Category: សង្គម និងសេដ្ឋកិច្ច

ទម្លាយអាថ៌កំបាំង បុរសសង្ហារូបនេះមិនមែនជាឪពុកបង្កើតរបស់ទារកនេះទេ…
នៅថ្ងៃទី19 ខែធ្នូ ឆ្នាំ2017នេះ នៅលើបណ្ដាញសង្គមអនឡាញមានការភ្ញាក់ផ្អើលជាខ្លាំង ដោយមានមនុស្សជាច្រើនបាននាំគ្នាបង្ហោះរូបភាពទារកទើបប្រសូតដែលមានទម្រង់មុខស្រស់សង្ហា និងគួរឱ្យស្រឡាញ់មួយយ៉ាងភ្លូកទឹកភ្លូកដី មិនថាតែនៅក្នុងប្រទេសកម្ពុជាយើងទេ សូម្បីតែនៅប្រទេស ថៃ វៀតណាម ហ្វីលីពីន និងឥណ្ឌូនេស៊ី ក៏មានការចាប់អារម្មណ៍ខ្លាំងចំពោះរូបភាពទារកនេះដែរ។ បើតាមរយៈគណនីហ្វេសប៊ុកមួយដែលមានឈ្មោះ “Joseph Virgil” ដែលត្រូវបានគេដឹងថា ជាគណនីមានទីតាំងនៅក្នុងទីក្រុង Zamboanga នៃប្រទេសហ្វីលីពីន បានបង្ហោះរូបភាពរបស់ទារកនេះ។ នេះបើការចេញផ្សាយរបស់សារព័ត៌មាន Teenee នៅថ្ងៃទី21 ខែធ្នូ ឆ្នាំ2017នេះ។
មិនតែប៉ុណ្ណោះ ចំពោះរឿងនេះក៏មានការយល់ច្រឡំច្រើនថា បុរសដែលបីទារកដូចនៅក្នុងរូបដែលគ្រប់គ្នាបាននាំគ្នាបង្ហោះនោះ គឺជាឪពុកបង្កើតរបស់ទារក ដោយសារតែឃើញទម្រង់មុខរបស់លោកមានភាពស្រដៀងគ្នាទៅនឹងទារកនោះ។ ក៏ប៉ុន្ដែបើតាម គណនីហ្វេសប៊ុកខាងលើនេះ បានបញ្ជាក់ថា « Mr. Anton Tanjung ( បុរសសង្ហាដែលគ្រប់គ្នាផ្អើលថា ជាឪពុកបង្កើតរបស់ទារកដែលកើតមកសង្ហាភ្លាមនោះ ) មិនមែនជាឪពុកពិតប្រាកដរបស់ទារកឈ្មោះ Arsyaនេះទេ។ លោក Anton គ្រាន់តែជាវេជ្ជបណ្ឌិតរូបសង្ហាម្នាក់ដែលបានបង្កើតទារកនេះ ហើយមានទម្រង់មុខស្រដៀងគ្នាតែបុណ្ណោះ នេះបើតាមរូបភាពនៅលើអ៊ីនស្តាក្រាមរបស់លោក»។
គួរបញ្ជាក់ផងដែរថា នៅមិនទាន់មានសារព័ត៌មានណាដែលអាចបញ្ជាក់ពីអត្តសញ្ញាណឪពុកម្ដាយពិតរបស់ទារកនេះនៅឡើយទេ។ ដើម្បីឱ្យច្បាស់បន្ថែមទៀត សូមប្រិយមិត្តទាំងអស់ទស្សនារូបភាពខាងក្រោមនេះ៖
December 21, 2017
នាទីសោកសៅ…អ្នកគាំទ្រ និងក្រុមគ្រួសារទ្រហោយំចង់ឃើញមុខសពជាលើកចុងក្រោយ
នៅថ្ងៃទី21 ខែធ្នូ ឆ្នាំ 2017 វេលាម៉ោង 09.00 ព្រឹក តាមម៉ោងនៅប្រទេសកូរ៉េ គឺជាពេលដែលត្រូវដង្ហែសពរបស់តារាចម្រៀងប្រុស Kim Jonghyun ដែលជាអតីតសមាជិកក្រុមចម្រៀង SHINEE ដោយត្រូវឱ្យសមាជិករួមក្រុមចំនួន 4 រូបផ្សេងទៀតដូចជា Lee Tae-min, Choi Min-ho, Onew និង Key ជាអ្នកដង្ហែក្ដារមឈូសចេញមកពីសាលបុណ្យទៅទីបញ្ចុះសព។
