Category: សង្គម និងសេដ្ឋកិច្ច
បឹងកេងកងនឹងមានខុនដូប្រណីតរបស់ជប៉ុនថ្មីមួយទៀត
បឹងកេងកង ជាតំបន់ដែលគេដឹងថាមានអចលនទ្រព្យថ្លៃជាងគេក្នុងរាជធានីភ្នំពេញ ព្រោះទីនោះសម្បូរទៅដោយអគារការិយាល័យខ្ពស់ អគារសម្រាប់ស្នាក់នៅទំនើបៗ ព្រមទាំងមានហាងលក់ទំនើប និងភោជនីយដ្ឋានដ៏សម្បូរបែបទៀតផង។
ដោយសម្លឹងឃើញតម្រូវការអគារស្នាក់នៅ និងអគារបំពេញការងារប្រកបដោយផាសុកភាពនោះក្រុមអ្នកវិនិយោគជប៉ុនមួយក្រុមបានសម្រេចបោះទុនវិនិយោគក្នុងទឹកប្រាក់ប្រមាណជាង10លានដុល្លារអាមេរិក ដើម្បីសាងសង់ខុនដូទំនើបមួយដែលមានគុណភាពខ្ពស់ ប្រកបដោយស្តង់ដាររបស់ជប៉ុនពិត។
លោក មុត ចាន់ដារិទ្ធ ប្រធានគ្រប់គ្រងក្រុមហ៊ុន L’attrait Property Development Inc. របស់វិនិយោគិនជប៉ុន បានមានប្រសាសន៍ថា បើទោះបីជាបច្ចុប្បន្ននេះរាជធានីភ្នំពេញ ត្រូវគេមើលឃើញថាការផ្គត់ផ្គង់អគារអាផាតមិន និងអគារខុនដូហាក់មានចំនួនលើសតម្រូវការក៏ដោយ ប៉ុន្តែសម្រាប់ក្រុមហ៊ុន L’attrait Property Development Inc. មិនមានការរុញរាក្នុងការបោះទុនវិនិយោគលើគម្រោងសាងសង់អគារខុនដូថ្មីនេះឡើយដោយក្រុមហ៊ុនបានរៀបចំរចនាប័ទ្មសាងសង់អគារប្រកបដោយសោភ័ណភាព គុណភាព និងផាសុកភាពគួរឱ្យចង់រស់នៅ។
លោកបានបន្ថែមថា លក្ខណៈពិសេសរបស់គម្រោងនេះគឺផ្តោតសំខាន់ទៅលើអតិថិជនជាវិនិយោគិនបរទេស និងជនជាតិជប៉ុនដែលកំពុងស្នាក់នៅ និងប្រកបការងារនៅក្នុងរាជធានីភ្នំពេញ។
កត្តាដែលអាចចាប់អតិថិជនគោលដៅនេះបាន គឺដោយសារក្រុមហ៊ុនផ្តោតលើកត្តាសំខាន់ៗចំនួន3 គឺទី1 ក្រុមហ៊ុនមានបទពិសោធ ក្នុងការសាងសង់ប្រកបដោយភាពជោគជ័យនៅប្រទេសជប៉ុនរួចមកហើយ ហើយក្រុមហ៊ុនក៏បានឡើងផ្សារហ៊ុន (Stock Exchange) នៅទីក្រុងតូក្យូប្រទេសជប៉ុនទៀតផង។ ទី2 ក្រុមហ៊ុនបានសម្រេចចិត្តទិញដីនៅក្នុងតំបន់បឹងកេងកង ដែលជាតំបន់សម្បូរទៅដោយអ្នកវិនិយោគស្នាក់នៅ និងបំពេញការងារ ហើយងាយស្រួលក្នុងការធ្វើដំណើរទៅគ្រប់ទិសទី និងទី3 ការសាងសង់ និងដេគ័ររៀបចំបន្ទប់ផ្សេងៗត្រូវបានធ្វើឡើងប្រកបដោយគុណភាព សោភ័ណភាព និងផាសុកភាព ពិសេសសម្រាប់អ្នកវិនិយោគដែលស្នាក់នៅមិនមានដៃគូ ឬស្វាមីភរិយា គឺអាចមានអាហារ ភេសជ្ជៈបម្រើគ្រប់ប្រភេទ ប្រៀបដូចការរស់នៅក្នុងសណ្ឋាគារដែរ។
គួរបញ្ជាក់ផងដែរថា គម្រោងនេះមានកម្ពស់ 90.3ម៉ែត្រ ស្មើនឹង26ជាន់ និងមានបន្ទប់ស្នាក់នៅសរុបចំនួន149 យូនីត។ បន្ទប់ស្នាក់នៅមាន 4ប្រភេទគឺប្រភេទ Studio មានទំហំ27ម៉ែត្រការ៉េ ប្រភេទ1បន្ទប់គេង មានទំហំ50ម៉ែត្រការ៉េ ប្រភេទ2បន្ទប់គេង មានទំហំ70ម៉ែត្រការ៉េ និងប្រភេទទំហំ150ម៉ែត្រការ៉េ ដោយបានចាប់ផ្តើមបុកគ្រឹះសាងសង់ក្នុងខែធ្នូ ឆ្នាំ2017 នេះតទៅ។ សម្រាប់តម្លៃវិញ គឺលក់ក្នុងតម្លៃចាប់ពី10ម៉ឺនដុល្លារឡើងទៅ ដោយបច្ចុប្បន្នគម្រោងនេះត្រូវបានអតិថិជនបរទេសកក់អស់ជាង30%រួចហើយ៕
