សង្គម និងសេដ្ឋកិច្ច - La Reine Media

មូលហេតុដែលស្រីស្អាត ជីជី មិនព្រមយកប្ដី…

ពិតជាគួរឱ្យភ្ញាក់ផ្អើលបំផុតដែលពិធីការិនី និងជាតារាសម្ដែងស្រីរូបស្អាតកញ្ញា ពេជ្រ សូលីដា ហៅ ជីជី មិនដែលធ្លាប់បង្ហើបប្រាប់ពីទំនាក់ទំនងស្នេហារបស់នាងជាមួយបុរសណាម្នាក់ឡើយ បើទោះបីជាកន្លងមកធ្លាប់មានព័ត៌មានថា នាងតែងព្យាយាមលាក់បាំងរឿងរ៉ាវស្នេហាជាមួយបុរសសម្បុរស មុខដូចកូនចិនដែលជាអតីត Freshy Boy និងជាមិត្តរួមការងារទៀត និងមហាជនថែមទាំងឧស្សាហ៍ឃើញពួកគេទាំងពីរនាក់បណ្តើរគ្នាទៀតផងក៏ដោយនោះ ស្រាប់តែថ្មីៗនេះ នាងបានទម្លាយប្រាប់ពីមូលហេតុពិតដែលនាងមិនព្រមយកប្ដី។

ថ្មីៗនេះ តារាស្រីរូបនេះបានបញ្ចេញអារម្មណ៍ពិតតាមរយៈរូបភាពប្លែកៗជាច្រើនសន្លឹក និងវីដេអូប្រុសស្រឡាញ់ប្រុស នៅលើគណនី Facebook របស់នាងផ្ទាល់ ដែលធ្វើឱ្យអ្នកគាំទ្រនាងបានយល់ពីអារម្មណ៍ពិតរបស់នាងនៅក្នុងពេលនេះ តាមរយៈការបញ្ចេញសារខ្លីមួយឃ្លាថា «អាដែងនែ…កុំឆ្ងល់ថា ម៉េចបានជាមិនទាន់យកប្ដី» ។ ដើម្បីកាន់តែជាក់ច្បាស់សូមទស្សនារូបភាព និងវីដេអូខាងក្រោមនេះ៕

October 12, 2017

ស្វាមីអ្នកស្រី ហ៊ឹម ស៊ីវន ចង់ឲ្យអ្នកស្រីសម្រាកពីការងារសិល្បៈ

ខណៈកំពុងតែផ្ទុះនូវការរិះគន់ចំពោះអ្នកស្រី ហ៊ឹម ស៊ីវន ដែលមហាជនបានរិះគន់អ្នកស្រីថា ក្នុងនាមជាគណៈកម្មការ និងជាសិល្បការិនីជើងចាស់ មិនគួរណាពោលពាក្យសម្ដីធ្ងន់ៗ និងបំបាក់ទឹកចិត្តចំពោះបេក្ខនារី សុខ វិសាល មកពីខេត្តសៀមរាបដែលបានបកស្រាយបទចម្រៀង “រាត្រីសេកុង” នោះសោះ។ ភ្លាមៗនោះ អ្នកស្រីមិនបានចេញមុខបកស្រាយ ឬផ្ដល់បទសម្ភាសណាមួយឡើយ ពោលគឺមានតែតារាចម្រៀងស្រី អ្នកនាង ម៉េង កែវពេជ្ជតា ប៉ុណ្ណោះដែលបានចេញមុខបកស្រាយជំនួសទៅវិញ។

ស្ថានការណ៍ស្ងប់ស្ងាត់អស់មួយរយៈហើយ តែថ្មីៗនេះស្រាប់តែអ្នកស្រី ហ៊ឹម ស៊ីវន ទម្លាយរឿងដែលនឹកស្មានមិនដល់មួយ ប្រាប់ទៅកាន់មហាជនវិញតែម្ដង។ ប្រភពដែលសារព័ត៌មានឡារ៉ែនទទួលបាន គឺអ្នកស្រី ហ៊ឹម ស៊ីវន បានប្រាប់ឱ្យដឹងផងដែរថា ស្វាមីអ្នកស្រី ដែលជាមន្ត្រីរាជការកំពុងតែបម្រើការនៅក្នុងស្ថាប័នរបស់ក្រសួងមួយនោះ មិនចង់ឲ្យភរិយារបស់លោកប្រឡូកក្នុងវិស័យសិល្បៈនេះបន្ដទៀតទេ ព្រោះថា បើគិតពីជីវភាពគ្រួសាររបស់លោកវិញ គឺមិនពិបាកដល់ថ្នាក់ឱ្យប្រពន្ធចេញទៅច្រៀងរាំ ដើម្បីរកចំណូលមកផ្គត់ផ្គង់ជីវភាពគ្រួសារនោះទេ។ យ៉ាងណាមិញ អ្នកស្រីក៏បានបញ្ជាក់ប្រាប់ទៅមហាជនបន្ថែមទៀតដែរថា “ពោលគឺស្វាមីខ្ញុំចង់ឲ្យខ្ញុំឈប់សម្រាកពីការងារសិល្បៈតែម្ដង ប៉ុន្តែដោយសារទឹកចិត្តដែលស្រឡាញ់វិស័យសិល្បៈ ទើបខ្ញុំមិនចង់បោះបង់ចោល ហើយនៅតែបន្តដើរលើវិថីនេះទៀត”។

គួបញ្ជាក់ផងដែរថា ការលើកឡើងរបស់តារាជើងចាស់រូបនេះ ទំនងជាកើតឡើងពីចិត្តស្រឡាញ់វិស័យសិល្បៈខ្មែរ និងគ្រាន់តែមានគោលបំណងចង់ជួយបង្ហាត់បង្រៀន និងណែនាំដល់កូនចៅជំនាន់ក្រោយ ឱ្យចេះស្រឡាញ់ និងបន្ដថែរក្សាកេរដំណែលខ្មែរមួយនេះតែប៉ុណ្ណោះ ពុំមានចិត្តគិតពេបជ្រាយ ឬបញ្ឈឺចិត្តដល់បេក្ខជនណាម្នាក់ឡើយ៕

