សង្គម និងសេដ្ឋកិច្ច - La Reine Media

Chevy Bolt EV ជារថយន្តអគ្គិសនីជាប់ចំណាត់ថ្នាក់ខ្ពស់បំផុតរបស់ Edmunds

នៅពេលរថយន្តអគ្គិសនីមានការពេញនិយមជាងមុន និងមានម៉ូដែលថ្មីៗជាបន្តបន្ទាប់ តម្រូវការប្រើប្រាស់ក៏កើនឡើងយ៉ាងខ្ពស់។

រថយន្តអគ្គិសនីលែងនៅជារបស់ដែលមានតម្លៃខ្ពស់ដូចមុនទៀតហើយ។ ពេលនេះ បណ្ដាក្រុមហ៊ុនផលិតរថយន្តអគ្គិសនីត្រូវប្រឈមនឹងការប្រកួតប្រជែងពិតប្រាកដដើម្បីទទួលបានការគាំទ្រពីអ្នកប្រើប្រាស់។ ប្រការនេះមានន័យថា រថយន្តអគ្គិសនីត្រូវតែមានគុណភាពល្អ អាចជិះបានឆ្ងាយ និងតម្លៃសមរម្យ។

Edmunds គឺជាប្រភពនៃព័ត៌មានស្ដីពីរថយន្តដោយយោងទៅលើការស្រាវជ្រាវ ការវាយតម្លៃរបស់ក្រុមអ្នកជំនាញ និងជាក្រុមហ៊ុនដែលមានទីស្នាក់ការនៅសហរដ្ឋអាម៉េរិក។

សូមទស្សនាវីដេអូខាងក្រោមដើម្បីបានដឹងថា ហេតុអ្វីបានជា Chvy Bolt EV គឺជារថយន្តអគ្គិសនីដែលបានជាប់ចំណាត់ថ្នាក់ខ្ពស់នៅ Edmunds សម្រាប់ឆ្នាំ 2023។

January 24, 2023

Pioneering Spirit គឺជាកប៉ាល់សាងសង់ដែលធំជាងគេបង្អស់លើពិភពលោក

កប៉ាល់យក្ស Pioneering Spirit មានកម្ពស់ស្មើនឹងអគារ 30 ជាន់ និងធំជាងតួ Eiffel អាចរុះរើប្រព័ន្ធខួងអណ្ដូងប្រេងទាំងមូលនៅលើសមុទ្រ។

Pioneering Spirit គឺជាកប៉ាល់សាងសង់ដែលធំជាងគេបង្អស់លើពិភពលោក។ ប្រការមួយក្នុងចំណោមប្រការដ៏គួរចាប់អារម្មណ៍បំផុតរបស់វា នោះគឺសមត្ថភាពក្នុងការរុះរើប្រព័ន្ធខួងអណ្ដូងប្រេងទាំងមូលនៅលើសមុទ្រ។

កប៉ាល់ខ្នាតយក្សនេះ អាចកាត់ផ្ដាច់ជើងដែកថែបរបស់ប្រព័ន្ធខួរអណ្ដូងប្រេងលើសមុទ្រ និងលើកប្រព័ន្ធខួរទាំងមូលចេញពីបាតសមុទ្រ ដោយការប្រើប្រាស់ប្រព័ន្ធស្ទូចកម្លាំងខ្លាំង និងបច្ចេកវិទ្យាកាត់ទំនើប។

ខាងលើនេះមិនត្រឹមតែជួយកាត់បន្ថយបរិមាណនៃបំណែករបស់ប្រព័ន្ធខួងដែលធ្លាក់ទៅក្រោមទឹកសមុទ្រនោះទេ ប៉ុន្តែក៏ជួយកាត់បន្ថយហានិភ័យដែលនាំឱ្យខូចបរិស្ថានផងដែរ។ ក្រៅពីសមត្ថភាពខាងលើ កប៉ាល់ Pioneering Spirit ក៏ថែមទាំងអាចដំឡើងបណ្ដាញបំពង់នានានៅបាតសមុទ្រទៀតផង។

Pioneering Spirit មានបណ្ដោយ 382 ម៉ែត្រ និងទទឹង 124 ម៉ែត្រ ក្នុងនោះផ្នែកដែលមានចន្លោះមានបណ្ដោយ 122 ម៉ែត្រ និងទទឹង 59 ម៉ែត្រ ធ្វើឱ្យវាធំជាងពីរដងធៀបនឹងកប៉ាល់ដឹកប្រេង។

កប៉ាល់យក្ស Pioneering Spirit មានកម្ពស់ស្មើនឹងអគារ 30 ជាន់ និងធំជាងតួ Eiffel។ កប៉ាល់នេះប្រៀបបានទៅនឹងកូនភ្លោះមួយគូដែលមានរាងកាយជាប់គ្នា និងអាចធ្វើដំណើរដោយកម្លាំងម៉ាស៊ីនផ្ទាល់ខ្លួនក្នុងល្បឿន 26 គីឡូម៉ែត្រ/ម៉ោង អនុញ្ញាតឱ្យវាអាចធ្វើសកម្មភាពគ្រប់ទីកន្លែងនៅលើសមុទ្រអន្តរជាតិ៕