រៀនចប់ហើយ!! ចេមស៍ ជិ គ្រងឈុតទទួលបរិញ្ញាបត្រសង្ហាដូចព្រះអង្គម្ចាស់
នៅថ្ងៃទី15 ខែធ្នូ ឆ្នាំ2017 តាមរយៈគេហទំព័រសារព័ត៌មាន Teenee បានចេញផ្សាយឱ្យដឹងថា ចូលរួមត្រេកអរចំពោះតារាឯកប្រុសប្រចាំប្រទេសថៃលោក ចេមស៍ ជិរាយុ បានបញ្ចប់ថ្នាក់បរិញ្ញាបត្រវិស្វករ 4 ឆ្នាំ និងថែមទាំងទទួលបានភាពជោគជ័យលើការងារសម្ដែងទៀតផង។
ថ្មីៗនេះ នៅលើបណ្ដាញសង្គមអ៊ីនស្ដាក្រាមរបស់តារាប្រុសរូបនេះ បានបង្ហោះរូបភាពជាច្រើនសន្លឹក ខណៈដែលលោកកំពុងតែគ្រងឈុតទទួលបរិញ្ញាបត្រ ដែលមើលទៅឃើញកាន់តែស្រស់សង្ហា ព្រមទាំងមានទម្រង់មុខដូចកូនកាត់ទៀតផងនោះ រឹតតែធ្វើឱ្យតារាប្រុសរូបនេះស្រស់សង្ហាស្អាតដូចជាព្រះម្ចាស់នៅចក្រភពអង់គ្លេសអ៊ីចឹង។ លោកបានបញ្ជាក់ថា លោកនឹងត្រៀមទៅហាត់សមទទួលសញ្ញាបត្រ នៅថ្ងៃសៅរ៍ស្អែកនេះ ហើយឡើងទទួលជាផ្លូវការនៅថ្ងៃអាទិត្យទី17 ខែធ្នូនេះហើយ ដូច្នេះលោកនឹងរង់ចាំជួបអ្នកគាំទ្រទាំងអស់គ្នា។ ដើម្បីឱ្យកាន់តែជាក់ច្បាស់ សូមទស្សនារូបភាពខាងក្រោមនេះ៖
សម្បកខ្ទឹមបារាំងមានអត្ថប្រយោជន៍ដូចម្តេចខ្លះ
យើងបកសម្បកខ្ទឹមបារាំងរួចក៏បោះវាចោលទៅក្នុងធុងសំរាម ព្រោះតែយើងគិតថាវាគ្រាន់តែជាផ្នែកខាងក្រៅ មិនមានប្រយោជន៍អី្វនឹងត្រូវរក្សាទុកទៀតនោះទេ ប៉ុន្តែការពិតទៅការបោះចោលសម្បកខ្ទឹមបារាំងគឺប្រៀបបានទៅនឹងការបោះចោលនូវគុណប្រយោជន៍ ដ៏សំខាន់មួយដែលអ្នកមិនដែលនឹកស្មានដល់។
សម្បកខ្ទឹមបារាំងលាក់ទុកនូវជាតិសរសៃ និង Phenolic ដែលអាចជួយការពារអ្នកពីជំងឺបេះដូង ហើយក៏មានសមត្ថភាពអាចជួយគ្រប់គ្រងសម្ពាធឈាម និងការពារកុំឱ្យកើតមានការកកស្ទះសរសៃឈាមផងដែរ។ ដូច្នេះពេលក្រោយ នៅពេលដែលអ្នកចម្អិនអាហារណាដែលយកខ្ទឹមបារាំងធ្វើជាបន្លែនោះ សូមកុំចោលសម្បករបស់វាទៀត ចូរប្រមូលវាទុកមួយអន្លើ ដើម្បីទាញយកប្រយោជន៍ចំពោះសុខភាពរបស់អ្នក។
អត្ថប្រយោជន៍ដែលអ្នកនឹងទទួលបានពីសម្បកខ្ទឹមបារាំងរួមមានដូចជា ៖
– កាត់បន្ថយកម្រិតនៃជាតិខ្លាញ់អាក្រក់ក្នុងរាងកាយ
– រក្សាសម្ពាធឈាមឱ្យនៅក្នុងកម្រិតល្អប្រសើរ
– កាត់បន្ថយអាការថយចុះកម្លាំង
– ប្រយុទ្ធប្រឆាំង និងការរងប្រតិកម្ម
– ជួយទ្រទ្រង់ដំណើរការនៃការធ្វើចលនារបស់សាច់ដុំ
– កាត់បន្ថយការរលាក និងហើមជាដើម។អ្នកប្រហែលជាចាប់ផ្តើមឆ្ងល់ហើយមែនទេថា តើអ្នកអាចយកសម្បកខ្ទឹមបារាំងមកធ្វើជាប្រយោជន៍ចំពោះសុខភាព និងស្បែកបានយ៉ាងដូចម្តេច បើអ្នកមិនអាចបរិភោគវាបានផងនោះ?