October 12, 2017

ចិននឹងបោះទុន $700លាន សង់មជ្ឈមណ្ឌលទេសចរណ៍នៅកម្ពុជា

ភ្នំពេញ៖ ក្រុមហ៊ុនចិនដ៍ដំមួយគ្រោងបោះទុនវិនិយោគរបស់ខ្លួនក្នុងទឹកប្រាក់ប្រមាណជា 700លានដុល្លារអាមេរិក ដើម្បីសាងសង់មជ្ឈមណ្ឌលទេសចរណ៍ និងវប្បធម៌ដ៏ធំមួយនៅក្នុងទឹកដីប្រាសាទអង្គរ ខេត្តសៀមរាបនៅដើមឆ្នាំ 2018 ខាងមុខ។

ក្នុងដំណើរទស្សនកិច្ចទៅកាន់ប្រទេសចិន កាលពីថ្ងៃទី11 ខែតុលា ម្សិលមិញនេះលោកឧបនាយករដ្ឋមន្ត្រី ហោ ណាំហុង បានអញ្ជើញទៅទស្សនាផ្ទាល់នៅក្រុមហ៊ុន USunhome ដែលស្ថិតនៅក្នុងខេត្តSichuan ប្រទេសចិន ដែលក្នុងដំណើរទស្សនកិច្ចនោះ ក្រុមហ៊ុនចិនបានស្នើសុំសាងសង់មជ្ឈមណ្ឌលទេសចរណ៍ និងវប្បធម៌ដ៍ធំមួយក្នុងខេត្តសៀមរាបនៃប្រទេសកម្ពុជា។

ឆ្លើយតបសំណើនេះ លោកឧបនាយករដ្ឋមន្ត្រី ហោ ណាំហុង បានស្នើទៅវិញឱ្យក្រុមហ៊ុនធ្វើការសាងសង់គម្រោងមជ្ឈមណ្ឌលនេះឱ្យបានឆាប់ ដើម្បីឱ្យអ្នកទេសចរចិន និងអ្នកទេសចរបរទេសផ្សេងៗទៀត មកទស្សនានៅកម្ពុជាឱ្យបានកាន់តែច្រើន។

ទំព័រហ្វេសប៊ុកផ្លូវការរបស់លោកឧបនាយករដ្ឋមន្ត្រី ហោ ណាំហុង បានឱ្យដឹងថា វិនិយោគិនចិននៅកម្ពុជាឈរលើលំដាប់លេខ1ក្នុងឆ្នាំ2016 មានទឹកប្រាក់វិនិយោគប្រមាណ11ពាន់លានដុល្លារលើវិស័យកសិកម្ម ឧស្សាហកម្ម ថាមពល សេវាកម្ម សំណង់ និងវិស័យផ្សេងៗទៀត ជាពិសេសក្នុងការកសាងផ្លូវថ្មីៗ និងស្ពានឆ្លងកាត់ទន្លេមេគង្គ ទន្លេសាប និងទន្លេបាសាក់ ព្រមទាំងវារីអគ្គិសនីជាច្រើនទៀតដែលនាំឱ្យតម្លៃអគ្គិសនីនៅកម្ពុជាកាន់តែចុះថោក។ ទន្ទឹមនឹងនេះ ចិនក៏បានផ្តល់ហិរញ្ញប្បទានឥតសំណង ឥណទាន សម្បទាន និងជំនួយផ្សេងៗដ៏ច្រើនសន្ធឹកសន្ធាប់ដល់កម្ពុជាផងដែរ។

គួររំឭកថា ក្នុងឆ្នាំ2016កន្លងទៅ កម្ពុជាបានទទួលអ្នកទេសចរចិនចំនួនជាង 80ម៉ឺននាក់ ហើយ សង្ឃឹមថា នឹងទាក់ទាញភ្ញៀវទេសចរចិនប្រមាណ 1លាននាក់ ក្នុងឆ្នាំ2017នេះ និងប្រមាណ 2លាននាក់នៅឆ្នាំ2020៕

October 12, 2017

ការព្យាករ៖ វិស័យឧស្សាហកម្មកាត់ដេរ ឆ្នាំ2017ធ្លាក់ចុះជាងឆ្នាំមុន

ភ្នំពេញ៖ ការព្យាករថ្មីមួយបានបង្ហាញថា កំណើនក្នុងវិស័យឧស្សាហកម្មមានការធ្លាក់ចុះជាងឆ្នាំមុនដោយសារការធ្លាក់ចុះនៃវិស័យកាត់ដេរ ដែលកើតចេញពីកត្តាផ្សេងៗមួយចំនួន ដូចជាកត្តាប្រាក់ឈ្នួល (ប្រាក់ខែកម្មករ) និងការបញ្ជាទិញរបស់វិនិយោគិនក្រៅប្រទេស ជាដើម។

របាយការណ៍របស់ក្រសួងសេដ្ឋកិច្ច និងហិរញ្ញវត្ថុ ប្រចាំឆមាសទី1 ឆ្នាំ2017នេះ បង្ហាញថា វិស័យឧស្សាហកម្មត្រូវបានព្យាករថា នឹងមានការថយចុះបន្តិចក្នុងអត្រា9.2% នៅឆ្នាំ2017 ដោយសារការធ្លាក់ចុះនៃកំណើនក្នុងវិស័យកាត់ដេរ ដែលទាមទារឱ្យមានការប៉ះប៉ូវឡើងវិញពីវិស័យឧស្សាហកម្មដែលមិនមែនកាត់ដេរ និងវិស័យសំណង់ជាដើម។

ការព្យាករនេះបង្ហាញថា វិស័យកាត់ដេររំពឹងថានឹងថយចុះមកនៅត្រឹម 5.8% ដែលស្តែងចេញតាមរយៈការធ្លាក់ចុះនៃការនាំចេញផលិតផលកាត់ដេរ និងការនាំចូលវត្ថុធាតុដើម ដែលរងនូវសម្ពាធមួយចំនួន ដូចជាការបន្តកើនឡើងនៃប្រាក់ឈ្នួលអប្បបរមា ការប្រកួតប្រជែងខ្លាំងជាងមុនពីប្រទេសមីយ៉ាន់ម៉ា(ភូមា) បង់ក្លាដែស និងវៀតណាម និងភាពស្ទាក់ស្ទើរនៃការបញ្ជាទិញផលិតផលកាត់ដេររបស់អ្នកវិនិយោគក្រៅប្រទេសមួយចំនួនដែលត្រូវប្រើរយៈពេលផលិតខ្លី ដោយសារការបារម្ភរបស់អ្នកបញ្ជាទិញ និងភាពមិនប្រាកដប្រជានៃការបញ្ជូនទំនិញទាន់ពេលវេលា។

