អគ្គនាយកដ្ឋានពន្ធដារ គ្រោងនឹងដាក់ឱ្យដំណើរការនៃការដាក់លិខិតប្រកាស និងបង់ពន្ធតាមប្រព័ន្ធអេឡិចត្រូនិក (E-Filing and E-Payment)នៅក្រោយការរៀបចំសិក្ខាសាលាផ្សព្វផ្សាយមួយដែលគ្រោងធ្វើនៅថ្ងៃទី20 ខែវិច្ឆិកា ខាងមុខ នៅសណ្ឋាគារ Sofitel Phnom Penh ដោយមានអ្នកចូលរួមប្រមាណ1,000នាក់។
លិខិតអញ្ជើញរបស់អគ្គនាយកដ្ឋានពន្ធដារ ចុះថ្ងៃទី6 ខែវិច្ឆិកា ឆ្នាំ2017 បានឱ្យដឹងថា អគ្គនាយកដ្ឋានពន្ធដារ នឹងរៀបចំសិក្ខាសាលាផ្សព្វផ្សាយស្តីពី“កាតព្វកិច្ចពន្ធលើប្រាក់ចំណូលប្រចាំឆ្នាំ និងការដាក់ឱ្យដំណើរការនៃការដាក់លិខិតប្រកាស និងបង់ពន្ធតាមប្រព័ន្ធអេឡិចត្រូនិក (E-Filing and E-Payment)”។ លិខិតនោះបានបញ្ជាក់ថា អគ្គនាយកដ្ឋានពន្ធដារ ចាត់ទុកថាសិក្ខាសាលានេះមានទ្រង់ទ្រាយធំ ដោយអញ្ជើញសហគ្រាសចំនួន1,000 មកពីគ្រប់វិស័យ និងគ្រប់សមាគមពាណិជ្ជករនៅព្រះរាជាណាចក្រកម្ពុជាទាំងអស់ចូលរួម។
រហូតមកដល់ពេលនេះគេនៅមិនទាន់ទទួលបានការបញ្ជាក់ជាផ្លូវការណាមួយថា តើអគ្គនាយកដ្ឋានពន្ធដារនឹងកែសម្រួលការចុះបញ្ជីពន្ធ ពីការតម្រូវឱ្យម្ចាស់ក្រុមហ៊ុនមកចុះបញ្ជីដោយផ្ទាល់ និងត្រូវបង្ហាញមុខនៅអគ្គនាយកដ្ឋានពន្ធដារសម្រាប់ការចុះបញ្ជី ដោយការថតរូប និងស្កែនម្រាមដៃ ឬយ៉ាងណានោះទេ បន្ទាប់ពីមានការលើកឡើងពីផលលំបាកមួយចំនួននាពេលកន្លងមក។
កាលពីខែតុលា ឆ្នាំ2014 ក្រសួងសេដ្ឋកិច្ច និងហិរញ្ញវត្ថុ បានចេញប្រកាសលេខ 1139 ដោយបានដាក់លក្ខខណ្ឌតម្រូវមួយចំនួនសម្រាប់ការចុះបញ្ជីពន្ធ ដូចជាការតម្រូវឱ្យក្រុមហ៊ុនទាំងអស់ដែល
បច្ចុប្បន្នចុះបញ្ជីជាមួយអគ្គនាយកដ្ឋានពន្ធដារ ត្រូវតែចុះបញ្ជីឡើងវិញឱ្យស្របទៅតាមដំណើរការថ្មី។ ក្នុងប្រកាសនោះមានចំណុចមួយបានតម្រូវឱ្យអ្នកទទួលខុសត្រូវម្នាក់ក្នុងក្រុមហ៊ុនត្រូវតែមកបង្ហាញមុខផ្ទាល់នៅអគ្គនាយកដ្ឋានពន្ធដារ ដើម្បីឱ្យគេថតរូប និងស្កែនម្រាមដៃទុកសម្រាប់បំពេញការចុះបញ្ជីពន្ធដារ។
