Category: សង្គម និងសេដ្ឋកិច្ច

ប្រទេសសមាជិកថ្នាក់តំបន់ជំរុញឱ្យមានការបង្កើតទីផ្សាររួមគ្នាមួយ
ភ្នំពេញ៖ ថ្នាក់ដឹកនាំប្រទេសជាសមាជិកថ្នាក់តំបន់អាស៊ី-ប៉ាស៊ីហ្វិក បានរួមគ្នាធ្វើសន្និសីទថ្នាក់រដ្ឋមន្ត្រីនៅក្នុងទីក្រុងបាងកក ប្រទេសថៃ ដែលសហការរៀបចំដោយគណៈកម្មការសេដ្ឋកិច្ច និងសង្គមសម្រាប់តំបន់អាស៊ី-ប៉ាស៊ីហ្វិករបស់អង្គការសហប្រជាជាតិ (UNESCAP) ជាមួយធនាគារអភិវឌ្ឍន៍អាស៊ី (ADB) ដើម្បីជំរុញឱ្យមានការបង្កើតទីផ្សាររួមគ្នាមួយឱ្យឆាប់រហ័សក្នុងគោលដៅធ្វើកិច្ចសហប្រតិបត្តិការសេដ្ឋកិច្ចប្រកបដោយចីរភាព។
សន្និសីទថ្នាក់រដ្ឋមន្ត្រីលើកទី2នេះធ្វើឡើងដោយមានបំណងស្វែងយល់ពីវឌ្ឍនភាពរបស់ប្រទេសជាសមាជិក សម្រាប់ការអនុវត្តកិច្ចសហប្រតិបត្តិការសេដ្ឋកិច្ច និងការធ្វើសមាហរណកម្មនៅក្នុងតំបន់អាស៊ី និងប៉ាស៊ីហ្វិក (Regional Economic Cooperation and Integration – RECI) ដូចមានកំណត់នៅក្នុងសេចក្តីថ្លែងការណ៍ទីក្រុងបាងកក(Bangkok Declaration) ដែលត្រូវបានអនុម័តនាអំឡុងពេលសន្និសីទរដ្ឋមន្ត្រីកាលពីលើកទី1។
សូមរំឭកថា សេចក្តីថ្លែងការណ៍ទីក្រុងបាងកកបានអំពាវនាវឱ្យ UNESCAP បន្តអនុវត្ត RECI ដោយផ្តោតលើវិស័យសំខាន់ៗចំនួន4 រួមមាន ៖
1.ការឆ្ពោះទៅរកការបង្កើតទីផ្សាររួមគ្នា
2.ការអភិវឌ្ឍការតភា្ជប់គ្នានៅទូទាំងតំបន់សម្រាប់វិស័យដឹកជញ្ជូន ថាមពល ព័ត៌មាន និងបច្ចេកវិទ្យាគមនាគមន៍
3.ការបង្កើនកិច្ចសហប្រតិបត្តិការហិរញ្ញវត្ថុ
និង4.ការបង្កើនកិច្ចសហប្រតិបត្តិការសេដ្ឋកិច្ច និងបច្ចេកទេសដើម្បីដោះស្រាយភាពងាយរងគ្រោះ និងហានិភ័យរួម ដោយវិស័យទាំង4នេះនឹងរួមចំណែកយ៉ាងសំខាន់ដល់ការអនុវត្ត របៀបវារៈ 2030 ស្តីពីការអភិវឌ្ឍប្រកបដោយចីរភាពផងដែរ។
លោកជំទាវ តឹករ៉េត កំរង រដ្ឋលេខាធិការ និងជាតំណាងរដ្ឋមន្ត្រីក្រសួងពាណិជ្ជកម្មបានលើកឡើងអំពីវឌ្ឍនភាពការងារនៅក្នុងវិស័យទាំង4ខាងលើ ដែលប្រទេសនីមួយៗសម្រេចបាននាពេលកន្លងមក អំពីបញ្ហាប្រឈម និងទស្សនវិស័យលើការបង្កើនការអនុវត្ត RECI ដើម្បីឱ្យលេខាធិការដ្ឋានដាក់បញ្ចូលទៅក្នុងសេចក្ដីព្រាងសេចក្តីថ្លែងការណ៍បន្ទាប់។ ជាលទ្ធផល អង្គសន្និសីទថ្នាក់រដ្ឋមន្ត្រីលើកទី2នេះបានអនុម័តលើសេចក្ដីព្រាងសេចក្តីថ្លែងការណ៍ស្តីពីការពង្រឹងកិច្ចសហប្រតិបត្តិការសេដ្ឋកិច្ច និងការធ្វើសមាហរណកម្មនៅក្នុងតំបន់ដើម្បីគាំទ្រដល់ការអនុវត្តរបៀបវារៈឆ្នាំ2030 សម្រាប់តំបន់អាស៊ី និងប៉ាស៊ីហ្វិក។
សន្និសីទនេះក៏បានលើកឡើងផងដែរអំពីគំនិតផ្តួចផ្តើម ខ្សែក្រវាត់ និងផ្លូវ (High-level side event on the Belt and Road Initiative) ដែលសហការរៀបចំឡើងដោយ ESCAP និងប្រទេសចិនក្នុងដំណើរការតភ្ជាប់តំបន់ ទ្រទ្រង់កំណើនសេដ្ឋកិច្ច និងកាត់បន្ថយភាពក្រីក្រនៅកម្ពុជាក៏ដូចជានៅទូទាំងតំបន់ផងដែរ៕
