សង្គម និងសេដ្ឋកិច្ច - La Reine Media

តារាចម្រៀងចិន Nicholas Tse បង្ហាញពីតិចនិកធ្វើម៉ូដសក់ល្បីកាលពី18ឆ្នាំមុន

តទៅនេះគឺជាសម្រង់ព័ត៌មានចេញពីគេហទំព័រ Kenh14 នៅថ្ងៃទី22 ខែមករា ឆ្នាំ 2018 ដែលបានចេញផ្សាយថា តារាចម្រៀងចិនល្បីឈ្មោះលោក Nicholas Tse បានទម្លាយរូបភាពជាច្រើនសន្លឹកនៅលើបណ្ដាញទំនាក់ទំនងសង្គម ដែលស្ដែងឱ្យឃើញពីតិចនិកធ្វើម៉ូដសក់ល្បីរបស់លោកកាលពី18ឆ្នាំមុន ដែលកាលនោះមិនទាន់មានឧបករណ៍ច្នៃម៉ូដសក់ទំនើបៗដូចពេលបច្ចុប្បន្ននៅឡើយ ដែលធ្វើឱ្យមហាជនអ្នកគាំទ្ររូបលោក មានារភ្ញាក់ផ្អើល និងនឹកស្មានមិនដល់ទាល់តែសោះ។

តារាចម្រៀងរូបនេះបានបង្ហើបឱ្យដឹងដែរថា កាលពី18ឆ្នាំមុន មុនពេលឡើងសម្ដែងនៅលើឆាក ឬកម្មវិធីសម្ភាសនៅក្នុងស្ថានីយទូរទស្សន៍នីមួយៗម្ដងៗ លោកបានសម្រេចចិត្តយកឆ្នាំងអ៊ុតសម្លៀកបំពាក់ មកអ៊ុតសក់របស់លោកឱ្យត្រង់គ្រប់ពេល ហើយវាពិតជាមានផលលំបាកណាស់ ព្រោះកាលនោះនៅមិនទាន់មានឧបករណ៍ធ្វើម៉ូដសក់ទំនើបៗនៅឡើយទេ។ ស្របគ្នានោះដែរ មានអ្នកគាំទ្រតារាប្រុសរូបនេះជាច្រើនបានចូលទៅបញ្ចេញមតិថា «នេះមិនត្រឹមតែជារឿងដែលមិននឹកស្មានដល់នោះទេ តែវាថែមទាំងជារឿងដ៏គួរឱ្យអស់សំណើចទៀតផង តើលោកច្បាស់ជាចង់ក្លាយខ្លួនជាតារាកំប្លែងហើយមែនទេ?»។

ដើម្បីឱ្យកាន់តែជ្រាបច្បាស់បន្ថែមទៀត សូមទស្សនារូបភាពទាំងឡាយខាងក្រោមនេះ៖

January 22, 2018

ទីផ្សារដំឡូងមីឡើងថ្លៃ ប៉ុន្តែទិន្នផលធ្លាក់ចុះជាងឆ្នាំមុន

កសិករដាំដំឡូងមីនៅតាមខេត្តនានា បានសម្តែងក្តីរីករាយខណៈរដូវប្រមូលផលឆ្នាំនេះតម្លៃដំឡូងមីឡើងថ្លៃខ្ពស់ជាងឆ្នាំមុន និងមានឈ្មួញមកចាំទទួលទិញដល់ទីកន្លែងយកទៅលក់បន្តនៅប្រទេសថៃប៉ុន្តែកសិករខ្លះបានសម្តែងការសោកស្តាយដោយសារទិន្នផលធ្លាក់ចុះ ដែលបណ្ដាលមកពីកត្តាអាកាសធាតុ និងការធ្លាក់ថ្លៃកាលពីឆ្នាំមុន។

លោក ស្រ៊ន កុយ កសិករដាំដំឡូងមីនៅភូមិអូរតាភ្លាវ ឃុំអូរអណ្តូង ស្រុកសាលាក្រៅ ខេត្តប៉ៃលិនបានឱ្យដឹងថា តម្លៃដំឡូងមីក្រៀមនៅដើមឆ្នាំនេះលក់បានថ្លៃខ្ពស់ជាងឆ្នាំមុន ប៉ុន្តែទិន្នផលថយចុះខ្លាំងដោយសារមានភ្លៀងធ្លាក់ច្រើនពេក។ លោកបានបន្តថា កាលពីឆ្នាំទៅ តម្លៃដំឡូងមីក្រៀមមានតម្លៃចន្លោះពី 370រៀល ទៅ400រៀលប៉ុណ្ណោះក្នុង1គីឡូក្រាម ហើយនៅឆ្នាំនេះតម្លៃដំឡូងមីក្រៀមលក់ចេញបានថ្លៃក្នុងចន្លោះពី 600 ទៅ 640រៀលក្នុង 1គីឡូក្រាម “សម្រាប់ដំឡូងមីកាលពីឆ្នាំទៅ លក់បានក្នុងមួយគីឡូក្រាមតម្លៃ 300ជាង ទៅ400រៀល ទៅតាមដំឡូងស្ងួតល្អ ឬមិនសូវស្ងួតល្អ ហើយឆ្នាំនេះកសិករមានកម្លាំងធ្វើឡើងវិញ ដោយសារដំឡូងមីឡើងថ្លៃរហូតដល់ 640រៀលក្នុង1គីឡូក្រាម។

លោកបានបញ្ជាក់ថា ក្នុងទំហំដីចម្ការដំឡូងចំនួន 12ហិកតា លោកប្រមូលផលបានទម្ងន់ពី 60ទៅ70តោន ប៉ុន្តែមកដល់ឆ្នាំនេះនៅមិនទាន់ដកអស់នៅឡើយទេ គ្រាន់តែដឹងថា ទិន្នផលធ្លាក់ចុះខ្លាំង ខណៈដែលមានភ្លៀងធ្លាក់ជោកជាំខ្លាំងពេក បង្កឱ្យដើមដំឡូងងាប់ និងរលួយមើមអស់ជាច្រើន។ ជាមួយគ្នានេះដែរ លោក ឡាយ សុខទី កសិករដាំដំឡូងមីនៅក្នុងឃុំអូរចាប់ត្រី ស្រុកអន្លង់វែង ខេត្តឧត្តរមានជ័យ បានឱ្យដឹងថា តម្លៃដំឡូងឆ្នាំនេះពិតជាឡើងថ្លៃជាងឆ្នាំមុនមែន ដោយលក់ចេញបានពី 630រៀល ទៅ650រៀលក្នុង 1គីឡូក្រាម។ ប៉ុន្តែយ៉ាងណាក៏ដោយ មានកសិករមួយចំនួនបានបោះបង់របរដាំដំឡូងមីនេះចោលខ្លះហើយ ដោយសារតែបទពិសោធក្នុងការលក់ដំឡូងមីធ្លាក់ថ្លៃ ធ្វើឱ្យខាតបង់ច្រើនពេកកាលពីឆ្នាំមុន ដោយលក់បាន1គីឡូថ្លៃត្រឹមតែ 300 ទៅ400រៀលប៉ុណ្ណោះ បង្កឱ្យមានការខាតបង់ខ្លាំង និងអ្នកខ្លះនៅជំពាក់ប្រាក់ធនាគារសងមិនទាន់រួចផងមកទល់បច្ចុប្បន្ន ហើយដោយសារខ្លាចខាតបង់ដូចឆ្នាំមុនទៀត ទើបកសិករមួយចំនួនបានបោះបង់របរដាំដំឡូងមី ហើយងាកទៅដាំស្វាយចន្ទី និងដំណាំផ្សេងៗទៀតក្រែងបានផលចំណេញច្រើនជាង។