January 24, 2023

កំពូលតារាបាល់ទាត់ទាំង 5 ដែលគួរទស្សនាបំផុតក្នុងពាក់កណ្តាលទីពីរនៃរដូវកាល 2022/23

សូមរាប់ឡើងវិញនូវកំពូលតារាបាល់ទាត់ទាំង 5 របស់ពិភពលោក ដែលគួរទស្សនាបំផុតក្នុងពាក់កណ្តាលទីពីរនៃរដូវកាល 2022/23។

Enzo Fernandez

Enzo Fernandez កំពុងក្លាយជាឈ្មោះដែលគួរចាប់អារម្មណ៍ជាងគេនៅអឺរ៉ុប បន្ទាប់ពីបានបង្ហាញថ្វីជើងនៅ World Cup 2022។ ខ្សែបម្រើវ័យ 21 ឆ្នាំរូបនេះគឺជាចំណែកដ៏សំខាន់មួយក្នុងការជួយឱ្យអាហ្សង់ទីនដណ្ដើមបានតំណែងជើងឯក និងជាកីឡាករវ័យក្មេងឆ្នើមបំផុតនៅ World Cup 2022។

ថ្វីជើងរបស់ Fernandes អាចត្រូវបានលក់ក្នុងតម្លៃ 120 លានអឺរ៉ូ និងកំពុងត្រូវបាន Chelsea «តាមដាន»។ ដោយថ្វីជើងចេះតែប្រសើរឡើង តម្លៃខ្លួនខាងលើអាចកើនឡើងដល់ 150 លានអឺរ៉ូបនៅក្នុងអនាគត។

Jude Bellingham

ខ្សែបម្រើរបស់ Dortmund បើទោះជាមានអាយុទើបតែ 19 ឆ្នាំ ប៉ុន្តែបានក្លាយជាសសរទ្រូងមួយក្នុងខ្សែបម្រើរបស់ក្រុមជម្រើសជាតិអង់គ្លេសនៅ World Cup 2022 ថ្វីបើពួកគេត្រូវបានជម្រុះត្រឹមវគ្គ 4 គូចុងក្រោយ។

Bellingham កំពុងត្រូវបាន Liverpool, Real Madrid និង Man City ជាដើម «ស្រក់ទឹកមាត់»។ កីឡាកររូបនេះអាចនឹងក្លាយជាកំពូលតារាបាល់ទាត់បន្ទាប់ដែលត្រូវបានបញ្ចេញដោយ Dortmund បន្ទាប់ពី Erling Haaland កាលពីរដូវក្ដៅឆ្នាំកន្លង។

Lionel Messi

គេមិនអាចមិនរម្លឹកដល់កំពូលតារាបាល់ទាត់រវ័យ 35 ឆ្នាំ ជនជនអាហ្សង់ទីនរូបនេះឡើយ។ Messi គឺជាកីឡាករឆ្នើមជាងគេបង្អស់នៅ World Cup 2022 និងជាបេក្ខភាពលំដាប់ទីមួយសម្រាប់ពានរង្វាន់គ្រាប់បាល់មាសឆ្នាំនេះ។

ដោយរកបាន 13 គ្រាប់ និងបង្កឱកាសស៊ុតបញ្ចូលទីបាន 14 គ្រាប់ក្រោយ 21 ប្រកួតរាប់ចាប់ពីដើមរដូវកាល El Pulga (រហ័សនាមរបស់ Messi) កំពុងតែស្ថិតនៅចំណុចកំពូលនៃអាជីព។ គោលដៅបន្ទាប់របស់ Messi ប្រាកដជានឹងជួយឱ្យ PSG ដណ្ដើមបានជើងឯកនៅ Champions League។

Kylian Mbappe

ក្នុងឆ្នាំ 2022 Mbappe រកបាន 56 គ្រាប់ ក្រោយ 56 ប្រកួត។ កីឡាករជនជាតិបារាំងរូបនេះក៏លេចធ្លោនៅ World Cup 2022 ដោយទទួលបានតំណែងស្ដេចកម្ទេចសំណាញ់ទី។ បើទោះជាមិនទាន់ក្លាយជាជើងឯក ប៉ុន្តែក្នុងវ័យ 24 អនាគតរបស់ Mbappe ប្រាកដជាថ្កើងថ្កាន។

Mbappe កំពុងនាំមុខគេក្នុងបញ្ជីចំណាត់ថ្នាក់កីឡាកររកបានគ្រាប់បាល់ច្រើនជាងគេទាំងនៅ Ligue 1 (13 គ្រាប់) និងនៅ Champions League (7 គ្រាប់)។ ក្រោយពីបារាំងបានបរាជ័យនៅ World Cup Mbappe កាន់តែប្ដេជ្ញាចិត្តខ្ពស់ ហើយប្រាកដណាស់ថា នឹងធ្វើបានល្អជាងមុន នៅក្នុងការជួយឱ្យ PSG ដណ្ដើមបានជើងឯកនៅអឺរ៉ុប។

Erling Haaland

ក្នុងរដូវកាលដំបូងនៅ លីគកំពូលអង់គ្លេស (English Premier League) Haaland បានធ្វើឱ្យក្រុមនានាត្រូវភ័យខ្លាច បន្ទាប់ពីរកបាន 21 គ្រាប់/17 ប្រកួត។ ដោយសារបានលេងក្នុងប្រព័ន្ធរបស់ Pep Guardiola ដែលមានកីឡាករឆ្នើមច្រើនរូបដូចជា De Bruyne, Bernardo Silva និង Grealish ជាច្រើន កំពូលកីឡាករជនជាតិន័រវែសនេះអាចបញ្ចេញអំណាចបន្ថែមទៀតនៅក្នុងពាក់កណ្ដាលចុងក្រោយនៃរដូវកាលបច្ចុប្បន្ន។

