សង្គម និងសេដ្ឋកិច្ច - La Reine Media

Buffon ជំរុញអ៊ីតាលី កុំឲ្យភិតភ័យពេលប៉ះ ស៊ុយអែត រាត្រីនេះ

អ្នកចាំទី Gianluigi Buffon បានបញ្ជាក់ថា ក្រុមបាល់ទាត់ជម្រើសជាតិអ៊ីតាលី មិនត្រូវស្លន់ស្លោឡើយ ខណៈដែលពួកគេនឹងត្រូវប្រជែងគេចឲ្យផុតពីការអវត្តមានក្នុងយុទ្ធនាការ World Cup ជាលើកទី1ក្នុងរយៈពេល60ឆ្នាំ ក្រោយពីការរងបរាជ័យ 1-0 ក្រោមស្នាដៃក្រុមជម្រើសជាតិស៊ុយអែត ក្នុងជើងទី1នៃវគ្គ Playoff បានធ្វើឲ្យពួកគេស្ថិតយ៉ាងប្រកៀកក្នុងការធ្លាក់ចេញ។

ប្រធានក្រុម Buffon ដែលកំពុងតែសម្លឹងរកការបង្ហាញខ្លួនក្នុងយុទ្ធនាការ World Cup ជុំផ្តាច់ព្រ័ត្រ ជាលើកទី6 របស់ខ្លួននៅរុស្ស៊ីនោះ គឺជាកីឡាករម្នាក់ក្នុងចំណោមកីឡាករដែលនៅតែមានវត្តមានពីក្រុមដែលបានឈ្នះពាន World Cup ឆ្នាំ2006។ ប៉ុន្តែ ទម្រង់លេងរបស់ក្រុមដែលមានរហស្សនាមថា Azzurri មួយនេះ ត្រូវបានចាត់ទុកថា ជាទម្រង់លេងមួយដ៏អន់ និងមិនច្បាស់លាស់ដែលធ្វើឲ្យអ៊ីតាលី ត្រូវតែធ្វើឲ្យបានល្អក្នុងការប្រកួតជើងទី2នៅរាត្រីនេះ ក្នុងទីក្រុង Milan ដើម្បីគេចឲ្យផុតពីការខកខានក្នុងការឈ្នះកៅអីទៅលេងក្នុងយុទ្ធនាការ World Cup ជុំផ្តាច់ព្រ័ត្រ ជាលើកទីដំបូងបើគិតចាប់តាំងពីឆ្នាំ1958មក។ Buffon ដែលបានបណ្តោយឲ្យមានគ្រាប់បាល់ចូលទីរបស់ខ្លួនពីការស៊ុតរបស់កីឡាករបម្រុង Jakob Johansson នៃក្រុមស៊ុយអែតក្រោយពីប្លាតចេញពីជើងរបស់ខ្សែការពារ Daniele De Rossi នោះ បាននិយាយថា៖ «យើងត្រូវតែមានអារម្មណ៍ល្អតាមដែលអាចធ្វើបានក្នុងការទៅកាន់ World Cup»។ អ្នកចាំទីចាស់វស្សារូបនេះបានប្រាប់បន្តថា៖ «យើងដឹងថា យើងបានរងបរាជ័យ ប៉ុន្តែ យើងមានរយៈពេល90នាទីផ្សេងទៀតក្នុងការជម្នះលើស្ថានភាពដ៏ស្មុគស្មាញនេះ។ គោលការណ៍ទី1 គឺមិនត្រូវមានការស្លន់ស្លោឡើយ»។

Buffon បានបន្ថែមទៀតថា៖ «ខ្ញុំរំពឹងទុកថា អ្នកគាំទ្រដ៏ច្រើនកុះករនៅកីឡដ្ឋាន San Siro នឹងជួយឲ្យក្រុមយើងបានទៅវគ្គបន្ត។ ខ្ញុំគិតថា វាមិនមែនជាការប្រកួតដ៏សំខាន់បំផុតប្រចាំជីវិតឡើយ ប៉ុន្តែ ខ្ញុំជឿជាក់ថា យើងនឹងធ្វើបាន ក្រោមជំនួយពីអ្នកគាំទ្រ»។ ការប្រកួតនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Daily Stars

November 13, 2017

លោកយាយធ្លាប់សម្ដែងក្នុងចម្រៀង «ស័ង្ខសិល្បជ័យ» ទទួលមរណភាពហើយ

នៅថ្ងៃទី12 ខែវិច្ឆិកា ឆ្នាំ2017 វិរសិល្បករិនីជើងចាស់ ដែលមានឈ្មោះបោះសំឡេង និងត្រូវបានប្រជាពលរដ្ឋខ្មែរចំណាំលោកយាយបានតាមរយៈបទចម្រៀងយីកេរឿង “ស័ង្ខសិល្បជ័យ ” ដែលត្រូវបានផលិតជាវីដេអូចម្រៀងដោយផលិតកម្មរស្មីហង្សមាសនោះ គឺលោកយាយ ចាន់ ស៊ីផាន់ បានទទួលមរណភាពហើយនាថ្ងៃម្សិលមិញនេះដោយរោគាពាធក្នុងជន្មាយុ 93 ឆ្នាំ។