ងាកទៅខាងខេត្តរតនគិរីវិញ លោក ច្រឹក ពិសិដ្ឋឈ្មួញកណ្តាលទិញដំឡូងមីក្រៀមយកទៅលក់បន្តនៅប្រទេសវៀតណាម បានថ្លែងថា ដំឡូងឆ្នាំនេះពិតជាបានថ្លៃជាងឆ្នាំមុនមែន ប៉ុន្តែការប្រមូលទិញមានការធ្លាក់ចុះខ្លាំង ដោយសារកសិករមួយចំនួនធំបានបោះបង់ការដាំដុះដំឡូងមីនេះ ហើយងាកទៅដាំស្វាយចន្ទី និងដាំដំណាំកៅស៊ូវិញ ដោយសារដំណាំទាំងនេះកំពុងមានតម្រូវការនៅលើទីផ្សារ។

លោកបញ្ជាក់បន្ថែមថា “សម្រាប់នៅខេត្តរតនគិរីតម្លៃដំឡូងមីបានថ្លៃមិនខុសពីខេត្តប៉ៃលិន និងខេត្តឧត្តរមានជ័យនោះទេ គឺតម្លៃទិញចូលចន្លោះពី 630ទៅ640រៀលក្នុង1គីឡូក្រាម ហើយយកទៅលក់វិញបាន 720រៀល ទៅ730រៀលដែរក្នុង 1គីឡូក្រាមប៉ុន្តែមិនសូវទទួលបានផលចំណេញទេ ដោយសារតែវៀតណាមកាត់ភ្នែកគីឡូច្រើនពេក ជួនកាលកាត់អស់ដល់1តោនក៏មានដែរ។ លោកថា ទោះជាចំណេញតិចតួចក៏ដោយ ក៏ចេះតែដឹកទៅលក់ទៅ ប្រសើរជាងមិនមានអ្វីលក់ដែរ។

សូមជម្រាបដែរថា បើយោងតាមរបាយការណ៍ក្រសួងពាណិជ្ជកម្មបានឱ្យដឹងថា កម្ពុជាគឺជាប្រទេសដែលផលិតដំឡូងមីលំដាប់ទី8 នៅលើពិភពលោក និងលំដាប់ទី4 នៅក្នុងតំបន់។ ការនាំចេញផលិតផលដំឡូងមីរបស់កម្ពុជា(ដំឡូងមីស្រស់ ចំណិតដំឡូងមីក្រៀម និងម្សៅដំឡូងមី) បានកើនឡើងពីចំនួន 0.22លានតោន ក្នុងឆ្នាំ2012 ដល់ចំនួនជាង 3.6លានតោន ក្នុងឆ្នាំ2016 និងគិតត្រឹមតែរយៈពេល 9ខែក្នុងឆ្នាំ2017 ការនាំចេញផលិតផលដំឡូងមីរបស់កម្ពុជា សម្រេចបានចំនួនជាង 1.8លានតោន៕

January 22, 2018

ភាពយន្ដថៃល្បី Malila The Farewell Flower ឈ្នះពានរង្វាន់មហោស្រពភាពយន្ដនៅទីក្រុងប៊ូសាន

តាមរយៈសារព័ត៌មាន Mthai ដែលបានចេញផ្សាយនៅថ្ងៃទី22 ខែមករា ឆ្នាំ2018 នេះ បានឱ្យដឹងថា ការបើកបង្ហាញខ្លួនរបស់ខ្សែភាពយន្ដថៃនៅក្នុងឱកាសមហោស្រពភាពយន្ដប្រចាំតំបន់អាស៊ី នៅក្នុងទីក្រុង ប៊ូសាន ប្រទេសកូរ៉េខាងត្បូង ដែលនៅក្នុងនោះកំពូលខ្សែភាពយន្ដខ្នាតធំដ៏ល្បីល្បាញប្រចាំឆ្នាំរបស់ប្រទេសថៃ ដែលមានចំណងជើងថា “Malila The Farewell Flower” ឫ “បាយសីម្លិះលា” បានឈ្នះពានរង្វាន់ភាពយន្ដដែលល្អបំផុតប្រចាំឆ្នាំ2018នេះ។

ខ្សែភាពយន្តខ្នាតធំខាងលើនេះ ត្រូវបានដឹកនាំសម្ដែងដោយលោក នុឈី អៈនុឆា ប៊ុណយៈវ៉ាន់ថៈណៈ និងសម្ដែងដោយតារាល្បីឈ្មោះពីរដួងគឺលោក វៀរ៍ ស៊ុកុនលៈវ៉ាត់ និង អូ អនុឈីត។ ស្របគ្នានោះដែរ តារាសម្ដែងរូបស្រស់សង្ហា វៀរ៍ ស៊ុគុនលៈវ៉ាត់ បានឈ្នះពានរង្វាន់ Face of Asia Award តារាឯកភាពយន្ដអាស៊ីដែលមានអ្នកគាំទ្រចាប់អារម្មណ៍ខ្លាំងជាងគេបំផុត។ យ៉ាងណាមិញ អ្នកដឹកនាំរឿង នុឈី អៈនុឆា បានបង្ហើបប្រាប់អ្នកសារព័ត៌មានថៃថា រឿងនេះបានបរិយាយពីការរៀបចំបាយសីស្លាធម៌ ដោតក្រងជាក្បាច់ដោយផ្កាម្លិះលា ដើម្បីអន្ទងហៅព្រលឹងមនុស្សដែលខ្លួនស្រឡាញ់ឱ្យវិលត្រឡប់មកវិញ។ ភាពយន្ដនេះទៀតសោត បានដាក់បញ្ចាំងនៅក្នុងពិធីមហោស្រពភាពយន្ដជាច្រើនប្រទេស ដូចជាសិង្ហបុរី តៃវ៉ាន់ ឥណ្ឌា និងកូរ៉េខាងត្បូងផងដែរ។

លោក នុឈី អៈនុឆា បានបញ្ជាក់ផងដែរថា បើទោះបីជាខ្សែភាពយន្ដធំមួយនេះបានឆ្លុះបញ្ជាំងពីសង្គមក្រុមមនុស្សស្រឡាញ់ភេទដូចគ្នាក្ដី ក៏ប៉ុន្ដែ លោករំពឹងទុកថា លោកនឹងព្យាយាមយកខ្សែភាពយន្ដល្បីមួយនេះ ទៅដាក់បញ្ជាំងនៅក្នុងទីផ្សារភាពយន្ដក្នុងបណ្ដាប្រទេសធំៗដូចជាប្រទេស ចិន ស្វ៊ីស ទីក្រុងឡុងដ៍នៃចក្រភពអង់គ្លេស និងមានគោលបំណងទៅដណ្ដើមពានរង្វាន់នៅសហរដ្ឋអាមេរិកទៀតផង៕