បើទោះមានសញ្ញាថមថយបន្តិចនៅក្នុងប៉ុន្មានប្រកួតបន្ទាប់ពី World Cup 2022 ប៉ុន្តែ គេអាចជឿបានថា Man City ទិញ Haaland គឺមិនមែនមានគោលដៅត្រឹមតែ លីគកំពូលអង់គ្លេសឡើយ។ គោលដៅខ្ពស់បំផុតរបស់ពួកគេគឺ Champions League ជាទីដែលកីឡាករវ័យ 22 ឆ្នាំ Haaland រកបាន 5 គ្រាប់រួចហើយ ក្រោយពីទាត់បាន 4 ប្រកួត៕

January 24, 2023

រថយន្តអគ្គិសនីកាន់កាប់10% នៃចំណែកទីផ្សាររថយន្តសរុបនៅទូទាំងសកលលោក

ឆ្នាំ 2022 បរិមាណរថយន្តអគ្គិសនីដែលបានលក់ចេញ បានក្ដោបក្ដាប់ 10% ជាលើកដំបូងនៅក្នុងទីផ្សាររថយន្តនៅទូទាំងពិភពលោក ដោយសារកំណើននៅប្រទេសចិន និងអឺរ៉ុប។

យោងតាមការស្រាវជ្រាវរបស់ LMC Automotive និង EV-Volumes.com បរិមាណរថយន្តដើរដោយអគ្គិសនីទាំងស្រុងដែលបានលក់ចេញនៅលើពិភពលោកក្នុងឆ្នាំ 2022 សម្រេចបានប្រមាណ 7.8 លានគ្រឿង កើន 68% ធៀបនឹងឆ្នាំ 2021។

បើទោះរថយន្តអគ្គិសនីនៅតែមានចំណែកតូចក្នុងចំណោមបរិមាណរថយន្តដែលបានលក់ចេញនៅសហរដ្ឋអាម៉េរិក ប៉ុន្តែទីផ្សាររបស់វាបានកើនឡើងខ្លាំងនៅអឺរ៉ុប និងប្រទេសចិន។ រថយន្តអគ្គិសនីក៏កាន់តែមានឥទ្ធិពលលើកំណើនរំពឹងទុករបស់ទីផ្សាររថយន្ត ព្រោះតែទទួលបានការគាំទ្រពីអ្នកប្រើប្រាស់។

Ralf Brandstatter ប្រធានផ្នែកពាណិជ្ជកម្មនៅប្រទេសចិនរបស់ក្រុមហ៊ុនផលិតរថយន្ត Volkswagen បានឱ្យដឹងថា ទីផ្សាររថយន្តអគ្គិសនីនឹងបន្តរីកចម្រើនយ៉ាងឆាប់រហ័ស ហើយបរិមាណលក់ចេញនៃរថយន្តសាំងនៅប្រទេសចិននឹងចាប់ផ្ដើមធ្លាក់ចុះឆាប់ៗនេះ និងជារៀងរហូត គ្រាដែលចំណែកទីផ្សាររបស់រថយន្តអគ្គិសនីចេះតែរីកមាឌ។

«កាលពីឆ្នាំកន្លង ជាមធ្យម ក្នុងចំណោមរថយន្ត 4 គ្រឿងដែលយើងបានលក់នៅប្រទេសចិនគឺមាន 1 គ្រឿងជារថយន្តអគ្គិសនី ហើយឆ្នាំនេះ អត្រានេះគឺ 3:1។ យើងមិនទាន់សម្រេចបានដល់ចំណុចផ្ទុះនៅឡើយ ប៉ុន្តែសង្ឃឹមថានឹងកើតឡើងឆាប់ៗនេះ ក្នុងអំឡុងពេលពី 2025 ដល់ 2030» លោក Ralf Brandstatter អះអាងដូច្នេះ។

យោងតាម LMC Automotive ក្នុងឆ្នាំ 2022 រថយន្តអគ្គិសនីរួមចំណែក 11% ក្នុងបរិមាណរថយន្តសរុបដែលបានលក់ចេញនៅអឺរ៉ុប និង 19% នៅប្រទេសចិន។ រថយន្ត hybrid និងរថយន្តអគ្គិសនីទាំងស្រុងដែលបានលក់ចេញនៅអឺរ៉ុប គឺមានចំណែក 20.3% ក្នុងចំណោមរថយន្តថ្មីដែលបានលក់ចេញកាលពីឆ្នាំកន្លង នេះបើតាម EV-Volume.com។

សហរដ្ឋអាម៉េរិក អន់ថយជាងធៀបនឹងចិន និងអឺរ៉ុប ក្នុងការប្រើប្រាស់រថយន្តអគ្គិសនី។ ប៉ុន្តែ នៅទីផ្សារនេះមានរថយន្តអគ្គិសនីជាង 807,000 គ្រឿងត្រូវបានលក់ចេញនៅសហរដ្ឋអាម៉េរិកក្នុងឆ្នាំកន្លង ស្មើនឹង 5.8% ក្នុងចំណោមរថយន្តសរុបដែលបានលក់ចេញ៕

