Category: សង្គម និងសេដ្ឋកិច្ច

ស្ថិតក្នុង​បរិស្ថាន​អំណោយផល​ពី​កំណើនសេដ្ឋកិច្ច​ពិភពលោក សេដ្ឋកិច្ចកម្ពុជា​បាន​កើនឡើង​ប្រមាណ​ជា6.9% នៅ​ឆ្នាំ2017 ទាប​ជាង​ឆ្នាំ2016 បន្តិច​ចំនួន7.0%។ កត្តា​នេះ​បានធ្វើឱ្យ​កំណើន​ផលិតផល​សរុប​ក្នុងស្រុក(GDP)កើនឡើង​ប្រមាណ​ជា 89ទ្រី​លាន​រៀល ស្មើនឹង22ប៊ី​លាន​ដុល្លារ​អាមេរិក​ដែលនាំឱ្យ​ចំណូល​សម្រាប់​ប្រជាជន​ម្នាក់​កើនឡើង​ដល់1,434ដុល្លារ​អាមេរិក​ក្នុង​ឆ្នាំ2017កន្លងទៅ។

ឯកឧត្តម ជា ចាន់តូ ទេសាភិបាល​ធនាគារជាតិ​មានប្រសាសន៍​នៅក្នុង​សន្និបាត​បូកសរុប​លទ្ធផល​ការងារ​ប្រចាំឆ្នាំ2017 និង​លើក​ទិសដៅ​ការងារ​ឆ្នាំ 2018កាលពី​សប្តាហ៍​មុន​ឱ្យដឹងថា កំណើន​នេះ​ត្រូវបាន​គាំទ្រចម្បងៗដោយ​កំណើន​វិស័យ​កាត់ដេរ សំណង់ និង​ទេសចរណ៍​រឹងមាំ​ស្រប​ពេលដែល​ចលនា​នៃ​ពិពិធ​កម្ម​ផលិតផល និង​គោលដៅ​នាំចេញ​កំពុង​ត្រូវបាន​លើកកម្ពស់។

វិស័យ​កសិកម្ម​មាន​ស្ថាន​ភាពល្អ​ជាង​ឆ្នាំ​កន្លងទៅ ដោយមាន​កំណើន​ប្រមាណ​ជា1.5% ធៀប​នឹង​ឆ្នាំ2016មាន​ចំនួន1.4% បន្ទាប់ពី​មាន​កំណើន​ទាប​បំផុត​នៅ​ឆ្នាំ2015 គឺ​ចំនួន0.2%ក្នុងអំឡុងពេល 10ឆ្នាំ​ចុងក្រោយ ប៉ុន្តែ​នៅតែ​បន្ត​រួមចំណែក​តិចតួច​ក្នុង​កំណើន​ផលិតផល​ក្នុងស្រុក​សរុប(GDP)0.3%។

កំណើន​នេះ​សម្រេចបាន​ដោយ​សារភាព​អំណោយផល​ជាង​មុន​នៃ​កត្តា​អាកាសធាតុ និង​ការកើនឡើង​នៃ​ផលិតកម្ម​ដំណាំ ជាពិសេស​ស្រូវ និង​ជលផល គួបផ្សំ​នឹង​ការបង្កើន​ចំណាយ​លើ​វិស័យនេះ​របស់​រដ្ឋាភិបាល​ដែល​កើនឡើង17% និង​លំហូរ​វិនិយោគ​ផ្ទាល់​ពី​បរទេស​កើនឡើង4%។ បរិមាណ​ស្រូវ​ដែលមាន​ចំណែក​ធំធេង​ក្នុង​វិស័យ​កសិកម្ម 59% បាន​កើនឡើង6.6% ដល់​ប្រមាណ860ពាន់​តោន ធៀប​នឹង4%ក្នុង​ឆ្នាំ2016 ហើយ​ផល​នេសាទ​មាន​កំណើន​ប្រហាក់ប្រហែល​នឹង​ឆ្នាំ2016 ក្នុង​អត្រា7%។

ចំណែក​វិស័យ​ឧស្សាហកម្ម​សម្រេចបាន​កំណើន 10.5% គាំទ្រ​ជា​ចម្បង​ដោយ​កំណើន​ក្នុង​វិស័យ​កាត់ដេរ រួមចំណែក1.4%នៃ​កំណើន​GDP វិស័យ​សំណង់​រួមចំណែក1.5%នៃ​GDP និងការរួមចំណែកច្រើនជាងមុននៃផលិតផលឧស្សាហកម្មមិនមែនសម្លៀកបំពាក់។ ក្នុងវិស័យកាត់ដេរ ការនាំចេញសម្លៀកបំពាក់សមាមាត្រ64%នៃការនាំចេញសរុបបានកើនដល់ប្រមាណជិត6ប៊ីលានដុល្លារអាមេរិកមានល្បឿនកំណើន8% យឺតជាងឆ្នាំមុនបន្តិច9% ខណៈដែលការនាំចេញស្បែកជើង សមាមាត្រ8% នៃការនាំចេញសរុបបានកើនឡើងគួរឱ្យកត់សម្គាល់ដល់ប្រមាណ 700លានដុល្លារជាមួយនឹងអត្រាកំណើន 25% ធៀបនឹងពេលវេលាដូចគ្នា 16%។

