាមទៅក្រៅប្រទេស គឺនាំចេញកូនស្វាក្តាមជំទង់ដែលបង្កាត់ពូជមិនមែនមេៗស្វានោះទេសម្រាប់ធ្វើការស្រាវជ្រាវ និងពិសោធវេជ្ជសាស្ត្រ ហើយការនាំចេញក្នុងមួយឆ្នាំមានចំនួនជាមធ្យមពី3,000 – 5,000 ក្បាល។

លោក Steven Meyer នាយកក្រុមហ៊ុន Shin Nippon Biomedical Laboratories(SNBL)បានឱ្យដឹងក្នុងពិធីបើកសិក្ខាសាលាស្តីពី “ផលិតកម្មសត្វស្វាក្តាម និងជំងឺស៊ូណូស” ដែលធ្វើឡើងនៅខេត្តព្រះសីហនុ កាលពីថ្ងៃទី5 ខែតុលា បានឱ្យដឹងថា ការវិវឌ្ឍរីកចម្រើន និងសមិទ្ធផលសំខាន់ៗដែលក្រុមហ៊ុនសម្រេចបានជាអាទិ៍មានដូចជា៖ ការជ្រើសរើសពូជ និងការបង្កាត់ពូជ ការចិញ្ចឹម ការការពារជំងឺឆ្លង ការងារស្រាវជ្រាវកម្មសិក្សារបស់និស្សិត និងមន្ត្រីជំនាញ ការផ្លាស់ប្តូរបទពិសោធ ការរៀបចំសិក្ខាសាលាផ្សព្វផ្សាយ និងការបំពេញបែបបទនាំចេញតាមគោលការណ៍របស់ក្រសួងកសិកម្ម រុក្ខា ប្រមាញ់ និងនេសាទ។

លោកបានបញ្ជាក់បន្ថែមថា ជាច្រើនឆ្នាំកន្លងមកនេះ សត្វស្វាក្តាម ត្រូវបាននាំចេញពីប្រទេសកម្ពុជាយកទៅចិញ្ចឹម និងបង្កាត់ពូជនៅប្រទេសជិតខាង ពិសេសប្រទេសចិន រួចធ្វើការនាំចេញទៅកាន់ប្រទេសទី3 ដែលធ្វើឱ្យប្រទេសកម្ពុជាបាត់បង់ចំណូល ពិសេសបាត់បង់អត្តសញ្ញាណ និងប្រភពដើមរបស់សត្វស្វាក្តាម។ បច្ចុប្បន្ន និងអនាគត ក្រុមហ៊ុនបានទទួលគោលការណ៍នាំចេញទៅកាន់ប្រទេសមួយចំនួនក្នុងតំបន់អឺរ៉ុប សហរដ្ឋអាមេរិក ជប៉ុន អូស្ត្រាលី កូរ៉េ និងចិន។ល។ ក្នុងបំណងធ្វើការសិក្សាស្រាវជ្រាវផ្នែកវិទ្យាសាស្ត្រឱសថមនុស្ស និងសត្វ។

ជាមួយគ្នានេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទបានវាយតម្លៃខ្ពស់ចំពោះអគ្គនាយកដ្ឋានសុខភាពសត្វ និងផលិតកម្មសត្វ និងក្រុមហ៊ុនSNBL ដែលសហការគ្នាលើការស្រាវជ្រាវ បណ្តុះបណ្តាលផ្លាស់ប្តូរបទពិសោធ ការធ្វើរោគវិនិច្ឆ័យជំងឺសត្វនៅមន្ទីរពិសោធទាំងក្នុង និងក្រៅប្រទេសតាំងពីឆ្នាំ 2010 រហូតមកទល់ពេលបច្ចុប្បន្ន។