បើតាមរយៈសារព័ត៌មាន Koreaboo នាព្រឹកថ្ងៃទី21នេះ បានឱ្យដឹងថា មានសមាជិកក្រុមគ្រួសារ និងបុគ្គលិករបស់ផលិតកម្ម SM ចំនួនជាង300 នាក់បានប្រមូលផ្តុំគ្នានៅមុខសាលបុណ្យសពរបស់តារាប្រុសខាងលើនេះ។ ខណៈដែលរថយន្តចាប់ផ្តើមបើកដង្ហែសពបានមកដល់ គេសង្កេតឃើញមានអ្នកគាំទ្រប្រហែល 1000 នាក់ បាននាំគ្នាឈូឆរប្រមូលផ្តុំគ្នា ដើម្បីបានឃើញមុខមាត់របស់ Jonghyun នាវិនាទីចុងក្រោយ ព្រមទាំងសម្ដែងទុក្ខសោកចំពោះ Idol ចម្រៀង Kpop រូបនេះផង ។
គួរបញ្ជាក់ផងដែរថា គ្រាន់តែបងស្រីរបស់ Kim Jonghyun បាននាំមុខក្បួនដង្ហែសពចេញមកក្រៅភ្លាម សំឡេងស្រែកទ្រហោយំពីក្រុមគ្រួសារ មិត្តភ័ក្តិ និងអ្នកគាំទ្របានលាន់ឮឡើងយ៉ាងទ្រហឹងពេញនៅខាងមុខអគារ Asian Medical Center Funeral Hall តែម្ដង។ ដើម្បីឱ្យកាន់តែជាក់ច្បាស់ សូមទស្សនារូបភាពក្បួនដង្ហែសពរបស់តារាប្រុស Kim Jonghyun ខាងក្រោមនេះ៖
December 21, 2017
អំពើហិង្សាលើកុមារនឹងជះឥទ្ធិពលអាក្រក់ដល់អនាគតសង្គម
កុមារជាផ្នែកដ៏សំខាន់ដែលមិនអាចខ្វះបានសម្រាប់ប្រទេសជាតិ ព្រោះថាចាប់ផ្តើមពីការអភិវឌ្ឍសមត្ថភាពរបស់កុមារ យើងនឹងទទួលបានប្រជាជនសកម្មដែលប្រកបដោយសមត្ថភាពនៅថ្ងៃអនាគត តែប្រសិនបើយើងធ្វេសប្រហែសតែបន្តិច យើងនឹងឃើញមានអំពើអសកម្មជាច្រើនទៅវិញនៅថ្ងៃខាងមុខ។
លោក គង់ វិចិត្រា ស្ថាបនិកអង្គការមូលនិធិកុមារពិការ បានបង្ហាញថា សកម្មភាពទាំងឡាយដែលកុមារទទួលយកអាចក្លាយជារូបភាពនៃការដោះស្រាយបញ្ហារបស់គេនៅថ្ងៃក្រោយ ដូចនេះអាណាព្យាបាល រួមទាំងអ្នកអប់រំផង គួរមានការប្រុងប្រយ័ត្នឱ្យបានខ្ពស់ចំពោះសកម្មភាពនៃការអប់រំពួកគេ។ ក្មេងអាចចាប់យករឿងគ្រប់យ៉ាងដែលមនុស្សធំធ្វើចំពោះគេ ហើយក៏ព្យាយាមធ្វើគ្រប់យ៉ាងតាមវិធីដែលមនុស្សធំធ្វើ ដើម្បីបង្ហាញថាគេជាមនុស្សធំពិត។
លោក វិចិត្រា បានលើកឡើងថា ៖ “អាណាព្យាបាលជាច្រើននៅកម្ពុជាយើងចូលចិត្តប្រើប្រាស់ហិង្សាក្នុងការអប់រំកូន ឬដាក់ពិន័យនៅពេលពួកគេធ្វើអ្វីខុស។ សកម្មភាពនេះមិនប្រាកដថាត្រឹមត្រូវទាំងអស់នោះទេព្រោះថាពួកគាត់មួយចំនួនភ្លេចប្រើប្រាស់ហេតុផលដើម្បីបង្រៀនពួកគេ ដែលធ្វើឱ្យក្មេងៗមិនសូវប្រើហេតុផលដូចគ្នាក្នុងការដោះស្រាយបញ្ហានានានៅពេលដែលពួកគេធំឡើង។
