សង្គម និងសេដ្ឋកិច្ច - La Reine Media

វីតាមីន10មុខសម្រាប់ស្ត្រីគ្រប់រូប

អាហារហូបចុកប្រចាំថ្ងៃវាពិតជាសំខាន់ណាស់សម្រាប់ស្ត្រីយើង ដូច្នេះក្នុងនាមជាអ្នកចាត់ចែកចំណីអាហារក្នុងគ្រួសារអ្នកគួរតែជ្រើសរើសអាហារណាដែលល្អសម្រាប់អ្នក និងសមាជិកគ្រប់គ្នា ទាំងចំពោះសុខភាព និងសម្រស់។ វីតាមីនសំខាន់ណាស់សម្រាប់អ្នក ហើយវីតាមីនទាំង10ខាងក្រោមនេះរឹតតែសំខាន់ទៅទៀត ព្រោះវាគឺជាវីតាមីនដែលស្ត្រីគ្រប់រូបគួរតែផ្គត់ផ្គង់ទៅឱ្យរាងកាយឱ្យបានគ្រប់គ្រាន់ ដើម្បីឱ្យក្លាយជាស្ត្រីម្នាក់ដែលប្រកបដោយសុខភាពល្អប្រពៃ និងមានសម្រស់ដ៏ផូរផង់ជាទីទាក់ទាញចិត្ត។

1-វីតាមីន A ៈ ផ្ទុក Antioxidant ដែលស្ត្រីគ្រប់វ័យត្រូវការចាំបាច់ដើម្បីជួយសាងសង់ និងទ្រទ្រង់ឆ្អឹង ធ្មេញ ស្បែកនិងភ្នាសរំអិលជាដើម។ វីតាមីន A ក៏ជួយកាត់បន្ថយឱកាសនៃការកើតជំងឺរលាកសន្លាក់រាំរ៉ៃជំនួយភ្នែក និងជួយការពារប្រព័ន្ធភាពស៊ាំផងដែរ។ អាហារដែលសម្បូរវីតាមីន A មានដូចជា ការ៉ុត ល្ពៅ ត្រសក់ Cantaloupe ប៉េងប៉ោះ ត្របែក ឪឡឹក ខាត់ណាខៀវ ល្ហុង ស្ពៃ ស៊ុត ថ្លើម ទឹកដោះគោ និងធញ្ញជាតិជាដើម។

2-វីតាមីន B2 ៈ ជាវីតាមីនដែលអាចជួយឱ្យរាងកាយលូតលាស់បានល្អ មានសុខភាពល្អ និងផ្តល់ថាមពលដល់រាងកាយ។ ជួយពង្រឹកប្រព័ន្ធភាពស៊ាំ បន្ថយភាពហត់នឿយ ធុញថប់ និងស្ពឹកស្រពន់ជាដើម។វត្តមានរបស់វីតាមីន B2 ជួយការពារមិនឱ្យកើតមានបញ្ហាប្រេះបែកបបូរមាត់ សក់ស្ងួត ស្បែកជ្រួញ និងរមាស់ស្បែកជាដើម។ ប្រភេទអាហារដែលសម្បូរវីតាមីនប្រភេទនេះមានដូចជា Cheeseទឹកដោះគោ បន្លែបៃតង ស៊ុត ធញ្ញជាតិ សណ្តែកបាយ អាល់ម៉ុន និងផ្សិតជាដើម។

3-វីតាមីន B6 ៈ បន្ថែមការចងចាំ កាត់បន្ថយជំងឺបេះដូង អស់កម្លាំង ជំនួយខួរក្បាល សម្រួលដល់កម្រិតជាតិស្ករក្នុងឈាម បន្ថយអាការចាញ់កូន និងការពារជំងឺខ្វះឈាម។ចេក សាច់ ផ្លែប៊័រ សណ្តែក ត្រី គ្រាប់ធញ្ញជាតិ គឺជាអាហារដែលមានផ្ទុកវីតាមីនប្រភេទនេះច្រើនជាងគេ។

4-វីតាមីន B7 ៈ វីតាមីនប្រភេទនេះត្រូវការ ដើម្បីភាពរីកលូតលាស់នៃកោសិកាស្បែក និងការសំយោគរបស់អាស៊ីតខ្លាញ់។ វាជួយរក្សាសំណើមឱ្យសក់ និងស្បែក ជួយជុំរុញការលូតលាស់នៃសក់ ព្យាបាលបញ្ហាក្រចកឆាប់បាក់។ វីតាមីនB7 ក៏ជាតម្រូវការសម្រាប់ការលូតលាស់នៃឆ្អឹង និងជួយគ្រប់គ្រងកម្រិតកូឡេស្តេរ៉ូលផងដែរ។ អាហារមួយចំនួនដែលសម្បូរវីតាមីនប្រភេទនេះមានដូចជា ត្រី ដំឡូងជ្វា អាល់ម៉ុន ការ៉ុត ចេក ផ្លែឈើពណ៌លឿង បន្លែបៃតង សណ្តែក ទឹកដោះគោ យ៉ា-អួរ និងម្ទេស…។

5-វីតាមីន B9 ៈ សំខាន់ណាស់សម្រាប់ស្ត្រីយើង ព្រោះវាជួយការពារជំងឺបេះដូង សំពោធឈាមឡើងខ្ពស់ Alzheimer អស់កម្លាំង មហារីក និងការចងចាំថយចុះជាដើម។ក្រៅពីនោះវាជួយដល់សុខភាពខួរក្បាល ព្រមទាំងជួយដល់ការលូតលាស់របស់ទារកក្នុងផ្ទៃ
ផងដែរ។ B9 មាននៅក្នុងអាហារមួយចំនួនដូចជា បន្លែបៃតង ទឹកក្រូច ត្រសក់ស្រូវ ស្ត្រូប៊ឺរី ស៊ុត និងសណ្តែក…។

6-វីតាមីន B12 ៈ វីតាមីនផ្សេងទៀតដែលស្ត្រីគួរទទួលទានគឺ B12 ដែលមានសារសំខាន់ក្នុងការជួយបំលែងអាហារសំយោគប្រូតេអីុន។ វីតាមីននេះជួយដល់បេះដូងនិងខួរក្បាលមិនឱ្យកើតមានបញ្ហាខ្វះឈាម។ អាចរកបាននៅក្នុងត្រី សាច់ ទឹកដោះគោ ស៊ុត និងយ៉ាអួជាដើម។

7-វីតាមីន E ៈ សំខាន់សម្រាប់ស្បែក សក់ និងគុណប្រយោជន៍ជាច្រើនទៀត។ វាមាននៅក្នុងស្ពៃ ប្រេងពោត ប្រេងអូលីវ គ្រាប់ផ្កាឈូករ័ត្ន ស៊ុត និងត្រសក់…។

8-វីតាមីន C ៈ ជួយបន្ថយឱកាសនៃការកើតជំងឺមហារីក ជួយបង្កើតកោសិកាឈាមក្រហម ពង្រឹកប្រព័ន្ធការពារ បង្កើតសមត្ថភាពក្នុងការព្យាបាលរាងកាយ។ ខាត់ណាខៀវ ក្រូចថ្លុង គីវី ក្រូច ត្របែក ដំឡូងបារាំង ប៉េងប៉ោះ និងស្ត្រូប៊ឺរី … សុទ្ធតែជាអាហារដែលសម្បូរទៅដោយវីតាមីន C។

