សង្គម និងសេដ្ឋកិច្ច - La Reine Media

Ronaldo លេចធ្លោនៅក្នុងជ័យជម្នះរបស់ក្លឹប Al Nassr កាលពីព្រលប់ម្សិលមិញ

(អារ៉ាប៊ីសាអូឌិត)- កីឡាករខ្សែប្រយុទ្ធវ័យ 38 ឆ្នាំ Cristiano Ronaldo បង្កឱកាសឱ្យមិត្តរួមក្រុមស៊ុតបញ្ចូលទីបានពីរគ្រាប់ ជួយឱ្យក្លឹប Al Nassr ឈ្នះ Al Taawoun 2-1 នៅវគ្គ 17 នៃពានរង្វាន់ Saudi League កាលពីព្រលប់ថ្ងៃទី 17 កុម្ភៈ។

ថ្វីបើមិនបានស៊ុតបញ្ចូលទី ប៉ុន្តែ Ronaldo នៅតែបានរួមចំណែកធំនៅក្នុងជ័យជម្នះរបស់ក្រុមម្ចាស់ផ្ទះ Al Nassr ដោយការបញ្ជូនបាល់ពីរគ្រាប់ជួយឱ្យ Abdulrahman Ghareeb និង Abdullah Madu ស៊ុតបញ្ចូលទីបានសម្រេច។ នេះគឺជាការបង្កឱកាសដំបូងៗដែល CR7 បានធ្វើឡើងនៅ Saudi League ហើយជួយឱ្យ Al Nassr ដណ្ដើមបានតំណែងកំពូលតារាងពី Al Ittihad មកវិញ។

Ronaldo មានឱកាសពីរលើកដើម្បីស៊ុតផ្ដាច់ ប៉ុន្តែគាត់ធ្វើមិនអាចធ្វើបាន។ យ៉ាងណាក៏ដោយ Al Nassr នៅតែជាក្រុមដែលរកបានគ្រាប់បាល់មុនគេ គឺនៅនាទីទី 17។ ក្រោយពីទទួលបានបាល់នៅកណ្ដាលទីលាន Ronaldo ក៏បញ្ជូនរហ័សឱ្យ Ghareeb ឆ្ពោះទៅកាន់តំបន់គ្រោះថ្នាក់ ប្រឈមមុខនឹងអ្នកចាំទី។ ខ្សែបម្រើ Ghareeb ក៏ស៊ុតកោងខ្ពស់ ផ្ដួលអ្នកចាំទីបានសម្រេច ជួយឱ្យ Ronaldo មានគ្រាប់បាល់បង្កឱកាសបានជោគជ័យលើកដំបូងនៅពានរង្វាន់ Saudi League។

ក្រុមម្ចាស់ផ្ទះ Al Nassr ត្រូវបាន Al Taawoun រកបានគ្រាប់បាល់ស្មើ 1-1 នៅនាទីទី 47 ប៉ុន្តែត្រូវបាន Al Nassr បន្តរកបាន 1 គ្រាប់ទៀតនៅនាទីទី 78។ ខ្សែបម្រើ Luiz Gustavo Al Nassr ស៊ុតពីជាយតំបន់គ្រោះថ្នាក់ ត្រូវចំទីតាំងរបស់ Ronaldo ភ្លាមនោះ CR7 ក៏ទប់ រួចបាល់ក៏ស្ថិតនៅក្បែរជើង ល្មមឱ្យ Madu ស៊ុតប៉ើងសំណាញ់ទី របស់ Al Taawoun។ ដំបូង អាជ្ញាកណ្ដាលមិនទទួលស្គាល់គ្រាប់បាល់នេះ ប៉ុន្តែក្រោយពីបានមើលសកម្មភាពឡើងវិញ គាត់ក៏ប្ដូរការសម្រេចចិត្ត។

https://www.youtube.com/watch?v=_B2GVqKtfDU

ក្លឹប Al Nassr ឈ្នះ Al Taawoun 2-1 នៅវគ្គ 17 នៃពានរង្វាន់ Saudi League កាលពីព្រលប់ថ្ងៃទី 17 កុម្ភៈ

ចប់ការប្រកួត ក្រុម Al Taawoun ដែលកំពុងឈរលំដាប់ទីប្រាំនៅ Saudi League ត្រូវចាកចេញដោយដៃទទេ ខណៈ Al Nassr ត្រលប់ទៅកាន់តំណែងកំពូលតារាង។

នៅក្នុងការរកបាន 7 គ្រាប់នាពេលថ្មីៗនេះរបស់ក្លឹប Al Nassr គឺសុទ្ធតែមានស្នាមស្បែកជើងរបស់ Ronaldo ដោយគាត់រកបាន 5 គ្រាប់ និងបង្កឱកាសបាន 2 គ្រាប់។

នៅវគ្គបន្ទាប់ ក្រុមរបស់ Ronaldo នឹងធ្វើជាភ្ញៀវនៅលើទីលានរបស់ Damac ដែលកំពុងឈរលើលំដាប់ទី 7 នៅថ្ងៃទី 25 កុម្ភៈខាងមុខ ហើយក្រោយមកនឹងត្រលប់មកធ្វើជាម្ចាស់ផ្ទះ ដោយត្រូវប៉ះនឹងក្រុមបាតតារាង Al Batin៕

