សង្គម និងសេដ្ឋកិច្ច - La Reine Media

អ្នកចាំទីរបស់ក្លឹប Sevilla ចាប់បោកផ្ដួលអ្នកគាំទ្រនៅពេលកំពុងប្រកួត

(ហូឡង់) – បន្ទាប់ពីត្រូវដាល់មួយដៃចំផ្ទៃមុខនៅពេលក្រុម Sevilla កំពុងប្រកួតនៅ Europa League អ្នកចាំទី Marko Dmitrovic ក៏បានបោកផ្ដួលបុរសជាអ្នកគាំទ្រម្នាក់ដែលបានចូលទៅខាងមុខទី កាលពីព្រលប់ថ្ងៃទី 23 កុម្ភៈ។

នៅនាទីទី 90 ពេលក្រុមម្ចាស់ផ្ទះ PSV (Philips Sport Vereniging) ត្រូវការ 2 គ្រាប់បន្ថែមទៀតដើម្បីចៀសវាងត្រូវជម្រុះ ស្រាប់តែបុរសជនជាតិហូឡង់ម្នាក់ចុះទៅដល់ទីលានប្រកួត និងរត់ទៅកាន់ Dmitrovic ពីខាងក្រោយ។ ពេលនោះ អ្នកចាំទីជនជាតិស៊ែប៊ី មិនបានចាប់អារម្មណ៍ ដោយសារតែកំពុងតាមដានបាល់។ អ្នកគាំទ្រម្នាក់នេះក៏ចាប់ជាប់អាវ និងដាល់មួយដៃទៅលើផ្ទៃមុខអ្នកចាំទីរបស់ក្រុមភ្ញៀវ Sevilla។ Dmitrovic ក៏បានដាល់តបត ហើយចាប់បោកផ្ដួល និងសង្កត់អ្នកគាំទ្ររូបនេះរហូតដល់បុគ្គលិកសន្តិសុខមកដល់។

អ្នកគាំទ្រនេះត្រូវបាននាំខ្លួនចេញទៅក្រៅ។ ការប្រកួតក៏ត្រូវបានបន្តក្រោយពីផ្អាកពីបីនាទី។ PSV ក្រោយមកក៏រកបាន 1 គ្រាប់ទៀត ហើយក៏ឈ្នះ 2-0 នៅជើងទីពីរ ប៉ុន្តែត្រូវចាញ់សរុប 2-3។ ដូច្នេះ PSV ក៏ត្រូវអង្គុយមើល Sevilla ឡើងទៅកាន់វគ្គ 1/8 នៅ Europa League។

Dmitrovic ទទួលបានការបណ្ដុះបណ្ដាលពីក្លឹប Red Star Belgrade ហើយធ្លាប់លេងបាល់នៅហុងគ្រី និងអង់គ្លេស មុនពេលទៅកាន់អេស្ប៉ាញ។ គាត់គឺជាអ្នកចាំទីលេខមួយរបស់ Eibar នៅ La Liga អំឡុងឆ្នាំ 2017-2021 តែក្រោយមកក៏បានក្លាយជាអ្នកចាំទីបម្រុងរបស់ Sevilla។

https://www.youtube.com/watch?v=BXh0HT0p4BY

February 24, 2023

អ៊ីនធើណិតផ្កាយរណបរបស់មហាសេដ្ឋី Elon Musk មកដល់កម្ពុជាក្នុងឆ្នាំនេះ

សេវាកម្មអ៊ីនធើណិតផ្កាយរណប Starlink ដែលមានតម្លៃប្រហែល 49 ដុល្លារអាម៉េរិក/ខែ ចាប់ផ្ដើមផ្គត់ផ្គង់តាំងពីម្សិលមិញ (22 កុម្ភៈ) នៅហ្វ៊ីលីពីន ហើយគ្រោងនឹងផ្គត់ផ្គង់នៅកម្ពុជា និងប្រទេសមួយចំនួនទៀតនៅអាស៊ីអាគ្នេយ៍ចាប់ពីឆ្នាំ 2023 នេះ។

«Starlink បានមានវត្តមាននៅហ្វ៊ីលីពីន» គណនី Twitter របស់ SpaceX បានបង្ហោះសារជាភាសាក្នុងស្រុកមួយឃ្លាដូច្នេះកាលពីរសៀលថ្ងៃទី 22 កុម្ភៈ។ មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk ក៏បានចែករំលែកបន្តសារនេះផងដែរ។

