Category: សង្គម និងសេដ្ឋកិច្ច
ករុណា ពេជ្រ បារម្ភពីស្ថានភាពជំងឺរបស់ឪពុកមុនថ្ងៃមង្គលរបស់ខ្លួន
តាមរយៈរូបភាពនៅក្នុងបណ្ដាញសង្គមហ្វេសប៊ុករបស់តារាចម្រៀងប្រចាំផលិតកម្មថោន លោក ករុណា ពេជ្រ ដែលបានបង្ហោះឱ្យដឹងពីស្ថានភាពជំងឺរបស់ឪពុកខ្លួន បានឱ្យដឹងថា ខណៈនេះឪពុកលោកកំពុងតែសម្រាកព្យាបាលនៅលើគ្រែក្នុងមន្ទីពេទ្យជប៉ុន ក្នុងរាជធានីភ្នំពេញនៅឡើយ ព្រមទាំងបានបង្ហាញពីក្ដីបារម្ភយ៉ាងខ្លាំង ព្រោះថា តារារូបនេះចង់ឱ្យលោកឪពុកមានវត្តមាននៅក្នុងថ្ងៃចូលរោងការរបស់លោក។
ជាក់ស្ដែងណាស់កាលពីថ្ងៃម្សិលមិញនេះដែរ មានរឿងដ៏គួរឱ្យភ្ញាក់ផ្អើលមួយកើតឡើង ដោយសារតែឪពុកជាទីស្រឡាញ់របស់តារាចម្រៀង ករុណា ពេជ្រ បានចូលមន្ទីរពេទ្យសង្គ្រោះបន្ទាន់ភ្លាមៗ ធ្វើឲ្យមហាជន និងមិត្តរួមអាជីព នាំគ្នាសាកសួរពីស្ថានភាព ព្រមទាំងជូនពរឲ្យឪពុករបស់តារាប្រុសរូបនេះឆាប់ជាសះស្បើយទៀតផង។
ជាមួយគ្នានោះដែរ ករុណា ពេជ្រ បានបង្ហោះសារដ៏សែនក្ដុកក្ដួលមួយ ជាមួយរូបភាពឪពុកកំពុងសម្រាកនៅលើគ្រែ ដែលមើលឃើញហើយគួរឱ្យសោកសៅយ៉ាងខ្លាំងថា៖ «អារម្មណ៍មួយនេះ ទឹកភ្នែកមិនដឹងខ្លួន សូមទេវតាជួយថែរក្សា ប៉ាខ្ញុំផង គាត់ចង់ឃើញកូនគាត់ចូលរោងការខ្លាំងណាស់ កូនមានលទ្ធភាព តែចង់ឱ្យប៉ាតស៊ូ មានកម្លាំងកាយ និងកម្លាំងចិត្តដើម្បីជម្នះជំងឺនេះ»៕
ភ្ញាក់ផ្អើល! អ្នកលេងហ្វេសប៊ុកចំណាស់ជេរតារាស្រី អាំ ផាត់ឆារ៉ាផា ខ្លាំងកប់ៗ បណ្ដាលឱ្យអ្នកគាំទ្រផ្ទុះកំហឹង
តាមរយៈសារព័ត៌មាន khaosod ដែលចេញផ្សាយនៅថ្ងៃទី4 ខែមករា ឆ្នាំ2018នេះ បានឱ្យដឹងថា អ្នកលេងហ្វេសប៊ុកវ័យចំណាស់ល្បីឈ្មោះម្នាក់ដែលមានមុខមាត់អាក្រក់ឈ្មោះ “លីណាចាំង” និងត្រូវបានគេស្គាល់ថា ជាកំពូលមនុស្សពូកែជេរ និងរិះគន់នៅក្នុងប្រទេសថៃនោះ នៅពេលថ្មីៗនេះ អ្នកស្រីបានចេញមុខតាមការ Live Video ជេរកំពូលតារាស្រី អាំ ផាត់ឆារ៉ាផា ខ្លាំងៗដោយសារតែរឿងតម្រង់ជួរឈរចាំទិញផាត់ថៃ នៅតូបលក់អាហារ ប្រៈទូភី។
លីណាចាំង បានជេរកំពូលតារាស្រីរូបនេះថា «មនុស្សវាល្ងង់ហ្នឹងណា បានជាទៅឈរតម្រង់ជួរទាំងរយៗនាក់ មី អាំ ផាត់ឆារ៉ាផា នេះក៏ល្ងង់ដែរ ធ្វើដល់ Super Star ហើយនៅតែល្ងង់ទៅឈរតម្រង់ជួរចាំទិញទៀត។ យើងឯនេះទេ ទើបមានវាសនាល្អជាង ប្ដីទិញមកឱ្យស៊ី មិនចាំបាច់ទៅឈរតម្រង់ជួរចាំទិញទេ អ៊ីចឹងហើយបានជា មី អាំ ធ្វើដល់ Super Star ហើយ នៅតែមិនទាន់មានប្ដីទៀត មកពីវាល្ងង់!»។
គួរបញ្ជាក់ផងដែរថា គ្រាន់តែបញ្ចប់ការ Live ហើយភ្លាម វីដេអូនេះត្រូវបានចែករំលែកតៗគ្នា រហូតដល់អ្នកគាំទ្ររបស់ អាំ ផាត់ឆារ៉ាផា ចូលធ្វើការ Comment និង Live Video យ៉ាងក្ដៅស្លឹកត្រចៀក ជេរតបតទៅ លីណាចាំង វិញយ៉ាងភ្លូកទឹកភ្លូកដីតែម្ដង៕
កូនបៅឈ្លក់ទឹកដោះញឹកញាប់ តើមានគ្រោះថ្នាក់ដែរឬទេ? ត្រូវកែបញ្ហានេះយ៉ាងណា?
