Category: សង្គម និងសេដ្ឋកិច្ច

លោក បារ៉ាក់ អូបាម៉ា និងភរិយា ទាមទារយុត្តិធម៌ដល់ស្ត្រីរងគ្រោះពីផលិតករ Harvey Weinstein
អតីតប្រធានាធិបតីសហរដ្ឋអាមេរិកលោក បារ៉ាក់ អូបាម៉ា និងភរិយាលោកស្រី Michelle បាននិយាយថា ពួកយើងស្អប់ខ្ពើមបំផុតចំពោះទង្វើរបស់អ្នកផលិតខ្សែភាពយន្ត និងអ្នកផលិតកម្មវិធីលោក Harvey Weinstein ដែលបានបំពានផ្លូវភេទរបស់តារាស្រីៗ។
កាលពីថ្ងៃអង្គារ ទី10 ខែតុលា ឆ្នាំ2017 សារព័ត៌មាន New Yorker បានចេញផ្សាយថា មន្ត្រីពាក់ព័ន្ធចំពោះបញ្ហាមួយនេះ នឹងបើកការស៊ើបអង្កេតលើករណីតារាស្រី 3 ដួង ដែលបានចេញមុខអះអាងថា ពួកនាងត្រូវបានរងការរំលោភបំពានផ្លូវភេទពីលោក Harvey Weinstein ក្នុងអំឡុងពេល 10 ខែខាងមុខ។
ហើយថ្មីៗនេះ បើតាមសារព័ត៌មាន independent បានផ្សាយថា លោកបារ៉ាក់ អូបាម៉ា និងភរិយាបានចេញមុខយ៉ាងពេញទំហឹងនៅក្នុងរឿងនេះ ដោយបានលើកឡើងថា “ភរិយាខ្ញុំ និងរូបខ្ញុំផ្ទាល់មានការខ្ពើមរអើមចំពោះទង្វើដ៏អាក្រក់របស់ Harvey Weinstein នេះណាស់។ បុរសនេះបានបន្ទាបបន្ថោក និងធ្វើឱ្យខូចខាតតម្លៃស្រ្តី ហេតុនេះគាត់ត្រូវតែបានថ្កោលទោស និងទទួលខុសត្រូវចំពោះមុខច្បាប់ដោយមិនគិតពីទ្រព្យសម្បត្តិ ឬឋានៈគាត់ទេ”។
គួបញ្ជាក់ផងដែរថា លោក អូបាម៉ា បានទាមទាររកយុតិ្តធម៌ និងទទូចបន្ថែមថា “យើងគួរសាទរចំពោះភាពក្លាហានរបស់នារីដែលបានចេញមុខមកនិយាយរឿងនេះទាំងក្ដីឈឺចាប់លាក់ទុកនៅក្នុងចិត្តយ៉ាងគ្រាំគ្រា ហើយយើងទាំងអស់គ្នាត្រូវតែកសាងវប្បធម៌មួយ ដែលជាការរួមចំណែកផ្តល់សិទ្ធិអំណាចដល់ក្មេងស្រី និងការបង្រៀនកូនចៅរបស់យើង ឱ្យមានការគោរព និងឱ្យតម្លៃដល់ស្ត្រីឱ្យបានខ្លាំង” ៕

October 11, 2017
ក្រសួងការងារ កំពុងសាងកម្លាំងពលកម្ម ដើម្បីអាចទៅប្រកួតប្រជែងជាមួយប្រទេសក្នុងតំបន់
ភ្នំពេញ – ដើម្បីកសាងកម្លាំងជំនាញ និងឱ្យស្របទៅតាមទីផ្សារការងារ ថ្មីៗនេះកម្ពុជាបានដាក់ចេញនូវគោលនយោបាយជាតិ ស្តីពីការអប់រំ និងបណ្តុះបណ្តាលវិជ្ជាជីវៈ ឆ្នាំ2017-2025 ធ្វើយ៉ាងណាឱ្យកម្ពុជាអាចមានកម្លាំងពលកម្មជំនាញតម្រូវទៅតាមទីផ្សារការងារ។
សម្ដេចអគ្គមហាសេនាបតីតេជោ ហ៊ុន សែន បានលើកឡើងថា ការបង្កើតគោលនយោបាយជាតិស្ដីពីការអប់រំបណ្ដុះបណ្ដាលវិជ្ជាជីវៈថ្នាក់ជាតិ 2017-2025 គឺជាដំណើរការនៃការកសាងកម្លាំងជំនាញឱ្យមានសមត្ថភាព និងលទ្ធភាពអាចប្រើប្រាស់បច្ចេកវិទ្យាកម្រិតខ្ពស់ ដែលជាកាតព្វកិច្ចដ៏សំខាន់ដើម្បីឈានទៅដល់ការអភិវឌ្ឍកំណើនសេដ្ឋកិច្ច និងស្ថិរភាពសង្គមប្រកបដោយចីរភាព។
ជាមួយគ្នានេះសម្ដេច ហ៊ុន សែន បញ្ជាក់ថា ដើម្បីធានាឱ្យគោលនយោបាយស្ដីពីការអប់រំបណ្ដុះបណ្ដាលបច្ចេកទេស 2017-2025 អនុវត្ដឱ្យកាន់តែមានប្រសិទ្ធភាព ត្រូវបន្ដពង្រឹងការអប់រំ បណ្ដុះបណ្ដាលបច្ចេកទេស និងវិជ្ជាជីវៈ ដោយបន្ដអនុវត្ដប្រព័ន្ធធានាគុណភាព ពង្រឹងគរុកោសល្យ និងបច្ចេកទេសរបស់គ្រូបណ្ដុះបណ្ដាលហេដ្ឋារចនាសម្ព័ន្ធ រួមទាំងធនធានមូលដ្ឋានសម្រាប់រៀន និងបង្រៀន ដោយឆ្លើយតបការអភិវឌ្ឍបច្ចេកវិទ្យាថ្មីសម្រាប់តម្រូវការទីផ្សារការងារ។