ចំណែកវិស័យសំណង់វិញ ទោះជាមានការលើកឡើងពីកំណើនរឹងមាំមែន ប៉ុន្តែធាតុពិតបានធ្លាក់ចុះមកនៅត្រឹម14.4% ដោយសារឥរិយាបថរង់ចាំមើលរបស់វិនិយោគិនចំពោះព្រឹត្តិការណ៍បោះឆ្នោតដែលខិតជិតមកដល់ និងវិធានការរឹតត្បិតរបស់ធនាគារជាតិនៃកម្ពុជា។ ជាមួយគ្នានេះការថមថយនៃវិស័យឧស្សាហកម្មជារួមក៏បានបំពេញវិញខ្លះដែរដោយកំណើនខ្ពស់នៃវិស័យឧស្សាហកម្មមិនមែនកាត់ដេរ គ្រឿងផ្គុំអេឡិចត្រូនិក គ្រឿងបន្លាស់ ចំណីអាហារ និងភេសជ្ជៈ កង់ និងគ្រឿងសង្ហារិមក្នុងអត្រាប្រមាណ 12.5% ដែលត្រូវបានឆ្លុះបញ្ចាំងតាមរយៈកំណើនតម្លៃផលិតកម្ម និងការនាំចេញ។

ទោះជាវិស័យឧស្សាហកម្មធ្លាក់ចុះមែន ប៉ុន្តែបើក្រឡេកមើលពីវិស័យសេវាកម្មវិញ ត្រូវបានព្យាករថា នឹងមានកំណើនល្អប្រសើរជាងឆ្នាំ2016 ដោយនឹងអាចសម្រេចបានក្នុងរង្វង់ 7.23% ក្នុងឆ្នាំ2017នេះ ដោយសារភាពរឹងមាំនៃវិស័យទេសចរណ៍ និងវិស័យលក់ដុំ និងលក់រាយ ទោះបីជាវិស័យដឹកជញ្ជូន និងគមនាគមន៍ និងវិស័យអចលនទ្រព្យមានការធ្លាក់ចុះបន្តិចក៏ដោយ៕

October 12, 2017

ឆាប់ៗខាងមុខនេះ ប្រជាជនកម្ពុជានឹងអាចធ្វើដំណើរតាមរថភ្លើងទៅដល់ប្រទេសចិន

ភ្នំពេញ – ដើម្បីតភ្ជាប់ប្រព័ន្ធផ្លូវដែកកម្ពុជាទៅកាន់បណ្ដាប្រទេសក្នុងតំបន់អាស៊ាន កម្ពុជាគ្រោងនឹងសាងសង់ផ្លូវដែកថ្មីពីស្ថានីយបាត់ដឹង ខេត្តកំពង់ស្ពី ដើម្បីតភ្ជាប់ទៅប្រទេសវៀតណាម និងឆ្ពោះទៅប្រទេសចិន ដែលផ្លូវដែកនេះនឹងធ្វើការអភិវឌ្ឍទៅតាមលក្ខណៈស្ដង់ដារ។

បើយោងតាមលោក ចាន់ សំនៀង ប្រធាននាយកដ្ឋានផ្លូវដែកកម្ពុជា បានលើកឡើងថា មិនយូរប៉ុន្មានទៀតទេ រាជរដ្ឋាភិបាលកម្ពុជាមានគម្រោងកសាងផ្លូវដែកថ្មីពីស្ថានីយបាត់ដឹង ឆ្ពោះទៅប្រទេសវៀតណាមដែលមានចម្ងាយផ្លូវ 257គីឡូម៉ែត្រដែលត្រូវចំណាយថវិកាច្រើន ដើម្បីសាងសង់ឱ្យត្រឹមត្រូវតាមស្ដង់ដារ។

គម្រោងនេះបង្កើតឡើងក្នុងគោលបំណងតភ្ជាប់កម្ពុជាទៅនឹងបណ្ដាប្រទេសក្នុងតំបន់អាស៊ានទាំងអស់ ឆ្ពោះទៅកាន់ខេត្ដឃុននីង នៃប្រទេសចិន។ គម្រោងនេះនឹងធ្វើទៅតាមស្ដង់ដារទំហំហ្គេដដែលមានទទឹង1,435 មីល្លីម៉ែត្រ ដែលបណ្ដាប្រទេសក្នុងតំបន់អាស៊ានកំពុងតែអនុវត្ដទៅតាមស្ដង់ដារនេះទាំងអស់ ខណៈប្រទេសកម្ពុជា និងប្រទេសមួយចំនួនក្នុងតំបន់អាស៊ានកំពុងតែបន្ដប្រើប្រាស់ទំហំផ្លូវក្នុងខ្នាត1,000មីល្លីម៉ែត្រ។

លោកបន្ដថា ជាមួយគ្នានេះកម្ពុជាក៏កំពុងតែស្ដារប្រព័ន្ធផ្លូវដែកកម្ពុជាតភ្ជាប់ទៅប្រទេសថៃដោយជួសជុលផ្លូវដែកពីប៉ោយប៉ែតទៅមង្គលបុរី និងជួសជុលផ្លូវដែកពីមង្គលបុរីទៅបាត់ដំបង ដែលគ្រោងនឹងបញ្ចប់ក្នុងឆ្នាំនេះ។ ជាមួយគ្នានេះ ការជួសជុលផ្លូវដែកពីខេត្ដពោធិ៍សាត់ទៅបាត់ដំបងក៏គ្រោងនឹងបញ្ចប់នៅខែមេសា ឆ្នាំ2018ខាងមុខនេះផងដែរ។ ក្នុងករណីមានថវិកាគ្រប់គ្រាន់កម្ពុជាក៏នឹងអាចបញ្ចប់ការជួសជុសផ្លូវដែកពីពោធិ៍សាត់មកស្ថានីយបាត់ដឹង ដើម្បីជួយសម្រួលការធ្វើដំណើរ និងដឹកទំនិញតាមផ្លូវដែកពីប្រទេសកម្ពុជាទៅប្រទេសថៃឱ្យកាន់តែមានភាពងាយស្រួលឡើង៕

October 12, 2017

ស្រីស្អាត 2 នាក់ ក្រោយបែកពីក្រុម Girls’ Generation ភ្លាម តម្លៃខ្លួនឡើងភ្លែតតែម្ដង!

