Category: សង្គម និងសេដ្ឋកិច្ច

តើជនបរទេសនៅស្រុកខ្មែរត្រូវបង់ពន្ធលើប្រាក់ខែដែរឬទេ?
ការបង់ពន្ធជាកាតព្វកិច្ចយ៉ាងសំខាន់មួយដែលប្រជាជនគ្រប់រូបត្រូវយកចិត្តទុកដាក់ ព្រោះក្នុងនាមជាប្រជាពលរដ្ឋដែលមានការទទួលខុសត្រូវ ត្រូវតែបំពេញឱ្យបាននូវកាតព្វកិច្ចដ៏សំខាន់មួយនេះ។
ពាក់ព័ន្ធនឹងបញ្ហានេះ មានសំណួរបានចោទឡើងថា ប្រជាជនខ្មែរត្រូវបានច្បាប់ចែងយ៉ាងច្បាស់អំពីកាតព្វកិច្ចដែលត្រូវបង់ពន្ធតាមលទ្ធភាពរកប្រាក់ចំណូល ឬប្រាក់ខែរបស់ខ្លួន ចុះជនបរទេសធ្វើការនៅស្រុកខ្មែរវិញ តើត្រូវបង់ពន្ធដែរឬទេ បើគាត់មិនមែនជាប្រជាជនខ្មែរផងនោះ?។
ពាក់ព័ន្ធនឹងបញ្ហានេះ លោកស្រី ជីវ គីមស្រូយ នាយិកាសេវាកម្មពន្ធ និងប្រឹក្សាយោបល់នៃក្រុមហ៊ុន Deloitte (Cambodia) Co., Ltd បានលើកឡើងថា សម្រាប់បញ្ហាជនបរទេសធ្វើការនៅកម្ពុជាគឺ តាមច្បាប់កម្ពុជាគេបែងចែកចេញជា 2ប្រភេទ។ ប្រភេទទី1 គឺជនដែលស្នាក់នៅកម្ពុជាលើសពី 182ថ្ងៃ ដែលយើងហៅថាជានិវេសនជន (resident) និងមួយប្រភេទទៀតដែលស្នាក់នៅតិចជាង 182ថ្ងៃ ហើយត្រឡប់ទៅប្រទេសរបស់គាត់វិញដែលយើងហៅថាជាអនិវេសនជន (non-residence)។
លោកស្រី ជីវ គីមស្រូយ បាននិយាយថា៖ «ចំពោះជនដែលជានិវេសនជន មានន័យថាគាត់បានរស់នៅ និងធ្វើការនៅកម្ពុជាច្រើនជាង 182ថ្ងៃ គាត់ត្រូវមានកាតព្វកិច្ចបង់ពន្ធទៅតាមច្បាប់របស់កម្ពុជា»។
លោកស្រី គីមស្រូយ បានបន្ថែមទៀតថា ចំពោះអ្នកដែលស្នាក់នៅ ឬរស់នៅប្រទេសកម្ពុជាតិចជាង 182ថ្ងៃ ដែលអ្នកខ្លះអាចមកធ្វើការនៅស្រុកខ្មែរតែប្រមាណ 2ខែ បន្ទាប់មកគាត់ត្រឡប់ទៅផ្ទះវិញ គាត់មិនបាច់បង់ពន្ធលើប្រាក់ខែនោះទេ តែគាត់ត្រូវបង់ប្រាក់ប្រមាណ 20% នៃប្រាក់ចំណូលរបស់គាត់ក្នុងចន្លោះពេលនោះ៕
November 25, 2017
អ្នកជំនាញបង្ហាញពីហេតុផលដែលក្រសួងចាត់វិធានការលើក្រុមហ៊ុនពាក់ព័ន្ធនឹងសិទ្ធិការងារ
ការគាំពារបុគ្គលិក និងការជំរុញឱ្យមានការគោរពសិទ្ធិការងារឱ្យកាន់តែទូលំទូលាយ ជារឿងសំខាន់មួយដែលកម្ពុជាកំពុងយកចិត្តទុកដាក់។
វិធានការមួយចំនួនដែលរដ្ឋាភិបាល ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការ បានចាប់ផ្តើមធ្វើចំពោះក្រុមហ៊ុនឯកជននាពេលបច្ចុប្បន្ននេះ គឺការដាក់ពិន័យទៅលើក្រុមហ៊ុនទាំងឡាយណាដែលមិនគោរពតាមច្បាប់ការងារ ជាពិសេសលើលក្ខខណ្ឌមួយចំនួនស្តីពីសិទ្ធិការងារ។