អគ្គនាយកដ្ឋានពន្ធដារ កាលពីខែមករា ឆ្នាំ2015ក៏បានចេញសេចក្តីជូនដំណឹងលេខ 286 ដោយបានចែងលក្ខខណ្ឌតម្រូវ ដែលអះអាងថា បណ្តាក្រុមហ៊ុននឹងមិនអាចទទួលប៉ាតង់ពន្ធប្រចាំឆ្នាំបានទេ ប្រសិនបើមិនបានធ្វើបច្ចុប្បន្នភាពព័ត៌មានអំពីក្រុមហ៊ុនស្របតាមប្រកាសលេខ1139។ សេចក្តីប្រកាសនេះ ត្រូវបានវិស័យឯកជនលើកឡើងថា គេមិនអាចទទួលប៉ាតង់ពន្ធបានទេ កាលណាគ្មានប្រធានក្រុមហ៊ុនទៅបង្ហាញមុខផ្ទាល់នៅអគ្គនាយកដ្ឋានពន្ធដារ។ តម្រូវការនេះពិតជាបង្កភាពប្រឈម និងបន្ទុកស្មុគស្មាញមួយសម្រាប់ក្រុមហ៊ុនមួយចំនួន ពិសេសក្រុមហ៊ុនអន្តរជាតិដែលមានប្រធាននៅក្រៅប្រទេស។
ក្រោយពីនោះមក នៅខែមេសា ឆ្នាំ2015 អគ្គនាយកដ្ឋានពន្ធដារ បានចេញសេចក្តីណែនាំលេខ 2439 ដែលអនុញ្ញាតឱ្យប្រធានក្រុមហ៊ុនមានជម្រើសធ្វើប្រតិភូកម្មទទួលខុសត្រូវជំនួសក្នុងការបង្ហាញខ្លួនផ្ទាល់នៅអគ្គនាយកដ្ឋានពន្ធដារ។ ប្រតិភូកម្មនោះ អាចត្រូវបានធ្វើចំពោះសមាជិកភាគហ៊ុនណាម្នាក់ ឬក៏តំណាងនីតិបុគ្គលណាមួយ ដែលមានការទទួលស្គាល់ដោយក្រសួងពាណិជ្ជកម្ម ឬ ស្ថាប័នសាធារណៈពាក់ព័ន្ធណាផ្សេងទៀតរួចមកហើយ។
តែទោះជាយ៉ាងណាការណែនាំអនុញ្ញាតឱ្យមានការធ្វើប្រតិភូកម្មនោះ ជាវិធានការបណ្តោះអាសន្នតែប៉ុណ្ណោះ ដោយទុកពេលពី3ទៅ6ខែទៀត ឱ្យប្រធានក្រុមហ៊ុនមកបង្ហាញខ្លួនផ្ទាល់នៅអគ្គនាយកដ្ឋានពន្ធដារ ហើយដរាបណាធ្វើដូច្នេះរួច ទើបគេចេញវិញ្ញាបនបត្រអាករលើតម្លៃបន្ថែមឱ្យទៅក្រុមហ៊ុន។
យោងតាមសៀវភៅ“ស” របស់សភាពាណិជ្ជកម្មអឺរ៉ុបប្រចាំកម្ពុជា EuroCHAM ប្រការច្បាប់ទាំងឡាយណាដែលមានលក្ខណៈការិយាធិបតេយ្យពេក និងជះឥទ្ធិពលអវិជ្ជមានទៅលើការយល់ឃើញកម្ពុជាថា ជាគោលដៅវិនិយោគល្អមួយក្នុងពិភពលោក។ ក្នុងសេណារីយ៉ូអាក្រក់បំផុត ក្រុមហ៊ុនអន្តរជាតិប្រហែលជាអាចយកជម្រើសមិនពង្រីកធុរកិច្ចរបស់គេនៅកម្ពុជា កាលណាគេជឿថា ពួកគេនឹងត្រូវប្រឈមជាមួយភាពត្បិតត្បៀតការិយា-ធិបតេយ្យច្រើនពេក។
