Category: សង្គម និងសេដ្ឋកិច្ច

ការចាកចេញរបស់នាងតូច សុវណ្ណារី ធ្វើឱ្យ ដេននី ក្វាន់ ទប់ចិត្តមិនបាន!
គ្រាន់តែការប្រកាសលទ្ធផលកម្មវិធី The Voice Kids Cambodia ក្នុងវគ្គ LIve Show នាសប្ដាហ៍ទី 3 បានបញ្ចប់ភ្លាម បណ្ដាអ្នកលេងបណ្ដាញទំនាក់ទំនងសង្គម Facebook បានបញ្ចេញការរិះគន់យ៉ាងខ្លាំងចំពោះគ្រូបង្វឹក សុគន្ធ នីសា និងការចាកចេញរបស់នាងតូច អ៊ុក សុវណ្ណារី ដែលជារឿងមួយមិនស័ក្ដិសមទាល់តែសោះ ដោយហេតុថា នាងតូចរូបនេះជាបេក្ខភាពដែលពោរពេញដោយសមត្ថភាព និងទេពកោសល្យល្អដាច់គេក្នុងការបកស្រាយចម្រៀងគ្រប់ទម្រង់។
នៅក្នុងនោះដែរ តារាសិចស៊ី ដេននី ក្វាន់ កាន់តែរំជួលចិត្ត និងទប់អារម្មណ៍មិនបានទៅទៀត ចំពោះការរបូតចេញពីបេក្ខភាពរបស់នាងតូច សុវណ្ណារី ក្នុងកម្មវិធីប្រឡងលំដាប់ថ្នាក់ពិភពលោកមួយនេះ ទើបបានជានាងបញ្ចេញអារម្មណ៍ក្នុងចិត្តនៅលើ Facebook ថា “យប់មិញមិនបានគេងទេចាំមើលលទ្ធផលប្រកាស តែសម្រាប់ខ្ញុំគិតថា វាមិនសមទាល់តែសោះដែលសុវណ្ណារីត្រូវចាកចេញពីការប្រកួតនេះ បើទោះខ្ញុំមិនមែនជាអ្នកចម្រៀង តែក៏អាចស្តាប់ដឹងថា គាត់ច្រៀងពីរោះឬមិនពីរោះ ហើយមានសមត្ថភាព ឬមិនមានដែរ សុវណ្ណារីច្រៀងបានគ្រប់ទម្រង់ សម័យ បុរាណ នឹងបទអង់គ្លេស ។ Hmmmmm! សង្ឃឹមថា វគ្គផ្តាច់ព្រ័ត្រនៅសប្តាហ៍ក្រោយ ពុកម៉ែបងប្អូននឹងបោះឆ្នោតឱ្យពួកគេទៅលើសមត្ថភាពទៅចុះសូមកុំបោះឆ្នោតឱ្យដោយគ្រាន់អាណិត និងចូលចិត្តឱ្យសោះ សូមយល់ពីគ្នាដែលជាអ្នកមានសមត្ថភាពផង”៕
October 9, 2017
មូលហេតុដែលអ្នកគាំទ្រកូរ៉េស្អប់តារាស្រី Tiffany SNSD ខ្លាំងមិនអាចលើកលែងបាន
អ្នកគាំទ្រកូរ៉េភាគច្រើនស្អប់តារាស្រីដែលមានឈ្មោះថា Tiffany ជាសមាជិកស្រីក្នុងក្រុមចម្រៀងSNSD ហើយនាងជាតារាកូនកាត់កូរ៉េ-អាមេរិក ដែលកន្លងមកនាងបានធ្វើរឿងមួយប៉ះពាល់ដល់ថ្ងៃឯករាជ្យជាតិរបស់ប្រទេសកូរ៉េ ដែលជាមូលហេតុមួយបណ្ដាលឱ្យអ្នកគាំទ្រកូរ៉េស្អប់រូបនាងដល់ឆ្អឹងតែម្ដង។