ពាក់ព័ន្ធនឹងបញ្ហានេះ លោកមេធាវី សោម ចំណាន ដែលជាអ្នកជំនាញផ្នែកច្បាប់ការងារបានលើកឡើងថា នេះជាពេលវេលាដ៏សំខាន់ដែលក្រសួងចាប់ផ្តើមចាត់វិធានការលើក្រុមហ៊ុនទាំងឡាយណាដែលមិនគោរពសិទ្ធិការងារ។ ដើម្បីធានាដល់ការគ្រប់គ្រងយន្តការនេះ ក្រសួងបានបង្កើតឱ្យមានក្រុមអធិការកិច្ចដែលក្នុងនោះ តួនាទីរបស់ពួកគាត់គឺធ្វើការត្រួតពិនិត្យ និងផាកពិន័យចំពោះក្រុមហ៊ុន ឬសហគ្រាសទាំងឡាយណាដែលមិនគោរពសិទ្ធិបុគ្គលិក។
លោកមេធាវី សោម ចំណាន បាននិយាយថា៖ «នៅឆ្នាំ 2015 ដល់ឆ្នាំ 2016 មានការផាកពិន័យកើនឡើងដល់ទៅ 100%។ វាជាពេលដែលត្រូវផាកពិន័យហើយ ព្រោះច្បាប់ការងារបានធ្វើប្រមាណជាង 30ឆ្នាំ មកហើយ ហេតុនេះល្មមដល់ពេលដែលក្រុមហ៊ុននានាយល់ច្បាស់ និងចូលរួមអនុវត្តហើយ»។
ក្រៅពីនេះ ហេតុផលដែលជំរុញឱ្យមានការផាកពិន័យកាន់តែច្រើននេះ ព្រោះក្រសួងមានយន្តការលើកទឹកចិត្តដល់ក្រុមអធិការកិច្ច ដោយក្រសួងបានផ្តល់ថវិកាប្រមាណ 70% នៃចំនួនទឹកប្រាក់ដែលបានមកពីការផាកពិន័យឱ្យទៅក្រុមអធិការកិច្ចដែលបានចាត់វិធានការលើក្រុមហ៊ុនឯកជន។ ក្រៅពីនេះ សហជីពអន្តរជាតិក៏តែងតែធ្វើការស្នើសុំ (Complain) និងជំរុញដើម្បីឱ្យក្រសួងចាត់វិធានការឱ្យបានដិតដល់ជុំវិញបញ្ហានេះផងដែរ៕
November 24, 2017
ច្បាស់ការហើយ! រឿងថ្ងៃចូលរោងការរបស់កញ្ញា សុគន្ធ នីសា
កំពូលតារាចម្រៀងសំឡេងផ្អែម និងមានទឹកដមប្រកបដោយមនោសញ្ចេតនាកញ្ញា សុគន្ធ នីសា ត្រូវបានគេបង្ហើបឱ្យដឹងថា នឹងចូលរោងការនៅថ្ងៃទី1 ខែធ្នូ ឆ្នាំ2017នេះ នៅក្នុងបរិវេណសណ្ឋាគារលំដាប់ផ្កាប្រាំ សូហ្វីតែល ភូគីត្រា ជាមួយនឹងអនាគតស្វាមីលោក សាំបា ដែលជាអាណិកជនខ្មែររស់នៅអាមេរិក ដែលនៅក្នុងនោះក៏នឹងមានវត្តមានភ្ញៀវកិត្តិយសដែលជាមន្ត្រីរាជការ អ្នកមានមុខមាត់ក្នុងសង្គម អ្នកជំនួញធំៗ ជាពិសេសគឺ អ្នកសិល្បៈ ដែលសរុបទាំងអស់មិនក្រោម 1000 នាក់ឡើយ។
នៅក្នុងនោះត្រូវបានគេដឹងថា តារាស្រីរូបនេះត្រៀមចំណាយថវិកាជាច្រើនម៉ឺនដុល្លារក្នុងការតុបតែងលម្អនៅក្នុងបរិវេណកន្លែងទទួលភ្ញៀវរបស់នាង ដែលរាប់ចាប់តាំងពីផ្លូវចូលរោង ផ្លូវដើរអមសងខាងដោយរបងផ្កាស្រស់ ក្លោងទ្វារ ក៏ដូចជាការតុងតែងនៅលើឆាកក្នុងការត្រៀមស្វាគមន៍កូនកំលោះ-កូនក្រមុំផងដែរ។ ជាមួយគ្នានេះ គេក៏បានដឹងដែរថា កញ្ញា សុគន្ធ នីសា បានត្រៀមចំណាយលុយជាច្រើនម៉ឺនដុល្លារទៀតសម្រាប់ទិញលំនៅដ្ឋានដ៏ស្រស់ស្អាតមួយទៀត ដែលមានទីតាំងនៅក្នុងបុរីដ៏ធំមួយក្នុងរាជធានីភ្នំពេញ។
