Category: សង្គម និងសេដ្ឋកិច្ច

លោក កឹម អឿន៖ មនុស្សគួរដកអត្តសញ្ញាណទុកទៅម្ខាងសិន ហើយទទួលយករឿងល្អគ្រប់យ៉ាង
នៅក្នុងការរស់នៅ មនុស្សម្នាក់ៗមានវិធីរៀងៗខ្លួនក្នុងការអភិវឌ្ឍខ្លួនឯងឆ្ពោះទៅរកភាពជាបុគ្គលអស្ចារ្យ ឬបុគ្គលដែលទទួលបានការគោរព និងឱ្យតម្លៃពីសង្គម។ ក្នុងចំណោមវិធីទាំងអស់ក្នុងការអភិវឌ្ឍខ្លួនឯង ការបើកចិត្តឱ្យទូលាយជារឿងសំខាន់ចម្បងមួយដែលជាចំណុចបើកផ្លូវទៅកាន់ភាពជាអ្នកដែលមានគុណតម្លៃជាលក្ខណៈសកល។
លោក កឹម អឿន នាយកប្រតិបត្តិនៃវិទ្យាស្ថានសិក្សាដើម្បីជោគជ័យ បានលើកឡើងនៅក្នុងវេទិកាភាពជាអ្នកដឹកនាំថា អ្នកដែលមនុស្សគ្រប់គ្នាគួរតែត្រៀមចាត់ទុកថា ជាមនុស្សសកលដែលមានតម្លៃសម្រាប់សង្គម និងមនុស្សទូទៅ គឺមនុស្សដែលបើកចំហ និងទទួលយកបាននូវអ្វីដែលល្អ និងមានភាពទទួលខុសត្រូវ។ ភាពជាប្រជាជនសកលគឺជារឿងសំខាន់មួយដែលអាចធ្វើឱ្យយើងងាយស្រួលក្នុងការរស់នៅ ឬធ្វើការងារដោយអាចប្រើគំនិតប្រកបដោយភាពទូលំទូលាយ និងមានភាពជាអ្នកដឹកនាំដ៏ល្អថែមទៀតផង។
លោក កឹម អឿន បាននិយាយថា៖ «ដើម្បីក្លាយខ្លួនជាមនុស្សដ៏អស្ចារ្យ និងមានតម្លៃម្នាក់ យើងម្នាក់ៗគួរទុកអត្តសញ្ញាណ (identity) ទៅម្ខាងសិន ហើយទទួលយករឿងគ្រប់យ៉ាង»។
ជាការពិតណាស់ បើតាមលោក កឹម អឿន មនុស្សជាច្រើនតែងតែប្រកាន់ខ្លួនថា ខ្លួនឯងជាអ្នកចេះ ជាមនុស្សមានសមត្ថភាពស្រាប់ហើយ ជាមនុស្សដែលជំនាញផ្នែកនេះ ឬជំនាញផ្នែកនោះជាដើម ហើយព្យាយាមប្រើតែសមត្ថភាពដែលខ្លួនមាន និងមិនព្រមទទួលយកនូវអ្វីដែលថ្មីពីមជ្ឈដ្ឋានខាងក្រៅនោះទេ បើទោះបីជាដឹងថា រឿងនោះជារឿងល្អក៏ដោយ។ តាមពិតទៅប្រសិនបើមនុស្សអាចដកអត្តសញ្ញាណរបស់ខ្លួនទុកមួយឡែកសិន បន្ទាប់មកពិចារណាទទួលយករឿងល្អៗពីគ្រប់ទីកន្លែង គេនឹងអាចក្លាយជាមនុស្សដែលមានទាំងជំនាញគោល និងជំនាញទូទៅ ឬជំនាញទន់ ដែលពិភពលោកកំពុងត្រូវការ៕
November 30, 2017
Yaya Saya បញ្ជាក់ទំនាក់ទំនងស្នេហា 6 ឆ្នាំជាមួយ អេឡិច ហ្សូរ៉ា
បន្ទាប់ពីគេហទំព័រសារព័ត៌មាន ឡារ៉ែន បានចេញផ្សាយអំពីទំនាក់ទំនងស្នេហារបស់នារីម្នាក់ដែលជាម្ចាស់គណនីឈ្មោះ Yaya Saya អស់រយៈពេល 6 ឆ្នាំជាមួយនឹងតារាប្រុស អេឡិច ហ្សូរ៉ា រួចមក មិនបានប៉ុន្មានថ្ងៃផងនោះ នារីរូបនេះបានធ្វើការឆ្លើយតបតាមរយៈសារអេត្រូនិកនៅលើបណ្ដាញសង្គមហ្វេសប៊ុកថា ក្ដីស្រឡាញ់រយៈពេល6ឆ្នាំរវាងរូបនាងជាមួយតារាប្រុសល្បីឈ្មោះរូបនេះគឺ គ្រាន់តែក្នុងន័យបងប្អូនតែប៉ុណ្ណោះ។