គួរបញ្ជាក់ថា សត្វស្វាក្តាម (Scientific Name: Macacafascicularis) ជាប្រភេទសត្វស្ថិតក្នុងក្រុមដែលមានដោយបង្គួរ វាជាប្រភេទសត្វមិនខ្លាចទឹក និងរស់នៅជាហ្វូងធំរហូតដល់ទៅ 100ក្បាល។ ស្វាក្តាមមានវត្តមានស្ទើរតែទូទាំងតំបន់នៃប្រទេសកម្ពុជា ក៏ដូចជានៅតាមបណ្តាប្រទេសនានានៃភូមិភាគអាស៊ីអាគ្នេយ៍ដែរ ដែលរួមមាន៖ ប្រទេសថៃ ម៉ាឡេស៊ី ហ្វីលីពីន កោះសូម៉ាត្រា។ល។ លទ្ធផលស្រាវជ្រាវរបស់រដ្ឋបាលព្រៃឈើក្នុងឆ្នាំ2009 បានបង្ហាញថា ដង់ស៊ីតេសត្វស្វាក្តាម ជាមធ្យមមាន 30ក្បាល/Km2 ហើយពួកវាចូលចិត្តរស់នៅជាហ្វូងនៅតាមតំបន់ព្រៃលិចទឹក តំបន់ព្រៃភ្នំ តំបន់ព្រៃកោងកាង តាមឆ្នេរសមុទ្រ និងតំបន់កសិកម្ម។

ចាប់តាំងពីឆ្នាំ2003មក ក្រសួងកសិកម្ម រុក្ខា ប្រមាញ់ និងនេសាទបានអនុញ្ញាតឱ្យមានការបង្កើតកសិដ្ឋានចិញ្ចឹម និងបង្កាត់ពូជស្វាក្តាមសម្រាប់ធ្វើការនាំចេញ បច្ចុប្បន្ននេះមានកសិដ្ឋានចំនួន7នៅកម្ពុជា៕

October 6, 2017

វៀតណាមជំរុញវិស័យអប់រំបែបណាដើម្បីជួយដល់វិស័យឧស្សាហកម្ម?

ការអប់រំធនធានមនុស្ស ជាផ្នែកយ៉ាងសំខាន់ដែលជំរុញឱ្យសកម្មភាពមានភាពរស់រវើក ព្រោះថា នៅពេលដែលប្រទេសមួយសម្បូរទៅដោយប្រជាជនដែលមានគុណភាពខ្លាំង គ្រប់ចង្វាក់ផលិតកម្មក្នុងស្រុកក៏អាចធ្វើទៅបានដោយរលូនផងដែរ ព្រោះពួកគេមានធនធានគ្រប់គ្រាន់ដើម្បីធ្វើការផលិតនូវរាល់ផលិតផលទាំងអស់នោះ។

យោងការលើកឡើងរបស់រដ្ឋាភិបាលវៀតណាមដែលដកស្រង់ដោយសារព័ត៌មាន Vietnam Express បានឱ្យដឹងថា រដ្ឋាភិបាលកំពុងធ្វើបទប្បញ្ញត្តិថ្មីមួយដើម្បីសម្រួលដល់ស្ថាប័នបរទេសដែលធ្វើការផ្តល់សេវាកម្មអប់រំដល់សិស្សដើម្បីស្វែងរកការសិក្សានៅក្រៅប្រទេស។

យោងតាមការចេញផ្សាយដោយសារព័ត៌មានក្នុងស្រុករបស់វៀតណាម បានបង្ហាញពីការលើកឡើងរបស់ក្រសួងអប់រំ និងបណ្តុះបណ្តាលវៀតណាមថា ពួកគេជឿជាក់ថា បទប្បញ្ញត្តិថ្មីនេះនឹងជំរុញឱ្យមានការបណ្តុះបណ្តាលធនធានមនុស្សបានយ៉ាងទំលំទូលាយ ដែលមូលធនមនុស្សទាំងអស់នោះនឹងក្លាយជាកម្លាំងពលកម្មយ៉ាងសំខាន់សម្រាប់អភិវឌ្ឍវិស័យឧស្សាហកម្មក្នុងស្រុក។

