សង្គម និងសេដ្ឋកិច្ច - La Reine Media

ក្រុមហ៊ុនកូនខ្មែរដំបូងទទូលបានពានរង្វាន់កិត្តិយសនៅលើឆាកអន្តរជាតិ

ភ្នំពេញ៖ ពិតជាគួរឱ្យមោទនភាពខ្លាំងណាស់សម្រាប់កម្ពុជាយើង ខណៈដែលក្រុមហ៊ុនកូនខ្មែរដំបូងគេទទួលបានពានរង្វាន់កិត្តិយសលើឆាកអន្តរជាតិសម្រាប់ឆ្នាំ2017 ដែលត្រូវបានប្រគល់ជូននៅទីក្រុងឡុងដ៍ ចក្រភពអង់គ្លេស។

ក្រុមហ៊ុនដែលទទួលបានពានរង្វាន់កិត្តិយសនេះគឺ ក្រុមហ៊ុនអចលនទ្រព្យ Khmer Foundation Appraisal Co, Ltd (KFA) ដែលមានការប្តេជ្ញាចិត្តខ្ពស់ក្នុងការចេញផ្សាយជាសាធារណៈនូវវប្បធម៌គុណភាពនេះ (Quality Culture) ដល់បុគ្គលិក អ្នកផ្គត់ផ្គង់សម្ភារដល់អតិថិជន និងសហគមន៍ដែលបានគាំទ្រដោយ QC 100 Total Quality Management Model។

លោកឧកញ៉ា នួន រិទ្ធី អគ្គនាយកក្រុមហ៊ុន (KFA) មានប្រសាសន៍ថា អ្វីដែលធ្វើឱ្យក្រុមហ៊ុនលោកទទួលបានពានរង្វាន់កិត្តិយសដ៏អស្ចារ្យនេះ គឺដោយសារក្រុមហ៊ុនអនុវត្តនូវគោលការណ៍មួយចំនួនដូចជា ៖

ទី1.គុណភាព គឺជាហេតុផលមួយសម្រាប់ផ្តល់ទំនុកចិត្តទៅដល់អតិថិជន។

ទី2.ជាមួយកម្រិតគុណភាពដែលបានបង្កើតក្នុងក្រុមហ៊ុនដោយយោងជាមួយនឹងពិន្ទុគុណភាព QC 100%។

ទី3.លើកទឹកចិត្តការចូលរួម និងធ្វើការជាដៃគូក្នុងការសម្រេចចិត្ត។

ទី4.មានភាពសប្បាយរីករាយចំពោះតម្រូវការអតិថិជនរបស់យើង និងការរំពឹងទុករបស់ពួកគេ។

ទី5.ផ្តល់ធនធានមនុស្ស ទាំងបច្ចេកទេស និងសេដ្ឋកិច្ចដើម្បីបន្តសម្រេចបាននូវការរីកចម្រើននិងការគោរពចំពោះបរិស្ថាន។

ទី6. គ្រប់គ្រងធនធានមនុស្សក្នុងក្រុមហ៊ុនឱ្យទទួលបានសក្ដានុពលកម្រិតខ្ពស់។

និងទី7.ធ្វើឱ្យបុគ្គលិកយល់ដឹងពីសារៈសំខាន់នៃការតាំងចិត្តលើសកម្មភាពមុខងារផលប្រយោជន៍ និងទទួលបានលទ្ធផលអាជីវកម្មល្អ។

ជាមួយនឹងសក្ខីភាពនៃការទទួលបានពានរង្វាន់លំដាប់ពិភពលោកនាទីក្រុងឡុងដ៍ចក្រភពអង់គ្លេសខាងលើនេះ លោកឧកញ៉ា នួន រិទ្ធី ក៏ដូចជាស្ថាបនិក និងបុគ្គលិកទាំងអស់បានបង្ហាញពីក្ដីរីករាយ ព្រមទាំងមានមោទនភាពជាខ្លាំងជាមួយនឹងសមិទ្ធផលដែលសម្រេចបានកន្លងមក។

លោកឧកញ៉ា នួន រិទ្ធី បានបញ្ជាក់យ៉ាងដូច្នេះថា «ខ្ញុំមានសេចក្តីរីករាយឥតឧបមា រួមជាមួយនឹងមោទនភាពចំពោះរូបខ្ញុំផ្ទាល់ និងយុវជនខ្មែរយើងដទៃទៀតដែលតែងនាំយកមកនូវកិត្តិយស និងកិត្តិស័ព្ទជូនដល់ក្រុមគ្រួសារក៏ដូចប្រទេសជាតិទាំងមូល។ ការទទួលបានពាននេះគឺកើតឡើងដោយសារការចូលរួមគាំទ្រំពីសំណាក់អតិថិជន ការខិតខំប្រឹងប្រែងរបស់បុគ្គលិកគ្រប់ជាន់ថ្នាក់ ជាពិសេសស្ថេរភាពសេដ្ឋកិច្ចដែលរក្សាកំណើន GDP 7% ។ បើគ្មានសុខសន្តិភាពដូចសព្វថ្ងៃទេនោះ ម្ល៉េះរូបខ្ញុំក៏មិនមានឱកាសបញ្ចេញសមត្ថភាពដើម្បីមកទទួលពានរង្វាន់អន្តរជាតិនេះដែរ។ កត្តាដែលនៅពីក្រោយភាពជោគជ័យរបស់ខ្ញុំ គឺជាការតស៊ូ ព្យាយាម និងស្មោះត្រង់»៕

November 28, 2017

គយគន់សម្រស់ Miss Universe តំណាងប្រទេសថៃ ក្នុងឈុតហែលទឹក

បច្ចុប្បន្ននេះ អ្នកគាំទ្រកម្មវិធីប្រកួតប្រជែងបវរកញ្ញាលំដាប់អន្ដរជាតិ Miss Universe 2017 នៅក្នុងប្រទេសថៃ កំពុងតែជ្រួលច្របល់ជាមួយនឹងសម្រស់ ព្រមទាំងសមត្ថភាពរបស់ កញ្ញា ម៉ារីយ៉ា ភូនលើតឡាភ (มารีญา พูลเลิศลาภ ) ដែលជាបវរកញ្ញាចក្កវាឡតំណាងប្រទេសថៃ។ ថ្វីត្បិតតែនាងមិនបានគ្រងតំណែងម្ចាស់មកុដ Miss Universe 2017 ក្ដី តែនាងបានពាំនាំនូវមោទនភាពមួយសម្រាប់ប្រទេសថៃ ដោយសារនាងបានជាប់នៅក្នុងចំណោម Top 5។

ដោយឡែកទាំងរូបសម្បត្តិ និងកិរិយានៅក្នុងដំណើរបង្ហាញម៉ូដឈុតហែលទឹកវិញ បវរកញ្ញារូបនេះក៏បានជាប់ជាបេក្ខនារីដែលលេចធ្លោជាងគេក្នុងចំណោមបវរកញ្ញាទាំង 5 នាក់នោះដែរ ដោយនាងគ្រងនូវឈុតប៊ីគីនីពណ៌ខ្មៅ។ កញ្ញា ម៉ារីយ៉ា ភូនលើតឡាភ គឺជាកូនកាត់ដែលជាប់សែស្រឡាយចិន និងបើតាមសារព័ត៌មាន Mthai ដែលធ្លាប់បានចេញផ្សាយកាលពីពេលថ្មីៗនេះបានឱ្យដឹងថា នាងទើបតែមានវ័យ 25ឆ្នាំ ហើយនាងបានបញ្ចប់ថ្នាក់មហាវិទ្យាល័យ ផ្នែកវិស្វកម្មអគ្គិសនី និងជាអតីតសាស្ត្រាចារ្យនៅសាលា American Tesol Institute ហើយនាងមានបងប្អូនភ្លោះប្រុស 1 នាក់ ផងដែរ។