នៅក្នុងសារដដែលនោះផងដែរ សាមីខ្លួនដែលជាម្ចាស់គណនីហ្វេសប៊ុកឈ្មោះ Yaya Saya បានអះអាងយ៉ាងដូច្នេះថា «ចំពោះរឿងហ្នឹង ខ្ញុំសូមឆ្លើយថា វាជារឿងពិតមែនដែលខ្ញុំស្រឡាញ់បងហ្សូរ៉ាជិត6ឆ្នាំមកហើយនោះ តែខ្ញុំស្រឡាញ់គាត់មិនមែនក្នុងលក្ខណៈស្នេហាអូនបងអីទេ ខ្ញុំស្រឡាញ់គាត់ទុកដូចបងប្រុសខ្ញុំបង្កើតអ៊ីចឹង មិនមានអ្វីលើសពីបងប្អូនទេ»។ នាងបានបន្ដបញ្ចាក់បន្ថែមទៀតថា «ខ្ញុំមកថ្ងៃនេះគ្រាន់តែចង់បកស្រាយប៉ុណ្ណឹងទេ កុំឲ្យមានការយល់ច្រឡំរវាងខ្ញុំនឹងបងហ្សូរ៉ា គឺត្រឹមបងប្រុសនិងប្អូនស្រីតែប៉ុណ្ណោះ អត់មានអ្វីលើសពីហ្នឹងទេ»៕
November 30, 2017
នាយក្រឹមត្រូវកូនប្រុសបង្កើតរបស់ខ្លួនចោទថា ជាមនុស្សក្បត់
បន្ទាប់ពីសារព័ត៌មានក្នុងស្រុកមួយបានទម្លាយរឿងរ៉ាវ នាងលាភ ប្រពន្ធចុងនាយក្រឹម ឬលោក អ៊ូ ប៊ុណ្ណារ៉ាត់ ប្រសូតបានកូនភ្លោះរួចមក ព័ត៌មាននេះបានក្លាយជារឿងអាស្រូវមួយដែលគេកំពុងនាំគ្នានិយាយនៅក្នុងពិភពសិល្បៈ ហើយក៏ជាហេតុបណ្ដាលឱ្យប្រពន្ធដើម និងកូនៗរបស់លោក(នាយក្រឹម)ហួសចិត្តចំពោះរូបលោកទៀតផង ដោយថ្មីនេះៗកូនប្រុសរបស់តារាកំប្លែងជើងចាស់រូបនេះបានទម្លាយសារនៅក្នុងចិត្ត ពន្លះឪពុករបស់ខ្លួនយ៉ាងពេញទំហឹងចំពោះភាពត្រេកត្រអាលនឹងតំណក់ឈាមថ្មីរបស់ឪពុកខ្លួន និងប្រពន្ធចុង។
លោក អ៊ូ ដានីញ៉ែលរ័ត្នមុន្នី បានពន្លះឪពុកខ្លួនតាមរយៈសារនៅលើបណ្ដាញសង្គមហ្វេសប៊ុកថា «ខ្ញុំធ្លាប់មានមោទនភាព ដែលមានបុរសដ៏មានទេពកោសល្យម្នាក់ធ្វើជាឪពុកខ្ញុំ ប៉ុន្តែឥឡូវនេះខ្ញុំស្ទើរតែមិនដឹងថា តើត្រូវមានអារម្មណ៍ដូចម្តេចជាមួយគាត់។ មិនមែនត្រឹមតែការចាកចេញពីផ្ទះប៉ុណ្ណោះទេ ប៉ុន្តែគាត់ថែមទាំងបានធ្វើទង្វើល្មើសច្បាប់ប្រទេសកម្ពុជាទៀតផង។ គាត់គួរតែសន្សំលុយ 5,000ដុល្លារដែលចំណាយលើសហាយរបស់គាត់ដើម្បីបង្កើតកូនមួយ និងជាមូលហេតុធ្វើឲ្យគ្រួសារខ្ញុំព្រាត់ប្រាសនោះ មកសង្គ្រោះខ្ញុំវិញ។ ហើយគាត់កំពុងសើច និងផឹកស៊ីនៅពេលដឹងថា ខ្ញុំអាចនឹងត្រូវស្លាប់»។
យ៉ាងណាមិញកូនប្រុសរបស់នាយក្រឹមម្នាក់នេះក៏បានសរសេរធ្ងន់ៗទៀតថា «ខ្ញុំមិនច្បាស់ឡើយថា តើគាត់ជាមនុស្សប្រភេទណាទេនៅពេលនេះ ប៉ុន្តែគាត់មិនមែនជាឪពុកខ្ញុំទៀតទេ។ ខ្ញុំឆ្អែតឆ្អន់ហើយ ចំពោះរឿងរ៉ាវដ៏ឥតកេរ្តិ៍ខ្មាសបែបនេះ។ ខ្ញុំសង្ឃឹមថាគាត់ (នាយក្រឹម)នឹងរស់នៅបានយូរ ដើម្បីមើលថែទាំកូនចង្រៃទាំងពីរនាក់នោះរហូតដល់ចាស់…។ មនុស្សក្បត់ដ៏អាក្រក់!!»៕