ទិន្នន័យនៅចុងឆ្នាំ 2016 ពាក់ព័ន្ធនឹងការអប់រំនៅប្រទេសវៀតណាម បានបង្ហាញឱ្យឃើញថា មាននិស្សិតប្រមាណជាង 30,000នាក់ បានចេញទៅសិក្សានៅសហរដ្ឋអាមេរិក។ ចំនួននេះត្រូវបានគេមើលឃើញថាវៀតណាមបានស្ថិតក្នុងចំណាត់ថ្នាក់លេខ6 ក្នុងចំណោមប្រទេសដែលមានសិស្សទៅសិក្សានៅគ្រឹះស្ថានអប់រំរបស់អាមេរិក។

ជាចក្ខុវិស័យថ្មីរបស់វៀតណាម គឺចង់ឃើញសិស្សនិស្សិតរបស់ខ្លួនបានចេញទៅសិក្សានៅបរទេស ជាពិសេសសហរដ្ឋអាមេរិកច្រើនជាងជប៉ុន និងជិតដល់ចំនួនសិស្សនៃប្រទេសកាណាដា។ ចំនួនចុះឈ្មោះសិក្សារបស់សិស្សវៀតណាមនៅសហរដ្ឋអាមេរិក មានចំនួនច្រើនជាងឆ្នាំ 2009 ទ្វេដង។

ក្រៅពីសហរដ្ឋអាមេរិក ប្រទេសដែលជាគោលដៅរបស់សិស្សវៀតណាមមានដូចជា អូស្ត្រាលី សិង្ហបុរី និងចក្រភពអង់គ្លេស៕

October 6, 2017

ផ្សារផលិតផលរបស់សម្ព័ន្ធសមាគមជលផលសមុទ្រកម្ពុជា បើកសាកល្បងនៅក្នុងខេត្តកំពត

ផលិតផលមួយចំនួនដែលចេញពីបណ្តា ខេត្តនានានៅតំបន់សមុទ្រ បានចាប់ផ្តើមមានផ្សារសាកល្បងរបស់ខ្លួនជាលើកដំបូងក្នុងខេត្តកំពត ដោយថ្នាក់ដឹកនាំក្រសួងពាណិជ្ជកម្ម និងអាជ្ញាធរខេត្តកំពត ព្រមទាំងវិស័យឯកជនរំពឹងថា ការបង្កើតផ្សារមួយនេះនឹងចូលរួមចំណែកជួយដល់ការអភិវឌ្ឍផលិតផលផ្សេងៗ ពិសេសផលិតផលជលផលសមុទ្រកម្ពុជា។

រដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ កាលពីថ្ងៃសុក្រកន្លងមក បានចាត់ទុកការបង្កើតផ្សារផលិតផលសមុទ្រនេះ គឺជាដំណើរវិវត្តដ៏ល្អមួយដែលនឹងផ្តល់ឱកាសឱ្យសហគ្រាសនៅតំបន់សមុទ្រអាចនាំយកផលិតផលសមុទ្ររបស់ខ្លួន ដើម្បីផ្តល់ឱ្យអ្នកប្រើប្រាស់ដែលមាននិន្នាការកើនឡើងផ្នែកអនាម័យ គុណភាព និងសោភ័ណភាព។

ឯកឧត្តមបានបញ្ជាក់ថា បើតាមបទពិសោធរបស់ប្រទេសជឿនលឿនដែលផលិតផលត្រូវបានគេទទួលស្គាល់យ៉ាងទូលំទូលាយ គឺអ្នកប្រើប្រាស់តែងតែប្រើភ្នែករបស់គេមុន មុននឹងការប្រើអណ្តាតសម្រាប់ទិញផលិតផលនោះ។ នេះមានន័យថា ផលិតផលដែលអាចទាក់ទាញអ្នកប្រើប្រាស់បាន គឺជាផលិតផលដែលមានសោភ័ណភាពស្អាត និងគុណភាពល្អ។