គួររំឭកផងដែរថា លោកយាយ ចាន់ ស៊ីផាន់ គឺជារិវសិល្បករិនី 3 ជំនាន់ ដែលធ្លាប់បានចូលប្រឡូកសិល្បៈតាំងពីអំឡុងទសវត្សរ៍ទី60 និង90 រហូតដល់អំឡុងប៉ុន្មានឆ្នាំចុងក្រោយនេះ ។ រិវសិល្បករិនីជើងចាស់រូបនេះ ធ្លាប់បានសាងនូវស្នាដៃសម្ដែងជាច្រើនរឿង ទាំងរឿងភាគ និងខ្សែភាពយន្ដខ្នាតធំផងដែរ។ នៅក្នុងនោះតាមរយៈខ្សែវីដេអូរឿង គេសង្កេតឃើញថា តារាជើងចាស់រូបនេះធ្លាប់មានស្នាដៃសម្ដែងជាមួយតារាល្បីៗជាច្រើនដួងរួមមាន លោក ខៃ ប្រសិទ្ធ លោក ចៅ ចាន់ណារី លោក យស បូវណ្ណ: លោក ទេព រិនដារ៉ូ អតីតតារាសម្ដែង ហង្ស ផល្លីមធុរ៉ា (សព្វថ្ងៃស្លាប់) អ្នកនាង អម្ពរ ទេវី និងអ្នកស្រី ចាន់ តារាទីជាដើម។

ជំនួសមុខឱ្យសារព័ត៌មាន ឡារ៉ែន យើងខ្ញុំទាំងអស់គ្នាសូមគោរពចូលរួមរំលែកទុក្ខដល់គ្រួសារសពចំពោះទុក្ខសោកដ៏សែនក្រៀមក្រំមួយនេះ និងសូមឱ្យវិញ្ញាណក្ខន្ធរបស់វិរសិល្បករិនីលោកយាយ ចាន់ ស៊ីផាន់ បានទៅកាន់សុគតិភពកុំបីអាក់ខានឡើយ៕

November 13, 2017

Walmart ក្រុមហ៊ុនយក្សរបស់អាមេរិក កំពុងពិចាណា ដើម្បីបោះទុនវិនិយោគនៅកម្ពុជា

Walmart ដែលជាក្រុមហ៊ុនលក់ទំនិញអនឡាញរបស់អាមេរិក បានបង្ហាញចំណាប់អារម្មណ៍ និងស្វែងយល់ឱ្យកាន់តែច្បាស់ពាក់ព័ន្ធទៅនឹងច្បាប់ និងបទដ្ឋាននានាក្នុងការគ្រប់គ្រងទៅលើកម្លាំងពលកម្ម ច្បាប់ស្តីពីការងារ និងបរិយាកាសការងារ ដើម្បីបោះទុនវិនិយោគលើអាជីវកម្មរបស់ខ្លួននៅក្នុងប្រទេសកម្ពុជា។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក៏បានផ្ដល់នូវអនុសាសន៍ និងការចែករំលែកព័ត៌មានពាក់ព័ន្ធគោលនយោបាយបើកទូលាយក្នុងការប្រកបអាជីវកម្ម ពាណិជ្ជកម្ម និងវិនិយោគ ជាពិសេសកិច្ចសម្រួលពាណិជ្ជកម្ម ដែលរាជរដ្ឋាភិបាលកម្ពុជាបាននិងកំពុងអនុវត្តប្រកបដោយ និងទទួលបានការស្វាគមន៍យ៉ាងកក់ក្តៅពីអ្នកវិនិយោគទាំងក្នុង និងក្រៅប្រទេស។

រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបន្ថែមថា តាមរយៈយុទ្ធសាស្ត្រចតុកោណរបស់រាជរដ្ឋាភិបាលដំណាក់កាលទី3 រួមទាំងការអនុវត្តប្រកបដោយផ្លែផ្កានូវផែនការយុទ្ធសាស្ត្រគោលនយោបាយជាតិ ស្តីពីមុខរបរ និងការងារ គោលនយោបាយអភិវឌ្ឍន៍វិស័យឧស្សាហកម្មកម្ពុជា គោលនយោបាយស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ និងក្របខណ្ឌគោលនយោបាយជាតិគាំពារសង្គម។ គួបផ្សំនឹងការពង្រឹងការអនុវត្តច្បាប់ស្តីពីការងារ និងច្បាប់ស្តីពីសហជីព លក្ខខណ្ឌការងារបានផ្ដល់ជូនបងប្អូនកម្មករនិយោជិតកាន់តែល្អប្រសើរ ការបន្តដំឡើងប្រាក់ឈ្នួលអប្បបរមា មានសុវត្ថិភាព និងសន្តិសុខការងារល្អ មានរបបសន្តិសុខសង្គមផ្នែកហានិភ័យការងារ និងថែទាំសុខភាព មានកន្លែងទទួលទានអាហារ មានកន្លែងស្នាក់នៅ មានមធ្យោបាយធ្វើដំណើរ។ ការទំនាក់ទំនងរវាងកម្មករនិយោជិត ជាមួយម្ចាស់រោងចក្រ មានភាពជិតស្និតល្អ ប្រកបដោយការយោគយល់គ្នា បង្កើតនូវបរិយាកាសសុខដុមរមនា។

ក្រុមហ៊ុន Walmart មានទីស្នាក់ការធំនៅ ទីក្រុង Bentonville រដ្ឋ Arkansas ហើយបច្ចុប្បន្នមានហាងលក់ទំនិញយីហោ Walmart រហូតដល់ជាង 6200 ហាងនៅសហរដ្ឋអាមេរិក និងជាង 850,000 ហាងទៀត នៅក្នុង 27ប្រទេស។ ក្រុមហ៊ុន Walmart មានចំណូលច្រើនជាងគេក្នុងពិភពលោក ប្រហែល480 ពាន់លានដុលារអាមេរិក ហើយក៏ជាក្រុមហ៊ុនដែលមានកម្មករនិយោជិតច្រើនជាងគេនៅលើពិភពលោកផងដែរ ប្រមាណ2,3 លាននាក់។

