Category: សង្គម និងសេដ្ឋកិច្ច
បញ្ហាសំខាន់ដែលបុរសចង់បានចម្លើយ និងមូលហេតុដែលទម្ងន់មិនព្រមស្រក ទោះព្យាយាមហាត់ប្រាណក៏ដោយ
បញ្ហាគឺអាចស្ថិតនៅលើខ្លួនយើងក៏មានដែរ សូមកុំទៅសម្លឹងអ្វីដែលស្ថិតនៅឆ្ងាយពីខ្លួនយើងឡើយ។ បញ្ហាសុខភាព និងការហាត់ប្រាណទាំងអស់នេះគឺជាបញ្ហាសំខាន់ណាស់ ដែលបុរសចង់បានចម្លើយថា តើមូលហេតុអ្វីគីឡូមិនព្រមស្រកទាល់តែសោះ ទាំងដែលខ្លួនកំពុងតែព្យាយាមហាត់ប្រាណយ៉ាងនឿយហត់ក៏ដោយ។ សម្រាប់បុរសទាំងឡាយដែលកំពុងតែហាត់ប្រាណលើកសាច់ដុំនិងព្យាយាមចង់បានសាច់ដុំកង់ៗ តើលោកអ្នកមានបានកត់សម្គាល់ចំណុចប្លែកនៃរាងកាយរបស់ខ្លួនដែលអាចនឹងធ្លាប់ជួបបញ្ហាទាំងនេះខ្លះដែរឬទេ? យ៉ាងណាមិញបញ្ហាមិនមានច្រើនពេកនោះទេ។
បញ្ហានៃការហាត់ប្រាណដែលបានអនុវត្តជាប្រចាំ ជួនកាលខ្លួនអ្នកចង់ព្យាយាមឱ្យទម្ងន់ស្រកបានភ្លាមៗតាមក្ដីស្រមៃពេកក៏ជាបញ្ហាដែលងាយនាំឱ្យទម្ងន់មិនស្រកដូចគ្នាផងដែរ។ ថ្ងៃនេះទស្សនាវដ្តី ឡារ៉ែន មានចម្លើយអំពីបញ្ហាមួយនេះដែលបាននាំយកមកប្រាប់ប្រិយមិត្តអ្នកអានបានជ្រាប។ ហេតុផលដែលធ្វើឱ្យទម្ងន់មិនស្រកនោះ ពោលគឺនៅមិនឆ្ងាយពីខ្លួនអ្នកឡើយ។ គ្រប់យ៉ាងរមែងអាចកើតចេញខ្លួនអ្នកក៏ថាបាន នៅពេលដែលបានមើលរំលងពីចំណុចតូចៗរបស់វា។ តើសុភាពបុរសទាំងឡាយធ្លាប់បានសង្កេតពីមូលហេតុដែលបង្កដោយខ្លួនឯងដែរឬទេ?
ដូច្នេះប៉ុន្មានចំណុចខាងក្រោមនេះអាចប្រាប់អ្នកបានអំពីមូលហេតុនៃការសម្គាល់ពីខ្លួនឯងតាមបែបងាយ៖
1/ ក្រោយពីការហាត់ប្រាណហើយ ទៅទទួលទានអាហារឆ្ងាញ់ច្រើនៗ
នេះហើយ!!… គ្មានហេតុផលអ្វីដែលត្រូវស៊ើបអង្កេតស្វែងរកចម្លើយជាបន្ដទៀតទេ។ បញ្ហាដែលធ្វើឱ្យទម្ងន់អ្នកមិនព្រមស្រកទាល់តែសោះនោះគឺខណៈដែលអ្នកទៅទទួលទានអាហារឆ្ងាញ់ៗ ដើម្បីបំពេញកម្លាំងបន្ថែមឡើងវិញក្នុងការបំបាត់ភាពនឿយហត់ក្រោយហាត់ប្រាណនេះឯង។ ក៏ព្រោះថាការដែលទទួលទានអាហារឆ្ងាញ់ៗដែលមានប្រូតេអីុន និងកាឡូរីច្រើនគឺច្បាស់ទទួលបានរង្វាន់ធំពីការឡើងគីឡូយ៉ាងលឿនជាក់ជាមិនខានឡើយ។ យើងសូមបញ្ជាក់ដោយត្រង់ទៅចុះថា អាហារដែលអ្នកគួរទទួលទាន ដើម្បីបំបាត់ភាពនឿយហត់ក្រោយពីហាត់ប្រាណរួច ព្រមទាំងមិនធ្វើឱ្យឡើងទម្ងន់នោះគឺ ទឹកដោះគោ យ៉ាអួរ ផ្លែឈើស្រស់ ជាពិសេសគឺផ្លែប៉ោមខៀវ។
2/ បញ្ហានៃអារម្មណ៍តប់ប្រមល់ខ្លាំងពេក