គួរបញ្ជាក់ផងដែរថា សមត្ថភាពពិសេសដែលធ្វើឱ្យនាង ម៉ារីយ៉ា មានភាពលេចធ្លោជាងគេ មិនមែនត្រឹមតែសម្រស់ប៉ុណ្ណោះទេ តែនាងអាចនិយាយបាន 5 ភាសា រួមមាន អង់គ្លេស ថៃ ស្វ៊ីស ចិន និងវៀតណាម។ ហើយក៏សូមរំឭកដែរថា កាលពីឆ្នាំកន្លងទៅ នាងធ្លាប់ត្រូវបានអញ្ជើញទៅកាន់សហរដ្ឋអាមេរិកមុនចូលប្រកួត ដើម្បីចូលរួមថតរូបបង្ហាញម៉ូដឱ្យទស្សនាវដ្តីល្បីឈ្មោះ Vogue Baeuty ផងដែរ។

ដើម្បីឱ្យកាន់តែច្បាស់ថា តើរូបនាងរបស់តារារូបនេះ សិចស៊ីរោលរាលដល់កម្រិតណានោះ សូមទស្សនារូបភាពខាងក្រោមនេះ៖

November 28, 2017

លោក Allardyce វិលទៅកាន់ការពិចារណាវិញដើម្បីក្លាយជាគ្រូបង្វឹករបស់ Everton

ក្លិបទូកក្តោង Everton កំពុងតែពិចារណាទៅលើការពិភាក្សាផ្សេងៗជាមួយនឹងលោក Sam Allardyce ជុំវិញការតែងតាំងរូបលោកធ្វើជាអ្នកចាត់ការទូទៅថ្មីរបស់ពួកគេ ក្រោយពីការពិភាក្សាជាបឋមជាមួយនឹងគ្រូបង្វឹកវ័យ63ឆ្នាំរូបនេះទទួលបរាជ័យកាលពីដើមខែនេះ។

ទីតាំងរបស់លោក Allardyce ក្នុងនាមជាបេក្ខភាពដ៏មានសក្តានុពលម្តងទៀតបានបង្ហាញថា ក្លិប Everton ត្រូវតែស្វែងរកគ្រូបង្វឹកជាអចិន្ត្រៃយ៍ម្នាក់ដើម្បីជំនួសកន្លែងរបស់លោក Ronald Koeman ក្រោយពីការទាក់ទងជាលើកទី1ជាមួយនឹងអតីតអ្នកចាត់ការទូទៅរបស់ក្រុមជម្រើសជាតិអង់គ្លេសរូបនេះ ត្រូវបានគេគិតថា បានទទួលបរាជ័យដោយសារតែទំហំ និងលក្ខខណ្ឌផ្សេងៗនៃកិច្ចសន្យាដែលលោកត្រូវបានគេផ្តល់ឲ្យ។ រយៈពេល5សប្តាហ៍បានកន្លងផុតទៅ ចាប់តាំងពីលោក Koeman សញ្ជាតិហូឡង់ ត្រូវបានបណ្តេញចេញ កាលពីថ្ងៃទី23 ខែតុលា ហើយលោក David Unsworth ដែលជាគ្រូបង្វឹកក្រុមអាយុក្រោម23ឆ្នាំរបស់ Everton ត្រូវបានតែងតាំងជាគ្រូបង្វឹកបណ្តោះអាសន្ន។ ប៉ុន្តែ ទម្រង់លេងរបស់ក្រុមបានបន្តធ្លាក់ចុះជាបន្តបន្ទាប់ ដូចក្នុងពេលស្ថិតក្រោមការដឹកនាំរបស់លោក Koeman អ៊ីចឹងដែរ។ លោក Unsworth បានដឹកនាំឲ្យក្រុមខ្លួនរងបរាជ័យ5លើក ក្នុងចំណោមការប្រកួត7លើកក្រោមការដឹកនាំរបស់លោកក្នុងរាល់យុទ្ធនាការទាំងអស់ ខណៈដែលពួកគេដណ្តើមបានជ័យជម្នះតែ1លើកគត់។

ការរងបរាជ័យក្នុងលទ្ធផល 4-1 កាលពីថ្ងៃអាទិត្យ នៅលើទឹកដីក្រុម Southampton បានធ្វើឲ្យក្រុម Everton មាន12ពិន្ទុ ពោលគឺនាំមុខ2ពិន្ទុលើក្រុមស្ថិតក្នុងតំបន់កាត់ចោល ក្រោយពីការប្រកួត13លើក៕

ប្រភពពី៖ The Guardian

November 28, 2017

Man United ស្រេកឃ្លានជ័យជម្នះពេលប៉ះ Watford រាត្រីនេះ

ក្រុមបិសាចក្រហម Manchester United នឹងធ្វើដំណើរទៅជួបក្រុម Watford ក្នុងការប្រកួតក្របខ័ណ្ឌ Premier League ដ៏សំខាន់នៅរាត្រីនេះ ខណៈដែលពួកគេនឹងសម្លឹងរកការកាត់បន្ថយពិន្ទុដេញតាមពីក្រោយក្រុមកំពុងតែនាំមុខ Manchester City ។

ស្របពេលដែល Man City ក៏នឹងធ្វើជាម្ចាស់ផ្ទះទទួលក្រុម Southampton នៅរាត្រីថ្ងៃពុធដែរនោះ ក្រុម Man United ដែលបានយកឈ្នះលើក្រុម Brighton ទាំងលំបាកក្នុងលទ្ធផល 1-0 កាលពីថ្ងៃសៅរ៍នោះ មិនត្រូវធ្វើឲ្យមានការភ្នាត់ស្នៀតឡើយនាកីឡដ្ឋាន Vicarage Road ជាកន្លែងក្រុម Watford ធ្លាប់បានបង្កើតការភ្ញាក់ផ្អើលម្ដងរួចមកហើយតាមរយៈការផ្តួលក្រុមរបស់លោក Jose Mourinho 3-1 កាលពីរដូវកាលមុន។