សូមទស្សនាវីដេអូរឿងខាងក្រោមនេះ៖

January 22, 2018

Facebook ធ្វើកំណែទម្រង់ថ្មី ដោយផ្ដោតសំខាន់លើប្រភពព័ត៌មាន «គួរឱ្យជឿទុកចិត្តបាន»

អាមេរិក៖ សហស្ថាបនិក និងជានាយកប្រតិបត្តិក្រុមហ៊ុន Facebook លោក Mark Zuckerberg បានប្រកាសឱ្យដឹងថា Facebook នឹងធ្វើកំណែទម្រង់ថ្មីមួយទាក់ទងទៅនឹងការបង្ហោះអត្ថបទនានា ជាពិសេសនឹងធ្វើការវាយតម្លៃទៅលើអត្ថបទទាំងនោះថា «គួរឱ្យជឿទុកចិត្តបាន ឬក៏ជាព័ត៌មានមិនត្រឹមត្រូវ» ដោយការវាយតម្លៃនេះនឹងត្រូវធ្វើឡើងដោយមានការចូលរួមពីអ្នកប្រើប្រាស់។

សារព័ត៌មាន The Guardian បានចេញផ្សាយថា កន្លងមកមានព័ត៌មានជាច្រើនត្រូវបានចែកចាយតាមបណ្ដាញសង្គម Facebook ដោយព័ត៌មានួទាំងនោះ មានខ្លះជាព័ត៌មានពិត និងខ្លះទៀតជាព័ត៌មានមិនពិត ដូច្នេះហើយ ក្រុមហ៊ុន Facebook នឹងធ្វើការស្ទង់មតិទៅលើ «ប្រភពព័ត៌មាន» ដោយឱ្យអ្នកប្រើប្រាស់បញ្ជាក់ថា «ស្គាល់ ឬមិនស្គាល់» ដើម្បីងាយស្រួលបញ្ជាក់ថា ប្រភពព័ត៌មានមួយនេះគឺផ្សព្វផ្សាយនូវព័ត៌មានជាក់លាក់ និងត្រឹមត្រូវ ឬប្រភពព័ត៌មានមួយនេះ ផ្សព្វផ្សាយព័ត៌មានមិនត្រឹមត្រូវ។

លោក Mark Zuckerberg បានបញ្ជាក់បន្ថែមទៀតថា ក្រោយពីធ្វើការស្ទង់មតិរួចរាល់ហើយ ក្រុមការងារ Facebook នឹងផ្ដល់ចំណាត់ថ្នាក់សម្រាប់ប្រភពព័ត៌មានទាំងនោះ តាមរយៈទិន្នន័យដែលស្ទង់មតិបាន ដើម្បីផ្ដល់អាទិភាពក្នុងការបង្ហាញព័ត៌មាននៅក្នុង News Feed៕

January 22, 2018

Real លត់ Deportivo ចាស់ដៃ ខណៈ Barca បន្ថែមការនាំមុខ

ក្រុម Real Madrid បានវិលទៅកាន់ចំណាត់ថ្នាក់កំពូលទាំងបួនវិញនៃក្របខ័ណ្ឌ La Liga តាមរយៈការលត់ក្រុម Deportivo La Coruna យ៉ាងចាស់ដៃក្នុងលទ្ធផល 7-1 កាលពីថ្ងៃអាទិត្យ ខណៈដែល Cristiano Ronaldo បានបញ្ចប់ការមិនអាចរកបានគ្រាប់បាល់ក្នុងការប្រកួតក្របខ័ណ្ឌលីក ជាមួយនឹងការស៊ុតបាល់បញ្ចូលទី 2គ្រាប់។ ប៉ុន្តែ Barcelona នៅតែបន្ថែមការនាំមុខរបស់ពួកគេ រហូតដល់ទៅ19ពិន្ទុ ពីលើក្រុម Real ខណៈដែល Lionel Messi និង Luis Suarez បានស៊ុតបាល់បញ្ចូលទី 2គ្រាប់ដូចគ្នា ក្នុងពេលយកឈ្នះលើក្រុម Real Betis 5-។

Ronaldo បានស៊ុតបាល់បញ្ចូលទីត្រឹមតែ4គ្រាប់ប៉ុណ្ណោះក្នុងការប្រកួតលីក មុនពេលឈានទៅកាន់ការប្រកួតកាលពីថ្ងៃអាទិត្យជាមួយនឹងក្រុម Deportivo ប៉ុន្តែតារាឆ្នើមអន្តរជាតិព័រទុយហ្គាល់រូបនេះ បានបន្ថែមគ្រាប់បាល់ទី5 និងទី 6សម្រាប់ Real ខណៈដែលពួកគេបានវិលទៅឈរនៅពីលើក្រុម Villarreal ក្នុងចំណាត់ថ្នាក់ដែលត្រូវឈ្នះកៅអីទៅលេងក្នុងក្របខ័ណ្ឌ Champions League។

Villarreal បានឡើងទៅឈរក្នុងចំណាត់ថ្នាក់លេខ4ជាបណ្តោះអាសន្ន ក្នុងពេលយកឈ្នះលើក្រុម Levante 2-1 កាលពីថ្ងៃសៅរ៍ ក្រោយពីបានផ្តួលក្រុម Real នាកីឡដ្ឋាន Bernabeu ជាលើកទី1 កាលពីសប្តាហ៍មុន។ Gareth Bale និង Nacho ក៏បានរកគ្រាប់បាល់បញ្ចូលទី 2គ្រាប់ផងដែរ ក្នុងតង់នីមួយៗ ហើយ Luka Modric រកបានគ្រាប់បាល់យ៉ាងល្អនៅនាទីទី68 ខណៈដែល Real បានវាយបកពីការដេញតាមពីក្រោយ1គ្រាប់ ដើម្បីកត់ត្រាជ័យជម្នះដ៏ធំមួយ ក៏ដូចជាកាត់បន្ថយសម្ពាធលើលោកគ្រូបង្វឹក Zinedine Zidane ផងដែរ៕

ប្រភពពី៖ sport24

January 22, 2018

ដីនៅជិតតំបន់អភិវឌ្ឍន៍ព្រលានយន្តហោះខេត្តកណ្តាលកំពុងឡើងថ្លៃ

បន្ទាប់ពីរដ្ឋាភិបាលប្រកាសសាងសង់ព្រលានយន្តហោះថ្មីលើផ្ទៃដីទំហំ 2,600 ហិកតា ស្ថិតនៅក្នុងភូមិសាស្ត្រក្រុងតាខ្មៅជាប់នឹងស្រុកកណ្តាលស្ទឹង ខេត្តកណ្តាលរួចមក បានធ្វើឱ្យតម្លៃដីនៅទីនោះហក់ឡើងខ្ពស់កប់ពពក និងមានឈ្មួញកំពុងសម្រុកចុះទិញយ៉ាងមមាញឹក។

