Category: សង្គម និងសេដ្ឋកិច្ច

ការមើលថែទាំកូនតូចក្រោយចាក់វ៉ាក់សាំងយ៉ាងត្រឹមត្រូវ
អ្នកម្តាយអាចសង្កេតឃើញអាការផ្សេងៗរបស់កូនតូចក្រោយពីបានទទួលការចាក់វ៉ាក់សាំងការពារហើយដែរឬទេថា អាការដែលបង្ហាញចេញមកនោះមានគ្រោះថ្នាក់ធ្ងន់ធ្ងរចំពោះកូនតូចឬយ៉ាងណា?ហើយតើកូនតូចត្រូវបានទទួលការមើលថែទាំដែលស័ក្តិសម និងត្រឹមត្រូវតាមវិធីណាខ្លះ? លោកឪពុកអ្នកម្តាយនឹងមានវិធីការទប់ទល់យ៉ាងណានោះ យើងនាំគ្នាមកចម្លើយទាំងអស់គ្នា។
ឈឺ ហើម ឡើងក្រហមកន្លែងដែលចាក់ថ្នាំ
បើកូនមានអាការហើម ឬបង្ហាញអាការឈឺចាប់ (យំរករឿង) អ្នកម្តាយចូរស្អំដោយទឹកកកដើម្បីសម្រាលអាការឈឺចាប់។ ទាំងអស់នេះ អាការទាំងនោះអាចបាត់ទៅវិញក្នុងរយៈពេល1-3ថ្ងៃ តែបើសិនឡើងហើមក្រហមជាស្នាមរបួស សូមអ្នកម្តាយសាកល្បងសង្កេតមើលថាតើកូនកម្រើកដៃខាងដែលចាក់វ៉ាក់សាំងនោះបានតិចតួច ឬមិនកម្រើកសោះ អាការបែបនេះអាចកើតការឆ្លងមេរោគរហូតក្លាយពងខ្ទុះបាន ត្រូវប្រញាប់នាំកូនតូចទៅជួបលោកគ្រូពេទ្យជាបន្ទាន់។
មានគ្រុនក្តៅខ្លួន
យកក្រណាត់ស្អាតជ្រលក់ទឹកស្អាតសើមៗ ជូតបញ្ចុះកម្តៅ បរិវេណក កញ្ចឹងក តាមសន្លាក់ដៃជើងផ្សេងៗ ដើម្បីបញ្ចុះសីតុណ្ហភាពក្នុងរាង-កាយ។ អាការគ្រុនក្តៅនឹងធូរស្រាលឡើង និងបាត់ក្នុងអំឡុង2-3ថ្ងៃ តែបើកម្តៅខ្លួននៅតែខ្ពស់ មិនព្រមថយចុះ អាចឱ្យកូនតូចញ៉ាំថ្នាំបញ្ចុះកម្តៅតាមដែលគ្រូពេទ្យណែនាំបាន។
យំ ងង៉ក់ រករឿង
ពេលដែលកូនតូចយំ ងង៉ក់ កុំអាលជ្រួលច្រាលអី អ្នកម្តាយត្រូវធ្វើចិត្តឱ្យត្រជាក់ ប្រើវិធីលួងលោមកូន ដូចជា បង្វែរចំណាប់អារម្មណ៍ដោយការនាំទៅដើរលេង ច្រៀង ឬចាក់បទភ្លេងឱ្យកូនស្តាប់ ដើម្បីសាងបរិយាកាសដែលល្អ ការបី ព ឱបកូនយោលខ្លួនទៅមកតិចៗ ដើម្បីជួយសាងភាពកក់ក្តៅ សប្បាយចិត្តដល់កូនតូចឱ្យឈប់យំងង៉ក់។
មានពងទុលឡើងនៅកន្លែងដែលចាក់ថ្នាំ
មានលក្ខណៈបែបឡើងពង រួចបាត់ទៅវិញ ឡើងពង រួចបាត់ទៅវិញ ប្រមាណជា3-4សប្តាហ៍ ក៏នឹងជាបាត់ទៅវិញ មិនចាំបាច់ត្រូវដាក់ថ្នាំ ឬលាបថ្នាំបិទស្លាកស្នាមទេ។ បើមានពងទុលឡើង គួរប្រយ័ត្នកុំច្របាច់ កុំសង្កត់ ឬធ្វើអ្វីជាមួយពងនោះឱ្យសោះ ព្រោះអាចកើតការឆ្លងមេរោគ តែបើមានឆ្លងមេរោគចូល ក្លាយជាដំបៅ ចូរប្រញាប់នាំកូនតូចទៅជួបលោកគ្រូពេទ្យភ្លាម៕
October 10, 2017
វិធីធម្មតាៗ តែមានប្រសិទ្ធិភាពកម្ចាត់ក្លិនក្លៀកពូកែបំផុត
ក្លិនក្លៀកបណ្តោលមកពីក្រពេញញើសនៅក្រោមក្លៀក និងបាក់តេរីមានការកើនឡើង។ នេះជាជំងឺទូទៅមួយមិនមានផលប៉ះពាល់ដល់សុខភាពឡើយ ប៉ុន្តែវាបានរំខានដល់ជីវិតរបស់នៅប្រចាំថ្ងៃ និងទំនាក់ទំនងរបស់អ្នក។ ប្រសិនបើអ្នកខ្មាស់អៀនមិនហ៊ានជួបជាមួយនឹងគ្រូពេទ្យ ដើម្បីធ្វើការព្យាបាលនោះទេ អ្នកអាចអនុវត្តតាមវិធីធម្មជាតិវិញក៏មានប្រសិទ្ធភាពដែរ។
១. ក្រូចឆ្មាស្រស់
ក្រូឆ្មាមានរសជាតិជូរ, ត្រជាក់, មានប្រសិទ្ធភាពកាត់បន្ថយកម្ដៅ, ជាថ្នាំសម្លាប់មេរោគ, ប្រឆាំងនឹងការរលាក។ ប្រភពធម្មជាតិនៃទឹកអាស៊ីតនៅក្នុងក្រូចឆ្មា អាចជួយសម្លាប់បាក់តេរីនៅលើស្បែកក្លៀក ហើយអាស៊ីតខ្លាញ់អាចជួយលុបបំបាត់ញើស និងក្លិនក្លៀក។
