Category: សង្គម និងសេដ្ឋកិច្ច

បន្ទប់ដែលភ្លឺស្រឡះជួយឱ្យមានអារម្មណ៍ធូរស្រាលស្រឡះ មានជីវិតរស់រវើក និងត្រៀមជាស្រេចក្នុងការធ្វើតែរឿងល្អៗសម្រាប់ជីវិត។ សម្រាប់មិត្តអ្នកអានជាច្រើនដែលកំពុងគិតមិនចេញ ចង់រកវិធីគេចចេញពីបន្ទប់ដែលនៅក្នុងទីតាំងអាប់ពន្លឺមិនភ្លឺស្វាងនោះ ថ្ងៃនេះ ឡារ៉ែន មានចំណុចល្អៗ 6វិធីដែលនឹងជួយផ្លាស់ប្ដូរបន្ទប់ដែលងងឹតអាប់ឱ្យប្រែកាយជាបន្ទប់ថ្មីឆើតឆាយជាងមុនបាន។ តើមានវិធីអ្វីខ្លះទៅ សូមតាមដានជាបន្ត…។

1-ប្រើវាំងននថ្លាចាំងពន្លឺ
វាំងនន និងមាត់បង្អួចមានផលយ៉ាងខ្លាំងក្នុងការជួយនាំពន្លឺឱ្យចូលមកក្នុងបន្ទប់ ការជ្រើសរើសប្រើវាំងននដែលស័ក្តិសម អាចបង្កើនពន្លឺដល់បន្ទប់បាន។ បើត្រូវការសន្សំសំចៃការចំណាយ ក៏គ្រាន់តែរកផ្ទាំងក្រណាត់ដែលថ្លាៗទំហំប៉ុនផ្ទាំងវាំងនននៅផ្ទះ មកបិទជាប់ជាមួយក្រណាត់វាំងននចាស់នោះ ហើយរូតបើកវាំងននក្រណាត់ តែទុកផ្ទាំងក្រណាត់ថ្លានោះនៅបាំងមាត់បង្អួច តែប៉ុណ្ណឹងក៏អាចធ្វើឱ្យបន្ទប់មានពន្លឺចាំងចូលមកគ្រប់គ្រាន់ទៅហើយ។

2-ភ្លើងចង្កៀងគោមលើតុបែបភ្លឺច្បាស់
ភ្លើងចង្កៀងគោមក៏ជាបច្ច័យមួយទៀតក្នុងការជួយកំណត់ពន្លឺដែលនឹងចេញមកយ៉ាងណាបានដែរ។ បើត្រូវការឱ្យបន្ទប់ភ្លឺខ្លាំងឡើង គួរជ្រើសរើសប្រើចង្កៀងគោមដែលជាក្រណាត់ពណ៌សស្តើង ព្រោះវាអាចជួយជះពន្លឺបានល្អ និងធ្វើឱ្យមានពន្លឺច្រើនឡើង។

3-ប្រើគ្រឿងសង្ហារិមដែលជាកញ្ចក់
សម្រាប់បន្ទប់ដែលល្មមអាចមានពន្លឺពីធម្មជាតិចាំងចូលមកដល់ខ្លះដែរនោះ ការជ្រើសរើសប្រើគ្រឿងសង្ហារិមដែលជាកញ្ចក់អាចលើកកម្រិតភាពភ្លឺស្រឡះរបស់ពន្លឺខ្លាំងឡើងបាន ជាពិសេសបើយកទៅដាក់នៅជិតចំណុចទទួលពន្លឺ ដូចជា ជិតមាត់បង្អួច ឬផ្លូវដើរជាដើម វានឹងជួយបង្កើនមន្តស្នេហ៍​ដល់ពន្លឺដែលចាំងចូលមកប៉ះនឹងកញ្ចក់នៅក្នុងបន្ទប់បាន។

4-ជ្រើសរើសប្រើទ្វារកញ្ចក់
ជាវិធីដ៏ឆ្លាតវៃមួយ គ្រាន់តែប្ដូរផ្ទាំងទ្វារក្នុងផ្ទះពីទ្វារបែបបាំងជិតមើលមិនឃើញមកជាទ្វារផ្ទាំងកញ្ចក់វិញក៏អាចបញ្ជូនពន្លឺពីធម្មជាតិពីបន្ទប់មួយទៅបន្ទប់មួយបានយ៉ាងល្អ និងជួយឱ្យខាងក្នុងផ្ទះភ្លឺ និងមានអារម្មណ៍ថាស្រឡះឡើងទៀតផង។

5-ប្ដូរអំពូលភ្លើងថ្មី
មិត្តអ្នកអានមួយចំនួនអាចនឹងធ្លាប់កើតមានអាការងឿងឆ្ងល់ថា ហេតុអីបានជាចង្កៀងគោមដដែលរបស់អ្នកដែលធ្លាប់ប្រើពីមុនមក មកដល់ថ្ងៃនេះបែរជាមិនផ្ដល់ពន្លឺគ្រប់គ្រាន់ដូចពេលកន្លងមកអីុចឹង? ដល់ពេលត្រូវប្ដូរអំពូលថ្មីហើយចា៎ស…
គឺជាវិធីងាយៗបំផុត ដែលនឹងធ្វើឱ្យចង្កៀងគោមរបស់អ្នកត្រឡប់មកភ្លឺស្វាងល្អដូចមុនវិញ។

6-បំពាក់ប្រព័ន្ធដំឡើង និងបន្ថយពន្លឺភ្លើង
គឺជាវិធីមួយទៀតដែលអ្នកច្នៃម៉ូដខាងក្នុងផ្ទះភាគច្រើននិយមប្រើ និងបានច្នៃម៉ូដទុកជាស្រេច ដើម្បីបំពាក់នៅក្នុងផ្ទះសម័យថ្មី​នេះ ពីព្រោះវាជួយឱ្យអាចសម្រួលកម្រិតពន្លឺដែលស័ក្តិសមដល់បន្ទប់នីមួយៗបានក្នុងពេលវេលាដែលខុសប្លែកពីគ្នានៅអំឡុងពេលថ្ងៃបាន។
បានដឹងពីគន្លឹះងាយៗក្នុងការជួយបង្កើនពន្លឺនៅក្នុងផ្ទះរួចហើយ បន្ទាប់ពីនេះទៅ ចូរសាកល្បងសង្កេតមើលថា តើនៅខាងក្នុងផ្ទះរបស់អ្នកមានបន្ទប់ណា ឬជ្រុងណាមួយនៅអាប់ពន្លឺដែរឬទេ?រួចហើយសាកល្បងនាំយកវិធីងាយៗនៅក្នុងអត្ថបទនេះ ទៅកែសម្រួលប្រើ បន្ទប់ដែលធ្លាប់តែធុញថប់ បរិយាកាសដែលធ្លាប់តែងងឹតស្រទំ នឹងប្លែកខុសពីមុនជាមិនខាន៕