នៅក្នុងផែនទីផ្គត់ផ្គង់សេវាអ៊ីនធើណិត Starlink ហ្វ៊ីលីពីនគឺជាប្រទេសដំបូងនៅអាស៊ីអាគ្នេយ៍ដែលត្រូវបានពង្រាយសេវាកម្មនេះ។ ចំណែកប្រទេសកម្ពុជា ម៉ាឡេស៊ី ព្រុយណេ សិង្ហបុរី និងឥណ្ឌូណេស៊ី ក៏គ្រោងនឹងមានសេវាអ៊ីនធើណិត Starlink នៅក្នុងឆ្នាំនេះ ខណៈឡាវនឹងមាននៅឆ្នាំក្រោយ។ ដោយឡែក ប្រទេសថៃ និងវៀតណាម ពុំទាន់ឃើញមានការកំណត់ពេលវេលាជាក់លាក់នៅឡើយ។

ដើម្បីប្រើប្រាស់អ៊ីនធើណិត Starlink អតិថិជននៅហ្វ៊ីលីពីនត្រូវទិញឧបករណ៍ចាប់រលកសញ្ញាតម្លៃ 29,320 ប៉េសូ (ប្រហែល 532 ដុល្លារអាម៉េរិក) និងថ្លៃសេវាអ៊ីនធើណិតប្រចាំខែ 2,700 ប៉េសូ (49 ដុល្លារ) ក្នុងមួយខែ។ ល្បឿននៃការទាញយកទិន្នន័យដោយប្រើប្រាស់អ៊ីនធើណិត Starlink ស្ថិតក្នុងចន្លោះពី 50 ទៅ 200 Mbps៕

February 23, 2023

រថយន្តអគ្គិសនី PHEV Peugeot 408 2023 ជិតបង្ហាញខ្លួននៅប្រទេសថៃ

បន្ទាប់ពីសង្ហបុរី ប្រទេសថៃនឹងក្លាយជាទីផ្សារទីពីរនៅអាស៊ីអាគ្នេយ៍ដែលទទួលយករថយន្តហាយប្រីដ SUV កូនកាត់ Coupe តម្លៃទាប Peugeot 408 2023។

រថយន្ត Peugeot 408 2023 ដែលគ្រោងនឹងបង្ហាញវត្តមាននៅប្រទេសថៃនេះនឹងជាប្រភេទកូនកាត់អគ្គិសនី-សាំង PHEV ដែលសន្សំសំចៃសាំងបានច្រើន។ បច្ចុប្បន្ន Peugeot 408 2023 មានកំណែ PHEV ចំនួនពីរផ្សេងគ្នាគឺ Peugeot 408 Hybrid 180 e-EAT8 2023 និង Peugeot 408 Hybrid 225 e-EAT8 2023។

រថយន្ត Peugeot 408 Hybrid 180 e-EAT8 2023 មានម៉ាស៊ីនសាំង 1.6 លីត្រ 4 ស៊ីឡាំង កម្លាំង 150 សេះ។ម៉ាស៊ីននេះភ្ជាប់ជាមួយនឹងម៉ូទ័រអគ្គិសនីកម្លាំង 110 សេះ រួមនឹងបណ្ដុំថ្មលីចូម (lithium-ion) 12.4 គីឡូវ៉ាត់ម៉ោង។ ជាសរុប រថយន្ត Peugeot 408 Hybrid 180 e-EAT8 2023 មានកម្លាំង 180 សេះ។

ចំណែករថយន្ត Peugeot 408 Hybrid 225 e-EAT8 2023 វិញ គឺវាប្រើប្រាស់ម៉ាស៊ីនសាំងដូចកំណែទីមួយ តែមានកម្លាំង 180 សេះ ហើយបើបូកនឹងម៉ូទ័រអគ្គិសនីទៀត នោះវាមានកម្លាំងសរុបឡើងដល់ 225 សេះ។

រថយន្តកូនកាត់សាំង-អគ្គិសនី ប្រភេទ SUV-Coupe ទាំងពីរខាងលើនេះសុទ្ធតែអាចប្រើឆ្នាំងបញ្ចូលថាមពល AC 7.4 គីឡូវ៉ាត អនុញ្ញាតឱ្យបញ្ចូលអគ្គិសនីមួយពេញប្រើពេលតែ 1 ម៉ោង និង 55 នាទីប៉ុណ្ណោះ៕

February 23, 2023

គម្រោងបង្កើតរោងចក្រថ្មីចំនួនបីនៅកម្ពុជា មានទុនសរុបជាង 17 លានដុល្លារ ទទួលបានការចុះបញ្ជី

គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួនបី ដែលមានទុនវិនិយោគសរុប ប្រមាណ 17.6 លានដុល្លារអាម៉េរិក និងអាចបង្កើតការងារបានជាង 4,400 កន្លែង។

ក្នុងការវិនិយោគថ្មីនេះ មានគម្រោងពីរស្ថិតនៅក្នុងខេត្តកំពង់ស្ពឺ និងមួយស្ថិតក្នុងខេត្តតាកែវ៖