January 23, 2023

យន្តហោះប្រើ «ម៉ាស៊ីនអ៊ីដ្រូសែន» ធំជាងគេលើពិភពលោក ហោះហើរជាលើកដំបូង

យន្តហោះ Dornier 228 មានកៅអីចំនួន 19 របស់ក្រុមហ៊ុន ZeroAvia ធ្វើការហោះហើរសាកល្បងដំបូងនៅប្រទេសអង់គ្លេស កាលពីថ្ងៃទី 20 មករា 2023។

ការហោះហើរសាកល្បងនេះជួយឱ្យគេដឹងពីស្ថានភាពបច្ចេកវិទ្យាអាកាសចរណ៍ស្អាតរបស់ ZeroAvia ដែលប្រើប្រាស់ប្រព័ន្ធអ៊ីដ្រូសែន-អគ្គិសនីមិនបំភាយឧស្ម័នពុល ហើយគ្រោងនឹងសុំអាជ្ញាប័ណ្ណ និងហោះហើរពាណិជ្ជកម្មនៅឆ្នាំ 2025។

បន្ទាប់ពីត្រូវបានប្រកាសកាលពីឆ្នាំ 2021 កម្មវិធី HyFlyer II បន្តការប្រឹងប្រែងរបស់ ZeroAvia ក្នុងបំណងបញ្ជាក់ថា អ៊ីដ្រូសែន គឺជាអនាគតរបស់វិស័យអាកាសចរណ៍។ កម្មវិធី HyFlyer បានចាប់ផ្ដើមដំបូងដោយការហោះហើររបស់យន្តហោះ 6 កៅអី កាលពីឆ្នាំ 2020។ នោះគឺជាយន្តហោះដែលដំណើរការដោយអ៊ីដ្រូសែនធំជាងគេដែលធ្លាប់ហោះហើរនៅពេលនោះ។ បច្ចុប្បន្ន យន្តហោះគំរូនេះ ហោះហើរបានជាង 30 ជើងរួចហើយ។

កាលពីឆ្នាំ 2021 យន្តហោះមួយគ្រឿងមានកៅអី 2 របស់ក្រុមហ៊ុនខាងលើបានជួបបញ្ហា ប៉ុន្តែមិនមែនដោយសារប្រព័ន្ធដែលទាក់ទិននឹងអ៊ីដ្រូសែនឡើយ។ មួយក្នុងចំណោមយន្តហោះគំរូ 9 កៅអីរបស់ ZeroAvia បានឈានចូលដល់ដំណាក់កាលសាកល្បងជាលើកដំបូង។ ZeroAvia បំពាក់ម៉ាស៊ីនចំហេះក្នុង Honeywell TPE-331 នៅស្លាបខាងស្ដាំង និងម៉ូទ័រអគ្គិសនី 600 គីឡូវ៉ាត់នៅស្លាបខាងឆ្វេង។

ZeroAvia សង្ឃឹមថា ពួកគេនឹងអាចដាក់ពាក្យស្នើសុំអាជ្ញាប័ណ្ណនៅចុងឆ្នាំនេះ ហើយថាប្រព័ន្ធរុញច្រាន 600 គីឡូវ៉ាត់នេះនឹងទទួលបានអាជ្ញាប័ណ្ណ និងបម្រើដល់វិស័យពាណិជ្ជកម្មលើយន្តហោះ 9-19 កៅអីនៅឆ្នាំ 2025។

យន្តហោះ Dornier 228 មានកៅអីចំនួន 19 របស់ក្រុមហ៊ុន ZeroAvia ធ្វើការហោះហើរសាកល្បងដំបូងនៅប្រទេសអង់គ្លេស កាលពីថ្ងៃទី 20 មករា 2023

សូមបញ្ជាក់ថា «អ៊ីដ្រូសែនគឺជាថាមពលបៃតង» ពីព្រោះថា ម៉ូទ័រដែលប្រើថាមពលអ៊ីដ្រូសែនបញ្ចេញកាកសំណល់មកវិញជាចំហាយទឹកសុទ្ធសាធ ដោយមិនបំភាយឧស្ម័នកាបូនដូចជាថាមពលហ្វូស៊ីល នេះបើសិនមិននិយាយដល់ដំណាក់កាលផលិតអ៊ីដ្រូសែន៕

January 23, 2023

ការប្រកួតដំបូងរបស់ Ronaldo ក្នុងអាវ Al Nassr ពេលប៉ះ Al Ettifaq នៅ Saudi Pro League 2022-2023

Ronaldo បានទាត់ក្នុងការប្រកួតដំបូងរបស់ខ្លួននៅក្នុងអាវរបស់ក្លឹប Al Nassr នៅអារ៉ាប៊ីសាអូឌីត ប៉ុន្តែវត្តមានរបស់គាត់មិនអាចទាក់ទាញចំណាប់អារម្មណ៍ពីទស្សនិកជនបានទាំងអស់នោះឡើយ។

