សង្គម និងសេដ្ឋកិច្ច - La Reine Media

Aguero រឹងមាំក្នុងការចូលលេងឲ្យ Man City ក្រោយមានបញ្ហាសុខភាព

Sergio Aguero ពិតជារីករាយក្នុងការបង្ហាញខ្លួនឲ្យក្រុម Manchester City នៅលើទឹកដីក្រុម Leicester City ក្នុងការប្រកួតក្របខ័ណ្ឌ Premier League នៅថ្ងៃសៅរ៍នេះ បើទោះបីមានការបារម្ភពីបញ្ហាសុខភាពក្នុងពេលបំពេញកាតព្វកិច្ចអន្តរជាតិក៏ដោយ។

ខ្សែប្រយុទ្ធរូបនេះត្រូវបានបញ្ជូនទៅកាន់មន្ទីរពេទ្យ ដើម្បីការពារទុកជាមុន ក្រោយពីត្អូញត្អែរពីការវិលមុខ ខណៈដែលក្រុមបាល់ទាត់ជម្រើសជាតិអាហ្សង់ទីន បានចាញ់ក្រុមជម្រើសជាតិនីហ្សេរីយ៉ា 4-2 ក្នុងការប្រកួតមិត្តភាពនៅទីក្រុង Krasnodar របស់រុស្ស៊ី កាលពីថ្ងៃអង្គារ។ Man City បានធ្វើការច្រានចោលព័ត៌មានដែលថា Aguero សន្លប់បាត់ស្មារតី ក្រោយពីការអស់កម្លាំងខ្លាំង ដោយបានបញ្ជាក់ថា រូបគេថែមទាំងអាចចាកចេញពីកីឡដ្ឋាន ដោយមិនត្រូវការជំនួយទៀតផង។ រូបគេបានវិលទៅកាន់ទីក្រុង Manchester វិញដើម្បីធ្វើការត្រួតពិនិត្យសុខភាពបន្ថែមទៀត កាលពីថ្ងៃពុធ ស្របពេលដែលឈាមមួយដំណក់ក្នុងសម្ពាធឈាមរបស់គេត្រូវបានគេជឿជាក់ថា ជាដើមហេតុដែលធ្វើឲ្យគេធ្លាក់ខ្លួនឈឺ។ លោក Pep Guardiola ដែលជាអ្នកចាត់ការទូទៅ បានតាមដានការត្រួតពិនិត្យយ៉ាងយកចិត្តទុកដាក់ទៅលើ Aguero ចាប់តាំងពីពេលនោះមក ប៉ុន្តែ រូបគេបានចូលរួមហ្វឹកហាត់ជាមួយនឹងមិត្តរួមក្រុមរបស់ខ្លួនកាលពីថ្ងៃព្រហស្បតិ៍ និងថ្ងៃសុក្រនេះ ហើយត្រូវបានរំពឹងទុកថា នឹងចូលលេងនៅកីឡដ្ឋាន King Power។ Aguero បានស្ថិតក្នុងទម្រង់លេងយ៉ាងល្អឥតខ្ចោះ នៅមុនពេលសម្រាកសម្រាប់ការប្រកួតអន្តរជាតិ ដោយរកបាន10គ្រាប់ពីការប្រកួត12លើកសម្រាប់ក្លិបរបស់គេ ខណៈដែល Man City បានទទួលជ័យជម្នះ16លើកពីការប្រកួត17លើកក្នុងរាល់យុទ្ធនាការទាំងអស់ នៅរដូវកាលនេះ។

Man City កំពុងតែស្ថិតក្នុងទម្រង់លេងយ៉ាងរឹងមាំ ដោយបានកក់កៅអីរួចជាស្រេចក្នុងក្របខ័ណ្ឌ Champions League វគ្គ16ក្រុមចុងក្រោយ តាមរយៈការផ្តួល Napoli 4-2 មុនពេលផ្តួលក្រុម Arsenal 3-1 ដើម្បីធ្វើឲ្យពួកគេនាំមុខ8ពិន្ទុដាច់លើតារាង Premier League។ ការប្រកួតនេះនឹងចាប់ផ្តើមនៅម៉ោង10យប់៕

ប្រភពពី៖ Sky Sports

November 17, 2017

តោខៀវ Chelsea រីករាយចំពោះការធ្វើដំណើរទៅជួប West Brom ថ្ងៃសៅរ៍នេះ

ក្រុមតោខៀវ Chelsea អាចនឹងទុកការចាប់ផ្តើមដ៏ខកចិត្តចំពោះការការពារពាន Premier League របស់ខ្លួនមួយឡែក តាមរយៈការបន្តកំណត់ត្រាឈ្នះរបស់ពួកគេនៅលើទឹកដីក្រុម West Bromwich Albion នៅថ្ងៃសៅរ៍នេះ។

ក្រុមរបស់លោក Antonio Conte កំពុងតែដេញតាមពីក្រោយក្រុម Manchester City រហូតដល់ទៅ9ពិន្ទុ ក្រោយពីការប្រកួត11លើក។ ប៉ុន្តែ ក្រុមម្ចាស់ការពារតំណែងជើងឯកមួយនេះ បានឈ្នះរាល់ការប្រកួតលីកទាំង4លើកចុងក្រោយរបស់ពួកគេ ហើយអាចនឹងឡើងចេញពីចំណាត់ថ្នាក់លេខ4 ទៅកាន់ចំណាត់ថ្នាក់លេខ2 ប្រសិនបើក្រុម Manchester United និង Tottenham ដែលកំពុងតែឈរពីលើពួកគេ មិនអាចដណ្តើមបានជ័យជម្នះពីការប្រកួតរបស់ពួកគេ។ លោក Conte បានឃើញក្រុមរបស់លោករងបរាជ័យយ៉ាងខកចិត្តក្រោមស្នាដៃក្រុម Roma ក្នុងក្របខ័ណ្ឌ Champions League កាលពីចុងខែមុន ប៉ុន្តែ ការយកឈ្នះលើក្រុម Manchester United 1-០ ក្នុងការប្រកួតក្របខ័ណ្ឌ Premier League បានបង្ហាញថា មិនមានការខកចិត្តដ៏ធំពីប្រទេសអ៊ីតាលី នៅតែកើតឡើងក្នុងក្រុមមួយនេះទៀតឡើយ។ ស្របពេលជាមួយគ្នានេះ ខ្សែបម្រើស្លាប Victor Moses ក៏បានគិតបែបនោះផងដែរ។ Moses បានឲ្យដឹងថា៖ «ក្នុងនាមជាក្រុមមួយ ទោះបីជាមានអ្វីកើតឡើងក៏ដោយ ក៏យើងនៅតែស្ថិតនៅជាមួយគ្នា និងធ្វើឲ្យបានល្អបំផុតតាមដែលយើងអាច។ មនុស្សជាច្រើនមិនមានការរីករាយ ប៉ុន្តែ យើងមិនត្រូវគិតពីបញ្ហានោះ ឬផ្តោតលើអ្វីដែលមនុស្សជាច្រើនកំពុងតែនិយាយឡើយ»។