November 30, 2017
ការសាកល្បងដាំពូជស្រូវថ្មីរបស់ជប៉ុននៅកម្ពុជាទទួលបានជោគជ័យខ្ពស់
ភ្នំពេញ៖ លោកសាស្ត្រាចារ្យ Qi Shaowu នាយកមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center បានថ្លែងឱ្យដឹងថា ការសាកល្បងដាំស្រូវប្រភេទថ្មីនាំមកពីប្រទេសជប៉ុនកំពុងទទួលបានជោគជ័យខ្លាំងនៅក្នុងប្រទេសកម្ពុជា។
លោកបញ្ជាក់ថា ការសាកល្បងដាំដុះពូជអង្ករគ្រាប់ឃ្លីនៅកម្ពុជាទទួលបានលទ្ធផលល្អប្រសើរខ្លាំងជាងពូជស្រូវដទៃ ដោយក្នុង1ហិកតាទទួលផលបានប្រមាណជា 7.7តោននៅក្នុងខេត្តកំពង់ស្ពឺ និង 7.4តោននៅក្នុងខេត្តពោធិ៍សាត់។ លក្ខណៈពិសេសរបស់ពូជស្រូវជប៉ុនប្រភេទនេះមានចំនួន4យ៉ាងដែលត្រូវបានជ្រើសរើសយកមកដាំនៅប្រទេសកម្ពុជាដោយពូជនីមួយៗអាចធន់នឹងទឹកជំនន់ ធន់នឹងជំងឺឆ្លង និងត្រូវការប្រើប្រាស់សារធាតុជីតិចបំផុត ជាពិសេសធន់នឹងអាកាសធាតុក្តៅ។ បច្ចុប្បន្នប្រភេទពូជស្រូវជប៉ុននេះកំពុងមានតម្រូវការទីផ្សារខ្ពស់ទូទាំងពិភពលោក ជាពិសេសប្រទេសចិនដែលកំពុងមានការខ្វះខាតអង្ករប្រភេទនេះជាង3លានតោនក្នុងមួយឆ្នាំ។
ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានថ្លែងកោតសសើរ និងវាយតម្លៃខ្ពស់ចំពោះមជ្ឈមណ្ឌលវិទ្យាស្ថានស្រាវជ្រាវពូជស្រូវ China National Hybrid Rice R&D Center ជាពិសេសលោកសាស្ត្រាចារ្យ Qi និងសហការីដែលបានមកសិក្សាស្រាវជ្រាវពូជអង្ករគ្រាប់ឃ្លីថ្មីនេះនៅប្រទេសកម្ពុជា និងមានបំណងវិនិយោគ និងសហការជាមួយក្រសួងក្នុងការផ្លាស់ប្តូបទពិសោធការងារដើម្បីអភិវឌ្ឍវិស័យស្រូវអង្ករនៅកម្ពុជាឱ្យកាន់តែមានកិត្យានុភាពលើទីផ្សារស្រូវអង្ករពិភពលោកដែលស្របជាមួយគោលដៅអាទិភាពរបស់រាជរដ្ឋាភិបាលក្នុងការធានាសន្តិសុខស្បៀង និងបង្កើតការនាំចេញអង្ករកម្ពុជាឱ្យបានលើសពី 1លានតោនក្នុង1ឆ្នាំ។
ឯកឧត្តមរដ្ឋមន្ត្រីក៏បានផ្តល់អនុសាសន៍ណែនាំមួយចំនួនដល់លោកសាស្ត្រាចារ្យ Qi និងសហការី ត្រូវរៀបចំសេចក្តីព្រាងអនុស្សរណៈនៃការយោគយល់គ្នា3ភាគី រវាងក្រុមហ៊ុនទទួលទិញអង្ករនេះទៅកាន់ទីផ្សារចិន ខណៈមជ្ឈមណ្ឌលវិទ្យាស្ថានស្រាវជ្រាវ និងក្រសួងកសិកម្ម រុក្ខាប្រមាញ់ និងនេសាទ នឹងត្រូវចុះហត្ថលេខានៅពាក់កណ្តាលខែធ្នូខាងមុខ។
ទន្ទឹមនឹងនេះត្រូវអនុវត្តនូវយុទ្ធសាស្ត្រមួយចំនួនគឺ
ទី1.គិតគូរពីការអនុវត្តដោយផ្សារភ្ជាប់វិស័យឯកជន និងកសិករតាមរយៈធ្វើការដាំដុះ និងផ្គត់ផ្គង់តាមកិច្ចសន្យា។
