Category: សង្គម និងសេដ្ឋកិច្ច

សេដ្ឋកិច្ចអាស៊ី និងពិភពលោក៖ អាស៊ីក្លាយជាតំបន់ដែលមានមហាសេដ្ឋីលុយពាន់លានច្រើនជាងសហរដ្ឋអាមេរិក
ជារឿងមួយដែលគួរឱ្យចាប់អារម្មណ៍បំផុត ខណៈដែលពេលនេះមហាសេដ្ឋីដែលមានប្រាក់លំដាប់ពាន់លានដុល្លារអាមេរិកឡើងទៅ ត្រូវបានគេរកឃើញថា ស្ថិតនៅក្នុងទ្វីបអាស៊ីច្រើនជាងសហរដ្ឋអាមេរិក។
របាយការណ៍មួយចេញផ្សាយដោយ UBS និង Price Water House Coopers បានបង្ហើបឱ្យដឹងថា ក្នុងឆ្នាំ 2016 កន្លងទៅ មានមហាសេដ្ឋីថ្មីកើនឡើងប្រមាណជា 17% គិតជាទឹកប្រាក់ប្រមាណជា 6 លានលានដុល្លារសហរដ្ឋអាមេរិក ដោយការរីកធំធាត់នេះ ភាគច្រើនបានមកពីផ្នែកធុរកិច្ចនៅក្នុងប្រទេសចិនជាចម្បង ដែលរឿងនោះបានធ្វើឱ្យកើតមានមហាសេដ្ឋីជនជាតិចិនមានប្រាក់លំដាប់ “ពាន់លាន” មានចំនួនច្រើនជាងសហរដ្ឋអាមេរិកជាលើកដំបូង តែទោះជាយ៉ាងដូច្នេះមែន ក៏មហាសេដ្ឋីសញ្ជាតិអាមេរិកនៅតែគ្រប់គ្រងភាពជាអ្នកមានទ្រព្យសម្បត្តិរឹងមាំខ្លាំងជាងក្នុងរង្វង់ 2.8 លានលានដុល្លារអាមេរិកដែរ ចំណែកអាស៊ីនៅតែតាមពីក្រោយក្នុងរង្វង់ 1.9 លានលានដុល្លារអាមេរិកដដែល។
ខណៈពេលជាមួយគ្នា ការកើនឡើងនៃសេដ្ឋកិច្ចក្នុងអឺរ៉ុបវិញ បែរជាមើលទៅគ្មានការប្រែប្រួលអ្វីជាដុំកំភួនឡើយ។ ទាំងអស់នេះ UBS បានវិភាគថា ដោយសារតែបណ្ដាប្រទេសក្នុងទ្វីបអឺរ៉ុបមានការធ្វើធុរកិច្ចបែបជាអនុរក្សនិយម រួមទាំងមានច្បាប់វិន័យដែលម៉ឺងម៉ាត់ខ្លាំង ទើបក្លាយជារឿងពិបាកដែលចំនួនមហាសេដ្ឋីនឹងពង្រីកខ្លួននៅពេលប្រៀបធៀបជាមួយទ្វីបអាស៊ី។
យ៉ាងណាក៏ដោយ ភាពគួរឱ្យចាប់អារម្មណ៍របស់របាយការណ៍នោះគឺ អាស៊ីបានក្លាយជាភូមិភាគដែលមានការរីកច្រើនឡើងរបស់មហាសេដ្ឋីថ្មីៗរៀងរាល់ 3 សប្ដាហ៍ ដែលបណ្ដាលមកពីការវិនិយោគទុនរបស់រដ្ឋក្នុងប្រទេសចិន ជាពិសេសនយោបាយការវិនិយោគក្រោមឈ្មោះរដ្ឋរបស់លោក ស៊ី ជីនភីង ដែលទើបនឹងបានទទួលការជ្រើសតាំងឱ្យគ្រប់គ្រងតំណែងបន្តទៀត 5 ឆ្នាំទៀតផងនោះ ក៏នឹងរឹតតែធ្វើឱ្យឱកាសនៃការរីកធំធាត់របស់មហាសេដ្ឋីចិននៅតែកើនឡើងជាបន្តបន្ទាប់។
យ៉ាងណាក៏ដោយ នៅមានរឿងដែលគួរឱ្យចាប់អារម្មណ៍មួយប្រការទៀត នោះគឺ បណ្ដាក្រុមអ្នកមានក្នុងយុគបច្ចុប្បន្នកំពុងផ្ដល់ចំណាប់អារម្មណ៍ទៅលើផ្នែកសិល្បៈ និងកីឡាយ៉ាងខ្លាំងទៀតផង ជាពិសេសផ្នែកសិល្បៈ អាចរាប់បានថា ជាការលើកកម្រិតឡើងទាំងក្នុងន័យឋានៈ និងទ្រព្យសម្បត្តិ ដូចជាការដេញថ្លៃផ្ទាំងគំនូររបស់វិចិត្រករ Jean-Michel Basquiat ដែលមានតម្លៃខ្ពស់ដល់ទៅ 110.5 លានដុល្លារអាមេរិក រួមទាំង ក្លិបកីឡាកំពូលៗទាំង 140 លើពិភពលោក ក៏មានមហាសេដ្ឋីល្បីៗដល់ទៅ 109 នាក់កំពុងធ្វើជាម្ចាស់ផងដែរ៕
ប្រភព៖ Bloomberg
ប្រែសម្រួលដោយ៖ តាវ៉ែនតា
October 31, 2017
Man Utd សម្លឹងរកកៅអីវគ្គ16ក្រុម ខណៈ Juventus រំពឹងផ្តួល Sporting
