សាលអ្នកដំណើរថ្មីក្នុងបរិវេណនៃអាកាសយានដ្ឋានអន្តរជាតិភ្នំពេញដែលមានផ្ទៃក្រឡារហូតដល់1ម៉ឺនម៉ែត្រការ៉េ ត្រូវបានដាក់ឱ្យដំណើរការជាផ្លូវការហើយកាលពីសប្តាហ៍កន្លងមក ដើម្បីត្រៀមទទួលស្វាគមន៍អ្នកដំណើរដែលមានកំណើនជាលំដាប់។
ការពង្រីកសាលអ្នកដំណើរដែលអាចផ្តល់នូវភាពងាយស្រួលដល់ការកម្សាន្តសម្រាប់អ្នកដំណើរចេញនិងការរង់ចាំអ្នកដំណើរមកដល់ គឺជាការពង្រីកបន្ថែមទៅលើហេដ្ឋារចនាសម្ព័ន្ធអាកាសយានដ្ឋានដែលក្រុមហ៊ុន VINCI របស់បារាំងបានវិនិយោគក្នុងទឹកប្រាក់ប្រមាណ100លានដុល្លារ រួចសម្ពោធដាក់ឱ្យប្រើប្រាស់កាលពីខែមីនា ឆ្នាំ2016។
ពិធីសម្ពោធដាក់ឱ្យដំណើរការ“ស្ថានីយសម្រាប់ទទួលអ្នកដំណើរមកដល់ និងស្ថានីយសម្រាប់ភ្ញៀវរង់ចាំចេញដំណើរ” នៅអាកាសយានដ្ឋានអន្តរជាតិភ្នំពេញ គឺដើម្បីឆ្លើយនឹងកំណើននៃអ្នកដំណើរដែលកំពុងកើនឡើងជាលំដាប់ក្នុងបច្ចុប្បន្ន និងអនាគត។ នេះបើតាមការកត់សម្គាល់របស់ថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា។ ក្នុងឱកាសអញ្ជើញចូលរួមធ្វើជាគណៈអធិបតីក្នុងពិធីសម្ពោធ“ស្ថានីយសម្រាប់ទទួលអ្នកដំណើរមកដល់ និងស្ថានីយសម្រាប់ភ្ញៀវរង់ចាំចេញដំណើរ” ឯកឧត្តមឧបនាយករដ្ឋមន្ត្រី ប៊ិន ឈិន បានឱ្យដឹងថា តាមការព្យាកររបស់ក្រសួងទេសចរណ៍ ក្នុងឆ្នាំ 2017 នេះកម្ពុជានឹងទទួលបានភ្ញៀវទេសចរអន្តរជាតិជាង5លាននាក់ និងនៅឆ្នាំ2020 នឹងទទួលបានយ៉ាងតិច7លាននាក់។
ឯកឧត្តមឧបនាយករដ្ឋមន្ត្រី បញ្ជាក់ថា៖“វិស័យដឹកជញ្ជូនតាមផ្លូវអាកាសនេះសំខាន់ខ្លាំងណាស់សម្រាប់កម្ពុជា ដែលទាមទារឱ្យមានការសហការ និងខិតខំពីគ្រប់ភាគីពាក់ព័ន្ធដើម្បីធ្វើយ៉ាងណាឱ្យមានការសម្រួលដល់ការដឹកជញ្ជូនអ្នកដំណើរ ហើយរាជរដ្ឋាភិបាលកម្ពុជានៅតែលើកទឹកចិត្ត និងជំរុញការងារនេះឱ្យបានខ្ជាប់ខ្ជួនជាទីបំផុត។
ឯកឧត្តមបានលើកឡើងថា ពេលនេះកម្ពុជាកំពុងប្រែក្លាយខ្លួនទៅជាមជ្ឈមណ្ឌលអាកាសចរណ៍និងទេសចរណ៍មួយដែលមានភាពទាក់ទាញក្នុងតំបន់ និងពិភពលោក។ កម្ពុជាមានសន្តិភាព និងស្ថិរភាពនយោបាយល្អ ហើយជាទីផ្សារមួយក្នុងចំណោមទីផ្សារទេសចរណ៍ ដែលមានការរីកចម្រើនយ៉ាងឆាប់រហ័សបំផុតនៅក្នុងតំបន់អាស៊ីអាគ្នេយ៍ ពោលគឺនៅតែបន្តរក្សាកំណើនជាមធ្យមក្នុងរង្វង់8.5% រហូតដល់ឆ្នាំ2040។
លោក នីកូឡា មន្ត្រីជាន់ខ្ពស់នៃក្រុមហ៊ុន Cambodia Airport បានឱ្យដឹងថា ការបើកដំណើរការស្ថានីយថ្មីនេះមានគោលបំណងសំខាន់ចំនួន2 ទី1 ដើម្បីគិតគូរពីកំណើនភ្ញៀវទេសចរនាពេលបច្ចុប្បន្ន និងអនាគត ខណៈជិតដាច់ឆ្នាំ2017 នេះអ្នកដំណើរដែលឆ្លងកាត់អាកាសយានដ្ឋានអន្តរជាតិភ្នំពេញ មានលើសពី4លាននាក់ ហើយនៅឆ្នាំ 2020 កម្ពុជារំពឹងថានឹងទទួលបានភ្ញៀវទេសចរអន្តរជាតិយ៉ាងតិច 7លាននាក់ និង ទី2 ដើម្បីរៀបចំកែលម្អប្រព័ន្ធហេដ្ឋារចនាសម្ព័ន្ធថ្មីៗសម្រាប់អ្នកដំណើរឱ្យកាន់តែល្អប្រសើរជាងមុន ស្របតាមស្ដង់ដារអន្តរជាតិ។