លោក Scott Price អនុប្រធានប្រតិបត្តិ និងជាប្រធានរដ្ឋបាលនៃក្រុមហ៊ុន Walmart អន្តរជាតិ បានសម្ដែងនូវអារម្មណ៍រីករាយចំពោះការយកចិត្តទុកដាក់របស់រាជរដ្ឋាភិបាលកម្ពុជាក្នុងការគាំពារដល់វិស័យឯកជន ព្រមទាំងវាយតម្លៃខ្ពស់ចំពោះគោលនយោបាយដ៏ល្អរបស់រាជរដ្ឋាភិបាលកម្ពុជាក្នុងការបន្តធានានូវលក្ខខណ្ឌការងារល្អប្រសើរ ដែលជាប្រភពទំនិញស្អាតស្អំ គ្មានការកេញប្រវ័ញ្ចកម្លាំងពលកម្មពីកម្មករនិយោជិត ហើយកម្មករនិយោជិតទទួលបាននូវប្រាក់ឈ្នួលអប្បបរមាល្អប្រសើរ។

ប្រធានរដ្ឋបាលនៃក្រុមហ៊ុន Walmart អន្តរជាតិ បន្ថែមថា ទាំងនេះជាកត្តាដ៏ចម្បង សម្រាប់ក្រុមហ៊ុន Walmart អាចរក្សាបាននូវស្តង់ដារបស់ខ្លួន ដែលអតិថិជនរបស់ Walmart នឹងពេញចិត្តនូវប្រភពទំនិញ Walmart បញ្ជាទិញ ពីកម្ពុជាសម្រាប់ចែកចាយតាមហាងនានា នៅសហរដ្ឋអាមេរិក កាណាដា និងប្រទេសនានាទូទាំងពិភពលោក។

លោក Scott Price បន្ថែមថា តាមរយៈសក្តានុពល និងស្ថានភាពវិវត្តន៍រីកចម្រើនសេដ្ឋកិច្ចរបស់ប្រទេសកម្ពុជា ដែលជាឱកាសដ៏ល្អសម្រាប់ក្រុមហ៊ុន Walmart អន្តរជាតិធ្វើការពិចារណាក្នុងការបណ្តាក់ទុននៅកម្ពុជា។ ជាងនេះក្រុមហ៊ុននឹងបន្តបង្កើនការបញ្ជាទិញទំនិញផលិតផលសំលៀកបំពាក់ និងស្បែកជើងពីកម្ពុជា រួមទាំងទំនិញសម្ភារៈធ្វើដំណើរដែលកម្ពុជាទើបតែទទួលបាន ភាពអនុគ្រោះពាណិជ្ជកម្មពីសហរដ្ឋអាមេរិក៕

November 13, 2017

5អគារដែលមានរចនាបទប្លែកបំផុតទូទាំងពិភពលោក

ច្រើនឆ្នាំកន្លងមកនេះយើងបានឃើញនូវការផ្លាស់ប្តូរប្រែប្រួលនៅតាមប្រទេសនីមួយៗ ហើយសូម្បីតែនៅក្នុងប្រទេសយើងក៏ដោយក៏មានផុសឡើងនូវរូបបែបម៉ូដអគារដែលមានទ្រង់ទ្រាយប្លែកចម្លែកៗបែបមិនដែលធ្លាប់បានឃើញនៅទីណាពីមុនមកឡើយ។ ថ្ងៃនេះទំព័រដេគ័រនៃទស្សនាវដ្តី ឡារ៉ែន សូមរួបរួមកំពូលអគារដែលមានរចនាបទនិងរូបរាងប្លែកស្អាតទូទាំងពិភពលោកមកជូនប្រិយមិត្តអ្នកអានបានទស្សនាទាំងអស់គ្នា។

1-The sky Pool (London, UK)
ជាអគារម៉ូដជ្រុងៗធម្មតា តែចំណុចលេចធ្លោគឺ នៅលើដំបូលអគារ The skyPool នេះមានអាងហែលទឹកដែលសាងពីកញ្ចក់ថ្លាកម្រាស់20សង់ទីម៉ែត្រ និងមានកម្ពស់ពីដីដល់ទៅ35ម៉ែត្រ សម្រាប់អ្នកណាចង់សាកល្បងភាពក្លាហានដោយការហែលទឹកនៅក្នុងអាង
ទឹកដែលសាងពីកញ្ចក់ថ្លានេះ។ អាងហែលទឹកកញ្ចក់នេះតភ្ជាប់អគារចំនួន2 ឱ្យជាប់គ្នាដោយខាងក្រោមគ្មានសសរទ្រ ឬសំណង់អ្វីទប់ទ្រនៅពីក្រោមឡើយ។

2-The Louvre Abu Dhabi (Abu Dhabi, United Arab Emirates)
សហរដ្ឋអារ៉ាប់ អេមីរេតបានទិញសិទ្ធិពីសារមន្ទីរ The Louvre ក្នុងតម្លៃ500លានដុល្លារ ហើយអគារសារមន្ទីរ The Louvre នៅក្នុង អាប៊ូដាប៊ី នេះថែមទាំងត្រូវបានសាងសង់ឡើងដោយការសហការគ្នារវាងអារ៉ាប់ និងបារាំងទៀតផង។ ដោយបានទទួលការរចនាម៉ូដឱ្យក្លាយជាអគារដែលមានរូបរាងជាដូម មានស្នាមបែក និងរន្ធនៅលើដំបូលដែលជួយឱ្យពន្លឺចាំងចុះមក នៅពេលយើងដើរចូលទៅខាងក្នុងធ្វើឱ្យមានអារម្មណ៍ថា ដូចកំពុងដើរនៅក្រោមទឹក។ គឺជារចនាបទដ៏កំពូលអស្ចារ្យ។