9-វីតាមីន D ៈ គឺជាភ្នាក់ងារបឺតស្រូបកាល់ស្យូម ដែលដើរតួយ៉ាងសំខាន់ក្នុងការជួយពង្រឹងឆ្អឹងឱ្យរឹងមាំ និងគុណប្រយោជន៍ជាច្រើនទៀត។ ខ្លាញ់ត្រី ទឹកដោះគោ ថ្លើម និងស៊ុត… ជាអាហារដែលមានវីតាមីនប្រភេទនេះខ្ពស់ជាងគេ។

10-វីតាមីន K ៈ ដើរតួយ៉ាងសំខាន់ក្នុងការពង្រឹងឆ្អឹង សម្រួលឈាម បន្ថយឱកាសកើតជំងឺបេះដូង និងជួយដល់ប្រព័ន្ធការពាររាងកាយផងដែរ។ សម្បូរនៅក្នុង ស្ពៃក្តោប ត្រសក់ ម្ទេសចេក ប៉េងប៉ោះ ប្រេងសណ្តែក និងខ្លាញ់ត្រី….។

នៅពេលដែលរាងកាយរបស់អ្នកមានវីតាមីនទាំង10ប្រភេទនេះគ្រប់គ្រាន់ហើយនោះ ធានាថារាងកាយរបស់អ្នកពិតជាប្រកបដោយសុខភាពល្អ និងមានសម្រស់ស្រស់ស្អាតជាមិនខាន៕

November 7, 2017

ទម្លាប់ 3 យ៉ាងនៃភាពជោគជ័យ ដែលពួកអ្នកមាននាំគ្នាធ្វើជាប្រចាំ

តើធ្លាប់នឹកឆ្ងល់ដែរឬទេថា…មនុស្សដែលជួបនឹងភាពជោគជ័យយ៉ាងច្រើននាបច្ចុប្បន្ននេះ តើពួកគេមានផ្នត់គំនិត និងទស្សនៈជីវិតយ៉ាងណាខ្លះ ទើបធ្វើឱ្យអាចធ្វើដំណើរទៅដល់ចំណុចជោគជ័យនោះបានដូចបំណងបែបនេះ?។ តាមរយៈការដែលយើងបានរៀនយល់ដឹងពីបណ្ដាអ្នកមាន និងមានកេរ្តិ៍ឈ្មោះល្បីៗជាច្រើន ដែលធ្លាប់ឆ្លងកាត់ជីវិត និងឧបសគ្គដ៏ច្រើនទម្រាំនឹងអាចងើបត្រដែតឡើងក្លាយជាមនុស្សដែលទទួលបានជោគជ័យទាំងនោះរួចមក ធ្វើឱ្យយើងបានដឹងថា ពួកគេមានទម្លាប់មួយចំនួនដែលមិនសូវជាខុសប្លែកពីគ្នាប៉ុន្មានឡើយ។

នោះគឺ កិច្ចការងារប្រចាំថ្ងៃដែលយើងអាចប្រទះឃើញជាញឹកញាប់ គឺការគ្រប់គ្រងចាត់ចែងពេលវេលាក្នុងតម្លៃថោកឱ្យទទួលបានប្រយោជន៍យ៉ាងច្រើន និងដែលសំខាន់គឺ មិនចាំបាច់យកលុយទៅទិញមកទៀតផង។ បើអ្នកណាចង់សាកល្បងធ្វើជាមនុស្សម្នាក់ក្នុងចំណោមពួកអ្នកទទួលបានជោគជ័យទាំងនោះឱ្យបានម្ដងនោះ សាកល្បងនាំយកគន្លឹះសំខាន់ 3 យ៉ាងខាងក្រោមនេះទៅសាកល្បងកែច្នៃប្រើជាមួយជីវិតប្រចាំថ្ងៃលមើលក៏បាន…។

1 . ការហ្វឹកសមាធិ

ជារឿងដ៏គួរឱ្យចាប់អារម្មណ៍មួយក្នុងក្រុមមនុស្សដែលជោគជ័យយ៉ាងមហាសាលទាំងនោះ។ ការដាក់ចិត្តឱ្យស្ងប់នឹង និងអាចប្រឈមជាមួយគ្រប់ស្ថានការណ៍បានគឺជាការសាងថាមពលផ្លូវចិត្តឱ្យខ្លួនឯងក្លាយជាមនុស្សដែលមានភាពក្លាហាន និងមានសតិបញ្ញាស្មារតីច្រើនគ្រប់គ្រាន់ក្នុងការសម្រេចចិត្តជាមួយការងារធំៗនៅចំពោះមុខឱ្យត្រង់ចំៗគោលដៅខ្លាំងបំផុត ដូច្នេះហើយទើបការហ្វឹកសមាធិបានក្លាយជាអ្នកជួយលើកកម្ពស់ថាមពលខួរក្បាល និងភាពស្ងប់ខាងផ្លូវចិត្ត មិនថាប្រឈមជាមួយបញ្ហាបែបណាក៏ដោយ។ បើសិនសាកល្បងហ្វឹកហាត់អង្គុយតាំងសមាធិជាប្រចាំ យើងនឹងអាចមានឱកាសឈានទៅមុខក្នុងតួនាទីមុខតំណែងការងារ និងទទួលបានជោគជ័យកាន់តែងាយស្រួលឡើង។

2 . ការភ្ញាក់ពីព្រឹកព្រលឹម

ភ្ញាក់មុន បានលុយមុន មានមុន…ពាក្យនេះច្រើនតែត្រូវបាននិយាយនៅក្នុងក្រុមអ្នកមាន ឬក្រុមអ្នកជោគជ័យ។ អ្នកដែលភ្ញាក់ឡើងមកធ្វើការតាំងពីព្រឹកព្រលឹម ច្បាស់ជាមានពេលវេលាច្រើនក្នុងការធ្វើការងារ តាំងពីការរៀបចំផែនការយ៉ាងសន្សឹមៗយ៉ាងហ្មត់ចត់ មានពេលវេលាច្រើនគ្រប់គ្រាន់ក្នុងការធ្វើអ្វីផ្សេងៗឱ្យសម្រេចទៅបានច្រើនជាងអ្នកដែលគេងដល់ថ្ងៃបានភ្ញាក់។ ការភ្ញាក់ឡើងនៅពេលព្រឹកថែមទាំងជួយឱ្យពួកគេបានជួបជាមួយនឹងអំឡុងពេលដ៏សែនវិសេស រីកស្រស់ស្រាយដោយធាតុអាកាសដ៏សែនបរិសុទ្ធ ជួយឱ្យខួរក្បាលត្រូវបានជំរុញ និងធ្វើការបានយ៉ាងមានប្រសិទ្ធភាព។ សាកល្បងនាំគ្នាសង្កេតមើលងាយៗថា អ្នកដែលគេងដល់ថ្ងៃទើបភ្ញាក់ និងមិនចង់ងើបចេញពីគ្រែនោះ ដល់ពេលវេលាធ្វើការ ពួកគេច្រើនតែច្របូកច្របល់ជ្រួលច្រាល និងចាប់ផ្ដើមចាប់ការងារដែលត្រូវធ្វើមិនសូវជាត្រូវប៉ុន្មានឡើយ ព្រោះរវល់តែបារម្ភថា ពេលវេលាធ្វើការក្នុងមួយថ្ងៃនោះនឹងត្រូវប្រើប្រាស់អស់ជាមុន។

