សង្គម និងសេដ្ឋកិច្ច - La Reine Media

អតីត CEO របស់ Google លាឈប់ពីតំណែងប្រធានក្រុមប្រឹក្សាភិបាល

អាមេរិក៖ លោក Eric Schmidt អតីតនាយកប្រតិបត្តិក្រុមហ៊ុន Google នៅថ្ងៃនេះ បានប្រកាសលាឈប់ពីតំណែងប្រធានក្រុមប្រឹក្សាភិបាល ដោយក្នុងនោះ មូលហេតុនៃការលាឈប់មិនត្រូវបានក្រុមហ៊ុនបញ្ជាក់ឱ្យដឹងនោះទេ។ នេះបើយោងតាមការចេញផ្សាយដោយក្រុមហ៊ុន Alphabet (ក្រុមហ៊ុនធំរបស់ Google)។

តាមការបញ្ជាក់ពី Google បានឲ្យដឹងថា លោក Schmidt បានលាឈប់ពីតំណែងប្រធានក្រុមប្រឹក្សាភិបាលក៏ពិតមែន ប៉ុន្តែលោកនៅកាន់តំណែងជាទីប្រឹក្សាបច្ចេកទេស និងជាសមាជិកក្រុមប្រឹក្សាយោបល់ដដែល ខណៈមូលហេតុនៃការលាឈប់នៅតែមិនបញ្ជាក់ឱ្យដឹង។

លោក Schmidt បានក្លាយជានាយកប្រតិបត្តិក្រុមហ៊ុន Google នៅឆ្នាំ 2001 និងក្រោយមក 10ឆ្នាំ លោកបានក្លាយជាប្រធានក្រុមប្រឹក្សាភិបាលរហូតមកដល់បច្ចុប្បន្ន ហើយនៅពេលនេះ Google នៅមិនទាន់សម្រេចចិត្តជ្រើសតាំងអ្នកថ្មីជំនួសលោកនោះទេ៕

December 22, 2017

ភ្ញាក់ផ្អើល!! អ្នកគាំទ្រថៃរាប់ពាន់នាក់គោរពវិញ្ញាណក្ខន្ធ Kim Jonghyun តាមបែបព្រះពុទ្ធសាសនា

នៅព្រឹកថ្ងៃទី22 ខែធ្នូ ឆ្នាំ2017នេះ បើតាមការចេញផ្សាយរបស់សារព័ត៌មាន Teenee បានឱ្យដឹងថា ក្រុមអ្នកគាំទ្រក្រុមចម្រៀង SHINEE ប្រចាំប្រទេសថៃ ដែលមានចំនួនជាង 1000 នាក់ បានប្រមូលផ្ដុំគ្នា និងដើរដង្ហែក្បួនគ្នារៀបចំពិធីបុណ្យសព និងគោរពវិញ្ញាណក្ខន្ធរបស់តារាចម្រៀងប្រុស Kim Jonghyun ដែលបានធ្វើអត្តឃាតដោយសារវិបត្តិផ្លូវចិត្ត។ កម្មវិធីនេះធ្វើឡើងនៅក្នុងបរិវេណវត្ត សុតធិវៈរ៉ារ៉ាម ផ្លូវចៈរើនគ្រុង ដោយមានការតម្កល់ផ្កាកុលាបស្រស់នៅពីមុខរូបថតតារាប្រុសរូបនេះ ដែលជាទំនៀមទម្លាប់តាមបែបសាសនាគ្រិស្ត។ បន្ទាប់មកទៀត មានកម្មវិធីសរសេរបង្ហាញពីអារម្មណ៍អាឡោះអាល័យនៅក្នុងសំបុត្រ ដែលបញ្ជាក់ពីការលាគ្នាជាចុងក្រោយចំពោះតារារូបនេះ និងចុងក្រោយគឺកម្មវិធីធ្វើបុណ្យបញ្ជូនកុសលដល់វិញ្ញាណក្ខន្ធរបស់តារារូបនេះ ឱ្យបានទៅកាន់សុគតិភព តាមបែបព្រះពុទ្ធសាសនា។

គួររំឭកផងដែរថា សម្រាប់ការបាត់បង់ជីវិតរបស់តារាចម្រៀងប្រុសល្បីឈ្មោះរូបនេះ បានកើតឡើងនៅល្ងាចថ្ងៃទី18 ខែធ្នូ ឆ្នាំ2017 ដែលបានចេញផ្សាយដំបូងដោយសារព័ត៌មានកូរ៉េល្បីឈ្មោះ yonhapnewsបានផ្សាយឱ្យដឹងថា តារាប្រុស Kim Jonghyun វ័យ 27 ឆ្នាំ ជាសមាជិកនៅក្នុងក្រុមចម្រៀង SHINEE ត្រូវបានប្រទះឃើញកំពុងដេកសន្លប់នៅក្នុងបន្ទប់ដេកប្រមាណជាជាង 6 ម៉ោងមកហើយ។ បងស្រីរបស់លោកបានទូរស័ព្ទបញ្ជូនដំណឹងទៅប៉ូលិសដើម្បីសុំជំនួយ ព្រោះនាងបានដឹងជាមុនថា ប្អូនប្រុសបម្រុងនឹងធ្វើអត្តឃាត។ មុនពេលធ្វើអត្តឃាត តារាប្រុសរូបនេះ បានផ្ញើសារអេឡិចត្រូនិកចុងក្រោយចូលទូរស័ព្ទដៃបងស្រីថា «រហូតដល់ពេលនេះវានៅតែលំបាកណាស់ សូមមេត្តាបណ្ដោយខ្ញុំទៅ ខ្ញុំវេទនាណាស់ »៕

