Category: សង្គម និងសេដ្ឋកិច្ច

ភ្នំពេញ- គណៈអភិបាលរាជធានីភ្នំពេញ បានសម្រេចអនុវត្តគម្រោងស្ដារ និង​អភិវឌ្ឍន៍ប្រឡាយស្ទឹងមានជ័យដែលមានលំនៅឋានប្រជាពលរដ្ឋនៅលើខ្នងប្រឡាយប្រមាណជាង500គ្រួសារ ដែលនឹងត្រូវរុះរើតាមដំណាក់កាល។

ឯកឧត្តម ឃួង ស្រេង អភិបាលរាជធានីភ្នំពេញបានឯកភាព​ទៅលើការអនុវត្ដគម្រោងផែនការស្ដារ និង​អភិវឌ្ឍន៍ប្រឡាយស្ទឹងមានជ័យដោយមន្ទីរសាធារណការ និងដឹកជញ្ជូនរាជធានីភ្នំពេញបានចាប់ផ្តើមរៀបចំប្រមូល និងសម្អាតទីធ្លាសម្រាប់ការស្នាក់នៅបណ្តោះអាសន្ននៅក្រោមស្ពានអាកាសស្ទឹងមានជ័យ ជូនបង​ប្អូនប្រជាពលរដ្ឋដែលត្រូវរើចេញក្នុងដំណាក់កាលទី1នេះមាន153គ្រួសារ ដែលនឹងត្រូវត​បណ្ដាញទឹកស្អាត អគ្គិសនី បង្គន់​អនាម័យជូន។

គម្រោងស្ដារ និងសាងសង់ប្រឡាយបេតុងស្ទឹងមានជ័យត្រូវបានឯកភាពស្រុះស្រួលគ្នារវាងប្រជាពលរដ្ឋនៅលើប្រឡាយចំនួន572គ្រួសារ និងអាជ្ញាធរ ដោយអាជ្ញាធរនឹងប្រគល់ដីនៅសល់ពីការសាងសង់ប្រឡាយបេតុង និងផ្លូវជាប់ប្រឡាយជូនប្រជាពលរដ្ឋអភិវឌ្ឍន៍នៅនឹងកន្លែង៕

ភ្នំពេញ៖ ដោយឈរលើកំណើនសេដ្ឋកិច្ចថេរក្នុងរយៈពេលជិត2ទសវត្សរ៍ចុងក្រោយនេះ បានធ្វើឱ្យកម្ពុជាប្រែខ្លួនពីប្រទេសដែលមានចំណូលទាបទៅជាប្រទេសដែលមានចំណូលមធ្យមកម្រិតទាបនៅត្រឹមឆ្នាំ2017 ហើយកំពុងនឹងក្លាយខ្លួនទៅជាប្រទេសដែលមានចំណូលមធ្យមកម្រិតខ្ពស់នៅត្រឹមឆ្នាំ2030ខាងមុខ។

ឯកឧត្តមបណ្ឌិត អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុមានប្រសាសន៍កាលពីពេលថ្មីៗនេះថា កម្ពុជាកំពុងមានការអភិវឌ្ឍពីមួយឆ្នាំទៅមួយឆ្នាំ ដោយខិតខំរក្សាបាននូវស្ថិរភាពម៉ាក្រូសេដ្ឋកិច្ច និងបន្តតម្រង់ឆ្ពោះទៅចក្ខុវិស័យ2030 ដើម្បីក្លាយខ្លួនទៅជាប្រទេសដែលមានចំណូលមធ្យមកម្រិតខ្ពស់។​

ក្នុងជំនួបពិភាក្សាការងារ ជាមួយប្រតិភូសមាជិកសហភាពអឺរ៉ុប ទទួលបន្ទុកទំនាក់ទំនងអាស៊ីអាគ្នេយ៍ និងអាស៊ាន ដោយផ្តោតលើការផ្លាស់ប្តូរទស្សនៈស្តីពីការអភិវឌ្ឍសេដ្ឋកិច្ចនៅកម្ពុជា និងការផ្លាស់ប្តូរទស្សនៈស្តីពីកម្មវិធីកិច្ចសហប្រតិបត្តិការជាមួយប្រទេសកម្ពុជា ឯកឧត្តមទេសរដ្ឋមន្រ្តីបានបញ្ជាក់បន្ថែមថា សមិទ្ធផលទាំងនេះកើតចេញពីការខិតខំដោយខ្លួនឯងផង និងដោយមានកិច្ចសហប្រតិបត្តិការល្អពីប្រទេសជាដៃគូ រាប់ទាំងសហភាពអឺរ៉ុបផងដែលបានពង្រឹងកិច្ចសហប្រតិបត្តិការតាមរយៈជំនួយ និងការអនុគ្រោះលើវិស័យពាណិជ្ជកម្ម ដែលនាំឱ្យមានការគោលការណ៍អនុគ្រោះជាដើម។