ភាពតានតឹង និងអារម្មណ៍តប់ប្រមល់ វាមិនត្រឹមតែជាបញ្ហាដែលបានហុចផលដល់សុខភាព និងសុខភាពផ្លូវចិត្តតែប៉ុណ្ណោះទេ ក៏ប៉ុន្ដែវាក៏នៅហុចផលអាក្រក់ដល់រាងកាយរបស់អ្នកថែមទៀតផង។ ព្រោះថានៅពេលណាដែលរាងកាយរបស់អ្នកស្ថិតក្នុងសភាពអួលអាប់មានអារម្មណ៍តានតឹងតប់ប្រមល់ខ្លាំងពេកនោះរាងកាយរបស់អ្នកនឹងបញ្ចេញអ័រម៉ូន Cortisolចេញមកច្រើនពេក ទើបបានជាអ័រម៉ូននោះទៅជំរុញភាពស្រែកឃ្លានអាហារដល់រាងកាយអ្នកកាន់តែខ្លាំងឡើង។ ដូច្នេះហើយទើបអ្នកត្រូវបង្ខំទទួលទានអាហារជាច្រើនក្រោយពេលធ្វើការហាត់ប្រាណរួច។
3/ ការសម្រាកមិនគ្រប់គ្រាន់
ការគេងតិចតួច គេងយប់ជ្រៅ និងការសម្រាកមិនគ្រប់គ្រាន់ជាដើមនោះ គឺបណ្ដាលឱ្យបាក់កម្លាំង និងរាងកាយមានសភាពល្វើយនឿយហត់ ជាមួយអារម្មណ៍តានតឹងមកពីគេងមិនលក់នេះ។ ចំពោះការគេងយប់ជ្រៅអាចធ្វើឱ្យរាងកាយរបស់អ្នកដុតកម្តៅបានយឺតបំផុត ហើយប្រព័ន្ធដុតកម្ដៅ Metabolism មិនអាចធ្វើប្រតិបត្តិការបានយ៉ាងគ្រប់គ្រាន់ឡើយទើបបណ្ដាលឱ្យកើតអាការឈឺក្បាលដោយសារចុះជាតិស្ករ៕
អ៊ុន អាលីហ្សា នៅមិនទាន់ច្បាស់ពីគម្រោងរៀបការ
កញ្ញា អ៊ុន អាលីហ្សា ត្រូវបានគេស្គាល់ថាជាតារាសម្ដែង និងបង្ហាញម៉ូដមួយដួងដែលមានកេរ្តិ៍ឈ្មោះបោះសំឡេងល្បីគួរសម ជាពិសេសនៅក្នុងអំឡុងឆ្នាំ2010 ដែលស្ទើរតែគ្រប់កម្មវិធីបង្ហាញម៉ូដសម្លៀកបំពាក់ ឬកម្មវិធីបង្ហាញ និងផ្សព្វផ្សាយផលិតផលនានាគឺតែងមានវត្តមានរបស់នាងជានិច្ច។ បន្ថែមពីនេះ អាលីហ្សា ក៏ធ្លាប់បានធ្វើជាអ្នកតំណាងកម្ពុជាចេញទៅប្រកួតនៅក្រៅប្រទេសជាញឹកញាប់នៅលើវេទិការបង្ហាញម៉ូដអន្តរជាតិផងដែរ។
ដោយឡែក និយាយពីរឿងរ៉ាវនៃជីវិតឯកជនវិញ អ៊ុន អាលីហ្សា ក៏ស្ថិតនៅក្នុងការតាមដានពីសំណាក់មហាជនមិនចាញ់តារាស្រីល្បីៗឯទៀតនេះដែរ ពិសេសគឺជីវិតស្នេហាក្រៅឆាករបស់នាងតែម្ដង ខណៈដែលគេដឹងថាបុរសជាគូកំណាន់ចិត្តរបស់នាងគឺជាអ្នកជំនួញធំម្នាក់ និងមានឈ្មោះគួរសមនៅក្នុងសង្គមផងដែរ។ បើទោះជាយ៉ាងណាក៏ដោយ អ៊ុន អាលីហ្សា នៅតែបង្ហាញពីការព្យាយាមលាក់បាំងមុខមាត់ និងអត្តសញ្ញាណគូស្នេហ៍ដដែល ជាក់ស្ដែង សូម្បីតែនៅក្នុងឱកាសថ្ងៃខួបកំណើតរបស់ខ្លួន ក៏នាងមិនអនុញ្ញាតឱ្យបណ្ដាមិត្តក្នុងបណ្ដាញហ្វេសប៊ុកបានឃើញមុខបុរសម្នាក់នោះច្បាស់នោះដែរ ពោលគឺនាងបានយកស្ទីកគ័របិតមុខប្រុសស្នេហ៍តែម្ដង។
ជាមួយនឹងដំណើររឿងខាងលើនេះ មានសំណួរជាច្រើនបានកើតឡើង ក៏ប៉ុន្តែអ្វីដែលសំខាន់នោះគឺចម្ងល់ដែលបានសួរតាមរយៈបណ្តាញ Facebook នៅលើគណនីរបស់នាងថា តើហេតុអ្វីចាំបាច់បិតបាំងមុខប្រុសស្នេហ៍ដូច្នេះ? តើនាងខ្លាចអ្វីឱ្យប្រាកដ? ខ្លាចប៉ះពាល់កិត្តិយសរបស់ប្រុសស្នេហ៍ ឬខ្លាចប្រពន្ធដើមប្រុសស្នេហ៍ដឹង? ពាក់ព័ន្ធនឹងបញ្ហានេះ ត្រូវបានតារារូបនេះបង្ហើបប្រាប់ថា មូលហេតុុដែលនាងព្យាយាមបិទបាំង និងមិនបង្ហាញពីអត្តសញ្ញាណប្រុសស្នេហ៍ ក៏ព្រោះតែនាងនៅមិនទាន់ច្បាស់ពីគម្រោងអនាគតជាមួយបុរសម្នាក់នេះនៅឡើយ។
