សង្គម និងសេដ្ឋកិច្ច - La Reine Media

ស្ត្រីគួរដឹងអ្វីខ្លះពីជំងឺមហារីកស្បូន?

អ្វីទៅជាជំងឺមហារីកស្បូន? មហារីកស្បូន គឺជាដុំសាច់មហារីកមួយ ដែលអាចបណ្តាលឱ្យស្លាប់ក្រពេញស្បូន និងអាចកើតមានលើមនុស្សគ្រប់វ័យទាំងអស់ ជាពិសេសកើតមានចំពោះស្ត្រីដែលមានអាយុចាប់ពី50ឆ្នាំឡើងទៅ។ ជំងឺប្រភេទនេះវាបង្កឡើងដោយមេរោគម្យ៉ាងឈ្មោះថា Human papillomavirus (HPV) និងអាចឆ្លងពីមនុស្សម្នាក់ទៅមនុស្សម្នាក់ទៀតបានតាមរយៈការរួមភេទ និងការប៉ះពាល់ដោយផ្ទាល់រវាងស្បែក និងស្បែកប្រដាប់ភេទ ហើយម្យ៉ាងវិញទៀតវាក៏អាចកើតមានចំពោះស្ត្រីដែលសកម្មក្នុងការរួមភេទផងដែរ។

រោគសញ្ញានៃជំងឺមហារីកស្បូន
ចំពោះរោគសញ្ញានៃជំងឺមហារីកស្បូននៅក្នុងដំណាក់កាលដំបូង ឬដំណាក់កាលស្រួចស្រាវ មិនបានបង្ហាញឱ្យអ្នកជំងឺបានឃើញនោះឡើយ។ ដោយឡែកនៅក្នុងដំណាក់កាលបន្ទាប់វាអាចស្ដែងឱ្យដឹងតាមរយៈ ៖
• ប្រដាប់ភេទស្ត្រីមានឈាម
នេះគឺជារោគសញ្ញាមហារីកស្បូនដែលតែងតែជួបប្រទះ និងកើតឡើងមុនគេបំផុត ដែលក្នុងនោះមានការចេញឈាមមិនត្រូវតាមក្បូន(មិនត្រឹមត្រូវតាមវដ្តរដូវ) ជួនច្រើន ជួនតិច អាចមុន ឬក្រោយចន្លោះពេលមានរដូវ។ ក្នុងករណី
ស្រី្តដែលកើតមានជំងឺមហារីកស្បូន តែងតែមានឈាមធ្លាក់មកជាប្រចាំតាមទ្វារមាស និងមានអាការឈឺស្ទេញៗក្នុងពោះ (ពីលើថ្ងាសនៃប្រដាប់ភេទ) ឬតែងតែរងការឈឺចាប់នៅពេលរួមភេទសម្ពន្ធ។ នៅមានលក្ខណៈសំគាល់ផ្សេងទៀតដែលបង្ហាញឱ្យឃើញពីរូបភាពនៃជំងឺ ដោយសារតែស្ត្រីជាអ្នកកើតជំងឺ មានអាការអស់កម្លាំងរកកល់ចង់ក្អួតចង្អោរ បរិភោគអាហារលែងដឹងពីរសជាតិ និងស្រកទម្ងន់។ ជួនមានពេលខ្លះអាចកើតអាការទល់លាមក ឬឈឺឆ្អឹងខ្នង និងចុករោយចង្កះជាញឹកញាប់។
• ប្រដាប់ភេទស្ត្រីហៀរទឹករងៃ
មហារីកស្បូនមានទឹករងៃ ដំបៅ រលួយអាចបណ្តាលឱ្យហូរចេញមកក្រៅតាមទ្វារមាសនៅពេលបត់ជើងតូច។ ការហូរទឹករងៃចេញមកក្រៅនេះអាចធុំក្លិន លាយឡំដោយឈាម ឬមានខ្ទុះដែលមានក្លិនស្អុយផងដែរ។
• ឈឺចុកចាប់
ភាគច្រើនតែងកើតឡើងលើអ្នកជំងឺក្នុងដំណាក់កាលចុងក្រោយ ដោយសារមហារីកមានសំពាធលើសតិអារម្មណ៍ក៏បណ្តាលឱ្យឈឺចុកចាប់នៅផ្នែកទ្រនុងឆ្អឹងចង្កេះផ្នែកខាងក្រោមពោះថែមទាំងរាលដាលដល់ផ្នែកជើងថែមទៀតផង។

• អ្នកជំងឺដំណាក់កាលចុងក្រោយ
អាចប៉ះពាល់ទៅដល់ផ្នែកខាងក្រោមនៃពោះដោយសារភាពរីកធំនៃស្បូន ហើយថែមទាំងអាចបណ្តាលឱ្យឈឺហើមអវៈយវៈខាងក្រោម និងអាចលេចចេញនូវអាការកង្វះឈាមក្រហម ស្គមស្គាំងគ្រុនក្តៅ អាការរីងរៃ និងអាការហេវហត់ជាដើម។
វិធីបង្ការជំងឺមហារីកស្បូន
• ចាក់ថ្នាំបង្ការ ឬវា៉ក់សាំងការពារមហារីកមាត់ស្បូន
ជាទូរទៅជំងឺមហារីកស្បូនអាចកើតមានចំពោះស្ត្រីក្នុងវ័យរួមភេទសកម្ម មិនមែនកើតតែចំពោះស្ត្រីវ័យ ចំណាស់នោះទេ ពោលគឺ ប្រមាណ80%នៃស្រ្តីសុទ្ធតែអាចឆ្លងមេរោគ HPV ក្នុងជីវិតពួកគេដែលក្នុងចំណោមស្រ្តីទាំងនោះមានមួយចំនួនតូចអាចជម្រុះ HPV បានដោយឯកឯងប៉ុន្តែស្ត្រីមួយចំនួនទៀតមិនអាចជម្រុះមេរោគនេះបានឡើយ ហើយអាចវិវឌ្ឍទៅជាជំងឺមហារីកស្បូនថែមទៀត។ គ្រូពេទ្យអាចចាក់វ៉ាក់សាំងលើក្មេងស្រីចាប់ពីអាយុ9ឆ្នាំឡើងទៅ និងត្រូវចាក់គ្រប់ចំនួន3ដងត្រឹមរយៈពេល6ខែជាមួយ នឹងការពិនិត្យមើលមាត់ស្បូនរបស់នារី។
• ការពិនិត្យមាត់ស្បូនឱ្យបានទៀងទាត់
ដោយឡែក ចំពោះការពិនិត្យមើលសុខភាពមាត់ស្បូនរបស់នារី ដោយប្រើសារធាតុជូរ(VIA) គឺដើម្បីបញ្ជាក់ពីភាពបម្រែបម្រួលមិនធម្មតារបស់កោសិកាមាត់ស្បូន ក៏ដូចជាការពិនិត្យមើលដោយការបៀកយកកោសិកាមាត់ស្បូន(Pap Smear) ទៅពិនិត្យ ដើម្បីបញ្ជាក់ពីបម្រែបម្រួលមិនធម្មតារបស់កោសិកាមាត់ស្បូន៕

November 14, 2017

តើកម្ពុជាបានពង្រីកសក្ដានុពលលើវិស័យរ៉ែ និងថាមពលដូចម្ដេច?

ភ្នំពេញ – ខណៈកម្ពុជាកំពុងតែមានការអភិវឌ្ឍលើវិស័យឧស្សាហកម្ម និងសំណង់ ព្រមទាំងវិស័យពាក់ព័ន្ធជាច្រើនទៀតនោះ គេមើលឃើញថា វិស័យរ៉ែ និងថាមពលក៏បានចូលរួមចំណែកយ៉ាងសំខាន់ដល់ការអភិវឌ្ឍវិស័យទាំងនោះដែរ។

តើបច្ចុប្បន្នវិស័យរ៉ែ និងថាមពលរបស់កម្ពុជាបានពង្រីកសក្ដានុពលរបស់ខ្លួនយ៉ាងដូចម្ដេចហើយ?