វិធីសាមញ្ញបំផុត៖ បន្ទាប់ពីងូតទឹក យកក្រូចឆ្មាស្រស់មួយចំណិត ត្រដុសត្រង់ក្លៀកប្រហែលជា ១០នាទី។ បន្ទាប់មកប្រើកូនកន្សែងជ្រក់ទឹកក្តៅឧណ្ឌៗមកជូតសម្អាត។ អនុវត្តជារៀងរាល់ថ្ងៃ អ្នកនឹងឆាប់ឃើញលទ្ធផល។
ដើម្បីបង្កើនប្រសិទ្ធភាពនៃការព្យាបាលក្លិនក្លៀក គួរតែលាយទឹកក្រូចឆ្មាមួយលីត្រសម្រាប់បរិភោគក្នុងមួយថ្ងៃ។ ធ្វើបែបនេះអាចកាត់បន្ថយកម្ដៅ, បន្សាបជាតិពុលនៅក្នុងរាងកាយ, ជួយកាត់បន្ថយក្លិនខ្លួនដែលបង្កឡើងដោយសារតែក្រពេញញើស។
២. ស៊ុតស្ងោរ
បើយោងតាមឱសថបុរាណស៊ុតស្ងោរមានប្រសិទ្ធភាពក្នុងការព្យាបាលក្លិនក្លៀកខ្លាំងណាស់។ ប្រសិនបើបានអនុវត្តម្តងហើយ ម្តងទៀតអ្នកនឹងមានអារម្មណ៍ថា ក្លិនក្លៀនត្រូវបានបាត់បង់យ៉ាងលឿន។
យកស៊ុតពីគ្រាប់មកស្ងោរឲ្យឆ្អិន រួចបកសំបកចេញទាន់នៅក្តៅៗ ហើយខ្ចប់នឹងកូនកន្សែងមួយដើម្បីលុញនៅក្រោមក្លៀកទាល់តែស៊ុតត្រជាក់ទើបឈប់។ អនុវត្តបែបនេះឱ្យបានទៀងទាត់អ្នកនឹងទទួលបានផល។
៣. ខ្ញីស្រស់
ខ្ញីស្រស់អាចជួយការពារការបែបញើសក្លៀក និងជួយឲ្យក្លៀកស្ងួតបានយូរ។ តើគួរតែប្រើយ៉ាងម៉េច? អ្នកគ្រាន់តែប្រើទឹកខ្ញីស្រស់យកទៅជូតសម្អាតក្លៀកឱ្យបានរៀងរាល់ថ្ងៃ ដើម្បីជួយឱ្យស្បែកក្រោមក្លៀកស្ងួត និងមានក្លិនល្អឡើងវិញ៕
October 10, 2017
ដើម្បីក្តីសង្ឃឹម World Cup…អាហ្សង់ទីន ត្រូវតែឈ្នះជាដាច់ខាតពេលប៉ះ អេក្វាទ័រ
ក្រុមបាល់ទាត់ជម្រើសជាតិអាហ្សង់ទីន ត្រូវតែដណ្តើមជ័យជម្នះឲ្យបានជាដាច់ខាត នៅពេលដែលធ្វើដំណើរទៅជួបក្រុមបាល់ទាត់ជម្រើសជាតិអេក្វាទ័រ ក្នុងការប្រកួតជម្រុះជុំចុងក្រោយនៃតំបន់អាមេរិកខាងត្បូងរបស់ពួកគេនៅរាត្រីថ្ងៃអង្គារនេះ (ត្រូវនឹងព្រឹកថ្ងៃពុធ នៅកម្ពុជា) ខណៈដែលយុទ្ធនាការ World Cup ឆ្នាំ2018ខាងមុខនេះ កំពុងតែប្រឈមមុខនឹងការអវត្តមានតារាឆ្នើមបំផុតរបស់ពិភពលោកគឺ Lionel Messi។
ក្រុមជម្រើសជាតិអាហ្សង់ទីន ទទួលបានត្រឹមលទ្ធផលស្មើ ០-០ នៅពេលប្រកួតជាមួយនឹងក្រុមជម្រើសជាតិប៉េរូ កាលពីថ្ងៃព្រហស្បតិ៍ ដែលមិនត្រឹមតែធ្វើឱ្យធ្លាក់ចេញពីចំណាត់ថ្នាក់កំពូលទាំង4ដែលត្រូវឈ្នះសិទ្ធិជាស្វ័យប្រវត្តិនៅកាន់ប្រទេសរុស្ស៊ី នៅឆ្នាំក្រោយប៉ុណ្ណោះទេ ប៉ុន្តែក៏បានធ្លាក់ចេញពីចំណាត់ថ្នាក់លេខ5 ដែលជាកៅអីសម្រាប់លេងវគ្គ Playoff ជាមួយនឹងក្រុមជម្រើសជាតិនូវែសេឡង់ ទៀតផង។ ជាមួយនឹងការស្ថិតក្នុងចំណាត់ថ្នាក់លេខ6 បច្ចុប្បន្នក្រុមជម្រើសជាតិអាហ្សង់ទីន ត្រូវតែឈ្នះជាដាច់ខាតក្នុងការប្រកួតចុងក្រោយរបស់ពួកគេលើទឹកដីក្រុមជម្រើសជាតិអេក្វាទ័រ នៅថ្ងៃអង្គារនេះ។