ខ្សែបម្រើរូបនេះបានបន្ថែមទៀតថា៖ «ការរិះគន់ទាំងនេះ គឺជាប្រភេទនៃកត្តាដែលធ្វើឲ្យកីឡាករម្នាក់ៗកាន់តែរឹងមាំ។ យើងដឹងថា យើងត្រូវតែជឿជាក់លើខ្លួនយើង និងបង្ហាញឲ្យពួកគេឃើញថា ពួកគេកំពុងតែយល់ខុស។ យើងមានសាមគ្គីភាព100ភាគរយ។ យើងដូចជាបងប្អូនអ៊ីចឹងនៅទីនេះ»។ ការប្រកួតនេះនឹងចាប់ផ្តើមនៅម៉ោង10យប់៕

ប្រភពពី៖ sports.yahoo.com

November 17, 2017

ចម្លើយ8យ៉ាងដែលអ្នកនឹងបានទទួល ពេលប្រាប់ឱ្យកូនប្រមូលរបស់លេងទុក

ពេលនេះកូនរបស់អ្នកអាយុប៉ុន្មានហើយ? ធំល្មមនឹងចេះសម្អាតផ្ទះ ឬប្រមែប្រមូលរបស់លេងរបស់ខ្លួនឯងឱ្យមានរបៀបរៀបរយហើយឬនៅ? ជាប្រក្រតី យើងត្រូវបង្ហាត់បង្រៀនកូនឱ្យចេះប្រមូលទុកដាក់របស់លេង ឬរបស់របរខ្លួនឯងនៅពេលដែលគេមានអាយុប្រមាណ18ខែឡើងទៅ ព្រោះក្មេងក្នុងវ័យនេះងាយស្ដាប់បង្គាប់ និងយល់ពីពាក្យបញ្ជាបានហើយ។ បើយើងឆាប់ចាប់ផ្ដើមបង្រៀនកូន កូននឹងស៊ាំធ្លាប់នឹងការប្រមូលទុកដាក់របស់របរ តែបើចាប់ផ្ដើមបង្ហាត់បង្រៀនកូនពេលគេធំហើយ វានឹងក្លាយជាបញ្ជាដែលកូនមិនចង់ធ្វើតាម នៅពេលនោះតើអ្នកចង់ដឹងទេថា ពេលអ្នកបញ្ជាឱ្យកូនបោសសម្អាត ឬប្រមូលទុកដាក់របស់លេង តើអ្នកនឹងបានជួបនឹងទង្វើ ឬចម្លើយបែបណាខ្លះ?

1 ការតវ៉ា ៈ “កូនសុំប្រមូលរបស់លេងក្រោយពេលញ៉ាំបាយល្ងាចហើយបានទេ? ពេលនេះកូនហត់ខ្លាំងណាស់” នេះគឺការតវ៉ា ហើយចុងក្រោយ គឺអត់ប្រមូលទុកនោះទេ។
2 រង់ចាំមួយភ្លែតសិន ៈ “ចាំឱ្យកូនធ្វើត្រង់នេះឱ្យរួចសិន ចាំឱ្យកូនបាត់ហត់បន្តិចសិន ចាំបន្តិចកូននឹងត្រឡប់ទៅលេងទៀតហើយ”។
3 ធ្វើព្រងើយ ៈ អត់ប្រមូល អត់ធ្វើ អត់បដិសេធ ធ្វើកិច្ចការងារផ្សេងតទៀតយ៉ាងព្រងើយ ទីបំផុតអ្នកម្តាយធុញរំខាន ខ្ជិលចាំ ក៏ប្រមូលទុកដាក់ខ្លួនឯងទៅ។
4 បន្តិចទៀតប្រមូល ៈ ទីបំផុតក៏អត់ប្រមូលទុក ងងុយគេង ឡើងទៅបន្ទប់គេងបាត់ហើយចា៎ស។
5 កំពុងតែលេង ៈ បើកូនកំពុងតែលេងរបស់លេងច្រើនមុខកុំអាលឱ្យកូនប្រមូលទុកដាក់អី ព្រោះកូនច្បាស់ជាមិនព្រមប្រមូលទុកដាក់របស់លេងទាំងនោះជាដាច់ខាត ព្រោះគេនឹងមានអារម្មណ៍ថា កំពុងត្រូវបង្អាក់ការលេងសប្បាយរបស់គេ។

6 អត់! ៈ (ភាគច្រើនជាក្មេងដែលមានអាយុប្រមាណជា2ឆ្នាំដែលចូលចិត្តនិយាយពាក្យនេះ) អ្នកម្ដាយនឹងជួបចម្លើយបដិសេធភ្លាមតែម្ដង តែនេះគឺជាវិវឌ្ឍនាការរបស់ក្មេងក្នុងវ័យនេះ។
7 សុំលេងឱ្យអស់ចិត្តសិន ហើយនឹងប្រមូលទុក ៈ សន្យាថា នឹងប្រមូលទុកដាក់ឱ្យស្អាតបាតក្រោយលេងរួច ឬប្រើការរួច តែចុងក្រោយក៏មិនបានធ្វើ…។
8 ច្រើនតែសុំដូរដោះដោយអ្វីម្យ៉ាង ៈដូចជា បើប្រមូលរបស់លេងទុកសុំដូរជាមួយអៃស្គ្រីម ឬបានអង្គុយមើលរឿងតុក្កតា។ បើជារឿងទាំងអស់ហ្នឹង អ្នកម្ដាយក៏គួរតែឱ្យបាន។អាចរាប់បានថា ជាលក្ខខណ្ឌដូរដោះ ដែលកូននឹងបានរៀនយល់ដឹងថា គ្មានអ្វីមួយដែលនឹង
បានមកដោយស្រួលទេ។

