Category: សង្គម និងសេដ្ឋកិច្ច

ទីកន្លែងបម្រាមដែលស្រីក្រមុំបរិសុទ្ធមិនគួរទៅ
មានទីកន្លែងជាច្រើនដែលបុរសនារីយើងច្រើនតែចូលចិត្តទៅជួបគ្នាតាមនិស្ស័យកំលោះក្រមុំ តែក៏មានទីកន្លែងជាច្រើនទៀតដែរដែលយើងនាំគ្នាហៅថា ទីកន្លែងបម្រាមដែលស្រីក្រមុំបរិសុទ្ធ (ឬមិនបរិសុទ្ធ តែមិនចង់បង់ខ្លួនបង់ប្រាណមុនពេលវេលាសមរម្យ) មិនគួរឈានជើងចូលទៅឡើយបើមិនចាំបាច់ ព្រោះអាចនិយាយបានថា អ្នកនាងអាចនឹងស្ថិតក្នុងស្ថានការណ៍ដែលប្រថុយប្រថានក្នុងការបាត់បង់ភាពបរិសុទ្ធ បើសិនជាភ្លេចខ្លួន ឬហាមចិត្តខ្លួនឯងមិនបាននោះ។
1.ទីកន្លែងដំបូង គឺផ្ទះមនុស្សប្រុស (ផ្ទះសង្សារ ឬផ្ទះមិត្តប្រុស)
ព្រោះអាចរាប់បានថា អ្នកនាងកំពុងស្ថិតក្នុងរូងខ្លាដែលកំពុងស្រេកឃ្លាន និងមានឱកាសបាត់បង់ភាពបរិសុទ្ធខ្ពស់បំផុត ព្រោះថា បើអ្នកនាងទៅផ្ទះរបស់គេ ហើយចេញមកវិញដោយគ្មានខូចខាតសឹករេចរឹលអ្វីនោះ នៅក្នុងក្រុមមនុស្សប្រុសដូចគ្នា គេប្រកាន់ថាបុរសម្នាក់នោះ “គោងាប់សុទ្ធៗ ចំណីដល់មាត់ហើយមិនចេះស៊ី” ព្រោះបើគេតាំងចិត្តចង់មាន SEX ជាមួយអ្នកនាងនៅក្នុងផ្ទះរបស់គេហើយនោះ គេនឹងរៀបចំទីកន្លែងទុកជាមុនយ៉ាងល្អល្អះរួចជាស្រេចមិនខាន (រៀបចំទីកន្លែងនៅទីនេះគឺមានន័យថា មានការឃ្លៀរ៍មនុស្សឱ្យចេញពីទីកន្លែងនោះ ឬសាងបរិយាកាសឱ្យរ៉ូមែនទិកដើម្បីបង្កឱ្យមានអារម្មណ៍ស្រើបស្រាល)។ វិធីដែលល្អ គួរចៀសវាងក្នុងការទៅផ្ទះរបស់គេ ឬបើចៀសមិនរួច ក៏គួរតែមានមិត្តភ័ក្តិទៅជាមួយគ្រាន់បានការពារគ្នា ល្អជាងការទៅតែពីរនាក់ស្ងាត់ៗជាមួយគេ។
2.ទីកន្លែងទីពីរ គឺទីកន្លែងកម្សាន្តនៅពេលយប់ដែលមានការផឹកគ្រឿងស្រវឹង
ព្រោះកាលៈទេសៈ និងទីកន្លែងអាចនឹងធ្វើឱ្យអ្នកនាងបដិសេធការផឹកគ្រឿងស្រវឹងមិនបាន និងឬទ្ធិរបស់ជាតិអាល់កុលអាចធ្វើឱ្យអ្នកនាងភ្លាត់ស្នៀត ដល់ថ្នាក់បាត់បង់ភាពបរិសុទ្ធបាន។ វិធីកែបញ្ហានៅពេលធ្លាក់ខ្លួនក្នុងស្ថានការណ៍បែបនេះប្រហែលជាគេចមិនផុតពីការរកមិត្តភ័ក្តិដែលជឿទុកចិត្តបំផុតណាម្នាក់ទៅជាមួយ ទុកគ្រាន់បង្អាក់ការបង្ខំឱ្យអ្នកនាងផឹកពីសំណាក់មនុស្សប្រុស។
3.ទីកន្លែងទីបី គឺផ្ទះពួកម៉ាករបស់គេ
ព្រោះគេអាចនឹងដឹងគ្នាជាមួយមិត្តភ័ក្តិគេពីផែនការសម្រេចទោសអ្នកនាងជាមុនហើយ ដោយយកផ្ទះរបស់មិត្តភ័ក្តិធ្វើជាសមរភូមិស្នេហ៍ និងជាធម្មជាតិពេលទៅផ្ទះអ្នកដទៃ យើងត្រូវតែខ្លាចចិត្តគេមិនហ៊ានទាមទារ ឬស្រែកឡូឡាអ្វីឡើយ និងបូកជាមួយការសហការរបស់ពួកម៉ាកគេផងនោះ ធ្វើឱ្យអ្នកនាងប្រៀបដូចជាសត្វជ្រូកនៅលើជ្រុញដែលរង់ចាំឱ្យគេចាត់ការដូច្នោះដែរ។ វិធីដែលល្អគួរចៀសវាង ឬប្រកែកមិនទៅឱ្យបាន។
