Category: សង្គម និងសេដ្ឋកិច្ច

កសិករកុំទាន់អស់សង្ឃឹម! ដំឡូងមីនឹងមានតម្រូវការកាន់តែខ្ពស់នៅលើទីផ្សារ
ភ្នំពេញ៖ កាលពីឆ្នាំកន្លងទៅនេះ កសិករនៅក្នុងខេត្តប៉ៃលិនបាននាំគ្នាតវ៉ាដោយយករថយន្តដឹកដំឡូងមកបិទផ្លូវដើម្បីសំណូមពរឱ្យអាជ្ញាធរខេត្តជួយដោះស្រាយស្វែងរកទីផ្សារដើម្បីឱ្យលក់បានក្នុងតម្លៃសមរម្យ ហើយមកទល់បច្ចុប្បន្ន ថ្នាក់ដឹកនាំក៏បានចុះទៅពិនិត្យ និងបង្ហាញថា ដំឡូងមីឆ្នាំនេះនឹងមានតម្រូវការច្រើន និងអាចបានថ្លៃខ្ពស់ជាងឆ្នាំមុន។
នៅចំពោះមុខកសិករ ឈ្មួញ និងក្រុមហ៊ុនដែលទិញដំឡូងមីពីកសិករ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានគូសបញ្ជាក់ថា និន្នាការ និងការរំពឹងទុកបានបង្ហាញថា តម្រូវការដំឡូងមីសម្រាប់ទីផ្សារក្នុងតំបន់ និងពិភពលោកនឹងមានកំណើនកាន់តែខ្ពស់ ដែលនេះគឺជាកាលានុវត្តភាពថ្មីសម្រាប់កម្ពុជាដើម្បីអភិវឌ្ឍចង្វាក់តម្លៃដំឡូងមីតាមរយៈការពង្រឹង និងពង្រីកផលិតកម្ម ការកែច្នៃចំណិតដំឡូងមី និងសមត្ថភាពនាំចេញ សំដៅឆ្លើយតបតម្រូវការទីផ្សារនាពេលអនាគត។
ក្នុងឱកាសអញ្ជើញជាគណៈអធិបតីក្នុងពិធីបើកសម្ពោធវេទិកាថ្នាក់ជាតិលើកទី4 ស្តីពីការជំរុញការលើកកម្ពស់ និងអភិវឌ្ឍកសិ-ពាណិជ្ជកម្មកម្ពុជា អមដោយទិវាដំឡូងមីលើកទី2 និងពិធីតាំងបង្ហាញផលិតផលបន្លែ-ផ្លែឈើខ្មែរ កាលពីព្រឹកថ្ងៃទី7 ខែវិច្ឆិកា ឆ្នាំ2017 ឯកឧត្តមបានគូសបញ្ជាក់ថា ដើម្បីចាប់យកនូវកាលានុវត្តភាពនេះ កម្ពុជាចាំបាច់ត្រូវធ្វើការវិនិយោគបន្ថែម និងការឯកភាពជាធ្លុងមួយរវាងរដ្ឋាភិបាល និងភាគីពាក់ព័ន្ធដើម្បីដោះស្រាយបញ្ហាប្រឈម និងហានិភ័យនានាដូចជា ភាពទន់ខ្សោយនៃខ្សែចង្វាក់តម្លៃ កង្វះព័ត៌មានទីផ្សារ ការផ្គត់ផ្គង់មិនទៀងទាត់ និងគុណភាពប្រែប្រួលនៃដំឡូងមីដែលជាកត្តារាំងស្ទះដល់ការលូតលាស់នៃឧស្សាហកម្មដំឡូងមីនៅកម្ពុជា។
នៅក្នុងឱកាសនោះដែរ ឯកឧត្តម វ៉េង សាខុន បានស្នើឱ្យមានការចូលរួមកាន់តែសកម្មពីគ្រប់តួអង្គពាក់ព័ន្ធដើម្បីជំរុញការអភិវឌ្ឍវិស័យកសិកម្ម និងកសិ-ឧស្សាហកម្ម ប្រកបដោយប្រសិទ្ធភាពខ្ពស់ ជាពិសេសធានាបាននិរន្តរភាព និងសុវត្ថិភាពស្បៀងអាហារនៅក្នុងប្រទេស និងការនាំចេញទីកាន់ទីផ្សារអន្តរជាតិ។ ឯកឧត្តមរដ្ឋមន្ត្រីបានលើកយកកំណើនដាំដុះ និងសក្តានុពលដំឡូងមី ដែលជាដំណាំយុទ្ធសាស្ត្ររបស់កម្ពុជា ព្រមទាំងកត្តាប្រឈមមួយចំនួនដែលទាមទារឱ្យមានគោលនយោបាយជាក់លាក់ និងស៊ីជម្រៅស្របតាមមូលដ្ឋាននៃការអភិវឌ្ឍបៃតង ដែលមានការចូលរួមពីគ្រប់ភាគីពាក់ព័ន្ធដូចជា គ្រឹះស្ថានអប់រំសិក្សាកសិកម្ម អង្គការក្រៅរដ្ឋាភិបាល និងវិស័យឯកជន។
គួរបញ្ជាក់ថា កម្ពុជាគឺជាប្រទេសផលិតដំឡូងមីលំដាប់ទី8 លើពិភពលោក និងលំដាប់ទី4 នៅក្នុងតំបន់។ ការអនុវត្តគោលនយោបាយយុទ្ធសាស្ត្រ និងកម្មវិធីពាក់ព័ន្ធតាមវិស័យនានា តម្រង់ឆ្ពោះទៅរកទីផ្សារក្នុងបណ្តាឆ្នាំកន្លងមក បានជួយជំរុញកំណើននាំចេញកសិផលកម្ពុជា ទៅកាន់ទីផ្សារក្នុងតំបន់ និងពិភពលោកក្នុងល្បឿនមួយគួជាទីមោទនៈ។