February 18, 2023

បាល់ទាត់បុរស SEA Games 32 នៅកម្ពុជា នឹងមិនមានកីឡាករលើសអាយុ

យោងតាមការសម្រេចរបស់ម្ចាស់ផ្ទះកម្ពុជា បណ្ដាក្រុមជម្រើសជាតិត្រូវបានអនុញ្ញាតឱ្យប្រើប្រាស់តែកីឡាករវ័យក្រោម 22 ឆ្នាំប៉ុណ្ណោះ នៅពេលចូលរួមប្រកួតកីឡាបាល់ទាត់បុរសក្នុងព្រឹត្តិការណ៍ SEA Games 32។

ការកំណត់ថ្មីបានចែងថា ក្រុមបាល់ទាត់ជម្រើសជាតិនានាត្រូវប្រើប្រាស់កីឡាករដែលកើតចាប់ពីថ្ងៃទី 01 មករា 2001 ចុះ ដោយលុបចោលការប្រើប្រាស់កីឡាករលើសអាយុដែលធ្លាប់មានក្នុង SEA Games ពីររដូវកាលមុន។ ដំបូងឡើយ កម្ពុជាក៏ចង់មានកីឡាករលើសអាយុ ប៉ុន្តែ សហព័ន្ធបាល់ទាត់អាស៊ី (AFC) បានស្នើឱ្យឈប់ប្រើប្រាស់ដើម្បីឱ្យសមស្របជាមួយនឹងវគ្គផ្ដាច់ព្រ័ត្រ U23 អាស៊ី ដែលធ្វើឡើងពីរឆ្នាំម្ដងនៅក្នុងឆ្នាំគត់។

ឆ្នាំ 2001 SEA Games ជាលើកដំបូងបានកំណត់ថា បាល់ទាត់បុរសអាចប្រើប្រាស់ក្រុម U23។ ដល់ឆ្នាំ 2017 ភាគីពាក់ព័ន្ធក៏បានមូលមតិគ្នាកែប្រែ ដោយយកក្រុម U22 វិញ។ ពីរឆ្នាំក្រោយមកទៀត ហ្វ៊ីលីពីន ដែលជាម្ចាស់ផ្ទះលើកដំបូងក៏បានអនុញ្ញាតឱ្យបន្ថែម U23 ចំនួនពីរជើង។ ចំណែក SEA Games 31 វិញ វៀតណាម បានបង្កើនជាបីជើង។

ព្រឹត្តិការណ៍ SEA Games 32 នៅកម្ពុជា នឹងត្រូវធ្វើឡើងចាប់ពីថ្ងៃទី 05 ឧសភា ដល់ 17 ឧសភា 2023។ វិញ្ញាសាបាល់ទាត់បុរសគ្រោងនឹងចាប់ផ្ដើមមុនពិធីសម្ពោធជាផ្លូវការ ដោយចាប់ផ្ដើមប្រកួតពីថ្ងៃទី 29 មេសា៕

February 17, 2023

ក្រុមហ៊ុន Adidas បច្ចុប្បន្នគឺកើតចេញពីរោងជាងស្បែកជើងតូចមួយនៅក្រោយផ្ទះ

Adolf Dassler បានបោះបង់មុខរបរធ្វើនំដើម្បីវិលទៅរកមុខរបរដេរស្បែកជើងរបស់គ្រួសារ និងបានដឹកនាំ Adidas ឆ្លងកាត់ការលំបាកធំៗរបស់សេដ្ឋកិច្ចអាល្លឺម៉ង់ បន្ទាប់ពីសង្គ្រាមលោកផ្ទុះឡើង និងបញ្ចប់។

Adidas គឺជាយីហោផលិតផលកីឡាលំដាប់កំពូលរបស់ពិភពលោក និងមានលក់ស្បែកជើងដែលស្ថិតក្នុងប្រភេទប្រណិត និងថ្លៃបំផុតលើពិភពលោក។ យោងតាមក្រុមហ៊ុន Macro Trends តម្លៃមូលធនទីផ្សាររបស់ Adidas គិតត្រឹមខែមករា 2023 គឺ 30 ពាន់លានដុល្លារអាម៉េរិក។ ក៏ប៉ុន្តែ មុនពេលបានក្លាយជាក្រុមហ៊ុនជោគជ័យដូចសព្វថ្ងៃ Adidas ដំបូងឡើយគ្រាន់តែជារោងជាងស្បែកជើងដ៏តូចមួយប៉ុណ្ណោះនៅក្នុងបន្ទប់បោកខោអាវរបស់គ្រួសារ។

Adidas ត្រូវបានបង្កើតឡើងដោយ Adolf Dassler។ Adolf កើតឆ្នាំ 1900 នៅទីរួមស្រុក Herzogenaurach (ប្រទេសអាល្លឺម៉ង់) នៅក្នុងគ្រួសារក្រីក្រមួយដែលមានកូន 4 នាក់ ដែលមានឪពុកជាជាងដេរស្បែកជើង និងម្ដាយជាអ្នកបោកអ៊ុតខោអាវ។ ក្រោយពីបានបញ្ចប់មធ្យមសិក្សា Adolf ក៏រៀនធ្វើនំទៅតាមបំណងរបស់ឪពុក។ ប៉ុន្តែ ដោយសារការធ្វើនំមិនមែនជាចំណូលចិត្ត ដូច្នេះ Adolf ក៏វិលទៅរៀនដេរស្បែកជើង។