ឯកឧត្ដម អ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈបានលើកឡើងថា ការបង្កើតគោលនយោបាយនេះបានបង្ហាញពីភាពចាំបាច់នៃការបង្កើតយុទ្ធសាស្ដ្រនៃការអប់រំ បណ្ដុះបណ្ដាលបច្ចេកទេស និងវិជ្ជាជីវៈដល់កម្លាំងពលកម្មធ្វើយ៉ាងណាឱ្យឆ្លើយតបទៅនឹងទីផ្សារការងារ។ ពិសេសវាបានរួមចំណែកក្នុងការអភិវឌ្ឍដល់វិស័យឧស្សាហកម្មបង្កើតការងារ និងធានាបានគុណភាពផលិតភាពខ្ពស់របស់កម្លាំងពលកម្មដែលអាចប្រកួតប្រជែងកាន់តែប្រសើរជាងមុនជាមួយបណ្ដាប្រទេសក្នុងតំបន់។ ក្នុងនោះឯកឧត្ដមបន្ដថា ក្នុងបរិបទនៃការប្រកួតប្រជែងឥតឈប់ឈរ និងស្វែងរកឧត្ដមភាព ទាមទារឱ្យកម្ពុជាកាន់តែប្រឹងប្រែងបង្កើនគុណភាពក្នុងផលិតផល និងសេវាកម្មរបស់ខ្លួនឱ្យបានកម្រិតអតិបរមា៕
October 11, 2017
កម្ពុជាទទួលបានទឹកប្រាក់ 7.5លានដុល្លារ សម្រាប់ពង្រឹងសុវត្ថិភាពម្ហូបអាហារ
ភ្នំពេញ៖ ដើម្បីអភិវឌ្ឍផលិតកម្ម និងសេវាកម្ម និងការពង្រឹងសុវត្ថិភាពម្ហូបអាហារឱ្យកាន់តែប្រសើរឡើង កម្ពុជាទទួលបានជំនួយឥតសំណងប្រមាណជា 7.5 លានដុល្លារ ពីគម្រោងកម្មវិធីពង្រឹងក្របខ័ណ្ឌសមាហរណកម្ម (EIF) របស់អង្គការពាណិជ្ជកម្មពិភពលោក។
ថ្លែងក្នុងកិច្ចប្រជុំ ក្រុមប្រឹក្សាភិបាលនៃកម្មវិធីពង្រឹងក្របខ័ណ្ឌសមាហរណកម្ម (EIF) លើកទី25 ដោយមានការចូលរួមពីតំណាងឯកអគ្គរដ្ឋទូតអ៊ឺរ៉ុប និងតំណាងបេសកកម្មអចិន្ត្រៃយ៍អង្គការពាណិជ្ជកម្មពិភពលោក (WTO) នៅឯខេត្តសៀមរាប នៅថ្ងៃទី11 ខែតុលានេះ ឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មបានឱ្យដឹងថា កម្មវិធី EIF ដែលអនុវត្តនៅក្នុងប្រទេសកម្ពុជា មានទឹកប្រាក់ឥតសំណងសរុប7.5លានដុល្លារ ហើយបានធ្វើការលើគម្រោងធំៗរួមមានការអភិវឌ្ឍផលិតផល និងសេវាកម្ម ការសម្របសម្រួល និងជំរុញនាំចេញ និងការពង្រឹងហេដ្ឋារចនាសម្ព័ន្ធ, សុវត្ថិភាពម្ហូបអាហារ និងភូតគាមអនាម័យ។
ឯកឧត្តមមានប្រសាសន៍ថា “តាមរយៈជំនួយនេះ កម្ពុជាអាចបន្តដើរតួជាប្រទេសជោគជ័យមួយសម្រាប់កម្មវិធី EIF នៅលើពិភពលោក។ យុទ្ធសាស្ត្រDTIS មិនត្រឹមតែបម្រើដល់ការរៀបចំវិស័យសំខាន់ៗប៉ុណ្ណោះទេ ប៉ុន្តែថែមទាំងកំណត់ពីចំណុចខ្វះខាតសមត្ថភាព ទាំងនៅកម្រិតស្ថាប័ន និងធនធានមនុស្ស ដើម្បីបម្រើការអភិវឌ្ឍវិស័យពាណិជ្ជកម្ម។
បន្ថែមលើនេះ ឯកឧត្តមរដ្ឋមន្ត្រីក៏បានស្នើដល់ក្រុមប្រឹក្សាEIF បន្តជួយប្រទេសកម្ពុជា និងប្រទេសអភិវឌ្ឍន៍តិចតួច (LDCs) ឆ្ពោះទៅសម្រេចគោលដៅអភិវឌ្ឍន៍ទាំងឡាយ ដើម្បីធានានិរន្តរភាពលទ្ធផលក្នុងរយៈពេលយូរអង្វែងដែលនឹងជួយឱ្យកម្ពុជាអាចសម្រេចបាននិរន្តរភាពកំណើនសេដ្ឋកិច្ច និងការកាត់បន្ថយភាពក្រីក្រ។
ឯកឧត្តម ចច អេតហ្គា ឯកអគ្គរដ្ឋទូតអឺរ៉ុបប្រចាំនៅកម្ពុជាបានលើកឡើងពីសារៈសំខាន់នៃជំនួយសម្រាប់ពាណិជ្ជកម្ម (AfT) ដើម្បីធានានិរន្តរភាពសេដ្ឋកិច្ច និងកាត់បន្ថយភាពក្រីក្រនៅតាមប្រទេស LDCs ហើយចាប់តាំងពីឆ្នាំ2007 ដល់2015 សហគមន៍អឺរ៉ុប និងរដ្ឋសមាជិក បានផ្តល់ AfTដល់ប្រទេស LDCs ចំនួន 96,8 ប៊ីលានអឺរ៉ូ ដែលចំនួននេះស្មើនឹង 1/3 នៃទឹកប្រាក់ AfTពិភពលោក។ លើសពីនេះ សហគមន៍អឺរ៉ុបក៏បានអនុញ្ញាតឱ្យប្រទេស LDCs ចំនួន 47 រួមទាំងកម្ពុជាអាចនាំចេញទំនិញទៅកាន់ទីផ្សារអឺរ៉ុបក្រោមប្រព័ន្ធអនុគ្រោះពន្ធ “អ្វីគ្រប់យ៉ាងលើកលែងតែអាវុធ (EBA)” ចាប់តាំងពីឆ្នាំ 2001មក។