តាមរយៈសារព័ត៌មាន vogue ដែលបានចេញផ្សាយនៅថ្ងៃទី20 ខែវិច្ឆិកា ឆ្នាំ2017 នេះបានឱ្យដឹងថា រយៈពេលថ្មីៗនេះ គេសង្កេតឃើញថា កំពូលតារាចម្រៀងពន្លកថ្មីដូចជា Selena Gomez ត្រូវបានប្រិយមិត្តអ្នកគាំទ្រ ព្រមទាំងបណ្ដាអ្នកសារព័ត៌មានទាំងឡាយ កំពុងតែចាប់អារម្មណ៍ខ្លាំងជាងគេនៅក្នុងកម្មវិធីរាត្រី AMAs (American Music Awards) ។

នៅក្នុងជំនួបជាមួយអ្នកគាំទ្រ និងអ្នកសារព័ត៌មាន Selena Gomez  បានប្ដូរស្ទីលសក់មកលេងពណ៌ទឹកមាសខ្ចី ស្លៀកឈុតសម្លៀកបំពាក់ស្បែកពណ៌ខ្មៅ បង្ហាញដងខ្លួនតូចច្រឡឹង និងភាពសិចស៊ីដ៏អស្ចារ្យរបស់នាងនៅលើកម្រាលព្រំក្រហមផងដែរ។ តារាចម្រៀងស្រីរូបនេះត្រូវបានអ្នកសារព័ត៌មាន និងអ្នកគាំទ្ររបស់នាងចោមរោមយ៉ាងណែនណាន់តាន់តាប់ព្រោះចង់ដឹង ចង់ឮរាល់ព័ត៌មានដែលទាក់ទងរវាងនាង និងJustin Bieber។ តែជាអកុសល នៅយប់នោះJustin Bieber មិនបានបង្ហាញខ្លួនចូលរួមជាមួយនាងឡើយ ហើយនាងបានត្រឹមតែបង្ហាញវត្តមាន និងថតរូបតែប៉ុណ្ណោះ  មិនបានបកស្រាយព័ត៌មានអ្វីទាំងអស់។

គួរបញ្ជាក់ផងដែរថា ឈុតសម្លៀកបំពាក់ដែលតារាចម្រៀងស្រីម្នាក់នេះបានប្រើប្រាស់នៅក្នុងកម្មវិធីខាងលើនេះ គឺត្រូវបានរចនាតាមលំនាំស្ទីលឆ្នាំ1941 និងដើម្បីឱ្យកាន់តែជាក់ច្បាស់ សូមទស្សនារូបភាពរបស់ Selena Gomez ​និង បណ្ដាតារាល្បីៗទាំងឡាយដែលបានចូលរួមក្នុងកម្មវិធី American Music Awards ទាំងអស់ដូចខាងក្រោមនេះ៕

ពិធី​រៀប​អាពាហ៍ពិពាហ៍​ដ៏​មានន័យ​ត្រូវបាន​បញ្ចប់ ពេលវេលា​ដែល​ត្រូវ​គិតដល់​ទីតាំង​ក្រេបទឹក​ឃ្មុំ​ដ៏​រ៉ូ​មែន​ទិ​ក ក៏ត្រូវ​ចូលមក​ដល់​ដែរ។ សម័យ​បច្ចុប្បន្ននេះ ការធ្វើដំណើរ​កម្សាន្ត​ក្រេបទឹក​ឃ្មុំ​អាច​ចាត់ទុកថា ជា​រឿង​ដែលមាន​ភាព​សំខាន់​មួយ​ដែរ ព្រោះថា​សម្រាប់​គូស្នេហ៍​ដែល​ទើបតែ​រៀបការ​រួច​ថ្មោងថ្មី​ដូចជា​អ្នក​ទាំងពីរ ការធ្វើដំណើរ​កម្សាន្ត​ក្រេប​ចន្ទ​ទឹកឃ្មុំ គឺ​ប្រៀបដូចជា ការជួយ​បង្កើន​នូវ​ការចងចាំ​អនុស្សាវរីយ៍​ដ៏​រីករាយ បន្ថែម​ជាមួយនឹង​ភាព​ផ្អែមល្ហែម​ដ៏​សែនមានន័យ​មិនអាច​បំភ្លេចបាន។ “គិត​ចេះតែ​គិត​ហើយ ប៉ុន្តែ​ដូច​មិនទាន់​ច្បាស់​ក្នុង​ចិត្ត​សោះ​ថា​នឹង​ទៅ​ក្រេបទឹក​ឃ្មុំ​នៅឯណា​ល្អ​នោះទេ?” នេះ​គឺជា​ប្រយោគ​មួយ​ដែល​ស្ថិតនៅក្នុង​ចិត្ត​គូ​ស្វាមីភរិយា​មួយចំនួនមែនដែរ​ទេ? បើ​ដូច្នេះ​ចូរ​សាក​មក​ទទួលយក​ទីតាំង​មួយចំនួន​ដែល ឡា​រ៉ែ​ន បានបង្ហាញ​ជូន​ដូចខាងក្រោម​នេះ ៖

តំបន់​កម្សាន្ត​លើ​កោះ ៈ អាច​និយាយបានថា ជាទី​តាំង​ល្អ​លេខ​មួយ​ហើយ​សម្រាប់​អ្នក​ដែល​ចង់​ស្វែងរក​ទីតាំង​ក្រេប​ចន្ទ​ទឹកឃ្មុំ​លំដាប់​ល្អ​ដាច់គេ​នោះ។ ជា​ដំណើរ​កម្សាន្ត​ក្រេបទឹក​ឃ្មុំ​ដែលមាន​លក្ខណៈ​ផ្ទាល់ខ្លួន​ខ្លាំងជាងគេ​បំផុត បើ​ប្រៀបធៀប​ទៅនឹង​ការធ្វើដំណើរ​កម្សាន្ត​នៅ​ទីតាំងផ្សេងៗទៀត តែ​ក៏​អាច​នឹងត្រូវ​ចំណាយ​អស់​ច្រើនជាងគេដែរ ប៉ុន្តែ​អ្វីដែល​អ្នកទទួលបាន​ពី​តំបន់​កម្សាន្ត​នៅលើ​កោះ​នោះ ក៏​ស្ទើរតែ​រក​មិនឃើញ​ភាពខ្វះ​ចន្លោះ​ទាល់តែសោះ​ដែរ។ សម្រាប់​ទីតាំង​ពិសេស​បែបនេះ​អ្នក​អាច​នឹក​គិតដល់​តំបន់​មួយចំនួន​ដូចជា កោះ​ម៉ា​ល់​ឌី​វ កោះ​ឡាំង​កា​វី កោះ​តា​ហី​ទី កោះ​បាលី និង​កោះ​សាមុយ​ជាដើម តែបើ​អ្នក​គិតថា​មិន​ចង់ទៅដល់​បរទេស​ទេនោះ អ្នក​អាច​គិតដល់​កោះ​មួយចំនួន​នៅក្នុង​ប្រទេស​យើង​ក៏បាន គឺអាច​ផ្តល់នូវ​ភាព​រ៉ូ​មែន​ទិ​ក​ដែល​មិនអាច​បំភ្លេចបាន​សម្រាប់​រាត្រីច​ន្ទ​ទឹកឃ្មុំ​របស់​អ្នក​ដូចគ្នា។

