Category: សង្គម និងសេដ្ឋកិច្ច

កវីល្បីឈ្មោះ សុខ ជំនោរ ចូលរោងការថ្ងៃនេះហើយ
នៅថ្ងៃទី 26 ខែវិច្ឆិកា ឆ្នាំ2017នេះ គឺជាថ្ងៃរៀបអាពាហ៍ពិពាហ៍របស់កវីល្បីឈ្មោះ សុខ ជំនោរ និងភរិយា ស្រី សុរង្សី ដោយឡែកមុននេះបន្ដិច នៅលើបណ្ដាញសង្គម ហ្វេសប៊ុក របស់អ្នកទាំងពីរបានបង្ហោះរូបភាពជាច្រើនសន្លឹកបញ្ជាក់ថា ថ្ងៃនេះគឺជាថ្ងៃសិរីមង្គល ដែលពោពេញទៅដោយស្នាមញញឹម និងសេចក្ដីសុខបំផុតនៅក្នុងជីវិត។
គួររំឭកផងដែរថា លោក សុខ ជំនោរ និងគូដណ្ដឹងកញ្ញា ស្រី សុរង្សី បានភ្ជាប់ពាក្យនៅថ្ងៃទី6 ខែសីហា ឆ្នាំ2017 ហើយនៅរសៀលថ្ងៃទី 26 ត្រូវបានគេបង្ហើបថា គូស្នេហ៍មួយគូនេះ ត្រៀមទទួលភ្ញៀវកិត្តិយសនៅកោះពេជ្រ ដែលមានវត្តមានចូលរួមពីសិល្បករ សិល្បការិនី និងញាត្តិមិត្តបងប្អូន មានចំនួនមិនតិចជាង១០០តុនោះទេ។ កាន់តែជាក់ច្បាស់សូមទស្សនារូបភាពទាំងឡាយ ខាងក្រោមនេះ៖
November 26, 2017
ធ្លាយព័ត៌មាន Apple កំពុងសំងំផលិត iPhone SE ជំនាន់ថ្មី
សារព័ត៌មានចិន Economic Daily News បានចេញផ្សាយថា ក្រុមហ៊ុន Apple គ្រោងនឹងបង្ហាញ iPhone ម៉ូដែលតូច ឬអាចនិយាយបានថា iPhone SE ម៉ូដែលថ្មី នៅត្រីមាសដើមឆ្នាំ 2018 ដែលព័ត៌មាននេះគឺជាដំបូងថ្មីបំផុតសម្រាប់អ្នកគាំទ្រ iPhone។ ប្រភពដដែលបានបន្តទៀតថា iPhone តូចថ្មី អាចនឹងមានឈ្មោះ iPhone SE 2 ហើយផលិតនៅរោងចក្រមួយក្នុងប្រទេសឥណ្ឌា ប៉ុន្តែសមត្ថភាពរបស់ iPhone ថ្មីនេះ អាចនឹងអស្ចារ្យជាង iPhone SE កាលពីឆ្នាំ 2016 ពោលគឺតូចតែទំហំប៉ុណ្ណោះ។
ជាមួយគ្នានោះផងដែរថា សារព័ត៌មានឥណ្ឌា Tekz24 បានចេញផ្សាយថា iPhone SE 2 មានលក្ខណពិសេសចំនួន ដូចជា មាន RAM ទំហំ 2GB, មានម៉ូដែល 32GB និង 128GB ចំណែកកាមេរ៉ាវិញគឺខាងមុខ 5មេហ្គាភិចសែល និងខាងក្រោយ 12មេហ្គាភិចសែល៕
November 25, 2017
តារាចម្រៀងស្រី Miley Cyrus កំពុងតាំងគភ៌មែនឬ?
តាមរយៈសារព័ត៌មាន Mthai ដែលបានចេញផ្សាយនៅថ្ងៃទី24 ខែវិច្ឆិកា ឆ្នាំ2017 បានឱ្យដឹងថា កន្លងទៅថ្មីៗនេះ តារាចម្រៀងស្រី Miley Cyrus បានបង្ហោះរូបភាពពើងពោះនៅលើបណ្ដាញទំនាក់ទំនងសង្គមអ៊ីនស្តាក្រាមរបស់ខ្លួន ដែលបណ្ដាលឱ្យអ្នកគាំទ្ររបស់នាងមានមន្ទិលសង្ស័យថា នាងកំពុងតែមានផ្ទៃពោះជាមួយគូស្នេហ៍គឺ លោក Liam Hemsworth ដែលទើបតែបានរៀបអាពាហ៍ពិពាហ៍ស្ងាត់ៗជាមួយគ្នាកាលពីដើម 2017 នេះ។
រូបថតមួយសន្លឹកនោះ ពោលគឺនាងចង់បញ្ជាក់ប្រាប់ថា ជិតដល់ថ្ងៃខួបកំណើតរបស់នាងហើយ។ ហើយនាងត្រៀមនឹងរៀបពិធីខួបកំណើតតូចមួយនៅក្នុងផ្ទះ ព្រមទាំងសរសេរនៅលើអ៊ីនស្ដាក្រាមថា «ជិតដល់ថ្ងៃខួបកំណើតហើយណា៎ ពិធីនេះនឹងពោរពេញទៅដោយអាហារ Tofurkey និងសេចក្ដីស្រឡាញ់ពីអ្នកទាំងអស់គ្នា #VeganTurkeyBaby »។
