សង្គម និងសេដ្ឋកិច្ច - La Reine Media

ទស្សនាសម្រស់ពិតរបស់បវរកញ្ញាផែនដី Miss Earth 2017 នៅលើទឹកដីប្រទេសកម្ពុជា

តាមរយៈសារព័ត៌មាន Kenh 14 ដែលបានចេញផ្សាយនៅថ្ងៃទី16 ខែវិច្ឆិកា ឆ្នាំ2017 មុននេះបន្ដិចបានឱ្យដឹងថា បរវកញ្ញាផែនដី ឬ Miss Earth 2017 កញ្ញា Karen Ibasco បានធ្វើដំណើរចេញពីព្រលានយន្ដហោះអន្ដរជាតិ Tan Son Nhat នៅក្នុងប្រទេសវៀតណាម មកកាន់ប្រទេសកម្ពុជាហើយ។

កញ្ញា Karen Ibasco ជាជនជាតិហ្វីលីពីនដែលបានជាប់ជយលាភីប្រឡងការប្រកួតបវរកញ្ញាផែនដី Miss Earth 2017 ព្រមទាំងបានគ្រងមកុដដ៏មានតម្លៃទៀតផងនោះបានធ្វើដំណើរមកកាន់ប្រទេសវៀតណាម ហើយបានជួបរាក់ទាក់សំណេះសំណាលជាមួយបវរកញ្ញាផែនដីតំណាងប្រទេសវៀតណាម មុនពេលដែលនាងត្រូវចេញដំណើរមកកាន់ប្រទេស កម្ពុជា បន្ដទៀត។

ដោយឡែកតាមរយៈរូបថតមួយសន្លឹកដែលបានដកស្រង់ពីបណ្ដាញសង្គម Facebook បានឱ្យដឹងថា ដំណើររបស់បវរMiss Earth 2017រូបនេះ នឹងត្រូវបានទទួលស្វាគមន៍ពីសំណាក់សណ្ឋាគារ Naga World ដូច្នេះដើម្បីឱ្យកាន់តែជាក់ច្បាស់បន្ថែមថា សម្រស់ពិតៗរបស់ម្ចាស់មកុដ Miss Earth 2017 នៅលើទឹកដីកម្ពុជា ស្រស់ស្អាតខុសពីការរិះគន់កម្រិតណានោះ សូមប្រិយមិត្តទាំងអស់ទស្សនារូបភាពទាំងឡាយខាងក្រោមនេះ៖

November 16, 2017

5ហេតុផល ដែលគូស្វាមី-ភរិយាថ្មោងថ្មីត្រូវតែទៅក្រេបរាត្រីចន្ទទឹកឃ្មុំ

ធ្លាប់នឹកសង្ស័យដែរឬទេថា ហេតុអ្វីបានជាគូអាពាហ៍ពិពាហ៍ថ្មោងថ្មីត្រូវតែទៅក្រេបរាត្រីចន្ទទឹកឃ្មុំ (Honeymoon) តើវាជាច្បាប់កំណត់ ជាទំនៀមទម្លាប់ ឬជាអ្វី? និងបើគូស្នេហ៍ដូចរូបអ្នកមិនទៅហានីមូន តើខុសដែរឬទេ? ព្រោះជាធម្មតាអ្នកក៏តែងធ្វើដំណើរកម្សាន្តញឹកញាប់ស្រាប់ទៅហើយតើ! ហើយពាក្យថា “ក្រេបរាត្រីចន្ទទឹកឃ្មុំ” នេះវាកើតចេញមកទីកន្លែងណាទៅ ហេតុអីចាំបាច់ពិសេសជាងគេជាងឯង? គូអាពាហ៍ពិពាហ៍ថ្មីថ្មោងទាំងឡាយមិនចាំបាច់ឆ្ងល់ច្រើនទេ សូមនាំគ្នាមើលចម្លើយដូចតទៅ។

Honeymoon ឬរាត្រីក្រេបចន្ទទឹកឃ្មុំនេះមានប្រភពមកពីខាងបណ្ដាប្រទេសអឺរ៉ុបដែលបានប្រៀបធៀបការហានីមូននេះទៅនឹងការឡើងចុះរបស់ដួងព្រះចន្ទ ព្រោះអំឡុងខែដំបូងនៃការរៀបការ សេចក្ដីស្នេហានឹងក្រអូបផ្អែមឆ្អិតប្រៀបដូចទឹកឃ្មុំ ទើបហៅថា ហានីមូន។ តមកនាពេលក្រោយៗនេះ គូស្នេហ៍នៃសង្គមអភិជនក្នុងទ្វីបអឺរ៉ុបច្រើនតែធ្វើដំណើរទៅសួរសុខទុក្ខសាច់ញាតិដែលមិនបានមកចូលរួមពិធីមង្គលការនៅតាមទីក្រុងផ្សេងៗ ឬនៅក្រៅប្រទេស ដែលអាចរាប់បានថា ជាការធ្វើដំណើរកម្សាន្តដើម្បីបន្ធូរភាពតានតឹងពីការរៀបចំពិធីមង្គលការផងដែរ រហូតធ្វើឱ្យការទៅហានីមូននេះក្លាយជាទំនៀមទម្លាប់មួយដែលមិនអាចខកខានបាននាពេលបច្ចុប្បន្ននេះ។

La Reine Wedding Tips មានហេតុផល5យ៉ាងដែលគូស្នេហ៍អាពាហ៍ពិពាហ៍ទាំងឡាយគួរតែទៅហានីមូនមកជម្រាបជូន ដើម្បីឱ្យគូស្វាមីភរិយាថ្មោងថ្មីមួយចំនួនដែលមើលមិនឃើញពីភាពចាំបាច់របស់ការទៅហានីមូននេះក្រោកឡើងមករៀបចំដំណើរកម្សាន្តក្រេបរាត្រីចន្ទទឹកឃ្មុំដ៏សែនផ្អែមល្ហែមនេះជាមួយគ្នា។