គម្រោង PENGJIAO (CAMBODIA) INDUSTRIAL CO., LTD នឹងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិសំរោង ឃុំសូភី ស្រុកបាទី ខេត្តតាកែវ ក្នុងទុនវិនិយោគប្រមាណ 7 លានដុល្លារអាម៉េរិក និងអាចបង្កើតការងារបានចំនួន 3,258 កន្លែង។

គម្រោង ZHONG SHAN TENG FEI (CAMBODIA) PACKAGING MATERIAL CO., LTD គ្រោងនឹងបង្កើតរោងចក្រផលិតសម្ភារៈវេចខ្ចប់ ដែលមានទីតាំងវិនិយោគស្ថិតនៅភូមិទួលសំបូរ ឃុំដំណាក់រាំង ស្រុកឧដុង្គ ខេត្តកំពង់ស្ពឺ ក្នុងទុនវិនិយោគប្រមាណ 5.5 លានដុល្លារអាម៉េរិក និងអាចបង្កើតការងារបានចំនួន 1,076 កន្លែង។

គម្រោង SSH CB SUSTAINABLE FASHION CO., LTD គ្រោងនឹងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិព្រៃសាលា ឃុំរលាំងគ្រើល ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 2,148 កន្លែង។

February 23, 2023

ដើម្បីភរិយានិងកូន Messi មានការសម្រេចចិត្តសំខាន់ស្ដីពីក្លឹបអនាគត

នៅក្នុងស្ថានភាពដែលកិច្ចព្រមព្រៀងជាមួយក្លឹប PSG នឹងត្រូវអស់សុពលភាពនៅចុងរដូវកាលនេះ Lionel Messi នឹងត្រូវប្រញាប់សម្រេចចិត្តក្នុងការជ្រើសរើសក្រុមបាល់ទាត់អនាគត។

Messi កំពុងស្ថិតក្នុងដំណាក់កាលចុងក្រោយនៃកិច្ចសន្យាដែលបានចុះហត្ថលេខាជាមួយក្លឹបបារាំង PSG កាលពីឆ្នាំ 2021។ ដំណើរការនៃការពន្យារសុពលភាពបានឈានចូលដល់ដំណាក់កាលសំខាន់ ដែលបានចាប់ផ្ដើមការចរចាកាលពីដើមខែនេះ ប៉ុន្តែមិនទាន់បានជោគជ័យ។

នេះក៏ជាពេលដែល Messi អាចចរចាជាមួយក្លឹបដទៃដោយសេរី។ ចំណែកបណ្ដាក្លឹបក៏មានឱកាសច្រើនក្នុងការ «ចាប់យក» កំពូលតារាបាល់ទាត់ពិភពលោកនេះ។ យោងតាមប្រភពព័ត៌មាននៅអឺរ៉ុប មិនត្រឹមតែក្លឹបចាស់ Barca នោះទេ ក្លឹបជាច្រើនក្រៅអឺរ៉ុប មានដូចជា Inter Miami (សហរដ្ឋអាម៉េរិក) របស់ Beckham ឬ Al Hilal (អារ៉ាប៊ីសាអូឌីត) ជាដើម ក៏កំពុងចាប់អារម្មណ៍លើ Messi។

ទោះជាយ៉ាងណាក៏ដោយ ថ្មីៗនេះ ប្រភពព័ត៌មានដែលស្និទ្ធនឹង El Pulga (Messi) បានបញ្ជាក់អំពីបញ្ហានេះ។ ជាក់ស្ដែង អ្នកយកព័ត៌មាន Gaston Edul របស់ TyC Sport Argentina ជាអ្នកធ្លាប់សម្ភាសជាមួយ Messi ជាញឹកញាប់ បានឱ្យដឹងថា លទ្ធភាពដែលថា M10 នឹងចាកចេញពីអឺរ៉ុប គឺជាមានកម្រិតទាបណាស់។

Edul ជឿថា Messi នឹងជ្រើសរើសតែ PSG ឬ Barca ប៉ុណ្ណោះ។ ដោយសារកត្តាគ្រួសារ Messi នឹងមិនទៅទាត់ឱ្យក្លឹបនៅខាងក្រៅអឺរ៉ុបឡើយ។ ជាងនេះ អំឡុងពេលបច្ចុប្បន្ន ក្រុមអ្នកគ្រប់គ្រងរបស់ Messi ក៏ចរចាជាមួយតែក្លឹប PSG ប៉ុណ្ណោះ ខណៈដែល Barca មិនធ្លាប់មានសំណើចរចាជាផ្លូវការណាមួយឡើយ។