រយៈពេល 2ឆ្នាំមុន ក្រោយពីក្រុមជម្រើសជាតិអាហ្សង់ទីន បានចាប់ផ្តើមយុទ្ធនាការជម្រុះរបស់ពួកគេជាមួយនឹងការបរាជ័យ 2-០ លើទឹកដីខ្លួនឯង ក្រោមស្នាដៃក្រុមជម្រើសជាតិអេក្វាទ័រ ក្រុមរបស់លោក Jorge Sampaoli នឹងត្រូវធ្វើដំណើរទៅកាន់ទីក្រុង Quito ដើម្បីជួបជាមួយនឹងអេក្វាទ័រនេះម្តងទៀតជាមួយនឹងក្តីសង្ឃឹមដ៏ទាបបំផុត។ ប៉ុន្តែ ស្របពេលដែលក្រុមឈរលេខ3 ស៊ីលី (26ពិន្ទុ) និងក្រុមឈរលេខ7 ប៉ារ៉ាហ្គាយ (24ពិន្ទុ) កំពុងតែដេញតាមពីក្រោយគ្នាត្រឹមតែ2ពិន្ទុនោះ ការប្រែប្រួលផ្សេងៗអាចនឹងត្រូវកើតឡើង។
ទោះបីជាយ៉ាងណា ក្រុមជម្រើសជាតិអាហ្សង់ទីន អាចនឹងលួងចិត្តអ្នកគាំទ្ររបស់ខ្លួនបាន ប្រសិនបើពួកគេដណ្តើមបាន3ពិន្ទុដ៏សំខាន់នេះ។ ប៉ុន្តែ ការដណ្តើមជ័យជម្នះនៅលើទឹកដីដែលមានសម្ពាធខ្យល់ទាបនៃទីក្រុង Quito និងដែលមានកម្ពស់ខ្ពស់ជាងកម្រិតទឹកសមុទ្រចំនួន2,850ម៉ែត្រនេះ ប្រហែលមិនមែនជារឿងងាយស្រួលឡើយ។ ការប្រកួតនេះនឹងចាប់ផ្តើមនៅម៉ោង6:3០ព្រឹកថ្ងៃពុធ៕
ប្រភពពី៖ Sport24
October 10, 2017
បវរកញ្ញាប្រចាំប្រទេស Haiti ខ្ចីលុយគេដើម្បីមកចូលរួមប្រកួត Miss Grand International
ដំណឹងដ៏គួរឱ្យភ្ញាក់ផ្អើលនេះ ត្រូវបានសារព័ត៌មានវៀតណាម kenh14 បានចេញផ្សាយនាពេលថ្មីៗមុននេះបន្ដិចថា បើតាមបណ្ដាញទំនាក់ទំនងសង្គមបានបញ្ចេញព័ត៌មានរបស់បវរកញ្ញាប្រចាំប្រទេស Haiti ដែលនាងបានធ្វើរឿងដ៏គួរឱ្យស្ញប់ស្ញែងបំផុតសម្រាប់វេទិកាប្រកួត Miss Grand International ដែលនឹងរៀបចំឡើងដោយប្រទេសវៀតណាម។
ប្រភពស្និទ្ធនឹងបវរកញ្ញាប្រចាំប្រទេស Haiti បានប្រាប់ឱ្យដឹងថា បរវកញ្ញារូបនេះគ្មានថវិកាដើម្បីមកចូលរួមប្រកួតនៅក្នុងកម្មវិធីលំដាប់ថ្នាក់អន្ដរជាតិ Miss Grand International នេះឡើយ តែ ដោយហេតុតែនាងបានទទួលការអញ្ចើញឱ្យចូលរួម ព្រមទាំងចង់សម្រេចបំណងរបស់ខ្លួនទៀតផងនោះ នាងក៏បានអំពាវនាវដល់ក្រុមមនុស្សទាំងឡាយនៅក្នុងប្រទេសរបស់នាងដែលជាអ្នកមានលុយ ហើយអាចឱ្យនាងខ្ចីបាន ដើម្បីធ្វើដំណើរមកកាន់ប្រទេស វៀតណាម ឈោងចាប់យកក្ដីស្រមៃមួយនេះឱ្យខាងតែបាន។
ជាថ្មីម្ដងទៀត អ្នករៀបចំកម្មវិធី នាង Jennifer Alexis បានលើកឡើងថា “ល្ងាចនៃថ្ងៃប្រកួតសប្តាហ៍នេះ ដំណឹងដ៏គួរឱ្យភ្ញាក់ផ្អើលរបស់បវរកញ្ញារូបនេះ ពិតជាគួរឱ្យស្ញប់ស្ញែងខ្លាំងណាស់ នាងខ្ញុំចូលចិត្តពីរបៀបដែល Miss Grand Haitian បានមកកាន់ទីនេះ និងរបៀបនៃការសម្រេចក្ដីស្រមៃរបស់នាងខ្លាំងណាស់ នាងខ្ញុំពិតជារំភើបមែនទែន” ៕

October 10, 2017
អ៊ីស្លង់ ក្លាយជាប្រទេសតូចជាងគេបំផុតក្នុងការឈ្នះកៅអីទៅ World Cup
ក្រុមបាល់ទាត់ជម្រើសជាតិអ៊ីស្លង់ បានឈ្នះកៅអីមួយទៅកាន់ប្រទេសរុស្ស៊ី ក្រោយពីបានកត់ត្រាជ័យជម្នះក្នុងលទ្ធផល 2-០ លើក្រុមជម្រើសជាតិកូសូវ៉ូ ក្នុងទីក្រុង Reykjavik កាលពីថ្ងៃចន្ទ និងបានក្លាយជាប្រទេសតូចជាងគេបំផុតមិនធ្លាប់មានពីមុនមកក្នុងការឈ្នះសិទ្ធិទៅ World Cup។
ក្រុមរបស់លោក Heimir Hallgrimsson បានដឹងថា ការដណ្តើមបានជ័យជម្នះនៅពេលប្រកួតជាមួយនឹងក្រុមបាតតារាងនៃពូល I នេះ នឹងធ្វើឲ្យពួកគេបញ្ចប់ដោយបានឈរលើលេខ1ក្នុងពូល និងឈ្នះកៅអីជាស្វ័យប្រវត្តិទៅជុំផ្តាច់ព្រ័ត្រ ហើយខ្សែបម្រើ Gylfi Sigurdsson របស់ក្រុម Everton បានកាត់បន្ថយការភិតភ័យរបស់ពួកគេតាមរយៈការរកបានគ្រាប់បាល់ដ៏ល្អមួយគ្រាប់មុនពេលបញ្ចប់តង់ទី1។