គួររំឭកផងដែរថា ជិតដល់ថ្ងៃរៀបការ កញ្ញា សុគន្ធ នីសា បានជំពប់នឹងព័ត៌មានអាស្រូវជាច្រើន ដែលក្នុងនោះសុទ្ធតែបានលើកឡើងពីភាពរង្គោះរង្គើរវាងស្នេហារបស់នាង និងអតីតសង្សារចាស់ជាកវីនិពន្ធដ៏ល្បីឈ្មោះដែលបានបាក់បែកគ្នាហើយ គឺលោក សុខ ជំនោរ។ ស្របគ្នានោះដែរ គេក៏បានដឹងថា លោក សុខ ជំនោរ ជាអតីតគូស្នេហ៍ដ៏ស្អិតល្មួតរបស់នាងដែលធ្លាប់បានរួមរស់ជាមួយគ្នានៅក្រោមដំបូលផ្ទះតែមួយរាប់ឆ្នាំនោះ ក៏នឹងរៀបមង្គលការផងដែរ ដោយលោក សុខ ជំនោរ នឹងចូលរោងការមុននាង 4 ថ្ងៃ៕
November 24, 2017
ភ្ញាក់ផ្អើល!! រកឃើញប្រសាទបុរាណអាយុ 3000 ឆ្នាំកប់ក្រោមបាតបឹងតួកគី
បើតាមរយៈសារព័ត៌មាន The Independence ដែលបានចេញផ្សាយនៅថ្ងៃទី24 ខែវិច្ឆិកា ឆ្នាំ2017នេះបានឱ្យដឹងថា ក្រុមអ្នកស្រាវជ្រាវបុរាណវិទ្យាមកពីសាកលវិទ្យាល័យ Van Yushchenko បានសហការជាមួយក្រុមអ្នកជំនាញមុជទឹកបាតសមុទ្រ បានស្វែងរកឃើញប្រាសាទបុរាណចំណាស់អាយុ 3000 ឆ្នាំកប់នៅក្រោមបាតបឹង វេន( Lake Van) ប្រទេស តួកគី និងបានអះអាងថា បើតាមរចនាបទ និងក្បាច់ក្បូរចម្លាក់ ធ្វើឱ្យគេដឹងថា ប្រាសាទនេះត្រូវបានសាងសង់ឡើងនៅក្នុងយុគសម័យ Iron Age ស្ថិតក្នុងអំឡុងឆ្នាំ 600-900 មុនគ.ស។
Said Kinsey ជាអ្នកដឹកនាំក្រុមស្រាវជ្រាវបុរាណវិទ្យា បានថ្លែងថា «ក្រុមអ្នកមុជទឹកធ្លាប់បានសង្ស័យអំពីបឹងនេះ ទើបប្រាប់អ្នកស្រាវជ្រាវបុរាណវិទ្យា តែក្រុមអ្នកស្រាវជ្រាវបុរាណវិទ្យាមិនជឿថា នឹងមានអ្វីចម្លែកនៅក្រោមបាតបឹងនេះទេ តែក្រោយមកក្រុមការងារក៏ចេះតែព្យាយាមមុជរកតទៅទៀត រហូតដល់បានប្រទះឃើញគ្រោងប្រសាទបុរាណ ដែលមានកំពែងវែងរហូតដល់ 1 គីឡូម៉ែត្រ»។
បើទោះបីជាគ្រោងកំពែងនេះត្រូវបានសាងសង់នៅក្រោមបាតបឹង និងកប់ចោលរាប់ពាន់ឆ្នាំហើយក្ដី តែសភាពរបស់វានៅតែរក្សាបានរូបរាងល្អដដែល ដែលគេអាចមើលឃើញយ៉ាងច្បាស់ពីរយៈកម្ពស់ 3 ទៅ 4 ម៉ែត្រពីលើទៅ។ Kinsey បានបន្ដទៀតថា «មានប្រជាជនជាច្រើនបានមកតាំងលំនៅឋាននៅក្បែរបឹងនេះ ទើបដាក់ឈ្មោះថា Lake Van ហើយឈ្មោះបឹងនេះទៀតសោតក៏នៅមានអត្ថន័យយ៉ាងអាថ៌កំបាំងជាច្រើនទៀត ដែលយើងត្រូវបន្តស្រាវជ្រាវអំពីអាថ៌កំបាំងរបស់បឹងមួយនេះ ដែលមកពេលនេះ បឹងនេះមានអាយុជាង 6 សែនឆ្នាំទៅហើយ»៕

November 24, 2017
ធនាគារ CIMB សហការជាមួយក្រុមហ៊ុនមូលបត្រ ផ្តល់រង្វាន់ដល់និស្សិតជាប់ជយលាភី