ថ្វីបើមានពាក្យចចាមអារ៉ាមស្ដីពីទំនោរចាកចេញពីប៉ារីសនៅចុងរដូវកាល ប៉ុន្តែបើគិតជារួម ការស្ថិតនៅ PSG ទំនងជាល្អបំផុតសម្រាប់ Messi។ ព្រោះថា PSG សន្យាថានឹងរក្សាប្រាក់បៀវត្សរ៍ 41 លានអឺរ៉ូ/រដូវ សម្រាប់កីឡាកររូបនេះ។ សំខាន់ជាងនេះ គឺថា គ្រួសាររបស់ M10 ក៏កំពុងមានសុភមង្គល និងរស់នៅយ៉ាងរីករាយជាមួយជីវភាពនៅប្រទេសបារាំង៕

February 23, 2023

ក្រុមហ៊ុនថ្មីមួយចង់ធ្វើឱ្យឥណ្ឌាទៅជាកន្លែងផលិតរថយន្តអគ្គិសនីធំជាងគេលើលោក

ក្រុមហ៊ុនមួយដែលមានដើមកំណើតពីភ្នាក់ងារហៅរថយន្តតាក់ស៊ីកំពុងរៀបផែនការដើម្បីផលិតរថយន្តអគ្គិសនី និងម៉ូតូអគ្គិសនី ក្នុងទ្រង់ទ្រាយធំនៅឥណ្ឌា។

យោងតាម Bloomberg ក្រុមហ៊ុន Ola Electric Mobility មានគម្រោងសាងសង់ «មជ្ឈមណ្ឌលរថយន្តអគ្គិសនីធំបំផុតលើលោក» ដោយមានទុនវិនិយោគ 76.1 ពាន់លានរូពី (ប្រហែល 918.3 ពាន់លានដុល្លារអាម៉េរិក)។

ក្នុងប្រកាសកាលពីពេលថ្មីៗនេះ Ola ឱ្យដឹងថា មជ្ឈមណ្ឌលនេះនឹងមានទំហំប្រហែល 809 ហិកតា នៅក្នុងរដ្ឋ Tamil Nadu ភាគខាងត្បូងប្រទេសឥណ្ឌា។ នេះនឹងក្លាយជាកន្លែងផលិតម៉ូតូអគ្គិសនី រថយន្តអគ្គិសនី និងថ្មផ្ទុកថាមពលសម្រាប់យានយន្តអគ្គិសនី។ ក្រៅពីនេះ មជ្ឈមណ្ឌលខាងលើក៏នឹងមានឧទ្យាន និងផ្ទះសម្រាប់កម្មករស្នាក់នៅផងដែរ។ ក្រុមហ៊ុនឥណ្ឌានេះគ្រោងនឹងផលិតទ្រង់ទ្រាយធំនូវថ្មផ្ទុកថាមពលសម្រាប់រថយន្តអគ្គិសនីចាប់ពីចុងឆ្នាំនេះ។

ក្រៅពី Ola នៅមានក្រុមហ៊ុន Reliance Industries របស់មហាសេដ្ឋី Mukesh Ambani និងក្រុមហ៊ុន Rajesh Exports ជាដើមក៏នឹងទទួលបានអត្ថប្រយោជន៍ទៅតាមកម្មវិធីដែលមានតម្លៃ 2.3 ពាន់លានដុល្លារអាម៉េរិករបស់រដ្ឋាភិបាលឥណ្ឌា ដើម្បីអភិវឌ្ឍថ្មផ្ទុកថាមពលទំនើប។

កាលពីឆ្នាំមុន Ola បានឱ្យដឹងថា ថ្មប្រភេទលីចូម (Lithium-ion) ដំបូងត្រូវបានអភិវឌ្ឍនៅក្នុងមជ្ឈមណ្ឌលផលិតថ្មរបស់ខ្លួននៅ Bengaluru ជាទីដែលក្រុមហ៊ុននេះបានវិនិយោគ 500 លានដុល្លារ។

លោក Bhavish Aggarwal ដែលជាស្ថាបនិកក្រុមហ៊ុន Ola បានបង្ហើបឱ្យដឹងពីគម្រោងចូលរួមក្នុងទីផ្សាររថយន្តអគ្គិសនីកាលពីដើមសប្ដាហ៍នេះ ដើម្បីប្រកួតប្រជែងជាមួយ Tata Group និង Hyundai Motor ឬ Tesla ជាដើម។

អ្នកជំនួញវ័យ 36 ឆ្នាំខាងលើថ្លែងថា Ola កំណត់គោលដៅបញ្ចេញរថយន្តអគ្គិសនីដំបូងនៅរដូវក្ដៅឆ្នាំក្រោយ និងមានតម្លៃក្រោម 50,000 ដុល្លារអាម៉េរិក/គ្រឿង៕

February 23, 2023

ពេលចាកចេញពីក្លឹបបារាំង ម្ចាស់ជើងឯក World Cup 2022 នឹងជ្រើសរើសគោលដៅថ្មីសម្រាប់ការចូលនិវត្តន៍

ពេលចាកចេញពី PSG កីឡាករកំពូលរបស់ពិភពលោក Messi ចង់ទៅទាត់ឱ្យ Inter Miami ហើយចូលនិវត្តន៍នៅទីនេះ។