November 29, 2017
អតីតសមាជិកចម្រៀង SNSD នាង Taeyeon បានជួបគ្រោះថ្នាក់ចរាចរណ៍យ៉ាងរន្ធត់
តាមរយៈការចេញផ្សាយរបស់គេហទំព័រព័ត៌មាន Kenh 14 ដែលបានចេញផ្សាយនៅថ្ងៃទី29 ខែវិច្ឆិកា ឆ្នាំ2017 មុននេះបន្ដិចបានឱ្យដឹងថា នាថ្ងៃទី28 ម្សិលមិញនេះ តារាស្រីល្បីឈ្មោះ Taeyeon ដែលជាអតីតសមាជិកក្រុមចម្រៀង SNSD បានជួបប្រទះគ្រោះថ្នាក់ចរាចរណ៍យ៉ាងរន្ធត់មួយ ខណៈដែលនាងបានបើករថយន្តចេញពីកម្មវិធីប្រគំតន្រ្តីមួយនៅម្ដុំតំបន់ Gangnam ក្នុងទីក្រុងសេអ៊ូល ប្រទេសកូរ៉េ។
បើតាមសារព័ត៌មានកូរ៉េមួយនេះបានអះអាងថា នាង Taeyeon បានបើករថយន្ដប្រណីតម៉ាក Mercedes Benz របស់នាងនៅលើផ្លូវល្បឿនលឿនទី 3 ដោយល្បឿនលឿនហើយក៏បានជ្រុលទៅបុករថយន្ដ Taxi មួយគ្រឿងពីក្រោយយ៉ាងពេញទំហឹង បណ្ដាលឱ្យរថយន្តតាក់ស៊ីនោះរងការខូចខាតផ្នែកខាងក្រោយយ៉ាងដំណំ ហើយភ្លាមៗនោះ រថយន្តតាក់ស៊ីនោះក៏បានជ្រុលទៅបុករថយន្ដនៅខាងមុខ 3 គ្រឿងបន្ដទៀតដែរ។ ក្រោយកើតហេតុភ្លាមៗ តារាស្រីរូបនេះត្រូវបានបញ្ជូនទៅកាន់មន្ទីរពេទ្យយ៉ាងបន្ទាន់តាមរយៈរថយន្ដសង្គ្រោះនៅវេលាម៉ោង 8 និង10 នាទីយប់ ។
គួរបញ្ជាក់ផងដែរថា អ្នកបើករថយន្ដតាក់ស៊ី និងអ្នកដំណើរ 2នាក់ទៀតក៏បានរងរបួសធ្ងន់ ហើយត្រូវបានបញ្ជូនទៅមន្ទីរពេទ្យដូចគ្នាដែរ៕

November 29, 2017
Young ជួយឲ្យ Man Utd កាត់ពិន្ទុតាមពីក្រោយ ខណៈ Spurs ជួបការខកចិត្ត
ក្រុម Manchester United បានកាត់បន្ថយពិន្ទុនាំមុខរបស់ក្រុម Manchester City នៅលើកំពូលតារាងនៃក្របខ័ណ្ឌ Premier League ឲ្យនៅមកត្រឹម5ពិន្ទុ ខណៈដែលខ្សែបម្រើ Ashley Young បានធ្វើឲ្យពួកគេទទួលជ័យជម្នះ 4-2 លើក្រុម Watford ខណៈដែលក្តីសង្ឃឹមនៃការប្រជែងពានរបស់ក្រុម Tottenham បានជួបការខកចិត្តធំតាមរយៈការចាញ់ក្នុងលទ្ធផល 2-1 នៅលើទឹកដីក្រុម Leicester កាលពីថ្ងៃអង្គារ។
គ្រាប់បាល់បញ្ចូលទីជាលើកទី1របស់ Young សម្រាប់ក្រុម Man United ចាប់តាំងពីខែឧសភា ឆ្នាំ2016 បានកើតឡើងនៅមុនពេលមានគ្រាប់បាល់1គ្រាប់ពីខ្សែប្រយុទ្ធ Anthony Martial ខណៈដែលក្រុមបិសាចក្រហមមួយនេះបានបង្ហាញពីទម្រង់លេងយ៉ាងល្អក្នុងតង់ទី1នាកីឡដ្ឋាន Vicarage Road។ ការទទួលជ័យជម្នះក្នុងការប្រកួតលីកជាលើកទី3ជាប់ៗគ្នារបស់ក្រុម Man United ត្រូវបានធ្វើឲ្យមានសុវត្ថិភាព។