1- បន្ធូរអារម្មណ៍តានតឹងពីការរៀបចំពិធីមង្គលការទិដ្ឋភាពនៃពិធីមង្គលការដែលអ្នកទាំងពីរបាននឹករំពឹងទុកនោះ ប្រាកដណាស់ វាច្បាស់ជាត្រូវធ្វើនេះធ្វើនោះច្រើនណាស់ និងពេញទៅដោយការងារសំខាន់ៗ ទាំងការរៀបផែនការចាត់ពិធី ទីកន្លែង ធៀបការ វត្ថុអនុស្សាវរីយ៍ និងនេះនោះជាច្រើនទៀត ដូច្នេះទើបគូស្នេហ៍ពោរពេញទៅដោយភាពតានតឹងក្នុងអារម្មណ៍ និងភាពនឿយហត់ពីការរៀបចំពិធីមង្គលការនេះ អីុចឹងហើយទើបការទៅហានីមូនប្រៀបដូចជាទៅសម្រាកលម្ហែបន្ធូរភាពនឿយហត់ទាំងអស់របស់អ្នកទាំងពីរដែរ។

2- ជប់លៀងតែពីរនាក់ស្ងាត់ៗជាការពិតហើយដែលអ្នកទាំងពីរបានធ្វើពិធីជប់លៀងពិធីមង្គលការធំដុំ មានញាតិមិត្តមករួមសម្ដែងក្ដីសោមនស្សរីករាយជាច្រើននោះ តែកុំគិតថាការជប់លៀងបែបស្ងាត់ៗតែពីរនាក់តទល់មិនសំខាន់ឱ្យសោះ តែវាថែមទាំងជារឿងដែលចាំបាច់ខ្លាំងទៀតផង ជាពិសេសចំពោះសុភាពនារីអាចនិយាយបានថា ជារឿងមួយដែលមិនអាចខ្វះបានឡើយនៅក្នុងសម្ពន្ធភាពនៃជីវិតអាពាហ៍ពិពាហ៍ គឺជាការបន្ថែមភាពផ្អែមល្ហែមដល់ជីវិតគូក៏អាចថាបានដែរ។ រឹតតែក្នុងអំឡុងពេលដែលផ្អែមល្ហែមបំផុតពេលហានី-
មូនផងនោះ ក្រៅពីបានទៅដើរលេងកម្សាន្តហើយនៅមានផែនការជប់លៀងជាមួយគ្នាតែពីរនាក់ស្ងាត់ៗទៀតផង។ គិតមើលលេងៗទៅមើលថា តើគូស្នេហ៍របស់អ្នកនឹងមានសេចក្ដីសុខប៉ុនណាទៅ? សូមកុំភ្លេចថា រឿងការធ្វើឱ្យមានរឿងភ្ញាក់ផ្អើលល្អៗ គឺជារឿងចាំបាច់មួយសម្រាប់ជីវិតគូ ព្រោះរឿងទាំងអស់នេះបានសាងភាពរីករាយ និងសេចក្ដីសុខខ្លាំងមែនទែន។

3- រៀនយល់ដឹងពីគ្នាទៅវិញទៅមកអំឡុងពេលហានីមូន គឺជាឱកាសដែលអ្នកទាំងពីរបាននៅជាមួយគ្នា24ម៉ោង បានដើរលេង ប្រឡែងគ្នា និងកាន់ដៃគ្នា អាចហៅបានថា ជាអំឡុងពេលផ្អែមល្ហែមបំផុតមួយនៃជីវិតអាពាហ៍ពិពាហ៍។អំឡុងពេលនេះអ្នកទាំងពីរនឹងមានសេចក្តីសុខបែបផុតកំពូល អ្វីៗក៏មើលទៅល្អ មើលទៅគួរឱ្យស្រឡាញ់ទាំងអស់ ដូច្នេះគឺពេលនេះហើយដែលជាចង្វាក់ល្អបំផុតដែលអ្នកនឹងបានស្គាល់ពីគូស្នេហ៍របស់ខ្លួនយ៉ាងស៊ីជម្រៅ អាចនិយាយបានថា បានសម្របសម្រួលខ្លួន បានរៀនយល់ដឹងពីគ្នាទៅវិញទៅមកយ៉ាងពេញទំហឹង មុននឹងត្រឡប់ទៅរស់នៅក្នុងជីវិតក្រោយអាពាហ៍ពិពាហ៍យ៉ាងពិតប្រាកដ។

4- មានពេលវេលានៅជាមួយគ្នាតែពីរនាក់គូស្នេហ៍ភាគច្រើនតែងតែមានពេលវេលានៅជាមួយគ្នាតែពីរនាក់មិនច្រើនប៉ុន្មានឡើយក្នុងអំឡុងមុនពេលរៀបការ ដូច្នេះទើបការហានីមូនជាវិធីមួយដែលនឹងធ្វើឱ្យអ្នកទាំងពីរបានផ្អែមល្ហែមជាមួយគ្នាដូចចិត្តប្រាថ្នា ដូចពាក្យថា “ការធ្វើដំណើរផ្លូវឆ្ងាយ ធ្វើឱ្យយើងខិតជិតគ្នា”។

5- រៀបចំផែនការអនាគតរួមគ្នាការទៅហានីមូនប្រៀបដូចជាការបើកឱកាសឱ្យទាំងពីរនាក់បាននៅជាមួយគ្នា ដោយគ្មាននរណាផ្សេងមកពាក់ព័ន្ធ។ ឱកាសនេះស័ក្តិសមបំផុតក្នុងការជជែកពិភាក្សាគ្នាយ៉ាងបើកចំហ ជាអំឡុងពេលដ៏ល្អមួយក្នុងការបានប្រឹក្សាអំពីរឿងរ៉ាវរបស់គ្នាទៅវិញទៅមក ឬរឿងមួយចំនួនដែលអាចនឹងបំភ្លេចមិនបានប្រាប់គ្នាឱ្យដឹងតាំងពីដំបូង និងជាឱកាសដ៏ល្អបំផុតសម្រាប់ការរៀបចំផែនការគ្រួសារនាពេលអនាគតទៀតផង។

ទាំង5ហេតុផលនេះ អាចប្រាប់បានថា ហេតុអីបានគូស្នេហ៍ទាំងអស់ចាំបាច់ត្រូវទៅហានីមូនព្រោះក្រៅពីនឹងធ្វើឱ្យអ្នកទាំងពីរបាននៅនែបនិត្យជិតគ្នាច្រើនឡើងហើយ ការក្រេបរាត្រីចន្ទទឹកឃ្មុំថែមទាំងជាចំណុចចាប់ផ្ដើមក្នុងការធ្វើឱ្យជីវិតគូរបស់អ្នកផ្លាស់ប្ដូទៀតផង៕