3-The San Francisco Museum of Modern Art (San Francisco, CA)
សារមន្ទីរសិល្បៈសម័យថ្មីរបស់ San Francisco ឬ SFMOMA ដែលច្នៃម៉ូដអគារឡើងដោយ Snohetta ដែលស្ថិតនៅលើផ្ទៃដីទាំងអស់12,000ម៉ែត្រការ៉េ ទាំងផ្ទៃដីក្នុងម្លប់ និងកណ្តាលវាល។ ផ្នែកខាងក្រោមជាបន្ទប់វិចិត្រសាលបំពាក់កញ្ចក់ដែលអាចឱ្យមនុស្សម្នាទូទៅចូលទស្សនាដោយសេរី និងនៅក្នុងជាន់នីមួយៗថែមទាំងមានការរចនាបទតុបតែងខាងក្នុងខុសប្លែកពីគ្នា មានលក្ខណៈពិសេសដោយឡែកពីគ្នា ធ្វើឱ្យអគារមួយនេះត្រូវបានច្នៃម៉ូដឡើងយ៉ាងចម្លែក។

4-The Agora Garden (Taipei, Taiwan)
ជាអគារកម្ពស់20ជាន់ កំពូលទំនើបស្ថិតនៅក្នុងទីក្រុងតៃប៉ិ ប្រទេសតៃវ៉ាន់ ជាអគារពណ៌បៃតង មានរូបរាងទ្រង់ទ្រាយជារាងអគាររមួល រចនាម៉ូដឡើងដោយ Paris-based Vincent Callebaut Architecture។ ខាងក្នុងមានទំហំជាង42,335ម៉ែត្រការ៉េ ព្រមជាមួយក្លិបហៅស៍ អាងហែលទឹក រោងហាត់ប្រាណ ចំណតរថយន្ត និងកន្លែងស្នាក់នៅលំដាប់ Luxury ហើយផ្នែកខាងក្រៅនៃអគារថែមទាំងមានទឹកធ្លាក់សិប្បនិម្មិត និងសួនច្បារពណ៌បៃតងខ្ចីដែលពោរពេញទៅដោយរុក្ខជាតិ បន្លែផ្លែឈើ និងរុក្ខជាតិឱសថបុរាណដែលបញ្ចេញក្លិនក្រអូបនៅជុំវិញនោះទៀតផង។

5-Zlota 44 (Warsaw, Poland)
ជាអគារស្នាក់នៅដ៏សែនទំនើបបំផុតកម្ពស់54ជាន់ ត្រូវបានច្នៃម៉ូដឡើងឱ្យមានរូបលក្ខណៈដ៏ទាន់សម័យ និងប្រើប្រាស់នវានុវត្តន៍ដែលទាន់សម័យបំផុតនៅក្នុងប្រទេសប៉ូឡូញ វាក្លាយជាអគារស្នាក់នៅដ៏សែនទំនើបបំផុត និងជានិមិត្តសញ្ញាដ៏លេចធ្លោរបស់ទីក្រុងវ៉-ស ប្រទេសប៉ូឡូញ។ ផ្នែកខាងក្នុងប្រកបទៅដោយទីកន្លែងទំនើបៗជាច្រើន ដើម្បីតបស្នងចំពោះអ្នកដែលមកសា្នក់នៅ មានទាំងអាងហែលទឹក បន្ទប់ចំហុយសោណា និងស្ប៉ាជាដើម។ អគារមួយនេះត្រូវបានសាងសង់ និងរចនាម៉ូដឡើងដើម្បីធ្វើជាអគារកម្រិតស្តង់ដារថ្មីដែលឆ្លុះបញ្ចាំងអំពីភាពជោគជ័យ និងកម្លាំងជំរុញចិត្តរបស់ប្រជាជនប៉ូឡូញទៀតផង៕

November 13, 2017

ស្វ៊ីស និងក្រូអាស៊ី ដឹកដៃគ្នាទៅ World Cup ក្រោយទម្លាក់អៀរឡង់ខាងជើង និងក្រិក

ក្រុមបាល់ទាត់ជម្រើសជាតិស្វ៊ីស បានការពារការវាយលុករបស់ក្រុមជម្រើសជាតិអៀរឡង់ខាងជើងបានយ៉ាងរឹងមាំ ដើម្បីកក់កៅអីរបស់ពួកគេទៅកាន់យុទ្ធនាការ World Cup ឆ្នាំ2018 ក្នុងប្រទេសរុស្ស៊ី តាមរយៈការបញ្ចប់ក្នុងលទ្ធផលស្មើ ០-០ ក្នុងការប្រកួតជើងទី2កាលពីថ្ងៃអាទិត្យ ដែលនាំឲ្យពួកគេឈ្នះទាំងពីរជើង 1-០ នៃការប្រកួតវគ្គ Playoff នេះ។