ខាងក្រោមនេះគឺជាមធ្យោបាយមួយចំនួនដែលអ្នកអាចធ្វើបាន៖
1/ វិធីលឿនបំផុត និងងាយស្រួលបំផុតទីមួយគឺ ដាក់វាចូលទៅក្នុងម្ហូបដែលអ្នកត្រូវចម្អិនស្រាប់។ លុះពេលដែលម្ហូបនោះឆ្អិនគ្រាន់តែស្រង់វាចេញជាការស្រេច។ សារធាតុទាំងឡាយដែលមាននៅក្នុងសម្បកខ្ទឹមបារាំងនឹងរលាយចូលទៅក្នុងទឹកសម្លក្នុងពេលកំពុងចម្អិន។
2/ វិធីមួយផ្សេងទៀតគឺ យកវាមកធ្វើជាតែជំនួសតែទូទៅ ដោយការដាំទឹកឱ្យពុះ រួចបង់សម្បកខ្ទឹមបារាំងចូលហើយទទួលទានដូចធម្មតាជាការស្រេច។
3/ សម្រាប់អ្នកដែលមានអាការរមួលក្រពើក៏អាចសាកល្បងព្យាបាលដោយការទទួលទានទឹកសម្បកខ្ទឹមនេះរាល់យប់មុនពេលចូលគេងបានដែរ ប៉ុន្តែអ្នកត្រូវរំងាស់វារយៈពេល15-20នាទី រួចត្រងវាយកកាកចេញមុនទទួលទាន។ ក្រៅពីនេះ សម្បកខ្ទឹមបារាំងក៏អាចជួយឱ្យសក់ឆាប់លូតលាស់ផងដែរ។ ហេតុផលគឺ ខ្ទឹមបារាំងសម្បូរទៅដោយជាតិស្ពាន់ធ័រ ដែលជាតិរ៉ែប្រភេទនេះជួយបង្កើត Collagen ជួយឱ្យសក់របស់អ្នកលូតលាស់ ភ្លឺរលោង និងមានសុខភាពល្អ។ គ្រាន់តែយកសម្បកខ្ទឹមបារាំងទៅដាំ រួចយកទឹកដែលដាំរួចនោះធ្វើជាទឹកលាងសម្អាតសក់ជំនួសទឹកធម្មតាជាការស្រេច។
4/ ប្រសិនបើស្បែករបស់អ្នកមានបញ្ហាដូចជារមាស់ជាដើម សម្បកខ្ទឹមបារាំងអាចជួយអ្នកបាន ដោយគ្រាន់តែយកវាមកត្រដុសពីលើស្បែកត្រង់បរិវេណដែលរមាស់នោះ រួចសម្អាតចេញដោយសាប៊ូជាការស្រេច។
ចំណាំ៖ សម្បកខ្ទឹមបារាំងដែលអ្នកយកមកប្រើត្រូវតែជាសម្បកខ្ទឹមបារាំងធម្មជាតិគ្មានជាតិគីមី ព្រោះបើវាជាសម្បកខ្ទឹមបារាំងដែលមានជាតិគីមីអាចធ្វើឱ្យប៉ះពាល់ដល់សុខភាពរបស់អ្នកបាន។ ក្រៅពីនោះប្រសិនបើអ្នកជាស្ត្រីមានផ្ទៃពោះ ឬស្ត្រីដែលកំពុងបំបៅកូន សូមកុំអនុវត្តវិធីនេះ ព្រោះវាធ្វើឱ្យរមាស់ស្បែករបស់អ្នកបាន៕
កម្ពុជាទទួលបានទីផ្សារថ្មីនៃការនាំចេញស្វាយចន្ទីកែច្នៃទៅកូរ៉េខាងត្បូង
ខណៈទិន្នផលគ្រាប់ស្វាយចន្ទីស្រស់ ឬមិនទាន់កែច្នៃភាគច្រើនត្រូវបាននាំចេញទៅកាន់ទីផ្សារវៀតណាម ថ្មីៗនេះកម្ពុជាបានបើកទីផ្សារថ្មីមួយទៀតដោយគ្រាប់ស្វាយចន្ទីកែច្នៃរួចប្រមាណ1ម៉ឺនតោននឹងត្រូវបាននាំចេញទៅកាន់ទីផ្សារកូរ៉េខាងត្បូង។
លោក Hasan Nodin នាយកក្រុមហ៊ុន Camshew Company, Ltd បញ្ជាក់ប្រាប់ថា ការចុះអនុស្សារណៈយោគយល់គ្នានេះគឺធ្វើឡើងដើម្បីបង្កើតកិច្ចសហប្រតិបត្ដិការក្នុងការនាំគ្រាប់ស្វាយចន្ទីកែច្នៃរួចប្រមាណ1ម៉ឺនតោនទៅកាន់ប្រទេសកូរ៉េខាងត្បូង ដោយដំណាក់កាលដំបូងក្រុមហ៊ុនរបស់លោកនឹងនាំចេញប្រហែល1,000តោននៅខែកុម្ភៈ ឆ្នាំ2018។ លោកបន្ដថា ក្រុមហ៊ុនរបស់លោកនឹងពង្រីកសមត្ថភាពកែច្នៃគ្រាប់ស្វាយចន្ទីឱ្យដល់5-6តោនក្នុងមួយថ្ងៃ ខណៈបច្ចុប្បន្នរោងចក្រមានសមត្ថភាពកែច្នៃគ្រាប់ស្វាយចន្ទីបានត្រឹមតែ1តោនប៉ុណ្ណោះក្នុង1ថ្ងៃ។
ក្រុមហ៊ុនកែច្នៃគ្រាប់ស្វាយចន្ទីកម្ពុជា Camshew Company, Ltd បានសហការរួមគ្នាជាមួយក្រុមហ៊ុនម៉ាឡេស៊ី បានចុះអនុស្សរណៈយោគយល់គ្នាជាមួយក្រុមហ៊ុន Naroo Marine Co., Ltd ដែលជាក្រុមហ៊ុនបញ្ជាទិញដើម្បីនាំចេញគ្រាប់ស្វាយចន្ទីកែច្នៃរួចទៅកាន់ទីផ្សារកូរ៉េខាងត្បូងប្រមាណ1ម៉ឺនតោន។ ក្នុងនោះ Camshew Company, Ltd គ្រោងនឹងចំណាយប្រាក់100លានដុល្លារ បង្កើនសមត្ថភាពរោងចក្រកែច្នៃគ្រាប់ស្វាយចន្ទី ពង្រីកឃ្លាំងស្ដុក និងពង្រីកផ្ទៃដីដាំដុះដំណាំស្វាយចន្ទី និងការប្រមូលទិញគ្រាប់ស្វាយចន្ទីពីកសិករ ដើម្បីផ្គត់ផ្គង់ទៅលើការនាំចេញគ្រាប់ស្វាយចន្ទីទៅកាន់ប្រទេសកូរ៉េខាងត្បូងនៅឆ្នាំក្រោយ និងឆ្នាំបន្ដបន្ទាប់ទៀត។