សម្រាប់ប្រទេសកម្ពុជា ឯកឧត្តម ឯកអគ្គរដ្ឋទូត បានគូសបញ្ជាក់ថា សហគមន៍អឺរ៉ុប បានផ្តល់ AfTដើម្បីគាំទ្រចំពោះវិស័យសំខាន់ៗចំនួន 5 ដូចបានកំណត់នៅក្នុង DTIS គឺ៖ អង្ករ សូត្រប្រណីត ដំឡូងមី ជលផលសមុទ្រ និងបដិសណ្ឋារកិច្ច ហើយទន្ទឹមគ្នាសហគមន៍អឺរ៉ុប នឹងបន្តជួយអភិវឌ្ឍសង្គមសេដ្ឋកិច្ចកម្ពុជា និងប្រទេសជាសមាជិក EIF តាមរយៈវិស័យពាណិជ្ជកម្មផងដែរ។
ទន្ទឹមគ្នានេះ ឯកឧត្តម អ៊ីឡយ ឡាអ៊ូរូ ប្រធានក្រុមប្រឹក្សាភិបាលកម្មវិធី EIF និងជាតំណាងបេសកកម្មអចិន្ត្រៃយ៍ប្រទេសបេនីន ប្រចាំអង្គការពាណិជ្ជកម្មពិភពលោក (WTO) បានទទួលស្គាល់ថា កម្ពុជាគឺជាប្រទេស (EIF) ដែលទទួលបានជោគជ័យខ្លាំង ក្នុងការប្រើប្រាស់របៀបវារៈពាណិជ្ជកម្មដើម្បីពន្លឿនកំណើនសេដ្ឋកិច្ច និងកាត់បន្ថយភាពក្រីក្រ ដែលជាលទ្ធផលចាកចេញពីប្រទេសដែលមាន “ប្រាក់មានចំណូលទាប” ទៅជាប្រទេសដែលមាន “ប្រាក់ចំណូលមធ្យមកម្រិតទាប” ដោយជោគជ័យ។ ហើយក្រុមប្រឹក្សា EIF មកទីនេះ ក្នុងគោលបំណងរៀនសូត្រអំពីភាពជោគជ័យរបស់កម្ពុជា ដើម្បីចែករំលែកជូនប្រទេសដែលជាសមាជិក EIF ផ្សេងៗលើពិភពលោក។
ឯកឧត្តម អ៊ីឡយ បានបន្តទៀតថា ក្រុមប្រឹក្សា EIF ក៏នឹងធ្វើការពិភាក្សាស្វែងរកវិធីសាស្ត្រនានាដើម្បីជួយគាំទ្រប្រទេស LDCs នៅឯកិច្ចប្រជុំថ្នាក់រដ្ឋមន្ត្រី នៃអង្គការ WTO លើកទី11 ដែលនឹងរៀបចំឡើងនៅក្នុងទីក្រុងប៊ុយណូហ្ស៊ែរ ប្រទេសអាហ្សង់ទីន ដើម្បីធ្វើសមាហរណកម្មចូលទៅក្នុងប្រព័ន្ធពាណិជ្ជកម្មសកល និងទាញយកអត្ថប្រយោជន៍អតិបរិមាពីប្រព័ន្ធអនុគ្រោះពន្ធ និងការចូលទីផ្សារថ្មីៗ សំដៅកាត់បន្ថយភាពក្រីក្រ និងសម្រេចគោលដៅសហសវត្សរ៍ប្រកបដោយចីរភាព៕
October 11, 2017
លោកស្រី ចេន សុភាព ៖ ចង់ក្លាយជាអ្នកដឹកនាំល្អត្រូវរៀន 3យ៉ាង
ការបង្កើតបរិយាកាស ក្នុងភាពជាអ្នកដឹកនាំ និងការដឹកនាំប្រកបដោយប្រសិទ្ធភាព ជាចំណុចសំខាន់មួយដែលមនុស្សគ្រប់គ្នាចង់ធ្វើ ដើម្បីក្លាយជាអ្នកដឹកនាំស្ថាប័នល្អ មេគ្រួសារល្អ ឬជាអ្នកដឹកនាំក្រុមមួយដ៏ល្អ។
ពាក់ព័ន្ធនឹងភាពជាអ្នកដឹកនាំនេះ លោកស្រី ចេន សុភាព ស្ថាបនិក កីតម្បាញខ្មែរ និងជាជយលាភីលេខ1 ក្នុងវេទិកា ភាពជាអ្នកដឹកនាំស្តីពីការបង្កើតបរិយាកាសដើម្បីឱ្យមនុស្សម្នាក់ៗក្លាយជាអ្នកដឹកនាំ បានលើកឡើងថា ការដឹកនាំគឺសំដៅលើការដឹកនាំក្រុមណាមួយឱ្យដល់គោលដៅ ហើយដើម្បីក្លាយជាអ្នកដឹកនាំដែលមានប្រសិទ្ធភាព និងដល់គោលដៅប្រកបដោយភាពវិជ្ជមាន បុគ្គលគ្រប់រូបគួររៀន 3យ៉ាង គឺរៀនរៀន (Learn to Learn) រៀនធ្វើ និងរៀនចែករំលែក។
លោកស្រី ចេន សុភាព បាននិយាយថា៖ «អ្នកដឹកនាំត្រូវតែជាមនុស្សដែលបន្តការអភិវឌ្ឍឥតឈប់ឈរ ហើយដើម្បីក្លាយជាអ្នកដឹកនាំដែលមានគំនិតទូលំទូលាយគឺត្រូវតែចេះកសាងខ្លួនខ្លាំងបំផុតតាមរយៈការស្តាប់ ការអាន ការចូលរួមសិក្ខាសាលា និងរៀនពីគ្រប់មជ្ឈដ្ឋាន ព្រោះនៅសម័យបច្ចេកវិទ្យានេះ គឺគេត្រូវការចំណេះដឹងខ្លាំងបំផុត»។