ក្លឹបបារាំង PSG បច្ចុប្បន្នកំពុងប្រឹងប្រែងបញ្ចុះបញ្ចូល Messi ឱ្យចុះកិច្ចព្រមព្រៀងថ្មី ប៉ុន្តែ យោងតាមទំព័រ L’Equipe ម្ចាស់ជើងឯក World Cup 2022 ពីមួយថ្ងៃទៅមួយថ្ងៃ កាន់តែទោរទន់ទៅរកការចាកចេញពីកីឡដ្ឋាន Le Parc des Princes តាមទម្រង់ដោះដូរដោយសេរីនៅរដូវក្ដៅឆ្នាំ 2023 នេះ។

បច្ចុប្បន្ន ក្រៅពី PSG ក្លឹប Man City, Chelsea និងក្រុមបាល់ទាត់ធំៗមួយចំនួនទៀតនៅអឺរ៉ុប ក៏មានបំណងទិញយកកំពូលតារាបាល់ទាត់ជនជាតិអាហ្សង់ទីនរូបនេះផងដែរ។ ក៏ប៉ុន្តែ ប្រភពព័ត៌មានខាងលើបានអះអាងថា Lionel Messi ចង់ទៅទាត់ឱ្យ Inter Miami ហើយចូលនិវត្តន៍នៅទីនេះ ជាជាងការបន្តទាត់ឱ្យ PGS ឬក្លឹបដទៃទៀត៕

February 22, 2023

មតិចម្រូងចម្រាសស្ដីពីការស្លាប់របស់តួអង្គ Jack ក្នុងរឿង «Titanic» នៅតែបន្តកើតមាន

អ្នកដឹកនាំរឿងរបស់ «Titanic» បានទទួលស្គាល់ថា តួអង្គ Jack អាចនៅមានជីវិត បន្ទាប់ពីបានបង្កើតឡើងវិញនូវស្ថានការណ៍ដូចទៅនឹងឈុតឆាកក្នុងខ្សែភាពយន្ត។

យោងតាមទំព័រ Complex ការជជែកគ្នាអំពីការស្លាប់របស់ Jack បានអូសបន្លាយពេលពេញ 25 ឆ្នាំ ធ្វើឱ្យអ្នកដឹករឿង James Cameron ត្រូវចេញមុខបកស្រាយជាច្រើនលើក។ កាលពីឆ្នាំ 2019 លោក James បានប្រាប់ទំព័រ The Toronto Sun ថា ការស្លាប់របស់ Jack (សម្ដែងដោយ Leonardo DiCaprio) គឺជា «ជម្រើសសិល្បៈ» មិនទាន់ទងនឹងកត្តារូបវិទ្យាឡើយ។ «គាត់ត្រូវតែស្លាប់។ ដូចទៅនឹង Romeo និង Juliet។ នេះគឺជាភាពយន្តស្ដីពីស្នេហា ការលះបង់ និងការស្លាប់។ ស្នេហាត្រូវបានគណនាដោយការលះបង់» លោក James Cameron ថ្លែងដូច្នេះ។

ក្នុងឱកាសខួប 25 ឆ្នាំនៃការបង្ហាញវត្តមានរបស់ភាពយន្ត Titanic លោក James Cameron បានយល់ព្រមចូលរួមក្នុងការពិសោធអំពីឱកាសនៃការរស់រានមានជីវិតរបស់តួអង្គ Jack។ ដោយមានការចូលរួមរបស់ក្រុមអ្នកស្រាវជ្រាវអំពីឥទ្ធិពលនៃភាពត្រជាក់ទៅលើរាងកាយមនុស្ស ក្រុមផលិតភាពយន្តបានបង្កើតបន្ទះក្ដារអណ្ដែតដូចក្នុងរឿង Titanic និងជួលអ្នកសម្ដែងពីរនាក់ដែលមានអាយុ កម្ពស់ ទម្ងន់ និងស្លៀកពូកដូចទៅនឹង Jack និង Rose ហើយធ្វើត្រាប់តាមសកម្មភាព និងសម្ដីដូចក្នុងភាពយន្តនេះ។

បន្ទាប់ពីបានធ្វើការពិសោធ អ្នកដឹករឿង Titanic លោក James Cameron ទទួលស្គាល់ថា Jack អាចនៅមានជីវិត

ក្នុងការពិសោធដំបូង Jack និង Rose សុទ្ធតែនឹងត្រូវលិចក្នុងទឹក បើសិនឡើងលើបន្ទះក្ដារជាមួយគ្នា។ ក្នុងការពិសោធទីពីរ អ្នកទាំងពីរតោងបន្ទះក្ដារ និងបណ្ដែតខ្លួនមួយកំណាត់នៅលើផ្ទៃទឹក។ James Cameron យល់ថា វិធីនេះមិនអាចទៅរួច ព្រោះពួកគេអស់កម្លាំងទៅហើយក្រោយពីកប៉ាល់បានលិច។ ក្នុងការពិសោធទីបី Rose យកអាវពោងឱ្យ Jack ចំណែកនាងឡើងទៅលើបន្ទះក្ដារ ជួយឱ្យកំលោះនេះរស់បានច្រើនម៉ោងបន្ថែមទៀត។