អាលីហ្សា បានប្រាប់អ្នកព័ត៌មានកាលពីពេលកន្លងទៅយ៉ាងដូច្នេះថា “មិនមានអីជាអាថ៌កំបាំងអីនោះទេ ហើយក៏មិនបារម្ភខ្លាចអ្នកណានោះដែរ គ្រាន់តែពេលនេះទំនាក់ទំនងរបស់ពួកយើងនៅមិនទាន់មានការកំណត់ច្បាស់លាស់100% អំពីពេលវេលារៀបការនៅឡើយ។ ម្យ៉ាងទៀតខ្ញុំគិតថា ចាំដល់ថ្ងៃមង្គលចាំបង្ហាញពីអត្តសញ្ញាណគាត់ក៏មិនទាន់ហួសពេលនោះដែរ”៕
ការអានលើឯកសារបោះពុម្ព និងការអានលើប្រព័ន្ធបច្ចេកវិទ្យាមួយណាល្អជាង?
មនុស្សភាគច្រើនគ្រប់គ្នាសរសើរបច្ចេកវិទ្យាដែលអាចបង្កើត PDF អាចមានកម្មវិធីអាន និងអាចធ្វើឱ្យយើងទទួលបានចំណេះដឹងច្រើន ខណៈដែលពេលមុនមិនធ្លាប់មាន។ បណ្ណាល័យមួយអាចដាក់សៀវភៅបានច្រើន ឬតិចគឺអាស្រ័យលើទំហំនៃអគារ តែពេលនេះកាន់តែទូរស័ព្ទ ឬកុំព្យូទ័រមួយ អាចដាក់បណ្ណាល័យមួយតាមខ្លួនដោយលែងបារម្ភ។
ទន្ទឹមនឹងមានចំណុចល្អនេះ មនុស្សមួយចំនួនធំ បានលើកឡើងថាទូរស័ព្ទ និងកុំព្យូទ័ររបស់គាត់មានសៀវភៅច្រើន តែពេលខ្លះពិបាកអាន។ ពិបាកមិនមែនមកពីគាត់មិនទាន់ទម្លាប់ជាមួយនឹងបច្ចេកវិទ្យា ឬមកពី Screen ខុសពីសៀវភៅនោះទេ តែពិបាកត្រង់ការគ្រប់គ្រងចិត្តខ្លួនឯង។ នៅពេលដែលកាន់ឧបករណ៍អេឡិចត្រូនិកដើម្បីអាន មានរឿងជាច្រើនបានលោតឡើងស្របពេលដែលគាត់អាន ហើយធ្វើឱ្យចិត្តគាត់ចង់បើកមើល ចង់ដឹងពីហេតុការណ៍នៃ Notification ដែលបានលោតឡើងនោះ ហើយក៏ចង់ចូលទៅកាន់កម្មវិធីកម្សាន្តជាច្រើនទៀតនៅក្នុងដៃរបស់គាត់។
ជាដំណោះស្រាយនៃបញ្ហាខាងលើនេះ មានមនុស្សមួយចំនួនបានឱ្យយោបល់ថា គ្រាន់តែបិទ Internet នៅពេលដែលយើងកំពុងអានសៀវភៅជាការស្រេច តែមានអ្នកខ្លះលើកឡើងថា បើទោះបីជាគ្មាន Internet ក៏ដោយ ក៏គាត់នៅតែពិបាកដែរ ព្រោះមានកម្មវិធីដែលគាត់ជក់ចិត្តច្រើនណាស់នៅក្នុងដៃរបស់គាត់ ហើយរង់ចាំឱ្យគាត់ទៅបើកវាមើល។
ជារួមគឺបច្ចេកវិទ្យាល្អ តែមកពីមនុស្សខ្លួនឯងគ្រប់គ្រងវាមិនបានល្អ។ សំណួរសួរថា ចុះបើពិបាកគ្រប់គ្រងម្លឹងៗ ម្តេចក៏មិនប្រើវាឱ្យមានតុល្យភាព? កុំបដិសេធការប្រើបច្ចេកវិទ្យា តែក៏កុំភ្លេចការមើលឯកសារបោះពុម្ពដែរ៕
បុកល្ហុង ក្តាមប្រៃ
សូមមកមើលវិធីបុកល្ហុងបែបខ្មែរដ៏ឈ្ងុយឆ្ងាញ់ម្តងពីអាហារដ្ឋាន គ្រួសាររីករាយ ដែលល្បីខាងបុកល្ហុងឆ្ងាញ់ និងសម្បូរបែបតែម្តង។ តោះមកមើលពីរបស់ធ្វើបុកល្ហុងដ៏ឆ្ងាញ់ពិសាពីមេចុងភៅធំ ថ្វីដៃល្អឯកវិញម្តងមើល៎!