កំណើននៃការនាំចេញសម្លៀកបំពាក់បានគាំទ្រដោយការកើនឡើងនៃការនាំចេញទៅកាន់ទីផ្សារសហរដ្ឋអាមេរិក2% ធៀបនឹងកំណើនអវិជ្ជមានឆ្នាំមុន9% និងប្រទេសជប៉ុនកើន15% ទោះជាការនាំចេញទៅកាន់ទីផ្សារសហភាពអឺរ៉ុបដែលជាទីផ្សារធំជាងគេរបស់កម្ពុជាថយចុះ16%ក៏ដោយ។ ក្នុងរយៈពេលពីរឆ្នាំចុងក្រោយនេះ ប្រាក់ឈ្នួលអប្បបរមាកើនឡើងជាមធ្យម 9% ដល់ 153ដុល្លារអាមេរិកក្នុងឆ្នាំ2017 ក៏ប៉ុន្តែការកើនឡើងនៃប្រាក់ឈ្នួលអប្បបរមានេះហាក់មិនទាន់មានផលប៉ះពាល់គួរឱ្យកត់សម្គាល់ទៅលើវិស័យកាត់ដេរនៅឡើយទេ។

កំណើនវិនិយោគបរទេសគួបផ្សំនឹងការធ្វើសមាហរណកម្មខ្សែចង្វាក់ផលិតកម្ម កម្ពុជាក៏ចាប់ផ្តើមបង្កើនការនាំចេញផលិតផលឧស្សាហកម្មមិនមែនវាយនភណ្ឌ ដូចជាគ្រឿងបន្លាស់អេឡិចត្រូនិក គ្រឿងបរិក្ខារ និងបន្លាស់យានយន្តជាដើម។  រោងចក្រចក្ខុវិស័យកម្មន្តសាលមិនមែនវាយនភណ្ឌបានកើនឡើងដល់ចំនួន127 ស្មើនឹង8%នៃចំនួនរោងចក្រសរុបក្នុងឆ្នាំ2012 ស្របពេលដែលការនាំចេញផលិតផលក្នុងវិស័យនេះកើនដល់454លានដុល្លារដែលមានកំណើន74% ធៀបនឹងរយៈពេលដូចគ្នា។ ការនាំចេញផលិតផលនេះមានសមាមាត្រស្មើនឹងប្រមាណ 8% នៃការនាំចេញសរុប។

នៅក្នុងវិស័យសំណង់ ការហូរចូលនៃការវិនិយោគ និងកំណើនតម្រូវការ ជាពិសេសប្រជាជន ដែលមានចំណូលមធ្យមបានរួមចំណែកជំរុញឱ្យវិស័យនេះបន្តមានកំណើនខ្ពស់ ប៉ុន្តែក្នុងល្បឿនយឺតជាងមុន។ បើពិនិត្យមើលលើសូចនាករដែលបង្ហាញពីកំណើននៃវិស័យសំណង់ឃើញថា ការនាំចូលសម្ភារសំណង់មានការកើនឡើង36% យឺតជាងឆ្នាំមុន42% ដោយសារសំណង់ភាគច្រើនបានឈានដល់ការបញ្ចប់គម្រោងដែលបណ្តាលឱ្យការនាំចូលសម្ភារបរិក្ខារប្រើប្រាស់ផ្សេងៗ ដូចជាម៉ាស៊ីនត្រជាក់ និងម៉ាស៊ីនភ្លើងជាដើមបានកើនឡើងជាបន្តបន្ទាប់ ជាមធ្យមក្នុងអត្រា40%។ ម្យ៉ាងទៀតកំណើនក្នុងវិស័យសំណង់ក៏បានរួមចំណែកគាំទ្រដោយកំណើនឥណទានចំពោះវិស័យនេះដែលបន្តមានកម្រិតខ្ពស់ក្នុងអត្រា35% ប្រហាក់ប្រហែល នឹងកម្រិតជាមធ្យម5ឆ្នាំចុងក្រោយនេះ ទោះបីកំណើនឥណទានជារួមបានថមថយក៏ដោយ។

ចំពោះវិស័យសេវាកម្មមានកំណើន6.2% គាំទ្រដោយកំណើនភ្ញៀវទេសចរអន្តរជាតិដែលកើនឡើងដល់5.5លាននាក់ជាមួយនឹងអត្រាកំណើន12% ខ្ពស់ជាង2ដងនៃកំណើនមធ្យមក្នុងរយៈពេល3ឆ្នាំចុងក្រោយ6%។ ចំណូលពីវិស័យទេសចរណ៍បានកើនដល់3.8ប៊ីលានដុល្លារអាមេរិក មានកំណើន17% ដែលរួមចំណែកដោយកំណើនខ្ពស់នៃភ្ញៀវទេសចរចិន46% ឡាវ48% ជប៉ុន7% ខណៈភ្ញៀវទេសចរមកពីប្រទេសដែលធ្លាប់រួមចំណែកធំបានថយចុះវិញ ដូចជាប្រទេសវៀតណាម-15% កូរ៉េខាងត្បូង-3% និងថៃ-5%៕