ក្រុមបិសាចក្រហម Manchester United របស់លោក Jose Mourinho នឹងសម្លឹងរកការឈ្នះកៅអីទៅប្រកួតវគ្គ16ក្រុមចុងក្រោយនៃក្របខ័ណ្ឌ Champions League នៅពេលដែលពួកគេធ្វើជាម្ចាស់ផ្ទះទទួលក្រុមបាតតារាង Benifica ក្នុងការប្រកួតពូល A នៅរាត្រីនេះ។
ក្រុមរបស់លោក Mourinho អាចនឹងឈ្នះកៅអីទៅលេងក្នុងវគ្គ16ក្រុម ដោយការនៅសល់2ប្រកួតទៀត តាមរយៈការយកឈ្នះនៅកីឡដ្ឋាន Old Trafford ប្រសិនបើ Basel គេចផុតពីបរាជ័យពេលប៉ះក្រុម CSKA Moscow។ Man Utd មិនស្គាល់ចាញ់សោះលើទឹកដីខ្លួនឯង ពីការជួបប្រកួតជាមួយនឹងក្រុមមកពីព័រទុយហ្គាល់ចំនួន12លើក ខណៈដែលការចាញ់ជាលើកចុងក្រោយរបស់ពួកគេលើទឹកដីខ្លួនឯងក្នុងក្របខ័ណ្ឌអឺរ៉ុប បានកើតឡើងក្នុងលទ្ធផល 2-1 ពេលជួបក្រុម Real Madrid កាលពីរដូវកាលឆ្នាំ2012-2013។
Benfica ហាក់កំពុងតែឆ្ពោះទៅកាន់ការធ្លាក់ចេញ ក្រោយពីចាញ់3លើកពីការប្រកួតបើកឆាកទាំង3លើករបស់ពួកគេ ហើយនិងលេងដោយគ្មានខ្សែការពារជើងចាស់ Luisao ក្រោយពីការរងពិន័យកាតក្រហម ក្នុងពេលក្រុមខ្លួនចាញ់ Man United 1-0 ក្នុងក្រុង Lisbon កាលពី2 សប្តាហ៍មុន។ ខ្សែប្រយុទ្ធសញ្ជាតិប្រេស៊ីល Jonas បានរកគ្រាប់បាល់បញ្ចូលទីក្នុងការប្រកួតលីកលើកទី12របស់គេ ក្នុងពេលក្រុមខ្លួនទទួលជ័យជម្នះ 1-0 លើក្រុម Feirense កាលពីថ្ងៃសុក្រ ខណៈដែលក្រុម Man United បានស្តារមុខមាត់ពីការរងបរាជ័យក្រោមស្នាដៃក្រុម Huddersfield Town តាមរយៈការផ្តួលក្រុម Tottenham 1-0 កាលពីថ្ងៃសៅរ៍ តាមរយៈគ្រាប់បាល់ឈ្នះរបស់ Anthony Martial។ ស្របពេលជាមួយគ្នានេះ Sporting Lisbon និង Juventus នឹងត្រូវប្រជែងយកចំណាត់ថ្នាក់លេខ2ក្នុងពូល D បន្ទាប់ពី Barcelona ខណៈការប្រកួតនៅរាត្រីនេះ គឺជាការប្រកួតដ៏សំខាន់ ក្រោយពីក្រុមយក្សរបស់អ៊ីតាលី បានយកឈ្នះ 2-1 កាលពីជើងមុន ក្នុងទីក្រុង Turin។
ក្រុម Sporting កំពុងតែសម្លឹងរកការតាមស្មើពិន្ទុរបស់គូប្រកួតខ្លួន បើទោះបី Juventus នឹងស្ថិតយ៉ាងប្រកៀកក្នុងការទៅវគ្គបន្ត ប្រសិនបើឈ្នះក៏ដោយ។ Juventus ទើបតែបានកត់ត្រាជ័យជម្នះ6លើកជាប់ៗគ្នានេះ ក្នុងក្របខ័ណ្ឌ Serie A ហើយពួកគេបានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម AC Milan 2-០ កាលពីថ្ងៃសៅរ៍កន្លងទៅ។ ការប្រកួតទាំងពីរគូនឹងចាប់ផ្តើមនៅម៉ោង 2:45ទៀបភ្លឺ៕
ប្រភពពី៖ Sport 24
October 31, 2017
រកឃើញឈុតប្រចាំជាតិដែលជាប់ជយលាភីក្នុងកម្មវិធី Miss Earth 2017 ហើយ
បើតាមគេហទំព័រ normannorman ដែលបានចេញផ្សាយនៅថ្ងៃទី31 ខែតុលា ឆ្នាំ2017នេះ បានឱ្យដឹងថា ការរៀបចំប្រកួតឈុតប្រចាំប្រទេសសម្រាប់ការប្រកួតបវរកញ្ញាផែនដី ឬ Miss Earth 2017 លំដាប់អន្ដរជាតិនៅក្នុងប្រទេស ហ្វីលីពីន កាលពីរាត្រីថ្ងៃទី30 ខែតុលាកន្លងទៅថ្មីនេះៗ គេបានរកឃើញនូវឈុតប្រចាំជាតិដែលស្អាត និងមានភាពច្នៃប្រឌិតល្អដាច់គេហើយ។ ឈុតដែលបានជាប់ជយលាភីប្រចាំទ្វីបអាស៊ី មេដាយមាសបានទៅលើប្រទេស ហ្វីលីពីន ហើយមេដាយប្រាក់បានទៅលើប្រទេស ថៃ និងមេដាយសំរិទ្ធបានទៅលើប្រទេស ជប៉ុន ផងដែរ។