យ៉ាងណាមិញ ថ្ងៃម្សិលមិញតារាស្រីរូបនេះបានចេញមុខបកស្រាយរឿងរូបភាពរបស់នាងដែលបានសង្ស័យថា តើនាងកំពុងមានផ្ទៃពោះពិតមែនឬ? ដោយនាងបានបញ្ជាក់ថា «មិនបានតាំងគភ៌ទេ នាងខ្ញុំគ្រាន់តែញ៉ាំ Tofurky ច្រើនពេកតែប៉ុណ្ណោះ និយាយអីអាក្រក់ស្ដាប់ម្ល៉េះ»៕
November 25, 2017
តារាស្រីហុងកុងល្បីឈ្មោះ ទម្លាយរឿងត្រូវគេបៀតបៀនផ្លូវភេទកាលពីអាយុ 4 ឆ្នាំ
តាមរយៈសារព័ត៌មាន kenh14 ដែលបានចេញផ្សាយនៅថ្ងៃទី25 ខែវិច្ឆិកា ឆ្នាំ2017 ដោយបានដកស្រង់ព័ត៌មានក្ដៅមួយពីសារព័ត៌មានចិន Sina, iFeng, QQ បានឱ្យដឹងថា ថ្មីនេះៗរឿងដ៏សែនរន្ធត់មួយបានកើតឡើង ខណៈដែលតារាស្រីល្បីឈ្មោះរបស់ពិភពភាពយន្តហុងកុង នាង Yang Rong បានទម្លាយរឿងអាស្រូវរបស់ខ្លួនដែលធ្លាប់ត្រូវបានបុរសម្នាក់រំលោភបំពានផ្លូវភេទលើរូបនាងកាលពីនាងនៅអាយុ 4ឆ្នាំ។
តារាស្រីរូបនេះបានរៀបរាប់ប្រាប់អ្នកសារព័ត៌មានចិនថា ម្ដាយរបស់នាងគឺជាកម្មការិនីរោងចក្រម្នាក់ ហើយនៅពេលខ្លះនាងតែងតែទៅកន្លែងធ្វើការជាមួយម្ដាយរបស់នាង ព្រោះថា នៅទីនេះមានក្រុមកុមារជាច្រើននាក់ដែលនិយមមកលេងនៅសួនច្បារក្នុងបរិវេណរោងចក្រនោះ ហើយនាងតែងតែចូលចិត្តរត់លេងជាមួយក្មេងៗនៅទីនោះ។ ថ្ងៃមួយ ស្រាប់តែមានបុរសម្នាក់ដែលនាងស្គាល់ថាជាអ្នកធ្វើការជាមួយម្ដាយនាងបានមកបបួលនាងទៅលេងនៅក្នុងបន្ទប់មួយដែលងងឹតគ្មានពន្លឺព្រះអាទិត្យឡើយ គឺមានតែគ្រែសម្រាប់ដេក និងពន្លឺព្រាលៗតែប៉ុណ្ណោះ។ ដំបូងឡើយបុរសនោះ បាននាំនាងប្រលែងលេងបែបក្មេងៗ លុះក្រោយមកក៏ចាប់ផ្ដើមថើបនាង រហូតដល់ថើបជើងរបស់នាង ហើយបន្ទាប់មកក៏ចាប់រំលោភនាងតែម្ដង។ ខណៈនោះ នាងនៅក្មេងណាស់មិនបានដឹងថា ទង្វើរបស់បុរសម្នាក់នោះបានរំលោភបំពានផ្លូវភេទឡើយ។
តារាស្រីវ័យ 36 ឆ្នាំរូបនេះបានបញ្ជាក់ប្រាប់អ្នកសារព័ត៌មានបន្ដទៀតថា «សាមសិបឆ្នាំជាងបានកន្លងផុតទៅហើយ គ្មាននរណាម្នាក់នឹកឃើញរឿងនេះទៀតទេ វាត្រូវបានកប់យ៉ាងជ្រៅ និងលាក់យ៉ាងសម្ងាត់នៅក្នុងបេះដូងនាងខ្ញុំតែម្នាក់ប៉ុណ្ណោះ ហើយនាងខ្ញុំគិតថា មិនចង់ឱ្យនរណាដឹងទេ តែឥឡូវ វាមិនមែនជារឿងសម្ងាត់ដែលគួរឱ្យចងចាំទុកទៀតទេ»៕
November 25, 2017
សមាជិកអង្គការពាណិជ្ជកម្មពិភពលោកសរសើរកម្ពុជាអំពីការអភិវឌ្ឍឧស្សាហកម្ម
