សង្គម និងសេដ្ឋកិច្ច - La Reine Media

ក្រោយស្មើ 2-2 នៅព្រលប់នេះ «វៀតណាមត្រូវការឈ្នះតែ 1-0 នៅជើងទីពីរ គឺក្លាយជាជើងឯក»

(វៀតណាម) – គ្រូបង្វឹករបស់ក្រុមវៀតណាម លោក Park Hang-seo បានប្រាប់អ្នកយកព័ត៌មាននៅក្រោយការប្រកួតជើងទីមួយនៃវគ្គផ្ដាច់ព្រ័ត្រនៅ AFF Cup 2022 រវាងវៀតណាម និងថៃ កាលពីព្រលប់នេះថា «វៀតណាមត្រូវការឈ្នះតែ 1-0 នៅជើងទីពីរ គឺក្លាយជាជើងឯក»។

«ពិតណាស់ លទ្ធផល 2-2 គឺមិនមានអំណោយផលល្អសម្រាប់វៀតណាម នៅជើងទីពីរដែលត្រូវប្រកួតនៅទឹកដីថៃ ដោយសារតែច្បាប់ស្ដីពីគ្រាប់បាល់ឈ្នះលើទីលានម្ចាស់ផ្ទះ» គ្រូបង្វឹករបស់ក្រុមវៀតណាម លោក Park បាននិយាយដូច្នេះ និងបន្តថា «ថៃមានអំណោយផលល្អជាង ប៉ុន្តែប្រការនោះមិនមែនមានន័យថា យើងត្រូវបោះបង់នោះទេ។ យើងនឹងប្រឹងប្រែងយកឈ្នះលើទីលានរបស់ថៃ»។

គ្រូបង្វឹកវ័យ 66 ឆ្នាំ បានសុំទោសអ្នកគាំទ្រ ព្រោះតែមិនបានជួយឱ្យវៀតណាមឈ្នះការប្រកួតចុងក្រោយនៅលើទីលានម្ចាស់ផ្ទះ។ ប៉ុន្តែ លោកយល់ថា កីឡាករទាំងអស់សុទ្ធតែប្រែងប្រឹងរហូតដល់នាទីចុងក្រោយ។

លោក Park យល់ថា កូនសិស្សរបស់លោកមានកំហុសត្រង់ការរក្សាទីតាំង នាំឱ្យចាញ់ 2 គ្រាប់។ «ប្រហែលជាដោយសារសម្ពាធជាម្ចាស់ផ្ទះ ចង់ឈ្នះ ទើបចាកចេញពីទីតាំងរបស់ខ្លួន» លោក Park បន្ថែម។

ដោយលទ្ធផល 2-2 នៅជើងទីមួយ វៀតណាមត្រូវការឈ្នះលើទីលានរបស់ថៃនៅជើងទីពីរដើម្បីក្លាយជាជើងឯក ឬស្មើ 3-3 ឡើងទៅ។

January 13, 2023

ទិដ្ឋភាពនៅជុំវិញកីឡដ្ឋានរបស់វៀតណាម មុនការប្រកួតវគ្គផ្ដាច់ព្រ័ត្រ AFF Cup 2022

(វៀតណាម) – នៅវេលាម៉ោង 19 និង 30 នាទីព្រលប់ថ្ងៃទី 13 មករានេះ ការប្រកួតជើងទីមួយនៃវគ្គផ្ដាច់ព្រ័ត្ររបស់ AFF Cup 2022 រវាងវៀតណាម និងថៃនឹងត្រូវបានធ្វើឡើង។ បរិយាកាសគាំទ្រចាប់ផ្ដើមឡើងកម្ដៅ ខណៈក្រុមអ្នកគាំទ្រចាប់ផ្ដើមបង្ហាញវត្តមាន។

យោងតាមសារព័ត៌មានវៀតណាម ក្រុមអ្នកគាំទ្រវៀតណាមបានបង្ហាញខ្លួននៅខាងមុខកីឡដ្ឋាន My Dinh តាំងពីវេលាថ្ងៃត្រង់ ដើម្បីថតរូប និងកំសាន្ត។

បុរសម្នាក់នៅក្បែរតំបន់កីឡដ្ឋានបានឱ្យដឹងថា ដោយសារតែផ្ទះនៅជិត គាត់បានទិញសំបុត្រមួយចំនួនក្នុងបំណងជួយដល់មិត្តភក្ដិដែលមិនមានពេលមកតម្រង់ជួរទិញសំបុត្រ។ គាត់បន្ថែមថា គាត់ក៏មានសំបុត្រមួយចំនួនសម្រាប់លក់ដល់អ្នកត្រូវការដើម្បីយកចំណេញបានខ្លះផងដែរ។