ភ្នំពេញ៖ ដើម្បីលើកចិត្តដល់និស្សិតដែលខិតខំប្រឹងប្រែងរៀនសូត្រ ធនាគារ CIMB បានសហការជាមូយក្រុមហ៊ុនផ្សារមូលបត្រកម្ពុជា (CSX) ប្រគល់រង្វាន់ជយលាភីថ្នាក់ជាតិដល់ក្រុមជយលាភីកំពូល3ក្រុមក្នុងកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានឆ្នាំ2017 នៅប្រទេសកម្ពុជា។
ក្រុមជយលាភីថ្នាក់ជាតិដែលតំណាងឱ្យប្រទេសកម្ពុជាសម្រាប់ការប្រកួតថ្នាក់តំបន់ គឺក្រុម The Brilliant។ ជាមួយគ្នានេះក្រុមជយលាភីលេខ1គឺក្រុម Team Potatoes មកពីសាកលវិទ្យាល័យហ្សាម៉ាន ទទួលបានប្រាក់រង្វាន់800ដុល្លារពីធនាគារ CIMB និង 500ដុល្លារពី CSX រីឯក្រុមជយលាភីលេខ2 គឺក្រុមThe Brilliant មកពីសាកលវិទ្យាល័យកម្ពុជា ទទួលបានប្រាក់រង្វាន់ 500ដុល្លារពីធនាគារ CIMB និង 350ដុល្លារពី CSX ខណៈដែលក្រុមជយលាភីលេខ3 គឺក្រុម The Gravity មកពីសាកលវិទ្យាល័យហ្សាម៉ាន ទទួលបានប្រាក់រង្វាន់ 400ដុល្លារពីធនាគារ CIMB និង 250ដុល្លារពីCSX។ ស្របតាមការប្តេជ្ញាចិត្តរបស់ស៊ីអាយអិមប៊ីក្នុងការអភិវឌ្ឍទេពកោសល្យយុវជនជំនាន់ក្រោយ ក្រុមកំពូលទាំង3 ក៏នឹងទទួលបានឱកាសក្លាយជាបុគ្គលិកហាត់ការ នៅក្នុងធនាគារ ស៊ីអាយអិមប៊ី ផងដែរ។
លោក ប៊ុន យីន ប្រធាននាយកប្រតិបត្តិនៃធនាគារ CIMB បានបង្ហាញចំណាប់អារម្មណ៍ដោយបានសម្តែងនូវការកោតសរសើរដល់ក្រុមបេក្ខជនដែលទទួលបានជយលាភីទាំងអស់ ជាពិសេសគឺក្រុមជើងឯកថ្នាក់ជាតិដែលត្រូវបានជ្រើសរើសជាក្រុមជយលាភីតំណាងកម្ពុជាទៅចូលរួមក្នុងវគ្គផ្តាច់ព្រ័ត្រនៃកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានឆ្នាំ2017 នៅប្រទេសឥណ្ឌូនេស៊ី នាពេលខាងមុខនេះ។
លោកបន្ថែមថា ការចូលរួមកម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ាន គឺមិនត្រឹមតែបង្កើនចំណេះដឹង និងជំនាញវិនិយោគ Platform ប៉ុណ្ណោះទេ តែថែមទាំងបានលើកកម្ពស់ការទទួលស្គាល់លើសមត្ថភាពរបស់និស្សិតកម្ពុជាពីតំបន់អាស៊ានដ៏ទូលំទូលាយទៀតផង។
ជាមួយគ្នានេះ ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាបានមានប្រសាសន៍ថា កន្លងមកដើម្បីគាំទ្រកម្មវិធីប្រកួតប្រជែងនេះឱ្យទទួលបានភាពជោគជ័យ ក្រុមហ៊ុនផ្សារមួលបត្រកម្ពុជាបានរៀបចំវគ្គបណ្តុះបណ្តាលក៏ដូចជាសិក្ខាសាលាមួយចំនួនដែរដោយសហការជាមួយធនាគារស៊ីអាយអិមប៊ី ដើម្បីពន្យល់ពីរបៀបដាក់ការបញ្ជាជួញដូរ និងការវិភាគផ្សេងៗដែលជាទុនសម្រាប់ប្អូនៗនិស្សិតក្នុងការប្រកួត។ ជាការពិត ការចូលរួមនៅក្នុងកម្មវិធីប្រកួតប្រជែងបែបនេះនឹងញ៉ាំងឱ្យប្អូនៗនិស្សិតកាន់តែមានទំនុកចិត្តមួយកម្រិតថែមទៀតក្នុងការចូលរួមក្នុងវិស័យមូលបត្រនាពេលអនាគតក្នុងនាមជាវិនិយោគិន ឬជាមន្ត្រីបុគ្គលិក ដែលទទួលបន្ទុកការងារពាក់ព័ន្ធ និងដំណើរការទីផ្សារមូលបត្រផ្ទាល់តែម្តង។