យោងតាមទិន្នន័យក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ទីផ្សារនាំចេញផលិតផលដំឡូងមីត្រូវបានពង្រីកពី4ប្រទេស (ថៃ វៀតណាម ចិន បារាំង) ក្នុងឆ្នាំ2014 ទៅ 16ប្រទេសក្នុងឆ្នាំ2016 រួមមាន៖ កាណាដា ចិន អង់គ្លេស ហ្វាំងឡង់ ឥណ្ឌា អ៊ីតាលី កូរ៉េ លីទុយអានី ម៉ាឡេស៊ី មីយ៉ាន់ម៉ា ហូឡង់ នូវែលសេឡង់ កោះតៃវ៉ាន់ ថៃ អាមេរិក និងវៀតណាម។ ការនាំចេញផលិតផលដំឡូងមី (ដំឡូងមីស្រស់ ចំណិតដំឡូងមីក្រៀម និងម្សៅដំឡូងមី) បានកើនឡើងពី0.22លានតោន ក្នុងឆ្នាំ2012 ដល់ជាង 3.6លានតោនក្នុងឆ្នាំ2016 និងនៅក្នុងរយៈពេល 9ខែឆ្នាំ2017នេះ ការនាំចេញដំឡូងមីសម្រេចបានជាង 1.8លានតោន៕
November 8, 2017
ពេជ្រ ថៃ ទ្រាំមិនបាន បញ្ចេញសំបុត្រកំណើតរបស់ខ្លួន
បន្ទាប់ពីផ្ទុះឡើងនូវការរិះគន់លើម្ចាស់ពានរង្វាន់ The Voice Kids Cambodia រដូវកាលទី 1 កុមារា ពេជ្រ ថៃ នៅលើបណ្ដាញសង្គមហ្វេសប៊ុកយ៉ាងខ្លាំងក្លារួចមក ថ្មីៗនេះស្រាប់តែ ពេជ្រ ថៃ បានបញ្ចេញសំបុត្រកំណើតពិតរបស់ខ្លួន ក្នុងគោលបំណងចង់បញ្ឈប់នូវបញ្ហាដ៏ឈឺក្បាលមួយនេះ។
ការរិះគន់ចំពោះ ពេជ្រ ថៃ មានពាក្យឆ្លើយឆ្លងតិះដៀលគ្នាជាច្រើនហូរហែបន្ដបន្ទាប់ រហូតមកដល់ថ្ងៃម្សិលមិញនេះ មានតារាចម្រៀងជើងចាស់ជាងកុមារា ពេជ្រ ថៃ បានរិះគន់ខ្លាំងៗរហូតដល់ថ្នាក់ទទូចទាមទារ ឱ្យអ្នករៀបចំកម្មវិធី The Voice Kids Global សើរើឡើងវិញនូវប្រវត្តិរូបរបស់ ពេជ្រ ថៃ ព្រមទាំងទាមទារឱ្យពិនិត្យ DNA របស់ពេជ្រ ថៃ ថែមទៀតផង ដើម្បីបញ្ជាក់ថា កុមារារូបនេះ គឺជាមនុស្សក្រិន និងក្លែងបន្លំអាយុមកចូលរួមប្រកួត។ ហើយក្នុងបំណងនេះទៀតសោត ក៏បានដាក់ការបន្ទោសទៅដល់ក្រុមអ្នករៀបចំកម្មវិធី The Voice Kids Cambodia ផងដែរ។
ដោយឡែកនៅថ្ងៃទី7 ខែវិច្ឆិកា ឆ្នាំ2017 នេះ ប្រភពដែលសារព័ត៌មាន ឡារ៉ែន ទទួលបានគឺ ពេជ្រ ថៃ បានបញ្ចេញសំបុត្រកំណើតពិតរបស់ខ្លួនដែលបញ្ជាក់ថា បានកើតនៅថ្ងៃអង្គារ ទី24 ខែមីនា ឆ្នាំ2004 នៅក្នុងភូមិជ្រៃមួយ ឃុំជ្រៃ ស្រុកមោងឫស្សី ខេត្តបាត់ដំបង ប្រទេសកម្ពុជា។ ប្រសិនបើគិតមកទល់ពេលនេះ កុមារារូបនេះមានអាយុ 13 ឆ្នាំ សមស្របទៅនឹងពេលដាក់ពាក្យប្រឡងពិតប្រាកដមែន មិនបានក្លែងបន្លំអាយុដូចពាក្យរិះគន់ចោទប្រកាន់នោះឡើយ៕
November 8, 2017
ផលិតករ ហ៊ុយ យ៉ាឡេង គ្រោងយករឿងរបស់ខ្លួនទាំងពីរទៅបញ្ចាំងនៅសហរដ្ឋអាមេរិក
នៅថ្ងៃទី7 ខែវិច្ឆិកា ឆ្នាំ2017 នេះ ផលិតករឆ្នើមក្នុងការផលិតភាពយន្ដខា្នតធំបានប្រកាសថា ខ្លួនមានគម្រោងនឹងនាំយកខ្សែភាពយន្តរបស់ខ្លួនទាំងពីររឿង គឺរឿង “វិកលចរិត” និងរឿង “ធ្មប់” ដែលកំពុងតែថតបញ្ចប់នៅពេលឆាប់ៗខាងមុខនេះ ទៅដាក់បញ្ចាំងនៅទឹកដីសហរដ្ឋអាមេរិក ដោយមានការសហការជួយជ្រោមជ្រែងពីសំណាក់តារាជើងចាស់ និងជាផលិតកររបស់ផលិតកម្ម “កេសារា” គឺលោកស្រី កេសារា ផ្ទាល់ ព្រោះលោកស្រីធ្លាប់មានបទពិសោធរស់នៅទីនោះ និងស្គាល់បណ្ដាផលិតករនៅសហរដ្ឋអាមេរិកជាច្រើនរូប។