ស្ថាបនិកកីតម្បាញខ្មែរខាងលើបានលើកឡើងផងដែរថា ការរៀនគឺលោកស្រីផ្តោតសំខាន់លើការអាន ព្រោះថា ការអានអាចធ្វើឱ្យមនុស្សទទួលបាននូវចំណេះដឹងច្រើន និងមានប្រសិទ្ធភាព ជាវិធីផ្សេងៗ ដូចជាប្រធានាធិបតីសហរដ្ឋអាមេរិក លោក Harry Truman បានលើកឡើងថា «គ្រប់អ្នកដឹកនាំសុទ្ធតែជាអ្នកពូកែអាន តែមិនមែនគ្រប់អ្នកអានសុទ្ធតែក្លាយជាអ្នកដឹកនាំនោះទេ»។ បន្ថែមពីលើនេះ ការរៀនស្តាប់ និងការៀននិយាយក៏ជាចំណុចចាំបាច់មួយរបស់មេដឹកនាំដែរ ព្រោះថា មេដឹកនាំដែលពូកែនិយាយ ពូកែបង្ហាញពីគម្រោងប្រកបដោយគុណភាព លុះត្រាតែជាអ្នកពូកែបំផុសទឹកចិត្តមនុស្សឱ្យមានការខិតខំប្រកបដោយសក្តានុពល ពូកែនិយាយធ្វើឱ្យគេមានជំនឿចិត្ត និងពូកែនិយាយឱ្យគេមានក្តីសង្ឃឹមជាដើម។
លោកស្រី ចេន សុភាព បានបញ្ជាក់ផងដែរថា៖ «ជាអ្នកដឹកនាំល្អម្នាក់មិនមែនគ្រាន់តែពូកែនិយាយនោះទេ តែក៏ត្រូវពូកែធ្វើផងដែរ។ ត្រូវតែជាអ្នកដែលធ្វើជាគំរូល្អដល់អ្នកគ្រប់គ្នា ប្រកបដោយការទទួលខុសត្រូវ និងការគោរព ជាពិសេសធ្វើជាគំរូដល់បុគ្គលិកដែលធ្វើការជាមួយគ្នាដើម្បីសម្រេចគោលដៅរួម»។
សហគ្រិនរូបនេះបានលើកឡើងផងដែរថា អ្នកដឹកនាំក៏ត្រូវតែជាអ្នកពូកែចែករំលែកទាំងចំណេះដឹង រឿងល្អៗ ការយកចិត្តទុកដាក់ និងការចែករំលែកក្តីស្រឡាញ់ទៅកាន់ក្រុមទាំងមូល៕
October 11, 2017
Angelina Jolie និងGwyneth Paltrow ធ្លាប់រងការរំលោភបំពានផ្លូវភេទជាទម្ងន់
នៅថ្ងៃទី11 ខែតុលា ឆ្នាំ2017 សារព័ត៌មាន BBC បានចេញផ្សាយឱ្យដឹងថា អ្នកនាង Angelina Jolie និងអ្នកនាង Gwyneth Paltrow ដែលជាតារាសម្ដែងល្បីប្រចាំហូលីវូដ បានចេញមកសារភាពថា ពួកអ្នកនាង និងស្ត្រីជាច្រើនរូបទៀតសុទ្ធតែធ្លាប់រងការបំពានផ្លូវភេទយ៉ាងធ្ងន់ធ្ងរពីអ្នកផលិតកម្មវិធីម្នាក់ដែលមានឈ្មោះថា Harvey Weinstein។
អ្នកនាង Angelina Jolie បានហែកស្បែកមុខបុរសចំណាស់ម្នាក់នេះថា “នាងខ្ញុំធ្លាប់មានបទពិសោធអាក្រក់ៗជាមួយនឹងអ្នកផលិតកម្មវិធី Harvey Weinstein នៅអំឡុងពេលដែលនាងខ្ញុំនៅជាយុវវ័យនៅឡើយ ទើបនាងខ្ញុំបានសម្រេចចិត្តមិនបន្ដធ្វើការងារជាមួយនឹងគាត់ទៀត ព្រមទាំងបានដាស់តឿនដល់អ្នកផ្សេងៗទៀត មិនឱ្យចូលរួមការងារជាមួយបុរសចំណាស់ម្នាក់នេះ។ ការធ្វើបែបនេះដាក់ស្ត្រីភេទ គឺជារឿងរំលោភបំពានសុទ្ធសាធ នឹងមិនអាចលើកលែងទោសឱ្យបានឡើយ”។
យ៉ាងណាមិញ មិនមែនមានតែតារាស្រី Angelina Jolie តែម្នាក់នោះទេដែលបានចេញមកបកស្រាយរឿងរបស់អ្នកផលិតកម្មវិធីរោគចិត្តមួយនេះ តែនៅមានអ្នកនាង Gwyneth Paltrow ដែលបានរៀបរាប់ដោយមិនលាក់បាំងប្រាប់អ្នកសារព័ត៌មាន BBC ថា “នៅពេលនោះនាងខ្ញុំនៅក្មេងពេក ហើយទើបតែបានចុះកិច្ចសន្យាជាមួយគាត់ នៅពេលនោះនាងខ្ញុំមានអារម្មណ៍ភ័យខ្លាចណាស់។ ខណៈនោះ នាងខ្ញុំក៏បានប្រាប់ដល់ Brad Pitt ផងដែរ ព្រោះពួកយើងនៅទាក់ទងគ្នានៅឡើយ ។ ហើយគាត់បានចេញមុខការពារនាងខ្ញុំពី Harvey Weinstein ដែរ។ ទោះយ៉ាងនោះក៏ដោយ ក្រោយកើតហេតុ នាងខ្ញុំបានគិតថា គាត់គង់តែនឹងបណ្ដេញខ្ញុំចេញដូចតែគ្នាទេ”។
