សង្គម និងសេដ្ឋកិច្ច - La Reine Media

អាការតាំងគភ៌ថ្មីៗ និង14សញ្ញាបញ្ជាក់ថាអ្នកកំពុងជិតក្លាយជាម្តាយគេហើយ

សម្រាប់អាការរបស់អ្នកតាំងគភ៌រយៈដំបូងៗ តើយើងនឹងដឹងយ៉ាងណាបានថា កំពុងតែមានគភ៌ឬក៏អត់? ព្រោះក្នុងរយៈពេល1សប្តាហ៍ដំបូង អាចនិយាយបានថា ជាអំឡុងពេលដែលមិនសូវបង្ហាញអាការប៉ុន្មានឡើយ ហើយបើអីុចឹង តើនារីៗយើងនឹងដឹង ហើយប្រាកដក្នុងចិត្តយ៉ាងណាបានទៅថា ចាប់ផ្តើមតាំងគភ៌ហើយនោះ? សំណួរនេះគឺជាសំណួរមួយដែលស្ត្រីយើងជាច្រើនចង់ដឹងខ្លាំងណាស់ ដូច្នេះកុំបង្អង់យូរអី ឡារ៉ែន សូមនាំនារីៗយើងទាំងអស់មកពិនិត្យមើលសញ្ញារបស់អ្នកចាប់ផ្តើមមានផ្ទៃពោះក្នុងរយៈពេល1សប្តាហ៍ដំបូងថា តើខ្លួនអ្នកកំពុងមានអាការទាំងនេះដែរឬទេ?

1- វដ្តរដូវមកយឺត ឬបាត់មិនឃើញមកតែម្តងនេះគឺបណ្តាលមកពីរាងកាយយើងកើតមានការចាប់បដិសន្ធិហើយហ្នឹងឯង។
2- ធ្លាក់-សច្រើនជាងប្រក្រតី ៈ កើតពីអ័រម៉ូនអេស្ត្រូជេនមានការប្រែប្រួល ទើបធ្វើឱ្យមានទឹកហូរចេញមកតាមរន្ធស្បូនច្រើនឡើង និងរបូតចេញមកជាធ្លាក់-ស។
3- មានឈាមហូរចេញមកតិចៗ ៈ ស្រដៀងៗគ្នានឹងពេលជិតអស់វដ្ដរដូវប្រចាំខែដែរ ដែលអាចបណ្តាលមកពីតួកំណើតដែលទៅបង្កប់ខ្លួននៅលើសាច់ជញ្ជាំងស្បូន។
4- មានអារម្មណ៍ថាតឹងៗសុដន់ ៈ ដោយសារតែសុដន់នឹងកើតការប្រែប្រួល អាចនឹងមានអារម្មណ៍តឹងណែនស្រដៀងៗគ្នានឹងមុនពេលមានវដ្ដរដូវប្រចាំខែដែរ ឬពេលខ្លះឈឺស្រៀវតិចៗ ដែលអាការនេះនឹងកើតឡើងបន្ទាប់ពីបាត់វដ្ដរដូវប្រចាំខែប្រមាជា1សប្តាហ៍។
5- ដកដង្ហើមញាប់ឡើង ៈ ការដកដង្ហើមលឿន ឬញឹកឡើង កើតឡើងដោយសារតួកំណើតនៅក្នុងគភ៌ត្រូវការអុកស៊ីែហ្ស៊ន ទើបធ្វើឱ្យរាងកាយត្រូវដកដង្ហើមញាប់ឡើងទ្វេដងហ្នឹងឯង។
6- វិលមុខ ងងឹតមុខ ៈ បណ្តាលមកពីអ័រម៉ូន និងសម្ពាធឈាមក្នុងរាងកាយចាប់ផ្តើមមានការប្រែប្រួល អាចនឹងធ្វើឱ្យអ្នកមានអារម្មណ៍វិលមុខ និងងងឹតមុខញឹកញាប់បាន។
7- មានអារម្មណ៍ថាខ្លួនប្រាណក្តៅស្ទិញៗចង់គ្រុន ៈ ដោយសារតែរាងកាយមានសីតុណ្ហភាពខ្ពស់ឡើង។
8- ឈឺបត់ជើងតូចញឹកញាប់ ៈ ការឈឺបត់ជើងតូចញឹកញាប់ក៏ជាសញ្ញាមួយដែលបញ្ជាក់បានថា អ្នកកំពុងចាប់ផ្តើមតាំងគភ៌ហើយ ព្រោះការតាំងគភ៌ រាងកាយនឹងត្រូវប្រើក្រលៀនធ្វើការខ្លាំង ដោយសាររាងកាយត្រូវផលិតឈាមទៅចិញ្ចឹមផ្នែកផ្សេងៗច្រើនឡើង។
9- ងងុយគេងញឹកញាប់ ៈ អ្នកដែលកំពុងចាប់-ផ្តើមតាំងគភ៌ រាងកាយនឹងមានអារម្មណ៍ទន់ល្វើយ ងងុយគេងញឹកញាប់ និងចង់តែគេងយូរៗ ដែលនេះជាលទ្ធផលមកពីកម្រិតអ័រម៉ូនក្នុងរាងកាយដែលប្រែប្រួលហ្នឹងឯង។
10- ចុករួយតាមខ្លួនប្រាណ ៈ នឹងមានអារម្មណ៍ថា ខ្លួនប្រាណញ័រជាប់ជានិច្ច ដោយសាររាងកាយនឹងចាប់ផ្តើមប្រែប្រួល ដើម្បីត្រៀមទប់ទល់ជាមួយការតាំងគភ៌។
11- ទល់លាមក ៈ ដោយសារតែអ័រម៉ូនក្នុងរាងកាយដែលប្រែប្រួលធ្វើឱ្យមានផល ប៉ះពាល់ដល់ប្រព័ន្ធបន្ទោបង់ធ្វើការងារយឺតទើបជាមូលហេតុនៃការទល់លាមក។
12- មានអារម្មណ៍ឆាប់ខឹងមួម៉ៅ ៈ ស្ត្រីជាច្រើនអាច នឹងមានអារម្មណ៍មួម៉ៅឡើងបែបគ្មានមូលហេតុ អារម្មណ៍ងាយឆាប់ប្រែប្រួល ដោយសារតែអ័រម៉ូនប្រូជេស្ទើរ៉ូនមានការប្រែប្រួល។
13- ច្រមុះឆាប់ធុំក្លិន ៈ មិនថាក្លិនអ្វីដែលនៅជុំវិញខ្លួននោះទេ អ្នកដែលកំពុងតាំងគភ៌នឹងអាចដឹងបានលឿនជាងមនុស្សទូទៅដែលជាលទ្ធផលមកពីអ័រម៉ូនអេស្ត្រូជេនដែលកើនឡើងហ្នឹងឯង។
14- លក្ខណៈការហូបចុកផ្លាស់ប្តូរ ៈ អ្នកខ្លះអាចនឹងចង់ទទួលទានរបស់ប្លែកៗ ដែលមិនធ្លាប់ទទួលទាន ឬអ្នកខ្លះក៏អាចនឹងធុញ-ទ្រាន់អាហារដែលខ្លួនធ្លាប់ចូលចិត្ត ឬជួនកាលក៏អាចចង់ទទួលទានរបស់ជូរៗជាដើម។