ភ្នំពេញ៖ ឯកឧត្តម Juan Carlos Gonzalez អគ្គរដ្ឋទូតប្រទេសកូឡុំប៊ី បានថ្លែងថា សមាជិកអង្គការពាណិជ្ជកម្មពិភពលោក បានសម្ដែងការសាទរចំពោះសមិទ្ធផលរបស់កម្ពុជាក្នុងផែនការយុទ្ធសាស្ត្រនានារួមមានគោលនយោបាយអភិវឌ្ឍន៍ឧស្សាហកម្ម ឆ្នាំ2015-2025 និងផែនការយុទ្ធសាស្ត្រអភិវឌ្ឍន៍វិស័យទេសចរណ៍ ឆ្នាំ2012-2020 ជាដើម។
ការលើកសរសើរអំពីផែនការអភិវឌ្ឍន៍គោលនយោបាយឧស្សាហកម្ម និងពាណិជ្ជកម្មរបស់ប្រទេសកម្ពុជាធ្វើឡើងក្នុងកិច្ចប្រជុំត្រួតពិនិត្យទ្បើងវិញនូវគោលនយោបាយពាណិជ្ជកម្មលើកទី2របស់កម្ពុជានៅអង្គការពាណិជ្ជកម្មពិភពលោក។ យ៉ាងនេះក្តីឯកឧត្តម Juan Carlos Gonzalez ប្រធានអង្គប្រជុំក៏ជំរុញឱ្យកម្ពុជាបន្តកិច្ចការដែលកំពុងធ្វើ និងបំពេញកាតព្វកិច្ចរបស់ខ្លួនបន្ថែមទៀត ពិសេសតាមការស្នើសុំរបស់សមាជិកអង្គការពាណិជ្ជកម្មពិភពលោក ដើម្បីលើកកម្ពស់តម្លាភាពក្នុងរបបពាណិជ្ជកម្ម និងអនុលោមភាពស្របតាមគោលការណ៍ ដែលមានចែងក្នុងបទដ្ឋានអន្តរជាតិ ដែលកម្ពុជាបានចូលជាភាគីហត្ថលេខី។
ឆ្លើយតបនូវការលើកឡើងនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងក្នុងកិច្ចប្រជុំខាងលើនេះថា គំនិតផ្តួចផ្តើមនៃការបង្កើតស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការពាណិជ្ជកម្មពិភពលោកជាសក្ខីភាពបង្ហាញអំពីការប្តេជ្ញាចិត្តរបស់កម្ពុជាក្នុងក្របខ័ណ្ឌអង្គការពាណិជ្ជកម្មពិភពលោកដែលនឹងជួយជ្រោមជ្រែងបន្ថែមដល់ការចូលរួមរបស់កម្ពុជាក្នុងកិច្ចការអន្តរជាតិ ពាក់ព័ន្ធនឹងវិស័យពាណិជ្ជកម្ម ពិសេសការបំពេញតួនាទីរបស់កម្ពុជាជាប្រធានសម្របសម្រួលប្រទេសអភិវឌ្ឍន៍តិចតួច។
គួរបញ្ជាក់ថា បច្ចុប្បន្នប្រទេសអភិវឌ្ឍន៍តិចតួចភាគច្រើនចំណូលជាមធ្យមរបស់ប្រជាជនគឺ 1.25 ដុល្លារអាមេរិក និងបានរួមចំណែក 0.9% នៃ ផ.ស.ស (GDP) របស់ពិភពលោក។ លទ្ធផលនៃសេដ្ឋកិច្ចទន់ខ្សោយរបស់ប្រទេសអភិវឌ្ឍន៍តិចតួចជាច្រើន បានធ្វើឱ្យមានការថមថយនៃកំណើន ផ.ស.ស (GDP) ជាមធ្យមសម្រាប់មនុស្សម្នាក់ក្នុងមួយឆ្នាំដល់ 1.5% នៅឆ្នាំ 2015 ដែលក្នុងឆ្នាំ2014មាន 3.3%។ ការធ្លាក់ចុះបែបនេះហើយដែលជាកត្តារារាំងដល់ការកាត់បន្ថយភាពក្រីក្រ និងអូសបន្លាយពេលក្នុងការសម្រេចបាននូវទិសដៅការអភិវឌ្ឍប្រកបដោយចីរភាព។
គណៈកម្មាធិការស្តីពីពាណិជ្ជកម្ម និងការអភិវឌ្ឍរបស់អង្គការពាណិជ្ជកម្មពិភពលោកបានគូសបញ្ជាក់ច្បាស់អំពីការបើកច្រកទីផ្សាររបស់ប្រទេសអភិវឌ្ឍន៍តិចតួចពីឆ្នាំ2005 ដល់ 2016 ដែលការនាំចេញទំនិញ និងសេវាកម្មរបស់ប្រទេសអភិវឌ្ឍន៍តិចតួចបានកើនឡើងតិចតួចជាមធ្យម 6.4%៕
November 25, 2017
តារាចម្រៀងវៀតណាម និយាយអ្វីខ្លះពីខ្មែរនៅក្នុងបទចម្រៀងនេះ?