យោងតាមរបាយការណ៍ផ្លូវការចេញដោយក្រសួងរ៉ែ និងថាមពល បានបង្ហាញឱ្យឃើញពីសក្ដានុពលដ៏សំខាន់ៗរបស់ខ្លួនក្នុងការជួយជំរុញការអភិវឌ្ឍជាច្រើននៅក្នុងព្រះរាជាណាចក្រកម្ពុជា៖

– ការធ្វើអាជីវកម្មផ្នែកអនុវិស័យរ៉ែថ្ម សម្ភារសំណង់បានឆ្លើយតប និងបំពេញបានតាមតម្រូវការនៃវិស័យសំណង់ និងអចលនទ្រព្យនៅទូទាំងប្រទេសដែលកំពុងមានសម្ទុះរីកចម្រើនយ៉ាងខ្លាំងនាពេលបច្ចុប្បន្ន ។

– វិស័យរ៉ែបានសម្រេចបង្កើតបានជាថ្មីនូវសករាជនៃឧស្សាហកម្មផលិតស៊ីម៉ង់ត៍របស់កម្ពុជា តាមរយៈការបង្កើតបាននូវសមត្ថភាពផលិតស៊ីម៉ង់ត៍ក្នុងស្រុកសរុបប្រមាណ 7លានតោនក្នុងមួយឆ្នាំសម្រាប់បំពេញតម្រូវការក្នុងវិស័យសំណង់ និងជំនួសការនាំចូល។

– គម្រោងអាជីវកម្មរ៉ែមាសទ្រង់ទ្រាយធំចំនួនពីរ ត្រូវបានសិក្សារៀបចំឡើង និងគ្រោងចាប់ផ្តើមផលិតកម្មនៅឆ្នាំ2018 និងនៅឆ្នាំ2019 នៅខេត្តរតនគិរី និងខេត្តមណ្ឌលគិរី។

– ក្នុងវិស័យអគ្គិសនី វារីអគ្គិសនីចំនួន6ស្ថានីយ មានអានុភាពសរុប 928 មេហ្កាវ៉ាត់ អគ្គិសនីដើរដោយធ្យូងថ្មមាន 505 មេហ្កាវ៉ាត់ អគ្គិសនីដើរដោយប្រេងមាន 218 មេហ្កាវ៉ាត់ និងថាមពលព្រះអាទិត្យមាន 10 មេហ្កាវ៉ាត់ បានផ្គត់ផ្គង់តាមរយៈខ្សែបណ្ដាញជាតិបញ្ជូនអគ្គិសនីឲ្យដល់រាជធានី-ខេត្ត ចំនួន18 និងបានផ្គត់ផ្គង់ដល់ភូមិ ចំនួនជាង11,200ភូមិ ត្រូវជា80ភាគរយនៃចំនួនភូមិទូទាំងប្រទេស និងបានតភ្ជាប់ទៅលំនៅដ្ឋានបានចំនួនប្រមាណជិត2លានខ្នងផ្ទះ ត្រូវជា60ភាគរយនៃចំនួនខ្នងផ្ទះសរុបទូទាំងប្រទេស។

– កម្ពុជាបានចាប់ផ្តើមបោះជំហានតាមផែនការអភិវឌ្ឍន៍វិស័យប្រេងកាតរបស់ខ្លួននៅតំបន់ប្លុកប្រេងកាតដែនសមុទ្រ ហើយគ្រោងនឹងចាប់ផ្តើមផលិតកម្មដំណក់ប្រេងឆៅរបស់ខ្លួនជាលើកដំបូងនៅចុងឆ្នាំ2019។

– រោងចក្រចម្រាញ់ប្រេងកាតមួយដែលមានសមត្ថភាព 5លានតោនក្នុង1ឆ្នាំ ត្រូវបានដាក់ឲ្យវិនិយោគសាងសង់ និងបើកផ្លូវឲ្យកម្ពុជាបង្កើតបានឡើងវិញជាថ្មីនូវឧស្សាហកម្មវិស័យប្រេងកាតរបស់ខ្លួន៕

November 14, 2017

វិធីការពារ និងទប់ទល់អាការ Jet Lagពេលធ្វើដំណើរ

ការធ្វើដំណើរទេសចរណ៍ទៅក្រៅប្រទេស ជាពិសេស បណ្តាប្រទេសនៅក្នុងហ្សូនអឺរ៉ុប ឬអាមេរិកគឺជារឿងមួយដ៏គួរឱ្យរំភើបញាប់ញ័រជានិច្ច ព្រោះវាធ្វើឱ្យយើងបានឃើញនូវវប្បធម៌ថ្មីៗ ស្ថានភាពធាតុអាកាសដែលមិនធ្លាប់ជួប រួមទាំងទីកន្លែងទេសចរណ៍ថ្មីៗទៀតផង តែមានអ្នកទេសចរមិនតិចទេ ដែលចូលចិត្តធ្វើទេសចរណ៍ តែមិនចូលចិត្តការធ្វើដំណើរ… នោះក៏ព្រោះតែការជិះយន្តហោះយូរពេក ទៅជ្រុងមួយទៀតនៃផែនដីធ្វើឱ្យកើតអាការ Jet Lag ឬអាការនឿយល្វើយ ដោយសារតែសម្របខ្លួនមិនទាន់ជាមួយនឹងហ្សូពេលវេលាថ្មីហ្នឹងឯង តែថ្ងៃនេះ ឡារ៉ែន មានវិធី5យ៉ាងក្នុងការការពារ និងទប់ទល់អាការ Jet Lag នេះមកជម្រាបជូន តើមានអ្វីនោះ សូមតាមដានជាបន្ត៖

1- ហាត់ប្រាណជាទម្លាប់ប្រចាំថ្ងៃ
ការហាត់ប្រាណហុចផលល្អទាំងខាងរាងកាយនិងផ្លូវចិត្ត រួមទាំងការធ្វើដំណើរដោយយន្តហោះក្នុងចម្ងាយផ្លូវដែលឆ្ងាយៗទៀតផង រឹតតែលោកអ្នកបានហាត់ប្រាណជាប់ជាប្រចាំផងនោះ នឹងរឹតតែជួយឱ្យរាងកាយបញ្ចេញសារធាតុ អេនដូហ្វ៊ីន ឬសារធាតុនៃសេចក្តីសុខចេញមកទៀតផង តែអ្វីដែលសំខាន់នោះគឺ ភាពរឹងប៉ឹងរបស់រាងកាយនឹងជួយឱ្យលោកអ្នកអាចទប់ទល់បាន និងអាចសម្របខ្លួនឱ្យចូលចុះជាមួយស្ថានភាពធាតុអាកាសថ្មី ឬហ្សូនពេលវេលាថ្មីបានយ៉ាងល្អ។ អាចនិយាយបានថា ការហាត់ប្រាណមានផលល្អជានិច្ច ដូច្នេះចូរកុំខ្ជិល និងចាប់ផ្តើមពីឥឡូវនេះទៅ។

2- ព្យាយាមសម្របសម្រួលខ្លួនឱ្យចូល
ជាមួយនឹងហ្សូនពេលវេលាថ្មីនៅពេលលោកអ្នកបានដឹងពីទិសដៅដែលត្រូវទៅនោះច្បាស់លាស់ហើយ មុននឹងចេញដំណើរប្រមាណជា2-3ថ្ងៃ ចូរសាកល្បងផ្លាស់ប្តូរតារាងជីវិតឱ្យចូលជាមួយនឹងហ្សូនពេលវេលាថ្មី ដែលនៅក្នុងប្រទេសនីមួយៗអាចនឹងមានពេលវេលាលឿនជាង ឬយឺតជាងប្រទេសយើងជាច្រើនម៉ោង ដោយប្រកាន់យកតាមហ្សូនម៉ោងពេលថ្មី និងអាចសម្របខ្លួនតាមសន្សឹមៗ ឬបើសិនជាពេលចូលគេងរបស់ហ្សូនពេលវេលាថ្មីអាចនឹងធ្វើឱ្យលោកអ្នកគេងមិនលក់ ក៏កុំទៅមានអារម្មណ៍តានតឹងអី ព្រោះរឹតតែមានអារម្មណ៍តានតឹងធុញថប់ នឹងរឹតតែមានកង្វល់ សរុបសេចក្តីថាត្រូវព្យាយាមសម្របខ្លួនឱ្យបានខ្លាំងបំផុតតាមដែលអាចធ្វើទៅបាន។