នៅពេលជិតបញ្ចប់ការប្រកួត ខណៈដែល Troy Deeney និង Abdoulaye Doucoure បានរកគ្រាប់បាល់វាយបកវិញសម្រាប់ក្រុមម្ចាស់ផ្ទះ មុនពេល Jesse Lingard បានបណ្តើរបាល់ដាច់តែម្នាក់ឯងហើយស៊ុតបញ្ចូលទីយ៉ាងល្អ។ បើទោះបីក្រុម Man United បានកាត់បន្ថយពិន្ទុដេញតាមក្រោយក្រុម Man City ក៏ដោយ ប៉ុន្តែក្រុមរបស់លោក Pep Guardiola ដែលកំពុងតែសម្លឹងរកការទទួលជ័យជម្នះក្នុងការប្រកួតលីកជាលើកទី12ជាប់ៗគ្នារបស់ពួកគេនោះ អាចនឹងរក្សាការនាំមុខ8ពិន្ទុវិញ នៅពេលដែលពួកគេធ្វើជាម្ចាស់ផ្ទះទទួលក្រុម Southampton នៅរាត្រីនេះ។
ចំណែកនៅឯកីឡដ្ឋាន King Power ឯនោះវិញ ក្រុម Tottenham បានភ្លាត់ស្នៀត និងរងបរាជ័យដ៏គួរឱ្យខកចិត្តមួយ ដែលធ្វើឲ្យពួកគេបានកត់ត្រាជ័យជម្នះត្រឹមតែ1លើកគត់ក្នុងចំណោមការប្រកួតក្របខ័ណ្ឌលីក5លើកចុងក្រោយរបស់ពួកគេ៕
ប្រភពពី៖ The Straits Times
November 29, 2017
នារីម្នាក់និយាយពីរឿងស្នេហា 6 ឆ្នាំ របស់ខ្លួនចំពោះ អាឡិច ហ្សូរ៉ា
កាលពីពេលថ្មីៗនេះ នៅលើបណ្ដាញទំនាក់ទំនងសង្គមហ្វេសប៊ុក ស្រាប់តែមាននារីម្នាក់ដែលមានឈ្មោះថា Yaya Saya បានបង្ហោះសាររៀបរាប់អំពីសេចក្ដីស្រឡាញ់របស់នាងចំពោះតារាសម្ដែងប្រុស អាឡិច ហ្សូរ៉ា យ៉ាងក្បោះក្បាយ។ មិនតែប៉ុណ្ណោះ នាងថែមទាំងបានបញ្ជាក់ប្រាប់មហាជនផងដែរថា នាងពិតជាមានចិត្តស្រឡាញ់តារាប្រុសរូបនេះ អស់រយៈពេល6 ឆ្នាំមកហើយ តែជាអកុសល នាងបានត្រឹមតែលាក់ទុកនៅក្នុងចិត្តតែប៉ុណ្ណោះ។
នារីវ័យក្មេងរូបនេះ បានសរសេរសារនៅលើហ្វេសប៊ុកយ៉ាងដូច្នោះថា «ស្រឡាញ់បង មិនដែលគិតថាបងស្អាតយ៉ាងណា មានប៉ុនណា ឡូយប៉ុនណា តែចិត្តដែលស្រឡាញ់បងមកជិត6ឆ្នាំនេះ គឺគិតតែម្យ៉ាងគត់ថា បងជាមនុស្សល្អ មិនចង់បានអ្វី ចង់ត្រឹមតែឃើញបងជាមនុស្សម្នាក់មានចរិតល្អ សប្បាយចិត្តពេលឃើញបងជោគជ័យ ទោះមុខបងអាក្រក់យ៉ាងណា ក្រយ៉ាងណា ក៏ភ្នែកនេះមើលឃើញបងសង្ហាដដែល Love U Forever B Alexora John »។
បើ៍ទោះបីជាមានគេបកស្រាយថា នាងគ្រាន់តែបង្ហាញពីទឹកចិត្តស្រឡាញ់បែបបងប្អូនយ៉ាងណាក្ដី ក៏ប៉ុន្ដែមានមហាជនជាច្រើន ដែលគេបានគិតចំពោះតារាប្រុសរូបនេះថា លោកពិតជាមានទំនាក់ទំនងស្នេហាជាមួយនាងហើយ បានជានារីម្នាក់បង្ហើបប្រាប់ថា “ស្រឡាញ់បង” ដល់ទៅ 6 ឆ្នាំបែបនេះ។
គួរបញ្ជាក់ឱ្យដឹងផងដែរថា មួយរយៈពេលថ្មីៗនេះ ត្រូវបានគេសង្កេតឃើញថា តារាប្រុស អាឡិច ហ្សូរ៉ា គឺមានភាពជិតស្និទ្ធ និងមើលទៅផ្អែមល្ហែមខ្លាំងបំផុតជាមួយ កញ្ញា ឌី សូនីតា តែម្នាក់ប៉ុណ្ណោះ៕
November 28, 2017
អាមេរិក ហាមបុគ្គលិកសេតវិមាន ប្រើប្រាស់ទូរស័ព្ទដៃផ្ទាល់ខ្លួន