ចម្រៀងមួយបទរបស់តារាចម្រៀងវៀតណាមដែលមានឈ្មោះល្បី នាង LêVân ( ឡេ វឹន ) ដែលមានចំណងជើងថា « HươngTìnhTràVinh » ឬ មន្ដស្នេហ៍នារីខេត្ត TràVinh (ជ្វែវីញ) កំពុងតែក្លាយជាបទចម្រៀងល្បីរន្ទឺនៅក្នុងប្រទេស វៀតណាម និងឆ្ពោះទៅកាន់ពិភពលោក។
បទនេះបានច្រៀងរៀបរាប់អំពីបងប្អូនខ្មែរកម្ពុជាក្រោម ដែលបានរក្សាទំនៀមទម្លាប់ ប្រពៃណីវប្បធម៌ខ្មែរបានយ៉ាងល្អនៅក្នុងទឹកដីខេត្ត TràVinh ប្រទេសវៀតណាម។ យ៉ាងណាមិញ នៅក្នុងខេត្ត TràVinh គឺជាខេត្តដែលល្បីឈ្មោះ និងសម្បូរទៅដោយនារីកម្ពុជាក្រោមស្អាតៗ សាច់សៗជាច្រើន ព្រមទាំងជាទីកន្លែងដែលល្បីល្បាញខាងរាំឡាំថូន ដែលជាទូទៅ ពួកគេពេញនិយមរាំនៅក្នុងវត្ត TràVinh។ រាល់កម្មវិធីបុណ្យទាននៅក្នុងវត្តនេះទៀតសោត គេរមែងតែងសង្កេតឃើញមានការរៀបចំកម្មវិធីសម្ដែងជូនជារបាំប្រពៃណីខ្មែរ របាំឈ្នាង ល្ខោនខោល ការរាំឡាំថូន និងមានការបណ្ដែតប្រទីបជាដើម។
បទចម្រៀងរបស់តារាស្រីល្បីឈ្មោះ ឡេ វឹន ក៏បានរៀបរាប់ផងដែរថា បើបងៗសុភាពបុរសខ្មែរ និងបរទេសនានា បានមកលេងវត្ត TràVinh ហើយ នឹងបាក់ចិត្តស្រឡាញ់នារីនៅទីនេះមិនខាន និងសូមកុំភ្លេចលើកដៃឡើងរាំឡាំថូននៅទីនេះផង ព្រោះថា នារីនៅទីនេះពូកែរាំឡាំថូនណាស់ ហើយក៏ពូកែដាំស្លដូចគ្នាផងដែរ។ គួរបញ្ជាក់ដែរថា បទចម្រៀងនេះកំពុងតែមានអ្នកទស្សនារាប់លាននាក់នៅលើបណ្ដាញសង្គម Youtube៕

November 25, 2017
តើអ្នកត្រៀមខ្លួនរួចស្រេចប៉ុនណាហើយ ក្នុងការធ្វើជាម្ចាស់មុខជំនួញ?
សំណួរដំបូងគេដែលអ្នកត្រូវឆ្លើយតបខ្លួនឯងនៅពេលនឹកស្រមៃចង់ចាប់ផ្ដើមធ្វើជំនួញនោះគឺ “តើអ្នកបានត្រៀមខ្លួនរួចជាស្រេចហើយឬ?” ព្រោះអ្វី…ព្រោះអ្នកនឹងក្លាយជាបុគ្គលិកដែលសំខាន់បំផុតនៅក្នុងក្រុមហ៊ុនរបស់ខ្លួនឯង។
ការវាយតម្លៃខ្លួនឯងសំខាន់ខ្លាំងជាងការវាយតម្លៃអនាគតនិយោជិត(កូនឈ្នួល)របស់អ្នកទៅទៀត។ អ្នកគួរតែអាចវិភាគពីចំណុចលេចធ្លោ និងចំណុចខ្សោយរបស់ខ្លួនឯងបាន ព្រោះការគ្រប់គ្រងចាត់ចែងការងារជំនួញរបស់ខ្លួនឯងនេះ ម្ចាស់មុខជំនួញត្រូវតែមានគុណសម្បត្តិច្រើនៗយ៉ាងរួមបញ្ចូលគ្នា។
ក្នុងការដឹកនាំឆ្ពោះទៅរកភាពជោគជ័យរបស់ការគ្រប់គ្រងមុខជំនួញ គំរូសំណួរ-ចម្លើយខាងក្រោមនេះនឹងជួយឱ្យអ្នកបានដឹងថា តើអ្នកមានភាពត្រៀមខ្លួនរួចជាស្រេចហើយឬនៅ ក្នុងការធ្វើជំនួញរបស់ខ្លួនឯង។ អ្នកអាចនាំគំរូសំណួរ-ចម្លើយនេះទៅប្រើសម្រាប់វិភាគលើមនុស្សដែលនឹងក្លាយមកជាភាគហ៊ុនិកក្នុងការគ្រប់គ្រងការងាររបស់អ្នកបានផងដែរ។
សូមកុំភ្លេចថា ចូរជ្រើសរើសយកចម្លើយក្នុងលក្ខណៈជាខ្លួនអ្នកពិតៗ មិនមែនគ្រាន់តែអារម្មណ៍ដែលគិតថាគួរតែធ្វើអ៊ីចឹងនោះទេ។ ត្រូវស្មោះត្រង់ចំពោះខ្លួនឯង ដើម្បីឱ្យទទួលបានពិន្ទុដែលត្រូវនឹងការពិតខ្លាំងបំផុត។
1 . តើអ្នកមានភាពឧស្សាហ៍ព្យាយាមប៉ុនណា?
ចម្លើយ
ក . បើមានអ្នកបង្ខំឱ្យចាប់ផ្ដើមធ្វើការ ទើបអ្នកចាប់ផ្ដើម និងធ្វើការតទៅទៀតបានល្អ
ខ . អ្នកដឹងពីតួនាទីការធ្វើការងាររបស់អ្នកខ្លួនឯង មិនចាំបាច់ឱ្យនរណាមកបញ្ជាឱ្យចាប់ផ្ដើមនោទេ
ឃ . មានដែរភាពឧស្សាហ៍ព្យយាមនោះ…គ្រាន់តែមិនទាន់ចាប់ផ្ដើមធ្វើការ ចាំរហូតទាល់តែដល់ពេលវេលាត្រូវចាប់ផ្ដើម
2 . តើអ្នកមានអារម្មណ៍ជាមួយអ្នកដទៃជុំវិញខ្លួនអ្នកយ៉ាងណាដែរ?