3- កុំអង្គុយ ឬគេងស្ងៀមៗនៅក្នុងយន្តហោះ
ការអង្គុយ ឬគេងស្ងៀមៗនៅក្នុងយន្តហោះអាចធ្វើឱ្យកើតភាពនឿយល្វើយបាន ដូច្នេះគួរយឺតសរសៃសរសូងបន្តិចបន្តួចដូចជា កម្រើកដៃកម្រើកជើង ពត់ខ្លួន ឬពឹងកទៅក្រោយ ឥរិយាបថទាំងអស់នេះនឹងជួយឱ្យលោកអ្នកក្លៀវក្លាស្វាហាប់ខ្លាំងឡើង និងអ្វីដែលសំខាន់នោះ គួរសេរេនាឡិកាឱ្យត្រូវជាមួយនឹងម៉ោងពេលរបស់ប្រទេសគោលដៅរួចជាស្រេច ដើម្បីត្រៀមខ្លួនទុកជាមុន។

4- មិនគួរទទួលទានស្រាខណៈពេល
ជិះយន្តហោះការទទួលទានស្រា ឬភេសជ្ជៈដែលមានជាតិអាល់កុលខណៈជិះ ឬមុនឡើងយន្តហោះនោះ នឹងធ្វើឱ្យរាងកាយរបស់លោកអ្នកត្រូវទប់ទល់យ៉ាងខ្លាំងជាមួយការចាត់ការផលប៉ះពាល់ដែលនឹងកើតឡើង ព្រោះជាតិអាល់កុលនឹងបឺតយកជាតិទឹកនៅក្នុងរាងកាយធ្វើឱ្យមានអារម្មណ៍ថាស្ងួតក និងអាចកើតអាការវិលមុខបាន។ ក្រៅពីត្រូវតមទទួលទានស្រា ឬភេសជ្ជៈដែលមានជាតិអាល់កុលគ្រប់ប្រភេទហើយនោះ លោកអ្នកគួរទទួលទានទឹកឱ្យបានច្រើន ដើម្បីកាត់បន្ថយសម្ពាធរបស់ធាតុអាកាស និងបង្កើនភាព
ស្រស់ថ្លាដល់រាងកាយផង។

5- ខ្យល់អាកាសបរិសុទ្ធក៏អាចជួយបានដែរ
នៅពេលទៅដល់គោលដៅហើយ លោកអ្នកគួរប្រតិបត្តិខ្លួនតាមពេលម៉ោងរបស់ទីនោះ ទាំងការហូបចុក និងការគេង ដើម្បីឱ្យងាយស្រួលដល់ការសម្របខ្លួន ហើយលោកអ្នកគួរតែចេញទៅស្រូបយកខ្យល់អាកាសបរិសុទ្ធនៅខាងក្រៅ រួមទាំងចេញទៅប៉ះនឹងពន្លឺថ្ងៃពីធម្មជាតិផងដើម្បីធ្វើឱ្យលោកអ្នកបានស្រស់ស្រាយស្វាហាប់ឡើង ត្រៀមជាស្រេចក្នុងការរស់នៅតាមប្រក្រតីដូចអ្នកម្ចាស់ស្រុកអីុចឹងដែរ។

ទោះជាមិនអាចកែអាការ Jet Lag បានមួយរយភាគរយក៏ពិតមែន តែយើងជឿថាចំណុចណែនាំខាងលើអាចធ្វើឱ្យអាការ Jet Lag ធូរស្រាលបានខ្លះយ៉ាងពិតប្រាកដ យ៉ាងណាៗការធ្វើដំណើរលើកក្រោយ សាកល្បងយកទៅកែច្នៃប្រើឱ្យត្រូវនឹងខ្លួនឯងលមើល ដើម្បីឱ្យទៅដល់គោលដៅយ៉ាងស្រស់ស្រាយរីករាយ ត្រៀមសំរុករឿងដើរលេងកម្សាន្តបែបមិនបាច់កង្វល់ពីរឿងអ្វីទាំងអស់៕

November 14, 2017

បុត្រភ្លោះរបស់ ឈុំភូ អារីយ៉ា មានអាយុ 2 ខែហើយ កាន់តែស្អាត Cute! Cute!!

នៅថ្ងៃទី14 ខែវិច្ឆិកា ឆ្នាំ 2017 នេះ តាមរយៈបណ្ដាញទំនាក់ទំនងសង្គម Pantip បានឱ្យដឹងថា កូនប្រុសភ្លោះរបស់តារាស្រី ឈុំភូ អារីយ៉ា បានចម្រើនវ័យបាន 2 ខែហើយ ដោយទាំងស្អាត ទាំងស្រស់សង្ហា ព្រមទាំងមានទម្រង់មុខ មិនច្រឡំគ្នាទៀតផង។

បើតាមរយៈរូបភាពដែលបានបង្ហោះជាច្រើនសន្លឹកនៅក្នុងបណ្ដាញសង្គម អ៊ីនស្ដាក្រាម ដោយលោក ណត់ វិសៈរុត ជាស្វាមីរបស់អ្នកនាង ឈុំភូ អារីយ៉ា គេសង្កេតឃើញថា អូនតូច ផាយុ និងសាយហ្វា អាយុបាន 2 ខែហើយ និងអ្វីដែលកាន់តែមើលឃើញច្បាស់បន្ថែមទៀតនោះ គឺកូនភ្លោះទាំងពីរនាក់ មានទម្រង់មុខមិនច្រឡំគ្នានោះទេ គឺមានចំណុចដូចម្ដាយ និងចំណុចដូចឪពុក ហើយជាពិសេសទៀតនោះ បើតាមការបៀបធៀបរូបខាងក្រោមនេះ គេសង្កេតឃើញថា អូនតូចផាយុ គឺមានទម្រង់មុខ និងបបូរមាត់ ព្រមទាំងឥរិយាបថគេងដូចគ្នានឹងលោកឪពុករបស់គេគឺ ណត់ វិសៈរុត។ រីឯអូនតូចសាយហ្វា គឺមានទម្រង់មុខដូចតារាស្រី ឈុំភូ អារីយ៉ា កាលនៅពីក្មេងបេះបិទតែម្តង៕

November 14, 2017

កសិករកាន់តែមានសង្ឃឹម ខណៈក្រុមហ៊ុនយក្សចិនពីរសន្យាទិញអង្ករពីកម្ពុជា

ភ្នំពេញ៖ បើតាមការឱ្យដឹងជាផ្លូវការពីថ្នាក់ដឹកនាំជាន់ខ្ពស់កម្ពុជាដែលបានលើកឡើងថា ក្រុមហ៊ុនធំៗរបស់មហាយក្សចិនចំនួនពីរបានសន្យាក្នុងការជួយជ្រោមជ្រែងកសិករខ្មែរតាមការទិញអង្ករពីកម្ពុជាឱ្យបានកាន់តែច្រើនដើម្បីយកទៅលក់បន្តនៅលើទីផ្សារក្នុងប្រទេសរបស់ខ្លួន្លួន ខណៈដែលអង្ករក្រអូបកម្ពុជាជាប់ចំណាត់ថ្នាក់លេខ1។