ស្ត្រី​ទាំងអស់​នៅពេល​ឈានចូល​ដល់​វ័យ​អស់​រដូវ​ហើយ​នោះ ភាពប្រែប្រួល​ដែល​កើតឡើង​យ៉ាងច្បាស់​នោះ​គឺ បញ្ហា​ស្បែក​ដែល​រុះ​រោយ​ស្រពោន​ស្រអាប់ មើលទៅ​លែង​ស្រស់ស្អាត​ភ្លឺ​ថ្លា​ដូចពេលមុន​ទៀតហើយ រហូត​ធ្វើឱ្យ​ស្ត្រី​ជាច្រើន​នាក់​ត្រូវ​ប្រញាប់​ស្វះស្វែង​រិះរក​វិធី​ជាច្រើន​មក​មើលថែ​បំប៉ន​ស្បែក​យ៉ាង​ប្រញាប់។ ថ្ងៃនេះ ឡា​រ៉ែ​ន សូម​នាំយក​គន្លឹះល្អៗដែល​ជួយ​បំប៉ន និង​ថែទាំ​ស្បែក​មុខ​ឱ្យ​ស្អាត​ម៉ដ្ឋ​ថ្លា​មក​ជម្រាបជូន​ដូចខាងក្រោម​នេះ៖

1/ ថែបំប៉ន​ស្បែ​កមុខ​ដោយ​គ្រី​ម

មើលថែទាំ និង​បំប៉ន​ស្បែក​ឱ្យ​ស័ក្តិ​សមល្មម ដោយ​ការ​លាប​គ្រី​ម​បំប៉ន​ដែលមាន​គុណសម្បត្តិ​ជួយ​ពន្យារ​ភាពចុះ​ទ្រុឌទ្រោម​របស់​កោសិកា​ស្បែក និង​ស្តារ​សភាព​ស្បែក​ដែល​ជ្រីវ​យារ​ឱ្យ​តឹង​ស្មើ​ឡើងវិញ ដែលមាន​វីតាមីន A វីតាមីន C វីតាមីន E និង​ខូ​ឡា​ជេន។ ក្រៅពីនេះ អ្នក​គួរ​លាប​គ្រី​ម​ការពារ​កម្តៅថ្ងៃ​ដែល មាន​ចំណែក​ផ្សំ​របស់​ម៉ូ​ជី​រ៉ា​យ​ស័​រ និង​សារធាតុ​ពន្យារ​ការកើត​ស្លាកស្នាម ដើម្បី​ជួយ​ការពារ​ការឡើង​ស្រអាប់​ខ្មៅ និង​ការពារ​មិនឱ្យ​កើត​ស្នាម​ជ្រួញ​យារ​នៅលើ​ស្បែក ដោយសារ​ត្រូវ​កម្តៅថ្ងៃ​ទៀតផង។

2/ ប្រើ​គ្រឿងសម្អាង​ជា​ជំនួយ

សម្អាត​ស្បែ​កមុខ​ឱ្យ​ស្អាត​ស្រស់ថ្លា​ជាប់​ជានិច្ច ដោយសារតែ​ស្ត្រី​ស្ថិតក្នុង​វ័យ40ឆ្នាំ​ជាង ភាគច្រើន​តែងតែ​ប្រើ​គ្រឿងសម្អាង ដើម្បី​បិទបាំង​ស្លាកស្នាម​ជាប្រចាំ​រៀងរាល់ថ្ងៃ ទើប​ជាហេតុ​ធ្វើឱ្យ​ស្បែ​កមុខ​មើលទៅ​ចុះខ្សោយ និង​ងាយ​កើតមាន​ស្នាម​ជ្រីវជ្រួញ។ ដូច្នេះ​ដើម្បី​កុំឱ្យ​ស្បែក​មុខ​កាន់​តែមាន​បញ្ហា​ខ្លាំង​ជាង​មុន​នោះ​អ្នក​គួរប្រើ​ម្សៅ​ផាត់មុខ​ដូចជា ម្សៅ​ទ្រនាប់ ឬ​ប៊ី​ប៊ី​គ្រី​ម​សាច់ស្តើងៗ បន្ទាប់ពីនោះ ពេល​ត្រឡប់មក​ដល់ផ្ទះ​វិញ អ្នក​គួរ​ជូត​សម្អាត​ស្បែក​មុខ​របស់​អ្នកចេញ ដោយ​ការយក​សំឡី​ជ្រលក់​ទឹក​សម្រាប់​សម្អាត​ផ្ទៃមុខ​លាង​សម្អាត​គ្រឿងសម្អាង​ហើយ​សឹម​ជូត​ចេញ​យ៉ាង​ថ្នមដៃ។

3/ សម្រាក​ឱ្យ​គ្រប់គ្រាន់

គេង​សម្រាក​ឱ្យបាន​គ្រប់គ្រាន់ ក្នុងខណៈ​ពេលដែល​អ្នក​កំពុង​គេង​លក់ រាងកាយ​នឹង​បញ្ចេញ​សារធាតុ មេ​ឡា​ថូ​នី​ន និង​សារធាតុ អេ​ន​ដូ​ហ្វ៊ី​ន ដែលមាន​ចំណែក​ជួយ​ធ្វើឱ្យ​ផ្ទៃមុខ​ឡើង​ស្រស់ថ្លា​ភ្លឺរលោង និង​មើលទៅ​ក្មេង​ជាង​វ័យ។

4/ អាហារ​បំប៉ន​ស្បែក

ទទួលទាន​អាហារ​បំប៉ន​ស្បែក ដែលមាន​ដូចជា អាហារ​ពពួក​បន្លែ និង​ផ្លែឈើ​ស្រស់​ពណ៌​បៃតង ពណ៌​លឿង និង​ពណ៌​ក្រហម ដោយសារតែ​បន្លែ​ផ្លែឈើ​ទាំងអស់នោះ​សម្បូរ​ទៅដោយ​វីតាមីន សារធាតុ​រ៉ែ រួមទាំង​សារធាតុ​ប្រឆាំងនឹង​អនុ​មូល​ឥស្សរ: ដែល​ធ្វើឱ្យ​ស្បែក​ស្អាត​ស្រស់ថ្លា និង​មាន​ភាពយឺត​តឹង។