គ្រឿងផ្សំ
– ក្តាមប្រៃ
– កាពិ (កែវថៃ) 1/3 ស្លាបព្រាបាយ
– ស្ករស 1ស្លាបព្រាបាយ
– ខ្ទឹមស 2កំពឹស
– ម្ទេសស្រស់ 2-5ផ្លែ
– ក្រូចឆ្មារ 2ផ្លែ
– បង្គាក្រៀម
– សណ្តែកដីលីង
– ល្ហុងឈូស ឬសាប់
– ត្រកួន
– សណ្តែកកួរ
– ត្រប់
– ប៉េងប៉ោះ
– ជីរណា
– ប្រហុកខ្មែរ 1/3 ស្លាបព្រាកាហ្វេ
– ការ៉ុត
– ត្រសក់របៀបធ្វើ
ដំបូងត្រូវដាក់ខ្ទឹមស និងម្ទេសស្រស់ចូលក្នុងត្បាល់ រួចបុកចូលគ្នា បន្ទាប់មកដាក់កាពិ ស្ករស និងប្រហុកចូលបុកចូលគ្នាឱ្យសព្វ សឹមច្របាច់ក្រូចឆ្មារចូល រួចកូរឱ្យរលាយចូលគ្នា។ ដាក់សណ្តែកកួរ ត្រកួន និងល្ហុងឈូសចូល រួចបុកឱ្យសព្វ សឹមដាក់ក្តាមប្រៃចូលបុកជាមួយគ្នាឱ្យបែកសាច់ក្តាមប្រៃ បន្ទាប់មកកាត់ប៉េងប៉ោះ និងត្រប់ដាក់ចូលក្នុងត្បាល់ រួចកូរឱ្យចូលជាតិគ្នាល្អ។ ជាចុងក្រោយចូររៀបការ៉ុត និងត្រសក់ដាក់ក្នុងចាន និងដួសបុកល្ហុងដាក់ពីលើ ហើយរោយសណ្តែកដីលីង បង្គាក្រៀម និងហាន់ម្ទេសស្រស់ដាក់ពីលើបុកល្ហុងជាការស្រេច៕
តុបតែងម៉ូដក្រចកស្វាគមន៍ឆ្នាំថ្មី2018
បន្ទាប់ពីឆ្នាំចាស់កន្លងផុតទៅ ឆ្នាំថ្មីបានឈានចូលមកដល់ ដូច្នេះដើម្បីស្វាគមន៍ឆ្នាំថ្មី ឆ្នាំ2018នេះ សូមសម្អិតសម្អាងម៉ូដក្រចកដៃរបស់អ្នកឱ្យស្រស់ស្អាតបំផុតបែប Fashion Nail គឺទាំងស្រស់ស្អាត និងជាម៉ូដកំពុងពេញនិយមទូទាំងពិភពលោកថែមទៀត នោះអ្នកនឹងក្លាយជានារីដ៏លេចធ្លោនៅក្នុងចំណោមមនុស្សជាច្រើន។
សូមបង្ហាញពីភាពស្រស់ស្អាតរបស់អ្នកជាមួយនឹងម៉ូដក្រចកបែប Fashion ទាំងអស់គ្នាណា៎ ដើម្បីស្វាគមន៍ឆ្នាំថ្មី៕
Brandeis Prometheus ស្មាតហ្វូនរាងប្លែក RAM 8GB
ស្មាតហ្វូនស៊េរីនេះជាផលិតផលពីក្រុមហ៊ុន Brandeis ដែលក្រៅពីរូបរាងដែលមើលទៅជំពប់ភ្នែកចម្លែកខុសគេហើយនោះ Brandeis Prometheus ថែមទាំងចេញមកជាមួយនឹងលក្ខណៈសម្បត្តិខាងក្នុងខ្លាំងមិនចាញ់ស្មាតហ្វូនយីហោដទៃទៀតឡើយ។
ដោយអេក្រង់បង្ហាញទិន្នន័យខ្នាតធំ 6អីុញ ភាពលម្អិតច្បាស់កម្រិត 4K ដំណើរការដោយឈិបសិតប្រមូលទិន្នន័យលំដាប់ High End Snapdragon 835 ដែលនឹងធ្វើការរួមជាមួយអង្គចងចាំ RAM 8GB។ ចំណែកឯការថតរូបភាពវិញ មានបំពាក់ប្រព័ន្ធកាមេរ៉ាគូទាំងមុខទាំងក្រោយ ព្រមជាមួយភ្លើងហ្វ្លាស់បែបសម្បូរបែបដល់ទៅ 8គ្រាប់នៅលើតួគ្រឿងការពារទឹក និងធូលីដីតាមស្តង់ដារ IP68 ដោយខាងក្រុមហ៊ុនបានបញ្ជាក់ថា Prometheus នឹងដំណើរការដោយប្រព័ន្ធប្រតិបត្តិការ Android 8.0 សេ៊រីថ្មីចុងក្រោយបំផុត ហើយសម្រាប់លក្ខណៈសម្បត្តិដែលគួរឱ្យចាប់អារម្មណ៍ផ្សេងទៀត នោះមានដូចតទៅ៖