មានជាច្រើនដងណាស់ដែលការចិញ្ចឹមកូនតូចរបស់លោកឪពុកអ្នកម្ដាយច្រើនតែសង្កេតឃើញថា កូនមានអាការឈ្លក់ទឹកដោះនៅពេលបៅ ដែលអ្នកខ្លះក៏មិនសូវជាផ្ដល់ការចាប់អារម្មណ៍លើរឿងនេះប៉ុន្មានទេ ព្រោះគិតថា ជារឿងធម្មតាដែលអាចកើតឡើងបានចំពោះក្មេងតូចៗ តែដឹងឬទេថា មានព័ត៌មានញឹកញាប់ណាស់ដែលពាក់ព័ន្ធនឹងការស្លាប់បាត់បង់ជីវិតរបស់ទារកដែលបណ្តាលមកពីការឈ្លក់ទឹកដោះនេះ ព្រោះបណ្តាលមកពីការដកដង្ហើមខុសប្រក្រតី ដូច្នេះហើយទើបឪពុកម្ដាយហាមមើលរំលងរឿងនេះជាដាច់ខាត និងគួរការពារមិនឱ្យកើតឡើងដោយវិធីខាងក្រោមនេះ។
គួរឱ្យកូនបៅទឹកដោះម្ដាយជាបន្តបន្ទាប់រហូតដល់អាយុ6ខែឡើងទៅ
មានឪពុកម្ដាយមួយចំនួនដែលឱ្យកូនតូចបៅទឹកដោះគោម្សៅ ដោយការឆុងដាក់ដបទឹកដោះគោឱ្យមឹម តែអាចនឹងភ្លេចថា កូនរបស់លោកអ្នកមិនបានបៅទឹកដោះនោះជាប់រហូតនោះទេ ទើបអាចធ្វើឱ្យមានបញ្ហាទឹកដោះហូរចេញពីដបចូលទៅក្នុងបំពង់ករបស់កូនខណៈដែលគេកំពុងលង់លក់បាន ដែលបើសិនជាបៅទឹកដោះចេញពីដោះម្ដាយវិញ នឹងមិនសូវមានបញ្ហានេះកើតឡើងទេ។ រឹតតែឱ្យទឹកដោះគោឆុងទៅកូនបៅខណៈដែលកូនកំពុងតែហាមាត់ស្រែកយំផងនោះ រឹតតែប្រថុយក្នុងការធ្វើឱ្យកូនកើតការឈ្លក់ទឹកដោះខ្លាំងឡើងថែមទៀត។
ឱ្យកូនតូចគេងផ្អៀងបន្ទាប់ពីបៅទឹកដោះហើយ
ដើម្បីជាការការពារការឈ្លក់ទឹកដោះ គួរលើកកូនពពាក់លើស្មា ដើម្បីឱ្យកូនតូចបានភើចេញមករៀងរាល់ពេលបំបៅទឹកដោះហើយ និងដាក់ឱ្យគេគេងផ្អៀងជំនួសការដាក់ឱ្យគេងផ្ងារ ដើម្បីការពារមិនឱ្យកើតមានការហូរទឹកដោះបញ្ច្រាសចេញមកពីបំពង់អាហាររហូតក្លាយជាហេតុឱ្យកើតការឈ្លក់ទឹកដោះបាន។
ក្បាលដបទឹកដោះខុសខ្នាត ឬយ៉ាងណា?
បើទោះជាកន្លងផុតអំឡុង6ខែហើយក៏ដោយតែក៏ត្រូវមានការយកចិត្តទុកដាក់លើការបំបៅទឹកដោះកូនមិនអន់ជាងអំឡុងខែដំបូងៗដែរ ជាពិសេសក្បាលដបទឹកដោះដែលអាចនឹងមានខ្នាតធំរហូតធ្វើឱ្យទឹកដោះហូរចេញមកពីក្នុងដបច្រើនធ្វើឱ្យក្មេងមិនអាចលេបទាន់ ទើបបណ្ដាលឱ្យកើតជាការឈ្លក់ទឹកដោះក៏មាន។
កុំបញ្ចុកទឹកដោះច្រើនជ្រុលពេក
ដោយសារតែក្មេងតូចមិនទាន់ចេះនិយាយប្រាប់បានថា មានអ្វីខុសប្រក្រតីចំពោះខ្លួនឯងនោះ ទើបគេត្រូវប្រើការស្រែកយំជាសញ្ញាប្រាប់នៅពេលមានរឿងអ្វីម្យ៉ាងកើតឡើងនៅក្នុងខ្លួនគេ ដែលឪពុកម្ដាយមួយចំនួនអាចនៅថ្មីថ្មោងជាមួយនឹងការចិញ្ចឹមថែទាំកូន បែរជាយល់ថា កូនយំព្រោះឃ្លានបៅ ក៏ចាប់ដបទឹកដោះគោដាក់ឱ្យកូនបៅគ្រប់ពេលដែលកូនតូចស្រែកយំ រហូតកើតបញ្ហាទឹកដោះពេញហៀរក្រពះ និងធ្វើឱ្យក្មេងក្អែចេញមកវិញរហូតក្លាយជាការឈ្លក់ទឹកដោះក៏មាន។
អាចបណ្ដាលមកពីភាពខុសប្រក្រតីរបស់អវយវៈណាមួយ
បើសិនជាកូននៅតែកើតមានអាការឈ្លក់ទឹកដោះញឹកញាប់ និងមានសញ្ញាថាកាន់តែធ្ងន់ធ្ងរឡើងជារឿយៗនោះ ឪពុកម្ដាយគួរតែនាំកូនតូចទៅជួបលោកគ្រូពេទ្យដើម្បីធ្វើការពិនិត្យវិនិច្ឆ័យថា តើមានអាការខុសប្រក្រតីអ្វីដែរឬទេ? ដោយរោគដែលពាក់ព័ន្ធជាមួយការឈ្លក់ទឹកដោះនេះ គឺការដែលអវយវៈដែលពាក់ព័ន្ធនឹងការបឺតលេបមានភាពខុសប្រក្រតី ឬសួត និងបេះដូងមានបញ្ហាជាដើម។