គួររំឭកផងដែរថា តាមរយៈសារព័ត៌មាន Koreanboo ដែលធ្លាប់បានចេញផ្សាយបានឱ្យដឹងថា តារាស្រីរូបនេះបានធ្វើដំណើរទៅចូលរួមការប្រគំតន្ត្រីនៅទីក្រុងតូក្យូ ដែលមានឈ្មោះថា “SM TOWN Live World Tour V” ក្នុងប្រទេសជប៉ុន។ ជាអកុសល នាងបានបង្ហោះរូបភាពមួយសន្លឹកដែលជាការជូនដំណឹងដល់អ្នកគាំទ្រជប៉ុនឱ្យបានដឹង ក៏ប៉ុន្ដែរូបភាពនេះបានស្ដែងពីសញ្ញានៃទង់ជាតិជប៉ុន រូបរស្មីពន្លឺព្រះអាទិត្យរះពណ៌ក្រហម ដែលប្រទេសជប៉ុនបានប្រើប្រាស់ទង់ជាតិមួយនេះនៅក្នុងសម័យសង្គ្រាមលោកលើកទី2 ហើយបានបង្កសង្រ្គាមជាមួយបណ្ដាប្រទេសជិតខាងខ្លួន ដែលរួមមានកូរ៉េខាងត្បូងផងដែរ ហើយតារាស្រីរូបបានបែរជាបង្ហោះរូបភាពនៃសញ្ញាសង្គ្រាមបែបនេះនៅក្នុងថ្ងៃបុណ្យឯករាជ្យរបស់កូរ៉េខាងត្បូងទៅវិញ បណ្ដាលឱ្យអ្នកគាំទ្រជនជាតិកូរ៉េផ្ទុះកំហឹង និងស្អប់រូបនាងរហូតដល់សព្វថ្ងៃមិនអាចបំភ្លេចបានឡើយ។
គួរបញ្ជាក់ផងដែរថា រហូតមកទល់បច្ចុប្បន្ននេះ ភ្លើងកំហឹងរបស់ជនជាតិកូរ៉េចំពោះតារាស្រីមួយដួងនេះ នៅតែមិនទាន់ពន្លត់់បាននៅឡើយទេ បើទោះបីជានាងបានព្យាយាមចេញសារសូមទោសហើយក្ដី៕

October 9, 2017
9ខែដើមឆ្នាំ2017 កម្ពុជាប្រមូលពន្ធបានជាង1,500លានដុល្លារ
ភ្នំពេញ៖ ត្រឹមរយៈពេល 9ខែដើមឆ្នាំ 2017 នេះ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការប្រមូលពន្ធដារពីពលរដ្ឋ ដូចជាអាជីវករ និងវិនិយោគិន ម្ចាស់សហគ្រាសក្រុមហ៊ុនផ្សេងៗបានប្រមាណជាជាង 1,500លានដុល្លារអាមេរិក។
យោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារឱ្យដឹងថា ចំណូលពន្ធខែកញ្ញា 2017 តាមប្រព័ន្ធ online មានចំនួន 529.92ពាន់លានរៀល ស្មើនឹង 132.48លានដុល្លារ សម្រេចបាន92.65% នៃផែនការ ឯលទ្ធផលប្រចាំត្រីមាសទី3 ឆ្នាំ2017 ធៀបនឹងផែនការឆ្នាំ2017 ចំណូលសរុប 6186.20ប៊ីលានរៀលស្មើនឹង 1,546.55លានដុល្លារ ស្មើនឹង 90.15%នៃផែនការសរុប។