- អេក្រង់បង្ហាញទិន្នន័យ Freedom Display បែប Super AMOLED ទំហំ 6អីុញ គ្របដោយកញ្ចក់ Gorrla Glass 5
- ឈិបសិតប្រមូលទិន្នន័យក្រាហ្វិក (GPU) Adreno 540
- អង្គចងចាំខាងក្នុង (ROM) ទំហំផ្ទុក 256GB
- កាមេរ៉ាឌីជីថលខាងមុខ និងខាងក្រោយបែបគូដូចគ្នា (Dual-Camera) ភាពលម្អិតច្បាស់ 12មេហ្គាភិចសេល ដូចគ្នា។
- សេនស៊ើរស្គែនខ្ចៅម្រាមដៃនៅលើប៊ូតុងហូម
- Support ការប្រើការបែបស៊ីម 2 Dual Nano-SIM
- Support ការតភ្ជាប់បណ្ដាញ 4G LTE
- ថ្មបាត់តេរីទំហំ 3500mAh support តិចណូឡូជី Quick Charge 4.0៕
វិធីសាស្រ្តសម្រាប់អាណាព្យាបាល និងគ្រូបង្រៀនក្នុងការយកចិត្តកុមារ
ក្មេងជាវ័យដែលត្រូវការក្តីស្រឡាញ់ និងការយកចិត្តទុកដាក់ខ្ពស់ពីអាណាព្យាបាល ព្រោះមានក្មេងខ្លះកាន់តែរីកលូតលាស់ធំឡើង កាន់តែពូកែប្រឆាំងជំទាស់ ឬកាន់តែឃ្លាតឆ្ងាយពីអាណាព្យាបាល។ មានអាណាព្យាបាល និងអ្នកអប់រំជាច្រើនបានបង្ហាញក្តីកង្វល់របស់ខ្លួនពីបញ្ហាពិបាកក្នុងការធ្វើឱ្យក្មេងចូលចិត្ត ហើយស្តាប់តាម ឬនិយាយឱ្យងាយស្រួលគឺឱ្យក្មេងស្រឡាញ់ចូលចិត្ត។
ខាងក្រោមនេះជាវិធីមួយចំនួនដើម្បីធ្វើឱ្យក្មេងៗចូលចិត្ត និងទទួលយកបំណងល្អដែលយើងផ្តល់ជូនទៅកាន់គាត់៖
- និយាយពីអ្វីដែលក្មេងចូលចិត្ត កុំនិយាយពីអ្វីដែលយើងចង់បានខ្លួនឯងនៅពេលដែលអាណាព្យាបាល ឬអ្នកបង្រៀន ចង់ឱ្យក្មេងធ្វើអ្វីមួយតាមដែលខ្លួនចង់បាន ពួកគេមួយចំនួនបានធ្វើការបង្ខំ ឬពន្យល់តែអ្វីដែលពួកគាត់ចង់ធ្វើតែប៉ុណ្ណោះដែលធ្វើឱ្យក្មេងកាន់តែប្រឆាំងព្រោះគំនិតនេះអាចមិនស្របជាមួយនឹងកម្រិតយល់ដឹងរបស់ក្មេង។
ចំណុចល្អដែលអាណាព្យាបាលគួរធ្វើគឺ បំផុសសំណួរមួយចំនួនដើម្បីឱ្យក្មេងជាអ្នកឆ្លើយហើយយើងគ្រាន់តែសម្រួល លើចម្លើយដែលគេឆ្លើយនោះដោយប្រើហេតុផលមួយចំនួនទៅកាន់ក្មេងៗនោះគេនឹងគិតថាអាណាព្យាបាលកំពុងឱ្យតម្លៃលើរូបគេ។ ការបញ្ចូលនូវគំនិតមួយចំនួនដែលយើងចង់ឱ្យក្មេងយល់នេះ ចាំបាច់ត្រូវប្រុងប្រយ័ត្នហើយធ្វើយ៉ាងណាឱ្យក្មេងយល់ថា យើងកំពុងតែស្របតាមអ្វីដែលគេឆ្លើយ ហើយយើងលើកទឹកចិត្តឱ្យមានការអនុវត្តនូវគំនិតនោះដោយគ្រាន់តែបញ្ចូលលក្ខណៈកាន់តែល្អៗមួយចំនួនប៉ុណ្ណោះ។ នៅពេលដែលក្មេងគិតថាមនុស្សចាស់អនុវត្តតាមការសម្រេចចិត្តរបស់គេ គេក៏នឹងផ្តល់ក្តីគោរពមកវិញ ហើយរីករាយនឹងធ្វើតាមអ្វីដែលអាណាព្យាបាលចង់ឱ្យគេធ្វើដោយក្តីពេញចិត្ត និងយល់ហេតុផល។