បានដឹងបែបនេះហើយ ឡារ៉ែន សង្ឃឹមថា លោកឪពុកអ្នកម្ដាយនឹងប្រយ័ត្នប្រយែងខ្លាំងឡើងក្នុងការចិញ្ចឹមថែទាំកូនតូចក្នុងវ័យទារកនេះ និងគួរឧស្សាហ៍សង្កេតមើលអាការរបស់កូនតូចឱ្យបានគ្រប់ពេលថា តើមានការឈ្លក់ទឹកដោះដល់ថ្នាក់មុខឡើងក្រហម ឬស្លេកស្លាំងដែរឬទេ? បើសិនជាមិនស្រួល ក៏គួរតែប្រញាប់នាំកូនទៅជួបគ្រូពេទ្យភ្លាមៗតែម្ដង ដើម្បីសុវត្ថិភាពរបស់កូនសម្លាញ់៕
កំពូលអ្នករកលុយ Youtube ល្បីម្នាក់ ចេញមុខសូមទោស
ដោយយោងតាមសារព័ត៌មាន Teenee ដែលបានចេញផ្សាយនៅថ្ងៃទី4 ខែមករា ឆ្នាំ2018នេះ បានដកស្រង់ព័ត៌មាន ABC News បានឱ្យដឹងថា កំពូលអ្នកលេងបណ្ដាញសង្គមយូធូប (Youtube) ល្បីម្នាក់ដែលអាចរកចំណូលបានពីគណនីយូធូបរាប់ម៉ឺនដុល្លារ មានឈ្មោះថា Logan Paul មានវ័យ 22 ឆ្នាំ បានចេញមុខសូមទោសជាសាធារណៈទៅកាន់មហាជន បន្ទាប់ពីលោកបានបង្ហោះវីដេអូចុងក្រោយមួយ បង្ហាញពីការសើចចំអក មើលងាយប្រមាថដល់សាកសពក្រុមមនុស្សធ្វើអត្តឃាតនៅក្នុងព្រៃដ៏អាណោចអាធ័មមួយ គឺព្រៃអត្តឃាត អាអូឃិងៈហារៈ នៅក្នុងតំបន់ភ្នំហ្វូជិ ប្រទេសជប៉ុន។
ក្រោយពីវីដេអូនោះត្រូវបានបង្ហោះឡើង ភ្លាមៗនោះក៏ទទួលបានអ្នកចូលទស្សនារាប់ពាន់ រាប់ម៉ឺននាក់ ប៉ុន្តែជាអកុសល កំពូលអ្នករកលុយពីយូធូបម្នាក់នេះ ត្រូវបានមហាជនសម្ដែងមតិរិះគន់នៅខាងក្រោមវីដេអូថា លោកមិនគោរពដល់វិញ្ញាណក្ខន្ធមនុស្សដែលបានធ្វើអត្តឃាតយ៉ាងអាណោចអាធ័មនៅក្នុងព្រៃ និងថែមទាំងសើចចំអក កំប្លែងលេងសើចគ្មានសុជីវធម៌ មើលងាយប្រមាថដល់សេចក្ដីទុក្ខសោករបស់សាកសព។ ដូច្នេះហើយ ក្រោយរងការិះគន់ បុរសវ័យ 22 ឆ្នាំខាងលើនេះ ត្រូវបានគេដកហូតការងារជាច្រើនកន្លែង និងលែងអនុញ្ញាតឱ្យរកលុយនៅលើយូធូបជាបន្ដទៀត ដែលជាហេតុបណ្ដាលឱ្យលោកបាត់បង់ប្រាក់ចំណួលអស់រាប់ម៉ឺនដុល្លារនៅក្នុងមួយខែៗ។
វីដេអូសូមទោសរបស់បុរសនេះ បានរៀបរាប់ថា ខ្លួនមិនធ្លាប់ត្រូវគេជេរប្រមាថរិះគន់យ៉ាងចាស់ដៃបែបនេះពីមុនទេ ព្រោះលោកក៏មិនធ្លាប់ធ្វើរឿងខុសឆ្គងបែបនេះពីមុនមកដូចគ្នាដែរ ក្ដីអស់សង្ឃឹម និងការរអៀសខ្លួនបានធ្វើឱ្យលោកដឹងពីកំហុសខ្លួនជាខ្លាំង ហើយលោកក៏ជាមនុស្សម្នាក់ព្រមទទួលកំហុសមួយនេះដែរ។
គួរបញ្ជាក់ផងដែរថា ព្រៃអត្តឃាត អាអូឃិងៈហារៈ ដែលស្ថិតនៅតំបន់ភ្នំ ហ្វូជិ ប្រទេសជប៉ុន គឺជាព្រៃ ឬជាកន្លែងមួយសម្រាប់មនុស្ស និងក្រុមមនុស្សដែលមានបំណងចង់ស្លាប់មកធ្វើអត្តឃាតបញ្ចប់ជីវិត និងបញ្ហារបស់ខ្លួន ហើយក៏ជាទីកន្លែងបញ្ចប់ជីវិតដ៏ពេញនិយម និងល្បីល្បាញមួយនៅក្នុងប្រទេសជប៉ុន រហូតបានក្លាយជាកន្លែងទាក់ទាញភ្ញៀវទេសចរ ដែលចង់ដឹង នឹងចង់ឃើញពីភាពភ័យខ្លាចនៅក្នុងព្រៃនេះទៀតផង។ នៅខាងមុខផ្លូវទៅកាន់ព្រៃមរណៈមួយនេះ ក៏មានការបិទបដាណែនាំ និងដាស់តឿនដល់មនុស្សដែលសម្រេចចិត្តគិតខ្លីថា «សូមទៅពិគ្រោះជាមួយគ្រូពេទ្យផ្លូវចិត្តជាមុនសិន មុនសម្រេចចិត្តមកធ្វើអត្តឃាតនៅទីនេះ»៕
Van Dijk ត្រៀមចូលលេងជាលើកដំបូង ពេល Liverpool ប៉ះ Everton ក្នុង FA Cup