ទាំងអស់នេះគឺ លក្ខណៈអាការទូទៅដែលកំពុងចង់ប្រាប់អ្នកថា អ្នកកំពុងតែជិតបានក្លាយជាអ្នកម្តាយគេហើយ តែទាំងអស់នេះ ម្នាក់ៗអាចនឹងមានអាការដែលបង្ហាញចេញមកមិនដូចគ្នាទេ អ្នកខ្លះអាចមានច្រើនជាង10ចំណុច ឬអ្នកខ្លះទៀតមានត្រឹមតែ2-3ចំណុចក៏មាន ដូច្នេះវិធីដែលល្អ បើអ្នកចាប់ផ្តើមមានលក្ខណៈ អាការដូចដែលបានប្រាប់ និងសង្ស័យថា កំពុងតាំងគភ៌ឬអត់នោះ ឡារ៉ែន សូមណែនាំឱ្យទៅទិញប្រដាប់ពិនិត្យគភ៌មកពិសោធមើល ឬទៅជួបគ្រូពេទ្យតែម្តងទើបជាការប្រសើរបំផុត៕

November 20, 2017

ពណ៌សក់របស់ក្រុមចម្រៀងប្រុស BTS ធ្វើឱ្យកក្រើកកម្មវិធី American Music Awards

នៅព្រឹកថ្ងៃទី20 ខែវិច្ឆិកា ឆ្នាំ2017 នេះ តាមរយៈសារព័ត៌មាន Daily Mail បានចេញផ្សាយឱ្យដឹងថា ក្រុមតារាចម្រៀងប្រុសដ៏ល្បីរបស់ប្រទេសកូរ៉េខាងត្បូង BTS ត្រូវបានអញ្ជើញចូលរួមជាកិត្តិយសនៅក្នុងកម្មវិធី AMAs (American Music Awards) ដែលខណៈពេលបង្ហាញវត្តមានរបស់ពួកគេនៅក្នុងពិភពសិល្បៈហូលីវូដនោះ ពួកគេបានធ្វើឱ្យកម្មវិធីទាំងមូលមានភាពភ្ញាក់ផ្អើល និងកក្រើកជាខ្លាំងចំពោះការរចនាម៉ូដសម្លៀកបំពាក់ និងពណ៌សក់ចម្រុះគ្នាតែម្ដង។

ក្រុមតារាចម្រៀងប្រុសខាងលើនេះបានធ្វើឱ្យការចូលរួមជាលើកដំបូងរបស់ពួកគេ ក្លាយជាទំព័រប្រវត្តិសាស្ត្រថ្មីនៅលើទឹកដីសហរដ្ឋអាមេរិក ព្រមទាំងបានសម្ដែងនូវបទចម្រៀងល្បីរបស់ពួកគេគឺបទ DNA។ បើតាមរយៈទស្សនាវដ្តី Vogue ក៏បានឱ្យដឹងផងដែរថា ឈុតសម្លៀកបំពាក់ដែលក្រុមចម្រៀងប្រុសមួយនេះបានលើកយកមកបង្ហាញនៅក្នុងកម្មវិធីខាងលើនោះ ត្រូវបានរចនាម៉ូដដោយលោក Anthony Vaccarello ដែលជាអ្នកជំនាញរចនាម៉ូដសម្លៀកបំពាក់ឈុតខ្មៅ បែបរ៉ុក ប្រចាំប្រ៊េនដ៍ល្បី Saint Laurent។

សូមជម្រាបបន្ថែមថា ក្រុមចម្រៀង BTS បានចូលប្រឡូកនៅក្នុងសិល្បៈចម្រៀង Kpop នៅអំឡុងឆ្នាំ2013 ហើយទទួលបានប្រជាប្រិយភាព និងភាពជោគជ័យជាខ្លាំងរហូតមកដល់បច្ចុប្បន្ននេះផងដែរ៕

November 20, 2017

យុវជនមួយក្រុមបង្កើតគម្រោងលក់សៀវភៅដើម្បីជួយអ្នកនិពន្ធ និងនិស្សិត

«ដោយមើលឃើញពីតម្រូវការផ្នែកអាន និងចង់ជំរុញវប្បធម៌នៃការអាននៅកម្ពុជាឱ្យកាន់តែផុសផុលឡើង ពួកយើងក៏បង្កើតកម្មវិធីមួយដើម្បីលក់សៀវភៅរបស់អ្នកនិពន្ធកម្ពុជាឱ្យបានទូលំទូលាយ» នេះជាការលើកឡើងរបស់យុវជន រ៉ា វ៉ាន ស្ថាបនិកនៃបណ្ណាគារ “ស្លឹករឹត” ដែលជាកន្លែងលក់សៀវភៅនៅតាមសាកលវិទ្យាល័យ ឬអាចដឹកជញ្ជូនដល់ទីកន្លែងនៅក្នុងទីក្រុងភ្នំពេញ។

ជានិស្សិតសាកលវិទ្យាល័យ និងជាយុវជនម្នាក់ដែលស្រឡាញ់ការងារសង្គម រ៉ា វ៉ាន បានថ្លែងថា ការអានមានសារៈសំខាន់ខ្លាំងណាស់សម្រាប់សង្គមមួយ ព្រោះវាបានជួយទាំងផ្នែកអប់រំចិត្តសាស្ត្រដល់ប្រជាពលរដ្ឋ អប់រំចំណេះដឹង អប់រំជំនាញ និងជំរុញឱ្យមានរឿងល្អៗកើតឡើងនៅក្នុងការរស់នៅរបស់មនុស្សម្នាក់ៗ ដែលជាកោសិកាយ៉ាងសំខាន់របស់សង្គម។ ការអានអាចកាត់បន្ថយអំពើហិង្សាក្នុងសង្គម ហើយថែមទាំងជាវិធីសាស្ត្រយ៉ាងល្អបំផុតក្នុងការបណ្តុះនូវភាពជាអ្នកដឹកនាំសម្រាប់ប្រជាជន តែជាអកុសល នៅក្នុងប្រទេសរបស់យើង ការអានហាក់នៅមានកម្រិតនៅឡើយក្នុងចំណោមប្រជាជន និងជាពិសេសគឺយុវជន។