ចម្លើយ
ក . អ្នកមានអារម្មណ៍ថា មនុស្សច្រើនៗគួរឱ្យរំខានណាស់ មនុស្សច្រើន រឿងក៏ច្រើនដែរ
ខ . អ្នកចូលចិត្តមនុស្សច្រើនៗ ហើយអ្នកខ្លួនឯងក៏អាចចូលចុះជាមួយអ្នកដទៃបានល្អដែរ
ឃ . ខ្លួនអ្នកមានមិត្តភ័ក្តិច្រើនគ្រប់គ្រាន់ស្រាប់ហើយ មិនត្រូវការស្គាល់អ្នកដទៃថែមទៀតទេ
3 . តើអ្នកមានភាពជាអ្នកដឹកនាំដែរឬទេ?
ចម្លើយ
ក . អ្នកអាចធ្វើឱ្យអ្នកឯទៀតធ្វើការតាមដែលអ្នកត្រូវការបាន តែត្រូវបង្ខំពួកគេបន្តិច
ខ . អ្នកអាចធ្វើឱ្យមនុស្សភាគច្រើនធ្វើការបាន តាមដែលត្រូវការដោយមិនចាំបាច់បញ្ចេញកម្លាំងប៉ុន្មានឡើយ
គ . ជាប្រក្រតី អ្នកច្រើនតែធ្វើតាមអ្នកដទៃបញ្ជាច្រើនជាង
4 . តើអ្នកមានភាពទទួលខុសត្រូវប៉ុនណា?
ចម្លើយ
ក . អ្នកនឹងបង្ហាញភាពទទួលខុសត្រូវនៅពេលណាដែលចាំបាច់ប៉ុណ្ណោះ ពេលនេះឱ្យអ្នកដទៃទទួល
ខុសត្រូវការងារសិនចុះ
ខ . អ្នកមិនចូលចិត្តដឹកនាំអ្នកដទៃ ឬបង្ហាញភាពទទួលខុសត្រូវលើការងារណាទាំងអស់ ព្រោះគិតថាមានអ្នកឯទៀតនៅចាំចេញមុខចេញមាត់ច្រើនណាស់ ដូច្នេះទុកឱ្យពួកនោះសម្ដែងតែម្ដងទៅល្អជាង
គ . អ្នកចូលចិត្តធ្វើជាអ្នកដឹកនាំ និងបង្ហាញពីភាពទទួលខុសត្រូវលើការងារផ្សេង។ ចូលចិត្តក្នុងការសម្រេចចិត្តលើបញ្ហាដើម្បីឱ្យការងារដំណើរការទៅមុខទៀតយ៉ាងរលូន
5 . តើជំនាញផ្នែកការចាត់ការរបស់អ្នកយ៉ាងណាដែរ?
ចម្លើយ
ក . អ្នកចូលចិត្តរៀបផែនការមុននឹងចាប់ផ្ដើមការងារ ដោយជាប្រក្រតីទៅ អ្នកច្រើនតែជាអ្នកកំណត់ដំណាក់កាលក្នុងការធ្វើការងារ
ខ . អ្នកធ្វើការងារបានល្អ តែបើការងារនោះមិនដំណើរការទៅដូចការចង់បាននោះ ទើបអ្នកត្រឡប់មក គិតគូររៀបចំផែនការ
គ . មានការងារអ្វីចូលមកក៏ធ្វើជាបណ្ដើរៗទៅ មិនបានត្រូវការរៀបផែនការជារឿងជារ៉ាវអ្វីប៉ុន្មានទេ
6 . តើអ្នកជាមនុស្សទទួលធ្វើការងារបានច្រើនប៉ុនណា?
ចម្លើយ
ក . មិនចូលចិត្តធ្វើការច្រើន ព្រោះមើលមិនឃើញថា ការងារច្រើននឹងជួយឱ្យជីវិតល្អឡើងសោះ
ខ . ធ្វើការច្រើនជាប់រហូត តែបើធ្វើលែងរួចហើយនោះ ឈប់ក៏គឺឈប់
គ . ធ្វើការច្រើនបានជារឿយៗ មិនខ្វល់ពីរឿងការងារច្រើនស្រាប់ទៅហើយ
7 . តើអ្នកសម្រេចចិត្តបានល្អប៉ុនណាដែរ?
ចម្លើយ
ក . បានល្អ បើសិនមានពេលវេលាគ្រប់គ្រាន់ តែបើមានពេលវេលាតិច ច្រើនតែមិនសូវល្អ
ខ . ច្រើនតែសម្រេចចិត្តបានល្អ ទោះជាមានពេលគិតមិនសូវច្រើនក៏ដោយ
គ . មិនចូលចិត្តការសម្រេចចិត្តសោះតែម្ដង ព្រោះលទ្ធផលនៃការសម្រេចចិត្តមិនសូវល្អសោះ
8 . តើអ្នកដទៃគេជឿសំដីរបស់អ្នកបានប៉ុនណាដែរ?
ចម្លើយ
ក . ព្យាយាមរក្សាពាក្យសំដីដែរ តែពេលខ្លះក៏ជ្រើសរើសនិយាយតែរឿងងាយៗ និងគេចពីរឿងណដែលអាចត្រូវឆ្លើយសំណួរ
ខ . បាន ប្រាកដណាស់! ព្រោះបើមិនមែនជាសំដីដែលចេញមកពីចិត្ត អ្នកនឹងមិននិយាយវាចេញមកទេ
គ . ដូចជាមិនឃើញត្រូវទៅយកចិត្តទុកដាក់អីនឹងអ្នកដទៃសោះ បើនិយាយទៅហើយធ្វើមិនបាន ក៏គឺធ្វើមិនបានហ្នឹងហើយ
9 . អ្នកជាមនុស្សរក្សាពាក្យសន្យាបានប៉ុនណាដែរ?