ក្រៅពីការងារដេរស្បែកជើង Adolf ក៏ចូលចិត្តលេងកីឡាមួយចំនួន មានដូចជា បាល់ទាត់ និងវាយបុកជាដើម។ ប្រការនេះធ្វើឱ្យគាត់រកឃើញគន្លឹះមួយដែលក្រោយមកបានជួយឱ្យ Adidas ទទួលបានជោគជ័យ នោះគឺ «កីឡាករពេលនោះសុទ្ធតែពាក់ស្បែកជើងមួយប្រភេទដូចគ្នា។ Adolf យល់ថា បើសិនគេធ្វើស្បែកជើងទៅតាមប្រភេទកីឡានីមួយៗ អ្នកពាក់នឹងមានប្រៀបជាងមុន»។

ឆ្នាំ 1919 Adolf បានកែប្រែកន្លែងបោកអ៊ុតខោអាវនៅក្រោយផ្ទះឱ្យទៅជាកន្លែងដេរស្បែកជើង។ គាត់ក៏រកបានប្រាក់ពីការជួសជុលស្បែកជើងឱ្យអ្នកភូមិ។ ប្រការនេះក៏ជួយឱ្យគាត់មានពេលច្រើនសម្រាប់ច្នៃ និងផលិតស្បែកជើងទៅតាមក្ដីស្រមៃប្រកបដោយការច្នៃប្រឌិតរបស់គាត់។

ឆ្នាំ 1942 Adolf និងបងប្រុសរបស់គាត់ក៏បានសហការគ្នាបើកក្រុមហ៊ុនមួយដែលដាក់ឈ្មោះថា Dassler Brothers Shoe Factory។ ឆ្នាំ 1929 ពួកគេបានរើរោងចក្រដេរស្បែកជើងទៅកាន់ទីតាំងថ្មី។ នៅទីនេះ ពួកគេផលិតស្បែកជើងរាប់រយគូជារៀងរាល់ថ្ងៃ។ ទំហំរបស់រោងចក្រក៏ចេះតែធំឡើង។ Adolf ក៏ចូលរួមព្រឹត្តិការណ៍កីឡាជាហូរហែ និងបង្កើតបានទំនាក់ទំនងល្អ និងកិច្ចសហការជាមួយកីឡាករ ក៏ដូចជាក្លឹបកីឡានានានៅក្នុងស្រុក និងបរទេស។ កិច្ចការនេះក៏ចេះតែត្រូវបានធ្វើឡើង និងពង្រីកវិសាលភាពជាបន្តបន្ទាប់។

ឆ្នាំ 1949 Adolf បង្កើតក្រុមហ៊ុន Adidas ដោយយកតាមឈ្មោះខ្លួនឯង គឺ Adolf (Adi) និង Dassler (das) បន្ទាប់ពីបានចែកក្រុមហ៊ុនរួម Dassler Brothers Shoe Factory ជាមួយបងប្រុស ម្នាក់ពាក់កណ្ដាល។

ក្នុងសង្គ្រាមលោកលើកទីពីរដែលកំពុងកើតឡើង Adolf ត្រូវដឹកនាំក្រុមហ៊ុនដោយការច្នៃប្រឌិត និងស្មារតីរកស៊ីដំណាក់កាលដំបូង។ Adolf បានប្រើប្រាស់ទំនាក់ទំនងដែលមានស្រាប់របស់ខ្លួនដើម្បីរកដៃគូសហការដែលអាចផ្គត់ផ្គង់វត្ថុធាតុសំណល់ពីសង្គ្រាម។ Adolf ក៏រកបានពាណិជ្ជសញ្ញាសម្រាប់ផលិតផលរបស់ខ្លួន ដែលមានរហូតដល់បច្ចុប្បន្ន។

Adolf ត្រូវបានគេជឿថាជាមនុស្សព្យាយាម តស៊ូនឹងការងារ។ ឆ្នាំអាយុ 50 Adolf នៅតែលេងកីឡាមួយចំនួនដើម្បីតាមដាននិន្នាការប្រើប្រាស់ស្បែកជើងដើម្បីអភិវឌ្ឍផលិតផល។ បន្តបន្ទាប់មកទៀត Adidas ក៏ចេះតែរកបានដៃគូសហការ និងដៃគូជំនួញថ្មីៗ និងពង្រីកការផ្សព្វផ្សាយយ៉ាងទូលំទូលាយ។

អ្នកស្រី Kathe និងកូនប្រុសច្បង Horst កាលពីឆ្នាំ 1978

លោក Adolf បានទទួលមរណភាពកាលពីឆ្នាំ 1978។ អ្នកស្រី Kathe ដែលជាភរិយារបស់លោកក៏បន្តគ្រប់គ្រងក្រុមហ៊ុន Adidas ជាមួយនឹងកូនប្រុស Horst រហូតដល់អ្នកស្រីបានលាចាកលោកកាលពីឆ្នាំ 1984។