ទី2. ផ្តល់ស្រូវដែលមានតម្រូវការទីផ្សារខ្ពស់ដល់កសិករខ្មែរ។
ទី3.កំណត់តំបន់ដាំដុះដែលមានសក្តានុពលខ្ពស់ដើម្បីបង្កើនប្រសិទ្ធភាព និងគុណភាពអង្ករ។ ទី4.បន្តកិច្ចសហប្រតិបត្តិការល្អរវាងមជ្ឈមណ្ឌលវិទ្យាស្ថានស្រាវជ្រាវពូជស្រូវ និងក្រសួងដោយការបង្កើតក្រុមការងារ និងគណៈកម្មការ។
លោកសាស្ត្រាចារ្យ Qi Shaowu និងតំណាងក្រុមហ៊ុនចិនបានបញ្ជាក់យ៉ាងមុតមាំថា ក្រុមហ៊ុននឹងប្រមូលទិញប្រភេទស្រូវខាងលើទាំងអស់សម្រាប់នាំចេញទៅកាន់ទីផ្សារប្រទេសចិន នៅពេលកសិករកម្ពុជាផលិតបាន៕
November 30, 2017
ទ្រាំលែងបាន! ចន ច័ន្ទលក្ខិណា តបទៅ ម៉េង កែវពេជ្ជតា វិញបែបនេះ…
បន្ទាប់ពីអ្នកនាង ម៉េង កែវពេជ្ជតា បានពង្រាយសារដ៏វែងអន្លាយនៅលើបណ្ដាញសង្គមហ្វេសប៊ុករបស់ខ្លួន ដែលបង្ហាញពីការដៀមដាម ទិតៀន ប្រមាថ និងចំអកដ៏ក្ដៅគគុកទៅលើអ្នកនាង ចន ច័ន្ទលក្ខិណាប្រធានសមាគមសិល្បករខ្មែរនោះ នៅពេលថ្មីៗនេះ ស្រាប់តែគេឃើញមានការតបតរបស់អ្នកនាង ចន ច័ន្ទលក្ខិណា ទៅកាន់តារាចម្រៀងជើងចាស់រូបនេះវិញដូចខាងក្រោមនេះ..។
តាមរយៈហ្វេសប៊ុករបស់អ្នកនាង ចន ច័ន្ទលក្ខិណា បានសរសេរយ៉ាងដូច្នេះថា «សុំទោសណា រឿងដែលបងពេជ្ជតាចង់និយាយ ទុកឱ្យគាត់និយាយទៅ ព្រោះជាមាត់របស់គាត់ ឱ្យគាត់និយាយតែឯងទៅ អ្នកណាចោទអី គិតអីក៏តាមចិត្ត បើគាត់ចង់ឈ្លោះ ឱ្យគាត់ឈ្លោះតែឯងទៅ ហើយខ្ញុំបង្ហោះនេះក៏គ្មានពាក់ព័ន្ធនឹងអ្នកណាដែរ មិនបាច់ប្រាប់ទេ ខ្ញុំដឹង! គ្រាន់តែគេទុកឱ្យគាត់ឆ្កួតតែឯងចុះ»។
តាមរយៈសារខាងលើនេះដែរ បានធ្វើឱ្យអ្នកដែលតាមដានរឿងនេះយល់ថា ការសរសេរសារប៉ុន្មានឃ្លារបស់អ្នកនាង ចន ច័ន្ទលិក្ខណា ប្រហែលជាមិនមែនមានន័យថា នាងសុខចិត្តចុះចាញ់មិនព្រមតបតជាមួយអ្នកនាង ម៉េង កែវពេជ្ជតា នោះទេ តែផ្ទុយទៅវិញគឺនាងគ្រាន់តែចង់រក្សាកិត្តិយសរបស់ខ្លួនក្នុងនាមជាប្រធានសមាគមសិល្បករខ្មែរ ដែលគ្រប់គ្រងលើសិល្បករខ្មែរតែប៉ុណ្ណោះ៕
November 30, 2017
បិតាស្ថាបនិក Android ដើរចេញពី Google បន្ទាប់ពីផ្ទុះរឿងអាស្រូវផ្លូវភេទជាកូនចៅ
យោងតាមការចេញផ្សាយរបស់សារព័ត៌មាន The Information បានឲ្យដឹងថា លោក Andy Rubin បិតាស្ថាបនិក Android បានដើរចេញពីក្រុមហ៊ុន Google បន្ទាប់ពីផ្ទុះរឿងអាស្រូវផ្លូវភេទជាមួយបុគ្គលិកក្រោមបង្គាប់។