បើអ្នកម្ដាយចង់ឱ្យកូនចេះប្រមូលរៀបចំទុកដាក់របស់លេង ឬរបស់ប្រើប្រាស់ផ្សេងៗរបស់ខ្លួនឯងឱ្យមានរបៀប មានភាពទទួលខុសត្រូវ មិនចាំបាច់ប្រាប់នោះ អ្នកម្ដាយត្រូវបង្ហាត់បង្រៀនឱ្យកូនចេះធ្វើតាំងពីនៅតូចៗ ព្រោះពេលនៅតូចកូននឹងមិនតវ៉ា ឬតតាំងឡើយ តែដល់ធំឡើងបន្តិច សឹមចាប់ផ្ដើមដាក់លក្ខខណ្ឌជាមួយរឿងនេះ ដូចជាមានរង្វាន់ឱ្យជាដើម ដើម្បីកូននឹងបានស៊ាំធ្លាប់ ហើយនឹងធ្វើដោយខ្លួនឯងដោយមិនបាច់ត្រូវប្រាប់តទៅទៀតឡើយ៕

November 17, 2017

Justin Bieber និង Selena Gomez គ្រោងទិញផ្ទះតម្លៃរាប់លានដុល្លារនៅរដ្ឋ California

នៅថ្ងៃទី17 ខែវិច្ឆិកា ឆ្នាំ2017 បើតាមសារព័ត៌មាន keng14 បានចេញផ្សាយឱ្យដឹងថា នាប៉ុន្មានសបា្ដហ៍មុននេះតារាចម្រៀង Justin Bieber និង Selena Gomez បានបង្ហើបប្រាប់សារព័ត៌មានបរទេសថា អ្នកទាំងពីរគ្រោងនឹងទិញផ្ទះប្រណីតមួយដែលមានតម្លៃរាប់លានដុល្លារសហរដ្ឋអាមេរិក ស្ថិតនៅក្នុងតំបន់មួយក្នុងរដ្ឋ California ដើម្បីចំណាយពេលវេលាដ៏មានន័យ រស់នៅជុំគ្នាជារៀងរហូត។

នៅក្នុងនេះ បើយើងមើលតាមការចេញផ្សាយរបស់ទស្សនាវដ្ដីល្បីមួយរបស់អាមេរិក ក៏បានឱ្យដឹងបន្ថែមដែរថា តារាពីរដួងនេះព្យាយាមបំពេញការរស់នៅតាមលក្ខណៈសាមញ្ញៗ និងសម្របខ្លួនតាមធម្មជាតិ ពោលគឺ ពួកគេចូលចិត្តទៅតំបន់ឆ្ងាយៗ ហើយមានធម្មជាតិខៀវស្រស់ត្រកាល។ ប្រភពស្និទ្ធនឹងJB ក៏បានអះអាងថា គម្រោងទិញផ្ទះរបស់គេក៏ស្ថិតនៅក្បែរតំបន់ភ្នំផងដែរ។

គួរបញ្ជាក់ដែរថា ថ្មីៗនេះជីវិតឯកជនរបស់ Selena Gomez និង Justin Bieber ហាក់បីដូចជាមានសេចក្ដីសុខខ្លាំងបំផុត ដែលគេបានសង្កេតមើលទៅ ទំនងជានេះគឺជាពេលវេលាចុងក្រោយនៃការថែរក្សាសុខភាពរបស់ Selena Gomez អ៊ីចឹងដែរ។ ក្រុមគ្រួសារ និងមនុស្សជំនិតរបស់ Selena Gomez បានថ្លែងប្រាប់សារព័ត៌មានបរទេសកន្លងមក អំពីទំនាក់ទំនងជាថ្មីជាមួយ Justin Bieber ថា «ពួកយើងចង់ឱ្យនាងខ្លួនឯងមានសុខភាពល្អ ហើយនេះក៏ជាកំហុសដ៏ធ្ងន់មួយនៅក្នុងជីវិតរបស់ពួកយើងផងដែរ អ្វីដែលអាចធ្វើបាន គឺដើម្បីសុខភាពនាង»៕

November 17, 2017

ប្រដាប់ពិនិត្យមើលគភ៌ គឺជាអ្វី តើត្រូវមើលនៅពេលណា និងមានប្រភេទណាខ្លះ?

សម្រាប់នារីៗដែលកំពុងត្រៀមខ្លួនធ្វើជាអ្នកម្ដាយ ឬសង្ស័យថា ខ្លួនឯងប្រហែលជាកំពុងមានគភ៌ និងចង់ពិនិត្យមើលថា ខ្លួនឯងមានគភ៌ ឬមិនមានគភ៌ដោយខ្លួនឯងនោះ មុនគេបង្អស់ប្រហែលជានឹកដល់ “ប្រដាប់ពិនិត្យមើលគភ៌” ហើយមែនទេ? តែទាំងអស់នេះសម្រាប់អ្នកដែលមិនធ្លាប់ប្រើប្រហែលជាមានសំណួរច្រើននៅក្នុងចិត្តជាមិនខានថា អាប្រដាប់ពិនិត្យគភ៌នោះគឺជាអ្វី? មានប៉ុន្មានបែប? និងពិនិត្យឃើញច្បាស់លាស់ប៉ុនណាទៅ?ឥឡូវសរុបថា ដើម្បីឱ្យបងប្អូននារីៗយើងអស់កង្វល់ក្នុងចិត្ត ឡារ៉ែន មានរឿងដែលគួរយល់ដឹងពាក់ព័ន្ធនឹងប្រដាប់ពិនិត្យគភ៌នេះមកជម្រាបជូនដូចតទៅ។

