អាណាព្យាបាលជាច្រើនប្រហែលជាមិនដែលនឹកដល់ទេថា កូនតូចៗដែលពេលខ្លះទើបនឹងចេះនិយាយនោះកំពុងរៀនអ្វីគ្រប់យ៉ាងពីមនុស្សធំ ដែលចំណុចនេះធ្វើឱ្យឪពុកម្តាយខ្លះមានការភ្ញាក់ផ្អើលនៅពេលដែលពួកគាត់សង្កេតឃើញចំណុចអវិជ្ជមានរបស់គាត់ត្រូវបានក្មេងធ្វើតាមនៅពេលណាមួយ។
ពាក់ព័ន្ធនឹងបញ្ហានេះលោកស្រី គឹម សុជាតា នាយិកាសាលាអន្តរជាតិ សាស្តា បានលើកឡើងថា ក្មេងចាប់ផ្តើមរៀនសូត្រ និងមានការចេះគិតតាំងពីពួកគេនៅវ័យក្មេងបំផុត ហេតុនេះការបង្រៀនពួកគាត់គឺជារឿងសំខាន់បំផុតមួយដែលអាណាព្យាបាលគួរតែយកចិត្តទុកដាក់ ហើយការប្រើអាកប្បកិរិយាក៏ត្រូវប្រុងប្រយ័ត្នផងដែរ ព្រោះពួកគេចាប់យករូបភាពគ្រប់យ៉ាង ទោះបីជាពួកគេមិនចេះនិយាយក៏ដោយ។
លោកស្រី គឹម សុជាតា បាននិយាយថា៖ «ក្មេងដែលទទួលបានការអប់រំត្រឹមត្រូវតាំងពីនៅតូចអាចក្លាយជាក្មេងដែលមានភាពក្លាហានច្រើនជាងក្មេងទូទៅ ដែលរស់នៅជាមួយនឹងមនុស្សធំតែមិនបានបង្រៀនហើយធ្វើអ្វីគ្រប់យ៉ាងតាមទម្លាប់ប្រចាំថ្ងៃ»។
អ្នកអប់រំក្មេងតូចខាងលើបានបង្ហាញឱ្យដឹងផងដែរថា មនុស្សធំគួរយកចិត្តទុកដាក់ក្នុងការប្រើប្រាស់ពាក្យសម្តី និងអាកប្បកិរិយាល្អៗជាមួយក្មេងតូចៗ ព្រោះថា ពួកគេបានចម្លងយកអ្វីគ្រប់យ៉ាងដែលមនុស្សធំបានធ្វើ។ ការដែលដាក់ឱ្យកូនរស់នៅក្នុងមជ្ឈមណ្ឌលថែទាំ អាចជាជម្រើសល្អមួយដើម្បីឱ្យពួកគេរស់នៅក្នុងបរិស្ថានដែលទន់ភ្លន់ កក់ក្តៅ និងមានអ្នកជំនាញសម្រាប់អប់រំទាំងសុខភាព និងផ្លូវចិត្តឱ្យក្លាយជាមនុស្សដែលមានសមត្ថភាពម្នាក់នៅថ្ងៃអនាគត។
លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន បានលើកឡើងថា ក្មេងតូចៗ ក៏ត្រូវការរៀនដូចមនុស្សធំដែរ គ្រាន់តែពេលខ្លះការរៀនរបស់ពួកគាត់គឺខុសប្លែកពីក្មេងដែលនិយាយស្តាប់គ្នាបាន។ ក្មេងតូចត្រូវការការយកចិត្តទុកដាក់ ហើយចូលចិត្តលេងជាងការរៀនអ្វីដែលលំបាកគិត ហេតុនេះអ្នកជំនាញគេអាចប្រើប្រាស់វិធីលេងដែលបង្កប់ដោយចំណេះដឹង និងបំផុសការគិតដែលអាចធ្វើឱ្យក្មេងនោះក្លាយជាមនុស្សដែលមានហេតុផល ចេះគិត និងមានភាពក្លាហាននៅពេលដែលពួកគេធំឡើង៕