ចំណែករយៈពេល8ខែដើមឆ្នាំ2017 អគ្គនាយកដ្ឋានពន្ធដារ ប្រមូលពន្ធបានប្រមាណជា 5,657 ពាន់លានរៀល ស្មើនឹងប្រមាណជា 1,414.43លានដុល្លារសហរដ្ឋអាមេរិក ដែលសម្រេចបានប្រមាណជា 82.43% នៃផែនការកំណត់ដោយច្បាប់។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារមានប្រសាសន៍ថា អគ្គនាយកដ្ឋានពន្ធដារបានយកចិត្តទុកដាក់ខ្ពស់ក្នុងការអនុវត្តយុទ្ធសាស្ត្រកៀរគរចំណូលរយៈពេលមធ្យមឆ្នាំ2014 – 2018 ស្របតាមគោលនយោបាយរាជរដ្ឋាភិបាលដែលបានដាក់ចេញ គឺមិនមានការបង្កើតប្រភេទពន្ធថ្មី ឬដំឡើងអត្រាពន្ធទេ ដោយគ្រាន់តែមានតែពង្រឹងលើការគ្រប់គ្រងប្រមូលពន្ធប៉ុណ្ណោះ។
លើសពីនេះ រដ្ឋាភិបាលបានគិតគូរដល់ប្រជាពលរដ្ឋអ្នករកស៊ីតូចតាច តាមរយៈការលុបចោលនូវរបបម៉ៅការ ស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2016 ដែលក្នុងនោះ ប្រជាពលរដ្ឋអាជីវករតូចតាចបែបលក្ខណៈគ្រួសារដូចរៀបរាប់ខាងលើ ហើយមានកម្រិតផលរបរក្រោម 250លានរៀល គឺជាកម្មវត្ថុនៃការលើកលែងពន្ធ និងមិនមានកាតព្វកិច្ចសារពើពន្ធទេ៕
October 9, 2017
ម៉ូដសក់បែបសាមញ្ញ តែបង្កប់ដោយភាពស្រស់ស្អាត
យើងជាខ្មែរ ពិតណាស់គឺត្រូវតែមានពេលវេលា សម្រាប់ការតុបតែងខ្លួនបែបដែលខ្លួនស្រឡាញ់ខ្លះហើយ ទោះជាសម័យកាលនេះគឺជាសម័យកាលនៃភាពទំនើបទាន់សម័យ និងស៊ីវីល័យយ៉ាងណាក៏ដោយ។
ជាពិសេសស្ថិតនៅក្នុងអំឡុងពេលនៃពិធីបុណ្យប្រពៃណីជាតិដូចជារដូវភ្ជុំបិណ្ឌនេះទៀត គឺពិតជាអំឡុងពេលដែលអ្នកត្រូវផ្លាស់ប្តូរស្តាយល៍នៃការតុបតែងខ្លួន និងម៉ូដសក់តាមបែបសុភាពរាបសារម្តងហើយ ដើម្បីទទួលបាននូវភាពស្រស់ស្អាតគួរជាទីគាប់ចិត្ត និងស័ក្តិសមជាមួយនឹងរដូវកាលផង ដូច្នេះសូមពិនិត្យមើលម៉ូដសក់ទាំងនេះ ហើយសូម ជ្រើសរើសម៉ូដសក់បែបសុភាពៗណាមួយដែលអ្នកចូលចិត្ត ដើម្បីលេងស្តាយល៍ម៉ូដសក់របស់អ្នក៕
October 9, 2017
អ្នកនាង ខ្ញុង ទួញសោកថ្ងៃចូលរួមមរណភាពដៃគូភ្លេងការ
មុននេះបន្ដិច នៅលើគណនី Facebook របស់តារាកំប្លែងល្បីឈ្មោះអ្នកនាង ខ្ញុង បានបង្ហោះរូបភាពគ្រោះថ្នាក់ចរាចរណ៍ដ៏រន្ធត់ប៉ុន្មានសន្លឹក ដែលបង្ហាញឱ្យឃើញពីរូបស្រី្តចំណាស់ម្នាក់អង្គុយយំបោកខ្លួនឱបបុរសដែលរងគ្រោះម្នាក់នៅក្នុងថ្លុកឈាម។
