Category: សង្គម និងសេដ្ឋកិច្ច

នៅថ្ងៃទី​1 ខែធ្នូ ឆ្នាំ2017 នេះ តាមរយៈហ្វេសប៊ុករបស់តារាស្រីល្បីឈ្មោះ ដេនី ក្វាន់ បានឱ្យដឹងថា នាងបានធ្វើដំណើរទៅកាន់ខេត្តព្រៃវែងជាមួយនឹងក្រុមការងារដើម្បីចែកសម្ភារសិក្សា និងកង់មួយចំនួនជូនដល់ប្អូនៗកុមារទីទាល់ក្រនៅក្នុងឃុំអង្គរ ស្រុកមេសាង ខេត្តព្រៃវែង។

តារាស្រីរូបនេះបានបង្ហោះសារនៅលើហ្វេសប៊ុករបស់ខ្លួនថា ក្នុងនាមរូបនាងជាសិល្បការិនីម្នាក់ដែលត្រូវជាប់ពិន័យរយៈពេល1ឆ្នាំពីក្រសួងវប្បធម៌មិនឱ្យមានគ្រប់សកម្មភាពក្នុងវិស័យសិល្ប: អាស្រ័យហេតុនេះនាងមិនអាចបង្ហាញខ្លួនឬសម្តែងសកម្មភាពផ្សេងៗដែលពាក់ព័ន្ធនឹងសិល្ប:បានឡើយ ប៉ុន្ដែនាងក៏មិនបានអាក់អន់ចិត្ត ឬខឹងសម្បាអ្វីនោះទេ។ នាងបានបន្ដទៀតថា «នាងខ្ញុំបានបង្វែរការសម្តែងគ្រប់សកម្មភាពក្នុងសិល្ប: មកបង្កើតសកម្មភាពមនុស្សធម៏ដោយចេញពីចិត្ត ចេញពីបេះដូង ទោះបីតិចក្តីច្រើនក្តី ទៅតាមលទ្ធភាពដែលនាងខ្ញុំមាន និងអាចធ្វើបាន។ ដូចជាម្សិលមិញនេះ ថ្ងៃទី 1 ខែធ្នូ ឆ្នាំ 2017 នាងខ្ញុំបាននាំយកនូវអំណោយសម្ភារសិក្សាផ្សេងៗដូចជា កង់3គ្រឿង សៀវភៅ ប៊ិច ខ្មៅដៃ ជ័រលុប និង បន្ទាត់ ចំនួន490ឈុត(សម្រាប់490នាក់) ព្រមទាំងថវិកាបន្តិចបន្តួចទៅចែកជូនបងប្អូន និងលោកគ្រូ-អ្នកគ្រូដែលមានវត្តមាននៅសាលាបឋមសិក្សា សូរ ដែលស្ថិតនៅភូមិសូរថ្មី ឃុំអង្គរ ស្រុកមេសាង ខេត្តព្រៃវែង ដើម្បីជួយសម្រួលដល់ភាពខ្វះខាតរបស់ពួកគាត់»។

នៅក្នុងទឹកចិត្តសប្បុរស និងការចូលរួមចែករំលែកក្ដីស្រឡាញ់ដែលជាផ្នែកមួយនៃការជួយការងារសង្គម តារាសិចស៊ីរូបនេះបានបញ្ជាក់បន្ថែមថា «មូលហេតុដែលនាងខ្ញុំធ្វើសកម្មភាពមួយនេះឡើង គឺដោយសារនាងខ្ញុំធ្លាប់នឹកស្រមៃកាលពីនាងខ្ញុំនៅតូចៗរៀននៅបឋមសិក្សា គឺនាងខ្ញុំធ្លាប់ឈររង់ចាំទទួលអំណោយបែបនេះដោយសប្បាយចិត្ត ទើបមកដល់ថ្ងៃនេះ ពេលនេះ វេលានេះខ្ញុំបានធ្វើសកម្មភាពមួយនេះឡើង។ ខ្ញុំសន្យានឹងខ្លួនឯងថា ខ្ញុំនឹងបន្តការងារផ្សេងៗទៀតដែលទាក់ទងនឹងមនុស្សធម៏តាមរយៈរូបភាពផ្សេងៗទៀតជូនដល់អ្នកដែលខ្វះខាត ។ វប្បធម៌ចែករំលែកមួយនេះ វាធ្វើឱ្យនាងខ្ញុំមានអារម្មណ៍ជ្រះថ្លា សប្បាយរីករាយ ពេញចិត្តនឹងធ្វើ ហើយនឹងបន្តធ្វើវាទៀតតាមលទ្ធភាពនាងខ្ញុំ»៕