4.ផ្ទះរបស់អ្នកនាងខ្លួនឯង (ពេលគ្មានអ្នកណានៅ)
មិនថាដោយហេតុផលអ្វីក៏ដោយ អ្នកនាងមិនគួរនាំគេមកផ្ទះរបស់អ្នកនាងពេលគ្មាននរណានៅនោះឡើយ ព្រោះគេនឹងគិតថា អ្នកនាងបបួលគេ ឬហុចដៃឱ្យ និងរីករាយក្នុងការមាន SEX ជាមួយគេ ដែលធ្វើឱ្យគេមានភាពជឿជាក់លើខ្លួនឯងកាន់តែខ្លាំងឡើង ដូច្នេះបើចង់បបួលគេទៅផ្ទះ ក៏គួរតែមានសាច់ញាតិ មនុស្សចាស់ ឬនរណាក៏ដោយដើរចុះដើរឡើងនៅក្នុងផ្ទះផង (រឹតតែច្រើនរឹតតែល្អ) ដើម្បីសុវត្ថិភាពរបស់អ្នកនាងខ្លួនឯង៕
ដោយអ្នកគ្រូ ឆវី
December 12, 2017
Dortmund តែងតាំងលោក Stoger ក្រោយពីបណ្តេញលោក Bosz
លោក Peter Bosz ត្រូវបានបណ្តេញចេញដោយក្លិប Borussia Dortmund ក្រោយពីបានជួបលទ្ធផលដ៏ខកចិត្តជាបន្តបន្ទាប់ និងក្រោយពីចាញ់ក្រុម Werder Bremen ក្នុងលទ្ធផល 2-1 ក្នុងការប្រកួតក្របខ័ណ្ឌ Bundesliga នៅលើទឹកដីខ្លួនឯងកាលពីថ្ងៃសៅរ៍។
លោក Bosz បានបាត់បង់ការងារក្រោយពីជួបរដូវកាលដ៏ត្រដាបត្រដួសមួយទាំងក្នុងក្របខ័ណ្ឌ Bundesliga និងក្របខ័ណ្ឌអឺរ៉ុប ហើយក្លិបយក្សរបស់អាល្លឺម៉ង់មួយនេះបានប្រកាសពីការចាកចេញរបស់លោក Bosz ក្នុងសន្និសីទសារព័ត៌មានមួយកាលពីថ្ងៃអាទិត្យ។ លោក Hans-Joachim Watzke នាយកប្រតិបត្តិរបស់ក្លិប Dortmund បានឲ្យដឹងថា៖ «កាលពីយប់មិញ ក្នុងកិច្ចសន្ទនាមួយជាមួយនឹងលោក Peter Bosz យើងបានសម្រេចចិត្តថា យើងនឹងចែកផ្លូវជាមួយគាត់ភ្លាម។
វាពិតជារឿងដ៏គួរឲ្យរំជួលចិត្ត ប៉ុន្តែ ក៏គួរឲ្យគោរពផងដែរ។ ក្នុងនាមខ្ញុំតំណាងឲ្យក្លិប Dortmund ខ្ញុំសូមថ្លែងអំណរគុណដល់លោក Peter Bosz។ យើងនៅតែចាត់ទុកថា គាត់ជាគ្រូបង្វឹកដ៏អស្ចារ្យម្នាក់»។ លោក Bosz បានចូលកាន់តំណែងក្នុងក្លិបស្ថិតក្នុងក្របខ័ណ្ឌ Bundesliga មួយនេះ កាលពីរដូវក្តៅ ប៉ុន្តែ បើទោះបីបានចាប់ផ្តើមយ៉ាងល្អក៏ដោយ ប៉ុន្តែ ទម្រង់លេងរបស់ពួកគេបានធ្លាក់ចុះយ៉ាងគំហុក ហើយគ្រូបង្វឹកសញ្ជាតិហូឡង់រូបនេះ ក៏ធ្លាក់ចូលក្នុងសម្ពាធតែម្តង។
ក្លិប Dortmund បានសម្រេចជ្រើសយកជម្រើសដ៏គួរឲ្យភ្ញាក់ផ្អើលមួយ តាមរយៈការដាក់ការជឿជាក់ទៅលើលោក Peter Stoger ក្នុងការជួយសង្គ្រោះជោគវាសនារបស់ពួកគេ។
លោក Stoger ទើបតែត្រូវបានបណ្តេញចេញដោយក្លិប Cologne កាលពីដើមរដូវកាលនេះ ក្រោយពីពួកគេបានធ្លាក់ទៅឈរក្នុងតំបន់កាត់ចោល។ លោក Stoger បានឲ្យដឹងថា៖ «ខ្ញុំពិតជារីករាយណាស់ក្នុងការក្លាយជាគ្រូបង្វឹករបស់ក្រុមនេះ និងស្ថិតក្នុងកីឡដ្ឋាននេះ»៕
ប្រភពពី៖ The Sun
December 12, 2017
ធ្វើបែបណាដើម្បីឱ្យបបូរមាត់ទន់រលោងយ៉ាងឆាប់រហ័ស?