November 16, 2017

Jedinak ជួយឲ្យអូស្ត្រាលី ឈានទៅ World Cup ជាលើកទី 4ជាប់ៗគ្នា

ក្រុមបាល់ទាត់ជម្រើសជាតិអូស្ត្រាលី បានឈ្នះកៅអីទៅលេងក្នុងយុទ្ធនាការ World Cup ជាលើកទី4ជាប់ៗគ្នារបស់ពួកគេតាមរយៈការផ្តួលក្រុមជម្រើសជាតិហុងឌូរ៉ាស ក្នុងលទ្ធផល 3-1 ក្នុងការប្រកួតវគ្គ Playoff អន្តរទ្វីបជើងទី2 នាកីឡដ្ឋាន Stadium Australia ក្នុងទីក្រុងស៊ីដនី កាលពីថ្ងៃពុធ។

ក្រោយពីបានបញ្ចប់ក្នុងលទ្ធផលស្មើ ០-០ កាលពីជើងទី1 ការស៊ុតបាល់ពិន័យ Free-kick របស់ខ្សែបម្រើ Mile Jedinak នៃក្លិប Aston Villa បានរត់ទៅចំខ្សែការពារ Henry Figueroa របស់ក្រុមហុងឌូរ៉ាស ហើយប្លាតចូលទីយ៉ាងល្អ ដើម្បីជួយឲ្យក្រុមម្ចាស់ផ្ទះមានគ្រាប់បាល់បើកឆាក។ បន្ទាប់មក Jedinak បានរកគ្រាប់បាល់បញ្ចូលទី2គ្រាប់បន្ថែមទៀតពីការស៊ុតបាល់ប៉េណាល់ទី ក្រោយពីខ្សែការពារ Bryan Acosta បានធ្វើឲ្យបាល់ប៉ះដៃក្នុងប្រអប់គ្រោះថ្នាក់ និងបន្ទាប់ពីការប្រព្រឹត្តកំហុសរបស់កីឡាករ Johnny Palacios ដើម្បីជ័យជម្នះរបស់ក្រុមអូស្ត្រាលីតែម្តង។ ខ្សែការពារ Maynor Figueroa បានវាយបកបាន1គ្រាប់វិញសម្រាប់ក្រុមភ្ញៀវ ប៉ុន្តែវាហាក់ដូចជាយឺតពេលបន្តិចហើយសម្រាប់ក្រុមជម្រើសជាតិហុងឌូរ៉ាស។ ជ័យជម្នះនេះ មានន័យថា អូស្ត្រាលី នឹងបានចូលរួមជាមួយនឹងក្រុមចំនួន3០ក្រុមផ្សេងទៀត ក្នុងនោះរាប់បញ្ចូលទាំងម្ចាស់ផ្ទះរុស្ស៊ី ផងដែរ សម្រាប់យុទ្ធនាការ World Cup ឆ្នាំ2018 ខណៈដែលក្រុមទី32 នឹងត្រូវកាត់សេចក្តី បន្ទាប់ពីការប្រកួតរវាងក្រុមជម្រើសជាតិប៉េរូ និងនូវែលសេឡង់ នៅព្រឹកថ្ងៃព្រហស្បតិ៍នេះ។

លោក Ange Postecoglou គ្រូបង្វឹកនៃក្រុមជម្រើសជាតិអូស្ត្រាលី បានឲ្យដឹងថា៖ «និយាយឲ្យត្រង់ទៅ វាជាការទទួលជ័យជម្នះដ៏ធំមួយ។ នៅពេលដែលអ្នកកំពុងតែធ្វើជាគ្រូបង្វឹករបស់ក្រុមជម្រើសជាតិរបស់អ្នក ដើម្បីទទួលខុសត្រូវកាន់តែធំ អ្នកដឹងថា វាពិតជាមានន័យណាស់សម្រាប់ជាតិ និងក្នុងការប្រកួតនេះ»៕

ប្រភពពី៖ BBC

November 16, 2017

សមត្ថភាពការងាររបស់យុវជនបច្ចុប្បន្ននៅមិនទាន់ឆ្លើយតបតម្រូវការទីផ្សារគ្រប់គ្រាន់

ភ្នំពេញ៖ នៅក្នុងប្រទេសកម្ពុជា អ្នកបំពេញការងារនៅតាមបណ្តាក្រុមហ៊ុន រោងចក្រ សហគ្រាសនានា ពិសេសនៅក្នុងវិស័យកាត់ដេរ និងសំណង់ហាក់មិនទាន់មានជំនាញគ្រប់គ្រាន់សមទៅតាមតម្រូវការទីផ្សារការងារនៅឡើយ ដោយភាគច្រើនធ្វើការដោយប្រើកម្លាំងពលកម្មសុទ្ធសាធ។

លោក Charles Esterhoy ប្រធានសភាពាណិជ្ជកម្មអាមេរិកប្រចាំប្រទេសកម្ពុជា ហៅកាត់ថា AmCham បានមានប្រសាសន៍ថា តាមការសង្កេតមើលការបំពេញការងាររបស់កម្មករនិយោជិតនៅតាមបណ្តារោងចក្រនានានៅកម្ពុជា ពួកគេហាក់នៅមិនទាន់មានជំនាញគ្រប់គ្រាន់ និងតម្រូវឱ្យមានការបណ្តុះបណ្តាលជំនាញបន្ថែមឱ្យកាន់តែប្រសើរឡើង ដើម្បីឱ្យពួកគេបំពេញការងារបានលឿន និងទទួលបានប្រាក់ចំណូលច្រើនត្រឡប់ទៅវិញ។