ចម្លើយ
ក . “និយាយហើយត្រូវតែធ្វើ” បើអ្នកសម្រេចចិត្តហើយថា នឹងធ្វើអ្វីមួយ អ្នកនឹងមិនព្រមឱ្យអ្វីមួយមកបញ្ឈប់អ្នកបានទេ
ខ . “និយាយហើយមិនបាច់ធ្វើក៏បានដែរ” បើការងារកំពុងធ្វើ វាមិនទៅតាមអ្វីដូចដែលចង់បាន ទៅខំប្រឹងធ្វើនាំតែខាតខួរក្បាលធ្វើអី?!
គ . “និយាយហើយគួរតែធ្វើ” ទោះជាការងារហ្នឹងមិនបានដូចចិត្តក៏ដោយ ក៏អ្នកនឹងព្យាយាមធ្វើឱ្យរួចស្រេចដូចដែលបានចាប់ផ្ដើមដែរ។
10 . តើអ្នករក្សាទុកព័ត៌មានរបស់ការងារដែលធ្វើហើយយ៉ាងណាដែរ?
ចម្លើយ
ក . ព័ត៌មាន មិនឃើញចាំបាច់ ឬសំខាន់អ្វីសោះ ព្រោះអ្នកដឹងថា ត្រូវធ្វើយ៉ាងណាដោយមិនចាំបាច់ត្រូវពឹងព័ត៌មានចាស់ឡើយ
ខ . រក្សាទុកខ្លះដែរ តែធ្វើការឱ្យបានតាមសាច់ការ វាសំខាន់ជាងមកអង្គុយមើលតួលេខ
គ . អ្នករក្សាទុកព័ត៌មានជាប់រហូត ដើម្បីក្រែងលោត្រូវប្រើការ ទោះជាអ្នកខ្ជិលរក្សាទុកក៏ដោយ
ពិន្ទុ
ចម្លើយ ក ខ គ
1. 6 10 0
2. 0 10 6
3. 6 10 0
4. 6 0 10
5. 10 6 0
6. 0 6 10
7. 6 10 0
8. 6 10 0
9. 10 0 6
10. 0 6 10
វិភាគពិន្ទុ ៖
ពិន្ទុ 100 ៖ កម្រិតភាពត្រៀមខ្លួនរួចជាស្រេច ល្អកំពូល។ មានន័យថា អ្នកកើតមកដើម្បីធ្វើជាចៅហ្វាយលើខ្លួនឯងយ៉ាងពិតប្រាកដ។ បើអ្នកនៅមិនទាន់បានចាប់ផ្ដើមបើកមុខជំនួញជារបស់ខ្លួនឯងនោះ អ្នកគួរតែបើកបានហើយ រឹតតែឆាប់ រឹតតែល្អ ព្រោះអ្នកកំពុងមានកម្ដៅ គ្រប់គ្រាន់សម្រាប់បោះជំហានទៅមុខបានយ៉ាងល្អ។
ពិន្ទុ 91 – 99 ៖ កម្រិតភាពត្រៀមខ្លួនរួចជាស្រេច ល្អណាស់។ មានន័យថា អ្នកមានភាពត្រៀមរួចជាស្រេចលើគ្រប់ផ្នែកសម្រាប់ការចាប់ផ្ដើមមុខជំនួញរបស់ខ្លួនឯង។ កុំបង្អង់យូរ ដំណើរផ្លូវនៃភាពជោគជ័យនៅខាងមុខកំពុងតែបើកចំហ និងរង់ចាំអ្នកហើយ។
ពិន្ទុ 72 – 90 ៖ កម្រិតភាពត្រៀមខ្លួនរួចជាស្រេច ល្អ។ មានន័យថា អ្នកមានគុណសម្បត្កិ និងភាពត្រៀមជាស្រេចក្នុងការធ្វើជាសហគ្រិនដែលនឹងទទួលជោគជ័យ តែក៏នៅមានចំណុចខ្សោយជាច្រើនចំណុចទៀតដែរ។ ជំនាញលើចំណុចដែលអ្នកខ្វះ អ្នកអាចសិក្សារកចំណេះដឹងបន្ថែមបាន ឬមិនទេអាចជួលមនុស្សពីក្រៅឱ្យចូលមកជួយបាន។
ពិន្ទុ 40 – 71 ៖ កម្រិតភាពត្រៀមខ្លួនរួចជាស្រេច កណ្ដាល ឬមធ្យម។ មានន័យថា នៅមិនទាន់ប្រាកដច្បាស់ថា តើអ្នកត្រៀមរួចស្រេចក្នុងការធ្វើជាចៅហ្វាយលើខ្លួនឯង និងអ្នកដទៃហើយឬនៅទេ។ អ្នកនៅខ្វះគុណសម្បត្តិច្រើនប្រការដែលអនាគតសហគ្រិនជោគជ័យមិនគួរមើលរំលង តែបើអ្នកនៅតែមានតម្រូវការចង់បើកមុខជំនួញរបស់ខ្លួនឯងឱ្យបានវិញនោះ អ្នកនឹងជួបឧបសគ្គដ៏ច្រើននាពេលអនាគតដែលអាចនឹងធ្វើឱ្យអ្នកបរាជ័យយ៉ាងអស់ក្បាច់មិនខាន។
ពិន្ទុ ទាបជាង 40 ៖ កម្រិតភាពត្រៀមខ្លួនរួចជាស្រេច មិនសូវល្អ។ មានន័យថា មិនចង់ប្រាប់ឡើយថា ចូរបំភ្លេចក្តីសុបិនដែលចង់ក្លាយជាចៅហ្វាយលើខ្លួនឯងនោះចោលទៅ។ ការធ្វើជំនួញមិនមែនជាដំណើរផ្លូវរបស់អ្នកទេ អ្នកប្រហែលជាស័ក្តិសមនឹងការងារដែលអ្នកកំពុងធ្វើហ្នឹងច្រើនជាង។ ដូច្នេះចូរកុំមកខាតពេលមកអង្គុយនឹកស្រមៃទៅដល់អ្វីដែលមិនអាចក្លាយជាការពិតបានធ្វើអី៕ រៀបរៀងដោយ តាវ៉ែនតា
November 25, 2017
ការដំឡើងប្រាក់ឈ្នួលអប្បបរមាប៉ះពាល់ដល់សហគ្រាសផ្សេងក្រៅពីរោងចក្រដែរឬទេ?