តាំងពីព្រឹកព្រលឹម សមត្ថកិច្ចបានចាប់ផ្ដើមដំឡើងរបងការពារពីរជាន់នៅខាងមុខតំបន់កីឡដ្ឋាន ហើយផ្លូវឆ្ពោះមកកាន់តំបន់កីឡដ្ឋាននេះក៏នឹងត្រូវបានអនុញ្ញាតសម្រាប់តែអ្នកថ្មើរជើងប៉ុណ្ណោះ ចាប់ពីរសៀលនេះ។

មន្ត្រីរបស់ សហព័ន្ធកីឡាបាល់ទាត់វៀតណាម បានឱ្យដឹងថា មកដល់រសៀលនេះ សំបុត្រចូលទស្សនានៅតែដាក់លក់នៅឡើយ។

នេះគឺជាលើកទីពីរហើយដែលវៀតណាម និងថៃ ប៉ះគ្នានៅវគ្គផ្ដាច់ព្រ័ត្ររបស់ AFF Cup បន្ទាប់ពីបានជួបគ្នាដំបូងនៅឆ្នាំ 2008 ដែលពេលនោះ វៀតណាមបានឈ្នះថៃ 2-1 នៅជើងទីមួយ និងស្មើ 1-1 នៅជើងចុងក្រោយ នាំឱ្យវៀតណាមបានក្លាយជាឯកជើង AFF Cup 2008។

នៅលើកនេះ ការប្រកួតជើងទីពីរនៃវគ្គផ្ដាច់ព្រ័ត្រនឹងត្រូវធ្វើឡើងនៅប្រទេសថៃ វេលាម៉ោង 19 និង 30 នាទីថ្ងៃទី 16 មករា 2023៕

January 13, 2023

រ៉ុក្កែតធំជាងគេលើពិភពលោក អាចមើលឃើញពីលើមេឃ

(សហដ្ឋអាម៉េរិក) – ក្រុមហ៊ុន Airbus បានចែករំលែករូបថតស្ដីពីប្រព័ន្ធរ៉ុក្កែត-យានអវកាស Starship កម្ពស់120 ម៉ែត្រ របស់ SpaceX ដែលថតបានពីគន្លងគោចរកម្រិតទាបរបស់ផែនដី។

SpaceX បានដំឡើងរ៉ុក្កែត Starship ខ្នាតយក្សកាលពីដើមសប្ដាហ៍នេះ ដោយដាក់យានអវកាស Ship 24 នៅលើកំណាត់ដំបូងគេដែលមានឈ្មោះថា Booster 7 នៅក្នុងមូលដ្ឋាន Starbase ក្បែរទីក្រុង Brownsville ភាគខាងត្បូងរដ្ឋ Texas។ កម្ពស់សរុបរបស់ Ship 24 – Booster 7 គឺ 120 ម៉ែត្រ និងធំជាងរ៉ុក្កែតព្រះចន្ទ Saturn V និងប្រព័ន្ធបាញ់បង្ហោះ SLS ថ្មីរបស់ ណាសា ដែលប្រើក្នុងបេសកកម្ម Artemis 1 ទៅទៀត។ Starship ធំល្មមអាចមើលឃើញពីគន្លងគោចររបស់ផ្កាយរណបដែលមានកាមេរ៉ាមានគុណភាពបង្ហាញខ្ពស់។ រូបភាពដែលថតបានដោយផ្កាយរណប Pleiades Neo របស់ Airbus ត្រូវបានចែករំលែកកាលពីថ្ងៃទី 12 មករា។

បច្ចុប្បន្ន Airbus មានផ្កាយរណបថតរូបផែនដី Pleiades Neo ចំនួនពីរគ្រឿង ដែលអាចថតយករូបភាពរបស់វត្ថុតូចៗត្រឹម 30 សម ពីគន្លងគោចរកម្រិតទាបរបស់ផែនដី។ កាលពីខែធ្នូ 2022 Airbus បានបញ្ជូនផ្កាយរណបប្រភេទនេះចំនួន 2 គ្រឿងទៀតឡើងទៅកាន់អវកាស ប៉ុន្តែបានបាត់ដាន។

