មនុស្សពូកែរៀន និងមនុស្សរៀនពូកែមិនដូចគ្នានោះទេ ដោយមនុស្សមួយចំនួនខំសិក្សាខ្លាំងជ្រុលរហូតធ្វើឱ្យខ្លួនឯងមិនអាចរីកចម្រើនបាន តែមនុស្សមួយចំនួនទៀតបានរកឃើញនូវវិធីសាស្ត្រសម្រួចគោលដៅរបស់ខ្លួនបានយ៉ាងល្អដែលធ្វើឱ្យពួកគេក្លាយជាមនុស្សដែលមានសមត្ថភាព និងភាពជោគជ័យក្នុងជីវិត។
ពាក់ព័ន្ធនឹងបញ្ហានេះមានការលើកឡើងថា កុំសិក្សា 2មហាវិទ្យាល័យក្នុងពេលតែមួយ ព្រោះថាការសិក្សាបែបនេះអាចធ្វើឱ្យពួកគេមិនមានពេលគ្រប់គ្រាន់ដើម្បីធ្វើការស្វែងរកបទពិសោធ តែគួរសិក្សា2ជំនាញទៅវិញដើម្បីក្លាយជាអ្នកដែលមានគំនិតអភិវឌ្ឍន៍ឆ្ពោះទៅរកជោគជ័យក្នុងជីវិតការងារ។
មនុស្សជាច្រើនប្រហែលជាគិតថា សិក្សា2មហាវិទ្យាល័យ និងការសិក្សា2ជំនាញដូចគ្នា តែបើគិតឱ្យបានស៊ីជម្រៅបន្តិចយើងនឹងឃើញថា វាស្ទើរតែដូច តែមិនដូចនោះទេ។ ការសិក្សា 2មហាវិទ្យាល័យចាំបាច់ត្រូវតែជ្រើសរើស 2ជំនាញតែការសិក្សា 2ជំនាញមិនប្រាកដថាសិក្សា 2មហាវិទ្យាល័យនោះទេ។
ជាការពិតណាស់ការធ្វើការងារមួយជោគជ័យ វាទាមទារឱ្យមានចំណេះដឹងជាមូលដ្ឋានច្រើន មិនមែនសិក្សាតែមួយជំនាញគោលគ្រប់គ្រាន់នោះទេ។ បើសិនអ្នកចង់ក្លាយជាអ្នកការទូតពូកែ អ្នកត្រូវតែចេះជំនាញទំនាក់ទំនងអន្តរជាតិផង ភាសាបរទេសផង តែបើចង់ក្លាយជាអ្នកជំនាញផ្នែកពាណិជ្ជកម្ម ក៏ត្រូវការជំនាញពាណិជ្ជកម្មជាគោលនិងច្បាប់ជាច្រើនផ្សេងទៀតដែរ ហើយដើម្បីសម្រេចគោលដៅបានល្អលុះត្រាតែយើងបំពេញបាននូវចំណេះដឹងសំខាន់ៗទាំងអស់នោះ ដែលលើសពីមួយ។
ត្រង់ចំណុចនេះហើយដែលនិស្សិតជាច្រើននៅកម្ពុជា មានការយល់ច្រឡំ ហើយសិក្សាលើមហាវិទ្យាល័យ 2 ក្នុងពេលតែមួយដែលវាអាចធ្វើឱ្យប៉ះពាល់ដល់ការសិក្សាទៅវិញ ប្រសិនបើពួកគេមិនអាចគ្រប់គ្រងបានល្អ។ ទោះជាយ៉ាងនេះក្តី មាននិស្សិតមិនតិចទេដែលជោគជ័យក្នុងជីវិតបន្ទាប់ពីបញ្ចប់ការសិក្សា 2មហាវិទ្យាល័យក្នុងពេលតែមួយ តែជាទូទៅអ្នកជំនាញសំខាន់ៗ ដោយរួមទាំងអ្នកធ្លាប់សិក្សា 2មហាវិទ្យាល័យផងនោះ បានណែនាំមនុស្សជាច្រើនផ្សេងទៀតឱ្យសិក្សាតែ1មហាវិទ្យាល័យបានហើយ ដើម្បីមានពេលវេលាច្រើនសម្រាប់អភិវឌ្ឍសមត្ថភាពលើផ្នែកដែលខ្វះខាត។