អាមេរិក៖ យោងតាមការចេញផ្សាយរបស់សារព័ត៌មាន Bloomberg បានឲ្យដឹងថា នៅពេលនេះ សេតវិមាន របស់សហរដ្ឋអាមេរិក បានគ្រោងចេញច្បាប់ថ្មី ហាមបុគ្គលិកបម្រើការងារនៅក្នុងសេតវិមានទាំងអស់ប្រើប្រាស់ទូរស័ព្ទផ្ទាល់ខ្លួន ដែលបម្រាមថ្មីនេះ ត្រូវបានធ្វើឡើងបន្ទាប់ពីមានសេចក្ដីព្រួយបារម្ភ និងខ្លាំងបែកធ្លាយការណ៍សម្ងាត់របស់សេតវិមានទៅដល់ស្ថាប័ន្ធព័ត៌មាន ឬរដ្ឋាភិបាលផ្សេង។
ប្រភពដដែលបានបន្តទៀតថា ការចេញច្បាប់ថ្មីនេះ ប្រហែលជាត្រូវប៉ះពាល់ដល់ការទំនាក់ទំនងរបស់បុគ្គលិកសេតវិមាន ជាមួយនឹងគ្រួសារ ជាពិសេសគឺការទំនាក់ទំនងផ្ទាល់ខ្លួន ប៉ុន្តែដើម្បីសន្តិសុខ និងសុវត្ថិភាពជាតិ ត្រូវតែអនុញ្ញាត ជាក់ស្ដែងដូចកាលពីដើមឆ្នាំនេះ ទូរស័ព្ទដៃផ្ទាល់ខ្លួនរបស់លោក John Kelly ប្រធានបុគ្គលិកប្រចាំសេតវិមាន ត្រូវបានក្រុមអាណាមិកលួយវាយប្រហារ ដើម្បីស្វែងរកទិន្នន័យផ្សេង ហើយបើតាមការបញ្ជាក់បន្ថែម គឺមិនមែនមានតែទូរស័ព្ទរបស់លោក John Kelly មួយទៀតដែលទទួលរងការវាយប្រហារនោះ។
បើតាមព័ត៌មានផ្ទៃក្នុងបានឲ្យដឹងថា បុគ្គលិកជាន់ខ្ពស់ដែលបម្រើការងារនៅសេតវិមាន ភាគច្រើនគឺប្រើប្រាស់ទូរស័ព្ទ Blackberry ជាពិសេសគឺប្រធានាធិបតីសហរដ្ឋអាមេរិកតែម្ដង ព្រោះសេតវិមាន និង FBI ព្រមទាំងក្រុមហ៊ុន RIM បានបញ្ជាក់ថា ដើម្បីសុវត្ថិភាពត្រូវប្រើទូរស័ព្ទ Blackberry៕
November 28, 2017
លោកឪពុករបស់កុមាររើសសំរាមនៅស្ទឹងមានជ័យទទួលសញ្ញាបត្រកិត្តិយសផ្នែកសង្គមកិច្ច
ផ្តើមចេញពីផលិតករនៃផលិតកម្ម Hollywood ដ៏ល្បីល្បាញ លោក Scott Neeson បានមកដល់ប្រទេសកម្ពុជានៅឆ្នាំ 2004 ដើម្បីជួយសង្គ្រោះកុមាររើសសំរាមជាច្រើននៅស្ទឹងមានជ័យឱ្យទទួលបានការអប់រំ និងការរស់នៅប្រកបដោយគុណតម្លៃនៅក្នុងសង្គម។
លោក Scott Nesson ដែលជាស្ថាបនិក និងជានាយកប្រតិបត្តិនៃអង្គការមូលនិធិកុមារកម្ពុជា (CCF) បានទទួលនូវសមិទ្ធផលថ្មីមួយទៀតគឺ បណ្ឌិតកិត្តិយសផ្នែកសង្គមកិច្ចពីសាកលវិទ្យាល័យសុខាភិបាល និងវិទ្យាសាស្ត្រសង្គម St. Elizabeth។ នៅប្រទេសកម្ពុជា បន្ទាប់ពីព្រះករុណាព្រះបាទសម្ដេចព្រះបរមនាថ នរោត្តមសីហមុនី លោកគឺជាបុគ្គលទី2 ដែលទទួលបានសញ្ញាបត្រកិត្តិយសនេះក្នុងប្រវត្តិសាស្ត្រនៃសាកលវិទ្យាល័យស្លូវ៉ាគី។
ថ្លែងនៅក្នុងថ្ងៃប្រគល់សញ្ញាបត្របណ្ឌិតកិត្តិយសជូនលោក Scott Neeson លោកសាស្ត្រាចារ្យបណ្ឌិត Vladirmir Krchmery ស្ថាបនិក និងជាសាកលវិទ្យាធិការនៃសាកលវិទ្យាល័យ St. Elizabeth បានមានប្រសាសន៍ថា គោលបំណងនៃសាកលវិទ្យាល័យរបស់លោកគឺ ផ្តល់ជំនួយមនុស្សធម៌ដល់ប្រជាជនដែលងាយរងគ្រោះបំផុតនៅលើពិភពលោកតាមរយៈការងារសង្គម ហើយសាកលវិទ្យាល័យនេះបានបំពេញការងារផ្អែកលើគុណតម្លៃស្មារតី និងគោលការណ៍មនុស្សធម៌ដែលរួមមាន ការគោរពចំពោះមនុស្ស ការការពារជីវិតមនុស្ស និងការអភិវឌ្ឍវប្បធម៌។