ក្រសួងសេដ្ឋកិច្ច និងហិរញ្ញវត្ថុ បានចេញប្រកាសមួយកាលពីខែតុលា ឆ្នាំ2014 ស្តីពីការចុះបញ្ជីពន្ធដារដោយមានគោលបំណងពង្រឹង និងបង្កើនប្រសិទ្ធភាពនៃការចុះបញ្ជីពន្ធដារ ដើម្បីគ្រប់គ្រងទិន្នន័យសហគ្រាសនីតិបុគ្គល ឬក្រុមអាជីវកម្ម ឬសហគ្រាសឯកបុគ្គល ឬបុគ្គលទាំងឡាយឱ្យបានកាន់តែប្រសើរឡើង ពង្រឹងការផ្តល់សេវាជូនអ្នកជាប់ពន្ធឱ្យកាន់តែមានលក្ខណៈល្អប្រសើរ និងពង្រឹងការគាំទ្រដល់ការគ្រប់គ្រងការដាក់លិខិតប្រកាស ការធ្វើសវនកម្ម និងការប្រមូលបំណុលពន្ធឱ្យកាន់តែមានតម្លាភាព និងប្រសិទ្ធភាព។ នៅក្នុងប្រការ5 នៃប្រកាសនោះ បានចែងពីកាតព្វកិច្ចនៃការចុះបញ្ជីពន្ធដារ ដោយកំណត់ថា ការចុះបញ្ជីត្រូវធ្វើឡើងក្នុងរយៈពេល 15ថ្ងៃ ក្រោយពីចាប់ផ្តើមធ្វើសកម្មភាពសេដ្ឋកិច្ច ឬក្រោយពីពេលទទួលបានការចុះបញ្ជីនៅក្រសួងពាណិជ្ជកម្ម ឬក្រសួងស្ថាប័នពាក់ព័ន្ធ។ ការចុះបញ្ជីពន្ធដារនោះបានតម្រូវឱ្យបង់ថ្លៃ 400,000រៀល សម្រាប់ពន្ធស្វ័យប្រកាស ហើយ 20,000រៀលសម្រាប់របបម៉ៅការ។
ក្រោយពីការសម្រេចតាមរយៈប្រកាសជាបន្តបន្ទាប់ និងការប្រកាន់យកការប្រមូលពន្ធតាមរបបស្វ័យប្រកាស ឬរបបពិតវិញ មានសហគ្រាសខ្លះធ្លាប់បានត្អូញត្អែរពីការបិទទ្វារអាជីវកម្ម។ នេះបើ
តាមការអះអាងរបស់ ឯកឧត្តម គង់ វិបុល ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។
នៅក្នុងពិធីប្រគល់អាជ្ញាប័ណ្ណដល់ក្រុមហ៊ុនចំនួន 43ដើម្បីក្លាយជាភ្នាក់ងារសេវាកម្មជាលើកដំបូងនៅអគ្គនាយកដ្ឋានពន្ធដារ កាលពីថ្ងៃទី01 ខែវិច្ឆិកា ឆ្នាំ2016 ឯកឧត្តម គង់ វិបុល បានលើកឡើងថា ក្រុមហ៊ុនរកស៊ីមិនតិចជាង80%ទេ ដែលដាក់លិខិតប្រកាសខាតមកពន្ធដារ តែថ្នាក់ដឹកនាំពន្ធដារមិនជឿលើលិខិតប្រកាសខាតទាំងនោះទេ។
សូមរំឭកផងដែរថា កាលពីដើមឆ្នាំ2016 រាជរដ្ឋាភិបាលកម្ពុជា បានប្រកាសប្រកាន់ជំហររបស់ខ្លួនក្នុងប្រមូលពន្ធតាមផលរបបពិត ដោយផ្លាស់ប្តូរទម្លាប់ពីការប្រមូលពន្ធតាមរបបម៉ៅការដែលធ្លាប់ប្រកាន់យកជាយូរមកហើយទៅលើប្រភេទអាជីវកម្មខ្នាតតូច ឬអាជីវកម្មខ្នាតធំ តែគ្មានប្រព័ន្ធគណនាហិរញ្ញវត្ថុត្រឹមត្រូវ៕