3 . ចេះនិយាយបដិសេធដោយពាក្យថា “ទេ” យ៉ាងសមរម្យ

ការនិយាយបដិសេធដោយពាក្យមួយម៉ាត់នេះសម្រាប់រឿងខ្លះដែលមិនមានតម្លៃគ្រប់គ្រាន់ជាមួយការរស់នៅ គ្រប់យ៉ាងអាចនឹងមាន 2 ជម្រើសឱ្យយើងជ្រើសរើស។ នៅពេលបានអ្វីមួយមក អ្វីមួយទៀតក៏នឹងបាត់បង់ទៅ ដូច្នេះការបដិសេធយ៉ាងឆ្លាតវៃគឺជាការនៅតែគ្រប់គ្រងត្រឹមតែរឿងណាមួយដែលមានតម្លៃ។ សម្លឹងមើលឱ្យធ្លុះថា តើរឿងណាដែលគួររក្សាទុក និងរឿងណាដែលគួរតែលែងចោល ទោះជាវានៅមានប្រយោជន៍ខ្លះក៏ដោយ តែនៅពេលប្រៀបធៀបជាមួយអនាគតហើយនោះ យើងអាចនឹងត្រូវជ្រើសរើសត្រឹមតែរឿងមួយដែលល្អបំផុតតែមួយគត់ប៉ុណ្ណោះ ទោះជានៅស្ដាយរឿងមួយទៀតនោះក៏ដោយ។

ឱកាស និងភាពសំណាងល្អមិនដែលបានមកដោយសារជោគវាសនា ឬព្រហ្មលិខិតនោះទេ ទោះជាយើងដើរចេញមកពីផ្លូវនៃជីវិតផ្សេងគ្នាក៏ដោយ តែការឈានឆ្ពោះទៅរកភាពជោគជ័យអាចកើតឡើងបានតាមរយៈការព្យាយាម មិនមែនដោយការគូសដំណើរផ្លូវឱ្យរបស់ព្រះជាម្ចាស់ ឬពីអ្វីម្យ៉ាងដែលមើលមិនឃើញនោះទេ ដូច្នេះចូរក្រោកឡើងមកផ្លាស់ប្ដូរខ្លួនឯង សាងថាមពលវិជ្ជមាន និងធ្វើអ្វីដែលល្អបំផុតក្នុងរៀងរាល់ថ្ងៃដើម្បីគោលដៅរបស់ខ្លួនឯង…៕

រៀបរៀងដោយ តាវ៉ែនតា

November 7, 2017

សុខភាពកុមារជារឿងសំខាន់សម្រាប់អនាគតសង្គម

សុខភាព និងការរីកលូតលាស់របស់កុមារតូចៗជាផ្នែកមួយដ៏សំខាន់សម្រាប់អនាគតរបស់សង្គម និងប្រទេសជាតិ ព្រោះកុមារជាអ្នកបន្តវេននៅក្នុងសង្គមនាថ្ងៃអនាគត ហើយធនធានមនុស្សនៅថ្ងៃខាងមុខគឺត្រូវជំនួសដោយកុមារៗក្នុងពេលបច្ចុប្បន្ននេះទាំងស្រុង។

ប្រធានអង្គការកម្មវិធីអភិវឌ្ឍន៍ធនធានយុវជនកម្ពុជា លោក ជាង សុខា បានលើកឡើងថា កុមារជាផ្នែកដ៏សំខាន់សម្រាប់ប្រទេសកម្ពុជា ព្រោះពួកគេនឹងក្លាយជាយុវជននាថ្ងៃខាងមុខ។ អ្វីដែលជាបញ្ហាប្រឈមរបស់កុមារបច្ចុប្បន្ន គឺបញ្ហាសុខភាព ព្រោះនាពេលបច្ចុប្បន្ននេះស្ត្រីដែលជាមាតាជាច្រើនបាន និងកំពុងធ្វើការងារនៅតាមរោងចក្រសហគ្រាស និងកន្លែងជាច្រើនទៀតដែលពេលខ្លះសុខភាពរបស់គាត់មានលក្ខណៈទន់ខ្សោយ ដែលជាហេតុធ្វើឱ្យកូនតូចៗដែលកើតមកអាចមានលក្ខណៈទន់ខ្សោយតាមដែរ។

លោក ជាង សុខា បាននិយាយថា៖ «យើងគ្រប់គ្នាតែងតែពឹងពាក់លើកុមារជំនាន់ក្រោយថា អាចនឹងមានលក្ខណៈរឹងមាំ តែពេលខ្លះយើងមើលឃើញថា ពួកគេអាចនឹងមានកត្តាប្រឈមមួយចំនួនដែលត្រូវយកចិត្តទុកដាក់»។

Cambodian school children head back their home after morning school time at Tnoat Kpoh village in the outskirt of Phnom Penh, Cambodia, Monday, March 18, 2013. (AP Photo/Heng Sinith)

ស្របជាមួយគ្នានេះដែរ អង្គការ Unicef ប្រចាំនៅកម្ពុជាបានរាយការណ៍ថា កង្វះអាហារូបត្ថម្ភជាបញ្ហាមួយដែលធ្វើឱ្យការលូតលាស់របស់រាងកាយ និងបញ្ញាស្មារតីរបស់កុមារមានការអន់ថយ។ ការធានាថាស្ត្រីមានផ្ទៃពោះ និងកុមារទទួលបានអាហារដែលមានជីវជាតិ និងការថែទាំសុខភាពដែលមានគុណភាព អាចផ្តល់ផលវិជ្ជមានដល់ការលូតលាស់របស់កុមារដែលឈានទៅកាន់ជីវិតដែលមានសុខភាពល្អ និងសុភមង្គល។

អង្គការដដែលនេះបានបញ្ចាក់ផងដែរថា ចាប់ពីឆ្នាំ 2000 ដល់ឆ្នាំ 2014 ភាគរយនៃកុមារមិនគ្រប់ទម្ងន់ខ្លួនបានថយចុះពី 39% មក 24% ហើយកុមារដែលមានជំងឺក្រិសក្រិនបានថយចុះពី 50% មក 32% ប៉ុន្តែការថយចុះនេះក៏មានន័យដែរថា មានកុមារម្នាក់ក្នុងចំណោមបួននាក់នៅតែមិនគ្រប់ទម្ងន់ខ្លួននៅកម្ពុជា។ ហើយកុមារម្នាក់ក្នុងចំណោមបីនាក់មានកម្ពស់ទាបជាងអាយុ ដែលនេះជាសញ្ញាបញ្ជាក់អំពីកង្វះអាហារូបត្ថម្ភ៕