លោកបណ្ឌិត Vladirmir Krchmery បានមានប្រសាសន៍ថា៖ «សកម្មភាពរបស់លោក Scott គឺស្រដៀងគ្នាទៅនឹងសកម្មភាពរបស់ម្ចាស់ពានរង្វានណូបែល អ្នកមា្តយ Teresa ដែលបានជួយដល់មនុស្សជាច្រើននៅលើពិភលោក ហើយសកម្មភាពរបស់លោក Scott គឺជាសកម្មភាពមួយដ៏ល្អបំផុតដែលបានជួយដល់កុមារកម្ពុជាដែលកំពុងត្រូវការការអប់រំល្អ»។
សាស្ត្រាចារ្យ និងជាស្ថាបនិកសាកលវិទ្យាល័យខាងលើបានលើកឡើងផងដែរថា ការវិនិយោគលើវិស័យអប់រំជាផ្នែកយ៉ាងសំខាន់ដែលមិនអាចខ្វះបានសម្រាប់គ្រប់ជនជាតិ ហើយនៅថ្ងៃនេះលោកបណ្ឌិត Scott Neeson បានផ្តល់ឱ្យកុមារនៅតំបន់ស្ទឹងមានជ័យនូវការអប់រំយ៉ាងល្អ ហើយពួកគេនឹងក្លាយជាធនធានមនុស្សដ៏សំខាន់នៅក្នុងសង្គមជាតិ។
នៅក្នុងឱកាសនោះលោក Scott Neeson បានមានប្រសាសន៍ថា៖ «ខ្ញុំមានការរំភើបយ៉ាងខ្លាំងដែលទទួលបាននូវសញាបត្របណ្ឌិតកិត្តិយសនៅថ្ងៃនេះ ហើយខ្ញុំសូមអរគុណចំពោះសហការីទាំងអស់គ្នា រួមទាំងលោកយាយៗទាំងឡាយដែលយករូបខ្ញុំធ្វើជាកូនធម៌ ហើយនិងមនុស្សគ្រប់គ្នាដែលបានចូលរួមចំណែកក្នុងការអប់រំ និងគាំពារកុមារទាំងអស់ដែលកំពុងត្រូវការជំនួយនៅតំបន់ចាក់សំរាមស្ទឹងមានជ័យ»។
លោក Scott Neeson បានលើកឡើងផងដែរថា លោកនឹងបន្តខិតខំប្រឹងប្រែងធ្វើយ៉ាងណាពង្រឹងគុណភាពអប់រំដល់កុមារៗទាំងអស់នៅ CCF ឱ្យមានសមត្ថភាពគ្រប់គ្រាន់ដើម្បីធ្វើការងារនៅក្នុងសង្គមជាតិ ហើយព្យាយាមគ្រប់លទ្ធភាពដើម្បីធ្វើឱ្យពួកគេក្លាយជាមនុស្សដែលមានគុណតម្លៃខ្លាំង និងរស់នៅជាមួយគ្នាប្រកបដោយសេចក្តីសុខ និងស្នាមញញឹម៕
November 28, 2017
វែកមុខម្ចាស់បទ «ទឹកភ្នែកប្រុសសង្ហា» ដែលមិនមែនជាកូនប្រុស ព្រាប សុវត្ថិ
បើលោកអ្នកចូលទៅទស្សនាបទ «ទឹកភ្នែកប្រុសសង្ហា» នៅក្នុងបណ្ដាញសង្គមយូធូប នោះអ្នកនឹងបានឃើញថា ភាគច្រើនបទចម្រៀងមួយនេះ មានសុទ្ធសឹងតែរូបថតកូនប្រុសច្បងរបស់កំពូលតារាចម្រៀង ព្រាប សុវត្ថិ ដែលមានឈ្មោះថា សុវត្ថិ មុនីវណ្ណ អមដោយឡូហ្គោផលិតកម្មរស្មីហង្សមាស ដែលជាមូលហេតុបណ្ដាលឱ្យមហាជនគិតថា ផលិតកម្មហង្សមាស កំពុងតែផលិតបទចម្រៀង និងចាប់អារម្មណ៍ជាខ្លាំងចំពោះកូនប្រុស ព្រាប សុវត្ថិ។
ជាការពិតណាស់បទចម្រៀង «ទឹកភ្នែកប្រុសសង្ហា» មួយនេះ គឺមិនមែនជាការបកស្រាយរបស់លោក សុវត្ថិ មុន្នីវណ្ណ នោះទេ និងរឹតតែមិនមែនជាការបកស្រាយរបស់ នាយ ចឺម ទៀត ហើយថែមទាំងមិនមែនជាការចម្លងចេញពីតារាចម្រៀងល្បីក្នុងស្រុករូបណាទាំងអស់។ ពោលគឺ ជាការបកស្រាយដោយតារាចម្រៀង អែន ភី (N phy) ដែលជាម្ចាស់បទពិតប្រាកដ ហើយបទចម្រៀងមួយនេះត្រូវបានបង្ហោះនៅក្នុងបណ្ដាញសង្គមយូធូបជាផ្លូវការរបស់ផលិតកម្ម One Production Official តាំងពីថ្ងៃទី14 ខែកញ្ញា ឆ្នាំ2017 មកម្ល៉េះ។