ថ្មីៗនេះក្រសួងការងារ និងបណ្តុះបណ្តាលវិជ្ជាជីវៈ បានជំរុញឱ្យម្ចាស់រោងចក្រទាំងអស់អនុវត្តតាមគោលការណ៍ដំឡើងប្រាក់ឈ្នួលអប្បបរមា និងលក្ខខណ្ឌការងារជាច្រើនដល់កម្មករ និងកម្មការិនីរោងចក្រ ដែលធ្វើឱ្យកម្មករ-កម្មការិនីមានភាពរីករាយ ខណៈមានស្ថាប័នមួយចំនួនផ្សេងទៀតកំពុងមានការបារម្ភខ្លះៗពីផលប៉ះពាល់ពីបញ្ហានេះ។
លោកមេធាវី សោម ចំណាន អ្នកជំនាញច្បាប់ការងារបានលើកឡើងថា រាជរដ្ឋាភិបាលបានចេញគោលការណ៍ដំឡើងប្រាក់ឈ្នួលអប្បបរមាចំពោះតែរោងចក្រសហគ្រាសដែលផលិតស្បែកជើង និងកាត់ដេរតែប៉ុណ្ណោះ។ តែពេលខ្លះម្ចាស់អាជីវកម្មផ្សេងក៏អាចប៉ះពាល់ខ្លះដែរព្រោះប្រសិនប្រាក់ឈ្នួលអប្បបរមារបស់កម្មកររោងចក្រខ្ពស់ជាងប្រាក់ខែនៅសហគ្រាសផ្សេង បុគ្គលិកអាចនឹងមិនពេញចិត្ត ឬស្នើសុំឱ្យមានការដំឡើងដូចគ្នាកុំឱ្យចាញ់កម្មកររោងចក្រ។
លោកមេធាវី សោម ចំណាន បាននិយាយថា៖ «កន្លងមកមានបុគ្គលិកផ្នែកមន្ត្រីឥណទានមកពីគ្រឹះស្ថានមីក្រូហិរញ្ញវត្ថុតូចៗមួយចំនួនបានរត់ទៅសុំធ្វើការងារនៅរោងចក្រវិញ ព្រោះនៅស្ថាប័នគាត់បានប្រាក់ខែត្រឹមតែ180ដុល្លារ ហើយត្រូវជិះម៉ូតូរហូត តែសម្រាប់កម្មករ-កម្មការិនីរោងចក្រឥឡូវអាចបានដល់ជាង 200ដុល្លារ បើគាត់ថែមម៉ោង ព្រោះគ្រាន់តែប្រាក់ឈ្នួលអប្បបរមាបូកនឹងថ្លៃផ្សេងៗមិនទាន់ថែមម៉ោងផង ក៏បានប្រមាណ 187ដុល្លារបាត់ទៅហើយ»។
អ្នកជំនាញច្បាប់ការងារខាងលើបានលើកឡើងថា ពេលខ្លះម្ចាស់ស្ថាប័នមួយចំនួនមានការយល់ច្រឡំពីប្រាក់ខែគោល និងប្រាក់ឈ្នួលអប្បបរមា ហើយមានការបារម្ភពីការដំឡើងប្រាក់ខែគោល។ តាមពិតប្រាក់ខែគោល និងប្រាក់ឈ្នួលអប្បបរមាគឺខុសគ្នា ព្រោះប្រាក់ខែគោលគឺប្រាក់ខែដែលផ្តល់ឱ្យបុគ្គលិកទូទៅតាមជំនាញ និងតំណែងរបស់គាត់ តែគាត់ក៏អាចកំណត់ប្រាក់ខែគោលផ្នែកខ្លះជាប្រាក់ខែអប្បបរមាដែរ។ ចំណែកឯប្រាក់ខែអប្បបរមាវិញ គឺការកំណត់ពីប្រាក់ខែចាប់ផ្តើមទាបបំផុតសម្រាប់ស្ថាប័ន មានន័យថាតំណែងតូចបំផុតមិនត្រូវក្រោមប្រាក់ឈ្នួលអប្បបរមាដែលក្រសួងបានកំណត់នោះទេ ហើយជាទូទៅក្រសួងមិនមែនជំរុញឱ្យដំឡើងប្រាក់ខែគោលនោះទេ គឺជំរុញឱ្យតម្លើងប្រាក់ឈ្នួលអប្បបរមាតែប៉ុណ្ណោះ៕
November 25, 2017
គូស្នេហ៍ Song Song ទៅក្រេបច័ន្ទទឹកឃ្មុំនៅប្រទេស អេស្ប៉ាញ
យោងតាមសារព័ត៌មាន PBE Media ដែលបានចេញផ្សាយនៅថ្ងៃទី25 ខែវិច្ឆិកា ឆ្នាំ2017នេះ បានឱ្យដឹងថា គូស្នេហ៍ Song Song គឺ Song Joong Ki និង Song HyeKyo ដែលទើបតែរៀបអាពាហ៍ពិពាហ៍ហើយថ្មីថ្មោង ខណៈនេះអ្នកទាំងពីរបានធ្វើដំណើរទៅក្រេបច័ន្ទទឹកឃ្មុំ ឬភាសាពេញនិយមហៅថា Honeymoon នៅប្រទេស អេស្ប៉ាញ។