នៅក្នុងជំនួបជាមួយអ្នកសារព័ត៌មានក៏ដូចជាការជូនដំណើរអ្នកស្រី កេសារា ដែរនោះ លោក ហ៊ុយ យ៉ាឡេង ដែលជាផលិតកររបស់ផលិតកម្ម មាតុចក្រ បានថ្លែងយ៉ាងដូច្នោះថា «ជាដំបូង ខ្ញុំបាទបានពិភាក្សា និងស្នើសុំទៅអ្នកមីង កេសារា ក្នុងការយករឿង “វិកលចរិត” និងរឿង “ធ្មប់” ទៅដាក់បញ្ចាំងនៅសហរដ្ឋអាមេរិក ក្នុងគោលបំណងដើម្បីឱ្យប្រជាជនខ្មែរដែលរស់នៅទីនោះបានទស្សនារឿងទាំងពីរនេះ ព្រមទាំងរឿងរបស់អ្នកមីងផ្ទាល់ផងដែរ»។ ចំពោះក្ដីរំពឹងថា ទទួលបានភាពជោគជ័យក្នុងដំណើរការបញ្ចាំងរឿងខ្មែរនៅលើទឹកសហរដ្ឋអាមេរិកឬយ៉ាងណានោះ លោក យ៉ាឡេង ក៏បានបន្ដទៀតថា រឿងនេះគឺជាបំណងប្រាថ្នារបស់លោកជាយូរណាស់មកហើយ ។ ថ្វីដ្បិតតែទីនោះជាទឹកដីសហរដ្ឋអាមេរិក មានទំហំធំក៏ពិតមែន ក៏ប៉ុន្ដែអ្វីដែលសំខាន់ជាងនេះទៅទៀត គឺចំនួនប្រជាជនខ្មែរដែលរស់នៅទីនោះក៏មានច្រើនដូចគ្នា ដែលជាកម្លាំងជំរុញចិត្តមួយឱ្យមានក្ដីសង្ឃឹមនៃភាពជោគជ័យគាំទ្របន្ដ។ ដោយឡែកអ្វីដែលជាបទពិសោធកន្លងមក លោកថា កុនដែលបានបញ្ចាំងនៅប្រទេសថៃ និងឡាវ មិនសូវមានប្រជាជនខ្មែររស់នៅទីនោះ ដូច្នោះបានជាការគាំទ្រមិនបានទទួលលទ្ធផលល្អមកវិញប៉ុន្មានឡើយ។
ស្របគ្នានេះដែរ អ្នកមីង កេសារា ដែលជាដៃគូសហការក្នុងការនាំភាពយន្ដខ្មែរទាំងពីររឿងនេះទៅបញ្ចាំងនៅអាមេរិក ក៏បានលើកឡើងដែរថា «ពីមុនមកឱ្យតែរឿងខ្មែរបានផលិតហើយ ផលិតករនៅអាមេរិកបានទិញយកទៅផលិតជា DVD ដើម្បីដាក់លក់នៅទីនេះ តែជាអកុសលរឿងខ្មែរមួយរយៈក្រោយមិនបានផលិត ហើយក៏គ្មាន DVD រឿងខ្មែរទៀតដែរនៅទីនោះ។ តែដោយសារតែមានការចម្លងខុសច្បាប់ច្រើនពេក ទាំងរូបខ្ញុំផ្ទាល់ក៏បានឈប់ផលិតរឿងខ្មែរដូចគ្នា»។ អ្នកស្រីក៏បានបន្ដទៀតថា កន្លងមកក៏មានរឿងរបស់ផលិតករផ្សេងៗ ដូចជាលោក ឆាយ បូរ៉ា ក៏បានយកទៅបញ្ចាំងនៅសហរដ្ឋអាមរិកផងដែរ ក៏ប៉ុន្ដែការយកទៅ និងចាក់បញ្ចាំងរឿងលើកនេះរបស់លោកស្រី គឺមានបែបផែនផ្សេងខុសពីគេ។ អ្នកស្រី កេសារា ក៏បានបញ្ជាក់ដែរថា ក្រៅពីរឿង “វិកលចរិត” និងរឿង “ធ្មប់” អ្នកស្រីក៏គ្រោងនឹងស្នើសុំរឿងរបស់ផលិតកម្ម មហាហង្ស ដែលមានការសម្ដែងដោយ កញ្ញា ដួង ម៉ានិច ទៅដាក់បញ្ចាំងជាមួយគ្នាផងដែរ។
ជាចុងក្រោយផលិតកររឿង “វិកលចរិត” និងរឿង “ធ្មប់” បានថ្លែងអំណរគុណជាខ្លាំងចំពោះការជួយជ្រោមជ្រែងពីអ្នកមីង កេសារា និងបានពោលថា «នេះគឺជាសណ្ដានចិត្តដ៏ល្អមួយរបស់អ្នកមីង ដោយហេតុតែការស្រឡាញ់សិល្បៈ ទើបអ្នកមីងទទួលការទទូចអង្វរក និងជួយគ្នាក្នុងការនាំរឿងខ្មែរទៅអាមេរិក ដើម្បីឱ្យប្រជាជនខ្មែរនៅទីនោះបានទស្សនា ជាឱកាសឱ្យបងប្អូននៅទីនោះបានស្គាល់ពីកុនខ្មែរយើងនាពេលបច្ចុប្បន្ននេះផងដែរ»៕
November 8, 2017
អ្នកស្រាវជ្រាវជប៉ុន ប្រាប់ឱ្យបរិភោគផ្លែចេកទុំជោរ ដើម្បីការពារជំងឺមហារីក