តំបន់​មាត់សមុទ្រ ៈ ខ្យល់​ត្រជាក់​បក់​ផាត់​នាំយក​ក្លិន​ដ៏​ប្រហើរ​នៃ​ទឹកសមុទ្រ រួមជាមួយ​នឹង​សំឡេង​រលក​បោក​ច្រាំង​ទាំងថ្ងៃទាំងយប់​ឥតឈប់ឈរ រួម​ជាមួយនឹង​សម្រស់​ដ៏​ស្រស់ត្រកាល​នៃ​សមុទ្រ​នឹង​ជួយ​ធ្វើឱ្យ​ភាព​ផ្អែមល្ហែម​នៃ​គូ​ស្វាមីភរិយា​ថ្មោងថ្មី​កាន់តែ​មាន​ភាព​ស៊ីជម្រៅ​ឡើង​មួយកម្រិត​ទៀត ហើយ​បើ​បានទទួល​ទាន​អាហារ​ពេល​ល្ងាច​នៅលើ​ឆ្នេរ​ខ្សាច់​យ៉ាង​រ៉ូ​មែន​ទិ​ក​ក្រោម​ពន្លឺ​ភ្លើងទៀន និង​ក្រោម​ពន្លឺ​ព្រះ​ចន្ទ​ទៀត​នោះ​គឺ​កាន់តែ​បង្កើន​នូវ​ក្តី​ស្រឡាញ់ និង​ភាព​ផ្អែមល្ហែម​មិនអាច​បំភ្លេច​បានឡើយ។

តំបន់ភ្នំ ៈ នៅតាម​តំបន់ភ្នំ​ជា​កន្លែង​ដែលមាន​ខ្យល់អាកាស​បរិសុទ្ធ​ល្អ មាន​ភាព​ត្រជាក់​ស្រួល ស្ងប់​ស្អា​ត់ មាន​ទេសភាព​ស្រស់ស្អាត មាន​ពណ៌បៃតង​ស្រស់ មាន​សំឡេង​សត្វ​បក្សាបក្សី​ខ្ញា​វ​ខ្ញារ និង​សំឡេង​ទឹកជ្រោះ​ជាត​ន្ត្រី​កំដរ​គូស្នេហ៍​ដែល​ស្រឡាញ់​ចូលចិត្ត​ធម្មជាតិ និង​សម្រាប់​គូស្នេហ៍ដែល​ចូលចិត្ត​ភាពស្ងប់ស្ងាត់​ឱ្យ​កាន់តែ​រ៉ូ​មែន​ទិ​ក មាន​សេចក្តីសុខ និង​មាន​ភាព​រីករាយ​កាន់តែ​ច្រើនឡើង ហើយក៏​ជួយ​ឱ្យ​គូស្នេហ៍​ថ្មោងថ្មី​មាន​ភាព​ពពុះ​ពារ និង​ចេះ​ជួយ​គ្នា​នៅក្នុង​ដំណើរ​ឡើង​ភ្នំ និង​ដើរកាត់​ព្រៃព្រឹក្សា​ផងដែរ ដើម្បីឱ្យ​ទៅដល់
​គោលដៅ​មួយ​រួមគ្នា។ នេះ​គឺជា​បទពិសោធ​ថ្មី​ដែល​គូស្នេហ៍​របស់​អ្នក​អាចធ្វើ​រួមគ្នា​ជា​លើកដំបូង​ដ៏​ល្អ​មិនអាច​បំភ្លេចបាន​នៅក្នុង​ជីវិត​គូ​របស់​អ្នក។

ប្រសិនបើ​អ្នក​មិន​ចង់​ទៅណា​ឆ្ងាយ​រហូតដល់​ឆ្លង​ប្រទេស​ទេនោះ ចូរ​ស្វែងរក​ទីតាំងពិសេសៗនៅក្នុង​ប្រទេស​យើង​ក៏បាន​ដែរ ហើយ​ទីតាំង​ក្នុងប្រទេស​ដែល​និយាយ​នោះ វា​គ្មានអ្វី​ក្រៅពី​តំបន់​សមុទ្រ (ដូចជា ក្រុងព្រះសីហនុ និង​ក្រុងកែប) ឬ​តំបន់​កោះ (ដូចជា កោះ​សង្សារ កោះ​ឫស្សី និងកោះរ៉ុង​សន្លឹម កោះរ៉ុង កោះ​ឋានសួគ៌ កោះទន្សាយ និង​កោះ​ស្តេច​ជាដើម) និង​តំបន់ភ្នំ (ដូចជា ភ្នំ​បូកគោ និង​គីរីរម្យ​ជាដើម)៕

ភ្នំពេញ៖ លោក Machele Clara អ្នកជំនាញ​មកពី​អង្គការ​អភិវឌ្ឍន៍​ឧស្សាហកម្ម​សហប្រជាជាតិ (UNIDO) បាន​ជ្រើស​យក​ប្រទេស​កម្ពុជា​ធ្វើជា​ប្រទេស​គំរូ​មួយ​នៅក្នុង​តំបន់​អាស៊ី លើ​ការពង្រឹង​ការអភិវឌ្ឍ​វិស័យ​ឧស្សាហកម្ម​កម្ពុជា​ប្រកបដោយ​ចីរភាព។

ការយក​ប្រទេស​កម្ពុជា​ធ្វើជា​គំរូ​នៅក្នុង​ចំណោម​ប្រទេស​នានា​នៅ​អាស៊ី  គឺ​កម្ពុជា​មានការ​អភិវឌ្ឍ​វិស័យ​ឧស្សាហកម្ម​ប្រកបដោយ​ចីរភាព​ដែល​ធ្វើឡើង​តាមរយៈ​ការពង្រឹង​នូវ​យន្តការ​មួយចំនួន​ដូចជា៖ គណនា​ឱ្យឃើញ​នូវ​តម្លៃ​ខ្សែចង្វាក់​ផលិតកម្ម ជំរុញ​ប្រសិទ្ធភាព​នៃ​តំបន់​សេដ្ឋកិច្ច​ពិសេស ការកាត់បន្ថយ​បែបបទ​រដ្ឋបាល​ស្មុគស្មាញ កិច្ច​សម្រួល​ពាណិជ្ជកម្ម ការទាក់ទាញ​ការវិនិយោគ​ដោយផ្ទាល់​ពី​បរទេស ការបណ្តុះបណ្តាល​ជំនាញ វិជ្ជាជីវៈ​និង​ប្រសិទ្ធភាព​នៃ​ការអនុវត្ត​គោលនយោបាយ​អភិវឌ្ឍន៍​វិស័យ​ឧស្សាហកម្ម​ជាដើម។

លោក Machele Clara បាន​លើកឡើងថា ការចាត់​ទុកជា​ប្រទេស​គំរូ​នេះ គឺ​កម្ពុជា​ទទួលបាន​ជំនួយ​ពី​ដៃគូ​អភិវឌ្ឍន៍ និង​ម្ចាស់ជំនួយ​មួយចំនួន​ជាពិសេស​ពី​ប្រទេស​កូរ៉េ​ក្នុងការ​អនុវត្ត​ភាពជា​ដៃគូ​ដែលមាន​ជំនាញ​ផ្នែក​អភិវឌ្ឍ​ន៏​សួន​ឧស្សាហកម្ម និង​សហគ្រាស​ធុន​តូច និង​មធ្យម។ លោក​បាន​បញ្ជាក់បន្ថែម​ទៀតថា«អង្គការ​UNIDOនឹង​ខិតខំ​សហការ​ធ្វើយ៉ាងណា​ជួយ​ពង្រឹងសមត្ថភាព​ស្ថាប័ន ធនធានមនុស្ស ជាពិសេស​សិក្សា និង​កសាង​គោលនយោបាយ និង​យុទ្ធសាស្ត្រ​អភិវឌ្ឍន៍​ឧស្សាហកម្ម​ប្រកបដោយ​ចីរភាព»។