ក្រុមហ៊ុន SpaceX ក៏បានចែករំលែករូបថតស្ដីពី Starship កាលពីថ្ងៃទី 12 មករា។ ក្នុងរូបថតទាំងនោះបង្ហាញថា Starship ឈរខ្ពស់កប់ពពកទាបនៅ Starbase។ SpaceX កំពុងត្រៀម Ship 24 និង Booster 7 សម្រាប់ការសាកល្បងបាញ់បង្ហោះឡើងទៅកាន់គន្លងគោចរនៅចុងខែកុម្ភៈឆ្នាំនេះ ប៉ុន្តែយាន Ship 24 នឹងត្រូវដោះចេញមុនពេលបាញ់បង្ហោះសាកល្បងរ៉ុក្កែត។

នេះគឺជាការសាកល្បងបាញ់បង្ហោះឡើងទៅកាន់គន្លងគោចរជាលើកដំបូងរបស់ Starship ក្នុងរង្វង់ជិត 2 ឆ្នាំកន្លង។ មុននោះ ការបាញ់បង្ហោះសាកល្បងលើកចុងក្រោយត្រូវបានធ្វើឡើងកាលពីខែឧសភា 2021 ដែល Starship បានហោះឡើងដល់កម្ពស់ 10 គីឡូម៉ែត្រ ពីលើ Texas មុនពេលចុះចតដោយជោគជ័យ៕

January 13, 2023

ក្រុមហ៊ុនចិន Yadea បង្ហាញម៉ូតូអគ្គិសនីលេខស្វ័យប្រវត្ត VoltGuard VFV

ម៉ូតូអគ្គិសនីលេខស្វ័យប្រវត្តកាន់តែដូចទៅនឹងគូប្រជែងប្រើម៉ាស៊ីនសាំងរបស់ពួកវា ពិសេសគឺនៅពេលនិយាយដល់ផាសុកភាព និងប្រសិទ្ធភាព។

ដើមឡើយ ម៉ូតូអគ្គិសនីមានរូបរាងតូចជាង និងមានល្បឿនយឺតជាងបច្ចុប្បន្នឆ្ងាយណាស់ ប៉ុន្តែក្រុមហ៊ុនជាច្រើនបានបញ្ចេញម៉ូតូអគ្គិសនីលេខស្វ័យប្រវត្តដែលមានកម្លាំងប្រហាក់ប្រហែលនឹងម៉ូតូម៉ាស៊ីនសាំងកម្លាំង 125cc ក្នុងនោះមានក្រុមហ៊ុនចិន Yadea ផងដែរ។

Yadea ជាក្រុមហ៊ុនមួយក្នុងចំណោមអ្នកផលិតម៉ូតូអគ្គិសនីដែលបន្ថែមប្រសិទ្ធភាព និងគុណភាពជាបន្តបន្ទាប់ទៅឱ្យផលិតផលថ្មីរបស់ខ្លួន ក្នុងនោះមានដូចជា ម៉ូតូអគ្គិសនីលេខស្វ័យប្រវត្ត VoltGuard VFV ជាដើមដែលទទួលបានចំណាប់អារម្មណ៍ច្រើននៅអឺរ៉ុប។

ភាពស្រស់ស្អាត ទាន់សម័យរបស់ម៉ូតូអគ្គិសនីលេខស្វ័យប្រវត្ត VoltGuard VFV គឺស្ថិតនៅលើភាពសាមញ្ញរបស់វា ហើយអ្នកដែលធ្លាប់ប្រើប្រាស់ម៉ូតូសាំងលេខស្វ័យប្រវត្តនឹងមិនជួបការលំបាកឡើយនៅពេលប្រើប្រាស់ VoltGuard VFV។ VoltGuard VFV បំពាក់ម៉ូទ័រអគ្គិសនីកម្លាំង 5.5 គីឡូវ៉ាត់ និងអាចបើកបរក្នុងល្បឿនប្រហែល 80 គីឡូម៉ែត្រ/ម៉ោង។

ក្រុមហ៊ុន Yadea បានអះអាងថា VoltGuard VFV អាចជិះបានចម្ងាយដល់ 200 គីឡូម៉ែត្របន្ទាប់ពីបញ្ចូលថាមពលអគ្គិសនីមួយពេញ បើសិនបើកបរក្នុងល្បឿន 30 គីឡូម៉ែត្រ/ម៉ោង៕

https://www.youtube.com/watch?v=-2eTx44_c7I

January 13, 2023

អតីតខ្សែប្រយុទ្ធថៃ បារម្ភថា អាជ្ញាកណ្ដាលគាំទ្រក្រុមវៀតណាមនៅវគ្គផ្ដាច់ព្រ័ត្រ AFF Cup 2022

