សង្គម និងសេដ្ឋកិច្ច - La Reine Media

សាទរ Miss Grand កម្ពុជាជោគជ័យ បានសំឡេងឆោ្នតជិត100 ភាគរយហើយ!

ពិតជាគួរឱ្យភ្ញាក់ផ្អើលខ្លាំងណាស់ដែល Miss Grand កម្ពុជា និងហ្វីលីពីនកំពុងតែទទួលបានការគាំទ្រ Like និងShare នៅលើបណ្ដាញសង្គម Facebook យ៉ាងប្រកៀកប្រកិតគ្នាខ្លាំងមែនទែន ហើយនៅក្នុងនោះដែរ កាលពីថ្ងៃទី13 ខែតុលាឆ្នាំ2017 តារាចម្រៀងស្រីពេជ្រ សោភាក៏បានចូលរួមអំពាវនាវឱ្យអ្នកគាំទ្រនាង និងបងប្អូនរួមជាតិខ្មែរទាំងអស់ជួយគ្នាបោះឆ្នោតគាំទ្របវរកញ្ញា Miss Grand កម្ពុជា កញ្ញា ខ្លឹម ស្រីគា ដែលបានគ្រងឈុត “ទេវីក្រុងកម្ពុជាធិបតី” និងកំពុងតែទទួលបានជោគជ័យក្នុងការគាំទ្រនៅលើវេទិកាអន្ដរជាតិ Miss Grand International 2017 ដែលកំពុងប្រារព្ធធ្វើឡើងនៅក្នុងប្រទេសវៀតណាម។

ចំពោះការបោះឆ្នោតនៅលើបណ្ដាញប្រព័ន្ធអេឡិចត្រូនិកវិញ យើងសង្កេតឃើញថា Miss Grand កម្ពុជា គឺស្ថិតនៅលើលំដាប់ថ្នាក់ទី1 កំពូលគេបំផុត ហើយបើគិតចាប់ម៉ោងនេះទៅ ពេលនេះកម្ពុជាទទួលបានសំឡេងបោះឆ្នោតគាំទ្រ 41,550 សំឡេង គិតជាភាគរយនៃការបោះឆ្នោតគឺបាន 84% ហើយ។ កម្លាំងចិត្តដែលប្រជាជនកម្ពុជាបានចូលរួមបោះឆ្នោតឱ្យកញ្ញាខ្លឹម ស្រីគា ពិតជាគួរឱ្យស្ងប់ស្ងែង និងមានមោទនភាពខ្លាំងណាស់។ ប្រសិនបើលោកអ្នកចង់បោះឆ្នោតគាំទ្រកញ្ញាខ្លឹម ស្រីគា បេក្ខភាពតំណាង Miss Grand កម្ពុជាឱ្យទទួលបានជ័យជម្នះនៅក្នុងឆ្នាំនេះ លោកអ្នកគ្រាន់តែចុចលើ Link ខាងក្រោមនេះរួចជ្រើសរើសយកពាក្យថា Cambodia បន្ទាប់មកចុចពាក្យVote ជាការស្រេច៕

ចុចដើម្បីបោះឆ្នោត

[Vote] Miss International 2017: Who should win?

October 14, 2017

កូរ៉េត្រៀមសង់រោងចក្រផលិតខ្សែកាប្លិ៍អុបទិកនៅកម្ពុជាជាលើកដំបូង

ភ្នំពេញ៖ ព្រឹកថ្ងៃទី13 ខែតុលា ឆ្នាំ2017 នៅមជ្ឈមណ្ឌលសួនបច្ចេកវិទ្យា Technopark នៃសាធារណរដ្ឋកូរ៉េបានរៀបចំពិធីផ្លូវការនៃការចុះហត្ថលេខាលើអនុស្សរណៈយោគយល់គ្នា រវាងឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម ជាមួយលោក Bae,yung-Chan ប្រធានសួនបច្ចេកវិទ្យា Gwangju Technopark ជាមួយលោក Park InCheol នាយកសមាគមឧស្សាហកម្មផលិតខ្សែកាប្លិ៍អុបទិក នៃខេត្ត Gwangju របស់កូរ៉េ។

ស្មារតីខ្លឹមសារនៃអនុស្សរណៈយោគយល់គ្នាបានចែងអំពីគោលបំណងក្នុងការបង្កើតមជ្ឈមណ្ឌលឧស្សាហកម្មបច្ចេកទេសជាន់ខ្ពស់ផ្នែកខ្សែកាប្លិ៍អុបទិកនៅកម្ពុជា ដោយក្រសួងឧស្សាហកម្ម និងសិប្បកម្មដើរតួជាអ្នកសម្របសម្រួលផ្នែកច្បាប់ និងរដ្ឋបាល ហើយមជ្ឈ មណ្ឌល Technopark ជាអ្នកផ្តល់ជំនួយបច្ចេកទេស ចំណែកសមាគមឧស្សាហកម្មខ្សែកាប្លិ៍អុបទិកផ្តល់ប្រឹក្សាយោបល់ផ្នែកបច្ចេកទេសការចែករំលែកបទពិសោធ ចែករំលែកព័ត៌មាន និងការផ្ទេរបច្ចេកវិទ្យារវាងប្រទេសទាំងពីរ។

ក្នុងឱកាសនោះដែរ ឯកឧត្តម ហេង សុខគង់ បានធ្វើបទឧទ្ទេសនាមដល់អ្នកវិនិយោគទុនកូរ៉េ នៅខេត្ត Gwangju អំពីសក្តានុពល និងលក្ខណៈអំណោយផលរបស់កម្ពុជាលើវិស័យសេដ្ឋកិច្ច និងវិនិយោគ។ ក្នុងនោះមានដូចជាការរីកចម្រើនសេដ្ឋកិច្ច សង្គម ទីតាំងភូមិសាស្ត្រអំណោយផល និងសមិទ្ធផលសំខាន់ៗនៃការអភិវឌ្ឍរបស់កម្ពុជា ស្ថានភាពទូទៅនៃសហគ្រាសធុនតូចនិងមធ្យមនៅកម្ពុជា ស្វែងយល់ពីគោលនយោបាយអភិវឌ្ឍន៍វិស័យឧស្សាហកម្មពីឆ្នាំ 2015-2025 និងភាពអនុគ្រោះពាណិជ្ជកម្មដែលកម្ពុជាមាន។