Sigurdsson ក៏បានជួយឲ្យកីឡាករ Johann Berg Gudmundsson រកគ្រាប់បាល់ទី2ផងដែរ នៅពាក់កណ្តាលតង់ទី2 ខណៈដែលក្រុមជម្រើសជាតិអ៊ីស្លង់ បានបំពេញយុទ្ធនាការជម្រុះរបស់ពួកគេ តាមរយៈការឈ្នះការប្រកួត3លើកចុងក្រោយរបស់ពួកគេ ដើម្បីបង្ហាញថា ការឈានទៅប្រកួតវគ្គ8ក្រុមចុងក្រោយនៃព្រឹត្តិការណ៍ Euro ឆ្នាំ2016 របស់ពួកគេកន្លងមកនោះ មិនមែនជារឿងចៃដន្យឡើយ។
លោក Hallgrimsson គ្រូបង្វឹករបស់ក្រុមជម្រើសជាតិអ៊ីស្លង់ បានឲ្យដឹងថា៖ «ខ្ញុំបានគិត បន្ទាប់ពីការប្រកួត Euro ឆ្នាំ2016 ហើយថា រឿងដែលលំបាកបំផុតគឺការលើកទឹកចិត្តខ្លួនឯងម្តងទៀត។ រឿងដ៏ល្អបំផុតគឺការបន្តធ្វើឲ្យបានល្អម្តងទៀត ក្រោយពីការជួបភាពជោគជ័យដ៏ធំនៅប្រទេសបារាំង»។ ស្របពេលជាមួយគ្នានេះ ក្រុមជម្រើសជាតិស៊ែប៊ី ក៏បានឈ្នះកៅអីរបស់ពួកគេទៅកាន់ព្រឹត្តិការណ៍ World Cup ឆ្នាំ2018 ផងដែរ ក្រោយពីបានយកឈ្នះលើក្រុមជម្រើសជាតិហ្ស៊កហ្ស៊ី ដើម្បីបញ្ចប់ដោយឈរលើលេខ1ក្នុងពូលរបស់ពួកគេ។
ក្រុមជម្រើសជាតិអ៊ីស្លង់ ត្រូវការ3ពិន្ទុជាដាច់ខាតដើម្បីបញ្ចប់ដោយការឈរលើលេខ1ក្នុងពូល ក្នុងការប្រកួតជម្រុះប្រចាំតំបន់អឺរ៉ុប ក្នុងពូល I ខណៈដែលក្រុមបាល់ទាត់ជម្រើសជាតិក្រូអាស៊ី ដែលបានបណ្តេញលោក Ante Cacic ចេញពីតំណែងកាលពីសប្តាហ៍មុននោះ បានកត់ត្រាជ័យជម្នះ 2-០ លើក្រុមជម្រើសជាតិអ៊ុយក្រែន ក្នុងទីក្រុងគៀវ ដើម្បីដណ្តើមយកចំណាត់ថ្នាក់លេខ2៕
លទ្ធផលពីការប្រកួតផ្សេងទៀត
Albania 0-1 Italy
Finland 2-2 Turkey
FYR Macedonia 4-0 Liechtenstein
Israel 0-1 Spain
Moldova 0-1 Austria
Wales 0-1 Ireland
ប្រភពពី៖ The Guardian
October 10, 2017
សមាជិក 3នាក់នៃក្រុមចម្រៀង Girls’ Generation អះអាងថា ចាកចេញពីក្រុម
ដំណឹងក្ដៅមួយនេះត្រូវបានប្រកាសផ្សាយភ្លាមៗដោយសារព័ត៌មានកូរ៉េ koreaboo នៅពេលមុននេះបន្ដិច បានឱ្យដឹងថា ផលិតកម្ម SM Entertainment បានប្រកាសអះអាងថា សមាជិក 3នាក់នៃក្រុមចម្រៀងស្រី Girls’ Generation នឹងចាកចេញពីក្រុម ដែលរួមមាននាង Tiffany, Sooyoung, និងSeohyun។
ក៏ប៉ុន្ដែ សមាជិក 5នាក់ផ្សេងទៀតដែលមាននាង Taeyeon, Hyoyeon, Sunny, Yoona និង Yuri បានបន្ដចុះកុងត្រាជាមួយក្រុមហ៊ុនខាងលើដដែល។ យ៉ាងណាមិញក្រុមចម្រៀងមួយនេះ នៅមិនទាន់មានការអះអាងថា នឹងបន្ដច្រៀងជាក្រុមដដែល ឬក៏រំលាយក្រុមចោល ហើយច្រៀងទោលវិញនោះឡើយ។

Tiffany

Sooyoung

Seohyun
ក្រុមហ៊ុនផលិតកម្ម SM Entertainment បានអះអាងបន្ដថា “សមាជិកក្រុមពុំបានគិតចង់រំលាយក្រុមរបស់ខ្លួនឡើយ។ Girls’ Generation គឺមានអត្ថន័យខ្លាំងណាស់ចំពោះការគាំទ្រទាំងពីរ គឺក្រុមហ៊ុន និងអ្នកគាំទ្ររបស់ពួកគេ។ ម៉្យាងវិញទៀត ខណៈដែលក្រុមចម្រៀងបានបញ្ចប់កុងត្រា ពួកយើងក៏បានពិភាក្សាគ្នា និងរំឭកគ្នាអំពីគោលដៅនាពេលអនាគតចំពោះក្រុមចម្រៀងមួយនេះ ព្រមទាំងចាត់ចែងជាមួយភារកិច្ចច្បាស់ការផងដែរ”៕