5/ ទទួលទាន​ទឹក​ជំនួយ​ដល់​ស្បែក

ទទួលទាន​ទឹក​ឱ្យបាន​ច្រើន ពីព្រោះ​ការទទួល​ទាន​ទឹក​មិន​ត្រឹមតែ​ជួយ​ចិញ្ចឹម​ប្រព័ន្ធ ធ្វើ​ការងារ​របស់​រាង​កាយ​ឱ្យ​ដំណើរការ​ប្រក្រតី​នោះទេ នៅ​ហុច​ផល​ល្អ​ដល់​ស្បែក​របស់​អ្នក​បាន​ទៀតផង ជួយ​ពន្យឺត​ភាព​ជ្រួញ​យារ​របស់​ស្បែក ថែមទាំង​ផ្លាស់ប្តូរ​ស្បែក​ដើម​ដែល​ធ្លាប់តែ​ក្រៀម​ស្វិត​ឱ្យ​មើលទៅ​ស្រស់ស្អាត តឹង​ណែន មាន​សុខ​ភាពល្អ​មិន​ចាញ់​គ្រី​ម​បំប៉ន​ស្បែក​តម្លៃថ្លៃៗនោះឡើយ។

6/ ចៀសវាង​សកម្មភាព​មិនល្អ​មួយចំនួន

ចំពោះ​សុខភាព​ស្បែក​ចៀសវាង​ពី​អ្វីដែល​ធ្វើឱ្យ​ស្បែក​ក្រៀម​ជ្រួញ​មិន​ស្រស់ថ្លា ដូចជា ការ​ដុស​សម្អាត​មុខខ្លាំងៗ ការ​ធុញថប់​មួម៉ៅ ការ​ទទួលទាន​ភេសជ្ជៈ​ដែលមាន​ជាតិ​អាល់កុល និង​កាហ្វេ​អុ​ី​ន ដែលជា​កត្តា​បំផ្លាញ​ភាពស្រស់ថ្លា​របស់​ស្បែក​ឱ្យ​ឆាប់​រុះ​រោយ និង​មើលទៅ​ចាស់​ជាង​វ័យ។

កុំ​រវល់​តែ​ឆ្លុះកញ្ចក់ ហើយ​អង្គុយ​ពិបាក​ចិត្តនឹង​បញ្ហា​ស្បែក​មុខ​របស់​អ្នក​តទៅទៀត​អី ចូរនាំគ្នាចាប់ផ្តើមមើលថែបំប៉នស្បែកឱ្យស្រស់ស្អាតចាប់ពីថ្ងៃនេះតទៅវិញប្រសើរជាង ជាមួយនឹងវិធីបែបងាយៗទាំង6ចំណុចដូចខាងលើនេះ៕

ចាប់តាំងពី​ដើមឆ្នាំ2017រហូតមក ពិធី​ការិនី​និង​ជា​តារា​សម្ដែង​ម្ដងម្កាល កញ្ញា ថន លក្ខិណា​ត្រូវបាន​គេ​សម្លឹង​ឃើញថា បាន​បង្កើន​ប្រជាប្រិយភាព​របស់ខ្លួន​ខ្លាំង​ទ្វេដង រួមជាមួយ​នឹង​ការទទួលបាន​ការងារ​ជាច្រើន​កាន់កាប់​ក្នុង​ដៃ ជាពិសេស បន្ទាប់ពី​ជាប់​ឈ្មោះ​ជាតា​រា​តំណាងឱ្យ​ផលិតផល​តែ​បៃតង​អី​ុ​ឈី​តាន់ ក៏ដូចជា​ពិធី​ការិនី​នៅ​ស្ថានីយទូរទស្សន៍​ហង្ស​មាស។ ជាមួយនឹង​ការបង្កើន​ភាពល្បីល្បាញ និង​មាន​ការងារ​មមាញឹក​ខាងលើនេះ ពិធី​ការិនី​ដែលមាន​ស្រុកកំណើត​នៅឯ​ខេត្តកោះកុង​ម្នាក់នេះ​មានឱកាស​កើប​លុយ​បាន​យ៉ាង​សន្ធឹកសន្ធាប់ រហូត​ភ្លេចខ្លួន​មាន​ជំងឺ​ដោយ​បញ្ហា​ឈឺក្រពះ​ដែល​តម្រូវឱ្យមាន​ការពិនិត្យ និង​ព្យាបាល​យ៉ាង​យកចិត្តទុកដាក់​បំផុត។

ក្រោយពី​បាន​ក្លាយខ្លួនជា​តារា​តំណាង​ផលិតផល​តែ​បៃតង​អី​ុ​ឈី​តាន់​ភ្លាម ថន លក្ខិណា បានក្លាយ​ទៅជា​ពិធី​ការិនី​លំដាប់​កំពូល​មួយរូប​ដែលមាន​កម្មវិធី​កាន់កាប់​ក្នុង​ដៃ​យ៉ាងច្រើន រួម​ជាមួយនឹង​ការទទួលបាន​ប្រាក់ចំណូល​កប់​ក្តោង​រាប់ម៉ឺន​ដុល្លារ​ក្នុងមួយខែៗរហូត​ភ្លេច​គិតពី​សុខភាព បណ្ដែត​បណ្តោយឱ្យ​កើតមាន​ជំងឺ​ដោយ​បញ្ហា​ក្រពះ។