ឆ្លើយតបទិដ្ឋភាពនេះ លោក Werner Langen ប្រធានគណៈកម្មការធិការសេដ្ឋកិច្ច និងរូបិយវត្ថុរបស់សហភាពអឺរ៉ុបបានវាយតម្លៃខ្ពស់ចំពោះរដ្ឋាភិបាលកម្ពុជាក្នុងការដឹកនាំប្រទេសឆ្ពោះទៅសម្រេចបានផ្លែផ្កាបែបនេះ។ ហើយប្រតិភូអឺរ៉ុបក៏មានបំណងស្វែងយល់ពីកំណែទម្រង់សំខាន់ៗរបស់រដ្ឋាភិបាល​ដែលបានអនុវត្តកន្លងមក ពិសេសអំពីសកម្មភាពរបស់ក្រសួងសេដ្ឋកិច្ចនិងហិរញ្ញវត្ថុក្នុងការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរហូតដល់សម្រេចបានជាផ្លែផ្កាមកទល់ពេលនេះ ខណៈពេលដែលកម្មវិធីកែទម្រង់លើវិស័យផ្សេងៗទៀតកំពុងអនុវត្ត។

សូមជម្រាបថា ជាមួយសមិទ្ធផលនេះធនាគារអភិវឌ្ឍន៍អាស៊ី(ADB) បានចាត់ទុកប្រទេសកម្ពុជា ជាមួយប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុត នៅតំបន់អាស៊ី ហើយបានប្រសិទ្ធនាមប្រទេសកម្ពុជា ជា «ខ្លាសេដ្ឋកិច្ចថ្មីនៅអាស៊ី» ទៀតផង៕

ទោះបីជាមានការអភិវឌ្ឍ​លើវិស័យអប់រំ និងសង្គមបានដើរទៅមុខយ៉ាងលឿនក៏ដោយ តែកូនស្រីនៅកម្ពុជា​ក៏​នៅមានបញ្ហាវិសមភាព​លើវិស័យអប់រំដដែល ជាពិសេសនៅតំបន់ជនបទ។ បញ្ហាទាំងនេះ បានជំរុញឱ្យមានការតស៊ូមតិ​ក្នុងចំណោម​ភាគីពាក់ព័ន្ធនានាដើម្បីធ្វើយ៉ាងណាលើកកម្ពស់ស្រ្តីកម្ពុជាឱ្យមានលទ្ធភាពគ្រប់គ្រាន់ដើម្បីសិក្សា​ឱ្យស្មើនឹងបុរស។

ពាក់ព័ន្ធនឹងបញ្ហានេះ ឯកឧត្តម ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា បានលើកឡើងថា ក្រសួងអប់រំ យុវជន និងកីឡា បាន និងកំពុងគាំទ្រ​ឱ្យមានការលើកកម្ពស់សមភាពយេនឌ័រ ក្នុងវិស័យពាក់ព័ន្ធ។ ហើយជាក់ស្ដែងការជួយមន្រ្តីរាជការស៊ីវិល​ជាស្រ្តី គឺហាក់បីដូចជាកំពុងជួយខ្លួនឯង និងសង្គមជាតិទាំងមូល ព្រោះស្ត្រី​ជាចលករដ៏សំខាន់មួយក្នុងការអភិវឌ្ឍសម្រាប់សង្គមជាតិ។

ថ្លែងនៅក្នុងសិក្ខាសាលាបណ្តុះបណ្តាលស្តីពីការបណ្តុះបណ្តាលភាពជាអ្នកដឹកនាំរបស់ស្ត្រីលើវិស័យអប់រំ លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានថ្លែងថា ស្ត្រីជាធនធានមនុស្សដ៏មានតម្លៃសម្រាប់សង្គម។ ការកសាងបណ្តាញភាពជាអ្នកដឹកនាំសម្រាប់ស្ត្រី គឺជាការចូលរួមក្នុងការកសាងផែនការយុទ្ធសាស្រ្តអប់រំ ចែករំលែកចំណេះដឹង និងបទពិសោធទៅវិញទៅមកដល់យុវជននៅតាមគ្រឹះស្ថានអប់រំនានា ចូលរួមដោះស្រាយបញ្ហាប្រឈមពាក់ព័ន្ធនឹងស្ត្រី។

លោកជំទាវ គឹម សេដ្ឋានី បាននិយាយថា៖ «បណ្តាញអ្នកដឹកនាំស្ត្រីនឹងប្រមូលផ្តុំស្ត្រីដែលមានតួនាទីចាប់ពីអនុប្រធានការិយាល័យរហូតដល់ថ្នាក់ក្រសួងដើម្បីគាំទ្រ និងលើកទឹកចិត្តគ្នាដើម្បីលើកកម្ពស់វិស័យអប់រំសម្រាប់ស្ត្រី។ តាមរយៈសកម្មភាពនេះស្ត្រីមកពីក្រសួងនានា នឹងបានចែករំលែកបទពិសោធចំណេះដឹង និងដំណោះស្រាយសង្គមៗសម្រាប់អភិវឌ្ឍសង្គម»។