ក្រុមរបស់លោក Vladimir Petkovic បានខ្ជះខ្ជាយឱកាសជាច្រើនក្នុងតង់ទី1 ខណៈដែលក្រុមជម្រើសជាតិអៀរឡង់ខាងជើងបានរក្សាទម្រង់លេងដ៏រឹងមាំរបស់ខ្លួន ប៉ុន្តែ គ្រាប់បាល់ប៉េណាល់ទីដ៏ចម្រូងចម្រាសរបស់កីឡាករ Ricardo Rodriguez កាលពីជើងទី1 ក្នុងទីក្រុង Belfast គឺគ្រប់គ្រាន់សម្រាប់ក្រុមជម្រើសជាតិស្វ៊ីស ក្នុងការឈានទៅប្រកួត World Cup ជាលើកទី4ជាប់ៗគ្នារបស់ពួកគេ។ អ្នកចាំទី Yann Sommer របស់ស្វ៊ីស បានប្រាប់ប៉ុស្តិ៍ ទូរទស្សន៍ RTS ថា៖ «វាពិតជាការប្រកួតមួយដ៏លំបាក។ វាមានសម្ពាធជាច្រើន។ គ្រប់គ្នាបាននិយាយថា វាស្ទើរតែបញ្ចប់ទៅហើយ ប៉ុន្តែ ក្នុងការប្រកួតជាមួយនឹងក្រុមបែបនេះ វាគឺជាការប្រយុទ្ធមួយ។ ខ្ញុំពិតជារំភើបណាស់ដែលយើងបានសម្រេចគោលដៅរបស់យើង»។

ស្របពេលជាមួយគ្នានេះដែរ ក្រុមជម្រើសជាតិក្រូអាស៊ី ក៏បានបញ្ចប់ក្នុងលទ្ធផលស្មើ ០-០ ជាមួយនឹងក្រុមម្ចាស់ផ្ទះក្រិកដែរ កាលពីថ្ងៃអាទិត្យ ដើម្បីបានទទួលការកក់កៅអីរបស់ពួកគេទៅកាន់យុទ្ធនាការ World Cup នាឆ្នាំក្រោយ ជាមួយនឹងជ័យជម្នះទាំងពីរជើង 4-1 នៃវគ្គ Playoff របស់ពួកគេ។ ក្រុមរបស់លោក Zlatko Dalic នឹងឈានទៅប្រកួតក្នុងព្រឹត្តិការណ៍ World Cup ជាលើកទី5របស់ពួកគេនៅក្នុងប្រទេសរុស្ស៊ីនៅឆ្នាំក្រោយ ក្រោយពីខកខានមួយលើកកាលពីឆ្នាំ2010។ សម្រាប់រយៈពេល30នាទីដំបូង ក្រុមជម្រើសជាតិក្រិកបានគ្រប់គ្រងស្ទើរតែទាំងស្រុង ប៉ុន្តែ បើទោះបីខ្សែការពារ Sokratis Papastathopoulos របស់ក្លិប Borussia Dortmund និងខ្សែប្រយុទ្ធ Anastasios Bakasetas របស់ក្លិប AEK Athens មានឱកាសស៊ុតបាល់សំដៅទីយ៉ាងល្អក៏ដោយ ក៏ក្រុមម្ចាស់ផ្ទះនៅតែមិនអាចរកគ្រាប់បាល់បើកឆាកបានដែរ៕

ប្រភពពី៖ AFP

November 13, 2017

អ្នកច្នៃម៉ូដកូនខ្មែរ2រូប សាងស្នាដៃនៃការច្នៃម៉ូដយ៉ាងអស្ចារ្យក្នុងកម្មវិធី TIME OF FASHION SHOW

TIME OF FASHION SHOW ត្រូវបានធ្វើឡើងក្នុងគោលបំណងធំៗចំនួន 3 រួមមាន៖ ជួយលើកកម្ពស់ និងលើកទឹកចិត្តនូវគំនិតច្នៃប្រឌិតស្នាដៃកូនខ្មែរលើការរចនាម៉ូដ ហើយក៏ជាខួបដប់ឆ្នាំរបស់ Ice-watch ដែលមានវត្តមានលើពិភពលោក ផងដែរ។

ក្នុងកម្មវិធីដ៏អស្ចារ្យមួយនេះ ភ្ញៀវកិត្តិយស ក៏ដូចជាអ្នកដែលបានចូលរួមសុទ្ធតែមានការចាប់អារម្មណ៍យ៉ាងខ្លាំងទៅលើការបង្ហាញម៉ូដសម្លៀកបំពាក់ស្អាតៗចំនួន 3 ខូឡិកហ្សិន ដែលច្នៃដោយអ្នករចនាម៉ូដកូនខ្មែរចំនួន 2 រូបគឺ លោក ម៉ែន សីហា ដែលជាម្ចាស់ស្លាកយីហោ Victoria Santini និង លោក យុន រតនៈ ជាម្ចាស់ Rottanak Collection ក្រោមការបង្ហាញរហូតដល់ចំនួនជាង 20 ឈុតរួមជាមួយនឹងការដើរបង្ហាញម៉ូដ ចំនួន 3 Show ផងដែរ។

សម្រាប់ Show ទី1 គឺជាការបង្ហាញម៉ូដខូឡិកហ្សិន របស់ Victoria Santini មានឈ្មោះថា Mirror BLOOMSOOM ជាមួយនឹងម៉ូឌែលថ្មីរបស់ Ice-watch City Mirror ។ Show ទី2 ជាការបង្ហាញដោយ Rotanak Collection មានឈ្មោះថា Sparkling Lady បង្ហាញរួមជាមួយនឹង Ice-watch City Sparkling និង Show ទី3 បង្ហាញដោយ ROTTANAK collection មានឈ្មោះថា APPOLO Pierre បង្ហាញរួមជាមួយម៉ូឌែលថ្មីរបស់ Ice-watch Pierre ផងដែរ។