ការមើលថែបបូរមាត់ក៏សំខាន់ដូចគ្នាទៅនឹងកន្លែងផ្សេងៗទៀតនៃរាងកាយដែរ។ បបូរមាត់បានដើរតួយ៉ាងសំខាន់ក្នុងការផ្តល់ឱ្យអ្នកនូវភាពឆើតឆាយ និងទាក់ទាញបំផុត។ ការផ្លាស់ប្តូរនៃអាកាសធាតុ និងកត្តាផ្សេងៗបានធ្វើឱ្យបបូរមាត់របស់អ្នកប្រែមកជាស្ងួត និងប្រេះបែកជាដើម ដែលជាហេតុនាំឱ្យសម្រស់នៃស្នាមញញឹមរបស់អ្នកត្រូវធ្លាក់ចុះ។ បើអ្នកកំពុងតែស្វែងរកវិធីដែលធ្វើឱ្យបបូរមាត់ទន់រលោងយ៉ាងឆាប់រហ័សនោះ សូមស្វែងរកគំនិតដ៏អស្ចារ្យតាមរយៈអត្ថបទខាងក្រោមនេះ៖
• ផ្តល់សំណើមឱ្យបបូរមាត់
នេះជាដំណាក់កាលសំខាន់ជាងគេបំផុតក្នុងការធ្វើឱ្យបបូរមាត់ទន់រលោង។ អ្នកអាចប្រើច្រាសដុសធ្មេញថ្មី ឬច្រាសដែលអ្នកប្រើរាល់ថ្ងៃ ដែលមានសរសៃច្រាសមិនទន់ពេកមកដុសថ្នមៗលើបបូរមាត់ជាប្រចាំ។ ទោះយ៉ាងណា សូមចាំថាគ្មានវិធីណាផ្តល់សំណើមដល់បបូរមាត់ដែលត្រឹមត្រូវល្អ និងមានប្រយោជន៍ជាងទឹកនោះទេ ដូច្នេះសូមចាប់ផ្តើមថែរក្សាបបូរមាត់របស់អ្នកឱ្យទន់រលោង ដោយការទទួលទានទឹកឱ្យបានច្រើនជារៀងរាល់ថ្ងៃ។
• ខាត់ស្បែកនៅបរិវេណជុំវិញបបូរមាត់
ចាប់ផ្តើុមដោយការយកច្រាសដុសធ្មេញមកត្រដុសថ្នមៗលើបបូរមាត់ ផ្នែកខាងក្រោមពីម្ខាងទៅម្ខាងទៀតប្រមាណជា3-4វិនាទី។ បន្ថែមដោយប្រេងអូលីវ ឬល្បាយនៃសូដា និងទឹក លាបនៅលើបបូរមាត់ ដើម្បីជួយថែបំប៉នដល់បបូរមាត់របស់អ្នក។ ការខាត់ស្បែកនៅបរិវេណជុំវិញបបូរមាត់ឱ្យបានត្រឹមត្រូវ នឹងជួយកម្ចាត់កោសិកាស្បែកចាស់ៗដែលជាមូលហេតុធ្វើឱ្យបបូរមាត់របស់អ្នកស្ងួតគ្រើមមិនស្អាត។
• ប្រើប្រេងលាបមាត់ដែលត្រឹមត្រូវ
បន្ទាប់ពីកម្ចាត់កោសិកាស្បែកចាស់ៗនៅលើបបូរមាត់ចោលរួចហើយ ត្រូវលាងសម្អាតបបូរមាត់របស់អ្នកជាមួយនឹងទឹកក្តៅឧណ្ហៗ ហើយបន្តដោយការលាបប្រេងលើបបូរមាត់។ ប្រេងលាបមាត់ដែលល្អបំផុតគឺជាប្រេងណាដែលជួយការពារបបូរមាត់របស់អ្នកពីការប្រេះបែកបានយ៉ាងមានប្រសិទ្ធភាព។
• ទប់ស្កាត់ការខាំ និងលិទ្ធបបូរមាត់
បបូរមាត់ទន់រលោង ពិតជាមិនអាចនៅជាមួយអ្នកបានទេ បើអ្នកមានទម្លាប់ខាំ ឬលិទ្ធបបូរមាត់គ្រប់ពេលវេលានោះ។ ទឹកមាត់ដែលបានមកពីការខាំ ឬ លិទ្ធបបូរមាត់ មិនបានធ្វើឱ្យបបូរមាត់របស់អ្នកទន់រលោងនោះទេ ប៉ុន្តែមានតែធ្វើឱ្យបបូរមាត់របស់អ្នកកាន់តែស្ងួតទៅវីញទេ៕
December 12, 2017
Otamendi ជួយឲ្យ Man City នាំមុខដាច់ ខណៈ Rooney សង្គ្រោះ Everton
Manchester City បានបោះជំហានដ៏ធំមួយទៀតឆ្ពោះទៅកាន់ការឈ្នះពាន ខណៈដែលក្រុមកំពុងនាំមុខមួយនេះបានផ្តួលក្រុម Manchester United ក្នុងលទ្ធផល 2-1 ដើម្បីកត់ត្រាជ័យជម្នះជាលើកទី14ជាប់ ៗគ្នាក្នុងការប្រកួតក្របខ័ណ្ឌ Premier League ខណៈពេលដែលគ្រាប់បាល់តាមស្មើរបស់ Wayne Rooney បានជួយឲ្យក្រុម Everton បញ្ចប់ក្នុងលទ្ធផលស្មើ 1-1 នៅលើទឹកដីក្រុម Liverpool កាលពីថ្ងៃអាទិត្យ។
Man City បានតាមស្មើកំណត់ត្រាឈ្នះជាប់ៗគ្នាកាលពីពេលមុនរបស់ក្រុម Arsenal ដែលធ្លាប់បានបង្កើតឡើងនៅចន្លោះខែកុម្ភៈ និងខែសីហា ឆ្នាំ2002 ក្រោយពីខ្សែការពារ Nicolas Otamendi បានរកគ្រាប់បាល់ឈ្នះនៅតង់ទី2។ បច្ចុប្បន្នក្រុមរបស់លោក Pep Guardiola កំពុងនាំមុខ11ពិន្ទុដាច់ លើក្រុមឈរលេខ2 Man United ដែលបានរងបរាជ័យនៅកីឡដ្ឋាន Old Trafford ជាលើកទី1របស់ពួកគេក្នុងចំណោមការប្រកួត41លើកក្នុងរាល់យុទ្ធនាការទាំងអស់។
ការទទួលជ័យជម្នះចុងក្រោយគេនេះរបស់លោក Guardiola នឹងផ្តល់ផលលំបាកមួយសម្រាប់លោក Jose Mourinho ក្នុងការប្រជែងដណ្តើមពាន ខណៈដែលវាហាក់បង្ហាញថា បច្ចុប្បន្នក្រុម Man City មិនបោះបង់ការនាំមុខរបស់ខ្លួនឡើយ។ លោក Mourinho បានទទួលស្គាល់ថា ពាននឹងធ្លាក់ទៅលើដៃក្រុម Man City តាមរយៈការនិយាយថា៖ «ប្រហែលមែនហើយ…ការមានប្រៀបរបស់ពួកគេពិតជាធំណាស់»។
Man United មានអារម្មណ៍ថា ពួកគេគួរតែទទួលបានបាល់ប៉េណាល់ទីសម្រាប់ការប្រជែងរបស់ Otamendi ទៅលើខ្សែបម្រើ Ander Herrera ប៉ុន្តែ បែរជាត្រូវរងការពិន័យកាតក្រហមជំនួសវិញ។ លោក Mourinho បានបន្ថែមទៀតថា៖ «Manchester City គឺជាក្រុមដ៏ខ្លាំងមួយ ហើយពួកគេត្រូវបានការពារដោយសំណាង ហើយព្រះជាម្ចាស់នៃកីឡាបាល់ទាត់ក៏នៅចាំជួយដល់ពួកគេផងដែរ»៕
ប្រភពពី៖ Sky Sports
December 12, 2017
តើមហាសេដ្ឋីថ្មោងថ្មីដោយសារ Bitcoin គឺនរណា?