យុវជន រ៉ា វ៉ាន បាននិយាយថា៖ «ការដែលយុវជនមិនចូលចិត្តអាន អាចមកពីគាត់មិនទាន់មានទម្លាប់អាន និងអាចមកពីគាត់មិនដឹងថា តើគាត់ត្រូវរកឯកសារដែលគាត់ចង់បានពីប្រភពណាខ្លះ ហេតុនេះទើបពួកយើងព្យាយាមបង្កើតកម្មវិធីបង្ហាញសៀវភៅដែលមានគុណប្រយោជន៍ទៅកាន់យុវជន ដើម្បីជាជម្រើសក្នុងការទិញ ឬជ្រើសរើសយកសៀវភៅមកអាន»។

យុវជនខាងលើបានលើកឡើងផងដែរថា បណ្ណាគារ “ស្លឹករឹត” ជាកន្លែងមួយដែលផ្តល់ផលប្រយោជន៍ដល់អ្នកនិពន្ធសៀវភៅ អ្នកលក់សៀវភៅ និងអ្នកអានសៀវភៅ។ សម្រាប់អ្នកនិពន្ធ គឺគាត់អាចដាក់លក់សៀវភៅរបស់គាត់ដោយកំណត់ថ្លៃដូចលក់ឱ្យបណ្ណាគារនានាដែរ ហើយគាត់នឹងទទួលបានការផ្សព្វផ្សាយដោយឥតគិតថ្លៃពីក្រុមយុវជនយើងតាមរយៈការដាក់បង្ហាញនៅតាមសាកលវិទ្យាល័យ នៅតាមសិក្ខាសាលាមួយចំនួន និងបណ្តាញសង្គម។ សម្រាប់និស្សិតដែលជាក្រុមការងារវិញ គាត់នឹងបានទទួលផលប្រយោជន៍ពីកម្រៃចំណេញដែលអ្នកនិពន្ធកំណត់ឱ្យហើយកម្រៃទាំងអស់នេះ ថ្វីដ្បិតតែមិនច្រើនក៏ដោយ តែវាបង្ហាញពីទឹកចិត្តនៃការចែករំលែកវប្បធម៌នៃការអាន និងថវិកាដែលកើតចេញពីអ្វីដែលខ្លួនស្រឡាញ់។ ចំណែកឯសាធារណជនវិញ គាត់នឹងអាចទទួលបានព័ត៌មានពីសៀវភៅនានាតាមបណ្តាញសង្គម និងវេទិកាដែលពាក់ព័ន្ធនឹងការអប់រំ ហើយព័ត៌មានទាំងអស់នោះអាចជាជម្រើសនៃចំណេះដឹងដែលអ្នកកំពុងតាមរកផងដែរ។

សហស្ថាបនិកបណ្ណាគារ “ស្លឹករឹត” យុវជន រស់ សុភារម្យ បានលើកឡើងថា ថ្វីដ្បិតតែពេលនេះក្រុមការងារមានសមាជិកច្រើនគួរសម និងមានគ្រឹះស្ថានបោះពុម្ពផ្សាយមួយចំនួនសហការហើយក្តី តែយុវជនកម្ពុជាមួយចំនួនហាក់មិនទាន់ចាប់អារម្មណ៍ខ្លាំងលើការអាននៅឡើយទេ។ ហេតុនេះការជំរុញ និងការផ្សព្វផ្សាយពីការអានជារឿងសំខាន់មួយដែលពួកយើងត្រូវធ្វើ ព្រោះថាចាប់ផ្តើមពីការបង្កើតសេវាលក់នេះ យើងនឹងបង្កើនការផ្សព្វផ្សាយតាមគ្រប់រូបភាពដើម្បីឱ្យមនុស្សគ្រប់គ្នាបានដឹង ហើយអាចគិតថាការទិញសៀវភៅពីបណ្ណាគារ “ស្លឹករឹត” ជាជម្រើសយ៉ាងងាយស្រួលមួយដែលគាត់មិនបាច់ពិបាកចំណាយពេលច្រើន ព្រោះយើងអាចមានការដឹកជញ្ជូនសៀវភៅជូនដល់កន្លែង។

គួរបញ្ជាក់ផងដែរថា នៅពេលបច្ចុប្បន្ននេះ បណ្ណាគារ “ស្លឹករឹត” អាចលក់សៀវភៅចេញបានប្រមាណពី 10 ទៅ 20ក្បាលជារៀងរាល់ថ្ងៃ៕

November 20, 2017

អ្នកឯកទេសអង់គ្លេស នឹងរៀបចំបណ្តុះបណ្តាលជំនាញដល់កម្មករនៅកម្ពុជា

ភ្នំពេញ៖ លោក Jonathan Ledger ជាអ្នកឯកទេសខាងកិច្ចការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៃអគ្គនាយកដ្ឋានពាណិជ្ជកម្មអន្តរជាតិរបស់ចក្រភពអង់គ្លេសបានសន្យាថា លោកនឹងបើកវគ្គបណ្តុះបណ្តាលជំនាញនៅកម្ពុជាដើម្បីឱ្យសាធារណជន ពិសេសកម្មករ-កម្មការិនីបានសិក្សាជំនាញពួកគេបន្ថែមឱ្យកាន់តែប្រសើរ។

ការសន្យាធ្វើឡើងនៅពេលដែលលោក Jonathan Ledger បានចូលជួបពិភាក្សាការងារជាមួយថ្នាក់ដឹកនាំជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អ៊ិត សំហេង កាលពីថ្ងៃទី17 ខែវិច្ឆិកា ម្សិលមិញនេះ។

គោលបំណងនៃជំនួបនេះគឺ ដើម្បីស្វែងយល់ពីប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅកម្ពុជា ទន្ទឹមនឹងនេះភាគីអង់គ្លេសក៏មានបំណងចង់ចែករំលែកបទពិសោធពាក់ព័ន្ធ និងប្រព័ន្ធនៃការបណ្តុះបណ្តាលជំនាញដ៏ល្អនៅអង់គ្លេស និងសមត្ថភាពក្នុងវិស័យនេះ។