ដោយ​មិន​មានការ​លាក់បាំង ថន លក្ខិណា បាន​ប្រាប់​ឱ្យដឹងថា “ជំងឺ​ក្រពះ​នេះ​បាន​កើតមាន​ជា​យូរណាស់​មកហើយ គ្រាន់តែ​កាលពីមុន​វា​មិនសូវ​ធ្វើទុក្ខ​ខ្លាំង។ គ្រូពេទ្យ​ប្រាប់ថា វា​បណ្តាលមកពី​ការទទួល​ទាន​មិន​ទៀងទាត់។ មែន​បង…ភាគតិច​ណាស់​ដែល​បាន​ញាំ​ុ​បាយ​ទាន់ពេល ជូន​កាល​បាយ​ថ្ងៃត្រង់​របស់ខ្ញុំ គឺ​ម៉ោង3 ឬ​ម៉ោង4ល្ងាច ក៏មានដែរ ឬ​ពេលខ្លះ​ញាំ​ុ​បាយល្ងាច​ជំនួស​បាយ​ថ្ងៃត្រង់​ក៏មានដែរ។ កញ្ញា បាន​បន្តទៀតថា “ពេល​វា​ធ្វើទុក្ខម្ដងៗពិបាក​ទ្រាំ​ណាស់ ហើយ​ពេលនេះ​គ្រូពេទ្យ​ឱ្យ​ញាំ​ុ​ថ្នាំ​ជាប់​ជាប្រចាំ ហើយ​កំណត់​ឱ្យមាន​ពេល​សម្រាក​គ្រប់គ្រាន់ និង​ត្រឹមត្រូវ ជាពិសេស ត្រូវ​យកចិត្តទុកដាក់​ញាំ​ុ​បាយ​ឱ្យ​ទៀងពេល​វិញ។ យ៉ាងណាក៏ដោយ លក្ខិណា ក៏បាន​បញ្ជាក់​ផងដែរ​ថា សម្រាប់​ជំងឺ​ក្រពះ​ដែល​តែង​ធ្វើទុក្ខ​ជា​ញឹកញាប់​នេះ នាង​មិនបាន​ប្រាប់​ឱ្យ​អ្នក​ម្ដាយ​ជាទី​ស្រឡាញ់​របស់​នាង​បានដឹង​នោះឡើយ ខណៈដែល​អ្នក​ម្តាយ​រូបនេះ​ក៏មាន​បញ្ហា​សុខភាព​មិនសូវ​រឹងមាំ​ផងដែរ​នោះ។

គួរកត់សម្គាល់​ផងដែរ​ថា កញ្ញា ថន លក្ខិណា នាពេល​បច្ចុប្បន្ននេះ​បានក្លាយ​ទៅជា​ពិធី​ការិនី​ឈានមុខ ដែល​ស្ថិតនៅ​លំដាប់​កំពូល និង​មាន​កម្មវិធី​ជាច្រើន​កាន់​នៅក្នុង​ដៃ រាប់ទាំង​ការងារ​ជា​ពិធី​ការិនី​ប្រចាំ​នៅ​ស្ថានីយទូរទស្សន៍ CTN ក៏ដូចជា​ស្ថានីយទូរទស្សន៍​ហង្ស​មាស ដែលមាន​កម្មវិធី​តន្ត្រី​កម្សាន្ត អី​ុ​ឈី​តាន់ និង​តន្ត្រី​ខា​រ៉ា​បាវ​ប្រចាំ​សប្ដាហ៍ រួម​ជាមួយនឹង​ការប្រគំ​តន្ត្រី​ទេសចរណ៍​តាម​បណ្តា​ខេត្ត​ក្រុង​រៀងរាល់​សប្ដាហ៍​ផងដែរ។ បន្ថែម​ពីនេះ​នៅមាន​កម្មវិធី​ជា​លក្ខណៈ​ឯកជនផ្សេងៗជាច្រើន​ទៀត ដូចជា ការសម្ពោធ​ក្រុមហ៊ុន និង​ការបង្ហាញ​ផលិតផល​ថ្មី​ជាដើម៕

ប៉ៃលិន​គឺជា​ខេត្ត​មួយ​ដែលមាន​សក្តានុពល​ខ្លាំង​ក្នុង​ការដាំដុះ​ដើមឈើ​ហូប​ផ្លែ ជាពិសេស​ដំណាំ​មៀន​ដែល​កំពុង​ចែកចាយ​យ៉ាង​ផុលផុស​នៅលើ​ទីផ្សារ​ក្នុងស្រុក។ ដើម្បី​លើកកម្ពស់​កសិផល​ក្នុងស្រុក រដ្ឋាភិបាល​កម្ពុជា​តាម​រយៈ​ក្រសួងពាណិជ្ជកម្ម​បានស្នើ​សុំឱ្យ​ប្រទេស​ចិន​ទទួលយក​ផ្លែ​មៀន​ពី​កម្ពុជា​ទៅ​បំពេញ​ទីផ្សា​របស់ខ្លួន​ប​ន្ថែ​ម​ទៀត បន្ទាប់​ទីផ្សារ​អង្ករ។