«ស្ថានភាពរបស់កំលោះនេះនៅល្អ អាចរង់ចាំរហូតដល់ទូកសង្គ្រោះមកដល់។ Jack អាចរស់រានមានជីវិត។ ប៉ុន្តែនឹងនៅមានបញ្ហាជាច្រើនទៀតដែលអាចនឹងកើតឡើង» លោក James Cameron និយាយដូច្នេះ និងបន្តថា Jack អាចនឹងមិនព្រមទទួលយកអាវពោងពី Rose ព្រោះគិតថា «ខ្ញុំនឹងមិនធ្វើអ្វីដែលនាំឱ្យនាងជួបគ្រោះថ្នាក់»។ ក្រោយពីបានទទួលស្គាល់ថា Jack មានលទ្ធភាពអាចរស់រាន លោក James Cameron បញ្ជាក់ថា «ខ្ញុំគួរណាស់តែធ្វើបន្ទះក្ដារតូចជាងនេះ»។

ទិដ្ឋភាព Jack បានស្លាប់ ខណៈ Rose អស់សង្ឃឹម

ក្នុងកម្មវិធី podcast Happy Sad Confused កាលពីចុងឆ្នាំកន្លង ពិធីករ Josh Horowitz បាននិយាយដល់ស្ថានការណ៍ខាងលើជាមួយនឹងតារាសម្ដែង Kate Winslet ដែលបានសម្ដែងជាតួអង្គឯក Rose។ ដោយមានបទពិសោធន៍ច្រើនទាក់ទងនឹងកីឡាមុជទឹកសមុទ្រ ជិះស្គីលើរលកសមុទ្រ អ្នកស្រី Kate Winslet និយាយថា «បើសិនអ្នកដាក់មនុស្សពីរនាក់ឡើងលើបន្ទះក្ដារ វានឹងបាត់បង់តុល្យភាពភ្លាម។ … ខ្ញុំពិតជាមិនជឿថា អ្នកទាំងពីរនឹងនៅមានជីវិត បើសិនឡើងលើបន្ទះក្ដារនោះ។

ឈុតឆាកនៃការស្លាប់របស់តួអង្គ Jack បន្ទាប់ពីកប៉ាល់ Titanic បានលិច

នៅលើបណ្ដាញសង្គម Quora ប្រធានបទស្ដីពី «រឿងរ៉ាវអ្វីខ្លះនឹងកើតឡើងបើសិន Jack មិនស្លាប់ក្នុងហេតុការណ៍លិចកប៉ាល់ Titanic» បានទាក់ទាញមតិរាប់ពាន់លើក។ ទស្សនិកជនជាច្រើនស្រមៃថា គូស្នេហ៍នេះអាចបែកគ្នា ដោយសារ Rose រងសម្ពាធពីគ្រួសារ វណ្ណៈរបស់ពួកគេខុសគ្នាឆ្ងាយ ពិសេសគឺនៅពេល Jack ជាអ្នកក្រ មិនមានប្រាក់មួយសេននៅក្នុងថង់។ ចំណែកទស្សនិកជនខ្លះទៀតជឿថា Rose មិនគប់ខ្សែកដែលមានតម្លៃខ្ពស់ចូលទៅក្នុងសមុទ្រ ប៉ុន្តែពួកគេនឹងលក់វា ហើយអាចរស់នៅជាមួយគ្នា។ ទស្សនិកជនភាគច្រើនយល់ថា បើសិន Jack មិនស្លាប់ ខ្សែភាពយន្តនេះនឹងបាត់បង់អត្ថន័យមួយចំនួន៕

February 22, 2023

អ៊ីនធើណិតផ្កាយរណបរបស់ Elon Musk ពង្រីកសេវាទូទាំងសកលលោក

សេវាកម្មអ៊ីនធើណិតថ្មី Starlink អនុញ្ញាតឱ្យប្រើប្រាស់ដោយភ្ជាប់ជាមួយនឹងផ្កាយរណបនៅស្ទើរតែគ្រប់តំបន់លើពិភពលោក ដោយលក់ក្នុងតម្លៃ 200 ដុល្លារអាម៉េរិក/ខែ។