ក្នុងអំឡុងពេលដែលមនុស្សទូទាំងពិភពលោកកំពុងតែប្រកែកគ្នាថា តើ Bitcoin មានឱកាសអាចក្លាយជាពពុះសាប៊ូឌីជីថល(ជំនួញដែលរីកធំលឿន តែងាយបែក)ដែរឬទេ? រហូតទៅដល់មានសេដ្ឋីៗមួយចំនួនកំពុងតែគិតហើយគិតទៀតថា តើគួរវិនិយោគលើ Bitcoin ឬក៏អត់នោះ? មានមនុស្សជាច្រើនណាស់ដែលមិនទាន់ដឹងថា មានមនុស្សពីរនាក់បានក្លាយជាមហាសេដ្ឋីដោយសារ Bitcoin ដែលពួកគេកំពុងកាន់ក្នុងដៃ។
សារព័ត៌មានក្នុងប្រទេសអង់គ្លេស នាំមុខគេដោយ តេឡេហ្ក្រាហ្វ បានបង្ហើបឱ្យដឹងថា ខាមេរ៉ន់ និងថៃលើរ៍ វិងឃើលវ៉ូស(Vinklevoss)បានក្លាយជាមហាសេដ្ឋីលំដាប់ពាន់លានដុល្លារដោយសារការចូលទិញ Bitcoin កាលពីឆ្នាំ 2013 ដែលក្រោយមកតម្លៃ Bitcoin ស្ទុះឡើងខ្ពស់ដល់ 10,000 ដុល្លារក្នុង 1 Bitcoin ធ្វើឱ្យទាំងពីរនាក់បងប្អូនភ្លោះក្លាយជាមហាសេដ្ឋីក្នុងចំណោមមហាសេដ្ឋីលំដាប់ពាន់លានដុល្លារដែលមានបានដោយសារ Bitcoinដោយបរិយាយ។
របាយការណ៍របស់តេឡេហ្ក្រាហ្វនៅបានប្រាប់បន្ថែមទៀតថា ថៃលើរ៍ – ខាមេរ៉ន់ វិងឃើលវ៉ូស ចាប់ផ្ដើមកាន់កាប់ Bitcoin តាំងពីឆ្នាំ 2013 ដោយក្នុងពេលនោះតម្លៃរបស់ត្រកូលប្រាក់ឌីជីថលកំពូលពេញនិយមមួយនេះនៅមានតម្លៃត្រឹមតែ 120 ដុល្លារប៉ុណ្ណោះក្នុង1 Bitcoin ជាមួយគ្នានោះតេលេហ្ក្រាហ្វជឿថា បងប្អូនភ្លោះ វិងឃើលវ៉ូស ប្រហែលជាមាន Bitcoin នៅក្នុងដៃមិនតិចជាង 1 សែន Bitcoin ឬប្រមាណ 1,16 ពាន់លានដុល្លារអាមេរិកឡើយ។
ទាំងអស់នេះ បើត្រឡប់ទៅក្រោយវិញកាលពីឆ្នាំ 2015 ពីរនាក់បងប្អូនវិងឃើលវ៉ូសធ្លាប់បានផ្ដល់បទសម្ភាសជាមួយ CNN Money ដោយបានប្រាប់ថា នៅពេលអនាគត តម្លៃរបស់ Bitcoin នឹងហក់ឡើងខ្ពស់ និងមានឱកាសច្រើនដែលវានឹងកើនតម្លៃឡើងក្លាយជាទ្រព្យសម្បត្តិលំដាប់លានលានដុល្លារមិនខាន និងដោយសារជំនឿនេះ ធ្វើឱ្យថៃលើរ៍ និងខាមេរ៉ន់បដិសេធក្នុងការបញ្ចេញ Bitcoin ទោះជាក្នុងអំឡុង 3 – 4 ឆ្នាំមុន តម្លៃរបស់ Bitcoin ធ្លាក់ចុះយ៉ាងខ្លាំងក៏ដោយ។
តើ ថៃលើរ៍ និងខាមេរ៉ន់ វិងឃើលវ៉ូស ជានរណា?