នៅថ្ងៃទី2 ខែធ្នូ ឆ្នាំ2017 នេះ បើតាមរយៈសារព័ត៌មាន kenh14 ដែលបានចេញផ្សាយមុននេះបន្ដិចបានឱ្យដឹងថា​ មាននារីៗមួយចំនួនដែលមានភាពក្លាហាន មិនភ័យខ្លាចមុខកាំបិតវះកាត់របស់គ្រូពេទ្យកែសម្ផស្សឡើយ ដោយសារតែចង់មានទម្រង់មុខដូចកំពូលតារាហូលីវូដល្បីៗ។

ដើម្បីស្រាយចម្ងល់ឱ្យបានច្បាស់ឡើង សូមទស្សនារូបភាពនារីក្លាហានទាំងអស់នោះខាងក្រោមនេះ៖

1.នាង Sahar Tabarវះកាត់ឱ្យដូច Angelina Jolie

នាង Sahar Tamarahមានអាយុ 19 ឆ្នាំ ត្រូវបានគេស្គាល់ថាជាជនជាតិអ៊ឺរ៉ង់ មកពីទីក្រុងតេអេរ៉ង់  បានសម្រេចចិត្តធ្វើការវះកាត់កែសម្ផស្សផ្ទៃមុខ ដោយឆ្លងកាត់មុខកាំបិតរបស់គ្រូពេទ្យចំនួន 50 ដងរួចមកហើយក្នុងរយៈពេលតែប៉ុន្មានខែប៉ុណ្ណោះ ដើម្បីឱ្យមានទម្រង់ផ្ទៃមុខដូចកំពូលតារាល្បីឈ្មោះ Angelina Jolie។ នារីរូបនេះត្រូវស៊ូទ្រាំបង្អត់អាហារដើម្បីសម្រកទម្ងន់ខ្លួនឯងឱ្យនៅសល់ត្រឹមតែ 40 គីឡូ ដែលអាចឱ្យអ្នកឯទៀតចាប់អារម្មណ៍បែរមកតាមមើលនាងដែលមានរូបរាងដូចគ្នាបេះបិទនឹងតារាស្រីល្បីឈ្មោះ Angelina Jolie ។

2.នាង Jordan James Parke វះកាត់ឱ្យដូច Kim Kardashian

កាលពីឆ្នាំមុន , នារីភេទទីបីម្នាក់ត្រូវបានអ្នកសារព័ត៌មានស្គាល់ឈ្មោះថា Jordan Parkes បានព្យាយាមកែសម្ផស្ស និងភេទឱ្យដូចតារាស្រី Kim Kardashian ហើយនាងបានចំណាយប្រាក់ 130,000 ផោន ក្នុងការកែសម្ផស្សចំនួន 50 ដង ។

3.ស្រ្តីពីរនាក់ម្ដាយកូនវះកាត់រូបរាង និងទម្រង់មុខឱ្យដូចតារាសម្ដែងនាង Katie Price

ស្ត្រីជាម្តាយក្មេកមានឈ្មោះថា Georgina Clarke មានវ័យ 38 ឆ្នាំ និងកូនប្រសាស្រីឈ្មោះKayla Morris មានវ័យ 20 ឆ្នាំ បានធ្វើឱ្យភ្ញាក់ផ្អើលដល់បណ្ដាញសារព័ត៌មានអន្ដរជាតិ Daily Mail ខណៈដែលពួកគេទាំងពីរនាក់បានចំណាយប្រាក់ចំនួន 56,000 ផោន ព្យាយាមកែរូបរាង និងទម្រង់មុខឱ្យស្រដៀងទៅនឹងតារាសម្ដែងនាង Katie Price៕

បើតាមរយៈបណ្ដាញសង្គមហ្វេសប៊ុករបស់ផលិតកម្ម មាតុចក្រ នៅថ្ងៃទី1 ខែធ្នូ ឆ្នាំ2017 នេះ​ បានបញ្ចេញនូវរូបភាពមួយចំនួន និងបង្ហាញជូនអំពីសកម្មភាពក្រៅឆាកនៃការផលិតខ្សែភាពយន្ដធំលំដាប់ស្ដង់ដាអន្ដរជាតិ ដែលកាន់តែធ្វើឱ្យទស្សនិកជនអត់ទ្រាំពុំបាន បើមិនបានទស្សនាភាពយន្ដល្បីមួយនេះ។