បន្ទាប់ពីចុះអនុស្សរណៈយោគយល់គ្នាខាងលើ ប្រតិភូកម្ពុជាក៏បានអញ្ជើញចុះសិក្សាស្វែងយល់នៅរោងចក្រផលិតខ្សែកាប្លិ៍អុបទិក ដោយបានពិភាក្សាលើគម្រោងបើករោងចក្រប្រភេទនេះនៅកម្ពុជានាពេលឆាប់ៗខាងមុខនេះ។ បន្ទាប់មកក៏បានអញ្ជើញចូលរួមការប្រារព្វពិធីរំឭកខួបទី 27ឆ្នាំ នៃការបង្កើតក្រុមហ៊ុន NuriElecom.Co,Ltd ក្នុងទឹកចិត្តរីករាយ ស្និទ្ធស្នាលនិងមិត្តភាពខ្ពស់ក្នុងនាមជាដៃគូ និងជាប្រទេសធ្លាប់មានទំនាក់ទំនងគ្នាជាយូរលង់មកហើយ៕

October 14, 2017

មានសង្ឃឹមហើយ! បុរសដែលមានបញ្ហាសក់ស្តើង និងសក់ទំពែក

បុរសជាច្រើនរមែងតែងជួបប្រទះបញ្ហារោមភ្នែក ឬក៏សក់ជ្រុះដោយមិនដឹងថា ត្រូវព្យាបាលដោយរបៀបណា ដោយមិនចាំបាច់ត្រូវចំណាយថវិកាច្រើន។ បញ្ហានេះបណ្ដាលមកពីដំណើរវិវត្តនៃវ័យរបស់យើង ដែលស្របទៅតាមដំណើរធម្មជាតិ។ ថ្ងៃនេះ គេហទំព័រ ឡារ៉ែន បានពាំនាំនូវវិធីស្រាស្តល្អៗសម្រាប់ដោះស្រាយបញ្ហារបស់បុរសដែលសក់ជ្រុះ និងសក់ទំពែក តាមវិធីធម្មជាតិ ព្រមទាំងធ្វើឱ្យសក់លូតលាស់បានឡើងវិញ ហើយមានសភាពក្រាស់ជាងមុន ដែលកាន់តែធ្វើឱ្យបុរសមានសភាពក្មេងជាងវ័យរហូតដល់ 10ឆ្នាំ។

ដំណោះស្រាយដែលយើងត្រូវបង្ហាញនៅពេលនេះគឺ ទឹកឃ្មុំ ត្រាំជាមួយខ្ទឹម ក្រូចឆ្មារ សម្រាប់ព្យាបាលបញ្ហាសក់ទំពែករបស់បុរស។

គ្រឿងផ្សំមាន

ទឹកឃ្មុំ 1 គីឡូក្រាម
ខ្ទឹម 3 ដុំ
ក្រូចឆ្មារ 4 ផ្លែ
ប្រេង Flaxseed oil 200ក្រាម

វិធីធ្វើ

យកគ្រឿងផ្សំទាំងអស់ដូចជា ទឹកឃ្មុំ ខ្ទឹមក្រូចឆ្មារ និងប្រេង Flaxseed oil ចាក់ចូលម៉ាស៊ីនក្រឡុក រួចក្រឡុកឱ្យម៉ដ្ឋជាល្បាយស្មើសាច់តែមួយ ហើយចាក់ចូលក្នុងដប រួចយកទៅក្លាសេទុកក្នុងទូរទឹកកក ទុកទទួលទានម្ដង 1ស្លាបព្រាកាហ្វេ មុនពេលទទួលទានអាហារទាំងបីពេល រយៈពេល 30នាទី ជារៀងរាល់ថ្ងៃ។ រូបមន្ដនេះនឹងធ្វើឱ្យសក់របស់អ្នកដុះមកវិញ ហើយក្រាស់ជាមុនគួរជាទីគាប់ចិត្តសម្រាប់បុរសគ្រប់រូប លែងមានកង្វល់រឿងបញ្ហាជ្រុះសក់ និងក្បាលទំពែកទៀតហើយ៕

October 14, 2017

អាជីពចុងភៅមានឱកាសបានការងារល្អ តែខ្វះសាលាបណ្តុះបណ្តាល

អ្នករៀនអាជីពចុងភៅមានអត្រាការងារខ្ពស់ តែកម្ពុជានៅមិនទាន់មានសាលាបណ្តុះបណ្តាលផ្លូវការគ្រប់គ្រាន់ ដើម្បីបំពេញទីផ្សារដែលមានតម្រូវការខ្ពស់នេះទេ។ នេះបើតាមការអះអាងរបស់លោក លូ ម៉េង ដែលជាម្ចាស់ភោជនីយដ្ឋានជាច្រើនកន្លែង និងជាសហប្រធានផ្នែកឯកជនក្នុងវិស័យទេសចរណ៍កម្ពុជា។

លោក លូ ម៉េង បាននិយាយថា សាលាបណ្តុះបណ្តាលអាជីពចុងភៅ (លក្ខណៈផ្លូវការ) មានតិចណាស់នៅកម្ពុជា ដោយមានប្រហែល2-3កន្លែងប៉ុណ្ណោះនៅក្នុងរាជធានីភ្នំពេញ ចំណែកប្រហែល 5-6កន្លែងទៀតមាននៅសៀមរាប តែក្នុងទ្រង់ទ្រាយជាលក្ខណៈអង្គការតែប៉ុណ្ណោះ។