មកដល់ពេលនេះ កម្មវិធីប្រកួតជួញដូរភាគហ៊ុនស៊ីអាយអិមប៊ីប្រចាំតំបន់អាស៊ានបានឈានមកដល់ឆ្នាំទី8ហើយ ហើយប្រទេសកម្ពុជាទើបតែបានចូលរួមកម្មវិធីប្រកួតថ្នាក់តំបន់នេះ ចំនួន 3ឆ្នាំប៉ុណ្ណោះ ប៉ុន្តែអ្វីដែលគួរឱ្យកត់សម្គាល់នោះ គឺក្រុមជើងឯកតំណាងកម្ពុជាតែងតែបង្ហាញនូវភាពលេចធ្លោរបស់ខ្លួន ដោយដណ្តើមបានតំណែងរងជើងឯកថ្នាក់តំបន់ 2ឆ្នាំជាប់គ្នា និងជយលាភីលេខ4កាលពីឆ្នាំមុនទៀតផង។ កម្មវិធីនេះមានការគាំទ្រយ៉ាងផុលផុសពីបណ្តាសាកលវិទ្យាល័យនានា និងមានការចូលរួមប្រកួតពីសំណាក់និស្សិតដែលកាន់តែកើនច្រើនឡើងពីមួយឆ្នាំទៅមួយឆ្នាំ។ ក្នុងឆ្នាំនេះមានក្រុមចូលរួមប្រកួតប្រជែងកើនឡើងរហូតដល់124ក្រុមមកពីសាកលវិទ្យាល័យចំនួន23 នៅក្នុងរាជធានីភ្នំពេញ៕
November 24, 2017
ការប្រកួតប្រដាល់ក្បាច់គុន “THAI FIGHT 2017” វគ្គជម្រុះជុំទី1 នឹងធ្វើឡើងនៅថ្ងៃទី25 វិច្ឆិកា
ដើម្បីបង្កើនទំនាក់ទំនងឲ្យកាន់តែជិតស្និតរវាងប្រទេសថៃ និងកម្ពុជា ក្រុមហ៊ុន ISUZU បានចូលរួមរៀបចំការប្រកួតប្រដាល់ក្បាច់គុនថៃលំដាប់ពិភពលោក “THAI FIGHT 2017” ក្នុងវគ្គជម្រុះជុំទី1 ក្នុងការប្រគួត “KHMER – THAI FIGHT” ដោយនាំយកកីឡាករ “សេនសាថាន ភី.ខេ សេនឆៃ មួយថៃយីម” ( Saensatharn PK Saenchaimuaythaigym) ម្ចាស់ជើងឯក ISUZU CUP SUPER FIGHT 2017 ជួបជាមួយនឹង “កីឡាករ ទីអាកូ កួឡាតេ” (Thiago Goulate) មកពីប្រេស៊ីល ព្រមជាមួយវត្តមានកីឡាករប្រដាល់ដ៏ល្បីល្បាញ៤រូបទៀតមកពីប្រទេសកម្ពុជា រួមមាន ពេជ្រ ម្ទេសខ្មាំង, ឃឹម ឌីម៉ា, មឿន សុភា និង ឡៅ ចិត្រា។
ព្រឹត្តិការណ៍ដ៏អស្ចារ្យនេះ នឹងរៀបចំឡើងនៅពហុកីឡាដ្ឋានជាតិអូឡាំពិក ទីក្រុងភ្នំពេញ ព្រះរាជាណាចក្រកម្ពុជា នៅថ្ងៃ សៅរ៍ ទី25 ខែ វិច្ឆិកា ពីម៉ោង 6:20 នាទីល្ងាច ដល់ម៉ោង 10:00នាទីយប់ ឬលោកអ្នកអាចទស្សនាតាមរយៈការផ្សាយបន្តផ្ទាល់នៅលើកញ្ចក់ទូរទស្សន៍ PNN ចាប់ពីម៉ោង 18:20 នាទី ដល់ម៉ោង 21:45នាទីយប់តទៅ។ ក្នុងឱកាសនេះផងដែរ ក្រុមហ៊ុន Tri Petch Isuzu Sales Cambodia Co., Ltd. និង ក្រុមហ៊ុន K (CAMBODIA) Co., Ltd. ក៏នឹងមានការតាំងបង្ហាញរថយន្ដម៉ូឌែលចុងក្រោយបំផុតដែលជារថយន្ដពហុមុខងារ គឺ រថយន្ដ Isuzu MU-X និង Isuzu D-Max V-Cross 4×4 នៅបញ្ជារតាំងបង្ហាញ Isuzu នៅក្នុងព្រឹត្តិការណ៍នេះផងដែរ៕