គួរបញ្ជាក់ផងដែរថា មេដាយទាំងបីប្រភេទ ត្រូវបានបែងចែកទៅតាមតំបន់ទ្វីបដែលមានដូចជា អាស៊ី អឺរ៉ុបខាងលិច អឺរ៉ុបខាងកើត អាមេរិកខាងជើង អាមេរិកខាងត្បូង និងទ្វីបអាហ្វ្រិក។ ដោយឡែកកម្មវីធីប្រកួតបវរកញ្ញា Miss Earth 2017 នេះក៏នៅមានពានរង្វាន់មេដាយទំនាក់ទំនងមិត្តភាពល្អក្នុងក្រុម ដែលគេឱ្យឈ្មោះថា Miss Friendship គឺបានបែងចែកមេដាយជាបីក្រុមដែលបានទៅលើបណ្ដាប្រទេសដូចជា ៖ ប្រទេស ស៊ុយអែត សៀរ៉ា កូរ៉េខាងត្បូង ប៉េរូ អេស្ប៉ាញ ជប៉ុន ឥណ្ឌា ស្វីស និងប្រទេស តុងហ្គាផងដែរ៕
សូមទស្សនាវីដេអូខាងក្រោម៖

https://youtu.be/SiOD37g4Ks4

October 31, 2017
តារាប្រុសនៅក្នុងរឿង Lovers in Prague ទទួលមរណភាពដ៏គួរឱ្យរន្ធត់
នៅទីបំផុតតារាប្រុសល្បីឈ្មោះរបស់ប្រទេសកូរ៉េខាងត្បូងដែលធ្លាប់ទទួលបានពានរង្វាន់ជាច្រើន បានស្លាប់បាត់បង់ជីវិតភ្លាមៗនៅក្នុងគ្រោះថ្នាក់ចរាចរណ៍ដ៏គួរឱ្យរន្ធត់មួយ ដែលបានបណ្ដាលឱ្យពិភពសិល្បៈកូរ៉េទាំងមូលមានភាពភ្ញាក់ផ្អើលជាខ្លាំង។ តារាប្រុសខាងលើមានឈ្មោះថា Kim Joo Hyuk មានវ័យ 45ឆ្នាំដែលមហាជនអ្នកគាំទ្របានស្គាល់លោកយ៉ាងច្បាស់នៅក្នុងរឿង Lovers in Prague បានជួបគ្រោះថ្នាក់ចរាចរណ៍យ៉ាងគួរឱ្យរន្ធត់នៅថ្ងៃទី30 ខែតុលា ឆ្នាំ2017 វេលាម៉ោង 18.30 នាទី ។ នេះបើតាមសារព័ត៌មាន Koreaboo ដែលបានចេញផ្សាយកាលពីល្ងាចថ្ងៃទី30 ខែតុលា ឆ្នាំ2017។

បើតាមមន្ត្រីប៉ូលីសនៅក្នុងតំបន់ Gangnam បានប្រាប់ឱ្យដឹងថា “នៅល្ងាចថ្ងៃទី30 ខែតុលា លោក Kim JooHyukបានបើករថយន្តត្រឡប់ទៅកាន់គេហដ្ឋានរបស់លោក។ លោកបើករថយន្ដប្រភេទ Mercedes Benz SUV ខណៈដែលលោកបានបើកបុកជាមួយរថយន្ដម៉ាក Hyundai Grandeurនោះ។ បន្ទាប់ពីបានបុកគ្នាយ៉ាងខ្លាំងរួចមក រថយន្ដតារាប្រុសរូបនេះ បានជ្រុលទៅបុកទង្គិចជាមួយអគារចំណតរថយន្ដ Samseong-dong បណ្ដាលឱ្យរថយន្ដរបស់លោកក្រឡាប់ភា្លមៗនៅនឹងកន្លែងកើតហេតុ និងឆាបឆេះព្រឹបឡើងតែម្ដង។ ក្រោយកើតហេតុភ្លាមៗនេះ ក្រុមប៉ូលិសពន្លត់អគ្គីភ័យ បានជួយពន្លត់អណ្ដាតភ្លើងដែលកំពុងឆាបឆេះរថយន្ដរបស់លោក ព្រមទាំងប្រញាប់បញ្ជូនខ្លួនលោកទៅមន្ទីរពេទ្យដើម្បីសង្គ្រោះបន្ទាន់ភ្លាមៗដែរ។ ប៉ុន្តែយ៉ាងណាក៏ដោយ ខណៈទៅដល់មន្ទីពេទ្យ តារាប្រុសរូបនេះទើបតែទទួលបានការជួយសង្គ្រោះបឋម CPR ដំណាក់កាលទី 1 ប៉ុណ្ណោះ ប៉ុន្តែគ្រូពេទ្យក៏បានប្រកាសឱ្យដឹងថា លោកបានស្លាប់បាត់បង់ជីវិតទៅហើយ” ។
ដើម្បីឱ្យកាន់តែជាក់ច្បាស់សូមទស្សនាវីដេអូខាងក្រោមនេះ៖
https://youtu.be/kbpR5N2-K4c
https://youtu.be/zSN-G47XPzY

October 31, 2017
ថ្នាក់ដឹកនាំជំរុញឱ្យប្រជាជនខ្មែរបន្តគាំទ្រ និងប្រើប្រាស់ផលិតផលក្នុងស្រុក