ប្រដាប់ពិនិត្យគភ៌ គឺជាអ្វី?
សម្រាប់ “ប្រដាប់ពិនិត្យគភ៌” ឈ្មោះរបស់វាក៏បានប្រាប់យើងចំៗហើយថា ជាឧបករណ៍ទុកសម្រាប់ពិនិត្យមើលថា តើយើងមានគភ៌ ឬមិនមានគភ៌ដោយខ្លួនឯង។ ប្រដាប់ពិនិត្យគភ៌គឺជាការពិនិត្យរកមើលអ័រម៉ូន HCG(Human Chorionic Gonadotropin) នៅក្នុងទឹកមូត្រដែលអ័រម៉ូននេះនឹងត្រូវបង្ហូរចេញមកក្រោយពីមានការចាប់បដិសន្ធិរួចហើយប្រមាណជា6-7ថ្ងៃ ដោយប្រដាប់ពិនិត្យគភ៌នេះមានភាពច្បាស់លាស់ប្រមាណជា99% ហើយដែលអាចពិនិត្យមើលបានតាំងពីថ្ងៃទី1នៃការបាត់វដ្តរដូវ តែបើអ្នកណាចង់ឱ្យប្រាកដក្នុងចិត្តមែនទែននោះ គួរពិនិត្យនៅក្នុងអំឡុងពេលក្រោយការចាប់បដិសន្ធិរួចហើយប្រមាណ8-12សប្ដាហ៍ ឬវដ្តរដូវបាត់តាំងពីថ្ងៃទី10-14ឡើងទៅ លទ្ធផលដែលចេញមកនឹងមានភាពច្បាស់លាស់ខ្លាំងបំផុត។

ត្រូវពិនិត្យនៅពេលណា?
ការពិនិត្យការមានគភ៌ដើម្បីទទួលបានលទ្ធ-ផលដែលច្បាស់លាស់ គួរពិនិត្យពីទឹកមូត្រនៅពេលព្រឹកក្រោយភ្ញាក់ពីដំណេក ព្រោះពេលនោះទឹកមូត្រមានភាពខាប់ និងធ្វើឱ្យទទួលបានលទ្ធផលដែលទៀង និងច្បាស់លាស់បំផុត។

តើប្រដាប់ពិនិត្យគភ៌មានបែបណាខ្លះ?
• ប្រដាប់ពិនិត្យគភ៌បែបជ្រលក់ មានលក្ខណៈជាបន្ទះវែងៗដែលមានកូនពែងតូចមួយសម្រាប់ដាក់ទឹកមូត្រមកជាមួយ។ វិធីការពិនិត្យ ចូរចាប់ផ្តើមពីការត្រងទឹកមូត្រដាក់ចូលពែង ហើយយកបន្ទះពិនិត្យគភ៌ខាងផ្នែកដែលមានរូបសញ្ញាព្រួញចង្អុល ជ្រលក់ចូលទៅក្នុងទឹកមូត្រប្រមាណជា3-5វិនាទី រួកយកចេញមក ហើយរង់ចាំមើលលទ្ធផលប្រមាណជា5នាទី។
• ប្រដាប់ពិនិត្យគភ៌បែបបន្តក់ ឧបករណ៍នឹងប្រកបទៅដោយដន្លាប់សម្រាប់ពិនិត្យគភ៌ កូនពែងដាក់ទឹកមូត្រ និងបំពង់បន្តក់។ វិធីប្រើ ចូរចាប់ផ្តើមពីការត្រងទឹកមូត្រដាក់ចូលកូនពែងបន្ទាប់មកចូរយកបំពង់បន្តក់បឺតយកទឹកមូត្រហើយបន្តក់ទឹកមូត្រនោះនៅលើដន្លាប់ពិនិត្យគភ៌ប្រមាណជា3ដំណក់ រួចហើយរង់ចាំលទ្ធផលប្រមាណជា5នាទី។
• ប្រដាប់ពិនិត្យគភ៌បែបឆ្លងកាត់ មានត្រឹមតែបន្ទះសម្រាប់ពិនិត្យគភ៌មួយប៉ុណ្ណោះ ឯវិធីប្រើវិញក៏ងាយស្រួលដែរ គឺគ្រាន់តែយកបន្ទះពិនិត្យនោះមកកាន់ដោយឱ្យសញ្ញារូបព្រួញចង្អុលចុះក្រោម បន្ទាប់ពីនោះក៏ឱ្យទឹកម៉ូត្រហូរឆ្លងកាត់បន្ទះពិនិត្យគភ៌នោះឱ្យសើមជោក រួចហើយទុកចោលប្រមាណជា5នាទីដើម្បីរង់ចាំលទ្ធផល។

លទ្ធផលការពិនិត្យនៅលើប្រដាប់ពិនិត្យគភ៌
នៅពេលធ្វើការពិនិត្យការតាំងគភ៌រួចស្រេចហើយ ហើយក្រោយពីរង់ចាំលទ្ធផលប្រមាណជា5នាទីរួចហើយ លទ្ធផលដែលទទួលបានតាមបែបនីមួយៗនឹងបញ្ជាក់ប្រាប់ដូចតទៅនេះ ៖
• នៅលើបន្ទះពិនិត្យគភ៌មានឡើង1ឆ្នូត ឬមាន1ឆ្នូតឡើងក្នុងទីតាំងអក្សរ C នោះមានន័យថា មិនមានគភ៌ទេ។
• នៅលើបន្ទះពិនិត្យគភ៌មានឡើង2ឆ្នូត ឬមានឆ្នូតឡើងទាំងក្នុងទីតាំងអក្សរ C និងអក្សរ T នោះមានន័យថា មានគភ៌ហើយ។
• នៅលើបន្ទះពិនិត្យគភ៌មានឡើងតែ 1ឆ្នូតក្នុងទីតាំងអក្សរ T មួយគត់ នោះមានន័យថា មិនច្បាស់លាស់ អាចបណ្តាលមកពីប្រដាប់ពិនិត្យគភ៌នោះខូច ឬអាចមកពីការប្រើការមិនបានត្រឹមត្រូវតាមវិធី។
• នៅលើបន្ទះពិនិត្យគភ៌គ្មានឡើងស្នាមឆ្នូតអ្វីទាំងអស់ មានន័យថា មិនច្បាស់លាស់ អាចបណ្តាលមកពីប្រដាប់ពិនិត្យគភ៌នោះខូច ឬអាចមកពីការប្រើការមិនបានត្រឹមត្រូវតាមវិធី។