December 22, 2017

Dybala វិលទៅកាន់ទម្រង់លេងល្អវិញ ខណៈ Juventus សម្លឹងរកចំណាត់ថ្នាក់លេខ1

តារាឆ្នើម Paulo Dybala បានវិលទៅរកទម្រង់លេងយ៉ាងល្អរបស់គេវិញក្នុងពេលវេលាដ៏សំខាន់ ខណៈដែលក្រុមម្ចាស់ការពារតំណែងជើងឯក Juventus ត្រូវប៉ះជាមួយនឹងក្រុមជើងខ្លាំង AS Roma ដើម្បីប្រជែងយកចំណាត់ថ្នាក់លេខ1អំឡុងថ្ងៃបុណ្យណូអែល ក្នុងការប្រកួតមួយដែលអាចនឹងក្លាយជាចំណុចកាត់សេចក្តីលើការប្រជែងពាន Serie A។

ក្រុមខ្លាំងទាំង4នៅលើតារាងនៃក្របខ័ណ្ឌរបស់អ៊ីតាលី កំពុងតែដេញតាមពីក្រោយគ្នាយ៉ាងប្រកិតត្រឹមតែ4ពិន្ទុប៉ុណ្ណោះ ខណៈដែល Napoli ឈរលេខ1 ដោយមាន42ពិន្ទុ ពីការប្រកួត17លើក ដោយនាំមុខ1ពិន្ទុពីលើក្រុម Juventus។ ក្រុម Inter Milan ស្ថិតក្នុងចំណាត់ថ្នាក់លេខ3 ដោយដេញតាមពីក្រោយ1ពិន្ទុ ហើយ Roma ឈរលេខ4 ដោយនៅសល់1ប្រកួតក្នុងដៃ។ Napoli នឹងសម្លឹងរកការពង្រឹងពិន្ទុនាំមុខរបស់ខ្លួននៅពេលប្រកួតជាមួយនឹងក្រុមឈរលេខ6។

Sampdoria ដែលបានរងបរាជ័យ4លើកក្នុងចំណោមការប្រកួត5លើកចុងក្រោយរបស់ពួកគេ។ ប៉ុន្តែ ចំណាត់ថ្នាក់ទាំងអស់នឹងមានការប្រែប្រួល នៅសប្តាហ៍បន្ទាប់ ខណៈដែលក្រុម Juventus នឹងធ្វើដំណើរទៅកាន់ទឹកដីក្រុម Verona ហើយក្រុម Napoli នឹងប្រកួតនៅលើទឹកដីក្រុម Crotone ហើយ Inter ធ្វើជាម្ចាស់ផ្ទះទទួលក្រុម Lazio។ ការសម្រាកនារដូវរងានៅឆ្នាំនេះរបស់ក្របខ័ណ្ឌអ៊ីតាលី នឹងចាប់ផ្តើមនៅថ្ងៃទី៦ ខែមករា ហេតុនេះ ការប្រជែងគ្នាយ៉ាងស្វិតស្វាញនារដូវរងានេះ នឹងមិនមានសកម្មភាពឡើយ ចាប់ពីដើមខែក្រោយ។ ប៉ុន្តែ ការវិលទៅកាន់រដូវក្តៅវិញ នឹងផ្តល់នូវការមានប្រៀបដោយក្រុម Juventus ខណៈដែល Dybala បានបញ្ចប់ការមិនអាចរកបានគ្រាប់បាល់របស់គេក្នុងពេលក្រុម Juventus ដណ្តើមបានជ័យជម្នះ 2-0 លើក្រុម Genoa ក្នុងការប្រកួតពាន Italian Cup កាលពីពាក់កណ្តាលសប្តាហ៍នេះ។ ទាក់ទងនឹងខ្សែបម្រើប្រយុទ្ធដ៏ឆ្នើមរូបនេះ លោក Massimiliano Allegri គ្រូបង្វឹករបស់ក្លិប Juventus បានឲ្យដឹងថា៖ «រូបគេត្រូវការការបង្ហាញពីទម្រង់លេងដ៏ល្អមួយ ប៉ុន្តែ ជាមួយនឹងគ្រាប់បាល់នេះ វាអាចជួយឲ្យរូបគេមានអារម្មណ៍ស្ងប់ និងជឿជាក់»។ ការប្រកួតនេះនឹងចាប់ផ្តើមនៅម៉ោង 2:45ទៀបភ្លឺ៕

ប្រភពពី៖ Sport24

December 22, 2017

នៅចាំស្ត្រីសម្រាលកូនម្ដង បានភ្លោះ8នាក់ទេ? ពេលនេះពួកគេធំៗអស់ហើយ

តាមរយៈសារព័ត៌មាន khaosod ដែលបានដកស្រង់ព័ត៌មានចេញពីគេហទំព័រ Daily Mail នៅថ្ងៃទី21 ខែធ្នូ ឆ្នាំ2017 បានចេញផ្សាយថា ស្ត្រីជនជាតិអាមេរិកមានឈ្មោះ Otto Mammoth ដែលប្រសូតបានបុត្រភ្លោះ 8 នាក់ដែលបង្កភាពភ្ញាក់ផ្អើលពាសពេញពិភពលោកនោះ ឥឡូវនេះកូនៗរបស់នាងបានធំៗឡើង និងប្រកបដោយសុខភាពល្អអស់ហើយ ហើយរូបគាត់ផ្ទាល់ក៏មានសេចក្ដីសុខនៅក្នុងជីវិតដែរ។ ដោយឡែក កាលពីឆ្នាំ 2009 អ្នកម្ដាយរូបនេះ ត្រូវធ្លាក់ខ្លួននៅក្នុងស្ថានភាពក្រលំបាកយ៉ាងខ្លាំង រហូតដល់គ្មានការងារធ្វើដើម្បីចិញ្ចឹមកូនៗទៀតផង។ សារព័ត៌មានអាមេរិកមួយធ្លាប់បានចេញផ្សាយថា ដោយសារតែគ្មានទឹកដោះគោឱ្យកូន 6 នាក់បៅ និងត្រូវបង់ថ្លៃចិញ្ចឹមកូននៅក្នុងកែវ 2 នាក់ទៀតនោះ គាត់ធ្លាប់គិតថា ចង់សម្លាប់ខ្លួន។