ក្រោយការបញ្ចប់ការប្រកួតមិត្តភាពជាប្រវត្តិសាស្ត្រជាមួយនឹង PSG កំពូលតារាបាល់ទាត់ Cristiano Ronaldo ក៏បានឈានចូលដល់ការប្រកួតដំបូងក្នុងអាវរបស់ Al Nassr ហើយគូប្រជែងរបស់ CR7 និង Al Nassr គឺក្រុម Al Ettifaq។ គ្រាប់បាល់តែមួយគ្រាប់ដែល Al Nassr រកបានក្រោមថ្វីជើងរបស Talisca បានជួយឱ្យ Al Nassr បន្តរក្សាបានតំណែងកំពូលតារាងចំណាត់ថ្នាក់របស់ពានរង្វាន់ជើងឯកថ្នាក់ជាតិនៅអារ៉ាប៊ីសាអូឌីត។

ការប្រកួតដែលមានវត្តមានដំបូងរបស់ Ronaldo ធ្វើឱ្យក្រុមអ្នកគាំទ្ររបស់ Al Nassr មានការត្រេកអរ និងអបអរសាទរយ៉ាងខ្លាំងក្លា។ ប៉ុន្តែ នៅមានកីឡាករមួយរូបទៀតរបស់ Al Nassr ដែលបានទាក់ទាញចំណាប់អារម្មណ៍ខ្លាំងផងដែរនៅក្នុងការប្រកួតនេះ។

ជាក់ស្ដែង អ្នកគាំទ្រមួយក្រុមបានបង្ហោះប៉ោងប៉ោងដែលមានចងអាវរបស់អ្នកចាំទី David Ospina។ ក្នងរដូវកាលនេះ Ospina គឺជាមូលហេតុសំខាន់ដែលជួយឱ្យ Al Nassr ស្ថិតនៅលើកំពូលតារាងចំណាត់ថ្នាក់ នៅពេលរក្សាទីបានស្អាតនៅក្នុង 7/14 ប្រកួត។

ចំណែក Ronaldo វិញ បើទោះរកគ្រាប់បាល់មិនទាន់បាន ប៉ុន្តែក៏ទទួលបានជោគជ័យក្នុងការប្រកួតដំបូងរបស់ Al Nassr។ បាល់ដែលគ្រោះថ្នាក់បំផុតរបស់ Ronaldo គឺការស៊ុតពិន័យពីចម្ងាយ 25 ម៉ែត្រ។ Ronaldo ក៏ប្លោងគ្រាប់បាល់ឱ្យមិត្តរួមក្រុមទាត់ក្បាច់វូឡេ ប៉ុន្តែខ្ពស់ហួសទី និងឈុតស៊ុតប៉ើងអ្នកចាំទីប៉ុន្តែមិនបានសម្រេច។

Al Nassr រកបាន 1 គ្រាប់នៅនាទីទី 31 នាំឱ្យ Al Nassr ឈ្នះ Al Ettifaq 1-0។ បន្ទាប់ពី Ronaldo តែតខុសបាល់ពិន័យពីស្លាបខាងឆ្វេង Anderson Talisca ក៏តែតបន្តបានជោគជ័យ។ នេះគឺជាគ្រាប់បាល់ទី 12 របស់ Talisca រាប់ចាប់ពីដើមរដូវកាល Saudi Pro League 2022-2023។

Al Nassr បន្តនាំមុខគេក្រោយពីបានឈ្នះ Al Ettifaq។ ពាន់រង្វាន់បាល់ទាត់ Saudi Pro League មាន 16 ក្រុមចូលរួម និងត្រូវទាត់ 30 ជុំ។

ថ្ងៃទី 26 មករា Al Nassr នឹងត្រូវប៉ះ Al-Ittihad នៅវគ្គពាក់កណ្ដាលផ្ដាច់ព្រ័ត្ររបស់ Saudi Super Cup។ Al Hilal នឹងប៉ះ Al Fayha ក្នុងគូដែលនៅសល់របស់វគ្គពាក់កណ្ដាលផ្ដាច់ព្រ័ត្រ។ វគ្គផ្ដាច់ព្រ័ត្រនឹងធ្វើឡើងនៅថ្ងៃទី 29 មកា 2023។

https://www.youtube.com/watch?v=-gGN8kl_9Es

ក្រុម Al Nassr រកបាន 1 គ្រាប់ដែលមិនមែនជាថ្វីជើងរបស់ Ronaldo នៅនាទីទី 31 នាំឱ្យ Al Nassr ឈ្នះ Al Ettifaq 1-0 នៅ Saudi Pro League កាលពីថ្ងៃទី 22 មករា 2023

ក្នុងរដូវកាល 2022-2023 Al Nassr ក៏ចូលរួមប្រកួតនៅ King Cup ផងដែរ។ ពួកគេនឹងប៉ះ Abha ក្នុងវគ្គ 4 ក្រុមចុងក្រោយនៅថ្ងៃទី 14 មីនា។ បើសិនដណ្ដើមបានពានជើងឯក Saudi Pro League ឬ King Cup ក្រុមរបស់ Ronaldo នឹងបានឡើងទៅប្រកួតដណ្ដើមពានរង្វាន់ AFC Champions League រដូវកាលក្រោយ៕

January 23, 2023

គ្រូបង្វឹកថ្មីរបស់ក្រុមបាល់ទាត់ជម្រើសជាតិព័រទុយហ្កាល់ ទៅជួប Cristiano Ronaldo

សារព័ត៌មានអង់គ្លេស ថ្មីៗនេះបានផ្សាយថា គ្រូបង្វឹក Roberto Martinez របស់ក្រុមបាល់ទាត់ជម្រើសជាតិព័រទុយហ្កាល់ បានទៅជួប Ronaldo នៅអារ៉ាប៊ីសាអូឌីត ដើម្បីពិភាក្សាអំពីអនាគតរបស់ CR7 នៅក្នុងក្រុមជម្រើសជាតិ។