November 7, 2017

ជម្រើសថ្មី! ក្រសួងត្រៀមរៀបចំដឹកអ្នកដំណើរតាមផ្លូវទឹកបន្ថែមពីលើឡានក្រុង

ភ្នំពេញ៖ ដើម្បីផ្តល់ភាពងាយស្រួល និងកាត់បន្ថយការកកស្ទះចរាចរណ៍ក្នុងការធ្វើដំណើរ ក្រសួងសាធារណការ និងដឹកជញ្ជូនបាននិងកំពុងសាងសង់កំពង់ផែនៅតាមចំណុចរថយន្តក្រុងនានាដែលនៅជាប់មាត់ទន្លេដើម្បីឱ្យប្រជាពលរដ្ឋអាចធ្វើដំណើរតាមផ្លូវទឹកជំនួសផ្លូវគោកបាន។

ថ្លែងទៅកាន់អង្គប្រជុំប្រចាំសប្តាហ៍ជាមួយមន្ត្រីជាន់ខ្ពស់ និងមន្ត្រីជំនាញជាច្រើនរូប ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងពីសក្ដានុពលនៃការអភិវឌ្ឍវិស័យដឹកជញ្ជូនអ្នកដឹកដំណើរតាមផ្លូវទឹក ពិសេសតាមបណ្តាញដៃទន្លេដែលហូរកាត់ក្នុងភូមិសាស្ត្ររាជធានីភ្នំពេញ និងការពង្រីកវិស័យនេះឱ្យបានទូលំទូលាយ បញ្ចៀសការកកស្ទះចរាចរណ៍ ក៏ដូចជាកាត់បន្ថយគ្រោះថ្នាក់ចរាចរណ៍ និងឱ្យប្រកបដោយចីរភាពផងដែរ។

ដើម្បីឱ្យគម្រោងនេះដំណើរការទៅបានឆាប់រហ័ស ឯកឧត្ដមទេសរដ្ឋមន្ត្រី ក៏បានជំរុញឱ្យអគ្គនាយកដ្ឋានដឹកជញ្ជូនផ្លូវទឹកពន្លឿនគម្រោងដឹកជញ្ជូនអ្នកដំណើរតាមផ្លូវទឹកពីរាជធានីភ្នំពេញទៅខេត្តកណ្ដាលឱ្យបានមុនពិធីបុណ្យចូលឆ្នាំថ្មីប្រពៃណីខែ្មរខាងមុខ ដោយចំណតកំពង់ផែនីមួយៗត្រូវមានការតភ្ជាប់ជាមួយនឹងចំណតរថយន្តក្រុង ដើម្បីបង្កភាពងាយស្រួលដល់អ្នកធ្វើដំណើរឡើងចុះបន្ត។

គួរបញ្ជាក់ផងដែរថា ដោយសារការកកស្ទះផ្លូវកើតមានជាអន្លើៗ ជារៀងរាល់ថ្ងៃក្នុងភូមិសាស្ត្ររាជធានីភ្នំពេញ ប្រជាពលរដ្ឋរស់នៅក្នុងទីក្រុងហាក់មិនសូវមានការគាំទ្រក្នុងការធ្វើដំណើរតាមរថយន្តក្រុងនោះឡើយ ដោយហេតុផលតែម្យ៉ាងគត់ គឺខ្លាចទៅធ្វើការមិនទាន់ម៉ោង។ ដូច្នេះគេរំពឹងថា បើសិនជាគម្រោងដឹកជញ្ជូនតាមផ្លូវទឹកនេះដាក់ឱ្យដំណើរការបាននៅមុនពេលចូលឆ្នាំថ្មីខាងមុខនោះ ប្រាកដជានឹងមានអ្នកដំណើរចាប់អារម្មណ៍ច្រើន ដោយសារការធ្វើដំណើរតាមផ្លូវទឹកមិនមានការកកស្ទះដូចធ្វើដំណើរតាមផ្លូវគោកហ្នឹងឯង៕

November 7, 2017

ក្រសួងពាណិជ្ជកម្មជំរុញឱ្យវិនិយោគិនបង្កើនការទិញដំឡូងមីឱ្យកាន់តែច្រើន

ភ្នំពេញ៖ ថ្លែងនៅក្នុងពិធីសម្ពោធជាផ្លូវការនៃ “វេទិកាធុរកិច្ច និងវិនិយោគដំឡូងមី” ដែលរៀបចំឡើងកាលពីព្រឹកថ្ងៃទី6 ខែវិច្ឆិកា ឆ្នាំ2017 នៅឯមជ្ឈមណ្ឌលសន្និសីទសុខាអង្គរ ខេត្តសៀមរាប ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអំពាវនាវដល់វិស័យឯកជន និងស្ថាប័នពាក់ព័ន្ធឱ្យបង្កើនការវិនិយោគលើការអភិវឌ្ឍចង្វាក់តម្លៃដំឡូងមី ដើម្បីធានានិរន្តរភាពពាណិជ្ជកម្មដំឡូងមីនៅកម្ពុជា។

ឯកឧត្តមរដ្ឋមន្ត្រីបានមានប្រសាសន៍ថា ដំឡូងមី គឺជាពាណិជ្ជកម្មដ៏សំខាន់ និងមានសក្តានុពលបំផុតដែលអាចបង្កើតការងារពហុវិស័យជូនប្រជាជន និងនាំមកនូវប្រាក់ចំណូលយ៉ាងច្រើនសម្រាប់សេដ្ឋកិច្ចជាតិ “វាតម្រូវឱ្យមានការវិនិយោគកាន់តែច្រើនពីវិស័យឯកជន និងភាគីពាក់ព័ន្ធលើខ្សែចង្វាក់តម្លៃរាប់តាំងពីវិទ្យាស្ថានស្រាវជ្រាវ និងអភិវឌ្ឍន៍កសិកម្ម ក្រុមហ៊ុនផលិតជី និងគ្រាប់ពូជ អ្នកផលិត និងកែច្នៃម្ហូបអាហារ ភ្នាក់ងារផ្សព្វផ្សាយទីផ្សារ និងជំរុញការនាំចេញ ព្រមទាំងក្រុមហ៊ុនភ័ស្តុភារ និងដឹកជញ្ជូន។

បន្ថែមលើសនេះ ឯកឧត្តម ប៉ាន សូរស័ក្តិ បានគូសបញ្ជាក់អំពីទំនាក់ទំនងរវាងពាណិជ្ជកម្ម និងការវិនិយោគ និងបានបង្ហាញអំពីដំណោះស្រាយសមស្របចំពោះការផ្លាស់ប្តូរចំនួន3 ដែលកម្ពុជាកំពុងប្រឈមសព្វថ្ងៃនៅក្នុងវិស័យដំឡូងមី រួមមាន៖

1.ការកើនឡើងយ៉ាងឆាប់រហ័សរបស់ប្រទេសកម្ពុជា និងរបៀបដែលកម្ពុជាអាចទាញយកផលប្រយោជន៍ពាណិជ្ជកម្ម និងលំហូរវិនិយោគ ដើម្បីពន្លឿនកំណើនលូតលាស់ និងការអភិវឌ្ឍនៅក្នុងសេដ្ឋកិច្ចពិភពលោក។