លោកថា កន្លងមកដោយយល់ឃើញពីកង្វះខាតជំនាញ និងបទពិសោធរបស់អ្នកស្វែងរកការងារធ្វើក្នុងការបំពេញតាមលក្ខខណ្ឌ និងតម្រូវការជ្រើសរើសបុគ្គលិកពីសំណាក់សមាជិករបស់ខ្លួន សភាពាណិជ្ជកម្មអាមេរិកប្រចាំនៅកម្ពុជា (AmCham) បានសហការជាមួយ NEA ក្នុងការត្រៀមលក្ខណៈចូលទីផ្សារការងាររបស់យុវជនតាមរយៈការអនុវត្តកម្មវិធីកម្មសិក្សាការងារជាមួយក្រុមហ៊ុនដែលជាសមាជិករបស់ខ្លួន ដើម្បីឱ្យកិច្ចសហប្រតិបត្តិការនេះ ឆ្លើយតបទៅនឹងគោលនយោបាយរបស់រាជរដ្ឋាភិបាលក្នុងការលើកកម្ពស់ការអភិវឌ្ឍជំនាញ និងការងាររបស់យុវជន រួមមាន៖ គោលនយោបាយស្តីពីមុខរបរ និងការងារឆ្នាំ 2015-2025(NEP), គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ 2015-2025 (IDP), គោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈឆ្នាំ 2017-2025 (TVET-Policy) និងផែនការយុទ្ធសាស្ត្រអភិវឌ្ឍន៍វិស័យការងារ។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មាធិការជាតិបណ្តុះបណ្តាលបានថ្លែងគាំទ្រចំពោះគម្រោងខាងលើ ដើម្បីជួយឱ្យកម្មករកម្ពុជាមានជំនាញកាន់តែប្រសើរឡើងក្នុងការបំពេញការងារប្រកបដោយវិជ្ជាជីវៈ។ ឯកឧត្តមមានប្រសាសន៍ថា គម្រោងនេះក៏ជាការបង្កើនកិច្ចសហប្រតិបត្តិការកាន់តែជិតស្និទ្ធថែមទៀតរវាងសភាពាណិជ្ជកម្មអាមេរិកប្រចាំប្រទេសកម្ពុជា និងក្រសួងការងារ និងបណ្តុះបណ្តាលវិជ្ជាជីវៈផងដែរ។

ដើម្បីឱ្យគម្រោងបណ្តុះបណ្តាលនេះទទួលបានលទ្ធផលជាផ្លែផ្កា ឯកឧត្តមរដ្ឋមន្ត្រីបានអញ្ជើញជាអធិបតីភាព និងជាសាក្សីក្នុងពិធីចុះហត្ថលេខាលើអនុស្សរណៈនៃការយោគយល់គ្នាស្តីពី “កម្មវិធីកម្មសិក្សាការងារ” រវាងទីភ្នាក់ងារជាតិមុខរបរ និងការងារ ជាមួយសភាពាណិជ្ជកម្មអាមេរិកប្រចាំប្រទេសកម្ពុជា (AmCham)។

គួរបញ្ជាក់ថា គោលបំណងនៃកិច្ចសហប្រតិបត្តិការដើម្បីអនុវត្តសាកល្បងនូវ “កម្មវិធីកម្មសិក្សាការងារ” នេះសំដៅលើកកម្ពស់ជំនាញ បទពិសោធ ការទទួលបានឱកាសការងារ និងចូលទីផ្សារការងារកាន់តែងាយស្រួលរបស់យុវជន ព្រមទាំងឆ្លើយតបតាមតម្រូវការរបស់និយោជកឱ្យកាន់តែប្រសើរឡើងផងដែរ៕

November 16, 2017

កញ្ញា ឌី លីណា សង្ឃឹមថា នឹងមិនមានបាតុភូតចម្លែកអ្វីកើតឡើងពេលថតរឿង ភូមិគ្រឹះ100ល្បិច

នៅថ្ងៃទី15 ខែវិចិ្ឆកា ឆ្នាំ2017 កញ្ញា ឌី លីណា ឬនៅក្នុងចង្កោមពិភពសិល្បៈគេនិយមហៅថា ម៉ែគ្រូ និងជាតារាសម្ដែងនៅក្នុងរឿងភាគក្នុងស្ថានីយទូរទស្សន៍ជាច្រើននោះ បានបង្ហាញពីអារម្មណ៍ភ័យព្រួយជាខ្លាំង ខណៈនាងបានក្លាយជាតួអង្គខ្មោចស្រីនៅក្នុងរឿង”ភូមិគ្រឹះ100ល្បិច” របស់ស្ថានីយទូរទស្សន៍ប៉ុស្ដិ៍លេខ5។ នេះបើតាមការផ្ដល់សម្ភាសជាមួយអ្នកយកព័ត៌មាននៃគេហទំព័រ ឡារ៉ែន នាថ្ងៃក្រុងពាលីរឿង។

ក្នុងពិធីក្រុងពាលីរឿង “ភូមិគ្រឹះ100ល្បិច” កញ្ញា ឌី លីណា បាននិយាយថា នៅក្នុងរឿងនេះនាងសម្ដែងជាតួអង្គខ្មោចឈ្មោះនាងម៉ារ៉ា ដែលបានបង្កប់នូវល្បិចពិសពុលកាច់កុង ប្រកួតប្រជែងគ្នា ធ្វើយ៉ាងណាឱ្យស្នេហារបស់ខ្លួនបានសម្រេច ហើយតំណែងតួអង្គមួយនេះបានធ្វើឱ្យនាងកំពុងតែមានការព្រួយបារម្ភជាខ្លាំង នៅពេលនាងទទួលបានដំណឹងថា ធ្លាប់មានតារាសម្ដែងមួយចំនួនជួបនឹងបញ្ហាអបិយជំនឿ និងមានវិញ្ញាណចូលសណ្ឋិតពិតប្រាកដមែនទៀតផង។

នាងនិយាយថា «នាងខ្ញុំមានក្ដីព្រួយបារម្ភខ្លាំងណាស់ ព្រោះកន្លងមកនាងខ្ញុំធ្លាប់តែសម្ដែងជាតួអង្គធម្មតា មានចរិតស្លូតបូត មិនមែនជាតួអង្គខ្មោច ដល់បានទទួលសម្ដែងជាតួខ្មោចបែបនេះ នាងខ្ញុំបារម្ភខ្លាចថា ពុំធ្លាប់មានបទពិសោធ និងទេពកោសល្យក្នុងការសម្ដែងជាតួខ្មោចដែលតម្រូវឱ្យនាងខ្ញុំត្រូវសិក្សាយកបទពិសោធ និងតិចនិកបន្ថែម ពីចរិតរបស់ខ្មោចតាមរយៈភាពយន្ដបរទេសនានា »។

