ថ្នាក់ដឹកនាំរបស់ក្រុមហ៊ុន Idemitsu Kosan Co., Ltd ដែលជាដៃគូជាមួយក្រុមហ៊ុនទទួលបានកិច្ចព្រមព្រៀងប្រេងកាតមានលក្ខខណ្ឌនៅតំបន់ I&II នៃតំបន់ទាមទារត្រួតគ្នា (OCA) បានស្នើឱ្យកម្ពុជា ពន្លឿនការដោះស្រាយបញ្ហាដែលនៅជាប់គាំងក្នុងតំបន់ឈូងសមុទ្រ ដើម្បីឈានទៅបើកផ្លូវក្នុងការរុករក និងធ្វើអាជីវកម្មប្រេងនៅកម្ពុជា។
ការស្នើនេះបានធ្វើឡើងនៅក្នុងជំនួបដ៏កម្រមួយរវាង ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ជាមួយលោក Eiji Hagiwara នាយកផ្នែកស្រាវជ្រាវ និងផលិតកម្មនៃក្រុមហ៊ុន Idemitsu Kosan Co., Ltd នៅទីស្តីការក្រសួងរ៉ែ និងថាមពល កាលពីពេលថ្មីៗនេះ។
បច្ចុប្បន្នប្រទេសកម្ពុជាបាននិងកំពុងធ្វើដំណើរឆ្ពោះទៅរកការធ្វើអាជីវកម្មប្រេងឥន្ធនៈនៅក្នុងប្លុក A ដែលកាន់កាប់ដោយក្រុមហ៊ុន KrisEnergy មានមូលដ្ឋាននៅប្រទេសសិង្ហបុរី និងការកសាងរោងចក្រចម្រាញ់ប្រេង ដែលវិនិយោគដោយក្រុមហ៊ុនមកពីប្រទេសចិន និងតំណាងដោយក្រុមហ៊ុន Cambodian Petrochemical ដែលដឹកនាំដោយលោកឧកញ៉ា ហាន់ ឃៀង។
យោងតាមបណ្តាញសង្គមរបស់ក្រសួងរ៉ែ និងថាមពល បានឱ្យដឹងថា លោក Eiji Hagiwara នាយកផ្នែកស្រាវជ្រាវ និងផលិតកម្មនៃក្រុមហ៊ុន Idemitsu Kosan Co., Ltd. ដែលជាក្រុមហ៊ុនដៃគូជាមួយក្រុមហ៊ុន Conoco Phillips (UK) Limited (មានភាគហ៊ុន 66.66%) ជាក្រុមហ៊ុនទទួលបានកិច្ចព្រមព្រៀងប្រេងកាតមានលក្ខខណ្ឌនៅតំបន់ I&II នៃតំបន់ទាមទារត្រួតគ្នា (OCA) ដែលជាតំបន់ត្រួតស៊ីគ្នារវាងប្រទេសកម្ពុជា និងថៃ បានស្នើឱ្យភាគីទាំងពីរបន្តជំរុញការដោះស្រាយបញ្ហា ដើម្បីពន្លឿនដល់ការអភិវឌ្ឍវិស័យប្រេងកាតក្នុងតំបន់នោះ។
ក្រសួងរ៉ែ និងថាមពល ក៏បានបង្ហាញថា ក្រុមហ៊ុន Idemitsu Kosan Co., Ltd. តែងតែបញ្ជូន Dr. Shiga អតីតនាយកផ្នែកស្រាវជ្រាវ និងផលិតកម្មឱ្យមកធ្វើការបណ្តុះបណ្តាលដល់មន្ត្រីប្រេងកាតកម្ពុជាជាញឹកញាប់ផងដែរដើម្បីជាសក្ខីភាពក្នុងកិច្ចសហប្រតិបត្តិការជាមួយគ្នា។ ក្នុងជំនួបជាមួយឯកឧត្តម ស៊ុយ សែម តំណាងក្រុមហ៊ុនបានលើកឡើងថា ក្រុមហ៊ុនលោកនឹងបោះទុនសម្រាប់ការវិនិយោគប្រេងកាតនៅតំបន់នោះ ប្រសិនបើភាគីកម្ពុជា និងភាគីថៃចរចាត្រូវគ្នា។
ឯកឧត្តម ស៊ុយ សែម បានបញ្ជាក់ជូនប្រតិភូជប៉ុនថា កាលពីថ្ងៃទី07 ខែកញ្ញា ឆ្នាំ2017 កន្លងមកឯកឧត្តមនាយករដ្ឋមន្ត្រីនៃប្រទេសថៃបានអញ្ជើញមកទស្សនកិច្ចជាផ្លូវការនៅកម្ពុជា ក្នុងពេលនោះប្រមុខរាជរដ្ឋាភិបាលនៃប្រទេសទាំងពីរបានចេញសេចក្តីថ្លែងការណ៍រួមគ្នាមួយ ដើម្បីជំរុញយន្តការនេះឱ្យបានលឿននៅក្នុងតំបន់ប្រេងកាតត្រួតស៊ីគ្នានោះ។ ឯកឧត្តមរដ្ឋមន្ត្រី បានបន្តថា ពាក់ព័ន្ធបញ្ហានេះភាគីកម្ពុជាបានខិតខំប្រឹងប្រែងយ៉ាងខ្លាំង នឹងឈានទៅដល់ការចរចាម្តងពីរដងរួចមកហើយ ក្នុងនោះភាគីថៃហាក់សម្តែងនូវការទទួលយក ប៉ុន្តែជាលទ្ធផលគឺពុំបានចេញជាផ្លៃផ្កានោះឡើយ ដោយអ្នកបច្ចេកទេសថៃតែងតែទាញយកបញ្ហាព្រំដែន គឺចង់ឱ្យមានការកំណត់ព្រំដែនជាមុន ចំណែកភាគីកម្ពុជាវិញចង់ទុករឿងព្រំដែនដោះស្រាយជាក្រោយ ហេតុនេះការជជែកវែកញែកនោះមិនបានត្រូវគ្នាឡើយ ដែលបានបន្តទុកមកដល់សព្វថ្ងៃនេះ។
តំបន់ទាមទារត្រួតគ្នា (OCA) ត្រូវបានចែកចេញជា 4តំបន់ ក្នុងនោះតំបន់1 និងតំបន់2 ស្ថិតក្រោមការស្វែងរុករកប្រេងកាតរបស់ក្រុមហ៊ុន អ៊ីដឹម មីតស៊ុយ កូសាន និងក្រុមហ៊ុនកូនីកូ ហ្វីលៀប របស់អាមេរិក ដែលបានចុះកិច្ចព្រមព្រៀងរួមគ្នាមានលក្ខខណ្ឌតាំងពីឆ្នាំ1997 ចំណែកតំបន់3 ក្រុមហ៊ុនតូតាល់ និងតំបន់4 ក្រោមការវិនិយោគរបស់ក្រុមហ៊ុន សីនុ ប្រទេសចិន។ បច្ចុប្បន្នតំបន់ទាំង4នេះស្ថិតនៅក្នុងតំបន់ ស នៅឡើយ៕