អ្នកម្ដាយវ័យ 42 ឆ្នាំរូបនេះ បានប្រាប់ពីការតស៊ូក្នុងការចិញ្ចឹមកូនៗថា «នៅទីបំផុត ពេលនេះជីវិតត្រូវបានចាប់ផ្ដើមទំព័រថ្មី បញ្ហារឿងលុយកាក់ និងភាពតានតឹង ដែលត្រូវចិញ្ចឹមកូនទាំងអស់ 14 នាក់នោះ គឺត្រូវបានព្យាយាមរកដំណោះសា្រយបន្ដិចម្ដងៗ ដោយការចាប់ផ្ដើមពីអត់ឃ្លាន អត់ធ្មត់គ្រប់បែបយ៉ាងនៅក្នុងជីវិត»។ អ្នកស្រីក៏បានបន្ដប្រាប់ទៀតថា «ខ្ញុំធ្លាប់មានអារម្មណ៍តានតឹង និងពេលខ្លះវាបានសង្កត់ខ្ញុំជាប់មិនឱ្យក្រោកឡើង ហើយមិនចង់ឱ្យខ្ញុំមានជីវិតរស់បន្ដទៅមុខទៀតឡើយ។ ខ្ញុំមានអារម្មណ៍ថា ខ្លួនឯងមិនមានតម្លៃដូចជាមនុស្សទេដែលត្រូវបង្កើតកូនមកច្រើនយ៉ាងនេះ ក៏ប៉ុន្ដែក្ដីស្រឡាញ់ និងទឹកមុខរបស់កូនៗបានក្លាយជាកម្លាំងជំរុញចិត្តឱ្យខ្ញុំត្រូវតែតស៊ូ និងរស់នៅចិញ្ចឹមគ្រួសារឱ្យទាល់តែបាន។ អ្វីដែលខ្ញុំទទួលបានគុណតម្លៃមកវិញគឺ កិត្តិយសរបស់ខ្លួន និងធ្វើឱ្យកូនៗបានឃើញ និងចងចាំមេរៀនជីវិតមួយនេះ។ មានរឿងខ្លះ ខ្ញុំត្រូវបង្ខំចិត្តធ្វើអ្វីដែលខ្ញុំចង់ធ្វើទាល់តែសោះ ព្រោះខ្ញុំភ័យខ្លាចថា មិនអាចមើលថែរក្សាកូនៗឱ្យបានល្អ»។

ស្ត្រីខាងលើនេះ ក៏បានបញ្ជាក់បន្ថែមផងដែរថា ខណៈនេះកូនៗរបស់នាងបានចម្រើនធំធាត់ឡើងហើយ កូនច្បងធំជាងគេឈ្មោះ Elijah អាយុ 16 ឆ្នាំ។ បន្ទាប់មកគឺ Amerahមានអាយុ 15 ឆ្នាំ , Joshua មានអាយុ 13 ឆ្នាំ, Aden អាយុ 11ឆ្នាំ និង Cali និងCaleមានអាយុ 10 ឆ្នាំ ហើយឈុតភ្លោះ 8 នាក់នោះគឺមានអាយុ 9 ឆ្នាំហើយ។ កូនៗទាំង 14 នាក់នេះ គឺជាបេះដូងរបស់នាងខ្ញុំ៕

December 22, 2017

លោក Giggs ច្រានចោលចំពោះព័ត៌មានដែលថា នឹងទៅដឹកនាំក្លិប Swansea

លោក Ryan Giggs អតីតតារាបាល់ទាត់ដ៏ឆ្នើមរបស់ក្លិប Manchester United បានច្រានចោលព័ត៌មានដែលថា លោកកំពុងតែស្ថិតនៅលើផ្លូវឆ្ពោះទៅកាន់ការចូលកាន់តំណែងជាគ្រូបង្វឹកនៅឯក្លិប Swansea របស់ក្របខ័ណ្ឌ Premier League ក្រោយពីការចាកចេញរបស់លោក Paul Clement។

ស្របពេលដែល Swansea កំពុងតែស្វែងរកគ្រូបង្វឹកទី3របស់ខ្លួនក្នុងរយៈពេលតិចជាង12ខែនោះ លោក Giggs ត្រូវបានគេគិតថា មានទំនាក់ទំនងជាមួយនឹងតួនាទីនេះ រួមជាមួយនឹងលោក Ronald Koeman, Tony Pulis និងលោក Louis van Gaal។ លោក Giggs ត្រូវបានចោទសួរថា តើលោកមានការចាប់អារម្មណ៍ក្នុងការដឹកនាំក្លិបមួយដែលលោកធ្លាប់ត្រូវបានគេទាក់ទងកាលពីពេលមុន នៅមុនពេលលោក Bob Bradley ត្រូវបានតែងតាំងជាគ្រូបង្វឹកកាលពីខែតុលា ឆ្នាំ២០១៦ ឬយ៉ាងណា?

លោក Giggs បានប្រាប់ទូរទស្សន៍ Sky Sports ថា៖ «ទេ ខ្ញុំធ្លាប់បានពិភាក្សាជាមួយនឹងពួកគេកាលពីមុន ពោលគឺមុនពេលពួកគេបានធ្វើការតែងតាំងលោក Bob Bradley ទៅទៀត»។ លោក Giggs បានបញ្ជាក់ថា ការលក់តារាឆ្នើមដូចជា Gylfi Sigurdsson និង Fernando Llorente កាលពីរដូវក្តៅមុន បានធ្វើឲ្យក្រុម Swansea ចុះខ្សោយ។ លោក Giggs បានឲ្យដឹងថា៖ «ខ្ញុំមិនដឹងទេ ខ្ញុំមិនមែនស្ថិតក្នុងក្លិបនោះឡើយ ប៉ុន្តែពិតណាស់ ក្នុងរយៈពេលប៉ុន្មានឆ្នាំចុងក្រោយនេះ វាពិតជាមានដំណើរការយ៉ាងល្អក្នុងក្លិបនេះ ដែលស្ថិតនៅលើផ្លូវដ៏ត្រឹមត្រូវ និងក្លាយជាក្រុមមួយដ៏មានស្ថិរភាពរបស់ក្របខ័ណ្ឌ Premier League»។