Piyapong Pue-on វ័យ 63 ឆ្នាំ យល់ថា ថៃចាញ់ប្រៀបវៀតណាមនៅក្នុងវគ្គផ្ដាច់ព្រ័ត្រ AFF Cup 2022 ចាប់ពីបញ្ហាធនធានមនុស្សរហូតដល់អាជ្ញាកណ្ដាល។

«វៀតណាមបានសម្រាកច្រើនជាងថៃ។ យើងត្រូវរង់ចាំទទួលលទ្ធផលនៃការពិនិត្យដើម្បីដឹងថា Teerasil Dangda អាចចូលប្រកួតបានដែរ ឬទេ។ ជារួម វៀតណាមមានអំណោយផលជាង។ នេះមិនទាន់និយាយដល់បរិយាកាសខាងក្រៅទីលានប្រកួតដែលអាចជះឥទ្ធិពលមិនល្អ។ រាល់លើកដែលថៃទាត់នៅលើទីលានគូប្រកួត សុទ្ធតែមានបញ្ហា» Piyapong Pue-on អះអាងប្រាប់ Thairath ដូច្នេះ។

ថៃត្រូវទទួលផលមិនល្អសម្រាប់ការប្រកួតឈ្នះម៉ាឡេស៊ី 3-0 នៅវគ្គពាក់កណ្ដាលផ្ដាច់ព្រ័ត្រក្នុងជើងទីពីរដោយការរងរបួសរបស់ Teerasil។ ខ្សែប្រយុទ្ធវ័យ 34 ឆ្នាំនេះបើកឆាកដោយរកបាន 1 គ្រាប់ ប៉ុន្តែត្រូវចាកចេញពីទីលានក្រោយតង់ទីមួយ។ Teerasil រកបាន 6 គ្រាប់ ដែលជាតួលេខច្រើនជាងគេនៅ AFF Cup 2022។ បើសិនកីឡាករនេះមិនអាចចូលប្រកួតលើវាលស្មៅរបស់កីឡដ្ឋាន My Dinh នោះគឺជាការខាតបង់ដ៏ធំរបស់ថៃ។

Piyapong Pue-on និយាយថា «កត្តាសំខាន់បំផុតដែលប៉ះពាល់ដល់ការប្រកួត នោះគឺអាជ្ញាកណ្ដាល (Ko Hyun-jin) ដែលជាជនជាតិកូរ៉េខាងត្បូងដូចគ្រូបង្វឹករបស់វៀតណាម លោក Park Hang-seo។ AFF មិនគួររៀបចំអាជ្ញាកណ្ដាលដូច្នេះទាល់តែសោះ ព្រោះនឹងអាចមានការសង្ស័យ។ យើងត្រូវទទួលស្គាល់ថា ថៃ អន់ជាងគ្រប់ចំណុច»។

វៀតណាមប៉ះនឹងថៃនៅវគ្គផ្ដាច់ព្រ័ត្រគឺជាក្ដីស្រមៃរបស់អ្នកគាំទ្រនៅវៀតណាម។ ទាំងពីរគឺជាក្រុមជើងឯកថ្មីៗបំផុតនៅ AFF Cup។ ឆ្នាំ 2018 វៀតណាម មិនបានប៉ះថៃនៅវគ្គផ្ដាច់ព្រ័ត្រ។ ឆ្នាំ 2020 ថៃយកឈ្នះកូនសិស្ស និងគ្រូបង្វឹក Park Hang-seo 2-0 នៅវគ្គពាក់កណ្ដាលផ្ដាច់ព្រ័ត្រ។

លោក Ko Hyun-jin ជនជាតិកូរ៉េខាងត្បូង នឹងធ្វើជាអាជ្ញាកណ្ដាលក្នុងការប្រកួតវគ្គផ្ដាច់ព្រ័ត្ររវាងថៃ និងវៀតណាម

ឆ្នាំនេះ វៀតណាមទាត់នៅវគ្គផ្ដាច់ព្រ័ត្រជាមួយឥណ្ឌូណេស៊ីមុនគេ ទើបបានសម្រាកច្រើនជាងថៃមួយថ្ងៃ។ ទន្ទឹមនឹងនេះ គ្រូបង្វឹក Park ក៏ត្រូវបានគេជឿថា មានកូនសិស្សពូកៗច្រើនផងដែរ។