គួរបញ្ជាក់ផងដែរថា បើទោះមានការអះអាងពីនារីរងគ្រោះដោយការរំលោភបំពានផ្លូវភេទជាច្រើននាក់ដោយសារលោក Harvey Weinstein ក៏ដោយ ក៏ប៉ុន្ដែរហូតមកទល់ពេលនេះ បុរសចំណាស់រូបនេះនៅតែអះអាងប្រាប់អ្នកសារព័ត៌មានថា លោកត្រូវបានគេចោទទាំងបំពាន និងប្រឌិតរឿងដើម្បីបំផ្លាញកេរ្តិ៍ឈ្មោះរបស់លោក៕

October 11, 2017
ការចេញលិខិតបញ្ជាក់កម្មសិទ្ធិច្រើនសន្លឹកដល់ប្រជាពលរដ្ឋដើម្បីខ្ចីប្រាក់ គឺជាបញ្ហាប្រឈមដ៏ធំ
ភ្នំពេញ – ស្របពេលដែលវិស័យមីក្រូហិរញ្ញវត្ថុកំពុងមានអត្រាកំណើននៃអ្នកប្រើប្រាស់ អគ្គទេសាភិបាលនៃធនាគារជាតិកម្ពុជាបានក្រើនរំឭកដល់អាជ្ញាធរ ត្រូវតែបញ្ឈប់ជាបន្ទាន់នូវការចេញលិខិតបញ្ជាក់កម្មសិទ្ធិច្រើនសន្លឹកឱ្យប្រជាពលរដ្ឋសម្រាប់ខ្ចីប្រាក់ ដើម្បីឈានទៅបញ្ជៀសបញ្ហាប្រឈមនឹងហានិភ័យទាំងឡាយដែលអាចកើតឡើងក្នុងវិស័យមីក្រូហិរញ្ញវត្ថុ។
ឯកឧត្តម ជា ចាន់តូ អគ្គទេសាភិបាលនៃធនាគារជាតិកម្ពុជា បានមានប្រសាសន៍ថា បច្ចុប្បន្នវិស័យមីក្រូហិរញ្ញវត្ថុមានការរីកចម្រើនដែលអាចមើលឃើញថា តាមរយៈអត្រាកំណើននៃអ្នកប្រើប្រាស់សេវាហិរញ្ញវត្ថុផ្លូវការ ពិសេសប្រជាពលរដ្ឋពេញវ័យដែលកំពុងប្រើប្រាស់សាវានេះ មានការកើនឡើងប្រមាណ 51% នៅឆ្នាំ2017 ធៀបទៅនឹងឆ្នាំ2016 មានប្រមាណ 8,7%។
គ្រឹះស្ថានមីក្រូហិរញ្ញវត្ថុនៅកម្ពុជាមានចំនួន 76 ស្ថាប័ន និងប្រតិបត្តិករឥណទានជនបទមានចំនួន 286ស្ថាប័ន ដែលមានរហូតដល់ថ្នាក់ឃុំ។ ទំហំទឹកប្រាក់កម្ចីសរុបប្រមាណ 18,80 ទ្រីលានរៀល ស្មើនឹងប្រមាណ 3,90 ប៊ីលានដុល្លារ ហើយផ្តល់ដល់អតិថិជនចំនួន 1,8 លាននាក់ និងប្រាក់បញ្ញើសរុបចំនួន 7,70 ទ្រីលានរៀល ស្មើនឹង1,90 ប៊ីលានដុល្លារ និងទទួលបានអតិថិជនដែលផ្ញើប្រាក់ចំនួន1,7លាននាក់។
អគ្គទេសាភិបាលធនាគារជាតិកម្ពុជា បានបន្តលើកឡើងថា ទន្ទឹមនឹងភាពរីកចម្រើននៃវិស័យមីក្រូហិរញ្ញវត្ថុ ក៍មានបញ្ហាប្រឈមមួយចំនួនផងដែរ។ ដើម្បីដោះស្រាយបញ្ហានេះឱ្យមានប្រសិទ្ធភាព និងតម្លាភាព អាជ្ញាធរត្រូវជួយផ្សព្វផ្សាយឱ្យប្រជាពលរដ្ឋបានយល់ច្បាស់អំពីប្រភពស្របច្បាប់នៃដំណើរការខ្ចីប្រាក់។ បន្តការសហការអនុវត្តតាមផ្លូវច្បាប់ទៅលើសមាគម អង្គការ ជនខិលខូច និងអ្នករកស៊ីចងការប្រាក់ដែលពុំមានច្បាប់អនុញ្ញាត។ ពិសេសត្រូវពិនិត្យឱ្យបានច្បាស់ មុនចេញលិខិតបញ្ជាក់ជូនប្រជាពលរដ្ឋដើម្បីខ្ចីប្រាក់ និងចៀសវាងការចេញលិខិតឱ្យច្រើនសន្លឹក និងបញ្ឈប់ការសហការជាមួយគ្រឹះស្ថានមីក្រូហិរញ្ញវត្ថុក្នុងការដើរទារប្រមូលប្រាក់ពីប្រជាពលរដ្ឋ។
ធនាគារជាតិនៃកម្ពុជានឹងពិនិត្យថ្លឹងថ្លែងប្រកបដោយសមភាព និងពង្រឹងប្រសិទ្ធភាពអនុវត្តតាមច្បាប់ និងបទប្បញ្ញត្តិនានា ចាត់វិធានការចំពោះអ្នកផ្តល់ប្រាក់កម្ចីឱ្យបានម៉ឺងម៉ាត់ និងជំរុញបន្តឱ្យគ្រឹះស្ថានមីក្រូហិរញ្ញវត្ថុផ្តល់សេវាកម្ចី ឱ្យកាន់តែមានភាពងាយស្រួល និងមានលក្ខណៈអនុគ្រោះសម្រាប់ពលរដ្ឋក្រីក្រ ព្រមទាំងបន្តការរៀបចំសិក្ខាសាលាផ្សព្វផ្សាយជូនសាធារណជនបន្ថែមទៀត អំពីប្រតិបត្តិការមីក្រូហិរញ្ញវត្ថុ និងបញ្ហាផ្សេងៗដែលអាចកើតឡើងពីការប្រើប្រាស់សេវាហិរញ្ញវត្ថុនេះ៕
October 11, 2017
អ្នកគាំទ្រតារាចម្រៀងក្រុម EXO ធ្វើអត្តឃាតក្រោយដឹងថា Idol ខ្លួនមានសង្សារហើយ!