ភ្នំពេញ៖ ឯកឧត្ដម ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្ត្រីស្តីទីនៃទីស្តីការគណៈរដ្ឋមន្ត្រីបានអំពាវនាវឱ្យប្រជាជនខ្មែរបន្តគាំទ្រ និងប្រើប្រាស់ផលិតផលក្នុងស្រុក ដើម្បីពង្រឹងចង្វាក់ផលិតកម្មជាតិ សំដៅបង្កើតឱកាសការងារជូនប្រជាជន និងរួមចំណែកកាត់បន្ថយភាពក្រីក្រ។
ឯកឧត្ដមឧបនាយករដ្ឋមន្ត្រី បានមានប្រសាសន៍ដូច្នេះនៅក្នុងឱកាសអញ្ជើញជាអធិបតីភាព ពិធីបើកសម្ពោធ “ពិព័រណ៍ពាណិជ្ជកម្មផលិតផលខ្មែរ ក្នុងយុទ្ធនាការទិញផលិតផលខ្មែរ ឆ្នាំ2017” ដែលរៀបចំឡើងដោយអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម កាលពីរសៀលថ្ងៃទី26 ខែតុលា ឆ្នាំ2017 នៅឯមជ្ឈមណ្ឌលវិមានសុភមង្គលស្ទឹងមានជ័យ រាជធានីភ្នំពេញដែលពិព័រណ៍នេះនឹងត្រូវបញ្ចប់នៅថ្ងៃទី29 តុលា។
ឯកឧត្តមឧបនាយករដ្ឋមន្ត្រី ប៊ិន ឈិន បានកោតសរសើរចំពោះការផ្តួចផ្តើមរបស់ក្រសួងពាណិជ្ជកម្មដែលបានដាក់ចេញនូវយុទ្ធនាការទិញផលិតផលខ្មែរ ក្នុងក្របខ័ណ្ឌទូទាំងប្រទេស ដើម្បីបំផុសឱ្យពលរដ្ឋកម្ពុជាចូលរួមប្រើប្រាស់ផលិតផលខ្មែរ ជំនួសផលិតផលនាំចូលពីបរទេស។ តាមរយៈការរៀបចំ និងការចូលរួមពិព័រណ៍ពាណិជ្ជកម្មជាតិ និងអន្តរជាតិ បានធ្វើឱ្យទំហំពាណិជ្ជកម្មកម្ពុជា មានកំណើនកាន់តែប្រសើររៀងរាល់ឆ្នាំ។
ទន្ទឹមគ្នានេះ ឯកឧត្តមរដ្ឋមន្ត្រី ប៉ាន សូរស័ក្តិ បានគូសបញ្ជាក់ថា ក្រសួងពាណិជ្ជកម្មបានរៀបចំដោយជោគជ័យនូវយុទ្ធនាការទិញផលិតផលខ្មែរ រដូវកាលទី1នៅរាជធានីភ្នំពេញ ខេត្តសៀមរាប ខេត្តកំពង់ចាម និងខេត្តព្រះសីហនុ។ សម្រាប់រដូវកាលទី2នេះ ក្រសួងនឹងបន្តធ្វើឱ្យបាននៅក្នុងខេត្ត-ក្រុងចំនួន 4ទៀត ដើម្បីទាក់ទាញការគាំទ្រកាន់តែច្រើនពីប្រជាជន ចំពោះផលិតផលខ្មែរ។
សូមបញ្ជាក់ថា នៅក្នុងពិព័រណ៍ពាណិជ្ជកម្មថ្ងៃនោះ មានក្រុមហ៊ុនចូលរួមចំនួន 194ក្រុមហ៊ុន និងមានស្តង់លក់សរុបចំនួន 200ស្តង់ ហើយក្នុងនោះក៏មានរៀបចំសិក្ខាសាលា កម្មវិធីជំនួបពិភាក្សារវាងអ្នកផលិត-អ្នកផ្គត់ផ្គង់ និងអ្នកបញ្ជាទិញ-អ្នកប្រើប្រាស់ផលិតផលខ្មែរ ព្រមទាំងការប្រគំតន្ត្រី ដែលមានការចូលរួមសម្តែងពីសិល្បករ និងសិល្បការិនីល្បីៗនៅក្នុងព្រះរាជាណាចក្រកម្ពុជាផងដែរ៕
October 31, 2017
គណៈប្រតិភូចិននៃខេត្ដគុនមិញ មើលឃើញឱកាសវិនិយោគលើវិស័យទេសចរណ៍នៅកម្ពុជា
ភ្នំពេញ – ស្របតាមការអនុវត្ដគោលនយោបាយទាក់ទាញភ្ញៀវទេសចរ«China Ready» ដែលកម្ពុជារំពឹងថា នៅឆ្នាំ2020 អាចនឹងស្រូបយកបានភ្ញៀវទេសចរចិនប្រមាណ2លានក្នុងមួយឆ្នាំ គណៈប្រតិភូចិននៃខេត្តគុនមិញ បានសម្ដែងនូវចំណាប់អារម្មណ៍ និងកំពុងតែសម្លឹងឃើញឱកាសនៃការវិនិយោគលើវិស័យទេសចរណ៍នៅកម្ពុជា ខណៈកម្ពុជាជាប្រទេសមានសក្ដានុពលខាងផ្នែកទេសចរណ៍បែបវប្បធម៌ និងអេកូទេសចរណ៍។