តាមការឱ្យដឹងពីមន្ត្រីជាន់ខ្ពស់កម្ពុជានៅថ្ងៃទី13 វិច្ឆិកាម្សិលមិញថា ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុនចិនចំនួនពីរ ដែលមានឯកឧត្តម LIU Liange ប្រធានធនាគារនីហរ័ណ-អាហរ័ណចិន និង លោក WANG Jiong ប្រធានក្រុមហ៊ុន CITIC Group លើគម្រោងជំរុញផលិតកម្មស្រូវ និងការនាំចេញអង្ករពីកម្ពុជា។

ជាមួយគ្នានេះដែរ ក៏មានការចុះអនុស្សរណៈយោគយល់គ្នាផ្សេងមួយទៀតរវាងកម្ពុជា ដែលតំណាងដោយក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្មកម្ពុជា ជាមួយភាគីចិនតំណាងដោយក្រុមហ៊ុន CITIC Construction Co., Ltd. និងក្រុមហ៊ុន Henan Yuguang International Economic & Technical Cooperation ក្នុងគោលបំណងកំណត់មូលដ្ឋានសម្រាប់រៀបចំ និងអនុវត្តគម្រោងសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធ។

អនុស្សរណៈទី2នេះដែរ គឺដើម្បីកំណត់ចំណុចសំខាន់ៗពាក់ព័ន្ធនឹងទស្សនទាន វិសាលភាព រចនាសម្ព័ន្ធ អនុវត្តប្រភព និងគំរូហិរញ្ញប្បទាន ព្រមទាំងកិច្ចការហិរញ្ញវត្ថុនៃគម្រោង ជាពិសេសនឹងផ្ដល់ជាមូលដ្ឋានច្បាស់លាស់សម្រាប់ការរៀបចំ និងការអនុវត្តគម្រោងដូចជា ការសិក្សាសមិទ្ធលទ្ធភាព ការរៀបចំប្លង់លម្អិត ផែនការហិរញ្ញប្បទាន ការសាងសង់ ប្រតិបត្តិការ និងការថែទាំហេដ្ឋារចនាសម្ព័ន្ធគម្រោង យន្តការប្រើប្រាស់ស្រូវអង្ករស្តុកក្នុងឃ្លាំងជាវត្ថុបញ្ចាំ ដើម្បីទទួលបានឥណទានពីធនាគារ និងការបង្កើតទីផ្សារលក់ដូរស្រូវ-អង្ករ។

ចំណែកភាគីចិនក៏បានប្តេជ្ញានៅពេលចុះអនុស្សរណៈនោះដែរថា នឹងខិតខំប្រឹងប្រែងជួយជ្រោមជ្រែងដើម្បីបង្កើនការនាំចេញអង្ករកម្ពុជាទៅចិនបន្ថែមពីលើកូតាដែលមានស្រាប់ហើយ និងសម្រាប់គម្រោងនេះដែរ ត្រូវបានរចនាឡើងសំដៅដោះស្រាយបញ្ហាប្រឈមនានាក្នុងវិស័យស្រូវ-អង្ករនៅកម្ពុជាសម្រាប់រយៈពេលវែង និងប្រកបដោយចីរភាព ពោលគឺដំណោះស្រាយជាប្រព័ន្ធ និងគ្រប់ជ្រុងជ្រោយ ហើយក៏ជាការបោះជំហានទៅមុខមួយជំហានទៀត មុននឹងឈានដល់ដំណោះស្រាយសម្រាប់ដំណាំ និងផល្លានុផលផ្សេងទៀត៕

November 14, 2017

8វិធីងាយៗ ការពារការប្រសូតមុនកំណត់

ស្ត្រីតាំងគភ៌ថ្មីថ្មោង ឬតាំងគភ៌កូនដំបូង អាចនឹងនឹកភ័យៗថា កូនអាចនឹងប្រសូតចេញមកមុនកាលកំណត់នៅពេលដែលអាយុគភ៌ឈានចូលត្រីមាសទី3 តែអនាគតអ្នកម្ដាយថ្មោងថ្មីទាំងអស់មិនបាច់បារម្ភទេ ថ្ងៃនេះ ឡារ៉ែន មាន8វិធី ការពារការប្រសូតមុនកាលកំណត់មកជម្រាបជូនដូចតទៅ។

1-ទទួលទានញឹកញាប់
អ្នកស្រាវជ្រាវបានរកឃើញថា ការទទួលទានអាហារឱ្យគ្រប់ទាំង5ប្រភេទក្រុមនៅមិនទាន់គ្រប់គ្រាន់ទេ តែអនាគតអ្នកម្ដាយគួរទទួលទានឱ្យបានញឹកញាប់ជាមធ្យមប្រមាណ5ដងក្នុងមួយថ្ងៃ ដោយទទួលទានអាហារចម្បង3ពេល និងអាហារបន្ទាប់បន្សំ2ពេលទៀតគឺ អាហារពេលទំនេរ ឬមិនទេក៏ទទួលទានអាហារពេលតូចៗ 5ពេលតែម្ដង។ បើធ្វើបានបែបនេះ នឹងកាត់បន្ថយឱកាសការប្រសូតមុនកាលកំណត់បាន។

2-ទ្រាំមិនបត់ជើងតូច
ការទប់ ឬការខំទ្រាំមិនព្រមទៅបត់ជើងតូច ក្រៅពីសាងនូវភាពមិនស្រួលសប្បាយខ្លួនហើយនោះ វាអាចធ្វើឱ្យកើតការឆ្លងមេរោគនៅក្នុងប្លោកនោមបានទៀត។ អាការដែលសង្កេតឃើញអាចជាការសាងនូវការរលាកដល់ស្បូន និងធ្វើឱ្យស្បូនច្របាច់ខ្លួនញឹកញាប់ និងក្រៅពីនេះនៅអាចធ្វើឱ្យរលាកប្លោកនោមបានទៀតផង។

3-ព្យាបាលរោគរលាកស្បូន
ប្រសិនបើអ្នកមានភាពប្រថុយប្រថានក្នុងការកើតរោគរលាកស្បូន គួរប្រញាប់ទៅព្យាបាលជាបន្ទាន់។ សាកល្បងប្រឹក្សាជាមួយគ្រូពេទ្យថាតើការទទួលទានថ្នាំនឹងស័ក្តិសមចំពោះអ្នកឬទេ? ព្រោះការស្រាវជ្រាវមួយផ្នែកបានបញ្ជាក់ថា ស្ត្រីដែលកើតរោគរលាកស្បូន បើបានទទួលការព្យាបាលដោយការទទួលទានថ្នាំបដិបក្ខប្រាណ( Antibiotic) អាចបន្ថយភាពប្រថុយប្រថានក្នុងការប្រសូតមុនកាលកំណត់បាន តែក៏មានការងារស្រាវជ្រាវមួយទៀតដែលជំទាស់ថា ស្ត្រីដែលកើតរោគរលាកស្បូនត្រូវតែទទួលបានការព្យាបាលយ៉ាងដិតដល់ ទើបអាចជួយកាត់បន្ថយឱកាសប្រសូតបុត្រមុនកំណត់បាន តែយ៉ាងណាក៏ដោយ គ្រូពេទ្យរបស់អ្នកគឺជាអ្នកផ្ដល់ចម្លើយបានល្អបំផុត។

4-សុខភាពមាត់ធ្មេញ
ការមើលថែទាំអនាម័យរបស់ប្រអប់មាត់ជាវិធីដំបូងៗគេដែលងាយស្រួលបំផុត និងល្អបំផុតដែលអាចជួយការពារការប្រសូតបុត្រមុនកាលកំណត់បាន។ រោគរលាកអញ្ចាញធ្មេញជាមូលហេតុមួយរបស់ការប្រសូតមុនកំណត់ ដូច្នេះទើបស្ត្រីមានគភ៌ត្រូវដុសសម្អាតធ្មេញ ប្រើអំបោះខាត់ធ្មេញ និងទៅជួបទន្តពេទ្យយ៉ាងតិចបំផុតឱ្យបាន1ដងក្នុងអំឡុងពេលមានគភ៌ ក្រៅពីនេះបើសិនមានអាការអ្វីមួយខុសប្រក្រតីសូម្បីតែបន្តិចបន្តួចក៏ដោយ ក៏គួរប្រញាប់ព្យាបាលថែរក្សាឱ្យប្រក្រតីឡើងវិញមុនពេលវាកាន់តែធ្ងន់ធ្ងរឡើង។