ជាមួយគ្នានេះ ឯកឧត្តម​ទេសរដ្ឋមន្ត្រី ចម ប្រសិទ្ធ បាន​គាំទ្រ និង​វាយតម្លៃ​ខ្ពស់​ចំពោះ​អង្គការ UNIDO ដែល​សប្តាហ៍​កន្លងទៅនេះ​បានមក​រៀបចំ​សិក្ខាសាលា​មួយ​ស្តីអំពី​ក្របខ័ណ្ឌ​កម្មវិធី​ភាពជា​ដៃគូ​ប្រចាំ​ប្រទេស (PCP) សម្រាប់​ការស្វែងយល់​នូវ​អ្វី​ជា​ឱកាស និង​ភាព​ប្រឈម​នៃ​ការអភិវឌ្ឍ​វិស័យ​ឧស្សាហកម្ម​នៅ​កម្ពុជា ព្រមទាំង​ប្រសិទ្ធភាព​នៃ​ការទទួល និង​ប្រើប្រាស់​ជំនួយ​អន្តរជាតិ ។

ឯកឧត្តម​ទេសរដ្ឋមន្ត្រី ចម ប្រសិទ្ធ ក៏បាន​ស្នើឱ្យ​តំណាង​អង្គការ UNIDO គិតគូរ​លើ​ការកសាង​ផែនការមេ​ក្នុងការ​អភិវឌ្ឍ​តំបន់​សេដ្ឋកិច្ច​ពិសេស​សំដៅលើ​ការធ្វើ​ពិពិធ​កម្ម​ឧស្សាហកម្ម។ ជាពិសេស​គឺ​ការទាក់ទាញ​ការវិនិយោគ​ឱ្យចំ​គោលដៅ ជា​ប្រភេទ​ឧស្សាហកម្ម​ដែលមាន​ចរិត​ជា យុទ្ធសាស្ត្រ​ដូចជា៖ វិស័យ​អេឡិចត្រូនិក-គ្រឿងយន្ត​ជាដើម…។ ទាក់ទង​នឹង​ជំនួយ​មូលនិធិ​គាំទ្រ​ពី​ភាគី​កូរ៉េ កម្ពុជា​រំពឹង​សង្ឃឹមថានឹង​ទទួលបាន​នូវ​បទពិសោធ​ចំណេះដឹង និង​ការផ្ទេរ​បច្ចេកវិទ្យា​ពី​ភាគី​កូរ៉េ​ក្នុង​ការចូលរួម​ការអភិវឌ្ឍ​វិស័យ​ឧស្សាហកម្ម​នៅ​កម្ពុជា​ឱ្យមាន​ការរីកចម្រើន​ទៅ​មុខជា​លំដាប់៕

ភ្នំពេញ៖ វា​ជា​រឿង​ធម្មតា​ដែល​នៅពេល​មានការ​ផ្គត់ផ្គង់​កើនឡើង​ច្រើន តម្រូវការ​នៃ​ការប្រើប្រាស់​តែងមាន​ការធ្លាក់ចុះ ជាក់ស្តែង​របាយការណ៍​សិក្សា​ថ្មី​មួយ​បាន​រកឃើញថា កាលពី​ឆ្នាំ​កន្លងទៅ​ចំនួន​អា​ផាត​មិន (Apartment) ក្នុង​រាជធានី​ភ្នំពេញ​បាន​កើនឡើង​ប្រមាណ​ជា 20% ខណៈដែល​តម្រូវ​ការប្រើ​ប្រាស់​ធ្លាក់ចុះ​រហូតដល់ 8%ឯណោះ។

យោងតាម​ការសិក្សា​រប​ស់​ក្រុមហ៊ុន​ប៊ុណ្ណា​រៀល​ធី​គ្រុប​ដែល​បង្ហាញ​កាលពីពេលថ្មីៗបាន​រកឃើញថា ការផ្គត់ផ្គង់​អា​ផាត​មិន​នៅលើ​ទីផ្សារ​បាន​កើនឡើង​ប្រមាណ​ជា20ភាគរយ ធៀប​រយៈពេល​ដូចគ្នា​កាលពី​ឆ្នាំមុន ស្របពេល​ជាមួយ​តម្រូវការ​ប្រើប្រាស់​បាន​ធ្លាក់ចុះ8% ដោយសារ​ការផ្គត់ផ្គង់​អា​ផាត​មិន​កើនឡើង​ច្រើន​នៅលើ​ទីផ្សារ។

លោក​ឧកញ៉ា​នួន រិទ្ធី​អគ្គនាយក​ក្រុមហ៊ុន Khmer Foundation Appraisal បាន​មានប្រសាសន៍​ទទួលស្គាល់​ថា ចំនួន​នៃ​ការផ្គត់ផ្គង់​អគារ​អា​ផាត​មិន​ពិតជា​មានការ​កើនឡើង ហើយ​ចំនួន​តម្រូវ​ការជួល​ស្នាក់នៅ​មានការ​ធ្លាក់ចុះ​ប្រាកដ​មែន ដែល​កន្លងមក​ការជួល​បន្ទប់​អា​ផាត​មិន កាលពី​ឆ្នាំមុន​កើនឡើង​ដល់90% ប៉ុន្តែ​បច្ចុប្បន្ន​តម្រូវការ​បាន​ធ្លាក់​ចុះមក​នៅត្រឹម​ប្រមាណ​ជា 70% ប៉ុណ្ណោះ។

លោក​ថា អតិថិជន​គោលដៅ​ដែល​ជួល​បន្ទប់​អា​ផាត​មិន​ស្នាក់នៅ មាន​ទាំង​ប្រជាជន​ខ្មែរ និង​បរទេស ហើយ​សម្រាប់​តម្លៃ​ក្រោម1,000ដុល្លារ​ក្នុង​មួយខែ ភាគច្រើន​គឺ​ក្រុម​អ្នកវិនិយោគ​នៅ​អាស៊ី​ស្នាក់នៅ​កម្ពុជា ចំណែក​តម្លៃ​ចាប់ពី1000ដុល្លារ​ឡើងទៅ គឺ​ភាគច្រើន​ជា​អ្នកវិនិយោគ ឬ​ជនបរទេស​មកពី​អឺរ៉ុប។