ទាំងអស់នេះ នៅពេលពិនិត្យការតាំងគភ៌រួចហើយ ប្រដាប់ពិនិត្យគភ៌បង្ហាញលទ្ធផលមិនច្បាស់លាស់ ឡារ៉ែន សូមណែនាំឱ្យសាកល្បងពិនិត្យឡើងវិញម្ដងទៀត ដោយប្ដូរប្រដាប់ពិនិត្យគភ៌ថ្មី ឬប្ដូរម៉ាកយីហោផ្សេងណាមួយទៀតគឺជាការល្អបំផុត ឬបើអ្នកណាពិនិត្យហើយឃើញលទ្ធផលវិជ្ជមាន ឬមានគភ៌នោះ ដើម្បីឱ្យច្បាស់លាស់ និងពិតប្រាកដ100% ឡារ៉ែន សូមណែនាំឱ្យទៅពិនិត្យជាមួយគ្រូពេទ្យម្ដងទៀត ដើម្បីភាពប្រាកដប្រជា ព្រោះយ៉ាងណាប្រដាប់ពិនិត្យគភ៌គ្រាន់តែជាឧបករណ៍ពិនិត្យគភ៌រយៈដំបូងប៉ុណ្ណោះ៕

November 17, 2017

សុគន្ធ នីសា បដិសេធថា អនាគតស្វាមីមិនមែនផ្កាយបី

ផ្ទុយស្រឡះពីការចេញផ្សាយដោយគ្មានប្រភពច្បាស់លាស់ពីបណ្តាញសារព័ត៌មានក្នុងស្រុកមួយចំនួន ដែលអាស្រ័យទៅតាមពាក្យចចាមអារ៉ាមស្រែកបន្តគ្នានៅលើបណ្តាញទំនាក់ទំនងសង្គមហ្វេសប៊ុកពាក់ព័ន្ធទៅនឹងដំណើររឿងចោទប្រកាន់ទៅលើកំពូតារាចម្រៀង
សុគន្ធ នីសា ថាមានភាពលំអៀង និងមានទំនោរទៅលើកូនក្រុមរបស់ខ្លួន កុមារី ស៊ីវហេង ដែលមានឪពុកជាមន្ដ្រីផ្កាយ3 និងជាគូដណ្ដឹងរបស់ខ្លួន។ បន្ថែមពីនេះ នៅមានការទិតៀនថាតារាចម្រៀងស្រីរូបនេះព្យាយាមយិតយោងសណ្តោងអនាគតកូនស្រីក្រៅខាន់ស្លាឱ្យបានជាប់ជាបន្តបន្ទាប់រហូតបានមកដល់វគ្គផ្តាច់ព្រ័ត្រក្នុងកម្មវិធី “The Voice Kids Cambodia” រដូវកាលទី1 ថែមទៀតផង។

ភ្ជាប់ទៅនឹងការលើកឡើងខាងលើនេះ សុគន្ធនីសា បានចេញមុខធ្វើការបកស្រាយបញ្ជាក់យ៉ាងច្បាស់ជាសាធារណៈថា ចំពោះព័ត៌មានទាំងអម្បាលម៉ានដែលធ្លាប់ចេញផ្សាយកាលពីពេលកន្លងទៅគឺសុទ្ធតែជារឿងប្រាសចាកពីការពិតទាំងស្រុង។ នាងបានបញ្ជាក់យ៉ាងដូច្នេះថា “ខ្ញុំមិនដឹងថាពួកគាត់បានព័ត៌មានមកពីប្រភពណានោះទេ ហើយមុនពេលពួកគាត់ចេញផ្សាយក៏មិនបានជួបសម្ភាសជាមួយខ្ញុំដែរ។ ព័ត៌មានដែលថា ខ្ញុំមានទំនាក់ទំនងជាមួយបុរសផ្កាយ3នោះ គឺខ្ញុំសុំអះអាងថាមិនមែនជាការពិតនោះទេ។ ខ្ញុំប្រាប់ថា ខ្ញុំពិតជាមានគូកំណាន់ និងមានគម្រោងចូលរោងការនៅត្រឹមខែធ្នូ ចុងឆ្នាំ2017ខាងមុខនេះពិតមែន ប៉ុន្តែគាត់គ្រាន់តែជាមនុស្សសាមញ្ញ និងមិនមែនជាឪពុករបស់កុមារី ស៊ីវហេងដែលជាមន្ត្រីរាជការដូចគេថានោះឡើយ”។

ជាមួយនឹងការបកស្រាយប្រាប់ពីការពិតនូវរឿងរ៉ាវជីវិតឯកជនខាងលើនេះ តារាចម្រៀងស្រីចូលចិត្តភាពស្រគត់ស្រគំម្នាក់នេះក៏បានបញ្ជាក់ផងដែរថា នាងមិនមានការអាក់អន់ស្រពន់ចិត្តទៅនឹងអ្នកប្រឌិតរឿងខាងលើនេះនោះឡើយ ដោយនាងបានចាត់ទុកថា វាអាចជាចេតនាល្អមួយ ដែលគេចាប់អារម្មណ៍ចំពោះរូបនាង ហើយមិនចង់ឱ្យនាងមានភាពស្ងប់ស្ងាត់៕

November 17, 2017

សញ្ញា5យ៉ាងបង្ហាញពី គ្រោះថ្នាក់របស់ជំងឺក្រលៀន

ជំងឺក្រលៀន គឺជាជំងឺដែលបណ្ដាលមកពីការដែលក្រលៀនធ្វើការខុសប្រក្រតី មានប្រសិទ្ធភាពថយចុះ បង្កឱ្យកើតការដក់ស្ទះនូវវត្ថុកាកសំណល់នៅក្នុងរាងកាយ រហូតហុចផលប៉ះពាល់ដល់ការធ្វើការងារក្នុងប្រព័ន្ធផ្សេងៗទូទាំងរាងកាយ ហើយអាចហុចផលឱ្យកើតសភាវគាំងក្រលៀនបាន ដែលការពិតទៅវាអាចកើតឡើងបានពីច្រើនមូលហេតុ ទាំងកើតឡើងតាំងពីកំណើត កើតពីការរលាកក្លាយ ឆ្លងមេរោគ ដក់ស្ទះក្នុងតម្រងនោម ឬមានដុះសាច់ជាដើម ដោយវានឹងបង្ហាញអាការចេញមកខុសប្លែកពីគ្នា ដែលយើងអាចសរុបអាការដែលប្រថុយប្រថាននឹងការកើតជំងឺក្រលៀនបានដូចខាងក្រោមនេះ។

