ដោយសម្លឹងឃើញខេត្ដសានទុង របស់ប្រទេសចិន មានទីតាំងនៅជាប់មាត់សមុទ្រ និងមានបទពិសោធជោគជ័យក្នុងការអភិវឌ្ឍវិស័យទេសចរណ៍តាមតំបន់ឆ្នេរសមុទ្រនោះ ថ្នាក់ដឹកនាំនៃក្រសួងទេសចរណ៍ កាលពីពេលថ្មីៗនេះបានស្នើសុំឱ្យគណៈប្រតិភូចិន មកពីខេត្តសានទុង ជួយរៀបចំផែនការមេក្នុងការអភិវឌ្ឍវិស័យទេសចរណ៍ និងជំរុញការវិនិយោគផលិតផលទេសចរណ៍នៅតំបន់ឆ្នេរសមុទ្រកម្ពុជាឱ្យបានកាន់តែខ្លាំងឡើងបន្ថែមទៀត។
រដ្ឋមន្ដ្រីក្រសួងទេសចរណ៍ ឯកឧត្ដម ថោង ខុន បានលើកឡើងថា កម្ពុជា ជាប្រទេសដែលមានសក្តានុពលលើវិស័យទេសចរណ៍ដ៏ច្រើនសម្បូរបែប ទាំងតំបន់មាត់សមុទ្រ តំបន់វប្បធម៌ តំបន់អេកូទេសចរណ៍ តំបន់ទេសចរណ៍ធម្មជាតិ និងតំបន់ទេសចរណ៍ជីវចម្រុះបឹងទន្លេសាប ជាដើម។
ឯកឧត្តមបានបន្តថា ដោយសារកម្ពុជាមានសក្ដានុពលទេសចរណ៍ខ្ពស់បានធ្វើឱ្យចំនួនភ្ញៀវទេសចរបរទេសដែលមកទស្សនាកម្ពុជាកើនឡើងជារៀងរាល់ឆ្នាំ។ ជាក់ស្ដែងក្នុងឆ្នាំ2016 កន្លងមក កម្ពុជាទទួលបានភ្ញៀវទេសចរបរទេសជាង5លាននាក់ ដោយមានកំណើន5% បើធៀបនឹងឆ្នាំ2015 ខណៈភ្ញៀវទេសចរចិនមានចំនួនជាង83ម៉ឺននាក់។
ការព្យាករមួយបានបង្ហាញថា នៅឆ្នាំ2020 ខាងមុខភ្ញៀវទេសចរចិននឹងចេញទៅទស្សនាក្រៅប្រទេសប្រមាណ200លាននាក់ ក្នុងនោះកម្ពុជាក៏បាននិងកំពុងរៀបចំយុទ្ធសាស្ត្រដើម្បីត្រៀមទទួលភ្ញៀវទេសចររបស់ប្រទេសនេះផងដែរ ដែលមានដូចជា ការដាក់ចេញឱ្យប្រើប្រាស់នូវសៀវភៅស China Ready ការសម្រួលទិដ្ឋាការជូនទេសចរចិន ការដាក់ស្លាកសញ្ញាស្គាល់ សញ្ញាប្រាប់ទិសជាភាសាចិន និងការបណ្ដុះបណ្ដាលមគ្គទេសក៍ភាសាចិនជាដើម។
ឯកឧត្តម បានលើកឡើងថា ទន្ទឹមនឹងការត្រៀមខ្លួនទទួលភ្ញៀវទេសចរចិន ក៏ដូចជាភ្ញៀវទេសចរអន្ដរជាតិដទៃទៀត កម្ពុជាក៏ត្រូវមានផែនការមេច្បាស់លាស់ក្នុងការអភិវឌ្ឍវិស័យទេសចរណ៍ ហេដ្ឋារចនាសម្ព័ន្ធ សេវាកម្ម ធនធានមនុស្សក្នុងវិស័យទេសចរណ៍ និងមធ្យោបាយធ្វើដំណើរផងដែរ។