អ្នកនាង Song HyeKyo បានបង្ហោះរូបភាពអគារមួយសន្លឹកនៅលើបណ្ដាញទំនាក់ទំនងសង្គមអ៊ីនស្ដាក្រាមរបស់អ្នកនាងផ្ទាល់ ដែលបានបង្ហាញអំពីទឹតាំងនៃដំណើរក្រេបច័ន្ទទឹកឃ្មុំនៅប្រទេស អេស្ប៉ាញ។ អគារមួយនោះត្រូវបានគេស្គាល់ថា ជាសណ្ឋាគារលំដាប់ផ្កាយ5 ដែលមានរចនាបទក្បូរក្បាច់ស្ថាបត្យកម្មបែបវប្បធម៌បុរាណរបស់ទ្វីបអឺរ៉ុបមួយនៅក្នុងទីក្រុង Cordova ប្រទេសអេស្ប៉ាញ ។
គួរបញ្ជាក់ផងដែរថា នៅពេលវិលត្រូវមកពីប្រទេស អេស្ប៉ាញ វិញ តារាល្បីទាំងពីរដួងនេះត្រូវបានគេបង្ហើបឱ្យដឹងដែរថា ពួកគេគ្រោងនឹងរើទៅរស់នៅក្នុងវីឡាប្រណីតមួយនៅក្នុងទីក្រុងសេអ៊ូល ដែលមានតម្លៃ 11.98 លានដុល្លារអាមេរិក៕
November 25, 2017
Messi ឈ្នះស្បែកជើងមាសប្រចាំតំបន់អឺរ៉ុបជាលើកទី4
ខ្សែប្រយុទ្ធ Lionel Messi បានបញ្ជាក់ថា រូបគេកាន់តែមានភាពមុតស្រួចក្នុងពេលឈានដល់វ័យកាន់តែចាស់ ក្រោយពីឈ្នះរង្វាន់ស្បែកជើងមាសក្នុងនាមជាអ្នករកគ្រាប់បាល់បានច្រើនជាងគេប្រចាំទ្វីបអឺរ៉ុប (European Golden Shoe) ជាលើកទី4 កាលពីថ្ងៃសុក្រ។
តារាឆ្នើមអន្តរជាតិអាហ្សង់ទីនវ័យ30ឆ្នាំរូបនេះ បានឈ្នះរង្វាន់ក្នុងនាមជាអ្នករកបានគ្រាប់បាល់បានច្រើនជាងគេក្នុងចំណោមក្របខ័ណ្ឌលីកកំពូលៗរបស់អឺរ៉ុប ក្រោយពីរកបាន37គ្រាប់បាល់សម្រាប់ក្រុម Barcelona។ ក្រោយពីត្រូវបានគេប្រគល់រង្វាន់ស្បែកជើងមាសឲ្យនៅក្នុងកម្មវិធីមួយក្នុងទីក្រុង Barcelona កីឡាករ Messi ដែលបានឈ្នះពានរង្វាន់បាល់មាស Ballon d’Or 5លើកដែរនោះ បានឲ្យដឹងថា៖ «ស្របពេលដែលខ្ញុំកាន់តែមានវ័យចាស់នៅក្រៅទីលាន ខ្ញុំគិតថា ខ្ញុំក៏មានភាពមុតស្រួចនៅក្នុងទីលានផងដែរ»។ ខ្សែប្រយុទ្ធរូបនេះបានបន្ថែមទៀតថា៖ «ខ្ញុំបានអភិវឌ្ឍខ្លួនយ៉ាងច្រើន និងបានបន្ថែមរឿងរ៉ាវជាច្រើនចូលក្នុងកីឡារបស់ខ្ញុំ ហើយខ្ញុំពិតជារីករាយកាន់តែខ្លាំងក្នុងនាមជាកីឡាករម្នាក់»។ Messi បានឈ្នះពានរង្វាន់នេះ ដោយឈរពីលើខ្សែប្រយុទ្ធ Bas Dost ដែលរកបាន34គ្រាប់ឲ្យក្លិប Sporting Lisbon កាលពីរដូវកាលមុន និង Pierre-Emerick Aubameyang ដែលរកបាន31គ្រាប់សម្រាប់ក្លិប Borussia Dortmund។
ក្រោយពីបានឈ្នះពានរង្វាន់នេះកាលពីឆ្នាំ2010, 2012 និង2013 Messi ស្មើនឹង Cristiano Ronaldo តាមរយៈការឈ្នះស្បែកជើងមាសជាលើកទី4។ តារាឆ្នើមរបស់ក្លិប Real Madrid គឺ Cristiano Ronaldo បានឈ្នះស្បែកជើងមាសក្នុងឆ្នាំ2008, 2011, 2014 និងឆ្នាំ2015៕
ប្រភពពី៖ BBC

November 25, 2017