លោក បានបញ្ជាក់ថា៖“យើងនៅខ្វះសាលានេះច្រើន! យើងមានឱកាសបង្រៀនគាត់ តែយើងរកទីតាំងបង្រៀនគាត់មិនបាន។ នៅពេលបច្ចុប្បន្ននេះសណ្ឋាគារលំដាប់ខ្ពស់ៗ និងភោជនីយដ្ឋានទំនើបៗបានកើតឡើងយ៉ាងព្រោងព្រាតនៅស្ទើរគ្រប់ខេត្តក្រុង តែធនធានមនុស្សក្នុងវិស័យនេះមិនទាន់អាចចាប់យកអាជីពកម្រិតខ្ពស់ដើម្បីឆ្លើយតបទៅនឹងតម្រូវការក្នុងសម័យទំនើបនេះបានទេ។

លោក លូ ម៉េង បញ្ជាក់ថា អ្នករៀនអាជីពនេះមានអត្រាការងារធ្វើខ្ពស់ណាស់ ដោយអ្នករៀនមិនទាន់ទាំងចប់ផង គឺមានគេចុះកិច្ចសន្យាឱ្យបំពេញការងារ ដោយមិនចាំបាច់រង់ចាំរហូតដល់រៀនចប់នោះទេ។

កម្ពុជាបានដាក់ចេញនូវយុទ្ធសាស្ត្រជាច្រើនដើម្បីធ្វើយ៉ាងណាទាក់ទាញភ្ញៀវទេសចរបរទេសឱ្យមកទស្សនាបានយ៉ាងហោចណាស់7លាននាក់នៅដំណាច់ឆ្នាំ2020 ដោយក្នុងនោះភ្ញៀវទេសចរចិន នឹងមានចំនួនច្រើនជាងគេ។

កម្ពុជានឹងត្រូវបណ្តុះបណ្តាលអ្នកជំនាញទេសចរណ៍ថ្មីបន្ថែមទៀត ចំនួន40ម៉ឺននាក់ ចាប់ពីឆ្នាំ2013 ដល់ 2020 ដើម្បីទ្រទ្រង់កំណើនទេសចរចំនួន7លាននាក់នៅឆ្នាំ2020៕

October 14, 2017

លោក Mourinho រីករាយក្នុងការដឹកនាំ Man United ទៅកាន់ទឹកដី Anfield ល្ងាចនេះ

លោក Jose Mourinho បានចាត់ទុកកីឡដ្ឋាន Anfield របស់ក្លិប Liverpool ជាកន្លែងដ៏ស្រស់ស្អាតមួយ និងបានបញ្ជាក់ថា តារាឆ្នើមៗនៃក្រុម Manchester United របស់លោក នឹងរីករាយក្នុងការលេងក្រោមបរិយាកាសដ៏តានតឹងបែបនេះនៅល្ងាចថ្ងៃសៅរ៍នេះ។

លោក Gary Neville និង Mikael Silvestre ដែលសុទ្ធសឹងជាអតីតកីឡាកររបស់ក្លិប Man United បាននិយាយនៅសប្តាហ៍នេះទាក់ទងនឹងការប្រជែងយ៉ាងពិសេសតាមរយៈការធ្វើដំណើររបស់ Man United ទៅកាន់ទឹកដី Anfield ហើយភាពស្វិតស្វាញនឹងកើតឡើងក្នុងការប្រកួតនេះ។ ប៉ុន្តែ លោក Mourinho គ្រូបង្វឹករបស់ក្រុម Man United បានបញ្ជាក់ថា បើទោះបីមានប្រវត្តិយ៉ាងជូរចត់នៃការជួបប្រកួតគ្នារវាងក្រុមទាំងពីរក៏ដោយ ប៉ុន្តែ កីឡាកររបស់លោកគួរតែពេញចិត្តទៅនឹងឱកាសក្នុងការលេងពីមុខអ្នកគាំទ្រដ៏ច្រើនកុះករនៃកីឡដ្ឋាន Anfield។

លោក Mourinho បានប្រាប់អ្នកយកព័ត៌មានកាលពីថ្ងៃសុក្រថា៖ «អ្នកដឹងទេ នេះវាហាក់ដូចជារឿងកំប្លែងបន្តិចសម្រាប់ខ្ញុំ ពីព្រោះខ្ញុំគិតថា នៅពេលដែលមនុស្សជាច្រើននិយាយអំពីបរិយាកាសធំៗជាច្រើន វាហាក់ដូចជាយើងមិនចូលចិត្ត វាហាក់ដូចជាវាមានបញ្ហាមួយសម្រាប់យើង ក្នុងការទៅកាន់កន្លែងដ៏ជាក់លាក់មួយ និងត្រូវជួបបរិយាកាសដ៏ធំមួយ។ នេះគឺជាអ្វីដែលយើងត្រូវបាន»។ គ្រូបង្វឹកសញ្ជាតិព័រទុយហ្គាល់រូបនេះបានឲ្យដឹងទៀតថា៖ «ខ្ញុំពិតជាភ្ញាក់ផ្អើលណាស់ដែលអ្នកនិយាយពីការប្រកួតនេះតាមរបៀបអវិជ្ជមាន។ ខ្ញុំកាន់តែភ្ញាក់ផ្អើលទៅទៀតនៅពេលដែលខ្ញុំបានឮអតីតកីឡាករ និងតារាឆ្នើមៗ និយាយពីបរិយាកាសផ្សេងៗដែលដូចទៅនឹងរឿងដែលគួរឲ្យខ្លាច វាដូចទៅនឹងរឿងដ៏គួរឲ្យព្រួយបារម្ភទៅវិញ»។

ទាក់ទងនឹងការប្រកួតនៅល្ងាចនេះ លោក Mourinho បានបន្ថែមទៀតថា៖ «វាលើកទឹកចិត្តដល់យើង ព្រោះវាជាអ្វីមួយដែលយើងចង់បាន។ វាជាការប្រកួតមួយដែលយើងចង់បានរាល់ការប្រកួតទាំងអស់»។ ការប្រកួតនេះនឹងចាប់ផ្តើមនៅម៉ោង៦:៣០ល្ងាច៕

