រឿងសាច់ស្អាត ស្បែករាបភ្លឺរលោង សម្រាប់នារីៗយើង គឺជារឿងសំខាន់ណាស់ ព្រោះបើសិនស្បែកស្អាត មានសុខភាពល្អ ពិតជាមានផលល្អដល់រូបអ្នកវិញមិនខាន ដូច្នេះតើស្បែករបស់អ្នកយ៉ាងណាដែរ? ព្រោះស្បែករបស់មនុស្សយើងមិនដូចគ្នាទេ អ្នកខ្លះស្បែកស្ងួត អ្នកខ្លះមានស្បែកធម្មតា ឬជួនកាលស្បែករបស់អ្នកឡើងជាតិប្រេង (ឡើងខ្លាញ់)ច្រើន ដូច្នេះ តើអ្នកមានដឹងពីវិធីការមើលថែទាំស្បែករបស់អ្នកដែរឬទេ? ថ្ងៃនេះ យើងមានចំណេះដឹងល្អៗពាក់ព័ន្ធនឹងប្រភេទស្បែករបស់នារីៗយើងមកជម្រាបជូនប្រីយមិត្តអ្នកអានដូចតទៅ ៖
ឥលូវ យើងនាំគ្នាមកសាកល្បងពិនិត្យមើលស្បែករបស់យើងថា តើស្បែករបស់យើង ជាស្បែកប្រភេទបែបណា ។
លាងមុខឱ្យស្អាត រួចទុកចោលប្រមាណជា 2 – 3 ម៉ោង បើធ្វើការសាកល្បងមើលក្រោយពេលលាងមុខហើយភ្លាមៗនោះ អាចធ្វើឱ្យលទ្ធផលចេញមកមិនសូវប្រាកដច្បាស់ ព្រោះសូម្បីតែ អ្នកដែលមានផ្ទៃមុខឡើងជាតិខ្លាញ់ខ្លាំងបំផុត នៅអាចមើលទៅឃើញឡើងស្ងួតបានបន្ទាប់ពីលាងសម្អាតមុខហើយថ្មីៗ ដូច្នេះទើបគួរទុកចន្លោះពេលចោលមួយរយៈដើម្បីរង់ចាំមើលការធ្វើការងាររបស់ក្រពេញជាតិខ្លាញ់ ដោយការយកក្រដាសអនាម័យទន់ៗ ស្តើងៗ មកបិទពីលើមុខ បើក្រដាស់នោះជាប់នៅលើមុខ បញ្ជាក់ថា អ្នកមានស្បែកមុខប្រភេទឡើងប្រេង បើក្រដាសមិនស្អឹតជាប់នៅលើមុខសោះ បញ្ជាក់ថា អ្នកមានស្បែកស្ងួត បើក្រដាសស្អឹតជាប់នៅលើផ្ទៃមុខមួយផ្នែក ជាពិសេសកន្លែង T zone(ក្តោងច្រមុះ និងថ្ងាស់)នោះ បញ្ជាក់ថា អ្នកមានស្បែកប្រក្រតី។
ស្បែកស្ងួត៖ ជាស្បែកដែលមិនអាចរក្សាសំណើមបាន ធ្វើឱ្យផ្ទៃមុខមើលទៅគ្មានភាពស្រស់បស់ និងមានឱកាសឆាប់កើតស្លាកស្នាមជ្រីវជ្រួញបានងាយជាងស្បែកប្រភេទផ្សេងៗទៀតផង។ លក្ខណៈផ្ទៃមុខរបស់អ្នកដែលមានស្បែកស្ងួត គឺនៅម្តុំថ្ពាល់ផ្នែកខាងក្រោមដែលជាប់នឹងធ្គាម ហើយនិងស្បែកក្រោមភ្នែក នឹងមើលទៅឃើញរាងស្ងួត ជួនកាលរាងរបកៗហុយទៀតផង។
ដំណាក់កាលការមើលថែទាំ៖ ចៀសវាងការប្រើឡូស្សឹនជូតស្បែក ព្រោះនឹងធ្វើឱ្យស្បែកកាន់តែស្ងួតឡើង វិធីដែលល្អ គឺគួរប្រើទឹកស្អាតលុបលាងមុខនៅពេលព្រឹក ចំណែកពេលល្ងាច ដែលជាពេលត្រូវលាងគ្រឿងសម្អាងចេញពីមុខនោះ គួរជ្រើសរើសប្រើគ្រីមលាងសម្អាតផ្ទៃមុខណាដែលមានចំណែកផ្សំរបស់ ម៉យស៏ជើរ៉ាយហ្ស៊ើរ៍ ដែលនឹងធ្វើឱ្យមានអារម្មណ៍ថា ស្បែករាងរអិលៗបន្ទាប់ពីលាងសម្អាតមុខហើយ។ ចំណែកឯមុនពេលគេង គួរបំប៉នស្បែកមុខដោយគ្រីមបំប៉នដើម្បីបន្ថែមសំណើម និងភាពស្រស់បស់ដល់ស្បែកមុខ។ សម្រាប់អ្នកដែលមានស្បែកមុខស្ងួតខ្លាំង រហូតបែកមានស្នាម ចូរបន្ថែម ម៉យស៍ជើរ៉ាយហ្ស៊ើរ៍នៅពេលព្រឹក និងពេលថ្ងៃតែអ្នកដែលមានស្បែកមុខស្ងួតក៏មានចំណុចល្អដែរ គឺរន្ធរោមច្រើនតែបិទជិត មើលទៅឃើញផ្ទៃមុខរាបរលោង និងមិនសូវមានបញ្ហារឿងផ្ទៃមុខឡើងខ្លាញ់រលើប ដែលជាមូលហេតុធ្វើឱ្យតុបតែងមុខមិនសូវជាប់បានយូរ។
ស្បែកឡើងប្រេង (ស្បែកមុខឡើងខ្លាញ់)៖ ស្បែកប្រភេទនេះ នឹងមានភាពខ្លាញ់រលើបរលោងពាសពេញផ្ទៃមុខ និងឡើងច្រើនជាពិសេសនៅកន្លែង T zone ឬម្តុំថ្ងាស់ ធ្គាម និងច្រមុះ។ អ្នកដែលមានស្បែកឡើងខ្លាញ់ មើលទៅហាក់ដូចជាមិនងាយកើតស្លាកស្នាមដូចអ្នកដែលមានស្បែកស្ងួតទេ តែក៏ពិបាកនឹងលាងសម្អាតដែរ និងដោយសារតែក្រពេញជាតិប្រេងធ្វើការខ្លាំងជាងប្រក្រតីនោះ ទើបធ្វើឱ្យរន្ធរោមរីកធំ មើលទៅឃើញស្បែកមុខរាងគ្រើមជាងអ្នកដែលមានស្បែកស្ងួត។ បញ្ហាមួយទៀតរបស់អ្នកដែលមានស្បែកមុខឡើងប្រេង គឺនៅពេលជាតិប្រេងចេញមកស្រោបលើផ្ទៃមុខច្រើននោះ នឹងធ្វើឱ្យផ្ទៃមុខមើលទៅរលើបរងើម ជោរប្រេង ផ្ទៃមុខមិនស្រស់ថ្លា តុបតែងមុខមិនសូវជាប់បានយូរ។
ដំណាក់កាលការមើលថែទាំ៖ ជ្រើសរើសប្រើសាប៊ូប្រភេទខ្សោយៗ ឬជេលលាងមុខថ្លាៗ និងមិនចាំបាច់លាងមុខញឹកញាប់នោះទេ បើមានអារម្មណ៍ថា ផ្ទៃមុខឡើងប្រេងខ្លាំង ចូរប្រើក្រដាសអនាម័យ ជូតរាងប្តិតៗជាតិប្រេងនោះចេញ នឹងជួយឱ្យស្បែកមុខស្រស់ឡើងវិញបាន ចំណែកគ្រឿងសម្អាង គួរជ្រើសរើសប្រើប្រភេទ Oil – Free ដើម្បីកុំឱ្យផ្ទៃមុខឡើងរងើម។
ស្បែកធម្មតា៖ ការពិតទៅ មនុស្សភាគច្រើន ច្រើនមានស្បែកក្នុងលក្ខណៈនេះ គឺមានជាតិប្រេងស្រោបលើស្បែកបែបស្តើងៗនៅម្តុំ T zone គឺថ្ងាស់ និងច្រមុះ នឹងមានភាពរលើបខ្លាំងជាងផ្នែកខាងថ្ពាល់បន្តិច ខណៈដែលស្បែកនៅម្តុំកែវភ្នែក និងថ្ពាល់ចុះមកដល់បំពង់កមើលទៅឃើញរាងស្ងួតជាងម្តុំ T zone។
ដំណាក់កាលការមើលថែទាំ៖ គួរលាងសម្អាតផ្ទៃមុខដោយសាប៊ូប្រភេទខ្សោយៗ និងមិនគួរប្រើឡូស្សឹនដែលមានចំណែកផ្សំរបស់អាល់កុលឡើយ ព្រោះនឹងធ្វើឱ្យអ្នកក្លាយជាមនុស្សដែលមានស្បែកស្ងួត ចំណែកការប្រើ ម៉យស៏ជើរ៉ាយហ្ស៊ើរ៍ ចូរលាបតែលើថ្ពាល់ និងស្បែកជុំវិញកែវភ្នែក ដើម្បីការពារការកើតស្លាកស្នាមបានហើយ។
វិធីមើលថែទាំស្បែកប្រភេទនីមួយៗមិនដូចគ្នាទេ តែយ៉ាងណាក៏ដោយ នារីៗយើងគួរសាកល្បងជ្រើសរើសវិធីការមើលថែទាំស្បែកណាមួយដែលស័ក្តិសមនឹងខ្លួនឯងឱ្យបានច្រើនបំផុត ដើម្បីស្បែកដ៏ស្អាតស្រស់ថ្លារបស់អ្នកហ្នឹងឯង៕