គួររំលឹកផងដែរថាកម្មវិធីនេះបានប្រព្រឹត្តទៅកាលពីរាត្រីថ្ងៃទី 9 ខែវិច្ឆិកា ឆ្នាំ2017 រហូតដល់ម៉ោង 9យប់ នៅសណ្ឋាគារ SUN & MOON ក្រោមវត្តមានរបស់កំពូលអ្នកច្នៃម៉ូដដែលជាកូនខ្មែរ គឺ លោក ម៉ែន សីហា និង លោក យុន រតនៈ ដែលជាម្ចាស់លើស្លាកសញ្ញា រួមជាមួយអ្នកតំណាងក្រុមហ៊ុន Watch Empire ដែលជាក្រុមហ៊ុននាំចូលនាឡិកាម៉ាក Ice-watch តារាសម្ដែងល្បីៗ អ្នកច្នៃម៉ូដជាតិ – អន្តរជាតិ ព្រមទាំងភ្ញៀវជាតិ អន្តរជាតិ និងបណ្ដាអ្នកសារព័តមានក្នុងស្រុកយ៉ាងច្រើនកុះករ ៕

November 11, 2017

ខេត្តព្រះសីហនុនឹងចងសម្ព័ន្ធមេត្រីភាពជាបងប្អូនជាមួយខេត្តស៊ីឈាន់ប្រទេសចិន

ក្នុងគោលដៅទាក់ទាញភ្ញៀវទេសចរចិនឱ្យចូលមកទស្សនាតំបន់មាត់សមុទ្រកម្ពុជាឱ្យបានកាន់តែច្រើន រដ្ឋបាលខេត្តព្រះសីហនុ និងក្រសួងទេសចរណ៍កម្ពុជាគ្រោងចុះអនុស្សរណៈយោគយល់គ្នាស្តីពីទីក្រុងសម្ព័ន្ធភាព (Sisters City) ជាមួយរដ្ឋបាលក្រុងឈិនទូ នៃខេត្តស៊ីឈាន់ ប្រទេសចិននាពេលដ៏ខ្លីខាងមុខ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា «គម្រោងចុះអនុស្សរណៈខាងលើជាការនាំទៅដល់ការសម្រេចគោលដៅកម្ពុជាទទួលបានទេសចរចិនចំនួន2លាននាក់នៅឆ្នាំ2020ខាងមុខ»។ ឯកឧត្តមមានប្រសាសន៍ថា ចំពោះផែនការគ្រប់គ្រង និងអភិវឌ្ឍន៍តំបន់ឆ្នេរដោយគ្រប់ជ្រុងជ្រោយប្រកបដោយការប្រុងប្រយ័ត្ន និងការទទួលខុសត្រូវទាំងការអភិវឌ្ឍផលិតផលទេសចរណ៍ និងការបណ្តុះបណ្តាលធនធានមនុស្សជំនាញ ព្រមជាមួយការបណ្តុះបណ្តាលទាំងភាសាចិនដែលត្រូវធ្វើព្រមគ្នាគឺដើម្បីធានាឱ្យមានការអភិវឌ្ឍមួយប្រកបដោយនិរន្តរភាព និងការទទួលខុសត្រូវ។

ជាមួយនឹងកំណើនប្រមាណ 15% នៃទេសចរអន្តរជាតិជាង55ម៉ឺននាក់ ទៅកាន់នៅតំបន់ឆ្នេរក្នុងរយៈពេល9ខែ ដើមឆ្នាំ2017នេះ តាមការសិក្សារបស់ក្រសួងទេសចរណ៍បច្ចុប្បន្ននៅខេត្តព្រះសីហនុនៅមានការខ្វះខាតជាសំខាន់នូវផលិតផលទេសចរណ៍ និងធនធានមនុស្សផ្នែកជំនាញវិជ្ជាជីវៈទេសចរណ៍។ ឯកឧត្តមបានគូសបញ្ជាក់ថា «ការអភិវឌ្ឍនៅខេត្តព្រះសីហនុនៅមានភាពក្មេងខ្ចីនៅឡើយ ខណៈវិស័យទេសចរណ៍មានការកើនឡើងយ៉ាងឆាប់រហ័សក្រៅពីផលិតផលទេសចរណ៍ដ៏ទាក់ទាញប្រកបដោយភាពច្នៃប្រឌិតហើយ យើងក៏នៅខ្វះធនធានមនុស្សដែរ»។

ជាមួយលោក Yu Wei ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនទីក្រុងឈិនទូ និងជាប្រធានគណៈប្រតិភូទីក្រុងឈិនទូបានបង្ហាញចំណាប់អារម្មណ៍ និងកោតសរសើរកម្ពុជាចំពោះការអភិវឌ្ឍលើផ្នែកហេដ្ឋារចនាសម្ព័ន្ធជារួម និងដោយឡែកសក្តានុពលទេសចរណ៍វប្បធម៌ប្រវត្តិសាស្ត្រ និងសក្តានុពលទេសចរណ៍ធម្មជាតិ ប្រកបដោយភាពទាក់ទាញ ពិសេសអ្វីដែលកម្ពុជាខិតខំធ្វើសព្វថ្ងៃ ក្នុងការត្រៀមទទួលទេសចរចិននៅប៉ូលទេសចរណ៍ធំៗទាំង4 ក៏ដូចជានៅតំបន់ឆ្នេរសមុទ្រដែរ។

លោក Yu Wei បានបញ្ជាក់ថា«នៅក្នុងដំណើរទស្សនកិច្ចលើកទី1របស់លោក និងប្រតិភូក៏នឹងមានការចុះហត្ថលេខាលើអនុស្សរណៈយោគយល់គ្នាស្តីពីទីក្រុងសម្ព័ន្ធភាព (Sisters City) រវាងទីក្រុងឈិនទូ នៃខេត្តស៊ីឈាន់ ជាមួយខេត្តព្រះសីហនុផងដែរ»។ កន្លងមកទីក្រុងឈិនទូ បានចុះហត្ថលេខាលើអនុស្សរណៈយោគយល់គ្នាស្តីពីទីក្រុងសម្ព័ន្ធភាព (Sisters City)ជាមួយរាជធានីភ្នំពេញផងដែរ។