2.របៀបដែលពាណិជ្ជកម្ម និងការវិនិយោគត្រូវបានផ្សារភ្ជាប់គ្នាកាន់តែខ្លាំងឡើងនៅក្នុងសេដ្ឋកិច្ចដំឡូងមី។

និង 3.របៀបដោះស្រាយបញ្ហាប្រឈម ចេញពីទស្សនវិស័យគោលនយោបាយ។

ជាមួយគ្នានេះដែរឯកឧត្តម នីក ប៊ឺរេសហ្វ៉ត (Nick Beresford) នាយកកម្មវិធីអភិវឌ្ឍន៍សហប្រជាជាតិ (UNDP) បានមានប្រសាសន៍ថា ផលិតកម្មដំឡូងមីបានកើនឡើងយ៉ាងឆាប់រហ័ស ដោយសារតែមានតម្រូវការខ្ពស់ពីទីផ្សារសកលដើម្បីកែច្នៃជាផលិតផលសម្រេចផ្សេង។ កត្តានេះ បានផ្តល់នូវប្រភពកំណើនថ្មីសម្រាប់កម្ពុជាឱកាសសម្រាប់អភិវឌ្ឍតំបន់ជនបទ និងការបង្កើនប្រាក់ចំណូលប្រជាជនដែលមិនត្រឹមតែសម្រាប់ឧស្សាហកម្មនោះទេ ប៉ុន្តែក៏សម្រាប់គ្រួសារកសិករដែលមានប្រាក់ចំណូលទាបផងដែរ “យើងមើលឃើញករណីអាជីវកម្មច្បាស់លាស់មួយ សម្រាប់ការវិនិយោគវិស័យឯកជនលើវិស័យដំឡូងមីនៅក្នុងប្រទេសកម្ពុជាដែលផ្តល់តម្លៃប្រកួតប្រជែងខ្ពស់សម្រាប់ដំឡូងមីឆៅ និងកែច្នៃ។ ប្រទេសនេះសម្បូរដីមានជីជាតិ អាចផលិតបានដំឡូងមី 20 តោនក្នុងមួយហិកតា ខ្ពស់ជាងឧស្សាហកម្មស្តង់ដារទាំង12ផ្សេងទៀត” ។

ឯកឧត្តមនាយកអង្គការ UNDP ក៏បានសង្កត់ធ្ងន់ពីតួនាទីសំខាន់របស់រាជរដ្ឋាភិបាលកម្ពុជា ជាពិសេសក្រសួងពាណិជ្ជកម្មក្នុងការផ្តល់នូវបរិយាកាសចាំបាច់សម្រាប់កាត់បន្ថយហានិភ័យ និងស្រូបទាញការវិនិយោគឯកជនកម្រិតខ្ពស់ដូចជា៖ ការបង្កើតគោលនយោបាយច្បាស់លាល់ និងការវិនិយោគសាធារណៈនៅក្នុងវិស័យសំខាន់ៗដើម្បីតភ្ជាប់កសិករ និងក្រុមហ៊ុនឯកជនជាមួយកាលានុវត្តភាពសេដ្ឋកិច្ច។

សូមបញ្ជាក់ថា ក្រោមការសហការ និងគាំទ្រពីកម្មវិធី UNDP “វេទិកាធុរកិច្ច និងវិនិយោគដំឡូងមី” ដែលបានរៀបចំឡើងរយៈពេល2ថ្ងៃនេះបានទាក់ទាញការចូលរួមយ៉ាងច្រើនពីមន្ត្រីរាជរដ្ឋាភិបាល សេដ្ឋវិទូ អ្នកជំនាញកសិកម្ម តំណាងដៃគូអភិវឌ្ឍន៍ និងវិស័យឯកជនប្រមាណ 200នាក់ក្នុងគោលបំណងសំខាន់គឺដើម្បីពិភាក្សា និងស្វែងរកធាតុចូល ដើម្បីរៀបចំគោលនយោបាយ និងយុទ្ធសាស្ត្រសំដៅអភិវឌ្ឍវិស័យដំឡូងមីកម្ពុជា ដែលជាដំណាំមានសក្តានុពលពាណិជ្ជកម្មខ្ពស់បន្ទាប់ពីវិស័យស្រូវ-អង្ករ៕

November 7, 2017

ស្ងាត់ៗ ណាំ ប៊ុណ្ណារ័ត្ន បួសសងគុណមាតាបិតា

នៅព្រឹកថ្ងៃទី7 ខែវិច្ឆិកា ឆ្នាំ2017 នេះ តារាចម្រៀង ណាំ ប៊ុណ្ណារ័ត្ន បានលាចាកភាពជាគ្រហស្ថ មកបួសជាភិក្ខុ ក្នុងគោលបំណងសងគុណ និងរំឭកដឹងគុណមាតាបិតារបស់លោក នៅវត្តទួល ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។

តាមរយៈការឆ្លើយឆ្លងលើសារអេឡិចត្រូនិក ជាមួយអ្នកដឹកនាំកម្មវិធីស្ថានីយទូរទស្សន៍ Town Full HD TV លោក ប៊ុន រតនា បានប្រាប់អ្នកយកព័ត៌មានគេហទំព័រ ឡារ៉ែន ឱ្យដឹងថា តារាចម្រៀង ណាំ ប៊ុណ្ណារ័ត្ន ទើបតែត្រូវបានបំបួសជាសង្ឃកាលពីព្រឹកមិញនេះ ដោយមូលហេតុដែលគេបាននិយាយថា ចង់រំឭកនឹក និងសងគុណដល់មាតាបិតាដ៏មានគុណរបស់គេ និងមានរូបថតមួយសន្លឹកដែលបានបង្ហោះជាភ័ស្តុតាងនៅលើបណ្ដាញទំនាក់ទំនងសង្គម Facebook របស់អ្នកដឹកនាំកម្មវិធី “ដូច្នឹងផង!!” ដែលបានបញ្ជាក់យ៉ាងដូច្នេះថា «ពិធីបំបួសលោកបង ណាំ ប៊ុណ្ណារ័ត្ន»៕

November 7, 2017

ទស្សនាកំពូលតារាថៃល្បីៗដើរបង្ហាញម៉ូដ ឈុតហ្វីណាឡេបុរាណចិន និងជប៉ុន

តាមរយៈសារព័ត៌មាន Mthai ដែលបានចេញផ្សាយនៅថ្ងៃទី7 ខែវិច្ឆិកា ឆ្នាំ2017 នេះបានឱ្យដឹងថា ការបើកតាំងបង្ហាញឈុតសម្លៀកបំពាក់វប្បធម៌ប្រពៃណីដ៏ធំសម្បើមសម្រាប់ពីធីបង្ហាញម៉ូដ WEE FALL/WINTER 2017 COUTURE COLLECTION បានរៀបចំឡើងនៅក្នុងបរិវេណអគារវប្បធម៌ចិន Haute Couture ព្រមទាំងមានលក្ខណៈដេគ័រឱ្យដូចជាកងបង្វិលពេលវេលាឱ្យវិលត្រឡប់ទៅរកអតីតកាលនាសម័យបុរាណនៃប្រវត្តិសាស្ត្ររបស់ប្រទេសចិន។