ស្របពេលដែលក្រុម Watford បានកត់ត្រាជ័យជម្នះដ៏គួរឲ្យជឿជាក់មួយក្នុងលទ្ធផល 3-0 នៅលើទឹកដីក្រុម Newcastle កាលពីថ្ងៃសៅរ៍នោះ ក្រុម Man United បានជួបការលំបាកក្នុងការបំបែកតំបន់ការពាររបស់ក្រុម Brighton នាកីឡដ្ឋាន Old Trafford នៅមុនពេលការធ្វើឲ្យបាល់ចូលទីខ្លួនឯងរបស់កីឡាករ Lewis Dunk ពីការបញ្ជូនបាល់របស់ខ្សែបម្រើ Ashley Young បានបំពេញជ័យជម្នះក្នុងការប្រកួតលីកជាលើកទី2ជាប់ៗគ្នារបស់ពួកគេតែម្តង។ ខ្សែការពារ Victor Lindelof របស់ក្រុម Man United សង្ឃឹមថា ក្រុមរបស់គេអាចបន្តដណ្តើមបានជ័យជម្នះទៀត ស្របពេលដែលកំពុងតែស្វែងរកទម្រង់លេងដ៏មុតស្រួចរបស់ពួកគេត្រឡប់មកវិញ។ កីឡាកររូបនេះបានឲ្យដឹងថា៖ «យើងបានព្យាយាមអស់ពីសមត្ថភាពរបស់យើងក្នុងការប្រកួតនេះ យើងបានព្យាយាមលេងការប្រកួតរបស់យើង ប៉ុន្តែ វាមិនបានដំណើរការល្អឡើយ»។ Lindelof បានបន្ថែមទៀតថា៖ «យើងទទួលបាន3ពិន្ទុ ហើយនោះគឺជារឿងដ៏សំខាន់បំផុត។ យើងមិនបានលេងការប្រកួតដ៏ល្អបំផុតរបស់យើងឡើយ ប៉ុន្តែ យើងបានទទួលជ័យជម្នះ ហើយនោះគឺជាការបង្ហាញពីភាពខ្លាំងរបស់យើង»។ ការប្រកួតនេះនឹងចាប់ផ្តើមនៅម៉ោង3ទៀបភ្លឺ៕

ប្រភពពី៖ The Guardian

November 28, 2017

តើគួរតែធ្វើការសិក្សាស្រាវជ្រាវមុនពេលធ្វើអាជីវកម្ម ឬយ៉ាងណា?

បច្ចុប្បន្នមានអ្នកមានទ្រព្យសម្បត្ដិជាច្រើនកំពុងចង់បង្កើតអាជីវកម្មធំៗ ឬបង្កើតជាក្រុមហ៊ុនមួយដោយប្រើប្រាស់ទុនវិនិយោគច្រើនសន្ធឹកសន្ធាប់ ប៉ុន្ដែពួកគេហាក់នៅពុំទាន់ច្បាស់ក្នុងចិត្តថា ខ្លួនឯងកំពុងឈរនៅត្រង់ចំណុចណានោះទេ? ហើយក៏ពុំទាន់បានកំណត់ពីគោលដៅឱ្យបានច្បាស់លាស់ផងដែរ។លោកបណ្ឌិត តាន់ មុនីវណ្ណ អគ្គនាយករងនៃក្រុមហ៊ុន ម៉ុង ឫទី្ធ គ្រុប កាលពីពេលថ្មីៗនេះបានចំណាយពេលវេលាដ៏មានតម្លៃរបស់លោកដើម្បីចែករំលែកបទពិសោធរបស់លោកទាក់ទងនឹងការស្រាវជ្រាវទីផ្សារមុននឹងចាប់ផ្តើមដំណើរការអាជីវកម្ម។

មុនពេលបើកដំណើរការក្រុមហ៊ុន តើគេគួរធ្វើអ្វីខ្លះ?
ជាធម្មតាមុនពេលចាប់ផ្តើមបើកដំណើរការ ក្រុមហ៊ុនទាំងអស់ត្រូវតែរៀបចំគម្រោងផែនការនៃការធ្វើជំនួញឱ្យបានច្បាស់លាស់។ ប្រសិនបើក្រុមហ៊ុនដែលគ្រោងបើកដំណើរការនោះគ្មានទិន្នន័យពីការស្រាវជ្រាវ គេនឹងមិនអាចដឹងពីកិច្ចការរៀបចំក្រុមហ៊ុន ឱកាសលក់ផលិតផល ការភ្ជាប់ទំនាក់ទំនងទៅកាន់ទីផ្សារ និងដៃគូប្រកួតប្រជែងជានរណានោះទេ។ ដូច្នេះវានឹងធ្វើឱ្យការរៀបចំគម្រោងផែនការអាជីវកម្មមិនល្អ ព្រោះយើងធ្វើទៅតាមការនឹកឃើញ ឬការស្រមើលស្រមៃ។ ជាបទពិសោធនៃការងារគ្រប់គ្រងជាង10ក្រុមហ៊ុននៅក្នុងក្រុមហ៊ុន ម៉ុង ឫទ្ធី គ្រុប រយៈពេលជិត20ឆ្នាំ និងក្រុមហ៊ុនថ្មីចំនួន5ដែលខ្ញុំទើបបង្កើត គឺខ្ញុំតែងតែឱ្យតម្លៃខ្ពស់ទៅលើការសិក្សាស្រាវជ្រាវ។

តើការសិក្សាស្រាវជ្រាវនោះត្រូវធ្វើឡើងក្នុងកម្រិតណា?
ការសិក្សាស្រាវជ្រាវ យើងមិនចាំបាច់ធ្វើទៅលើអ្វីច្រើននោះទេ មានន័យថាបើយើងចង់រកស៊ីអ្វីយើងធ្វើទៅលើការងារនោះទៅ។ ឧទាហរណ៍ ខ្ញុំចង់នាំសាច់គោចូលមកលក់ក្នុងទីផ្សារកម្ពុជា គឺខ្ញុំមិនអាចទៅយកសាច់ចូលមកទីផ្សារតែម្ដងនោះទេ ដោយយើងត្រូវដឹងពីព័ត៌មានថា តើតម្រូវការសាច់គោក្នុងទីផ្សារកម្ពុជាមានកម្រិតណា? មនុស្សប្រភេទណាដែលត្រូវការសាច់យើងចង់នាំចូល? តើប្រទេសណាខ្លះ ឬក្រុមហ៊ុនណាខ្លះដែលនាំសាច់ចូលមកកម្ពុជា? នៅពេលយើងប្រមូលព័ត៌មានទាំងអស់ហ្នឹងបានហើយ ទើបយើងសិក្សាពីទិសដៅ និងការបញ្ជ្រាបខ្លួនចូលទៅកាន់ទីផ្សារ ព្រមទាំងធ្វើការវិភាគលើទីផ្សារ និងហានិភ័យមួយចំនួន។ ដូច្នេះការសិក្សាស្រាវជ្រាវវានឹងបង្ហាញយើងឱ្យកាន់តែច្បាស់ដើម្បីឱ្យងាយស្រួលដឹងថា គួរតែដំណើរការងារនេះដូចម្ដេច?

តើការសិក្សាស្រាវជ្រាវអាចជួយសម្រួលដល់ការធ្វើអាជីវកម្មកម្រិតណាដែរ?
ជាទូទៅនៅពេលទទួលបានលទ្ធផល ឬទិន្នន័យនៃការសិក្សាស្រាវជ្រាវ គឺយើងមិនមែនជឿភ្លាម100%ទេ តែយើងក៏ត្រូវយកវាមកធ្វើការវិភាគដោយខ្លួនឯងបន្ថែមទៀតអំពីផលិតផលរបស់យើងថា តើយើងអាចចែកចាយវា ឬបញ្ជ្រាបចូលទៅទីផ្សារតាមរយៈអ្វី? យើងមិនអាចជឿជាក់ទាំងស្រុងទៅលើការសិក្សាស្រាវជ្រាវទេ ព្រោះវាគ្រាន់តែជាផែនទីដែលបង្ហាញផ្លូវយើងសម្រាប់ដើរប៉ុណ្ណោះ។ ហេតុអ្វីបានជាខ្ញុំនិយាយបែបនេះ? ព្រោះអ្វីៗវាមាននៅតែលើក្រដាសប៉ុណ្ណោះ។ តែទោះបីជាយ៉ាងណា យ៉ាងហោចណាស់យើងត្រូវយល់ថាការសិក្សាស្រាវជ្រាវមុនដំណើរការអាជីវកម្ម គឺវាមានតម្លៃខ្លាំងណាស់។