​បង្ហាញការគាំទ្រលើគម្រោងនេះ រដ្ឋមន្ត្រីក្រសួងកិច្ចការនារី លោកជំទាវ អ៊ឹង គន្ថាផាវី បានលើកឡើងថា ក្រសួងអប់រំ គួរបន្ថែមគ្រូបង្រៀនដែលជាស្រ្តី សាងសង់អន្តេវាសិកដ្ឋាន និងផ្តល់អាហារូបករណ៍​ដល់សិស្ស​នារីឱ្យបានច្រើន​ដើម្បីសមភាពយេនឌ័រក្នុងវិស័យអប់រំ។

លោកជំទាវក៏បានណែនាំឱ្យបណ្តាញស្ត្រីដែលទើបនឹងត្រូវបានបង្កើតឡើងនេះ បង្កើនការផ្សព្វផ្សាយអប់រំ និងពន្យល់ដល់អាណាព្យាបាលមួយចំនួនឱ្យពួកគាត់ផ្លាស់ប្តូរឥរិយាបថ ឬគំនិតអវិជ្ជមានលើកូនស្រី ដើម្បីផ្តល់​ឱកាសដល់កូនស្រីឱ្យបានរៀនសូត្រដូចកូនប្រុសដែរ៕

ខណៈដែល​មាន​តារា​ស្រី​មួយចំនួនបានទទួល​រង​នូវ​ការព្រមានធ្ងន់ៗពី​សំណាក់​មន្ត្រីជាន់ខ្ពស់​នៃ​ក្រសួង​វប្បធម៌ និង​វិចិត្រសិល្បៈ​ពាក់ព័ន្ធ​ទៅនឹង​ការបង្ហាញ​រូបភាព​បែប​សិច​ស៊ី​របស់ខ្លួន​នៅលើ​បណ្តាញ​ទំនាក់ទំនង​សង្គម ប្រយោជន៍​ដើម្បី​ទទួលបាន​នូវ​ចំណាប់អារម្មណ៍​ពី​មហាជន​ទូទៅ ជាក់ស្តែង​ដូចជា កំពូល​តារា​ស្រី​សិច​ស៊ី ដេ​ន​នី ក្វាន់ ជាដើម​នោះ ពេលនេះ ស្រី​ស្រស់ រតនៈ ពិសី ដែល​ទើបតែ​ផ្តើម​មានឈ្មោះ​ល្បី​សារ-ជាថ្មី​ក្រោយ​បាត់​មុខ​មួយរយៈ​នោះ ក៏​កំពុងតែ​ដេក​ភ័យព្រួយ​ខ្លាចសេចក្ដីប្រកាស​របស់​ក្រសួង​បន្ទាប់ពី​ខ្លួន​បាន​ធ្លោយ​បង្ហាញ​រូបភាព​ដ៏​សិច​ស៊ី​ស្ទើរ​អាក្រាត​មួយ​ល្វែងលើ​នោះ។

ជាមួយនឹង​ការភ័យខ្លាច​ទទួលរង​នូវ​ការ​សំពង​ពី​សំណាក់​ថ្នាក់ដឹកនាំ​ក្រសួង​ខាងលើនេះ រតនៈ ពិសី បានបញ្ជាក់​ឱ្យដឹងថា សម្រាប់​ការបង្ហាញ​រូបភាព​បញ្ចេញ​សាច់​កាលពីពេល​កន្លងទៅ​នោះ គឺ​មិនមែន​ដើម្បី​ធ្វើ​ឱ្យគេ​ចាប់អារម្មណ៍ ឬ​ដើម្បី​ទាក់ទាញ​ប្រជាប្រិយភាព​អី​នោះទេ គឺ​គ្រាន់តែ​ជាការ​បង្អួត​សម្រស់ និង​សុខភាព​នៃ​ស្បែក-ស ស្អាត ខណៈដែល​នាង​ចាប់ផ្ដើម​ប្រកប​មុខ​ជំនួញ​ថ្មី​ផ្ទាល់ខ្លួន ដោយ​ការ​បើកហាង​សាឡ​ន​តែប៉ុណ្ណោះ។ ប៉ុន្តែ​គ្រាន់តែ​បង្ហោះ​រូប​បានត្រឹមតែ​ប៉ុន្មាន​ថ្ងៃ ក៏​ទទួលបាន​ការរិះគន់​យ៉ាងច្រើន រហូត​ធ្វើឱ្យ​នាង​ភ័យខ្លាច ហើយក៏​លុប​រូបភាព​ទាំងនោះ​ចេញពី​គណនី​របស់ខ្លួន​វិញ។ យ៉ាងណាក៏ដោយ ក្រោយពេល​នាង​ទទួលស្គាល់​ពី​កំហុស​ដោយ​អ​ចេតនា​ខាងលើនេះ គេ​សង្កេតឃើញ​បណ្តា​អ្នក​ធ្លាប់​រិះគន់​នាង ក៏​ប្រែ​មកជា​សរសើរ​ចំពោះ​ការ​ហ៊ាន​ទទួលកំហុស​របស់ រតនៈ
ពិសី ថា នាង​ជាតា​រា​វ័យក្មេង​ដែល​ចេះ​ទទួល​ការរិះគន់ ខុសប្លែក​ពី​តារា​ស្រី​មួយចំនួនទៀត ដែល​រមែង​ទាត់ចោល​ការទិតៀន និង​មិនចេះ​ស្គាល់​កំហុស​របស់ខ្លួន​នោះ៕