ស្ថាបនិកអង្គការដែលធ្វើការគាំពារលើកុមារពិការខាងលើបានបញ្ជាក់ថា នៅពេលដែលកុមារទទួលបានការអប់រំតាមរយៈការវាយដំ នោះគេអាចនឹងមិនឃើញវិធីសាស្ត្រអ្វីក្រៅពីអំពើហិង្សានោះទេ នៅពេលដែលពួកគេមានរឿងត្រូវដោះស្រាយ។ យើងរាល់គ្នាបានមើលឃើញហើយថា យុវជនមួយចំនួនបានប្រើប្រាស់អំពើហិង្សាកាប់ចាក់គ្នានៅពេលដែលពួកគេខឹងនរណាម្នាក់ ឬក្រុមផ្សេង ដើម្បីឱ្យក្រុមម្ខាងទៀតខ្លាច ឬរាងចាល ព្រោះថានៅពេលដែលមានបញ្ហាកើតឡើងម្តងៗពួកគេមិនបានរកឃើញដំណោះស្រាយណាប្រកបដោយហេតុផលនោះទេ ព្រោះក្នុងគំនិតរបស់គេគឺមានអំពើហិង្សារួចជាស្រេចទៅហើយ។
យោងតាមអង្គការ UNICEF នៅឆ្នាំ2014 បានបង្ហាញឱ្យឃើញថា កុមារកម្ពុជាចំនួន 70%ទទួលរងនូវការប្រើប្រាស់អំពើហិង្សាយ៉ាងហោចណាស់មួយទម្រង់មុនពួកគេមានអាយុ18ឆ្នាំ ហើយ 25% ត្រូវបានរំលោភបំពានលើអារម្មណ៍ និងប្រមាណ5% បានឆ្លងកាត់ការរំលោភបំពានផ្លូវភេទ ដែលសកម្មភាពទាំងអស់នេះអាចប៉ះពាល់ដល់ការគិតរបស់កុមារ និងអាចធ្វើឱ្យពួកគេក្លាយជាអ្នកដែលមានសកម្មភាពអវិជ្ជមាននៅថ្ងៃអនាគត៕
December 21, 2017
Swansea បណ្តេញគ្រូបង្វឹក Clement ចេញពីតំណែង
ក្លិប Swansea City កាលពីថ្ងៃពុធ បានបណ្តេញលោក Paul Clement ពីតំណែងជាអ្នកចាត់ការទូទៅ ខណៈដែលក្លិបបាតតារាងនៃក្របខ័ណ្ឌ Premier League រំពឹងអាចគេចឲ្យផុតពីតំបន់កាត់ចោល។ ស្របពេលដែលរដូវកាលនេះ ជិតឈានដល់ពាក់កណ្តាលផ្លូវ ក្រុមរបស់វែលស៍មួយនេះកំពុងតែដេញតាមពីក្រោយក្រុមស្ថិតក្នុងតំបន់សុវត្ថិភាពចំនួន4ពិន្ទុ ក្រោយពីបានចាញ់ក្នុងលទ្ធផល 3-1 នៅលើទឹកដីក្រុម Everton ដោយពួកគេបានកត់ត្រាជ័យជម្នះត្រឹមតែ3ប្រកួតគត់ក្នុងចំណោមការប្រកួត18លើកនៃក្របខ័ណ្ឌ Premier League។
ក្លិបនេះបានឲ្យដឹងនៅលើបណ្តាញសង្គម Twitter របស់ខ្លួនថា៖ «យើងអាចប្រកាសបានថា នៅរាត្រីនេះក្លិបបានចែកផ្លូវជាមួយនឹងគ្រូបង្វឹកបង្គោលលោក Paul Clement ហើយ»។ លោក Huw Jenkins ប្រធានក្លិប Swansea City បានឲ្យដឹងក្នុងសេចក្តីថ្លែងការណ៍មួយថា៖ «ដើម្បីផ្លាស់ប្តូរអ្នកចាត់ការទូទៅ ជាពិសេសនៅត្រឹមពាក់កណ្តាលផ្លូវនៃរដូវកាលនេះ គឺជារឿងចុងក្រោយដែលយើងចង់ធ្វើក្នុងនាមជាក្លិបមួយ»។ លោក Jenkins បានបន្ថែមទៀតថា៖ «យើងមានអ្នកចាត់ការទូទៅ3នាក់ផ្សេងគ្នាកាលពីរដូវកាលមុន ហើយជាលទ្ធផល យើងចង់ផ្តល់ឲ្យលោក Paul នូវពេលវេលាជាច្រើនតាមដែលអាច ក្នុងការផ្លាស់ប្តូរអ្វី។ ប៉ុន្តែ យើងមានអារម្មណ៍ថា យើងមិនអាចរក្សាអ្វីៗឱ្យស្ថិតក្នុងស្ថានភាពបែបនេះយូរឡើយ និងត្រូវតែធ្វើការផ្លាស់ប្តូរដើម្បីធ្វើឲ្យយើងមានឱកាសដ៏ល្អបំផុតក្នុងការផ្លាស់ប្តូរជោគវាសនាខណៈដែលក្លិបនេះកំពុងតែស្ថិតនៅបាតតារាងនៃក្របខ័ណ្ឌ Premier League»៕