ក្នុងជំនួប​ជាមួយ​ប្រតិភូ​កសិកម្ម​ចិន​ដែល​ដឹកនាំ​ដោយ​លោក ហ៊ី ជៀន​យ៉ាង (He Jianxiang) អគ្គនាយករង​ទទួលបន្ទុក​ការិយាល័យ​កែច្នៃ​ផលិតផល​កសិកម្ម​នៃ​ក្រសួងកសិកម្ម​ប្រទេស​ចិន ឯកឧត្តម ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម​កម្ពុជា​បានស្នើ​ភាគី​ចិន​ឱ្យធ្វើ​ការអភិវឌ្ឍ​ចង្វាក់​តម្លៃបន្ថែម​សម្រាប់​ដំណាំ​ដំឡូង​មី និង​ផ្លែ​មៀន​ប៉ៃលិន​ដើម្បី​ពង្រីក​ការនាំចេញ​ផលិតផល​ទាំងពីរ​នេះ​ឱ្យបាន​អតិបរមា។

ឯកឧត្តម​រដ្ឋមន្ត្រី​មានប្រសាសន៍​បន្ថែម​អំពី​អត្ថប្រយោជន៍​នៃ​ដំឡូង​មី​ដែលជា​ដំណាំ​អាទិភាព​ទី2 និង​មាន​សក្តានុពល​នាំចេញ​ខ្ពស់​របស់​កម្ពុជា​បន្ទាប់​ពី​ដំណាំ​ស្រូវ ព្រមទាំង​ផ្លែ​មៀន​ប៉ៃលិន ដែលជា​ដំណាំ​ឈើ​ហូប​ផ្លែ​មាន​តម្រូវការ​ខ្ពស់​នៅលើ​ទីផ្សារ។

ឯកឧត្តម​បាន​គូសបញ្ជាក់ថា កម្ពុជា​កំពុង​ចងក្រង​គោលនយោបាយ​ដំឡូង​មី និង​ដំណាំផ្សេងៗរួមទាំង​មៀន​ប៉ៃលិន​ដើម្បី​ជំរុញ​ការអភិវឌ្ឍ​ចង្វាក់​តម្លៃ និង​ការនាំចេញ​សំដៅ​ធ្វើ​ពិពិធ​កម្មវិស័យ​ការងារ​ជូន​ប្រជាជន និង​កាត់បន្ថយ​ភាពក្រីក្រ។ ឯកឧត្ដម​មានប្រសាសន៍​ថា “កម្ពុ​ជាមាន​ដី​អំណោយផល​សម្រាប់​វិស័យ​កសិកម្ម ជាពិសេស​ដំឡូង​មី និង​ដំណាំ​មៀននៅ​ខេត្ត​ប៉ៃលិន ហើយ​យើង​ចង់​សហការ​ជាមួយ​វិនិយោគិន​ចិន​ដើម្បី​កែច្នៃ​ផលិតផល​ទាំងពីរ​នេះ​សំដៅ​នាំចេញ​ទៅកាន់​ប្រទេស​ចិន​ដោយផ្ទាល់ ដោយ​ពុំ​ចាំបាច់​ឆ្លងកាត់​ប្រទេស​ទី​បីដូច​ពេលបច្ចុប្បន្ន។

ជាការ​ឆ្លើយតប លោក ហ៊ី ជៀន​យ៉ាង បាន​សន្យា​នឹង​យក​សំណើ​នេះ​ទៅ​ពិភាក្សា​ឱ្យបាន​ស៊ីជម្រៅ និង​សិក្សា​បន្ថែម​អំពី​លទ្ធភាព​សហការ​វិនិយោគ​លើ​ការអភិវឌ្ឍ​ចង្វាក់​តម្លៃ​នៃ​ផលិតផល​ទាំងពីរ គឺ​ដំឡូង​មី និង​ផ្លែ​មៀន​ប៉ៃលិន និង​ដំណាំ​សក្តានុពលផ្សេងៗទៀត​របស់​កម្ពុជា ដូចជា ពោត ស្រូវ និង​ស្វាយ​ជាដើម។

ទន្ទឹមគ្នា​នេះដែរ លោក ហ៊ឺ ជៀន​យ៉ាង ក៏បាន​ជម្រាប​ទៅ​ឯកឧត្តម​រដ្ឋមន្ត្រី​ពាណិជ្ជកម្ម​កម្ពុជា​ដែរ​ថា លោក​នឹង​លើកយក​សំណើ​នេះ​ទៅ​ពិភាក្សា​ជាមួយ​រដ្ឋមន្ត្រី​កសិកម្ម​ចិន​ដែល​នឹង​អញ្ជើញ​អមដំណើរ​ឯកឧត្តម លី កឺ​ឈាំ​ង (Li Keqiang) នាយករដ្ឋមន្ត្រី​នៃ​សាធារណរដ្ឋ​ប្រជាមានិត​ចិន​ដែល​នឹង​អញ្ជើញ​មក​បំពេញ​ទស្សនកិច្ច​ផ្លូវការ​នៅ​កម្ពុជា​នៅ​ដើម​សប្តាហ៍​ក្រោយនេះ។