ភ្នំពេញ- បន្ទាប់ពី​មានការ​យក​ចិ​ត្ដ​ទុកដាក់​ពី​សំណាក់​រាជរដ្ឋាភិបាល​ចំពោះ​កម្មករ-កម្មការិនី  ថ្មីៗនេះ​ប្រមុខ​រាជរដ្ឋាភិបាល​បាន​ផ្តល់នូវ​អនុសាសន៍សំខាន់5ចំណុច ដល់​និយោជក និង​និយោជិត​សម្រាប់​ធ្វើការ​រួមគ្នា​ដើម្បី​ធានា​ដល់​លក្ខខណ្ឌ​ការងារ​ល្អ និង​ប្រាក់ចំណូល​ល្អ។

ទី1) ត្រូវ​រួមគ្នា​ថែរក្សា​សន្តិភាព​ស្ថេរភាព និង​សុវត្ថិភាព​សណ្តាប់ធ្នាប់​ស​ង្គ​ម​ឱ្យ​បានល្អ។

ទី2) រួមគ្នា​រក្សា​ការងារ និង​បង្កើត​ការងារថ្មីៗច្រើន​ថែមទៀត​ដោយ​ធ្វើការ​ពង្រីក និង​បង្កើន​ទីផ្សារ​បន្ថែម។

ទី3) រួមគ្នា​បង្កើន​ប្រាក់ចំណូល​ដោយ​ការបណ្តុះបណ្តាល​ចំណេះដឹង​បន្ថែម​ដល់ក​ម្មករ។ រាជរដ្ឋាភិបាល​នឹង​បន្ត​ដំឡើង​ប្រាក់ខែ​កម្មករ​ជា​រៀងរាល់ឆ្នាំ កើន​ទាំង​ប្រាក់បៀវត្សរ៍​អប្បបរមា និង​ប្រាក់​អត្ថប្រយោជន៍ផ្សេង។ ចំពោះ​តម្លៃ​ទឹក​ភ្លើង​វិញ គឺ​ចាប់តាំងពី​ថ្ងៃទី1 កញ្ញា ឆ្នាំ2017 តទៅ ថ្លៃ​ភ្លើង​នឹង​បញ្ចុះ​មក​នៅត្រឹម450៛ ក្នុង1គីឡូវ៉ាត់ម៉ោង(សម្រាប់​ការប្រើប្រាស់​ក្រោម50គីឡូវ៉ាត់ម៉ោង​ក្នុង1ខែ)។ ចំពោះ​ទឹក​វិញ គឺមាន​តម្លៃ​ត្រឹមតែ 700៛ ប៉ុណ្ណោះ​ក្នុង​មួយ​ម៉ែត្រគុប។ ប្រមុខ​រាជរដ្ឋាភិបាល​បាន​អំពាវនាវ​ដល់​ម្ចាស់ផ្ទះ​កុំ​ដំឡើង​ថ្លៃឈ្នួល​ផ្ទះ​រយៈពេល1ឆ្នាំ(2018)ដើម្បី​ជួយ​កម្មករ​យើង​ឱ្យមាន​លទ្ធភាព​រកប្រាក់​ចំណូល​បន្ថែម​ក្នុងការ​សម្រួល​ដល់​ជីវភាព​រស់នៅ​ប្រចាំថ្ងៃ​ឱ្យ​កាន់តែ​ប្រសើរឡើង។

ទី4) ផ្តល់​របប​គាំពារ​សន្តិសុខ​សង្គម​ដល់​កម្មករ​ចាប់ពី​ខែមករា ឆ្នាំ2018ទៅ គឺ​និយោជក (ម្ចាស់​ក្រុមហ៊ុន) នឹង​បង់ថ្លៃ​របប​សន្តិសុខ​សង្គម 100% ដល់ក​ម្មករ-កម្មការិនី​ដែល​អាចឱ្យ​បងប្អូន​កម្មករ-កម្មការិនី​នៅសល់​ប្រាក់​ប្រមាណ​ពី (8,000៛-12,000៛ក្នុង1ខែ)។ កម្មការិនី​យើង​ទាំងអស់ (រួមទាំង​កម្មការិនី​សំណង់ សណ្ឋាគារ ដឹកជញ្ជូន បើកបរ និង​កសិកម្ម​ជាដើម…)គឺ​ទទួលបាន​ការពិនិត្យ​ព្យាបាល​ជំងឺ​នៅ​មន្ទីរពេទ្យ​រដ្ឋ​ដោយ​មិន​គិតថ្លៃ​តាមរយៈ​មូលនិធិ​សមធម៌។

