អង្ករកំពុងក្លាយជាទំនិញកសិកម្មតែមួយមុខគត់ដែលនាំមកនូវប្រាក់ចំណេញខ្លះក្នុងការជួយរួមចំណែកដល់កំណើនសេដ្ឋកិច្ចរបស់កម្ពុជា ខណៈផលិតផលកសិកម្មដទៃទៀតកំពុងប្រឈមនឹងការលំបាកដ៏ខ្លាំងក្នុងអំឡុងពេលក្រោយៗនេះ។
ប្រទេសចិនដែលមានប្រជាជនច្រើនជាងគេបំផុតលើពិភពលោក បានបញ្ជាទិញផលិតផលអង្ករពីកម្ពុជារហូតដល់ 30ម៉ឺនតោននៅក្នុងឆ្នាំ2018នេះ ដោយមានកំណើនរហូតដល់ 10ម៉ឺនតោន ធៀបនឹងកូតាឆ្នាំ2016 និង2017កន្លងទៅ ដែលមានត្រឹមតែ 20ម៉ឺនតោនប៉ុណ្ណោះ ស្របពេលដែលទីផ្សារអង្ករកម្ពុជាហាក់កំពុងប្រឈមខ្លាំងនៅតំបន់អឺរ៉ុប។
អនុស្សរណៈយោគយល់គ្នាស្តីពីពាណិជ្ជកម្មអង្ករ ត្រូវបានចុះហត្ថលេខារវាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោកអុី ស៊ីប៉ ប្រធានក្រុមហ៊ុនសាជីវកម្មនាំចេញ-នាំចូលផ្នែកធញ្ញជាតិ ប្រេងឥន្ធនៈ និងចំណីអាហារ (COFCO)ដើម្បីនាំចូលអង្កររហូតដល់ 30ម៉ឺនតោនពីប្រទេសកម្ពុជាក្នុងឆ្នាំ2018នេះទៅកាន់ប្រទេសចិន។
ការសន្យានាំចូលផលិតផលអង្ករពីប្រទេសកម្ពុជាដោយបង្កើនចំនួនកូតាជាបន្តបន្ទាប់ គឺជាឱកាសសម្រាប់ផលិតផលអង្ករកម្ពុជាក្នុងការពង្រីកទីផ្សារទៅកាន់ប្រទេសដែលមានប្រជាជនច្រើនជាងគេក្នុងពិភពលោកមួយនេះ ហើយក៏ជាឱកាសបង្កើននូវជញ្ជីងពាណិជ្ជកម្មឱ្យកាន់តែមានភាពប្រសើរជាងមុនសម្រាប់ផលិតផលនាំចេញរបស់កម្ពុជា ខណៈដែលប្រទេសទាំងពីរមានគម្លាតពាណិជ្ជកម្មរហូតដល់ជិត 4ពាន់លានដុល្លារអាមេរិក។
ក្នុងឆ្នាំ2017 កន្លងទៅ កម្ពុជាបាននាំចេញអង្ករទៅកាន់ទីផ្សារចិនជាង 21ម៉ឺនតោន ហើយចំនួនកូតាថ្មីសម្រាប់ឆ្នាំថ្មី2018នេះនឹងបង្កើនឱកាសដល់រោងម៉ាស៊ីន និងកសិកររបស់កម្ពុជាបន្ថែមទៀត។ នេះបើតាមការលើកឡើងរបស់សហព័ន្ធស្រូវអង្ករកម្ពុជា ក្រោយការចុះហត្ថលេខារបស់ភាគីកម្ពុជានឹងសាធារណរដ្ឋប្រជាមានិតចិន។
កាលពីថ្ងៃទី15 ខែមករា កន្លងទៅនេះ ក្រសួងពាណិជ្ជកម្មបានរៀបចំជំនួបពិភាក្សាការងារជាមួយប្រធានផ្នែកកិច្ចសហប្រតិបត្តិការបច្ចេកទេស និងក្របខ័ណ្ឌសមាហរណកម្មនៃសន្និសីទអង្គការសហប្រជាជាតិស្តីពីពាណិជ្ជកម្ម និងអភិវឌ្ឍន៍ (UNCTAD) ដើម្បីពិភាក្សាអំពីការធ្វើពាណិជ្ជកម្មអង្ករទៅកាន់ទីផ្សារនៃសហភាពអឺរ៉ុប បន្ទាប់ពីមានការតវ៉ារបស់ប្រទេសអុីតាលី ដើម្បីកំណត់កូតានាំចូលអង្ករពីប្រទេសកម្ពុជា ក៏ដូចជាប្រទេសមួយចំនួនទៀតតាមរយៈប្រព័ន្ធអនុគ្រោះពន្ធ EBA (Everything But Arms) ដែលអនុញ្ញាតឱ្យទំនិញអង្កររបស់កម្ពុជារួចពន្ធនាំចូលរហូតដល់ជាង 100ដុល្លារក្នុងមួយតោន។