October 10, 2017
ចូលទស្សនារមណីដ្ឋានឋានសួគ៌បូកគោ មិនត្រូវបង់ប្រាក់ជារៀងរហូត ចាប់ពីថ្ងៃទី 15 ខែនេះ
ចាប់ពីម៉ោង00 នាទីថ្ងៃទី15ខែតុលា ឆ្នាំ2017ខាងមុខនេះ ប្រជាជនខ្មែរទាំងអស់នឹងបានទទួលកាដូចំនួនពីរព្រមគ្នាគឺការធ្វើដំណើរឆ្លងកាត់ស្ពានលីយុងផាត់ដោយលែងបង់ប្រាក់ និងការធ្វើដំណើរឡើងកម្សាន្តនៅរមណីយដ្ឋានឋានសួគ៌ភ្នំបូកគោ «ឧទ្យានជាតិព្រះមុនីវង្ស» ដោយពុំចាំបាច់ទិញសំបុត្រចូលឡើយ។
រយៈពេលកន្លងមកប្រមុខរាជរដ្ឋាភិបាលកម្ពុជា បានប្រកាសស្ដីពីការទិញស្ពានលី យុងផាត់ ដើម្បីជួយសម្រួលដល់ការធ្វើដំណើរដល់ប្រជាជនកម្ពុជាឆ្លងកាត់ដោយពុំចាំបាច់បង់ប្រាក់បន្ដទៀត។ ដំណឹងល្អនេះ មិនទាន់បានរំលងផុតពីសេចក្ដីរីករាយរបស់ប្រជាជនកម្ពុជាផង ថ្មីៗនេះនៅក្នុង Page ផ្លូវការរបស់សម្ដេច ហ៊ុន សែន ប្រមុខរាជរដ្ឋាភិបាល បានសរសេរដោយបង្ហាញពីដំណឹងល្អមួយទៀតដល់ប្រជាជនកម្ពុជាដែលមានបំណងចង់ទៅកម្សាន្តនៅ រមណីយដ្ឋានឋានសួគ៌ភ្នំបូកគោ «ឧទ្យានជាតិព្រះមុនីវង្ស» ពុំចាំបាច់ចំណាយប្រាក់ទិញសំបុត្រចូលទស្សនាទៀតឡើយ។
ខ្លឹមសារទាំងស្រុងនៃសំណេរនេះបញ្ជាក់ថា៖ «ទូលព្រះបង្គំ ខ្ញុំព្រះករុណាខ្ញុំ ក្នុងនាមរាជរដ្ឋាភិបាល មានសេចក្តីរីករាយ សូមជម្រាបជូនដល់សាធារណជនឱ្យបានជ្រាបថា ក្រុមហ៊ុន សុខា អូតែល បានស្ម័គ្រចិត្តឈប់លក់សំបុត្រយកថ្លៃចូលឧទ្យានជាតិព្រះមុនីវង្ស «បូកគោ» និងរមនីយដ្ឋានបូកគោ ដែលនឹងចូលជាធរមាន ចាប់ពីវេលាម៉ោង 00:00 នាទី ថ្ងៃទី15ខែតុលា ឆ្នាំ2017 តទៅ។ ទូលព្រះបង្គំ ខ្ញុំព្រះករុណាខ្ញុំ យល់ថា ការឈប់លក់សំបុត្រយកថ្លៃចូលឧទ្យានជាតិនេះ នឹងជួយសម្រួលដល់បងប្អូនជនរួមជាតិ ក៏ដូចជាភ្ញៀវទេសចរណ៍ទាំងអស់បានឡើងទៅទស្សនាកម្សាន្ដនៅលើតំបន់រមណីយដ្ឋានប្រវត្តិសាស្ដ្រ ជាពិសេសបានទស្សនាទេសភាពដ៏ស្រស់ត្រកាលនិងសែនមនោរម្យ និងស្វែងយល់អំពីប្រភេទសត្វ និងរុក្ខជាតិដ៏មានតម្លៃ ដែលមាននៅក្នុងតំបន់ឧទ្យានជាតិ។ បងប្អូនជនរួមជាតិ នឹងមានភាពងាយស្រួលក្នុងការធ្វើដំណើរឡើងទៅកាន់តំបន់រមណីយដ្ឋានបូគោ ដើម្បីស្វែងយល់ពីហេដ្ឋារចនាសម្ព័ន្ធវប្បធម៌ និងសាសនា ក៏ដូចជាការគោរពប្រតិបត្តិពិធីប្រពៃណីសាសនានៅលើតំបន់ប្រវត្តិសាស្ដ្រនេះ។ លើសពីនេះទៅទៀត ទូលព្រះបង្គំ ខ្ញុំព្រះករុណាខ្ញុំសង្ឃឹមថា ដំណោះស្រាយនេះ ក៏នឹងជួយជំរុញឱ្យសកម្មភាពទេសចរណ៍នៅតំបន់ឧទ្យានជាតិព្រះមុនីវង្ស «បូគោ» ក៏ដូចជានៅរបៀងទេសចរណ៍ភាគខាងត្បូង ជាពិសេសតំបន់ឆ្នេរ មានការកើនឡើងបន្ថែមទៀត សំដៅរួមចំណែកដល់សេដ្ឋកិច្ចសង្គម និងជីវភាពរស់នៅរបស់ប្រជាសហគមន៍ក្នុងមូលដ្ឋាន»៕
October 9, 2017
ហេតុអ្វីបានជាសិង្ហបុរីជាប់ឈ្មោះជាប្រទេសដែលមានប្រព័ន្ធអប់រំល្អក្នុងពិភពលោក?