ប្រភពពី៖ The Straits Times
December 21, 2017
របៀបតុបតែងមុខឱ្យស្រស់ស្អាតរីករាយក្នុងថ្ងៃ Christmas
ថ្ងៃ Christmas ចាត់ទុកថាជាថ្ងៃពិសេសសម្រាប់មនុស្សមួយចំនួនដែលប្រកាន់នូវជំនឿតាមបែបសាសនាគ្រិស្ត។ វាជាថ្ងៃដ៏រីករាយបំផុតក្នុងការជួបជុំគ្នា បង្កើនភាពរីករាយ ទំនាក់ទំនង ហើយក៏ឆ្លៀតពេលបង្អួតពីភាពស្រស់ស្អាតដាក់គ្នាផងដែរ។ ដូច្នេះដើម្បីឱ្យថ្ងៃជួបជុំដ៏រីករាយរបស់អ្នកកាន់តែពិសេសទៅទៀតនោះ អ្នកត្រូវតែទុកចិត្តថា សម្រស់នៃការផាត់មុខរបស់អ្នកគឺស្រស់ស្អាតគ្រប់គ្រាន់សមស្របទៅនឹងពេលវេលា។
ភ្នែក៖ ការតុបតែងមុខសម្រាប់មនុស្សម្នាក់ ស្អាត ឬមិនស្អាតគឺអាស្រ័យលើការតុបតែងភ្នែកនេះហើយ ហេតុនេះហើយបានជាការតុបតែងភ្នែកត្រូវបានយកចិត្តទុកដាក់ខ្លាំងជាងទីតាំងផ្សេង។ ចង់តុបតែងភ្នែកឱ្យបានស្អាត អ្នកត្រូវដឹងពីទម្រង់ភ្នែក ម៉ូដ និងពណ៌របស់សម្លៀកបំពាក់ដែលអ្នកត្រូវពាក់ ទីកន្លែង និងពេលវេលាដែលអ្នកត្រូវចូលរួមផងដែរ។
ការផាត់ភ្នែកត្រូវផ្តោតលើទីតាំងសំខាន់4គឺ ត្របកភ្នែកខាងលើ ត្របកភ្នែកខាងក្រោម ការគូសរឹមភ្នែក និងការគូសរោមភ្នែក។ ប្រសិនបើអ្នកចង់ផាត់ភ្នែកបែបធម្មជាតិក្នុងថ្ងៃ Christmas អ្នកអាចជ្រើសរើសយកពណ៌ផ្កាឈូក ទឹកក្រូច សូកូឡាស្រាល ឬពណ៌លឿងស្រាលក៏បាន។
ថ្ពាល់៖ មិនបាច់ឱ្យមើលទៅច្បាស់លាស់ពេកទេ ព្រោះថ្ងៃ Christmas គួរតែមើលទៅធម្មតា ស្អាតតាមបែបងាយៗ និងសមភ្នែកទៀតផង។ អ្នកគួរជ្រើសរើសពណ៌ផាត់ថ្ពាល់បែបស្រាលៗ នឹងធ្វើឱ្យអ្នកមានអារម្មណ៍ថា ភាពស្រស់ស្អាតដែលអ្នកមានគឺជាភាពស្រស់ស្អាតស័ក្តិសមបំផុតសម្រាប់ថ្ងៃ Christmas របស់អ្នក។
បបូរមាត់៖ វាជាចំណាប់អារម្មណ៍មួយផ្នែកទៀតដែលធ្វើឱ្យអ្នកមានភាពលេចធ្លោកាន់តែខ្លាំង។ ជ្រើសរើសពណ៌ក្រែមលាបមាត់ណាដែលអ្នកគិតថា ស័ក្តិសមជាមួយបបូរមាត់របស់អ្នក ព្រមទាំងត្រូវជាមួយនឹងម៉ូដសម្លៀកបំពាក់របស់អ្នកផងដែរ។ បន្ថែមក្រែមរលោងបន្តិច (បើលាបក្រេមរលោងច្រើនពេក វាអាចមើលទៅប្រតាក) ពីលើពណ៌ក្រែមដែលអ្នកលាបនោះ ធានាថាអ្នកពិតជាទទួលបាននូវបបូរមាត់ដែលពេញទៅដោយមន្តសេ្នហ៍ជាក់ជាមិនខានឡើយ៕