ដោយយោងតាមសារព័ត៌មាន Sports Donga នៅថ្ងៃព្រហស្បតិ៍ ទី12 ខែតុលា ឆ្នាំ2017នេះ បានចេញផ្សាយឱ្យដឹងថា តារាស្រី 2 ដួងកំពុងតែក្លាយជាប្រធានបទក្ដៅនៅក្នុងពិភពសិល្បៈកូរ៉េ KPOP គឺនាង Sooyoung និងនាង Seohyunបន្ទាប់ពីបានចាកចេញពីក្រុមចម្រៀង Girls’ Generation មិនទាន់បានប៉ុន្មានថ្ងៃផង តម្លៃខ្លួនរបស់ស្រីស្អាតទាំងពីរស្រាប់តែឡើងខ្ពស់ទ្វេដងភ្លាមៗតែម្ដង ហើយបានក្លាយជាតារាលំដាប់កំពូលទៀតផង។

មូលហេតុដែលតារាស្រី 2 ដួងនេះឡើងកូដភ្លាមៗបែបនេះ សារព័ត៌មានខាងលើបានអះអាងយ៉ាងដូច្នេះថា Sooyoung និង Seohyun កំពុងត្រូវបានក្រុមហ៊ុនផលិតកម្ម និងក្រុមហ៊ុនផលិតផលប្រ៊េនដ៍ៗធំៗជាច្រើនប្រកួតប្រជែងដេញថ្លៃលើតម្លៃខ្លួនរបស់ពួកនាង ក្នុងគោលបំណងចង់ឱ្យពួកនាងចុះកិច្ចសន្យា និងធ្វើការជាមួយក្រុមហ៊ុនរបស់ខ្លួន។ តែទោះជាយ៉ាងណា ក៏ស្រីស្អាតទាំង 2 នៅតែមិនទាន់ហ៊ានសម្រេចចិត្តថា តើគួរចុះកុងត្រាជាមួយក្រុមហ៊ុនណានៅឡើយទេ បើទោះបីជាក្រុមហ៊ុននោះជាក្រុមហ៊ុនប្រ៊េនដ៍ធំ ល្បីខ្លាំង និងហ៊ានចាយប្រាក់ច្រើនប៉ុនណាក៏ដោយ៕

October 12, 2017

តើគួរទិញអចលនទ្រព្យមុនពេលបោះឆ្នោត ឬត្រូវរង់ចាំក្រោយបោះឆ្នោត?

ជាទូទៅនៅពេលការបោះឆ្នោតជិតចូលមកដល់ម្តងៗគេសង្កេតឃើញថា សកម្មភាពក្នុងវិស័យអចលនទ្រព្យតែងមានការប្រែប្រួលដោយចៀសមិនផុតនោះឡើយ។ នៅឆ្នាំ2018 ខាងមុខកម្ពុជានឹងរៀបចំការបោះឆ្នោតជាតិម្តងទៀត។ តើវិស័យអចលនទ្រព្យនៅកម្ពុជាអាចនឹងមានការប្រែប្រួលបែបណា?

លោកស្រី តាំង ហួរ អគ្គនាយិកាក្រុមហ៊ុន អមតៈប្រផឹធី សឺវីស បានប្រាប់ថា នៅពេលការបោះឆ្នោតជិតចូលមកដល់ មិនថាប្រទេសណានោះទេគឺតម្លៃអចលនទ្រព្យអាចនឹងស្ថិតនៅទ្រឹងមួយរយៈដោយសារតែគ្រប់គ្នាសុទ្ធតែរង់ចាំមើលការបោះឆ្នោតរួចរាល់។ បន្ទាប់ពីការបោះឆ្នោតរួចរាល់ សកម្មភាពទិញ លក់ នឹងមានភាពមមាញឹកឡើងវិញ។

ករណីនេះលោកស្រី តាំង ហួរ បានអះអាងថា បើក្រឡេកមើលទីផ្សារអចលនទ្រព្យនៅកម្ពុជាបច្ចុប្បន្នបើទោះបីជាការបោះឆ្នោតជិតឈានចូលមកដល់ក៏ដោយ ប៉ុន្តែសកម្មភាពទិញ លក់ ដីធ្លី និងអចលនទ្រព្យនានានៅមានភាពផុលផុសនៅឡើយគ្រាន់តែថាហាក់ថយចុះជាងមុនបន្តិច។ ចំណែកការប្រកួតប្រជែងគឺមានយុទ្ធសាស្ត្ររៀងៗខ្លួនដោយក្រុមហ៊ុនខ្លះលក់ក្នុងតម្លៃសមរម្យ ហើយក្រុមហ៊ុនខ្លះលក់ក្នុងតម្លៃខ្ពស់ ដើម្បីចាប់យកអតិថិជនលំដាប់ផ្សេងៗគ្នា។

ទោះបីជាយ៉ាងណា លោកស្រីអគ្គនាយិកាក្រុមហ៊ុន អមតៈ ប្រផឹធី សឺវីស បានបញ្ជាក់ថា៖“សម្រាប់ក្រុមហ៊ុនដែលលក់ក្នុងតម្លៃសមរម្យនឹងមានការគាំទ្រច្រើនជាងក្រុមហ៊ុនលក់ក្នុងតម្លៃខ្ពស់។

កន្លងមកនៅពេលការបោះឆ្នោតជិតចូលមកដល់ប្រជាជនខ្មែរតែងមានការយល់ឃើញផ្សេងៗគ្នា ដោយអ្នកខ្លះមិនហ៊ានទិញដីធ្លី ឬផ្ទះនោះទេ ព្រោះខ្លាចមានបញ្ហាអស្ថិរភាពសង្គម ប៉ុន្តែអ្នកខ្លះទៀតបែរជាគិតថាជាឱកាសទៅវិញ ដោយសារតម្លៃអចលនទ្រព្យមិនសូវឡើងខ្លាំង។