ប្រភពព័ត៌មាន៖ Sky Sports

October 14, 2017

រោងម៉ាស៊ីន និងអ្នកនាំចេញអង្ករអាចខកខ្លួនក្នុងឆ្នាំនេះ

ក្រុមហ៊ុន ឬរោងម៉ាស៊ីនដែលនាំចេញអង្ករទៅកាន់ទីផ្សារអន្តរជាតិ អាចប្រឈមនឹងការលំបាកទាំងបរិមាណនៃការផ្គត់ផ្គង់ និងប្រាក់ចំណេញ ក្រោយពីតម្លៃស្រូវហាក់មិនមានការធ្លាក់ចុះ និងមានបរិមាណមិនច្រើន តែក្រុមហ៊ុននាំចេញខ្លះបែបជាចុះកិច្ចសន្យានាំចេញក្នុងបរិមាណច្រើន ហើយក្នុងតម្លៃទាបទៀតផង។

ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ ដែលជាធនាគាររដ្ឋដ៏សំខាន់មួយក្នុងការផ្តល់ប្រាក់កម្ចីក្នុងអត្រាការប្រាក់ទាប និងលក្ខខណ្ឌងាយស្រួល បានពន្យល់ថា នៅក្នុងរដូវកាលប្រមូលផលស្រូវសែនក្រអូបកន្លងមកនេះ តម្លៃស្រូវបានធ្លាក់ចុះតិចតួចប៉ុណ្ណោះនៅពេលដែលការប្រមូលផលមមាញឹក។ ឯកឧត្តមបានបន្តថា មានកត្តាមួយចំនួនដែលបណ្តាលឱ្យតម្លៃស្រូវរក្សាស្ថិរភាពល្អ ដែលរួមមាន តម្រូវការទីផ្សារខាងក្រៅមានកាន់តែច្រើន ការប្រមើលមើលគ្រោះធម្មជាតិនៅក្នុងពិភពលោក និងការរៀបចំហេដ្ឋារចនាសម្ព័ន្ធគាំទ្ររបស់រាជរដ្ឋាភិបាលដើម្បីសម្រួលដល់ការទិញ និងលក់ស្រូវ។ ទោះជាបែបនេះក្តី ក៏នៅមានឈ្មួញនាំចេញខ្លះកំពុងតែមានបញ្ហាសម្រាប់ការផ្គត់ផ្គង់អង្ករឱ្យដៃគូរបស់ខ្លួននៅក្រៅប្រទេសផងដែរ ដោយសារតែការបង្អង់រង់ចាំឱ្យស្រូវចុះថោក។

អគ្គនាយកធនាគារអភិវឌ្ឍន៍ជនបទ បានមានប្រសាសន៍ថា៖“ខ្ញុំបានប្រាប់តាំងពីដំបូងហើយថា សូមរួសរាន់ទិញស្រូវមកស្តុក ប៉ុន្តែអ្នកខ្លះនៅតែរង់ចាំមើលស្រូវធ្លាក់ថ្លៃ។ ឈ្មួញខ្លះខំដណ្តើមគ្នាយកលេខ (យកតួលេខនាំចេញ) ដោយរំពឹងថាស្រូវឆ្នាំនេះធ្លាក់ថ្លៃទៀត ប៉ុន្តែស្ថានភាពបែរជាផ្ទុយពីការរំពឹងទុកទៅវិញ។ តម្លៃស្រូវសែនក្រអូបក្នុងឆ្នាំនេះបានធ្វើឱ្យស្ថានភាពរបស់ប្រជាកសិករប្រសើរឡើង ប៉ុន្តែអ្នកដែលលំបាកគឺរោងម៉ាស៊ីនកិនស្រូវ និងបណ្តាអ្នកនាំចេញទៅកាន់ទីផ្សារអន្តរជាតិ។

លោក ហេង ផេង អនុប្រធានសហព័ន្ធស្រូវអង្ករកម្ពុជា និងជានាយកប្រតិបត្តិក្រុមហ៊ុនថ្មគោលរ៉ាយស៍ នៅក្នុងខេត្តបាត់ដំបង បានឱ្យដឹងថា តម្រូវការអង្ករសម្រាប់នាំចេញនៅតែមានចំនួនច្រើន ជាពិសេសទីផ្សារប្រទេសចិន ខណៈដែលវត្តមានស្រូវសែនក្រអូបមានតិចតួចប៉ុណ្ណោះ។

លោក ហេង ផេង បញ្ជាក់ថា៖“ពួកគេជួបប្រទះផលលំបាក ដោយសារស្រូវឡើងថ្លៃ ហើយឡសម្ងួតពួកគាត់មានកម្រិត និងទុនបង្វិលមានកម្រិតធ្វើឱ្យគាត់ប្រមូលមិនទាន់។ តាមការអះអាងរបស់ លោក ហេង ផេង ផល ស្រូបសែនក្រអូបនឹងចាប់ដល់ច្រើនម្តងទៀតចន្លោះពីចុងខែតុលា នេះដល់ពាក់កណ្តាលខែវិច្ឆិកា។ មុនពេលការប្រមូលផលស្រូវមកដល់ ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍ជនបទបានប្រកាសកែប្រែលក្ខខណ្ឌខ្លះក្នុងការសម្រួលបើកផ្លូវឱ្យរោងម៉ាស៊ីន និងអ្នកទិញស្រូវមានលទ្ធភាពទទួលបានកម្ចីបន្ថែមសម្រាប់ទិញស្រូវសែនក្រអូប ដើម្បីរួមចំណែកក្នុងការទប់តម្លៃស្រូវមិនឱ្យធ្លាក់ថ្លៃខ្លាំង។

យោងតាមការស្រង់តម្លៃស្រូវរបស់សហព័ន្ធស្រូវអង្ករកម្ពុជា បច្ចុប្បន្ននេះតម្លៃស្រូវសែនក្រអូប លក់នៅតាមស្រែមានតម្លៃប្រមាណ1,010រៀលក្នុងមួយគីឡូក្រាម។ តម្លៃនេះប្រសើរជាងពីរដងបើធៀបនឹងតម្លៃកាលពីពាក់កណ្តាលខែកញ្ញា ឆ្នាំ2016 ពេលដែលប្រជាកសិករចេញតវ៉ាជាលើកដំបូងនៅខេត្តបាត់ដំបង។