បន្ទាប់ពីសិក្សាស្រាវជ្រាវបានបញ្ចប់ តើយើងត្រូវធ្វើកិច្ចការទាំងនេះបន្ដជាប្រចាំទៀត ឬទេ?
យើងអាចប្រើប្រាស់បុគ្គលិកបានសម្រាប់ការស៊ើបព័ត៌មានតិចតួច ប៉ុន្ដែនៅពេលដែលយើងចង់ដឹងព័ត៌មានអ្វីមួយធំដុំ គឺយើងត្រូវតែជួលក្រុមហ៊ុនជំនាញដើម្បីឱ្យគេធ្វើការសិក្សាស្រាវជ្រាវ ព្រោះគេមានពេលធ្វើ និងមានជំនាញ ពិសេសគេមានទិន្នន័យក្នុងដៃខ្លះទៅហើយ ដូច្នេះគេដឹងពីមធ្យោបាយធ្វើយ៉ាងណាដើម្បីទទួលបានទិន្នន័យពិតប្រាកដដែលយើងចង់បាន។ ដោយឡែកសម្រាប់ក្រុមហ៊ុនធ្វើអាជីវកម្មដូចជាយើងពិតជាមិនដឹងថាទៅយកទិន្នន័យមកពីណានោះទេ? ឧទាហរណ៍ដូចជារូបខ្ញុំផ្ទាល់មិនមែនមិនធ្លាប់ប្រើបុគ្គលិកឱ្យធ្វើកិច្ចការនេះទេ ប៉ុន្ដែវាចំណាយពេលច្រើន ហើយថែមទាំងទទួលបានព័ត៌មានមិនប្រាកដប្រជាទៀត។ តាមបទពិសោធរបស់ខ្ញុំ យើងអាចធ្វើបានជាមួយបុគ្គលិកត្រឹមតែបញ្ជូនគាត់ទៅសិក្សាបន្ថែមលើជំនាញដែលកំពុងធ្វើការងាររាល់ថ្ងៃ ដើម្បីបង្កើនសមត្ថ-
ភាពឱ្យខ្លាំង។

តើលោកបណ្ឌិតអាចលើកជាករណីសិក្សាមួយបានទេ ពាក់ព័ន្ធគុណសម្បត្ដិលើការសិក្សាស្រាវជ្រាវ?
ខ្ញុំសូមលើកឧទាហរណ៍មួយ ដូចជាខ្ញុំចង់បង្កើតក្រុមហ៊ុននាំចូលសាច់គោ ពេលខ្ញុំធ្វើការស្រាវជ្រាវទើបខ្ញុំដឹងថា ប្រទេសរបស់យើងខ្វះសាច់គោ មិនតែប៉ុណ្ណោះយើងអត់ចេះកែច្នៃសាច់គោឱ្យមានតម្លៃទៀតផង។ តាមរយៈការស្រាវជ្រាវនោះបានធ្វើឱ្យខ្ញុំដឹងថា មានប្រទេសចំនួនប៉ុន្មានដែលនាំសាច់គោចូលមកកាន់ប្រទេសកម្ពុជា? សាច់គោមកពីប្រទេសណានាំចូលកម្ពុជាច្រើនជាងគេ? ហើយខ្ញុំថែមទាំងដឹងទៀតថា មូលហេតុអ្វីបានជាប្រជាជនខ្មែរពុំសូវចូលចិត្ដហូបសាច់គោ? នៅពេលយើងមានទិន្នន័យហើយ យើងចង់រៀបយុទ្ធសាស្ដ្រដាក់តម្លៃសាច់គោនាំចូលមកឱ្យមានការប្រកួតប្រជែងជាមួយសាច់គោក្នុងស្រុកក៏អាចធ្វើបាន ឬត្រូវកែច្នៃសាច់គោក្នុងស្រុកឱ្យមានតម្លៃ ឬស្ដង់ដារមួយសម្រាប់ដាក់ចូលក្នុងទីផ្សារដើម្បីទប់ការនាំចូលមកក៏អាចធ្វើទៅបាន។

តាមរយៈបទពិសោធរបស់លោកបណ្ឌិត តើក្រុមហ៊ុនគួរតែចំណាយប្រាក់ទៅលើការសិក្សាស្រាវជ្រាវជាមុនដែរ ឬទេ?
ជាទស្សនៈរបស់ខ្ញុំ ប្រសិនបើចង់បើកក្រុមហ៊ុន យើងត្រូវតែចាប់ផ្ដើមធ្វើការសិក្សាស្រាវជ្រាវជាមុនសិន មុននឹងចាប់ផ្តើមបើកដំណើរការអាជីវកម្ម។ ក្នុងករណីយើងចង់បង្កើតអាជីវកម្មខ្នាតតូច ដូចជាលក់គុយទាវ ឬធ្វើអ្វីតិចតួច យើងគ្រាន់តែមើលទីផ្សារជុំវិញខ្លួនឯង ឬសួរនាំអ្នកជិតខាងដែលមានបទពិសោធក៏បាន។ ចំណុចនេះខ្ញុំចង់បញ្ជាក់ថាមិនមែនការសិក្សាស្រាវជ្រាវទាំងអស់សុទ្ធតែប្រាកដជាទទួលបានភាពជោគជ័យនោះទេ ប៉ុន្ដែយ៉ាងហោចណាស់ហានិភ័យក្រោយពីយើងសិក្សាស្រាវជ្រាវរួចវាមានតិចតួចបំផុត ព្រោះនៅពេលយើងស្រាវជ្រាវវានឹងបង្ហាញឱ្យយើងឃើញពីទិដ្ឋភាពជាក់ស្ដែងថា យើងជាអ្វី? នៅត្រង់ណា? ត្រូវទៅណា? ពេលនោះយើងនឹងដឹងថាយើងនៅមានចំណុចខ្វះខាតអ្វីដែលធ្វើឱ្យយើងមិនអាចទៅដល់គោលដៅ។នៅប្រទេសអភិវឌ្ឍគេតែងតែចំណាយទុនលើកិច្ចការស្រាវជ្រាវ ដូច្នេះទើបក្រុមហ៊ុនរបស់គេពុំសូវជួបភាពបរាជ័យ។ យើងគួរតែចាប់ផ្ដើម ព្រោះការជួលឱ្យក្រុមហ៊ុនជំនាញសិក្សាស្រាវជ្រាវចំណាយក្នុងរង្វង់ត្រឹមតែ2-3ពាន់ដុល្លារប៉ុណ្ណោះ។ ក្រោយពីទទួលបានទិន្នន័យយើងអាចធ្វើការវិភាគដោយខ្លួនឯងថា គួរ ឬមិនគួរ បើមិនអាចទៅរួចយើងបោះចោលគំនិតអាជីវកម្មដោយគ្រាន់តែខាតបង់ថ្លៃជួលគេស្រាវជ្រាវប៉ុណ្ណោះ។ ផ្ទុយទៅវិញបើយើងដើរទៅមុខដោយគ្មានការស្រាវជ្រាវ ដោយក្ដីស្រមៃ ស្រពេចស្រពិលយើងនឹងបាត់បង់លុយដ៏ច្រើនសន្ធឹកសន្ធាប់ ដូច្នេះខ្ញុំចង់និយាយថា ក្រុមហ៊ុននៅកម្ពុជាគួរតែនាំគ្នាចាប់ផ្ដើមគិត និងធ្វើរឿងនេះ។ កិច្ចការទាំងនេះវាជារឿងមួយថ្មីសម្រាប់ប្រទេសកម្ពុជា ដោយសារតែយើងខ្វះការសិក្សាស្រាវជ្រាវនេះហើយទើបធ្វើឱ្យអាជីវកម្មរបស់យើងចេះតែបរាជ័យ៕