លោក សន សៀប អគ្គនាយកក្រុមហ៊ុន ឃីរៀលអុីស្ទេត បាននិយាយថា នៅពេលការបោះឆ្នោតឆ្នាំ2018 កាន់តែខិតជិតមកដល់ គេសង្កេតឃើញថាសកម្មភាពនៃការទិញលក់ ដីធ្លី អគារ ផ្ទះល្វែង នៅកណ្តាលក្រុងហាក់មានសភាពស្ងាត់ជាងមុនបន្តិច ដោយសារពួកគេរង់ចាំមើលសភាពការណ៍ក្រោយពេលបោះឆ្នោត។

លោកបាននិយាយថា៖ “បច្ចុប្បន្នអ្នកមានលុយគេមានទឹកមាត់ក្នុងការចរចា បើគេចង់ទិញលុះត្រាតែមានការទម្លាក់តម្លៃចន្លោះពី 20%ទៅ30% បើមិនដូច្នេះគេមិនទិញទេ ដោយគេរង់ចាំឱកាសចូលមកដល់។

អគ្គនាយកក្រុមហ៊ុន ឃី រៀលអុីស្ទេត បានបន្តថា កត្តាដែលធ្វើឱ្យវិស័យអចលនទ្រព្យនៅកណ្តាលក្រុងនាពេលនេះហាក់មានភាពស្ងាត់ជាងមុននេះគឺដោយសារកត្តាអាកាសធាតុមានភ្លៀងធ្លាក់ច្រើននិងរដូវកាលបោះឆ្នោតជិតចូលមកដល់។ តែយ៉ាងណាសកម្មភាពទិញលក់អចលនទ្រព្យនៅតំបន់ជាយក្រុងនៅមានភាពប្រសើរដដែល ពិសេសភាគខាងលិចឆៀងខាងជើងនៃរាជធានីនៅត្រង់ចំណុចផ្សារទំនើប Aeon ទី2 និងភាគខាងលិចឆៀងខាងត្បូងក៏មានសកម្មភាពស្ទុះឡើងគួរសមដែរ ខណៈរដ្ឋាភិបាលត្រៀមសាងសង់ផ្លូវក្រវាត់ក្រុងទី3 ចេញពីផ្លូវទំនប់កប់ស្រូវ កាត់តាមខេត្តកណ្តាល ឆ្ពោះទៅកំពង់ផែនៅផ្លូវជាតិលេខ1 ក្នុងស្រុកកៀនស្វាយ។

លោក សន សៀប បានលើកឡើងពីបទពិសោធន៍កន្លងមកថា នៅរដូវកាលបោះឆ្នោតឆ្នាំ2003 វិស័យអចលនទ្រព្យមានភាពល្អប្រសើរឡើងបន្តិចម្តងៗទាំងមុន និងក្រោយពេលបោះឆ្នោត រហូត

ដល់ឆ្នាំ2008 វិស័យនេះបានធ្លាក់ចុះមួយរយៈដោយសារវិបត្តិសេដ្ឋកិច្ចពិភពលោក។ បន្ទាប់ពីស្ទុះងើបឡើងវិញបានមួយរយៈ នៅឆ្នាំ2013 ស្ថានភាពវិស័យអចលនទ្រព្យបានស្ងប់ស្ងាត់សាជាថ្មីម្តងទៀត ដោយសារឥទ្ធិពលនយោបាយ។ ក្រោយពេលស្ថានភាពនយោបាយមានភាពល្អប្រសើរ វិស័យអចលនទ្រព្យក៏ចាប់ផ្តើមមានដំណើរការល្អរហូតដល់ពេលនេះ។

យ៉ាងណាក៏ដោយ លោកអគ្គនាយកក្រុមហ៊ុន ឃី រៀលអុីស្ទេត បានអះអាងថា ដោយសារកម្ពុជាមានភាពចាស់ទុំផ្នែកនយោបាយនោះ គេរំពឹងថាសកម្មភាពអចលនទ្រព្យនឹងមានភាពប្រសើរឡើងវិញនៅក្រោយបោះឆ្នោតឆ្នាំ2018។

សូមជម្រាបថា ទោះជាវិស័យអចលនទ្រព្យនាពេលនេះហាក់មានភាពស្ងប់ស្ងាត់ជាងមុនបន្តិច ប៉ុន្តែសកម្មភាពសាងសង់ផ្សេងៗនៅតែរីកចម្រើនទៅមុខគួរឱ្យកត់សម្គាល់៕

October 12, 2017

គន្លឹះ 9យ៉ាងដើម្បីសុខភាពល្អ

បញ្ហាសុខភាពគឺជារឿងមួយដែលមនុស្សយើងគិតគូរខ្លាំងណាស់នាពេលបច្ចុប្បន្ននេះ អាចសង្កេតឃើញបានតាមរយ:ពេលធ្វើបុណ្យសុំពរ ឬជូនពរគ្នាទៅវិញទៅមកជាដើម ពាក្យថា “សូមឱ្យមានសុខភាពរឹងមាំ” តែងបានឮជាប់ជានិច្ច។ កន្លងមកនេះ ទស្សនាវដ្តីសុខភាព H to H Magazine នៅក្នុងសហរដ្ឋអាមេរិក បានសរសេអត្ថបទសុខភាពមួយដែលមានចំណងជើងថា “គន្លឹះ9យ៉ាង ដើម្បីសុខភាពល្អ” ដែល ឡារ៉ែន សូមនាំមកជម្រាបប្រិយមិត្តអ្នកអានជាបន្ត ដើម្បីសាកល្បងអនុវត្តតាម ព្រោះមិនមែនជារឿងពិបាកឡើយ។

1/ ផ្លែប៉ោម

មួយថ្ងៃមួយផ្លែពាក្យស្លោកដែលថា «An apple a day, keeps doctor away» គឺជារឿងត្រឹមត្រូវជានិច្ច។តាមរយ:ការសិក្សាស្រាវជ្រាវរបស់មហាវិទ្យា-ល័យ ឡុនដុន បានរកឃើញថា ការទទួលទានផ្លែប៉ោមមួយថ្ងៃមួយផ្លែ នឹងធ្វើឱ្យការធ្វើការងាររបស់សួតកាន់តែល្អប្រសើរឡើង។ ដោយសារ អ៊ែនទីអុកស៊ីឌែនត៍ និងសារធាតុនៅក្នុងផ្លែប៉ោមដែលហៅថា Quercetin នឹងជួយធ្វើឱ្យសួតរឹងប៉ឹង និងធ្វើការបានយ៉ាងត្រឹមត្រូវ។