ក្រោយបរាជ័យនៅ World Cup 2022 ពេលត្រូវចាញ់ម៉ារ៉ុកត្រឹមវគ្គ ¼ ក្រុមជម្រើសជាតិព័រទុយហ្កាល់បានឆ្លងកាត់ការប្រែប្រួលច្រើនបន្ទាប់ពីគ្រូបង្វឹក Fernando Santos ត្រូវបានបញ្ឈប់ពីតួនាទីក្រោយពីបានប្រឹងប្រែងជាមួយក្រុមអស់ជាច្រើនឆ្នាំ។ ចំណែកអនាគតរបស់ Cristiano Ronaldo ក៏បានជួបនឹងកាលៈទេសៈលំបាកច្រើនផងដែរ ក្រោយពីលេងមិនបានល្អនៅ World Cup 2022 ដែលដើមហេតុអាចបណ្ដាលមកពីមានទំនាក់ទំនងមិនសូវល្អជាមួយនឹងគ្រូបង្វឹក Fernando Santos។

ក្រោយការចាកចេញរបស់គ្រូបង្វឹក Fernando Santos ក្រុមជម្រើសជាតិព័រទុយហ្កាល់ក៏រកបានមនុស្សមកជំនួសភ្លាម នោះគឺ Roberto Martinez ដែលជាគ្រូបង្វឹកបានចាកចេញពីក្រុមជម្រើសជាតិបែលហ្ស៊ិក បន្ទាប់ពីបរាជ័យនៅកាតាកាលពីឆ្នាំ 2022។

គ្រូបង្វឹក Roberto Martinez ចូលមកដឹកនាំក្រុមជម្រើសជាតិ ក្រោយពីគ្រូបង្វឹក Fernando Santos ត្រូវបានបញ្ឈប់ពីតួនាទី បន្ទាប់ពីព័រទុយហ្កាល់បានបរាជ័យនៅ World Cup 2022

បច្ចុប្បន្ន Ronaldo បានចាកចេញពី Man United និងកំពុងលេងឱ្យ Al Nassr របស់អារ៉ាប៊ីសាអូឌីត ហើយទើបតែបានប៉ះ Messi និង Mbappe របស់ PSG កាលពីម្សិលមិញ។ Daily Mail បង្ហើបឱ្យដឹងថា មុនការប្រកួតនេះ Ronaldo បានជួបពិភាក្សាជាមួយគ្រូបង្វឹករបស់ព័រទុយហ្កាល់។

ក្នុងជំនួបនោះ គ្រូបង្វឹក Roberto Martinez បានបញ្ជាក់អំពីលទ្ធភាពដែល Ronaldo អាចចូលរួមប្រកួតនៅ Euro 2024 ដែលពេលនោះនឹងគាត់មានអាយុ 41 ឆ្នាំ។ គ្រូបង្វឹករូបនេះចង់ឱ្យ Ronaldo បន្តកាន់តួនាទីជាប្រធានក្រុមកីឡាករជម្រើសជាតិនៅវគ្គជម្រុះរបស់ Euro 2024 ហើយបើ Ronaldo បានបង្ហាញសមត្ថភាពល្អ គាត់ប្រាកដជាបានទៅចូលរួមប្រកួតនៅ Euro 2024 មិនខាន៕

January 21, 2023

ក្រោយ Ronaldo រងរបួស Mbappe ក៏ចូលទៅបង្ហាញសកម្មភាពដ៏កក់ក្ដៅក្នុងការប្រកួតមិត្តភាពកាលពីម្សិលមិញ

ទន្ទឹមនឹងភាពទាក់ទាញរបស់ Cristiano Ronaldo និង Lionel Messi ការប្រកួតមិត្តភាពរវាង PSG និង Al Nassr & Al Hilal (Saudi All Star XI) កាលពីយប់ម្សិលមិញក៏មានសកម្មភាពគួរឱ្យកក់ក្ដៅផងដែរពី Kylian Mbappe។

ការប្រកួតដែលមានកំពូលតារាបាល់ទាត់ច្រើនរូបរបស់ក្រុម PSG និង Saudi All Star XI កាលពីយប់ថ្ងៃទី 19 មករា នៅ អារ៉ាប៊ីសាអូឌីត ពិតជាពិសេស។ ភាពទាក់ទាញនៃការប្រកួតនេះត្រូវបានរុញដល់ចំណុចកំពូលនៅពេលមានវត្តមានរបស់កំពូលតារាបាល់ទាត់ Ronaldo និង Messi។

Ronaldo និង Messi ក្រោយមកក៏មិនបានធ្វើឱ្យទស្សនិកជនខកចិត្តដែរ។ Messi គឺជាអ្នករកបាន 1 គ្រាប់ដំបូងគេឱ្យ PSG ហើយ Ronaldo ក៏រកបាន 2 គ្រាប់ឱ្យ Al Nassr & Al Hilal ក្នុងតង់ទីមួយ។