មកដល់ត្រង់នេះ មិត្តអ្នកអានអាចនឹងនឹកឆ្ងល់ថា តើបងប្អូនភ្លោះវិងឃើលវ៉ូសនេះជានរណា និងមានភាពសំខាន់យ៉ាងណាខ្លះមិនខាន។ ការពិតទៅបងប្អូនភ្លោះវិងឃើលវ៉ូសអាចរាប់បានថា ជាមនុស្សល្បីឈ្មោះម្នាក់ដែរ នៅពេលដែលទាំងពីរនាក់មានឈ្មោះថា ជាម្ចាស់ផ្នត់គំនិតក្នុងបង្កើតហ្វេសប៊ុកបណ្ដាញទំនាក់ទំនងសង្គមដ៏ធំបំផុតក្នុងពេលបច្ចុប្បន្ន មុនពេលដែលផ្នត់គំនិតនេះបានរបូតធ្លាក់ទៅដល់ដៃ ម៉ាក ហ្សាក់ឃើប៊ើក។
ពីរនាក់បងប្អូន វិងឃើលវ៉ូស បានចោទថា ម៉ាក ហ្សាក់ឃើប៊ើក ចម្លងផ្នត់គំនិតក្នុងការសាងហ្វេសប៊ុកពីខ្លួនខណៈពេលនៅជានិស្សិតនៅមហាវិទ្យាល័យ ហាវ៉ាដ ដោយនៅពេលនោះពួកគេបានហៅអ្វីដែលស្រដៀងនឹងហ្វេសប៊ុកនោះថា ConnectU (ចំណុចនេះ មិត្តអ្នកអានអាចមើលបាននៅក្នុងខ្សែភាពយន្ត The Social Network)មុននឹងតុលាការកាត់ក្ដីឱ្យបងប្អូនភ្លោះវិងឃើលវ៉ូសឈ្នះរឿងក្ដីនេះ ព្រមជាមួយបង្គាប់ឱ្យ ម៉ាក ហ្សាក់ឃើប៊ើក ត្រូវបង់ជំងឺចិត្តជាប្រាក់ចំនួន 65 លានដុល្លារអាមេរិក ហើយរឿងរ៉ាវក៏បានបញ្ចប់។
វិងឃើលវ៉ូសទាំងពីរកំពុងប្រកួតកីឡាអុំទូកក្នុងកីឡាអូឡាំពិកនៅទីក្រុងប៉េកាំង
ចំណែកអតីតភាពរបស់បងប្អូនភ្លោះវិងឃើលវ៉ូសវិញ ពួកគេរៀនចប់ពីមហាវិទ្យាល័យ ហាវ៉ាដ មានអាជីពជាអ្នកវិយោគទុន អ្នកជំនួញ ជាសហគ្រិន Start up និងធ្លាប់បានចូលរួមប្រកួតកីឡាអុំទូកក្នុងនាមជាកីឡាកររបស់សហរដ្ឋអាមេរិកក្នុងការប្រកួតកីឡាអូឡាំពិកឆ្នាំ 2008 ក្នុងទីក្រុងប៉េកាំងទៀតផង។
បច្ចុប្បន្ននេះ ទាំងពីរនាក់កំពុងធ្វើធុរកិច្ច Start up ពាក់ព័ន្ធនឹងការថ្រេដ Bitcoin និងត្រកូលប្រាក់ឌីជីថលដទៃទៀតក្នុងឈ្មោះ Gemini ដោយមានគោលដៅគាំទ្រដល់ការកើតមានការវិនិយោគទុនក្នុងត្រកូលប្រាក់ឌីជីថលយ៉ាងច្បាស់លាស់៕

រៀបរៀងដោយ តាវ៉ែនតា

December 9, 2017
អ្នកគាំទ្រអន្ទះសាទស្សនាការប្រគំតន្ត្រីរបស់ CL នៅយប់នេះ
នៅល្ងាចថ្ងៃទី9 ខែធ្នូនេះ ក្រុមហ៊ុន Smart បានសហការជាមួយ HD&S Media Group ក្នុងការរៀបចំការប្រគំតន្រ្តីរបស់កំពូលតារាចម្រៀង CL នៅក្នុងបរិវេណកោះពេជ្រ ដែលមានការចូលរួមពីសំណាក់ក្រុមតារាចម្រៀងពន្លកថ្មី Original Song ជាច្រើនដួង រួមមានកញ្ញា Nikki Nikki , Small World Small Band , លោក P-Sand , កញ្ញា ADda , លោក ថេណា , Bros La , ក្រុម SWSB និងក្រុម Mustaches Band ជាដើម ដែលធ្វើឱ្យអ្នកគាំទ្រអន្ទះសាចាំទស្សនារហូតដល់ទប់ចិត្តសឹងមិនបាន។
គួរបញ្ជាក់ផងដែរថា តាមរយៈហ្វេសប៊ុករបស់ក្រុមហ៊ុនស្មាតបានឱ្យុដឹងថា កំពូលតារាចម្រៀងប្រចាំប្រទេសកូរ៉េខាងត្បូង និងជាតារាចម្រៀងជាប់លំដាប់របស់អាមេរិក កញ្ញា CL បានធ្វើដំណើរមកដល់ប្រទេសកម្ពុជា កាលពីវេលាម៉ោង 11 យប់ម្សិលមិញនេះ ហើយគេសង្កេតឃើញមានការទទួលស្វាគមន៍យ៉ាងកក់ក្តៅពីសំណាក់អ្នកគាំទ្រជាច្រើន ដែលឈររង់ចាំនៅឯព្រលានយន្តហោះ ។ បើថ្វីត្បិតតែ តារាស្រីរូបនេះមិនមានពេលវេលារាក់ទាក់ជាមួយអ្នកគាំទ្រច្រើនក្ដី ក៏ប៉ុន្ដែ គេសង្កេតឃើញនាងមានទឹកមុខស្រស់ស្រាយ សប្បាយចិត្ត និងញញឹមញញែមមកកាន់អ្នកគាំទ្រ ដែលធ្វើឱ្យអ្នកគាំទ្រនាងមានអារម្មណ៍រំភើបជាមួយនឹងវត្តមានរបស់នាងជាខ្លាំង៕