5-ទទួលទានវីតាមីនសម្រាប់ស្ត្រីមានគភ៌
វីតាមីនក្នុងអំឡុងពេលមានគភ៌ មិនមែនគ្រាន់តែធ្វើឱ្យម្ដាយ និងកូនក្នុងផ្ទៃមានសុខភាពរឹងមាំល្អប៉ុណ្ណោះទេ តែវានៅជួយឱ្យស្ត្រីជាម្ដាយបង្កើនឱកាសពពោះបានរហូតដល់គ្រប់កំណត់ប្រសូតបានទៀតផង។ ការទទួលទានវីតាមីនមិនអាចនាំមកប្រើជំនួសការទទួលទានអាហារដែលគ្រប់ទាំង5ប្រភេទក្រុមបានទេ តែវាអាចសាងនូវភាពសប្បាយចិត្តបានថា ក្នុងមួយថ្ងៃៗអ្នកបានទទួលសារធាតុអាហារគ្រប់ចំនួនហើយ។

6-ទទួលទានទឹកឱ្យបានច្រើន
ព្យាយាមទទួលទានទឹកក្នុងមួយថ្ងៃឱ្យបាន8កែវ បើធាតុអាកាសក្ដៅ ឬបានហាត់ប្រាណផងនោះ ក៏គួរទទួលទានទឹកឱ្យបានច្រើនឡើង ដើម្បីរក្សាភាពស្រស់បស់របស់រាងកាយ និងបង្កើនឱកាសឱ្យអ្នកពពោះបានរហូតដល់គ្រប់កំណត់ប្រសូត ព្រោះបើអ្នកខ្វះជាតិទឹក នឹងធ្វើឱ្យកើតការឈឺពោះប្រសូតមុនកាលកំណត់បាន។

7-ទទួលទានអាហារដែលមានប្រយោជន៍
ការទទួលទានអាហារដែលមានប្រយោជន៍ មានផលល្អចំពោះម្តាយ និងកូនក្នុងផ្ទៃ ក្រៅពីនេះនៅមានហេតុផលមួយទៀតដែលគួរឱ្យចាប់អារម្មណ៍បំផុតគឺ ការទទួលទានអាហារដែលមានសមតុល្យ ជួយការពារការប្រសូតមុនកាលកំណត់បាន។

8-ប្រយ័ត្នទម្ងន់ខ្លួន
ការកើនឡើងនៃទម្ងន់ខ្លួនក្នុងអំឡុងពេលតាំងគភ៌ច្រើនជ្រុលពេក នឹងបង្កើនភាពប្រថុយប្រថាននឹងជំងឺទឹកនោមផ្អែម និងគភ៌មានជាតិពុល ដែលរោគទាំងពីរនេះសុទ្ធតែជាដើមហេតុដែលបង្កឱ្យកើតសភាវប្រសូតមុនកំណត់ទាំងអស់។ ក្នុងផ្លូវផ្ទុយគ្នាវិញ បើស្ត្រីមានគភ៌កើនទម្ងន់ខ្លួនតែបន្តិចបន្តួចវិញនោះ ក៏អាចបង្កើនបច្ច័យប្រថុយប្រថានឱ្យអនាគតអ្នកម្ដាយប្រសូតមុនកាលកំណត់បានដែរ ដូច្នេះទម្ងន់ខ្លួនខណៈពេលមានគភ៌គួរកើនឡើងក្នុងកម្រិតដែលស័ក្តិសមល្មម ដោយជាមធ្យមគឺស្ថិតក្នុងទម្ងន់11.3 – 15.8គីឡូក្រាមដោយទម្ងន់ខ្លួនដែលកើនឡើងក្នុងកម្រិតសមរម្យល្អនេះនឹងមានសញ្ញាល្អថា អ្នកនឹងប្រសូតបុត្រចេញមកដែលមានទម្ងន់ប្រក្រតីល្អនៅពេលគ្រប់កំណត់ប្រសូតទៀតផង៕

November 14, 2017

រួមប្រយោគល្អៗ ដែលស្វាមី-ភរិយាគួរនិយាយឱ្យបានរត់មាត់ ដើម្បីជីវិតគូយូរអង្វែង

ពាក្យថា “បងស្រឡាញ់អូន ឬអូនស្រឡាញ់បង” ជាពាក្យសម្ដីងាយៗដែលគូស្នេហ៍គួរនិយាយប្រាប់គ្នាឱ្យបានរៀងរាល់ថ្ងៃ ព្រោះវានឹងសាងនូវអារម្មណ៍ល្អៗចំពោះគ្នាទៅវិញទៅមក តែត្រឹមតែពាក្យ3ម៉ាត់នេះ អាចនឹងមិនទាន់គ្រប់គ្រាន់ក្នុងការធ្វើឱ្យជីវិតជះពន្លឺនៃសេចក្តីសុខសុភមង្គលរហូតពេញមួយជីវិតអាពាហ៍ពិពាហ៍បានឡើយ ដូច្នេះហើយទើបអ្នកជំនាញការរឿងជីវិតនិងសុភមង្គលបានណែនាំថា គូស្វាមី-ភរិយាគួរពោលពាក្យសម្ដីសំខាន់ៗ 10ប្រយោគខាងក្រោមនេះជាមួយគ្នាឱ្យបានរត់មាត់ បើនិយាយបានរាល់ថ្ងៃផងរឹតតែល្អទៅទៀត។

1- បង(អូន)សំណាងល្អណាស់ដែលបានរៀបការជាមួយអូន(បង)យើងគ្រប់គ្នាចង់បានការអះអាង និងចូលចិត្តពាក្យសរសើរពីគូស្នេហ៍ ហើយនឹងរឹត-តែរំភើបចិត្តរហូតស្ទើរតែហោះទៅទៀតបើសិនជាស្វាមី ឬភរិយារបស់យើងម្នាក់ៗមានអារម្មណ៍ថា ការសម្រេចចិត្តប្រើជីវិតតទៅមុខទៀតទាំងអស់រស់នៅជាមួយនឹងយើង គឺជាការសម្រេចចិត្តដែលត្រឹមត្រូវបំផុតនោះ។

2- ឱ្យបង(អូន)ជួយអី្វខ្លះទេ?គូស្នេហ៍ដែលរៀបការហើយកន្លះសតវត្សរ៍ ឬច្រើនជាងនោះ គេនឹងមិនព្យាយាមធ្វើខ្លួនជា “អ្នកប្រយុទ្ធជិះសេះស” ដែលចូលមកជ្រៀតជ្រែក ប្រាប់ឱ្យគូស្នេហ៍ធ្វើបែបនេះបែបនោះដើម្បីកែបញ្ហា ឬធ្វើខ្លួនដូចថា “គឺខ្ញុំនេះឯងដែលអាចកែខៃបញ្ហាគ្រប់បែបយ៉ាង”បានទាំងអស់នោះទេ ព្រោះអ្វីដែលគូជីវិតរបស់អ្នកចង់បានពិតប្រាកដនោះគឺ នៅចាំស្ដាប់គេយ៉ាងយល់ចិត្ត ដោយអ្នកគ្រាន់តែនិយាយថា “បង(អូន)នៅក្បែរអូន(បង)ជានិច្ច” ឬ “មានអី្វចង់ឱ្យបង(អូន)ជួយ ក៏ប្រាប់មកណា៎” វានឹង
មានប្រសិទ្ធភាពខ្លាំងជាងទៅនិយាយថា “នែ ត្រូវធ្វើអីុចេះណា៎!”។