អ្នកវិទ្យាសាស្ត្រជប៉ុនបានបញ្ជាក់ថា ផ្លែចេកដែលទុំជោរ វាជួយបង្កើតនូវសារធាតុមួយប្រភេទដែលឱ្យឈ្មោះថា TNF (Tumor Necrosis Factor) ជាសារធាតុដែលមានសមត្ថភាពប្រយុទ្ធប្រឆាំងជាមួយកោសិកាដែលខុសពីធម្មតា ដូចជា កោសិកា
មហារីកជាដើម។ សារធាតុ TNF គឺជាចំណែកនៃការជួយបង្កើតមូ៉លេគុល CD4 ឱ្យច្រើនឡើង ដើម្បីជួយក្នុងការបង្កើតប្រព័ន្ធភាពស៊ាំក្នុងរាងកាយរបស់យើងបានច្រើនទ្វេដង។
នៅក្នុងចំណោមផ្លែចេកទាំងអស់ ផ្លែចេកពងមាន់ មានសារធាតុការពារជំងឺមហារីកច្រើនជាងគេ ព្រមទាំងមានសារធាតុ TNF ច្រើនបំផុត ហើយអ្នកគួរតែជ្រើសរើសទទួលទានផ្លែចេកណា ដែលមានសភាពទុំជោរ សម្បុរពណ៌ខ្មៅៗ គឺវាល្អប្រសើរជាងគេ។
ការណែនាំ ៖ សូមទទួលទានផ្លែចេក 1-2 ផ្លែ ក្នុងមួយថ្ងៃ ដើម្បីបន្ថែមប្រព័ន្ធភាពស៊ាំការពាររោគជំងឺផ្សេងៗ ដូចជា ផ្ដាសាយ ផ្ដាសាយធំ និងជំងឺផ្សេងៗទៀត ហើយចេកដែលមានសម្បកពណ៌លឿង និងមានចំណុចជាំខ្មៅៗច្រើន នោះវាមានគុណសម្បត្តិបង្កើតគោលិកាគ្រាប់ឈាមសច្រើន ហើយច្រើនជាងផ្លែកចេកដែលមានសម្បកពណ៌បៃតងដល់ទៅ8ដងឯណោះ។
ប្រសិនបើប្រិយមិត្តរបស់ទស្សនាវដ្តី និងគេហទំព័រ ឡារ៉ែន បានអាននឹងបានជ្រាបពីអត្ថប្រយោជន៍របស់ផ្លែចេកទុំជោរ ដែលអ្នកស្រាវជ្រាវជប៉ុនបានបកស្រាយ ហើយសូមកុំភ្លេចជួយចែករំលែកអត្ថបទនេះបន្ដដល់មិត្តភក្តិ និងបងប្អូនរបស់អ្នកឱ្យបានដឹងទាំងអស់គ្នាផងណា៎៕
November 8, 2017
Terry នាំភរិយាទៅលម្ហែកាយនៅឌូបៃភ្លាមៗ ក្រោយរងរបួសឆ្អឹងប្រអប់ជើង
តារាឆ្នើម John Terry របស់ក្លិប Aston Villa ដែលលេងក្នុងក្របខ័ណ្ឌ Champion ship របស់អង់គ្លេស បានធ្វើដំណើរទៅសម្រាកលម្ហែនៅក្នុងទីក្រុងឌូបៃ ដើម្បីព្យាបាលរបួស ក្រោយពីរូបគេជួបបញ្ហារបួសបាក់ឆ្អឹងប្រអប់ជើង កាលពីចុងសប្តាហ៍ថ្មីៗនេះ។
អតីតប្រធានក្រុមនៃក្លិប Chelsea វ័យ៣៦ឆ្នាំរូបនេះ បានរងរបួសឆ្អឹងប្រអប់ជើងរបស់គេ នៅពេលប្រកួតជាមួយនឹងក្រុម Sheffield Wednesday កាលពីថ្ងៃសៅរ៍ ដែលជាការប្រកួតចុងក្រោយមុនពេលសម្រាកសម្រាប់ការប្រកួតអន្តរជាតិ។ ប៉ុន្តែ Terry មិនបានបង្ហាញពីការខ្វល់ខ្វាយខ្លាំងឬការខកចិត្តរបស់គេទៅលើបញ្ហារបួស និងការរងបរាជ័យក្នុងលទ្ធផល 2-1 នេះឡើយ ខណៈរូបគេបានដឹកដៃភរិយាដ៏ស្រស់សោភារបស់គេធ្វើដំណើរទៅសម្រាកលម្ហែកាយក្រោមពន្លឺព្រះអាទិត្យក្នុងប្រទេសអេមីរ៉ាត អារ៉ាប់រួម នារដូវរងានេះ។ អតីតខ្សែបម្រើអន្តរជាតិអង់គ្លេសរូបនេះ បានធ្វើដំណើរទៅកាន់តំបន់មជ្ឈិមបូព៌ាភ្លាមៗមុនពេលបង្ហោះរូបបង្ហាញពីថ្ងៃសម្រាករបស់គេនៅលើបណ្តាញសង្គម Instagram។
អ្នកស្រី Toni ដែលជាភរិយារបស់ Terry ក៏បានប្រើប្រាស់បណ្តាញសង្គម ដើម្បីចែករំលែកនូវរូបភាពនៃពន្លឺព្រះអាទិត្យនៅទីក្រុងឌូបៃផងដែរ។ នាង Toni បានសរសេរថា៖ «ថ្ងៃដ៏ស្រស់ស្អាតមួយផ្សេងទៀតក្នុងទីក្រុងឌូបៃ។ ពិតជាស្រឡាញ់ទីក្រុងឌូបៃខ្លាំងណាស់»។ រូបភាពមួយផ្សេងទៀតដែលត្រូវបានចែករំលែកដោយ Terry បានបង្ហាញថា រូបគេកំពុងកម្សាន្ត និងអានសៀវភៅ ទាក់ទងនឹងភាពជោគជ័យក្នុងអាជីវកម្ម៕