November 27, 2017

មន្ត្រីជាន់ខ្ពស់លើកទឹកចិត្តឱ្យប្រជាជនដាំដូងសម្រាប់លក់លើទីផ្សារ

ដូង ជាប្រភេទដំណាំកសិកម្មដែលងាយស្រួលដាំនិងមិនពិបាកថែទាំដូចដំណាំផ្សេងទៀតនោះទេ មិនតែប៉ុណ្ណោះវាក៏ផ្តល់នូវផលប្រយោជន៍ជាច្រើនដែលមិនគួរមើលរំលងទៀតផង។ឯកឧត្តម គង់ ចាន់ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងពិធីបើកវេទិកាសាធារណៈអំពីរបាយការណ៍ និងការសិក្សាស្រាវជ្រាវដំណាំដូង នៅប្រទេសកម្ពុជា នាសណ្ឋាគារកាំបូឌីយ៉ាណា កាលពីចុងសប្តាហ៍មុនថា នៅប្រទេសកម្ពុជា ដំណាំដូងនៅមិនទាន់មានការដាំដុះជាលក្ខណៈពាណិជ្ជកម្ម ឬឧស្សាហកម្មនៅឡើយទេ ដូច្នេះហើយទិន្នន័យដំណាំដូងក៏ពុំទាន់មានគ្រប់គ្រាន់ដែរ។ ឯកឧត្តម បានបន្តថា ផ្លែដូងខ្ចីបានផ្តល់ជាទឹកសម្រាប់បរិភោគ ចំពោះដូងទុំ វិញគេអាចទាញយកជាខ្ទិះ ដើម្បីយកទៅប្រើប្រាស់ជាអាហារ និងបង្អែម។ ជាទូទៅកសិករច្រើនដាំដូង ដោយមានគម្លាតពីគ្នា7.5×7.5ម៉ែត្រ ហើយជារួមក្នុង1ហិកតា មានដើមដូងសរុបចំនួន177 ដើម។ អាយុកាលរបស់ដើមដូង គឺចន្លោះពី40-50ឆ្នាំ ដោយវាផ្តល់ផលរយៈពេល4-7ឆ្នាំ បន្ទាប់ពីពេលដាំ។

តាមការអង្កេតដំណាំដូងនៅកម្ពុជា បានបង្ហាញថា នៅឆ្នាំ2010 ដើមដូងមានចំនួនសរុបប្រមាណ12លានដើម។ ដូងជាប្រភេទដំណាំហូបផ្លែ ដែលគេនិយមដាំនៅជុំវិញផ្ទះ ឬតាមវាលស្រែ ដោយគេគ្រាន់តែលើកដីឱ្យខ្ពស់ រួចដាំតែម្តង ដើម្បីចៀសវាងការជាំទឹកនៅរដូវវស្សា។នៅកម្ពុជាបច្ចុប្បន្ន ដូងខ្ចីអាចលក់នៅលើទីផ្សារក្នុងតម្លៃជាមធ្យម0.5-0.62ដុល្លារក្នុងមួយផ្លែ សម្រាប់ការលក់រាយ ហើយការលក់ដុំអាចមានតម្លៃពី0.42-0.5ដុល្លារក្នុងមួយផ្លែ។ជាទូទៅកសិករអាចលក់ដូងនៅលើទីផ្សារក្នុងស្រុក ឬលក់ទៅឱ្យឈ្មួញប្រមូលទិញ។

ក្នុងមួយហិកតា គេអាចដាំដូងបានចំនួន 177ដើម ហើយក្នុងមួយដើមអាចផ្តល់ផ្លែបានចំនួន60 ដោយ1ផ្លែលក់បាន0.42ដុល្លារ។ ដូចនេះកសិករបានទទួលបានប្រាក់ចំនួន 4,460ដុល្លារក្នុងមួយហិកតា សម្រាប់រយៈពេលមួយឆ្នាំ។ជាមួយគ្នានេះ លោក ង៉ ខេវិន តំណាងក្រុមហ៊ុន សោម៉ា គ្រុប មានប្រសាសន៍ថា នៅកម្ពុជាការដាំដូង នៅមិនទាន់មានលក្ខណៈកែច្នៃជាឧស្សាហកម្មរោងចក្រសម្រាប់នាំចេញទេ គឺមានតែការលក់ដូងស្រស់នៅលើទីផ្សារតែប៉ុណ្ណោះ។ ដោយមើលឃើញតម្រូវការផ្លែដូង លោកបានដាំដូងក្រអូបសម្រាប់ផ្គត់ផ្គង់នៅលើទីផ្សារ មកទល់បច្ចុប្បន្នមានចំនួន45,000ដើមនៅស្រុកបាទី ខេត្តតាកែវ និងខេត្តកំពត ដែលជាខេត្តជាប់ចំណាត់ថ្នាក់លេខ1 មានដូងច្រើនជាងគេ និងទឹកដូងមានរសជាតិផ្អែមឆ្ងាញ់ជាងគេ បើធៀបនឹងភូមិសាស្ត្រផ្សេងៗនៅកម្ពុជា។

លោក ចាន់ប្រាន នៀ នាយកវិទ្យាស្ថានសកលសម្រាប់អនាគត បាននិយាយថា ដោយមើលឃើញពីសក្តានុពលនៃទីតាំងភូមិសាស្ត្រ លោក ព្រមទាំងសមាជិកក្រុមដទៃទៀត មកពី14ប្រទេសក្នុងតំបន់អាស៊ី បានធ្វើការសិក្សាស្រាវជ្រាវរកឃើញថា ដំណាំដូងពិតជាមានសក្តានុពលនៅលើទីផ្សារ តែរហូតមកដល់ពេលនេះនៅមិនទាន់មានក្រុមហ៊ុនកែច្នៃផ្លែដូងទុំសម្រាប់នាំចេញទៅលក់នៅក្រៅប្រទេសនៅឡើយ។លោកអះអាងថា ការសិក្សាអំពីដូងនេះធ្វើឡើងបន្ទាប់ពីការសិក្សាស្រូវអង្កររួចមក។ ជាមួយគ្នានេះលោកលើកទឹកចិត្តដល់វិនិយោគិនទាំងក្នុងស្រុក និងក្រៅស្រុក គួរសហការជាមួយកសិករដាំដូងឱ្យបានច្រើន សម្រាប់កែច្នៃនាំចេញទៅលក់នៅលើទីផ្សារក្រៅប្រទេស៕