ឯកឧត្តម កៅ ថាច បានអះអាងថា រាជរដ្ឋាភិបាលកម្ពុជានឹងនៅតែបន្តសាងសង់ហេដ្ឋារចនាសម្ព័ន្ធសម្រាប់គាំទ្រដល់វិស័យស្រូវអង្ករនេះបន្តទៀត។ របាយការណ៍ផ្លូវការរបស់លេខាធិការដ្ឋានច្រកចេញចូលតែមួយសម្រាប់ការបំពេញបែបបទនៃការនាំចេញអង្ករ បានបង្ហាញថា ក្នុងរយៈពេល9 ខែនៃឆ្នាំ2017 នេះកម្ពុជានាំចេញអង្ករបានចំនួន421,966តោន ដែលកើនឡើង16.70% បើធៀបនឹងរយៈពេលដូចគ្នាឆ្នាំ2016។ ប្រទេសដែលទិញអង្ករពីកម្ពុជាច្រើនជាងគេ គឺប្រទេសចិន បារាំង និងប្រទេសប៉ូឡូញ៕

October 14, 2017

អាហាររបស់អ្នកមានផ្ទៃពោះ 9 ខែ… គួរ និងមិនគួរទទួលទានអ្វីខ្លះ?

អំឡុងពេលប្រសូតកាន់តែខិតចូលមកជិតហើយ ស្ត្រីមានផ្ទៃពោះជិតប្រសូតគួរបណ្តោយផ្លូវចិត្តឱ្យធូរស្រាល ព្រោះមិនប៉ុន្មានថ្ងៃទៀតទេ នឹងបានឃើញមុខកូនតូចជាទីស្រឡាញ់ហើយ តែទោះជាផ្លូវចិត្តនឹងធូរស្រាលក៏ដោយ ក៏ផ្ទៃរបស់អនាគតអ្នកម្តាយនៅត្រូវទ្រាំទ្រនឹងទម្ងន់ខ្លួនរបស់កូនដែលធំប៉ុនផ្លែឪឡឹកដដែល ដូច្នេះរឿងការទទួលទានអាហារក៏អាចនឹងធ្វើឱ្យស្ត្រីមានគភ៌តឹងតែងក្បាលពោះបានដែរ ដូច្នេះស្ត្រីមានគភ៌គួរជ្រើសរើសទទួលទានតែអាហារដែលល្អ និងចាំបាច់ដល់រាងកាយតែប៉ុណ្ណោះ។

អាយុគភ៌ 9ខែ អាហារដែលគួរទទួលទានដើម្បីបំប៉នគភ៌មានដូចខាងក្រោមនេះ៖

1. ធញ្ញជាតិ និងធញ្ញជាតិដែលមិនសម្រិតសម្រាំងពណ៌ ឬនំប៉័ង៖ បែងជាពេលទទួលទានតូចៗ 6-11ពេលក្នុងមួយថ្ងៃ។

2. ផ្លែឈើ ៖ 2-4ដងក្នុងមួយថ្ងៃ។

3. បន្លែ ៖ ច្រើនជាង4ដងក្នុងមួយថ្ងៃ។

4. ផលិតផលធ្វើពីទឹកដោះ ៖ ប្រមាណ4ដងក្នុងមួយថ្ងៃ។

5. អាហារដែលសម្បូរដោយវីតាមីន ៖ ទទួលទាន3ដងក្នុងមួយថ្ងៃ។

6. ខាបូហាយដ្រេត ៖ បែងជាពេលទទួលទានតូចៗយ៉ាងតិច3-4ដងក្នុងមួយថ្ងៃ។

7. ទឹកត្រជាក់ ៖ យ៉ាងតិចមួយថ្ងៃ1លិត្រ។

អាយុគភ៌9ខែ អាហារដែលគួរចៀសវាង និងមិនគួរទទួលទាន៖

1. កាហ្វេ ៖ ក្នុងត្រីមាសទី3 ស្ត្រីមានគភ៌ភាគច្រើនតែងតែមាន អាការគេងមិនលក់ស្រាប់ទៅហើយ អាចដោយសារតែអ័រម៉ូន និងក្តីកង្វល់រឿងទារក និងការប្រសូត ទើបធ្វើឱ្យគេងមិនលក់ បើទទួលទានកាហ្វេ ឬភេសជ្ជៈដែលមានជាតិកាហ្វេអីុនចូលទៅទៀតអាច ធ្វើឱ្យមានអាការគេងមិនលក់កាន់តែខ្លាំងឡើង។ ដូច្នេះស្ត្រីមានគភ៌ដែលចូលចិត្តទទួលទានកាហ្វេ មិនគួរទទួលទានលើសពី1កែវក្នុងមួយថ្ងៃឡើយ។

2. អាហារសមុទ្រខ្លះមានសារធាតុបារ៉ត ៖ អាហារទាំងនេះនឹងធ្វើឱ្យប្រព័ន្ធប្រសាទ និងខួរក្បាលរបស់កូនតូចក្នុងផ្ទៃត្រូវបំផ្លាញ។

3. ស៊ុតឆៅ ៖ ស៊ុតស្ទើរឆៅ ស្ទើរឆ្អិនអាចមានមេរោគបាក់តេរី ដែលជាមូលហេតុធ្វើឱ្យស្ត្រីមានគភ៌មានអាការពុលអាហារ។

4. ការជក់បារី និង ការទទួលទានទឹកភេសជ្ជៈដែលមានជាតិអាល់កុល ៖ វត្ថុ2នេះអាចធ្វើឱ្យស្ត្រីមានគភ៌មានសភាវប្រថុយនឹងការប្រសូតមុនកំណត់ និងអាចបំផ្លាញប្រព័ន្ធប្រសាទ និងខួរក្បាលរបស់កូនតូច។