បុរសសញ្ជាតិវេលស៍រូបនេះបានបន្ថែមទៀតថា៖ «ប៉ុន្តែ វាពិតជាលំបាកនៅពេលនេះ អ្នកឃើញស្រាប់ហើយថា ក្រុមនេះធ្លាក់ចុះទម្រង់លេង។ វាកាន់តែស្វិតស្វាញពីមួយឆ្នាំទៅមួយឆ្នាំ។ ពួកគេបានបាត់បង់កីឡាករឆ្នើមៗជាច្រើន តើមែនទេ? ពួកគេបានបាត់បង់ Sigurdsson ពួកគេបានបាត់បង់ Llorente ហើយប្រហែលជាមិនទិញចូលកីឡាករដើម្បីជំនួសកន្លែងរបស់ពួកគេឡើយ។ នោះគឺជាបញ្ហា»៕

ប្រភពពី៖ Sky Sports

December 22, 2017

អ្នកចិត្តសាស្ត្របង្ហាញហេតុផលដែលក្មេងតូចចូលចិត្តសួរ “ហេតុអ្វី?”

ពាក្យថា “ហេតុអ្វី?” ជាសំណួរដែលមនុស្សទូទៅតែងតែសួរនៅពេលដែលគេជួបរឿងដែលមិនអាចគ្រប់គ្រងបាន ឬជួបស្ថានការណ៍ដែលកើតឡើងមិននឹកស្មានដល់ តែសម្រាប់ក្មេងវិញស្ទើរតែគ្រប់រឿងទៅហើយដែលពួកគេជួបគឺជារឿងថ្មី។ ក្មេងតូចៗចូលចិត្តសួរសំណួរថា “ហេតុអ្វីបានជាបែបនេះ?” ជាច្រើនដងក្នុងមួយថ្ងៃៗ ព្រោះថា ពួកគេកំពុងស្វែងយល់ពីរឿងគ្រប់យ៉ាងនៅក្នុងជីវិត ដែលពួកគេបានជួបប្រទះ ហើយក៏ជាពេលវេលាចាប់ផ្តើមដំបូងបំផុតដែលទទួលយកហេតុផលពីមនុស្សធំផងដែរ។

តាមពិតទៅប្រសិនបើក្មេងបានចម្លើយច្រើនពីមនុស្សធំដែលឆ្លើយដោយត្រឹមត្រូវនោះ ពួកគេនឹងអាចអភិវឌ្ឍសមត្ថភាពបានលឿនបំផុត ព្រោះថាគេអាចនឹងចងចាំរឿងគ្រប់យ៉ាងបានល្អ ហើយថែមទាំងសួរនូវសំណួរពាក់ព័ន្ធនានាជាច្រើនទៀតដើម្បីយល់ច្បាស់នូវរឿងដែលពួកគេចង់ដឹង។ ហេតុនេះហើយទើបអ្វីដែលយើងគ្រប់គ្នាគួរពិចារណាគឺត្រូវត្រៀមចម្លើយឱ្យបានល្អ និងប្រកបដោយហេតុផលវិជ្ជមានសម្រាប់ឆ្លើយនឹងសំណួរថា “ហេតុអ្វី?” ដែលគេនឹងចោទសួររាប់រយ រាប់ពាន់សំណួរមុនពួកគេក្លាយជាក្មេងជំទង់។

លោកបណ្ឌិត Rebecca Palacios អ្នកជំនាញផ្នែកចិត្តសាស្ត្រកុមារ បានលើកឡើងថា ជាទូទៅតាមធម្មជាតិ ក្មេងៗអាចទទួលបានចំណេះដឹងជាច្រើនក្នុងជីវិតរបស់ពួកគេ និងមានលក្ខណៈសម្បត្តិល្អ ឬអាក្រក់តាមរយៈសំណួររបស់ពួកគេដែលសួរដល់ទៅរាប់រយសំណួរក្នុងមួយថ្ងៃ។ ពួកគេឆ្ងល់ពីពិភពនៅជុំវិញខ្លួន ឆ្ងល់ពីសកម្មភាពរបស់មនុស្សធំ ឆ្ងល់ពីជំនាញដែលមនុស្សទូទៅកំពុងធ្វើ ឆ្ងល់ពីការប្រើប្រាស់ពាក្យ និងព្យាយាមស្វែងយល់នូវរឿងជាច្រើនទៀតនៅក្នុងជីវិត។ អ្វីដែលមនុស្សធំអាចផ្តល់ឱ្យពួកគេ គឺតាមរយៈការធ្វើជាប្រភពព័ត៌មានដែលត្រឹមត្រូវសម្រាប់ពួកគេ ដើម្បីជំរុញការគិតរបស់ក្មេងៗឱ្យក្លាយជាមនុស្សវិជ្ជមានទៅថ្ងៃអនាគត។

អ្នកជំនាញខាងលើបានបន្តថា នៅពេលដែលក្មេងតូចៗសួរសំណួរថា “ហេតុអ្វី?” យើងត្រូវតែដឹងឱ្យច្បាស់ថា ពួកគេត្រូវការដឹងចម្លើយភ្លាមៗជាការផ្តល់យោបល់របស់គាត់ គឺក្នុងនាមជាឪពុកម្តាយ ឬជាអ្នកបង្រៀនត្រូវតែឆ្លើយភ្លាមៗទោះបីជាចម្លើយនោះខ្លី ឬវែងក៏ដោយ តែត្រូវឆ្លើយឱ្យចំចំណុច និងឱ្យច្បាស់។