November 27, 2017

តម្លៃ និងតម្រូវការ បានធ្វើឱ្យការដាំដុះដំណាំស្វាយចន្ទីកើនឡើង

អ្នកដាំដំណាំស្វាយចន្ទី និងបណ្តុះកូនស្វាយចន្ទី លក់បានមើលឃើញនូវកំណើនដ៏ខ្ពស់ក្នុងការដាំដុះស្វាយចន្ទីឡើងវិញ បន្ទាប់ពីតម្លៃគ្រាប់ស្វាយចន្ទី បានហក់ឡើងយ៉ាងខ្ពស់នារយៈពេលប៉ុន្មានឆ្នាំចុងក្រោយនេះ។ទីប្រឹក្សាក្រសួងពាណិជ្ជកម្ម និងជាអ្នកចម្ការមួយរូប ឯកឧត្តម វ៉ា រុតសាន បាននិយាយថា ការដាំដុះស្វាយចន្ទី បានកើនឡើងយ៉ាងច្រើនក្នុងឆ្នាំនេះ ទាំងការដាំជាលក្ខណៈគ្រួសារ និងក្រុមហ៊ុន។ឯកឧត្តមបន្តថា មានមូលហេតុ ជាច្រើនដែលនាំឱ្យប្រជាជន ក៏ដូចជាក្រុមហ៊ុនមួយចំនួនងាកមកចាប់អារម្មណ៍ចំពោះការដាំដុះស្វាយចន្ទីឡើងវិញ។ ហេតុផលទាំងនោះមានដូចជា មានទីផ្សារនាំចេញល្អ ការលក់បានតម្លៃខ្ពស់ មានភាពងាយស្រួលក្នុងការថែទាំជាងដំណាំម្រេច ដាំតែម្តងអាចប្រមូលផលបានចន្លោះពី20-30ឆ្នាំ មិនពិបាកទុកដាក់ក្រោយពេលប្រមូលផល និងមានពូជ M-23 ដែលផ្តល់ផលខ្ពស់ និងគុណភាពគ្រាប់ល្អ។

ឯកឧត្តម វ៉ា រុតសាន បានបញ្ជាក់ថា តម្លៃគ្រាប់ស្វាយចន្ទី ក្នុងឆ្នាំ2017 នេះមានរហូតដល់2,350ដុល្លារ ក្នុងមួយតោន ដោយកើនឡើង500ដុល្លារក្នុងមួយតោន បើធៀបជាមួយតម្លៃកាលពីឆ្នាំ2016 ដែលមានតម្លៃត្រឹមតែ1,850ដុល្លារក្នុងមួយតោន។ កាលពីឆ្នាំ2015 តម្លៃគ្រាប់ស្វាយចន្ទីមានត្រឹមតែ1,550ដុល្លារប៉ុណ្ណោះក្នុងមួយតោន។បច្ចុប្បន្ននេះកម្ពុជាបានពឹងផ្អែកស្ទើរទាំងស្រុងទៅលើទីផ្សាររបស់ប្រទេសវៀតណាម ដោយសារប្រទេសវៀតណាម មានរោងចក្រកែច្នៃគ្រាប់ស្វាយចន្ទីច្រើន ប៉ុន្តែមិនមានផលិតកម្មស្វាយចន្ទីគ្រប់គ្រាន់សម្រាប់បំពេញតម្រូវការរបស់ខ្លួន។ឯកឧត្តម វ៉ា រុតសាន បានមានប្រសាសន៍ថា៖“វៀតណាម មានរោងចក្រកែច្នៃច្រើន ដោយត្រូវការប្រហែល1លានតោនក្នុងមួយឆ្នាំ ខណៈវៀតណាម អាចផលិតបានតែ30-40ម៉ឺនតោនប៉ុណ្ណោះក្នុងមួយឆ្នាំ ហេតុនេះគេត្រូវការនាំចូលពីប្រទេសកម្ពុជា និងពីតំបន់អាហ្វ្រិកបន្ថែម”។

លោក យីម សុខគង់ អ្នកបណ្តុះកូនស្វាយចន្ទីលក់នៅខេត្តត្បូងឃ្មុំ ដែលទើបតែចាប់ផ្តើមបណ្តុះកូនស្វាយចន្ទីលក់ក្នុងឆ្នាំ2017 នេះបានអះអាងថា លោកទើបតែងាកមកបណ្តុះកូនស្វាយចន្ទីលក់កាលពីខែមិថុនា ឆ្នាំ2017 នេះដោយមើលឃើញពីសន្ទុះនៃការពេញចិត្តក្នុងការដាំដុះ និងតម្លៃគ្រាប់ស្វាយចន្ទីហក់ឡើងខ្ពស់។ ក្នុងរយៈពេលជិតកន្លះឆ្នាំនេះ លោកលក់កូនស្វាយចន្ទីបានប្រមាណជាង1ម៉ឺនដើម។លោក សុខគង់ បាននិយាយថា៖“មានក្រុមហ៊ុនចិនមួយកុម្ម៉ង់ខ្ញុំរហូតដល់ទៅ20ម៉ឺនកូនសម្រាប់ដាំលើផ្ទៃដីជាង500ហិកតានៅខេត្តមណ្ឌលគិរី ប៉ុន្តែការផ្តល់តម្លៃរបស់គាត់នៅទាប ដូច្នេះខ្ញុំមិនទាន់យល់ព្រមសម្រាប់ផលិតឱ្យគាត់ទេ”។លោក បានអះអាងថា តម្លៃគ្រាប់ស្វាយចន្ទីបានហក់ឡើង និងរក្សាលំនឹងបានយ៉ាងល្អ លើសពីនេះទីផ្សារគ្រាប់ស្វាយចន្ទីមិនដែលខ្វះនោះទេ។

លោកនិយាយថា៖“ខ្ញុំយល់ថាសន្ទុះនៃការដាំដុះនឹងមិនថយចុះទេ ព្រោះគ្រាប់ស្វាយចន្ទីមានតម្រូវការខ្ពស់នៅទីផ្សារអន្តរជាតិ ដូចជាថ្មីៗនេះប្រទេសកូរ៉េ ក៏ចង់នាំចេញគ្រាប់ស្វាយចន្ទីពីកម្ពុជាដែរ”។កាលពីថ្ងៃទី20 ខែកុម្ភៈ ឆ្នាំ2017 លោក YoungKyu M00N ប្រធានក្រុមហ៊ុន Hwashin Construction Co., LTD នៃសាធារណរដ្ឋកូរ៉េ និងតំណាងក្រុមហ៊ុន M0C 101 កម្ពុជាបានជួបពិភាក្សាការងារជាមួយ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីលើកទឹកចិត្តដល់កិច្ចសហការរវាងក្រុមហ៊ុនទាំងពីរលើគម្រោងវិនិយោគប្រមូលនិងនាំចេញគ្រាប់ស្វាយចន្ទីនាពេលអនាគត។នាពេលកន្លងមក ឯកឧត្តម វេង សាខុន ក៏ធ្លាប់បានដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទ ទៅបំពេញទស្សនកិច្ចនៅរោងចក្រកែច្នៃគ្រាប់ស្វាយចន្ទី របស់ក្រុមហ៊ុន Dan On Food Corporation នៅខេត្តបិញឌួង ប្រទេសវៀតណាម ដោយក្រុមហ៊ុនកែច្នៃគ្រាប់ស្វាយចន្ទីនេះបាននិងកំពុងគាំទ្រ និងប្រមូលទិញគ្រាប់ស្វាយចន្ទីពីកម្ពុជាជាបន្តបន្ទាប់។ ក្រុមហ៊ុននេះ មានសមត្ថភាពកែច្នៃ វិចខ្ចប់ និងនាំចេញទៅកាន់បណ្តាប្រទេសជាង10លើពិភពលោក ក្នុងបរិមាណប្រហែល8,000តោនក្នុងមួយឆ្នាំ។