ប្រភពពី៖ The Sun
November 8, 2017
បុរសចម្លែកមិនដែលងូតទឹកអស់រយៈពេល 60 ឆ្នាំ មានសភាពបែបនេះ……
តាមរយៈគេហទំព័រ Petmaya ដែលបានចេញផ្សាយកាលពីពេលថ្មីៗនេះបានឱ្យដឹងថា បុរសចំណាស់ម្នាក់មានឈ្មោះថា អាម៉ូហាត់ជិ ជាជនជាតិ Iran មានវ័យ 80 ឆ្នាំ រស់នៅក្នុងទីក្រុង Phalaborwa ប្រទេស Iran ។ នៅពេលដែលពួកគេបានឃើញបុរសម្នាក់នេះដំបូង គឺរូបគាត់មានសភាពមិនដូចមនុស្សធម្មតានោះទេ និងមើលទៅដូចជាវត្ថុមានជីវិតម្យ៉ាងដែលមានសភាពដូចមនុស្សបិសាចនៅក្នុងរឿង “The Lord of the Ring” អ៊ីចឹង ពោលគឺមានស្បែកក្ដាំងខ្មៅ និងមានលក្ខណៈក្រៀមក្រោះ។ រីឯស្បែកមុខវិញ សម្លឹងមើលទៅគ្មានអ្វីក្រៅពីភាពខ្មៅងងឹត គ្មានពន្លឺនោះទេ ឯក្លិនខ្លួនវិញគឺមិនបាច់និយាយឡើយ គ្រាន់តែនឹកឃើញក៏មានអាម្មណ៍ថាឆ្អែតបាយភ្លាមតែម្ដង។
បើនិយាយពីរឿងអនាម័យវិញ បុរសចំណាស់នេះមានកើតជំងឺសើស្បែកផ្សេងៗ ដែលមើលទៅគួរឱ្យខ្លាច និងខ្ពើមរអើមបំផុត នេះគឺដោយសារតែគាត់មិនបានងូតទឹក និងសម្អាតខ្លួនប្រាណអស់រយៈពេល 60 ឆ្នាំមកហើយ ទើបមានសភាពដូចជាមនុស្សមិនមែនមនុស្សបែបនេះ។
មិនមាននរណាម្នាក់ដឹងថា ហេតុអ្វីបានជាលោកតាម្នាក់នេះ សម្រេចចិត្តមិនងូតទឹកសោះបែបនេះ តែអ្វីដែលប្រាកដនោះគឺ លោកតាច្បាស់ជាកើតជំងឺខ្ជិលងូតទឹកហើយមើលទៅ ព្រោះបើសិនជាមនុស្សធម្មតាវិញ អាចអត់ទ្រាំបានត្រឹមតែ 2 ឬ 3 ថ្ងៃប៉ុណ្ណោះ មិនអាចដល់មួយអាទិត្យ ឬយូរជាងនេះបានទេ តែសម្រាប់លោកតាម្នាក់នេះ គ្មាននរណាម្នាក់អាចយល់ពីគាត់បានឡើយ ពោលគឺគាត់មានជីវិតរស់នៅបែបងាយៗ ហើយអ្វីដែលសំខាន់សម្រាប់ជីវិតរបស់គាត់នោះគឺ ទម្លាប់រស់នៅតាមរបៀបរបស់គាត់ ធ្វើឱ្យគាត់មានសេចក្ដីសុខខ្លាំងបំផុត៕
November 8, 2017
កម្ពុជាប្រើប្រាស់ប្រភពហិរញ្ញវត្ថុពី ADB ជិត3ពាន់លានដុល្លារសម្រាប់អភិវឌ្ឍន៍សេដ្ឋកិច្ច និងសង្គម
ធនាគារអភិវឌ្ឍន៍អាស៊ី (ADB) គឺជាដៃគូអភិវឌ្ឍន៍និងជាប្រភពធនធានហិរញ្ញវត្ថុដ៏សំខាន់សម្រាប់ប្រទេសកម្ពុជាក្នុងការទទួលបានហិរញ្ញវត្ថុនានា ទោះជាក្នុងក្របខណ្ឌកម្ចី ជំនួយឥតសំណង និងជំនួយបច្ចេកទេសក៏ដោយ។ កម្ពុជា បានចូលជាសមាជិករបស់ធនាគារអភិវឌ្ឍន៍អាស៊ី ក្នុងឆ្នាំ1966 ប៉ុន្តែនិវេសនដ្ឋានរបស់ធនាគារមួយនេះត្រូវបានដកចេញពីកម្ពុជានៅក្នុងសម័យសង្គ្រាម និងត្រូវបានតភ្ជាប់ឡើងវិញក្នុងឆ្នាំ1996។
តើអ្នកដឹងថា រហូតមកដល់ពេលនេះ ធនាគារអភិវឌ្ឍន៍អាស៊ី បានផ្តល់ហិរញ្ញវត្ថុប៉ុន្មានដល់ប្រទេសកម្ពុជាសម្រាប់យកមកអភិវឌ្ឍន៍ប្រទេស? ហើយគម្រោងណាខ្លះដែលប្រើប្រាស់ហិរញ្ញវត្ថុពីធនាគារដ៏ធំមួយនេះ? មានវិស័យសំខាន់ៗចំនួន10 ដែលគ្របដណ្តប់ទៅលើគម្រោងចំនួន359 របស់កម្ពុជាធ្លាប់បានប្រើប្រាស់ធនធានហិរញ្ញវត្ថុពីធនាគារអភិវឌ្ឍន៍អាស៊ី ដែលមានដូច