November 24, 2017
បន្ទាប់ពីភ្លាត់ស្នៀតរអិលដួលផ្កាប់មុខ នារីម៉ូដែលចិនបង្ហាញរូបភាពហើមកជើង
យោងតាមសារព័ត៌មាន Kenh 14 ដែលបានចេញផ្សាយនៅព្រឹកថ្ងៃទី24 ខែវិច្ឆិកា ឆ្នាំ2017នេះ បានឱ្យដឹងថា បន្ទាប់ពីមានការភ្ញាក់ផ្អើលជាខ្លាំងចំពោះតារាម៉ូដែលចិននាង មីង ស៊ី ឬ Pastor Dao ដែលបានរអិលជើងដួលផ្កាប់មុខនៅលើឆាកដល់ទៅ 2 ដងដោយសារតែភ្លាត់ស្នៀតជាមួយស្បែកជើងកែងចោតកាលពីថ្ងៃទី20 កន្លងទៅថ្មីៗនោះ ខណៈនេះ តារាម៉ូដែលស្រីរូបនោះបានបង្ហោះរូបភាពបញ្ជាក់ពីអាការហើមកជើង និងអង្គុយបានតែនៅលើរទេះរុញ និងកំពុងសម្រាកព្យាបាលនៅក្នុងមន្ទីរពេទ្យ។
តារាស្រីវ័យ 28 ឆ្នាំរូបនេះ បានថ្លែងអំណរគុណចំពោះអ្នកលេងបណ្ដាញទំនាក់ទំនងសង្គមទាំងអស់ ដែលមានក្ដីបារម្ភចំពោះរូបនាង និងថែមទាំងបានផ្ញើសារលើកទឹកចិត្តនាងទៀតផងដែរ។ នាងក៏បានបញ្ជាក់ថែមផងដែរថា «ខណៈនេះ គ្រូពេទ្យបានសាកល្បងបង្វិលកជើងរបស់នាងខ្ញុំមើល ឃើញថា វាបានធូរស្បើយគ្រាន់ និងបាត់ហើមបន្ដិចហើយ ពិតជាអស្ចារ្យមែន!…»៕
November 24, 2017
ទួលគោក ត្រូវបានអ្នកវិនិយោគសម្លឹងឃើញបន្ទាប់ពីតំបន់បឹងកេងកង
ភ្នំពេញ – បច្ចុប្បន្នក្រៅពីបឹងកេងកង1 – 2 និង3 ទួលគោកត្រូវបានគេចាត់ទុកជាតំបន់សក្ដានុពលទីពីរដែលអ្នកវិនិយោគផ្នែកអចលនវត្ថុនានាមិនអាចមើលរំលងបានក្នុងការអភិវឌ្ឍ ខណៈដែលគម្រោងធំៗ ផ្សារទំនើប និងហេដ្ឋារចនាសម្ព័ន្ធជាច្រើនកំពុងតែមានការអភិវឌ្ឍយ៉ាងខ្លាំង ពិសេសម្ចាស់គម្រោងអភិវឌ្ឍន៍ដែលកំពុងតែធ្វើការងារសាងសង់អគាររបស់ខ្លួនបានបង្កើនសកម្មភាពដើម្បីឱ្យបញ្ចប់តាមការសន្យាជាមួយអតិថិជនផងដែរ។
លោក សន សៀប អគ្គនាយកក្រុមហ៊ុន Key Realestate បានថ្លែងថា ទួលគោកត្រូវបានគេចាត់ទុកថា ជាតំបន់មានសក្ដានុពលទីពីរ បន្ទាប់ពីតំបន់បឹងកេងកង១ ដោយសារតែតំបន់នេះមានផ្ទះធំៗ ដីទំនេរធំៗ និងមានហេដ្ឋារចនាសម្ព័ន្ធល្អ។ ពិសេសបច្ចុប្បន្ន តំបន់នេះត្រូវបានអភិវឌ្ឍឡើងដោយអគារខ្ពស់ៗជាច្រើន ដែលធ្វើឱ្យតំបន់ទួលគោកផ្លាស់ប្តូរមុខមាត់ ជាក់ស្ដែងដូចជានៅតំបន់បឹងកក់ ជាដើម។ លើសពីនេះទៅទៀតនឹងមានផ្លូវ30ម៉ែត្រថ្មីមួយខ្សែដែលសព្វថ្ងៃកំពុងសាងសង់នៅលើផ្លូវរថភ្លើងចាស់ដែលស្ថិតនៅចន្លោះទួលគោក និងបឹងកក់ដែលតភ្ជាប់ពីមហាវិថីសហព័ន្ធរុស្សីទៅកាន់សង្កាត់ឬស្សីកែវទៀតផង។