ឯកឧត្តមរដ្ឋមន្ត្រី មានប្រសាសន៍ថា៖“ខ្ញុំពិតជាគាំទ្រចំពោះកិច្ចខិតខំប្រឹងប្រែងរបស់ផ្នែកឯកជន ហើយខ្ញុំជឿថា ផ្សារនេះនឹងក្លាយជាកន្លែងប្តេជ្ញាចិត្តរបស់ម្ចាស់សហគ្រាសផលិតទាំងអស់។ អភិបាលខេត្តកំពត ឯកឧត្តម ចាន់ ចេស្តារ បាននិយាយថា ផ្សារនេះបានកើតឡើងក្នុងខេត្តកំពត ចំពេលដែលខេត្តជាប់មាត់សមុទ្រមួយនេះកំពុងមានប្រជាប្រិយភាពក្នុងការទាក់ទាញភ្ញៀវទេសចរជាតិ និងអន្តរជាតិមកទស្សនា។

បើតាមឯកឧត្តម ក្នុងឆ្នាំនេះខេត្តកំពតរំពឹងថានឹងទទួលបានភ្ញៀវទេសចរជាតិជាង1លាននាក់ និងភ្ញៀវទេសចរអន្តរជាតិជាង20ម៉ឺននាក់។ ភាគច្រើននៃភ្ញៀវទេសចរទាំងអស់គឺសុទ្ធតែជាអ្នកមានជីវភាពមធ្យម និងខ្ពស់ ដូចនេះការបង្កើតផ្សារនេះនឹងរួមចំណែកដល់ការទាក់ទាញភ្ញៀវទេសចរ ក៏ដូចជាអភិវឌ្ឍន៍ផលិតផលសមុទ្រដើម្បីឈានឆ្ពោះទៅរកគុណភាព និងអនាម័យកម្រិតខ្ពស់ផងដែរ។

ឯកឧត្តមអភិបាលខេត្តកំពត បានបញ្ជាក់ថា៖ “វាជាកិត្តិយសណាស់ ដែលផ្សាររួមសម្រាប់ផលិតផលសមុទ្រមួយនេះបានកើតឡើងក្នុងទឹកដីខេត្តកំពត។ យើងសង្ឃឹមថា អាជីវករអាចរៀនសូត្រពីគ្នាទៅវិញទៅមក ហើយផលិតផលិតផលដែលមានស្តង់ដារ និងអនាម័យខ្ពស់ស្របតាមតម្រូវការអ្នកប្រើប្រាស់ដែលមានជីវភាពកាន់តែប្រសើរ។

ក្នុងនាមជាម្ចាស់ផលិតផលម៉ាក ង៉ូវ ហេង ដែលមានផលិតទឹកត្រី និងម្រេចជាដើមនោះ លោកឧកញ៉ា ចាន់ ស៊ីថា អនុប្រធានសម្ព័ន្ធសមាគមជលផលសមុទ្រកម្ពុជា និងជាភាគីម្ចាស់ផ្សារដោយសារផ្សារនេះបានរៀបចំឡើងក្នុងទីតាំងអចលនទ្រព្យរបស់គ្រួសារលោកទាំងស្រុង និងការជួយឧបត្ថម្ភថវិកាកែលម្អពីអង្គការអភិវឌ្ឍន៍ឧស្សាហកម្មប្រចាំកម្ពុជា (UNIDO) បានយល់ឃើញថា ខេត្តនៅមាត់សមុទ្រមានផលិតផលសក្តានុពលជាច្រើនដែលមិនទាន់បានបង្ហាញឱ្យស្របតាមតម្រូវការរបស់អ្នកប្រើប្រាស់។

លោកឧកញ៉ា ចាន់ ស៊ីថា បានអះអាងថា កន្លងមក ខេត្តកំពតគេដឹងថា មានតែដំណាំម្រេចមួយមុខគត់ដែលល្បីសុះសាយទាំងថ្នាក់ជាតិ និងអន្តរជាតិ តែផលិតផលផ្សេងទៀតមិនត្រូវបានលើកស្ទួយ ដូចជាបន្លែ និងផលិតផលជលផលសមុទ្រជាដើម។