ដោយឡែកឈុតដែលបានរចនាម៉ូដទាំងអស់នេះ សុទ្ធសឹងតែបង្ហាញពី សិល្បៈ វប្បធម៌ ប្រពៃណី គ្រឿងអលង្ការ និងវឌ្ឃនភាពដ៏រីកចម្រើនរបស់ដែនដីមហានគរចិន និងក៏មាននូវការបង្ហាញពីអរិយធម៌ វប្បធម៌របស់ប្រទេសជប៉ុនដូចគ្នាផងដែរ។ នៅក្នុងការបង្ហាញម៉ូដដ៏ធំមហាសាលនាឆ្នាំនេះ គេសង្កេតឃើញថា មានកំពូលតារាថៃល្បីៗលំដាប់ជួរមុខជាច្រើនដួងត្រូវបានអញ្ជើញឱ្យចូលរួមដើរបង្ហាញម៉ូដឈុតប្រពៃណីទាំងនោះនៅក្នុងឆ្នាំនេះដែរ រួមមាន លូកកេត មេធីនី គីងផៈយោម , ប៊ី ណាំធីប , ផេន ខេក , ឃីមប៊ឺលី អេនធានស៊ិរិ និងតារាបង្ហាញម៉ូដបរទេសល្បីៗជាច្រើនរូបទៀតផងដែរ។ ដើម្បីកុំឱ្យមានការរង់ចាំ និងចង់ដឹងយូរនោះ សូមទស្សនាវីដេអូ និងរូបភាពដើរបង្ហាញម៉ូដទាំងអស់ខាងក្រោមនេះជាមួយឡារ៉ែនទាំងអស់គ្នា៖

November 7, 2017

ក្លិបញញួរធំ West Ham United តែងតាំងគ្រូបង្វឹកថ្មីក្នុងកិច្ចសន្យាសាកល្បង

ក្លិបញញួរធំ West Ham United នឹងត្រូវតែងតាំងលោក David Moyes ក្នុងកិច្ចសន្យាសាកល្បងរយៈពេល6ខែ ដោយផ្តល់តួនាទីឲ្យលោកទទួលខុសត្រូវក្នុងការស្រោចស្រង់ឲ្យពួកគេគេចឲ្យផុតពីគ្រោះថ្នាក់នៃការធ្លាក់ចូលក្នុងតំបន់កាត់ចោល ក្រោយពីអស់ការជឿជាក់ទៅលើសមត្ថភាពរបស់លោក Slaven Bilic ក្នុងការសង្គ្រោះពួកគេ។

ក្លិបនេះសង្ឃឹមថា លោក Moyes អតីតគ្រូបង្វឹករបស់ក្លិប Sunderland អាចដឹកនាំការហ្វឹកហាត់នៅព្រឹកថ្ងៃអង្គារនេះ ខណៈដែលលោក Alan Irvine, Chris Woods និងលោក Stuart Pearce អាចនឹងចូលរួមធ្វើការជាមួយនឹងលោក Moyes ក្នុងនាមជាជំនួយការគ្រូបង្វឹក។ លោក Moyes នឹងទទួលបានការបន្តកុងត្រាថ្មីរយៈពេល2ឆ្នាំ ប្រសិនបើគាត់អាចជួយឲ្យក្លិប West Ham រក្សាវត្តមានក្នុងក្របខ័ណ្ឌ Premier League បាន។ លោក Bilic ដែលកិច្ចសន្យារបស់លោកនឹងត្រូវផុតកំណត់នៅរដូវក្តៅក្រោយនោះ ត្រូវបានបណ្តេញចេញកាលពីព្រឹកថ្ងៃចន្ទ ក្រោយពីជួបលទ្ធផលដ៏សែនខកចិត្តជាបន្តបន្ទាប់នៅរដូវកាលនេះ ដែលបានធ្វើឲ្យក្លិប West Ham ស្ថិតក្នុងចំណាត់ថ្នាក់លេខ18 ហើយពួកគេដណ្តើមបានជ័យជម្នះត្រឹមតែ2លើកគត់ ពីការប្រកួតក្របខ័ណ្ឌ Premier League 11លើកចុងក្រោយរបស់ពួកគេ។ បើទោះបីលោក David Gold និងលោក David Sullivan ដែលជាម្ចាស់ក្លិបរបស់ West Ham ធ្លាប់បានសង្ឃឹមថា ការផ្តល់ពេលវេលាឲ្យអ្នកចាត់ការទូទៅរូបនេះ នឹងទទួលបានលទ្ធផលល្អ ក៏ដោយ ប៉ុន្តែ ការរងបរាជ័យយ៉ាងចាស់ដៃក្នុងលទ្ធផល 4-1 ក្រោមស្នាដៃក្រុម Liverpool នៅកីឡដ្ឋាន London បានក្លាយជាចំណុចកាត់សេចក្តីរបស់ម្ចាស់ក្លិបនេះតែម្តង។ លោក Nikola Jurcevic, Edin Terzic, Julian Dicks និងលោក Miljenko Rak ដែលជាគ្រូបង្វឹកជំនួយរបស់អ្នកចាត់ការទូទៅសញ្ជាតិក្រូអាស៊ីរូបនេះ ក៏ត្រូវចាកចេញផងដែរ៕

ប្រភពី៖ The Guardian

November 7, 2017

ម៉ៃ សុគន្ធ រងការរិះគន់យ៉ាងចាស់ដៃ ក្រោយទទូចទាមទារឱ្យពិនិត្យ DNA ចំពោះ ពេជ្រ ថៃ

នៅពេលថ្មីៗនេះ ស្រាប់តែតារាចម្រៀង រីងឌីងដុង ចម្លងគេ ឬលោក ម៉ៃ សុគន្ធ បានបង្ហោះសារនៅលើបណ្ដាញសង្គមហ្វេសប៊ុកផ្ទាល់ខ្លួនរបស់លោកក្នុងគោលបំណងរិះគន់តារាចម្រៀងវ័យក្មេងសំឡេងចាស់ ពេជ្រ ថៃ និងការរៀបចំរបស់កម្មវិធី The Voice Kids Cambodia របស់ស្ថានីយ៍ទូរទស្សន៍ហង្សមាសដែលទើបតែបានបញ្ចប់កាលពីពេលកន្លងទៅថ្មីៗនេះ។