ឯកសារក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា កម្ពុជាគឺជាប្រទេសមួយដែលមានសក្ដានុពលខ្ពស់លើផលិតកម្មគ្រាប់ស្វាយចន្ទី ហើយស្វាយចន្ទី គឺជាដំណាំផ្ដល់អត្ថប្រយោជន៍យ៉ាងច្រើន។ក្រៅពីសាច់ និងគ្រាប់ដែលគេយកទៅបកសម្បកហើយលីងសម្រាប់ធ្វើម្ហូបអាហារផ្សេងៗនោះ ផ្លែរបស់វា គេអាចយកទៅកែច្នៃធ្វើជាអាហារបានច្រើនថែមទៀតផង ដូចជា ទឹកផ្លែឈើ ដំណាប់ ទឹកខ្មេះ និងទទួលទានផ្ទាល់តែម្ដងក៏បាន។តំបន់សំខាន់ៗដែលផលិតស្វាយចន្ទី និងដាំដុះស្វាយចន្ទីនៅក្នុងកម្ពុជា គឺស្ថិតនៅតាមបណ្ដាខេត្តមួយចំនួន ដូចជា ខេត្តកំពង់ចាម រតនគិរី មណ្ឌលគិរី ក្រចេះ កំពង់ធំ កំពត កោះកុង និងខេត្តកំពង់ស្ពឺ ជាដើម៕

November 27, 2017

ការព្យាករ ៖ សេដ្ឋកិច្ចកម្ពុជានឹងមានល្បឿនថយចុះជាងឆ្នាំចាស់

ភ្នំពេញ៖ ទោះបីជាមានការអះអាងអំពីស្ថេរភាពនៃកំណើនសេដ្ឋកិច្ចកម្ពុជានៅរយៈពេលជិត2ទសវត្សរ៍ចុងក្រោយនេះក៏ដោយ ក៏ប៉ុន្តែបើតាមការព្យាកររបស់ធនាគារពិភពលោកបានបង្ហាញថា ឆ្នាំ2017នេះកំណើនសេដ្ឋកិច្ចកម្ពុជានឹងថយចុះមកនៅត្រឹម 6.8% ប៉ុណ្ណោះ។

របាយការណ៍បានលើកឡើងថា ការធ្លាក់ចុះនៃល្បឿនសេដ្ឋកិច្ចកម្ពុជាសម្រាប់ឆ្នាំ2017នេះ គឺដោយសារការថយចុះនូវការនាំចេញសម្លៀកបំពាក់ ការថមថយល្បឿននៃវិស័យសំណង់ នៅក្នុងរាជធានីភ្នំពេញ និងនៅតាមទីប្រជុំជនមួយចំនួន។

ទោះជាដូច្នេះក្តី យោងតាមរបាយការណ៍ស្តីពីបច្ចុប្បន្នភាពបានលើកឡើងថា សេដ្ឋកិច្ចកម្ពុជាបានបោះជំហានឡើងខ្សែចង្វាក់តម្លៃក្នុងវិស័យកម្មន្តសាលដែលបានចេញផ្សាយនៅចុងខែវិច្ឆិកានេះថា កំណើនសេដ្ឋកិច្ចកម្ពុជាឆ្នាំ2018នឹងកើនឡើងដល់6,9ភាគរយធៀបនឹងឆ្នាំនេះ។ របាយការណ៍ដដែលបានលើកឡើងថា ទោះបីជាមានការថយចុះនូវការនាំចេញសម្លៀកបំពាក់ក្តី ប៉ុន្តែវិស័យនាំចេញរបស់កម្ពុជាបានប៉ះប៉ូវមកវិញដោយការនាំចេញម៉ាស៊ីន ឧបករណ៍ គ្រឿងបន្លាស់អេឡិចត្រូនិក និងគ្រឿងបន្លាស់រថយន្តដែលទើបលេចចេញជារូបរាងកាលពីពេលថ្មីៗនេះ។

ជាមួយគ្នានេះ ដោយសារកិច្ចខិតខំប្រឹងប្រែងទាក់ទាញទេសចរពីអាជ្ញាធរ វិស័យនេះហាក់បីដូចជាមានលទ្ធផលល្អ ដោយមានការងើបឡើងវិញនូវចំនួនភ្ញៀវទេសចរអន្តរជាតិដែលជាផ្នែកមួយនៃការជួបទប់ស្កាត់ការធ្លាក់ចុះនៃកំណើនសេដ្ឋកិច្ច ជាក់ស្តែងគិតត្រឹមរយៈពេល9ខែ នៃឆ្នាំ2017 កម្ពុជាទទួលបានទេសចរអន្តរជាតិចំនួន3,912,761នាក់ ក្នុងកំណើន11.5% ដោយបាននាំមកនូវប្រាក់ចំណូលប្រមាណ3,400លានដុល្លារ បង្កើតឱកាសការងារដោយផ្ទាល់ប្រមាណជាង62ម៉ឺននាក់ និងដោយប្រយោលរាប់សិបម៉ឺននាក់បន្ថែមទៀត ដោយក្នុងនោះពលកម្មជាស្ត្រីមានប្រមាណ 60%។

របាយការណ៍របស់ធនាគារពិភពលោកបានរកឃើញផងដែរថា កំណើនសេដ្ឋកិច្ចកម្ពុជារឹងមាំនៅឆ្នាំ2018 គឺជំរុញដោយការធ្វើពិពិធកម្មនៃការនាំចេញ គាំទ្រដោយការហូរចូលនៃការវិនិយោគផ្ទាល់ពីបរទេស និងភាពប្រសើរឡើងនៃទស្សនវិស័យពិភពលោក៕

November 27, 2017

មន្ត្រីជំនាញចិន នឹងមកបណ្តុះបណ្តាលជំនាញសហជីពកម្ពុជានៅដើមឆ្នាំក្រោយ

ភ្នំពេញ៖ ក្នុងការផ្លាស់ប្តូរក៏ដូចជាពង្រឹងចំណេះដឹង និងជំនាញដល់កម្ពុជា មន្ត្រីជាន់ខ្ពស់ទទួលបន្ទុកផ្នែកជំនាញធនធានមនុស្ស និងពលករចិននឹងមកកម្ពុជាដើម្បីរៀបចំបើកវគ្គបណ្តុះបណ្តាលដល់បណ្តាសហជីពនៅកម្ពុជានាដើមឆ្នាំក្រោយនេះដើម្បីពង្រឹងឱ្យពួកគេកាន់តែមានចំណះដឹងក្នុងការបំពេញការងាររបស់ខ្លួន។

ឯកឧត្តម ប៉េង យ៉ុង អគ្គនាយកមជ្ឈមណ្ឌលធនធានមនុស្ស និងពលករចិនដើម្បីកិច្ចសហប្រតិបត្តិការអន្តរជាតិមានប្រសាសន៍ថា តបតាមការស្នើសុំរបស់សម្ព័ន្ធសហជីពជាតិកម្ពុជា លោកនឹងដឹកនាំមន្ត្រីជំនាញមកធ្វើការបណ្តុះបណ្តាល កសាងសមត្ថភាពដល់សហជីពកម្ពុជាឱ្យកាន់តែប្រសើរឡើង ដែលគម្រោងនេះនឹងចាប់ផ្តើមនៅឆ្នាំក្រោយ ដែលជាផ្នែកមួយក្នុងការគាំទ្រចំពោះការពង្រឹងធនធានមនុស្ស និងការកសាងសមត្ថភាពដល់សហជីពក្នុងវិស័យការងារនៅកម្ពុជា។