នាយកក្រុមហ៊ុន Camshew Company, Ltd បានបញ្ជាក់ថា៖“អនុស្សរណៈយោគយល់គ្នានេះ គឺជាកិច្ចសន្យាមួយឆ្នាំជាមួយក្រុមហ៊ុនកូរ៉េ ដើម្បីនាំចេញគ្រាប់ស្វាយចន្ទីទៅប្រទេសកូរ៉េ។ នៅដំណាក់កាលដំបូងនេះយើងនឹងវិនិយោគប្រហែល 30លានដុល្លារលើរោងចក្រកែច្នៃស្វាយចន្ទី និងតំបន់ដាំដុះ។ យើងនឹងពង្រីកការវិនិយោគ និងផលិតកម្មនៅក្នុងឆ្នាំបន្តបន្ទាប់។
ក្រុមហ៊ុន Camshew Company, Ltd នឹងវិនិយោគលើចម្ការស្វាយចន្ទីចំនួន4ពាន់ហិកតា ហើយនឹងធ្វើការដាំដុះតាមកិច្ចសន្យាជាមួយសមាគមគ្រាប់ស្វាយចន្ទីនៅខេត្តកំពង់ធំ និងខេត្តកំពង់ចាម សម្រាប់ចម្ការស្វាយចន្ទីប្រហែល 40,000ហិកតាដើម្បីផ្គត់ផ្គង់គ្រាប់ស្វាយចន្ទីកែច្នៃទៅកូរ៉េខាងត្បូង។
គួរបញ្ជាក់ផងដែរថា ដើម្បីលើកកម្ពស់ផលិតភាពដំណាំស្វាយចន្ទីនៅកម្ពុជា នាពេលកន្លងមកអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវយុទ្ធសាស្ត្រសំខាន់ៗចំនួន3 គឺទី1 កសាងសមត្ថភាពដល់សហគមន៍កសិករស្វាយចន្ទីកម្ពុជា ទី2 សម្រួលការប្រមូលទិញគ្រាប់ស្វាយចន្ទីកម្ពុជា របស់សមាគមន៍ស្វាយចន្ទីវៀតណាម រហូត1លានតោនក្នុង1ឆ្នាំ និងទី3 សម្រួលការដឹកជញ្ជូននាំចេញ៕
លូ ម៉េង៖ អង្ករល្អជួយលើកកម្ពស់ម្ហូបអាហារ និងទេសចរណ៍កម្ពុជា
កម្ពុជាធ្លាប់បានក្លាយជាម្ចាស់ជើងឯកក្នុងការប្រកួតអង្ករជាលក្ខណៈអន្តរជាតិរយៈពេល 3ឆ្នាំជាប់ៗគ្នា គឺក្រោយប៉ុន្មានឆ្នាំប៉ុណ្ណោះបន្ទាប់ពីកម្ពុជាបាននាំចេញអង្ករទៅកាន់ទីផ្សារអន្តរជាតិ ជាពិសេសទីផ្សារសហភាពអឺរ៉ុប ជាលើកដំបូងក្នុងឆ្នាំ2008។ ឆ្នាំ2012 ជាឆ្នាំដំបូងបំផុតដែលអង្ករកម្ពុជាទទួលបានពានជាអង្ករល្អបំផុតប្រចាំឆ្នាំ ដែលកាលនោះការយកអង្ករចេញទៅប្រកួតមិនទាន់ទទួលបានការចូលរួមទូលំទូលាយនោះទេ។
ដោយមើលឃើញពីការរីកចម្រើនក្នុងវិស័យស្រូវអង្ករ ខណៈមានក្រុមហ៊ុន និងសហគមន៍កសិកម្មកាន់តែច្រើនបានចូលរួមក្នុងសកម្មភាពធុរកិច្ចស្រូវអង្ករ សហព័ន្ធស្រូវអង្ករកម្ពុជា បានរៀបចំការប្រកួតប្រជែងជ្រើសគុណភាពអង្ករតាមរយៈការចម្អិនបាយ ដោយផ្តោតលើលក្ខណៈ 4យ៉ាងនៅមុនពេល និងក្រោយពេលចម្អិន មានដូចជា រូបរាងសាច់អង្ករ សំណើម ក្លិនក្រអូប និងប្រវែងគ្រាប់អង្ករ ដើម្បីទទួលបានអង្ករល្អបំផុតសម្រាប់យកទៅប្រកួតជាលក្ខណៈអន្តរជាតិនាពេលខាងមុខ។
ថ្មីៗនេះអ្នកយកព័ត៌មាននៃកាសែត ឡារ៉ែន ពាណិជ្ជ បានសាកសួរ លោក លូ ម៉េង សហប្រធានក្រុមការងារផ្នែកឯកជនក្នុងវិស័យទេសចរណ៍ និងជាចុងភៅដ៏ល្បីឈ្មោះមួយរូបនៅកម្ពុជា ព្រមទាំងជាម្ចាស់ភោជនីយដ្ឋានធំៗ និងល្បីៗជាច្រើននៅកម្ពុជា អំពីព្រឹត្តិការណ៍រៀបចំប្រកួតប្រជែងអង្ករល្អបំផុតប្រចាំឆ្នាំថ្នាក់ជាតិ និងអន្តរជាតិ។
តើលោកមើលឃើញពីសារៈប្រយោជន៍អ្វីខ្លះពីការប្រកួតប្រជែងគុណភាពអង្ករប្រចាំឆ្នាំ?
ការជ្រើសរើសអង្ករលេខ1 គឺជាសកម្មភាពដ៏មានអត្ថន័យ។ អង្ករជាតំណាងសំខាន់បំផុតសម្រាប់ម្ហូបអាហារ។ ការប្រកួតប្រជែងប្រចាំឆ្នាំជាឱកាសល្អមួយដើម្បីជ្រើសរើសអង្ករល្អសម្រាប់ប្រទេសកម្ពុជា។ តាមរយៈព្រឹត្តិការណ៍នេះ យើងក៏អាចមានឱកាសពន្យល់គ្នាយើងដែលជាចុងភៅចំណានៗអំពីអ្វីដែលយើងឃើញកើតចេញពីការប្រកួត។ អ្វីដែលយើងទទួលបានពីការប្រកួត យើងនឹងចែកចាយ ដោយពន្យល់ដល់សមាជិកចុងភៅក្នុងសហព័ន្ធរបស់យើងអំពីប្រភេទអង្ករល្អថាវាមានលក្ខណៈបែបណា។ យើងដឹងហើយថា អង្ករខ្លះពេលមើលឃើញស្អាត តែគ្មានក្លិនក្រអូបនោះទេ ខណៈអង្ករខ្លះមើលទៅមិនស្អាតទេ ប៉ុន្តែពេលយើងភ្លក់ទៅបែរជាមានរសជាតិឆ្ងាញ់ និងក្លិនល្អទៅវិញ។ អង្ករពេលគេកិន និងកែច្នៃច្រើនពេក រូបរាងរបស់វានឹងភ្លឺរលោងស្អាត តែរសជាតិរបស់វានឹងត្រូវបាត់បង់ខ្លះជាមិនខាន។
តើលោកយល់ថា ការរៀបចំប្រកួតអង្ករប្រចាំឆ្នាំមានអត្ថន័យបែបណា?