បើតាមប្រភពសារព័ត៌មានថៃ entertain.teenee ដែលចេញផ្សាយមុននេះបន្ដិច បានឱ្យដឹងថា ក្រោយពីតារាចម្រៀង Luhan នៃក្រុមតារាចម្រៀង EXO បានប្រកាសកាលពីពេលមុននេះនៅលើបណ្ដាញសង្គមរបស់ខ្លួនថា ខណៈនេះលោកកំពុងតែមានទំនាក់ទំនងស្នេហាជាមួយតារាស្រីវ័យក្មេងអាយុ 17 ឆ្នាំ ជាជនជាតិចិននោះ ភ្លាមៗនោះ ស្រាប់តែស្រីស្អាតអ្នកគាំទ្រម្នាក់មានឈ្មោះ គួន សៀវថុង អាយុ 20 ឆ្នាំបានសម្រេចចិត្តធ្វើអត្តឃាតដោយអារកដៃខ្លួនឯងនៅក្នុងបន្ទប់របស់ខ្លួនលើអគារខ្ពស់មួយ ព្រមទាំងបង្ហោះជាសាធារណៈទៀតផង។
គួរបញ្ជាក់ផងដែរថា នៅទីបំផុតដំណឹងដ៏សែនរន្ធត់មួយនេះបានក្លាយជារឿងដ៏គួរឱ្យតក់ស្លត់មួយ និងក្លាយជាប្រធានបទក្ដៅនៅលើបណ្ដាញទំនាក់ទំនង weibo ដែលប្រជាជនចិននិយមប្រើប្រាស់ ព្រោះថាពួកគេគិត ថាអាចនឹងមាននារីៗអ្នកគាំទ្រ Luhan ជាច្រើននាក់ទៀតធ្វើអត្តឃាតជាបន្ដបន្ទាប់ ដោយសារតែភាពអស់សង្ឃឹមក្នុងក្ដីស្នេហារបស់ខ្លួនចំពោះ Luhan ៕
October 11, 2017
តារាម៉ូដែលថៃ 10 រូបដែលគ្មានអ្នកណាមើលដឹងថា ជានារីភេទទី 3
រឿងដ៏គួរឱ្យចាប់អារម្មណ៍មួយនេះ ត្រូវបានចេញផ្សាយដោយសារព័ត៌មានកូរ៉េ koreaboo នៅព្រឹកថ្ងៃទី11 ខែតុលា ឆ្នាំ2017 នេះ ដោយបានកោតសរសើរចំពោះវេជ្ជសាស្ត្រកែសម្ផស្ស និងប្តូរភេទនៅប្រទេសថៃ ដែលក្នុងនោះមានតារាម៉ូដែលថៃចំនួន 10 រូប ដែលមានសម្រស់ស្រស់ស្អាតដូចទេពធីតា ហើយប្រសិនបើលោកអ្នកបានឃើញនោះ ប្រាកដជាមើលមិនដឹងឡើយថា ពួកនាងសុទ្ធតែជានារីប្ដូរភេទ ឬភេទទី3 និងមិនត្រឹមតែពួកនាងមានកេរ្តិ៍ឈ្មោះល្បីនៅក្នុងសង្គមប៉ុណ្ណោះទេ ប៉ុន្ដែពួកនាងក៏បានបង្ហាញពីភាពជោគជ័យ និងឥទ្ធិពលនៃការកែសម្ផស្សទៀតផង។ ចង់ដឹងថា តើមានតារាដួងណាខ្លះនោះ សូមទស្សនារូបភាពខាងក្រោមនេះ៖
1.Tree chada Poyd (ទ្រី ឆាដា ផយ)
នាង Tree chada Poyd ជាតារាសម្ដែង និងតារាម៉ូដែល ដែលមានភាពលេចធ្លោល្បីល្បាញជាងគេ និងថែមទាំងជានារីគំរូនៃក្រុមនារីភេទទី3ទៀតផង។
2.JIratchaya Mo (ជីរ៉ាត់ឆាយ៉ា ម៉ូ)
នារីម៉ូដែលភេទទី3ដ៏ស្រស់ស្អាតរូបនេះ បានឈ្នះពានរង្វាន់បវរកញ្ញាឯក Tiffany’s និង Miss International Queen ដែលសុទ្ធសឹងតែជាការប្រឡងបវរកញ្ញាអន្តរជាតិល្បីៗសម្រាប់នារីប្តូរភេទ។ បន្ទាប់ពីទទួលបានពានរង្វាន់ នាងបានធ្វើឱ្យអ្នកគាំទ្រភ្ញាក់ផ្អើលនឹងសំឡេងច្រៀងរបស់នាង ដែលមានសំឡេងដូចមនុស្សស្រីបេះបិទ តាមរយៈកម្មវិធី I Can See Your Voice ។
3.Chananchida Blossom (ចាណាន់ជីដា ប្លូសសំ)
Chananchida គឺជាបេក្ខភាពប្រកួតប្រជែង Miss Tiffany’s Universe 2013 ហើយជាកីឡាការិនីរត់ប្រណាំងលើកដំបូងលំដាប់ថ្នាក់លេខ 1 ក្នុងកីឡារបស់ស្ត្រីប្ដូរភេទនៅក្នុងប្រទេសថៃផងដែរ។
4.Nathachat Hana (ណាត់ថាឆាត ហាណា)
Nathachat Hana គឺជានារីដ៏ស្រស់សោភាសម្បុរខ្មៅស្រអែមម្នាក់ ដែលមានទម្រង់មុខស្រួចពីកំណើត ព្រមទាំងមានដងខ្លួនស្រឡូន ហើយនាងជាតារាបង្ហាញម៉ូដអាជីពដ៏អស្ចារ្យ។ នាងទទួលបានអ្នកគាំទ្រជាច្រើនតាមរយៈការអញ្ចើញចូលរួមជាតារាកិត្តិយសនៅក្នុងកម្មវិធី “The Face Thailand Season 3” ។