ដោយមើលឃើញពីសក្តានុពលដ៏ធំរបស់ខេត្តស៊ីឈាន់ និងបទពិសោធក្នុងការរៀបចំផែនការគ្រប់គ្រងច្បាស់លាស់នៅគ្រប់ខេត្តទាំងអស់នៅចិនជារួម និងដោយឡែកនៅខេត្តស៊ីឈាន់ លោករដ្ឋមន្ត្រី ថោង ខុន និងលោក Yu Wei ក៏បានបង្ហាញគោលជំហរក្នុងការសហការផ្សព្វផ្សាយពីសក្តានុពលទេសចរណ៍នៃប្រទេសទាំងពីរ ដើម្បីជំរុញការផ្លាស់ប្តូរទេសចរ និងទាក់ទាញវិនិយោគិនចិនពីខេត្តស៊ីឈាន់ មកវិនិយោគនៅក្នុងប៉ូលទេសចរណ៍ធំៗ នៅទីក្រុងភ្នំពេញតំបន់សៀមរាប-អង្គរ និងតំបន់ឆ្នេរសមុទ្រកម្ពុជា ពិសេសការហោះហើរត្រង់រវាងទីក្រុងឈិនទូ-ខេត្តព្រះសីហនុ៕

November 11, 2017

រូបថតសកម្មភាពក្រៅឆាករបស់រឿង “Titanic” ដែលលោកអ្នកមិនធ្លាប់បានឃើញពីមុនមក

បើនិយាយពីភាពយន្ដដែលល្បីល្បាញបំផុតនៅក្នុងអំឡុងទសវត្សរ៍ទី 90 នោះ លោកអ្នកប្រហែលជានៅចាំបានហើយថា ខ្សែភាពយន្ដយក្សរឿង “Titanic” ដែលបានដាក់បញ្ចាំងនៅឆ្នាំ 1997 និងទទួលបានពានរង្វាន់ជាច្រើនទូទាំងពិភពលោកលំដាប់ទី1 នៅសម័យនោះ ប៉ុន្តែវានៅមានអាថកំបាំងនៃសកម្មភាពក្រៅឆាកមួយចំនួនដែលត្រូវបានផលិតកររបស់ខ្សែភាពយន្តរឿងនេះបិទបាំង និងមិនធ្លាប់មាននរណាម្នាក់ងាយនឹងបានឃើញពីសកម្មភាពរបស់ក្រុមការងារផលិតកុនខ្នាតធំមួយនេះឡើយ។ បើតាមគេហទំព័រ petmaya ដែលបានចេញផ្សាយនៅថ្ងៃទី11 ខែវិច្ឆិកា ឆ្នាំ2017 នេះ បានឱ្យដឹងថា មានរូបថតសកម្មភាពក្រៅឆាករបស់រឿង “Titanic” ចំនួន 20សន្លឹក ដែលលោកអ្នកមិនធ្លាប់បានឃើញពីមុនមក ព្រមទាំងនឹកស្មានមិនដល់ថា តាមការពិតរឿងនេះ ត្រូវបានគេផលិតឡើងបែបហ្នឹងសោះ។

ដើម្បីស្រាយចម្ងល់នេះ សូមប្រិយមិត្តទស្សនារូបភាពទាំងអស់ខាងក្រោមនេះ៖

November 11, 2017

សាលារាជធានីគ្រោងចំណាយ 24លានដុល្លា រសាងសង់ស្ពានអាកាស និងផ្លូវក្រោមដី1ទៀត

ភ្នំពេញ៖ ដើម្បីបញ្ចៀសការកកស្ទះចរាចរណ៍ដែលកើតមានជាអន្លើៗស្ទើររៀងរាល់ថ្ងៃនោះ សាលារាជធានីបានត្រៀមទឹកប្រាក់ប្រមាណជា24លានដុល្លារសម្រាប់សាងសង់ស្ពានអាកាសនិងផ្លូវក្រោមដីថ្មីមួយទៀតនៅចំណុចរង្វង់មូលចោមចៅ ភាគខាងលិចរាជធានីភ្នំពេញ។

លោក សេង ត្រៃ អ្នករត់រ៉ឺម៉កកង់បីនៅចំណុចផ្សារជម្ពូវ័ន ជិតរង្វង់មូលចោមចៅបានឱ្យដឹងថា លោកតែងតែដឹកភ្ញៀវឆ្លងកាត់ទៅមកលើផ្លូវជាតិលេខ4 ដែលជាផ្លូវសេដ្ឋកិច្ចសំខាន់ជាងគេរបស់កម្ពុជា ហើយផ្លូវនេះមានការកកស្ទះជាអន្លើៗស្ទើរតែរាល់ថ្ងៃចាប់ពីរង្វង់មូលចោមចៅ រហូតដល់ចំណុចអូដឹម ខណ្ឌពោធិសែនជ័យ ដោយសារមានរថយន្តធំៗឆ្លងកាត់ច្រើន គួបផ្សំនិងផ្លូវខូចខាតស្ទើរទាំងស្រុង និងមានទឹកលិចជាប្រចាំពេលមេឃភ្លៀងខ្លាំងម្តង។