1- ទឹកមូត្រមានលក្ខណៈខុសប្រក្រតី
ទាំងការបន្ទោបង់ទឹកមូត្រចេញមកមានលាយឈាម ទឹកមូត្រមានពពុះច្រើន ឬទឹកមូត្រខាប់ជាដើម អាចសន្និដ្ឋានទុកជាមុនបានតែម្ដងថា អាចនឹងប្រថុយប្រថាននឹងការកើតជំងឺក្រលៀនហើយ គួរតែប្រញាប់ទៅជួបលោកគ្រូពេទ្យជាបន្ទាន់បំផុត ជាពិសេសអ្នកដែលបន្ទោបង់ទឹកមូត្រចេញមកមានឈាមចេញមកជាមួយ ព្រមជាមួយមានសរសៃខាប់(ដូចស៊ុត-ស) ឬមានប្រូតេអីុនចេញមកលាយឡំជាមួយទឹកមូត្រជាដើម។

2- ឈឺពោះខ្លាំង
អាចកើតឡើងរួមជាមួយការបន្ទោបង់ចេញមកមានឈាម ទឹកមូត្រខាប់ ឬមានគ្រាប់ខ្សាច់តូចៗ ដោយអាការទាំងអស់នេះប្រថុយប្រថានក្នុងការកើតក្រួសក្នុងតម្រងនោម និងជំងឺពាក់ព័ន្ធនឹងប្រព័ន្ធតម្រងនោម។

3- ឃើញមានដុំអ្វីម្យ៉ាងនៅម្ដុំក្រលៀន
បើសិនជាស្ទាបទៅហើយឃើញមានដុំសាច់អ្វីម្យ៉ាងនៅត្រង់ម្ដុំចង្កេះទាំងសងខាងរបស់អ្នក នេះអាចជាសញ្ញាគ្រោះថ្នាក់មួយរបស់ជំងឺក្រលៀនដែលបណ្តាលមកពីការស្ទះថង់ទឹកមូត្រ ការណែនស្ទះរបស់ក្រលៀន ឬការដុះសាច់នៅក្នុងក្រលៀនជាដើម។

4- សម្ពាធឈាមឡើងខ្ពស់
ដោយសារតែក្រលៀនបំពេញតួនាទីសាងសារធាតុគ្រប់គ្រងសម្ពាធឈាមប្រកបជាមួយក្រលៀនដែលមានតួនាទីរក្សាតុល្យភាពរបស់ទឹក និងអំបិលរ៉ែក្នុងរាងកាយ ដូច្នេះហើយទើបការដែលសម្ពាធឈាមឡើងខ្ពស់អាចបណ្តាលមកពីជំងឺក្រលៀនដោយត្រង់។

5- អាការហើម
អ្នកដែលកើតជំងឺក្រលៀននឹងមានអាការហើម ជាពិសេសនៅលើស្បែកភ្នែកនៅពេលព្រឹក ឬហើមមុខតែម្ដង ដែលបើសិនជាធ្ងន់ធ្ងរនឹងមានអាការហើមបែបនេះពេញទាំងដងខ្លួនតែម្ដង។ តែយ៉ាងណាក៏ដោយ អាការហើមនេះក៏អាចបណ្ដាលមកពីជំងឺថ្លើម ជំងឺបេះដូង
ការខ្វះសារធាតុអាហារ ឬភាពខុសប្រក្រតីពាក់ព័ន្ធនឹងអ័រម៉ូនបានដែរ ដូច្នេះគួរប្រញាប់ទៅជួបលោកគ្រូពេទ្យដើម្បីឱ្យបានដឹងពីមូលហេតុពិតប្រាកដ និងដើម្បីទទួលការព្យាបាលមុនពេលអ្វីៗហួសពេលនឹងកែកុនទៅបាន៕

November 16, 2017

ហាមបរិភោគអាហារប្រភេទនេះ បើមិនចង់អាយុខ្លី

សុខភាពល្អគឺជាអ្វីដែលយើងទាំងអស់គ្នាប្រាថ្នាចង់បាន ក៏ប៉ុន្តែនៅពេលខ្លះក៏យើងបានមើលរំលង ដោយការបរិភោគអាហារដែលមានលក់សម្បូរបែបដូចសព្វថ្ងៃនេះ។ សោភ័ណ្ឌភាពអាហារដែលត្រូវបានច្នៃប្រឌិតឱ្យមានភាពវិចិត្រ ទាក់ទាញចិត្តឱ្យចង់ទទួលទាន តាមពិតទៅវាក៏មានគ្រោះថ្នាក់ដល់សុខភាពយើងដោយមិនដឹងខ្លួន។ ដូច្នេះប្រសិនបើនរណាម្នាក់មិនចង់ឱ្យអាយុខ្លីទេនោះ គួរតែជ្រាបពីអាហារមួយចំនួនដែលអ្នកជំនាញហាមឃាត់ និងគួរចៀសវាងដូចខាងក្រោមនេះ។

1- ភេស្ជជៈជាតិហ្គាស់
ភេស្ជជៈដែលមានសារជាតិហ្គាស់ វាត្រូវបានរកឃើញថា សម្បូរទៅដោយសារធាតុគីមី និងបរិមាណជាតិស្ករច្រើន ប្រសិនបើអ្នកទទួលទានវាជារៀងរាល់ថ្ងៃ នោះអ្នកនឹងប្រឈមមុននឹងហានិភ័យនៃជំងឺទឹកនោមផ្អែមខ្ពស់ ហើយវាក៏មានគ្រោះថ្នាក់ដូចជា ជំងឺមហារីកពោះវៀនធំ និងជំងឺរលាកក្រពះផងដែរ។

2- ប្រភេទសាច់សម្រេច
អាហារប្រភេទសាច់សម្រេចដូចជា សាច់ក្រក ហតដក ប្រហិតកញ្ចប់ ណែម សាច់ងៀត ដែលត្រូវបានក្រុមហ៊ុនឧស្សាហកម្មនានាផលិតឡើង គឺមានលាយផ្សំជាមួយសារជាតិគីមីជាច្រើនដូចជា សារធាតុការពារចំណីអាហារឱ្យមានអាយុកាលយូរ សារធាតុខ្លាញ់ច្រើនសូដ្យូម និងសារធាតុដែលការពារមិនឱ្យសើម ហើយស្អុយជាដើម។ ប្រសិនបើអ្នកទទួលទានអាហារសាច់ប្រភេទនេះ ក៏មិនមានគុណប្រយោជន៍អ្វីចំពោះរាងកាយរបស់អ្នកនោះទេ។