ក្នុងការពិភាក្សាខាងលើលោក Jonathan Ledger បានសន្យាថា នឹងបន្តការខិតខំបង្កើតឱ្យមានជាគម្រោងកិច្ចសហប្រតិបត្តិលើការអភិវឌ្ឍប្រព័ន្ធ TVET នេះ ហើយបានទទួលការគាំទ្រពីស្ថានទូតអង់គ្លេសប្រចាំព្រះរាជាណាចក្រកម្ពុជារួចហើយ។ ជាជំហានដំបូង លោកនឹងរៀបចំឱ្យមានជាទស្សនកិច្ចសិក្សាជូនមន្ត្រីបច្ចេកទេសកម្ពុជាទៅកាន់ទីក្រុងឡុងដ៏ ដើម្បីសិក្សាស្វែងយល់ជាក់ស្តែង សម្រាប់ជាមួលដ្ឋានយកមកអភិវឌ្ឍវិស័យនេះនៅកម្ពុជា។

ជាមួយគ្នានេះឯកឧត្តមរដ្ឋមន្ត្រី អ៊ិត សំហេង បានថ្លែងអំណរគុណចំពោះលោក Jonathan Ledger ដែលបានចាប់អារម្មណ៍ក្នុងការជួយដល់កម្ពុជានូវការអភិវឌ្ឍប្រព័ន្ធ TVET នេះនៅកម្ពុជាដើម្បីឆ្លើយតបបានទៅនឹងការវិវឌ្ឍរីកចម្រើនរបស់ប្រទេសកម្ពុជា ដែលរាជរដ្ឋាភិបាលកម្ពុជាបានដាក់ចេញនូវគោលនយោបាយប្រកបដោយប្រសិទ្ធភាព ធ្វើឱ្យសេដ្ឋកិច្ចរបស់កម្ពុជាមានការវិវឌ្ឍរីកចម្រើនគួរឱ្យកត់សម្គាល់។ ទន្ទឹមនឹងនោះ ឯកឧត្តមរដ្ឋមន្ត្រីបានវាយតម្លៃខ្ពស់ចំពោះបទពិសោធរបស់ប្រទេសអង់គ្លេសដែលបានបង្កើតឱ្យមានប្រព័ន្ធ TVET តាំងពីឆ្នាំ1632 ដោយចាត់ទុកថា គុណភាពលំដាប់ពិភពលោកដែលតាមរយៈប្រព័ន្ធនេះបានធ្វើឱ្យសមត្ថភាពកម្លាំងពលកម្មរបស់អង់គ្លេសមានជំនាញខ្ពស់ចូលរួមអភិវឌ្ឍប្រទេសអង់គ្លេសឱ្យក្លាយទៅជាប្រទេសអភិវឌ្ឍន៍បានយ៉ាងឆាប់រហ័ស។

គួរបញ្ជាក់ថា ភាគីទាំងពីរបានមើលឃើញពីសារៈសំខាន់ក្នុងការបើកច្រកកិច្ចសហប្រតិបតិ្តការ ចែករំលែកបទពិសោធបង្កើតភាពជាដៃគូ ដែលមានសាកលវិទ្យាល័យ វិទ្យាស្ថាន និងអង្គការរបស់រដ្ឋាភិបាលអង់គ្លេសជាច្រើនកំពុងចាប់អារម្មណ៍ក្នុងការផ្តល់កិច្ចសហប្រត្តិបត្តិការភាពជាដៃគូជាមួយកម្ពុជា៕

November 20, 2017

Juventus ចាញ់ Sampdoria ខណៈដែល Buffon និង Barzagli មិនចូលលេង

ប្រធានក្រុម Gianluigi Buffon និងខ្សែការពារ Andrea Barzagli ត្រូវបានអនុញ្ញាតឲ្យសម្រាក ដោយក្លិប Juventus បន្ទាប់ពីការធ្លាក់ចេញពី World Cup របស់ក្រុមជម្រើសជាតិអ៊ីតាលី ខណៈដែលក្រុមម្ចាស់ការពារតំណែងជើងឯកក្របខ័ណ្ឌ Serie A មួយនេះ បានចាញ់នៅលើទឹកដីក្រុម Sampdoria ក្នុងលទ្ធផល 3-2 កាលពីថ្ងៃអាទិត្យ។

Juventus បានដេញតាមពីក្រោយដល់ទៅ3គ្រាប់ក្នុងពេលជិតបញ្ចប់ការប្រកួត ក្រោយពីខ្សែប្រយុទ្ធកូឡុំប៊ី Duvan Zapata ខ្សែបម្រើអ៊ុយរូហ្គាយ និងខ្សែការពារអ៊ីតាលី Gian Marco Ferrari បានរកគ្រាប់បាល់បញ្ចូលទីដូចគ្នាក្នុងតង់ទី2សម្រាប់ក្រុមម្ចាស់ផ្ទះ។ ក្រុមម្ចាស់ការពារតំណែងជើង6សម័យកាលមួយនេះបានរកគ្រាប់បាល់បាន2គ្រាប់វិញនៅនាទីបន្ថែម ដោយខ្សែប្រយុទ្ធ Gonzalo Higuain បានស៊ុតបាល់ប៉េណាល់ទី1គ្រាប់ ហើយកីឡាករបម្រុង Paulo Dybala បានបន្ថែមគ្រាប់បាល់ទី2នៅមុនពេលសំឡេងកញ្ចែបញ្ចប់ការប្រកួតបន្លឺឡើង។

ក្រុម Juventus បានធ្លាក់ទៅឈរក្នុងចំណាត់ថ្នាក់លេខ3 នៅលើតារាងនៃក្របខ័ណ្ឌរបស់អ៊ីតាលី ដោយមាន4ពិន្ទុតាមពីក្រោយក្រុម Napoli ដែលបានកត់ត្រាជ័យជម្នះ 2-1 លើក្រុម AC Milan កាលពីថ្ងៃសៅរ៍ ខណៈដែល Inter Milan ឡើងទៅឈរលេខ2 ក្រោយពីបានយកឈ្នះលើក្រុម Atalanta ក្នុងលទ្ធផល 2-។ ក្រុម Napoli មាន35ពិន្ទុពីការប្រកួត13លើក ដោយនាំមុខ2ពិន្ទុពីលើក្រុម Inter Milan ខណៈដែលក្រុម Juventus មាន31ពិន្ទុ ហើយក្រុម Roma កំពុងតែស្ថិតក្នុងចំណាត់ថ្នាក់លេខ4 ដោយដេញតាមពីក្រោយក្រុមលេខ3 ចំនួន1ពិន្ទុ ខណៈដែលនៅសល់ការប្រកួត1លើកទៀតក្នុងដៃ ក្រោយពីបានផ្តួលក្រុម Lazio ក្នុងការប្រកួតរវាងក្រុមស្ថិតក្នុងទីក្រុង Rome តែម្តង កាលពីថ្ងៃសៅរ៍។