យោងតាមលិខិតរបស់ទីស្ដីការគណៈរដ្ឋមន្ដ្រីផ្ញើទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន និងឯកឧត្តម ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលដើម្បីសុំគោលការណ៍បង្កើតក្រុមហ៊ុន “ខេមបូឌា អ៊ែរផត អុីនវេសមិន” បានឱ្យដឹងថា ព្រលានយន្តហោះថ្មីនេះត្រូវចំណាយទុនវិនិយោគរហូតដល់ទៅ1,500លានដុល្លារអាមេរិក ក្នុងនោះទឹកប្រាក់ 1,100លានដុល្លារជាកម្ចីពីធនាគារបរទេសនិង280លានដុល្លារជារបស់ក្រុម OCIC របស់លោកឧកញ៉ា ពុង ឃាវសែ ហើយដើមទុនចុះបញ្ជីមានរហូតដល់ 120លានដុល្លារអាមេរិក។

កាលពីសប្តាហ៍មុនលោកឧកញ៉ា ពុង ឃាវសែ និងក្រុមហ៊ុនចិនដែលជាដៃគូវិនិយោគនោះ បានចុះហត្ថលេខារួចរាល់ហើយ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានិងលោក លី ខឺឈាង នាយករដ្ឋមន្ត្រីចិននាវិមានរដ្ឋាភិបាល ដែលព្រឹត្តិការណ៍នេះបានជំរុញឱ្យដីនៅតំបន់នោះកំពុងមានតម្លៃស្ទុះហក់ឡើងយ៉ាងខ្ពស់ដ៏ពុំគួរឱ្យជឿ។

លោក ប៉ុល សិទ្ធី ឈ្មួញកណ្តាលទិញ-លក់ដីនៅក្នុងខេត្តកណ្តាលមានប្រសាសន៍ថា កន្លងមកដីនៅតំបន់នោះមានតម្លៃត្រឹមតែ 2ទៅ3សេនដុល្លារ ប៉ុណ្ណោះក្នុងមួយម៉ែត្រការ៉េ និងមិនមានឈ្មួញណាទិញផង ប៉ុន្តែមកដល់ពេលនេះដីទាំងនោះឡើងថ្លៃខ្ពស់ហួសពីការស្មាន ដោយទីតាំងខ្លះ1ម៉ែត្រការ៉េតម្លៃ 5ដុល្លារ កន្លែងខ្លះទៀតឡើងដល់ 10ដុល្លាររហូតដល់ 60ដុល្លារក៏មាន ទៅតាមទីតាំងផ្សេងៗដែលធ្វើឱ្យដីឡើងថ្លៃខ្ពស់ចាប់ពី 1ហិកតាតម្លៃ 2ពាន់ដុល្លារឡើងដល់ 10ម៉ឺនដុល្លារ ឬ60ម៉ឺនដុល្លារក៏មានដែរ។

ដោយឡែកលោក លឹម ច័ន្ទសុភី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីបានមានប្រសាសន៍ទទួលស្គាល់ថា តម្លៃដីនៅទីនោះពិតជាឡើងថ្លៃប្រាកដមែន ដោយកន្លងមកដីនៅផ្នែកខាងក្រោម(ដីបាតបឹង)ដែលមានតម្លៃត្រឹម 5ដុល្លារ ឬ6ដុល្លារនោះ បច្ចុប្បន្នឡើងដល់ជាង10ដុល្លារ ហើយថា តម្លៃដីផ្នែកខាងលើថ្លៃ 7 ឬ8ដុល្លារ ឥឡូវឡើងដល់ 60ដុល្លារ ទៅ70ដុល្លារក៏មានដែរ។ ទោះជាយ៉ាងនេះក្តី លោកអំពាវនាវឱ្យអ្នកទិញមានការប្រុងប្រយ័ត្នផងដោយមុននឹងទិញត្រូវពិចារណាឱ្យបានច្បាស់លាស់ ចៀសវាងការខាតបង់ ព្រោះថា នៅជិតព្រលានយន្តហោះមានទាំងគុណសម្បត្តិ និងគុណវិបត្តិដូចគ្នា។ គុណសម្បត្តិគឺនៅត្រង់ថា តំបន់នោះនឹងក្លាយទៅជាទីប្រជុំជន អាចប្រកបរបរលក់ដូរ ឬធ្វើផ្ទះសំណាក់ទទួលភ្ញៀវបាន ចំណែកគុណវិបត្តិវិញគឺមិនអាចសង់ផ្ទះខ្ពស់បានទេ និងសំឡេងរំខានក៏មានច្រើនដែរ។

គួរបញ្ជាក់ថា ឆ្លើយតបនឹងកំណើនភ្ញៀវទេសចរនិងវិនិយោគិនដែលមានចំនួនកាន់តែច្រើនឡើងនោះ រដ្ឋាភិបាលបានប្រកាសអំពីគ្រោងសាងសង់ព្រលានយន្តហោះភ្នំពេញថ្មីនេះ ហើយរាជរដ្ឋាភិបាលក៏នឹងធ្វើការសាងសង់ព្រលានយន្តហោះថ្មីនៅក្នុងខេត្តសៀមរាប និងខេត្តកោះកុងផងដែរ។ ព្រលានយន្តហោះអន្តរជាតិសៀមរាប-អង្គរថ្មីត្រូវសាងសង់នៅឆ្នាំ2018នេះដោយក្រុមហ៊ុនចិន YUNAN DEVELOPMENT GROUP ដោយគ្រោងវិនិយោគលើទឹកប្រាក់ 900លានដុល្លារអាមេរិកដែលមានកុងត្រារយៈពេល 55ឆ្នាំស្ថិតក្នុងស្រុកសូត្រនិគម លើផ្ទៃដី 700ហិកតា។

ដោយឡែកសម្រាប់ព្រលានយន្ដហោះថ្មីមួយទៀតដែលមានទីតាំងនៅខេត្តកោះកុងក៏នឹងត្រូវសាងសង់នៅលើផ្ទៃដីប្រមាណជា 750ហិកតាផងដែរដែលស្ថិតនៅក្នុងស្រុកបទុមសាគរ ខេត្តកោះកុងដែលវិនិយោគដោយក្រុមហ៊ុនចិនឈ្មោះថា Union Development Group ដែលនឹងវិនិយោគលើទឹកប្រាក់ប្រមាណជា 350លានដុល្លារអាមេរិក។

លោក ស៊ិន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិលមានប្រសាសន៍ថា ព្រលានយន្តហោះនេះនឹងមានទំហំជាង 700ហិកតា ប្រហាក់ប្រហែលគ្នានឹងព្រលានយន្តហោះអន្តរជាតិខេត្តសៀមរាបថ្មីដែរ ចំណែកផ្ទៃដីដែលនៅសល់គឺជាទីតាំងសម្រាប់សាងសង់មជ្ឈមណ្ឌលពាណិជ្ជកម្ម និងលំនៅដ្ឋាននានា ព្រោះការវិនិយោគព្រលានយន្តហោះមិនអាចរកផលចំណេញបានទេ គឺមានតែការរៀបចំសេវាកម្ម និងមជ្ឈមណ្ឌលពាណិជ្ជកម្មគាំទ្របន្ថែម ទើបអ្នកវិនិយោគអាចរកផលចំណេញបានហើយគម្រោងវិនិយោគនេះមានឈ្មោះថា Airport City ជាគម្រោងវិនិយោគចម្រុះដែលមានទាំងព្រលានយន្តហោះ និងមជ្ឈមណ្ឌលពាណិជ្ជកម្ម។