2/ ដកដង្ហើមវែងៗយើងគួរដកដង្ហើមឱ្យបានវែងៗ

ដើម្បីពង្រីកការធ្វើការងាររបស់សួត និងធ្វើឱ្យរាងកាយបានទទួលអុកស៊ីហ្ស៊ែនយ៉ាងគ្រប់គ្រាន់ផង តែរៀងរាល់ថ្ងៃនេះយើងច្រើនតែដកដង្ហើមខ្លីៗ ដោយសារតែធ្វើការនៅក្នុងកន្លែងតូចហប់ ឬព្រោះតែមិនបានដឹងក៏មានដែរ ដូច្នេះហើយក្នុងមួយថ្ងៃៗចូរសាកល្បងដកដង្ហើមវែងៗឱ្យបានយ៉ាងតិចណាស់ក្នុងមួយថ្ងៃ10ដង ដោយត្រូវដកដង្ហើមចូលឱ្យពោះឡើងប៉ោង និងដកដង្ហើមចេញវិញឱ្យពោះឡើងផតទើបត្រឹមត្រូវតាមវិធី។

3/ ចៀសវាងយកបន្លែទៅដាក់ចម្អិនក្នុងឆ្នាំងម៉ៃក្រូវេវតាមរយ

ការស្រាវជ្រាវវិភាគរបស់ប្រទេសអេស្បាញបានរកឃើញថា ការចម្អិនបន្លែឱ្យឆ្អិននៅក្នុងឆ្នាំងម៉ៃក្រូវេវនឹងធ្វើឱ្យសារជាតិអាហារបាត់អស់ដល់ទៅ97% ដូច្នេះហើយអ្នកគួរជ្រើសរើសទទួលទានបន្លែស្រស់ទើបប្រសើរជាង។

4/ កម្រើកខ្លួនជានិច្ច

អ្នកដែលកម្រើខ្លួន ឬធ្វើចលនាជាប់ជានិច្ចនឹងមានប្រព័ន្ធរំលាយអាហារល្អជាងអ្នកដែលគិតតែអង្គុយតែមួយកន្លែង។ វិធីនេះជួយការពារអាការចុកឆ្អល់ពោះ រួមទាំងរោគពុកឆ្អឹងទៀតផង។

5/ ប្រយោជន៍របស់ទឹកដូង

ទឹកដូងគឺជាទឹកផ្លែឈើដែលល្អបំផុតមួយប្រភេទ មានផ្ទុកសារធាតុរ៉ែដែលរាងកាយត្រូវការគ្រប់ទាំងអស់ដូចជា ប៉ូតាស្យូម ជាតិដែក សូដ្យូម កាល់ស្យូម ផូស្វ័រ អាស៊ីតអ:មីណូ និងវីតាមីន B ហើយថែមទាំងមានជាតិស្ករគ្លូខូសដែលរាងកាយអាចបឺតយកទៅប្រើជាថាមពលបានភ្លាមតែម្តង មានសារធាតុខ្លាញ់ដែលមានប្រយោជន៍ដល់រាងកាយ និងមានប្រយោជន៍ក្នុងការបណ្តេញសារជាតិពុលចេញពីរាងកាយទៀតផង។

6/ ពេលគ្រុនក្តៅខ្លួន មិនគួរទទួលទានផ្លែត្របែកទេ

នៅក្នុងផ្លែត្របែកមានរ៉ែប៉ូតាស្យូមខ្ពស់។ នៅពេលគ្រុន រាងកាយនឹងមានសីតុណ្ហភាពឡើងខ្ពស់ ការទទួលទានអាហារដែលមានប៉ូតាស្យូមខ្ពស់ អាចនឹងហុចផលឱ្យកើតអាការប្រកាច់បាន។

7/ ទទួលទានក្រូចជួយកែអាការធុញទ្រាន់ នឿយណាយបាន

ការទទួលទានផ្លែក្រូចដោយបកសម្បកខ្លួនឯង នឹងបានធុំក្លិនក្រូចដែលនឹងជួយឱ្យមានអា-រម្មណ៍ធូរស្រាល ហើយវីតាមីន C ដែលរាងកាយបានទទួលពីផ្លែក្រូចក្នុងបរិមាណដែលគ្រប់គ្រាន់ នឹងជួយជម្រុញឱ្យខួរក្បាលបញ្ចេញអ័រម៉ូនដែលធ្វើឱ្យបាត់ភាពធុញថប់តឹងតែងក្នុងចិត្តបានល្អទៀតផង។

8/ ទទួលទានអាហារពេលព្រឹកជួយការពាររោគភ្លេចភ្លាំង

អាហារពេលព្រឹកជួយប្រឆាំងការបង្កកខ្លួនរបស់ឈាម ព្រោះឈាមនៅពេលព្រឹកនឹងងាយបង្កកខ្លួនជាងពេលប្រក្រតី ដូច្នេះគួរទទួលទានអាហារពេលព្រឹកឱ្យបានទៀងទាត់ ដើម្បីឱ្យខួរក្បាលទទួលបានឈាមហូរទៅចិញ្ចឹមយ៉ាងគ្រប់គ្រាន់ នោះខួរក្បាលនឹងបានភ្លឺថ្លាមានការចងចាំល្អប្រសើរឡើង។

9/ សូកូឡាខ្មៅប្រឆាំងអនុមូលឥស្សរ

តើមិត្តអ្នកអានដឹងទេថា សូកូឡាប្រភេទផ្សេងៗនោះស្ទើរតែគ្មានចំណែកផ្សំរបស់កូកូឡើយ មានតែសូកូឡាខ្មៅមួយប៉ុណ្ណោះដែលជាសូកូឡាសុទ្ធពិត និងថែមទាំងមានប្រយោជន៍ដល់រាងកាយទៀតផង ព្រោះមានសារធាតុ Flavonoid ដែលជួយបង្កើនប្រព័ន្ធឈាមរត់បានល្អឡើង។ គួរទទួលទានសូកូឡាខ្មៅក្នុងមួយថ្ងៃប្រមាណកន្លះ អនស៍ (Ounce = 0.0296លីត្រ)៕