លោក Massimiliano Allegri គ្រូបង្វឹករបស់ក្រុម Juventus បានឲ្យដឹងថា៖ «នេះគឺជាការទះមួយកំផ្លៀងចំផ្ទៃមុខដោយឥតរំពឹងទុកមួយ»៕

ប្រភពពី៖ BBC

November 20, 2017

លោក Moyes អាម៉ាស់មុខថ្ងៃបើកឆាក ខណៈ Watford ផ្តួលក្រុមញញួរធំ

លោក David Moyes ត្រូវបានគេបន្យល់ទុកឲ្យនូវទំហំការងារដ៏ធំមួយនៅពីមុខរូបលោក ខណៈដែលក្រុមញញួរធំ West Ham បានរងបរាជ័យក្នុងលទ្ធផល 2-0 នៅលើទឹកដីក្រុម Watford កាលពីថ្ងៃអាទិត្យ។

ការប្រកួតជាលើកទី1របស់អ្នកចាត់ការទូទៅថ្មីនៃក្រុមញញួរធំរូបនេះ បានបញ្ចប់ទាំងការខកចិត្ត ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Will Hughes និង Richarlison បានធ្វើឲ្យក្រុម Watford វិលទៅកាន់ផ្លូវនៃជ័យជម្នះវិញ។ បើទោះបីលោក Moyes បានដឹងថា លោកត្រូវបានគេបន្សល់ទុកនូវតំបន់ការពារដ៏អន់បំផុតក្នុងក្របខ័ណ្ឌកំពូលក៏ដោយ ប៉ុន្តែ លោកក៏ត្រូវតែដោះស្រាយទៅលើបញ្ហាតំបន់ប្រយុទ្ធផងដែរ។ ក្រុមញញួរធំមួយនេះនៅតែស្ថិតក្នុងតំបន់កាត់ចោលនៃតារាងក្របខ័ណ្ឌ Premier League ដោយដេញតាមពីក្រោយក្រុមស្ថិតក្នុងតំបន់មានសុវត្ថិភាពចំនួន1ពិន្ទុ ក្រោយពីលោក Moyes បានចាប់ផ្តើមធ្វើការត្រួតពិនិត្យលើបញ្ហាផ្សេងៗដែលធ្វើឲ្យលោក Slaven Bilic បាត់បង់តំបន់ការពាររបស់លោក។

បើទោះបីជួបពេលវេលាមិនជោគជ័យក្រោយពីដឹកនាំឲ្យក្រុម Sunderland ធ្លាក់ចេញពីក្របខ័ណ្ឌ Premier League កាលពីរដូវកាលមុនក៏ដោយ ប៉ុន្តែ លោក Moyes បានទទួលយកកិច្ចសន្យារយៈពេលខ្លី ជាមួយនឹងក្រុម West Ham។ ការបរាជ័យរបស់លោកនៅឯក្លិប Sunderland, Manchester United និង Real Sociedad បានបង្ខូចកេរិ៍្តឈ្មោះដ៏ល្អឥតខ្ចោះរបស់លោកនៅឯក្លិប Everton ហើយគ្រូបង្វឹកសញ្ជាតិស្កុតឡេនរូបនេះ អាចនឹងប្រឈមមុខនឹងការខកចិត្តមួយផ្សេងទៀត។ លោក Moyes បានឲ្យដឹងថា៖ «ខ្ញុំតែងតែគិតថា នេះគឺជាការងារដ៏ធំមួយ។ កីឡាករឆ្នើមៗមួយចំនួនដែលមានកេរិ៍្តឈ្មោះបានធ្វើឲ្យខ្ញុំខកចិត្តយ៉ាងខ្លាំង។ ខ្ញុំបានគិតថា ពួកគេនឹងបង្ហាញខ្ញុំឲ្យបានច្រើនជាងនេះ។ ពួកគេត្រូវតែបង្ហាញខ្ញុំពីមូលហេតុដែលពួកគេបានទទួលកេរិ៍្តឈ្មោះទាំងនោះ»៕

ប្រភពពី៖ Daily Mail

November 20, 2017

ហេតុអី្វស្ត្រីមានគភ៌ចាំបាច់ត្រូវទទួលទានផ្លែឈើស្រស់?

ផ្លែឈើគួរតែត្រូវបានរួមបញ្ចូលទៅក្នុងពេលអាហារចម្បងៗរបស់ស្ត្រីមានគភ៌ផងដែរ ព្រោះសារធាតុអាហារសំខាន់ៗដែលមាននៅក្នុងផ្លែឈើដូចជា បេតាឃែរ៉ូធីន មានចំណែកសំខាន់ក្នុងការអភិវឌ្ឍសាច់ភ្នាស និងកោសិកាសម្រាប់ប្រព័ន្ធការពារជំងឺរបស់ទារក រួមទៅដល់ការជួយសាងធ្មេញ និងឆ្អឹងឱ្យរឹងមាំ ព្រមទាំងផ្លែឈើដែលសម្បូរទៅដោយអាស៊ីតហ្វូលិក ដែលនឹងជួយការពារអាការខុសប្រក្រតីរបស់ទារកនៅក្នុងគភ៌បានទៀតផង។ តើផ្លែឈើអ្វីខ្លះដែលស្ត្រីមានគភ៌គួរតែទទួលទាន សូមតាមដានជាបន្ត៖