គ្រូបង្វឹកជនជាតិកូរ៉េខាងត្បូងរបស់ក្រុមវៀតណាម លោក Park Hang-seo

យោងតាមអតីតខ្សែប្រយុទ្ធថៃ Piyapong Pue-on លទ្ធផលស្មើ 1-1 នៅលើទីលានរបស់វៀតណាម នៅព្រលប់ថ្ងៃទី 13 មករានេះ នឹងជាជោគជ័យសម្រាប់ថៃ។ ក៏ប៉ុន្តែ Piyapong Pue-on ព្យាករថា ក្រុមទាំងពីរនឹងទាត់ដោយប្រុងប្រយ័ត្ន ដូច្នេះឱកាសស៊ុតបញ្ចូលទីអាចនឹងមានតិចតួច៕

January 13, 2023

គ្រូបង្វឹកថៃ៖ «មកកាន់វៀតណាមមិនមែនដើម្បីសុំស្មើ» តែវៀតណាមតបវិញថា «នឹងទារបំណុលចាស់ឱ្យបាន»

គ្រូបង្វឹកជនជាតិប្រេស៊ីល Mano Polking របស់ក្រុមជម្រើសជាតិថៃ កំណត់គោលដៅស៊ុតបញ្ចូលទីឱ្យបាន ចំណែកគ្រូបង្វឹកជនជាតិកូរ៉េខាងត្បូងរបស់ក្រុមជម្រើសជាតិវៀតណាម ក៏បានឆ្លើយតបថា នឹងទារបំណុលចាស់។

«យើងត្រូវការលទ្ធផលល្អ ប៉ុន្តែ តើយ៉ាងម៉េចដែលហៅថាលទ្ធផលល្អ? ស្មើក៏ល្អ ប៉ុន្តែឈ្នះគឺល្អជាង» គ្រូបង្វឹក Polking ថ្លែងកាលពីថ្ងៃទី 12 មករាដូច្នេះ និងបន្តថា «ពួកយើងមកទីនេះមិនមែនដើម្បីសុំស្មើឡើយ។ ពួកយើងចង់រកបានគ្រាប់បាល់ឈ្នះ។ មានច្បាប់ស្ដីពីគ្រាប់បាល់ឈ្នះលើទីលានម្ចាស់ផ្ទះ ដូច្នេះនឹងជារឿងល្អបើសិនពួកយើងរកបានគ្រាប់បាល់នៅ My Dinh»។

ដោយឡែក គ្រូបង្វឹករបស់វៀតណាម បាននិយាយថា «ពួកយើងនៅមានកិច្ចការចំនួនពីរទៀតត្រូវធ្វើ។ នោះគឺលេងឱ្យបានល្អនៅក្នុងជើងទីមួយ រកបានជ័យជម្នះដើម្បីទារបំណុលចាស់ជាមួយថៃ។ ទីពីរគឺបញ្ចប់អាណត្តិចុងក្រោយរបស់តំណែងជើងឯក នាំពានមកជូនអ្នកគាំទ្រ។ 5 ឆ្នាំកន្លង នៅអាស៊ីអាគ្នេយ៍ ខ្ញុំចាញ់តែមួយប្រកួតគត់ គឺការប្រកួតចាញ់ថៃនៅវគ្គពាក់កណ្ដាលផ្ដាច់ព្រ័ត្រ AFF Cup 2020»។

នៅវគ្គពាក់កណ្ដាលផ្ដាច់ព្រ័ត្ររបស់ AFF Cup 2020 ថៃឈ្នះវៀតណាម 2-0 នៅជើងទីមួយ ហើយស្មើ 0-0 នៅជើងទីពីរ។ ប៉ុន្តែ គ្រូបង្វឹកថៃ និយាយថា ពេលនេះក្រុមទាំងពីរមានការប្រែប្រួលច្រើន។

គ្រូបង្វឹកកូនកាត់ប្រេស៊ីល-អាល្លឺម៉ង់ របស់ថៃ សង្ឃឹមថា 2 ប្រកួតនៅវគ្គចុងក្រោយបង្អស់នេះនឹងល្អមើលខ្លាំង ព្រោះតែនេះគឺជាការប៉ះគ្នារវាងក្រុមមួយដែលពូកែខាងវាយលុក និងក្រុមមួយទៀតពូកែខាងការពារ៕