ប្រភពរូបភាព៖ Smart Axiata
December 9, 2017
តារាស្រី Vicki Zhao តបទៅកាន់ពាក្យរិះគន់នៅលើបណ្ដាញសង្គម
តាមរយៈសារព័ត៌មានចិន Toggle បានចេញផ្សាយនៅពេលថ្មីៗនេះបានឱ្យដឹងថា មួយរយៈនេះតារាសម្តែងស្រីចិននាង Vicki Zhao ឬ នាង ត្រចៀកកាំ បានចេញមុខរិះគន់ចំៗចំពោះអ្នកលេងបណ្ដាញសង្គមអនឡាញ ដែលបានចោទប្រកាន់នាងថា រូបនាងបានបោះបង់ក្រុមហ៊ុននៅក្នុងទីក្រុងប៉េកាំង បន្ទាប់ពីការិយាល័យទាំង 4 របស់ក្រុមហ៊ុននាងត្រូវបានគេមើលឃើញថា បិទទ្វារ និងទុកចោលឱ្យនៅទំនេរ។
នៅក្នុងនោះដែរ នាង Vicki និងស្វាមីអ្នកជំនួញជនជាតិចិនលោក Huang You Long ត្រូវបានអ្នកលេងបណ្ដាញសង្គមបញ្ចេញព័ត៌មានមកថា អ្នកទាំងពីរបានជាប់ពិន័យហាមឃាត់រយៈ 5 ឆ្នាំនៅក្នុងទីផ្សារមូលបត្រ ហើយម្នាក់ៗត្រូវបានពិន័យជាប្រាក់ចំនួន 300,000 យ៉ន់ ហើយកាលពីខែមុននេះ នៅក្នុងទីផ្សារភាគហ៊ុនរបស់ស៊ាងហៃត្រូវបានគេរកឃើញថា អ្នកទាំងពីរមានចេតនាក្លែងបន្លំឯកសារក្នុងនាមជាវិនិយោគិនភាគហ៊ុន។
គួរបញ្ជាក់ផងដែរថា បន្ទាប់ពីបានទទួលដំណឹងដ៏ក្ដៅស្លឹកត្រចៀកនេះហើយ តារាស្រីរូបនេះបានចេញមុខមកបកស្រាយ និងរិះគន់អ្នកលេងបណ្ដាញសង្គមអនឡាញខ្លាំងៗថា “តើនាងខ្ញុំងាយស្រួលក្នុងការផ្លាស់ប្ដូរក្រុមហ៊ុនខ្លាំងណាស់មែនទេ ដើម្បីកែលម្អបរិស្ថានការងារនោះ? យ៉ាងហោចណាស់ក៏វាត្រូវការចំណាយពេលរៀបចំដល់ទៅ 1 ឆ្នាំដែរ ហើយណាមួយបុគ្គលិកទាំងអស់ក៏គេមានភាពនឿយហត់ដែរ ដែលត្រូវចំណាយថាមពលធ្វើការខ្លាំងនៅពេលយប់ រួចត្រូវសម្រាកសងវិញ នៅពេលថ្ងៃ។ ហើយបើបុគ្គលិកនាងខ្ញុំដ៏ទៃទៀត ត្រូវបំផ្លាស់ទីពីមួយកន្លែងទៅមួយកន្លែងទៀតនោះ ច្បាស់ជាមិនត្រូវគ្រោះថ្នាក់អស់ហើយទេឬ ប្រសិនបើចេះតែប្ដូរទីតាំងក្រុមហ៊ុនបែបនេះនោះ? “។
សូមជម្រាបបន្ថែមផងដែរថា តារាស្រីរូបនេះ និងស្វាមី ទើបតែត្រូវបានប្រកាសថា ជាអ្នកវិនិយោគដែលទទួលបានជោគជ័យ ព្រមទាំងមានទ្រព្យសម្បត្តិសរុបជាង 1 ពាន់លានដុល្លារទៀតផង៕
December 9, 2017
កញ្ញា វ៉ាន់ វល័ក្ខ កំពុងជួបទុក្ខធំ
នៅថ្ងៃទី9 ខែធ្នូ ឆ្នាំ2017នេះ តាមរយៈបណ្ដាញសង្គមហ្វេសប៊ុករបស់តារាសម្តែងស្រីដែលកំពុងមានមានប្រជាប្រិយភាព និងទីផ្សារសម្តែងច្រើនគួរសមដែរ គឺកញ្ញា វ៉ាន់ វល័ក្ខ កំពុងជួបទុក្ខជាទម្ងន់ ដោយសារតែលោកយាយជាទីស្រឡាញ់របស់នាងបានទទួលមរណភាពកាលពីយប់ថ្ងៃទី8 រំលងចូលថ្ងៃទី9 ធ្នូនេះ ដោយបានបន្សល់ទុកតែភាពអាឡោះអាល័យ និងទុក្ខសោកយ៉ាងក្រៀមក្រំដល់កូនចៅ។
តារាសម្តែងរូបនេះបានបង្ហោះសារក្រៀមក្រំលាយឡំ និងសោកស្តាយ ជាមួយរូបភាពជាច្រើនសន្លឹកលើបណ្តាញសង្គមហ្វេសប៊ុកថា «តើឲ្យចៅនិយាយថាម៉េចទៅ? លោកយាយ!» ។ ទន្ទឹមនឹងនោះដែរ គេសង្កេតឃើញមានតារាសម្តែងជាច្រើនរូប និងអ្នកគាំទ្ររបស់តារាស្រីរូបនេះ បានចូលរួមរំលែកទុក្ខ និងគោរពដួងវិញ្ញាណក្ខន្ធលោកយាយទៅកាន់សុគតិភព៕
December 9, 2017
លោក Mourinho ៖ កីឡាករក្រុម Man City នឹងត្រូវផ្តួលនៅថ្ងៃអាទិត្យនេះ