បច្ចុប្បន្នគេសង្កេតឃើញថា តម្លៃដីនៅតំបន់ទួលគោកស្ថិតក្នុងសភាពថេរនៅពេលបច្ចុប្បន្ន បើប្រៀបធៀបទៅនឹងតំបន់អភិវឌ្ឍន៍ជាស្រេចផ្សេងទៀតនៅក្នុងទីក្រុង។ តម្លៃដីនៅតំបន់ទួលគោកមិនមានការកើនឡើង ឬថយចុះនោះទេនៅក្នុងរយៈពេល 2ឆ្នាំចុងក្រោយនេះ។
លោក សន សៀប បន្ដថា លោកទទួលស្គាល់ថា តំបន់ទួលគោកជាតំបន់ដែលមានសក្ដានុពលខ្លាំង ព្រោះវាហ៊ុមព័ទ្ធទៅដោយគម្រោងធំៗជាច្រើនដែលអាចទាក់ទាញចំណាប់អារម្មណ៍នៃការរស់នៅពីប្រជាជនដោយសារតែពួកគេងាយស្រួលរកសេវាកម្មនានាដែលមាននៅជិតខ្លួនដូចជា សាលារៀន មន្ទីរពេទ្យ ផ្សារទំនើប និងភោជនីយដ្ឋានល្បីៗជាដើម ។
អគ្គនាយកក្រុមហ៊ុន Key Realestate បន្ថែមទៀតថា ទួលគោកជាតំបន់ដែលតភ្ជាប់ទៅតំបន់នានាជាច្រើនពិសេសភ្នំពេញថ្មីដែលសម្បូរទៅដោយគម្រោងនានា និងមានប្រជាជនរស់នៅច្រើន និងកំពុងតែមានការអភិវឌ្ឍយ៉ាងខ្លាំងទៀតផង។ ជាងនេះទួលគោកត្រូវបានគេចាត់ទុកថា ជាខណ្ឌនៅកណ្ដាលទីក្រុងក្នុងចំណោមខណ្ឌទាំង 4ដែលមានការអភិវឌ្ឍខ្លាំងជាងគេដែលមានហេដ្ឋារចនាសម្ព័ន្ធផ្លូវធំៗ ដូច្នេះវានឹងធ្វើឱ្យតម្លៃអចលនទ្រព្យកើនឡើងខ្លាំងៗនាពេលខាងមុខដ៏ខ្លី៕
November 24, 2017
ក្រុមឡើងទម្រង់លេង Valencia ត្រៀមប៉ះជើងខ្លាំង Barca ថ្ងៃអាទិត្យនេះ
ក្នុងនាមជាក្រុមមិនស្គាល់ចាញ់ដូចគ្នាក្នុងក្របខ័ណ្ឌ La Liga នារដូវកាលនេះ ក្រុម Valencia នឹងធ្វើជាម្ចាស់ផ្ទះទទួលក្រុម Barcelona ក្នុងការប្រកួតនៅថ្ងៃអាទិត្យនេះ ដោយមានបំណងបង្ហាញថា ភាពខ្លាំងក្នុងនាមជាក្រុមប្រជែងពានរបស់ពួកគេ គឺជាការពិត។
ក្រោយពីជួបភាពត្រដាបត្រដួសអស់រយៈពេល2រដូវកាល និងបានផ្លាស់ប្តូរគ្រូបង្វឹកអស់ជាច្រើននាក់ រួមទាំងការចោទសួរផ្សេងៗទៅលើការគ្រប់គ្រងក្លិបនេះពីមហាសេដ្ឋីសញ្ជាតិសិង្ហបុរីលោក Peter Lim រួចមក ទីបំផុត Valencia ត្រូវបានធ្វើឲ្យមានភាពខ្លាំងឡើងវិញក្រោមការដឹកនាំរបស់គ្រូបង្វឹក Marcelino Garcia Toral និងប្រធានផ្នែកកីឡាលោក Mateu Alemany ដើម្បីជួយឲ្យពួកគេកត់ត្រាជ័យជម្នះក្នុងក្របខ័ណ្ឌចំនួន8លើកជាប់ៗគ្នា។ ទោះបីជាយ៉ាងណា ពួកគេនៅតែដេញតាមពីក្រោយក្រុម Barca ចំនួន4ពិន្ទុនៅលើកំពូលតារាង ខណៈដែលក្រុមមានមូលដ្ឋាននៅ Catalonia