3- ប្រភេទនំកញ្ចប់
អាហារប្រភេទនេះ ជាអាហារកែច្នៃដែលមិនសូវមានសារធាតុអាហារូបត្ថម្ភ ហើយនៅពេលដែលអ្នកបរិភោគចូលក្នុងរាងកាយអ្នក នោះនឹងទទួលបានមកវិញតែជាតិសូដ្យូម ជាតិស្ករនិងជាតិខ្លាញ់ដែលមានបរិមាណច្រើនតែប៉ុណ្ណោះគឺវាគ្រោះថ្នាក់ដល់រាងកាយរបស់អ្នកខ្លាំងណាស់អ្វីដែលសំខាន់ជាងនេះទៅទៀតនោះ គឺវាអាចបណ្ដាលឱ្យកើតជំងឺមហារីកពោះវៀនធំ ជំងឺប្រព័ន្ធសរសៃឈាម និងជំងឺបេះដូងបានផងដែរ៕

November 16, 2017

កុមារកម្ពុជាមានឱកាសអភិវឌ្ឍការអានតាមបណ្តាញបច្ចេកវិទ្យា

បង្កើតវប្បធម៌នៃការអាន ជាចំណុចសំខាន់មួយដែលក្រសួងអប់រំ យុវជន និងកីឡា រួមទាំងអង្គការសង្គមស៊ីវិលមួយចំនួនដែលពាក់ព័ន្ធនឹងវិស័យអប់រំកំពុងយកចិត្តទុកដាក់ ហើយបានដាក់គោលដៅលើកុមារដើម្បីជំរុញឱ្យវប្បធម៌នេះកាន់តែរីកសាយឡើងនៅថ្ងៃអនាគត។

នៅពេលថ្មីៗនេះ កម្មវិធីមួយដែលមានឈ្មោះថា TEST (Technology for Education Systems Transformation) ត្រូវបានគម្រោង Development Innovation សហការជាមួយនឹងក្រសួងអប់រំ បង្កើតឡើងដើម្បីសម្រួលដល់ការវាយតម្លៃសមត្ថភាពអំណានរបស់សិស្ស កំណត់វិធីសាស្ត្រជួយសិស្សដែលត្រូវការរៀនបន្ថែមប្រកបដោយប្រសិទ្ធភាព និងពង្រឹងសមត្ថភាពអំណានរបស់សិស្សផងដែរ។

កម្មវិធី TEST ជាកម្មវិធីទូរស័ព្ទដៃមួយដែលអាចជួយសិស្សសាលាក្នុងការវាយតម្លៃការអានរបស់ពួកគេតាមរយៈការប្រើប្រាស់ទូរស័ព្ទស្មាតហ្វូន ,Tablet និងកុំព្យូទ័រ។

កម្មវិធីនេះ គឺបានជួយតភ្ជាប់ការអប់រំរវាងគ្រួ និងសិស្សបានល្អក្នុងកាលៈទេសៈជាច្រើនដែលសាលាភាគច្រើននៅកម្ពុជាមិនទាន់បានបង្រៀនគ្រប់គ្រាន់ក្នុងការធ្វើឱ្យមានតុល្យភាពដើម្បីបង្កើនចំនួនសិស្សសាលាតាមអាយុ។ កម្មវីធីនេះអនុញ្ញាតឱ្យគ្រូបង្រៀនកំណត់ពីលំហូរនៃការសិក្សារបស់សិស្សនៅក្នុងថ្នាក់រៀនរបស់ខ្លួនបានយ៉ាងងាយ ហើយគាត់ក៏អាចវាយតម្លៃពីភាពប្រែប្រួលជាលក្ខណៈបុគ្គល និងតម្រូវការរៀនសូត្ររបស់សិស្សម្នាក់ៗផងដែរ។

ចំណុចពិសេសនៃកម្មវិធី TEST នេះគឺអាចជួយឱ្យសិស្សអាចអភិវឌ្ឍការអានរបស់ខ្លួនតាមរយៈការអានសៀវភៅ និងលេងល្បែងពាក់ព័ន្ធនឹងការអាននៅក្នុងឧបករណ៍អេឡិចត្រូនិក ដែលមាននៅក្នុងបណ្ណាល័យនៃសាលាបឋមសិក្សាមួយចំនួននៅកម្ពុជា។ តាមរយៈកម្មវិធីនេះ គ្រូក៏អាចតាមដានការសិក្សារបស់សិស្សដែលបានប្រើប្រាស់បណ្តាញបច្ចេកវិទ្យានេះ ដែលវាជាការងាយស្រួលគ្រប់គ្រង និងអភិវឌ្ឍសមត្ថភាពពួកគេយ៉ាងងាយស្រួល និងប្រកបដោយប្រសិទ្ធភាព។

សព្វថ្ងៃមានសិស្សានុសិស្សជាង 11,600នាក់ និងគ្រូបង្រៀនជាង 280នាក់នៅប្រទេសកម្ពុជាកំពុងប្រើប្រាស់កម្មវិធីនេះ។ ក្រោមការគាំទ្ររបស់ USAID តាមរយៈគម្រោង Development Innovations នៅឆ្នាំ 2017នេះ អង្គការអប់រំពិភពលោកកំពុងបង្កើតកម្មវិធីនេះសម្រាប់សិស្សានុសិស្សថ្នាក់ទី3៕

November 16, 2017

ទទួលទានទឹកស្លឹកគ្រៃ ព្យាបាលរោគរលាកសន្លាក់ហ្គោតរបស់មនុស្សចាស់

ថ្ងៃនេះទស្សនាវដ្ដី ឡារ៉ែន បានពាំនាំនូវវិធីព្យាបាលជំងឺរលាកសន្លាក់ហ្គោត ដែលកើតមានចំពោះមនុស្សមានវ័យចំណាស់ តាមបែបឱសថដែលងាយរកនៅក្នុងផ្ទះ បើទោះបីជានៅតាមទីជន-បទ ឬទីក្រុងក៏ដោយ អាចរកមកផ្សំ ហើយដាំទឹកពិសាបានយ៉ាងជាសះស្បើយ ព្រមទាំងមិនបាច់ភ័យព្រួយខ្លាចមានគ្រោះថ្នាក់ចំពោះសុខភាពថែមទៀតផង។ មុននឹងរៀបរាប់អំពីឱសថព្យាបាលរោគជំងឺខាងលើនេះ ជាបឋមសូមជម្រាបជូនប្រិយមិត្តអ្នកអានជាមុនអំពីអ្វីទៅជារោគជំងឺរលាកសន្លាក់ហ្គោតសិនថា កើតនៅកន្លែងណាខ្លះនៃរាងកាយរបស់មនុស្សយើង?