អង្ករតំណាងប្រទេសជាតិនាពេលបច្ចុប្បន្ន។ ព្រឹត្តិការណ៍ប្រកួតអង្ករប្រចាំឆ្នាំ បានឆ្លុះបញ្ចាំងឱ្យឃើញពីស្នាដៃ និងកិច្ចខិតខំប្រឹងប្រឹងរបស់ប្រជាកសិករ។ ខ្ញុំយល់ថា ការប្រកួតអង្ករប្រចាំឆ្នាំមិនត្រឹមតែផ្តល់លទ្ធភាពឱ្យចុងភៅជ្រើសរើសបានអង្ករល្អសម្រាប់ផ្គត់ផ្គង់ដល់ភោជនីយដ្ឋានប៉ុណ្ណោះទេ ប៉ុន្តែវាក៏ជាការលើកទឹកចិត្តដល់កសិករឱ្យមានការយកចិត្តទុកដាក់ក្នុងការដាំដុះ ប្រកបដោយក្តីស្រឡាញ់ គ្មានប្រើប្រាស់សារធាតុគីមី ដើម្បីរួមចំណែកដល់ការនាំចេញឱ្យបានកាន់តែច្រើនផងដែរ។ ការរៀបចំការប្រកួតប្រចាំឆ្នាំ គឺជាវេទិកាផ្សព្វផ្សាយដ៏សំខាន់មួយទៅកាន់អន្តរជាតិ ដោយវាមិនត្រឹមតែផ្សព្វផ្សាយអង្ករនោះទេ សូម្បីតែវិស័យទេសចរណ៍ ក៏ទទួលបានផលពីការផ្សព្វផ្សាយផលិតផលល្អបំផុតនេះដែរ។
ជាទូទៅ តើលោកចែករំលែកបទពិសោធដែលទទួលបានពីការជ្រើសរើសអង្ករល្អបំផុតប្រចាំឆ្នាំដល់សមាជិកចុងភៅទាំងក្នុងប្រទេស និងអន្តរជាតិយ៉ាងដូចម្តេច?
ខ្ញុំតែងតែចែករំលែកជាមួយសមាជិករបស់យើងថា ប្រភេទអង្ករណាសម្រាប់ប្រើប្រាស់បាយឆា អង្ករប្រភេទណាសម្រាប់បាយចំហុយ។ល។ អង្ករមានច្រើនប្រភេទ និងមានច្រើនរសជាតិ មិនមែនឃើញអង្ករស យើងសន្មត់ថាល្អនោះទេ។ យើងបានចូលរួមជ្រើសរើសអង្ករល្អថ្នាក់ជាតិនេះ ឈានចូលឆ្នាំទី4ហើយ យើងបានរៀនពីបទពិសោធនេះច្រើនណាស់។ យើងឃើញរូបរាងអង្ករជាទី1 ក្លិនជាទី2 និងចុងក្រោយគឺរសជាតិ។ ក្រោយពីការជ្រើសរើស យើងតែងតែផ្តល់បទពិសោធនោះទៅកាន់ចុងភៅអន្តរជាតិ ដោយប្រាប់គេពីលក្ខណៈរបស់អង្ករកម្ពុជា ហើយបាយចេញពីអង្ករកម្ពុជាត្រូវជាមួយអ្វីប្រសើរបំផុតពេលភ្លក់ ឬបរិភោគ។ ការចែករំលែកនេះ យើងតែងតែធ្វើឡើងនៅក្នុងតំបន់អាស៊ាន ក៏ដូចជាចុងភៅនៅប្រទេសចិន។ យើងក៏បានរួមចំណែកដល់ចុងភៅនៅទូទាំងពិភពលោកដែរថា អង្ករកម្ពុជាអាចជ្រើសរើសប្រើប្រាស់ក្នុងមុខម្ហូបបានច្រើនប្រភេទ។
ដោយសារលោកធ្លាប់ធ្វើការងារជាមួយចុងភៅអន្តរជាតិក្នុងការជ្រើសរើសអង្ករកម្ពុជាជាប់លេខ1 ក្នុងឆ្នាំ2014 តើពេលនោះមានការដាក់ពិន្ទុបែបណាដែរ?
ក្នុងពេលដែលក្រុមការងារចុះមករៀបចំ និងដាក់ពិន្ទុដែលគេហៅថា Judges គេបានសម្តែងក្តីសប្បាយចិត្តដោយសារចុងភៅរបស់ពួកខ្ញុំ បានដាក់ពិន្ទុម៉ត់ចត់។ ខ្ញុំសង្កេតឃើញថា អង្ករកម្ពុជាបានជាប់លេខ1 ក្នុងពីរឆ្នាំដំបូង ចុងភៅរបស់កម្ពុជាមិនសូវបានចូលរួមដឹងពីលក្ខខណ្ឌសម្រាប់ជ្រើសរើសអង្ករល្អបំផុតនោះទេ ទើបប្រហែល 3-4ឆ្នាំចុងក្រោយនេះប៉ុណ្ណោះ ដែលចុងភៅរបស់យើងមានឱកាសស្គាល់អង្ករល្អរបស់ខ្មែរពិតប្រាកដ។ ដោយសារការចូលរួមរបស់យើង អង្កររបស់យើងរក្សាបានចំណាត់ថ្នាក់ល្អក្នុងការប្រកួតជាលក្ខណៈអន្តរជាតិ។
តើការប្រើប្រាស់អង្ករល្អមានចំណែកក្នុងការទាក់ទាញភ្ញៀវចូលបរិភោគ និងភ្ញៀវទេសចរអន្តរជាតិ ឬទេ?