ជា វិស័យកសិកម្ម ធនធានធម្មជាតិ និងអភិវឌ្ឍន៍ជនបទ វិស័យអប់រំ វិស័យថាមពល វិស័យហិរញ្ញវត្ថុ វិស័យសុខាភិបាល វិស័យឧស្សាហកម្ម និងពាណិជ្ជកម្ម ការគ្រប់គ្រងវិស័យសាធារណៈ វិស័យដឹកជញ្ជូន ផ្លូវទឹក និងហេដ្ឋារចនាសម្ព័ន្ធ ព្រមទាំងសេវាកម្មដទៃទៀតនៅតំបន់ទីក្រុង និងពហុវិស័យផ្សេងៗទៀត។
យោងតាមព្រឹត្តិបត្រសមាជិករបស់ធនាគារអភិវឌ្ឍន៍អាស៊ី ដែលមានមូលដ្ឋាននៅទីក្រុងម៉ានីលប្រទេសហ្វីលីពីន បានឱ្យដឹងថា ប្រទេសកម្ពុជាបានប្រើប្រាស់ទឹកប្រាក់ដែលទទួលបានពីធនាគារអភិវឌ្ឍន៍អាស៊ី ADB ចំនួន2,860.64លានដុល្លារអាមេរិក ដោយមានគម្រោងសរុបចំនួន359 គិតចាប់តាំងពីការភ្ជាប់ទំនាក់ទំនងគ្នាឡើងវិញ រហូតដល់ឆ្នាំ2016។
គម្រោងរបស់ប្រទេសកម្ពុជា ដែលប្រើប្រាស់កម្ចីច្រើនបំផុតស្ថិតក្នុងវិស័យកសិកម្ម ធនធានធម្មជាតិ និង អភិវឌ្ឍន៍ជនបទ ដែលមាន75គម្រោង ប្រើប្រាស់ទឹកប្រាក់រហូតដល់708.82លានដុល្លារ វិស័យដឹកជញ្ជូនឈរនៅលំដាប់លេខរៀងទី2 ប្រើប្រាស់ទឹកប្រាក់529.70លានដុល្លារ និងលំដាប់លេខ3 គឺវិស័យអប់រំ ដែលមានទឹកប្រាក់300.05លានដុល្លារ គ្របដណ្តប់លើ37គម្រោង។
ធនាគារអភិវឌ្ឍន៍អាស៊ី បានចាត់ទុកជំនួយរបស់ខ្លួនដល់ប្រទេសកម្ពុជាផ្តោតសំខាន់លើការពង្រឹងការតភ្ជាប់រវាងជនបទ ទីប្រជុំជន ក្នុងតំបន់ និងការអភិវឌ្ឍធនធានមនុស្ស និងសង្គមដែលជាសសរស្តម្ភយុទ្ធសាស្ត្រ។ ហិរញ្ញប្បទាននោះក៏ផ្តោតលើការកែលម្អការគ្រប់គ្រងវិស័យសាធារណៈ ដែលជាសសរស្តម្ភពហុវិស័យផងដែរ។
ធនាគារអភិវឌ្ឍន៍អាស៊ី បានហៅកម្ពុជា គឺជាប្រទេសមួយក្នុងចំណោមប្រទេសដែលមានសេដ្ឋកិច្ចរីកចម្រើនលឿនជាងគេនៅអាស៊ីអាគ្នេយ៍ ក្នុងរយៈពេល5ឆ្នាំចុងក្រោយនេះ។ កំណើនសេដ្ឋកិច្ចបានជួយកាត់បន្ថយភាពក្រីក្ររបស់ប្រជាជនខ្មែរពីអត្រា47.8%ក្នុងឆ្នាំ2007 មកនៅត្រឹម13.5% ក្នុងឆ្នាំ2014។ ទោះបីជាបែបនេះក្តី ប្រជាជនខ្មែររហូតដល់ទៅ70% នៅបន្តរស់នៅជាមួយនឹងចំណូលក្រោម3ដុល្លារក្នុងមួយថ្ងៃ។
ធនាគារអភិវឌ្ឍន៍អាស៊ី នឹងបង្កើនការផ្តល់ហិរញ្ញប្បទានសម្បទានដល់ប្រទេសកម្ពុជា រហូតដល់200លានដុល្លារក្នុងមួយឆ្នាំ សម្រាប់រយៈពេលពីឆ្នាំ2017ដល់ឆ្នាំ2020 ពីប្រមាណជា150លានដុល្លារក្នុងមួយឆ្នាំពីឆ្នាំ2013ដល់ឆ្នាំ2016៕
November 8, 2017
លោក Moyes ត្រៀមបង្ហាញសមត្ថភាព ក្រោយក្លាយជាគ្រូបង្វឹករបស់ West Ham
ក្លិប West Ham United នឹងផ្តល់ឲ្យលោក David Moyes នូវឱកាសក្នុងការកសាងកេរិ៍្តឈ្មោះរបស់លោក ក្រោយពីក្លិបញញួរធំមួយនេះបានតែងតាំងលោកជាអ្នកចាត់ការទូទៅថ្មីរបស់ពួកគេ ក្នុងកិច្ចសន្យារយៈពេល6ខែ ដែលអាចនឹងបន្តរយៈពេលវែងជាងនេះ ប្រសិនបើគ្រូបង្វឹកវ័យ54ឆ្នាំរូបនេះ ធ្វើឲ្យក្រុមខ្លួនមានទម្រង់លេងល្អប្រសើរ។
លោក Moyes ត្រូវបានតែងតាំងជាគ្រូបង្វឹកបណ្តោះអាសន្នរបស់ West Ham ក្រោយពីលោក Slaven Bilic ត្រូវបានបណ្តេញចេញកាលពីថ្ងៃចន្ទ ប៉ុន្តែ លោកនឹងចូលកាន់ដំណែងដោយដឹងថា វាមានភាពដែលអាចទៅរួចក្នុងការទទួលបានសំណើរយៈពេល2ឆ្នាំ ប្រសិនបើលោកអាចសង្គ្រោះក្លិបនេះមិនឲ្យធ្លាក់ចេញពីក្របខ័ណ្ឌកំពូលបាន។ លោក David Sullivan និង David Gold ដែលជាសហម្ចាស់ក្លិប ក៏ចង់ឃើញសញ្ញាដ៏ជាក់លាក់នៃការធ្វើឲ្យល្អប្រសើរឡើងនេះដែរ មុនពេលធ្វើការសម្រេចចិត្តចុងក្រោយនៅចុងរដូវកាលនេះ។