ក្នុងអំឡុងខែចុងក្រោយនេះស្ត្រីមានគភ៌អាចបន្ថែមដោយជាតិកាល់ស្យូម និងធាតុដែកឱ្យច្រើនជាពិសេស និងក្រោយប្រសូតក៏គួរទទួលទានជាតិកាល់ស្យូម និងធាតុដែកប្រមាណជា3ខែទៀតដែរ ជាពិសេសស្ត្រីដែលត្រូវបំបៅដោះកូន។

ពេលនេះទារកក្នុងគភ៌ល្អពេញលេញឥតខ្ចោះហើយ ត្រៀមរួចជាស្រេចក្នុងការប្រសូតចេញមកគ្រប់ពេលវេលា ស្ត្រីមានគភ៌ត្រូវជ្រើសរើសទទួល ទានអាហារឱ្យច្រើនឡើង ទទួលទានឱ្យទទួល បានគុណប្រយោជន៍ច្រើនបំផុត និងមិនគួរបណ្តោយឱ្យទម្ងន់ខ្លួនកើនឡើងខ្លាំងជ្រុលពេកទេ ព្រោះក្នុងខែនេះស្ត្រីមានគភ៌ជាច្រើននាក់ច្រើនតែមានទម្ងន់ខ្លួនស្ទុះឡើងខ្លាំងបំផុត ប្រព័ន្ធរំលាយអាហារក៏ធ្វើការយឺត ហើយដែលសំខាន់គួរជ្រើសរើសទទួលទានអាហារដែលផ្តល់កម្លាំងថាមពលខ្ពស់ ព្រោះនឹងបានមានកម្លាំងប្រសូតបុត្រនៅពេលថ្ងៃប្រសូតមកដល់៕

October 14, 2017

កូរ៉េបណ្តាក់ទុន 600លានដុល្លារធ្វើរោងចក្រដំឡើងរថយន្តនៅស្រុកខ្មែរ

ក្នុងការចូលរួមលើកម្ពស់សេដ្ឋកិច្ច ក៏ដូចជាការចូលរួមផ្តល់ការងារដល់ពលរដ្ឋខ្មែរ ក្រុមវិនិយោគិនកូរ៉េ បានបោះទុនវិនិយោគក្នុងទឹកប្រាក់ប្រមាណជា 600លានដុល្លារអាមេរិកសម្រាប់បង្កើតរោងចក្រផលិតសម្លៀកបំពាក់ និងដំឡើងរថយន្ត (Hyundai) នៅកម្ពុជា។

គម្រោងនេះបានលើកមកពិភាក្សា ក្នុងជំនួបរវាងឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម ជាមួយឯកឧត្តម Chan byoung Wan ប្រធានគណៈកម្មាធិការផ្នែកពាណិជ្ជកម្ម ឧស្សាហកម្ម ថាមពល សហគ្រាសធុនតូច និងមធ្យម និងវិនិយោគរបស់សាធារណរដ្ឋកូរ៉េ នៅឯក្រុងសេអ៊ូល ប្រទេសកូរ៉េ ក្នុងន័យពង្រឹងចំណងកិច្ចសហប្រតិបត្តិការរវាងប្រទេសទាំងពីរបន្ថែមទៀត លើវិស័យឧស្សាហកម្ម និងពាណិជ្ជកម្មរបស់កូរ៉េមកកម្ពុជា ឱ្យបានទំហំ 1ពាន់លានដុល្លារនាឆ្នាំខាងមុខ។

ឯកឧត្តមទេសរដ្ឋមន្ត្រីបានរំលឹកថា កន្លងមកការវិនិយោគរបស់កូរ៉េមកកម្ពុជា មានទំហំទឹកប្រាក់ចំនួន 600លានដុល្លារអាមេរិក លើវិស័យផលិតសម្លៀកបំពាក់ និងដំឡើងរថយន្ត(Hyundai)។ ជាមួយគ្នានេះ ឯកឧត្តមបានស្នើឱ្យភាគីកូរ៉េ ចាប់អារម្មណ៍វិនិយោគបន្ថែមទៀត ផ្នែកឧប្បករណ៍អេឡិចត្រូនិច និងបរិក្ខាអគ្គិសនី ជាដើម ដោយសារកម្ពុជាមានលក្ខណៈអំណោយផល និងឱកាសវិនិយោគដ៏ប្រសើរ មានសុខសន្តិភាព និងភាពអនុគ្រោះពាណិជ្ជកម្ម ដែលកម្ពុជាទទួលបានពីប្រទេសអភិវឌ្ឍ និងជាប្រទេសដៃគូផ្សេង អនុញ្ញាតឱ្យទំនិញរាប់ពាន់មុខពីកម្ពុជា នាំចេញដោយរួចពន្ធនិងមិនជាប់កូតា រួមទាំងនាំចេញទៅប្រទេសកូរ៉េផងដែរ ។

ឯកឧត្តម Chan byoung Wan បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ហើយកម្ពុជា-កូរ៉េ នឹងខិតខំពង្រឹងពង្រីកកិច្ចសហប្រតិបត្តិការល្អនេះបន្ថែមទៀត និងមានច្រើនវិស័យដូចជា៖ថាមពលកកើតឡើងវិញ ប្រព័ន្ធហេដ្ឋារចនាសម្ព័ន្ធ កិច្ចសហការលើជំនាញបច្ចេកទេស ការបង្កើតសួនឧស្សាហកម្ម និងបច្ចេកវិទ្យា ជាពិសេសការអភិវឌ្ឍន៍វិស័យសហគ្រាសធុនតូច និងមធ្យម ដែលភាគីកូរ៉េចាត់ទុកជាអាទិភាពសម្រាប់គាំទ្រ ឧស្សាហកម្ម ធន់ស្រាល និងធ្ងន់ និងជាសរសៃឈាមចូលរួមអភិវឌ្ឍសេដ្ឋកិច្ចជាតិផងដែរ ។