ជាងនេះទៅទៀត ប្រមុខ​រាជរដ្ឋាភិបាល​បាន​ណែ​នាំឱ្យ​ម្ចាស់​ក្រុមហ៊ុន​រោងចក្រ​រៀបចំ​បង្កើត Clinic បន្ថែម​នៅតាម​រោងចក្រ​របស់ខ្លួន​ដើម្បី​ជួយ​ដល់ក​ម្មករ។ គ្រប់​កម្មការិនី​មាន​ផ្ទៃពោះ​ទាំងអស់​ត្រូវបាន​អនុញ្ញាត​ឱ្យចេញ​មុន​ម៉ោង15នាទី តែ​ចំពោះ​បណ្តា​រោងចក្រ​ណា​អនុញ្ញាតឱ្យ​កម្មករ​ចេញ​មុន​ម៉ោង​លើសពី​ការកំណត់​នេះ​រឹតតែ​ប្រសើរ ហើយ​សម្តេច​តេ​ជោ​នឹង​បំពាក់​មេដៃ​ជូន។ ចំពោះ​ស្ត្រី​មាន​ផ្ទៃពោះ​សម្រាលកូន គឺ​នឹង​ទទួលបាន​ពេលវេលា​ឈប់សម្រាក​ពី​ការងារ​រយៈពេល3ខែ​ហើយ​នៅ​ទទួលបាន​ប្រាក់ខែ120% (50% ដោយ​ក្រុមហ៊ុន និង 70% ដោយ​បេឡា​ជាតិ)។

សម្តេច​តេ​ជោ ហ៊ុន សែន នាយករដ្ឋមន្ត្រី​បានប្រកាស​ជូនដំណឹង​ដល់​បងប្អូន​ជា​កម្មការិនី​អំពី​អត្ថប្រយោជន៍​មួយទៀត​ដែល​នឹង​ទទួលបាន​ពី​បេឡា​សង្គម​គឺ: -ចំពោះ​ស្ត្រី​សម្រាលកូន​ទោះ​ក្នុង​ប្រព័ន្ធ​ឬ​ក្រៅ​ប្រព័ន្ធ​ដែល​សម្រាល​បានកូន1 គឺ​ទទួល​ថវិកា40ម៉ឺន​រៀល និង​ពិនិត្យ​ផ្ទៃពោះ​ដោយ​ឥតគិតថ្លៃ។ បើ​សម្រាល​បានកូន​ភ្លោះ2 គឺ​ទទួលបាន​ថវិកា80ម៉ឺន​រៀល។ បើ​សម្រាល​បានកូន​ភ្លោះ3 គឺ​ទទួលបាន​ថវិកា1លាន2សែន​រៀល​ហើយ​បូក​នឹង​ប្រាក់ឧបត្ថម្ភ​មួយចំនួនទៀត​ពីស​ម្តេច​តេ​ជោ និង​សម្តេច​កិត្តិ​ព្រឹទ្ធ​បណ្ឌិត។ ថវិកា​នេះ​នឹង​ផ្តល់ជូន​ដោយ​បេឡា​សន្តិសុខ​សង្គម​របស់​រាជរដ្ឋាភិបាល​ដែល​នឹង​ត្រៀម​ថវិកា​ប្រមាណ​ជាង10លាន​ដុល្លារ ក្នុង1ឆ្នាំៗ (ទោះបី​កូន​នោះ​កើត​រស់ ឬ​ស្លាប់​ក៏​នៅតែ​ទទួលបាន​ថវិកា​គាំពារ​ដូចគ្នា)។

កម្មករ-កម្មការិនី​ទូទាំងប្រទេស​នឹង​ទទួលបាន​សេវា​ជិះឡាន​ក្រុង​សាធារណៈ​ដោយ​ឥតគិតថ្លៃ​រយៈពេល2ឆ្នាំ (គិតពី​ខែសីហា2017 ដល់​សីហា 2019)។ចំពោះ​កីឡាករ-កីឡាការិនី​ទាំងអស់​ក៏​ទទួល​បានការ​ជិះ​រថយន្តក្រុង​សាធារណៈ​ដោយ​មិន​គិតថ្លៃ​ផងដែរ​សម្រាប់​រយៈពេល2ឆ្នាំ​ដូចគ្នា ហើយ​ទទួលបាន​ការពិនិត្យ​ថែទាំ​សុខភាព​ដោយ​ឥតគិតថ្លៃ​នៅតាម​មន្ទីរពេទ្យ​រដ្ឋ។