ការសិក្សាតែ 1មហាវិទ្យាល័យ អាចធ្វើឱ្យនិស្សិតមានពេលវេលាគ្រប់គ្រាន់ដើម្បីធ្វើហាត់ការនៅក្នុងស្ថាប័នដែលគេចង់ធ្វើ និងស្វែងរកបទពិសោធ មានពេលគ្រប់គ្រាន់ដើម្បីធ្វើការស្រាវជ្រាវពីមេរៀនដែលគេសិក្សាបានល្អ និងអាចមានពេលគ្រប់គ្រាន់ដើម្បីស្វែងរកចំណេះដឹងជាច្រើនផ្សេងទៀតដែលជាតម្រូវការរបស់ជំនាញ។
តែទោះបីជាយ៉ាងណាការសិក្សាតែមួយមហាវិទ្យាល័យ ក៏មិនប្រាកដថាល្អទាំងស្រុងនោះដែរប្រសិនបើពួកគេគ្រប់គ្រងខ្លួនឯងមិនបានល្អ ព្រោះជាទូទៅការគ្រប់គ្រងខ្លួនឯង មិនមែនងាយស្រួលនោះទេសម្រាប់យុវវ័យដែលកំពុងតែចង់ស្វែងរករឿងថ្មីៗសម្រាប់ជីវិត។ មាននិស្សិតជាច្រើនបានយកលេសថា ទុកពេលឱ្យច្រើនសម្រាប់អភិវឌ្ឍសមត្ថភាពដោយផ្តោតលើការសិក្សាមុខវិជ្ជាមួយឱ្យបានច្បាស់លាស់ តែអ្វីដែលគាត់ធ្វើពិតប្រាកដគឺគាត់យកពេលវេលាដែលសល់ពីការសិក្សាដើម្បីធ្វើរឿងជាច្រើនដែលមិនមានប្រយោជន៍ ហើយបណ្តោយឱ្យការសិក្សាត្រូវបានបញ្ចប់ទៅដោយមិនមានទាំងបទពិសោធ និងគ្មានគុណភាព។
ជាទូទៅជាជម្រើសល្អសម្រាប់ការសិក្សាតែមួយមហាវិទ្យាល័យឱ្យបានល្អ និស្សិតគួរកុំទុកពេលវេលាដែលនៅសល់ច្រើនដើម្បីធ្វើរឿងគ្មានប្រយោជន៍ ព្រោះពួកគេមានជម្រើសច្រើនណាស់សម្រាប់ធ្វើការងារអភិវឌ្ឍសមត្ថភាពខ្លួនឯងឆ្ពោះទៅរកភាពជោគជ័យលើអាជីពនាថ្ងៃអនាគត។
និស្សិតអាចសិក្សាជំនាញបន្ថែម តែមិនមែនមានន័យថាត្រូវតែសិក្សាមហាវិទ្យាល័យមួយផ្សេងទៀតនោះទេ។ ដូចដែលឧទាហរណ៍ខាងដើម ដើម្បីជោគជ័យក្នុងការសិក្សា និងអាជីព គឺត្រូវមានជំនាញបន្ថែមជាច្រើនក្រៅពីជំនាញគោលនៅមហាវិទ្យាល័យ ហេតុនេះការសិក្សាជំនាញភាសា ជំនាញទំនាក់ទំនង និងជំនាញគួបផ្សំជាច្រើនទៀត គឺសុទ្ធតែជាជម្រើសល្អបំផុតសម្រាប់នាំអ្នកទាំងអស់គ្នាឱ្យសម្រេចគោលដៅ។ ម្យ៉ាងវិញទៀត ការសិក្សាជំនាញផ្សេងៗពីគ្រឹះស្ថានសិក្សាប្រកបដោយវិជ្ជាជីវៈត្រឹមត្រូវអាចធ្វើឱ្យនិស្សិតទទួលបាននូវចំណេះដឹងជាច្រើនដើម្បីបង្កើនទំនុកចិត្តដល់អ្នកគ្រប់គ្រង នៅពេលគាត់ដាក់ពាក្យធ្វើការងារ៕