ទាក់ទង​នឹង​ព័ត៌មាន​នេះ​លោក​ប៊ុន ថេ​ង កសិករ​ដាំ​មៀននៅ​ខេត្ត​ប៉ៃលិន​មានប្រសាសន៍ថា លោក​រីករាយ​ណាស់​ដែល​រដ្ឋាភិបាល​កំពុង​ស្វែងរក​ទីផ្សារ​ជូន​កសិករ​ដាំ​មៀន​ដូច្នេះ។ លោក​បន្តថា ដោយសារ​ទីផ្សារ​មៀន​ក្នុងស្រុក​មាន​តម្រូវការ​ខ្ពស់ លោក​បាន​ដាំ​សាកល្បង​នៅលើ​ផ្ទៃដី​ទំហំ​ត្រឹម1ហិកតា​ប៉ុណ្ណោះ​ហើយ​នៅពេល​ទទួលបាន​ផល ផ្លែ​មៀន​របស់លោក​មិន​ខ្វះ​ទីផ្សារ​នោះទេ គឺមាន​ម៉ូ​យមក​ទទួល​ទិញ​ដល់ទី​កន្លែង​តែម្តង ហើយ​លោក​ថា បើសិន​ផ្លែ​មៀន​ប៉ៃលិន​ត្រូវបាន​រដ្ឋាភិបាល​ចិន​នាំ​ចូលទៅ​ទីផ្សារ​របស់ខ្លួន​ទៀតផង​នោះ លោក​នឹង​ពង្រីក​ចម្ការ​មៀនឱ្យ​កាន់តែ​ធំ​ជាង​នេះ​ថែមទៀត។

សូមបញ្ជាក់ថា ទំហំ​ពាណិជ្ជកម្ម​ទ្វេភាគី​សរុប​រវាង​ចិន និង​កម្ពុជា​បាន​កើនឡើង​យ៉ាង​ឆាប់រហ័ស​ជាមធ្យម26%ក្នុង​រយៈពេល10ឆ្នាំ​ចុងក្រោយ។ កាលពី​ឆ្នាំ2016 ប្រទេស​ទាំងពីរ​សម្រេច​បាន​ទំហំ​ពាណិជ្ជកម្ម​ដល់​ទៅ4,800លាន​ដុល្លារ​អាមេរិក ក្នុងនោះ​ការនាំចេញ​របស់​កម្ពុជា​មាន​ទឹកប្រាក់ 830លាន​ដុល្លារ និង​នាំចូល 3,900លាន​ដុល្លារ។ ចិន​គឺជា​ប្រទេស​វិនិយោគ​ធំជាងគេ​នៅ​កម្ពុជា​ដែល​គិត​ត្រឹម​ឆ្នាំ2017 វិនិយោគ​របស់​ចិន​មាន​ចំនួន 5,000,100លាន​ដុល្លារ លើ​វិស័យ​មួយចំនួន ដូចជា​កម្មន្តសាល សំណង់ វាយ​ន​ភណ្ឌ និង​អគ្គិសនី។ ដោយឡែក​ភ្ញៀវទេសចរ​ចិន​ដែល​មក​កម្ពុជា​បាន​កើន​ដល់83ម៉ឺន​នាក់​នៅក្នុង​ឆ្នាំ 2017 គឺ​បាន​កើនឡើង 20% បើ​ធៀប​នឹង​ឆ្នាំ2016។ នៅក្នុង​ឆ្នាំ2018នេះ ចិន​ក៏បាន​យល់​ព្រមឱ្យ​កម្ពុជា​នាំចូល​អង្ករ 30ម៉ឺន​តោន​ផងដែរ៕

កាលពីពេល​មុននេះ​មាន​បែកធ្លាយ​ព័ត៌មាន​រឿង​ឧបករណ៍​ដែល​ប្រើ ARM ពី ASUS ដែល​បំពាក់ Windows 10 ស៊េរី​ធម្មតា​អាច​ប្រើការ​ប្រូ​ក្រាម​ដែល​ដំណើរការ​លើ x86 របស់ Intel, AMD ភាគច្រើន​បាន​នោះ ឥឡូវនេះ រឿងនេះ​បាន​ក្លាយជា​ការពិតហើយ។

Microsoft និង Qualcomm បានប្រកាស​បង្ហាញ​ជា​ផ្លូវការ​ហើយ​នូវ Notebook ដែល​ប្រើ CPU ARM ពី Qualcomm ដែល​ប្រើ Windows 10 ស៊េរី​ធម្មតា (ដូច​កុំព្យូទ័រ​ទូទៅ) ដែល​ប្រើ​ឈិ​ប Qualcomm Snapdragon 835 ដែល HP និង ASUS កំពុងតែ​បើក​បង្ហាញ​ឧបករណ៍​ទាំងនេះ​ក្នុងថ្ងៃនេះ ហើយ​គេ​រំពឹងថា Lenovo ក៏​នឹង​ចាប់ផ្ដើម​ដំណើរការ​ក្នុង​មិន​ប៉ុន្មាន​សប្ដាហ៍​ខាងមុខ​នេះដែរ។

កាលពីពេល​មុននេះ Microsoft ធ្លាប់បាន​បង្ហាញឱ្យឃើញ​ថា Windows 10 អាច​ប្រើការ​នៅលើ ARM បាន និង​លេង​ហ្គេម ឬ​លេង​កម្មវិធី​ទូទៅ​បាន​ដូចជា​Adobe Photoshop សម្រាប់ Windows ធម្មតា​បានភ្លាមៗកាលពី​ខែធ្នូ ឆ្នាំ2016 កន្លងមក។