Virgil van Dijk ដែលជាខ្សែការពារមានតម្លៃខ្លួនខ្ពស់ជាងគេបំផុតក្នុងពិភពលោក អាចនឹងធ្វើការបង្ហាញខ្លួនជាលើកដំបូងរបស់គេសម្រាប់ក្រុម Liverpool នៅពេលប្រកួតជាមួយនឹងក្រុម Everton នាកីឡដ្ឋាន Anfield ក្នុងការប្រកួតពាន FA Cup ជុំទី៣ នៅរាត្រីថ្ងៃស្អែកនេះ។
ខ្សែការពារកណ្តាលរូបនេះ មានសិទ្ធិចូលលេងបានហើយ ក្រោយពីការចុះឈ្មោះរបស់គេត្រូវបានបំពេញជាផ្លូវការ បន្ទាប់ពីការផ្ទេររបស់គេក្នុងតម្លៃខ្លួន75លានផោន (ស្មើនឹង102លានដុល្លារអាមេរិក) ពីក្លិប Southampton។ លោក Juergen Klopp ដែលជាអ្នកចាត់ការទូទៅ មិនទាន់បញ្ជាក់ថា លោកមានបំណងក្នុងការដាក់ឲ្យខ្សែការពារអន្តរជាតិហូឡង់រូបនេះ ចូលលេងភ្លាមៗនៅឡើយទេ ជាពិសេស ក្នុងការប្រកួតដ៏ស្វិតស្វាញបែបនេះ ប៉ុន្តែ Van Dijk អាចនឹងបង្ហាញខ្លួនយ៉ាងហោចណាស់ស្ថិតក្នុងនាមជាកីឡាករបម្រុងដែរ។
ការត្រៀមលក្ខណៈក្នុងក្រុមរបស់លោក Klopp ហាក់កំពុងតែមានភាពស្មុគស្មាញ ដោយសារតែបណ្តាញសារព័ត៌មានចក្រភពអង់គ្លេសជាច្រើនបានចេញផ្សាយថា ក្លិប Barcelona នឹងដាក់ការដេញថ្លៃមួយសម្រាប់ខ្សែបម្រើស្លាបដ៏ឆ្នើម Philippe Coutinho។ ស្របពេលជាមួយគ្នានេះ Mohamed Salah និង Sadio Mane ក៏ប្រហែលជាមិនអាចចូលលេងបានផងដែរសម្រាប់ការប្រកួតនៅថ្ងៃសុក្រនេះ ក្រោយពីលោក Klopp គ្រូបង្វឹកសញ្ជាតិអាល្លឺម៉ង់ បានយល់ព្រមអនុញ្ញាតឲ្យពួកគេធ្វើដំណើរទៅចូលរួមក្នុងកម្មវិធីប្រគល់រង្វាន់កីឡាករឆ្នើមប្រចាំឆ្នាំរបស់ទ្វីបអាហ្វ្រិកនៅប្រទេសហ្គាណា នៅថ្ងៃព្រហស្បតិ៍នេះ៕
ប្រភពពី៖ Channel News Asia
ការដាំដើមពុទ្រាមានភាពងាយស្រួល និងរកចំណូលបានខ្ពស់
ពុទ្រាម្រេច កំពុងទទួលបានការពេញនិយមច្រើនពីអ្នកបរិភោគ ហើយថែមទាំងផ្តល់ប្រាក់ចំណូលបានច្រើនគួរសមដល់អ្នកដាំទៀតផង ដោយក្នុងមួយសប្តាហ៍អាចលក់បានប្រមាណ 800ដុល្លារ សម្រាប់ការដាំនៅលើផ្ទៃដីជាង 30អា។
លោក ថន ធី កសិករនៅភូមិព្រែកសំរោង ឃុំរកាខ្ពស់ ស្រុកស្អាង ខេត្តកណ្តាល បានប្រាប់ថា ចាប់តាំងពីងាកមកដាំពុទ្រាម្រេចនេះបានរយៈពេល 4ឆ្នាំមក ជីវភាពគ្រួសាររបស់លោកបានប្រសើរឡើងជាលំដាប់ ហើយកូនៗក៏បានចូលរៀនគ្រប់ៗគ្នាដែរ។ លោកបានបន្តថា ពុទ្រាដែលលោកដាំនេះនៅលើដីបណ្តោយ 200ម៉ែត្រ និងទទឹង 18ម៉ែត្រ នេះមានដើមសរុបចំនួន230 ហើយក្នុងមួយសប្តាហ៍អាចបេះលក់បាន2ដង ដោយក្នុង1ដង បានជាង 200គីឡូក្រាម។ បច្ចុប្បន្នក្នុង1គីឡូក្រាមលក់បានតម្លៃ 8,000រៀល ប៉ុន្តែបើខែណាមិនសូវសម្បូរអាចលក់បានដល់ទៅ10,000រៀលឯណោះ។
ចំណែកលោក ខឹម កិ អាយុ 65ឆ្នាំ ដែលជាកសិករដាំពុទ្រាម្រេចម្នាក់ដែរនោះ ក៏បាននិយាយដែរថា គាត់បានដាំពុទ្រានេះជាង 8ឆ្នាំមកហើយ ដោយបានទិញពូជពីឃុំព្រែកគយ ក្នុង1ដើមតម្លៃ1ដុល្លារ។ លោកបានបង្ហើបអំពីវិធីសាស្ត្រដាំដុះ និងថែទាំថា ពុទ្រាម្រេចមិនពិបាកដាំ និងថែទាំប៉ុន្មាននោះទេ ដំបូងគឺត្រូវភ្ជួរដីហាលចោល1ទៅ2ខែ ទើបរាស់ហើយហាលចោល1អាទិត្យទៀត ទើបឆូតជាគន្លងកាប់រណ្តៅទំហំ5តឹកដាក់ជីលាមកគោចូលហើយយកកូនពុទ្រាមកដាំជាការស្រេច និងត្រូវទុកគម្លាតពីគ្នាប្រមាណពី4-5ម៉ែត្រពីដើមមួយទៅដើមមួយទៀត។