លោករដ្ឋមន្ត្រី ថោង ខុន បានលើកឡើងថា ការសម្រេចចិត្តរបស់គណៈប្រតិភូចិននៃខេត្ដគុនមិញ ដែលមានបំណងមកវិនិយោគនៅកម្ពុជាលើវិស័យទេសចរណ៍ គឺជាការសម្រេចចិត្តមួយដ៏ត្រឹមត្រូវ ព្រោះកម្ពុជាជាប្រទេសមានសក្តានុពលខ្ពស់ផ្នែកទេសចរណ៍ ពិសេសប្រទេសកម្ពុជាទាំងមូលពោរពេញទៅដោយសុខសន្តិភាព ស្ថិរភាពនយោ បាយ និងច្បាប់វិនិយោគក៏អំណោយផល និងផ្តល់ការអនុគ្រោះដល់វិយោគិនផងដែរ។ ឯកឧត្ដមបន្ដ កម្ពុជាក៏មានកិច្ចសហប្រតិបត្តិការល្អជាយុទ្ធសាស្ត្រគ្រប់ជ្រុងជ្រោយ ជាមួយសាធារណរដ្ឋប្រជាមានិតចិន និងជាសមាជិកនៃប្រទេសតាមបណ្តោយផ្លូវសូត្រសមុទ្រ ដែលនឹងអាចទទួលបានផលប្រយោជន៍យ៉ាងច្រើន ក្នុងក្របខ័ណ្ឌនៃកិច្ចសហប្រតិបត្តិការនេះ។ ដូច្នេះកំណើនភ្ញៀវទេសចរនៅកម្ពុជា មិនអាចកាត់ផ្តាច់ចេញបានពីទេសចរចិនបានឡើយ។
នៅឆ្នាំ2016 កម្ពុជាទទួលបានភ្ញៀវទេសចរចិន 83ម៉ឺននាក់ ហើយនៅឆ្នាំ2020 ខាងមុខ កម្ពុជាកំពុងរៀបចំខ្លួនជាច្រើនដើម្បីទាក់ទាញ និងស្រូបយកភ្ញៀវទេសចរចិនឲ្យបានយ៉ាងតិច2លាននាក់ ជាមួយកំណើននៃភ្ញៀវទេសចរបរទេសប្រមាណ7លាននាក់។ តាមរយៈការមានកំណើនភ្ញៀវទេសចរបរទេសនៅឆ្នាំ2020 កម្ពុជានឹងត្រូវការកម្លាំងពលកម្មបម្រើការងារផ្នែកទេសចរណ៍ជិត1លាននាក់ ស្របពេលដែលឆ្នាំ2017នេះ មានមនុស្សម្រើការងារដោយផ្ទាល់ក្នុងឧស្សាហកម្មទេសចរណ៍នេះជាង 62ម៉ឺននាក់ និងដោយប្រយោលរាប់សិបម៉ឺននាក់ទៀត។
ជាមួយគ្នាលោក វ៉ាង យូ ជុង អនុប្រធានគណៈកម្មាធិការរដ្ឋបាលរមណីយដ្ឋានជាតិខេត្តគុនមិញ សាធារណរដ្ឋប្រជាមានិតចិន បានបង្ហាញពីឆន្ទៈ និងគោលបំណងនៃការវិនិយោគលើវិស័យទេសចរណ៍នៅកម្ពុជា។ ពិសេសក៏បានអញ្ជើញរដ្ឋមន្ដ្រីក្រសួងទេសចរណ៍ទៅទស្សនកិច្ចនៅតំបន់រមណីយដ្ឋាននៅខេត្ដគុនមិញផងដែរ ដើម្បីផ្លាស់ប្ដូរបទពិសោធគ្នាទៅវិញទៅមក។
គួររំឭកថា តាមការព្យាកររបស់អង្គការទេសចរណ៍ពិភពលោក ឆ្នាំ2020 ខាងមុខ ភ្ញៀវទេសចរចិនរហូតដល់ទៅ ជាង 200លាននាក់នឹងចេញទៅក្រៅប្រទេសដែលមានការចំណាយរហូតជាង 420 ពាន់លានដុល្លារអាមេរិក ក្នុងនោះ 70ភាគរយមកអាស៊ី។ ក្នុងចំណោមបណ្តាប្រទេសអាស៊ានទាំង10 ទើប បានទទួលភ្ញៀវទេសចរចិនជាង20លាននាក់ប៉ុណ្ណោះ ក្នុងនោះប្រទេសថៃ និងម៉ាឡេស៊ី ទទួលបានភ្ញៀវទេសចរចិនច្រើនជាងគេ។
សាធារណរដ្ឋប្រជាមានិតចិន មានទីតាំងស្ថិតនៅក្នុងតំបន់អាស៊ីបូព៌ា ដែលមានផ្ទៃដីសរុបធំលំដាប់ថ្នាក់ទី3 និងជាប្រទេសមហាអំណាចសេដ្ឋកិច្ចពិភពលោក ជាប់ចំណាត់ថ្នាក់ទី2 បន្ទាប់ពីសហរដ្ឋអាមេរិក ដោយមានផលិតផលក្នុងស្រុកសរុប (GDP) ជាង10ទ្រីលានដុល្លារ នៃផលិតផលក្នុងស្រុកសរុប នៅឆ្នាំ2014 ដែលមានអត្រាកំណើនជាមធ្យម 7.4% ក្នុងមួយឆ្នាំ និងនៅឆ្នាំ2015 មានចំនួន11ទ្រីលានដុល្លារ នៃផលិតផលក្នុងស្រុកសរុប ដែលមានកំណើន6.8%៕
October 31, 2017
ក្រុមហ៊ុន Taixi របស់ថៃចង់ចូលមកទីផ្សារប្រទេសកម្ពុជា