សូមបញ្ជាក់ផងដែរថា ទីតាំងសាងសង់ព្រលានយន្តហោះថ្មីនេះស្ថិតនៅតាមបណ្តោយផ្លូវជាតិលេខ 21បេ ជាតំបន់វាលបឹងដ៏ធំមួយដែលមានឈ្មោះថា បឹងរៀន ស្ថិតក្នុងរង្វង់ផ្លូវក្រវាត់ក្រុងទី3 បើគិតពីកន្ទុយផ្លូវ60ម៉ែត្រ ឬផ្លូវសម្តេចតេជោហ៊ុន សែន គឺទីតាំងព្រលាននេះមានចម្ងាយប្រមាណ 9គីឡូម៉ែត្រចេញពីកន្ទុយផ្លួវនេះឆ្ពោះទៅមុខ។ ទីតាំងព្រលានយន្តហោះនេះជាផ្ទៃបឹង ដែលនឹងត្រូវបូមខ្សាច់បំពេញនាពេលខាងមុខនេះ៕

January 22, 2018

ភាគបញ្ចប់នៃកំពូលភាពយន្ដ Maze Runner: The Death Cure ធ្វើឱ្យទស្សនិកជនអត់ទ្រាំមិនទស្សនាមិនបាន

តាមរយៈសារព័ត៌មាន Khaosod នៅថ្ងៃទី22 ខែមករា ឆ្នាំ 2018 បានឱ្យដឹងថា ភាគបញ្ចប់នៃកំពូលខ្សែភាពយន្ដបែបវិទ្យាសាស្ត្រ “Maze Runner: The Death Cure” បានធ្វើឱ្យកក្រើកទីផ្សារភាពយន្ដនៅក្នុងឆ្នាំ 2018 នេះ ដែលមានមហាជនរង់ចាំទស្សនាយ៉ាងអន្ទះសា។

ភាគបញ្ចប់នៃ The Maze Runner ត្រូវបាននិទានដោយមេដឹកនាំក្រុម Thomas ដែលបានដឹកនាំក្រុម Gladers ដែលបានរត់គេចចូលទៅក្នុងបេសកកម្មគ្រោះថ្នាក់បំផុតចុងក្រោយមួយ ដើម្បីជួយមិត្តភ័ក្តិ។ ពួកគេត្រូវលួចចូលក្នុងទីក្រុងចុងក្រោយ ជាទីតាំងស្ថិតក្រោមការគ្រប់គ្រងរបស់អង្គការ WCKD ដែលអាចប្រែក្លាយជាព្រៃវង្វេងដ៏ស្លាប់រស់មួយ។ អ្នកដែលអាចនៅរស់រានមានជីវិតចេញមកវិញបាន គឺជាអ្នកដែលបានទទួលចម្លើយដែលក្រុម Gladers តែងសួរ ចាប់ពីពេលពួកគេចូលក្នុងព្រៃវង្វេងដំបូង។

គួរបញ្ជាក់ផងដែរថា ភាគចុងក្រោយនៃកំពូលខ្សែភាពយន្ដ Maze Runner: The Death Cure មានដាក់បញ្ចាំងនៅលើផ្ទាំងសំពត់សនៅក្នុងប្រទេសកម្ពុជា នាថ្ងៃទី23 ខែមករា ឆ្នាំ2018 នេះហើយ ដែលភាគបញ្ជប់នេះ មានការចូលរួមសម្ដែងដោយកំពូលតារាល្បីៗដូចជា Dylan O’Brien ( សម្ដែងជា Thomas ) Thomas Brodie Ki Hong Lee Kaya Scodelario Will Poulter និងតារាសម្ដែងជើងចាស់ល្បីៗជាច្រើនរូបទៀតផងដែរ៕

January 22, 2018

Mkhitaryan ព្រមទៅ Arsenal ជាថ្នូរនឹងការចាកចេញរបស់ Sanchez ទៅ Man Utd

ខ្សែបម្រើ Henrikh Mkhitaryan របស់ក្លិប Manchester United បានយល់ព្រមចូលរួមជាមួយនឹងក្លិប Arsenal ខណៈដែល Alexis Sanchez នឹងផ្ទេរក្នុងទិសដៅផ្ទុយគ្នា ជាការដោះដូរគ្នាភ្លាមៗ ដោយមិនពាក់ព័ន្ធនឹងទឹកប្រាក់ឡើយ។

បើយោងតាមការចេញផ្សាយរបស់កាសែត The Guardian ក្លិប Man United បានដាក់តម្លៃខ្លួនលើ Mkhitaryan ចំនួន 35លានផោន (ស្មើនឹង 45លានដុល្លារអាមេរិក) ដែលស្មើនឹងតម្លៃខ្លួនដែលក្លិប Arsenal ទាមទារសម្រាប់ការលក់ Sanchez ដែរ។ ខ្សែបម្រើអន្តរជាតិអាមេនី Mkhitaryan វ័យ 28ឆ្នាំ បានទទួលការពិនិត្យសុខភាព កាលពីថ្ងៃអាទិត្យ ខណៈដែលតារាឆ្នើមអន្តរជាតិស៊ីលី Sanchez នឹងបំពេញការផ្ទេររបស់គេនៅថ្ងៃចន្ទនេះ។

ទោះបីជាយ៉ាងណា ទំហំនៃកិច្ចសន្យារបស់ Mkhitaryan និងប្រាក់ខែរបស់គេ ត្រូវបានបិទជិត។ លោក Arsene Wenger គ្រូបង្វឹករបស់ Arsenal បានបញ្ជាក់កាលពីពេលមុននេះថា Sanchez នឹងចូលរួមជាមួយនឹង Man United លុះត្រាតែ Mkhitaryan យល់ព្រមផ្ទេរមកកាន់ Arsenal។ Sanchez បានអវត្តមានក្នុងពេលក្រុម Arsenal យកឈ្នះលើក្រុម Crystal Palace ក្នុងលទ្ធផល 4-1 កាលពីថ្ងៃសៅរ៍ ដោយសារតែរូបគេបានធ្វើដំណើរទៅកាន់ទីក្រុង Manchester។

លោក Wenger បានបញ្ជាក់ថា៖ «រូបគេមិនបានចូលលេងទេ ពីព្រោះអ្នកមិនអាចធ្វើដំណើរទៅកាន់ភាគខាងជើងផង និងលេងបាល់ទាត់ផងក្នុងពេលតែមួយបានឡើយ»។

ស្របពេលជាមួយគ្នានេះ លោក Jose Mourinho អ្នកចាត់ការទូទៅរបស់ Man Utd បានបញ្ជាក់ថា ការព្រមព្រៀងគ្នាមួយក្នុងការចុះហត្ថលេខាជាមួយនឹង Sanchez កំពុងតែស្ថិតយ៉ាងប្រកៀក ក្រោយពីក្រុមរបស់លោកទទួលជ័យជម្នះ 1-០ លើក្រុម Burnley កាលពីថ្ងៃសៅរ៍៕