នៅរដូវវស្សាគេមិនបាច់ស្រោចទឹកទេ តែត្រូវស្រោចទឹក1-2ដងក្នុងសប្តាហ៍នៅរដូវប្រាំង។ ពុទ្រាមិនពិបាកថែទាំទេ ចំណែកឯជីទៀតសោតគឺប្រើតែជីធម្មជាតិ លាមកគោ មាន់ ទា និងបាញ់ថ្នាំការពារដង្កូវតែ1ដងប៉ុណ្ណោះក្នុង1ខែ។ ក្រោយដាំបាន6ខែ អាចប្រមូលផលបានហើយ ដោយក្នុង1សប្តាហ៍អាចបេះបានចំនួន2ដង។ នៅពេលដើមពុទ្រា អាយុបាន2ឆ្នាំគេត្រូវតែអារដើមចោលខ្លះ ដោយទុកគល់កន្លះម៉ែត្រដើម្បីឱ្យលាស់ថ្មី ហើយក្រោយអារចោល6ខែ ពុទ្រានឹងចាប់ផ្តើមចេញផ្លែ ប៉ុន្តែដល់ដើមពុទ្រា អាយុ6ឆ្នាំ ផ្លែវាចាប់ផ្តើមតូច ទើបគេគាស់ដើមចាស់ចោលដាំសាជាថ្មី។
អ្នកស្រី ប៉ាង សារ៉េត ជាអ្នកលក់ម្នាក់ក្នុងចំណោមអ្នកលក់ជាង10តូបនៅចំណុចច្រាំងបាក់ ក្បែរផ្សារស្អាង បានប្រាប់ឱ្យដឹងថា ពុទ្រាម្រេចមានរសជាតិជូរអែម និងស្រួយឆ្ងាញ់ ហើយកំពុងទទួលបានការគាំទ្រពីអតិថិជន។ ជាមធ្យមក្នុង1ថ្ងៃគាត់អាចលក់បានប្រមាណ50គីឡូក្រាម តែបើថ្ងៃសៅរ៍ អាទិត្យនិងថ្ងៃឈប់សម្រាកវិញ គឺលក់បានច្រើនរហូតដល់ទៅជាង 100គីឡូក្រាមក៏មានដែរ ដែលក្នុងមួយគីឡូរកប្រាក់ចំណេញបានប្រមាណជា2,000រៀល៕
ចង់ធ្វើជាសហគ្រិនស្ដ្រីជោគជ័យ សំខាន់បំផុតត្រូវជឿជាក់លើខ្លួនឯង
ម្ចាស់អាជីវកម្មជាច្រើនដែលទទួលបានភាពជោគជ័យតែងតែមានអំណះអំណាងថា ដើម្បីឱ្យអាជីវកម្មមួយជោគជ័យត្រូវទាមទារឱ្យមានការរៀបចំផែនការច្បាស់លាស់ ពិសេសការប្រើទុនវិនិយោគក៏ជាសំខាន់ដែរ។ ដោយឡែកសម្រាប់ម្ចាស់ជំនួញ MAYA Cosmic ដែលកំពុងមានកេរ្ដិ៍ឈ្មោះល្បីល្បាញនៅក្នុងប្រទេសថៃ ហើយកំពុងសហការជាមួយក្រុមហ៊ុន Luxury Smile នៅកម្ពុជា បានបង្ហើបថា ការចាប់ផ្ដើមអាជីវកម្មដើមទុនជាចំណែកតូចតែប៉ុណ្ណោះ តែអ្វីដែលសំខាន់នោះ គឺការសិក្សាទីផ្សារឱ្យបានច្បាស់លាស់ និងទឹកចិត្ដដ៏រឹងមាំរបស់ម្ចាស់ជំនួញ។
អ្នកនាង សាក់សិកថាន់ ឡាវរ៉ូតភីនយ៉ូ (Sasitan Laorojpinyo) នាយិកាក្រុមហ៊ុន MAYA Cosmic ដែលបច្ចុប្បន្នកំពុងតែមានដំណើរការលក់យ៉ាងល្អនៅក្នុងទីផ្សារកម្ពុជា តាមរយៈការសហការជាមួយក្រុមហ៊ុន Luxury Smile បានរៀបរាប់ពីដំណើរជីវិត ក៏ដូចជាសកម្មភាពនៃការធ្វើអាជីវកម្មរបស់ខ្លួនថា រូបនាងគឺជាក្មេងស្រីម្នាក់កើតក្នុងត្រកូលអ្នកមានទ្រព្យសម្បត្ដិមួយក្នុងប្រទេសថៃ ដោយនាងជាកូនស្រីពៅក្នុងចំណោមបងប្អូន4នាក់។ អ្នកនាងបានបន្តថា ចាប់ផ្ដើមដឹងក្ដីពេលណាអ្នកនាងបានឃើញគ្រួសារខ្លួនមានហាងមាសចំនួន5កន្លែងទៅហើយ ខណៈបច្ចុប្បន្នហាងមាសនោះត្រូវបានពង្រីករហូតដល់8សាខា។ ដោយសារចាប់កំណើតក្នុងត្រកូលអ្នកមានទ្រព្យសម្បត្តិ ថ្ងៃណាក៏ឃើញការជួញដូរមាស និងប្រាក់ដែរ ហេតុនេះទើបធ្វើឱ្យរូបនាងកើតមានគំនិតចង់ធ្វើអាជីវកម្មតាំងពីនៅវ័យក្មេង។ ទោះជាយ៉ាងណាអ្នកនាងយល់ថា ប្រសិនបើចង់ដើរទៅមុខឱ្យបានវែងឆ្ងាយ ចង់រកស៊ីឱ្យទទួលបានជោគជ័យ គឺទាមទារឱ្យខ្លួនឯងត្រូវមានចំណេះដឹងទូលំទូលាយខាងផ្នែកទីផ្សារ ហេតុនេះរូបនាងបានខិតខំរៀនរហូតទទួលបានបរិញ្ញាបត្រ និងបន្ដទៅសិក្សានៅប្រទេសអង់គ្លេសរយៈពេល1ឆ្នាំទៀត។