ប្រភពខាងលើបានបញ្ជាក់ថា នៅពេលនេះ លោក Rubin បានចាកចេញពី Google បន្ទាប់ពីក្រុមហ៊ុនអ៊ីនធើណែតយក្សមួយនេះ បានចាប់ផ្ដើមបើកការស៊ើបអង្កេតផ្ទៃក្នុង ពាក់ព័ន្ធនឹងករណីលោក Rubin មានទំនាក់ទំនងផ្លូវភេទជាមួយនឹងស្ត្រីម្នាក់ដែលធ្វើការងារផ្ទាល់ជាមួយលោក។
ក្រោយពី The Information ចេញផ្សាយនូវព័ត៌មាននេះ លោក Mike Sitrick អ្នកនាំពាក្យរបស់លោក Rubin បានបញ្ជាក់ថា ការចាកចេញនោះមិនមែនពាក់ព័ន្ធនឹងករណីខាងលើឡើយ ពោលគឺលោកចាកចេញដោយសារហេតុផលផ្ទាល់ខ្លួន។ លោក Sitrick បានបញ្ជាក់បន្ថែមទៀតថា ស្ត្រីនោះបានធ្វើការនៅក្នុងក្រុម Android តាំងពីឆ្នាំ 2013 តែទំនាក់ទំនងរបស់អ្នកទាំងពីរគឺត្រឹមតែជាមេ និងកូនចៅប៉ុណ្ណោះ។
ទោះជាយ៉ាងនេះក្ដី ខាងក្រុមហ៊ុន Google នៅមិនទាន់មានប្រតិកម្ម ឬការឆ្លើយតបណាមួយឡើយ៕
November 30, 2017
តារាកំប្លែងជើងចាស់នាយ កុយ និយាយពីរឿងផ្ទុះសង្គ្រាមពាក្យសម្ដីរវាង ម៉េង កែវពេជ្ជតា និងចន ច័ន្ទលក្ខិណា
ក្រោយពីអ្នកនាង ម៉េង កែវពេជ្ជតា បានបង្ហោះសារពន្លះប្រធានសមាគមមិត្តសិល្បៈស្ម័គ្រចិត្តជួយសង្គម និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា យ៉ាងវែងអន្លាយដោយមិនប្រណីថ្វីមិត្តនៅលើបណ្ដាញទំនាក់ទំនងសង្គមហ្វេសប៊ុករួចមក កាលពីថ្ងៃម្សិលមិញនេះ តារារៀមច្បង និងជាតារាកំប្លែងដ៏មានប្រជាប្រិយលោកពូ កុយ បានចេញមុខផ្សះផ្សាចំពោះរឿងនេះ។
ប្រភពដែលសារព័ត៌មានឡារ៉ែនទទួលបាន បានបញ្ជាក់ឱ្យដឹងថា លោកពូ កុយ មានប្រសាសន៍ថា «បើនិយាយពីការចូលសិល្បៈ ខ្ញុំជាង30ឆ្នាំហើយ អ៊ីចឹងអាចនិយាយបានថា ខ្ញុំគឺជារៀមច្បង ឬជាវីរៈសិល្បករម្នាក់ដែរ ហើយខ្ញុំសូមសំណូមពរឲ្យប្អូនៗសិល្បករយើង កុំឈ្លោះគ្នាបង្ហោះលើ Facebook អី នាំឲ្យមហាជនគេវាយតម្លៃថា អ្នកសិល្បៈយើងមិនចេះចាប់ដៃគ្នាធ្វើការ គិតតែពីឈ្លោះគ្នា ច្រណែនឈ្នានីសគ្នា អ៊ីចឹងមិនល្អទេ គេឲ្យតម្លៃយើងទាបណាស់។ ខ្ញុំមិនដឹងថា ប្អូនម៉េង កែវពេជ្ជតា និងចន ច័ន្ទលក្ខិណា ម្នាក់ណាខុសឬត្រូវទេចំពោះរឿងនេះ ព្រោះខ្ញុំមិនទាន់បានដឹងច្បាស់ អត់ទាន់បានឃើញសារគេបង្ហោះ ដោយសារខ្ញុំរវល់ពេក។ ប៉ុន្ដែមួយរយៈនេះ ខ្ញុំសង្កេតឃើញប្រធានសមាគមសិល្បករខ្មែរ អ្នកនាងចន ច័ន្ទលក្ខិណាហ្នឹង ចាប់តាំងពីគាត់ក្លាយជាប្រធានមក គឺគាត់ជួយសិល្បករខ្មែរយើងបានច្រើនដែរ គឺឲ្យតែមានតារាណាម្នាក់មានបញ្ហា គាត់ចុះទៅភ្លាម ទោះជាតិចក្ដី ច្រើនក្ដី គាត់ជួយជាហូរហែ ហើយលោកហេង ឡុង គាត់ក៏ជ្រោមជ្រែងណាស់ដែរ គឺនៅពីក្រោយចន ច័ន្ទលក្ខិណា»។