តារាស្រីរូបនេះបានបញ្ជាក់នៅលើ Facebook ខ្លួនថា «យើងតែងតែជួបគ្នានៅតាមរោងការ ពេលខ្ញុំទៅកាត់សក់នៅកំពត តែងតែជួបវង់ភ្លេងខ្មែររបស់ពូរហូត ឥឡូវពូស្លាប់ហើយ សូមឱ្យវិញ្ញាណក្ខន្ធពូបានទៅកាន់សុខគតិភពផងចុះ ជាតិនេះជួបគ្នាស្គាល់គ្នា ជាតិក្រោយមិនប្រាកដថាបានជួបទៀតឬអត់ទេ ខ្ញុំស្រណោះពូណាស់ សូម្បីតែប្រូហ្វ៉ាលហ្វេសប៊ុកពូក៏ដាក់រូបក្មួយដែរ ហេតុតែស្រឡាញ់ ក្មួយរន្ធត់ចិត្តណាស់»។
គួរបញ្ជាក់ផងដែរថា អត្តសញ្ញាណបុរសដែលបានទទួលមរណភាពដោយសារគ្រោះថ្នាក់ចរាចរណ៍រូបនេះ ត្រូវបានអ្នកនាង ខ្ញុង បញ្ជាក់ឱ្យដឹងថា គាត់ជាអ្នកលេងភ្លេងការ និងជាដៃគូចម្រៀងជាមួយអ្នកនាង ដែលមានឈ្មោះថា នាយ ញ៉ាញ់ ៕
October 9, 2017
អាមេរិកលើកទឹកចិត្តឱ្យពលរដ្ឋខ្មែរដាក់ពាក្យស្នើសុំទៅរស់នៅប្រទេសរបស់ខ្លួន
ភ្នំពេញ៖ ដើម្បីភ្ជាប់ទំនាក់ទំនងគ្នាឱ្យកាន់តែល្អប្រសើរ ក្រសួងការបរទេសអាមេរិកបានប្រកាសលើកទឹកចិត្តដល់ពលរដ្ឋខ្មែរឱ្យដាក់ពាក្យស្នើសុំទិដ្ឋាការទៅរស់នៅសហរដ្ឋអាមេរិកជាថ្មីទៀតនៅចុងឆ្នាំ 2017នេះ។
សេចក្តីជូនដំណឹងរបស់ស្ថានទូតអាមេរិកនៅកម្ពុជាបានឱ្យដឹងថា នាយកដ្ឋានគ្រប់គ្រងទិដ្ឋាការ Diversity Visa (DV) របស់ក្រសួងការបរទេសអាមេរិកនឹងផ្តល់ទិដ្ឋាការអន្តោប្រវេសន៍ដល់អ្នកដាក់ពាក្យដែលមានសមត្ថភាពចំនួន 50,000 (ប្រាំម៉ឺន)នាក់ពីប្រទេសដែលជ្រើសរើសជាប្រទេសដែលមានសិទ្ធិទទួលបានជារៀងរាល់ឆ្នាំ។ ការដាក់ពាក្យមិនមានថ្លៃឈ្នួលនោះទេ ប៉ុន្តែត្រូវមានលក្ខណសម្បត្តិគ្រប់គ្រាន់ អ្នកត្រូវតែបំពេញតាមតម្រូវការសាមញ្ញ ប៉ុន្តែតឹងតែងមួយចំនួនដូចជា៖
1. អ្នកត្រូវតែបញ្ចប់ថ្នាក់បាក់ឌុប ឬសញ្ញាបត្រដែលមានតម្លៃស្មើ
2. ត្រូវភ្ជាប់រូបថតដែលថតក្នុងរយៈពេល6ខែចុងក្រោយ គិតត្រឹមថ្ងៃដាក់ពាក្យស្នើសុំឆ្នោតDVនេះ
3.ត្រូវបំពេញឈ្មោះ ក្រុមគ្រួសារ (ប្រពន្ឋ និងកូននៅលើពាក្យសុំនោះ)។