អ្វីដែលសំខាន់បំផុតនោះគឺ នាងមានក្ដីបារម្ភខ្លាចមានវិញ្ញាណចូលសណ្ឋិតពិតប្រាកដ ព្រោះកន្លងមកនាងក៏ធ្លាប់ជួបបញ្ហាបែបនេះ នៅពេលនាងទៅកន្លែងទីសក្ការៈបូជានានាម្ដងរួចមកហើយ។ កញ្ញា ឌី លីណា បញ្ជាក់ផងដែរថា «កន្លងមកខ្លួនខ្ញុំផ្ទាល់ធ្លាប់មានវិញ្ញាណចូលសណ្ឋិតពិតប្រាកដម្ដងរួចមកហើយ គ្រាន់តែវិញ្ញាណនោះជាវិញ្ញាណល្អ មិនមែនអាក្រក់។ ទោះជាយ៉ាងក៏ដោយ ក៏ខ្ញុំចេះតែបារម្ភខ្លះៗដែរ ខណៈពេលថតរឿងជាតួអង្គខ្មោចបែបនេះ ដូច្នោះហើយទើបនៅពេលថតម្ដងៗ ខ្ញុំត្រូវតែធ្វើការបន់ស្រន់ម្ចាស់ទឹកម្ចាស់ដី គ្រូបាធ្យាយជាមុន។ ហើយនាងខ្ញុំសង្ឃឹមថា វានឹងមិនមានរឿងអ្វីកើតឡើងនៅពេលថតឡើយ»៕

November 16, 2017

វត្តមានក្រុមហ៊ុនសម្លៀកបំពាក់ម៉ាកល្បីៗនៅកម្ពុជា នឹងធ្វើឱ្យវិស័យកាត់ដេរកាន់តែល្អប្រសើរ

ភ្នំពេញ៖ ទោះបីជាកម្ពុជាជិតផុតកូតានាំសម្លៀកបំពាក់ដោយមិនបាច់បង់ពន្ធចេញទៅលក់នៅលើទីផ្សារអឺរ៉ុបក៏ដោយ ប៉ុន្តែការងារក្នុងវិស័យនេះនឹងមិនធ្លាក់ចុះនោះទេ ហើយថែមទាំងមានភាពល្អប្រសើរឡើងទៀតផង ដោយសារតែមានក្រុមហ៊ុនសម្លៀកបំពាក់ម៉ាកល្បីៗនៅលើពិភពលោកស្នើសុំមកពីពង្រីកក្រុមហ៊ុននៅកម្ពុជា។

លោកបណ្ឌិត Frank Hoffer ប្រធានប្រតិភូតំណាងក្រុមហ៊ុនសម្លៀកបំពាក់ម៉ាកល្បីៗលើពិភពលោក និងក្រុមហ៊ុនលក់រាយក្នុងវិស័យវាយនភណ្ឌ និងកាត់ដេរ កាលពីរសៀលម្សិលមិញនេះ បានស្នើឱ្យមានកិច្ចសហប្រតិបត្តិការកាន់តែរឹងមាំ និងកិច្ចពិភាក្សាឱ្យកាន់តែច្រើន រវាងប្រតិភូ ACT (Action, Collaboration, Transformation) ជាមួយក្រសួងពាណិជ្ជកម្ម និងភ្នាក់ងារពាក់ព័ន្ធដទៃទៀតក្នុងវិស័យកាត់ដេរ និងវាយនភណ្ឌកម្ពុជា។ សំណើនេះត្រូវបានធ្វើឡើងក្នុងឱកាសដែលលោកបណ្ឌិតដឹកនាំតំណាងក្រុមហ៊ុន H&M, Next, C&A, Debenhams, Inditex, Kmart-Australia, Primark និង IndustriALLចូលជួបពិភាក្សាជាមួយឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្មដើម្បីស្វែងយល់ពីដំណើរវិវឌ្ឍន៍ថ្មីៗនៅក្នុងវិស័យកាត់ដេរ និងវាយនភណ្ឌកម្ពុជា។

លោកបណ្ឌិត Frank Hoffer បានកោតសរសើរចំពោះកំណែទម្រង់នានា និងបានស្នើសុំការគាំទ្រពីក្រសួងពាណិជ្ជកម្មដើម្បីបង្កើតសិក្ខាសាលានានា ដោយមានការចូលរួមពីភាគីក្រសួងពាណិជ្ជកម្ម អ្នកបញ្ជាទិញ (Buyers) សហជីព និងរោងចក្រដើម្បីប្រមូលធាតុចូលថ្មីៗសំដៅរៀបចំយុទ្ធសាស្ត្រសម្រាប់អភិវឌ្ឍវិស័យនេះ។ លោកបណ្ឌិតក៏បានស្នើឱ្យមានការថ្លឹងថ្លែង រវាងការបង្កើនប្រាក់ឈ្នួលអតិបរមា និងផលិតភាពការងាររបស់កម្មករ-កម្មការិនីដើម្បីចៀសវាងធ្វើឱ្យភាគីណាមួយរងគ្រោះ ដោយសារគោលនយោបាយកំណត់ប្រាក់ឈ្នួល។

ក្នុងជំនួបនោះឯកឧត្តម ឱក ប៊ុង បានគូសបញ្ជាក់ថា កន្លងមកកម្ពុជាទទួលបានផលចំណេញតិចតួចពីវិស័យកាត់ដេរ ដោយសារបញ្ហាកង្វះខាតបច្ចេកវិទ្យារួមជាមួយខ្សែចង្វាក់តម្លៃសម្រាប់វិស័យនេះនៅមានកម្រិតទាប។ ឯកឧត្តមរដ្ឋលេខាធិការបានស្នើឱ្យក្រុមហ៊ុនបញ្ជាទិញ (Buyers) ចូលរួមធ្វើការវិនិយោគ និងផ្ទេរនូវបច្ចេកវិទ្យាថ្មីៗសម្រាប់វិស័យនេះ ដើម្បីធ្វើឱ្យកម្ពុជាមានលទ្ធភាពផលិតគ្រប់គ្រាន់តាំងពីការកែច្នៃវត្ថុធាតុដើម រហូតដល់ផលិតផលសម្រេច ដើម្បីនាំចេញទៅកាន់ទីផ្សារអន្តរជាតិ។