បច្ចុប្បន្ន Adidas គឺជាមួយក្នុងចំណោមយីហោសម្លៀកបំពាក់កីឡាលំដាប់កំពូលលើពិភពលោក ទន្ទឹមនឹង Nike ឬ Puma។ ប្រាក់ចំណូលប្រចាំឆ្នាំក្នុងឆ្នាំ 2021 របស់ Adidas គឺ 25 ពាន់លានដុល្លារអាម៉េរិក កើន 10% ធៀបនឹងឆ្នាំ 2020 ហើយប្រាក់ចំណេញប្រចាំឆ្នាំគឺ 2.3 ពាន់លានដុល្លារ៕

February 17, 2023

Cristiano Ronaldo ទទួលសំណងក្នុងរឿងក្ដីរំលោភផ្លូវភេទកាលពីជាង 13 ឆ្នាំមុន

មេធាវីរបស់ Kathryn Mayorga (អ្នកដែលបានប្ដឹងកីឡាករបាល់ទាត់ Cristiano Ronaldo ពីបទរំលោភបំពានផ្លូវភេទ កាលពីឆ្នាំ 2009) ត្រូវតុលាការបង្គាប់ឱ្យបង់ប្រាក់សំណងជំងឺចិត្ត 334,637.5 ដុល្លារអាម៉េរិក ទៅឱ្យកំពូលតារាបាល់ទាត់ Cristiano Ronaldo ព្រោះតែសកម្មភាពដែល «មិនមានបំណងល្អ»។

ចៅក្រមតុលាការអាម៉េរិកមួយរូបបានប្រកាសថា មេធាវី Leslie Stovall របស់ Mayorga ត្រូវតែបង់ប្រាក់សំណងជំងឺចិត្តនេះដោយផ្ទាល់ដៃទៅឱ្យ Ronaldo។ សេចក្ដីសម្រេចនេះត្រូវបានធ្វើឡើងបន្ទាប់ពីកីឡាករខ្សែប្រយុទ្ធជនជាតិព័រទុយហ្កាល់ បាននិយាយថា គាត់បានរងផលប៉ះពាល់ដោយសារតែ «សកម្មភាពគ្រោះថ្នាក់» របស់មេធាវីនៅក្នុងរឿងក្ដីដែលបានអូសបន្លាយពេលយ៉ាងយូរនេះ។

Cristiano Ronaldo តែងតែបដិសេធការចោទដែលថា ខ្លួនបានរំលោភបំពានផ្លូវភេទលើ Mayorga ដែលបច្ចុប្បន្នមានអាយុ 40 ឆ្នាំ នៅក្នុងសណ្ឋាគារមួយនៅ Las Vegas កាលពីឆ្នាំ 2009 និងអះអាងថា ពួកគេមានទំនាក់ទំនងផ្លូវភេទដោយមានការព្រមព្រៀង។ ប៉ូលិសក៏មិនធ្លាប់បានលើកឡើងការចោទប្រកាន់ណាមួយឡើយ ទាក់ទងនឹងរឿងក្ដីនេះ។

យោងតាមសម្ដីរបស់ Mayora កីឡាករ Ronaldo បានរំលោភបំពានផ្លូវភេទលើនាងនៅ Palms Casino Resort ក្នុងទីក្រុង Las Vegas កាលពីខែមិថុនា 2009 ពេលកីឡាករនេះកំពុងទាត់ឱ្យ Man Utd។ ឆ្នាំ 2010 Mayorga បានយល់ព្រមទទួលយកប្រាក់ 375,000 ដុល្លារពី Ronaldo ជាថ្នូរនឹងការយល់ព្រមរក្សាការសម្ងាត់នេះ។

Roanldo (ឆ្វេង) ក្នុងពេលសប្បាយជាមួយ Mayorga នៅក្នុងក្លឹបរាត្រី Rain

ក៏ប៉ុន្តែ មកដល់ឆ្នាំ 2018 ស្រីស្អាតជនជាតិអាម៉េរិកខាងលើក៏បានប្រែក្រឡាស់ និងបានដាក់ពាក្យបណ្ដឹងឡើងតុលាការនៅ Las Vegas។ ក្រុមមេធាវីរបស់ Mayorga យល់ថា កូនក្ដីរបស់ខ្លួនចុះហត្ថលេខាជាមួយ Ronaldo ក្នុងស្ថានភាព «ស្មារតីមិនធម្មតា» និងត្រូវបង្ខំ។

ដូច្នេះហើយ Mayorga ក៏ទាមទារសំណងជំងឺចិត្តក្នុងរយៈពេលជាង 10 ឆ្នាំ ចំនួន 78 លានដុល្លារអាម៉េរិកពី Ronaldo ក្រោយពី Football Leaks បង្ហើបឱ្យដឹងអំពីការទាក់ទងគ្នារវាងមេធាវីរបស់ Ronaldo។ ខែមិថុនា 2022 ចៅក្រមខណ្ឌ Jennifer Dorsey បានច្រានចោលសំណើនេះ។