ពេលខ្លះចម្លើយសាមញ្ញៗ និងចម្លើយលឿនៗគឺជាអ្វីដែលគេត្រូវការភ្លាមៗ ហើយប្រសិនបើយើងពន្យាពេលក្នុងការឆ្លើយ គេអាចនឹងភ្លេច ហើយបន្តសួររឿងថ្មីផ្សេងៗទៀតជាមិនខាន ដែលកត្តានេះគឺអាចធ្វើឱ្យពួកគេបាត់បង់ឱកាសក្នុងការរៀនពីអ្វីដែលគេកំពុងចង់ដឹង។ ឧទាហរណ៍ ប្រសិនបើក្មេងតូចសួរថា “ហេតុអ្វីឆ្មាមានរោម?” យើងអាចឆ្លើយនូវចម្លើយងាយៗភ្លាមថា “ឆ្មាមានរោមព្រោះវាអាចធ្វើឱ្យឆ្មាមានភាពកក់ក្តៅ បើទោះបីជាយើងដឹងថា គ្រប់ឆ្មាទាំងអស់គឺត្រូវតែមានរោមពីធម្មជាតិក៏ដោយ។ ការព្យាយាមធ្វើបែបនេះគឺអាចជំរុញឱ្យកូនៗរបស់លោកអ្នកបានស្គាល់ពិភពលោកបានច្រើនតាមដែលអាចធ្វើទៅបាន ហើយពួកគេនឹងមានបញ្ញាកាន់តែខ្ពស់ នៅពេលដែលពួកគេទទួលបានចម្លើយកាន់តែច្រើន។

លើសពីនេះទៅទៀត ប្រសិនបើយើងជាមនុស្សធំ អាចធ្វើឱ្យគេចាប់អារម្មណ៍លើសំណួរទី1នេះហើយ យើងប្រាកដជាអាចនាំគេទៅរកប្រភពចំណេះដឹងល្អៗជាច្រើនទៀតដែលគេរីករាយនឹងស្តាប់។ កូនក្មេងតាមពិតទៅ បើចូលចិត្តអ្នកណាម្នាក់ហើយ ឬពេញចិត្តនឹងចម្លើយណាមួយហើយ គេនឹងដេញដោលសួរឱ្យដល់ទីបញ្ចប់។

ឧទាហរណ៍ ចំពោះរឿងខាងលើ យើងអាចឆ្លើយទៅកាន់គាត់បន្ថែមឱ្យលម្អិតប្រសិនបើយើងនឹកឃើញភ្លាមៗដូចជា “ឆ្មាមានរោមព្រោះវាអាចធ្វើឱ្យឆ្មាមានភាពកក់ក្តៅ ហើយឆ្មាគឺជាសមាជិកម្នាក់នៅក្នុងគ្រួសាររបស់ឆ្មាទាំងអស់ ដែលឆ្មាទាំងអស់គឺត្រូវតែមានរោម។ ឆ្មាជាសត្វចិញ្ចឹមកូនដោយទឹកដោះដូចមនុស្សយើងដែរ ដែលសូម្បីតែពួកយើងក៏មានរោមដែរ គ្រាន់តែយើងខុសគ្នាពីឆ្មាត្រង់ថាយើងមានសក់ក្រាស់ ហើយឆ្មាមានរោមក្រាសតែប៉ុណ្ណោះ។

ការឆ្លើយរបស់យើងបែបនេះ គឺជាវិធីមួយនាំក្មេងៗដោយគំនិតងាយៗដែលពួកគេកំពុងចង់ដឹងទៅកាន់មេរៀនជាច្រើនទៀតដែលគេអាចនឹងចងចាំបានល្អពីហេតុផលច្បាស់លាស់នៃការរស់នៅ៕

December 22, 2017

វិធីធ្វើឱ្យបន្លែសាលាដ នៅស្រស់ និងស្រួយជាប់ជានិច្ច

បើចង់ទទួលទានមុខម្ហូបធ្វើពីសាលាដឱ្យឆ្ងាញ់នោះ បន្លែសាលាដត្រូវតែនៅស្រស់ និងស្រួយតែជាច្រើនដងណាស់ ពេលដែលយើងយកចេញពីក្នុងទូទឹកកកមកតែប៉ុន្មាននាទីសោះ បន្លែសាលាដក៏មើលទៅទ្រោមស្លោកទន់ និងមើលទៅមិនគួរឲទទួលទាន ។

បញ្ហានេះអាចកែរខៃបានដោយវិធីដ៏ងាយបំផុត គឺនៅពេលដែលលោកអ្នកហែក ឬហាន់បន្លែសាលាដរួចរាល់ហើយ ចូរនាំយកទៅលាងនឹងទឹកស្អាត បន្ទាប់មកត្រាំចោលនៅក្នុងទឹកប្រមាណ 5នាទី រួចហើយយកអំបិលបន្តិចមកដាក់ចូលក្នុងទឹកដែលត្រាំសាលាដនោះ ទុកឱ្យអំបិលរលាយបន្តិចទើបស្រង់ឡើងទុកឲស្រស់ទឹករួចសឹមយកទៅធ្វើម្ហូមពិសា ។ តែប៉ុណ្ណឹងបន្លែសាលាដរបស់លោកអ្នកនឹងស្រស់ ស្រួយឆ្ងាញ់ពិសាទៅហើយ៕

December 22, 2017

វិធីថែបំប៉នស្បែកមុខស្ងួត ដោយប្រើផ្លែឈើ

ស្បែកមុខស្ងួត របកឡើងហុយ បើនារីៗយើងធ្លាប់ជួបបញ្ហានេះ អាចបណ្តាលមកពីច្រើនមូលហេតុ ជាពិសេសនារីៗដែលត្រូវអង្គុយធ្វើការនៅក្នុងបន្ទប់ម៉ាស៊ីនត្រជាក់ជាប់រហូតរយៈពេលយូរ ធ្វើឱ្យស្បែកមុខរបស់អ្នកសម្រួលខ្លួនមិនទាន់រហូតដល់ខ្វះសំណើម និងខ្វះភាពស្រស់បស់។ ថ្ងៃនេះ ឡារ៉ែន មានផ្លែឈើ5ប្រភេទមកណែនាំក្នុងការជួយថែបំប៉នស្បែកមុខរបស់នារីៗយើងឱ្យត្រឡប់មកមានសំណើមស្រស់បស់កាន់តែខ្លាំងឡើងវិញ តើមានអ្វីខ្លះនោះ សូមតាមដានជាបន្ត។

1/ ប្រទាលកន្ទុយក្រពើ (Aloe Barbadensis Mill)