ហើយខាងភាគីក្រសួងមានការចាប់អារម្មណ៍ចំពោះគំនិតផ្តួចផ្តើមរបស់លោកបណ្ឌិត Frank Hoffer ក្នុងការពង្រឹងកិច្ចសហប្រតិបត្តិការរវាងភាគីពាក់ព័ន្ធក្នុងវិស័យកាត់ដេរ និងវាយនភណ្ឌនៅក្នុងប្រទេសកម្ពុជា និងបានស្នើឱ្យមានការពិភាក្សាបន្ថែមលើប្រធានបទនេះនៅក្នុងជំនួបលើកក្រោយ ដើម្បីឈានទៅដល់ការសម្រេចតាមគោលដៅក្នុងពេលខាងមុខឆាប់៕

November 16, 2017

អ៊ីតាលី បណ្តេញលោក Ventura ក្រោយខកខានការឈ្នះកៅអីទៅ World Cup

សហព័ន្ធកីឡាបាល់ទាត់អ៊ីតាលី បានបណ្តេញលោក Gian Piero Ventura ចេញពីតំណែងអ្នកចាត់ការទូទៅ ក្រោយពីបានរងបរាជ័យទាំង2ជើងក្នុងលទ្ធផល 1-០ ក្រោមស្នាដៃក្រុមជម្រើសជាតិស៊ុយអែត ក្នុងការប្រកួតជម្រុះ World Cup វគ្គ Playoff ដែលបានធ្វើឲ្យក្រុមម្ចាស់ជើងឯកពិភពលោក4សម័យកាលមួយនេះ ខកខានក្នុងការឈានទៅជុំផ្តាច់ព្រ័ត្រ ជាលើកទី1ក្នុងរយៈពេល60ឆ្នាំ។

ក្នុងសេចក្តីថ្លែងការណ៍មួយកាលពីរាត្រីថ្ងៃពុធ សហព័ន្ធកីឡាបាល់ទាត់អ៊ីតាលី បានប្រកាសថា រជ្ជកាលនៃការដឹកនាំរយៈពេល16ខែរបស់លោក Ventura បានបញ្ចប់ហើយ។ សហព័ន្ធកីឡាបាល់ទាត់អ៊ីតាលី បានឲ្យដឹងបន្ទាប់ពីកិច្ចប្រជុំមួយថា៖ «ក្នុងចំណុចទីមួយនៃរបៀបរបស់យើង លោក Carlo Tavecchio ដែលជាប្រធានសហព័ន្ធ បានធ្វើការពិភាក្សាទៅលើការសម្រេចចិត្តមួយរបស់គណៈកម្មការដឹកនាំ ហើយចាប់ពីពេលនេះតទៅ លោក Gian Piero Ventura លែងជាគ្រូបង្វឹកនៃក្រុមជម្រើសជាតិទៀតហើយ»។ លោក Ventura វ័យ69ឆ្នាំ បាននិយាយបន្ទាប់ការប្រកួតជាមួយនឹងក្រុមស៊ុយអែតថា៖«ខ្ញុំសុំអភ័យទោសសម្រាប់លទ្ធផលនេះ ប៉ុន្តែ មិនមែនសម្រាប់ការខិតខំព្យាយាម និងការការពារដ៏លំបាកនោះឡើយ។ ខ្ញុំដឹងថា លទ្ធផលនេះពិតជារឿងដ៏សំខាន់បំផុត»។

ការសម្រេចចិត្តក្នុងការជ្រើសរើសគ្រូបង្វឹកថ្មីម្នាក់មកជំនួសកន្លែងរបស់លោក Ventura មិនទាន់ត្រូវបានធ្វើឡើងនៅឡើយ ខណៈដែលលោក Tavecchio បានប្រាប់អ្នកយកព័ត៌មានបន្ទាប់ពីកិច្ចប្រជុំថា សហព័ន្ធកីឡាបាល់ទាត់អ៊ីតាលី កំពុងតែធ្វើការពិចារណាទៅលើ «គ្រូបង្វឹកសំខាន់» ដើម្បីជំនួសលោក Ventura។ លោក Carlo Ancelotti ដែលអស់ការងារធ្វើចាប់តាំងពីត្រូវបានបណ្តេញចេញដោយក្លិប Bayern Munich កាលពីដើមរដូវកាលនេះ គឺជាបេក្ខភាពឈានមុខគេក្នុងការចូលកាន់តំណែងនេះ៕

ប្រភពពី៖ The Guardian

November 16, 2017

ចំណុចល្អ និងចំណុចមិនល្អរបស់ការមានកូនពេលអាយុច្រើន

ក្នុងពេលបច្ចុប្បន្ននេះមានស្ត្រីចំនួន1ភាគ5 ដែលពន្យារការមានគភ៌ទៅដល់អាយុ35ឆ្នាំឡើងនិងចំនួនស្ត្រីដែលមានកូនក្នុងវ័យ40ឆ្នាំបានកើនឡើងទ្វេដងខុសកាលពី20ឆ្នាំមុន។ ការកើនឡើងនៃចំនួនស្ត្រីដែលយកកូនបែបនេះ ធ្វើឱ្យកើតមានជាសំណួរមួយឡើងថា តើអាយុប៉ុន្មានទើបហៅថា ចាស់ហួសនឹងមានកូន? ហើយតើការមានកូននៅពេលអាយុច្រើន មានចំណុចល្អ និងមិនល្អយ៉ាងណាខ្លះ? ឡារ៉ែន មានចម្លើយសម្រាប់សំណួរនេះមកជូនមិត្តអ្នកអាននៅពេលនេះ…។