ក្រុមមេធាវីរបស់ Ronaldo និយាយច្រើនដងហើយថា ឯកសារនានាដែលដើមបណ្ដឹងប្រមូលបានគឺក្លែងក្លាយ និងធ្វើឡើងក្នុងបំណងបង្ខូចកេរ្តិ៍ឈ្មោះរបស់កូនក្ដីរបស់ខ្លួន។ ដូច្នេះភាគីខាង Ronaldo ក៏ទាមទារសំណង 609,680 ដុល្លារដែលបានចំណាយលើរឿងក្ដី ពីមេធាវី Leslie Stovall និងក្រុមមេធាវីរបស់ Mayorga។

Kathryn Mayorga បច្ចុប្បន្នមានអាយុ 40 ឆ្នាំ

ប៉ុន្តែ ចៅក្រម Dorsey បានសម្រេចចិត្តបង្គាប់ឱ្យ Stovall និងសហការី បង់ប្រាក់សំណងត្រឹមពាក់កណ្ដាលនៃការទាមទារខាងលើ ព្រោះយល់ថា Ronaldo គួរណាស់តែធ្វើសកម្មភាពឱ្យបានឆាប់ដើម្បីឆ្លើយតបនឹងពាក្យបណ្ដឹង។

កាលពីអំឡុងពេលកើតហេតុ Ronaldo (មានវ័យទើបតែ 24 ឆ្នាំ និងទាត់ឱ្យក្លឹប Man Utd ជាលើកដំបូង) ទៅលំហែកាយនៅ Las Vegas ជាមួយនឹងបងថ្លៃ និងប្អូនជីដូនមួយ។ ចំណែក Mayorga ដែលកាលណោះមានវ័យ 25 ឆ្នាំ ក៏ទើបចូលប្រលូកក្នុងវិស័យដើរម៉ូដ និងកំពុងធ្វើការក្នុងក្លឹបរាត្រី Rain ខាងក្នុង Palms Casino Resort។ ពួកគេបានជួបគ្នានៅទីតាំង VIP របស់រីសតនេះ៕

February 17, 2023

ប្រទេសថៃ ជំរុញការសាងសង់ «ទីក្រុងអាកាសចរណ៍» តម្លៃ 8.8 ពាន់លានដុល្លារអាម៉េរិក

រាជរដ្ឋាភិបាលថៃនឹងចាប់ផ្ដើមដំណើរការសាងសង់ទីក្រុងអាកាសចរណ៍នៅភាគខាងកើតប្រទេស តម្លៃ 290 ពាន់លានបាត ដែលប្រហែលនឹង 8.8 ពាន់លានដុល្លារអាម៉េរិក នៅក្នុងឆ្នាំនេះ។

គម្រោងនេះនឹងធ្វើឱ្យព្រលានយន្តហោះ U-Tapao ក្នុងខេត្តជាប់សមុទ្រ Rayong នៅភាគខាងកើត ក្លាយជាអាកាសយានដ្ឋានអន្តរជាតិដ៏ធំមួយរបស់ប្រទេសនេះ។ ព្រលានយន្តហោះ U-Tapao នឹងតភ្ជាប់ជាមួយព្រលានយន្តហោះអន្តរជាតិទីពីរ Don Muang និងព្រលានយន្តហោះអន្តរជាតិទីមួយ Suvarnabhumi នៅរាជធានីបាងកក។

គម្រោងនេះនឹងស្ថិតនៅលើតំបន់ដែលមានទំហំជាង 1,040 ហិកតា និងមានស្ថានីយអ្នកដំណើរ ឃ្លាំងទំនិញ មជ្ឈមណ្ឌលបណ្ដុះបណ្ដាលផ្នែកអាកាសចរណ៍ និងមជ្ឈមណ្ឌលថែទាំ ជួសជុលយន្តហោះ។

អាជ្ញាធរថៃបានឱ្យដឹងថា ក្នុង 5 ឆ្នាំដំបូង គម្រោងនេះនឹងផ្ដល់ការងារប្រមាណ 15,000 កន្លែង និងជំរុញកំណើនសម្រាប់វិស័យអាកាសចរណ៍របស់ប្រទេសនេះ។ នេះគឺជាគម្រោងរដ្ឋ-ឯកជន ហើយបើតាមផែនការនឹងទាក់ទាញទេសចរបរទេសក្នុងតំបន់បានកាន់តែច្រើនថែមទៀត។

នៅក្នុងគម្រោងខាងលើនេះដែរ ព្រមានយន្តហោះអន្តរជាតិ U-Tapao នឹងត្រូវបានអភិវឌ្ឍដើម្បីអាចទទួលភ្ញៀវចាប់ពី 60 លាន ទៅ 75 លាននាក់ជារៀងរាល់ឆ្នាំ៕

February 1, 2023

វិធីពិនិត្យមើលពិន្ទុក្នុងបណ្ណបើកបរយានយន្ត ដោយស្កេន QR Code លើបណ្ណបើកបរ…

ដើម្បីអាចពិនិត្យមើលពិន្ទុក្នុងបណ្ណបើកបរយានយន្ត ម្ចាស់កម្មសិទ្ធិត្រូវស្កេន QR Code លើបណ្ណបើកបរ ឬចូលទៅកាន់គេហទំព័រ https://point.mpwt.gov.kh នេះបើតាម ក្រសួងសាធារណការ និងដឹកជញ្ជូន។