December 21, 2017
ខែរងា បុរសសង្ហា Taeyang ប្រកាសរៀបការហើយ
តាមរយៈសារព័ត៌មាន Teenee ដែលបានចេញផ្សាយនៅពេលមុននេះបន្ដិចបានឱ្យដឹងថា បន្ទាប់ពីបានបង្ហាញមុខគូស្នេហ៍ឱ្យមហាជនបានដឹងរួចមកហើយ តារាចម្រៀងឯកប្រុសរបស់ក្រុមចម្រៀង BigBang លោក Taeyang ជាមួយតារាចម្រៀងស្រី Min Hyo-rin បានប្រកាសពីព័ត៌មានរៀបមង្គលការនៅក្នុងពេលឆាប់ៗនេះហើយ។
ខាងអ្នកគ្រប់គ្រងតារាប្រុស Taeyang គឺផលិតកម្ម YG Entertainment ក៏បានអះអាងដែរថា តារាប្រុសរូបនេះគ្រោងនឹងត្រៀមចូលរោងការជាមួយកញ្ញា Min Hyo-rin នៅអំឡុងដើមខែកុម្ភៈ ឆ្នាំ 2018 ខាងមុខនេះ ទើបតម្រូវឱ្យខាងកូនកំលោះប្រញាប់រៀបចំពិធីមង្គលការឱ្យបានលឿនបំផុត មុនពេលលោកត្រូវចូលធ្វើបរិច្ចាគកិច្ចយោធាបម្រើជាតិ។ គួរបញ្ជាក់ផងដែរថា បន្ទាប់ពីប្រកាសដំណឹងនេះមក អ្នកគាំទ្ររបស់តារាទាំងពីរដួងនេះ ក៏បានទម្លាយរឿងអាថ៌កំបាំងមួយទៀតថា ពួកគេទាំងពីរមិនមែនទើបតែមានទំនាក់ទំនងស្នេហានឹងគ្នានោះទេ ការពិតពួកគេបានលួចរស់នៅជាមួយគ្នាយ៉ាងលាក់លៀមតាំងពីឆ្នាំ 2016 មកម្ល៉េះ។
យ៉ាងណាមិញ ក៏មានការសម្ដែងក្ដីត្រេកអរសាទរពីសំណាក់អ្នកគាំទ្រចំពោះគូស្នេហ៍មួយគូនេះ ដោយបានលាន់មាត់ថា ពិតជាគូស្នេហ៍ដែលស័ក្ដិសមបំផុតទៀតផង៕
December 21, 2017
ចុងឆ្នាំគួររៀបចំអ្វីខ្លះដើម្បីធ្វើឱ្យជីវិតកាន់តែប្រសើរ?
នៅសល់តែប៉ុន្មានថ្ងៃទៀតប៉ុណ្ណោះ ឆ្នាំ2017 នឹងត្រូវបញ្ចប់ ហើយជំនួសមកវិញនូវឆ្នាំថ្មីដែលបង្ហាញថាអាយុរបស់មនុស្សគ្រប់គ្នានឹងកើនឡើងមួយឆ្នាំទៀត ហើយវាក៏ជាពេលវេលាដែលអ្នកទាំងអស់គ្នាត្រូវបង្កើនល្បឿននៃការអភិវឌ្ឍឱ្យស្របទៅតាមការវិវត្តនៃពេលវេលាផងដែរ។
ខាងក្រោមនេះជាវត្ថុមួយចំនួនដែលអ្នកស្រាវជ្រាវផ្នែកអភិវឌ្ឍមនុស្សណែនាំឱ្យមនុស្សគ្រប់រូបគួរត្រៀមដើម្បីជាជំនួយសម្រាប់ការសម្រេចគោលដៅសំខាន់ៗ និងបង្កើនប្រសិទ្ធភាពការងារសម្រាប់ឆ្នាំថ្មីខាងមុខ។
1. ប្រតិទិន និងតារាងផែនការចុងខែធ្នូ គឺជាពេលវេលាល្អបំផុតសម្រាប់អ្នកទាំងអស់គ្នាក្នុងការរំឭកពីផែនការសម្រាប់ឆ្នាំថ្មីដែលអ្នកគ្រោងថានឹងសម្រេច ហើយវាក៏ជាពេលវេលាល្អបំផុតសម្រាប់ពិនិត្យមើល និងត្រៀមទុកឱ្យហើយពីថ្ងៃដែលត្រូវឈប់សម្រាក រួមទាំងធ្វើការងារសំខាន់ៗនៅក្នុងខែនីមួយ។