នេះជារឿងសំខាន់ ប្រទេសទូទៅ អង្ករភាគច្រើនរបស់គេជាអង្ករចាស់ និងយូរឆ្នាំ គេមិនប្រើសម្រាប់ចម្អិនបាយនោះទេ។ ភ្ញៀវទេសចរខ្លះមកប្រទេសកម្ពុជា យើងបានណែនាំមុខម្ហូបដែលផ្សំជាមួយបាយ គាត់ក៏បរិភោគ ហើយក្រោយមកគាត់ក៏ជ្រើសរើសការបរិភោគបាយជាបន្តទៅទៀត។ អង្ករល្អ និងអង្ករអត់ល្អធ្វើឱ្យរសជាតិអាហារមានភាពខុសគ្នា ដូចមេឃ និងដី។
តើលោកយល់យ៉ាងណា ចំពោះអនាគតអង្ករកម្ពុជា?
តាមរយៈការប្រកួតប្រជែងដែលកម្ពុជាធ្លាប់ធ្វើនេះ បានដើរតួនាទីសំខាន់បំផុតសម្រាប់កសិករ អ្នកវិនិយោគ និងចុងភៅ។ នេះជារឿងសំខាន់ដែលយើងត្រូវតែធ្វើបន្តទៅទៀត និងធំជាងនេះទៅទៀត ព្រោះនេះជាការចែករំលែក និងការផ្សព្វផ្សាយមួយដ៏ល្អ។ អ្វីដែលយើងប្រកួតមិនឈ្នះគេ យើងមិនគួរអនុលោមទៀតទេ។ យើងត្រូវដឹងពីលក្ខណៈតម្រូវនៅពេលក្រោយ។
ក្នុងនាមជាម្ចាស់ភោជនីយដ្ឋាន និងសហព័ន្ធចុងភៅកម្ពុជា តើលោកអាចធ្វើអ្វីបានខ្លះសម្រាប់អង្ករកម្ពុជា?
តួនាទីសំខាន់របស់ខ្ញុំ គឺការផ្សព្វផ្សាយ ព្រោះក្នុងបញ្ជីមុខម្ហូប (Manu) យើងបានដាក់ឈ្មោះអង្ករល្អបំផុត គឺប្រៀបបានយើងផ្សព្វផ្សាយប្រទេសយើងឱ្យគេដឹងដូច្នោះដែរ។ យើងមិនត្រឹមតែផ្សព្វផ្សាយពីអង្ករកម្ពុជាដល់បរទេសនោះទេ សូម្បីតែភ្ញៀវទេសចរអន្តរជាតិក៏ពេញចិត្តមកប្រទេសយើងដែរ។
យើងមើលឃើញបទពិសោធម្រេចកំពត គឺជួយយើងបានច្រើនណាស់។ អង្កររបស់យើងមានលក្ខណៈពិសេស ដែលអ្នកបរិភោគ តែងតែនឹកឃើញពេលដាក់ចូលមាត់៕
យឹម តាស្រង់ និយាយពីបទចម្រៀង «គ្រូបង្រៀនស្រវឹងស្រា»
នៅលើបណ្ដាញសង្គមយូធូបរបស់ផលិតកម្មថោន បានបង្ហោះចម្រៀងមួយបទដែលមានចំណងជើងថា «គ្រូបង្រៀនស្រវឹងស្រា» កាលថ្ងៃទី10 ខែធ្នូ ឆ្នាំ2017 ដែលបកស្រាយដោយអ្នកនាង ចេន សាយចៃ និងស្នាដៃនិពន្ធរបស់កវីល្បីឈ្មោះប្រចាំផលិតកម្មថោនគឺ លោក យឹម តាស្រង់ កំពុងតែទទួលបានការគាំទ្រ និងសរសើរមិនដាច់ពីមាត់ឡើយថា ពីរោះហើយមានអត្ថន័យល្អណាស់។
ដោយឡែកក៏មានមតិខ្លះទៀត បានរិះគន់យ៉ាងចំៗថា «សម្រាប់ខ្ញុំមិនគាំទ្រទេ ព្រោះបើចង់រិះគន់ ត្រូវរិះគន់បុគ្គល យកឈ្មោះបុគ្គលមករិះគន់មក បើច្រៀងបែបនេះ ទោះមិនមានន័យសំដៅលើគ្រូទាំងអស់ក៏ដោយ តែស្តាប់មើលទៅវាប៉ះពាល់អារម្មណ៍គ្រូគេល្អៗ ស្តាប់មើលទៅហាក់បីដូចជាគ្រូគ្មានតម្លៃសោះ បើចង់រិះគន់គ្រូណាម្នាក់ យកឈ្មោះគាត់មករិះគន់មក កុំបញ្ឆិតបញ្ឆៀង មិនល្អទាល់តែសោះ បើអ្នកនិពន្ធល្អ ហើយហ៊ានប្រឈមមុខ និងការពិត មិនមែនមកបញ្ឆិតបញ្ឆៀងអ៊ីចឹងទេ»។
ជាមួយគ្នានេះដែរ មុនពេលដែលបទចម្រៀងនេះត្រូវបានបញ្ចេញនៅលើទីផ្សារអនឡាញ កាលពីថ្ងៃទី7 ខែធ្នូ ឆ្នាំ 2017នេះ លោក យឹម តាស្រង់ បានរៀបរាប់បញ្ជាក់ពីការនិពន្ធបទចម្រៀងមួយបទនេះនៅលើបណ្ដាញសង្គមហ្វេសប៊ុករបស់ខ្លួនយ៉ាងដូច្នេះថា « ខ្ញុំនៅចាំពេញខួរក្បាល លោកគ្រូម្នាក់កាលខ្ញុំនៅរៀនបឋម ថ្ងៃមួយនោះម៉ោងរៀនពេលថ្ងៃមិនដឹងជាគាត់ស្រវឹងមកពីណា មុខហាក់មួម៉ៅខ្លាំង ហើយភ្នែកឡើងក្រហម ចូលមកដល់ហៅខ្ញុំឡើងកែលំហាត់ ពេលខ្ញុំធ្វើខុសគាត់ឱ្យខ្ញុំបែរមុខទៅក្តារខៀនហើយទាញរំពាត់ផ្តៅប៉ុនមេដៃប្រវែងជាងកន្លះម៉ែត្រ វ៉ៃយកៗ ខ្ញុំនៅក្មេងឈឺពេកទ្រាំមិនបានក៏យកដៃក្រពាត់ទៅក្រោយដើម្បីរង»។