ចំពោះ​កីឡាការិនី​ដែល​សម្រាលកូន​ក៏​ទទួលបាន​អត្ថប្រយោជន៍​ដូចគ្នា​នឹង​កម្មការិនី​ផងដែរ ចាប់ពី​ខែមករា ឆ្នាំ2018នេះ​ទៅ។ នៅ​ឆ្នាំ2019 ខាងមុខ កម្មករ​ទាំងអស់​នឹង​មាន​ប្រាក់​សោធន​និវត្តន៍ (ប្រាក់​រ៉ឺ​ត្រែ​ត) ដែល​នឹង​ទទួលបាន​ចំនួន80%នៃ​ប្រាក់ខែ​ដែល​ខ្លួន​ធ្លាប់​បានទទួល​ពេល​នៅ​ធ្វើការ​ចុងក្រោយ។ ចំពោះ​ស្ត្រី​ជា​មន្ត្រីរាជការ​ស៊ីវិល នគរបាល កងទ័ព គឺ​ចាប់ពី​ខែ មករា ឆ្នាំ2018 នេះ​ទៅ បើ​សម្រាល​បានកូន1 ត្រូវ​ទទួលបាន 800,000៛ បើ​បានកូន​ភ្លោះ2 គឺ​ទទួលបាន1,600,000៛ បើ​បានកូន​ភ្លោះ3 គឺ​ទទួលបាន2,400,000។ ចំពោះ​គ្រូបង្រៀន និង​គ្រូពេទ្យ​ជា​ស្ត្រី ក៏​ទទួលបាន​ប្រាក់ឧបត្ថម្ភ​ដូចខាងលើ​នេះ​ផងដែរ។

ទី5) រាជរដ្ឋាភិបាល​បន្ត​យកចិត្តទុកដាក់​ផ្តល់​កិច្ច​គាំពារ​ចំពោះ​កម្មករ-កម្មការិនី​ដែល​កំពុងធ្វើការ​នៅក្រៅ​ប្រទេស​ដោយ​ធ្វើការ​សម្របសម្រួល​ជាមួយ​ប្រទេស​ដៃគូ​ដើម្បី​ផ្តល់នូវ​លក្ខខណ្ឌ​ការងារល្អៗ ដែលមាន​ប្រាក់ខែ​ល្អ​សមរម្យ​ដល់​កម្មករ​ព្រមទាំង​ជួយ​សម្រួល​នូវ​បែបបទ​លិខិតបទដ្ឋាន​ផ្លូវច្បាប់​នានា​ដែល​ពាក់ព័ន្ធ​នឹង​ការងារ​របស់​បងប្អូន​កូនក្មួយ​កម្មករ​ផងដែរ។

ទន្ទឹមនឹង​នេះដែរ​រាជរដ្ឋាភិបាល​នឹង​បន្ត​ជជែក​ជាមួយ​ប្រទេសផ្សេងៗដូចជា​កូរ៉េខាងត្បូង ម៉ាឡេស៊ី និង​ប្រទេស​ថៃ​ដើម្បី​ផ្តល់នូវ​លក្ខខណ្ឌ​ការងារ និង​ប្រាក់ខែល្អៗសម្រាប់​បងប្អូន​កូនក្មួយ​កម្មករ​ខ្មែរ​យើង​ផងដែរ៕

ភ្នំពេញ- ទោះបីជាបច្ចុប្បន្នការទិញ-លក់អគារសហកម្មសិទ្ធិហាក់មានសកម្មភាពនៅទ្រឹងក៏ដោយ ប៉ុន្ដែការទិញ-លក់អគារលំនៅឋាននៅតែមានសកម្មភាពជាបន្ដបន្ទាប់ ដែលក្នុងនោះអតិថិជនបានប្រើវិធីផ្សេងៗគ្នាក្នុងការបង់ប្រាក់។ តែយ៉ាងណា វិធីនៃការបង់រំលស់នៅតែមានការពេញនិយមយ៉ាងខ្លាំងសម្រាប់ការទិញអចលនទ្រព្យ។ ហេតុអ្វីបានជាវិធីបង់រំលស់ក្នុងការទិញលំនៅឋានមានការពេញនិយមសម្រាប់ប្រជាជននាពេលបច្ចុប្បន្ន?។

លោក ច្រឹក សុខនីម អគ្គនាយកនៃក្រុមហ៊ុនមេគង្គ Century21 បានលើកឡើងថា ជាទូទៅការវិនិយោគតែងតែមានចំណុចវិជ្ជមាន និងអវិជ្ជមាន  ដូច្នេះការទិញគម្រោងលំនៅឋានដោយជ្រើសរើសការបង់ប្រាក់ផ្ដាច់ ឬការបង់រំលស់ក្ដី វាសុទ្ធតែជាជម្រើសល្អដូចគ្នា។ អ្វីដែលសំខាន់គឺយើងត្រូវមើលទៅលើលក្ខខណ្ឌរបស់បុគ្គល ឬម្ចាស់បុរីផ្ទាល់តែម្ដង។ លោកបន្ដថា បើយើងមានលុយគ្រប់គ្រាន់ហើយទោះចង់ទិញលំនៅឋានដោយបង់ប្រាក់ផ្ដាច់ វាមិនមានអ្វីជាឧបសគ្គទេ ពិសេសនៅពេលយើងជឿជាក់លើម្ចាស់បុរីហ្នឹងថា គេមានការសាងសង់ប្រកបដោយចីរភាព គេមានកេរ្ដិ៍ឈ្មោះល្អក្នុងទីផ្សារ ផ្ដល់ភាពជឿជាក់ដល់អតិថិជនខ្ពស់ ដែលយើងមើលឃើញថា លក្ខខណ្ឌខាងលើនេះ ភាគច្រើនកើតលើគម្រោងអភិវឌ្ឍន៍បុរីធំៗ។