ស្លឹកប្រទាលកន្ទុយក្រពើមានគុណសម្បត្តិជួយកាពារស្បែកមិនឱ្យស្ងួត បន្ថែមសំណើម ប្រឆាំងការរលាក ធ្វើឱ្យស្បែករាបរលោង ការពារពន្លឺអ៊ុលត្រាវិយ៉ូឡេ។ ស្លឹកប្រទាលកន្ទុយក្រពើមានជ័រខាប់ៗ និងសាច់ថ្លាៗដែលអាចជួយរក្សាសំណើមនៅលើស្រទាប់ស្បែកខាងក្រៅបាន ក្រៅពីនេះនៅមានសារធាតុ Carboxypeptidase ដែលជួយភ្ជិតស្បែក ជួយបកស្រទាប់ស្បែកដែលក្រៀមស្ងួតចេញ និងបង្កើតស្រទាប់ស្បែកថ្មីដែលរាបរលោងឡើងមកជំនួសវិញ។

2/ ត្រសក់ (Cucumis Sativus Linn)

ផ្លែត្រសក់មានសារធាតុ Cystin, Methionin និងនៅមានសារធាតុ ផូលីស៊ែកខារ៉ាយ ដែលជួយធ្វើឱ្យស្បែកមុខស្រស់ថ្លាមានសំណើម ប្រឆាំងនឹងការឡើងស្នាមកន្ទួលក្រហម ល្អសម្រាប់អ្នកដែលមានស្បែកមុខស្ងួត និងអ្នកមានមុខឡើងខ្លាញ់ បង្កើនភាពតឹងណែនរបស់ស្បែក រក្សាភាពក្មេងជាងវ័យ និងថែមទាំងមានសារធាតុរ៉ែផ្សេងទៀតដែលជួយធ្វើឱ្យកើតមានសំណើមតាមធម្មជាតិនៅលើស្រទាប់ស្បែកទៀតផង។

3/ ផ្លែម្នាស់ (Anana Comosus (Linn) Merr)

ផ្លែម្នាស់ ជួយការពារស្បែកពីអនុមូលឥស្សរៈ កាត់បន្ថយការក្លាយ មានអង់ហ្ស៊ីម Papain ជួយរំលាយកោសិកាដែលស្លាប់ហើយរបស់ស្រទាប់ស្បែកឱ្យរបូតចេញមក មានប្រយោជន៍សម្រាប់អ្នកដែលមានមុនក្បាលខ្មៅនៅលើផ្ទៃមុខ ធ្វើឱ្យស្បែកកាន់តែស្រស់ថ្លាឡើង។ ម្នាស់មានគុណសម្បត្តិក្នុងការជួយកាត់បន្ថយការរលាកក្លាយ និងនៅមានវីតាមីន A វីតាមីន C ជួយប្រឆាំងអនុមូលឥស្សរៈ និងមានសារធាតុរ៉ែច្រើនប្រភេទទៀតដែលជួយធ្វើឱ្យស្បែកមុខស្រស់ថ្លាមានសំណើម មិនស្ងួតក្រៀម។

4/ ផ្លែប៉េងប៉ោះទុំ (Lycopersicon Esculentum Mill)

ផ្លែប៉េងប៉ោះទុំ ជួយបង្កើនសំណើម ធ្វើឱ្យស្បែកមុខស្រស់ថ្លា ការពារស្បែកពីអនុមូលឥស្សរៈ ធ្វើឱ្យផ្ទៃមុខសឡើង។ ទឹកចម្រាញ់ពីផ្លែប៉េងប៉ោះមានវីតាមីនច្រើនប្រភេទ និងមានសារធាតុគ្លុយខូអាល់ខាឡយដ៍ឈ្មោះ ថូម៉ាធីន ជាសារធាតុដែលមានឥទ្ធិពលភ្ជិតសន្លាកស្នាម ក្រៅពីនោះនៅមានឬទ្ធិជាទឹកអាស៊ីតខ្សោយជួយលាងផ្ទៃមុខឱ្យស្អាតទន់រលោង និងសម្រួលសភាពស្បែកមុខដែលស្ងួតក្រៀមឱ្យមានសំណើមស្រស់ថ្លាឡើងវិញបានយ៉ាងល្អប្រសើរ។

5/ ផ្លែចេក (Musa Paradisiacal L.Var. sapientum O.Ktze)

ផ្លែចេក មានសារធាតរំអិលបង្កើនភាពស្រស់ស្រាយ និងថែមទាំងមានវីតាមីន សារធាតុរ៉ែ ប្រូតេអុីនច្រើនប្រភេទដែលមានប្រយោជន៍ដល់ស្បែកក្នុងការបង្កើនសំណើម លុបស្នាមជ្រីវជ្រួញ ព្យាបាលសន្លាកស្នាម ធ្វើឱ្យស្បែកមុខស្រស់ថ្លា និងការពារស្បែកពីអនុមូលឥស្សរៈទៀតផង។

អានរួចហើយគឺមិនគួរឱ្យជឿសោះថា បន្លែផ្លែឈើទាំងអស់នេះមានគុណប្រយោជន៍ចំពោះស្បែកមុខរបស់យើងបានច្រើនដល់ថ្នាក់នេះឡើយ ហើយថែមទាំងមិនពិបាករកទៀតផង ចង់ឱ្យនារីៗយើងសាកល្បងយកមកថែបំប៉នស្បែកមុខលមើល ចង់យកមកចិតជាបន្ទះស្តើងៗបិទនៅលើផ្ទៃមុខ ឬយកមកកិនឱ្យម៉ដ្ឋហើយបំពោកលើផ្ទៃមុខ ទុកចោល3-5នាទី ហើយលាងសម្អាតចេញដោយទឹកស្អាតក៏បាន។ ក្រៅពីថែបំប៉នស្បែកមុខហើយ សូមកុំភ្លេចទទួលទានអាហារឱ្យគ្រប់5ប្រភេទក្រុម គេងសម្រាក និងទទួលទានទឹកឱ្យបានគ្រប់គ្រាន់ផង តែប៉ុណ្ណឹងស្បែកមុខរបស់នារីៗយើងនឹងសស្អាត ភ្លឺរលោង តឹងណែន លែងខ្មៅជ្រីញជ្រួញតទៅទៀតមិនខាន៕