ក្នុងករណីបណ្ណបើកបរដែលគ្មាន QR Code លោកអ្នកចូលទៅកាន់គេហទំព័រ https://point.mpwt.gov.kh រួចបំពេញឈ្មោះជាអក្សរឡាតាំង លេខសម្គាល់បណ្ណបើកបរ ថ្ងៃ-ខែ-ឆ្នាំកំណើត រួចចុចពិនិត្យពិន្ទុ នោះលោកអ្នក និងឃើញពិន្ទុបណ្ណបើកបរដូចគ្នា។

សូមចូលរួមគោរពច្បាប់ចរាចរណ៍ និងបើកបរដោយការទទួលខុសត្រូវខ្ពស់ ដើម្បីសុខសុវត្តិភាពរបស់យើងទាំងគ្នា។

January 31, 2023

ទីក្រុងរបស់ប្រទេសចិន ឧបត្ថម្ភប្រាក់ 1,500 ដុល្លារ ដើម្បីលើកទឹកចិត្តប្រជាជនប្រើរថយន្តអគ្គិសនី

គោលការណ៍ឧបត្ថម្ភប្រាក់របស់ប្រទេសចិនសម្រាប់ការទិញរថយន្តអគ្គិសនីបានអស់សុពលភាពតាំងពីចុងឆ្នាំ 2022 ប៉ុន្តែបច្ចុប្បន្នមានតំបន់មូលដ្ឋានជាច្រើននៅតែរក្សាគោលនយោបាយនេះដូចដើម។

ថ្មីៗនេះ អាជ្ញាធរក្រុងសៀងហៃ បានប្រកាសថា ទីក្រុងនេះនឹងការកែប្រែខ្ទង់ប្រាក់ជំនួយដើម្បីបន្តជំរុញការប្រើប្រាស់ផលិតផលចាំបាច់ និងរថយន្តដែលប្រើថាមពលអគ្គិសនីជាដើម។

នៅសៀងហៃ អតិថិជនទិញរថយន្តអគ្គិសនីមុនថ្ងៃទី 30 មិថុនា 2023 នឹងទទួលបានខ្ទង់ប្រាក់ជំនួយ 10,000 យុន (1,500 ដុល្លារអាម៉េរិក) សម្រាប់មួយគ្រឿង។ គម្រោងឧបត្ថម្ភលើកដំបូងរបស់ទីក្រុងសៀងហៃនេះ នឹងមានសុពលភាពចាប់ពីថ្ងៃទី 01 កុម្ភៈ 2023 រហូតដល់ថ្ងៃទី 31 ធ្នូ 2023។

នៅប្រទេសចិន ថ្វីបើកញ្ចប់ជំនួយរបស់រដ្ឋបាលថ្នាក់ជាតិសម្រាប់ការទិញរថយន្តអគ្គិសនីមិនទាន់ត្រូវបានពន្យារសុពលភាព ប៉ុន្តែទីក្រុងជាច្រើនរបស់ប្រទេសនេះនៅតែបន្តរក្សាសុពលភាពនៃកញ្ចប់ឧបត្ថម្ភរបស់ពួកគេដដែល ដើម្បីជំរុញកំណើនសេដ្ឋកិច្ចនៅមូលដ្ឋាន៕

January 31, 2023

ក្លឹប PSG របស់បារាំង ស្វែងរកទិញ «មេធ្មប់អាហ្វ្រិក» ដើម្បីបន្ថែមចំនួនកីឡាករឆ្នើម

យោងតាមប្រភពព័ត៌មានមួយចំនួន ក្លឹបបាល់ទាត់នៅបារីស PSG កំពុងចរចាដើម្បីចុះកិច្ចព្រមព្រៀងជាមួយកីឡាករម្នាក់ក្នុងចំណោមកីឡាករឆ្នើមជាងគេនៅអាហ្វ្រិក នោះគឺ Hakim Ziyech។

កីឡាករខ្សែបម្រើរូបនេះ កំពុងថមថយកម្លាំងក្នុងគ្រាទាត់ឱ្យក្លឹប Chelsea ហើយអាចត្រូវបានអនុញ្ញាតឱ្យចាកចេញនៅថ្ងៃចុងក្រោយនៃរដូវកាលទិញដូរកីឡាករនារដូវរងាឆ្នាំនេះ។

វត្តមានរបស់កីឡាករឆ្នើមដូចជា Mykhailo Mudryk, Joao Felix និង Noni Madueke ជាដើម ក៏អាចធ្វើឱ្យពេលវេលានៃការប្រកួតរបស់ Ziyech ត្រូវបានកាត់បន្ថយបន្ថែមទៀត។ កីឡាករដែលធ្លាប់ត្រូវបានគេហៅថា «មេធ្មប់អាហ្វ្រិក» រូបនេះ ទើបតែទាត់បាន 4 ប្រកួតប៉ុណ្ណោះក្នុងនាមជាកីឡាករជម្រើសដំបូងនៅ លីគកំពូលអង់គ្លេស (English Premier League) ក្នុងរដូវកាលនេះ។