ការប្រើប្រាស់តារាងគ្រប់គ្រងផែនការ អាចជាវិធីល្អមួយផងដែរក្នុងការកំណត់ឱ្យបានរួចជាស្រេចចំពោះថ្ងៃសំខាន់ៗរួមទាំងអាចជួយឱ្យអ្នកស្មានទុកផងដែរពីខ្ទង់ចំណាយអាទិភាពមួយចំនួនលើកម្មវិធីបុណ្យប្រពៃណី ឬកម្មវិធីផ្ទាល់ខ្លួន និងក្រុមគ្រួសារ ដោយរាប់ទាំងខួបកំណើតមនុស្សជាទីស្រឡាញ់ជាដើម។ ម្យ៉ាងវិញទៀត តារាងគ្រប់គ្រងផែនការ និងប្រតិទិនជាឧបករណ៍ដែលអាចជួយសម្រាលបន្ទុករបស់អ្នកបានច្រើនបំផុត ព្រោះថាមនុស្សម្នាក់ៗប្រាកដជាមានការងារច្រើនត្រូវធ្វើ ហេតុនេះបើមានតារាងចំណាំដែលអ្នកបានឃើញរាល់ថ្ងៃ អ្នកនឹងមានការទុកចិត្ត ហើយកាត់បន្ថយការខ្វល់ខ្វាយបានមួយកម្រិតដែរ។ នៅពេលដែលអ្នកអាចកំណត់ពីពេលសំខាន់ៗបានច្បាស់ហើយ អ្នកនឹងក្លាយជាមនុស្សដែលពូកែទំនាក់ទំនង ហើយជាមនុស្ស ដែលគ្រប់គ្នាស្គាល់ជាអ្នកធ្វើការហ្មត់ចត់ និងទៀងទាត់។
1. សៀវភៅកត់ត្រា និងសៀវភៅទិនានុលេខន៍ប្រចាំឆ្នាំថ្មី (Diary) ក្រៅពីប្រតិទិន និងតារាងធំៗដែលបិទជាប់នៅជញ្ជាំងការិយាល័យ ឬនៅផ្ទះ អ្នកក៏ត្រូវការជំនួយការមួយទៀតដែលអាចទៅតាមអ្នកគ្រប់ពេលវេលានោះ គឺសៀវភៅទិនានុលេខន៍ (Diary)។
សៀវភៅប្រភេទនេះមានបញ្ជាក់យ៉ាងច្បាស់ពីថ្ងៃខែឆ្នាំច្បាស់លាស់នៅគ្រប់ទំព័ររួចជាស្រេចដែលធ្វើឱ្យអ្នកងាយស្រួលកត់ត្រានូវរឿងដែលត្រូវធ្វើក្នុងមួយថ្ងៃៗបានយ៉ាងល្អ។ ក្រៅពីកត់ត្រានូវអ្វីដែលខ្លួនបានធ្វើសៀវភៅទិនានុលេខន៍ ក៏មានមុខងារជាអ្នកធ្វើផែនការតូចៗប្រចាំថ្ងៃយ៉ាងល្អផងដែរ ព្រោះថាអ្នកអាចសរសេរវាទុកមុនមួយថ្ងៃដើម្បីរំឭកខ្លួនឯងថា នៅថ្ងៃស្អែកត្រូវធ្វើអ្វីខ្លះ ហើយនៅថ្ងៃនេះអ្នកបានសម្រេចអ្វីខ្លះ និងនៅសល់អ្វីខ្លះទៀតដែលមិនទាន់បានធ្វើ។
ការប្រើប្រាស់ទិនានុលេខន៍ នេះអាចនឹងធ្វើឱ្យអ្នកក្លាយជាមនុស្សមានរបៀប ហើយជំរុញឱ្យការងារជាច្រើនទទួលបានជោគជ័យ ព្រោះថាវាជាជំនួយការដាស់តឿនអ្នកដែលនៅជាមួយអ្នកស្ទើរគ្រប់ពេល។
1. សៀវភៅអានដែលត្រូវនឹងគោលដៅសម្រាប់ឆ្នាំបន្ទាប់មនុស្សដែលមានគោលដៅច្បាស់លាស់ និងជាអ្នកដែលតែងតែតាមដានការរីកចម្រើនសម្រាប់ខ្លួនឯង ភាគច្រើនដឹងរួចជាស្រេចពីកន្លែងដែលគេនឹងទៅដល់នៅក្នុងរយៈពេលដែលគេកំណត់ទុករួចជាស្រេច។ សម្រាប់អ្នកដែលមានគំនិតបែបនេះពីមួយឆ្នាំទៅមួយឆ្នាំ គេនឹងអភិវឌ្ឍខ្លួនឯងឱ្យកាន់តែប្រសើរ ហើយទំនួលខុសត្រូវសម្រាប់ខ្លួនឯងក៏កាន់តែខ្ពស់ផងដែរ ដែលទាមទារឱ្យពួកគេត្រូវអភិវឌ្ឍខ្លួនឯងជាប់រហូតទើបទទួលបានជោគជ័យ។