3- បង(អូន)ត្រូវការអូន(បង)ប្រាប់ឱ្យគូជីវិតដឹងថា អ្នកត្រូវការរូបគេខ្លាំងប៉ុនណាលើគ្រប់ៗផ្នែក រួមទាំងរឿងលើគ្រែផងដែរ រួចហើយភ្លើងប្រាថ្នារបស់អ្នកទាំងពីរនឹងឆេះព្រឹបឡើងម្ដងទៀត…។

4- អូន(បង)គិតយ៉ាងណាដែរ?ប្រយោគងាយៗ តែមានថាមពលខ្លាំងក្លាយ៉ាងមិនគួរឱ្យជឿ ជាពិសេសពេលពិភាក្សាគ្នាយ៉ាងក្ដៅគគុក សម្ដីនេះនឹងកាត់បន្ថយភាពខ្លាំងក្លាបាន ព្រោះវាជាការបបួលឱ្យស្វាមី ឬភរិយាសម្ដែងគំនិតយោបល់ និងប្រាប់ឱ្យគេដឹងថា អ្នកនៅតែផ្តល់ភាពសំខាន់ចំពោះគំនិតរបស់គេយ៉ាងខ្លាំងជានិច្ច។

5- បើសិនគ្មានបង(អូន) អូន(បង)មិនដឹងទៅជាយ៉ាងណាទេ?នៅពេលដែលអ្នកកំពុងស្ថិតក្នុងស្ថានការណ៍សោកសៅ ឬកំពុងប្រឈមនឹងបញ្ហាសំខាន់ក្នុងជីវិត ហើយមានអារម្មណ៍ល្អឡើងវិញដែលមានគេ(នាង)នៅក្បែរ និងផ្ដល់កម្លាំងចិត្តដល់អ្នកជានិច្ចនោះ ចូរកុំភ្លេចអរគុណគេ(នាង)ដោយប្រយោគនេះ ដើម្បីឱ្យគេ(នាង)បានដឹងថា គេ(នាង)គឺជាកម្លាំងជំរុញដ៏អស្ចារ្យ ធ្វើឱ្យអ្នកមានសេចក្តីសុខ និងធ្វើឱ្យអ្នករំភើបចិត្តមែនទែន។

6- បងស្រស់សង្ហា / អូនពិតជាស្អាតមែនទោះជាមនុស្សយើងមិនបានសេពគប់គ្នាលើមុខមាត់ ឬរូបរាងខាងក្រៅក៏ដោយតែក៏មិនអាចបដិសេធបានដែរថា យើងខ្លួនឯងក៏មានអារម្មណ៍ល្អដែរ ពេលដែលគូជីវិតសរសើរពីរូបរាងមុខមាត់របស់យើង ដែលពាក្យសរសើរ
បន្តិចបន្តួចទាំងនេះ ដូចជា “បងចូលចិត្តពេលអូនស្លៀកឈុតហ្នឹងមែនទែន” ឬ “បងឯងស្លៀកឈុតហ្នឹងហើយ សង្ហាមែនទែន” ក៏ធ្វើឱ្យគូជីវិតរបស់អ្នកមានអារម្មណ៍រំភើបសឹងតែហោះបានដែរ ទោះជារៀបការគ្នាមកយូរឆ្នាំហើយក៏ដោយ។

7- សូមទោសណា៎!តើអ្នកបាននិយាយពាក្យមួយប្រយោគនេះលើកចុងក្រោយជាមួយគូជីវិតនៅពេលណាដែរ? សម័យនេះយើងបានឮពាក្យថា សំុទោសកាន់តែតិចទៅហើយ ព្រោះមនុស្សយើងច្រើនតែព្យាយាមរក្សាចរិតលក្ខណៈខ្លួនឯងឱ្យមើលទៅឃើញល្អ និងមិនសូវជាព្រមទទួលស្គាល់ចំពោះអ្វីដែលខ្លួនឯងបានធ្វើខុសឆ្គងប៉ុន្មានឡើយ តែចូរចាំទុកថា… ក្នុងជីវិតអាពាហ៍ពិពាហ៍ដែលសុខដុមរលូនល្អ គូស្នេហ៍ត្រូវមិនវាយឫកដាក់គ្នានោះឡើយ ពេលធ្វើខុសក៏ត្រូវសូមទោស និងទទួលស្គាល់ចំណុចខុសឆ្គងចំពោះគ្នាទៅវិញទៅមក ទើបអាចរស់នៅជាមួយគ្នាបានយូរអង្វែង។

8- និយាយឱ្យបង(អូន)ស្ដាប់ផងមើល៍បើគូស្នេហ៍បានទៅជួបរឿងរ៉ាវដ៏គួរឱ្យរំភើបញាប់ញ័រណាមួយ ឬទើបតែត្រឡប់មកពីដើរលេងកម្សាន្តនោះ ចូរសាកល្បងសុំឱ្យគេរៀបរាប់ឱ្យស្ដាប់បែបមិនបាច់និយាយកាត់ ឬលូកមាត់ម្ដងទៅមើល។ ចង់រឿងតូច រឿងធំ ឬរឿងណាមួយក៏ដោយ ចូរសម្ដែងឱ្យគេដឹងថា យើងកំពុងតែយកចិត្តទុកដាក់ស្ដាប់នូវអ្វីដែលគេរៀបរាប់ប្រាប់នោះ តែប៉ុណ្ណឹងគេក៏នឹងពេញចិត្តបាត់ទៅហើយ។

9- អូន(បង)ឯងនិយាយត្រូវហើយ បង(អូន)ខុសខ្លួនឯងនៅពេលបញ្ហាបានធូរស្រាលឡើងហើយ ប្រយោគនេះនឹងធ្វើឱ្យគេស្ដាប់ឮហើយមានអារម្មណ៍ល្អខ្លាំងបំផុត និងភ្លេចរឿងរ៉ាវដែលបានឈ្លោះគ្នាពីមុនមកសឹងតែទាំងអស់ ដូច្នេះចូរព្យាយាមនិយាយប្រយោគនេះឱ្យបានញឹកញាប់ ទោះជាក្នុងចិត្តរបស់អ្នកអាចគិតថា គេខុស ហើយយើងត្រូវក៏ដោយ។

10- មិនអីទេ បង(អូន)អត់ទោសឱ្យមនុស្សយើង នរណាៗក៏សុទ្ធតែធ្លាប់ធ្វើខុសដែរ អ្នកខ្លួនឯងក៏ដូចគ្នាដែរ! ដូច្នេះការដែលអ្នកអត់ទោសឱ្យគេ វាគឺជាកាដូអនុស្សាវរីយ៍ដ៏មានតម្លៃខ្លាំងបំផុត ទោះជាអ្នកនៅមិនទាន់ចង់លើកលែងទោសឱ្យគេចេញពីដួងចិត្តពិតៗក៏ដោយ តែចូរចាំទុកថា ការធ្វើខ្លួនយើឱ្យស្រឡះផុតពីភាពឈឺចាប់ និងឈប់រំឭកពីរឿងរ៉ាវដ៏អាក្រក់នោះ វានឹងជួយឱ្យអ្នកលែងមានអារម្មណ៍តានតឹង និងជំរុញឱ្យសម្ពន្ធភាពគ្រួសាររលូនល្អឡើងវិញទៀតផង។ ដូច្នេះ រឿងអ្វីដែលអាចចុះចាញ់បាន ក៏ធ្វើចាញ់ៗទៅចុះណា៎ ឡារ៉ែន សូមផ្ដាំ…៕