ប្រទេសសិង្ហបុរី (Singapore) ត្រូវបានគេស្គាល់ថា ជាប្រទេសដែលមានភាពល្បីល្បាញមួយលើពិភពលោកផ្នែកវិស័យអប់រំ ហើយប្រជាជនក្នុងប្រទេសដទៃជាច្រើនមានក្តីស្រមៃចង់ក្លាយជាសិស្ស នៃប្រទេសមួយនេះ តែមនុស្សជាច្រើនមិនទាន់បានដឹងនៅឡើយពីមូលហេតុដែលធ្វើឱ្យប្រទេសសិង្ហបុរីត្រូវបានគេចាត់ទុកជាប្រទេសដែលមានប្រព័ន្ធសិក្សាល្អជាប់ចំណាត់ថ្នាក់ខ្ពស់លើពិភពលោក។
យោងតាមគេហទំព័រដ៏ល្បីល្បាញផ្នែកសេដ្ឋកិច្ច Business Insider បានដកស្រង់យកនូវការលើកឡើងរបស់វេទិកាសេដ្ឋកិច្ចពិភពលោក (WEF) ថា ជារៀងរាល់ឆ្នាំស្ថាប័នមួយនេះបានចេញនូវរបាយការណ៍ប្រៀបធៀបពីប្រព័ន្ធអប់រំរបស់ខ្លួន ដោយក្នុងនោះប្រទេសសិង្ហបុរីត្រូវបានគេចាត់ទុកថា ជាប្រទេសមួយដែលមានប្រព័ន្ធគ្រប់គ្រងសាលាល្អក្នុងចំណោមប្រទេសដែលមានប្រព័ន្ធអប់រំល្អៗទាំង 11 លើពិភពលោក។
ការវាយតម្លៃរបស់វេទិកាសេដ្ឋកិច្ចពិភពលោកនេះ គឺផ្តោតលើចំណុចសំខាន់ៗចំនួន 12 យ៉ាងដែលក្នុងនោះរាប់បញ្ចូលទាំងបរិស្ថាននៃម៉ាក្រូសេដ្ឋកិច្ច ហេដ្ឋារចនាសម្ព័ន្ធ សុខភាព និងការអប់រំកម្រិតបឋម រួមទាំងឥទ្ធិពលនៃទីផ្សារកម្លាំងពលកម្មផងដែរ។
នៅក្នុងរបាយការណ៍នោះបានបញ្ចាក់ថា សិង្ហបុរី ជាប្រទេសដែលមានពិន្ទុខ្ពស់ក្នុងការធ្វើតេស្តកម្មវិធីសម្រាប់សិស្ស ការវាយតម្លៃសិស្សអន្តរជាតិ (PISA= Program for International Student Assessment)។ កម្មវិធីនេះមានគោលបំណងក្នុងការវាស់ស្ទង់ ក៏ដូចជាប្រៀបធៀបសកម្មភាពសិក្សា និងការលូតលាស់របស់សិស្សមកពីប្រទេសផ្សេងៗគ្នាដែរ។
ទន្ទឹមនៃការលូតលាស់ និងរីកចម្រើនលឿនរបស់សិស្សចម្រុះជាតិសាសន៍នោះ ប្រទេសសិង្ហបុរី ក៏ត្រូវបានគេមើលឃើញថា មានប្រព័ន្ធអប់រំមួយដែលបង្កើតសម្ពាធខ្ពស់ផងដែរសម្រាប់សិស្ស ជាពិសេសគឺកម្មវិធីសិក្សា និងលំហាត់ដែលបង្កើតឱ្យមានស្ត្រេសខ្លាំងសម្រាប់សិស្សវ័យក្មេង៕
October 9, 2017
ធ្វើបែបណាដើម្បីជោគជ័យលើការធ្វើការងារជាក្រុម (Team Work)?
ការរស់នៅក្នុងសង្គម ទំនាក់ទំនងគឺជារឿងចាំបាច់បំផុតដែលមិនអាចខ្វះបាន ហើយជីវិតការងារក៏កាន់តែត្រូវការជាចាំបាច់ក្នុងការធ្វើការងារជាក្រុម។ ការធ្វើការងារជាក្រុមត្រូវការជាចាំបាច់នូវចិត្តសាស្ត្រក្នុងការសម្របខ្លួន ការដោះស្រាយបញ្ហា និងការជម្នះកត្តាប្រឈមជាច្រើនទៀតដើម្បីឱ្យគម្រោងនីមួយៗទទួលបានជោគជ័យ ព្រោះថា មនុស្សជាច្រើនដែលពូកែធ្វើការងារតែម្នាក់ឯង តែងតែបរាជ័យនៅពេលដែលធ្វើការងារជាក្រុម។
ដើម្បីដោះស្រាយបញ្ហាទាំងអស់នេះ ឡារ៉ែនបានធ្វើបទសម្ភាសជាមួយនឹងលោក គង់ វិចិត្រា ស្ថាបនិកនៃស្ថាប័នបណ្តុះបណ្តាល V-training and Consultant និង Asia Leading Academy ពីចំណុចលម្អិតនៃគន្លឹះទទួលបានជោគជ័យនៃការធ្វើការងារជាក្រុម។
1. តើការធ្វើការជាក្រុមខុសគ្នាយ៉ាងដូចម្តេចខ្លះជាមួយនឹងការធ្វើការងារតែម្នាក់ឯង?