តារាកំប្លែងជើងចាស់បានបន្ថែមទៀតថា «ខ្ញុំសូមឲ្យសិល្បករខ្មែរយើងទាំងអស់ទ្រាំសិន កុំអាលវាយតម្លៃគាត់ (ចន ច័ន្ទលក្ខិណា) មើលការដឹកនាំរបស់គាត់សិនទៅ ហើយបើគាត់ដឹកនាំមិនកើតទេ គឺឲ្យគាត់កាន់តែ1អាណត្តិបានហើយ យើងអាចបោះឆ្នោតទម្លាក់វិញបានតើ! ឥឡូវខ្ញុំឃើញគាត់ខ្នះខ្នែងធ្វើការឲ្យតារាៗនៅសមាគមសិល្បករខ្មែរយើងណាស់។ ដើម្បីសម្គាល់ជាសមាជិក ក្នុង1ឆ្នាំ ម្នាក់ៗបង់20ដុល្លារ តែពេលនរណាម្នាក់ឈឺទៅពិនិត្យនៅពេទ្យណា មានកាតហ្នឹង គឺគេមានការចុះតម្លៃឱ្យច្រើនណាស់ អ៊ីចឹងខ្ញុំឃើញថា ចន ច័ន្ទលក្ខិណា គាត់ធ្វើការជួយអ្នកសិល្បៈយើងច្រើនដែរមួយរយៈនេះ។ ក្នុងនាមខ្ញុំជាសិល្បករខ្មែរជើងចាស់ម្នាក់ ខ្ញុំសំណូមពរឲ្យប្អូនពេជ្ជតា និងចន ច័ន្ទលក្ខិណាចាប់ដៃគ្នាវិញ គឺអាចនិយាយគ្នាបានតើ! កុំឈ្លោះទាស់ទែងគ្នា បង្ហោះអ៊ីចឹង មិនល្អទេ ព្រោះអាហ្នឹងធ្វើឲ្យសិល្បៈយើងកាន់តែធ្លាក់ចុះទៅថែមទៀតជាមិនខាន បើយើងអត់ចេះស្រឡាញ់គ្នា សាមគ្គីគ្នាទេនោះ»៕

November 30, 2017
បុរសម្នាក់ទម្លាយរឿងពិតរបស់នារីមុខអាក្រក់ម្នាក់ មុនពេលទៅកែសម្ផស្សនៅកូរ៉េ
បើតាមរយៈសារព័ត៌មាន khaosod ដែលបានចេញផ្សាយនៅថ្ងៃទី30 ខែវិច្ឆិកា ឆ្នាំ2017 នេះបានឱ្យដឹងថា បេក្ខនារីដែលបានចូលរួមក្នុងកម្មវិធី Let Me In Thailand រដូវកាលទី3 មានឈ្មោះថា “ជុបជីប” កំពុងក្លាយជាប្រធានបទក្ដៅ ដែលត្រូវបានគេចោទប្រកាន់ថា តើនាងកំពុងបោកប្រាស់ទស្សនិកជន ឬយ៉ាងណា ? តើនាងពិតជាមានមុខអាក្រក់ពីមុនមែនឬ? ខណៈដែលមានបុរសម្នាក់បានទម្លាយរឿងរ៉ាវអតីតកាលពិតរបស់នាងចេញមកធ្វើឱ្យមហាជនភ្ញាក់ផ្អើលយ៉ាងខ្លាំង។
បុរសម្នាក់នោះត្រូវបានគេស្គាល់ថា ជាអ្នករស់នៅជិតខាងនាងតាំងពីតូច ព្រមទាំងជាសិស្សប្អូនរៀនសាលាជាមួយគ្នាទៀតផង។ លោកបានទម្លាយរឿងអតីតកាលពិតៗរបស់នាង “ជុបជីប” ប្រាប់ក្រុមការងារកម្មវិធីខាងលើថា « នាងពិតជាមានមុខមាត់អាក្រក់ណាស់ ឃើញពេលណាគួរខ្លាច និងចង់តែរត់ចេញពីនាង»។ ជាមួយគ្នានោះ ក្រុមការងារក៏បានធ្វើការពិសោធដោយឱ្យបុរសម្នាក់នោះបានមើលរូបរាង និងមុខមាត់របស់បេក្ខនារី “ជុបជីប” ក្រោយពីបានធ្វើការកែសម្ផស្សរួច។ អ្វីដែលសឹងមិនគួរឱ្យជឿនោះគឺ លោកមើលនាងមិនស្គាល់ហើយភ្ញាក់ផ្អើលយ៉ាងខ្លាំងនៅពេលបានឃើញភាពផ្លាស់ប្ដូរទាំងរូបរាង និងរូបសម្ផស្សរបស់នាងក្រោយត្រឡប់មកពីប្រទេសកូរ៉េវិញ ពោលគឺនាងស្អាតជាងតារាភាពយន្តទៅទៀត និងគ្មាននរណាម្នាក់ចំណាំនាងបានឡើយ។