បើទោះបីជាវាត្រូវបានគេយល់ឃើញថា លោក Moyes នឹងទទួលបានប្រាក់ឧបត្ថម្ភ2លានផោន ប្រសិនបើលោកឈ្នះការប្រជែងនៃការគេចឲ្យផុតពីការធ្លាក់ចេញក៏ដោយ ប៉ុន្តែលក្ខខណ្ឌមួយក្នុងកិច្ចសន្យារបស់លោកនឹងអនុញ្ញាតឲ្យក្លិប West Ham ចាកចេញ ប្រសិនបើពួកគេមិនទទួលបាននូវការចាប់អារម្មណ៍។ ក្លិបញញួរធំមួយនេះ បានចែកផ្លូវជាមួយនឹងលោក Bilic កាលពីថ្ងៃចន្ទ ពោលគឺរយៈពេល2ថ្ងៃ ក្រោយពីពួកគេបានរងបរាជ័យយ៉ាងអាម៉ាស់ក្នុងលទ្ធផល 4-1 ក្រោមស្នាដៃក្រុម Liverpool ដែលធ្វើឲ្យសហប្រធានក្លិបលោក Sullivan និង Gold ជឿជាក់ថា ក្លិបនេះត្រូវតែមានការផ្លាស់ប្តូរទិសដៅដើម្បីបញ្ចប់ភាពត្រដាបត្រដួស។
ក្លិប West Ham ដែលកំពុងតែស្ថិតក្នុងចំណាត់ថ្នាក់លេខ18 ក្រោយពីដណ្តើមបានជ័យជម្នះតែ2លើកគត់ពីការប្រកួត11លើកនោះ នឹងត្រូវពឹងផ្អែកទៅលើសមត្ថភាពរបស់លោក Moyes ក្នុងក្របខ័ណ្ឌកំពូលរបស់អង់គ្លេស ដើម្បីជួយឲ្យពួកគេគេចផុតពីគ្រោះថ្នាក់ បើទោះបីមានកំណត់ត្រាមិនល្អនាពេលថ្មីៗនេះក្នុងតួនាទីដឹកនាំរបស់លោកក៏ដោយ៕
ប្រភពពី៖ The Guardian
November 8, 2017
អ្វីដែលអ្នកគួរដឹងពីស្ពៃក្ដោបពណ៌ស្វាយមុនជ្រើសរើសទទួលទាន
ដឹងដែរឬទេថា ស្ពៃក្ដោបពណ៌ស្វាយ ឬមានឈ្មោះជាភាសាអង់គ្លេស Red Cabbage ដែលមានពណ៌ស្វាយស្រស់ស្អាតទាក់ទាញគួរឱ្យចង់ទទួលទាននោះ មុននឹងបរិភោគ អ្នកគួរតែយល់ដឹងពីវាឱ្យបានច្បាស់សិន ដើម្បីឱ្យល្អចំពោះសុខភាពរបស់អ្នក។ នៅពេលអ្នកទទួលទានស្ពៃប្រភេទជាអាហារឆៅ ស្រស់ ដូចជា សាលាដ ឬញាំជាដើមនោះ អ្នកគួរតែជ្រាបអំពីគុណប្រយោជន៍ជាច្រើនរបស់ស្ពៃនេះចំពោះរាងកាយរបស់អ្នក។ ថ្ងៃនេះ ឡារ៉ែន បានពាំនាំនូវអត្ថប្រយោជន៍របស់ស្ពៃក្ដោបស្វាយមកជម្រាបជូនប្រិយមិត្តទាំងអស់គ្នាដូចតទៅ។
ដោយសារតែស្ពៃក្ដោបពណ៌ស្វាយ ជាបន្លែដែលមានសរសៃអាហារក្នុងបរិមាណច្រើនគួរសម និងសម្បូរទៅដោយសារធាតុចិញ្ចឹមនៅក្នុងអាហារជាច្រើនប្រភេទ មិនថាតែប្រូតេអីុន កាបូអីុដ្រាត សូដ្យូម និងវីតាមីន C ផងដែរ។ ក្រៅពីការទទួលទានស្ពៃក្ដោបស្វាយយ៉ាងទៀងទាត់ និងជួយបន្ថយឱកាសកើតជំងឺមហារីកពោះវៀន និងជួយការពារជំងឺមហារីកផ្សេងៗទៀត ដែលជួយឱ្យរាងកាយរបស់អ្នកមានសុខភាពល្អ។ ម្យ៉ាងទៀតវាសម្បូរទៅដោយសារធាតុដែក ដែលជាសារធាតុសំខាន់បំផុតក្នុងការជំរុញការបង្កើតគោលិកាឈាមនៅក្នុងរាងកាយរបស់មនុស្សយើងផងដែរ។
ទោះជាយ៉ាងណាក៏ដោយ ជារៀងរាល់ថ្ងៃយើងមិនគួរបរិភោគស្ពៃឆៅច្រើនជាង1-2គីឡូក្រាមនោះទេ ព្រោះវាមានផ្ទុកនូវសារធាតុម្យ៉ាងដែលឱ្យឈ្មោះថា Goitrogen មាននៅក្នុងស្ពៃក្ដោប ហើយបណ្ដាលឱ្យសារធាតុនេះលើសនៅក្នុងរាងកាយ ដែលបង្កឱ្យសារជាតិអីុយ៉ូតទីរ៉ូអីុតដែលនៅក្នុងឈាមមានសភាពថយចុះ ក៏ប៉ុន្ដែសារធាតុនេះនឹងបាត់បង់ទាំងស្រុងនៅពេលស្ពៃក្ដោបនោះត្រូវបានចម្អិនឆ្អិនល្អ៕