ការធ្វើការងារជាក្រុមមានលក្ខណៈខុសគ្នាដាច់ពីការធ្វើការងារតែម្នាក់ឯង។ តាមទស្សនៈលោក Henry Ford បានលើកឡើងថា ភាពជោគជ័យសំខាន់របស់មនុស្សកើតចេញពីការចាប់ផ្តើមជួបគ្នា ធ្វើការជាមួយគ្នា និងរីកចម្រើនជាមួយគ្នា។ ចំណែកឯខ្មែរយើងក៏លើកឡើងផងដែរថា បើចង់ដើរបានលឿន យើងអាចដើរម្នាក់ឯងក៏បាន តែប្រសិនបើយើងចង់ដើរបានឆ្ងាយ យើងចាំបាច់ត្រូវតែដើរជាក្រុម។
ចំណុចទាំងអស់នេះបង្ហាញថា ការធ្វើការងារម្នាក់ឯងមានលក្ខណៈពិសេសមួយ គឺអាចធ្វើឱ្យយើងបានបញ្ចេញអស់នូវសក្តានុពលក្នុងខ្លួនដោយមិនបាច់ដោះស្រាយបញ្ហាជាមួយអ្នកដទៃ តែការធ្វើបែបនេះអាចធ្វើឱ្យយើងហត់នឿយខ្លាំង ឬអាចធ្វើឱ្យយើងងាយបាក់ស្បាតជាមួយនឹងស្ថានភាព ឬមានបញ្ហាពេលប្រឈមនឹងបញ្ហាធំ។ ចំពោះការធ្វើការងារជាក្រុមវិញ គឺមានសក្តានុពលខ្លាំងជាង ព្រោះថា យើងអាចមានជំនួយគ្រប់យ៉ាង នៅជុំវិញខ្លួនដើម្បីរួមគ្នាទប់ស្កាត់បញ្ហា តែទោះជាយ៉ាងនេះក្តី ការធ្វើការងារជាក្រុមក៏មានបញ្ហាប្រឈមផងដែរ ព្រោះមនុស្សម្នាក់ៗមានគំនិតខុសៗគ្នាដែលទាមទារឱ្យសមាជិកម្នាក់ៗ ជាពិសេសមេក្រុមត្រូវប៉ិនប្រសប់ក្នុងការសម្របសម្រួល។
2. ជាទូទៅ តើការធ្វើការងារជាក្រុម ប្រឈមជាមួយនឹងឧបសគ្គអ្វីខ្លះ? និងបញ្ហាទាំងអស់នោះត្រូវដោះស្រាយដូចម្តេច?
តាមពិតអ្វីក៏ដោយ ទោះម្នាក់ឯង ឬក្រុម ក៏មានបញ្ហាដូចគ្នា ប៉ុន្តែការងារជាក្រុមអាចល្អជាងដោយមានគំនិតច្រើនហើយអាចកាត់បន្ថយហានិភ័យដោយការទទួលខុសត្រូវរួមគ្នា មានន័យថា បើជាការរកស៊ីគឺ ចំណេញ និងខាតរួមគ្នា។ ប៉ុន្តែការចាប់ដៃគូ គឺជារឿងមួយដ៏សំខាន់បំផុត ដោយយើងត្រូវធ្វើអ្វីមួយ ឬប្រកបការរកស៊ីរយៈពេលវែង និងជោគជ័យ។ ចំពោះនៅតាមស្ថាប័ន អង្គការ ឬក្រុមហ៊ុន ព្រោះបុគ្គល ឬសមាជិកម្នាក់ៗសំខាន់ដូចគ្នា ទោះតួនាទីរបស់គាត់ជាអ្នកបោសសម្អាត សន្តិសុខ ឬតួនាទីអ្វីក៏ដោយ ធ្វើដូចនេះទើបស្ថាប័នមានការលូតលាស់ទៅមុខ ប៉ុន្តែវាអាស្រ័យលើសមាជិក ឬបុគ្គលម្នាក់ហ្នឹងដែរ។
បើមានបញ្ហាកើតឡើង យើងអាចជជែកគ្នា និងបានសំឡេងគំនិតច្រើន ជាពិសេសបើនិយាយពីស្ថាប័ន និងក្រុមហ៊ុនមានតួនាទី និងភារកិច្ចផ្សេងៗហើយយើងអាចបែងចែកដំណោះស្រាយទៅតាមផ្នែក និងការទទួលខុសត្រូវរៀងៗខ្លួន និងឱកាសរកជម្រើសណាដែលសមស្រប អាចជាជម្រើសល្អបំផុតដែលកើតចេញពីសំឡេងភាគច្រើន និងគំនិតច្រើនហ្នឹងឯង។
3. តើមានវិធីសាស្ត្រអ្វីខ្លះដើម្បីបំផុសកម្លាំងចិត្តដល់ក្រុមការងារឱ្យមានកម្លាំងចិត្តខ្ពស់ និងទទួលបានផលច្រើន?
ជាវិធីសាស្ត្រ មុនពេលបំផុសកម្លាំងចិត្តដល់ក្រុមការងារ គេត្រូវបំផុសកម្លាំងចិត្តសមាជិកម្នាក់ៗសិន ជាពិសេស បុគ្គលម្នាក់ៗត្រូវមើលឃើញនូវភាពខ្លាំង ភាពខ្សោយ និងសក្តានុពល ជារួមត្រូវដឹងពីគោលបំណងរបស់សមាជិករបស់ខ្លូនម្នាក់ៗថា តើគាត់មកទីនេះដើម្បីអ្វី ចង់បានអ្វី និងហេតុអ្វីបានជាគាត់ចង់បានអ្វីមួយនោះ បន្ទាប់មក យើងកំណត់គោលបំណងឬ គោលដៅរួម ហើយធ្វើការដោយប្រើបេះដូង មិនមែនប្រើតែខួរក្បាលមួយមុខនោះទេ។
4. ករណីដែលសមាជិកម្នាក់ៗគិតតែពីប្រយោជន៍ផ្ទាល់ខ្លួន តើមេដឹកនាំត្រូវធ្វើបែបណាខ្លះដើម្បីបង្រួបបង្រួមស្មារតីរួម?