January 13, 2023

អាម៉េរិករកឃើញបញ្ហាធ្វើឱ្យកកស្ទះសកម្មភាពអាកាសចរណ៍កាលពីថ្ងៃទី 11 មករា

អាជ្ញាធរគ្រប់គ្រងអាកាសចរណ៍សហរដ្ឋអាម៉េរិក បានឱ្យដឹងថា បុគ្គលិកមិនគោរពតាមដំណើរការគឺជាមូលហេតុដែលបណ្ដាលឱ្យមានបញ្ហាក្នុងប្រព័ន្ធជូនដំណឹង NOTAM ធ្វើឱ្យជើងហោះហើររាប់ពាន់ត្រូវបានពន្យារពេល។

«ការវិភាគបឋមបង្ហាញថា ហ្វាលទិន្នន័យមួយបានខូចដោយសារបុគ្គលិកមិនគោរពតាមដំណើរការ ខណៈដែលប្រព័ន្ធនៅតែដំណើរការធម្មតា» អាជ្ញាធរគ្រប់គ្រងអាកាសចរណ៍អាម៉េរិក (FAA) បានប្រកាសដូច្នេះកាលពីថ្ងៃទី 12 មករា ស្ដីពីបញ្ហាដែលបានកើតឡើងចំពោះប្រព័ន្ធកុំព្យូទ័រ នាំឱ្យសកម្មភាពអាកាសចរណ៍នៅ សហរដ្ឋអាម៉េរិក ត្រូវកកស្ទះក្នុងរយៈពេល 90 នាទី នៅមុននោះមួយថ្ងៃ។

FAA មិនបានបង្ហាញសេចក្ដីលំអិតអំពីបញ្ហាខាងលើ ប៉ុន្តែសង្កត់ធ្ងន់ថា ពុំមានសញ្ញាដែលបង្ហាញថាមានការវាយប្រហារពីហែកឃើរ។ ប្រភពព័ត៌មានដែលដឹកច្បាស់អំពីបញ្ហាខាងលើបានឱ្យដឹងថា ហ្វាលទិន្នន័យបានខូចនោះ បានប៉ះពាល់ដល់ប្រព័ន្ធសំខាន់ និងប្រព័ន្ធបម្រុង។

សូមបញ្ជាក់ថា FAA កាលពីព្រឹកថ្ងៃទី 11 មករា បានផ្អាកការហោះហើរក្នុងស្រុកអស់ជាច្រើនម៉ោង បណ្ដាលឱ្យជើងហោះហើរជាង 11,000 ត្រូវបានពន្យារពេល និងជាង 1,100 ត្រូវបានលុបចោល។ ការសម្រេចនេះត្រូវបានធ្វើឡើងបន្ទាប់ពីបញ្ហាកើតឡើងក្នុងប្រព័ន្ធជូនដំណឹងផ្នែកអាកាសចរណ៍ (NOTAM) ដែលជាផ្នែកសំខាន់បំផុតមួយនៅក្នុងការធានាសុវត្ថិភាពអាកាសចរណ៍នៅ សហរដ្ឋអាម៉េរិក និងពិភពលោក។

អ្នកជំនាញជាច្រើនយល់ថា ហេតុការណ៍កាលពីថ្ងៃទី 11 មករា គឺជាសញ្ញាបង្ហាញថា ត្រូវការធ្វើឱ្យប្រសើរឡើងនូវប្រព័ន្ធគ្រប់គ្រងអាកាសចរណ៍របស់ សហរដ្ឋអាម៉េរិក៕

January 13, 2023

កំពូលតារាសម្ដែងមានតម្លៃខ្លួនខ្ពស់ជាងគេឆ្នាំ 2022 Margot Robbie ស្លៀករ៉ូបប្រណិតនៅ Golden Globes

រចនាបថបែប Haute Couture របស់ Chanel សម្រាប់កំពូលតារាសម្ដែង Margot Robbie នៅក្នុងព្រឹត្តិការណ៍ប្រគល់ពានរង្វាន់ផ្នែកសិល្បៈ «ផែនដីមាស» ឆ្នាំ 2023 ធ្វើឱ្យគេចំណាយពេលអស់ 750 ម៉ោងក្នុងការច្នៃម៉ូដ។

មកចូលរួមព្រឹត្តិការណ៍ប្រគល់ពានរង្វាន់ផែនដីមាស (Golden Globes) លើកទី 80 នៅ Los Angeles កាលពីថ្ងៃទី 10 មករា 2023 Margot Robbie ស្លៀករ៉ូបពណ៌ផ្កាឈូកខ្ចីដែលជាស្នាដៃក្នុងរចនាបថ Haute Couture 2022 របស់ Chanel។ ស្ទីលស្លៀកពាក់ និងផាត់មុខរបស់នាងគឺជាការច្នៃប្រឌិតរបស់ Kate Young ដោយយកតាមលំនាំថាមពលរបស់ Hollywood។