• ផ្លែ អេព្រីខត់(Apricot) សម្បូរទៅដោយវីតាមីន A, C, E, បេតាឃែរ៉ូធីន, ហ្វូស្វ័រ, ស៊ិលិខន, កាល់ស្យូម និងប៉ូតាស្យូម មានចំណែកជួយក្នុងការអភិវឌ្ឍសុខភាពរបស់ទារកក្នុងគភ៌និងធាតុដែកដែលជួយការពារជំងឺស្លេកស្លាំងទៀតផង។ ស្ត្រីមានគភ៌គួរទទួលទានផ្លែអេព្រីខត់ 2-4ផ្លែក្នុងមួយថ្ងៃ។
• ផ្លែប៉ោម សម្បូរទៅដោយវីតាមីន A, E, D និងជាតិស័ង្កសី(Zinc) ជួយបង្កើនប្រព័ន្ធការពារជំងឺ និងភាពរឹងប៉ឹងមាំមួនរបស់ទារកក្នុងគភ៌កាត់បន្ថយភាពប្រថុយប្រថានពីការកើតរោគហឺត និងរោគឃ្លង់នៅលើក្មេងបានល្អទៀតផង។
• ផ្លែស្វាយទុំ សម្បូរទៅដោយវីតាមីន C ជួយគ្រប់គ្រងប្រព័ន្ធការរំលាយអាហាររបស់ស្ត្រីមានគភ៌ កាត់បន្ថយអាការទល់លាមក និងសម្រាលអាការឆ្លងមេរោគក្នុងអំឡុងពេលមានគភ៌។
• ផ្លែស្ត្រប៊ើរី សម្បូរទៅដោយវីតាមីន C, A, B1, B2, ហ្វូលេត, ធាតុដែក, ម៉ាញេស្យូម, ហ្វ្លាវ៉ូណយដ៍, ស័ង្កសី និងកាកសរសៃអាហារ ជួយបញ្ចុះសម្ពាធឡើងខ្ពស់របស់ស្ត្រីខណៈមានគភ៌ ការពារអាការខុសប្រក្រតីខាងខួរក្បាលរបស់ទារក។
• ផ្លែចេកទុំ សម្បូរទៅដោយវីតាមីន C, B6,ហ្វូលេត, ប៉ូតាស្យូម និងម៉ាញេស្យូមដែលជួយការពារការប្រសូតមុនកំណត់របស់ទារក និងជួយការពាររោគសរសៃឈាមក្នុងខួរក្បាល និងសភាវជ្រៀតជ្រែកដែលពាក់ព័ន្ធនឹងការតាំងគភ៌ផ្សេងៗ។

ចុងក្រោយគេគឺ ផ្លែក្រូច ជាផ្លែឈើសម្រាប់ស្ត្រីមានគភ៌ ព្រោះសម្បូរទៅដោយវីតាមីន Cនិងហ្វូលេតដែលជួយបំប៉នឱ្យស្ត្រីមានគភ៌មានទឹកដោះដែលពេញទៅដោយសារធាតុអាហារ និងជួយសាងគ្រាប់ឈាមក្រហម និងជួយការពាររោគផ្សេងៗដែលធ្វើឱ្យទារកពិការតាំងពីកំណើតបានទៀតផង៕

November 20, 2017

កីឡាដែលស័ក្តិសមសម្រាប់ស្ត្រីមានគភ៌

ក្រៅពីការជួយជំរុញឱ្យម្តាយចិញ្ចឹមកូនដោយទឹកដោះខ្លួនឯងយ៉ាងតិចបំផុត6ខែ និងឱ្យកូនបានញ៉ាំទឹកដោះគួបផ្សំជាមួយអាហារតាមវ័យជាបន្តបន្ទាប់ដល់2ឆ្នាំហើយនោះ ក្រុមវេជ្ជបណ្ឌិតជំនាញនៅបានគាំទ្រឱ្យស្ត្រីមានគភ៌មានសុខភាពរឹងប៉ឹង ដោយការហាត់ប្រាណក្នុងកម្រិតសមរម្យទៀតផង ដោយបានណែនាំដូចខាងក្រោម។

ស្ត្រីមានគភ៌មិនមែនជាអ្នកជំងឺទេ តែវាជាអំឡុងពេល ដែលស្ត្រីគួរមានរាងកាយរឹងប៉ឹងបំផុតក្នុងជីវិត ព្រោះរាងកាយស្ត្រីមានគភ៌ត្រូវមើលថែទាំជីវិតដល់ទៅ2ក្នុងពេលតែមួយ និងកំពុងត្រៀមខ្លួនចូលឆ្ពោះទៅរកកម្មវិធីការប្រសូត ដូច្នេះការហាត់ប្រាណនឹងជួយឱ្យសុខភាពរាងកាយរឹងមាំនិងការធ្វើការងាររបស់ប្រព័ន្ធលំហូរវិលរបស់ឈាមឆ្ពោះទៅកាន់ទារកក្នុងគភ៌កាន់តែល្អឡើងបានទទួលសារធាតុអាហារគ្រប់គ្រាន់ និងចម្រើនធំធាត់បានល្អ។ ក្រៅពីនេះនៅពេលអ្នកម្តាយធ្វើលំហាត់ប្រាណ រាងកាយនឹងបញ្ចេញអ័រម៉ូនអេន-ដូហ្វ៊ីន ឬអ័រម៉ូននៃសេចក្តីសុខធ្វើឱ្យអ្នកម្តាយមានសភាវខាងអារម្មណ៍ល្អ ដែលមានចំណែកធ្វើឱ្យទារករឹងប៉ឹង និងមានអារម្មណ៍ភ្លឺថ្លា។

វេជ្ជបណ្ឌិតជំនាញបានណែនាំបន្ថែមថាស្ត្រីមានគភ៌ដែលហាត់ប្រាណត្រូវពិចារណាពីសភាវនិងគ្រឹះភាពរឹងមាំរបស់រាងកាយជាមុនសិនថា តើមុនពេលតាំងគភ៌ធ្លាប់ហាត់ប្រាណយ៉ាងជាប់លាប់ដែរឬទេ? ហាត់ប្រាណខ្លាំងក្លាប៉ុនណា?នៅពេលតាំងគភ៌ហើយនៅអាចហាត់ប្រាណជាបន្តបន្ទាប់បានក្នុងរយៈវេលា និងភាពខ្លាំងក្លារបស់ការហាត់ប្រាណដែលស័ក្តិសមចំពោះសភាពរាងកាយ និងសភាវការតាំងគភ៌ក្នុងអំឡុងអាយុគភ៌ផ្សេងៗ រួមទាំងត្រូវឧស្សាហ៍សង្កេតមើលអាការដែលកើតឡើងក្នុងខណៈពេលហាត់ប្រាណឬក្រោយពេលហាត់ប្រាណហើយផង ដូចជា បើមានអាការនឿយល្វើយ បញ្ជាក់ថា អ្នកហាត់ប្រាណខ្លាំងជ្រុលពេកហើយ ហើយចំពោះស្ត្រីមានគភ៌ដែលចាប់អារម្មណ៍ការហាត់ប្រាណ តែរាងកាយមានសភាវជ្រៀតជ្រែកពីអាការផ្សេងៗនោះអាចប្រឹក្សាជាមួយគ្រូពេទ្យជំនាញបាន។