October 12, 2017

លោក Mourinho ត្រៀមចុះកុងត្រាថ្មីជាមួយ Man Utd ក្នុងចំណូល 65លានផោន

ក្លិបបិសាចក្រហម Manchester United ពិតជាចង់ចងជើងរបស់លោក Jose Mourinho ឲ្យជាប់តាមរយៈការផ្តល់កុងត្រាថ្មីរយៈពេល 5ឆ្នាំដែលផ្តល់ចំណូលជាទឹកប្រាក់ 65លានផោន (ស្មើនឹង 86លានដុល្លារអាមេរិក)។

គ្រូបង្វឹករបស់ក្រុមបិសាចក្រហមរូបនេះ ត្រៀមលក្ខខណៈរួចរាល់ហើយក្នុងការបន្តកុងត្រាថ្មី ដើម្បីធ្វើឲ្យពេលវេលារបស់លោកនៅឯកីឡដ្ឋាន Old Trafford ក្លាយជាពេលវេលាដ៏យូរអង្វែងបំផុតក្នុងអាជីពរបស់លោក។ លោក Mourinho វ័យជាងសែសិបឆ្នាំ គឺ ជាអ្នកចាត់ការទូទៅដែលមានចំណូលខ្ពស់ជាងគេបំផុតក្នុងពិភពកីឡាបាល់ទាត់ រួមជាមួយនឹងលោក Pep Guardiola ដែលជាអ្នកចាត់ការទូទៅរបស់ក្លិប Man City ខណៈដែលគ្រូបង្វឹកទាំងពីរសុទ្ធសឹងទទួលបានចំណូល25ម៉ឺនផោន ក្នុងមួយសប្តាហ៍ដូចគ្នា។

ប្រាក់បៀវត្សរ៍ជាមូលដ្ឋាននេះ នឹងរក្សានៅដដែល ប៉ុន្តែកញ្ចប់ថវិកាលើកទឹកចិត្តរបស់គ្រូបង្វឹកសញ្ជាតិព័រទុយហ្គាល់រូបនេះ សម្រាប់ការឈ្នះពាននានា និងពានរង្វាន់ធំៗ នឹងស្ថិតក្នុងចំនួនមួយដ៏ខ្ពស់។ សេចក្តីលម្អិតចុងក្រោយនៅតែត្រូវរង់ចាំការយល់ព្រម ខណៈដែលលោក Mourinho បានចុះហត្ថលេខារយៈពេល3ឆ្នាំកាលពីរដូវក្តៅ ឆ្នាំ២០១។ បើទោះបីក្រុមប្រឹក្សារបស់ក្លិប Man United មានការជឿជាក់ថា ពួកគេមានមនុស្សដ៏ឆ្នើមម្នាក់ក៏ដោយ ប៉ុន្តែភាគីទាំងពីរពិតជារីករាយជាមួយនឹងរយៈពេលនៃកិច្ចសន្យានោះ ដោយរង់ចាំមើលកម្រិតនៃការវិវឌ្ឍឆ្ពោះទៅមុខសិន។ ប៉ុន្តែ ប្រធានក្លិប Man United ពិតជាចាប់អារម្មណ៍ទៅលើរបៀបដែលលោក Mourinho បានផ្លាស់ប្តូរក្លិបនេះក្នុងរយៈពេលតិចជាង1ឆ្នាំកន្លះកន្លងមកនេះ។

កាលពីរដូវកាលមុន រូបគាត់បានផ្សារភ្ជាប់ទំនាក់ទំនងដ៏ធំមួយជាមួយនឹងអ្នកគាំទ្ររបស់ Man United។ គ្រូបង្វឹករូបនេះ ក៏បានឈ្នះពានធំពីរក្នុងរដូវកាលទី1របស់លោកផងដែរ ពោលគឺពាន EFL Cup និងពានក្របខ័ណ្ឌ Europa League៕

ប្រភពពី៖ The Sun

October 12, 2017

យុវតីកម្ពុជានឹងកាន់តែខ្លាំង តាមរយៈការរៀនដោយផ្ទាល់ពីអ្នកជំនាញសំខាន់ៗ

ដោយសារតែចរន្តនៃបច្ចេកវិទ្យាព័ត៌មានវិទ្យា និងការអប់រំមានការអភិវឌ្ឍ ស្ត្រីកម្ពុជាដែលធ្លាប់ស្ថិតក្នុងគំនាបប្រពៃណី និងទំនៀមទម្លាប់យ៉ាងតឹងតែង បានអភិវឌ្ឍយ៉ាងលឿនជាមួយនឹងការយកចិត្តទុកដាក់ពីគ្រប់ភាគីក្នុងសង្គម។

ថ្មីៗនេះ អង្គការ Plan international Cambodia បានបង្កើតកម្មវីធីមួយឈ្មោះថា «ខ្ញុំដើម្បីខ្ញុំ» ដើម្បីជំរុញឱ្យក្មេងសម្រេចក្តីស្រមៃរបស់ខ្លួននៅថ្ងៃអនាគតក្នុងការចូលរួមចំណែកក្នុងវិស័យសំខាន់ៗរបស់សង្គម។ កម្មវិធីនេះបានប្រមូលក្មេងស្រីយ៉ាងតិច 20នាក់មកពីតំបន់ដាច់ស្រយាលនៃប្រទេសកម្ពុជាឱ្យបានជួបជាមួយនឹងរដ្ឋមន្ត្រី ព្រឹទ្ធបុរសនៃសាកលវិទ្យាល័យ ប្រធានគ្រប់គ្រងក្រុមហ៊ុនឯកជន និងនាយកអង្គការមិនមែនរដ្ឋភិបាល ដើម្បីផ្តល់ឱកាសដល់ពួកគេបានស្គាល់ពីតួនាទី និងត្រៀមខ្លួនសម្រួចគោលដៅរបស់ខ្លួនឆ្ពោះទៅកាន់តំណែងសំខាន់ៗទាំងអស់នោះ។

លោក Jan Japp Kleinrensink នាយកប្រចាំប្រទេសនៃអង្គការ Plan international Cambodia បានថ្លែងថា ក្មេងស្រីនៅតែប្រឈមនឹងការរារាំងនៅក្នុងជីវិតរបស់ពួកគេសម្រាប់ការអភិវឌ្ឍ និងការសម្រេចជោគជ័យ ដើម្បីទទួលបានក្តីស្រមៃរបស់ខ្លួន។ ក្មេងស្រីនៅតែមានអំណាចតិចតួចក្នុងការសម្រេចចិត្ត ឬបង្កើតជម្រើសសម្រាប់ខ្លួនឯង។