លោកបញ្ជាក់បន្ថែមថា ពេលនោះគាត់វ៉ៃខ្លាំងត្រូវដៃ ខ្ញុំឈឺលោតរមួលដួល ហើយស្ទុះក្រោកវិញយំទឹកភ្នែករហាម រួចគាត់ក៏ឱ្យខ្ញុំទៅអង្គុយតុវិញ ពេលនោះខ្ញុំគិតតែយំ ព្រោះត្រង់ដៃដែលគាត់វ៉ៃត្រូវនោះឈឺខ្លាំង និងចាប់ផ្តើមហើមខ្លាំងបន្តិចម្តងៗ ពេលមកដល់ផ្ទះ ម៉ែខ្ញុំឃើញខ្ញុំយំ ហើយឃើញដៃហើមខ្លាំង គាត់ខឹងជេរគ្រូបណ្តើរ លាបប្រេងកូឡាឱ្យខ្ញុំបណ្តើរ។
មកដល់ពេលនេះ រាល់ពេលទៅភូមិកំណើតម្តងៗ ឃើញមុខគាត់ ខ្ញុំនឹកឃើញរឿងហ្នឹងភ្លាម នេះហើយគ្រូបង្រៀនស្រវឹងស្រាដែលខ្ញុំធ្លាប់ជួបក្នុងជីវិតនេះ វាជាការឈឺចាប់របស់ក្មេងស្រុកស្រែម្នាក់ដែលចងចាំរឿងនេះតាំងពីក្មេងមកដល់ពេលនេះមិនរលុបបាត់ឡើយ៕
លោក Wenger រំពឹងឈ្នះនៅថ្ងៃសៅរ៍នេះ ក្នុងការប្រជែងដណ្តើមកៅអី Champions League
លោក Arsene Wenger ដឹងថា ក្រុម Arsenal មិនអាចបណ្តោយឲ្យមានការភ្លាត់ស្នៀតទៀតឡើយនៅពេលដែលពួកគេធ្វើជាម្ចាស់ផ្ទះទទួលក្រុម Newcastle នាកីឡដ្ឋាន Emirates ដោយមានបំណងបញ្ចប់ការប្រកួតមិនស្គាល់ឈ្នះក្នុងក្របខ័ណ្ឌ Premier League ត្រឹម3ប្រកួត។
ក្រុមរបស់លោក Wenger បានបញ្ចប់ក្នុងលទ្ធផលស្មើ ០-០ នៅលើទឹកដីក្រុម West Ham United កាលពីថ្ងៃពុធ និងកំពុងតែស្ថិតក្នុងចំណាត់ថ្នាក់លេខ7 មុននឹងធ្វើជាម្ចាស់ផ្ទះទទួលក្រុមសារិកាព្រៃរបស់លោក Rafael Benitez នៅរាត្រីថ្ងៃសៅរ៍នេះ។ មានការខុសគ្នាត្រឹមតែ1ពិន្ទុប៉ុណ្ណោះរវាងក្រុមកាំភ្លើងធំ Arsenal និងក្រុមឈរលេខ4 Tottenham Hotspur ប៉ុន្តែ អ្វីដែលជាភាពស្វិតស្វាញយ៉ាងពិតប្រាកដនោះ គឺការប្រជែងយកកៅអីក្នុងក្របខ័ណ្ឌ Champions League ខណៈដែលក្រុម Arsenal មិនអាចបាត់បង់ពិន្ទុទៀតឡើយក្នុងពេលប្រកួតជាមួយនឹងក្រុម Newcastle។
ការបញ្ចប់ក្នុងលទ្ធផលស្មើនៅលើទឹកដីក្រុម West Ham បានកើតឡើង ក្រោយពីទទួលបានលទ្ធផលស្មើ 1-1 ដូចគ្នានៅលើទឹកដីក្រុម Southampton ខណៈដែលការប្រកួតទាំង2នេះ លោក Wenger សុទ្ធសឹងរំពឹងទុកថា ក្រុមរបស់លោកនឹងឈ្នះ។ ហេតុផលទាំងនេះបានបង្ហាញថា ពួកគេមិនទាន់បានស្តារមុខមាត់ពីការខកចិត្តដោយសារតែការរងបរាជ័យក្រោមស្នាដៃក្រុម Manchester United នៅលើទឹកដីខ្លួនឯងនៅឡើយ។ លោក Wenger បានផ្លាស់ប្តូរសមាជិកក្នុងជម្រើសទាំង11នាក់ដំបូងរបស់លោកសម្រាប់ការធ្វើដំណើរទៅកាន់ទឹកដីក្រុម West Ham ខណៈដែលទាំង Jack Wilshere និង Olivier Giroud សុទ្ធសឹងបានចូលលេងក្នុងជម្រើសទាំង11ជាលើកទី1របស់គេក្នុងការប្រកួតក្របខ័ណ្ឌ Premier League នៅរដូវកាលនេះ។ Wilshere ផ្ទាល់បានប្រកាសថា រូបគេបានពេញចិត្តទៅនឹងទម្រង់លេងរបស់គេ ប៉ុន្តែ បានទទួលស្គាល់ថា គេមិនទាន់បានបើកការពិភាក្សាជាមួយនឹងក្លិប Arsenal ពីការបន្តកុងត្រារបស់គេនៅឡើយ ដែលវានឹងផុតកំណត់នៅចុងរដូវកាលនេះ។ ការប្រកួតនេះនឹងចាប់ផ្តើមនៅម៉ោង10យប់៕
ប្រភពពី៖ Sports.yahoo.com
ពេជ្រ ថៃ និងនាយចឺមនឹងចូលរួមសម្ពោធហាងថ្មីរបស់ តូតា នៅក្រុងតាខ្មៅល្ងាចនេះ