ជាការកត់សំគាល់ កំណើនទេសចរណ៍ជនជាតិកូរ៉េមកកម្ពុជា មានការកើនឡើងដែលឆ្នាំកន្លងទៅមានចំនួន 4សែននាក់ ដែលធ្វើឱ្យជើងហោះហើរដោយផ្ទាល់ពីកូរ៉េមកកម្ពុជា មានចំនួន35ជើងក្នុងមួយសប្តាហ៍។ ដោយឡែកពលករកម្ពុជាទៅធ្វើការនៅប្រទេសកូរ៉េ ប្រមាណជិត 8ម៉ឺននាក់ ដែលជាសក្តានុពលមួយ ពីព្រោះពួកគេបានទទួលបទពិសោធន៍ ចំណេះដឹង និងការអនុវត្តន៍ផ្ទាល់ នឹងក្លាយជាកម្លាំងចូលរួមយ៉ាងសំខាន់ ក្រោយពួកគេត្រឡប់មកកម្ពុជាវិញ ដែលអាចចូលរួមបម្រើការងារនៅក្រុមហ៊ុន កូរ៉េ នៅកម្ពុជា នាពេលអនាគតបន្តបន្ទាប់៕

October 13, 2017

USAID ផ្តល់ 3លានដុល្លារសម្រាប់គម្រោងទឹកស្អាត និងអនាម័យនៅកម្ពុជា

ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានប្រកាសផ្តល់ជំនួយ 3លានដុល្លារអាមេរិកដល់កម្ពុជា ដើម្បីជួយកសាងសមត្ថភាពនៃការផ្គត់ផ្គង់ទឹក និងសេវាអនាម័យ ក្នុងការបង្កើនលទ្ធភាពប្រើប្រាស់ទឹកដល់ជនបទ។

គម្រោងផ្តួចផ្តើមថ្មីមួយដែលមានឈ្មោះថា WASH-FIN Cambodia នឹងត្រូវអនុវត្តរយៈពេល 3 ឆ្នាំចាប់ពី ខែតុលា ឆ្នាំ2017 ហើយប្រតិបត្តិករទឹកឯកជន នឹងទទួលបានអត្ថប្រយោជន៍ពីគំនិតផ្តួចផ្តើមនេះ តាមរយៈការកសាងសមត្ថភាពចំណេះដឹង និងផែនការមេសម្រាប់ការកសាងអាងស្តុប និងការតភ្ជាប់ទុយោដល់គ្រួសារប្រជាពលរដ្ឋតាមជនបទ ដែលនេះជាការលើកឡើងរបស់ទីប្រឹក្សាគម្រោង។

លោក មិន មុន្នី មន្ត្រីទីប្រឹក្សាគម្រោងរបស់ USAID មានប្រសាសន៍ថា «ថវិកានេះនឹងត្រូវបានប្រើប្រាស់ ដើម្បីពង្រឹងសមត្ថភាពអ្នកប្រតិបត្តិការទឹកឯកជន នៅតាមតំបន់ជនបទដែលគ្មានលទ្ធភាពទទួលបានការផ្គត់ផ្គង់ទឹករបស់រដ្ឋ»។ តាមរយៈគម្រោងនេះ ប្រតិបត្តិករផ្គត់ផ្គង់ទឹកនៅក្នុងតំបន់គោលដៅ នឹងអាចមានសមត្ថភាពពេញលេញ តាមរយៈការបណ្តុះបណ្តាលដែលទីភ្នាក់ងារ USAID បានផ្តល់ឱ្យលើសេវាកម្មផ្គត់ផ្គង់ទឹក និងអនាម័យដល់ប្រជាជននៅតាមជនបទ។ លោកបន្ថែមថា ប្រតិបត្តិករទាំងនោះក៏អាចស្នើសុំប្រាក់កម្ចីពីធនាគារ និងគ្រឹះស្ថានមីក្រូហិរញ្ញវត្ថុ ដើម្បីទទួលបានសេវាហិរញ្ញវត្ថុ សម្រាប់ពង្រីកអាជីវកម្មរបស់ខ្លួនថែមទៀត។

គូរបញ្ជាក់ថាគោលបំណងចំបងនៃគម្រោង WASH-FIN Cambodia គឺគាំទ្រដល់ប្រតិបត្តិករទឹកឯកជន ឱ្យទទួលបានប្រាក់ដែលពួកគេត្រូវការ ដើម្បីពង្រីកនិងកែលម្អលទ្ធភាពទទួលបានទឹកនិងអនាម័យនិងសេវាកម្ម។ ហើយវានឹងផ្តល់ជំនួយបច្ចេកទេស និងជួយពង្រឹងប្រតិបត្តិករទឹកឯកជននៅតាមខេត្ដជាច្រើន, ស្ថាប័នមីក្រូហិរញ្ញវត្ថុក្នុងស្រុក និងតួអង្គផ្សេងៗទៀតក្នុងវិស័យទឹកនិងអនាម័យ។ ហើយក៏ជួយគាំទ្រដល់ការប្រើប្រាស់ឥណទានបន្ថែម ដែលមានដូចជាមូលនិធិឥណទានអភិវឌ្ឍន៍របស់ USAID ដើម្បីបង្កើនឱកាសបន្ថែមទៀតសម្រាប់ហិរញ្ញវត្ថុ ពាណិជ្ជកម្ម។

លោកស្រី Polly Dunford នាយកបេសកកម្ម USAID ប្រចាំនៅកម្ពុជា មានប្រសាសន៍ថា “ទីភ្នាក់ងារ USAID មានមោទនភាពក្នុងការលើកទឹកចិត្តដល់វិស័យឯកជន ក្នុងការផ្តល់កម្ចីដល់វិស័យ WASH របស់ប្រទេសកម្ពុជា” ។ «ទឹកស្អាតនិងអនាម័យស្អាត គឺជាកត្តាសំខាន់ចំពោះសហគមន៍ ហើយយើងជឿជាក់ថា វានឹងជួយដល់កំណើនសេដ្ឋកិច្ចដ៏ធំធេងរបស់ប្រទេសកម្ពុជា ក៏ដូចជាសុខភាពប្រជាពលរដ្ឋរបស់ខ្លួនផងដែរ»។