ដើម្បីរំដោះការកកស្ទះនេះ សាលារាជធានីបានបញ្ចេញថវិកាប្រមាណជា24លានដុល្លារ អាមេរិកដើម្បីត្រៀមសាងសង់ស្ពាន និងផ្លូវក្រោមដីចំណុចរង្វង់មូលចោមចៅ នៅក្នុងឆ្នាំ2018ខាងមុខឆាប់ៗនេះ។ ឯកឧត្តម ឃួង ស្រេង អភិបាលរាជធានីភ្នំពេញបានមានប្រសាសន៍ឱ្យដឹងថា សាលារាជធានីភ្នំពេញនឹងសាងសង់ស្ពានអាកាសថ្មីមួយខ្សែ និងធ្វើផ្លូវក្រោមដីមួយខ្សែទៀតនៅតំបន់ចំណុចប្រសព្វរង្វង់មូលចោមចៅដែលកំពុងមានបញ្ហាកកស្ទះចរាចរណ៍ជារៀងរាល់ថ្ងៃដែលក្រុមហ៊ុន OCIC ជាអ្នកទទួលបន្ទុកក្នុងការសាងសង់។

ចំណែកប្លង់ស្ពាន និងផ្លូវក្រោមដីនេះនឹងបញ្ចប់នៅរយៈពេល2ខែខាងមុខនេះ ហើយគម្រោងនេះមានភាពស្រដៀង ឬដូចគ្នាតែម្ដងនឹងស្ពានអាកាសនៅស្ទឹងមានជ័យដែរដោយគ្រោងចំណាយទឹកប្រាក់សាងសង់ប្រមាណ24លានដុល្លារអាមេរិក ជាថវិកាចំណាយរបស់សាលារាជធានី។ គម្រោងនេះគ្រោងបញ្ចប់ក្នុងរយៈពេលប្រមាណ2ឆ្នាំ ឬប្រហែល24ខែ។

ជាមួយដំណឹងនៃការសាងសង់ផ្លូវក្រោមដី និងស្ពានអាកាសថ្មីនេះ ប្រជាពលរដ្ឋធ្វើដំណើរឆ្លងកាត់ផ្លូវជាតិលេខ4 ជារៀងរាល់ថ្ងៃ បានសម្តែងការត្រេកអរដោយសង្ឃឹមថា ក្រោយពេលស្ពានក៏ដូចជាផ្លូវក្រោមដីបានសាង់សង់ចប់រួចរាល់នោះ វានឹងអាចបញ្ចៀសការកកស្ទះ និងអាចចំណេញពេលវេលាក្នុងការធ្វើដំណើរផ្សេងៗទៀតផង៕

November 11, 2017

កំពូលតារាចម្រៀងថៃ Bird Thongchai ប្រកាសជាផ្លូវការថា ខ្លួនមានសង្សារហើយ!

ស្ងាត់ៗអស់មួយរយៈ កំពូលតារាចម្រៀងថៃ Bird Thongchai បានប្រកាសថា នៅពេលនេះលោកមានសង្សារជាផ្លូវការ ហើយ និងកំពុងតែមើលចិត្តគ្នា រស់នៅជាមួយគ្នា ព្រមទាំងបដិសេធចោលរាល់ព័ត៌មានកន្លងមក ដែលបានចោទឮល្បីថាលោកសម្ងំបើកក្រុមហ៊ុនម៉ូដែល កើបលុយរាប់ពាន់លានបាតនោះ។

អាចនិយាយបានថា គឺជារឿងមួយដែលកំពុងតែត្រូវបានគេនិយាយជាទូទៅនៅក្នុងពិភពសិល្បៈប្រទេសថៃ ដែលមានមនុស្សជាច្រើននាក់នឹកសង្ស័យសម្រាប់រឿងរ៉ាវស្នេហារបស់កំពូលតារាចម្រៀងល្បីរបស់ប្រទេសថៃ គឺលោក Bird Thongchai តែខណៈនេះលោកបានប្រកាសខ្លួនថា លោកមានសង្សារហើយ។ ចំណែកឯជីវិតឯកជនបច្ចុប្បន្ននេះវិញ លោក Bird បានប្រាប់អ្នកសារព័ត៌មានថា លោកបានផ្ញើថវិកាឱ្យទៅអ្នកគ្រប់គ្រងរាល់ថ្ងៃក្នុងការរៀបចំអាល់ប៊ុមចម្រៀងថ្មី ព្រមទាំងគ្រោងរៀបចំការប្រគំតន្ត្រីនៅក្នុងចុងឆ្នាំនេះផងដែរ។

ជាចុងក្រោយតារាចម្រៀងប្រុសដ៏ល្បីល្បាញរូបនេះ បានបញ្ជាក់បន្ថែមថា ចំពោះក្រុមហ៊ុនម៉ូដែល ដែលបានយកនាមត្រកូលរបស់ខ្លួនទៅប្រើប្រាស់ធ្វើជាអាជីវកម្មផ្ទាល់ខ្លួននោះ គឺលោកមិនបានដឹង និងមិនបានអនុញ្ញាតឡើយ ហើយប្រសិនបើជាសាច់ញាតិនឹងគ្នា មុននឹងធ្វើអ្វីមួយក៏ត្រូវពិភាក្សានឹងគ្នាជាមុនដែរ។ ទង្វើបែបនេះ លោកបានចាត់ទុកថា ជាការមិនគោរព និងហុចផលប៉ះពាល់ចំពោះកេរ្ដិ៍ឈ្មោះរបស់លោកជាខ្លាំង។ នេះបើតាមសារព័ត៌មាន Kapookបានចេញផ្សាយនៅថ្ងៃទី11 ខែ វិច្ឆិកា ឆ្នាំ2017 ថ្មីៗនេះ ៕

November 11, 2017

Category: សង្គម និងសេដ្ឋកិច្ច