ឧកញ៉ា ចាន់ ស៊ីថា និយាយថា៖“យើងចង់ឱ្យនៅទីនេះសម្រាំងយកផលិតផលដែលមានគុណភាពខ្ពស់ កម្រិតស្តង់ដារ និងមានអនាម័យ។ យើងនឹងឈានទៅរកសហគមន៍ផលិតផលិតផលទាំងបន្លែ ត្រី ជាដើម តាមកិច្ចសន្យា ដើម្បីធានាថាផលិតផលនោះមានគុណភាព និងការវេចខ្ចប់ល្អ។

លោក សុខ ណារិន នាយកប្រតិបត្តិការរបស់អង្គការសហប្រជាជាតិដើម្បីអភិវឌ្ឍន៍ឧស្សាហកម្មប្រចាំកម្ពុជា (UNIDO) ដែលបានជួយជ្រោមជ្រែងបង្កើតផ្សារនេះ បានអះអាងថា ក្រោយពីការធ្វើការងារមួយរយៈធំជាពិសេសជាមួយអ្នកនេសាទតាមគោលដៅ គេសង្កេតឃើញថាមានការកែប្រែឥរិយាបថមួយចំនួនក្នុងការទុកដាក់ផលិតផល និងការវេចខ្ចប់។

លោក បាននិយាយថា៖“អ្វីដែលយើងដឹង គឺផលិតផលរបស់យើង ជាពិសេសផលិតផលសមុទ្រមិនទាន់កែច្នៃ ត្រូវបាននាំចេញយ៉ាងច្រើន ដែលយើងត្រូវតែទាញការចាប់អារម្មណ៍មករកផលិតផលដែលមានគុណភាព អនាម័យ ដើម្បីទាក់ទាញអ្នកប្រើប្រាស់ ព្រោះសូម្បីទីផ្សារក្នុងស្រុកក៏មានសក្តានុពលខ្ពស់ដូចគ្នា”៕

October 6, 2017

ស្ពានអាកាសថ្មើរជើង (ឆ្លងថ្នល់) ក្នុងរាជធានីភ្នំពេញនឹងត្រូវសាងសង់បន្ថែម

ភ្នំពេញ – ស្ពានអាកាសថ្មើរជើងជាច្រើនកន្លែងទៀតក្នុងរាជធានីភ្នំពេញនឹងត្រូវសាងសង់បន្ដ ខណៈស្ពានអាកាសថ្មើរជើងនាងគង្ហីងនឹងចាប់ផ្ដើមសាងសង់នៅសប្ដាហ៍ក្រោយ។

មន្ត្រីសាធារណការ និងដឹកជញ្ជូនរាជធានីបានឱ្យដឹងថា រដ្ឋបាលសាលារាជធានីភ្នំពេញដែលបានសហការជាមួយក្រុមហ៊ុន OCIC នឹងចាប់ផ្តើមសាងសង់ស្ពានអាកាសថ្មើរជើងនៅត្រង់ម្ដុំស្តុបរង្វង់មូលនាងគង្ហីង។

លោក សាំ ពិសិទ្ធិ ប្រធានមន្ទីរសាធារណការ និងដឹកជញ្ជូន បានបញ្ជាក់តាមរយៈ Facebook ផ្លូវការរបស់ខ្លួនថា «ដើម្បីសម្រួលដល់ការធ្វើដំណើរថ្មើរជើងឆ្លងកាត់ទីតាំងភ្លើងស្តុបមិនឱ្យប៉ះពាល់ចរាចរណ៍ និងធានាបានសុវត្ថិភាព រដ្ឋបាលរាជធានីភ្នំពេញ សហការជាមួយក្រុមហ៊ុនវិនិយោគទុនអាណិកជនកម្ពុជា OCIC នឹងចាប់ផ្តើមសាងសង់ស្ពានអាកាសថ្មើរជើងនៅជុំវិញស្តុបរង្វង់មូលនាងគង្ហីងក្នុងខណ្ឌ៧មករានៅសប្តាហ៍ក្រោយនេះហើយ»។