Hakim Ziyech ហាក់កំពុងថមថយកម្លាំងក្នុងគ្រាទាត់ឱ្យក្លឹប Chelsea

ព័ត៌មានពី The Athletic ឱ្យដឹងថា PSG ចង់ចុះកិច្ចសន្យាជាមួយកីឡាករម៉ារ៉ុក Hakim Ziyech ក្នុងទម្រង់ឱ្យខ្ចី ប៉ុន្តែអាចអមជាមួយនឹងលក្ខខណ្ឌទិញដាច់។ កីឡាករវ័យ 29 ឆ្នាំរូបនេះក៏ត្រូវបានគេជឿថា បានយល់ព្រមរួចហើយក្នុងការផ្លាស់ទីទៅទាត់ឱ្យ PSG សម្រាប់ពេលវេលាដែលនៅសល់ក្នុងរដូវកាលនេះ។

បច្ចុប្បន្ន PSG (Paris Saint-Germain) មានកីឡាករឆ្នើមលំដាប់កំពូលលើពិភពលោកមួយចំនួន រួមមានជាអាទិ៍ Lionel Andres Messi, Neymar da Silva Santos Junior, Kylian Mbappe និង Achraf Hakimi Mouh ជាដើម៕

January 31, 2023

ក្មួយបង្កើតរបស់ «ស្ដេចចម្រៀងប៉ប់» សម្ដែងជាតួអង្គឯកក្នុងភាពយន្តស្ដីពី Michael Jackson

Jaafar Jackson ដែលជាក្មួយប្រុសរបស់ Michael Jackson សម្ដែងជាតួអង្គឯកក្នុងភាពយន្តស្ដីពីជីវប្រវត្តិរបស់អតីតស្ដេចចម្រៀងប៉ប់។

កាលពីថ្ងៃទី 31 មករា ប្រភពព័ត៌មានរបស់ទំព័រ Variety បានឱ្យដឹងថា ក្រុមបុគ្គលិកធ្វើការក្នុងគម្រោងថតភាពយន្តរឿង Michael របស់អ្នកដឹកនាំរឿង Antoine Fuqua បានជ្រើសរើសអ្នកសម្ដែងសម្រាប់តួអង្គម្ចាស់បទចម្រៀង Thriller រួចហើយ។ Jaafar Jackson ជាកូនប្រុសរបស់ Jermaine Jackson ដែលជាបងប្រុសរបស់សពលោក Michael Jackson នឹងសម្ដែងជាតួអង្គឯកក្នុងរឿងនេះ។

អ្នកស្រី Katherine ដែលជាម្ដាយរបស់ Michael Jackson ឱ្យដឹងថា «ចៅ Jaafar ដូចកូនប្រុសរបស់ខ្ញុំ។ ពិតជាអស្ចារ្យនៅពេលបានឃើញចៅបន្តប្រពៃណីរបស់គ្រួសារនៅក្នុងវិស័យសិល្បៈ»។

គម្រោងផលិតភាពយន្តខាងលើត្រូវបានអនុវត្តដោយផលិតកម្ម Liongates និងអង្គការគ្រប់គ្រងកេរដំណែល Michael Jackson។ នេះគឺជាភាពយន្តខ្នាតធំដំបូងដែល Jaafar Jackson សម្ដែងជាតួអង្គឯក។ មុននោះ គាត់ធ្លាប់បានចូលរួមថត MV និងកម្មវិធីទូរទស្សន៍មួយចំនួន។

ផលិតករភាពយន្ត Graham King ដែលល្បីឈ្មោះដោយសារបទចម្រៀង Bohemian Rhapsody បានឱ្យដឹងថា «ខ្ញុំបានជួប Jaafar កាលពីជាងពីរឆ្នាំមុន និងភ្ញាក់ផ្អើលណាស់នៅពេលបានឃើញគាត់មានបុគ្គលិកលក្ខណៈ អាកប្បកិរិយាល្អដូច Michael។ យើងឃើញថា បើទោះស្វែងរកជុំវិញពិភពលោកក៏នៅតែរកមិនឃើញមនុស្សដែលសមស្របជាង Jaafar សម្រាប់ការសម្ដែងជាតួអង្គមួយនេះ»។

អ្នកដឹកនាំរឿង Antoine Fuqua ពេញចិត្តជាមួយនឹងការជ្រើសរើសអ្នកសម្ដែងជាតួអង្គឯកខាងលើ ៖ «ពិតជារំភើបណាស់ពេលបានឃើញ Jaafar សម្ដែងជា Michael នៅលើអេក្រង់។ មានការភ្ជាប់ទំនាក់ទំនងពិសេសស្ដីពីអារម្មណ៍រវាងគាត់ និងឪពុកមារបស់គាត់»។

លោក Michael Jackson កើតឆ្នាំ 1958 និងទទួលមរណភាពក្នុងឆ្នាំ 2009

ភាពយន្តរឿង Michael និយាយអំពីជីវភាពរស់នៅរបស់អតីតស្ដេចចម្រៀងប៉ប់ លោក Michael Jackson។ ក្រុមផលិតករបានឱ្យដឹងថា នឹងផ្ដោតសំខាន់ទៅលើការសម្ដែងនានាដែលជាឈុតឆាកពិសេស និងជានិមិត្តរូប ដើម្បីបង្ហាញអំពីផ្លូវឆ្ពោះទៅរកដំណាក់កាលក្លាយជាតារាចម្រៀង និងសម្ដែងអស្ចារ្យបំផុតមួយរូបនៅគ្រប់សម័យកាលរបស់ Michael Jackson។