កាលពីថ្ងៃទី 20 កុម្ភៈ ក្រុមហ៊ុន SpaceX បានឱ្យដឹងថា ខ្លួនបានចាប់ផ្ដើមផ្គត់ផ្គង់សាកល្បងនូវប្រព័ន្ធអ៊ីនធើណិតក្នុងបណ្ដាតំបន់ដែល Starlink មិនទាន់ទៅដល់។ ក្រៅពីកញ្ចប់សេវាកម្មអ៊ីនធើណិតតម្លៃ 200 ដុល្លារ/ខែ អ្នកប្រើប្រាស់ក៏ត្រូវទិញឧបករណ៍ទទួលសញ្ញាអ៊ីនធើណិត Starlink Kit ដែលមានតម្លៃ 599 ដុល្លារអាម៉េរិក។

យោងតាម PCMag ក្រុមហ៊ុន SpaceX បានចាប់ផ្ដើមផ្ញើអ៊ីម៉េលទៅកាន់អតិថិជនគោលដៅដើម្បីអញ្ជើញឱ្យ ប្រើប្រាស់សាកល្បងសេវាអ៊ីនធើណិតថ្មីរបស់ពួកគេ។ ប៉ុន្តែបើយោងតាម The Verge ក្រុមហ៊ុនរបស់មហាសេដ្ឋីអាម៉េរិក Elon Musk មិនទាន់អធិប្បាយលំអិតអំពីអ្វីដែលពួកគេនឹងធ្វើនៅពេលផ្គត់ផ្គង់អ៊ីនធើណិតនៅទូទាំងពិភពលោកនៅឡើយ។ ចំណែកផ្កាយរណបជាច្រើនគ្រឿងរបស់ SpaceX ក៏កំពុងរង់ចាំទទួលលិខិតអនុញ្ញាតដើម្បីផ្គត់ផ្គង់សេវាកម្មនេះនៅក្នុងទីផ្សារផ្សេងៗ មានដូចជា ឥណ្ឌា និងប៉ាគីស្ថានជាដើម។

SpaceX ក៏បានឱ្យដឹងថា អ្នកប្រើប្រាស់អាចនឹងត្រូវបង់ពន្ធ ថ្លៃនាំចូលឧបករណ៍ Starlink Kit បន្ថែមពីលើថ្លៃសេវាអ៊ីនធើណិត និងថ្លៃឧបករណ៍ Starlink Kit នេះផងដែរ។

SpaceX កំពុងផ្គត់ផ្គង់សេវាអ៊ីនធើណិតជម្រើសប្ដូរតំបន់ជាមួយនឹងតម្លៃទាបជាង នោះគឺ Starlink RV ក្នុងនោះអ្នកប្រើប្រាស់ត្រូវចំណាយបន្ថែម 25 ដុល្លារ ក្រៅពីកញ្ចប់ថេរ 110 ដុល្លារ/ខែ។ ក៏ប៉ុន្តែ កញ្ចប់តម្លៃទាបនេះអនុញ្ញាតឱ្យប្រើប្រាស់តែនៅក្នុងប្រទេសដែលអតិថិជនកំពុងរស់នៅប៉ុណ្ណោះ។ ចំណែកកញ្ចប់ប្ដូរតំបន់ទូទាំងពិភពលោកគឺសម្រាប់អ្នកដែលផ្លាស់ទីឆ្លងប្រទេសជាញឹកញាប់ក្នុងរយៈពេលយូរ។

ដំណើរការរបស់ប្រព័ន្ធអ៊ីនធើណិត Starlink របស់ SpaceX

សម្រាប់បណ្ដាប្រទេសនៅក្នុងតំបន់អាស៊ីអាគ្នេយ៍ មានដូចជា ហ្វ៊ីលីពីន សិង្ហបុរី ម៉ាឡេស៊ី និងព្រុយណេ ជាដើម SpaceX គ្រោងនឹងផ្គត់ផ្គង់អ៊ីនធើណិតចាប់ពីឆ្នាំ 2023 នេះ។

យោងតាមគោលការណ៍ប្រទេសមួយចំនួន បើសិន SpaceX ចង់ផ្គត់ផ្គង់អ៊ីនធើណិតនៅប្រទេសណាមួយ ពួកគេនឹងត្រូវមានកិច្ចព្រមព្រៀងពាណិជ្ជកម្មជាមួយក្រុមហ៊ុនណាមួយដែលបានទទួលការអនុញ្ញាតឱ្យផ្ដល់សេវាទូរគមនាគមន៍ក្នុងប្រទេសនោះជាមុន រួមនឹងគោលការណ៍មួយចំនួនផ្សេងទៀត។

គិតត្រឹមពាក់កណ្ដាលឆ្នាំ 2022 SpaceX មានផ្កាយរណប Starlink ប្រហែល 3,500 គ្រឿងកំពុងដំណើរការនៅលើគន្លងគោចរផែនដី និងផ្គត់ផ្គង់អ៊ីនធើណិតដល់អ្នកប្រើប្រាស់ប្រហែល 500,000 នាក់នៅក្នុង 37 ប្រទេសលើពិភពលោក៕