- ត្រូវធ្វើជាអ្នកស្តាប់ដ៏ពូកែ ក្មេងជាវ័យដែលចូលចិត្តបង្ហាញពីរឿងល្អៗដែលគេធ្វើបាន ឬរឿងអស្ចារ្យដែលគេគិតថាមិនធ្លាប់បានធ្វើពីមុនមក។ អារម្មណ៍ចង់បង្អួតស្នាដៃរបស់ក្មេង អាចធ្វើឱ្យមនុស្សធំចំណេញបានផលយ៉ាងច្រើន ព្រោះប្រសិនបើយើងអាចដាក់ចិត្ត ដាក់កាយស្តាប់គេតែបន្តិច យើងនឹងក្លាយជាអ្នកដែលគេចូលចិត្តរួចបាត់ទៅហើយ ព្រោះក្មេងនៅត្រូវការយើងដើម្បីស្តាប់រឿងអស្ចារ្យរបស់គេជាច្រើនទៀត។ ប្រសិនបើអាណាព្យាបាលឆ្លាត យើងគួរចំណាយពេលសួរនាំ និងចេះសរសើរនៅពេលដែលក្មេងបង្ហាញពីសកម្មភាពវិជ្ជមាន ឬអួតពីសមត្ថភាពរបស់គេ។ ទន្ទឹមនឹងនេះ អាណាព្យាបាលក៏អាចបង្ហាញពីផ្លូវដែលកាន់តែអស្ចារ្យ និងរីករាយដើម្បីឱ្យកូនកាន់តែខិតខំប្រឹងប្រែងដើម្បីយកវាឱ្យបាន ដូចជាលើកទឹកចិត្តឱ្យខំប្រឹងប្រែងយកពានរង្វាន់ បង្ហាញផ្លូវបង្កើតផលិតផលងាយៗ ក៏ដូចជាវិធីសាស្រ្តនិយាយឱ្យកាន់តែមានភាពចាស់ទុំជាដើមដល់កូនៗ។
- ត្រូវធ្វើជាអ្នកពូកែនិយាយរឿង ក្រៅពីការលេង ក្មេងចូលចិត្តបំផុតគឺការស្តាប់រឿងរ៉ាវដែលមនុស្សធំនិយាយ ព្រោះពួកគេចង់ធ្វើដូចមនុស្សធំ។ ចំណុចដែលអាណាព្យាបាលអាចទាក់ទាញចំណាប់អារម្មណ៍ពីក្មេង គឺយករឿងល្អៗ ឬគំរូនៃមេរៀនជីវិតដែលមានប្រយោជន៍តំណាលប្រាប់ក្មេង។ នៅពេលនោះ ក្មេងនឹងយល់ថាយើងជាអ្នកដែលធ្វើឱ្យគេរីករាយ ខណៈពេលដែលយើងកំពុងបង្រៀនគេដោយសីលវិធីល្អបំផុតមួយ៕
ម៉ៃយ៉ា កាន់តែល្បី កាន់មមាញឹក កាន់តែមានបុរសចោមស្រឡាញ់
ជាតារាសម្តែងស្រី និងជាពិធីការិនីប្រចាំនៅស្ថានីយទូរទស្សន៍ CNC ដែលទើបតែមានវ័យ20ឆ្នាំ កញ្ញា ម៉ែយ៉ា ត្រូវបានទស្សនិកជនទូទៅទទួលស្គាល់ថា តារាស្រីវ័យក្មេងមានរូបឆោមល្អ សាច់សខ្ចី មានទម្រង់មុខស្អាតជាកូនកាត់ខ្មែរ-អាល្លឺម៉ង់នោះ កំពុងតែកាក់កបយ៉ាងខ្លាំងនៅលើទីផ្សារ ទាំងការងារផ្នែកថតស្ប៉ត ការងារសម្ដែង ក៏ដូចជាមានកម្មវិធីកាន់កាប់នៅក្នុងដៃច្រើនគួរសម បើប្រៀបធៀបជាមួយតារារួមជំនាន់ជាមួយគ្នានោះ។ ជាមួយគ្នានេះ ម៉ៃយ៉ា ក៏មានការលេចឮផងដែរថា នាងកំពុងតែមានបុរសជាច្រើនកំពុងតែលង់ស្នេហ៍លើរូបនាង។
ភ្ជាប់ទៅនឹងការលើកឡើងខាងលើដែលនិយាយថា ពេលនេះ ម៉ៃយ៉ាង មានបុរសជាច្រើនកំពុងចោមស្នេហ៍ដែលក្នុងនោះក៏មានអ្នកសម្បូរធនធាន និងជាអ្នកជំនួញធំគួរសមផងដែរនោះ កញ្ញា ម៉ៃយ៉ា ហាក់ដូចជាបានឆ្លើយបែបមិនមានភាពជឿជាក់លើខ្លួនឯង និងមានភាពអៀនប្រៀនផងដែរថា “ខ្ញុំមិនទាន់ច្បាស់ពីរឿងនេះនៅឡើយទេ។ និយាយទៅនាងខ្ញុំមិនទាន់ចង់គិតគូរអីទេ ព្រោះថានៅពុំទាន់ត្រូវចិត្តឡើយចង់ផ្តោតសំខាន់លើការងារសិល្បៈបន្តឱ្យបានយូរក្រែលបន្តិចសិនចាំគិតក៏មិនទាន់ហួសពេលដែរបង!។