កម្រិតកំណត់ និងចំណុចគួរប្រយ័ត្នក្នុងការហាត់ប្រាណរបស់ស្ត្រីមានគភ៌

1/ ចាប់ផ្តើមដោយការហាត់ប្រាណបែបស្រាលៗ នៅពេលរាងកាយស៊ាំធ្លាប់ហើយ ទើបអាចបង្កើនកម្រិតភាពលំបាកបាន។

2/ ស្ត្រីមានគភ៌ដែលអាយុគភ៌នៅមិនទាន់ដល់3ខែ មិនគួរហាត់ប្រាណក្នុងកន្លែងដែលធាតុអាកាសក្តៅ និងសើមឡើយ។

3/ ចៀសវាងការត្រាំក្នុងទឹកដែលមានសីតុណ្ហភាពក្តៅឧណ្ហៗខ្លាំងលើសកម្រិត។

4/ ចៀសវាងក្បាច់ដែលពន្យឺតពង្រឹងខ្លួនក្បាច់ដែលប្រថុយប្រថាននឹងការប៉ះពាល់ជាមួយផ្ទៃ ឬក្បាច់ដែលស្ត្រីមានគភ៌ត្រូវបញ្ចេញកម្លាំងខ្លាំង។

5/ មិនគួរសម្រុកហាត់ប្រាណរហូតរាងកាយមានអារម្មណ៍ថា នឿយល្វើយឡើយ។

6/ គ្រប់ពេលដែលហាត់ប្រាណគួរទទួលទានទឹកស្អាត ដើម្បីបំពេញជំនួសញើសដែលបាត់បង់ទៅ។

7/ បើមានអារម្មណ៍ថា ដកដង្ហើមមិនទាន់ឈឺដើមទ្រូង វិលមុខ រកកលខ្យល់ មានឈាម ឬវត្ថុរាវចេញមកតាមរន្ធស្បូន ឬមាន អាការឈឺដោយសារស្បូនបង្រួញខ្លួន (ច្រើនជាង6-8ដងក្នុង1ម៉ោង) គួរបញ្ឈប់ការហាត់ប្រាណភ្លាម និងប្រញាប់ទៅជួបគ្រូពេទ្យជំនាញជាបន្ទាន់ដើម្បីសុវត្ថិភាព។

កីឡាដែល ឡារ៉ែន ចង់ណែនាំសម្រាប់ស្ត្រីមានគភ៌

1/ ហែលទឹក

ជួយធ្វើឱ្យមានអារម្មណ៍ធូរស្រាល និងសប្បាយខ្លួន សាច់ដុំគ្រប់ផ្នែករបស់រាងកាយរឹងមាំ។

2/ ការហ្វឹកហាត់យ៉ូហ្កា

ជួយឱ្យអាចគ្រប់គ្រងខ្យល់ដង្ហើម សាច់ដុំរឹងមាំធូរស្រាល មានសតិស្មារតី និងសមាធិក្នុងអំឡុងពេលប្រសូត។

3/ រាំអ៊ែរ៉ូប៊ិក ធ្វើចលនារាងកាយ

ជួយធ្វើចលនាសាច់ដុំស្ទើរតែគ្រប់ផ្នែកក្នុងរាងកាយធ្វើឱ្យមានអារម្មណ៍ធូរស្រាល។

ទាំងអស់នេះ ស្ត្រីមានគភ៌អាចហាត់ប្រាណ បានយ៉ាងជាប់លាប់រៀងរាល់ថ្ងៃ ឬមួយថ្ងៃខានមួយថ្ងៃ យ៉ាងតិចក្នុងម្តងៗ 30នាទី តាមក្បួនខ្នាតនៃការហាត់ប្រាណរបស់ស្ត្រីមានគភ៌៕

November 20, 2017

តើនរណាមួយជាអ្នកគ្រងមកុដកញ្ញាឯក World Miss University ប្រចាំកម្ពុជា

ភ្នំពេញ៖ កាប្រកួតកញ្ញាឯកសាកលវិទ្យាល័យពិភពលោក នៃព្រះរាជាណាចក្រកម្ពុជា បានចាប់ផ្តើមជាផ្លូវការនៅថ្ងៃនេះ ជាមួយនឹងការប្រកាសនូវបេក្ខនារីគួរឲ្យស្រលាញ់ចំនួន 20រូប ដែលមកពីសាកលវិទ្យាល័យផ្សេងៗក្នុងព្រះរាជាណាចក្រកម្ពុជា។

ការប្រកួតក្នុងប្រទេស នឹងស្វែងរកម្ចាស់ជ័យលាភីតំណាងប្រទេសកម្ពុជាដើម្បីគ្រងមកុដកញ្ញាឯកសាកលវិទ្យាល័យពិភពលោកវគ្គផ្តាច់ព្រ័ត្រ ដែលកម្ពុជាជាម្ចាស់ផ្ទះក្នុងការប្រារព្ធពីធីនៅថ្ងៃទី20 ខែធ្នូ ឆ្នាំ2017។

កាប្រកួតកញ្ញាឯកសាកលវិទ្យាល័យពិភពលោក គឺជាព្រឹត្តិការណ៍ដើម្បីជ្រើសរើសបេក្ខភាពតំណាង World Miss University Peace Corps ជាមួយនឹងតម្លៃស្នូលនៃការលើកកម្ពស់សន្តិភាពពិភពលោក តាមរយៈ ចលនាសន្តិភាពសម្រាប់ការរួបរួមគ្នារបស់ពិភពលោក ដូចពាក្យស្លោក “ក្នុងពិភពលោកមួយ មនុស្សធម៌ ប្រៀបបានដូចជាបងប្អូនប្រុសស្រី” “ចលនាបរិស្ថាននៃមនុស្សធម៌ដើម្បីរស់នៅលើភពផែនដី។

នេះគឺជាលើកដំបូងដែលការប្រកួតនេះត្រូវបានគេប្រារព្ធនៅក្នុងប្រទេសកម្ពុជា ដោយមានការអនុញ្ញាតពីក្រសួងទេសចរណ៍ និងគណៈកម្មការរៀបចំកម្មវិធីការប្រកួតកញ្ញាឯកសាកលវិទ្យាល័យពិភពលោក។