February 21, 2023

ភាពយន្ត «Avatar 2» បំបែកកំណត់ត្រាប្រាក់ចំណូលរបស់ភាពយន្ត «Titanic»

ខ្សែភាពយន្ត «Avatar 2» រកប្រាក់ចំណូលបាន 2.2433 ពាន់លានដុល្លារអាម៉េរិក ច្រើនជាងភាពយន្ត «Titanic» និងក្លាយជាភាពយន្តដែលរកបានប្រាក់ចំណូលពីការលក់សំបុត្រចូលទស្សនាខ្ពស់ជាងគេលំដាប់ទីបីនៅគ្រប់សម័យកាល។

កាលពីថ្ងៃទី 20 កុម្ភៈ Variety បានផ្សាយថា Avatar 2 ឬ Avatar: The Way of Water (អវតា៖ វិថិមហាសាគរ) បានយកឈ្នះលើ Titanic (2.2428 ពាន់លានដុល្លារ) និងបានចូលមកកាន់កាប់តំណែងលំដាប់ទីបីក្នុងចំណោមភាពយន្តដែលមានប្រាក់ចំណូលខ្ពស់បំផុតក្នុងគ្រប់សម័យកាល។ បច្ចុប្បន្ន ភាពយន្ត Avatar 2 កំពុងតាមពីក្រោយ Avatar (2.92 ពាន់លានដុល្លារ) និង Avengers: Endgame (2.7 ពាន់លានដុល្លារ)។

លោក James Cameron បានក្លាយជាអ្នកដឹកនាំរឿងដែលមានខ្សែភាពយន្តចំនួនបីក្នុងចំណោមបួនដែលមានឈ្មោះនៅក្នុងបញ្ជីស្ដីពីភាពយន្តរកបានប្រាក់ចំណូលខ្ពស់ជាងគេ។

ខ្សែភាពយន្ត Avatar 2 ឬ Avatar: The Way of Water (អវតា៖ វិថិមហាសាគរ)

ក្រុមហ៊ុន Disney បានចំណាយប្រាក់ប្រហែល 460 លានដុល្លារដើម្បីផលិត និងឃោសនាឱ្យខ្សែភាពយន្ត អវតា៖ វិថិមហាសាគរ ធ្វើឱ្យវាក្លាយជាមួយក្នុងចំណោមគម្រោងភាពយន្តដែលមានការចំណាយខ្ពស់បំផុតក្នុងប្រវត្តិសាស្ត្រ។ លោក James Cameron ចំណាយពេលប្រហែល 13 ឆ្នាំដើម្បីអភិវឌ្ឍ និងបង្ហើយស្នាដៃរបស់លោក។ Avatar 2 បានចាប់ផ្ដើមបញ្ចាំងនៅរោងភាពយន្តកាលពីខែធ្នូ 2022 និងបាននាំមុខគេក្នុងបញ្ជរលក់សំបុត្រនៅអាម៉េរិកខាងជើងក្នុងរយៈពេល 10 សប្ដាហ៍ជាបន្តបន្ទាប់។

ខ្សែភាពយន្ត «Avatar 2» ដែលជាវគ្គបន្ទាប់របស់ «Avatar» ផលិតកាលពីឆ្នាំ 2009 និយាយអំពី Jake Sully (Sam Worthington) កសាងគ្រួសារថ្មីនៅ Pandora។ ពួកគេរស់ដោយសុភមង្គលជាមួយនឹងកូន 4 នាក់ ក្នុងនោះមាន Kiri (Sigourney Weaver) ដែលជាកូនស្រីរបស់សពបណ្ឌិត Grace Augustine។ ក៏ប៉ុន្តែ ជីវភាពសុខសាន្តរបស់ពួកគេមិនបានអូសបន្លាយពេលយូរឡើយ នៅពេលមនុស្សវិលត្រលប់ទៅសងសឹក។

ខ្សែភាពយន្ត Titanic

ចំណែក Titanic វិញ គឺជាខ្សែភាពយន្តដែលចាប់បញ្ចាំងលើកដំបូងក្នុងឆ្នាំ 1997។ ភាពយន្តនេះត្រូវបានផលិតឡើងដោយយោងទៅតាមហេតុការណ៍លិចកប៉ាល់ទេសចរណ៍មួយកាលពីឆ្នាំ 1912។ Titanic ទទួលបានជោគជ័យខ្លាំងនៅឯបញ្ជរលក់សំបុត្រ និងដណ្ដើមបានពានរង្វាន់ Oscar ចំនួន 11។ គម្រោងភាពយន្តនេះក៏ត្រូវបានដឹកនាំរឿងដោយជនជាតិកាណាដា លោក James Cameron៕

February 21, 2023

Category: សង្គម និងសេដ្ឋកិច្ច