ក្រោយពីបញ្ចប់ការសិក្សា ដោយមិនចង់ទុកពេលវេលាឱ្យនៅទំនេរយូរ នាយិកាក្រុមហ៊ុន MAYA Cosmic រូបនេះក៏ចាប់ផ្ដើមរកស៊ីតែម្ដង។ និយាយទៅដល់ការធ្វើអាជីវកម្ម ប្រសិនបើយើងក្រឡេកទៅមើលជីវភាពគ្រួសាររបស់ស្ដ្រីជំនួញវ័យក្មេងរូបនេះវិញ គឺមិនមានការលំបាកឡើយ មានន័យថាចង់ចាប់អាជីវកម្មបែបណា? នៅពេលណា? ឬទំហំទឹកប្រាក់ច្រើនសន្ធឹកសន្ធាប់កម្រិតណាក៏អាចទៅរួចដែរ តែអ្វីដែលធ្វើឱ្យអ្នកនាង សាក់សិកថាន់ ឡាវរ៉ូតភីនយ៉ូ ត្រូវគិតពិចារណាច្បាស់លាស់ទៅលើអាជីវកម្មនោះ គឺដោយសាររូបនាងចង់ចាប់ផ្ដើមអាជីវកម្មដោយខ្លួនឯង ដើមទុនផ្ទាល់ខ្លួនមិនមែនជារបស់គ្រួសារ ម្យ៉ាងទៀតអ្នកនាងជាអ្នកចង់បានឥស្សរភាព និងសេរីភាពក្នុងការធ្វើជំនួញផងដែរ។
បន្ទាប់ពីគិតគូរបានច្បាស់លាស់ហើយ អ្នកនាងក៏បានសម្រេចចិត្ដប្រើដើមទុនប្រមាណ1ម៉ឺនបាតក្នុងការចាប់ផ្ដើមអាជីវកម្មដំបូងរបស់ខ្លួនដោយសហការជាមួយមិត្ដភក្ដិ។
អ្នកនាង សាក់សិកថាន់ ឡាវរ៉ូតភីនយ៉ូ បន្ថែមថា៖ “ដោយគិតគូរបានច្បាស់លាស់ហើយ ខ្ញុំក៏សម្រេចចិត្ដចាប់ផ្ដើមអាជីវកម្មក្នុងការលក់ផលិតផលតាមអនឡាន។ វាពិតជាទទួលបានការគាំទ្រខ្លាំងណាស់ដោយសារតែអាជីវកម្មមួយនេះមានការពេញនិយមខ្លាំងនៅក្នុងប្រទេសថៃ។ ទន្ទឹមនិងការទទួលបានជោគជ័យ អាជីវកម្មនោះក៏ត្រូវរលាយទៅវិញដោយសារតែម្ចាស់ហ៊ុនមានគំនិតខ្វែងគ្នា ធ្វើឱ្យការប្រកបអាជីវកម្មដំបូងត្រូវទទួលនូវការបរាជ័យពីរដង ខណៈខ្ញុំទើបតែមានអាយុត្រឹម20ឆ្នាំប៉ុណ្ណោះ ដែលមានបទពិសោធក្នុងទីផ្សារ និងសង្គមនៅមានតិចតួច។
បន្ទាប់ពីមានបទពិសោធបរាជ័យពីរដង ស្ដ្រីជំនួញវ័យក្មេងរូបនេះក៏នៅតែមិនចុះចាញ់ចំពោះអាជីវកម្ម និងប្រឹងដើរទៅមុខជានិច្ច។ នៅពេលនោះអ្នកនាងបានស្វែងយល់ពីខ្លួនឯងថា ជាមនុស្សចូលចិត្ដតុបតែងខ្លួនស្អាតៗទើបធ្វើឱ្យមានគំនិតចាប់ផ្ដើមអាជីវកម្មថ្មីដោយចំណាយទុនមួយចំនួនធំ ដើម្បីបង្កើតគ្រឿងសម្អាងមានឈ្មោះខ្លួនឯង MAYA Cosmic ក្នុងនោះរួមមាន ក្រេម ម្ស៉ៅ សាប៊ូដុះខ្លួន ដុះមុខ ធ្វើឱ្យស្បែកម៉ដ្ឋសរលោង ជាដើម ដែលផលិតផលទាំងនោះផ្ដោតទៅលើគុណភាពជាចម្បង។
បន្ទាប់ពីដំណើរការក្នុងទីផ្សារបានរយៈពេល4ខែ ផលិត MAYA ក៏ទទួលបាននូវភាពជោគជ័យ និងការទទួលស្គាល់ពីប្រជាជនថៃទូទាំងប្រទេស។ អ្នកនាងបន្ដថា៖“ត្រឹមរយៈពេល4ខែ ដែលខ្ញុំអាចធ្វើឱ្យប្រជាជនថៃទទួលស្គាល់នូវគុណភាពផលិតផល MAYA វាមិនមែនជារឿងងាយស្រួលទេ។ ជាក់ស្ដែងខ្ញុំជាអ្នកធ្លាប់រៀនខាងផ្នែកទីផ្សារ ទោះយ៉ាងណាក៏ត្រូវទាមទារឱ្យយើងយល់ដឹងអំពីយុទ្ធសាស្ត្រក្នុងការលក់នៅក្នុងទីផ្សារអនឡាញឱ្យបានច្បាស់។ យុទ្ធសាស្ដ្រទីផ្សារនេះ យើងត្រូវសិក្សាជាប្រចាំ ដោយយូរបំផុតមួយសប្ដាហ៍ម្ដងក៏ត្រូវប្ដូរយុទ្ធសាស្ត្រថ្មី ជួនកាលគិតឃើញថ្ងៃនេះ ស្អែកចាប់ផ្ដើមអនុវត្ដក៏មានដែរ។ ក្នុងករណីចាំបាច់ត្រូវជួលតារាល្បីៗមកបង្ហាញផលិតផលរបស់យើង ទោះបីជាចាយលុយច្រើនក៏ត្រូវតែធ្វើ។ ទោះយ៉ាងណា ផលិតផលមានគុណភាពល្អ និងរក្សាបាននូវសុខភាពអ្នកប្រើប្រាស់ទើបធ្វើឱ្យអ្នកប្រើប្រាស់ផ្សព្វផ្សាយតៗគ្នា។