ដើម្បីឱ្យកាន់តែជាក់ច្បាស់ សូមទស្សនាវីដេអូចម្រៀងខាងក្រោមនេះ៖
https://www.youtube.com/watch?v=Z1VMMyT7N8E

November 28, 2017
តារាកូរ៉េ 7 នាក់ដែលមានរឿងអាស្រូវខ្លាំងបំផុត ស្ទើរតែបំផ្លាញជីវិតពួកគេ
តាមរយៈសារព័ត៌មានកូរ៉េ Koreaboo ដែលបានចេញផ្សាយនៅថ្ងៃទី28 ខែវិច្ឆិកា ឆ្នាំ2017 នេះ បានឱ្យដឹងថា មានតារាកូរ៉េ 7 ដួង ដែលមានរឿងអាស្រូវខ្លាំងបំផុត ហើយរឿងនោះស្ទើរតែសម្លាប់ប្រជាប្រិយភាពរបស់ពួកគេទៀតផង តែជាសំណាងល្អ ពួកគេនៅតែអាចទាក់ទាញចិត្តអ្នកគាំទ្របានមកវិញ និងមានតែពេលវេលាប៉ុណ្ណោះដែលអាចលុបរឿងរ៉ាវទាំងនោះបាន។
1. IU
ក្នុងអំឡូងឆ្នាំ 2013 តារាចម្រៀងស្រី IU ត្រូវបានរងគ្រោះដោយសារតែមានគេទម្លាយរឿងអាស្រូវរបស់នាង ដែលគ្រោងនឹងរៀបអាពាហ៍ពិពាហ៍មួយបុរសម្នាក់ក្នុងក្រុមចម្រៀងល្បីមួយ ដែលធ្វើឱ្យប្រជាប្រិយភាពរបស់នាងបានធ្លាក់ចុះភ្លាមៗ។ តែយ៉ាងណាមិញ តារាស្រីរូបនេះបានចាត់វិធានការ ធ្វើការស៊ើបអង្កេតវែកមុខជនដែលបញ្ចេញព័ត៌មាននោះ និងបម្រុងនឹងចាប់គេដាក់គុកទៀតផង។
1. Han Seungyeon
ក្នុងអំឡុងឆ្នាំ2013ដូចគ្នា នាង Han Seungyeon ត្រូវបានទម្លាយរឿងអាស្រូវថា ដើម្បីឱ្យអាជីពរបស់នាងបានលេចធ្លោ និងល្អប្រសើរឡើងនោះ នាងបានបោកប្រាស់អ្នកគ្រប់គ្រង និងអ្នកចាត់ការនៅក្នុងចង្កោមសិល្បៈ ដែលសូម្បីតែម្ដាយឪពុករបស់នាងក៏បានដឹងរឿងនេះដែរ។ រឿងនេះបានធ្វើឱ្យនាងធ្លាក់ចុះប្រជាប្រិយភាពយ៉ាងខ្លាំង និងរហូតមកដល់ពេលនេះគេពុំទាន់ឃើញមានដំណោះស្រាយអ្វីលើបញ្ហានេះនៅឡើយ។
1. Sulli
អំឡុងឆ្នាំ2014 តារាស្រីល្បីឈ្មោះ Sulli បានបែកធ្លាយព័ត៌មានមួយថា នាងបានលបលួចទៅចូលគ្លីនិកសម្ភពឯកជនមួយកន្លែង ព្រមទាំងមានការបញ្ជាក់ប្រាប់ទៀតថា នាងមានអាការចាញ់កូនខ្លាំងទៀតផង។ បន្ទាប់មក ព័ត៌មានមួយនេះ កាន់តែផ្ទុះខ្លាំងឡើង និងបានដុតកម្ដៅនាង Sulli ឱ្យបាត់បង់ប្រជាប្រិយស្ទើរតែទាំងស្រុង។
1. Park Bom
តារាចម្រៀងស្រី Park Bom ដែលជាអតីតសមាជិកក្រុមចម្រៀងស្រី 2NE1 ត្រូវបានរងការរិះគន់យ៉ាងចាស់ដៃពីសំណាក់អ្នកគាំទ្រថា នាងជាតារាប្លាស្ទិក ពោលគឺនាងបានកែសម្ផស្សជាច្រើនដង ហើយថែមទាំងបែកធ្លាយរឿងដែលនាងបានប្រើប្រាស់ថ្នាំញៀនប្រភេទកញ្ឆា ដែលជាទង្វើខុសច្បាប់របស់ផលិតកម្ម YG ទៀតផង។
1. Jang Hyunseung និង HyunA
ក្នុងអំឡុងឆ្នាំ2014 មានការអះអាងមួយបានបញ្ជាក់ចេញពីផលិតកម្ម Cube Entertainment ជាផ្លូវការថា នាង HyunAកំពុងមានផ្ទៃពោះជាមួយនឹងតារាប្រុស Jang Hyunseung ហើយថែមទាំងទទួលបានការមើលថែទាំយ៉ាងមានសុវត្ថិភាពទៀតផង។ តែក្រោយមកក៏បានលេចធ្លាយរឿងពិតឡើងថា នោះគ្រាន់តែជារឿងប្រឌិតឡើងរបស់ក្រុមហ៊ុនប៉ុណ្ណោះ។