December 22, 2017

ហេតុផលឆ្លាតវៃមួយចំនួនបង្ហាញថាក្មេងតូចគួរសិក្សាពីហិរញ្ញវត្ថុ

ការចាយវាយរបស់កូនៗជារឿងដែលអាណាព្យាបាលតែងតែព្រួយបារម្ភ ហើយមានពេលខ្លះក៏ត្រូវចំណាយពេលច្រើនដើម្បីស្វែងរកការប្រឹក្សា ឬស្វែងរកវិធីសាស្ត្រក្នុងការគ្រប់គ្រងការចាយវាយរបស់ពួកគេផងដែរ ខណៈអ្នកខ្លះទៀតចង់ឱ្យកូនយល់ពីការលំបាករបស់ខ្លួនដែលខិតខំប្រឹងប្រែងដើម្បីរកលុយ តែកូនបែរចាយវាយច្រើនដោយមិនសូវខ្វល់ទៅវិញ។

ជាទូទៅគេរកឃើញថា បញ្ហាទាំងអស់នេះកើតចេញពីកូនៗទាំងអស់នោះមិនមានទម្លាប់ក្នុងការសន្សំប្រាក់ ឬមិនយល់ពីការរៀបចំផែនការនៅពេលដែលពួកគេមានវ័យក្មេង ហេតុនេះទើប ឡារ៉ែន ពាណិជ្ជ បានដកស្រង់នូវចំណុចសំខាន់ៗមួយចំនួនពីការស្រាវជ្រាវមកជម្រាបជូនពីហេតុផលក្នុងការជំរុញក្មេងតូចឱ្យសិក្សាពីការគ្រប់គ្រងហិរញ្ញវត្ថុតាំងពីនៅវ័យក្មេង។

ក្មេងអាយុ5ឆ្នាំជាវ័យល្អបំផុតសម្រាប់ការរៀនសន្សំ

តាមការស្រាវជ្រាវរបស់ស្ថាប័ន Customer Financial Protection Bureau (CFPB) បានបង្ហាញថា ក្មេងអាចអភិវឌ្ឍសមត្ថភាពក្នុងការសន្សំប្រាក់ចាប់ពីអាយុ5ឆ្នាំឡើងទៅ ហេតុនេះអាណាព្យាបាលគួរបណ្តុះគំនិតនៃការសន្សំ តាមរយៈការផ្តល់ឱ្យនូវកូនជ្រូកសន្សំលុយ (Piggy Bank) ឬគណនេយ្យសន្សំដែលផ្តល់ឱកាសឱ្យពួកគេចេះសន្សំប្រាក់ដោយខ្លួនឯង។ ជាការកត់សម្គាល់ នៅពេលដែលក្មេងតូចម្នាក់មានទម្លាប់សន្សំប្រាក់ គាត់បានស្គាល់នូវរសជាតិនៃការគ្រប់គ្រងលុយកាក់ ហើយគាត់អាចនឹងក្លាយជាមនុស្សម្នាក់ដែលចេះគ្រប់គ្រងលុយកាក់បានល្អ ឬមានគម្រោងក្នុងការបង្កើតលុយថែមទៀតផងនៅពេលដែលពួកគេចូលដល់វ័យកណ្តាល។ ការដែលកុមារចម្រើនវ័យជាមួយនឹងលុយសន្សំដែលគាត់មានស្រាប់ គាត់អាចនឹងមានអ្វីគ្រប់យ៉ាងដែលគាត់ចង់បានសម្រាប់ផ្គត់ផ្គង់ដល់ការសិក្សារបស់គាត់ ហើយការចាយវាយរបស់គាត់ក៏ហ្មត់ចត់ត្រឹមត្រូវហើយចំគោលដៅល្អ ព្រោះគាត់យល់ច្បាស់ពីតម្លៃនៃពេលវេលា និងលុយដែលគាត់ខំសន្សំតាំងពីមុនមក។

ក្មេងអាចចង់បានដំបូន្មានច្រើនជាងលុយកាក់នៅពេលដែលគេចូលចិត្តសន្សំប្រាក់

អាណាព្យាបាលជាច្រើនប្រហែលជាផ្តល់រង្វាន់ដល់កូនជាលុយកាក់ ឬជារបស់របរដែលចំណាយលុយទិញ។ របស់ទាំងអស់នេះអាចជួយឱ្យកូនសប្បាយចិត្ត តែពេលខ្លះមិនប្រាកដថាអាចជួយគេបានច្រើននោះទេ។ ពេលខ្លះអាណាព្យាបាលអាចចំណាយលុយតិច តែបានផលច្រើនចំពោះការផ្តល់មេរៀនល្អៗដល់ក្មេង។ នៅពេលដែលក្មេងៗយល់ពីតម្លៃនៃការគ្រប់គ្រងហិរញ្ញវត្ថុ ឬការសន្សំផ្ទាល់ខ្លួន អាណាព្យាបាលអាចផ្តល់ឱ្យពួកគេនូវថវិកាមួយចំនួន ជាមួយនឹងវិធីសាស្ត្រឆ្លាតវៃមួយចំនួនក្នុងការសន្សំប្រាក់ដែលពួកគេមិនធ្លាប់ដឹងពីមុនមក។ការធ្វើបែបនេះ អាចជារង្វាន់យ៉ាងល្អដែលក្មេងអាចចេះទាំងទ្រឹស្តី និងការអភិវឌ្ឍប្រកបដោយភាពរីករាយ ព្រោះថានៅពេលដែលយើងផ្តល់ឱ្យគាត់នូវលុយសន្សំ បង្ហាញវិធីក្នុងការសន្សំប្រកបដោយភាពឆ្លាតវៃ ហើយទុកឱ្យគាត់ជាអ្នកអនុវត្តដោយខ្លួនឯង ហើយទទួលបានលទ្ធផលនោះ គាត់នឹងរីករាយក្នុងការសន្សំនោះដោយជក់ចិត្ត។ ការទុកឱកាសក្នុងការសម្រេចចិត្តខ្លះដល់ក្មេងតូចៗ និងឱ្យគាត់ដឹងពីចំនួនលុយច្បាស់លាស់របស់គាត់ផ្ទាល់ផង អាចធ្វើឱ្យគាត់កាន់តែមានចំណង់កាន់តែខ្លាំងក្នុងការសន្សំប្រាក់។