ប្រភពពី៖ BBC

January 22, 2018

ទីក្រុងទាំង5 ដែលអ្នកគួរតែទៅកម្សាន្តនារដូវរងា

រដូវរងាបានមកដល់ហើយ ជាមួយភាពរ៉ូមែនទិក ថែមទាំងមិនមានទឹកភ្លៀង និងមិនក្ដៅផងដែរ។ ហើយអ្វីដែលកាន់តែពិសេសជាងនេះទៅទៀតនោះ គឺការបញ្ចេញម៉ូដសម្លៀកបំពាក់រងាដែលបានកប់ទុកនៅក្នុងទូដ៏សែនស្រស់ស្អាតរបស់អ្នកនៅក្នុងដំណើរកម្សាន្តយ៉ាងសប្បាយរីករាយ។ ដូច្នេះហើយថ្ងៃនេះទស្សនាវដ្តី ឡារ៉ែន សូមនាំអារម្មណ៍របស់អ្នកទៅដើរកម្សាន្ដនៅទីក្រុងមួយចំនួននៅក្នុងទ្វីបអឺរ៉ុប ដែលធានាថាជាទីក្រុងដែលកំពុងពេញនិយម និងស្រស់ស្អាតនាសិសិរដូវនេះ។

1/ ទីក្រុង Prague នៃសាធារណៈរដ្ឋឆេក

ដោយទីក្រុងនេះគឺជាលំដាប់ទីក្រុងទីមួយដែលមានសោភណ្ឌភាពស្រស់ស្អាតដាច់គេនៅក្នុងទ្វីបអឺរ៉ុប ហើយក៏ជាទីក្រុងដ៏សែនរ៉ូមែនទិកជាងគេនៅលើពិភពលោក ព្រមទាំងជាទីក្រុងមួយដែលគួរឱ្យចង់ធ្វើដំណើរកម្សាន្ដពេញមួយឆ្នាំថែមទៀតផង ព្រោះថា នៅក្នុងទីក្រុងនេះមានស្ថានីយ៍ស្ថាបត្យកម្មវ័យចំណាស់ជាច្រើនកន្លែង រហូតទទួលបានការប្រសិទ្ធនាមទីក្រុងនេះថា ជាទីក្រុងអច្ឆរិយនៃប្រាសាទមួយរយដំណាក់ និងជាទីក្រុងអរិយធម៌អស្ចារ្យលើពិភព-លោក។

2/ ទីក្រុង Salzburg ប្រទេសអូស្ត្រាលី

ឈ្មោះទីក្រុងនេះមានអត្ថន័យសំដៅទៅដល់ឈ្មោះរបស់ប្រាសាទក្រុងអំបិល។ ទីក្រុង Salzburg មិនមែនត្រឹមតែមានកេរ្តិ៍ឈ្មោះល្បីល្បាញដោយសារជាក្រុងអំបិលធំជាងគេតែប៉ុណ្ណោះទេ ក៏ប៉ុន្ដែវាគឺជាទីក្រុងដែលមានតន្ត្រីករ និងកវីនិពន្ធល្បីឈ្មោះបំផុតនៅលើពិភពលោកដូចជា Wolfgang Amadeus Mozart ជាដើម។ ប្រសិនបើអ្នកចង់បានបទពិសោធនៃជីវិតល្អប្លែក ដែលមិនធ្លាប់ជួបប្រទះកន្លងមកនារដូវរងានេះ សូមបញ្ជាក់ផងទៅចុះថា ទីក្រុងអំបិលមួយនេះ ពិតជាមិនធ្វើឱ្យអ្នកខកបំណងឡើយ ជាពិសេសកម្រាលហិមៈដ៏សក្បុសក្រាលពាសពេញទីក្រុងទាំងមូលផងដែរ។

3/ ទីក្រុង Amsterdam ប្រទេស Netherlands

គឺជាដែនដីដែលមិនមែនមានត្រឹមតែផ្កាលីលីស្រុក និងកង្ហារខ្យល់ធំតែប៉ុណ្ណោះទេ ក៏ប៉ុន្ដែជាទីក្រុងនៃទ្វីបអឺរ៉ុបមួយដ៏សែនស្រស់ស្អាត និងគួរឱ្យទាក់ទាញចង់រស់នៅខ្លាំងបំផុត។ នៅក្នុងទីក្រុងនេះមានកន្លែងធម្មជាតិស្រស់ត្រកាលហើយមនោរម្យស្រស់ស្អាតមួយកន្លែងដែលបានទាក់យកភ្ញៀវទេសចរជាតិ និងអន្តរជាតិយ៉ាងច្រើនកុះករឱ្យមកកាន់ទីក្រុងនៃស្ថាបត្យកម្ម ក្បូរក្បាច់រចនាបែបសិល្បៈដែលល្អដាច់គេនៅលើពិភពលោក ហើយមនុស្សជាច្រើនណាស់ ដែលស្រមៃចង់មកឃើញទីក្រុងមួយនេះ ក្នុងមួយជីវិតឱ្យបានម្ដងផងដែរ។ ក្រុង Amsterdam គឺជាទីក្រុងរីករាយក្អាកក្អាយពេញមួយឆ្នាំ ក៏ប៉ុន្ដែបើអ្នកចង់ដើរឱ្យសព្វជុំវិញទីក្រុងនេះ លុះត្រាតែអ្នកចំណាយពេលអស់មួយខែទើបសព្វគ្រប់កន្លែងកម្សាន្តនៅក្នុងទីក្រុងដ៏ប្រណីតនេះ។

4/ ទីក្រុង Berlin ប្រទេសអាល្លឺម៉ង់

គឺជាទីក្រុងដែលល្អបំផុតនៅក្នុងថ្ងៃបុណ្យគ្រិស្តម៉ាសព្រោះទីក្រុងនេះ គឺជាដើមកំណើតនៃបុណ្យគ្រិស្តម៉ាសដែលមានអាយុកាលរាប់រយរាប់ពាន់ឆ្នាំមកហើយ ដូច្នេះហើយបានជាភ្ញៀវទេសចរនឹងបានឃើញរូបភាពដ៏ស្រស់ស្អាត និងសប្បាយរីករាយជាមួយនឹងវត្ថុអនុស្សារីយ៍ ទំនិញតូចធំ ដែលបានតាំងបង្ហាញលក់នារដូវកាលបុណ្យណូអែលនេះ។ គេសង្កេតឃើញថា មានភ្ញៀវទេសចរជាច្រើនបានសម្រុកធ្វើដំណើរកម្សាន្ដមកកាន់ទីក្រុង Berlin នៅរដូវធ្លាក់ព្រិលខ្លាំងណាស់ ព្រោះពួកគេបានកម្សាន្ដសប្បាយជាមួយប្រជាជននៅក្នុងតំបន់ ដោយការទទួលកាដូពិសេសពីលោកតា សេនតាឃ្លស់ និងចូលរួមពិធីបុណ្យគ្រិស្តម៉ាសយ៉ាងរីករាយនៅទីនេះ។ មានមនុស្សជាច្រើននិយាយថា Gendarmen Marketគឺជាកន្លែងដែលលក់វត្ថុអនុស្សារីយ៍ និងអីវ៉ាន់សម្រាប់ពិធីបុណ្យគ្រិស្តម៉ាសធំជាងគេនៅលើពិភពលោកនេះ ហើយក៏ជាទីកន្លែងដែលមានភាពស៊ីវីល័យបំផុតផងដែរ។