ស្ថានទូតអាមេរិកលើកទឹកចិត្តដល់ប្រជាជនកម្ពុជា ដែលមានបំណងដាក់ពាក្យស្នើសុំ សូមកុំផ្តល់ទិន្នន័យឬព័ត៌មានផ្ទាល់ខ្លួនទៅឱ្យក្រុមហ៊ុនឯកជនទាំងឡាយណាដែលប្រកាសថា ខ្លួនជាភ្នាក់ងារផ្តល់ទិដ្ឋការទៅរស់នៅសហរដ្ឋអាមេរិកនេះឱ្យសោះ។ កម្រៃសេវាកម្មតែមួយគត់នៅក្នុងដំណើរការសុំឆ្នោត DV នេះ ត្រូវបានបង់នៅស្ថានទូតសហរដ្ឋអាមេរិក បន្ទាប់ពីបេក្ខជនត្រូវបានជ្រើសរើសដោយឆ្នោតសម្រាប់ការសម្ភាសយកទិដ្ឋាការច្រើនប្រភេទ។ ក្នុងឆ្នាំ 2017 ថ្លៃសេវាកម្មនេះមានចំនួន 330 ដុល្លារក្នុងម្នាក់។
សូមបញ្ជាក់ផងដែរថា ឆ្នោតDVនេះមិនត្រូវការអ្នកឧបត្ថម្ភនៅសហរដ្ឋអាមេរិកដើម្បីជួយសម្រួល ឬធានាការធ្វើដំណើររបស់អ្នកទេ។ ក្រសួងការបរទេសអាមេរិកជំរុញឱ្យមានការប្រុងប្រយ័ត្នចំពោះអ្នកណាដែលអះអាងថា ខ្លួនជាអ្នកឧបត្ថម្ភដែលត្រូវមាននៅក្នុងដំណើរការនេះ ព្រោះពួកគេអាចធ្វើឱ្យរាំងស្ទះដល់ដំណើរការដាក់ពាក្យសុំទៅរស់នៅអាមេរិករបស់អ្នក។
ព័ត៌មានបន្ថែមសូមចូលទៅក្នុងគេហទំព័រខាងក្រោម៖
Diversity Visa (DV)
October 9, 2017
តើលោកអ្នកនៅចាំតារាស្រីកាចឆ្នាស់ឆ្នើមពីសង្គមចាស់ កញ្ញា សាក់ ស៊ីស្បោង បានទេ?
នៅថ្ងៃច័ន្ទទី9 ខែតុលា ឆ្នាំ2017 នេះ ប្រភពព័ត៌មានដែលសារព័ត៌មាន ឡារ៉ែន ទទួលបាន គឺរូបថតមួយសន្លឹកដែលបានបង្ហាញពីសភាពជាក់ស្ដែងរបស់តារាស្រីដ៏កាចឆ្នាស់ឆ្នើមកាលពីសម័យសង្គមចាស់ គឺលោកយាយ សាក់ ស៊ីស្បោង ដែលបានបង្ហោះលើបណ្តាញទំនាក់ទំនងសង្គម Facebook ដោយសរសេរជាភាសាអង់គ្លេស ដែលមានន័យជាខេមរភាសាថា “នេះជារូបថតលោកស្រី សាក់ ស៊ីស្បោង ចន្លោះឆ្នាំ 1967 និងឆ្នាំ 2017″ ។
តារាស្រីរូបនេះ ជាអតីតតារាសម្តែងដ៏ល្បីល្បាញ និងជាតួអង្គនារីសិចស៊ីបំផុត និងសម្ដែងតែជាតួឆ្នាស់ប៉ុណ្ណោះ ក្នុងវិស័យភាពយន្តខ្មែរដំបូងៗ ដូចជាខ្សែភាពយន្តរឿង “បក្សីសួគ៌” (The Bird of Paradise) ដែលនិពន្ធ និងដឹកនាំផលិតដោយជនជាតិបារាំងដ៏ល្បីម្នាក់ឈ្មោះ Marcel Camus ។ លោកធ្វើការក្នុងវិស័យភាពយន្តកម្ពុជាក្នុងឆ្នាំ1961 រហូតដល់ឆ្នាំ1975(មុនរបបខ្មែរក្រហមចូលមកដល់)។