November 8, 2017
គន្លឹះខ្លីៗក្នុងការបង្កើតប្រ៊េនដ៍នាំចេញទៅបរទេស
ភ្នំពេញ – បន្ទាប់ពីទទួលបានភាពជោគជ័យក្នុងការគ្រប់គ្រងលើអាជីវកម្មជាច្រើន ថ្មីៗនេះលោកឧកញ៉ា ចិត្រ សេរីសុភ័ក្ដ្រ បានបង្ហើបថា បន្ទាប់ពីប្រ៊េនដ៍ Monsne កាហ្វេ មានឈ្មោះនៅលើទីផ្សារក្នុងស្រុករួចហើយ នៅពេលឆាប់ៗខាងមុខនេះប្រ៊េនដ៍មួយនេះនឹងចេញទៅដល់បរទេស។
លោកឧកញ៉ា ចិត្រ សេរីសុភ័ក្ដ្រ អគ្គនាយកក្រុមហ៊ុន Luxury Smile (Cambodia) Co., Ltd បានបញ្ជាក់ថា ដំបូងគិតបង្កើតត្រឹមតែលក់ក្នុងស្រុកតែប៉ុណ្ណោះ ប៉ុន្ដែដោយយល់ថា កូនខ្មែរជាអ្នកមានសមត្ថភាពពូកែ ដូច្នេះលោកនឹងធ្វើកិច្ចការងារនេះឱ្យបានល្អ និងល្អឥតខ្ចោះដើម្បីធ្វើយ៉ាងណាជាការទាក់ទាញដល់ជនបរទេសឱ្យចាប់អារម្មណ៍ និងមកសិក្សាផលិតផលរបស់យើង។ លោកឧកញ៉ាបន្ដថា ក្រោយពីមើលឃើញថា យើងមានទីផ្សារក្នុងស្រុកល្អហើយ លោកក៏មានគំនិតឈានទៅដល់ទីផ្សារបរទេសបន្ថែមទៀត។
អគ្គនាយកក្រុមហ៊ុន Luxury Smile (Cambodia) Co., Ltd សង្កត់ធ្ងន់ថា ដើម្បីឈានទៅដល់ការលក់ Franchise ទៅបរទេសយើងមានគោលការណ៍មួយចំនួនគឺ ត្រូវមានការរៀបចំគោលការណ៍ស្ដង់ដារនៃផលិតផលរបស់យើងឱ្យបានត្រឹមត្រូវ គឺយើងរៀបជាស្ដង់ដារអន្ដរជាតិ នៅពេលយើងរៀបបានស្ដង់ដារបែបនេះ អតិថិជននៅក្រៅប្រទេសដែលមានបំណងទិញFranchise គេអាចទទួលយកបានហើយ។
លើសពីនេះយើងត្រូវស្គាល់គោលការណ៍របស់ប្រទេសណាមួយដែលយើងចង់ទៅ។ មានន័យថា ប្រសិនបើយើងចង់យកប្រ៊េនដ៍របស់យើងទៅប្រទេសថៃ យើងត្រូវស្គាល់ឱ្យបានច្បាស់ពីអតិថិជននៅប្រទេសថៃ ថាគេនឹងទទួលយកផលិតផលបែបណា? ទីផ្សាររបស់យើងស្ថិតនៅក្នុងខ្នាតបែបណា? កម្រិតណា? តើយើងត្រូវដាក់តម្លៃប៉ុនណាដែលអាចឱ្យគេលក់បាន និងបង្កើនចំណូលសម្រាប់អ្នកទិញ Franchise ពីយើង។
លោកឧកញ៉ាចិត្រ សេរីសុភ័ក្ដ្រ បញ្ជាក់ថា បើយើងចង់លក់ Franchise ឱ្យគេ យើងមិនអាចនៅស្ងៀមអត់ធ្វើអ្វីសោះនោះទេ បែបហ្នឹងគេនឹងមិនមកទិញរបស់យើងទេ។ ដូច្នេះក្នុងនាមយើងជាម្ចាស់អាជីវកម្មយើងត្រូវធ្វើរឿងជាច្រើន ពិសេសធ្វើឱ្យខ្លួនឯងជោគជ័យជាមុនសិន ទើបទទួលបានទំនុកចិត្ដ។ លោកឧញ៉ាបន្ថែមថា៖ «សម្រាប់ប្រ៊េនដ៍របស់ខ្ញុំ គឺខ្ញុំធ្វើដោយផ្ទាល់ខ្លួនឯង ក្រៅពីរូបមន្ដដែលខ្ញុំយកមកពីប្រទេសជប៉ុន ខ្ញុំក៏បានបង្កើត និងចុះលក់ដោយខ្លួនឯងទៀត រហូតគេថា ខ្ញុំធ្លាក់ខ្លួនក្រ ចុះលក់កាហ្វេតាមថ្នល់។ ខ្ញុំសួរទៅវិញថា បើខ្ញុំចង់ណែនាំឱ្យគេស្គាល់ពីផលិតផលរបស់ខ្ញុំ តែខ្ញុំមិនទាំងស្គាល់ផលិតផលរបស់ខ្លួនឯងផងនោះ តើអតិថិជនរបស់ខ្ញុំគេមានទំនុកចិត្ដលើខ្ញុំដែរឬទេ? ច្បាស់ជាអត់ទេ។ ដូច្នេះខ្ញុំត្រូវស្គាល់អ្វីដែលខ្ញុំមានឱ្យច្បាស់ ខ្ញុំធ្វើអ្វីដែលខ្ញុំពូកែ និងខ្ញុំធ្វើអ្វីដែលខ្ញុំដឹង។ នៅពេលខ្ញុំនាំគំនិតទាំងនោះទៅឱ្យអតិថិជន ពួកគាត់នឹងប្រាកដក្នុងចិត្ដ ពួកគេនឹងជឿទុកចិត្ដលើខ្ញុំ»៕
November 7, 2017