5/ ទីក្រុងប៉ារីស ប្រទេសបារាំង

គឺជាទីក្រុងលំដាប់មួយសម្រាប់ភ្ញៀវទេសចរនៅលើពិភពលោក។ ទីក្រុងនេះពោរពេញទៅដោយស្ថានីយ៍ប្រវត្តិសាស្ត្រសំខាន់ៗ ស្ថានីយ៍បុរាណ និងវត្ថុសិល្បៈបុរាណដែលមានតម្លៃដែលមិនអាចកាត់ថ្លៃបាន។ ម្យ៉ាងវិញទៀត ទីក្រុងនេះមានជំនាញខាងផ្នែករចនាម៉ូដសម្លៀកបំពាក់ ទឹកអប់ និងអាហារ ដែលមានឈ្មោះល្បីល្បាញពាសពេញសាកលលោក ទើបជាមូលហេតុដែលអាចទាក់ទាញភ្ញៀវទេសចរឱ្យមកកម្សាន្ដនៅទីនេះជារៀងរាល់ឆ្នាំ៕

January 22, 2018

ផ្លែឈើ 8ប្រភេទ ជួយឱ្យនារីៗមានរូបរាងស្វែលស្អាត

នារីៗណាដែលប្រាថ្នាចង់មានរូបរាងកាយស្វែល ស្អាតសមសួន ច្រើនតែជ្រើសរើសទទួលទានផ្លែឈើជាអាហារពេលទំនេរ ឬអ្នកខ្លះទទួលទានផ្លែឈើជំនួសអាហារពេលចម្បងៗម្ដងម្កាលក៏មានដែរទាំងអស់នេះគឺដើម្បីឱ្យតួលេខនៅលើជញ្ជីងថ្លឹងទម្ងន់ខ្លួនបានថយចុះសមតាមបំណងប្រាថ្នា ប៉ុន្តែ…សួរថា តើត្រូវជ្រើសរើសទទួលទានផ្លែឈើមួយណាល្អទៅ ទើបវាជួយបញ្ចុះភាពធាត់បានបែបស្រួលៗ ថែមទាំងឆ្អែតពោះទៀតផងនោះ?

ថ្ងៃនេះ យើងមានផ្លែឈើ8ប្រភេទដែលនឹងជួយឱ្យនារីៗយើងបញ្ចុះភាពធាត់របស់រាងកាយបានយ៉ាងងាយស្រួលមកជម្រាប ជូនដូចតទៅ៖

1/ ផ្លែប៉ោម

ផ្លែឈើពណ៌ក្រហម លឿង និងបៃតងនេះ អាចជួយនារីៗយើងឱ្យបញ្ចុះភាពធាត់បានយ៉ាងសប្បាយៗ ព្រោះផ្លែប៉ោមមានឈ្មោះល្បីល្បាញថា ជាស្ដេចរបស់ផ្លែឈើសម្រកទម្ងន់ ដោយសារតែផ្លែប៉ោមមានសារធាតុកាកសរសៃអាហារ ឬហ្វៃប៊ើរយ៉ាងច្រើន។ នៅពេលទទួលទានចូលទៅហើយ នឹងជួយឱ្យយើងមានអារម្មណ៍ឆ្អែតពោះបានយូរ ព្រោះជាតិស្ករ ហ្វ្រុកតូស នៅក្នុងផ្លែប៉ោមនឹងបំលែងរូបទៅជាថាមពលយ៉ាងសន្សឹមៗ ជួយឱ្យរាងកាយមិនមានអារម្មណ៍ថាឃ្លាន។

ក្រោពីនេះ ផ្លែប៉ោមនៅផ្ដល់ថាមពលត្រឹមតែ 59កាឡូរីប៉ុណ្ណោះ ទើបមិនធ្វើឱ្យធាត់ ថែមទាំងមានវីតាមីន សារធាតុរ៉ែ ដែលមានប្រយោជន៍ដល់រាងកាយជាច្រើនទៀតផង ជាពិសេស “ផេកទីន” ដែលមានគុណសម្បត្តិបំប៉ោងខ្លួនបានច្រើនទើបវាទៅបង្កើនកាកសរសៃក្នុងអាហារធ្វើឱ្យប្រព័ន្ធបន្ទោបង់ដំណើរការយ៉ាងប្រក្រតី ជួយការពារជំងឺមហារីកពោះវៀនធំ ជួយចាប់កូលេស្តេរ៉ូល និងជួយកម្ចាត់សារធាតុពុលចេញពីរាងកាយបានទៀតផង។

2/ ផ្លែត្របែក

កំពូលផ្លែឈើដែលពេញប្រៀបទៅដោយវីតាមីនមួយនេះ ជួយឱ្យលោកអ្នកអាចបញ្ចុះភាពធាត់បានយ៉ាងមិនពិបាកឡើយ ព្រោះផ្លែត្របែកជាផ្លែឈើដែលផ្ដល់កម្លាំងថាមពលទាបថែមទាំងមានរសជាតិឆ្ងាញ់ ទំពាជក់មាត់ទៀតផង ទើបស័ក្តិសមជាមួយនារីៗយើងដែលចូលចិត្តញ៉ាំនេះញ៉ាំនោះជារឿយៗ ដែលក្រៅពីនឹងជួយបញ្ចុះភាពធាត់បានហើយ វីតាមីន C នៅក្នុងផ្លែត្របែកថែមទាំងជួយសាងខូលឡាជេន ធ្វើឱ្យស្បែក និងសាច់របស់អ្នកឡើងតឹង ភ្លឺរលោង គ្មានសន្លាកស្នាមទៀតផង។

ដូច្នេះ បើសិនឃ្លាននៅពេលក្រោយៗទៀត កុំភ្លេចស្រវារកផ្លែត្របែកមកទទួលទានជំនួសនំផ្សេងៗណា៎… តែសូមផ្ដាំផងថា ទទួលទានតែផ្លែត្របែកមួយមុខគត់ទេណា៎ កុំច្រឡំភ្លេចខ្លួនទៅជ្រលក់ជាមួយអំបិលម្ទេសស្ករឱ្យសោះ ព្រោះអាចនឹងធ្វើឱ្យធាត់បាន។

3/ ផ្លែឪឡឹក

ឪឡឹក ផ្លែធំៗ រសជាតិផ្អែមៗ មិនបានធ្វើឱ្យលោកអ្នកធាត់ដោយប្រការណាមួយឡើយ ព្រោះសាច់ផ្លែឪឡឹកមួយចាន ផ្ដល់ថាមពលត្រឹមតែ50កាឡូរីប៉ុណ្ណោះ ថែមទាំងផ្ដល់ជាតិខ្លាញ់តិចបំផុត និងសម្បូរទៅដោយជាតិទឹកច្រើនដល់ទៅ93% នៃចំណែកផ្សំទាំងអស់ ធ្វើឱ្យអ្នកមានអារម្មណ៍ឆាប់ឆ្អែត ដូច្នេះមិនចាំបាច់ភ័យខ្លាចថា ផ្លែឪឡឹកនឹងធ្វើឱ្យនារីៗយើងធាត់នោះទេ។ ផ្ទុយទៅវិញ បើទទួលទានផ្លែឪឡឹកជំនួសអាហារពេលល្ងាចផង ក៏អាចជួយបញ្ចុះភាពធាត់បានយ៉ាងងាយផងដែរ តែគួរទទួលទានឱ្យសមល្មម មិនច្រើនជ្រុលពេក មិនដូច្នោះទេ ពោះនឹងកូររមួល ថែមទាំងត្រូវចូលបន្ទប់ទឹកបត់ជើងតូចញឹកញាប់ទៀតផង។