គួរបញ្ជាក់ផងដែរថា បន្ទាប់ពីទទួលបានមហាកិត្តិយសសម្ដែងជាមួយនឹងសម្តេចព្រះបរមរតនកោដ្ឋ ព្រះបាទនរោត្តមសីហនុ ក្នុងដំណើរចូលរួមសម្តែងនៅក្នុងប្រទេសកូរ៉េ នៅដើមទសវត្សរ៍ឆ្នាំ1990រួចមក តារាស្រី សាក់ ស៊ីស្បោង បានបាត់មុខបាត់មាត់ពីវិស័យភាពយន្ដខ្មែររហូតមកទល់បច្ចុប្បន្ននេះតែម្ដង៕
October 9, 2017
គ្រាប់ផ្លែប័រ មានប្រយោជន៍ចំពោះស្បែកមុខ
ផ្លែប័រ មិនត្រឹមតែការពារជាតិខ្លាញ់ប៉ុណ្ណោះទេ វាជួយជួសជុលស្បែកស្ងួត និងខូចរិចរិលឱ្យមានសំណើមឡើងវិញ ហើយនៅក្នុងផ្លែប័រសម្បូរទៅដោយវីតាមីន B ជាតិដែក លីពីត និងកាកសរសៃមិនតែប៉ុណ្ណោះគ្រាប់របស់វាក៏មានផ្ទុកនូវសារធាតុចិញ្ចឹមជាច្រើនផងដែរ ដែលអ្នកគ្រប់គ្នានឹកស្មានមិនដល់។
នេះគឺជាការពិតណាស់ គ្រាប់ផ្លែប័រមានតួនាទីយ៉ាងសំខាន់ក្នុងការថែរក្សាស្បែក និងបំបាត់ស្នាមខ្មៅនៅលើផ្ទៃមុខបាន ទោះជាយ៉ាងណាក៏ដោយ វាមានប្រសិទ្ធភាពការពារស្បែកពេលស្ថិតនៅក្រោមកម្តៅព្រះអាទិត្យច្រើនជាងក្រែមការពារកម្ដៅថ្ងៃ SPF 15+ ទៅទៀត ហើយវាជួយឱ្យស្បែកមិនទទួលរងការខូចខាតដោយសារកម្ដៅព្រះអាទិត្រថែមទៀតផង។ ដូច្នេះហើយបានជា ឡារ៉ែន លើកយកនូវវិធីសាស្ត្រសម្អាតស្បែកមុខជាមួយគ្រាប់ផ្លែប័រ ដូចខាងក្រោមនេះ។
វត្ថុត្រូវត្រៀមទុកជាមុន
– គ្រាប់ប័រ 1គ្រាប់
– ទឹកសម្អាតមុខប្រភេទ Deep Cleaning
– ក្រដាសសើម
វិធីធ្វើ
– ដំបូងត្រូវលាងគ្រាប់ផ្លែប័រជាមួយទឹកស្អាត រួចចិតជាចំណិតៗ ក្រឡុកក្នុងម៉ាស៊ីនឱ្យម៉ដ្ឋ ទុកមួយអន្លើ។
– រួចលាយគ្រាប់ប័រក្រឡុករួច ជាមួយនឹងទឹកសម្អាតមុខ Deep Cleaning ឱ្យសមល្មម។
– បន្ទាប់មកយកល្បាយនោះមកម៉ាស្សាថ្មមៗនៅលើស្បែកមុខ រួចទុកឱ្យស្ងួត ទើបយកក្រដាសសើមជូតចេញ។
– នោះអ្នកនឹងសង្កេតឃើញមានស្នាម និងកម្ទេចធូលីដីនៅលើផ្ទៃមុខយ៉ាងច្បាស់ ដែលបានសម្អាតចេញមក។
– ស្បែកមុខអ្នកនឹងស រលោងស្អាត និងមានសំណើមជាងមុនជាមិនខាន៕
October 9, 2017
ម៉ូដសម្លៀកបំពាក់បុរសបែបសុភាព គួរឱ្យស្រឡាញ់

October 9, 2017
Salah ជួយឲ្យអេហ្ស៊ីបឈ្នះកៅអីទៅ World Cup ជាលើកទី1ក្នុងរយៈពេល28ឆ្នាំ