ជាមួយគ្នានេះដែរ​លោក សន សៀ​ប ប្រធាន​ក្រុមហ៊ុន Key Real Estate Co.ltd ក៏បាន​ថ្លែង​ទទួលស្គាល់ថា ដោយសារ​ការសង់​អគារ​អា​ផាត​មិន មានការ​ប្រកួតប្រជែង​គ្នា​កាន់​តែមាន​ចំនួនច្រើនឡើងៗ បានធ្វើឱ្យ​ការផ្គត់ផ្គង់​កើនឡើង​ខ្លាំង​នៅ​រយៈពេល​ចុងក្រោយ​នេះ​ដែលជា​ការលំបាក​ក្នុងការ​ស្វែងរក​អតិថិជន​សម្រាប់​ជួល​ស្នាក់នៅ។ លោក​បញ្ជាក់ថា អតិថិជន​គោលដៅ​ជួល​អគារ​ស្នាក់នៅ​គឺជា​ជនបរទេស ចំណែក​ប្រជាជន​ខ្មែរ​មិនទាន់មាន​ទំនោរ​ជួល​បន្ទប់​អា​ផាត​មិន​ស្នាក់នៅ​នោះទេ ភាគច្រើន​ស្នាក់​នៅផ្ទះ​ផ្ទាល់ខ្លួន មិន​សុខចិត្ត​ជួល​គេ​ទេ និង​ស៊ូ​ទិញ​បង់​រំលស់ យូរៗទៅនឹង​ក្លាយជា​កម្មសិទ្ធិ​របស់ខ្លួន។

គួរ​បញ្ជាក់ថា ចំនួន​អា​ផាត​មិន​ដាក់ចូល​ទីផ្សារ​បាន​កើនឡើង​យ៉ាងខ្លាំង ជាក់ស្តែង​គិត​ត្រឹម​ដំណាច់​ឆ្នាំមុន អា​ផាត​មិន និង​ខុន​ដូ​ចំនួន 292 គម្រោង និង​មានផ្ទះ​ចំនួន​ប្រមាណ10,000 យូ​នី​ត​បានដាក់​ចូលទៅក្នុង​ទីផ្សារ៕

កូន​មិនសូវ​ស្ដាប់បង្គាប់​ឪពុកម្ដាយ ទង្វើ​នេះ​នឹង​ចាប់ផ្ដើម​ធ្ងន់ធ្ងរ​ឡើង​មែនទែន​នៅពេល​កូន​ឈានចូល​ដល់​វ័យ8-12ឆ្នាំ ដែលជា​អំឡុង​វ័យ​នៃ​ការ​មាន​ឥស្សរភាព​ក្នុងការ​សម្រេចចិត្ត ព្រោះ​កុមារ​ក្នុង​វ័យ​នេះ​នឹង​ចាប់ផ្ដើម​ចេះ​គិត និង​មាន​បុគ្គល​ភាពជា​របស់​ខ្លួនឯង​ច្បាស់លាស់ មើល​អ្វី​ជុំវិញខ្លួន និង​សម្រេចចិត្ត​តាមបែប​របស់​ខ្លួនឯង ដោយ​មិនចាំបាច់​ឆ្លងកាត់​ការយល់ឃើញ​ពី​មនុស្ស​ចាស់​ឡើយ។ ថ្ងៃនេះ​ទំព័រ​គ្រួសារ​របស់​ទស្សនា​វ​ដ្តី ឡា​រ៉ែ​នសូម​អនុញ្ញាត​ពាំនាំ​ពាក្យ​ណែនាំ​ពី​អ្នកជំនាញ​ខាង​ចិត្តសាស្ត្រ​គ្រួសារ និង​កុមារ​ដែល​បាន​រៀបរាប់​យ៉ាង​លម្អិត ព្រមទាំង​ដំបូន្មាន​សម្រាប់​ឪពុកម្ដាយ ក្នុងការ​ចិញ្ចឹម​ថែទាំ​កូន​ជាមួយនឹង​ជំនាញ4យ៉ាងសំខាន់ៗដែល​គួរតែ​បង្ហាត់បង្រៀន​កូន​ឱ្យបាន​មុននឹង​កូន​ឈានទៅដល់​អាយុ8ឆ្នាំ​មក​ជូនជ្រាប​ជា​ចំណេះដឹង​ដូចតទៅ។

1- សាង​ទម្លាប់​ឱ្យ​ស្រឡាញ់​ការអាន

នៅពេលដែល​កូន​មាន​ទម្លាប់ និងឧបនិស្ស័យ​នេះហើយ នឹង​ជួយ​បន្ធូរ​កម្លាំង​ឪពុកម្ដាយ​បាន​ច្រើនណាស់ ដែល​សំខាន់​នោះ​គឺ ក្នុងពេលដែល​កូន​ចាប់ផ្ដើម​ចេះ​គិត ចេះ​សម្រេចចិត្ត និង​សម្លឹងអ្វីៗជុំវិញខ្លួន​ដោយ​ទស្សនៈ​របស់គេ​ហើយ។ គឺជា​វិធី​មួយទៀត​ដែល​កូន​នឹង​បានទទួល​ឥទ្ធិពល​ខាង​ការគិតល្អៗ និង​ពេលដែល​កូន​ស្ដាប់​យើង​កាន់តែ​តិចនិង​ចង់​ស្ដាប់​អ្នកដទៃ​ច្រើនឡើង​នោះ សៀវភៅល្អៗជួយ​ផ្លាស់​ប្ដូរជីវិត រឹតតែ​ក្នុង​យុគសម័យ​ដែលមាន​ព័ត៌មានល្អៗ ងាយស្រួល​ចូលដល់​ផង​នោះ យើង​ចង់​អភិវឌ្ឍ​ជីវិត​លើ​ផ្នែក​ណាមួយ ក៏​អាន​សៀវភៅ​របស់​អ្នក​ដែល​ជោគជ័យ​ក្នុង​រឿង​នោះ។ ចង់​ជោគជ័យ​ក្នុង​ជីវិត ក៏មាន​សាស្ត្រា​នៃ​ភាពជោគជ័យ​ឱ្យ​អាន ចង់​ជោគជ័យ​ផ្នែក​ហិរញ្ញវត្ថុ ការងារ សម្ពន្ធភាព សុខភាព ចិត្ត​វិញ្ញាណ គ្រប់យ៉ាង​សុទ្ធ​តែមាន​ឯកសារល្អៗទាំងអស់។ បើ​កូន​ស្រឡាញ់​ការអាន​ ហើយ​បាន​អនុវត្ត​ទៀតផង​នោះ ជីវិត​នឹង​ពេញ​ទៅដោយ​សេចក្ដីសុខ បាន​ជោគជ័យ​ដូច​បំណង មាន​ពេលវេលា មាន​កម្លាំង និង​បាន​ចែករំលែក​រឿងល្អៗដល់​សង្គម​ទៀតផង​ក៏​អាច​ថា​បានដែរ។