5.Rinrada Yoshi (រីនរ៉ាដា យ៉ូឈិ)
Rinrada គឺជាតារាសម្តែង និងជាតារាបណ្ដាញទំនាក់ទំនងសង្គមល្បីឈ្មោះមួយរូបដែលមានទម្រង់មុខដូចតុក្កតា។ ហើយកន្លងមកនាងបានបង្ហាញខ្លួននៅក្នុងវីដេអូចម្រៀង និងខ្សែភាពយន្តជាច្រើន ដែលបច្ចុប្បន្ននេះ តម្លៃខ្លួនរបស់នាងខ្ពស់មិនចាញ់តារាជួរមុខប៉ុន្មានឡើយ។
6.Woranun Frame (វរ៉ាណាន់ ហ្វ្រេម)
នារីប្ដូរភេទរូបនេះ ជាតារា Net IDOL ដែលមានឈ្មោះល្បីម្នាក់ទៀត ហើយនាងត្រូវបានស្ថានីយទូរទស្សន៍ជាច្រើនអញ្ចើញនាងឱ្យផ្ដល់បទសម្ភាសជុំវិញ ភាពស្រស់ស្អាតនៃសម្រស់របស់នាង។ សព្វថ្ងៃនេះ នាងមានអាជីពជាតារាសម្ដែង បង្ហាញម៉ូដ និងជាពិធីការិនី។
7.Monthana Jeen (មន់ថាណា យីន)
Monthana Jeen ជាតារាបង្ហាញម៉ូដល្បីល្បាញ ហើយនាងធ្លាប់បានទៅចុះឈ្មោះចូលធ្វើបរិច្ចាគកិច្ចជាយោធាថៃ តែជាអកុសលនាងចាប់បានសន្លឹកឆ្នោតពណ៌ខ្មៅ (រួចខ្លួនពីការធ្វើបរិច្ចាគកិច្ចយោធា)។
8.Pemika Pynk (ភេមីកា ភិង)
Pemika Pynk ជានារីម៉ូដែលអាជីព និងជាអ្នកតំណាងមន្ទីរពេទ្យកែសម្ផស្សរបស់ប្រទេស កូរ៉េ ផងដែរ។
9.Patta Nadia (ផាត់ថា ណាឌៀ)
តារាមួយដួងនេះ មានឈ្មោះល្បីតាមរយៈការប្រកួតក្នុងកម្មវិធី Miss Mimosa Queen Thailand in 2015 ហើយសព្វថ្ងៃនេះ នាងជាតារាសម្ដែង តារាម៉ូដែល និងអ្នករបាំអាជីព។
10.Chalisa Rose (ឆាលីហ្សា រ៉ូហ្ស)
Chalisa គឺជានារីប្តូរភេទទីមួយរបស់ប្រទេសថៃ ដែលទទួលបានកិត្តិយសទៅសម្ដែងក្នុងខ្សែភាពយន្ដខ្នាតធំរបស់ប្រទេសចិន និងជាតួអង្គចម្បងទៀតផង។ បច្ចុប្បន្ននេះ នាងបានក្លាយជាតារាសម្ដែងរបស់ប្រទេសចិនពេញសិទ្ធិ និងភាគច្រើនអ្នកគាំទ្រឧស្សាហ៍បានឃើញនាងសម្ដែងក្នុងរឿងកំប្លែងទូរទស្សន៍នៅក្នុងប្រទេសចិន៕

October 11, 2017
រដ្ឋាភិបាលប្រកាសចំណាយ 40លានដុល្លារក្នុងមួយឆ្នាំ ដើម្បីបន្ថែមប្រាក់ខែឱ្យកម្មករ
ភ្នំពេញ៖ ដើម្បីលើកកម្ពស់ជីវភាពកម្មករ-កម្មការិនីក្នុងវិស័យវាយនភណ្ឌកាត់ដេរ និងផលិតស្បែកជើង រាជរដ្ឋាភិបាលបានសម្រេចចំណាយថវិកាជាតិក្នុងមួយឆ្នាំប្រមាណជា40លានដុល្លារ ដើម្បីបង្គ្រប់ប្រាក់ខែកម្មករឱ្យបានដល់ 170ដុល្លារចាប់ពីឆ្នាំ2018 ខាងមុខតទៅ។
ក្នុងពិធីផ្សព្វផ្សាយគោលនយោបាយជាតិស្តីពីការអប់រំ និងបណ្តុះបណ្តាលវិជ្ជាជីវៈឆ្នាំ2017-2025 នៅវិមានសន្តិភាព ប្រមុខរដ្ឋាភិបាលកម្ពុជាសម្តេចនាយករដ្ឋមន្ត្រី ហ៊ុន សែន សម្តែងការអបអរសាទរចំពោះការស្រុះស្រួលគ្នាលើការចរចាប្រាក់ឈ្នួលអប្បបរមាសម្រាប់កម្មករ-និយោជិតនៅឆ្នាំ2018 ដែលព្រមទទួលយកតួលេខ165ដុល្លារ និងការបន្ថែមពីលើដោយរាជរដ្ឋាភិបាល 5ដុល្លារទៀតស្មើ170ដុល្លារ។
ការបន្ថែម 5ដុល្លារពីលើប្រាក់ឈ្នួលរបស់កម្មករនៅឆ្នាំ2018នេះ ធ្វើឱ្យរាជរដ្ឋាភិបាលខាតបង់ជាង 40លានដុល្លារអាមេរិកតាមរយៈការអនុគ្រោះពន្ធកាត់ទុក ដោយពន្យាររហូតដល់ឆ្នាំ2022 និងការយកប្រាក់កម្រៃលើការនាំចេញ។
យោងតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងថវិកាឆ្នាំ2018 បានកំណត់ថា ប្រាក់បៀវត្សរ៍ចាប់ពី1លាន 2សែនរៀលឡើងទៅទើបជាប់ពន្ធ។ សម្តេចរំពឹងថា រដ្ឋសភានឹងគាំទ្រចំពោះច្បាប់ថវិកាជាតិថ្មីនេះ និងស្នើឱ្យពិចារណាធ្វើយ៉ាងណាកុំឱ្យមានគម្លាតគ្នាខ្លាំងលើប្រាក់ឧបត្ថម្ភពេលមរណភាព ទាំងមរណភាពធម្មតា និងក្នុងពេលបេសកកម្មរវាងមន្ត្រីរាជការស៊ីវិល និងកងកម្លាំងប្រដាប់អាវុធ។
សូមរំឭកថា ក្រៅពីប្រាក់ខែ170ដុល្លារនេះហើយ កម្មករ-កម្មការនីក៏នៅមានប្រាក់ខែឧបត្ថម្ភផ្សេងៗទៀត ក្នុងនោះមានដូចជា ៖
-ប្រាក់សោហ៊ុយធ្វើដំណើរ និងស្នាក់នៅចំនួន 7ដុល្លារអាមេរិកក្នុងមួយខែ។
-ប្រាក់រង្វាន់ធ្វើការទៀងទាត់ចំនួន10ដុល្លារក្នុងមួយខែ។
-ប្រាក់ថ្លៃបាយធ្វើការបន្ថែមម៉ោងដោយស្ម័គ្រចិត្តចំនួន 2,000រៀលក្នុងមួយថ្ងៃ ឬទទួលបានបាយដោយឥតគិតថ្លៃ។
-និងប្រាក់រង្វាន់អតីតភាពការងារចំនួន 2ដុល្លារដល់11ដុល្លារក្នុងមួយខែ សម្រាប់កម្មករ-និយោជិតដែលបានធ្វើការចាប់ពីឆ្នាំទី2 ដល់ឆ្នាំទី11 ។
ដូច្នេះ ជាមធ្យមនិយោជិតម្នាក់នឹងទទួលបានប្រាក់បៀវត្សរ៍យ៉ាងតិចពី 187ដុល្លារ ទៅដល់198 ដុល្លារក្នុងមួយខែ៕
October 11, 2017
Robben ប្រកាសចូលនិវត្តន៍ពីក្រុមជម្រើសជាតិហូឡង់
ការរំពឹងទុកពីការធ្លាក់ចេញពីយុទ្ធនាការរបស់ក្រុមបាល់ទាត់ជម្រើសជាតិហូឡង់ បានកើតឡើង បើទោះបីពួកគេបានផ្តួលក្រុមជម្រើសជាតិស៊ុយអែត ក្នុងលទ្ធផល 2-០ នាកីឡដ្ឋាន Amsterdam Arena កាលពីថ្ងៃអង្គារក៏ដោយ ខណៈដែលពួកគេត្រូវឈ្នះដោយការរកគ្រាប់បាល់បញ្ចូលទីបានដល់ទៅ7គ្រាប់ ទើបមានសិទ្ធិឈ្នះកៅអីទៅប្រកួតក្នុងវគ្គ Playoff។
ស្របពេលជាមួយគ្នានេះ Arjen Robben ដែលបានរកគ្រាប់បាល់បញ្ចូលទីទាំង2គ្រាប់នោះ បានប្រកាសពីការចូលនិវត្តន៍របស់គេពីកីឡាបាល់ទាត់អន្តរជាតិ ក្រោយពីបានចំណាយពេលលេងអស់រយៈពេល14ឆ្នាំរួចមក។ គ្រាប់បាល់បញ្ចូលទីទាំងពីរគ្រាប់របស់គេសុទ្ធសឹងបានកើតឡើងក្នុងតង់ទី1 ប៉ុន្តែ វានៅតែមិនគ្រប់គ្រាន់ក្នុងការរារាំងមិនឲ្យក្រុមជម្រើសជាតិស៊ុយអែត ឈានទៅកាន់វគ្គ Playoffបានឡើយ។ ក្រុមជម្រើសជាតិទាំងពីរបានបញ្ចប់ដោយមាន19ពិន្ទុដូចគ្នា ដោយឈរនៅពីក្រោយក្រុមជម្រើសជាតិបារាំង ក្នុងពូល A ប៉ុន្តែ ស៊ុយអែត បានបញ្ចប់ដោយស្ថិតក្នុងចំណាត់ថ្នាក់លេខ1 ដោយសារតែមានគ្រាប់បាល់ច្រើនជាង។ Robben វ័យ33ឆ្នាំបានស៊ុតបាល់បញ្ចូលទី37គ្រាប់ក្នុងការបង្ហាញខ្លួន96លើកសម្រាប់ក្រុមជម្រើសជាតិហូឡង់ និងបានជួយឲ្យពួកគេឈានទៅប្រកួតព្រឹត្តិការណ៍ World Cup វគ្គផ្តាច់ព្រ័ត្រឆ្នាំ2010 មុននឹងពួកគេបានរងបរាជ័យក្រោមស្នាដៃក្រុមជម្រើសជាតិអេស្ប៉ាញ ក្នុងលទ្ធផល 1-០ បន្ទាប់ពីនាទីបន្ថែម15នាទីពីរដង។
ក្រុមជម្រើសជាតិហូឡង់ ក៏ធ្លាប់បានឈានទៅដល់ការប្រកួតវគ្គ4ក្រុមចុងក្រោយនៃព្រឹត្តិការណ៍ World Cup ឆ្នាំ2014 ផងដែរ មុនពេលចាញ់ក្រុមជម្រើសជាតិអាហ្សង់ទីន ដោយបាល់ប៉េណាល់ទី។ Robben ដែលបានធ្វើការបង្ហាញខ្លួនជាអន្តរជាតិជាលើកទី1របស់គេនៅពេលប្រកួតជាមួយនឹងក្រុមជម្រើសជាតិព័រទុយហ្គាល់ កាលពីឆ្នាំ2003នោះ បានឲ្យដឹងថា៖ «រយៈពេល14ឆ្នាំ ពិតជាឆ្នាំដ៏អស្ចារ្យ និងប្រកបដោយផ្លែផ្កាមែន»៕
ប្រភពពី៖ The Guardian
October 11, 2017