ឯកឧត្ដម ថោង ខុន បានមានប្រសាសន៍ថា៖ “រហូតមកដល់ពេលនេះនៅតាមបណ្តាខេត្ត និងគោលដៅទេសចរណ៍មួយចំនួនរបស់កម្ពុជា នៅមិនទាន់មានផែនការមេសម្រាប់វិស័យទេសចរណ៍នោះទេ ហេតុនេះយើងស្នើដល់មិត្តចិន តាមរយៈគណៈប្រតិភូដែលដឹកនាំដោយលោក ជី ចាងឈី នាពេលនេះឱ្យជួយសិក្សារៀបចំផែនការមេក្នុងការអភិវឌ្ឍវិស័យទេសចរណ៍នៅតំបន់ឆ្នេរសមុទ្រកម្ពុជាជាមួយនឹងកិច្ចសហប្រតិបត្តិការដទៃទៀត ខណៈសានទុង ជាខេត្តមានបទពិសោធជោគជ័យក្នុងការរៀបចំផែនការអភិវឌ្ឍលើការគ្រប់គ្រង និងការអភិវឌ្ឍវិស័យទេសចរណ៍របស់ខ្លួន ពិសេសនៅតំបន់ឆ្នេរសមុទ្រតែម្ដង។
ឯកឧត្ដមបញ្ជាក់ថា ការកសាងរៀបចំផែនការមេនឹងជួយឱ្យកម្ពុជាអាចមានសមត្ថភាពផ្ដល់សេវាកម្មជូនភ្ញៀវទេសចរ ឆ្លើយតបទៅនឹងស្ដង់ដាររួមរបស់អាស៊ាន ពោលសេវាមួយស្ដង់ដារមួយដែលទាមទារឱ្យមានការបណ្ដុះបណ្ដាលធនធានមនុស្សឱ្យបានហ្មត់ចត់ និងប្រកបដោយក្រមសីលធម៌វិជ្ជាជីវៈ។ ជាមួយគ្នានេះឯកឧត្ដមក៏បានស្នើដល់ភាគីចិនឱ្យជួយបណ្ដុះបណ្ដាលធនធានមនុស្សលើវិស័យទេសចរណ៍ ដើម្បីឆ្លើយតបទៅនឹងកំណើនទេសចរជាតិ-អន្តរជាតិ ខណៈកម្ពុជាត្រូវការធនធានមនុស្សលើវិស័យទេសចរណ៍ប្រមាណ 5ម៉ឺននាក់ក្នុងមួយឆ្នាំ។
គួរបញ្ជាក់ថា រយៈពេល9ខែ ឆ្នាំ2017 នេះកម្ពុជាទទួលបានភ្ញៀវទេសចរអន្តរជាតិចំនួន3,522,383នាក់កើនឡើង12% ក្នុងនោះតំបន់ឆ្នេរទទួលបាន554,613នាក់ កើនឡើង15.7%។ ជាចក្ខុវិស័យឆ្នាំ2020 កម្ពុជារំពឹងទទួលបានភ្ញៀវទេសចរអន្តរជាតិប្រមាណ7លាននាក់ ដែលអាចនាំចំណូលចូលជាតិប្រមាណ 5ពាន់លានដុល្លារ និងបង្កើតការងារផ្ទាល់ជិត1លាននាក់។
អភិបាលរងខេត្តសានទុង លោក ជី ចាងឈី ដែលបានដឹកនាំគណៈប្រតិភូចិន មកទស្សនកិច្ចកម្ពុជា ដើម្បីពិនិត្យមើលសក្ដានុពល និងការអភិវឌ្ឍលើវិស័យទេសចរណ៍នោះ បានគាំទ្រសំណើរបស់កម្ពុជាដោយបញ្ជាក់ថា លោកនឹងពាំនាំសំណើរបស់កម្ពុជាដាក់ជូនរដ្ឋាភិបាលរបស់ខ្លួន។ ជាមួយគ្នានេះលោកក៏បានលើកសរសើរថា កម្ពុជាពិតជាមានសក្ដានុពលខ្ពស់ក្នុងការអភិវឌ្ឍវិស័យទេសចរណ៍ពិតប្រាកដមែន ដែលខុសពីអ្វីដែលពួកគេបានឮថាកម្ពុជាមានតែប្រាសាទអង្គរវត្តសម្រាប់ទាក់ទាញភ្ញៀវទេសចរតែប៉ុណ្ណោះ៕