2 បង្ហាត់​ជំនាញ​ពី​ការធ្វើជា​ម្ចាស់​លើ​អារម្មណ៍​ខ្លួនឯង

រឿង​សំខាន់​មួយ​ដែល​ត្រូវតែមាន​គឺ “ជំនាញ​នៃ​ការគ្រប់គ្រង​ខ្លួនឯង” គឺជា​ឧបនិស្ស័យ​មួយ​សំខាន់​ខ្លាំងណាស់​ដែល​មនុស្ស​ជោគជ័យ​ត្រូវតែមាន។ ចាប់ផ្ដើម​ពី​ចំណុច​ទី6 នៅក្នុង​សៀវភៅ​ពេទ្យ និង​ការហ្វឹកហាត់ កុមារៗតាមរយៈ​ស្ថានការណ៍​ក្នុង​ជីវិត​ប្រចាំថ្ងៃ។ កុមារ​ដែលមាន​ជំនាញ​នៃ​ការធ្វើជា​ម្ចាស់​លើ​អារម្មណ៍ នឹង​គ្រប់គ្រង​អារម្មណ៍​ខ្លួនឯង​បានល្អ មិន​ថា​ផ្នែក​ណាក៏ដោយ។ គ្រប់គ្រង​ខ្លួនឯង​តទល់​នឹង​កម្លាំង​ជំរុញ​ឱ្យ​ចង់​លេង​ហ្គេម ចង់​ទិញ​នេះ​ទិញ​នោះ ខឹងក្រេវក្រោធ​ពេល​ត្រូវ​អ្នកដទៃ​ថាឱ្យ ឬ​អ្នកដទៃ​ធ្វើបាប​ជាដើម ក្មេង​ដែលមាន​ជំនាញ​លើ​ការគ្រប់គ្រង​អារម្មណ៍​ខ្លួនឯង នឹង​ចេះ​អត់ទ្រាំ ចេះ​រង់ចាំ និង​ចេះ​ចាត់ការ​ដោយ​សន្តិវិធី។ ជំនាញ​នេះ​អាច​មិន​បានមកភ្លាមៗក្នុង​វ័យ​នេះ​ទេ តែបើ​មាន​គ្រឹះ​មូលដ្ឋាន​ដែល​ល្អ​ហើយ នឹង​ទទួលបាន​ជោគជ័យ 50%មុន​បាត់ទៅហើយ។

3- ជំនាញ​នៃ​ការធ្វើជា​ម្ចាស់​លើ​តិច​ណូ​ឡូ​ជី

មុននឹង​យើង​ចង់​ប្រគល់ឱ្យ ឬអាណាព្យាបាល​ខ្លះ​នឹង​ប្រគល់​ទូរស័ព្ទ​ស្មា​ត​ហ្វូ​ន​ទៅឱ្យ​កូន យើង​ត្រូវប្រគល់​ជំនាញ​នេះ (ជំនាញ​នៃ​ការធ្វើជា​ម្ចាស់​លើ​តិច​ណូ​ឡូ​ជី) ឱ្យទៅ​កូន​ជាមុនសិន ព្រោះ​តិច​ណូ​ឡូ​ជី​ត្រូវបាន​ច្នៃ​ម៉ូដ​ឡើង​ឱ្យ​មនុស្ស​ចាប់អារម្មណ៍ ឱ្យ​មនុស្ស​ចូលចិត្ត​លេង ចង់​ប្រើ​ម្ដង​ហើយ​ម្ដងទៀត​ហ្នឹងឯង។ សាក​ល្បងមើល​មនុស្ស​ធំ​ក្នុង​យុគសម័យ​នេះ​ចុះ យើង​ខ្លួនឯង​នៅ​ពិបាក​គ្រប់គ្រង​ខ្លួនឯង​ផង ចុះ​ទម្រាំ​ក្មេង​ដែល​នៅ​មិនទាន់​បានទទួល​ការហ្វឹកហាត់​ការគ្រប់គ្រង​ខ្លួនឯង​ផង​នោះ នឹង​ទៅជា​យ៉ាងណា? ដូច្នេះ​បើ​បង្ហាត់​កូន​ឱ្យ​ចេះ​ប្រើ ចេះ​ស្វែងរក​ចំណេះ និង​ចេះ​ធ្វើជា​ម្ចាស់​លើ​តិច​ណូ​ឡូ​ជី​នឹងមាន​ប្រយោជន៍​ច្រើនណាស់​ចំពោះ​ជីវិត។

4- ជំនាញ​នៃ​ការធ្វើជា​ចៅហ្វាយនាយ​របស់​លុយ

កុមារ​គួរតែ​បានទទួល​ការបង្ហាត់បង្រៀន​ពី​ការមើលឃើញ​ពី​គុណ​តម្លៃ​របស់​អ្វីដែល​យើង​មាន។ កុមារ​គួរតែ​បាន​ស្គាល់​ពាក្យ​ថា “ចាំបាច់” និង “តម្រូវការ”។ កុមារ​គួរតែ​បាន​រៀន​យល់ដឹង​ពី​ការគ្រប់គ្រង​ចាត់ចែង​លុយកាក់ ដោយមាន​ម្ដាយ​នៅចាំ​មើលថែទាំ និង​ឱ្យអំណាច​បន្តិចម្ដងៗក្នុងការ​ប្រើប្រាស់​លុយកាក់​របស់គេ​ម្ដងបន្តិច។ ជំនាញ​ក្នុង​រឿងនេះ លទ្ធផល​ដែល​នឹង​តាម​មក​គឺ កុមារ​នឹង​បានដឹង​ពី​គុណ​តម្លៃ​របស់​ប្រាក់ ដឹងថា លុយកាក់​មាសប្រាក់​មិនមែន​ធ្លាក់​ចុះមក​ពីលើ​មេឃ​ទេ ចេះ​គ្រប់គ្រង​ការគិត មានគំនិត​ច្នៃប្រឌិត​លើ​ការចាយវាយ​លុយ ដើម្បីឱ្យ​កើតមាន​ក្តី​មោទនភាព​លើ​ខ្លួនឯង​នាពេល​អនាគត៕

ការចាយវាយ​របស់កូនៗជា​រឿង​ដែល​អាណាព្យាបាល​កំពុង​បារម្ភ ហើយ​មានពេលខ្លះ​ក៏​ចំណាយ​ពេលវេលា​ច្រើន​ដើម្បី​ស្វែងរក​ការប្រឹក្សា​យោបល់ ឬ​ដើម្បី​ស្វែងរក​វិធីសាស្ត្រ​ក្នុងការ​គ្រប់គ្រង​ការចាយវាយ​របស់​ពួកគេ ខណៈ​អ្នក​ខ្លះទៀត​ចង់ឱ្យ​កូន​យល់​ពី​ការលំបាក​របស់ខ្លួន​ដែល​ខិតខំ​ប្រឹងប្រែង​ខ្លាំង​ដើម្បី​រកលុយ តែ​កូន​ចាយវាយ​ច្រើន​ដោយ​មិនសូវ​ខ្វល់​ជាដើម។

ជាទូទៅ គេ​រកឃើញថា បញ្ហា​ទាំងអស់នេះ​កើតចេញពីកូនៗទាំងអស់នោះ​មិនមាន​ទម្លាប់​ក្នុងការ​សន្សំ​ប្រាក់ ឬ​មិន​យល់​ពី​ការរៀបចំ​ផែនការ​នៅពេលដែល​ពួកគេ​មាន​វ័យក្មេង ហេតុនេះ​ទើប​ឡា​រ៉ែ​ន បាន​ដកស្រង់​នូវ​ចំណុចសំខាន់ៗមួយចំនួន​ពី​ការស្រាវជ្រាវ​របស់​ស្ថាប័ន​មួយចំនួន​មក​ជម្រាបជូន​ពី​ហេតុផល​ក្នុងការ​ជំរុញ​ក្មេង​តូច​ឱ្យ​សិក្សា​ពី​ការគ្រប់គ្រង​ហិរញ្ញវត្ថុ​តាំងពី​វ័យក្មេង។