ភ្នំពេញ៖ លោកសាស្ត្រាចារ្យ Oudom Wang ប្រធានក្រុមហ៊ុន Taixi Development Group Co.,Ltd. បានដឹកនាំគណៈប្រតិភូមួយក្រុមចូលជួបពិភាក្សាស្ថានភាពទីផ្សារក្នុងប្រទេសកម្ពុជា ជាមួយឯកឧត្តម ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សហកម្ម និងសិប្បកម្ម មុននឹងក្រុមហ៊ុននេះសម្រេចចិត្តចូលមកវិនិយោគនៅលើទីផ្សារក្នុងប្រទេសកម្ពុជា។
លោកសាស្ត្រាចារ្យ Oudom Wang បានវាយតម្លៃខ្ពស់ចំពោះភាពរីកចម្រើន និងស្ថានភាពទីផ្សាររបស់កម្ពុជានាពេលបច្ចុប្បន្ន។ លោកបានជម្រាបជូនពីកម្រងក្រុមហ៊ុនរបស់ខ្លួន ដោយបានបញ្ជាក់ថា ក្រុមហ៊ុនរបស់លោកបានចុះបញ្ជីការតាមផ្លូវច្បាប់នៅប្រទេសថៃដែលមានទុនចុះបញ្ជីចំនួន20លានដុល្លារសហរដ្ឋអាមេរិក មានក្រុមហ៊ុនជាបុត្រសម្ព័ន្ធរបស់ខ្លួនចំនួន 13 និងសាខាចំនួន25 ។ ក្នុងនោះក្រុមហ៊ុន Taixi Development Group កាន់ភាគហ៊ុន 100% និងជាង 50% នៅប្រទេសចិន និងអាស៊ីអាគ្នេយ៍។ ក្រុមហ៊ុនមាននិយោជិតជាង 1,600 នាក់ មានកម្មវត្ថុអាជីវកម្មដូចជា ការវិនិយោគពាណិជ្ជកម្ម អចលនទ្រព្យ ដឹកជញ្ជូនផ្លូវអាកាស ចំណីអាហារ សណ្ឋាគារ អភិវឌ្ឍន៍កសិកម្ម សំណង់ ឧបករណ៍សុខាភិបាល ផលិតផលសុខភាពប្រព័ន្ធផ្សព្វផ្សាយ ទេសចរណ៍ ថាមពលបៃតង ដំណាំ និងផលិតផលកៅស៊ូ ជាដើម ។
លោកបញ្ជាក់បន្ថែមថា ប្រធានកិត្តយសរបស់ក្រុមហ៊ុនគឺ ឯកឧត្តម Chavalit Yongchaiyudh អតីតនាយករដ្ឋមន្ត្រីនៃរាជាណាចក្រថៃ ។ ហើយគោលបំណងនៃជំនួបថ្ងៃនេះ គឺពិនិត្យលទ្ធភាពវិនិយោគនៅកម្ពុជា ហើយនៅថ្ងៃមុខនឹងមានប្រតិភូក្រុមហ៊ុនវិនិយោគ ជាពិសេសផ្នែកវិស័យរោងចក្រនឹងមកសិក្សាស្វែងយល់ពីសក្តានុពលវិនិយោគនៅកម្ពុជា គឺអនុវត្តតាមគោលនយោបាយរបស់រដ្ឋចិនក្នុងការជំរុញឱ្យក្រុមហ៊ុនវិនិយោគរបស់ចិនមកបណ្តាក់ទុននៅក្រៅប្រទេសឱ្យបានច្រើន។ ជាពិសេសនាឱកាសនេះគឺ ចង់បានការណែនាំពីឯកឧត្តមទេសរដ្ឋមន្ត្រី ចម ប្រសិទ្ធ ពីស្ថានភាពទូទៅរបស់កម្ពុជា ។
ជាមួយនឹងការលើកឡើងខាងលើ ឯកឧត្តមទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងចាត់ទុកគោលនយោបាយផ្លូវមួយខ្សែក្រវាត់មួយរបស់ចិនជាស្ពានចម្លងដ៏សំខាន់នៃទំនាក់ទំនងសេដ្ឋកិច្ចប្រសើរនៅក្នុងតំបន់ និងប្រទេសជាមិត្ត។ ឯកឧត្តមទេសរដ្ឋមន្ត្រី បានជម្រាបជូនពីស្ថានភាពទូទៅរបស់កម្ពុជាដោយលើកកត្តា 3 យ៉ាងជាសំខាន់ដែលជាមូលដ្ឋានបង្កបរិយាកាសវិនិយោគយ៉ាងប្រពៃរួមមាន៖ កម្ពុជាមានស្ថិរភាពនយោបាយ និងម៉ាក្រូសេដ្ឋកិច្ច តម្លាភាពនៃក្របខ័ណ្ឌច្បាប់ និងភាពអនុគ្រោះពាណិជ្ជកម្មដែលអនុញ្ញាតឱ្យទំនិញនាំចេញពីកម្ពុជាដោយរួចពន្ធ និងមិនជាប់កូតាទៅកាន់ប្រទេសអភិវឌ្ឍន៍ និងប្រទេសដៃគូជាច្រើនរួមទាំងប្រទេសចិនផងដែរ ។
កម្ពុជាមានការរីកចម្រើនស្ទើរគ្រប់វិស័យ ជាពិសេសរោងចក្រកាត់ដេរសម្លៀកបំពាក់ និងស្បែកជើងដែលបច្ចុប្បន្នមានជិត1ពាន់រោងចក្រ នេះដោយសារកម្ពុជាទទួលបានភាពអនុគ្រោះពាណិជ្ជកម្មនេះឯង។ ឯកឧត្តមទេសរដ្ឋមន្ត្រី ចម ប្រសិទ្ធ បានណែនាំឱ្យប្រតិភូក្រុមហ៊ុនចាប់អារម្មណ៍នៅទីតាំងខេត្តព្រះសីហនុដែលរាជរដ្ឋាភិបាលបានកំណត់ជាតំបន់សេដ្ឋកិច្ចពិសេសពហុបំណងក្នុងខេត្តទាំងមូលតែម្តង ពីព្រោះជាខេត្តដែលមានកំពង់ផែទឹកជ្រៅ មានផ្លូវ រថភ្លើង និងព្រលានយន្តហោះ៕