អ្វីដែលធ្វើឱ្យក្រុមហ៊ុនកាន់តែទទួលបានភាពល្បីល្បាញនោះ គឺក្រៅពីបង្កើត និងចែកចាយផលិតផលមានគុណភាពហើយនោះ យើងក៏ជាអ្នកបង្កើត Brand ឱ្យអតិថិជននៅប្រទេសថៃរហូតដល់100ប្រភេទ និងនៅប្រទេសកម្ពុជា25ប្រភេទ។ ក្រៅពីនេះការធ្វើជំនួញត្រូវយល់ច្បាស់ពីទីផ្សារ ត្រូវស្គាល់ពីដៃគូ ព្រមទាំងចេះទប់ស្កាត់ហានិភ័យផងដែរ។ អ្នកនាង សាក់សិកថាន់ ឡាវរ៉ូតភីនយ៉ូ បញ្ជាក់ថា៖“ដោយសារយើងអាចឈរជើងក្នុងទីផ្សារប្រទេសថៃក្នុងកិត្ដិនាមល្អ ទើបធ្វើឱ្យក្រុមហ៊ុនរបស់ខ្ញុំ ទទួលបានពានរង្វាន់ចំនួន2 គឺ Best Business Award និង Best Product Award រយៈពេលពីរឆ្នាំជាប់គ្នា (2015-2016)”។
ជាមួយគ្នានេះស្ដ្រីជំនួញវ័យក្មេងខាងលើ ក៏បានបញ្ជាក់ដែរថា ទន្ទឹមនឹងការទទួលបានភាពជោគជ័យ ភាពស្មុគស្មាញក៏តែងតែកើតឡើងនៅជុំវិញខ្លួនរបស់អ្នកនាងជាប្រចាំដែរ ដែលទាមទារឱ្យត្រូវដោះស្រាយនៅពេលក្រុមហ៊ុនចាប់ផ្ដើមល្បីល្បាញ ប៉ុន្ដែពុំសូវមានបុគ្គលិក ដោយសារតែយើងចាប់ផ្ដើមពីដើមទុនមិនសូវច្រើន ដូច្នេះអតិថិជនទាំងអស់ត្រូវសាងឡើងដោយខ្លួនឯង។ ពិសេសនៅពេលមានការបញ្ជាទិញច្រើន យើងមិនអាចផលិតឱ្យទាន់ទៅតាមតម្រូវការ គឺពិតជាធ្វើឱ្យយើងជាម្ចាស់អាជីវកម្មមានភាពស្មុគស្មាញខ្លាំងមែនទែន។ អ្នកនាងប្រាប់ទៀតថា គ្មានផ្លូវដើរណាទទួលបានជោគជ័យ ដោយពុំមានការឆ្លងកាត់ការលំបាក ឬឧបសគ្គនោះទេ ដូច្នេះយើងក៏មិនត្រូវចុះចាញ់នូវឧបសគ្គទាំងនោះដែរ។
អ្នកនាង សាក់សិកថាន់ ឡាវរ៉ូតភីនយ៉ូ បន្ដថា ក្រោយពីទទួលបានភាពជោគជ័យនៅប្រទេសថៃ អ្នកនាងក៏ចាប់ផ្ដើមមើលឃើញពីតម្រូវការនៃអ្នកប្រើប្រាស់ និងសក្ដានុពលទីផ្សារនៅក្នុងប្រទេសកម្ពុជា ទើបសម្រេចចិត្ដធ្វើកិច្ចសហប្រតិបត្ដិការជាមួយក្រុមហ៊ុន Luxury Smile ដែលមានទីតាំងនៅក្នុងប្រទេសកម្ពុជា ដើម្បីធ្វើការចែកចាយ។ នៅឆ្នាំ2018 នេះ Luxury Smile នឹងចែកចាយផលិតផល MAYA ទៅដល់ប្រទេសឡាវផងដែរ និងគម្រោងបើក Clinic មួយដែលមានសក្ដានុពលខ្លាំងនៅក្នុងប្រទេសកម្ពុជា។ ជាងនេះទៅទៀតក្រុមហ៊ុននឹងនាំចូលនូវផលិតផលថ្មីដែលលក់ដាច់ជាងគេបំផុតនៅប្រទេសថៃដែលមានឈ្មោះថា ទឹកជំនួយស្បែកដ៏អស្ចារ្យ(Water Essence) មកកម្ពុជាផងដែរ។
អ្នកនាង សាក់សិកថាន់ ឡាវរ៉ូតភីនយ៉ូ ក៏បានចែករំឡែកគំនិតដល់សហគ្រិនស្ដ្រីខ្មែរថា៖“ចង់ធ្វើជាសហគ្រិនស្ត្រីដ៏ជោគជ័យ អាចធ្វើអាជីវកម្មយូរអង្វែងសំខាន់បំផុតត្រូវជឿជាក់លើខ្លួនឯង និងតែងតែផ្ដល់កម្លាំងចិត្ដលើខ្លួនឯង ដូចយើងជឿជាក់លើផលិតផលរបស់យើង និងធ្វើកិច្ចការនោះជាប្រចាំ។
ទន្ទឹមនឹងភាពជោគជ័យក្នុងមុខជំនួញ អ្នកនាង សាក់សិកថាន់ ឡាវរ៉ូតភីនយ៉ូ ក៏មិនបោះបង់ចោលសកម្មភាពមនុស្សធម៌ដែរ ដោយនៅថ្ងៃខួបកំណើតរបស់នាង កាលពីថ្ងៃទី10 ខែធ្នូ កន្លងមក អ្នកនាងបាននាំមិត្ដភក្ដិជនជាតិថៃដែលជាអ្នកជំនួញមកជាវព្រះពុទ្ធបដិមាករយកទៅតម្កល់ក្នុងទីវត្ដអារ៉ាមក្នុងប្រទេសកម្ពុជា ហើយនៅឆ្នាំ2018 នេះអ្នកនាងមានគម្រោងនឹងជួយឧបត្ថម្ភដល់ក្មេងកំព្រាចំនួន300នាក់នៅខេត្ដមណ្ឌលគិរី៕
ម្ដាយអ្នកនាង សារ៉ាយ សក្ខណា ត្រូវរឹបរថយន្ដឡិចស៊ីស 470 ពាក់ព័ន្ធនឹងលុយ3 ម៉ឺនដុល្លារ