November 14, 2017

យុវជនប្រើបណ្តាញសង្គមខុសគោលដៅនឹងធ្វើឱ្យចំណេះដឹងកាន់តែរេចរឹល

ភាពទំនើបនៃបច្ចេកវិទ្យាបានផ្លាស់ប្តូរការរស់នៅរបស់មនុស្សសម័យថ្មីយ៉ាងច្រើន ជាពិសេសការយល់ដឹង និងការទទួលបានព័ត៌មាន។ ថ្វីត្បិតតែបណ្តាញបច្ចេកវិទ្យា ជាពិសេសបណ្តាញទំនាក់ទំនងសង្គម មនុស្សគ្រប់គ្នាអាចទទួលបានព័ត៌មានច្រើន តែពេលខ្លះព័ត៌មានទាំងអស់នោះក៏បានបំពុល ឬធ្វើឱ្យប៉ះពាល់ដល់ការគិតរបស់ពួកគេវិញដែរ បើសិនជាយុវជនមិនយល់ពីការប្រើប្រាស់បណ្តាញសង្គម។

ថ្លែងនៅក្នុងទិវានៃការអាន ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ប្រព័ន្ធបច្ចេកវិទ្យាមានសារៈសំខាន់ និងជួយឱ្យយុវជនមានភាពងាយស្រួលក្នុងការសិក្សាស្រាវជ្រាវ តែយុវជនកម្ពុជាមួយចំនួននាពេលបច្ចុប្បន្ននេះប្រើប្រាស់បណ្តាញបច្ចេកវិទ្យាមិនទាន់ត្រូវគោលដៅនោះទេ ដែលវាបានផ្តល់ផលប៉ះពាល់ជាច្រើនដល់ពូកគេ។

ឯកឧត្តម ហង់ ជួនណារ៉ុន បាននិយាយថា៖ «ឥឡូវនេះបច្ចេកវិទ្យាជួយបានច្រើន ការរកសៀវភៅក៏ងាយស្រួលផងដែរតាមបណ្តាញបច្ចេកវិទ្យា តែពេលខ្លះដោយសារតែយើងប្រើវាខុសគោលដៅ យើងបែរជាចេញឆ្ងាយពីការអានទៅវិញ»។

រដ្ឋមន្ត្រីក្រសួងអប់រំ ចង់ឱ្យយុវជនយល់ដឹងឱ្យបានកាន់តែទូលំទូលាយលើការប្រើប្រាស់បណ្តាញសង្គម តាមរយៈការពន្យល់ និងអប់រំពីគ្រឹះស្ថានអប់រំ និងអាណាព្យាបាល ដើម្បីឱ្យពួកគេប្រើប្រាស់បណ្តាញបច្ចេកវិទ្យាឱ្យមានប្រយោជន៍ បើមិនដូច្នោះទេ យុវជននឹងខិតកាន់តែឆ្ងាយពីការអប់រំ ហើយធ្វើឱ្យសមត្ថភាពពួកគេថយចុះទៅវិញ។

បន្ថែមកាន់តែលម្អិតលើបញ្ហាទាំងអស់នេះ រដ្ឋមន្ត្រីក្រសួងព័ត៌មាន ឯកឧត្តម ខៀវ កាញារិទ្ធ បានលើកឡើងថា បណ្តាញសង្គម គ្រាន់តែជាកន្លែងផ្តល់ដំណឹងមួយផ្នែកតែប៉ុណ្ណោះ វាមិនបានផ្តល់ចំណេះដឹង និងភាពច្បាស់លាស់ដូចជាសៀវភៅនោះទេ។

ឯកឧត្តម ខៀវ កាញារិទ្ធ បានមានប្រសាសន៍ថា៖ «បណ្តាញសង្គម Facebook ឬ YouTube មិនមែនជាផលិតផលសម្រេចនោះទេសម្រាប់ការផ្តល់ ឬទទួលយកព័ត៌មាន»។

ឯកឧត្តម បានលើកឡើងផងដែរថា យុវជនមួយចំនួនបានងាកចេញពីការអានមកមើលបណ្តាញ YouTube ដើម្បីទទួលបានចំណេះដឹង ឬពឹងផ្អែកច្រើនលើបណ្តាញ Facebook តែតាមពិតទៅបណ្តាញទាំងនេះមិនបង្ហាញអស់ពីអ្វីដែលជាគុណតម្លៃសំខាន់ៗនោះទេ។ ពេលខ្លះព័ត៌មាននៅលើបណ្តាញសង្គម គឺត្រូវបានបញ្ចូលដោយប្រភពជាច្រើនផ្សេងៗគ្នា ដែលវាអាចជាព័ត៌មានមិនត្រឹមត្រូវ តែសម្រាប់សៀវភៅគឺអាចផ្តល់ការគិតច្រើន និងពិចារណាច្រើនជាងការសិក្សាដែលគ្រាន់តែមើលតាមបណ្តាញសង្គម។ ម្យ៉ាងវិញទៀត អ្នកមើល Facebook ភាគច្រើនមិនបានមើលឱ្យអស់ពីព័ត៌មានគ្រប់ជ្រុងជ្រោយនោះទេ ពួកគាត់មើលតែព័ត៌មានទាំងឡាយណាដែលគាត់ពេញចិត្តមើលតែប៉ុណ្ណោះ ហេតុនេះវាអាចធ្វើឱ្យគាត់បាត់បង់ភាពចម្រុះនៃគំនិតដែលអាចធ្វើឱ្យគាត់គិតមិនបានទូលាយ។

លោក សុខ ឡាក់ ស្ថាបនិកបណ្ណាល័យបញ្ញវន្ត បានលើកឡើងថា បណ្តាញសង្គមសំខាន់ តែពេលខ្លះព័ត៌មានមិនពិតជាច្រើនត្រូវបានគេដាក់លើបណ្តាញសង្កម ប្រសិនបើអ្នកប្រើប្រាស់បណ្តាញសង្គមមិនប្រយ័ត្ន ឬមិនបានពិចារណាឱ្យបានដិតដល់ទេនោះ គាត់អាចនឹងទទួលផលអវិជ្ជមានសម្រាប់ខ្លួនគាត់។ ដើម្បីមានមូលដ្ឋាននៃគំនិតដើម្បីពិចារណាលើព័ត៌មានថា ពិត ឬមិនពិត ការអានសៀវភៅអាចជាជម្រើសល្អមួយ ព្រោះថា ការចងក្រងជាសៀវភៅគឺត្រូវឆ្លងកាត់ដំណាក់កាលជាច្រើន ទើបវាមានភាពសុក្រឹតខ្ពស់ជាង៕

November 14, 2017

ទីន ទីន និយាយពីរឿងស្នហាជាមួយ ឆន សុវណ្ណរាជ

បន្ទាប់ពីមានសារព័ត៌មានក្នុងស្រុកមួយបានចេញផ្សាយថា ចិត្រាតូច និងចិត្រាធំមានទំនាក់ទំនងស្នេហាស៊ីជម្រៅជាមួយគ្នា ព្រមទាំងមានមុខមាត់ស្រដៀងគ្នាផងនោះ ក៏ស្រាប់តែមានអ្នកលេងបណ្ដាញសង្គម Facebook ម្នាក់ទៀតដែលមានឈ្មោះថា Roxy Bella បានចេញមកអះអាងរឿងរ៉ាវរបស់តារាសម្ដែង ទីន ទីន និង ឆន សុណ្ណរាជ ត្រឹមតែប្រយោគមួយឃ្លាថា «សំខាន់ពីរនាក់គាត់ នៅក្រៅ គឺប្ដីប្រពន្ធនឹងគ្នា»។