រាត្រីគ្រងមកុដនៃកម្មវិធីប្រកួតកញ្ញាឯកសាកលវិទ្យាល័យពិភពលោកនៃព្រះរាជាណាចក្រកម្ពុជា 2017 នឹងប្រារព្ធនៅថ្ងៃទី22 ខែវិច្ឆិកា ឆ្នាំ2017 នៅសាល1 នៃសណ្ឋាគារ សូហ្វីតែល ភ្នំពេញ ភូគីត្រា នៅវេលាម៉ោង 7:០០ ល្ងាច។

សូមអញ្ជើញទៅជួបជាមួយបេក្ខនារីគួរឲ្យស្រលាញ់ទាំង 20រូប ក្នុងការប្រកួតដើម្បីគ្រងតំណែង កញ្ញាឯកសាកលវិទ្យាល័យពិភពលោកនៃព្រះរាជាណាចក្រកម្ពុជា 2017 ទាំងអស់គ្នា៕

November 18, 2017

គម្រោងខុនដូ The Parkway បើកលក់ជាផ្លូវការ បន្ទាប់ពីបង្ហាញភាពរឹងមាំរបស់ខ្លួន

បន្ទាប់ពីធ្វើការអភិវឌ្ឍអស់រយៈពេល 7ខែ គម្រោងខុនដូ The Parkway បានបើកលក់ជាផ្លូវការដើម្បីផ្ដល់ជូនអតិថិជនដែលមានបំណងចង់បានបន្ទប់ស្នាក់នៅយ៉ាងល្អនៅក្នុងគម្រោងនេះ ។

លោក សួ សុខថេង នាយកប្រតិបត្ដិនៃក្រុមហ៊ុន Parkway Investment Co., Ltd បានលើកឡើងថា អ្វីដែលធ្វើឱ្យយើងសម្រេចចិត្ដបោះទុនវិនិយោគលើគម្រោង The Parkway ព្រោះយើងផ្អែកទស្សនវិស័យវែងឆ្ងាយ និងការបោះជំហ៊ានទៅមុខយ៉ាងលឿនរបស់កម្ពុជាក្នុងការអភិវឌ្ឍសេដ្ឋកិច្ចរបស់ខ្លួនដែលធ្វើឱ្យប្រជាជនកាន់តែមានកម្រិតជីវភាពល្អប្រសើរ ។

The Parkway ស្ថិតនៅក្រោមការវិនិយោគរបស់ក្រុមហ៊ុន Parkway Investment Co., Ltd សហការជាមួយក្រុមហ៊ុន Nantong City Da xin Engineering (Cambodia) Co., Ltd ដោយចំណាយទុនវិនិយោគប្រមាណជាង 100លានដុល្លារអារមេរិក។ គម្រោងនេះនឹងបង្កើតឱ្យមានអគារចំនួនបី ដែលអគារទីមួយមានកម្ពស់ 29ជាន់ និងអគារទីពីរមានកម្ពស់ 25ជាន់ ព្រមទាំងអគារទីបីមានកម្ពស់ 35ជាន់។ ក្នុងនោះមានអគារពាណិជ្ជកម្ម និងមានបន្ទប់ទំនើប 1500យូនីត ដែលមានទំហំចាប់ពី 45-135ម៉ែត្រការ៉េ គម្រោងនេះ នឹងបញ្ចប់ការសាងសង់នៅឆ្នាំ 2020។

គម្រោង The Parkway នឹងត្រូវបានសង់ឡើងដោយក្រុមហ៊ុន Da Xin Ltd ជាក្រុមហ៊ុនល្បីឈ្មោះនៅប្រទេសចិនដែលបានសាងសង់ពហុកីឡាដ្ឋាននៅទីក្រុងប៉េកាំង។ ក្នុងគម្រោងនេះត្រូវបានរៀបចំឱ្យមាន Sky bar ,Sky Garden ,Sky Swimming pool និងកន្លែងហាត់ប្រាណជាដើម។ អគារនេះត្រូវបានសាងសង់ឡើងបំពាក់ដោយសម្ភារៈបរិក្ខាទំនើបៗ និងប្រព័ន្ធការពារយ៉ាងល្អដែលជាបច្ចេកវិទ្យាចុងក្រោយ រួមទាំងមានចំណតរថយន្ដប្រមាណ 800កន្លែង។ ជាងនេះវា ត្រូវបានគ្រប់គ្រង់ការសាងសង់ដោយលោក Leon Zheng មានតួនាទីជា Director of Business Operations of Pelli Design International ដែលជាស្ថាបត្យការកម្រិត A នៅសហរដ្ឋអាមេរិក។

នាយកប្រតិបត្ដិនៃក្រុមហ៊ុន Parkway Investment Co., Ltd បន្ថែមថា មូលហេតុលោកសម្រេចចិត្ដអភិវឌ្ឍន៍នៅក្នុងតំបន់ទួលគោកដែលស្ថិតនៅលើផ្លូវ273 ព្រោះលោកយល់ថាក្រៅពីតំបន់ដែលមានសក្ដានុពលនៅក្នុងរាជធានីភ្នំពេញដែលមានដូចជាតំបន់បឹងកេងកង ទួលគោលក៏ជាតំបន់មានសក្ដានុពលក្នុងការអភិវឌ្ឍដែរ ពិសេសបច្ចុប្បន្នតំបន់នេះកំពុងតែមានការអភិវឌ្ឍខ្លាំងដែលហ៊ុំព័ទ្ធទៅដោយអគារខ្ពស់ៗជាច្រើ ដូចជាមជ្ឈមណ្ឌលពាណិជ្ជកម្ម TK និងផ្សារទំនើបអ៊ីអនពីរជាដើម ដែលយើងមើលឃើញថា វាជាកម្លាំងចលករក្នុងការទាក់ទាញចំណាប់អារម្មណ៍ពីអតិថិជនក្នុងស្រុក និងក្រៅស្រុកយ៉ាងល្អ។

ជាមួយគ្នានេះលោកសួ សុខថេង បញ្ជាក់ថា៖ «មូលហេតុដែល The Parkway ទើបតែប្រកាសលក់គម្រោងរបស់ខ្លួនក្រោយពីមានការសាងសង់រយៈពេល 7ខែមកនេះ ព្រោះយើងចង់សាងសង់ឱ្យបានចេញជារូបរាងខ្លះ។ ការធ្វើបែបនេះយើងចង់បង្ហាញឱ្យឃើញថា យើងជាម្ចាស់គម្រោងដែលមានទុនវិនិយោគគ្រប់គ្រាន់ក្នុងការអភិវឌ្ឍដែលអាចផ្ដល់ទំនុកចិត្ដជូនដល់អតិថិជនបាន100%»៕

November 18, 2017

Category: សង្គម និងសេដ្ឋកិច្ច