ដើម្បីបង្រួបបង្រួមស្មារតីក្រុមឱ្យខ្លាំង អ្នកដឹកនាំ និងសមាជិកម្នាក់ៗ ត្រូវកំណត់ឱ្យមានលក្ខខណ្ឌ ឬគោលការណ៍របស់ក្រុម ដើម្បីឱ្យសមាជិកទាំងអស់អនុវត្តតាម។ ករណីមានការខុសឆ្គង មេដឹកនាំត្រូវធ្វើការណែនាំ និងអប់រំ ដោយឈរលើភាពស្មើគ្នា ផលប្រយោជន៍ក្នុងក្រុម និងភាពជាគំរូល្អរបស់មេដឹកនាំ។ មេដឹកនាំដែលល្អ ត្រូវផ្តល់ឱកាសឱ្យសមាជិក ឬបុគ្គលិកសិក្សារៀនសូត្របន្ត និងបណ្តុះនូវគំនិតវិជ្ជមាន ភាពជោគជ័យ ឬជួលអ្នកបណ្តុះបណ្តាល និងអ្នកបង្វឹកសម្រាប់បន្តបណ្តុះបណ្តាល និងបង្វឹក។ ដោយឡែក ក្រុមហ៊ុនធំៗ គេជួលគ្រូបណ្តុះបណ្តាល និងគ្រូបង្វឹកដើម្បីធ្វើការផ្តល់ក្នុងរឿងនេះ ហើយគេសង្កេតឃើញថា ក្រុមហ៊ុននោះមានការរីកចម្រើន និងលូតលាស់។ មេដឹកនាំល្អ ត្រូវផ្តល់តម្លៃដល់បុគ្គលិក និងសមាជិកក្នុងក្រុមការងារ។ ធ្វើដូចនេះ បុគ្គលិកដែលតែងតែបង្កបញ្ហា និងគិតពីប្រយោជន៍ផ្ទាល់ខ្លួន នឹងកែប្រែ ហើយបង្វែរមកគិតពីផលប្រយោជន័រួមវិញជាក់ជាមិនខាន។
5. ពេលសមាជិកខុស មេដឹកនាំក្រុមអាចងាយក្នុងការសម្របសម្រួល តើពេលដែលមេដឹកនាំខុសវិញ តើសមាជិកម្នាក់ៗគួរធ្វើបែបណាដើម្បីចូលរួមចំណែកកែលម្អអ្នកដែលមានសិទ្ធិសម្រេចធំជាងគេនេះ?
ជាធម្មតា ក្នុងស្ថាប័នតែងមានគោលការណ៍ បទបញ្ជាផ្ទៃក្នុង និងលក្ខខណ្ឌផ្សេងៗ ដែលត្រូវអនុវត្តតាម ហើយនៅពេលដែលមេដឹកនាំក្រុមខុស គួរតែមានគណៈកម្មការ ឬក្រុមប្រឹក្សាភិបាលជាអ្នកជួយដោះស្រាយ ជាពិសេសមេដឹកនាំដែលល្អត្រូវបន្តការសិក្សារៀនសូត្រ និងដកស្រង់បទពិសោធល្អៗដើម្បីដំណើរការឱ្យស្ថាប័ន និងក្រុមហ៊ុនមានភាពរលូន និងរីកចម្រើនទៅមុខ។ ជាពិសេស មេដឹកនាំគួរតែមានអ្នកជួយបង្វឹក ដែលគ្រូបង្វឹកនោះជាបុគ្គលដែលមានសុវត្ថិភាព និងអាចជឿជាក់បាន៕
October 9, 2017
កវីល្បីឈ្មោះ សុខ ជំនោរ និងគូដណ្ដឺងលេងស្ទីលថើបមាត់ស្រស់ៗ
កាលពីថ្ងៃខួបកំណើតកវីនិពន្ធល្បី លោក សុខ ជំនោរ កន្លងទៅថ្មីៗនេះ អនាគតភរិយារបស់លោក គឺកញ្ញា រង្សី បានទិញនំខួបកំណើតមកធ្វើឲ្យលោកភ្ញាក់ផ្អើលក្នុងហាងមួយកន្លែងក្នុងរាជធានីភ្នំពេញ។ បន្ទាប់មកអ្នកទាំងពីរក៏បានបង្ហាញវីដេអូខ្លីមួយ ស្ដែងពីភាពផ្អែមល្ហែមស្អិតល្មួតដូចស្ករតាំងម៉ែឱ្យមហាជនបានឃើញនៅលើ Facebook។
អ្វីដែលកាន់តែពិសេសនោះ គឺគូស្នេហ៍ទាំងពីរលេងស្ទីលថើបមាត់ យ៉ាងរ៉ូមែនទិកដោយមិនបានក្រែងចិត្តអ្នកគាំទ្រឡើយ ហើយគូដណ្តឹងកវីនិពន្ធល្បីឈ្មោះរូបនេះថែមទាំងបានសរសេរសារដ៏ផ្អែមល្ហែមបញ្ជាក់ពីក្តីស្នេហ៍របស់នាងចំពោះលោកទៀតផងថា «គ្មានអ្នកណាផ្សេងឡើយ ដែលអាចឲ្យអូនចង់នៅជាមួយក្រៅពីរូបបង។ គ្មាននរណាម្នាក់ អាចធ្វើអូនញញឹម និងសើចដូចបងបានឡើយ។ បងជាមនុស្សដំបូងគេដែលអូនចង់ឃើ់ញមុនពេលក្រោកពីគេង ហើយជាមនុស្សចុងក្រោយ នៅពេលយប់…។ អូនស្រឡាញ់បង ស្រឡាញ់បងតែម្នាក់គត់»៕
October 9, 2017