បន្ទាប់ពីកំណត់ពីកន្លែងដែលត្រូវទៅហើយ យើងគួរត្រៀមខ្លួនសម្រាប់ដោះស្រាយបញ្ហាប្រឈមនានាដែលអាចរាំងស្ទះដល់ការងារ ឬអាជីវកម្មនៅឆ្នាំថ្មី ហេតុនេះការជ្រើសរើសសៀវភៅអានដើម្បីឆ្លើយតបឱ្យត្រូវស្ថានការណ៍ជាក់ស្តែងដែលអ្នកនឹងអាចជួបប្រទះជារឿងល្អបំផុត ព្រោះអ្នកអាចនឹងក្លាយជាមនុស្សដែលគ្រប់គ្រងស្ថានការណ៍បានល្អប្រសិនបើអ្នកត្រៀមចំណេះដឹងជាស្រេចដើម្បីទប់ទល់៕
December 20, 2017
Gigi Hadid ថតបង្ហាញម៉ូដ ភ្លេចកោររោមក្លៀក
បើតាមរយៈសារព័ត៌មាន Teenee ដែលបានចេញផ្សាយនៅថ្ងៃទី20 ខែធ្នូ ឆ្នាំ 2017 នេះបានឱ្យដឹងថា តារាបង្ហាញម៉ូដស្រីល្បីឈ្មោះនាង Gigi Hadid បានចូលរួមក្នុងការងារថតរូបបង្ហាញម៉ូដសម្រាប់ឈុតសិចស៊ី ដែលត្រូវដាក់បង្ហាញលើក្របប្រតិទិនឆ្នាំ 2018 របស់ក្រុមហ៊ុន LOVE Advent តែជាអកុសល នាងត្រូវបានអ្នកថតរូបបង្ហាញរូបភាពពិតដែលនាងមិនបានកោររោមក្លៀកឱ្យបានស្អាតមុនពេលមកថត ដែលធ្វើឱ្យមានការភ្ញាក់ផ្អើលយ៉ាងខ្លាំងនៅលើបណ្ដាញសង្គមធ្វីតធើរ។
ជាងថតរូបបានសរសេរពាក្យលេងសើច និងទម្លាយឱ្យឃើញរូបភាពដែលមិនទាន់បានធ្វើការកែកុននោះថា «មានតែមនុស្សដែល Focus ខុសចំណុចប៉ុណ្ណោះ ដែលមើលមិនឃើញរោមវែងៗច្បាស់ៗនៅក្រោមក្លៀករបស់នាង»។ បន្ទាប់ពីបានធ្វើការកែកុនរូបភាពរួចមក គេសង្កេតឃើញថា តារាស្រីរូបនេះមានក្លៀកសស្អាត និងរាងកាយសិចស៊ីដូចធម្មជាតិពិតៗ តែនៅពេលដែលអ្នកបានឃើញរូបភាពពិតវិញនោះ ធានាថាអ្នកនឹងញីភ្នែកមិនឈប់ ហើយសឹងតែមិនជឿទៀតផង។
ដើម្បីឱ្យកាន់តែជាក់ច្បាស់ សូមទស្សនារូបភាពទាំងឡាយខាងក្រោមនេះ៖
December 20, 2017
ក្រសួងប្រកាសហាមចាក់ផ្សាយបទចម្រៀង “គ្រូបង្រៀនស្រវឹងស្រា”
នៅថ្ងៃទី20 ខែធ្នូ ឆ្នាំ2017 នេះនៅលើបណ្ដាញសង្គមហ្វេសប៊ុករបស់ក្រសួងវប្បធម៌ និងវិចិត្រសិល្បៈ បានឱ្យដឹងថា បន្ទាប់ពីមានការរិះគន់ពីសំណាក់បណ្ដាសារព័ត៌មាន និងមជ្ឈដ្ឋានមហាជនយ៉ាងចាស់ដៃចំពោះបទចម្រៀង “គ្រូបង្រៀនស្រវឹងស្រា” របស់អ្នកចម្រៀង ចេន សាយចៃ ដែលជាការនិពន្ធរបស់លោក យឹម តាស្រង់ នៅក្នុងផលិតកម្មថោនរួចមក ថ្មីៗនេះក្រសួងវប្បធម៌ និងវិចិត្រសិល្បៈបានប្រកាសហាមចាក់ផ្សាយបទចម្រៀងមួយនេះ ដោយអះអាងថា បទចម្រៀងនេះមានខ្លឹមសារបន្តុះបង្អាប់ និងប្រមាថចំពោះគ្រូបង្រៀនដែលជាមាតាបិតាទីពីររបស់កុមារៗ។