របាយការណ៍ពីក្រសួងទេសចរណ៍ បានឱ្យដឹងថា ចំនួនភ្ញៀវទេសចរអន្តរជាតិដែលមកទស្សនាព្រះរាជាណាចក្រកម្ពុជា ក្នុងរយៈពេល10ខែ ឆ្នាំ 2017 នេះមានប្រមាណ 4.4លាននាក់ កើនឡើង10.4%បើធៀបទៅនឹងរយៈពេលដូចគ្នាកាលពីឆ្នាំមុន។
បច្ចុប្បន្ននេះវិស័យទេសចរណ៍បានចូលរួមចំណែកក្នុងសេដ្ឋកិច្ចប្រទេសកម្ពុជាប្រមាណ13% ជាវិស័យដែលកំពុងមានការរីកចម្រើនយ៉ាងលឿនប្រកបដោយសក្តានុពល។ ជាមួយគ្នានេះប្រទេសកម្ពុជាក៏កំពុងតែជំរុញការទាក់ទាញភ្ញៀវទេសចរពីប្រទេសចិនកាន់តែខ្លាំងជាងមុន ខណៈដែលភ្ញៀវទេសចរចិនមកទស្សនាកម្ពុជាបាននាំមុខគេរួចជាស្រេចទៅហើយ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងថា តាមការរំពឹងទុកចំនួនភ្ញៀវទេសចរបរទេសនឹងកើនដល់ 5.6លាននាក់ នៅឆ្នាំ2017 នេះ ដោយអាចរកចំណូលបានពីវិស័យនេះច្រើនជាង3,500លានដុល្លារ ក្នុងនោះភ្ញៀវទេសចរចិនរំពឹងថា នឹងកើនដល់ចំនួន1លាននាក់។ ឯកឧត្តមរដ្ឋមន្ត្រី បានបញ្ជាក់ថា៖“សមិទ្ធផលនេះ ឆ្លុះបញ្ចាំងយ៉ាងច្បាស់ពីកិច្ចខិតខំប្រឹងប្រែង និងការប្តេជ្ញាចិត្តរបស់រាជរដ្ឋាភិបាលក្នុងការចាប់យកឱកាសនៃការរីកចម្រើននៃវិស័យទេសចរណ៍នៅប្រទេសកម្ពុជា ឱ្យក្លាយជាឱកាសមាសឆ្ពោះទៅសម្រេចបាននូវគោលដៅអភិវឌ្ឍន៍ប្រកបដោយចីរភាព ឆ្នាំ2030”។
ក្រុមហ៊ុន VINCI របស់បារាំងដែលទទួលបានសិទ្ធិវិនិយោគអាកាសយានដ្ឋាននៅកម្ពុជារយៈពេល30ឆ្នាំ បានពង្រីកខ្លួនពីព្រលានយន្តហោះអន្តរជាតិភ្នំពេញ ទៅកាន់ព្រលានយន្តហោះក្នុងខេត្តសៀមរាប នាឆ្នាំ1997 ហើយក៏ពង្រីកខ្លួនទៅកាន់ក្រុងព្រះសីហនុផងដែរក្នុងឆ្នាំ2013។ ក្រុមហ៊ុននេះកំពុងគ្រប់គ្រងព្រលានយន្តហោះទាំង3ខាងលើ ប៉ុន្តែប្រមុខរាជរដ្ឋាភិបាលក៏ស្ថិតនៅដំណាក់កាលចរចាជាមួយក្រុមហ៊ុននេះ ដើម្បីផ្តល់សំណងណាមួយសម្រាប់ការយកអាកាសយានដ្ឋានខេត្តសៀមរាប ត្រឡប់មកវិញ ដើម្បីបើកផ្លូវឱ្យក្រុមហ៊ុនមកពីចិន វិនិយោគនៅតំបន់ផ្សេងពីទីតាំងចាស់។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាក្នុងឱកាសសម្ពោធស្ថានីយអ្នកដំណើរកាលពីឆ្នាំ 2016 ក៏បានអះអាងពីសមត្ថភាពរបស់ព្រលានយន្តហោះអន្តរជាតិភ្នំពេញក្នុងការទទួលការចុះចតរបស់យន្តហោះធំផងដែរ។ ជាក់ស្តែង កម្ពុជាបានសាកល្បងរួចមកហើយនូវការទទួលយន្តហោះធំៗ ដែលមកចុះចតនៅរាជធានីភ្នំពេញ ជាពិសេសក្នុងឆ្នាំ2012 ពេលដែលកម្ពុជាធ្វើជាប្រធានអាស៊ានយន្តហោះដែលដឹកប្រធានាធិបតីសហរដ្ឋអាមេរិកបារ៉ាក់ អូបាម៉ា បានមកចុះចត និងសំចតរួចហើយ៕