ក្រៅពីកំពូលកីឡាករទាំងពីររូបខាងលើក៏នៅមានកំពូលថ្វីជើងមួយរូបទៀតដែលបានទាក់ទាញចំណាប់អារម្មណ៍ច្រើន នោះគឺ Mbappe។ កីឡាករបារាំងរូបនេះបានបញ្ចេញសកម្មភាពដ៏កក់ក្ដៅសម្រាប់ Ronaldo។ រូបភាពបានពីការប្រកួតខាងលើបង្ហាញថា Mbappe បោះជំហានទៅរក CR7 សួរនាំពីរបួសលើផ្ទៃមុខដែលបង្កឡើងដោយអចេតនាពីអ្នកចាំទី Keylor Navas របស់ PSG នៅនាទីទី 31។ នេះគឺជាកំហុសដែលជួយឱ្យ Ronaldo រកបាន 1 គ្រាប់ពីការទាត់បាល់ពិន័យ។

CR7 រងរបួសលើផ្ទៃមុខដែលបង្កឡើងដោយអចេតនាពីអ្នកចាំទី Keylor Navas របស់ PSG នៅនាទីទី 31

និយាយអំពី Mbappe វិញ កីឡាករបារាំងរូបនេះបានទទួលស្គាល់តាំងពីយូរមកហើយថា Cristiano Ronaldo គឺជាកីឡាករដែលគាត់ចូលចិត្តជាងគេតាំងពីនៅតូច ហើយក៏ជានិមិត្តរូបសម្រាប់គោលដៅក្នុងអាជីពជាកីឡាករបាល់ទាត់របស់ខ្លួនផងដែរ។

ក្នុងការប្រកួតកាលពីយប់ម្សិលមិញ Mbappe ក៏ទទួលបានការសាទរយ៉ាងខ្លាំងពីទស្សនិកជន នៅពេលរកបាន 1 គ្រាប់ ហើយក៏បង្កឱកាសស៊ុតបញ្ចូលទីបាន 2 គ្រាប់ និងទទួលបាន 9.0 ពិន្ទុ ដែលជាពិន្ទុខ្ពស់ជាងគេសម្រាប់ PSG ខណៈ Ronaldo ទទួលបាន 9.2 ពិន្ទុ។ ការប្រកួតនេះបានបញ្ចប់ដោយ PSG ឈ្នះ Saudi All-Star XI ក្នុងលទ្ធផល 5-4៕

January 20, 2023

អ្នកសម្ដែងរបស់ភាពយន្តរឿង «Mission Impossible» ជាប់ចោទពីបទសម្លាប់មនុស្សពេលកំពុងថតកុន

(សហរដ្ឋអាម៉េរិក) – តារាសម្ដែងអាម៉េរិក Alec Baldwin ត្រូវបានតុលាការចោទប្រកាន់ពីបទសម្លាប់មនុស្សដោយអចេតនា ប្រឈមនឹងការជាប់ពន្ធនាគារ 5 ឆ្នាំ ក្រោយពីគាត់បានកេះកៃកាំភ្លើងបណ្ដាលឱ្យមិត្តរួមអាជីពម្នាក់ស្លាប់នៅកន្លែងថតកុន។

យោងតាម TMZ កាលពីថ្ងៃទី 19 មករា រដ្ឋអាជ្ញានៅស្រុក Santa Fe រដ្ឋ New Mexico បានប្រកាសថា Alec Baldwin ត្រូវបានចោទប្រកាន់ពីបទមនុស្សឃាតដោយអចេតនា ក្នុងនាមជាផលិតករ និងអ្នកសម្ដែងភាពយន្ត ហើយត្រូវប្រឈមនឹងការជាប់ពន្ធនាគារ 5 ឆ្នាំ។

មេធាវីរបស់ Alec Baldwin ប្រកាសថា ការចោទប្រកាន់របស់តុលាការខាងលើគឺជាការ «មួលបង្កាច់ការស្លាប់របស់អ្នកស្រី Halyan Hutchins» ហើយថា នឹងតស៊ូមតិផ្លូវច្បាប់ដល់ទីបញ្ចប់។

ក្រៅពីលោក Alec Baldwin តុលាការក៏បានចោទប្រកាន់ពីបទសម្លាប់មនុស្សដោយអចេតនាចំពោះ Hannah Gutierrez-Reed ដែលជាប្រធានគម្រោងភាពយន្តរឿង «Rust» នេះដែរ។

កាលពីខែតុលា 2021 Alec Baldwin ថតឈុតហិង្សារបស់ភាពយន្តរឿង Rust នៅក្នុងរដ្ឋ New Mexico។ ក្រោយត្រូវបានប្រាប់ថា កាំភ្លើងមិនមានគ្រាប់ អ្នកសម្ដែង Alec Baldwin ក៏បានកេះកៃកាំភ្លើង ប៉ុន្តែស្រាប់តែកាំភ្លើងនៅមានគ្រាប់។ អ្នកដឹកនាំរឿង និងជាអ្នកនិពន្ធ Joel Souza ត្រូវគ្រាប់កាំភ្លើង តែបានព្យាបាលជាសះស្បើយ។ ចំណែកអ្នកដឹកនាំផ្នែករូបភាព អ្នកស្រី Halyan Hutchins រងរបួសធ្ងន់ ហើយក៏បានបាត់បង់ជីវិត។