ចំណុចល្អនៃការមានកូននៅពេលអាយុច្រើន
-មានប្រាក់ចំណូលច្រើនឡើង និងស្ថិតស្ថេរហើយ។
-យល់ដឹងពីការមើលថែទាំសុខភាពច្រើនឡើងហើយ។
-អាយុច្រើន ចេះគិតគូរបានច្រើនឡើងហើយ។
-ចេះដំណើរការជីវិតយ៉ាងប្រយ័ត្នប្រយែងខ្លាំងឡើងហើយ។
-មានអារម្មណ៍ថា ត្រៀមខ្លួនជាស្រេចក្នុងការធ្វើជាម្ដាយគេរួចរាល់ហើយ។
-មានការសោកស្ដាយតិចបំផុត នៅពេលដែលបាត់បង់សេរីភាព ឬការស្វែងរកភាពកម្សាន្តសប្បាយ (មិនអាចដើរលេងបានតាមចិត្ត ព្រោះមានកូនត្រូវមើលថែ)។
-មានភាពរឹងមាំឡើង និងដឹងពីតួនាទីនៃភាពជាម្ដាយ។
-ចិត្តធ្ងន់ និងអាចចាត់ការភាពរញ៉េរញ៉ៃ វីវក់បានយ៉ាងមានស្មារតីនឹងនរ។

ចំណុចមិនល្អនៃការមានកូនពេលអាយុច្រើន
-មិនសូវមានកម្លាំងលេងជាមួយកូន ឬដេញតាមចាប់កូន។
-មិនមានឱកាសបានឃើញដំណើរជីវិតរបស់កូននៅវ័យកណ្ដាលមនុស្ស។
-មិនមានឱកាសបានជួយមើលថែចៅ។
-ក្មេងខ្លះខ្មាសមិត្តភក្តិដែលខ្លួនមានឪពុកម្ដាយជាមនុស្សចាស់។
– អាចនឹងពិបាកមានកូន ឬប្រើពេលវេលាយូរទម្រាំនឹងមានកូនតាមវិធីធម្មជាតិ ព្រោះឱកាសក្នុងការតាំងគភ៌ក្នុងវ័យ30ឆ្នាំឡើងគឺ ប្រមាណ25% ចំណែកក្នុងវ័យ40ឆ្នាំឡើងឱកាសតាំងគភ៌ថយចុះមកនៅត្រឹមតែ5%ប៉ុណ្ណោះ។
-អ្នកដទៃនឹងច្រឡំហៅអ្នកថាជាលោកយាយច្រើនជាងហៅថា ម្ដាយរបស់កូន៕

November 16, 2017

ត្រកួន មិនត្រឹមតែជាបន្លែ តែជាឱសថបុរាណដ៏ពូកែ

ត្រកួន គឺជាបន្លែពេញនិយមមួយប្រភេទ ដែលប្រជាជនខ្មែរយើងយកមកចម្អិនជាម្ហូបអាហារជាច្រើនមុខ ហើយក្រៅពីជាបន្លែហើយនោះ ត្រកួនក៏ជាឱសថបុរាណមួយប្រភេទដែលអាចព្យាបាលជំងឺបានជាច្រើនមុខ ដែលយើងមិនធ្លាប់បានដឹងពីមុនមក។ គុណប្រយោជន៍របស់ត្រកួនមានដូចខាងក្រោមនេះ៖

1- ការពារជំងឺហើមពោះ ៈ ត្រកួនជាប្រភពរបស់ជាតិសរសៃច្រើនបំផុត វាមានប្រសិទ្ធភាពជាថ្នាំរលាយកាកសំណល់ទន់ៗ ជួយឱ្យការបន្ទោបង់បានងាយស្រួល។ វាជួយការពារ និងព្យាបាលជំងឺទល់លាមក ហើមពោះ និងជួយកាត់បន្ថយហានិភ័យនៃការកើតជំងឺឫសដូងបាតបាន ពោលគឺ ការទទួលទានបន្លែត្រកួនជាប្រចាំថ្ងៃ នឹងជួយសម្អាតរាល់កាកសំណល់ និងជាតិពុលដែលធ្លាក់ទៅក្នុងពោះវៀនតូចឱ្យចេញមកក្រៅ ហើយជួយស្រូបយកសារធាតុចិញ្ចឹមដល់រាងកាយបានយ៉ាងល្អប្រសើរថែមទៀតផង។

2- ជំនួយភ្នែក ៈ ជាបន្លែដែលមានវីតាមីន A ច្រើន ជំនួយដល់ភ្នែក និងប្រស្រីភ្នែក ហើយមានគុណសម្បត្តិជួយដល់ប្រព័ន្ធប្រសាទ ធ្វើឱ្យអ្នកមានអារម្មណ៍ស្រស់ស្រាយ បំបាត់ភាពនឿយហត់ និងគេងលក់ស្រួល។

3- សម្រួលដំណេក ៈ នៅក្នុងត្រកួនមានសារធាតុ Selenium និងស័ង្កសី ដែលជួយឱ្យប្រព័ន្ធប្រសាទរបស់អ្នកបានសម្រាក ហើយធ្វើឱ្យអ្នកឆាប់គេងលក់ថែមទៀតផង។

4- ជំនួយគ្រាប់ឈាម ៈ ត្រកួនមានធាតុដែក ជាសារធាតុចិញ្ចឹមដែលមានសារសំខាន់ចំពោះប្រព័ន្ធឈាម និងចលនារបត់ឈាម វាជួយបង្កើតអេម៉ូក្លូប៊ីននៅក្នុងឈាម ទើបអាចការពារជំងឺអប្បលោហិតបានផងដែរ។

5- ជួយលាងជាតិពុលនៅក្នុងខ្លួន ៈ ត្រកួននៅមានគុណប្រយោជន៍ជួយលាងសារជាតិពុលក្នុងរាងកាយដូចជាថ្លើមជាដើម ព្រមទាំងជាសារធាតុពួករ៉ាឌីកាល់សេរី ដែលជួយការពារកោសិកាមិនឱ្យទទួលរងនូវការបំផ្លាញ ហើយជួយការពារថ្លើមថែមទៀតផង។

6- បន្ថយជាតិស្ករនៅក្នុងឈាម ៈ បច្ចុប្បន្ននេះមានការស្រាវជ្រាវរកឃើញថា ត្រកួនមានសារធាតុស្រដៀងនឹង Insulin ដែលមានសមត្ថភាពជួយកាត់បន្ថយជាតិស្ករនៅក្នុងឈាម និងជួយបន្ថយការស្រូបយកសារធាតុចិញ្ចឹមរបស់ក្លុយកូសនៃរាងកាយបាន។ ដូច្នេះអ្នកជំងឺទឹកនោមផ្អែម គួរតែទទួលទានត្រកួនជារៀងរាល់ថ្ងៃ ដើម្បីជួយកាត់បន្ថយជាតិស្ករនៅក្នុងឈាម។