October 31, 2017
លោក Puel ជួបការរីករាយថ្ងៃបើកឆាក ខណៈ Leicester ផ្តួល Everton
លោក Claude Puel ដែលជាអ្នកចាត់ការទូទៅថ្មីរបស់ក្រុម Leicester បានបញ្ជាក់ថា ការទទួលជ័យជម្នះលើក្រុមទូកក្តោង Everton ក្នុងលទ្ធផល 2-0 កាលពីថ្ងៃអាទិត្យ គឺជាវិធីសាស្ត្រដ៏ល្អបំផុតក្នុងការចាប់ផ្តើមការងារក្នុងនាមជាគ្រូបង្វឹករបស់លោក។
អតីតគ្រូបង្វឹករបស់ក្លិប Southampton រូបនេះ ដែលត្រូវបានតែងតាំងកាលពីថ្ងៃពុធ ដើម្បីជំនួសកន្លែងរបស់លោក Craig Shakespeare នោះ បានឃើញ Jamie Vardy បង្ហាញពីទម្រង់លេងយ៉ាងល្អ ក្នុងតំបន់ប្រយុទ្ធ ហើយកីឡាករ Demarai Gray បានធ្វើឲ្យកីឡាករ Jonjoe Kenny ស៊ុតបាល់ចូលទីរបស់ខ្លួនឯងមួយគ្រាប់។
លោកគ្រូបង្វឹកសញ្ជាតិបារាំងរូបនេះ ដែលក្រុមរបស់លោកបានឡើងទៅឈរក្នុងចំណាត់ថ្នាក់លេខ11នៅលើតារាងក្របខ័ណ្ឌ Premier League នោះ បានឲ្យដឹងថា៖ «ខ្ញុំបានឃើញក្រុមមួយក្នុង Leicester មានស្មារតីប្រយុទ្ធល្អ មានការរៀបចំល្អ និងមានសាមគ្គីភាពដ៏រឹងមាំ»។ លោក Puel បានបន្ថែមទៀតថា៖ «ខ្ញុំពិតជាចាប់អារម្មណ៍ទៅនឹងទម្រង់លេងរបស់កីឡាករ។
ខ្ញុំសង្ឃឹមថា វាគ្រាន់តែជាការចាប់ផ្តើមនៃរឿងមួយប៉ុណ្ណោះ»។ ដោយឡែក ក្រុម Everton ក្រោមការដឹកនាំរបស់លោកគ្រូបង្វឹកបណ្តោះអាសន្ន David Unsworth ក្រោយពីការបណ្តេញលោក Ronald Koeman កាលពីថ្ងៃចន្ទនោះ នៅតែស្ថិតក្នុងតំបន់កាត់ចោលដដែល។ បច្ចុប្បន្ន ក្រុម Leicester ដែលជាម្ចាស់ជើងឯកក្របខ័ណ្ឌ Premier League រដូវកាលឆ្នាំ2015-2016 កត់ត្រាជ័យជម្នះ3លើកជាប់ៗគ្នា ក្នុងក្របខ័ណ្ឌកំពូល និងពាន Carabao Cup ដោយជ័យជម្នះពីរលើកបានកើតឡើងក្រោមការដឹកនាំរបស់លោក Michael Appleton និង1លើកទៀតក្រោមការដឹកនាំរបស់លោក Puel៕
ប្រភពពី៖ BBC
October 31, 2017
ឱក សុគន្ធកញ្ញា បំផុសគំនិតយុវវ័យខ្មែរឱ្យចាប់ផ្ដើមអាន និងស្រឡាញ់សៀវភៅ
នាពេលថ្មីៗនេះ នៅលើបណ្ដាញសង្គម Facebook កំពុងតែចាប់អារម្មណ៍ជាខ្លាំងចំពោះសៀវភៅ “មនោសញ្ចេតនា” ដែលជាស្នាដៃថ្មីរបស់កវីនិពន្ធទំនុកច្រៀងប្រចាំផលិតកម្មរស្មីហង្សមាស លោក សុខ ចាន់ផល ព្រមទាំងរចនាម៉ូដរូបលើក្របសៀវភៅគឺ កញ្ញា ឱក សុគន្ធកញ្ញា ដែលជាកំពូលតារាចម្រៀងល្បីនៅក្នុងព្រះរាជាណាចក្រកម្ពុជាទៀតផង។