សាររិះគន់នោះបានទទូចទាមទារឱ្យមានការពិនិត្យ DNA សរីរាង្គកាយរបស់ ពេជ្រ ថៃ ដើម្បីសបញ្ជាក់ឱ្យច្បាស់ថា គេជាមនុស្សមានវ័យចំណាស់តែក្រិន(មិនមែននៅក្មេងទេ) ទើបលោក ម៉ៃ សុគន្ធ សរសេរសារបង្ហោះថា «វាដូចជាអយុត្តិធម៌ខ្លាំងណាស់សម្រាប់ក្មេងៗដែលចូលរួមប្រឡងហើយមានអាយុពិត តែពេជ្រ ថៃវិញ មិនមែនជាក្មេងអាយុ12ឆ្នាំទេ បើតាមការសង្កេតមើលអត្តចរិត និងកាយវិការ គេសមតែជាមនុស្សពេញវ័យ អាយុ16ឆ្នាំ ឬក្រោមហ្នឹងតិចតួច (មនុស្សក្រិនកន្តឿដូចនាយក្រិន) បើគួរពុំគួរ សូមសំណូមពរឱ្យគណៈកម្មការ The Voice Kid world ធ្វើការពិនិត្យទៅលើ DNA សរីរាង្គ និងធ្មេញរបស់ពេជ្រ ថៃ នោះប្រហែលជាអាចបានដឹងខ្លះៗពីអាយុពិតរបស់ម្ចាស់ពានម្នាក់នេះ»។

រឿងនេះពិតជាមិនតូចតាចនោះទេ ព្រោះវាកាន់តែក្ដៅគគុកខ្លាំងឡើង ព្រោះមានអ្នកគាំទ្រ ពេជ្រ ថៃ និងមហាជនជាច្រើនទៀតបានចូលទៅធ្វើការទិតៀនតារាចម្រៀងប្រុសរូបនេះយ៉ាងមិនប្រណីថ្វីមាត់ ដូចជា ឈប់ព្រុសទៀតទៅពួកអស់លោក… អាពួកចូលចិត្តរករឿងគេ តិចទៀតងាប់អស់ហើយព្រះមិនជួយទេ…គេឱ្យសាងអំពើល្អ អីក៏ពូកែខាងច្រណែនគេម្ល៉េះ…មុខខ្លួនឯងដូចមនុស្សពិភពផ្កាយ បើថាមុខអាក្រក់ហើយ ចរិតឲ្យវាបានតិចទៅអត់ទេ! នេះលក្ខណៈអាក្រក់ជាកញ្ចប់តែម្តង។

រីឯមហាជនខ្លះទៀតបានបញ្ចេញកំហឹងចំពោះតារាប្រុសខាងលើនេះយ៉ាងកប់ៗមាត់ថា «អាឆ្កួតអ៊ើយ ពូកែទើសច្រណែនក្មេង មានឈ្មោះជាតារានឹងគេដែរ តែចរិតអន់ ដេកចាំតែទើសគេគ្រប់គ្នា ឥឡូវមកទើសច្រណែនតាំងពីកូនក្មេងឡើងទៅ… លោកអើយលោក ឈប់បានឈប់ទៅ កុំចង់ល្បីខុសរឿងពេក បានតែគេជេទេ ព្រោះខុសទំនងណាស់លោក»។ និងខ្លះជេរថា «អាចោលម្សៀត…» ក៏មាន៕

November 7, 2017

ស្វែងយល់ពីលំហាត់ប្រាណបែបយូហ្គា ឬយោគៈ

យូហ្គា ឬយោគៈ ត្រូវបានគេស្គាល់ថា ជាការធ្វើលំហាត់ប្រាណដ៏មានប្រយោជន៍យ៉ាងលើសលប់ចំពោះសុខភាពរាងកាយ ផ្លូវចិត្ត ស្មារតី ជាពិសេសអាចមានប្រសិទ្ធភាពក្នុងការចូលរួមព្យាយាមជំងឺផ្លូវចិត្តបានយ៉ាងប្រសើរ ហើយក៏កំពុងមានប្រជាប្រិយភាពនាពេលបច្ចុប្បន្ននេះផងដែរ ដែលសូម្បីតែក្រសួងទេសចរណ៍ ក៏មានបំណងបង្កើតទីតាំងសម្រាប់ហាត់ប្រាណបែបយូហ្គានេះនៅតាមបណ្តាតំបន់ទេសចរណ៍នានាថែមទៀតផង។ តើប្រិយមិត្តអ្នកអានធ្លាប់បានជ្រាបទេថា យូហ្គា ឬយោគៈ នេះមានប្រភពមកណា អ្នកណាជាអ្នករកឃើញ និងបង្កើតឡើង ហើយគួរហាត់បែបណា នៅកន្លែងណា ទើបមានអត្ថប្រយោជន៍ចំពោះសុខភាព? សូមតាមដានលម្អិតជាមួយអត្ថបទនៅខាងក្រោមនេះ ក្រោមការបកស្រាយបញ្ជាក់ពីសំណាក់អ្នកជំនាញ ដែលជាគ្រូបង្ហាត់នៅ អាសាហា ហ្វោនដេសិន (Azahar Foundation-Phnom Penh) ដែលមានទីតាំងស្ថិតនៅផ្ទះលេខ 39 ផ្លូវ 21 សង្កាត់ទន្លេបាសាក់ ខណ្ឌចំការមន រាធានីភ្នំពេញ។

1 និយមន័យ យោគៈ
បើយោងតាមការសិក្សាស្រាវជ្រាវមួយបានអោយដឹងថា យោគៈ គឺជាសាលាមួយដែលគេសិក្សាពីទស្សនៈរបស់ឥណ្ឌា ចាប់តាំងពីសហវត្សទី3មុន គ.ស។ ចំណែកពាក្យថា “យូហ្គា” មកពីភាសាសំស្ក្រឹតបុរាណមួយដែលមានន័យថា ការផ្សារភ្ជាប់គ្នារវាងបេះដូង ចិត្ត
និងវិញ្ញាណ។ សម្រាប់ការហាត់ប្រាណតាមបែបយោគៈ គឺជាការបង្កើតទំនាក់ទំនងរវាងផ្នែករាងកាយទៅនឹងផ្នែកខាងក្នុងរបស់យើង។ ក្នុងន័យមួយទៀតបានលើកឡើងថា យោគៈ គឺជាការបង្កើតឱ្យមានទំនាក់ទំនងរវាងខ្លួនយើងទៅនឹងធម្មជាតិ ឫមជ្ឈដ្ឋានដែលនៅជុំវិញខ្លួនរបស់យើង។ការអនុវត្តលំហាត់ប្រាណ យោគៈ ប្រៀបបានទៅនឹងការដាក់វិន័យសម្រាប់រាងកាយរបស់យើងតាមវិធីសាស្ត្រ និងបច្ចេកទេសផ្សេងៗគ្នា។ ដោយឡែកសម្រាប់បច្ចេកទេសទាំងនោះ រួមមានការប្រើឥរិយាបថនៃរាងកាយ ដែលត្រូវបានគេហៅឈ្មោះថា អាសាណា (ASANAS) និងការប្រើប្រាស់ចលនាដង្ហើម ការធ្វើសមាធិ ការសម្រាករាងកាយ ចិត្ត ត្រូវបានគេប្រើជាមួយក្បាច់ ប្រាណាយាម៉ា (Pranayama)។ ក្នុងន័យម្យ៉ាងទៀតការធ្វើលំហាត់ប្រាណ យោគៈ គឺជាវិធីសាស្ត្រមួយដែលប្រាប់ឱ្យយើងបានស្គាល់ច្បាស់ពីខ្លួនឯង ដោយឆ្លើយតបទៅនឹងសំណួរមួយចំនួនដូចជា តើខ្ញុំជានរណា? ខ្ញុំមកពីណា? តើខ្ញុំនឹងទៅទីណា? តើខ្ញុំគួរធ្វើអ្វី? ក្នុងន័យនេះយើងអាចយល់បានថា ការអនុវត្តយោគៈ គឺជាការឱ្យយើងបានចងចាំពីខ្លួនយើងឡើងវិញ។