ដើម្បីឱ្យបានជ្រាបច្បាស់ សូមអានសេចក្ដីប្រកាសហាមរបស់ក្រសួងវប្បធម៌ និងវិចិត្រសិល្បៈ ខាងក្រោមនេះ៖

December 20, 2017
ខេត្ដចំនួនបី អាចប្រើប្រាស់ថាមពលអគ្គិសនីដោយពន្លឺព្រះអាទិត្យ និងខ្យល់
ខណៈបណ្ដាញអគ្គិសនីថ្នាក់ជាតិនៅមិនទាន់អាចបំពេញតម្រូវការដល់ប្រជាពលរដ្ឋខ្មែរនៅតាមតំបន់ដាច់ស្រយាលបានគ្រប់ជ្រុងជ្រោយ ក្រុមហ៊ុន Nuri Telecom Co.,Ltd ដែលមានការសហការពីក្រសួងរ៉ែ និងថាមពល បានបង្កើតគម្រោងសិក្សាមួយស្តីពីលទ្ធភាពសម្រាប់ប្រព័ន្ធផលិតថាមពលពីពន្លឺព្រះអាទិត្យ និងខ្យល់ខ្នាតតូច សម្រាប់ប្រើប្រាស់នៅតាមផ្ទះក្នុងតំបន់ដាច់ស្រយាល ក្នុងខេត្ដចំនួន3 ក្នុងប្រទេសកម្ពុជា។
លោក Kim Yu Kwon ប្រធានក្រុមហ៊ុន Nuri Telecom Co.,Ltd. បានលើកឡើងថា គម្រោងសិក្សាលទ្ធភាពប្រព័ន្ធផលិតថាមពលពីពន្លឺព្រះអាទិត្យ និងខ្យល់ខ្នាតតូចសម្រាប់ប្រើប្រាស់តាមផ្ទះក្នុងតំបន់ដែលមិនមានបណ្តាញអគ្គិសនីនេះបានស្នើថវិការហូតដល់5លានដុល្លារអាមេរិក ដើម្បីរៀបចំហេដ្ឋារចនាសម្ព័ន្ធឱ្យបានល្អ ដូច្នេះលោកសង្ឃឹមថាគម្រោងនេះនឹងទទួលបានជោគជ័យនៅក្នុងប្រទេសកម្ពុជា។
កម្ពុជា ជាប្រទេសមួយដែលមានសក្ដានុពលលើថាមពលកកើតឡើងវិញ ដោយតាមការសិក្សាថាមពលដើរដោយពន្លឺព្រះអាទិត្យ និងខ្យល់ដែលអាចផ្ដល់ថាមពលមានរហូតដល់ជាង8,000ម៉េហ្គាវ៉ាត់ និងថាមពលខ្យល់មានប្រមាណ 1,380ម៉េហ្គាវ៉ាត់ ។ តាមរយៈការសិក្សាលទ្ធភាពនៃការផលិតថាមពលអគ្គិសនីដើរដោយថាមពលពន្លឺព្រះអាទិត្យ និងខ្យល់នឹងដាក់ឱ្យប្រើប្រាស់ក្នុងផ្ទះសម្រាប់ប្រជាពលរដ្ឋនៅខេត្ដចំនួន3 គឺខេត្ដពោធិ៍សាត់ ខេត្ដកណ្ដាល និងខេត្តមណ្ឌលគីរី។
រដ្ឋលេខាធិការនៃក្រសួងរ៉ែ និងថាមពល ឯកឧត្តមអុិត ប្រាំង មានប្រសាសន៍ថា ការចូលរួមពីប្រទេសកូរ៉េ ពិតជាមានសារៈសំខាន់ណាស់ក្នុងការរួមចំណែកផ្គត់ផ្គង់អគ្គិសនីដែលដើរដោយពន្លឺព្រះអាទិត្យ និងខ្យល់ សម្រាប់បម្រើសេចក្ដីត្រូវការដល់ប្រជាពលរដ្ឋខ្មែរនៅតាមទីដាច់ស្រយាលដែលបណ្ដាញអគ្គិសនីថ្នាក់ជាតិពុំទាន់បានទៅដល់។ ឯកឧត្ដម បន្ដថា ក្នុងនាមរាជរដ្ឋាភិបាលកម្ពុជាឯកឧត្តមសូមសាទរចំពោះលទ្ធផលដ៏ល្អរបស់ក្រុមការងារដែលបានអនុវត្តជោគជ័យនូវការដំឡើងសាកល្បងប្រព័ន្ធផលិតថាមពលអគ្គិសនីសម្រាប់ប្រើប្រាស់តាមខ្នងផ្ទះក្នុងខេត្តចំនួនបីនេះ៕
December 20, 2017