ស្របពេលគ្នានេះដែរ តារាសម្ដែងវ័យក្មេង ដែលទើបទទួលបានប្រជាប្រិយភាពតាមរយៈរឿងភាគទូរទស្សន៍ ហង្សមាស រឿង “សិសិររដូវក្នុងបេះដូង” បានបង្ហោះសារឆ្លើយតបអំពីរឿងរ៉ាវស្នេហាជាមួយលោក ឆន សុវណ្ណរាជ ថា «ជូនចំពោះ បងស្រី Roxy Bella បើតាមជាក់ស្តែង ខ្ញុំហើយនិងបងរាជ មិនដែលស្គាល់បងស្រីទេ តែហេតុអីបានជាបងស្រីដឹងរឿងពួកខ្ញុំច្បាស់ម្ល៉េះ ឬក៏បងស្រីចង់ល្បី? សុំកុំដើរប្រឌិតរឿង ហើយនិយាយបង្ខូចកេរ្តិ៍ឈ្មោះគេបែបនេះទៀត ។ ខ្ញុំស្រឡាញ់រាប់អាន បងរាជដូចបងប្រុសអ៊ីចឹង មិនដូចពាក្យដែលបងស្រីមកចោទប្រកាន់ខ្ញុំទេ»។

គួរបញ្ជាក់ផងដែរថា តាមរយៈសារអេឡិចត្រូនិកដែល ទីន ទីន បានឆ្លងឆ្លើយជាមួយអ្នកសារព័ត៌មាន ឡារ៉ែន លោកបានបញ្ជាក់បន្ថែមថា «រវាងលោក និងតារាចម្រៀងប្រចាំផលិតកម្មរស្មីហង្សមាស លោក ឆន សុវណ្ណរាជ គឺត្រឹមតែជាបងប្អូនប្រុសល្អនឹងគ្នា ហើយគ្មានទំនាក់ទំនងស្នេហាប្រុស និងប្រុសដូចអ្វីដែលគេបានចោទប្រកាន់ឡើយ»៕

November 14, 2017

ដឹងទេថា មុនពេលល្បីឈ្មោះដូចសព្វថ្ងៃ សួស វីហ្សា ឆ្លងកាត់អ្វីខ្លះ?

បើក្រឡេកមើលពីសន្ទុះនៃប្រជាប្រិយភាពរបស់តារាចម្រៀងស្រីនាពេលបច្ចុប្បន្ននេះ ត្រូវបានគេកត់សម្គាល់ឃើញថា កញ្ញា សួស វីហ្សា ក៏ស្ថិតនៅក្នុងតារាកំពូលមួយក្នុងចំណោមតារាចម្រៀងស្រីល្បីៗមួយចំនួនទៀត ដែលស្ទើរតែអាចនិយាយបានថា មានភាពប្រកៀកប្រកិតជាមួយតារារៀមច្បងរួមទ្រនំតែមួយដូចជា ឱក សុគន្ធកញ្ញា, ពេជ្រសោភា និង សុគន្ធ នីសា ជាដើម។ យ៉ាងណាក៏ដោយ បើទោះជាពេលបច្ចុប្បន្ននេះ វីហ្សា កំពុងលេចអណ្តែតកេរ្តិ៍ឈ្មោះខ្លាំងក៏ពិតមែន ប៉ុន្តែគេជឿថា មានមនុស្សតិចណាស់ ដែលបានដឹងពីប្រវត្តិដ៏ជូរជត់របស់នាងមុនពេលទទួលបានភាពល្បីល្បាញ។

ចំពោះតារាចម្រៀងស្រីពេញសិទ្ធិផ្ដាច់មុខរបស់ផលិតកម្មរស្មីហង្សមាស កញ្ញា សួស វីហ្សាត្រូវបានក្រុមយុវវ័យដែលតែងតែឱ្យតម្លៃ និងតាមគាំទ្រនោះបានបង្ហើបប្រាប់ឱ្យដឹងថា កញ្ញា វីហ្សា មានឈ្មោះពិតថា សួស ស្រីថុល។ នាងគឺជាតារាចម្រៀងស្រីម្នាក់ដែលមានសំឡេងពីរោះរណ្តំ ជាក់ស្ដែងដូចជាច្រៀងបទមនោសញ្ចេតនាមួយចំនួននៅក្នុងផលិតកម្មហង្សមាសតាំងពីវ៉ុលមុនៗ ក៏ដូចជាបទទើបតែចេញថ្មី គឺពិតជាត្រូវនឹងសំឡេងនាងណាស់ ស្តាប់ទៅជក់អារម្មណ៍រួមផ្សំនឹងការសម្ដែងកាយវិការត្រូវនឹងសាច់រឿងកាន់តែល្អឥតខ្ចោះ។ ជាមួយគ្នានេះ ប្រសិនបើនាងងាកមកច្រៀងចម្រៀងបែបជំនាន់ចាស់របស់អ្នកស្រី រស់ សេរីសុទ្ធា វិញក៏ជក់ចិត្តមួយបែបដែរ បើមិនដូច្នោះ មិនមែនគ្រាន់តែនាងដាក់ពាក្យសុំចូលជាសមាជិកថ្មីរបស់ផលិតកម្មហង្សមាសបន្ទាប់ពីផលិតកម្មរ៉ក់ប្រកាសបិតភ្លាម ហង្សមាសព្រមទទួលយកភ្លែតនោះទេ។ ភ្ជាប់ជាមួយនឹងការកោតសរសើរពីសំណាក់បណ្តា Fan ជាច្រើននាក់ សួស វីហ្សា បានបង្ហាញពីអារម្មណ៍រីករាយបំផុត ខណៈដែលអ្នកគាំទ្រទាំងនោះបានយល់ និងដឹងពីសមត្ថភាពពិតពីធម្មជាតិរបស់នាង។

កញ្ញា សួស ស្រីថុល ឬ សួស វីហ្សា មានប្រវត្តិធ្លាប់ហាត់សម្តែង ជាសិស្សប្រចាំនៅសាកលវិទ្យាល័យភូមិន្ទវិចិត្រសិល្បៈ ហើយបន្ទាប់មកក៏ផ្លាស់ទៅធ្វើការនៅនាយកដ្ឋានសិល្បៈប្រចាំរាជធានីភ្នំពេញបានជាច្រើនខែ ដែលភាគច្រើនក្នុងទម្រង់សិល្បៈបែបបុរាណ មិនថាតែការច្រៀងយីកេ ឬបាសាក់នោះទេ គឺនាងអាចធ្វើបានទាំងអស់។ ជាមួយគ្នានេះ នាងក៏ធ្លាប់រួមសម្តែងជាមួយរៀមច្បងជំនាន់មុនៗជាប្រចាំដែរ មុនឆ្លងដល់ក្លាយជាអ្នកចម្រៀងបែបសម័យដូចបច្ចុប្បន្ននេះ។ អតីតសិល្បការិនីក្នុងក្រុមសម្តែងប្រចាំរាជធានីភ្នំពេញរូបនេះ ធ្លាប់ប្រឡងចម្រៀងនៅផលិតកម្មរ៉ុក ឆ្លងកាត់ការប្រកួតមិនតិចវគ្គនោះទេ ដោយគ្រានោះនាងពិតជាជួបភាពលំបាកជាច្រើន ដែលស្ទើរតែគ្មានលទ្ធភាពរកប្រាក់ទិញគ្រឿងតុបតែងខ្លួន ដើម្បីចូលប្រកួតផងនោះ។ពោលគឺមានតែម៉ូតូកញ្ចាស់មួយគ្រឿងជិះ2នាក់ឪពុកទៅចូលរួមប្រកួតទាំងមិនមានសង្ឃឹម ព្រោះតែអ្នកប្រកួតជំនាន់នាងសុទ្ធតែមានសមត្ថភាពខ្លាំងៗ មានសំឡេងពីរោះ សូម្បីតែវគ្គប្រកាសលទ្ធផលជាផ្លូវការក៏នាងអត់មានសង្ឃឹមដែរ។ ប៉ុន្តែនៅទីបំផុត នាងពិតជាអាចឆ្លងកាត់ឧបសគ្គជាច្រើនជំពូក រហូតបានក្លាយជាតារាចម្រៀងស្រីល្បីស្ថិតនៅលំដាប់កំពូលដូចសព្វថ្ងៃនេះ៕

November 14, 2017

Category: សង្គម និងសេដ្ឋកិច្ច