1. Rain
កាលពីខែវិច្ឆិកា ឆ្នាំ2014 រូបភាពអាក្រាតកាយរបស់កំពូលតារាសម្ដែង និងចម្រៀង Rain បានបែកធ្លាយចេញមកក្រៅពាសពេញបណ្ដាញទំនាក់ទំនងសង្គមអនឡាញ ដោយសារតែរូបភាពទាំងនោះមាននៅក្នុងទូរស័ព្ទដៃរបស់តារាស្រី Kim Taehee ដែលជាភរិយារបស់លោកបច្ចុប្បន្នហ្នឹងឯង ដែលកាលនោះនាងបានធ្វើឱ្យជ្រុះបាត់ទូរស័ព្ទមួយនោះ។
1. Suho
តារាប្រុសរូបនេះ ត្រូវបានអ្នកសារព័ត៌មានទម្លាយរឿងអាថ៌កំបាំងរបស់លោកថា ឪពុករបស់លោកគឺជាមន្ត្រីមួយរូបនៅក្នុងជួររដ្ឋាភិបាលនិយមជប៉ុន ដែលជាហេតុបណ្ដាលឱ្យអ្នកគាំទ្រជនជាតិកូរ៉េស្អប់រូបលោក និងឪពុកលោក៕
November 28, 2017
កោះរ៉ុង កំពុងត្រូវបានរៀបចំយុទ្ធសាស្ដ្រដើម្បីទាញភ្ញៀវទេសចរឱ្យកាន់តែច្រើន
ភ្នំពេញ – ស្របពេលដែលតំបន់ទេសចរណ៍ធម្មជាតិកោះរ៉ុងកំពុងតែទទួលបានភ្ញៀវទេសចរយ៉ាងច្រើនទៅទស្សនានៅទីនោះ ថ្មីៗនេះរដ្ឋមន្ដ្រីក្រសួងទេសចរណ៍បានដាក់ចេញនូវអនុសាសន៍មួយចំនួនដើម្បីធ្វើឱ្យតំបន់នោះកាន់តែអាចបង្កើនសក្ដានុពលរបស់ខ្លួនថែមឡើងទៀត។
ក្នុងអំឡុង 9 ខែនៃឆ្នាំ2017 នេះ ភ្ញៀវទេសចរមកកម្សាន្តក្នុងខេត្តព្រះសីហនុមានចំនួន 1,5លាននាក់ មានកំណើន22,39% ក្នុងនោះទេសចរជាតិ 1,1លាននាក់ កើន 23% ទេសចរអន្តរជាតិជាង 40ម៉ឺននាក់ កើន 18% ក្នុងនោះទេសចរជនជាតិចិនស្ថិតនៅលំដាប់ទី1ដែលមានចំនួនជិត9ម៉ឺននាក់ជាមួយកំណើន170,61%។
តាមការព្យាករ ក្នុងឆ្នាំ2017 ខេត្តព្រះសីហនុអាចមានចំនួនទេសចរប្រមាណជិត2លាននាក់ ក្នុងកំណើនប្រមាណ 20% (ក្នុងនោះទេសចរជាតិប្រមាណ 1,4លាននាក់ ទេសចរអន្តរជាតិប្រមាណជាង60ម៉ឺននាក់។ ឆ្នាំ 2020 ភ្ញៀវទេសចរអាចនឹងមកកម្សាន្តក្នុងខេត្តព្រះសីហនុកើនឡើងដល់ប្រមាណជិត3លាននាក់ ក្នុងនោះមានទេសចរអន្តរជាតិប្រមាណ1លាននាក់។
ដោយឡែក ភ្ញៀវទេសចរដែលទៅកម្សាន្តនៅតាមកោះក្នុងខេត្តព្រះសីហនុដោយជិះទូកសរុបចំនួន 7,897 ជើង ដែលមានភ្ញៀវទេសចរសរុបចំនួន34ម៉ឺននាក់ កើនឡើង42.38 % ក្នុងនោះភ្ញៀវទេសចរជាតិ 10ម៉ឺននាក់ កើន 43.58 % និងទេសចរអន្តរជាតិ 23ម៉ឺននាក់ កើន 41.85 %។
ស្របពេលដែលតំបន់មួយនេះកំពុងតែប្រែមុខមាត់ថ្មីក្នុងការទាក់ទាញភ្ញៀវទេសចររហូតជំរុញឱ្យមានកំណើនយ៉ាងខ្លាំងនោះ ឯកឧត្ដមរដ្ឋមន្ត្រី ថោង ខុន បានដាក់ចេញនូវអនុសាសន៍មួយចំនួនពាក់ព័ន្ធនឹងការរៀបចំតំបន់កោះរ៉ុងឱ្យមានសក្ដានុពលខ្លាំងឡើងដែលមានដូចជា៖
1- កិច្ចការឆ្វៀលដីស្បែកខ្លា៖ រដ្ឋបាលខេត្តព្រះសីហនុត្រូវពិនិត្យឱ្យច្បាស់លាស់ និងពន្លឿនការងារចេញប័ណ្ណជូនប្រជាពលរដ្ឋពិតប្រាកដលើកោះរ៉ុង។