2 ផលប្រយោជន៍ខាងរាងកាយ និងសីលធម៌
ពិតណាស់ការធ្វើលំហាត់ប្រាណតាមបែបយោគៈ វាជាដំណោះស្រាយល្អសម្រាប់បន្ធូរបន្ថយភាពតានតឹង និងបង្កើតទំនាក់ទំនងជាមួយអ្នកដទៃ។ យោគៈ គឺជាវ៉ិចទ័រដ៏ល្អនៃការតាមដានលើសុខុមាលភាព។ ការអនុវត្តរបស់វាមានប្រសិទ្ធភាពយ៉ាងល្អទាំងផ្នែករាងកាយ និងបញ្ញាស្មារតី វាអាចជួយសម្រួលដល់ប្រភេទផ្សេងៗនៃជំងឺដូចជា ជំងឺលើសឈាម បញ្ហាផ្លូវដង្ហើម ជំងឺផ្លូវដង្ហើម ឈឺក្បាលប្រកាំង ឈឺខ្នង ធ្លាក់ទឹកចិត្ត និងថប់បារម្ភជាដើម។ នៅពេលដែលយើងអនុវត្តយោគៈ វាមានន័យថា យើងបង្កើតឱ្យមានគំនិតប្រាជ្ញាល្អ ភាពរីករាយ និងមេត្តាធម៌ពិតប្រាកដ។

3 អំពី អាសាហា ហ្វោនដេសិន
អាសាហា ហ្វោនដេសិន បានចាប់ផ្តើមការងាររបស់ខ្លួននៅក្នុងប្រទេសកម្ពុជាចាប់តាំងពីឆ្នាំ2008 ដែលមានលោកស្រី យូហ្គេសស្វារី (Yogeswari) ជាស្ថាបនិក។ សកម្មភាពរបស់ អាសាហា ហ្វោនដេសិន ដំបូង គឺបានធ្វើការបង្ហាត់យោគៈដល់ក្មេងនៅមណ្ឌលកុមារកំព្រា។ ក្រោយមកដោយសង្កេតឃើញថា ក្មេងៗនៅទីនោះមានចំណាប់អារម្មណ៍ខ្លាំងចំពោះការហាត់យោគៈនេះ ដូច្នេះលោកស្រី យូហ្គេសស្វារី (Yogeswari) ក៏បានសម្រេចចិត្តបង្កើតអង្គការនេះឡើង ដើម្បីបង្កើតឱ្យមានកន្លែងសម្រាប់ហាត់យោគៈ និងសមាធិ។ បច្ចុប្បន្ននេះអាសាហា ហ្វោនដេសិន បានផ្តោតលើការរួមចំណែកក្នុងការកសាងសន្តិភាពតាមរយៈយោគៈរួមមានកម្មវិធីមួយចំនួនដូចជា ថ្នាក់យោគៈ ថ្នាក់សិក្សាសន្តិភាពរយៈពេល8ខែ និងការចុះកម្មសិក្សា កម្មវិធីបោះជំរុំសន្តិភាពដែលមានគ្រូយោគៈ
ជាជនជាតិខ្មែរ មានវិញ្ញាបនបត្រ ជំនាញផ្នែកយោគៈយ៉ាងត្រឹមត្រូវ។

4 ថ្នាក់យោគៈជាមួយ អាសាហា ហ្វោនដេសិន
គ្រូបង្រៀនយោគៈរបស់ អាសាហា ហ្វោនដេសិន ផ្តល់នូវថ្នាក់យោគៈ ដោយអមជាមួយតន្ត្រីស្មូត និងជួយដល់សិស្ស។ ជារៀងរាល់ថ្ងៃការអនុវត្តមានលក្ខណៈខុសៗគ្នា និងប្រកបដោយការច្នៃប្រឌិត ដូច្នេះវាបានធ្វើឱ្យអ្នកហាត់មិនធុញទ្រាន់ ហើយមានភាពរីករាយពីមួយពេលទៅមួយពេលថែមទៀតផង។ នៅពេលចាប់ផ្តើមថ្នាក់នីមួយៗ គ្រូបង្រៀននឹងសួរសិស្សប្រាប់ឱ្យបិទភ្នែកដើម្បីធ្វើឱ្យចិត្តស្ងប់។ បន្ទាប់មកគ្រូបង្រៀននឹងចាប់ផ្តើមយឺតៗ ដើម្បីឱ្យបានកម្ដៅខ្លួនប្រាណតាមរយៈអាស៊ីតដែលបញ្ចេញមកនៅពេលដែលយើងធ្វើចលនាដង្ហើម។ មួយថ្នាក់មានរយៈពេល1ម៉ោង ឬ1ម៉ោង 15នាទី ដែលអាស្រ័យលើថ្នាក់ និងបែបបទនៃលំហាត់ប្រាណ។តាមរយៈការធ្វើចលនារាងកាយ វាបានជួយឱ្យសាច់ដុំ និងបញ្ញាស្មារតីដំណើរការល្អប្រសើរជាងមុន។

យោគៈ អាចហាត់បានគ្រប់ៗគ្នា ទាំងក្មេងចាស់ ប្រុស ស្រី ដោយមិនប្រកាន់នៃភាពរស់រវើករបស់រាងកាយឡើយ។ នៅស្ទីឌីយោយោគៈរបស់ អាសាហា ហ្វោនដេសិន មានផ្តល់នូវឧបករណ៍ជំនួយក្នុងពេលហាត់ ដើម្បីធានានូវគុណភាពលំហាត់ប្រាណដល់អ្នកហាត់។ អាសាហា ហ្វោនដេសិន មានការបង្ហាត់យោគៈ សម្រាប់គ្រប់កម្រិត ទាំងអ្នកមិនធ្លាប់បានអនុវត្ត អ្នកធ្លាប់ហាត់បានខ្លះៗ និងអ្នកដែលមានកំរិតខ្ពស់។

សូមបញ្ជាក់ផងដែរថា បច្ចុប្បន្ន អាសាហា ហ្វោនដេសិន មានសាខាចំនួន2 ដោយសាខាទី1ស្ថិតផ្ទះលេខ 39 ផ្លូវ 21 សង្កាត់ទន្លេបាសាក់ ខណ្ឌចំការមន ភ្នំពេញ។ សាខាទី2 ស្ថិតនៅផ្ទះលេខ 628 ផ្លូវហាប់ហ្គន់ ភូមិកណ្តាល ក្រុងសៀមរាប ឬអាចទាក់ទងតាមរយៈ E-mail: [email protected] ឬ face-book: Azahar Foundation-Phnom Penh៕

November 7, 2017

Category: សង្គម និងសេដ្ឋកិច្ច