តាមរយៈបណ្ដាញទំនាក់ទំនងសង្គមហ្វេសប៊ុករបស់តារាស្រី កញ្ញា ម៉ាក់ សែនសូនីតា ហៅតូតា បានប្រកាសឱ្យដឹងថា នាងកំពុងត្រៀមខ្លួនធ្វើជាថៅកែហាងស្រី ដែលនៅថ្ងៃទី15 ខែធ្នូ ឆ្នាំ2017នេះ ដោយនាងគ្រោងរៀបចំកម្មវិធីបើកសម្ពោធហាងផែសមុទ្រ ក្នុងក្រុងតាខ្មៅ ដែលនឹងមានវត្តមានតារាល្បីៗជាច្រើ់នចូលរួម ហើយកាន់តែពិសេសទៅទៀតនោះគឺមានវត្តមាន ពេជ្រ ថៃ និង នាយចឺម ផងដែរ។
ចាប់តាំងពី ពេជ្រ ថៃ ជាប់ជាជយលាភីក្នុងកម្មវិធី The Voice Kids Cambodia មក តារាវ័យក្មេងនេះបានព្យាយាមចេញកើបប្រាក់ក្នុងកម្មវិធីប្រគំតន្ត្រីជាច្រើនដែលរៀបចំដោយហង្សមាស ជាក់ស្តែងនៅល្ងាចថ្ងៃនេះ ពេជ្រ ថៃ ក៏នឹងត្រូវកើបប្រាក់ក្រៅទ្រនំខ្លួនផងដែរ គឺកម្មវិធីសម្ពោធហាងម៉ាក់ សែនសូនីតា ហៅតូតា។ នេះជាលើកដំបូងហើយ ដែលតារាចម្រៀងវ័យក្មេង ពេជ្រ ថៃ ជ្រកក្នុងទ្រនំរបងខ្ពស់ផលិតកម្មហង្សមាសនឹងបង្ហាញខ្លួនច្រៀងជាមួយតារាចម្រៀងដ៏ល្បីលំដាប់យុវវ័យក្នុងផលិតកម្មសាន់ដេ គឺនាយចឺម។
គួរបញ្ជាក់ផងដែរថា វត្តមានតារាកំប្លែងដែលបានចាកចេញពីស៊ីធីអិន ហើយផ្តោតលើការច្រៀងជាធំ រួមនឹងពេជ្រ ថៃ នេះនឹងធ្វើឱ្យកម្មវិធីសម្ពោធហាងនោះកក្រើកជាមិនខាន៕
ផ្ទះរបស់លោក Emery ត្រូវបានចោរចូលប្លន់ក្នុងថ្ងៃប្រកួតរបស់ PSG
ផ្ទះជួលរបស់លោក Unai Emery គ្រូបង្វឹករបស់ក្រុម Paris Saint-Germain ត្រូវបានចោរចូលទៅគាស់ កាលពីល្ងាចថ្ងៃពុធ ខណៈដែលក្រុមរបស់លោកបានទទួលជ័យជម្នះក្នុងការប្រកួត League Cup នៅលើទឹកដីក្រុម Strasbourg។
ករណីចូលប្លន់ដល់ក្នុងផ្ទះ ដែលបានកើតឡើងនៅជាន់ខាងលើនៃផ្ទះល្វែងមួយក្នុងទីក្រុងប៉ារីសនេះ ត្រូវបានដឹងដោយភរិយារបស់លោក Emery នៅវេលាម៉ោង11យប់។ លោក Emery ផ្ទាល់ បានវិលត្រឡប់ពីការប្រកួតនៅលើទឹកដីក្រុម Strasbourg នៅព្រឹកព្រឹកថ្ងៃព្រហស្បតិ៍។ អាវដែលត្រូវបានចុះហត្ថលេខាដោយខ្សែប្រយុទ្ធ Neymar និងនាឡិកាម៉ាក Rolex មួយគ្រឿង សុទ្ធសឹងស្ថិតក្នុងចំណោមទ្រព្យសម្បត្តិដែលត្រូវបានចោរលួច ខណៈដែលក្រុមគ្រួសាររបស់លោក Emery បានប្រាប់ប៉ូលិសថា ទ្រព្យសម្បត្តិដែលបាត់បង់មានតម្លៃសរុប2ម៉ឺនអឺរ៉ូ។
ប៉ូលិសបាននិយាយថា៖ «ទ្វារត្រូវបានបិទជិត ប៉ុន្តែ មិនចាក់សោនោះត្រូវបានចោគាស់ចូល ហើយក្រុមចោរទាំងនោះបានលួចកាបូបដែលមានតម្លៃខ្ពស់ជាច្រើននៅក្នុងនោះ មានដូចជា គ្រឿងអលង្ការ អាវកីឡាបាល់ទាត់ និងសម្លៀកបំពាក់ថ្លៃៗជាច្រើន»។ ក្រុម Paris Saint-Germain បានជួបរាត្រីដ៏រីករាយនៅលើទឹកដីក្រុម Strasbourg ក្រោយពីបានកត់ត្រាជ័យជម្នះក្នុងលទ្ធផល 4-2 ដើម្បីកក់កៅអីក្នុងវគ្គ8ក្រុមចុងក្រោយនៃពាន League Cup របស់បារាំង។ លោក Emery នឹងត្រូវដឹកនាំក្រុម PSG ធ្វើដំណើរទៅប្រកួតនៅលើទឹកដីក្រុម Rennes ក្នុងការប្រកួតក្របខ័ណ្ឌ Ligue 1 នៅរាត្រីថ្ងៃសៅរ៍នេះ ខណៈដែលក្រុមរបស់លោកនឹងសម្លឹងរកការដណ្តើមឲ្យបាន3ពិន្ទុ។ បច្ចុប្បន្នក្រុម PSG កំពុងតែនាំមុខលើតារាងដោយមាន44ពិន្ទុពីការប្រកួត17លើកខណៈដែលក្រុម Rennes កំពុងឈរលេខ6 ដោយមាន25ពិន្ទុ។ ការប្រកួតនៅថ្ងៃសៅរ៍នេះនឹងចាប់ផ្តើមនៅម៉ោង11យប់៕
ប្រភពពី៖ Sport24