លោក Jose Mourinho អ្នកចាត់ការទូទៅរបស់ក្រុមបិសាចក្រហម Manchester United បានធ្វើការវាយប្រហារជាពាក្យសម្ដីនៅមុនពេលការប្រកួតរវាងក្រុមស្ថិតក្នុងតំបន់តែមួយលើកីឡាកររបស់ក្រុម Manchester City តាមរយៈការអះអាងថា យើងត្រូវការត្រឹមតែខ្យល់បក់ «បន្តិចបន្តួចប៉ុណ្ណោះ» សម្រាប់វាយផ្តួលពួកគេឲ្យដួលដល់ដី។
ក្រុម Man City របស់លោក Pep Guardiola នឹងធ្វើដំណើរទៅកាន់កីឡដ្ឋាន Old Trafford នៅថ្ងៃអាទិត្យនេះ ដោយសម្លឹងរកការបន្ថែមការនាំមុខចំនួន8ពិន្ទុរបស់ពួកគេលើក្រុមឈរលេខ2 Man United នៅលើកំពូលតារាងនៃក្របខ័ណ្ឌ Premier League។ ការប្រកួតនេះត្រូវបានគេចាត់ទុកថា ជាឱកាសមួយសម្រាប់ក្រុម Man United ក្នុងការធ្វើដំណើរវិលទៅកាន់ការប្រជែងដណ្តើមពានវិញ ហើយលោក Mourinho បានបង្កាត់ភ្លើងកម្តៅភ្លាមៗ នៅក្នុងសន្និសីទសារព័ត៌មានមុនការប្រកួតរបស់លោកតាមរយៈការនិយាយថា កីឡាកររបស់ក្រុម Man City នឹងចាញ់យ៉ាងងាយស្រួលបំផុត។
នៅឯទីលានហ្វឹកហាត់របស់ក្រុម Man United ក្នុងតំបន់ Carrington ភាគខាងលិចនៃទីក្រុង Manchester លោក Mourinho បានប្រាប់អ្នកយកព័ត៌មានកាលពីថ្ងៃសុក្រថា៖ «ពួកគេជាក្រុមដ៏ខ្លាំងមួយ។ ពួកគេការពារយ៉ាងល្អ ពួកគេបញ្ចេញប្រតិកម្មបានយ៉ាងល្អនៅពេលដែលពួកគេបាត់បង់បាល់។ ពួកគេលេងបានស៊ីចង្វាក់គ្នាល្អទៅលើការវាយសម្រុក ពួកគេអាចបង្កើតឱកាសបានយ៉ាងងាយ។ ពួកគេជាកីឡាករដ៏អស្ចារ្យ ពួកគេមានគ្រូបង្វឹកដ៏ឆ្នើម ហើយពួកគេមានចំណុចល្អជាច្រើន»។
គ្រូបង្វឹករូបនេះបានបន្ថែមទៀតថា៖ «ប្រសិនបើអ្នកសួរខ្ញុំរឿងមួយដែលខ្ញុំមិនចូលចិត្តនោះគឺថា ពួកគេបាត់បង់តុល្យភាពយ៉ាងងាយស្រួល។ អ្នកដឹងទេថា ត្រឹមតែកម្លាំងខ្សល់បក់បន្តិចប៉ុណ្ណោះ ពួកគេនឹងដួលគ្រាំងតែម្ដង»។ ការប្រកួតនៅថ្ងៃអាទិត្យនេះ នឹងចាប់ផ្តើមនៅម៉ោង11:30យប់៕
ប្រភពពី៖ Sky Sports
December 9, 2017
4 ជំនាញចាំបាច់សម្រាប់ការងារ Sales
Sales Skills គឺជាជំនាញសំខាន់របស់អ្នកដែលធ្វើការខាងផ្នែកលក់។ ដើម្បីឱ្យការធ្វើការងារកើតមានប្រសិទ្ធភាព អ្នកដែលធ្វើការងារផ្នែកនេះត្រូវតែមានការកែសម្រួល និងអភិវឌ្ឍសក្ដានុពលការធ្វើការងារលើផ្នែកនេះជាប់ជានិច្ច ដែលមិនត្រឹមតែនឹងធ្វើឱ្យការធ្វើការងារល្អឡើងនោះទេ តែបុគ្គលិកផ្នែកលក់ដែលមាន Sales Skills ដែលល្អ នឹងអាចយល់ពីតម្រូវការរបស់អតិថិជនបានយ៉ាងច្បាស់ទៀតផង ដែលវានឹងក្លាយជាប្រយោជន៍ដល់ការបង្កើនចំនួនលក់ដែលបានកំណត់ទុកក្នុងមួយខែៗបានយ៉ាងល្អប្រសើរ។
ដោយលក្ខណៈរបស់ការងារលក់ដែលមានភាពពាក់ព័ន្ធជាមួយនឹងសមត្ថភាពក្នុងការទាក់ទាញ និងបញ្ចុះបញ្ចូលអតិថិជន ធ្វើឱ្យអតិថិជនមានការយល់ឃើញតាម រហូតដល់ចង់ទិញទំនិញ ឬសេវាកម្មរបស់យើង អ្នកដែលធ្វើការផ្នែកលក់នេះចាំបាច់ត្រូវប្រើសិល្បៈក្នុងការលក់ដែលមិនមែនគ្រាន់តែជាការទិញលក់ទំនិញគ្នាធម្មតាៗនោះទេ តែត្រូវតែជាការលក់ដែលកើតចេញពីការរៀបចំកលយុទ្ធក្នុងការលក់យ៉ាងស័ក្តិសមទៀតផង ទើបធ្វើឱ្យការលក់ទទួលបានជោគជ័យ។
ជំនាញក្នុងការលក់ដែលអ្នកលក់មានឥទ្ធិពលចំពោះអ្នកទិញដោយការទំនាក់ទំនង ឬផ្ដល់ព័ត៌មានដែលចាំបាច់មុនការសម្រេចចិត្តទិញទំនិញ។ យើងនាំគ្នាមកមើលថា តើមានជំនាញអ្វីខ្លះដែលចាំបាច់សម្រាប់ការងារ Sales?