ទាំងអស់នេះ​ឧបករណ៍​របស់ HP និង Asus នឹង​ប្រកបដោយ Windows 10S ដែល​រចនា​ម៉ូដ​ចេញមក​ដើម្បី​ប្រើការ Application តាមរយៈ Windows Store តែប៉ុណ្ណោះ តែ​អ្នកប្រើប្រាស់​នឹង​អាច Upgrade ទៅជា Windows 10 Pro បាន​ដោយ​មិន​អស់ថ្លៃ​ចំណាយ​អ្វី​ទាំងអស់។

Microsoft បានបង្ហាញ​ចំណុច​លេចធ្លោ​ថា ការប្រើ ARM ធ្វើឱ្យ​ថ្ម​បាត់​តេ​រី​អាច​នៅបាន​ពេញ​មួយថ្ងៃ​ប្រើការ​បាន​ប្រមាណ​ជា 20-22ម៉ោង ហើយ​បាន​រៀន​យល់ដឹង​ពី​ចំណុច​ខុសឆ្គង​ពី​ការធ្វើ Windows RT កាលពី​អតីតកាល​មក​កែសម្រួល​ទៀតផង។

សម្រាប់​ព័ត៌មាន​របស់​លក្ខណៈសម្បត្តិ​ដែល​ចេញមក មាន Asus NovaGo 2-in-1ប្រកបដោយ​អេក្រង់ HD ទំហំ 13.3អី​ុ​ញ RAM ខ្ពស់បំផុត 8GB និង​កន្លែង​ផ្ទុក​ឯកសារ​បាន 256GB ថែមទាំង​អាច​ប្រើ​ប៊ិច​ស្តៃ​ឡាស់ និង​មាន​ផត USB 3.1 ផត HDMI ព្រមទាំង microSD ទៀតផង។

ចំណែក HP Envy X2 វិញ​ចេញមក​ព្រមជាមួយ​អេក្រង់​បង្ហាញ​ទិន្នន័យ​ទំហំ 12.3អី​ុ​ញ RAM 8GB និង​ផ្ទៃ​ផ្ទុក​ឯកសារ 256GB និង HP នៅ​អាច​ប្រើការ​ជាមួយ​ប៊ិច​ស្តៃ​ឡា​ស់បាន ហើយ​ទាំងពីរ​ស៊េរី​នេះ នឹង​ចេញមក​ព្រមជាមួយ​ការតភ្ជាប់ LTE ទៀតផង៕

ក្រុម Manchester United បាន​ទុក​រឿង​ការ​ប្រជែង​ទិញ​ខ្សែប្រយុទ្ធ Alexis Sanchez របស់​ក្លិប Arsenal មួយ​ឡែក​សិន ដើម្បី​កត់ត្រា​ជ័យជម្នះ​យ៉ាង​កក់ក្តៅ​ក្នុង​លទ្ធផល 3-០ លើ​ក្រុម Stoke នា​កីឡដ្ឋាន Old Trafford កាលពី​ថ្ងៃ​ចន្ទ។

ខ្សែបម្រើ Antonio Valencia និង​ខ្សែប្រយុទ្ធ Anthony Martial សុទ្ធសឹង​បាន​រក​គ្រាប់​បាល់​បញ្ចូល​ទី​ដូចគ្នា​នៅ​តង់​ទី1 ហើយ Romelu Lukaku បាន​បន្ថែម 1គ្រាប់​ទៀត​នៅ​តង់​ទី2 ខណៈដែល​លោក Jose Mourinho បាន​ផ្តួល​ក្រុម Stoke ជា​លើក​ទី1 ក្នុងនាម​ជា​អ្នកចាត់ការ​ទូទៅ​របស់​ក្រុម Man United ក្នុងចំណោម​ការជួបគ្នា 4លើក។

ប៉ុន្តែ ការបង្ហាញ​ពី​ទម្រង់​លេង​របស់ Man United ពី​ការប្រកួត​នេះ​មានការ​ខ្ជះខ្ជាយ​ឱកាស​ជាច្រើន និង​នៅតែ​បង្ហាញ​ឲ្យ​ឃើញថា លោក Mourinho ត្រូវតែ​បន្ថែម​តារា​ឆ្នើម Sanchez របស់​ក្លិប Arsenal ចូលក្នុង​ក្រុម​របស់លោក អំឡុងពេល​នៃ​ការដោះដូរ​កីឡាករ​នៅ​ខែម​ករានេះ បើទោះបីជា​បាន​កាត់បន្ថយ​ពិន្ទុ​នាំមុខ​របស់​ក្រុម Manchester City នៅលើ​កំពូល​តារាង​នៃ​ក្របខ័ណ្ឌ Premier League មក​នៅត្រឹម 12ពិន្ទុ​ក៏ដោយ។

ខ្សែបម្រើ​ដ៏​មាន​ឥទ្ធិពល Paul Pogba របស់ Man United បាន​ប្រាប់​ទូរទស្សន៍ Sky Sports ថា៖ «ពិតណាស់ យើង​ឃើញ Manchester City កំពុងតែ​នាំមុខ​យើង ហើយ​ពួកគេ​បាន​រង​បរាជ័យ។ ពួកគេ​កំពុងតែ​នាំមុខ ហេតុនេះ យើង​តែងតែ​ចង់​តាម​ពួកគេ​ឲ្យ​ទាន់ ហេតុនេះ វា​ជា​រឿង​ល្អ​ដែរ​ដែល​ពួកគេ​បាន​រង​បរាជ័យ ហេតុនេះ សម្រាប់​យើង យើង​ត្រូវតែ​គិត​អំពី​ខ្លួន​យើង»៕

ប្រភពពី៖ Channel News Asia