រ៉ូបនេះមានការដេរប៉ាក់ចំនួន 30,000 ចំណុច និងមានប៉ាក់ឌិន sequin គ្រាប់អង្កាំ រោមសត្វស្លាប និងចំណាយពេលអស់ 31 ថ្ងៃក្នុងការច្នៃ។ Margot Robbie ពាក់ក្រវិលធ្វើពីមាសស និងពេជ្រ 18K របស់ក្រុមហ៊ុនបារាំង។ អ្នកជំនាញ Pati Dubroff ផាត់មុខឱ្យស្រីស្អាតរូបនេះតាមបែបធម្មជាតិ។

សារព័ត៌មាន Vogue បានវាយតម្លៃថា ស្ទីលស្លៀកពាក់ និងតុបតែងខ្លួនរបស់ Margot Robbie គឺសមស្របនឹងរូបភាពនៃតួអង្គសម្ដែងថ្មីរបស់នាងនៅក្នុងខ្សែភាពយន្តរឿង Babylon ដែលដឹកនាំសម្ដែងដោយ Damien Chazelle)។

Margot Robbie កើតឆ្នាំ 1990 នៅ អូស្ត្រាលី និងត្រូវបានគេស្គាល់ច្រើនដោយសារការសម្ដែងជាតួអង្គក្នុងខ្សែភាពយន្ត «ក្ដៅសាច់» មួយចំនួន។ បច្ចុប្បន្ន នាងក្លាយជាកំពូលតារាសម្ដែងដែលទទួលបានការចាប់អារម្មណ៍ច្រើននៅ Hollywood ដោយធ្លាប់បានសម្ដែងក្នុងរឿងជាច្រើនមានដូចជា Once Upon a Time in Hollywood, Bombshell, Bird of Prey និង Suicide Squad ជាដើម។

យោងតាម Forbes នាង Margot Robbie នាំមុខគេក្នុងចំណោមកំពូលតារាសម្ដែងដែលមានតម្លៃខ្លួនខ្ពស់ជាងគេឆ្នាំ 2022 ដោយទទួលបាន 12.7 លានដុល្លារសម្រាប់សម្ដែងជាតួអង្គឯកក្នុងរឿង Barbie៕

January 13, 2023

សំបុត្រទស្សនាជើងទីពីរវគ្គផ្ដាច់ព្រ័ត្រ AFF Cup 2022 លក់អស់ក្នុង 5 នាទី

(ប្រទេសថៃ) – សំបុត្រជាង 20,000 សម្រាប់ទស្សនាការប្រកួតជើងទីពីរនៃវគ្គផ្ដាច់ព្រ័ត្រនៅ AFF Cup 2022 រវាង ថៃ និងវៀតណាម នៅកីឡដ្ឋាន Thammasat ត្រូវបានលក់អស់គ្មានសល់ក្រោយការបើកលក់បាន 5 នាទី កាលពីព្រឹកថ្ងៃទី 12 មករា 2023។

ការប្រកួតជើងទីពីរនៃវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 16 មករា លើទីលានរបស់កីឡដ្ឋាន Thammasat ក្នុងរាជធានីបាងកក អាចដាក់មនុស្សបាន 25,000 នាក់។ គណៈកម្មការបានបញ្ចេញសំបុត្រទស្សនាជាង 20,000 ដែលទាំងនេះសុទ្ធតែត្រូវបានលក់នៅលើអនឡាញ។ បញ្ជរលក់សំបុត្រត្រូវបានបើកនៅម៉ោង 10 ព្រឹក ហើយប៉ុន្មាននាទីក្រោយមក ទំព័របណ្ដាញសង្គមរបស់ក្រុមជម្រើសជាតិថៃ ក៏បានប្រកាសថា សំបុត្រត្រូវបានលក់អស់។

សំបុត្ររបស់កៅអីតំបន់ A សម្រាប់អ្នកគាំទ្រក្រុមម្ចាស់ផ្ទះមានតម្លៃ 600 បាត () ខណៈកៅអីតំបន់ B គឺ 450 បាត ចំណែក C និង D គឺ 250 បាត។ សារព័ត៌មាន Thairath បានផ្សាយថា សំបុត្រដែលត្រូវបានឈ្មួញសំបុត្រពពាយនាយលក់នៅខាងក្រៅកីឡដ្ឋាន មានតម្លៃខ្ពស់ជាងពីរដងធៀបនឹងតម្លៃដើម។