1.ក្មេង​អាយុ 5ឆ្នាំ​ជា​វ័យ​ល្អ​បំផុត​សម្រាប់​ការរៀន​សន្សំ

តាម​ការស្រាវជ្រាវ​រប​ស់​ស្ថាប័ន Customer Financial Protection Bureau (CFPB) បាន​បង្ហាញថា ក្មេង​អាច​អភិវឌ្ឍ​សមត្ថភាព​ក្នុងការ​សន្សំ​ប្រាក់​ចាប់ពី​អាយុ 5ឆ្នាំ​ឡើងទៅ ហេតុនេះ​អាណាព្យាបាល​គួរ​បណ្តុះ​គំនិត​នៃ​ការ​សន្សំ​ដោយ​ការផ្តល់​ឱ្យនូវ​កូនជ្រូក​សន្សំ​លុយ (Piggy Bank) ឬ​គណនេយ្យ​សន្សំ​ដែល​ផ្តល់ឱកាស​ឱ្យ​ពួកគេ​ចេះ​សន្សំ​ប្រាក់​ដោយ​ខ្លួនឯង។ ជាការ​កត់សម្គាល់ នៅពេលដែល​ក្មេង​តូច​ម្នាក់​មាន​ទម្លាប់​សន្សំ​ប្រាក់ គាត់​បាន​ស្គាល់​នូវ​រសជាតិ​នៃ​ការគ្រប់គ្រង​លុយកាក់ ហើយ​គាត់​អាច​នឹង​ក្លាយជា​មនុស្ស​ម្នាក់​ដែល​ចេះ​គ្រប់គ្រង​លុយកាក់​បានល្អ ឬ​មាន​គម្រោង​ក្នុងការ​បង្កើត​លុយ​ថែម​ទៀតផង​នៅពេលដែល​ពួកគេ​ចូលដល់​វ័យ​កណ្តាល។ ការដែល​កុមារ​ចម្រើន​វ័យ​ជាមួយនឹង​លុយ​សន្សំ​ដែល​គាត់​មាន​ស្រាប់ គាត់​អាច​នឹងមាន​អ្វី​គ្រប់យ៉ាង​ដែល​គាត់​ចង់បាន​សម្រាប់​ផ្គត់ផ្គង់​ដល់​ការសិក្សា​របស់គាត់ ហើយ​ការចាយវាយ​របស់គាត់​ក៏​នឹង​ហ្មត់ចត់​ត្រឹមត្រូវ ហើយ​ចំ​គោលដៅ​ល្អ ព្រោះ​គាត់​យល់ច្បាស់​ពី​តម្លៃ​នៃ​ពេលវេលា និង​លុយ​ដែល​គាត់​ខំ​សន្សំ​តាំងពី​តូច​មក​នោះ។

2.ក្មេង​អាច​ចង់បាន​ដំបូន្មាន​ច្រើនជាង​លុយកាក់​នៅពេលដែល​គេ​ចូលចិត្ត​សន្សំ​ប្រាក់

អាណាព្យាបាល​ជាច្រើន​ប្រហែលជា​ផ្តល់រ​ង្វាន់​ដល់​កូន​ជា​លុយកាក់ ឬ​ជា​របស់របរ​ដែល​ចំណាយលុយ​ទិញ។ របស់​ទាំងអស់នេះ​អាចជួយ​ឱ្យ​កូន​សប្បាយចិត្ត តែ​ពេលខ្លះ​មិន​ប្រាកដថា អាចជួយ​គេ​បាន​ច្រើន​នោះទេ តែ​ពេលខ្លះ​អាណាព្យាបាល​អាច​ចំណាយលុយ​តិច តែ​បាន​ផល​ច្រើន​ចំពោះ​ការផ្តល់​មេរៀនល្អៗដល់​ក្មេង។ នៅពេលដែល​ក្មេង​យល់​ពី​តម្លៃ​នៃ​ការគ្រប់គ្រង​ហិរញ្ញវត្ថុ ឬ​ការ​សន្សំ​ផ្ទាល់ខ្លួន អាណាព្យាបាល​អាច​ផ្តល់ឱ្យ​ពួកគេ​នូវ​ថវិកា​មួយចំនួន ជាមួយនឹង​វិធីសាស្ត្រ​ឆ្លាត​វៃ​មួយចំនួន​ក្នុងការ​សន្សំ​ប្រាក់​ដែល​ពួកគេ​មិន​ធ្លាប់​ដឹង​ពីមុនមក។ ការធ្វើ​បែបនេះ អាចជា​រង្វាន់​យ៉ាង​ល្អ​ដែល​ក្មេង​អាច​ចេះ​ទាំង​ទ្រឹស្តី និង​ការអភិវឌ្ឍ​ប្រកបដោយ​ភាព​រីករាយ ព្រោះថា នៅពេលដែល​យើង​ផ្តល់ឱ្យ​គាត់​នូវ​លុយ​សន្សំ បង្ហាញ​វិធី​ក្នុងការ​សន្សំ​ប្រកបដោយ​ភាព​ឆ្លាត​វៃ ហើយ​ទុកឱ្យ​គាត់​ជា​អ្នកអនុវត្ត​ដោយ​ខ្លួនឯង ហើយ​ទទួលបាន​លទ្ធផល​នោះ គាត់​នឹង​រីករាយ​ក្នុងការ​សន្សំ​នោះ​ដោយ​ជក់ចិត្ត។ ការដែល​ទុក​ឱកាស​ក្នុងការ​សម្រេចចិត្ត​ខ្លះ​ដល់​ក្មេងតូចៗ និង​ឱ្យ​គាត់​ដឹង​ពី​ចំនួន​លុយ​ច្បាស់លាស់​របស់គាត់​ផ្ទាល់​ផង អាចធ្វើឱ្យ​គាត់​កាន់​តែមាន​ចំណង់​កាន់តែខ្លាំង​ក្នុងការ​សន្សំ​ប្រាក់​នេះ។

3.អាណាព្យាបាល​នឹង​លែង​សូវ​បារម្ភ​ពី​ការចាយវាយ​របស់​កូន​នៅ​វ័យ​ជំទង់ បើ​គេ​ចេះ​សន្សំ​ប្រាក់​ពី​តូច

អាណាព្យាបាល​ជាច្រើន​តែងតែ​បារម្ភ​ពី​ការគ្រប់គ្រង​ហិរញ្ញវត្ថុ​របស់​កូន ឬ​ចូលខ្លួន​ទៅ​ជ្រៀតជ្រែក​លើ​ការសម្រេចចិត្ត​នានា​ពាក់ព័ន្ធ​នឹង​លុយកាក់​របស់​កូន។ ការធ្វើ​បែបនេះ​គឺអាច​ធ្វើឱ្យ​គាត់​ទុកចិត្ត តែ​គាត់​នឹង​បាត់បង់​ឱកាស​ក្នុងការ​ផ្តល់ឱ្យ​កូន​នូវ​ភាពចាស់ទុំ​ពិតប្រាកដ​ផ្នែក​ហិរញ្ញវត្ថុ ហេតុនេះ​ការដែល​តាមដាន និង​ឃ្លាំមើល​ក្មេង​ពី​តូច អាចធ្វើឱ្យ​អាណាព្យាបាល​មិនសូវ​បារម្ភ​ពី​ការចាយវាយ​របស់​កូន។