ទោះជាយ៉ាងណាអគ្គនាយកនៃក្រុមហ៊ុនមេគង្គ Century21 លើកឡើងថា បច្ចុប្បន្នជាសម័យភាវូបនីយកម្ម ជាសម័យសម្បូរបែបក្នុងការធ្វើជំនួញ ដូច្នេះមនុស្សមួយចំនួនធំគេពុំសូវនិយមទិញលំនៅឋានដោយការបង់ផ្ដាច់ឡើយ ព្រោះបើយើងយកលុយមួយដុំទៅបង់ផ្ដាច់វា ធ្វើឱ្យបាត់បង់ឱកាសក្នុងការធ្វើជំនួញ ឬការវិនិយោគផ្សេងទៀត។

លោក ច្រឹក សុខនីម បានលើកជាឧទាហរណ៍ថា៖«បើយើងមានលុយ10ម៉ឺនដុល្លារយើងទិញផ្ទះដោយប្រើជម្រើសបង់ប្រាក់ផ្ដាច់យើងទិញបានតែមួយល្វែងទេ។ តែបើយើងធ្វើការងារជាមួយធនាគារយើងអាចទិញបាន2 ឬ3ល្វែង តែបើទិញកុំឱ្យមានហានិភ័យទិញត្រឹម2ល្វែងគឺល្អ។ បង់ដំបូង3ម៉ឺនពីរដង ស្មើ6ម៉ឺន សល់4ម៉ឺនយើងទុកធ្វើជាទុនបង់រំលស់។ សល់លុយប៉ុណ្ណឹងរំលស់បាន3ទៅ4ឆ្នាំ ចាត់ទុកថា យើងជិតអស់លុយដែលមានទៅចុះ តែជាទូទៅអចលនទ្រព្យទិញត្រឹម2ឆ្នាំ គឺវាឡើងថ្លៃបាត់ទៅហើយ ពេលវាឡើងថ្លៃយើងអាចលក់ផ្ទះណាមួយយកចំណេញ និងទប់ការបង់រំលស់»៕

ចង់​ធ្វើដំណើរ​កម្សាន្ត​ឱ្យបាន​សប្បាយរីករាយ​នៅក្នុង​ឱកាស​ឈប់សម្រាក​នាពេលខាងមុខ​នេះដែរ​ឬទេ? នៅពេល​នឹកគិត​ទៅដល់​ការធ្វើដំណើរ​កម្សាន្ត អ្នក​ក៏​ប្រាកដជា​នឹកគិត​ដល់​ការថែរក្សា​ស្បែក​ដូចគ្នា​ដែរ ហើយ​មួយ​ភាគ​ធំ​នៃ​គំនិត​របស់​អ្នក​កំពុងតែ​ផ្តោត​សំខាន់​ទៅលើ​ផលិតផលថ្មីៗដែលមាន​តម្លៃ​ថ្លៃ​ដែល​កំពុង​តែមាន​ភាពល្បីល្បាញ​នៅលើ​ទីផ្សារ ប៉ុន្តែ​សូមកុំ​ភ្លេច​ឱ្យសោះ​ណា​ថា ការពិតទៅ​នៅមាន​វត្ថុសំខាន់ៗជាច្រើន​ទៀត ដែល​អាចធ្វើឱ្យ​អ្នកមាន​អារម្មណ៍​ថា មាន​សុវត្ថិភាព​ជានិច្ច​នៅពេលដែល​បាន​ប្រើ​វា​ជាប្រចាំជាពិសេស​គឺ​សម្រាប់​ការថែទាំ​ស្បែក​ក្នុងអំឡុងពេល​ដើរ​កម្សាន្ត​ដ៏​រីករាយ​នា​ថ្ងៃ​ឈប់សម្រាក​ច្រើន​ថ្ងៃ​នៅ​មាត់សមុទ្រ។ តើ​វត្ថុ​អស់ទាំងនោះ​មាន​អ្វីខ្លះ?