1 . រៀនយល់ដឹងអំពីអតិថិជន
មុននឹងធ្វើការលក់ យើងត្រូវដឹងជាមុនថា តើអតិថិជនរបស់យើងជានរណា និងកំពុងសម្លឹងរកមើលទំនិញប្រភេទណា។ យើងអាចរកអតិថិជនបានដោយការប្រមូលរួបរួមព័ត៌មានពីសៀវភៅបញ្ជីឈ្មោះផ្សេងៗក្នុងពិធីបង្ហាញមុខទំនិញ(ពិធីតាំងពិព័រណ៍) សមាគមពាណិជ្ជកម្ម តាមរយៈការដែលអតិថិជនចាស់ ឬអ្នកស្គាល់គ្នាណែនាំអ្នកដែលចាប់អារម្មណ៍ឱ្យ ឬតាមវេបសាយផ្សេងៗជាដើម។ វិធីនេះនឹងជួយឱ្យយើងបានអតិថិជនដែលត្រូវនឹងគោលដៅបានកាន់តែងាយឡើង បន្ទាប់ពីនោះទើបដំណើរការទាក់ទងតាមទូរស័ព្ទ ឬបណ្ដាញសង្គមអនឡាញដើម្បីផ្ដល់ព័ត៌មានបឋមទៅអតិថិជន និងណាត់ជួបជជែកគ្នាជាបន្ត។
2 . បើកឆាកការលក់ដើម្បីសាងភាពពេញចិត្ត
មុនពេលដែលយើងនឹងបើកឆាកការលក់ យើងត្រូវប្រាកដក្នុងចិត្តជាមុនសិនថា យើងមានព័ត៌មានពាក់ព័ន្ធនឹងអតិថិជនច្រើនគ្រប់គ្រាន់ហើយ ហើយសឹមរៀបផែនការកលយុទ្ធក្នុងការលក់។ នៅពេលយើងបើកការលក់ យើងត្រូវធ្វើឱ្យអតិថិជនកើតមានភាពពេញចិត្ត និងត្រូវមានសុជីវធម៌ដែលល្អក្នុងការលក់ ត្រូវមិនធ្វើឱ្យអតិថិជនមានអារម្មណ៍ធុញទ្រាន់ ទើសទាល់ដោយការបើកការលក់ដែលម៉ឺងម៉ាត់ខ្លាំងជ្រុលពេកនោះទេ។
3 . សាងចំណាប់អារម្មណ៍នៅពេលបើកការលក់
ការណែនាំស្នើការលក់ដោយបរិយាយពាក់ព័ន្ធនឹងមុខទំនិញនោះ យើងត្រូវធ្វើឱ្យអតិថិជនមានអារម្មណ៍
ជំពប់ចិត្ត ឬភ្ញាក់ផ្អើលក្នុងរឿងដែលយើងនិយាយរហូតនាំទៅដល់ការចាប់អារម្មណ៍លើមុខទំនិញ ហើយទើបជំរុញឱ្យកើតមានតម្រូវការដើម្បីឱ្យអតិថិជនសម្រេចចិត្តទិញ។ អ្នកលក់គួរព្យយាមសាងសេចក្ដីត្រូវការឱ្យកើតមានឡើងចំពោះអតិថិជន ចង្អុលឱ្យឃើញពីចំណុចល្អរបស់ទំនិញរបស់យើង ដោយបកស្រាយយ៉ាងត្រង់ទៅត្រង់មកដើម្បីឱ្យអតិថិជនកើតមានភាពជឿជាក់លើមុខទំនិញ និងសេវាកម្មរបស់យើង។ ក្នុងអំឡុងពេលចរចាលក់ អតិថិជនអាចនឹងមានចំណុចងឿងឆ្ងល់ក្នុងច្រើនរឿង មិនថាតែ តម្លៃរបស់ទំនិញដែលខ្ពស់ពេក ឬនៅមិនទាន់ត្រូវចិត្តជាមួយមុខទំនិញជាដើម ដូច្នេះអ្នកលក់ត្រូវព្យយាមរក្សាបរិយាកាសឱ្យមានភាពវិជ្ជមានឱ្យបានច្រើនបំផុត និងឆ្លើយតបចំណុចងឿងឆ្ងល់ទាំងនោះយ៉ាងចិត្តត្រជាក់ៗ និងបង្ហាញពីភាពជឿជាក់លើមុខទំនិញរបស់ខ្លួនឱ្យអតិថិជនបានឃើញ។
4 . បិទឆាកការលក់យ៉ាងឆ្លាតវៃ
ក្នុងអំឡុងការសន្ទនាដើម្បីបើកការលក់ នៅពេលដែលគ្រប់យ៉ាងដំណើរការទៅដោយប្រពៃ និងអតិថិជនមានអកប្បកិរិយាថានឹងទិញរបស់យើងហើយនោះ យើងគួរប្រើឱកាសនោះបិទឆាកការលក់ភ្លាមតែម្ដង តែមិនត្រូវប្រញាប់ប្រញាល់ជ្រុលពេកនោះទេ។ យើងគួរសរុបឱ្យអតិថិជនសម្រេចចិត្តទិញមុខទំនិញរបស់យើង ដោយបង្ហាញពីជម្រើសឱ្យបានឆាប់រហ័ស និងងាយស្រួលឡើង។ ប្រាប់អតិថិជនថា គាត់នឹងទទួលបានអ្វីខ្លះ និងអាចនឹងមានការផ្ដល់សំណូមពរពិសេស ដូចជា គិតតម្លៃពិសេសជូន បញ្ចុះតម្លៃជូន ឬមានរបស់ថែម ជាដើម។ ត្រឹមតែប៉ុណ្ណឹង អតិថិជនក៏នឹងកើតមានក្ដីពេញចិត្តក្នុងការលក់របស់យើងហើយ។
សមត្ថភាពក្នុងការទាក់ទាញចិត្តអតិថិជន អាចនិយាយបានថាជាបេះដូងសំខាន់សម្រាប់អ្នកដែលធ្វើការផ្នែក Sales តែត្រូវមិនធ្វើដោយភាពប្រញាប់ប្រញាល់នោះទេ និងបើយើងត្រូវការបិទការលក់លឿនជ្រុលពេក អតិថិជននឹងមានអារម្មណ៍ទើសទាល់ និងអាចនឹងលែងទិញទំនិញរបស់យើងទៀតក៏អាចថាបានដែរ ដូច្នេះក្នុងការលក់គ្រប់ពេល យើងត្រូវនឹកដល់ចិត្តគេ ចិត្តយើងឱ្យបានច្រើនបំផុត ដើម្បីឱ្យអតិថិជនកើតមានភាពពេញចិត្ត និងទិញទំនិញ ឬសេវាកម្មរបស់យើងយូរតទៅទៀត៕

រៀបរៀងដោយ តាវ៉ែនតា
December 9, 2017