លោក ហោ ឃីកេង នាយកប្រតិបត្តិនៃសមាគមផ្គត់ផ្គង់ទឹកកម្ពុជា (CWA) បានមានប្រសាសន៍ថា ប្រតិបត្តិករទឹកឯកជននឹងអាចពង្រីកសមត្ថភាពរបស់ខ្លួន ក្នុងការផ្គត់ផ្គង់ទឹកស្អាតដល់ប្រជាពលរដ្ឋឱ្យបានទូលំទូលាយ ពីព្រោះឥឡូវនេះមានចំនួនសេវាទឹកស្អាត និងប្រតិបត្តិករទឹកឯកជននៅតាមតំបន់ជនបទ។ លោកមានប្រសាសន៍ថា «ខ្ញុំជឿជាក់ថាក្រោមការផ្តួចផ្តើមនេះប្រតិបត្តិករទឹកឯកជននៅតំបន់ជនបទ នឹងកសាងសមត្ថភាពរបស់ពួកគេ ក្នុងការកែលំអរទឹក ជាពិសេសពួកគេអាចមានលទ្ធភាពទទួលបានសេវាហិរញ្ញវត្ថុ ដើម្បីពង្រីកប្រតិបត្តិការរបស់ខ្លួន” ៕

October 13, 2017

អ្នកដឹកនាំដែលមានទស្សនវិស័យវែងឆ្ងាយ ជាអ្នកដែលចងក្រងក្បួនទុក

ការបណ្តុះភាពជាអ្នកដឹកនាំជារឿងសំខាន់សម្រាប់មនុស្សគ្រប់គ្នា និងសម្រាប់ស្ថាប័ន ទាំងឯកជន និងស្ថាប័នសាធារណៈ។ ការបណ្តុះភាពជាអ្នកដឹកនាំ ចាំបាច់ត្រូវមានលក្ខណៈប្រាកដនិយម ឬមានច្បាស់លាស់ដែលអាចជំរុញឱ្យមានការបន្តវេនដ៏ល្អចំពោះអ្នកជំនាន់ក្រោយ។់ក្រោយ។

ពាក់ព័ន្ធនឹងបញ្ហានេះ លោក សោម សម្បត្តិ អគ្គនាយកក្រុមហ៊ុនថ្នាំពណ៌ជាតិ Cam-Paint បានលើកឡើងថា ស្ថាប័នដែលរីកចម្រើនត្រូវការបុគ្គលិកដែលមានភាពជាអ្នកដឹកនាំ ព្រោះថានៅពេលដែលបុគ្គលិកម្នាក់ៗមានភាពជាអ្នកដឹកនាំ នៅពេលនៅដំណើរការនៃក្រុមហ៊ុន ឬស្ថាប័ននឹងបន្តអភិវឌ្ឍ ព្រោះម្នាក់ៗសុទ្ធតែមានម្ចាស់ការ និងគំនិតច្នៃប្រឌិត ហើយប្រើអស់សក្តានុពលដើម្បីធ្វើការងាររួមគ្នា។

លោក សោម សម្បត្តិ បានមានប្រសាសន៍ថា៖ «អាជីវកម្មដែលរឹងមាំ ជាអាជីវកម្មដែលមានចក្ខុវិស័យវែងឆ្ងាយ ព្រោះអ្នកដឹកនាំនៃស្ថាប័ននោះជាអ្នកដែលពូកែរក្សានូវក្បួនទុកសម្រាប់បណ្តុះបណ្តាលដល់បុគ្គលិកគ្រប់គ្នាឱ្យមានភាពជាអ្នកដឹកនាំ»។

លោក សោម សម្បត្តិ បានបន្តទៀតថា មនុស្សទុកចំណេះដឹងនៅ 2កន្លែង គឺទី1 ទុកនៅក្នុងខ្លួន និងទី2 គឺទុកនៅក្នុងក្បួន ហេតុនេះចំណុចសំខាន់របស់អ្នកដឹកនាំដែលមានទស្សនវែងឆ្ងាយគឺ ចេះពង្រឹងចំណេះក្នុងខ្លួនឱ្យខ្លាំង បន្ទាប់មកចងក្រងជាក្បួន។ លោកបានលើកឡើងផងដែរថា បើអ្នកដឹកនាំក្រុមហ៊ុនបានបង្កើតក្បួនត្រឹមត្រូវ ក្រុមហ៊ុន ឬស្ថាប័ននោះនឹងក្លាយជាស្ថាប័នដែលរឹងមាំ ហើយក្រោយពេលដែលអស់ពីអ្នកដឹកនាំណាម្នាក់ទៅ អ្នកដទៃទៀតក៏អាចមានសមត្ថភាពក្នុងការអភិវឌ្ឍក្រុមហ៊ុនឱ្យខ្លាំងបានដែរ។

លើសពីនេះទៅទៀតសហគ្រិនខាងលើបានសង្កត់ធ្ងន់ផងដែរទៅលើការកសាងផ្នែកភាពជាអ្នកដឹកនាំនៅក្នុងក្រុមហ៊ុនថា ប្រសិនបើក្រុមហ៊ុនចេះអភិវឌ្ឍធនធានមនុស្ស ហើយមានផ្នែកអភិវឌ្ឍធនធានមនុស្សល្អ នោះបុគ្គលិកម្នាក់ៗនឹងរួមចំណែកបង្កើតលុយរាប់លានដើម្បីជោគជ័យទាំងអស់គ្នា តែបើគ្មានផ្នែកអភិវឌ្ឍធនធានមនុស្សត្រឹមត្រូវទេនោះ ស្ថាប័មួយអាចប្រឈមនឹងការខាតបង់៕

October 13, 2017

Category: សង្គម និងសេដ្ឋកិច្ច