មួក​សំណព្វចិត្ត ៈ ជា​មួក​ដែល​អ្នក​អាច​ពាក់​ទៅបាន​គ្រប់កន្លែង មាន​ប្រសិទ្ធភាព​ក្នុងការ​ការពារ​សក់ ថ្ងាស ច្រមុះ ថ្ពាល់ ក និង​បរិវេណផ្សេងៗទៀត​ពី​ពន្លឺព្រះអាទិត្យ ដែលជា​ដើមហេតុ​នៃ​ការកើតមាន​ស្នាមអុជៗលើ​ស្បែក ស្នាម​ជ្រួញ និង​ការកើត​ជំងឺមហារីក​ស្បែក​ជាដើម។ រកមើល​មួក​ណា​ដែលមាន​ហាម​ធំ ហើយ​ត្រូវចិត្ត​អ្នក ដើម្បីឱ្យ​ប្រាកដថា អ្នកនឹង​ពាក់​វា​គ្រប់ពេល​អ្នកចេញ​ទៅខាង​ក្រៅ ជាពិសេស​ពេល​ដើរលេង​តាម​មាត់សមុទ្រ​តែម្តង។

ក្រែ​ម​ការពារ​កម្តៅថ្ងៃ​ដែលមាន​សារធាតុ​ស័ង្កសី(Zinc) 7-20 % ៈ ហេតុ​អី្វ? ពី​ព្រោះតែ​កាំរស្មី UVA តែងតែមាន​វត្តមាន​ជា​រៀងរាល់ថ្ងៃ សូម្បីតែ​អាកាសធាតុ​កំពុងតែ​ស្រទុំ​ត្រជាក់​ស្រួល​ក៏ដោយហើយ​ដែល​សំខាន់​នោះ​គឺ​សូម្បីតែ​បង្អួច​កញ្ចក់ រួមមាន​ទាំង​កញ្ចក់​រថយន្ត​ក៏​វា​អាច​ជ្រាប​ចូលទៅ​បានដែរ។ ក្រែ​ម​ការពារ​កម្តៅថ្ងៃ​ខ្លះ​មិនអាច​ការពារ UVA បានល្អ​នោះទេ ដូច្នេះ​ក្រៅពី​គិតដល់​កម្រិតSPF ហើយ​នោះ ក្រែ​ម​ការពារ​កម្តៅថ្ងៃ​ក៏ត្រូវ​តែមាន​ផ្ទុក​ជាតិ​ស័ង្កសី​ខ្ពស់(7-20%)ផងដែរ។

ឈុត​ហែល​ទឹក ៈ អ្នកណាៗក៏​ដឹង​ដែរ​ថា ទៅលេង​ទឹកសមុទ្រ ផុតពី​ខោអាវ​ត្រឹមណា គឺ​ខ្មៅ​ត្រឹមហ្នឹង ដូច្នេះ​វិធី​ល្អ​បំផុត​នោះ​គឺ ត្រូវ​ជ្រើសរើស​ឈុត​ហែល​ទឹក​ណា​ដែលមាន​ប្រវែង​វែង​បន្តិច ទើប​អាច​ការពារ​ស្បែ​កបាន​ក្នុងអំឡុងពេល​ងូត-ទឹក​សមុទ្រ​យ៉ាង​សប្បាយរីករាយ។
ក្រែមផ្តល់សំណើម ៈ មិនមែន​តែ​ផ្ទៃមុខ​នោះទេ​ដែល​ត្រូវ​មើលថែ ស្បែក​រាងកាយ​ទាំងមូល​ក៏​សំខាន់​ណាស់ដែរ។ ជាធម្មតា​ពេល​លេង​ទឹកសមុទ្រ​រួច​អ្នក​ប្រាកដជា​ត្រូវ​សម្អាតខ្លួន​ជាមួយ​ទឹកសាប ហើយ​បន្ទាប់ពី​សម្អាតខ្លួន​បាន​ស្អាតហើយ​នោះអ្នក​គប្បី​ចងចាំ​ជានិច្ច​រឿង​បន្ថែមសំណើម​ដល់​ស្បែ​កមុខ និង​ស្បែក​ដងខ្លួន​របស់​អ្នកផង​ណា៎។

វ៉ែនតា ៈ វ៉ែនតា​ដែល​អាច​ការពារ​ពេញ​រង្វង់​ភ្នែក​របស់​អ្នក​គឺជា​វ៉ែនតា​ល្អ​បំផុត​ដែល​អ្នក​គួរតែ​ពាក់​ឱ្យបាន​ជាប់​រាល់​ពេលដែល​អ្នកចេញ​ទៅខាង​ក្រៅ​ប៉ះ​នឹង​ពន្លឺ​ថ្ងៃ ជាពិសេស​នៅក្នុង​ដំណើរ​-កម្សាន្ត​លើ​ឆ្នេរ​ខ្សាច់​នេះ​តែម្តង។ការអនុវត្ត​នៅក្នុង​ថ្ងៃនេះ​អាច​ការពារ​សម្រស់​
រប​ស់​អ្នក​ទាំង​សម្រាប់​ថ្ងៃនេះ និង​នា​ថ្ងៃ​អនាគត ដូច្នេះ​សូមកុំ​ប្រហែស​ឱ្យសោះ​ណា៎ ដើម្បី​សម្រស់​ដ៏​ផូរផង់​របស់​អ្នក៕