យ៉ាងណាក៏ដោយតារាស្រីកូនកាត់ ដែលមានឪពុកជាជនជាតិអាល្លឺម៉ង់ ម្តាយជាជនជាតិខ្មែររូបនេះបានទទួលស្គាល់ថា ហាក់មានរាសីឡើងខ្លាំងខុសពីឆ្នាំមុន ពោលគឺមួយរយៈចុងក្រោយនេះ កញ្ញាមានឱកាសចាប់យកឱកាសថតកុនទាំងរឿងដុំ និងរឿងភាគច្រើនគួរសម សឹងតែគ្មានពេលទំនេរទេ ហើយក្នុងនោះគឺទទួលបានតំណែងជាតួឯកស្រីរហូត ដូចជារឿង “ហង្សបាក់ស្លាប” ឱ្យទូរទស្សន៍ប៉ុស្តិ៍លេខ5 ស្របពេលនេះនាងក៏បានតំណែងជាពិធីការិនីនៅទូរទស្សន៍ CNC នៃកម្មវិធីកំពូលតន្ត្រីប៉ូការីស្វេតផងដែរ។ ក្រៅពីនេះនាងច្រើនលេចមុខក្នុងស្ប៉តពាណិជ្ជកម្មនានាស្ទើរតែគ្រប់ផ្នែក ជាពិសេស រឿងភាគចុងក្រោយដែលជិតចាក់បញ្ចាំងក្នុងពេលដ៏ខ្លីខាងមុខនេះនៅប៉ុស្តិ៍លេខ5 គឺរឿង “កូនក្រមុំថៅកែត្បូងពេជ្រ។ ជាមួយគ្នានេះ តារាស្រីកូនកាត់សាសន៍អាស៊ីអឺរ៉ុប កញ្ញា ម៉ៃយ៉ា ក៏បានបង្ហើបឱ្យដឹងពីភាពមមាញឹកក្នុងការថតខ្សែភាពយន្តផងដែរ បើទោះនាងជាតារាស្រីរលកក្រោយរះលើវិថីសិល្បៈបានតិចក៏ពិតមែន ប៉ុន្តែនាងស្ទើរតែគ្មានពេលសម្រាកគ្រប់គ្រាន់ផង។
គួរកត់សម្គាល់ផងដែរថា កញ្ញា ម៉ៃយ៉ា ដែលមានឈ្មោះពិតប្រាកដថា ខាហ្គឺម៉ៃយ៉ា សូរ៉ៃយ៉ាម៉ាថា ទើបតែបានចូលប្រឡូកនៅក្នុងវិស័យសម្ដែងត្រឹមរយៈពេលខ្លីប៉ុណ្ណោះ ប៉ុន្តែកេរ្តិ៍ឈ្មោះរបស់នាងត្រូវបានសាយភាយល្បីរន្ទឺ និងសុះសាយខ្លាំង បន្ទាប់ពីបានបង្ហាញរូបរាងនៅក្នុងស្ប៉តផ្សព្វផ្សាយទឹកផ្លែឈើជំនួយសម្រស់ ដែលមានតារាប្រុស លោក ខាត់ វៃហាំង ជាដៃគូសម្ដែង។ បន្ទាប់
ពីនោះ នៅមានខ្សែភាពយន្តមួយចំនួនទៀតដូចជា រឿង “អម្ពិលផ្អែម” របស់ស្ថានីយទូរទស្សន៍ PNN និងរឿងភាគមួយទៀត គឺរឿង “ភូមិខ្ញុំក្រមុំឆ្នាស” ថតឱ្យខាងផលិតកម្មទូរទស្សន៍បាយ័ន និងរឿងដុំមួយចំនួនទៀតដែលបានចាក់បញ្ចាំងតាមរោងកុននានានៅក្នុងទីក្រុងភ្នំពេញកាលពីពេលកន្លងទៅនោះ៕
ពុលអាហារ៖ មូលហេតុ អាការ និងវិធីព្យាបាល
ពុលអាហារ ឬទទួលទានអាហារមានជាតិពុលចូលទៅក្នុងខ្លួន មានន័យអំពី ការរាករូស (បន្ទោបង់ចេញមកជាទឹក) ដោយសារតែបណ្ដាលមកពីការបរិភោគអាហារ ឬទទួលទានទឹកដែលមានលាយឡំសារធាតុពុល ដែលអាចជាសារធាតុពុលកើតចេញពីមេរោគដែលមានច្រើនប្រភេទ និងសារធាតុគីមី ឬរុក្ខជាតិពុល ឬសត្វមានជាតិពុល និងច្រើនតែសង្កេតឃើញថា ក្នុងក្រុមអ្នកដែលបរិភោគជាមួយគ្នា នឹងមានអាការពុលដំណាលៗគ្នាច្រើននាក់ និងអាចមានអាការខ្លាំងខ្សោយខុសប្លែកពីគ្នាអាស្រ័យលើបុគ្គល និងបរិមាណដែលបានទទួលទានចូលទៅ។
មូលហេតុរបស់អាការពុលអាហារ