គួរបញ្ជាក់ផងដែរថា នេះមិនមែនជាការបោកប្រាស់របស់នាង “ជុបជីប” ឬក្រុមការងារកម្មវិធី Let Me In Thailand នេះទេ តែតាមការពិតទៅក្រុមការងារបានសម្ភាសប្រវត្តិដ៏កម្សត់របស់បេក្ខនារីខាងលើ និងបានដឹងពីរឿងរ៉ាវ 5 រឿងរបស់នាងគឺ ឪពុកម្ដាយនាងបានចែកផ្លូវគ្នា , ក្ដីសុបិនចង់រៀនឱ្យចប់ , ចង់ប្រឡូកក្នុងវិស័យសិល្បៈ , មានបំណងក្លាយជាគ្រូបង្រៀន និង ប្រាថ្នាមានសម្រស់ស្អាតដូចតារាភាពយន្តរហូតដល់បុរសៗភ្ញាក់ផ្អើល។ ទាំងអស់នេះហើយ ជាមូលហេតុដែលធ្វើឱ្យនាងបានជាប់ចូលរួមក្នុងកម្មវិធីនេះ ព្រមទាំងបានទៅកែសម្ផស្សនៅប្រទេសកូរ៉េទៀតផង៕
https://youtu.be/lTq4nWlaBcU

November 30, 2017
លោក Pardew ត្រៀមពង្រឹងតំបន់ប្រយុទ្ធ ក្រោយតែងតាំងជាគ្រូបង្វឹក West Brom
លោក Alan Pardew ដែលជាគ្រូបង្វឹកទើបតែតែងតាំងថ្មី បានបញ្ជាក់ថា West Brom «នឹងលេងប្រកបដោយការវាយសម្រុកជានិច្ច» បើទោះបីការព្យាយាមនោះនឹងធ្វើឲ្យពួកគេអាចនឹងហូរឈាមតាមច្រមុះក៏ដោយ។
គ្រូបង្វឹកវ័យ56ឆ្នាំរូបនេះបានចូលមកជំនួសកន្លែងរបស់លោក Tony Pulis គ្រូបង្វឹកចាស់ដែលត្រូវបានបណ្តេញចេញកាលពីថ្ងៃពុធ ក្នុងកិច្ចសន្យាមួយដែលនឹងបន្តរហូតដល់ចុងរដូវកាលឆ្នាំ2019-2020។ លោក Pulis ត្រូវបានគេរិះគន់ទៅលើទម្រង់លេងរបស់ក្រុម ខណៈដែលពួកគេបានស៊ុតបាល់បញ្ចូលទីបានត្រឹមតែ9គ្រាប់គត់ ក្នុងចំណោមការប្រកួតលីក12លើកចុងក្រោយរបស់ពួកគេ។
លោក Pardew បានឲ្យដឹងថា៖ «រឿងដ៏សំខាន់បំផុតនោះគឺការឈ្នះការប្រកួត។ លោក Tony បានដឹកនាំយ៉ាងល្អ និងមានលក្ខណៈផ្សេងពីខ្ញុំ។ ខ្ញុំសង្ឃឹមថា នឹងធ្វើឲ្យក្រុមនេះមានសេរីភាពជាងមុនបន្តិច»។ West Brom បានកត់ត្រាជ័យជម្នះក្នុងការប្រកួតលីក2លើកដំបូងរបស់គេនៅរដូវកាលនេះ ប៉ុន្តែ ចាប់តាំងពីពេលនោះមក មិនបានទទួលជ័យជម្នះឡើយ និងបន្តជួបភាពត្រដាបត្រដួសជាបន្តបន្ទាប់ ដែលនាំឲ្យមានការបណ្តេញលោក Pulis ចេញពីតំណែងតែម្តង ក្រោយពីពួកគេរកបានត្រឹមតែ 12ពិន្ទុគត់ពីការប្រកួត 21លើក។ លោក Pardew បានឲ្យដឹងថា៖ «ចំណុចដ៏ខ្លាំងបំផុតរបស់ខ្ញុំ គឺផ្តោតទៅលើការលេងទៅមុខជានិច្ច និងព្យាយាមយ៉ាងខ្លាំងដើម្បីធ្វើឲ្យក្រុមជាច្រើនស្ថិតក្រោមសម្ពាធ។ ពេលខ្លះ អ្នកនឹងត្រូវឈាមច្រមុះក្នុងការធ្វើបែបនោះ ហើយនោះគឺជាអ្វីដែលខ្ញុំនឹងផ្តល់ឲ្យនៅទីនេះក្នុងក្លិប West Brom»។