4/ ផ្លែក្រូច

នារីៗជាច្រើននាក់ ច្រើនតែកេះសរសៃសម្បកក្រូចចេញពីសាច់ក្រូចរហូតអស់រលីង ដើម្បីឱ្យងាយស្រួលទទួលទាន តែអ្នកដឹងទេថា អ្នកកំពុងតែបោះរបស់ល្អចោលហើយ ព្រោះកាកសរសៃហ្នឹងហើយដែលនឹងជួយគ្រប់គ្រងទម្ងន់ខ្លួនឱ្យនារីៗយើងនោះ ដោយកាកសរសៃនេះនឹងជួយធ្វើឱ្យមានអារម្មណ៍ឆាប់ឆ្អែតពោះ និងជួយធ្វើឱ្យបន្ទោបង់បានស្រួល។ យ៉ាងណាក៏ដោយ ក្រូចជាផ្លែឈើដែលផ្ដល់កម្លាំងថាមពលរាងខ្ពស់បន្តិច បើធៀបជាមួយផ្លែឈើបញ្ចុះភាពធាត់ប្រភេទផ្សេងទៀត ដូច្នេះគួរទទួលទានក្នុងបរិមាណល្មមសមរម្យបានហើយ។

5/ ផ្លែល្ហុង

ល្ហុង ជាផ្លែឈើដែលជួយបណ្ដេញសារធាតុពុល និងកាកសំណល់ចេញពីរាងកាយ ថែមទាំងជួយកម្ចាត់ជាតិខ្លាញ់ផ្សេងៗនៅខាងក្នុងរាងកាយបានទៀតផង។ ផ្លែល្ហុងមាន អង់ហ្ស៊ីមប៉ាប៉េន ដែលនឹងជួយរំលាយប្រូតេអីុន និងរំលាយអាហារ ទើបវាជួយបញ្ចុះទម្ងន់បានមួយផ្នែកដែរ។ ចំណែកអ្នកណាដែលចង់មានស្បែក និងសាច់ស្អាតវិញ ផ្លែល្ហុងក៏ជាជម្រើសមួយដែលគួរឱ្យចាប់អារម្មណ៍ផងដែរ ព្រោះល្ហុងមានវីតាមីន C និងបេតាឃែរ៉ូធីនខ្ពស់ ទើបវាជួយបំប៉នស្បែកបានយ៉ាងល្អ។

6/ ផ្លែស្រកានាគ

ស្រកានាគ ជាផ្លែឈើដែលជួយឱ្យលោកអ្នកឆ្អែតពោះបានយ៉ាងងាយ មិនចាញ់ផ្លែឈើប្រភេទផ្សេងទៀតឡើយ ព្រោះផ្លែស្រកានាគមានកាកសរសៃខ្ពស់ និងកាឡូរីទាប ថែមទាំងមានរសជាតិផ្អែមឆ្ងាញ់ទៀតផង ដូច្នេះហើយទើបមនុស្សជាច្រើនជ្រើសរើសទទួលទានផ្លែស្រកានាគធ្វើជាអាហារពេលល្ងាច ឬទទួលទានរួមជាមួយញាំបន្លែដទៃទៀត ដើម្បីបញ្ចុះទម្ងន់ ដោយមិនបាច់បារម្ភថា ភាពផ្អែមរបស់វានឹងក្លាយទៅជាដុំខ្លាញ់ប្រមូលសន្សំក្នុងរាងកាយនៅពេលក្រោយឡើយ។

ក្រៅពីបញ្ចុះទម្ងន់ហើយ លទ្ធផលបន្ទាប់បន្សំមួយទៀតដែលបានពីផ្លែស្រកានាគដែលនារីៗយើងមិនគួរខកខានដូចគ្នាដែរនោះគឺស្រកានាគជាផ្លែឈើមួយប្រភេទទៀតដែលមានវីតាមីន E ខ្ពស់ខ្លាំងណាស់ ដូច្នេះទើបវាជួយថែបំប៉នស្បែកផង ហើយថែមទាំងជំរុញក្រពេញទឹកដោះសម្រាប់ស្ត្រីដែលទើបតែប្រសូតបុត្ររួចទៀតផង។

7/ ផ្លែគីវី

ជាផ្លែឈើដ៏ពេញនិយមមួយទៀតរបស់នារីៗដែលប្រាថ្នាបញ្ចុះទម្ងន់ ព្រោះគីវីជាផ្លែឈើដែលមានកាកសរសៃច្រើនជាងផ្លែប៉ោម និងក្រូចដល់ទៅ25%ឯណោះ ធ្វើឱ្យមានអារម្មណ៍ឆាប់ឆ្អែត និងឆ្អែតបានយូរ ថែមទាំងមានវីតាមីន C និងវីតាមីន E ខ្ពស់ ដែលនឹងជួយឱ្យស្បែក និងសាច់ភ្លឺថ្លា ជួយប្រឆាំងអនុមូលឥស្សរៈ បញ្ចុះកូលេស្តេរ៉ូលក្នុងឈាម បំប៉នកោសិកាគ្រាប់ឈាមឱ្យរឹងមាំ និងជួយរំលាយខ្លាញ់ក្នុងឈាមទៀតផង។ អ្នកណាដែលចូលចិត្តទទួលទានផ្លែគីវីនឹងទទួលបានប្រយោជន៍ពីផ្លែគីវីច្រើនយ៉ាងណាស់។

8/ ក្រេបហ្វ្រុត

Grapefruit with a half and leaves on white background

ជាកំពូលផ្លែឈើដៃអ៊ែតដែលកំពុងពេញ-និយមបំផុត ព្រោះកាលពីពេលថ្មីៗនេះ អ្នកស្រាវជ្រាវនៅសហរដ្ឋអាមេរិកបានរកឃើញថា ការទទួលទាន “ក្រេបហ្វ្រុត” ពាក់កណ្ដាលផ្លែមុនពេលបាយ នឹងជួយឱ្យទម្ងន់ខ្លួនថយចុះបានយ៉ាងមិនគួរឱ្យជឿ ដោយវាអាចបញ្ចុះបរិមាណកាឡូរីបានដល់ទៅ150កាឡូរីក្នុងមួយថ្ងៃ ហើយថែមទាំងក្នុងក្រេបហ្វ្រុតពាក់កណ្ដាលផ្លែនោះមានកាឡូរីត្រឹមតែ39កាឡូរីតែប៉ុណ្ណោះទៀតផង។

ចង់ស្គម ចង់ស្អាត នារីៗយើងត្រូវតែកុំខកខានក្នុងការភ្លក្សរសជាតិផ្លែឈើបញ្ចុះទម្ងន់ទាំង8ប្រភេទដែលយើងបាននាំយកមកផ្ញើជូនដូចខាងលើនេះឱ្យសោះ ណា៎ចា៎ស!៕

January 22, 2018

Category: សង្គម និងសេដ្ឋកិច្ច