ក្មេងៗដែលមាន​ចំណេះដឹង​ផ្នែក​គ្រប់គ្រង​ហិរញ្ញវត្ថុ​ជា​មនុស្ស​ដែល​ចង់បាន​ឱកាស​ច្រើន​ក្នុងការ​សម្រេចចិត្ត​ចាយវាយ ព្រោះ​ពួកគេ​ជឿ​លើ​សមត្ថភាព​របស់ខ្លួន និង​មាន​ភាព​ប្រយ័ត្នប្រយែង​ខ្ពស់​ដែល​អាចធ្វើឱ្យ​ឪពុកម្តាយ​មានការ​ទុកចិត្ត។ គាត់​អាច​នឹង​សួរ​ច្រើន​ទៅកាន់​ឪពុកម្តាយ ឬ​សុំ​ការពិភាក្សា​មុនពេល​ចាយវាយ​លើ​របស់​ដែលមាន​តម្លៃ ដោយ​មិនចាំបាច់​ឱ្យ​អាណាព្យាបាល​បារម្ភ​នោះទេ៕

ភ្នំពេញ – កម្ពុជា​កំពុងមាន​ការព្រួយបារម្ភ និង​យក​ចិ​ត្ដ​ទុកដាក់​ចំពោះ​ការកើនឡើង​នៃ​កម្ដៅ​ផែនដី  កម្ពុជា​បានបង្ហាញ​ពី​ជំហរ និង​ឆន្ទៈ​យ៉ាង​ម៉ឺងម៉ាត់​ក្នុងការ​ចូលរួម​ទប់ស្កាត់​នៃ​ការប្រែប្រួល​អាកាសធាតុ ខណៈ​លោក​អគ្គលេខាធិការ​អង្គការសហប្រជាជាតិ Antonio Guterres បាន​បញ្ជាក់ថា ទឹកជំនន់ ខ្យល់ព្យុះ និង​អគ្គិភ័យ បានកើត​ឡើងជា​ញឹកញាប់ និង​កាន់តែ​សាហាវ​ដែល​កំពុង​វាយប្រហារ​ពិភពលោក។

ការលើកឡើង​បែបនេះ​ធ្វើឡើង​នៅពេល​ឯកឧត្តម ឃុ​ត ចាន់​ដា​រ៉ា តំណាង​ប្រតិភូ​នៃ​វិស័យ​បរិស្ថាន​កម្ពុជា បាន​ដឹកនាំ​គណៈប្រតិភូ​វិស័យ​បរិស្ថាន​ចូលរួម​ក្នុង​សន្និសីទ​សហប្រជាជាតិ​ស្តីពី​ការប្រែប្រួល​អាកាសធាតុ​លើក​ទី23 (COP23) ដែល​បានចាប់ផ្តើម​កាលពី​ថ្ងៃទី6 ដល់17 ខែវិច្ឆិកា ឆ្នាំ2017កន្លងមក នៅ​ទីក្រុង​បោ​ន សាធារណរដ្ឋ​អាល្លឺម៉ង់។

ឯកឧត្ដម ឃុ​ត ចាន់​ដា​រ៉ា បានបញ្ជាក់​ពី​ជំហរ​ដ៏​ម៉ឺងម៉ាត់​របស់​រាជរដ្ឋាភិបាល​កម្ពុជា​នៅក្នុង​ការចូលរួម​ទប់ស្កាត់​ការប្រែប្រួល​អាកាសធាតុ​តាមរយៈ​ការផ្តល់​កិច្ចព្រមព្រៀង​ទីក្រុង​ប៉ារីស​ស្តីពី​ការប្រែប្រួល​អាកាសធាតុ និង​បាន​ដាក់ជូន​នូវ​ផែនការ​ជាតិ​រួមចំណែក​អនុវត្ត​អនុសញ្ញា​ក្របខ័ណ្ឌ​សហប្រជាជាតិ​ស្តីពី​ការប្រែប្រួល​អាកាសធាតុ (NDC)។ ទន្ទឹមនឹងនេះ កម្ពុជា​ក៏បាន​អំពាវនាវ​ដល់​គ្រប់ភាគី​ទាំងអស់​ផ្តល់នូវ​ការគាំទ្រ​ដល់​រាជរដ្ឋាភិបាល​ដើម្បី​សម្រេច​ទិសដៅ​ផែនការ​របស់ខ្លួន​ដែល​នឹង​កាត់បន្ថយ​ការ​បំ​ភាយ​ឧស្ម័ន​ផ្ទះ​កញ្ចក់​ឲ្យ​បាន 27%ត្រឹម​ឆ្នាំ 2030 នឹង​សន្យា​បង្កើន​ចំនួន​ព្រៃឈើ​នៅក្នុង​ប្រទេស​ឲ្យ​បាន​ចន្លោះ​ពី 47 ទៅ 60 ភាគរយ។

ក្នុងនោះ​កម្ពុជា​បានដាក់​ចេញ​នូវ​វិធានការសំខាន់ៗមួយចំនួន​ដូចខាងក្រោម៖

(1) ការកសាង​សមត្ថភាព​ស្ថាប័ន
(2) ការរៀបចំ និង​អនុវត្ត​ផែនការ​យុទ្ធសាស្ត្រ​ឆ្លើយតប​នឹង​ការប្រែប្រួល​អាកាសធាតុ​នៅ​កម្ពុជា
(3) ការបញ្ជ្រាប​ការប្រែប្រួល​អាកាសធាតុ​ទៅក្នុង​ផែនការអភិវឌ្ឍន៍
(4) ការ​កៀរគរ​ធនធាន
(5) ការអភិវឌ្ឍ​ថាមពល​កកើត​ឡើងវិញ និង​ប្រសិទ្ធភាព​ថាមពល
(6) ការអភិរក្ស​ព្រៃឈើ
(7) ការអនុវត្ត​គម្រោង​នានា​សំដៅ​កសាង​ភាព​ធន់​របស់​សហគម​ន៍ និង​របរ​ចិញ្ចឹមជីវិត​ដែលមាន​និរន្តរភាព។

វិធានការ​នេះ​នឹងចូលរួម​ចំណែក​ធានា​ឱ្យបាន​លើ​ការអភិវឌ្ឍ​ដោយ​ចីរភាព ផ្តោតលើ​ការធានា​សន្តិសុខ​ថាមពល ទឹក និង​ស្បៀងអាហារ ការកែលម្អ​សុខភាព ការកសាង​សមត្ថភាព ការផ្ទេរ​បច្ចេកវិទ្យា ការទទួលបាន​នូវ​ធនធាន​ហិរញ្ញវត្ថុ និង​ការកាត់បន្ថយ​ភាពក្រីក្រ និង​រួមចំណែក​ជាមួយ​សហគមន៍​អន្តរជាតិ​ក្នុងការ​កាត់បន្ថយ​ការបញ្ចេញ​ឧស្ម័ន​ផ្ទះ​កញ្ចក់៕