គ្រូបង្វឹករូបនេះបានបន្ថែមទៀតថា៖ «បញ្ហាប្រឈមមុខភ្លាមៗពេលនេះ គឺការផ្អាកការធ្លាក់ចុះជាបន្តបន្ទាប់ ទទួលបានពិន្ទុនៅលើតារាង និងធ្វើឲ្យខ្លួនយើងស្ថិតក្នុងទីតាំងដែលយើងអាចព្យាយាមប្រជែងចំណាត់ថ្នាក់កំពូលទាំង1០ ប្រសិនបើអាច»៕
ប្រភពពី៖ BBC
November 30, 2017
លោក Conte រងពិន័យកាតក្រហម ឯ Sterling សង្គ្រោះ Man City ម្តងទៀត
Chelsea បានធ្វើឲ្យក្តីសង្ឃឹមនៃការប្រជែងពានក្របខ័ណ្ឌ Premier League របស់ខ្លួននៅតែបន្ត ក្រោយពីបានកត់ត្រាជ័យជម្នះក្នុងលទ្ធផល 1-០ លើក្រុម Swansea ខណៈដែលគ្រូបង្វឹកនៃក្រុមតោខៀវមួយនេះគឺលោក Antonio Conte ត្រូវបានបណ្តេញឲ្យទៅអង្គុយនៅកៅអីរបស់អ្នកទស្សនា សម្រាប់ការសម្តែងកំហឹងយ៉ាងខ្លាំងក្លានៅក្បែរខ្សែបន្ទាត់នៃទីលានប្រកួត។
លោក Conte បានបាត់បង់ការគ្រប់គ្រងអារម្មណ៍របស់លោកក្នុងតង់ទី1 នាកីឡដ្ឋាន Stamford Bridge ក្រោយពីបានសម្តែងនូវការខឹងសម្បាយ៉ាងខ្លាំង និងបានធ្វើការរិះគន់ទៅលើអាជ្ញាកណ្ដាលទី4លោក Lee Mason ក្រោយពីលោកអាជ្ញាកណ្តាល Neil Swarbrick មិនបានផ្តល់បាល់ជ្រុងឲ្យក្រុមរបស់ខ្លួន។ Chelsea មិនបានបាក់ស្មារតីដោយសារតែការអវត្តមានរបស់អ្នកចាត់ការទូទៅរបស់ខ្លួនឡើយ និងដណ្តើមបាន3ពិន្ទុពេញក្នុងតង់ទី2 នៅពេលដែលខ្សែការពារអន្តរជាតិអាល្លឺម៉ង់ Antonio Rudiger បានរកគ្រាប់បាល់បញ្ចូលទីក្នុងការប្រកួតលីកជាលើកទី1របស់គេ ចាប់តាំងពីផ្ទេរមកពីក្លិប Roma មុនពេលបើករដូវកាល។ ស្របពេលជាមួយគ្នានេះដែរ ខ្សែបម្រើឡើងទម្រង់លេង Raheem Sterling បានរកគ្រាប់បាល់ឈ្នះដ៏មិននឹកស្មានដល់នៅនាទីទី96 ដោយបានធ្វើឱ្យក្រុម Manchester City យកឈ្នះលើក្រុម Southampton ទាំងប្រផិតប្រផើយក្នុងលទ្ធផល1-0 កាលពីថ្ងៃពុធ ដើម្បីរក្សាការនាំមុខពិន្ទុដាច់នៅលើកំពូលតារាងនៃក្របខ័ណ្ឌ Premier League។
ក្រុមរបស់លោក Pep Guardiola ហាក់ដូចជាត្រូវបាត់បង់ពិន្ទុទៅហើយ ក្រោយពីខ្សែប្រយុទ្ធ Oriol Romeu បានរកគ្រាប់បាល់តាមស្មើគ្រាប់បាល់បើកឆាករបស់ខ្សែបម្រើ Kevin De Bruyne មុនពេល Sterling បានជួយឲ្យក្រុម Man City កត់ត្រាជ័យជម្នះជាលើកទី19ជាប់ៗគ្នា ក្នុងរាល់យុទ្ធនាការទាំងអស់ និងជាលើកទី12ជាប់ៗគ្នា ក្នុងក្របខ័ណ្ឌលីក។ វាជាគ្រាប់បាល់ឈ្នះជាលើកទី3របស់ Sterling ពីការប្រកួតទាំង3លើកចុងក្រោយនៃក្រុមរបស់គេ៕
ប្រភពពី៖ The Straits Times
November 30, 2017