នៅលើ Fcaebook Page របស់ ឱក សុគន្ធកញ្ញា បានរៀបរាប់បំផុសគំនិតយុវវ័យខ្មែរឱ្យចាប់ផ្ដើមអាន និងស្រឡាញ់សៀវភៅយ៉ាងដូច្នោះថា «បើយើងក្លាយជាអ្នកដទៃ អ្វីៗនឹងល្អមែនទេ? មនោសញ្ចេតនា ជាសៀវភៅទីពីរដែលខ្ញុំទទួលបានពីអ្នកនិពន្ធដែលពោពេញដោយមនោសញ្ចេតនា សុខ ចាន់ផល អរគុណបងប្រុសដែលបានចងក្រងសៀវភៅនេះឡើង។ ចាប់ផ្តើមអានជាមួយនាងខ្ញុំ ឱក សុគន្ធកញ្ញា»។ យ៉ាងណាក្ដីពីប្រភពអ្នកនិពន្ធវេទមន្ដក៏បានលើកឡើងនូវសម្ដីរបស់ ឱក សុគន្ធកញ្ញា ថា «ការងាររបស់ខ្ញុំរាល់ថ្ងៃ គឺពឹងលើការអាន បើខ្ញុំមិនអាន គឺខ្ញុំមិនដឹងថា ពាក្យដែលខ្ញុំយកទៅនិយាយជាមួយនឹងទស្សនិកជន ឬកូនក្រុមរបស់ខ្ញុំ ត្រូវនិយាយថាម៉េចនោះទេ តែគឺខ្ញុំតែងតែសិក្សាយកពីសៀវភៅ ទើបខ្ញុំអាចយល់ដឹងពីការរស់នៅ ការប្រើប្រាស់ភាសា សិល្បៈនៃការនិយាយ តើថាយ៉ាងណាខ្លះ… »។
ឱក សុគន្ធកញ្ញា បានបន្ដលើកឡើងថា «ក្នុងមួយទំព័រៗគឺមានពាក្យពេចន៍ច្រើនណាស់ ដូច្នេះមនុស្សម្នាក់អានសៀវភៅចប់មួយក្បាល នឹងទទួលចំណេះដឹងរាប់ម៉ឺនរាប់សែនពាក្យ យកមកប្រើមិនអស់ផង។ សៀវភៅមួយក្បាលផ្ដល់ចំណេះដឹងឱ្យអ្នកអានច្រើនលើសលប់ លើសពីអ្វីដែលយើងគិតទុក។ ហើយក្នុងទស្សនៈខ្ញុំ អ្នកនិពន្ធគឺជាមនុស្សដែលរៀនបានច្រើនមែនទែន គឺច្រើនជាងអ្វីដែលយើងកំពុងតែអាននោះផង»។
គួរបញ្ជាក់ផងដែរថា ពិតជាគួរឱ្យកោតសរសើរណាស់ ដែលមានតារាល្បីៗនៅក្នុងប្រទេសកម្ពុជាដូចជា ឱក សុគន្ធកញ្ញា បានចូលរួមជំរុញការអាន ការស្រឡាញ់សៀវភៅ និងលើកទឹកចិត្តក្នុងការបន្ដវប្បធម៌នៃការអានសៀវភៅនៅកម្ពុជា បែបនេះ។ ប្រសិនបើប្រិយមិត្តមានចំណាប់អារម្មណ៍ អាចរកជាវនៅថ្ងៃនេះបាននៅតាមហាង នស២រ និង បណ្ណាល័យបញ្ញវន្ត ឬក៏តាមរយៈទូរស័ព្ទលេខ 093 482 578 និង 077 765 063៕

October 28, 2017
Taylor Swift បង្ហាញស្ទីលអាក្រាតកាយទាំងស្រុងនៅក្នុងបទទើបចេញថ្មី
នៅពេលថ្មីៗនេះ គ្រាន់តែចាប់ផ្ដើមបទចម្រៀងថ្មី Taylor Swift បានធ្វើឱ្យមជ្ឈដ្ឋានមហាជនភ្ញាក់ផ្អើលយ៉ាងខ្លាំងតាមរយៈស្ទីលអាក្រាតកាយនៅក្នុងបទ “Ready For It?” ដែលត្រូវបានអ្នកគាំទ្ររិះគន់នាងនៅក្នុង Youtubeថា ពួកគេខកចិត្តដោយសារតែគំនិតនៃការបង្កើតថ្មីមួយនេះវាខ្លាំងពេក ហើយភាពច្របូកច្របល់ និងបង្ហាញភាពពិសពុលកាន់តែខ្លាំងឡើងទៀតផង។
ជាក់ស្ដែងនៅក្នុងបទចម្រៀងមួយបទនេះនាង Taylor Swift បានលេងស្ទីលអាក្រាតកាយ អណ្ដែតនៅលើលម្ហ ទាំងរាងកាយនាងត្រូវបានគ្រប់គ្រងដោយថាមពលវិទ្យាសាស្ត្រ ត្រឹមវិនាទីខ្លីៗតែប៉ុណ្ណោះ ក៏ប៉ុន្ដែរូបអាក្រាតបែបនេះ បែរមានរហូតដល់ទៅច្រើនប្លង់ទៅវិញ។ យ៉ាងណាមិញ គួរកត់សម្គាល់ដែលថា បទចម្រៀងនេះ គឺមិនមានប្លង់ថ្មី និងគំនិតថ្មីឡើយ ។ តារាស្រីរូបនេះក៏ត្រូវបានអ្នកគាំទ្ររិះគន់បន្ថែមថា ប្រើប្រាស់ប្លង់ដដែលៗ គឺ ប្លង់ដេកដួល ដែលមានសឹងតែគ្រប់បទ ប្រហែលនាងចង់បង្ហាញពីអត្តសញ្ញាណរបស់នាងក៏មិនដឹង?។
គួរបញ្ជាក់ផងដែរថា បទ “Ready For It?” ត្រូវបានបង្ហោះនៅលើ Youtube នៅថ្ងៃទី26 ខែតុលា ឆ្នាំ2017 ថ្មីៗនេះ រហូតមកទល់ពេលនេះ ម៉ោងនេះ មានអ្នកចូលទស្សនាកើនឡើងដល់ 16,485,053 ហើយ តែជាអកុសលមានអ្នកបោះឆ្នោតមិនចូលចិត្តរហូតដល់ទៅ 74 ពាន់នាក់ឯណោះ៕
October 28, 2017