តារាឆ្នើម Mohamed Salah របស់ក្លិប Liverpool បានគ្រប់គ្រងអារម្មណ៍របស់គេយ៉ាងល្អ ដើម្បីរកគ្រាប់បាល់ប៉េណាល់ទីនៅនាទីទី95 និងដើម្បីជួយឲ្យក្រុមជម្រើសជាតិអេហ្ស៊ីប ឈ្នះកៅអីទៅព្រឹត្តិការណ៍ World Cup ជាលើកទី1របស់ពួកគេក្នុងរយៈពេល28ឆ្នាំកន្លងមក ខណៈដែលនៅសល់ការប្រកួតតែ 1លើកទៀតប៉ុណ្ណោះ។
នៅពេលការប្រកួតឈានដល់នាទីបន្ថែម Salah គឺជាអ្នកទទួលខុសត្រូវ នៅពេលដែលក្រុមជម្រើសជាតិរបស់ពួកគេទទួលបានគ្រាប់បាល់ប៉េណាល់ទីដ៏សំខាន់ ដែលនាំឲ្យមានការអបអរយ៉ាងខ្លាំងទាំងនៅលើទីលាននាកីឡដ្ឋាន Borg El Arab និងក្រៅទីលានក្នុងទីក្រុង Alexandria តែម្តង។ ការទទួលជ័យជម្នះនេះ បានធ្វើឲ្យក្រុមអេហ្ស៊ីប នាំមុខ4ពិន្ទុដាច់ដែលមិនអាចតាមទាន់លើក្រុមជម្រើសជាតិអូហ្គង់ដា ក្នុងពូល E ខណៈដែលនៅសល់ការប្រកួតត្រឹមតែ1លើកទៀតប៉ុណ្ណោះ។
ក្រុមជម្រើសជាតិអូហ្គង់ដា បានបញ្ចប់ក្នុងលទ្ធផលស្មើ ០-០ ជាមួយនឹងក្រុមជម្រើសជាតិហ្គាណា ក្នុងទីក្រុង Kampala កាលពីថ្ងៃសៅរ៍។ ការធ្វេសប្រហែសក្នុងតំបន់ការពារបានអនុញ្ញាតឲ្យ Salah រកគ្រាប់បាល់ទម្លុះសំណាញ់ទីរបស់កីឡាករ Barel Mouko នៅនាទីទី63 នៅកីឡដ្ឋាន Borg El Arab។ ប៉ុន្តែ ក្រុមជម្រើសជាតិកុងហ្គោ បានបង្កើតការភ្ញាក់ផ្អើល ក្រោយពីកីឡាករបម្រុង Moutou បានរកគ្រាប់បាល់ទម្លុះសំណាញ់ទីរបស់អ្នកចាំទី Essam El Hadary។ ការបញ្ចប់ក្នុងលទ្ធផលស្មើនឹងមិនគ្រប់គ្រាន់សម្រាប់ក្រុមជម្រើសជាតិអេហ្ស៊ីបក្នុងការឈ្នះកៅអីទៅជុំផ្តាច់ព្រ័ត្រឡើយ ហើយពួកគេបានរកគ្រាប់បាល់ឈ្នះ មុនពេល Salah បានស៊ុតបាល់បញ្ចូលទីយ៉ាងល្អពីចំណុច11ម៉ែត្រតែម្តង។
អេហ្ស៊ីប បានឈ្នះកៅអីទៅលេង World Cup ជាលើកចុងក្រោយកាលពីឆ្នាំ1990 ខណៈដែលក្រុមម្ចាស់ជើងឯកទ្វីបអាហ្វ្រិក7សម័យកាលមួយនេះ បានជួបការខកចិត្តជាបន្តបន្ទាប់ចាប់តាំងពីពេលនោះរហូតមក។ ហេតុនេះ ក្រុមជម្រើសជាតិអេហ្ស៊ីប នឹងត្រូវចូលរួមជាមួយនឹងក្រុមជម្រើសជាតិនីហ្សេរីយ៉ា ក្នុងការបានកៅអីទៅ World Cup ពីទ្វីបអាហ្វ្រិក៕
ប្រភពពី៖ Daily Mails
October 9, 2017