7- ជួយសម្រកទម្ងន់ ៈ ជាប្រភេទបន្លែពណ៌បៃតង ដែលជាអាហារសម្រកទម្ងន់ដែលទទួលបានលទ្ធផលល្អជាទីគាប់ចិត្ត វាមានបរិមាណអាហារសរសៃច្រើន មានកាល់ឡូរីទាប ទទួលទានហើយឆ្អែតបានថែមទៀតផង។

8- បញ្ចុះជាតិកូឡេស្តេរ៉ូល ៈ អាហារសរសៃ និងវីតាមីន ដែលមាននៅក្នុងត្រកួន ជាផ្នែកមួយដែលសំខាន់បំផុតក្នុងការបន្ថយសារជាតិកូឡេស្តេរ៉ូល និងទ្រីគ្លីសេរីដ (ខ្លាញ់អាក្រក់) ក្នុងរាងកាយបាន ទើបវាបានហុចផលល្អសម្រាប់ប្រព័ន្ធសរសៃឈាម និងបេះដូង។

9- ការពារជំងឺបេះដូង និងសរសៃឈាម ៈត្រកួនមានវីតាមីន A, វីតាមីន C, Beta និង Carotene ដែលជួយប្រឆាំងអ៊ុកស៊ីតកម្ម ហើយការពារកោសិកា ជួយកាត់បន្ថយសារជាតិកូឡេស្តេរ៉ូលការពារការកើតជំងឺបេះដូង គាំងបេះដូង និងជំងឺដាច់សរសៃឈាមខួរក្បាល។ ក្រៅពីនោះ វាមានសារធាតុដែកមានសារសំខាន់ក្នុងការបង្កើតឈាមក្រហម និងមានម៉ាញ៉េស្យូមជួយកាត់បន្ថយសម្ពាធឈាមដែលជួយការពារមិនឱ្យកើតជំងឺបេះដូង។

10- ការពារជំងឺមហារីក ៈ នៅក្នុងត្រកួនមានសារធាតុចិញ្ចឹមជាង13ប្រភេទ ដែលវាប្រឆាំងអុកស៊ីតកម្ម និងការពារកោសិកាមិនឱ្យកើតជំងឺមហារីក ជាពិសេសជំងឺមហារីកពោះវៀនធំ ក្រពះ ស្បែក និងមហារីកសុដន់ជាដើម៕

November 16, 2017

អស្ចារ្យ!! ក្រុមបាល់ទាត់តារាកម្ពុជា “Mohahang All Star” ត្រៀមខ្លួនប៉ះជាមួយក្រុមតារាថៃ

ថ្មីៗនេះ នាឱកាសពិសេសនៃការសម្ពោធក្រុមបាល់ទាត់តារាមហាហង្សដែលបានប្រកាសឈ្មោះជាផ្លូវការថា “Mohahang All Star Football Team” ជាក្រុមដែលប្រមូលផ្ដុំដោយតារាសម្ដែង និងក្រុមការងារបច្ចេកទេសផ្នែកសិល្បៈ ក្រោមវត្តមានកិត្តិយសពី លោក អ៊ិន សុភិន អគ្គនាយកផលិតកម្មមហាហង្ស និងក្រុមពាណិជ្ជករថៃពីបណ្តាក្រុមហ៊ុនជាច្រើនៗ រួមទាំងវត្តមានក្រុមតារាប្រុស-ស្រីជាច្រើនទៀត។

នៅក្នុងពិធីខាងលើនេះលោក អ៊ិន សុភិន បានប្រកាសនៅមុខក្រុមអ្នកសារព័ត៌មានថា គោលបំណងដែលជំរុញឲ្យលោកសម្រេចបង្កើតក្រុមបាល់ទាត់ជាផ្លូវការនៅពេលនេះ ព្រោះលោកចង់ផ្ដល់ឱកាសឲ្យក្រុមតារាៗ និងក្រុមការងារបច្ចេកទេសផ្សេងៗ ដែលនិយមចូលចិត្តលេងកីឡាបាល់ទាត់មួយនេះ ទើបលោកបង្កើតឱ្យមានជាក្រុមលេងច្បាស់លាស់ និងមានការប្រកួតត្រឹមត្រូវ សមស្របទៅតាមក្បួនច្បាប់ប្រកួតជាលក្ខណៈអន្ដរជាតិឡើង។

លើសពីនេះ លោកក៏បានបង្ហាញពីក្ដីរំពឹងវែងឆ្ងាយពីការបង្កើតក្រុមមួយនេះផងដែរ។ តែជំហានដំបូង លោកគ្រោងនឹងទទួលស្វាគមន៍គ្រប់ការប្រកួតមិត្តភាពទាំងអស់ មិនថាក្រុមតារាល្បីៗ ស្ថាប័នរដ្ឋ ឬឯកជនឡើយ ពោលគឺអាចចូលរួមប្រកួតយកពានសមល្មមមួយ ដើម្បីជាបទពិសោធឆ្ពោះទៅចូលលេងជាមួយក្រុមពាក់កណ្ដាលខ្លាំង។

ជាចុងក្រោយម្ចាស់ផលិតកម្ម មហាហង្សរូបនេះក៏បានបញ្ជាក់ប្រាប់ថា «នៅដើមឆ្នាំ2018ខាងមុខនេះ ផលិតកម្មមហាហង្ស នឹងរៀបចំព្រឹត្តិការណ៍ដ៏អស្ចារ្យមួយទៀតគឺ ការប្រកួតមិត្តភាពរវាងក្រុមបាល់ទាត់តារាមហាហង្ស និងក្រុមតារាល្បីៗប្រចាំប្រទេសថៃ នៅលើទឹកដីកម្ពុជា ហើយជាបន្ដបន្ទាប់ លោកក៏មានគម្រោងណាត់ក្រុមតារាល្បីៗរបស់វៀតណាម ឡាវ និងក្រុមតារាក្នុងតំបន់ មកចូលរួមប្រកួតមិត្តភាពនៅកម្ពុជាទៀតផង»៕

November 16, 2017

Category: សង្គម និងសេដ្ឋកិច្ច