អាការពុលអាហារភាគច្រើនតែងតែបណ្ដាលមកពីការបរិភោគអាហារ ឬទទួលទានទឹកដែលលាយឡំដោយមេរោគបាក់តេរី ឬមេរោគវីរុសក្រៅពីនេះនៅអាចប្រទះឃើញមានខ្លះដែរគឺមានលាយឡំដោយពួកសត្វប៉ារ៉ាស៊ីត ដូចជា អាមីបា (Amoeba) ជាដើម ចំណែកការបរិភោគអាហារដែលមានលាយឡំដោយសារធាតុពុលផ្សេងទៀតដែលមិនមែនជាមេរោគដែលប្រទះឃើញញឹកញាប់នោះគឺ ពុលសារធាតុគីមី (ដូចជា ថ្នាំសម្លាប់សត្វល្អិត សារធាតុសំណ និងសារធាតុបារ៉តជាដើម) រុក្ខជាតិពុល ដូចជា ផ្សិតមើមក្ដួច និងសត្វដែលមានជាតិពុល ដូចជា គីង្គក់ត្រីកំពត និងអាហារសមុទ្រជាដើម។
អាការរបស់ការពុលអាហារ
មេរោគជាច្រើនប្រភេទអាចបញ្ចេញជាតិពុល (Toxin) ចេញមកលាយឡំនៅក្នុងអាហារផ្សេងៗ ហើយនៅពេលមនុស្សបរិភោគអាហារដែលប្រឡាក់ប្រឡូសដោយសារធាតុពុលទាំងនោះចូលទៅនឹងធ្វើឱ្យកើតអាការស្រដៀងៗគ្នាគឺ ចុកពោះរមួលជាដំណាក់ៗ ក្អួត (ច្រើនតែមានកម្ទេចអាហារចេញមកជាមួយ) និងរាកញឹកញាប់។ អ្នកខ្លះអាចមានគ្រុនក្ដៅខ្លួន និងអស់កម្លាំងខ្លាំងរួមជាមួយផង។ អាការទាំងអស់នេះអាចខ្លាំង ឬខ្សោយអាស្រ័យលើភាពតិច ឬច្រើនរបស់ជាតិពុលដែលទទួលទានចូលទៅ។ ជាទូទៅបើសិនជាតិចតួច មិនធ្ងន់ធ្ងរ អាការទាំងនោះនឹងបាត់ទៅវិញដោយខ្លួនឯងក្នុងរយៈពេល 24-48ម៉ោង។ ចំណែកអ្នកដែលធ្ងន់ធ្ងរ អាចនឹងមានអាការក្អួត និងរាករូសខ្លាំងក្លារហូតដល់រាងកាយខ្វះជាតិទឹក និងសារធាតុរ៉ែយ៉ាងធ្ងន់ធ្ងរបាន។
វិធីព្យាបាលអាការពុលអាហារ
ការព្យាបាល និងការមើលថែទាំខ្លួនឯងជាបឋម អ្នកជំងឺពុលអាហារគួរប្រតិបត្តិតាមការណែនាំដូចខាងក្រោមនេះ៖
- បើមានអាការចុកពោះខ្លាំងក្លា រាករូសធ្ងន់ធ្ងរ (បន្ទោបង់ចេញមកសុទ្ធតែទឹកម្ដងៗច្រើន)ក្អួតខ្លាំង (រហូតដល់ថ្នាក់ទទួលទានទឹក ទទួលទានទឹកអំបិលរ៉ែ ឬទឹកបបរលែងកើត) នៅពេលក្រោកអង្គុយហើយមានអាការវិលមុខ និងមានសភាវខ្វះជាតិទឹកធ្ងន់ធ្ងរ (បបូរមាត់ស្ងួត បំពង់កស្ងួត ភ្នែករូង បត់ជើងតូចចេញមកតិច និងជីពចរលោតញាប់) ត្រូវប្រញាប់បញ្ជូនអ្នកជំងឺទៅមន្ទីរពេទ្យជាបន្ទាន់។
- បើមិនមានអាការធ្ងន់ធ្ងរដូចខាងលើទេ ចូរឱ្យអ្នកជំងឺពុលអាហារទទួលទានទឹកអំបិលរ៉ែ ឬទឹកស្អាតឱ្យបានញឹកញាប់ ដើម្បីបំពេញជាតិទឹកដែលបាត់បង់ទៅដោយសារការក្អួត និងរាក និងទទួលទានរហូតទាល់តែទឹកមូត្រចេញមកថ្លា ឬអាការរាករូសបានធូរស្រាលឡើងវិញ។
- ហាមលេបថ្នាំដើម្បីបញ្ឈប់ការរាករូស ព្រោះមិនមានប្រយោជន៍ក្នុងការព្យាបាលនោះទេ ហើយបើប្រើប្រាស់ខុសវិធីផងនោះ អាចបង្កឱ្យកើតគ្រោះថ្នាក់កាន់តែធ្ងន់ធ្ងរបាន។
- បើមានគ្រុនក្ដៅខ្លួន ចូរឱ្យលេបថ្នាំ ប៉ារ៉ាសេតាម៉ុល ដើម្បីបញ្ចុះកម្ដៅ៕