នៅរសៀលថ្ងៃទី3 ខែមករា ឆ្នាំ 2018 មុននេះបន្ដិច ម្ដាយរបស់តារាស្រី សារ៉ាយ សក្ខណា ត្រូវបានមន្ត្រីប៉ូលិសតុលាការសាលាដំបូងរាជធានីភ្នំពេញ រឹបអូសតម្កល់ទុករថយន្ដឡិចស៊ីស 470 សេរ៊ីថ្មី ព័ណ៌ទឹកប្រាក់ ស្លាកកលេខ 2AJ 5488 ដោយសារ ជាប់ពាក់ព័ន្ធនឹងរឿងលុយបំណុល 3ម៉ឺនដុល្លារ។ រហូតមកទល់នឹងម៉ោងនេះ រថយន្តរបស់អ្នកស្រី ផាន់ សម្ផស្ស ដែលជាម្ដាយរបស់ តារាសម្ដែង សារ៉ាយ សក្ខណា ត្រូវបានតុលាការឃាត់ទុក ខណៈអ្នកស្រី បានបើករថយន្តមកឲ្យតុលាការតម្កល់ទុកដោយផ្ទាល់តែម្ដង ហើយពេលនេះមិនទាន់សុំការបកស្រាយនៅឡើយទេ។
ប្រភពពីមន្ត្រីប៉ូលិសតុលាការសាលាដំបូងរាជធានីភ្នំពេញ បានថ្លែងឱ្យដឹងថា « រថយន្តរបស់អ្នកស្រី សម្ផស្ស ម្ដាយអ្នកនាង សារ៉ាយ សក្ខណា ត្រូវបានតុលាការរឹបអូសតាមបណ្ដឹងរបស់ អ្នកស្រី ឃុត ស្រីមុំ បន្ទាប់ពីអ្នកស្រីខ្ចីលុយចំនួន 3ម៉ឺនដុល្លារ ហើយមិនសងទាំងដើម និងការប្រាក់ មកទល់នឹងឈានដល់ការរឹបអូសនេះ»។
ប្រភពដដែលបានថ្លែងបន្តថា «អ្នកស្រីសម្ផស្ស បានយករថយន្តដែល បានបង់រំលោះនៅឃ្លាំងរថយន្ត យីហោ A5 យកមកបញ្ចាំអ្នកស្រី ឃុត ស្រីមុំ កាលពី 1ឆ្នាំមុន តែដោយមានការយោគយល់ អ្នកស្រី ឃុត ស្រីមុំ ម្ចាស់ចងការប្រាក់ ក៏បានប្រគល់រថយន្តឲ្យយកមកប្រើមួយរយៈ។ អ្នកស្រី មិនបានបង់ការប្រាក់ និងមិនដោះស្រាយបំណុលរយៈពេលយូរមកហើយ ទើបឈានដល់ការដាក់បណ្ដឹង ហើយដោយមានការតវ៉ា ទើបឈានដល់ការស្នើឲ្យតុលាការរឹបអូស យករថយន្តរបស់អ្នកស្រី មកតម្កល់ទុកនៅតុលាការ នៅរសៀលថ្ងៃទី3 មករានេះ»៕
មកទៀតហើយ!! ឈុតប៊ីគីនីរបស់ សូរ្យ អេនណា ធ្វើឱ្យបុរសៗព្រឺសម្បុរ
កាលពីថ្ងៃទី2 ខែមករា ឆ្នាំ2018 ម្សិលមិញនេះ នៅលើបណ្ដាញសង្គមហ្វេសប៊ុករបស់តារាបង្ហាញម៉ូដស្រីកញ្ញា សូរ្យ អេនណា បានបង្ហោះរូបនាងធ្វើដំណើរកម្សាន្ដនៅលើឆ្នេរសមុទ្រ ថែមទាំងបង្ហាញពីសម្រស់រាងកាយដ៏សិចស៊ី បញ្ចេញសាច់ដើមទ្រូង និងសាច់គល់ភ្លៅ នៅក្រោមកំដៅថ្ងៃ លើកោះភូកេត ប្រទេសថៃ នាថ្ងៃឆ្លងឆ្នាំសកល។ រូបថតជាច្រើនសន្លឹកដែលសុទ្ធសឺងតែស្លៀកឈុតប៊ីគីនីបានបង្ហាញឱ្យដឹងថា តារាស្រីរូបនេះកំពុងតែត្រូវប៉ាន់ខ្លាំង ដោយមហាជនសង្កេតឃើញថា ទំហំដើមទ្រូងមានលក្ខណៈមូលក្លំធំជាងមុន ដែលជាហុងស៊ុយមួយក្នុងការឈោងចាប់យកទីផ្សារសិល្បៈ ឱ្យកាន់តែខ្ពស់ឡើង។
ជាមួយរូបថតសិចស៊ីជាច្រើនសន្លឹកនោះ សូរ្យ អេនណា បានរៀបរាប់ថា «ខ្ញុំសូមផ្ញើសេចក្តីស្រឡាញ់ជូនដល់អ្នកទាំងអស់គ្នា និងអរគុណអស់ពីជម្រៅបេះដូងរបស់ខ្ញុំ។ ខ្ញុំត្រៀមរួចជាស្រេចហើយសម្រាប់ឆ្នាំ2018 ចុះអ្នកវិញ?»។ មិនតែប៉ុណ្ណោះនាងបានបន្ដថា «ខ្ញុំគ្រាន់តែចង់ធ្វើដំណើរផ្សងព្រេងបន្ថែមទៀត គឺពោពេញទៅដោយថាមពលល្អ ដែលផ្សារភ្ជាប់ជាមួយប្រជាជន និងស្វែងយល់ពីការរីកចម្រើនថ្មីមួយ»។ សារដែលបានបង្កប់អត្ថន័យដ៏ជ្រាលជ្រៅនេះ បានស្ដែងឱ្យឃើញថា តារាស្រីរូបនេះប្រាកដជាមានផែនការជីវិតថ្មី នៅក្នុងឆ្នាំ2018នេះហើយ។ ដូច្នេះដើម្បីឱ្យកាន់តែជ្រាបច្បាស់ថា សូរ្យ អេនណា សិចស៊ីដល់កម្រិតណានោះ សូមទស្សនារូបភាពទាំងឡាយខាងក្រោមនេះ៖