បទ They Don’t Care About Us (Brazil Version) របស់ Michael Jackson មានអ្នកមាន 978 លានលើក

លោក Michael Jackson កើតឆ្នាំ 1958 និងទទួលមរណភាពក្នុងឆ្នាំ 2009 គឺជាសិល្បករមួយរូបក្នុងចំណោមសិល្បករដែលជោគជ័យបំផុតក្នុងប្រវត្តិសាស្ត្រតន្ត្រី ដោយមានចម្រៀងចំនួន 350 លានថាសត្រូវបានលក់ និងមាន 13 ថាសឈរលើកំពូលតារាងចំណាត់ថ្នាក់របស់ Billboard។ អតីតស្ដេចចម្រៀងប៉ប់ Michael Jackson ធ្លាប់ទទួលបានពានរង្វាន់ Grammy ចំនួន 13 លើក និងពាន AMAs សម្រាប់សិល្បករឆ្នើមប្រចាំសតវត្សរ៍ និងពានរង្វាន់ Bambi សម្រាប់តារាចម្រៀងប៉ប់ឆ្នើមប្រចាំសហស្សវត្សរ៍៕

January 31, 2023

កីឡាករប្រេស៊ីល Dani Alves បញ្ចេញមតិលើកដំបូង ពេលជាប់ពន្ធនាគារ

ខ្សែការពារ Dani Alves បានបញ្ចេញមតិជាលើកដំបូង បន្ទាប់ពីត្រូវជាប់ពន្ធនាគារព្រោះតែការចោទប្រកាន់ពីបទបំពានផ្លូវភេទ។

មុននេះមិនយូរប៉ុន្មាន អតីតខ្សែការពាររបស់ Barcelona កីឡាករ Dani Alves ត្រូវបានចាប់ខ្លួនក្រោមហេតុផលរំលោភបំពានផ្លូវភេទលើស្ត្រីម្នាក់នៅក្នុងបន្ទប់ទឹកនៅក្លឹបរាត្រី។ តុលាការជាន់ខ្ពស់នៅទីក្រុង Barcelona ក៏បានចេញបញ្ជាឱ្យឃុំខ្លួនដោយមិនមានការធានាចំពោះកីឡាករប្រេស៊ីលរូបនេះផងដែរ។

ថ្មីៗនេះ កាលពីថ្ងៃទី 29 មករា កីឡាករជម្រើសជាតិប្រេស៊ីល Alves បានបញ្ចេញមតិជាលើកដំបូង រាប់ចាប់តាំងពីបានចូល «រាប់ថ្ងៃខែ» នៅមន្ទីរឃុំខាំង។ គាត់អះអាងថា «ក្នុងដំណាក់កាលនេះ Dani Alves គឺជាមនុស្សម្នាក់ផ្សេងទៀត។ ខ្ញុំទទួលយកគ្រប់បញ្ហាដែលនឹងកើតឡើង»។

«ខ្ញុំចាកចោលផ្ទះតាំងពីអាយុ 15 ឆ្នាំ ហើយបានឆ្លងកាត់រឿងរ៉ាវអាក្រក់ជាច្រើនក្នុងជីវិត។ នេះគឺជាឧបសគ្គមួយផ្សេងទៀតដែលខ្ញុំត្រូវឆ្លងកាត់។ ខ្ញុំមិនខ្លាចអ្វីទាំងអស់» Alves រៀបរាប់។

បើទោះជាត្រូវជាប់ពន្ធនាគារ ប៉ុន្តែកីឡាករវ័យ 39 ឆ្នាំនេះនៅតែអាចលេងបាល់ ហើយគាត់ទើបតែបានចូលរួមប្រកួតដំបូងនៅមន្ទីរឃុំឃាំង Brians 2។ នៅទីនេះ មនុស្សជាច្រើនចង់ឃើញ និងចង់លេងបាល់ជាមួយ Dani Alves ព្រោះថា ភាពល្បីល្បាញរបស់គាត់គឺជាប្រការដែលមិនអាចបដិសេធបាន។

ក្នុងរឿងក្ដីនេះ មេធាវីរបស់ Alves កំពុងប្រឹងប្រែងដើម្បីឱ្យកូនក្ដីឆាប់បាននៅក្រៅឃុំ។ ប៉ុន្តែ បើសិនជាបាននៅក្រៅឃុំ Alves ក៏នឹងត្រូវពាក់ខ្សែដៃអេឡិចត្រូនិចរបស់ប៉ូលិស ដើម្បីឱ្យប្រាកដថា គាត់មិនអាចចាកចេញពីប្រទេសអេស្ប៉ាញ។

មុននោះ Dani Alves បានបដិសេធការចោទប្រកាន់ ប៉ុន្តែក្រោយមកក៏បានសារភាពនូវអំពើដែលគាត់បានធ្វើ ដោយសារតែសមត្ថកិច្ចមានភស្ដុតាងគ្រប់គ្រាន់។ ក្នុងករណីអាក្រក់បំផុត បើសិនជាត្រូវបានកាត់ទោសពីបទរំលោភសេពសន្ថវៈ Dani Alves អាចនឹងត្រូវដេករាប់ថ្ងៃខែរហូតដល់ 18 ឆ្នាំ៕

January 31, 2023

Category: សង្គម និងសេដ្ឋកិច្ច