លោកបញ្ជាក់ថា កម្មវិធី «ខ្ញុំដើម្បីខ្ញុំ» គឺផ្តោតសំខាន់ទៅលើអំណាច និងសក្តានុពលរបស់ក្មេងស្រី។ នៅពេលក្មេងស្រីមានឱកាស និងជម្រើសក្នុងជីវិត ពួកគេអាចប្រែក្លាយជីវិតរស់នៅ និងសហគមន៍របស់ពួកគេបាន។

កាលពីឆ្នាំមុន អង្គការភ្លែនអន្តរជាតិកម្ពុជា បានចាប់ផ្តើមកម្មវិធី «ខ្ញុំដើម្បីខ្ញុំ» ដែលបានអនុវត្តនៅតែក្នុង សហគមន៍ប៉ុណ្ណោះ ដោយបានជ្រើសរើសក្មេងស្រី 6នាក់ មកពីតំបន់ដាច់ស្រយាលនៃខេត្តចំនួន3គឺ ខេត្តសៀមរាប ត្បូងឃ្មុំ និងខេត្តរតនគិរី។

ទន្ទឹមនឹងកម្មវិធីនេះ នៅកម្ពុជាក៏មានអង្គការមួយចំនួនទៀតផងដែរដែលផ្តល់ឱកាសឱ្យក្មេងស្រីជួបជាមួយនឹងអ្នកជំនាញមកពីវិស័យសំខាន់ៗនៅលើពិភពលោក។

លោក Mario Ferro នាយកប្រតិបត្តិនៃអង្គការ Wedu ដែលមានបេសកកម្មពង្រឹងភាពជាអ្នកដឹកនាំដល់ស្ត្រីនៅអាស៊ីតាមរយៈកម្មវិធីប្រឹក្សាយោបល់ពីអ្នកជំនាញនៅក្នុងបណ្តាប្រទេសទាំងឡាយនៅអឺរ៉ុប និងនៅសហរដ្ឋអាមេរិក និងជាអតីតម្ចាស់ជយលាភីលើគម្រោងអាជីវកម្ម នៅសាកលវិទ្យាល័យខេមប្រីដត៍ )Cambridge) ដ៏ល្បីល្បាញរបស់ពិភពលោកបានផ្តួចផ្តើមបង្កើតគម្រោងអប់រំមួយ ដើម្បីផ្តល់ឱកាសដល់ យុវជនក្នុងប្រទេសកំពុងអភិវឌ្ឍន៍ឱ្យមានឱកាសទទួលបានការប្រឹក្សាយោបល់ពីបណ្តាអ្នកជំនាញដែលកំពុងបំពេញការងារនៅទ្វីបអឺរ៉ុប និងនៅសហរដ្ឋអាមេរិក។

កាលពីឆ្នាំ 2013 នាយកប្រតិបត្តិ និងជាស្ថាបនិកនៃអង្គការអន្តរជាតិរូបនេះ បានមកទស្សនកិច្ចនៅប្រទេសកម្ពុជា ហើយបាននាំយកគម្រោងដ៏មានសារៈសំខាន់មួយនេះមកជាមួយផងដែរ។ លោកថែមទាំងបានជួយស្ត្រីកម្ពុជាចំនួន3រូបដែលទទួលបានការប្រឹក្សាយោបល់ពីគម្រោងរបស់ Wedu ឱ្យមានការផ្លាស់ប្តូរពីបុគ្គលធម្មតា និងមានភាពខ្មាសអៀនច្រើនឱ្យក្លាយជានិស្សិតដែលទទួលបានអាហារូបករណ៍ទៅសិក្សានៅសាកលវិទ្យាល័យល្បីៗទាំងក្នុង និងក្រៅប្រទេស។

លោក Mario បានថ្លែងថា កម្មវិធី Wedu ត្រូវបានបង្កើតឡើងដើម្បីជួយយុវជនដែលជាស្ត្រីនៅអាស៊ីក្នុងការពង្រឹងសមត្ថភាពនៃភាពជាអ្នកដឹកនាំសម្រាប់រួមចំណែកជួយដឹកនាំសង្គមរបស់ពួកគេ។ ហេតុផលដែលត្រូវជ្រើសរើសយកស្ត្រីនៅអាស៊ី ព្រោះលោកបានស្រាវជ្រាវឃើញថា សមត្ថភាពនៃភាពជាអ្នកដឹកនាំរបស់ស្ត្រីនៅអាស៊ីនៅមានកម្រិតនៅឡើយ ហើយចំនួនស្ត្រីនៅក្នុងស្ថាប័នដឹកនាំក៏មានចំនួនតិចតួចបើប្រៀបធៀប នឹងបណ្តាប្រទេសនៅអឺរ៉ុប ឬនៅសហរដ្ឋអាមេរិកជាដើម។

លោក Marrio Ferro មានប្រសាសន៍ថា៖ «ខ្ញុំចង់ឃើញស្ត្រីនៅកម្ពុជាមានភាពជាអ្នកដឹកនាំដើម្បីផ្លាស់ប្តូរសង្គមរបស់គាត់ឱ្យកាន់តែប្រសើរឡើង»។

ស្ថាបនិកអង្គការដែលជួយដល់យុវជនជាលក្ខណៈអន្តរជាតិរូបនេះ បានបង្ហាញថា រហូតមកដល់ពេលបច្ចុប្បន្ន គម្រោងរបស់ Wedu មានអ្នកជំនាញជាច្រើននៅលើពិភពលោកដែលមានអាជីពផ្សេងៗគ្នាបានចុះឈ្មោះធ្វើជាអ្នកប្រឹក្សាយោបល់ )Mentor) ដើម្បីជួយជាគំនិតដល់បណ្តាស្ត្រីនៅអាស៊ីឱ្យបានយល់ដឹងពីការធ្វើការងារ និងវិធីសាស្ត្រ ក្នុងការគិតដែលមានលក្ខណៈជាសកល។ លោកបានបន្តថា យុវជនដែលចង់សិក្សាលើគ្រប់ផ្នែក នឹងទទួលបានការប្រឹក្សាយោបល់ពីអ្នកជំនាញលើអាជីពដែលគេកំពុងសិក្សានោះ៕

October 11, 2017

Category: សង្គម និងសេដ្ឋកិច្ច