រោគហ្គោត ឬរលាកសន្លាក់ហ្គោត ជាភាវៈជំងឺដែលអាចសង្កេតពីអាការរលាកសន្លាក់រ៉ាំរ៉ៃហើយផ្ដល់នូវរោគសញ្ញាឱ្យមានអារម្មណ៍ឈឺចាប់ស្រួចស្រាវដដែរៗ ហើយមានចេញអុចពណ៌ក្រហម ឡើងពងទឹក រលាក ហើមត្រង់គន្លាក់សន្លាក់ សន្លាក់ឆ្អឹងបាតជើង ម្រាមជើង ម្រាមដៃ ជាពិសេសរមែងកើតត្រង់សន្លាក់មេជើង ដែលទទួលរងនូវផលប៉ះពាល់គ្រោះថ្នាក់ខ្លាំងបំផុត ហើយធ្លាប់កើតលើក្រុមមនុស្សប្រមាណជា50%នៃអ្នកជំងឺលោកខាងលិច។ ក្រៅពីនេះ អាចជួបប្រទះរោគសញ្ញាហើមពងទឹកលើស្បែក ក្រួសក្នុងតម្រងនោម និងរោគតម្រងនោមដែលកើតពីអាស៊ីតអ៊ុយរិក។ល។ រោគនេះកើតឡើងនៅពេលជាតិអាស៊ីតអ៊ុយរិកឡើងខ្ពស់នៅក្នុងឈាមហើយអាស៊ីតនេះច្រើនគ្រាប់ ដែលមានសណ្ឋានដូចគ្រាប់គ្រីស្ដាល់ចំសរសៃ និងជុំវិញសរសៃយាវ។

ការស្រាវជ្រាវរបស់គ្រូពេទ្យជំនាញចំពោះការពិនិត្យដុំគ្រីស្ដាល់ដែលមានលក្ខណៈស្រដៀងនឹងក្រួសតម្រងនោមនេះបានរកឃើញថា វិធីព្យាបាលជំងឺនេះគឺអាចធ្វើទៅបានដោយប្រើថ្នាំបំបាត់ការរលាកមួយប្រភេទ ដែលមិនប្រើស្តេរ៉ូអីុដ(NSAIDs) និង Colchicine អាចព្យាបាលឱ្យអ្នកជំងឺមានអាការប្រសើរឡើង បន្ទាប់ពីចាប់ផ្ដើមមានអាការរលាកស្រួចស្រាវកើតឡើង ហើយកម្រិតនៃទឹកអាស៊ីតអ៊ុយរិកដែលមាននៅក្នុងឈាមក៏ថយចុះវិញដែរ។ ជំងឺនេះអាចជាសះ-ស្បើយបានដោយការផ្លាស់ប្ដូររបៀបរស់នៅរបស់អ្នកជំងឺពោលគឺអ្នកដែលមានអាការរោគនេះអាចប្រើ Allopurinol ឬថ្នាំចាក់ Prome-nade ដើម្បីការពារក្នុងរយៈពេលយូរអង្វែង។

ចំនួនអ្នកជំងឺរោគរលាកសន្លាក់ហ្គោត អាចនឹងកើតជំងឺនេះឡើងវិញនៅក្នុងអំឡុងរយៈពេល10ឆ្នាំក្រោយមក ហើយគេជឿជាក់ថា ជំងឺរលាកសន្លាក់ហ្គោត អាចហុចផលវិជ្ជមានមួយចំនួនចំពោះក្រុមមនុស្សដែលមានជំងឺមេតាបូលិកក្រុមមនុស្សដែលអាយុច្រើន និងក្រុមមនុស្សដែលមានទង្វើនៃការបរិភោគអាហារផ្លាស់ប្ដូរជារឿយៗ។ ពីមុនជំងឺរលាកសន្លាក់ហ្គោតធ្លាប់មានឈ្មោះថា ជាជំងឺអ្នកមាន ឬជំងឺស្ដេច។

វិធីព្យាបាល និងវិធីការពារខ្លួនពីជំងឺរោគរលាកសន្លាក់ហ្គោត
1. ស្លឹកគ្រៃសុទ្ធ 4-5 ដើម
2. ស្លឹកតើយសុទ្ធ 2-3 សន្លឹក
3. ទឹកបរិសុទ្ធ 2 លីត្រ

វិធីធ្វើ
1. ដាំទឹកស្លឹកគ្រៃ និងស្លឹកតើយរហូតដល់ពុះ។ នៅពេលពុះហើយ ក៏បន្ថយភ្លើងចុះបន្ដិចវិញ។
2. រំងាស់វាបន្ដរយៈពេល15នាទី ហើយនៅពេលរំងាស់ហាមបិទគម្របឆ្នាំងជាដាច់ខាត។
3. បន្ទាប់ពីគ្រប់15នាទីហើយ សឹមពន្លត់ភ្លើង រួចទុកចោលឱ្យត្រជាក់។
4. ចូរទទួលទានទឹកស្លឹកគ្រៃនេះជំនួសទឹកធម្មតាចំនួន1សប្ដាហ៍ ដើម្បីលាងជាតិអាស៊ីតអ៊ុយរិកនៅក្នុងឈាម ដែលជាមូលហេតុបណ្ដាលឱ្យកើតអាការឈឺជង្គង់ ឬសន្លាក ដែលកើតពីជំងឺរលាកសន្លាក់ហ្គោតនេះ ឱ្យជាសះស្បើយ និងមានភាពប្រសើរឡើងដោយមិនបាច់ប្រើប្រាស់ថ្នាំអ្វីទាំងអស់។ ចំពោះអ្នកដែលមានអាយុច្រើន តែមិនទាន់កើតមានជំងឺរលាកសន្លាក់ហ្គោត ក៏អាចទទួលទានទឹកស្លឹកគ្រៃនេះ ដើម្បីការពារខ្លួនពីជំងឺនេះបានដែរ៕

November 16, 2017

Category: សង្គម និងសេដ្ឋកិច្ច