ឯកឧត្តម ប៉េង យ៉ុង បន្ថែមថា មិនត្រឹមតែប៉ុណ្ណោះ គម្រោងបណ្តុះបណ្តាលនេះគឺជាកិច្ចសហប្រតិបត្តិការ និងជាផ្លូវមួយជំរុញដល់អ្នកវិនិយោគចិនឱ្យមកកម្ពុជាកាន់តែច្រើនឡើងបន្ថែមទៀតផងដែរ។ ឯកឧត្តមបញ្ជាក់ថា «បច្ចុប្បន្នមានអ្នកវិនិយោគចិន និងនិយោជិតជាច្រើនបានមកវិនិយោគ និងធ្វើការនៅកម្ពុជា ដូច្នេះកិច្ចសហប្រតិបត្តិការនេះ និងជំរុញផងដែរឱ្យអ្នកវិនិយោគ និងនិយោជិតទាំងនោះគោរពទៅតាមលក្ខខណ្ឌ និងច្បាប់ការងាររបស់កម្ពុជា»។

ជាមួយគ្នានេះឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានសម្តែងការសាទរ និងស្វាគមន៍ចំពោះភាគីចិនដែលបានគាំទ្រកម្ពុជាចំពោះកិច្ចការអភិវឌ្ឍន៍ ពិសេសផ្តល់ការគាំទ្រចំពោះតម្លៃនៃសន្តិភាព និងសេរីភាព។ ហើយវត្តមានរបស់ឯកឧត្តម ប៉េង យ៉ុង នៅកម្ពុជានាពេលនេះ គឺជាកិច្ចសហប្រតិបត្តិការមួយថ្មីទៀតក្នុងការជួយរួមចំណែកអភិវឌ្ឍលើវិស័យការងារនៅម្ពុជាឱ្យកាន់តែល្អប្រសើរឡើង ពិសេសទាក់ទងនឹងការបណ្តុះបណ្តាលធនធានមនុស្ស និងកសាងសមត្ថភាពដល់សហជីពកម្ពុជា។

ឯកឧត្តមបញ្ជាក់ថា«ផែនការនេះវាមិនត្រឹមតែបានពង្រឹងបន្ថែមនូវកិច្ចទំនាក់ទំនងរវាងប្រទេសទាំងពីរឱ្យកាន់តែល្អឡើងប៉ុណ្ណោះទេ តែវាបានជួយពង្រឹងដល់វិស័យការងារនៅកម្ពុជា ដើម្បីអភិវឌ្ឍសេដ្ឋកិច្ចឱ្យកាន់តែរីកចម្រើនជាងនេះបន្ថែមទៀតផង»៕

November 27, 2017

ការនាំចូលគ្រឿងយន្តកសិកម្មទទួលបានការកែសម្រួលនៅតាមមាត់ច្រក

អគ្គនាយកដ្ឋានគយ និងរដ្ឋាករកម្ពុជា បានតម្រូវឱ្យការបំពេញបែបបទនាំចូលគ្រឿងយន្តកសិកម្ម អាចធ្វើបាននៅតាមមាត់ច្រកនាំចូលតែម្តង ដោយអគ្គនាយកដ្ឋាន បានចាត់ទុកទង្វើនេះថាជាផ្នែកមួយនៃការជួយលើកទឹកចិត្តសម្រាប់អ្នកប្រកបរបរកសិកម្ម។

យោងតាមលិខិតរបស់អគ្គនាយកដ្ឋានគយ និងរដ្ឋាករ ចុះថ្ងៃទី20 ខែវិច្ឆិកា ឆ្នាំ2017 ឯកឧត្តម គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានណែនាំចំនួនពីរចំណុចសម្រាប់ការនាំចូលគ្រឿងយន្តកសិកម្ម ពិសេសត្រាក់ទ័រចូលមកកាន់ទីផ្សារកម្ពុជា។ ចំណុចទាំង2នោះ រួមមាន ទី1 មុខទំនិញត្រាក់ទ័រ និងគ្រឿងចក្រកសិកម្មគ្រប់ប្រភេទនាំចូល ដែលជាប់អត្រាពន្ធគយ0% ឬពន្ធអាករជាបន្ទុករបស់រដ្ឋ ត្រូវបានលើកលែងការផ្ទៀងផ្ទាត់តម្លៃគិតពន្ធគយ ដោយអាចធ្វើការបំពេញបែបបទគយនៅអង្គភាពគយ និងរដ្ឋាករតាមមាត់ច្រកនាំចូលតែម្តង តាមបទប្បញ្ញត្តិជាធរមាន និងចំណុចទី2 ចែងថា ឧបករណ៍បរិក្ខាសម្រាប់បំពាក់ជាមួយត្រាក់ទ័រ ទាំងផ្នែកខាងមុខ និងផ្នែកខាងក្រោយ ដែលពុំទទួលបានការលើកទឹកចិត្តពន្ធអាករ ជាបន្ទុករបស់រដ្ឋ លើការនាំចូល អាចធ្វើការផ្ទៀងផ្ទាត់ តម្លៃគិតពន្ធគយក្នុងក្របខណ្ឌវិមជ្ឈការ។

ឯកឧត្តម គុណ ញឹម បានចាត់ទុកការធ្វើបែបនេះ គឺជាការចូលរួមចំណែកលើកទឹកចិត្តដល់វិស័យកសិកម្ម តាមរយៈការធ្វើសាមញ្ញកម្មនីតិវិធីគយ។ក្រសួងសេដ្ឋកិច្ច និងហិរញ្ញវត្ថុ ហាក់បាននិងកំពុងបង្វែរសកម្មភាពយ៉ាងច្រើនដើម្បីជួយលើកស្ទួយវិស័យកសិកម្មនាពេលចុងក្រោយនេះ បន្ទាប់ពីកម្លាំងពលកម្មក្នុងវិស័យកសិកម្មបានធ្លាក់ចុះយ៉ាងគំហុកក្នុងរយៈពេលតែប៉ុន្មានឆ្នាំប៉ុណ្ណោះ។យោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ ការប្រើប្រាស់គ្រឿងយន្តក្នុងវិស័យកសិកម្មមានស្ទើរតែ100%ទៅហើយក្នុងឆ្នាំ2017 នេះ ខណៈពេលដែលធនធានមនុស្សបម្រើការងារក្នុងវិស័យកសិកម្ម បានធ្លាក់ចុះមកនៅក្រោម50%។កាលពីឆ្នាំ2013 ការភ្ជួររាស់ស្រែចម្ការដោយសត្វពាហនៈមានចំនួន0.96លានហិកតា ស្មើនឹង30% ខណៈការភ្ជួររាស់ដោយប្រើប្រាស់ត្រាក់ទ័រ-គោយន្ត មានចំនួន2.31លានហិកតា ស្មើនឹង70%ប៉ុន្តែទិន្នន័យឆ្នាំ2016 បង្ហាញថា ការភ្ជូររាស់ស្រែចម្ការដោយប្រើប្រាស់គ្រឿងម៉ាស៊ីន បានគ្របដណ្តប់ស្ទើរតែ100%ទៅហើយ។ប្រទេសកម្ពុជាបាននាំចូលគ្រឿងយន្តកសិកម្មជាច្រើនពីប្រទេសថៃ សហរដ្ឋអាមេរិក និង ប្រទេស
អូស្រ្តាលី ជាដើម៕

November 27, 2017

Category: សង្គម និងសេដ្ឋកិច្ច