កាលពីខែកុម្ភៈ 2022 គ្រួសាររបស់ Hutchins បានដាក់ពាក្យប្ដឹងប្រឆាំង Alec Baldwin ប៉ុន្តែបានដកពាក្យបណ្ដឹងវិញកាលពីខែតុលា 2022។ ទោះជាយ៉ាងនេះក៏ដោយ រដ្ឋអាជ្ញាមួយរូប ពេលនោះបាននិយាយថា Alec Baldwin នៅតែអាចត្រូវប្រឈមនឹងការចោទប្រកាន់ ព្រោះបាននាំឱ្យអ្នកដឹកនាំផ្នែករូបភាព Halyna Hutchins អាយុ 42 ឆ្នាំ ត្រូវបាត់បង់ជីវិត។ ដំណើរការរឿងក្ដីនៅតុលាការបានស៊ីពេលអស់ជាងមួយឆ្នាំ ដោយសារតែរដ្ឋអាជ្ញាត្រូវរង់ចាំការបញ្ជាក់ពី FBI។

លោក Alec Baldwin អាយុ 63 ឆ្នាំ គឺជាតារាសម្ដែងជនជាតិអាម៉េរិកមួយរូបដែលធ្លាប់ទទួលបានពាន់រង្វាន់ Emmy និងពានរង្វាន់ផែនដីមាស (Golden Globes) ជាច្រើនលើក។ តារាសម្ដែងរូបនេះត្រូវបានគេស្គាល់តាមរយៈភាពយន្តរឿង The Hunt for Red October (1990), The Aviator (2004) និង Mission Impossible ជាដើម។ លោក Alec Baldwin មានភរិយាឈ្មោះ Hilaria និងមានកូន 7 នាក់៕

January 20, 2023

ម្ដាយជនជាតិចិនម្នាក់បារម្ភខ្លាចកូនស្រីជាបណ្ឌិត «មិនអាចរកបានប្ដី» នឹងគេ

ស្ដ្រីជាម្ដាយមួយរូបនៅខេត្ត Zhejiang ប្រទេសចិន បានបង្ហោះវីដេអូបង្ហាញពីកូនស្រីជាបណ្ឌិតរបស់គាត់កំពុងអង្គុយអានសៀវភៅ និងរអ៊ូដាក់នាងថា គិតតែពីរៀន ដោយបារម្ភខ្លាចកូនស្រីមិនអាចរកបានប្ដីនឹងគេ។

ក្នុងវីដេអូមួយដែលត្រូវបានបង្ហោះលើបណ្ដាញសង្គមក្នុងសប្ដាហ៍នេះ ម្ដាយរបស់នារីជាបណ្ឌិតមួយរូបនៅខេត្ត Zhejiang ភាគខាងកើតប្រទេសចិន និយាយថា គាត់បារម្ភថា កូនស្រីគាត់នឹងមិនអាចបានជួបបុរសដែលអាចរៀបការជាមួយគ្នាបាន ក្នុងពេលកូនស្រីគាត់កំពុងអានសៀវភៅនៅក្បែរតុធ្វើការ។

«ដល់ម៉ោងចូលគេងហើយ។ ឈប់រៀនទៀតទៅ ហើយទៅគេងភ្លាមទៅ» ស្ត្រីជាម្ដាយនិយាយនៅក្នុងវីដេអូដូច្នេះ។ កូនស្រីគាត់ងើបមុខឡើង និងសើច ប៉ុន្តែមិនឆ្លើយតប។

ស្ត្រីជាម្ដាយរូបនេះបានឱ្យដឹងថា កូនស្រីរបស់គាត់គឺជាសាស្ត្រាចារ្យនៅមហាវិទ្យាល័យក្នុងតំបន់ បន្ទាប់ពីបានបញ្ចប់ការសិក្សាថ្នាក់បណ្ឌិតនៅកាណាដា។ អ្នកស្រីគិតថា កូនស្រីគាត់ល្អខ្លាំងណាស់ និងមានមោទកភាពចំពោះសមិទ្ធផលរបស់នាង។

ក៏ប៉ុន្តែ អ្នកស្រីក៏បារម្ភខ្លាំងដែរនៅពេលឃើញកូនស្រីមិនចំណាយពេលខ្លះសម្រាប់មិត្តភក្ដិ ឬរកមិត្តភក្ដិថ្មី ហើយគិតតែពីនៅផ្ទះ និងអានសៀវភៅ។

វីដេអូស្ដីពីរឿងរ៉ាវនេះបានទាក់ទាញអ្នកចូលមើលជិត 9 លានលើក និងបញ្ចេញមតិជិត 3,700 លើក ក្រោយពីបានបង្ហោះលើបណ្ដាញសង្គម។ ក្នុងនោះ អ្នកខ្លះបញ្ចេញយោបល់គាំនារីជាកូន ហើយអ្នកខ្លះយល់ស្របនឹងការបារម្ភរបស់ស្ត្រីជាម្ដាយ។

អ្នកចូលមើលបានលើកហេតុផលជាច្រើនមកអះអាង មានដូចជាថា «មិនរាប់អានមិត្តថ្មីៗគឺមិនអាចជួបមនុស្សក្នុងក្ដីស្រមៃ», «ប្រុសៗមិនសូវហ៊ានស្រលាញ់នារីដែលមានចំណេះដឹងខ្ពស់ជាងខ្លួននោះទេ» ឬថា «ការអានសៀវភៅ ការទទួលយកចំណេះដឹងថ្មីៗគឺជាសេចក្ដីសុខរបស់នាង» ជាដើម។ល។

January 20, 2023

Category: សង្គម និងសេដ្ឋកិច្ច