អាណាព្យាបាលនឹងលែងសូវបារម្ភពីការចាយវាយរបស់កូននៅវ័យជំទង់ បើគេចេះសន្សំប្រាក់ពីតូច

អាណាព្យាបាលជាច្រើនតែងបារម្ភពីការគ្រប់គ្រងហិរញ្ញវត្ថុរបស់កូន ឬចូលខ្លួនទៅជ្រៀតជ្រែកលើការសម្រេចចិត្តនានាពាក់ព័ន្ធនឹងលុយកាក់របស់កូន។ ការធ្វើបែបនេះគឺអាចធ្វើឱ្យគាត់ទុកចិត្ត តែគាត់នឹងបាត់បង់ឱកាសក្នុងការផ្តល់ឱ្យកូននូវភាពចាស់ទុំពិតប្រាកដផ្នែកហិរញ្ញវត្ថុ ហេតុនេះការដែលតាមដាន និងឃ្លាំមើលក្មេងពីតូច អាចធ្វើឱ្យអាណាព្យាបាលមិនសូវបារម្ភពីការចាយវាយរបស់កូន។ ក្មេងៗដែលមានចំណេះដឹងផ្នែកគ្រប់គ្រងហិរញ្ញវត្ថុជាមនុស្សដែលចង់បានឱកាសច្រើនក្នុងការសម្រេចចិត្តចាយវាយ ព្រោះពួកគេជឿលើសមត្ថភាពខ្លួនឯង និងមានភាពប្រយ័ត្នប្រយែងខ្ពស់ដែលអាចធ្វើឱ្យឪពុកម្តាយមានការទុកចិត្ត។ គាត់អាចនឹងសួរច្រើនទៅឪពុកម្តាយ ឬសុំការពិភាក្សាមុនពេលចាយវាយលើរបស់ដែលមានតម្លៃថ្លៃ៕

December 21, 2017

ម្ដាយ Selena Gomez ប្រកាសស្អប់កូនស្រី ក្រោយទាក់ទង JB វិញ

តាមរយៈសារព័ត៌មាន Teenee នៅថ្ងៃទី21 ខែធ្នូ ឆ្នាំ2017 នេះ បានចេញផ្សាយថា តារាចម្រៀងប្រុស Justin Biber និងតារាចម្រៀងស្រី Selena Gomez ដែលធ្លាប់មានទំនាក់ទំនងស្នេហាជាមួយគ្នាកាលពីឆ្នាំ 2011 ហើយបានបែកផ្លូវគ្នានៅឆ្នាំ 2014 ប៉ុន្ដែធ្លាប់មានអ្នកបានឃើញអ្នកទាំងពីរប្រាប់ថា ពួកគេនៅតែលបទាក់ទងគ្នាម្ដងម្កាលដោយលួចលាក់នោះ ឥឡូវមានកាយវិការបង្ហាញឱ្យដឹងថា ពួកគេចង់ត្រឡប់មកជានាគ្នាវិញក្រោយពីបានបែកគ្នាអស់រយៈពេល 3 ឆ្នាំមកហើយនោះ។

ខណៈនេះ អ្នកគាំទ្រតារាចម្រៀងទាំងពីរកំពុងតែសាទរចំពោះចំណងមេត្រីភាពដែលទើបត្រូវបានផ្សារភ្ជាប់គ្នាឡើងវិញ ក៏ប៉ុន្តែជាអកុសល អ្នកម្ដាយរបស់តារាស្រីខាងលើនេះ លោកស្រី Mandy Teefey បានផ្ដល់បទសម្ភាស និងប្រកាសប្រាប់សារព័ត៌មាន TMZ ថា លោកស្រី ស្អប់ និងមិនអាចអភ័យទោសចំពោះទង្វើរបស់កូនស្រី និងមិនព្រមទទួលយកតារាចម្រៀងប្រុស Justin Biber ឱ្យចូលមករស់នៅក្នុងក្រុមគ្រួសាររបស់លោកស្រីជាដាច់ខាត។ អស់រយៈពេលជាច្រើនឆ្នាំមកនេះ Justin Biber គឺជាមនុស្សបង្កបញ្ហានៅក្នុងសង្គមមករហូត ហើយបានធ្វើខុសច្បាប់ និងមិនគប្បីចំពោះក្រុមគ្រួសារលោកស្រីទេ។ ផ្ទុយទៅវិញ អ្នកម្ដាយរបស់តារាប្រុស Justin ក៏បានប្រាប់អ្នកសារព័ត៌មានវិញដែរថា គ្រួសារ Justin មានសេចក្ដីរីករាយបំផុតដែលកូនប្រុសបានត្រឡប់មកទាក់ទងជាមួយនាង Selena Gomez ដែលបង្ហាញពីក្ដីស្នេហាស្មោះស្ម័គ្រ។

គួរបញ្ជាក់ផងដែរថា ខណៈនេះស្ថានភាពជំងឺវះកាត់ក្រលៀនរបស់តារាស្រី Selena Gomez មានស្ថានភាពប្រសើរឡើងបន្ដិចហើយ តែក៏ត្រូវមកស្រងាកចិត្តយ៉ាងខ្លាំង ដែលនាងត្រូវម្ដាយបង្កើតប្រកាសក្ដែងៗថា ស្អប់កូនស្រីដែលត្រឡប់ទៅត្រូវគ្នាជាមួយកំពូលមនុស្សបង្កបញ្ហាដូចជា Justin Biber វិញ៕

December 21, 2017

Category: សង្គម និងសេដ្ឋកិច្ច