ក្នុងជំនួបពិភាក្សាដោយមានវត្តមានឯកឧត្តម វ៉ា រុតសាន្ត ប្រធានក្រុមទីប្រឹក្សាក្រសួងពាណិជ្ជកម្ម ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា និងលោក Stefano INAMA ប្រធានផ្នែកប្រតិបត្តិការបច្ចេកទេស និងផ្នែកលើកកម្ពស់គម្រោងសមាហរណកម្មពាណិជ្ជកម្ម និងភាពក្រីក្រនៃ UNCTAD។ ជំនួបនេះត្រូវបានរៀបចំឡើងដើម្បីពិភាក្សាលើការឆ្លើយតបចំពោះការតវ៉ារបស់ប្រទេសអុីតាលីដែលតែងស្នើឱ្យគណៈកម្មការអឺរ៉ុបប្រើប្រាស់វិធានការការពារ(Safeguard Measures) ក្នុងការទប់ស្កាត់ការនាំចូលអង្ករពីប្រទេសកម្ពុជា។
នៅក្នុងកិច្ចប្រជុំនោះ លោក Stefano INAMA បានពន្យល់លម្អិតអំពីស្ថានភាពដាំដុះនៅប្រទេសអុីតាលី និង មូលហេតុធ្លាក់ថ្លៃអង្ករនៅក្នុងប្រទេសអុីតាលី ដែលនាំទៅដល់ការតវ៉ានោះ។ ជាមួយគ្នានោះ លោកក៏បានបង្ហាញឱ្យឃើញថា ការនាំចេញអង្ករពីកម្ពុជាទៅកាន់ប្រទេសអុីតាលីក៏បានថយចុះ 51តោន ចន្លោះឆ្នាំ 2015 / 2016 និងឆ្នាំ2016 / 2017 ពី 320តោន មកនៅត្រឹម 269តោន។
លោក Stefano INAMA បានស្នើឱ្យភាគីកម្ពុជាគោរពឱ្យបានខ្ជាប់ខ្ជួននូវលក្ខខណ្ឌតម្រូវនានារបស់សហភាពអឺរ៉ុប ដើម្បីចៀសផុតពីការកំណត់កូតាសម្រាប់អង្ករពីប្រទេសកម្ពុជា។
យោងតាមទិន្នន័យនាំអង្ករចេញក្នុងឆ្នាំ2017 អង្កររបស់កម្ពុជាត្រូវបាននាំទៅកាន់ទីផ្សារតំបន់អឺរ៉ុបស្មើនឹង 43% ដែលមានបរិមាណ 275.557 តោន នៃការនាំចេញសរុបទៅកាន់ទីផ្សារពិភពលោកទាំង 63ប្រទេស។
ឯកឧត្តម វ៉ា រុតសាន្ត ប្រធានក្រុមទីប្រឹក្សាក្រសួងពាណិជ្ជកម្ម បានបញ្ជាក់ប្រាប់ដល់អ្នកជំនាញការ UNCTAD ថា សហព័ន្ធស្រូវអង្ករកម្ពុជាបានចុះបញ្ជីវិញ្ញាតកម្ម (Certification Mark) (ម្លិះអង្គរ Malys Angkor) ក្នុងនាមសហព័ន្ធសម្រាប់ការប្រើប្រាស់ទៅថ្ងៃអនាគត ដែលជាការបញ្ជាក់ថា គុណភាពអង្ករកម្ពុជា នឹងត្រូវបានធានានៅលើទីផ្សារអន្តរជាតិ ដែលជាផ្នែកនៃការអនុវត្តតាមការចង់បានរបស់គណៈកម្មការអឺរ៉ុប៕