ជាមួយគ្នានេះដែល លោកហ៊ុយ យ៉ាឡេង បានបញ្ជាក់នៅលើហ្វេសប៊ុករបស់លោកថា « ថ្ងៃ១៣កើត ខែមិគសិរ ឆ្នាំរកា ជាដើមខែធ្នូ! ធ្មប់ចេញរូបភាពផ្លូវការ Official Poster និងសកម្មភាពក្រៅឆាកដំបូង B-Roll និងចាក់បញ្ចាំងនៅថ្ងៃព្រហស្បតិ៍ ៩កើត ខែមាឃ ឆ្នាំរកា ខាងមុខនេះ! »។ គួរបញ្ជាក់ផងដែរថា រឿង ” ធ្មប់ ” នឹងដាក់បញ្ជាំងនៅថ្ងៃទី 25 ខែ មករា ឆ្នាំ2018 នេះ គ្រប់រោងកុននៅក្នុងប្រទេសកម្ពុជា ហើយរឿងនេះទៀតសោទ ក៏បានត្រៀមខ្លួនទៅបង្អួតសម្រស់របស់ខ្លួន នៅលើទឹកដីសហរដ្ឋអាមេរិកផងដែរ។

សូមរំឭកផងដែរថា ប្រភេទរឿងមន្ដអាគមអូមអាម ធ្មប់ព្រាយបីសាច ដ៏សែនភ័យខ្លាចញាប់ញ័ររន្ធត់មួយនេះ ត្រូវបានចូលរួមសម្ដែងដោយតារាល្បីៗជាច្រើនដួង ជាពិសេសរួមមាន កញ្ញា ហ៊ិន ច៍ន្ទនីរ័ត្ន និងលោក ហ៊ុយ យ៉ាឡេង ដែលជាអ្នកដឹកនាំរឿងល្បី ” វិកលចរឹត ” ផងដែរ ៕

សូមទស្សនាសកម្មភាពក្រៅឆាកខាងក្រោមនេះ៖

នៅថ្ងៃទី 01 ខែធ្នូ ឆ្នាំ2017 នេះ តារាបង្ហាញម៉ូដស្រី និងជាប្រធានក្រុមបង្ហាញម៉ូដ “តារារះកម្ពុជា” ត្រូវបានគេស្គាល់ថាជាកញ្ញា សូរ្យ អេណា បានបង្ហោះរូបភាពមួយសន្លឹកអមដោយសារដ៏វែងអន្លាយនៅលើបណ្ដាញសង្គម ហ្វេសប៊ុក ដែលត្រូវបានគេមើលឃើញថា រូបភាពរបស់នាងបានស្ដែងពីភាពសិចស៊ី និងទម្រង់ដើមទ្រូងដ៏មូលក្លំ។

ក៏ប៉ុន្ដែតាមរយៈសាររបស់នាង ត្រូវបានគេសង្កេតឃើញថា នាងហាក់បីដូចជាកំពុងមានទុកក្រៀមក្រំនៅក្នុងចិត្ត ឬមួយក៏នាងគ្រាន់តែចង់ស៊ីអារម្មណ៍ក៏អាចថាបាន។ នារីម៉ូដែលរូបនេះបានរៀបរាប់ជាភាសាអង់គ្លេស ដែលមាន័យថា « ​នារីប្រៀបបីដូចជាផ្លែមប៉ោមដែលនៅលើដើម។ ផ្លែដែលល្អជាងគេគឺនៅចុងដើម។ មានក្មេងប្រុសម្នាក់មិនចង់ឈោងបេះផ្លែដែលល្អមួយនោះទេ ពីព្រោះវាភ័យខ្លាចធ្លាក់ពីលើដើមឈើមកនឹងឈឺចាប់។ ផ្ទុយទៅវិញវាគ្រាន់តែចង់បេះផ្លែប៉ោមដែលនៅជុំវិញ និងរើសអារលួយៗពីដីមកតែប៉ុណ្ណោះ បើវាមិនល្អក្ដី ប៉ុន្តែងាយស្រួល»។