ដោយឡែក សំបុត្រសម្រាប់អ្នកគាំទ្ររបស់ក្រុមវៀតណាម នៅ Thammasat គឺមានតម្លៃ 750 បាត។ ទីតាំងសម្រាប់អ្នកគាំទ្រក្រុមភ្ញៀវស្ថិតនៅជាប់នឹងទីតាំងសារព័ត៌មាននៅតំបន់ A។

តម្លៃសំបុត្រសម្រាប់ទស្សនាជើងទីពីរនៃវគ្គផ្ដាច់ព្រ័ត្រនៅប្រទេសថៃ មានតម្លៃទាបជាងពាក់កណ្ដាល ធៀបនឹងសំបុត្រនៅជើងទីមួយដែលធ្វើឡើងនៅកីឡដ្ឋាន My Dinh នៅហាណូយ ដែលអាចដាក់មនុស្សបានប្រហែល 40,000 នាក់។ ក្រុមម្ចាស់ផ្ទះវៀតណាម ដាក់លក់សំបុត្រ 4 ប្រភេទ រួមមាន តម្លៃ 400,000, 600,000, 800,000 និង 1 លានដុង។ មកដល់រសៀលម្សិលមិញ ឈ្មួញសំបុត្រនៅខាងក្រៅកីឡដ្ឋាន My Dinh បានដំឡើងថ្លៃសំបុត្រខ្ពស់ជាងមុន 4 ដង។ សំបុត្រចូលទស្សនាវគ្គផ្ដាច់ព្រ័ត្រជើងទីមួយត្រូវបានវៀតណាមលក់អស់ក្នុងរយៈពេលតែប៉ុន្មានម៉ោងប៉ុណ្ណោះ។

វគ្គផ្ដាច់ព្រ័ត្រជើងទីមួយ និងទីពីររបស់ AFF Cup 2022 នឹងត្រូវបានប្រកួតនៅវេលាម៉ោង 19 និង 30 នាទី ថ្ងៃទី 13 មករា និង 16 មករាខាងមុខ៕

អ្នកគាំទ្រក្រុមថៃ ក្នុងការប្រកួតជាមួយម៉ាឡេស៊ី កាលពីប៉ុន្មានថ្ងៃមុន

January 13, 2023

ក្រុមហ៊ុនផលិតម៉ូតូអគ្គិសនីរបស់ឥណ្ឌា ចាប់ផ្ដើមប្រគល់ទំនិញវគ្គដំបូង

HOP Electric ដែលជាអ្នកផលិតយានយន្តអគ្គិសនីមានទីស្នាក់ការនៅប្រទេសឥណ្ឌា បានចាប់ផ្ដើមចែកចាយម៉ូតូអគ្គិសនីថ្មីបំផុតរបស់ខ្លួនចំនួន 2,500 គ្រឿងដំបូងនៅក្នុងទីក្រុង Jaipur។

យោងតាមក្រុមហ៊ុនខាងលើ ក្នុងរង្វង់ 2 ខែ រាប់ចាប់ពីថ្ងៃបង្ហាញខ្លួន ម៉ូតូអគ្គិសនី HOP OXO របស់ពួកគេ ទាក់ទាញអតិថិជនបញ្ជាទិញបានជាង 10,000 លើក និង 50,000 នាក់សម្ដែងចំណាប់អារម្មណ៍តាមរយៈគេហទំព័រក្រុមហ៊ុន។

ប្រធានផ្នែកទីផ្សាររបស់ HOP Electric បានឱ្យដឹងថា ការយឺតយ៉ាវដែលបានកើតឡើងកន្លងមកគឺដោយសារការអនុវត្តស្ដង់ដា និងការសាកល្បងថ្មី ក៏ដូចជាការកែប្រែលក្ខន្តិកៈរបស់កម្មវិធី FAME II។ ក្រៅពី Jaipur ក្រុមហ៊ុន HOP Electric ក៏នឹងឆាប់ចាប់ផ្ដើមប្រគល់ទំនិញនៅតាមបណ្ដារដ្ឋដទៃរបស់ឥណ្ឌា ក្នុងពេលឆាប់ៗខាងមុខ៕

January 12, 2023

Category: សង្គម និងសេដ្ឋកិច្ច