មួយនេះ រកបានដល់ទៅ34ពិន្ទុពីការប្រកួតដែលផ្តល់ពិន្ទុសរុបចំនួន36ពិន្ទុ។ ខ្សែប្រយុទ្ធ Simone Zaza របស់ Valencia ដែលបានវិលមករកទម្រង់លេងដ៏ល្អរបស់ខ្លួនវិញ ក្រោយពីជួបពេលវេលាខ្ចីជើងដ៏សែនខកចិត្តនៅឯក្លិប West Ham United កាលពីរដូវកាលមុននោះបានឲ្យដឹងថា៖ «រឿងដែលពិតប្រាកដនោះគឺថា ក្រុមនេះបានផ្លាស់ប្តូរទាំងស្រុង។ មិនត្រឹមតែអាចលេងក្នុងកម្រិតល្អមួយឡើយ ប៉ុន្តែថែមទាំងមានស្មារតីប្រយុទ្ធផងដែរ។ នេះគឺជាអ្វីដែលគ្រូបង្វឹកបានជួយដល់យើងជាច្រើន»។
លោក Marcelino នឹងត្រូវអង្គុយមើលពីកៅអីទស្សនិកជននៅថ្ងៃអាទិត្យនេះ ដោយសារតែបានរងពិន័យកាតក្រហមបណ្តេញចេញក្នុងពេលដែលក្រុមរបស់លោកទទួលជ័យជម្នះ 2-០ នៅលើទឹកដីក្រុម Espanyol កាលពីចុងសប្តាហ៍នេះ។ បច្ចុប្បន្នលោកកំពុងព្យាយាមផ្តួលក្រុម Barcelona ជាលើកទីដំបូងក្នុងនាមជាគ្រូបង្វឹកនៅពេលជួបគ្នាជាលើកទី15 នេះ។ ការប្រកួតនៅថ្ងៃអាទិត្យនេះនឹងចាប់ផ្តើមនៅម៉ោង2:45ទៀបភ្លឺ៕
ប្រភពពី៖ Daily Stars
November 24, 2017
អាល់ប៊ុមរបស់តារាចម្រៀង Beyoncé លក់ដាច់ច្រើនជាងក្នុងឆ្នាំ2017
បើតាមការចេញផ្សាយរបស់សារព័ត៌មាន Tvpool នៅថ្ងៃទី24 ខែវិច្ឆិកា ឆ្នាំ2017 បានឱ្យដឹងថា កំពូលតារាចម្រៀងស្រីសម្បុរស្រអែមស្រស់ Beyoncé បានគ្រងតំណែងជាតារាចម្រៀងស្រីលំដាប់ទី 1 ដែលលក់អាល់ប៊ុមចម្រៀងរបស់ខ្លួនបាន 105 លានដុល្លារសហរដ្ឋអាមេរិកក្នុងឆ្នាំ 2017 នេះ។ ចំណែកទស្សនាវដ្តី Forbes ដែលចេញផ្សាយក្នុងខែនេះក៏បានអះអាងដែរថា អាល់ប៊ុមចម្រៀងដែលមានឈ្មោះថា Lemonade របស់តារាចម្រៀងស្រីរូបនេះត្រូវបានលក់ដាច់ច្រើនជាងគេបង្អស់។
ខាងក្រោមនេះគឺជាកំណត់ត្រាទឹកប្រាក់ដែលបានមកពីការលក់អាល់ប៊ុមចម្រៀងរបស់កំពូលតារាចម្រៀង 10 រូបក្នុងឆ្នាំ 2017 ដែលបានដកស្រង់ចេញពីទស្សនាវដ្តី Forbes៖
1.Beyoncé 105 លានដុល្លារសហរដ្ឋអាមេរិក
2.Adele 69 លានដុល្លារសហរដ្ឋអាមេរិក
3.Taylor Swift 44 លានដុល្លារសហរដ្ឋអាមេរិក
4.Celine Dion 42 លានដុល្លារសហរដ្ឋអាមេរិក
5.Jennifer Lopez 38 លានដុល្លារសហរដ្ឋអាមេរិក
6.Dolly Parton 37 លានដុល្លារសហរដ្ឋអាមេរិក
7.Rihanna 36 លានដុល្លារសហរដ្ឋអាមេរិក
8.Britney Spears 34 លានដុល្លារសហរដ្ឋអាមេរិក
9.Katy Perry 33 លានដុល្លារសហរដ្ឋអាមេរិក
10.Barbra Streisand 30 លានដុល្លារសហរដ្ឋអាមេរិក
November 24, 2017