ជុំវិញបញ្ហានេះលោក ម៉េត មាសភក្ដី អ្នកនាំពាក្យសាលារាជធានីភ្នំពេញបានលើកឡើងថា នៅសប្ដាហ៍ក្រោយនេះ ការដ្ឋានសាងសង់ស្ពានអាកាសថ្មើរជើងទីបីដែលគ្រោងនឹងប្រើពេលវេលាសាងសង់ប្រមាណ6ខែនោះនឹងត្រូវធ្វើឡើង ដោយស្ពានអាកាសសម្រាប់ដើរឆ្លងថ្នល់ទីបីនេះគ្រោងនឹងដាក់ឱ្យប្រើប្រាស់ជាផ្លូវការក្នុងអំឡុងក្រោយពិធីបុណ្យចូលឆ្នាំខ្មែរប្រពៃណីជាតិរួច។

ស្ពានអាកាសថ្មើរជើងត្រង់ចំណុចនាងគង្គីងនេះ នឹងត្រូវសាងសង់ឡើងចេញពីតំបន់ពាណិជ្ជកម្មអូឡាំព្យា គ្រប់លើស្តុបនាងគង្គីង ដើម្បីធ្វើយ៉ាងណាសម្រួលដល់ការធ្វើដំណើរថ្មើរជើងរបស់ប្រជាពលរដ្ឋទូទៅចេញពីតំបន់ពាណិជ្ជកម្មមកកាន់ទីសាធារណៈ និងការធ្វើដំណើរថ្មើរជើងពីទីសាធារណៈទៅកាន់តំបន់ពាណិជ្ជកម្មកុំឱ្យមានបញ្ហាគ្រោះថ្នាក់ចរាចរណ៍។ ស្ពាននេះមានច្រកឡើង-ចុះជណ្ដើរ 5 ច្រកដែលស្របតាមផ្លូវដើម្បីបង្កលក្ខណៈងាយស្រួលសម្រាប់ប្រជាពលរដ្ឋអាចធ្វើដំណើរទៅតាមទិសដៅរបស់ខ្លួនបាន។ ដោយឡែកពាក់ព័ន្ធការវិនិយោគលើស្ពានអាកាសថ្មើរជើងទីបីនេះ រដ្ឋបាលសាលារាជធានីភ្នំពេញនឹងប្រកាសជូនសាធារណៈដឹងនៅពេលខាងមុខ។

អ្នកនាំពាក្យសាលារាជធានីភ្នំពេញ បន្ដថា បច្ចុប្បន្នរាជធានីភ្នំពេញមានស្ពានអាកាសថ្មើរជើងពីររួចហើយ នៅម្ដុំជម្ពូវ័ន្ដ ហើយស្ពានអាកាសនាងគង្ហីងនេះ គឺជាស្ពានទីបី។ បច្ចុប្បន្នក្រៅពីគិតគូរអំពីការសាងសង់ស្ពានថ្មើរជើងទីបី(នាងគង្ហីង)នេះហើយ រដ្ឋបាលសាលារាជធានីភ្នំពេញកំពុងតែគិតគូរ និងសិក្សាបន្ថែមទៀតទៅលើទីតាំងណាដែលអំណោយផល និងមានតម្រូវការស្ពានអាកាសថ្មើរជើងដើម្បីបញ្ជៀសការកកស្ទះ និងគ្រោះថ្នាក់កើតចេញពីបញ្ហាចរាចរណ៍នោះ ហើយនិងមានការសាងសង់ជាបន្ដបន្ទាប់នៅពេលក្រោយៗទៀត៕

October 6, 2017

Category: សង្គម និងសេដ្ឋកិច្ច