2-កិច្ចការគ្រប់គ្រងទេសចរណ៍ បរិស្ថាន និងជលផល៖ ត្រូវពង្រឹងសណ្តាប់ធ្នាប់ អនាម័យ និងការគ្រប់គ្រងគុណភាពសេវាកម្មនៅតាមមូលដ្ឋានអាជីវកម្មទេសចរណ៍ទាំងអស់នៅលើកោះរ៉ុង ដោយត្រូវធានាថា គ្រប់អាជីវកម្មទេសចរណ៍ទាំងអស់ត្រូវមានអាជ្ញាប័ណ្ឌទេសចរណ៍ និងពិសេសបុគ្គលិកទាំងអស់ត្រូវទទួលបានការបណ្តុះបណ្តាលជំនាញផ្នែកបដិសណ្ឋារកិច្ចទេសចរណ៍។ ដោយឡែកបញ្ហាកាកសំណល់រឹង-រាវ ត្រូវបន្តធ្វើការទប់ស្កាត់ការបង្ហូរកាកសំណល់រាវចូលសមុទ្រ និងរាល់អាជីវកម្មទេសចរណ៍ត្រូវមានធុងសំរាមផ្ទាល់ខ្លួន ហើយតាមតុអាហារដ្ឋាននីមួយៗ ត្រូវមានកន្ត្រកសម្រាប់ដាក់កាកសំណល់អាហារ។
3- កិច្ចការរៀបចំសន្តិសុខ សុវត្ថិភាព និងសណ្តាប់ធ្នាប់៖ ត្រូវបន្តពង្រឹងកិច្ចការពារសន្តិសុខសុវត្តិភាពជូនប្រជាពលរដ្ឋ និងភ្ញៀវទេសចរទាំងការស្នាក់នៅ និងការធ្វើដំណើរតាមមធ្យោបាយផ្លូវទឹក។ ដោយឡែក អាជ្ញាធរមូលដ្ឋាន ត្រូវសហការជាមួយអង្គភាពជំនាញ ចាត់វិធានការតឹងរ៉ឹងទប់ស្កាត់ការបំពុលដោយសំឡេងរបស់ក្លិបរាត្រី និងបារ៍មួយចំនួនដែលបានរំខានដល់ការស្នាក់នៅរបស់ប្រជាពលរដ្ឋ និងអ្នកទេសចរ៕
November 28, 2017
មិននឹកស្មានថា Domian Name របស់ Facebook មានតម្លៃខ្ពស់ដល់ម្លឹងសោះ!!!
បច្ចុប្បន្ន អ្នកលេង Facebook មួយចំនួន មិនសូវចាប់អារម្មណ៍ថា Facebook មាន Domain ផ្ទាល់ខ្លួនមួយទៀតគឺ fb.com ពោលគឺភាគច្រើនស្គាល់ត្រឹមតែ facebook.com ប៉ុណ្ណោះ។
តើលោកអ្នកមានដឹងទេថា Domain Name « fb.com និង facbeook.com » មានតម្លៃប៉ុន្មាន?
យោងតាមការចេញផ្សាយរបស់ Wikipedia បានឲ្យដឹងថា បណ្ដាញទំនាក់ទំនងសង្គម Facebook ដំបូងឡើងគឺមានឈ្មោះ « thefacebook.com » ប៉ុន្តែក្រោយមកនៅឆ្នាំ 2005 លោក Mark Zuckerberg ដែលជាសហស្ថាបនិក និងជានាយកប្រតិបត្តិនាពេលបច្ចុប្បន្ន បានសម្រេចចិត្តប្ដូរ ទៅប្រើ facebook.com វិញ ដោយ Domain name មួយនេះ ត្រូវបានទិញពីក្រុមហ៊ុន AboutFace ក្នុងតម្លៃ 20ម៉ឺនដុល្លារអាមរិក។ វាពិតជាថ្លៃណាស់មែនទេ? នៅមិនទាន់ចប់នោះទេ នៅឆ្នាំ 2010 បណ្ដាញសង្គមយក្សមួយនេះ បានសម្រេចចិត្តទិញ Domain name មួយទៀតគឺ « fb.com » ពីការិយាល័យសហព័ន្ធកសិកម្មរបស់អាមេរិក តែស្ថាប័នទាំងពីរនេះ បានលាក់បំបាំងនូវតម្លៃ រហូតក្រោយមកបានបន្តិច ក៏មានប្រភពព័ត៌មានជាច្រើនបានទម្លាយឲ្យដឹងថា Facebook ទិញ fb.com ក្នុងតម្លៃ 8,5លានដុល្លារអាមេរិក ខណៈដែល Domain name ទូទៅមានតម្លៃចន្លោះត្រឹមតែ 10 ដុល្លារអាមេរិកប៉ុណ្ណោះ។
គួរបញ្ជាក់ផងដែរថា ពេលនេះ Facebook បានក្លាយជាបណ្ដាញសង្គមដែលមានអ្នកប្រើប្រាស់ច្រើនជាងគេបំផុតរហូតដល់ជាង 2,1ពាន់លាននាក់ ហើយក៏ជាបណ្ដាញសង្គមដែលមានឥទ្ធិពលផងដែរ៕
November 28, 2017