រឿងនិទានរបស់នាងមួយនេះ ហាក់បីដូចជាកំពុងតែបង្រៀនជីវិតរបស់ខ្លួននាងឱ្យកាន់តែមានតម្លៃបន្ថែម និងព្យាយាមពង្រឹងខ្លួនបន្ថែមទៀតនៅក្នុងសង្គមសព្វថ្ងៃនេះ ទើបយ៉ាងនេះហើយបានជានាងបានបញ្ជាក់បន្ថែមទៀតថា « ដូច្នេះផ្លែប៉ោមនៅកំពូលគឺជាកំហុសឆ្គងអ្វីមួយដែលនៅជាប់ជាមួយនឹងពួកគេ នៅពេលដែលពួកគេគិតថា ខ្លួនគេពិតជាអស្ចារ្យបំផុត។ ពួកគេគ្រាន់តែរង់ចាំក្មេងប្រុសម្នាក់នោះ ឱ្យដើរតាមគេ ហើយក៏ជាម្នាក់ដែលក្លាហានគ្រប់គ្រាន់ ដើម្បីឡើងទៅឱ្យដល់ចុងមែកឈើផងដែរ។ ត្រូវអត់ធ្មត់។ អ្វីគ្រប់យ៉ាងកំពុងតែកើតឡើងតំណាលគ្នា។ ត្រូវបន្តមានពន្លឺហើយមិនដែលនៅស្ងៀមទេ។ អ្នកត្រូវបានបង្កើតឡើង ដើម្បីរស់នៅក្នុងជីវិតដ៏អស្ចារ្យ !!!! »៕

0

នៅថ្ងៃទី1 ខែធ្នូ ឆ្នាំ2017នេះ នៅលើបណ្ដាញសង្គមហ្វេសប៊ុករបស់តារាស្រី គង់ ចាន់ស្រីមុំ បានបង្ហោះសារដ៏សែនក្ដៅស្លឹកត្រចៀកមួយចំពោះសារព័ត៌មានថៃក្លែងក្លាយមួយដែលបានសរសេរប្រឌិតរឿងបំភ្លៃការពិត ដោយយករូបនាង និងស្វាមីនៅក្នុងថ្ងៃរៀបមង្គលការកំពុងសំពះផ្ទឹមទៅកាត់តជាមួយបុរសថៃវ័យចំណាស់ម្នាក់ និងថែមទាំងដាក់ចំណងជើងថា «រៀបការមិនអញ្ជើញឪពុក ព្រោះអៀនខ្មាសដែលឪពុកក្របើកម៉ូតូកង់បី  បានប្រពន្ធអ្នកមានបោះបង់ឪពុកក្រលំបាកចោល ឪពុកក្រគ្មានលុយ អត់អីស៊ី ស៊ីតែដៃម៉ូតូកង់បីរហូតដល់ឈឺស្លាប់»។

ឃើញហើយទ្រាំមិនបាន តារាស្រីរូបនេះបានពន្លះព័ត៌មានក្លែងក្លាយនោះ និងបកស្រាយនៅលើហ្វេសប៊ុកខ្លួនថា «នាងខ្ញុំ​ និង​ស្វាមី​សូមបដិសេធព័ត៌មានថៃមួយនេះ​ ដែលសរសេរបំផ្លើសកាពិត សូមមេត្តាយកវិជ្ជាជីវៈជាអ្នកសារព័ត៌មានមកពិចារណាផងមុននឹងសរសេរ ហើយនាងខ្ញុំក៏មិនដឹងថា សារពត៌មាននេះចេញមកពីប្រភពណាទេ ហើយមានបំណងអ្វីដែរបានជាយករូបភាពយើងខ្ញុំទាំង2​ នាក់មកភ្ជាប់ជាមួយអត្ថបទមួយនេះ​ សូមមេត្តាកុំដើម្បីតែផលប្រយោជន៍ខ្លួនឯង ហើយមកបំផ្លាញកិត្តិយសអ្នកដទៃបែបនេះអី។ នេះជារូបភាពលោកឱពុក​ និង​អ្នកម្តាយ​ របស់ស្វាមីនាងខ្ញុំ​ក្នុងថ្ងៃមង្គលការរបស់យើងទាំងពីរ​»។

គង់ ចាន់ស្រីមុំ បានបញ្ជាក់បន្ថែមទៀតថា ដូច្នេះសូមបងប្អូនទាំងអស់កុំមានការយល់ច្រឡំ​ ឬជឿលើព័ត៌មានដែលមានប្រភពមិនច្បាស់លាស់នេះទៀត។ សូមជួយ​ស៊ែរ​ផងដើម្បីកុំឱ្យមានការយល់ច្រឡំបន្តទៀត​។

សូមអរគុណ​ចំពោះការស្រឡាញ់​ និងគាំទ្រយើងខ្ញុំទាំង2នាក់កន្លងមក៕